بسم الله صلى الله على نبينا محمد


الابذكر الله تطمئن القلوب لااله الا الله وحده لا شريك له

حشا صارت الف ليله وليله من طول السالفه

انا وعدت الغاليه قوافي بالسواليف الزينه عن رمضان وحياه رمضان منول والعيد منول

ترا هذي الشهاده بسم الله صلى الله محمد
يقولهاالي يحرج منول في سوق شقراء القديم نسميه سوق المجلس او سوق المدينه او الماقفه يرقا الي يحرج على حصاتين ثمن يقول بسم الله صلى الله على محمد
ونتم خابرين شقراء منول من اغنا القرا في الجزيره العربيه هي وبريده بس والي يشك في كلامي ينشد الشياب المهم كان الذهب قصدي جنيهات الذهب شحنه مصوبه تحتها بساط وكان الفرانسي مثلها وكان العربي مثلهن كلهن شحن او صوب ودكم انه هلحين كان الدم الى الركب كل شوي يجي غاره عليهن


علا فكره ترا اهل شقراء هلحين اعادو بناء شقراء القديمه بيوت الطين ندعوكم لزيارتنا ونتشرف بقدومكم -تذكرون هذي العباره ياظيفنا لو زرتنا لوجدتنا نحنو الضيوف وانت رب المنزلي -

المهم الي يحرج بعدمايذكر الله و الصلاه على النبي صلى الله عليه وسلم يقول
من يبي الذهب مثل مابعنا
من يبي الفرانسي مثل مابعنا
من يبي العربي مثل مابعنا
من يبي القهوه مثل مابعنا
من يبي الهيل مثل مابعنا
من يبي سحاب مثل مابعنا :d امزح معكم
ثمن يبدون البيع والشرا - انا هلحين وشوله اعلمكم بذا السالفه مالها سنع :d

خل نبدا برمضان منول ايام بيوت الطين

من يوم يدخل شهر شعبان والناس مغير كم بقي على دخول الشهرالفظيل قصدهم شهر رمضان وكانو منول يسمون شهر شعبان القصيييرلانهم يقولون انه يروح بسرعه وهومثل غيره من الاشهر بس الناس هذا احساسهم او شعورهم المهم والله يعينا على المهم :d
الادخل شهر رمضان كلن يبارك للثاني بدخوله وذكرسنه من السنين يوم درينا ان بكرا رمضان وناخذ عسبان النخل ونولع فيهن الضو او النار ونركض في السكيك بين بيوت الطين والعسبان مولعه نار ونقول بكرا رمضان بكرا رمضان وبغو يشبون ذا العيالين في سابوط المجباب والسابوط طال عمركم غرفه تجي فوق السوق ونسميها ونحن تحتها في السوق سابوط وتجي ضلال ايام القوايل والشموس وقبلنا تحتها نجتمع المهم ويفرحون في رمضان الناس فرحه ماتوصف لا كبيرهم ولا صغيرهم بالنسبه للصغيرين قصدي البزارين يفرحون لانهم يبي ياكلون شي ماينوكل الا في رمضان مثل المحلبيه والمكرونه والتوت ويفرحون به لانهم يسهرون الين الساعه 9 في الليل ومنول من المهبول الي يقعد الين الساعه 9 في الليل لان الناس قبل رمضان ينامون مع صلاه المغرب يعني مع الدجاج ويصحون قبل العصافير وهذا ترا يالغالين الي مخلي صحتهم زينه وجعلنا الليل لباسا وجعلنا النهار معاشا مهوب مثل ذا الوقت الي فيه الناس قلبو الايه ينامون النهار ويصحون في الليل وياكلون برقرقر ونا اولهم بعد
ياكثرمااشطح عن الموضوع
نرجع لرمضان منول اذكرالاجا بعد صلاه العصر او الا انتصف العصر اذكر امي جعلها للفردوس وبيي وخيي وجدي ووالديكم وكل مسلم
اذكر امي تقولي سحااااب ياسحااااب ثمن اقول سمي ياماما :d بس الصدق منيب اقول ياماما اقول سمي يمه ولا يايوه ياحليلي منول وبس الولد المطيع - المهم الا جيت قالت امي تعال ياوليدي خذ هذيولا وهن قدور جمع قدراو مطبخيه صغيرات وكل قدر رابطته امي بقماش تخاف اني اكبهن من الطفاقه
وتعطيني امي ثلاثه قدور صغيرات وتقولي افطن ياوليدي للي ابا اقوله لك ولياك ونا امك تغلط بينهن ولياك تصربع ونا امك وتكبهن وقول ان شاء الله وتعلق في رقبتي واحد وتعطيني في يميني واحد ويساري واحد وتقولي الي ونا امك الي معلق في رقبتك هذا لعمك محمد والي في يمينك هذا لخميسه وهي عجوز مالها عيال وعايشه وحيده في بيتها والي في يسارك هذا لطريفه وهذي بعد عجوز مالها احد يعولها وعايشه بلحالها في بيتها ثمن اروح اوديهن ومن زود الذكا الي فيني قبل قبل اغلط وعطي كل واحد حق الثاني لان امي الله يغفر لها تحط لعمي محمد لحم حاشي ولا غنم لانه باقي عنده كم سن من سنونه مابعد طاحن وتعطي العجيزات بدون لحم لانهن مالهن ولا سن وش تسوي بعد امي تحط لهن بدال اللحم مرقه باميا ولا اي مرقه علشان يقون يبلعن لانهن ياملا الجنه مالهن ولا سن حتا التمر يعفس لهن يزرطنه زرط مهنا سنون ولا نيب ادري اني غلطان الا اذا وديت لهم اكل من بكرا تقولي وحده منهن قل لمك لا تحط لي لحم مامعي سنون ادري اني معطيها حق عمي محمد بلا والله الدلاخه ولا وش اكثرمن التعليقه في رقبتي :d

حيات الناس يالغالين ماتختلف عن باقي الاشهر راعي التجاره يروح لتجارته وراعي النخل يروح لنخله وراعي الغنم يروح يرعاهن كان مافيه شاوي يرعاهن والشاوي يالتوالي هذا رجال يجي وياخذ غنم اهل الديره كلهن ويروح يرعاهن في البر القريب لانهم يخافون منول لو يبعدون يجيهم الحنشل ويسرقونهم والحنشل هذولي حراميه وقطاعين الطريق يسمونهم منول حنشل

المهم الي ابا اقوله ان الحيات ماشيه مثل قبل رمضان ماعندهم سهروغيره
تراي اذكر مر علي رمضان وكله امطار ومر علي رمضان وكله برد وصريم ومر علي رمضان في عز القوايل والشموس مثل هلحين يعني جميع الفصول مرت علي في رمضان يقولي واحد ترا هذي الدوره في الفصول تحدث كل 36 سنه مره وحده - فيه نجم يعرفونه الاولين يسمونه نجم ابو عسيب ماينشاف الا كل 36 سنه مره ومنول يقولون للي كثيره غيباته وراك صاير كنك ابوعسيب ماتنشاف الا كل 36 سنه مره وحد

اذكريوم صرت جذع يقولي ابوي ياملا الجنه قم ونا ابوك يالله نبي نروح نصرم النخل ثمن يجيني طفش منذا الصرام مايعلم به الا الله سبحانه وهذا ترا في رمضان نصرم من طلوع الشمس الين يذن الظهر من 17 الى 20 نخله بس وعدد النخل اكثر من 500 نخله يالله متا يقضن او يخلصن الا بطلعه الروح ثمن صرامنا مهوب مثل الناس لا يقولي ابوي الله يرحمه خذ المحش ونا ابوك ورق على جذع النخله ونتق التمر الي بين الكرب ثمن تعال شف الثيل وللزاق الي طول ذراع ثمن افليه فلي رغم اني حاط بساطين تحت النخله نحط عذوق التمر عليهن بس ولو علشان بعض النخل طوال شوي يصير البطاط مبعد وكاني ولد ابوي خله يلقا تمره ماشفتها جعله للجنه اتحدا العصافير تلقا تمره بعد الصرام
تشوفون وشلون القرود تفلي بعضها كنه انا ونا افلي الثيل ادور تمر :d

ثمن الا صلينا الظهر ولا الواحد حلقه يطقطق من اليباس والتعب ثمن يقوم ابوي ويروح تحت صباب المكينه البلاكستون اربع بوص ويخليه يصب عليه يبي يبرد ثمن يفرش له خيشه تحت وحده من الشجروينسدح يريح او ينعس شوي ونا عاد مااصدق على الله تجي فتره الراحه الي بين الشوطين :d
وناتراي توي صغير منيب كبير يعني جذيع اروح طال عمركم ومرعلا شجرالرمان ولقاهن مستويات ومتفلحات يعني منشقه الرمانه من الاستواء وكنهن كلهن يقولن لي ونا خذني تكفا ثمن ارحمهن وااخذهن وملا المخابي كل مخبات فيها ثلاث بس وملا شقي بعد بس مدري كم عددهن وروح تحت الاثله البعيده شوي وتوزاتحتها ثمن تعال شف ماتسمع الا الرشخ وبلع من الرمان الين تظيق ضلوعي يالله لك الحمد والشكر ثمن مدري الا حس ابوي يقولي سحاااااب ياسحااااااب وقول سم يبه المفروض يرد علي يقولي تعال ياملا الصلاح ولا ياولدي - الا قلت سم يبه يقولي تعال ياملا الذهاب الي يذهبك وينك رايح مبعد قلت اقضي حاجه وكل يوم ونا اقظي حاجه على ذا الحال وذكر مره امتلا ثوبي من الرمان من الثواره ونا اكل ينقط الرمان على ثوبي ونتم خابرين الرمان الا نقط على الثوب مايروح لو تفلخ للي خلقك تغسله ولا ماتغسله كله واحد مايروح ويوم ناداني البابا :d بغيت اقول ابابا يوحنا ذاك الي قاص على الناس ويلعب عليهم ماعلينا منهم بس المهم يوم ناداني مره من المرات وجيت اركض سم يبه سم قالي سم بلا سم ماتقولي وينك فيه وماامداني اردها الا بذاك الكف طيب اصبر اعلمك ويني فيه وتسمع صرقعه الكف ولا هوب اي كف لا كف ومن يد فلاح وتشقلب في الهوا وخبط ثمن قالي ابوي وشذا الرمان الي طابع في ثوبك يالحمار المتين والحمار المتين هذي صفه للي يستاهلها وتستخدم بكثره منول المهم وشذا الرمان الي طابع في ثوبك عسا منتاب تفطرفي رمضان ثمن على طول لان الحياه علمتني سرعه البديهه مهوب كله ذكاء لا بس علشان افك نفسي من النشب
ثمن علا طول اقول لا نشاء الله منيب مفطر بس يوم شفتك انسدحتا رحت وخذت بعض الرمان الي طايح في الارض وعطيه غنمتي او شاتي ومسميها بعد نوره جعل نوره للفردوس
ومن يوم اقول عند حوش الغنم يانوره تجي تركض عند الباب المهم اقول لبوي اني اجمع الرمان الي طايح وروح اعطيه شاتي او غنمتي النوري :d وشوا فكني الله من الصلخ والصليخ
ونا الله لا يواخذني اخذ الرمان وبلعه في بطني ثمن احفر للقشرحق الرمان ودفنه تحت الاثله ولو يجي ابوي مثلا يبي يشوف وش انا اسوي مهوب لاقي شي كلش صاير زباره وبوي عاد مهوب ناخش كلش مزبر او مدفون يخاف يطلع عليه شي ولا شي الله يكرمكم والسامعين وش اسوي هذا الصدق

يوم قلت زباره او مدفون ذكرت شي خل اعلمكم به تكفون وهذا شي صاير لي انا مهوب يقالي

قالي واحد من ربعي الغالين تصدق ياسحاب اني كنت جالس في النفود الفلاني المهم يقولي يوم صار عقب العصر وشوف ذاك الجمس الي يروح ويرجع يروح ويرجع وذاك الطريق قليله السيارات الي تجي معه المهم يقول وشوفه يوم نزل من الزفلت ويروح تحت وحده من شجر السلم ويقولي رفيقي انا معي الدربيل وتابعه يقول وشوفه يوم دفن شي تحت السلمه ويركب الجمس ويمسك الخط يقول يوم خذت يجي ربع ساعه ولا هذاهو راجع يبي يشوف كان فيه احد شايفه وجاي يم الي مدفون المهم يقول رفيقي جلست في مكاني الين اضلمت الدنيا ولا عاد شفته راجع ونا الي اجيك ماشي الين وصلت السلمه وحفر الي هو دافن ولقا رزق وش كثره مهوب فلوس لا بس شي يجيب الفلوس:d الي يقولن طع طع عرفتوهن ايه هذولي صغارووسط بس يجي لهن 12 طبعن ذا السالفه من سنه جدي وتمر السنين تتلا السنين تذكرون استديو رقم واحد الي يقدمه محمد الرشيد الي يجي بعد الساعه 12 من الليل تراه يجي بعد برنامج سكن الليل اعداد وتقديم شوشه فرحه الغامدي كان تذكرونه يالصغيرين انا علشان لي معه موقف مانسيت البرنامج طبعن اقصد الرادووعرفتو محمد الرشيد المذيع الي يقدم برنامج ونه قلب ذكرتوه اذكر اني واقف بسيارتي الددسن مدري هو 75 ولا ثمانيه وسبعين تراي ناسي الي اذكره اني شاريه جديد من القصيم ب 7800ريال وذكر سعره في الرياض 7900 ريال الفرق مهوب شوي 100 ريال عدله والميه منول لها قدرها وحشيمتها مهوب مثل هلحين ياكثرمااسج وسرح بعيد
نرجع لموضوعنا كنت جالس في طراف شقراء حول المزارع القديمه ومطفي النور والسياره وجالس اتسمع استديو رقم واحد ومادريت الا براعي سياره يوم جا ومنول فيه حظرعندنا في شقراء ممنوع تروح ولا تجي بعد الساعه 8 او تسع بعد صلاه العشاء لو يمسكونك على طول لمركزالشرطه الين الصبح وياخذون عليم تعهد ماتعود لها مره ثانيه نرجع لراعي السياره يمشي بشويش وياقف تحت وحده من الاثل ويحول وهو مغير يتلفت يمين ويسار فيه ريبه وعلا طول وذكر رفيقي وخيشته الي لقا فيها رزق واجد قلت هذا رزقك ياسحاااب وساقه الله لك بس اركد ولا تستعجل تراي اكلم نفسي المهم الرجال يجلس ثمن يقوم بسرعه يناظريخاف يجيه احد ولا يشوفه ونا ملبد المهم ويجي الرجال ويشغل سيارته ويروح يمشي بشويش الين ابعد وراح معاد رجع لانه ظامن ماشافه احد مادرا ان سحاب ذيب امعط وشايفه المهم يوم انتها استديو رقم واحد وصارت الساعه يمكن وحده ونص في الليل ونا الي اروح امشي على رجلي وخليت السياره مكانها وخذت بجلي او كشاف بس ترانا نسميه بجلي الي يجي فيه ماص كان تذكرونه ماعلينا منه بس المهم وروح امشي عل رجلي ويوم وصلت مكانه وناظر بالكشاف ولا والله المدفن يعني شي مدفون ونا الي ابرك فوقه وحفره هذا رزق وساقه الله لي ومابين عيوني الا رفيقي وسالفته المهم وحفر مره مرتين وثلاث ولمس شي حار جعله للحبه الي تلقطه ياملا الامساك الي مايروح لو يشرب عشرق او يوطي على الشري وهو حافي يقولون انه يسهل البطن الله يكرمكم المهم مالقيت خيشه مثل رفيقي ولا خيبه تخيب العدو وروح اركض انا يالذيب الامعط لسيارتي وفتح تانكي الماء ومعي كرتون تايد وهات ياتغسيل الين نضفت يدي الله يكرمكم والسامعين وهو جعله للحبه الي تلقطه وشي عاد الحبه الي تلقطه مدري

ذكرت شي همانا اول صابون يجي اسمه تايد الا هلحين موجود بس اذكر قالو لي عيالي نبي صابون تايد بس مهوب تايد نوع ثاني المهم اذكرونا عند راعي الجمله اقوله عندك صابون تايد بس مهوب تايد :d يوم ضحكوعلي الناس وش اسوي بعد مانعرف الا التايد انا ادري فيه عشرين نوع بس نسميهن تايد بس مهوب تايد :d


الا جايوم العيد اذكرونا توي جذيع معي رفيق لي اقشر وهو الي مخربني اذكره يقولي في يوم العيد والبزور مالين السكيك بنات وعيال كلن معه كيس مليان من خير رب العالمين ياقريض ولا حلاو عسل ولا بسكوت ابو ميزان ولا حلاوساعات ولا خدود بنات ولا علك طابع ابو طبعه المهم اكياسهم ذا البزورمليانه ويمرون على البيوت وهم يقولون عطونا عيديتنا عطونا عيديتنا وكلن يفتح الباب لهم ويعطيهم قاسمه الله ومنهم ناس يعطون تمر شيص الي مالقح وبعضهم يعطون البزور اقط او مضير ونا ورفيقي مامعنا شي ابد اصلن من يبي يشوفنا يبي يقول حصان ابليس وحمار القايله بينهم صداقه ويمشون مع بعض مستحيل احد يعطينا وقالي رفيقي وش رايك ياسحاب نسوي قمرق قلت وشو قمرق قال الا شفنا بزور نقولهم قمرق ونلحقهم وناخذ الي معهم وغواني الشيطان ووافقت ونحن نمشي في السكيك الي بين بيوت الطين ونشوف مجموعه من البزران ومعهم بنت تجي في اعمارنا المهم قلنا قمرق والبزور يعرفون وش معناها معلمينهم اهلهم ماتشوف الا وهم يركضون ذا البزارين الي يصيح والي يطيح وتتوصخ ثيابه وماتسمع الا الصيحه كلن يبكي ضعيفين وشذا العيد رعب وبس ونحن هادين عليهم المهم انا حطيت البنت الي كبرنا في راسي لانها معها اربع كيس مليانات هي اكثرهم وركض وراها ياسبقها ذيك البنت سبقاه رغم اني ماعلي صروال والمغطه يلامس منطقه الصليب عندي الارض بس عجزت امسكها وركض وتدخل بي في سكه سد قلت جابها الله ونا على سرعتي ومادريت الا يوم دخلت فيذاك البيت ونا من عماالراي وراها ويوم دخلت في المجبب حقهم ولا البنت خطر على عقلها يطيرمن الروعه وتصيح بقوا صوتها المهم انا دخلت في وسط بيتهم ولا مادخلت ولا فيه يجي 5 حريم جالسات يتقهون وتطمر وحده منهن وتصك الباب وتاقف عنده وباقي الحريم الي يراكض وراي بين السواري المهم الكثره تغلب الشجاعه وتمسكني وحده منهن دوبيه وتبرك علي وهات ياتقبيص مع كل مكان هذيك مهيب يد هذيك زراديه وكل شوي لاشطتني مع قفاي الين صرت كني قرد من الطق حسبي الله على الخرتيته بغت تموتني تجيود عند الحريم - طيب من الي فكني وشالني من تحت الدوبيه الخرتيته ومسك يدي وهو يقول خلوه خلوه لا تطقونه خلوه من تعتقدون حزر فزر :d منتمب مصدقيني الا قلت لكم انها البنت الي انا لاحقها رحمتني مسكينه وتجي تمسك يدي ونا كلش يوجعني وهي تقول للحريم خلوه لا تقولون له شي ويوم مسكت يدي وش عليكم منا يالي تغارون ترانا بزور بزرت عيون العدو ياشينكم يالي تغارون احس فيكم كني اسمعكم تقولون شي ياحضه ياحضه ترانا بزور ولا تحسدون الواحد الا جاه شي زين في حياته تراه مثل الحلم يحصل -- وش حيلتي حتا من الحلم محروم :d
المهم وهي تمسك يد قيس ابن المكفخ وتروحبي للحوش حقهم وتعطيني من الحلاو الي معها ونا مغير بلع من الحلاو وشخر ونخر ونا كلي لواهيب وجهي كله خرايط كله من الدوبيه ماعندها الا تقبيص وطق مع المقعده
المهم ربا ضاره نافعه وتصير صداقه وكل يوم ونا وبنتهم على عينك يبو تاج في المجبب ولا في الحوش حقهم نلعب الدبق ولا نلعب بالعبس ولا بالمصاقيل الي جايبتها امها لها يوم تروح تحج سنه من السنين وكل يوم ونا احافض على الصداقه من الصبح الين عقب العصرثمن اروح لبيتنا انوم ورجع هذا لوني ماانعطا وجه الين يطردوني طرد المهم حصل ضرف طارئ وغبت عنها متره طويله وجي للرياض مع امي جعلها للجنه وكل مسلم ويوم رجعت لشقراء وروح يم الحبايب ولقاها عندبابهم وسلم عليها وقولها تعالي العبي معي في السكه تقولي اخاف يشوفني ابوي ويطقني انهم يقولون لي تراك صرتي حرمه ولا عاد تطلعين للسوق ولا حشينا رجليك ونهم يقولون حتا سحاب لا تدخلينه تلعبين معه ابد معاد يصلح كبرتي وكل يوم ورا يوم امر منعند بابهم ولقاها وقعد اسولف انا وياها ترانا بزور يالي تغارون وش عليكم منا بعد
المهم ويجي ابوها يوم من الايام ويشوفني انا وبنته نسولف مع بعض والسكه سد اصلن ماجا على بالي انه يبي يصير لي شي البنت يوم شافت ابوها دخلت ونا على وقفتي ويجي ابوها وقالي وش تسوي عند باب بيتي يالضاطور ويدودلني بذاني ويتفل بوجهي مرتين ويصطرني مرتين بعد وهو يقولي يالله اذلف ون شفتك مره ثانيه تراي ابا ادودلك في السابوط بذانك وعلشان سكتهم سد وبوها اقشر معاد رحت يمها امحق من علاقه من يومنا صغارونحن مضطهدين ومحرومين وحافين ماعندنا نعال ومطقوقين بعد

وتبونا بعد نطلع شعب ينتج ويصنع ويكتشف المعجزات احمدو ربكم ان انحن ندل بيوتنا ونعرف اسامينا
والي جانا في ريعان شبابنا شوي هذاك ارهاب بعينه وعلمه
اجل مايسمونا الا بالظاطور ولا حصان ابليس ولا ياحمار القايله ولا يالهيس الاربدي ولا يالشاعوف ولا يالحمار المتين عاد وش عليهم متين ولا نحيف كلش مدخلين خشومهم فيه حمار وبس يكفي تحطيم :d

وبس خلصت السواليف تراي مااعرف اكتب الا بصبع واحد ونقر الحروف مثل نقر الدجاج للعيش يعني اوضح اكثر تراي اتعب وقصر ونا انقر يعني ابي منكم شي واحد ون شاء الله ماتحرموني منه وتراي بحاجته بعد افهموها عاد ابيكم تدعون لي عساربي يتقبل منكم ونتم اهل القلوب الطاهره ترا مهوب علشان تدعولي هذي الحقايق انتم من اطهر الامم على وجه الارض من ابوانكم الى جدانكم ونتم اهل صلاح ومسلمين وترجون ماعند ربكم - ورب الكعبه مايوجد احد من شعوب الارض ارحم منكم ولا اكرم منكم ونا اقصد السعوديين كلهم وهذي حقيقه واضحه وضوح الشمس الحمد لله والشكر له سبحانه