قصتي انا والسوداني وابومحمد الهامه الله يحفظنا

محروم.كوم · #1 01-29-2014, 03:10 PM

اخواني واخواتي
السلام عليكم ورحمة الله وبركاته
هالمره سالفتي انا وابو محد غير وتراي ماعلمته وادري انه يبي يحملن حق لاكن مايخالف تستاهلون وبالاول والتالي ماتعرضنا لاحد ولاحكينا بحد وكل هالسوالف حصلت وانا امون على ابو محمد لانها عشرة عمر ان واياه واكثر من اخوان والقصد اننا نشارك بهالموقع الرائع مكشات والركن الرائع السوالف الشعبيه لنفيد ونتواصل فأحيانا قد يحزن الموضوع وقد يفرح تاره وقد يثير التسائل واشياء كثيرة ..........تقل اني طولت
بسم الله الرحمن الرحيم
وهاذي سالفتي انا وابو محمد مع اخوي وحبيبي السوداني الذي اعتبره من اعز اصدقائي الاوفياء واعترف انه بالتواصل هو خير مني وهذه القصة سوف انسخها وارسلها له عن طريق البريد الإلكتروني وذالك كجزء من ذكرياتنا.
كنا انا وهالفسقان ابو محمد ( ادري انه اذا قراه يبي يقول ماشاء الله انت مطهرك ربك)

بسنه ثالثه او رابع ابتدائي قبل تغذية ابو الجدايل على وقت الملك فيصل الله يرحمه بسنه وكانت الحال مهب اللي انتم تبون وكانت الفسحه اللي يعطوننا اهلنا يبيس روثانه (نوع من التمر يجف لاكن يكون له صلابه الين يغدي تقل حصاة) مهب مثل هالحين الحمدلله نعم وخير وتلقى ولدك اللى بالإبتدائي يالله تكفيه العشرة اريل
ولا اهنا الا هو رضيت والا انرضيت وابو محمد ماشاء الله عليه معه حنك مايرده شيء والله انه اذا حطه بإثمه وقرضه تقل رمية ربع ماشاء الله وبعض الايام اروح للبيت ويوجعن وجهي من كثر ما انا احاول مثله حتى عيوني يوجعنن لانه كل قرضه تطق هالتمره ثم ترج عيونك وابومحمد شغال ماعليه والله لو تحط حصاء يعني الله لايظره (كساره)
يوم من الايام سجل عندنا طالب سوداني ماشاء الله مررب وسمين والعافيه ماشاء الله بينتن مع كل شنق والحمدلله اني شفته الاول قبل هالهامه ابومحمد
وكان لابس بنطلون وجاكيت هاك المخطط ابيض واسود وغادين تقل دريشة سجن
سلمت عليه وعرفته بنفسي وصارمني بعض الكذيبات اضنه بيضاء والله يذكره بالخير يستحي من ضلاله
المراد عرضت عليه اليبيس
لانه ماياكله ولا ؟؟؟؟؟؟؟؟؟؟؟
استحى واخذ وحده وحاول وحاول لاكنه عجز قال ياخي ماقدر عليها قلت بيني وبين نفسي ( بلا والله مهب معك حنك ابو محمد)

وكان مؤدبا جدا فجئة ادخل ايده بشطنته وكان حنا مامعنا لا شناط ولا شيء مرة بملقح ومرة نربطهن بمغاط المهم يوم والله طلع من شنطته هاك السندوتشه اللي اول مره اشوف اللي به وماعرفت الا الخبزه المنفوخه حقت الفران والباقي ماعرفته وقال لي خذ جرب يوم والله يوم طاحت سعابيلي وبلمحة بصر يوم اختفت هالخبزه المنفوخه واللي به
بعد ما قضيت اكله قلتله ترى عندنا مثله بالبيت ( والله من الكذب ) وعندنا وعدنا وقعد اكذب عليه وجاز له هرجي ( طبعا وراه مايزين هرجي والخبزه المنفوخه طعمه كذا )
يوم صار من باكر وقعد ادوره لين لقيته ومعطين ابو محمد اشكل والله ماكنه يخلق
هلا ابو فلان وشلونك عساك طيب وكلمالي وناظر الشنطه لعله يطلع شيء يستحي وحاول المح مابه فايده
يوم شفت انه كذا قلت لنفسي هذي خبزه منفوخه يمكن اليوم حاطن شيء غير وادور حيله اي شيء مافيه
لان تفكيري بهالخبزه
قلتله تبي يبيس مثل الامس قل لي بسرعه
لالالالالالالالالالالا
تكفى مابيه اسناني تعورني من امس قلت بيني بين نفسي (مهب بس اسناني وعيوني وجهي حتى كتوفي بدت توجعن من هاليبيس الله لايعيده)
يوم جيبت له له العذرمن نفس عذره قلت تصدق انه حتى انا توجعن اسناني وغدينا نقسم الخبزه المنفوخه بيننا احسن ماتوجعنا اسناننا ؟؟؟؟؟؟
عندي انه يقول (وانا مكلوفن بك عساه تكسر سنونك كلهن) وابن الحلال عطان نصف الخبزه واثر اليوم به شي جديد ما عرفته الا يوم صرت بسادس تدرون وشو( فول سوداني)
ياربيه على هالطعم شي ماأقدر اوصفه ومن اللاعانه وان اكل افكر بكرا وشلون اباخذ منه
صار من بكرا تدرون اني رايح للمدرسه مهب جود
علشان هالخبزه ونسيت انه اجازة اخر الاسبوع
ياويليه وش ابازين
صبرت غصب علي
جاء السبت واجي اول واحد للمدرسه بعد ماجتمعو الطلاب وادوره واشوفه واصوتله من بعيد بغيت اغلط واقول معك الخبزه
وبعد ماشافن تقل بدا يتصدد ولا يرد علي واحاول معه مابه فايده
الى على مرة هالفسقان ابو محمد
قال وش عندك انت وهالدب ذا هو هالكوت اللي لابس تقل مخافق حمام
قلتله لاماعندي شي بس المسكين ضايع واوريه الفصل
قال والله مادري عنك
رديت على رفيقي السوداني وقلتله شف عاد تعرف اللي مر هذا ( ابو محمد لازم اشوه صورته)
قال لا ماعرفه قلتله بلا والله ماتدري هذا كل يوم يدق له واحد وانه شراني ودايم يرسلن غصب علي انقله الاخبارمين اللي يحكي فيه اعلمه ثم يدوس ببطنه دوس بالطلعه
صدق المسكين قال وش ازين قلت ان اقولك وش تزين جيبلي معك خبزه حط به مثل اللي تحط بالعاده وماقوله شي والا ( بدت صيغة التهديد) والله لاعلمه قال بس ان ماسويت شي
قلت بكيفك
قال المسكين خلاص بس وعد انك ماتقوله شيي قلت وعد
اثر هالفسقان يراقبنا ودري بالسالفه ومسك السوداني وقاله تجيب لي انا الخبزه وان اوريك شغله والله مايقولك ولا كلمه
طبعا صارت المسأله من اللي اقوى وهذا ابومحمد اللي هاذي حنوكه وشلون ايديه وصار كل يوم يرمله خبزه وبعض المرات من جشعه ياخذ نصف الثانيه اللي مع السوداني
ومرت الايام حتى جاء الفرج وبداء توزيع تغذية ابو الجدايل بالفسحه الطويله يوم ارتحت من هاليبيس وزانت شعرتي وصحتي وارتاح منا السوداني ومن ابو محمد هذا اللي ضنيت
واثره هالفسقان وترى هالكلام ماكتشقته الابعد سنه
وقول لنفسي
وراه غدا هالكبر ابو محمد علابي ولغابيب وثروب وغد كبر السوداني مرتين اللي يقوله الدب لوالله انت الدب
هك على للطلاب وقالهم ترى اللحم اللي بالتغذيه مادري تقل به شي وادري باخيي ابو محمد عند بطنه مخططات ؟؟؟؟؟؟؟؟؟؟
واثرهم يعطونه اللحم ويقولهم بدل مانجدع النعمه عندي كلب اوكله هالحم ( لاوالله توكله هالهامه اللي بطنك )
دارة السنين والايام واصبح كل لاهي بعمله واخونا السوداني اخر اخباره بجده هاذا الكلا يوم حنا بالثانوي
وغاب عني اكثر من 23 سنه والله لااعلم عنه شيئا
وفي رمضان عام 1425 ه كنت رايح لمحل مواد غذائيه اباخذ مقاضي للبيت
والله العظيم قبل ان اصل الى مجموعة 3 رجال امامي كأن قلبي طار من مكانه وقفت الوجه ليس بغريب على لاكن هذا طويل القامة وعريض ويبدو عليه القوه الجسمانيه ( يعني مهب رهال) واذا باحد الذين معه يناديه باسمه فعرفته وكان له ضحكه مميزه لايمكن ان انساها قربت منه وطلبت من اللي مقابلينن من اللي معه انلا يخبروه فما كان مني الا اني جيت من وراه وامسكت به بكل ما اوتيت من قوه
فرد0 ايشبك يازول ) وقعدنا نتعافر واستدار ومسك كتوفي ورفعن عن الارض كني عصفور وقالي ماتستحي
على طول سميته باسم لايعرفه الا انا وهو فقط وابو محمد نزلن وقال وشلون عرفت هالاسم
قلتله ماعرفتن قعد يناظرن ويتمقل فحين عرف
ذرفت عيونه دمعا غزيرا يوم خنقتن العبره وتعانقنا قرابة خمس دقائق ونحن نبكي بكاء قويا
وخواياه مايدرون وش السالفه والله انه يمسح دموعي بطرف عمامته وانا امسح عيونه بشماغي
قالي ابو فلان يعقل ان نتلتقي ثم عرفني باللي معه والله لم يقل صديقي بل قال اخي وسئل عن ابومحمد وسئل عن حاله ؟؟
قلتله طلعله سنام وغدا مثل الثور العربي له سنام من اكل اللحم اللي انت خابر فضحك كثير
فاخبرت ابو محمد بالحال وكان من حسن الحض انه لم يذهب للرياض فلم يصدق وقالي بالحرف الواحد
والله من الكذب
قلت اسمع اجل وعطيت اخوي السوداني يكلمه مباشره قال انت والله الكذوب والجشع والطماع اجل لحم التغذيه للكلابه هاه
فبكا ابو محمد بكاء شديدا
وقال لبو محمد تدري اني مادريت الامن ابو فلان هالحين
وابو محمد يشاهق من الصياح
فسبحان من يفرق ويجمع
ادري اني طولت عليكم
بس هالصحبه والاخوه بقيت الى الان ونحن على روابط اخويه والماضي كان جسرا للحاضر وسيضل للمستقبل وارجو من الله ان يجمعنا واياكم في جنات النعيم
تحياتي للجميع
وصابرن بالحق يابو محمد
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الله يحفظنا لبعض ! > dp	MYooD FBI	برامج وصور وثيمات والعاب بلاك بيري و IPhone	9	07-30-2012 07:02 AM
ابتزاز النساء الفتيات داؤود الشريان ...... مهم للغايه الله يحفظنا	محروم.كوم	منتدى أخبار المواقع والمنتديات العربية والأجنبية	0	03-13-2012 07:20 PM
الله يحفظنا >> حادث شنيع	محروم.كوم	منتدى أخبار المواقع والمنتديات العربية والأجنبية	0	09-02-2009 11:10 PM
كاميرة محل ترصد سرقه في call of duty نسال الله ان يحفظنا واياكم	محروم.كوم	منتدى أخبار المواقع والمنتديات العربية والأجنبية	0	08-04-2009 04:40 AM
الله يحفظنا يا رب ...	JUSTIN	المواضيع المكرره	3	04-18-2008 12:25 PM