لو يهون الحب قدرك ما يهون..لان عيني غيرك انته ماترى...

سلام عليكم..

شحالكم ...

هاذي القصه انا ناقلتنها وعطوني رايكم ^.^

احم احم عاد ابغي رايكم بعد ما تقرونها

«®°·.¸.•°°·.¸¸.•°°·.¸.•°®»لو يهون الحب قدرك ما يهوني..لان عيني غيرك انته ما ترى«®°·.¸.•°°·.¸¸.•°°·.¸.•°®»

الكاتبة: راعيه الرنج

أكتب لكم هذه القصة التي تدور أحداثها في الإمارات وبالتحديد بين دبي والعين وانشاالله يعجبكم أسلوبي

الجزء الاول
في العين...
وبالتحديد في بيت بوسعيد كانت الريم يالسه في الصالة وتشرب ديو........... الريم( بنت حلوة و حبوبة وخريشة باختصار حركاتها حركات أولاد وفيها شويه دفاشة ولسانها أطول عنها... بس حلوه وخشمها مثل حد السيف وعيونها سود و ناعسات.... وطويله وشوي ضعيفونه وابوها ما يسميها إلا الطويله و الكل يسميها اليابسه وفيها غمازه صغيرونه على خدها اليسار تزيد ويها براءه وهي في الجامعة سنه أولى وياها بنت خالها < عليوه > وهن الثنتين مدمناااااااااات ديو و عقولتهن خمر عمان)

الريم : أوووووووووووف ياربي ملل

حارب : يعني شوتبين أسويبج إنتي كله تقولين ملل ...حارب (ولد أخو الريم ويحب دايما يطفر بعمته بس هوه أصلا ما يقولها عمتي إلا وقت الحايه ومعتبرنها اخته مش عمته ويحبها واايد بس ما يحب يبينلها صح هوه صغير بس تفكيره وحركاته وافعاله افعال كبار ماشاالله عليه )
الريم : حارب دخيلك اسكت عني لونشيتلك بصفعك
حارب : انتي تصفعيني ...تخسين
الريم : حــــااااااااااااااااااااااااااارب ؟؟؟!!!
حارب : خيبة ... خيبة عصبت الشرررررررردة
خطف حارب يركض والريم وراه تبى تكفخة... ماحست بعمرها ولا هي طايحة على الأرض ..
الريم : آآآآيييييييي
سعيد : ماتشوفين العيون عندج سبير ...سعيد( أخو الريم الكبير وسعيد ريال عصبي ما عنده 1 ولا 2 يعني يوم يعصب خوزي عنه ومتزوج بنت عمه اليازية وعنده ولد وبنت حارب وعمره 12 وبنت صغيرونه واسمها مزنه مسمينها على ام اليازيه الله يرحمها)
الريم : حشى مب جسم عليك يدار اسمنت
حارب كان منخش ورا أبوه
سعيد : وبعدين ليش يالسة تربعين حد قالج مخلين البيت حق المرثون
الريم : ههههههه ضحكتني وأنا ماريد أضحك...
حارب : يحليلها.. يحليلها طاحت
الريم : حلك حلوول قول آمين ...وبعدين جب إنته لا ترمس وما عليه دواك عندي
سعيد : ليش شو سوابج؟؟؟
الريم : اسأل ولدك الطفس.. البايخ..إلي ما عرفت تربيه.. السباااال..الحـ
وقبل ما تكمل رمستها ما حست إلا بذاك الكف على ويها
وفجأة الكل سكت والريم منصدمة وعيونها منترسات دموع ومحطية يدها على ويها وسعيد مغيض من الريم ورمستها عن ولده ومابرد غيضه إلا بذاك الكف المحترم وحارب منصدم ومغيض من أبوه في نفس الوقت لأن أول مرة يضرب عموته وحارب ما تهون عليه حد يضربها صح انه يطفربها بس هذا لأن من زود ما يحبها...
بعد فترة صمت تفرقوا ...
ربعت الريم حجرتها وتمت داعسة ويها بين المخاد أما سعيد ركب سيارته وشخطها عند ربعة أما حارب متلوم وماعارف شويسوي لأن هوه السبب فالي صار..
بشرحلكم كيف بيت بوسعيد...
طبعا فيلا طابقين وحوووش واسع عشان يوم يفكر سعيد يبني برا الفيلا يعني حق مستقبل عيالة...أما الطابق الأول(الأرضي) مقسوم حق بو سعيد وام سعيد وعيالهم اليهال (خلوف 5 سنوات وودوم 7 سنوات)
والطابق الثاني مقسوم قسمين وصاله كبيرة مشتركة طبعا قسم حق سعيد وحرمته اليازية وعيالهم والقسم الثاني حق الريم واختها روضة
جني طولت عليكم وايد المهم....
بعد ما هدت الريم شوي يلست تفكر فالي قالته وعرفت انها تستاهل إلي ياها ...قامت الريم وغسلت ويها وراحت الصالة ويلست تجلب في التلفزيون وحطت حواس كانت توها اغنية ..حمد وحربي العامري ليش تزعل فديتك لكن عالنهاية يعني خلصت ..الريم بعصبية : خسارة كان خاطري أسمعها....
الريم ما انتبهت أن حارب يالس ويلاعب أخوها خلوف ..نش حارب وسار صوب الريم ...
حارب : عمتي أنا آسف
والريم ما عبرته وأونها تطالع التفزيون..
حارب : عمتي سمعيني..... احم احم اهداء خاص حقج وبدا يغني
ليش تزعل فديتك ..وانته غالي علينا
ما خذ القلب بيدة .. يالغلا من سنينا
يا منى النفس وينا ..صوبنا يالظنينا
ونذر ليوم ريتا ..بصوم لك اشهريينا
ليش تزعل فديتك ..وانته غالي علينا
وسوري ماعرف التكملة....يالشيخة سمحيلي
الريم : مسموح بس إذا عدتها صدق بصفعك ونشت الريم وخاشمت حارب واتراضوا

الساعة 5 العصر ....

الكل متجمعين في الصالة يسولفون
وفجأه رن التلفون واترابعوا اليهال وركض حارب بيشله
الريم : ايه لا تشله أنا بشله
حارب : مب عكيفج
روضة : حشى مستقطعين على التلفون (روضه اخت الريم الكبيره واكبرعنها بسنه هاديه وحلوه ورزينه وحلاله مشاكل البيت يعني دايما اليهال يلجؤولها لأنها عكس الريم إلا تزيد مشاكل اليهال وحشرتهم وكانت هي المسؤوله عن البيت في غياب امها والكل في البيت يعتمد عليها..)
ام سعيد : عيالي خفوا الحس
حارب في خاطره : هذا الرقم مش غريب هيه عرفته ...
حارب : ألوووووووووووووو
.....: ألو مرحبا الساع
حارب: المرحب باااجي .. من الحلوة
الريم وهي مغيضة : يالماصخ عطني السماعة
حارب وهو مخلي ييده على السماعة : بس جب خليني أرمس البنية ...سكتي
حارب : اسمحيلي الشيخة بس وحدة بايخة تبى التلفون...انزين واشحالج واخبارج...
عليوه : بخير وسهاله ممكن تعطيني الريم لو سمحت...( عليوه بنت خال الريم وهي بنت مرحه وحبوبه وما شاء الله عليها فيها جمال يوسفي وكان الكل يحبها من أول نظره وكانت هي والريم مثل الأفكار والحركات تقريبا بس الفرق بينهم ان عليوه جسمها مازر أما الريم أضعف عنها بشوي وهيه والريم سنه اولى في الجامعه )
الريم : سمعت اسمي عطني التلفون ولا والله بخبر عليك سعيد وبقوله يغازل بنات...
حارب : حشى مب أذن عليج... انزين .. انزين....اندوج ...افففففففففف
الريم : اهلين عليوه اشحالج
عليوه : ياويلي ع حروب يسوي حركات شباب كبار
الريم : ما عليج منه ياهل ...المهم واشحالج واخبارج عساج طيبة..
عليوه : الحمد الله زينة ... انزين بغيت أقولج تعالي اليوم عندنا بنفتح النت وبراويج منتدى واااااايد حلو ...بيعجبج...كله مضاربه عالنوادي وانا حاشرتنهم الزعيـــــــــــــم وبس
الريم : اممممممم والله شوقتيني يا حبي للضرايب...انزين لحظه شوي
الريم : امااااااااااااااايه بسير عند عليوه
حارب : لا ما تسيرين ماشي حوااامه منقوووود
الريم : جب انته ما لك شور علي ...امااايه شو قلتي ...
ام سعيد : برااايج رووحي فكينا من صدعتج.....
حارب : لا امايه لا تخلينها ...
اليازيه : بس حارب ما يخصك بعمتك ...( اليازيه هي حرمه سعيد حرمه طيبه وهاديه وهدفها تربي عيالها أحسن تربيه وام سعيد وايد تحبها وترتاحلها )
حارب : ماريد عيل بسير فياها...
الريم : خلاص دخيلك لا تصيح بخليك تروح فياااي هههههاااي
حارب : غصبن عنج بسير..
روضة : ايه ريموووه نسيتي البنت تترياج كلميها
الريم : أووووه نسيتها ...ألو اسمحيلي كله من حروب نسيتج
عليوه : مسموحة بس شو بتين بيتنا
الريم : أكيــــــــد
عليوه : انزين قولي حق رويض عسب تيي فياج
الريم : رويض تقولج عليوه بتروحين فياي عندهم
روضه : لا ما اقدر وراي بروجكت
حارب : قوليلها الشيخ حارب بيروح
الريم : أقول عليوه اوين بيي عندكم بشكارنا حويرب
حارب : طـ ما عليه ريمووه أنا اراويج
عليوه :ههههههههههههههههه خلاص عيل اترياج الساعة 7 أوكيه
لريم : أوكيك يله باي
عليوه : بايات

بعد ما سكرت الريم عن عليوه كانت الساعة ست إلا ثلث وعلى طول راحت الريم المطبخ....
الريم : سوزي سوي ورق عنب أنا يريد يشيل بيت مال بابا راشد
سوزي : انزين ماما
خلوف : سوزي أليد عصيل
سوزي : اوكيه
الريم : سوزي لازم الساعة 7 خلاص ورق عنب
سوزي : اوكيه ماما

بعد ما وصت الريم الخدامه على إلي تباه راحت تتسبح وتتكشخ وبعد ما خلصت نزلت تحت ....
حارب : حشى رايحة عرس مب إلا عند علوووووويه
الريم :جيه اصغر عيالك ولا ربيعتك إلي تلعب وياها في السكة .... البنت اسمها عليا
حارب : عليوه .... علايه ... كله واحد المهم خبرتي الدريول
الريم : لا والله هذا إلي ناقص ... سر انته خبره يطلع السياره وانا بسير اشوف الخدامه إذا خلصت ....

الساعة 7 ركبوا السياره
ركب حارب جدام والريم ورا فيا اليهال خلوف وودوم
حارب : أقول شاكر روح بيت مال بابا راشد
شاكر : أوكيه ارباب
الريم : شاكر شغل المسجل
حارب : لا لا تشغل
الريم : شاكر أقولك شغل ولا بقول حق بابا سعيد يكنسل ويزتك
حارب : خلاص وصلنا لا تشغل
الريم : ما عليه حويرب براويك

الساعة سبع وعشر وصلو لأن أصلا البيت ما بعيد وايد...
في بيت الخال راشد واللي عياله هم .........
عبدالله 24 سنه اخو عليوه الكبير وخاطب بنت عمه عنود متشدد وقل ما يقعد في البيت شغله ماخذ كل وقته لأنه يدير شركة أبوه ويغار على عنود حتى من اليهال
مانع21 سنه حبوب وايد والكل يحبه ومغازلجي درجه أولى وكشخة لأن أصلا كل البنات يتخبلن عليه يوم يشوفنه لان صراحة مزيووووون ومب البنات بس حتى ربعة يتخبلون عليه وعلى سوالفة الحلوه يعني يوم يخطف غصبن عنها العين تفتر صوبه من حلاته
عليوه 19 سنه دلوووووووووووووووعة وايد ودلعها محلنها
وابوها ما يردلها طلب حتى لو تطلب عيونه ................
و فهد 12 سنه وربيع حارب الروح بالروح
وميثه 7سنوات وتقلد عليوه في كل شي في لبسها في طريقه تسريحة قصتها في حركاتها في رمستها في كل شي

المهم أول ما وصلوا قوم الريم .......
سار حارب وخلوف غرفة فهد عسب يلعبون بلاي ستيشن اما ودوم حصلت ميثه ويلسن يلعبن بالعرايس.........
أما الريم معتبره البيت بيتها وراحت المطبخ عسب تحط الصحن...
كان البيت هادي عقولتهم ولا صريخ فهد يلعب سوني فيا حارب وخلوف يشجعهم ...
وميثه تلعب فيا ودوم.... وعبدالله في السوق... وام عبدالله عند امها وابو عبدالله في شغله... وعليوه تتسبح... ومانع يحوط من الغرفه للمكتب للمطبخ .....
كانت الريم في المطبخ وعااااااادي ماخذه راحتها دام انها شافت ان ما في سيايير عيال خالها و ما كانت تعرف ان مانع في البيت وسيارته عند ربيعه وكانت الشيله على الكتف ويالسه تغني بعد .......
الريم تغني :من زمان وانت عن العيون غايب... وبغيابك كم صابتني مصايب...... وش يسلي النفس في بعدك حبيبي........كل دقيقة تمر في قلبي لهايب...(وسكتت)ما عليج عليوووه تقولي تعالي ويلين ألحين ما طلعت أخاف نقعت فيني خيانه وهي رايحة مكان.....
وطول الوقت كان مانع واقف وسمعها يوم غنت ويوم رمست عن عليوه لأن كان ناوي يسوي فيها مقلب لكن ضحكته غلبته ويلس ناقع عليها من الظحك وأول ما سمعت الريم الظحكه تيبست مكانها وخلت إلي في ييدها ولبست شيلتها بسرعة وشردت.....
مانع وهو ناقع من الضحك : عاش الوسمي هههههه اكيد هااذي روضه بنت خالي سعيد أوووف محلاها

في غرفة عليوه....

الريم ملتهب ويهها من الموقف إلي صارلها وعليوه بعدها تتسبح وما خلصت لانها متعوده ان الريم تتأخر دايما ......

في غرفة فهد .....

فهد : وحليله غلبناه حويرب يله خلوف شجعني ....
خلوف : ايوه ..ايوه ... فهوووووووود
فهد : آفاااااا والعنز تيس ...أنا فهد راشد المهيري تقوووولي فهووووووووود ...لا لا يا خلوف صلحها
خلوف : آسف... ايوه الشيخ فهد بيغلب حويرب
فهد : ألحين تعجبني
حارب : ط اوكيه أنا براويك يا خلووف ألحين بغسلكم غسال تخسون انتو تغلبون معالي الشيخ حارب سعيد المنصوري...
مانع : هاه أسمع طاري شيوخ
حارب : هيه والله ولد سعيد محمد المنصوري يعني انا...اقول مانع غريبه وين الفتك مالك ما شفناه
مانع : عند ربيعي لأن سيارته في الصناعيه
حارب : أهااااا أقول تعرف عندي في تلفوني مقطع سيايير يخمسن ....
مانع : عطني اشوف
حارب : خذ
طلع مانع برى الغرفة وهوه يالس يطالع التلفون وفجأه رن
مانع : أووووف تروعت .... ارد ولا ما ارد لا برد بشوف حويرب من يرمس...
الريم : ألووو حروبي دخيلك يله بسرعة دق حق الدريول أريد أرد البيت ...
مانع : ليش بعدكم ما يلستوا توكم ياييين ...
الريم يبست: هذا مش تلفون حارب سعيد المنصوري
مانع : هوه نفسه
الريم : انته من ؟؟؟ وحارب وين
مانع : انا مانع ولد خالج راشد.... صبر صبر لا تسكرين
(( بس الريم ما سوت له سالفة ودفنته في ويهه))
مانع : أووووووف سكرت ... ياالله فديتج يا رويض
طبعا الريم ما عبرت حارب ولا خلوف دقت حق الدريول ويا وشلها ووصلها البيت .....

الساعة ثمان ونص...

طلعت عليوه من غرفتها وكاشخة وريحت دهن العود تفوح منها
ويلست تحوط وتتريا الريم توصل وكانت ماره جدام غرفة فهد....
عليوه : دومها ريمووه تتأخر أففففف
فهد : عليوووه جيه ريمووه من الصبح يايه يمكن في المطبخ....
عليوه : شووووه ؟؟؟
وركظت بسرعة تدورها من المطبخ .....

في المطبخ....

عليوه: غريبه وينها بس اكيد هيه إلي يايبه ورق العنب
مانع : منو تدورين
عليوه زاغت: خس الله بليسك انته متى وصلت
مانع : أصلا أنا ما طلعت .... واذا كنتي تدورين روضه تراها روحت بيتهم .....
عليوه : شوووه ...منوين هاذي الذرابه احيدها رووضوه الينيه
..... تعال بس انته شدراك... رويض قالت انها مب يايه .....
اكيد سويت شي يا منووووووع والله يراويك

مانع في خاطرة: صدق اني غبي يوم سميتها رووضوه الينيه
وهيه بهذا الجمال كله فديتج والله يا رويض...ولا خشمها صدق شيوخي

عليوه: حووووووه وين وصلت.... المهم ما شفت ريمموه إذا يت
مانع: هااااااا شو قلتي
عليوه: شفت ريمووه إذا يت
مانع: لا
مانع في خاطرة(عن لا يكوووون اللي شفتها الريم)

مانع:اووووووف ... بس حلوه
عليوه: مانع شوفيك .... ومنو هاي الحلوة ....اكيد انا صح

راح مانع ما عبر عليوه وهوه يفكر منو اللي شافها اذا هيه الريم ولا روضة

وركضت عليوه صوب التلفون عسب ترمس الريم وتعرف ليش ما يت.....

في غرفة مانع.......

مانع منسدح عالشبريه ومحطي يدينه تحت راسه وسرحان ويفكر .....
مانع في خاطره :أول مره أعرف ان رويض حليوه هالكثر ....
بس ليش قالت عليوه انه روضه مب يايه...معقوله تكون إلي شفتها الريم ....لا لا لا الريم احيدها من زمان ما حلوه وياهله وخريشه ولسانها أطول عنها ولو كانت الريم بترد علي بس لا أكيد هاذي روضــــــــ
ودخلت عليوه على مانع وتقطع عليه حبل افكاره وفز مانع من مكانه وهوه مستغرب من حركة اخته....

مانع : انزين دقي الباب قبل ما تدخلين
عليوه وهيه فاطسه من الضحك: منووووووع شو قلت حق ريمووه

مانع : منوووو........ كانت الريم!!!!!!!...... بس انا ما قلتلها شي

عليوه تستهبل وأونها ما عرفت السالفة: عيل ليش راحت بيتهم من دون ما اشووووفها

مانع: قووووولي حق عمرج اللي قاعده تتسبحين وتكشخين من ساعة ونص اكيد البنت بترووح
ما دام محد مستقبلنها ..... انا يوم شفتها في المطبخ كنت بقووولها اتفضلي.... وبس
وبعدين ليش تضحكين ..شو اللي يضحك ..ضحكيني وياج.....
عليوه:وشو سالفة التلفوووون ؟؟؟؟؟؟
مانع:اهاااااا شكلها هاذي هالريم طاسه مخبوقة.....بس تصدقين والله انها مزيووووونه ولا صوتها عذااااااااااااب......
عليوه : هاااااه منوووع بديت تحب...
مانع : عندج مااااااااااانع
عليوه : لا الريم ......هاااهااااي
مانع : انزين روحوا قوم حارب وخلوف وودوم
عليوه : لا ....
وقف مانع عالشبريه :والله !!!!! عيل بوصلهم
عليوه : طالع الحب شو يسوي ...
وطلع من الغرفة وسار صوب حارب
عليوه :ط انزين صبر بروح فياك
مانع : لا ماشي سيره....

في غرفه فهد....

خلوف : حرووووب اريد ارقد يله نرد البيت...
حارب : انزين شو اسوي دام ان الدريول ما يرد عالتلفووون كله من ريمووه روحت عنا...ألحين شونسوي
فهد : عادي باتو عندنا اليوم .....
حارب : هيه تريد امي تصرطني ....عادي بنروح مشي
كانو مانع وعليوه واقفين عند الباب.............
مانع : أفااااااااا يا حارب ونحن وين.... ألحين بوصلك
عليوه بصوت واطي: حشى هذا كله عشان ....
مانع بصوت واطي:جب لا ترمسين.
حارب : بس سيارتك عند ربيعك...
مانع : لا يابها قبل شوي...
حارب : خلاص أوكيه .. بس ما عليه يا ريمووه براويج
مانع : يله ركبو السياره...لا تتأخرون..يله بسرعه خلوف انته روح ازقر ودوم ........
عليوه : يا عيني على الذرابه .... منوووووعي الشيخ عادي أسير معاكم أريد أراضي ريماني فديتها زعلانه علي..
مانع : عادي... إلا توماتيك ....
عليوه : ههههههههههههه

ركبوا اليهال وعليوه ورا وحارب جدام.......

اما في بيت بوسعيد.....
كانت يالسة في الصالة وهي في عالم ثاني وكانت قاعدة جسد بلا روح تكلم نفسها وتتذكر إلي صارلها في بيت خالها راشد ......
الريم : أووووف ألحين شو بيقول عني ....لا ومالت عاويهي يالسه أغني .....بس ليش كان يضحك .....ومنو هوه أكيد مش عبدالله لأن بس يكون في البيت في الويك اند....ومانع دايما يهييت في السناتر وما يوصل إلا آخر الليل......عن لايكون حد من أهل دبي....لا بس الصراحة مزيوووووووووووون..اااخ ولا شعره خبال
روضة : الريم
والريم سرحااااااااااااانه
روضة : حوووووووووووه ريموووه وين وصلتي
الريم : هاااه
روضة : إلي ماخذ عقلج يتهنااااااابه
الريم : تتنهد .... من متى انتي هنيه؟؟؟
روضة : من زماااااان من أول ما بديتي ترمسين عمرج...
إلا تعالي وين حارب و ودوم وخلوف....
الريم : هاااه ما ادري
وبعد خمس دقايق....


دخلوا حارب وخلوف وودوم......وسيده لا سلام ولا كلام سيدة على شباريهم....
الريم : حشى سلموا عالأقل.......ومنوه يابكم...
وما عبروها....
الريم : ط.. ولا جني أرمسهم.....
الريم : انزين روضوه تقولين منوه يابهم.....
روضة : أكيـــد الدريول
الريم : بس الدريول سار الشيشه...

ودق الجرس ....


روضة : قومي فتحي الباب...
الريم : فتحيه انتي أنا روحي تعبانه...
روضة : وانتي شو متعبنج ...بس قولي عيازه وما فيني أنش...

وقامت روضة تشوف من عند الباب....

روضة: السلام عليكم
عليوه:وينكم عن الجرس...خست عند الباب....
روضة : هلا والله يحيج ما بغيتي تين
عليوه:هلا فيج
ويتوايهن بالخشوم....وطول الوقت مانع يطالعهن من السياره ويضحك عليهن.......
مانع:والله الي يشوفهن يقول شباب مب بنات.......
روضة :قربي داخل .......
عليوه:لا ما اقدر السيارة شغاله .......بس بغيت الريم .......
روضة :ما عليه خلي الدريول يرووووح بعدين نحن بنوصلج
عليوه بخبث : ههههه .... اوكييييه .......بس سيري قوليله .......انا بسير عنج عند الريم .......
روضة :اوكيه الريم في الصاله .....والله مكشخينه دريولهم مركبينه فتك


وسارت عليوه الصاله عسب تراضي الريم .......وروضة سارت عند الدريول مثل ما تظن يحليلها قصت عليها عليوه......
روضة :ايه بابووو فج الدريشه .......تقولك ماما عليـــ....
مانع:اشحالج بنت خالي.....
روضة و ويها احمر من القفطة وراحت تربع حجرتها ومرت على الريم وعليوه مثل الصاروخ والريم تزقرها عسب تقعد معاهم .......
عليوه:ههههههههههههههه
الريم :ليش تضحكين؟؟؟؟؟
عليوه:سويت في اختج مقلب .......
الريم :كيف؟؟؟؟ و رويض ماحد يقص عليها
عليوه:بقووووولج .......سمعي .......

وخبرت عليوه الريم كل شي من اول ما فتحت روضة الباب ألين مادخلت عليوه عند الريم .......
عليوه: وهذي السالفة ....... ههههههههه
الريم : ههههههههه .......حرام عليج الحين بتم تصيح
عليوه:صج ....... الحين برووح اعتذر منها
الريم : ما عليج منها بتزعل شوي وبترضى

اما مانع فقال :اكيد هاذي عليوه مسويه فيها مقلب .......الله يقطع بليسج يا عليووه.......البنت تقفطت ... ههههههههه

عليوه: اسمع هرن برى يمكن منوووووع يتريااااااني
الريم : لا تقوليين بتروحين…
عليوه : لا بروح الساعة 10 ألحين .... المهم مانع يسلم عليج ويقولج سمحيله على إلي صااااار
الريم : في ذمتج كان مانع….
عليوه تهز راسها:يس يس
الريم:اول مره اعرف ان ولد خالي حليوووو ويذبح
عليوه نافخه عمرها:خخخخ من حقه اخته عليووه
الريم:خخخخخخخخ هيه والله من حقه
عليوه:ههههه يله باااو
الريم:عليوه ...
عليوه:عنونها
الريم:فديت عيونج...بس..متاكده انه مانع ما غيره
عليوه: هوه نفسه .... وطاااار من الفرحة يوم قاله حارب انه الدريول ما يرد....عسب هوه يريد يوصلهم ... مسكين عباله انتي بتطلعين حق الجرس......المهم يله بروح واستسمحيلي من روضة ....
الريم : الله يحفظج...
عليوه : ما تبين أوصل رمسه حق حد....
الريم : هاااه لا بس سلمي على أهلج ....
عليوه : وبس؟؟؟؟؟؟؟؟
الريم فاهمه حركاتها:ههههه وسلمي ع دريولكم
عليوه : خخخخخخ أوكـــــــيك... يله تصبحين ع خير
الريم : وانتي من أهل الخير....



في دبي.........
وبالتحديد في بيت بو ناصر إلي عياله هم
ناصر 25 سنه متشدد بس محبوب بين أهله و ربعه
منصور20 سنه ريال راعي سوالف بنات وخربطان وهوه توام العنود اللي يشوفهم ما يقول توأم بس فيهم شبه بسيط.. وهوه أعري شوي بس محد يلاحظه بس إذا دقق في مشيته وسببه حادث استواله يوم كان صغير في المدرسة انه كان يستهبل على سواق الباص مال المدرسة يوم ينزل منه ويوقف جدامه وفي يوم كانوا مغيرين السواق بس السواق ماشافه بس الحادث كان بسيط الحمد الله ... ويموووت ويطفر بعنود وبطي واغلب اوقاته في العين
العنود20 سنه بنيه حليوه خاطبنها عبدالله ولد عمها راشد حلوه وايد وشعرها أسود ليلي وغليظ وناعم وقاصتنه بحركة مدرجة وحلوه ويوصل لها لين نص ظهرها
بطي 12 حبوب وايد وعقولته حارب وفهد وبطي الثلاثي المرح...وهم الثلاثه خبالهم شي اسمه دراجات البانشي....

بطي :أقوووووول عنودي ما تريدين تروحين العين.....
عنود : أريد ....وانته؟؟؟؟
بطي : والله خاطري أسير من زمان ماشفت حرووب وفهووود والله شتقتلهم.......
عنود : خلاص روح قول حق ناصر...
بطي : انتي تعرفين نصووووور يوم أقوله ما يعبرني ولا يدزلي ويه......
عنود : انزين وشو المطلوب مني...
بطي : عناد حبيبتي انتي يسمع كلامج أكثر عني أنا...يعني قنعيه
عنود : الله وأكبر... وينك يا ناصر علشان تشوف الحايه شو تسوي في بطوووووووي ....

وقبل ما تخلص كلامها دخل ناصر .....

ناصر : هاااه سمعت اسمي الشيوخي ......
عنود : تعال ناصر نريد نكلمك عن موضوع خطير .. فيه مسأله حياه أو موووت...
ناصر :خيبـــه السالفة فيها مووووت عيل صبر

راح ناصر وعدل يلسته وجابل عنود وبطي ..... المسكين عباله سالفة مهمة...

ناصر :يله رمسي طيرتي حمامة فوااااااااادي
عنود : ناصر انته أخونا العود ...وعاقل الحمد الله...وانته مؤمن بالقضاء والقدر..وترضى بحكم ربك....
ناصر :يله قولي بسرعة بلا مقدمات تخوف

يحليله ناصر من كثر ما هو خيفان وقلبه بيطلع من صدره كان حاضن المخدة....

عنود :تعرف ياخوي أن أحيانا الانسان يموت في بيته...................... من كثر الملل
ناصر وهوه يرص عيونه وميت من الغيض لأن عرف السالفة: انززززززين
عنود :يعني ياخوي يهونون عليك اخوانك الأبرياء يموتون من الملل..عاد إلي يسمع من كثرنا إلا أنا وبطوي...يعني بدون مقدمات أنا وبطوي نريد نروح العين...هاه شو قلت .....

ناصر :تبين تعرفين شوقلت.؟؟!!^_^
عنود :إذا تسمح...
ناصر وهو يطالع عيون عنود وبطوي : انا أقوووول....اممممم....لحظة شوي....ونش بسرعة وفر المخدة ع ويه عنود وطلع............
بطي : اففففففف يعني ما بنسير....
عنود :لا اصبر بعدني بجرب آخر محاولاتي......بطاي تعال بخبرك شو عليك تسوي.......
بطي :اوكيه


بعد ربع ساعة..........
دخل ناصر ....


ناصر :السلام عليكم
بس محد رد عليه مع انه عنود وبطي كانو قاعدين وكل واحد ماد البوز شبرين.......
ناصر : حشى محد يرد السلام عنبوه كفاااااااااار.......

عنود أونها تقرا المجلة وبطي يطالع التلفزيون ومحد معبر ناصر.......

ناصر : كنت ياي أقولكم شي بس ألحين كنسلت .......
عنود + بطي وبدون نفس : يله قووول إخلص .......
ناصر : اترجوني .......
عنود :يعني تريد نحبلك ريولك .......
ناصر :لا.. بس قولولي الشيخ ناصر تفضل .......
عنود : خلاص بنذل عمارنا لا حيله..الشيخ ناصر ممكن ترمس
ناصر :احم محلاها من لسانج .... يله بطوي بتقول
بطي : لا ما أريد اعرف .......
ناصر : خلاص ما بتروح فيانا .......
عنود : ويــــــــــن؟؟؟؟؟
ناصروهو يطالع بطي : العين عند قوم حرووب وفهووود
بطي وبسرعة فر الرموت: صدق؟؟؟؟؟؟
ناصر : هيه صدق بس انته ما بتروح .....
بطي :أخ.. تدري والله أول مره أعرف اني احبك موووت يانصور أقصد سموالشيخ ناصر .....
ناصر متشقق : احم...ألحين تعجبوني....خلاص بعد صلاة العصر بنسير .....
عنود + بطي: أوكــــيك ^_^
حليله ناصر طيووووووووووب ع اخوانه

في العين...........
الظهر الساعة2 كانت عليوه ترتب غرفتها ودخل عليها مانع

مانع : اشحالج اختي العزيزه عليوه
عليوه :من وين بتطلع الشمس منووووع اييني غرفتي يسلم علي وايقولي اختي العزيزه لا شي صاير.......
مانع :يعني حرام ايي غرفة اختي واسلم عليها...
عليوه : لا مب حراااااام بس غريبه منك
مانع :انزين عليوه ما تريديني أوصلج مكان
عليوه :لا شكرا ما اريد اطلع
مانع : ما تريدين تزورين قوم خالي سعيد.....ترا صله الرحم واجب .......
عليوه: لا شكرا أمس زرتهم .......
مانع:يعني خلاص ما تريدين اطلعين
عليوه : يعني غصب تريد اطلعني ياخي افهم ما اريد اطلع
مانع: انزين خلاص لا تصارخين ...بس بعدين لا تين تصيحين وتدلعين عسب أوصلج مكان حلمي.........
عليوه : يعني لو قلتلك شلني العين مول بتشلني....
مانع : افاااااااا عليج اشلج واشل يدج بعد....
عليوه: خلاص أوكيه بروح اتجهز
مانع : عليوه صبر محد بيروح فياج .....
عليوه : تعرف... بسير أدق حق ريمووه بنسير نشتري بدلات نريد انطقم مع بعض لأنهم بيون عندنا أهل دبي وعسب انطقم في الجامعة بعد ^_^
مانع : هيه صح أحلا...بس تعالي صدق بيون اهل دبي
عليوه : هيه صدق عيل اجذب....دقتلي عنود وقالتلي بيطلعون مناك العصر....
مانع : يا حظك يا عبود اليوم بتشوف حرمه المستقبل........وانا بعد اليوم بشوفها
عليوه : منووووع عن لا يكوووون مسونها ومن ورانا اعترف ولا بخبر باباتي........
مانع وهوه يقلد عليوه : بخبر باباتي.. مالت عليج وعلى تفكيرج
مانع وقبل ما يطلع من الغرفة : خلاص الساعة 4 كوني جاهزه
عليوه : اوكيـــــــــــــــــه

راحت عليوه ادق حق الريم عسب اتقولها تروح معاها ويشترن نفس الملابس.........
عليوه: ألو
خلوف : ألو
عليوه : اشحالك خلوف..
خلوف : الحمد الله بخير....
عليوه : خلوف حبيبي وين ريمووه........
خلوف : اهنيه يالسه تلعب كيرم فيا حاااارب..
عليوه : انزين قولها تبيج عليوه
خلوف : اوكيه

راح خلوف يزقر ع الريم من غرفة حارب.....

خلوف: ريمووه تبيج عليوه ع التلفون
حارب : قولها ريمووه ماتت
الريم : ويه بسم الله على عمري عن طاري الموووت بعدني ما شبعت من الدنيا.......خلوف قولها ألحين بتيج......
خلوف: اوكيه....
حارب : طبيها عليوه بعدين رمسيها خلينا نكمل لعب..
الريم : لا واللــــــــــه وبعدين عليوه أهم عنك انته...روح لاااه
حارب : آفاااااااا مشكوره مقبوله منج...
الريم : العــــــــــفو

نزلت الريم تحت وراحت تكلم عليوه............

الريم : هلا والله بالزين كله وينج ولهت عليج ...
عليوه: مسرع الوله أمس كنت عندج...
الريم : ولو أنا أوله عليج بسرعة..المهم شو رايج تين عندنا تراني ملانه.........
عليوه : لا تنسين أنا آخر مره يايه عندج...المهم بتروحين فياي
الريم : وين؟؟؟؟
عليوه : العين مووووول
الريم : تتمصخرين
عليوه : لا صدق!!
الريم : قولي والله..
عليوه : آفااا ما تصدقيني
الريم : اصدقج بس مستغربه ...وليش بتسيرين؟؟؟
عليوه : بنسير أنا وياج بنشتري شويه بدل عسب انطقم ويا بعض مب إلا عنود ورويض يطقمن حتى نحن بنطقم ما ناقصنا شي الحمد الله............
الريم : حلوه الفكره خلاص بسير ..بس تعالي شو اخبار عنود من زمان ما كلمتها...
عليوه : تسلم عليج واليوم بيون عندنا
الريم : والله عجيب اسميني ولهانه عليها
عليوه : حشى انتي تولهين ع كل الناس
الريم : شفتي عاد قلبي وااااااااايد وســــــــــيع
عليوه :هههههه انزين عسب جذاك بنطقم مع بعض تعرفين اليوم الكل بيجمعووون في بيتنا.............
الريم : خلاص أوكيه....
عليوه : خلاص الساعة4 كوني جاهزه
الريم : أوكييييييييك .....بس صبر من المتطوع إلي بيودينا
عليوه : منووووووع
الريم والدم يمشي في خدودها من سمعت اسمه : شوووووووووووه؟؟؟
عليوه : ؟؟؟؟؟؟؟؟؟ ليش
الريم : تعرفين..... خلاص ما بسير
عليوه : لاااااااااااااااااااا..حرام عليج... ليش ما بتسيرين؟؟؟؟
الريم : بس ما اريد اسير أنا على بالي الدريول بيوصلنا..
عليوه : عاااادي إلا منووووع محد يستحي منه.....
الريم : لا لا لا خلاص كنسلت بعدين صــــــــح نسيت اليازيه بتروح عندها موعد اسنان وبتخلي مزنه عندي يعني ما اقدر اسير..
عليوه : انزين عادي خليه عند روضة...
الريم : خلاص عليوه أنا ما بسير أنا إلي اطوعت وقلت بخلي مزززونه عندي...........
عليوه : امممممممممم...خسارة كان خاطري تروحين فياي
الريم : يله انشاالله مره ثانيه....
عليوه : خلاص اوكيه بااااي
الريم : بااااااياااااااااااات

......................ز

نهايه البااااااااااااارت

القصه روووووووووووووووووووووووووعه..

ما أقدر اصبر نزلي البارت الثاني.. بليز

يسلموو ع الطرح الناايس..

يلا نزلو البارت

روعه القصه

^_^

هاااااااااااااااي اليوم يبت لكم الجزء الثاني

انشالله اكووووووون عند حسن ظنكم

الجزء الثاني

>>>>>في بيت راشد المهيري<<<<<

كانت عليوه تتجهز حق سيره العين مول ومجابله المرايه وقاعدة تضبط ربط شعرها لأن دايما يلعوزها ويتبطل لأن أصلا كان في بيت راشد المهيري الكل شعره أسود ونعيم وسايح ...واندق الباب
عليوه : من؟؟
مانع: احم ..احم ..شيخج
عليوه تضحك : ادخل
عليوه بصوت واطي :هههه قصورك انته تكون شيخي ....كل واحد شيخ على عمره ...
مانع : قلتي شي
عليوه بارتباك: أبدا ما قلت شي بس كنت أقول ان شعري ملعوزني وايد
مانع : انزين عادي تعالي بحشه لج..
عليوه : شوووووه لا حياتي كله ولا شعري...وتسحب خصله من شعرها وتبوسها.... فديته والله امووووااااح
مانع : أووو..من قدي أنا حياتج ..لا لا شي صاير
عليوه : ط..تخسي... كنت اقصد شعري مب انته..

وطول الوقت كانت عليوه ترمسه بدون ما اتطالعه كانت عاطيتنه ظهرها ومبحلقه في المرايه تظبط شعرها...

مانع :انزين انتي جاهزة..
عاد توها الحبيبه اتفيجت وافترت صوبه.......وكان شكلها يضحك مبققه عيونها.. وحاطة شباص في حلجها.. ونص قصتها مرفوع والنص الثاني لأ...

مانع : بسم الله أعوذ بالله شفيج جنج مب شايفة خير
عليوه : أول مره أعرف انه أخوي غااااوي هالكثر...لا ما اصدق عيوني ..لأ..أكيد أحلم....

كان مانع كاشخ لدرجة انه يعق الطير من السما كان كاشخ بالكندوره البيج ولابس غتره حمرا ومسوي حمدانيه وكان شعره يوصل لآخر رقبته وأسود سواد الليل وريحة العطر تفوح منه عاد مانع خقاق عطره ما يغيره كان يستخدم عطر اسمه FLASH وماكان يتعطربه كان يتسبحبه وكان الكل حافظ ريحة عطره واذا حد شمها يعرفون انه مانع موجود ...وما شاء الله عليه هوه أحلى واحد بين شباب العايله ومليون بنت تترجا نظره منه لأن العين غصبن عنها تفتر صوبه ...ومش البنات بس يموتن عليه حتى ربعة يموتون عليه

عليوه وهي تفر الشبابيص من اثمها وتنبش في شنطتها
مانع : شو تسوين
عليوه وهي تطلع تيلفونها: يله اعتدل بصورك عسب ناس يشوفونها
مانع مبتسم : فديت ختيه إلي تفهمني
عليوه : يله اكشخ
عاد مانع ابتسم ذيج الإبتسامة إلي تذوب بنات العين كلهن
مانع : هاه شو حلوه الصوره
عليوه : أكيد حلوه مادام اني أنا إلي صورتك
عليوه وهي تير مانع من ايده : اخبرك يله تعال بنروح عند إمايه بخليها تقرا المعوذات عليك أخاف عليك من عيون هالبنات السحر
مانع وهوه يير ايده : ط...عنز انا تسحبيني يله بسرعة خلصي ولا بروح عنج تراني مستعيل.....مب فاضلج
عليوه : بل عليك ...عن لا تكون مواعد وانا ما أدري....
مانع : شوووو ؟؟؟ تقولين ؟؟؟تراني ما اسمع ...لا عيدي شوقلتي...
خلي يدتج توديج الموووول...
عليوه : منوعي فديت خشمك والله اني أمزح ...دخيلك والله اني اتمصخر...حرام عليك ...لا تكسر خاطري...دخيل والديك لا تخرب فرحتي اليوم بيون عندنا أهل دبي وانا والريم نريد انطقم باللبس ...
وأول ما قالت الريم ...تغيرت ملامح ويهه بالموافقة
مانع : خلاص أوكيه عفيت عنج....
بروح بحرر السياره ولحقيني بسرعة واذا اتخرتي بروح عنج
عليوه : إن شـــــــــــاالله
^
^
..

^
^
.....***^_^في السياره ^_^***.....


توها عليوه ركبت واتفيزرت ع الكرسي الجدامي
طير مانع السياره وعلى طول ع بيت خاله...
وطبعا مانع فرحان وشاق الحلج ومستانس انه الريم بتروح وياهم

عليوه وبنبره ضيج : اممممم ..صح نسيت أقولك ...الريم ما بتروح ويانا
ضرب مانع بريج بالقو لدرجة ان عليوه بغت تدعم في الجامة بس تمسكت قبل ما تروح فيها...
مانع معصب: شوووووووووووووووووو؟؟؟؟؟!!!!!! وليش انشالله ما تسير شو وراها ريل ولا عيال...
عليوه : مانع حرام عليك .. لا ترمس عنها جذاك ...وأنا شو يخصني تعصب عليه ..والله اني سلمت كان راسي بيضرب في الجامه....وبعدين قالت أوين حرمة أخوها بتخلي مزوونه عندها وما تقدر تخليها روحها...
مانع وهو شوي بيكفخ اخته : لا والله.. وحرمة اخوها ما تروم تسد عيالها اروحها
عليوه : وانا شو يخصني لازم تبرد حرتك فيني...
مانع : خلاص كنسلت ماشي سيرة بردج البيت...
عليوه بدلع : دخيــــــــــــــــلك ..لا تردني وبعدين فشلة أنا كنت بسوي مفاجأة وبشتريلها مثلي...

يحليله مانع طيوب كسرت خاطره اخته ...وما ردها البيت....بس كان طول الطريق معصب وعليوه تحاول تلطف الجو بس بدون فايدة...
مانع في خاطره: ماعليها السباله براويها الياااايات أكثر من الراااايحات وبعدين أصلا هيه تتشرف تركب سيارتيه ...بس ما عليه خلني أشوفها وبطفربها ..وبخليها تعرف من هوه مانع المهيري...

.....
كانت يالسه في صالة الطعام وتطالع التلفزيون وإلي يشوفها يقول مندمجة بس أصلا هيه شارده بتفكيرها في أحلامها الورديه ووتتذكر شو استوالها في بيت خالها راشد ومن ذاك اليوم ومانع ما يفارق تفكيرها ولا لحظة...

أم محمد (اليده) : الريم فديتج هاتيلي الدله بتقهوي...
والريم سرحااااااااااااانه
اليده : الريم ..ريموووووووه ويهد
توها الحبيبه انتبهت...
الريم : عونج يدوووه بغيتي شي
اليده : شفيج يا بنيتي أرمسج وما تسمعيني..شي يعورج
الريم تتنهد وبصوت واطي: آآآآه قلبي يعورني
اليده : اشوووووه
الريم : ماشي فديتج بس راسي شوي يعورني..باخذ حبه بندول وبيصح
اليده : سيري فديتج ولا أزقر ع الخدامه تيبلج..
الريم : لا الغاليه عندي في حجرتيه بسير ألحين...يله من رخصتج
.
..
...
في المول كان اليوم زحمه وممزور شباب

من كثر ما كانت زايغة كانت حاضنه ايد اخوها وإلي يشوفها يقول خطيبها مب اخوها...
مانع وهو يصاك اضروسة: عليوووه فجي عني شوي فضحتينا
عليوه: حرااام عليك والله اني زايغة وايد شباب..اتروع
مانع: اشفيج محد بياكلج..
عليوه : ما ادري أحسهم بياكلوني بعيووونهم
مانع: هههههههه بجلعهن عيونهم
انزين انتي خلاص خلصتي
عليوه : لا حراام عليك بس بعدني بروح محل البدل ومحل الإكسسوارات
مانع: أوووووووووف خلصيني مب متفيجلج
....
طول الوقت ما انتبهوا إن اثنين يلاحقونهم...بس عليوه كانت منتبهتلهم بس طنشت...
شهاب : خلااااااااااص بموت ياخي تذبح...
حمدان وهو يتعبل بتلفوووونه:............
شهاب : ايه يالهيس ارمسك
حمدان: شعندك...يعني هاذي أول مره تقولها تراك قلتها عن أكثر من بنت غير هاذي...
شهاب: لا لا لا لا هااااااااااذي غير مادري جلبت كياني...
حمدان: لا المره الريال مستصيب ..ويلس يغني..يا طير سلم ع الحبيب قله تراني مستصيب ..جروح قلبي ما برت وانته الدوا وانته الطبيب
شهاب : والله انك ييت ع العوق يالوسمي
حمدان :عاااااااشو تباني أكملك..
شهاب : لا مشكور من زين صوتك عز الله بيعتزل الوسمي
حمدان برطم ويبربش بعيونه شرات اليهال: ما احبك
شهاب :دخيلك تراني ما ابات من كثر ما اهويسبك
شهاب + حمدان يضحكون بصوت عالي
ههههههههههههههههههههههههههههههههههه
بعد فترة السكون يقطعه تنهيده شهاب
شهاب وهو يتنهد: آآآآآآآآآآآآه أشهد انها ظوت راسي
حمدان : اييييييييييه لا لا والله انك رايح فيها
..........
جدام محل الملابس الجاهزة

مانع: يله دخلي بترياج برا
عليوه: لاه احلف قول والله!! ما بدخل بروحي
مانع: والله استحي ع ويهي ادخل محل ملابس مال حريم
عليوه: عيل كيف بتشتري حق حرمتك في المستقبل
مانع وهوه يفكر بالريم :فديت طاري حرمتي
مانع في خاطره والله انها سبالة ليش ما تروح فيانا
عليوه: منووووووووووووعي حبيبي وين وصلت وتحرك ايدها جدام عيونه
مانع وتوه انتبه: هااااااااااه
عليوه : اللي ماخذ عقلك يتهنابه
مانع : فداها عقلي وانا بكبري
عليوه : اوه..... اوه منو ذي؟؟
مانع وهوه يقلد عليوه: ماماتي على قولتج
عليوه وهيه حاسه بخوييها: متأكد
مانع ويحاول يغير السالفة : بدخلين ولا؟؟
عليوه: بتدخل وياي
مانع : امري لله
عليوه: والله اني احبك
مانع وهوه متشقق: احم ...احم .... من قدي.. يله دخلي

ودخلوا المحل وقعدت عليوه تختار وتشاور مانع في كل شي تشتريه لأن مانع ماشاالله عليه ذويق في كل شي ......وطبعا شهاب وحمدان وراهم لو ان مالهم شغله في محل الحريم بس أونهم يايين يختارون...
وكانت عليوه رافعه الغشوه شوي عسب تتنقى
وطبعا شهاب ما رفع عينه عنها ومااات يوم شافها ترفع الغشوه ما شاالله عليها قمر .
بس عليوه يوم كانت تتنقى رفعت راسها يت عينها في عين شهاب
عليوه في خاطرها : اووووف منه.... حشى بيطلعن عيونه ..وبسرعه نزلت غشوتها
انتبه شهاب : افااا
حمدان: شياك؟؟
شهاب : لا ماشي

عليوه : منووووووووووعي فديتك شرايك بهذا اللون
يوم قالت منوعي فديتك بغى شهاب يموووووووت واتمنى لو إن الأرض تنشق وتبلعه وقال نيالك يا منوعها لا خلاص بموت أكيد هذا ريلها ....وحمدان كان يحاول ينبهه عسب أن مانع ما يحس فيهم ويسويلهم سالفه....
وبعد ما اختارت التنانير وخلصت
عليوه : شو رايك يكون القميص قطعة ولا قطعتين...
مانع : لا قطعتين أكشخ..
عليوه : بس أحيد الريم تحب يكونن بدلها سبورت.....
مانع في خاطره :فديتها والله انها بكبرها سبورت...
عليوه: هزرك أخذ مثلها ..
مانع : هااه...هيه أحلى بس بتكون ع الريم أحلى
عليوه : منوووووع حرام عليك هيه بنت خالك أنا اختك ليش ما تقولي جيه...
ويوم توهم شهاب وحمدان ظاهرين من المحل افتر حمدان بالقو صوبهم لدرجة انهم انتبهوله...بس سحب عمره وطلع بسرعة لأن شهاب طلع قبله وما سمعهم...
بعد ما اختاروا حاسبوا وظهروا ...

ممكــن دقيقه .. دقيقه وحده بس ارجوك ..عندي ســــؤالٍ .. واذا تسمـح تجـاوبني

أنت القـمر ؟ ولاّّ عــمه والا هــو اخـوك ..قـول بصـراحه .. دخــيلك بس ريحني

أدريـبك احلى وزين الزين لك مملوك ..لكن تــواضع .. ولــو حتى تســايرني

تواضع شويه وقول انه شبيه ابوك .. والشمس امك وجاملهم على شاني

جاملهم انته اخاف يغاروا ويحسدوك ..لاني بصراحه أنا من قربك أحسدني

طبعا يغاروا .. تحمل بس لا يضرّوك ..الله يحفظك خــصوصا منــهم ومـــني

اعذر فضولي وكل الناس إذا سئلوك .. ما شفنا مثلك ولا حسنك خطر ظني

..............
............

...
كان يالس وكاشخ ومزهب العده ويتريا الساعة 4 وكل دقيقة يشوف الساعة....
بطي : أوووووووووووف
عنود : حوووووووووووه لا تتأفف
بطي : أخاف انه يقص علينا وما يودينا والله بموت..
عنود : لا تخاف ناصر عند كلمته مب مثل بعض الناس.. وما بيقص علينا عقولتك
بطي يركز فعيونها: من هذيلا الناس؟؟؟؟منصور صح
عنود:يوم تعرف ليش تسأل
بطي: هههه تراني استهبل
ويدخل ناصر...
ناصر : هااه جاهزين..
عنود : هيه من الصبح جاهزين
ناصر : هاه بطوي جاهز
عنود : دخيلك من ساعة يتأفف ويقول...
ويقاطعها بطي : لا ما قلت شي أنا من الصبح جاهز
ناصر: خلاص غايته ...عنود خبري البشاكير يحملون القشار في كريل سيارة ابوي
عنود : خلاص أوكيه
.......
....
اشتلوا أهل دبي صوب العين ....

كانت عنود يالسه في السيت الوراني وبطوي جدام في سياره ناصرأما الشايب وعيوزه والقشار في سياره بو ناصر

في سيارة ناصر
بطي وناصر مشغلين المسجل ومرتبشين ويسوون حركات انهم يولووووون
ناصر وهوه يغني: مرحبا والنفس طربانه ..للقصيد وشاعر ياها..والكتابه بطيب عنوانه..والحروف بطيب مجناها
بطوي: عاااااااااااااااااااااشووووووووووووووو العوامر
عنود وهيه خاشه صبعها في اذنها اليمين والتلفون في اذنها اليسار ترمس رويض..
عنود:حشى ما اتقول إلا صوت أم خماس (وتقلد بطي) عااااااشو
روضة: هههههههههههههههه اخوانج مستهوين وشالنهم الهوا
عنود: إلا مخبل دخيلج لو تشوفينهم نصور قابض السكان بريله وايول وايبس ومرتبش وبطوي مطول آخر شي ع المسجل وظاهر من الدريشه ويسوي حق الشيبه باي باي والعيوز شكلها تحرطم واتأشر له عشان يرد داخل...
روضه فخاطرها:آآآآه منك يا ناصر
روضه : هههههههههههههههه لا ما اقدر برتبش وياهم
...
...
في سياره بو ناصر....
ام ناصر : دخيلك حميد الولد بيطيح بيتعوق إلحق عليه نصور الهرم لاهي عنه دخيلك وقفهم وإلا دقلهم تيلفون واعلي على بطوي طالع الهرم ويسويلك باي باي وايبس ...أنا ليتني ماركبت فياك أحيدها سواقة نصور ما تسر...
بو ناصر وهو ناقع من الضحك على عياله والعيوز: خليهم يا عوشه مرتبشين أشوفهم مرتاحين....
ام ناصر : أخاف ع بطوي الهرم بيتعوق ولا أكيد العنيدي زايغة من سواقة نصور
.......
...
..

كانت يالسه في حجرتها واتعابل الكياس وترتب إلي حقها وإلي حق بنت خالها وتعزل السامان كل شي في كيسه ويدخل عليها اخوها....
فهد : أوووه عليووه يايه من السوق شو يبتيلي ........
عليوه: يله ..يله..ما يبتلك شي...انجلع برا
فهد يجذب : آآآ هيه ..صح ابويه يبيج سيريله دلوعته يباج تهمزينه...
من طرا ابوها فرت كل إلي في ييدها: ابويه فديته بسيرله من أصبحت ما شفته...بقوم أسيرله...
وسارت حق ابوها ...وصار إلي يريده فهد وييلس يطالع ويينبش إلي في الكياس يحيدها أخته ما ترد من السوق إلا ومعبره الجمعيه من الحلاوه
وفي الممر
كان مانع رايح حجرته الي حذال حجره عليوه وهوه مار شاف فهد ينبش في الاكياس فحب يزيغه فدخل الحجرة الي كان بابها مب مسكر و وقف ورا فهد الي مب حاس بشي ومشغوووول
مانع بصوت عالي:اوووووووووووووووووووووووووووووب
فز فهد من مكانه وميت من الزيغة وتم يشاهق.... عاد هوه امبونه خواف وديايه امه ....
مانع:هههههههههههههههه ايه فهوووووووود اعترف شو تسوي ولا بخبر عليك عليووه
فهد زايغ ومرتبك: م م..ماشي ببب بس كنت أشوف إذا عليوه اشترتلي قير حق السوني احيدني موصنها تيبلي لأن القير مالي خربان....
مانع :اهااا
فهد : أنا بسير عند امايه باااااي
مانع : ههههههه بااااي يحليله يعرف يرقع السالفة
......
..
كان يالس في شقته فيا اخوه ومنسدح ع الكرسي ويطالع السقف ويفكر في حياته اليديده ويفكر إذا ممكن إنه يرجع امريكا ولا لأ ويفكر إذا انه بيستقر فيا اخوه في الإمارات ويفكر إذا كان عنده خوات ولا اخوان ويفكر بالمزيونه إلي جلبت حياته من أول ما شافها...ومن ساعتها أذنه ما تسمع إلا منطوقها يوم اترمس اخوها وحاله معتفس ويتمنى أن لو ما شافها وحليله عباله ريلها...
ويتنهد من خاطره....
شهاب: آآآآآآآآآآآآآآآآآآآآآآآآه يا قلبي
ذياب وهوه توه ظاهر من الحمام متسبح : يا ويل حالي ع اخوي ...اشفيك جنك بايع بخساره...
شهاب وهوه يعتدل في يلسته: ذيابووووووووه بنرد أمريكا ولا بنقعد هنيه ؟؟
ذياب : ما ادري ما صار لنا اهنيه إلا اسبوع ونص من وصلنا و تصدق.. بعدني ادور عنوان ابويه ما أدري بس إلي عرفته إنه ساكن في العين ...
شهاب : ليش ما ادور رقم تيلفونه؟؟
ذياب: كيف راحت عن بالي .. صدقك بتصل بواحد من الربع إلي يشتغلون في الاتصالات وبشوف إذا يقدر يطلع لي الرقم
شهاب : يله شو تتريا دقله
ذياب : الحين؟؟؟
شهاب : هيه
ذياب: انهبلت طالع الساعة كم الحين
شهاب: عادي الساعة 12
ذياب: شهابووووه نحن مب في امريكا نحن في الامارات استوعب شوي
شهاب : I am sorry sir
ذياب : والله وصرنا نتكلم انجليزي
شهاب : عيل انتوا ادرسون بس ترنا نحن مجابلينكم 24 ساعة لازم نتعلم شوي
ذياب : افتكينا من امريكا يوم ردينا الامارات
شهاب : بس اشتقت حق الامطار والبرد هناك... جنه هنيه الحر وايد عندهم...
ذياب : ههههههههه قول إنك اشتقت حق هذيلاك الشقر المعصقلات كل يوم مطيح لك وحده
شهاب :ههههههههههههههههه اللله يهديك يخسن إلا هن اشتاقلهن غــــــــــــير بنات الدار ياخي يحيين العروق...(ويتنهد) آآآآآآآه
ذياب : لا ..لا ..لا ..هاذي التنهيده مب عاديه شهابوووه عن لا يكون شايف لك شوفه....
غمض شهاب عيونه وسدح راسه ع ورا:آآآآآآآآآآآآآآآآآه دخيلك عاد لا تتخبر
ذياب: آآآآآآفا ليش؟؟؟؟؟
شهاب: يالله يا ذياب أسميني من شفتها وسمعت ذاك المنطوق...متت حسيت قلبي بيطلع من صدري والله لو كان فصدري فتحة جان طلع ما اعرف شو ياني تراقصت عظامي واسميني من اشوفها عيوني يعلقن ما اروم اشلهن من عليها بس إلا حمدان كل دقيقة وكفخني ويقولي (ويقلده) فضحتنا الناس كلت ويوهنا......
ذياب:هههههههههههه أجدا فيك .....اكيد وحدة من هاذيلا الخايسات الي يفرن المول 24 ساعة من دون سبب..
شهاب يوقف ويقطع رمسته: لا حرام عليك والله انها غير بنت عرب حشيمه حتى انها من كثر ما كانت زايغة كانت قابضه ايد (وسكت)...ومسك تيلفونه وغترته وراح يبا يطلع ...ويوم وصل صوب الباب...
ذياب : ايد ريلها صح وقف شهاب وهز راسه عشان يطرد صورتها وهيه قابضه ايد مانع....
شهاب: هيه.. وطلع..
ذياب : عنبوكن يالبنات شو تسون حشى اسميج إلا ظويتي راسه ....
...........
شهاب وذياب توفت امهم يوم كانوا صغاريه كان وقتها عمر ذياب 7سنوات وعمر شهاب 3 سنين سافر بهم ابوهم امريكا عند خالهم وويلسوا عنده أما ابوهم رد الإمارات لأنه عنده شركات يديرهن وهوه ريال معروف وبعد وفاه امهم بفتره اتزوج ابوهم وحده ثانيه وياب منها تريب عيال وعايش ووياهم ومستانس ...ابوهم ما نساهم كان يزورهم ويتطمن عليهم ومصاريفهم توصلهم كل شهر في امريكا عند خالهم...وألحين كبروا وصاروا رياييل ينشد بهم الظهر ويا الوقت إلي يردون فيه لبلادهم ويساندون ابوهم لأنه ما كان يقصر وياهم...
........
(ذياب وايد طيوب وجاد في كل شي وماعنده حركات البنات والخربطان ولا يفتر صوبهن بس هن يتخبلن عليه هوه طويل وعريض المنكبين وحواجبه مقرونه ومب أسمر وماعنده حركات يطول شعره بعكس شهاب إلي شعره جنان)
( شهاب بكل معنى الجمال ينوصف به ببساطه هوه مزيوووووووووووووون ويخبل ومربي شعره لنهايه رقبته شوي أسمراني ويعصب بسرعة وما عنده تفاهم وماعنده صبر وينقهر ما يحب حد يغلط عليه)
....
..
رايكم ان شهاب وذياب بيحصلون ابوهم ولا محد في الدنيا؟؟؟؟

تعتقدون شو شعور شهاب يوم يعرف ان عليوه مب مرتبطة؟؟؟؟

ومانع متحلف حق الريم رايكم شو بيسوي؟؟؟؟

والريم معقوله تحب مانع ولا مجرد إعجاب أو من الموقف إلي صار لها وياه؟؟؟؟

إذا حبيتو تعرفون اتريوني في الجزء الثالث