رواية أييه أحببك لو تسوي مَ تسوي.. للكاتبة:MahraA

MahraA · #1 07-22-2013, 11:08 PM

هاذي أول رواية لي أتمنى انها تنال اعجابكم..

و هذي قصة خيالية و ليست واقعية ..
اتمنى ألاقي تفاعل عسب اتحمس و اكمل..

و شكرا~
__DEFINE_LIKE_SHARE__

MahraA · 07-22-2013, 11:10 PM

روايةأييه أحببك لو تسوي مَ تسوي..

للكآإتبه ::MahraA
" يرجى عند النقل عدم مسح المصدر ، لآ آحلل النآقل بدؤن ذكر المصدر إلي يوم الدين = ) "

البارت الأول..
يوم الخميس 3:30 الفجر
DXB
فاطمة قاعدة مع مهرة ع السرير في غرفة مهرة يرمسون بالفون حمده و روضة ((حمده و روضة بنات خالهم)) يناقشون صور الانستغرام <<فاضين و قسم ..

حمده:فاطمة فتحي الانستا بسرعة شوفي الصورة حلوة و لا لاء بسرررعة..
فاطمة:اتريي خليني افتح الايفون ..
حمده:بسررررعة..
مهرة:حمدووه بس لااه صمختي اذني بلاج اتصارخين ترانا نسمعج.
روضة:أوزيل مهرة شو ياسة تقرأ الحين ؟
فاطمة:كيف عرفتي انها تقرا شي ؟
روضة:شو كيف عرفتي غرفتها مليانه كتب و لين الحين تجمع ماعرف شو عايبنها في الكتب الي تقرأهم..

مهرة:جب انتي مايخصج فيني.. البيبي مالي خربان شو اسوي يعني ؟؟ و الايفون مالحقت اشترك في الخدمة..
روضة : الي يقول الحين اطرشين شي في البيبي ترا بعد تقرين و فونج في الكبت..
مهرة:خليني انا الحين بخلص هذا الكتاب و من يرجعون الفون بطرش..
روضة:واايد سمعناج تقولين هذا الكلام..
حمدة:اوزيل ((فاطمة من كثر ماتحب اللاعب اوزيل لقبناها اوزيل)) وينج اكيد مشغولة في البيبي ماالت عليج و انا أخلص رصيدي عسب ارمسج ..
فاطمة:ياما خلصت رصيدي عشانج بتذليني يعني..
روضة:حمدووه تعطيكم كلمتين بعدين ترجع حق تصويرها ..
حمده:بروفيشنال حبيبتي بروفيشنال..
مهرة:موتي انتي و البروفيشنال مالج ..
روضة:مهاري كسرتي البيبي نفس ما كسرتي الايفون مالي ؟؟
مهرة:في الحفظ و الصون لا تخافين و الايفون بالغلط انززين :@:@
فاطمة:حمدووه ما سويتي لي لاايك تتمصخرين؟
حمدة:انزين انزين اتريي خليني اصور صورة و بسوي لج لاايك..
طق طق طق ((حمادة دق الباب على حمده و روضة))
حمده:ايه بسكر حمادة وصل باي
سكرت..

نبذة عن عائلة DXB
ام منى الله يطول في عمرها (فاطمة) و ابو منى الله يرحمه...
عائلة بوليد
ام وليد ((منى))+ بوليد ((محمد))+ وليد 23 سنة +حمدان 21 سنة + فاطمة 16 سنة + مهرة 14 سنة
عائلة بومحمد
بومحمد ((علي))+ ام محمد ((معصومة))+ محمد (حماده) 19 سنة + حمد 18 سنة + حمدة 16 سنة + روضة 13 سنة + مايد 10 سنين
عائلة بواحمد
بو احمد ((حسن))+ ام احمد ((مروة))+ ميثة 24 سنة (بنتها (سلامة سنة(1))+ احمد 23 سنة + سمية 20 سنة + سارة 19 سنة + عمار 15 سنة + حنان 10 سنوات + علياء 8 سنين + علي سنتين(2)
سعيد ((الله يرحمه))
بنته الوحيدة ((فاطمة)) 11 سنة
((ام وليد+بومحمد+بواحمد+سعيد+شيخة)) اخوان..

ما كملت 5 دقايق الا و حمده تتصل ..
حمده:كان يبا يرمس روضة الحين بتي ..
صوت حمادة كان ينسمع ..
حمادة:قوموا صلوه و خلوه حرمتي في حالها..
حمده:واايد تحلم تراك..
مهرة: قولي لحمادة مهرة ما بتوافق اصلا انك تاخذ اختي ..
حمده:ترا مهرة تقول لك هي مابتوافق انك تاخذ فاطمة ..
حماده : باخذ فاطمة انا و لا مهرة ؟!ما يخصها هي..
مهرة:حيوان قفطني..
حمده:هههههههه قفطتها المسكينة .. جبهج وين مهرة..
مهرة : سكتي عني انتي الثانية ..
فاطمة: مهرة جب خلاص..
مهرة:اكيد بتدافعين عن ريلج ..
فاطمة:ممهرررةة
حمده:طلع صوتج عيل..
حماده:منو منو ؟؟
روضة:اطلع برع انت!!
حمادة:حمدووه قولي منو؟؟
حمده:حمادة اطلع فكني ياخي ابا ارمسهم ..
حماده:اذا ما قلتي ما بطلع..
روضةتصارخ) حمممممد!!
حمد دخل الغرفة ..
حمد:بلاج تصارخين ؟
روضة:طلع اخوك نبا نرمس البنات..
حمد:قاعد عند البنات ماتستحي ع ويهك اطلع يلا..
حمادة:مب قاعد عندهم واقف ههه..
حمد:تستهبل؟!
حماده:لا اتمصخر..
حمد:اطلع اطلع ..
حماده:ياخي انت شو تبا..
مهرة:حمده متى بيخلصون ؟
حمده:اييه طلعووا مهرة تبا تركز..
حمادة:هاي الشريرة شو يخصها..
مهرة:قولي له حرمتك الشريرة..
حمده:تقول لك حرمتك الشريرة..
حمادة:قولي لها مابرد عليج ..
مهرة : افففف خلهم يسكتون عوروا راسي ماروم اكمل قراءة..
فاطمة:خليهم انتي ليش ..
مهرة:طبعا تبين تسمعين صوت حبيب القلب..
فاطمة:موتي انتي و حبيب القلب مالج..
روضة:حمد طلع حمادة بسرعة..
حماده:خلاص بطلع بطلع افففففف..

تمو يسولفون لين الساعة 8 الصبح بعدين سكروا عسب يرقدون..

في بيت ثاني.. بيت بواحمد..

عمار منسدح على السرير و فجأة الباب يتبطل..
عمار نقز..و شاف الباب سارة واقفة تشوفه..
عمار معصب:انتي ماتعرفين ادقين الباب كم مرة قايل لج؟ماتفهمين؟؟!
سارة:في شو كنت سرحان؟
عمار:هذا الي يهمج مايهمج قلبي الي كان بيوقف من ويهج الي يخوف..
سارة:لا تغير الموضوع..
عمار:جني بسمع كلامج و بخبرج الحين.. يودي الباب يلا برع ..
سارة:اسمع ترا يوم الجمعة عيال عمو و عمي بيون لا تطلع..
عمار:عمي علي بيي بعد ؟؟
سارة:عمو منى و عمي علي بيون..
عمار:يعني بشفوها<<ناسي سارة انها موجودة..
سارة:بتشوف منو ؟؟O.O
عمار<<توه انتبه لوجودها:بشوف منو يعني بشوف حمادة و حمد ..
سارة<<مو مصدقة:اهاااا زين عيل .. المهم ماما قالت لا تطلع و اتكشخ ..
عمار:انزين طلعي..

في غرفة ثانية في نفس البيت ..
ميثة في غرفة اتشوف بنتها النايمة (سلامة)..
و تدخل عليها سارة<<كل عادة خلتها تخاف من دخلتها..
ميثة:بسم الله الرحمن الرحيم ساروه ماتعرفين ادقين الباب..
سارة:خلج من ها الحين ماما تقول لا تطلعين يوم الجمعة عنا عزيمة ..قوم عمو و عمي بيون ..
ميثة:اعرف كنت قاعدة وياكم..
سارة:مالت و انا متعبة عمري و ياية لين غرفتج عسب اخبرج ..
ميثة:جذابة انتي ما ياية عسب تخبريني تعرفين اني اعرف كنت ياسة عندكم يوم ماما عزمتهم .. قولي شو تبين..
سارة:ميثو حبيبتي ابا منج ساعة قوجي بليزز..
ميثة:اشتريت لج ساعة نفس ساعتي بس عسب ماتخذين هاي الساعة شو سويتي فيها؟
سارة:كان عيدميلاد ربيعتي و عطيتها الساعة..
ميثة:عيل خذي من ربيعتج و لبسيها بعدرين رجعيها ..
سارة:تتمصخرين؟؟
ميثة:انا ماشريتها لج عسب توزيعين هدايا..
سارة:اخر مرة انزين بليززز..
ميثة:متى تبينها ؟
سارة:باجر ابا البسها حق العزيمة..
ميثة:خلاص تمام بعطيج بس ابا نفس اليوم الساعة موجودة في الصندوق..
سارة<<الاخت فرحانه:ولايهمج شكرا ميثوو..
وراحت عند الصندوق و خذت الساعة و طلعت..

سارة راحت غرفتها..
و كانت تفكر شو تلبس و كيف تطلع ..
و كان تفكيرها كله على الي لازم يشوف كشختها..
سارة:انا لازم اكون احلى من الكل باجر عسب حماده كله يشوفني و مايشوف ويه النحس فاطمة.. و لازم اخليه ينسى فاطمة لازم..

5:00 العصر
فاطمة و مهرة قاعدين في غرفة فاطمة يسولفون ((غرفهم متقابلة))
مهرة:افففففف خربتي عليه كنت بخلص الكتاب اليوم الله ياخذج..
فاطمة:ماتبين تصلين يعني؟؟
مهرة:سكتي بس سكتي ماعرف من وين يايبين هذي العزيمة بعد..
فاطمة:ماتبين تروحين ؟
مهرة:بالعكس متحمسة بس احيانا افكر شو الي بيصير هناك..
فاطمة:انا بعد بس شو نسوي اليوم خالي حسن ياي بس عسب يعزمنا على العزيمة..
مهرة:خالي علي بيي بعد ؟
فاطمة:سألت حمدوه انا و قالت لي عزموهم هم بعد يعني اكيد بيون..
مهرة:زين عيل ماعندي حد في عمري هناك بسولف مع رويض .. انزين فاطمة ماتعرفين سارة شو بتسوي بعد في هذي العزيمة ؟
فاطمة:ماعرف والله .. بس اكيد بتسوي شي هذي المرة في بيتهم يعني تروم تسوي اكثر من الي سوته المرة الاخيرة..
(( المرة الاخيرة الي تتكلم عنها فاطمة في عزيمة عمي علي..سارة كانت في غرفة حماده تتريا ايي بس حمده دخلت عليها و
قالت لها:انتي ما تستحين على ويهج قاعدة في غرفة اخويه ؟ مافيج حيا ؟
سارة:قصدج غرفة ريلي؟
حمده:يوم بيكون ريلج سوي هذي الحركات هو ماخطبج عسب تقولين ريلي !!
سارة:خطبني و لا ما خطبني هو يحبني ترا ..
حمده:انتي عايشة في قلبه ما شاء الله عليج يلا برع برع ..
سارة:بسكت عنج الحين بس يويلج مني مردودة..
و طلعت برع الغرفة))
مهرة:هي والله ينخاف منها هذي سارة .. بس ماتوقع حماده يحبها و هي جي تفر عمرها له..
فاطمة: ما ادري والله .. المهم خلنا نجهز من الحين ..
مهرة: بنروح على الفطور ؟
فاطمة:طبعا يعني بنروح على الغدا ؟
مهرة:اهاا زين عيل انا بروح غرفتي و بتجهز ..
فاطمة:تمااام..
مهرة:هي صح ساعة كم حمده و روضة بيون ؟
فاطمة: ساعة 7 قالو..
مهرة:خلاص اوك ..
و طلعت مهرة من الغرفة و تمت فاطمة تفكر بالي بتسويه سارة..
على الساعة 7 يو قوم حمده تمو يرمسون عن الي بيصير في العزيمة و شو بيلبسون و شو بيسوون و كيف بيتعدلون لين الساعة 11 حماده مر عليهم و رجعوا بيتهم..

الساعة 12 منتصف الليل..
في بيت بو وليد..
وليد و فاطمة و مهرة كلهم في غرفة وليد..حمدان في بوظبي عنده صيفي..
وليد قاعد على اللاب يدور سكن له لانه بيسافر بريطانيا (بعثة)..
وليد:هذا السكن جريب من الجامعة لكن هذا بعيد و في اشياء احسن من هذا ..اممم .. بس هذا اجرب 10 دقايق و اوصل..بس هذا بالقطار سريع يكون..
مهرة:وليد عورت راسي تراك اختار مكان واحد و فكني او ارمس في قلبك ..
فاطمة:مهرة انتي وايد تذمرين خليه على راحته في غرفته مب عايبنج طلعي برع..
مهرة:سكتي انتي محد رمسج..
فاطمة:رمسيني عدل احسن لج..
مهرة:بفلعج قسم بالله..
مهرة تسأل وليد:انت في مانجستر و لا في نيوكاسل؟
فاطمة:كان في مانجستر غيروا خلوه في نيوكاسل..
مهرة:حد رمسج انتي سكتي انا اسأل وليد ما اسألج انتي ..
فاطمة:شك.......(شكرا)
قاطعتها مهرة:جب اقول لج ولا والله بفلعج..
فاطمة:بتحصلين كف لاتقاطع.........(تقاطعيني)
فلعتها مهرة بدبة الحليب الفاضية المحطوطة على الطاولة و ضربت راس فاطمة..
و طبعا فاطمة ماسكتت قامت بالدبة تلحقها لين ماضربت ايد مهرة بالقوو..
و تموا في الغرفة تقريبا ساعتين بعدين ردوا غرفة مهرة يرقدون..
(ملاحظة:يرقدون في غرفة وحده يوم غرفة فاطمة و يوم غرفة مهرة ..مهرة تخاف تنام روحها )

في نفس الوقت لكن في مكان ثاني (بيت علي)..
حمده في غرفتها تسمع اغاني و ترمس بالبيبي (سلوم)..
و مرة وحده ميوود يدخل الغرفة ..
حمده على طول مسحت المحادثة و سكرت الفون و خلت عمرها عادي..
حمده معصبة:@:@:كيف تدخل غرفة بنات جي !!
مايد:شو تسوين ؟
حمده:ارمس الطوفة انا ؟
مايد:لا ترمسين الباب..

حمده:تنكت؟
مايد:لا أضحك..
حمدة:قول شو تبا بسرعة مب متفيجة لك..
مايد:رقدي باجر عنا عزيمة و بسج من هذي الاغاني ترا جهنم تترياج..
حمده:انت اخر انسان يرمس عن جهنم ..
حمد دخل عليهم..
حمد:وين رويض؟
حمده:حمود شل اخوك و طلعوا برع..
حمد:يالس اسألج وين رويض؟
حمده:في جيبي!
حمد:يلا بسرعة عندي سالفة وياها مب فاضي لج..
حمده:طبعا فاضي لحبيبتك روضة..
حمد ابتسم و رفع حياته:تغارين؟
حمده:مالت بس اغار هه اطلع اطلع هي في غرفتها..
حمد طلع من الغرفة و راح غرفة روضة..
مايد:حمدووه عطيني فونج شوي ...
حمده عطته بنظره:شو تبا في فوني؟
مايد:ماعندي رصيدي ابا اتصل في ربيعي برد لج اياه لا تخافين..
حمده:ميوود ماعندي رصيدي امس خلصته مع اوزيل و مهرة ..
مايد:اففففففف..
حمده:ميود اطلع برع بسرعة ابا ارقد..
مايد:زين انج فكرتي في الرقاد..
مايد طلع و حمده سكرت الاغاني و رقدت..

في بيت بواحمد..
ميثة سرحانه تفكر شو وصلها لهني..
قصة ميثة..((تزوجت شخص من برع العائلة خطبها و وافقت و عرست و بعدين حملت بعد ما ربت باشهر اطلقت لانه تزوج عليها..))

عمار في غرفته يفكر بالي بيشوفها في العزيمة و كيف شكلها<<عاشق الريال..
دخل عليه احمد..
احمد:ايه عمار بتي وياي باجر العزبة و لا لاء ؟
عمار:باجر عزيمة وين بتروح؟
احمد:اووه صح..انزين يوم السبت بتي ؟
عمار:ماعرف لين ذاك اليوم بفكر..
احمد:عمار بلاك ؟
عمار<مايبا اخوه يشك:بلاك و لا وايت؟
احمد:ما استهبل!!
عمار:شو تبا انت فيني روح عند حبيبتك..
احمد:اييه عن الغلط!!
عمار:دور الي بيي وياك ..
احمد:لو مو ربعي يبونك عسب الاسطبل جان ماعزمتك..
عمار:خلاص عيل مابي وياك..
احمد:كيفك لاه المهم بسك تفكير..
عمار:خلاص اطلع انت..
احمد:تراك نفسية واايد..
عمار:برع..
احمد طلع..

يوم الجمعة الساعة 7 المغرب..
الكل مجتمع في بيت مستانسين على هذي اللمة الحلوة..
فاطمة و حمده و سمية و سارة قاعدين مع بعض..
مهرة و روضة يلعبون مع سلامة بنت ميثة..
__
سارة:فاطمة صف كم انتي ؟
فاطمة:ثالث ثنوي اخر سنة..
سارة:ايواا يعني بعدج صغيرة..
فاطمة طالعتها بنظرة:انا صغيرة و انتي عيوزة..
سارة::@:@ شو قصدج..
فاطمة:فهمي الي يعيبج..
حمده:سارة مب لازم كل عزيمة تسوين مشاكل..
سارة:يعني انتي ماتشوفين فاطمة كله عليه انا..
حمده:اوزيل ساكتة انتي تبدين..
سارة:على ما اعتقد هذا بيتنا و ابا اسوي الي اسويه..
حمده:لو مب بيت عمي و عمي الي عازمنه جان ماطبيته..
حمده و فاطمة شلوه عمارهم و راحوا عند مهرة و روضة..
مهرة:اففففف سارة كل يوم تخليني اكرهها اكثر..
روضة:خاطري اسحبها من شعرها ححيوانه..
فاطمة:خلوها خلاص ..
حمده:تراج واايد هادية ما ادافعين عن ريلج..
فاطمة رفعت حياتها:ريلي؟
مهرة:بس بس جنه مابيصير ريلج..
فاطمة:يوم بيخطبني ذاك الوقت قولوا..
حمده:تتحرينه ماخطبج ترا رمس امي..
مهرةO.O شهقت:ليش ما قلتي لي يا حيوانه..
فاطمة مستحية..
حمده:حماده قال لي لا تخبرين حد..
مهرة:حماده حيواااان..
فاطمة:لا تسبين الريال..
مهرة:يوم اسب مروان ماتقولين هالكلام..
فاطمة:مروان شو يخصه الحين؟
مهرة:موتي لااه..
فاطمة:ماعندها رد تموتنا..
حمده:بس الحين بس ...
___
حطوا الفطور..((ايام رمضان))
الكل قعد و طبعا الشباب يو من الميلس و قعدوا في جهة و البنات في جهة ثانية..
البنات طبعا كل وحده احلى من الثانية و كل وحده مع كشختها جنه يوم العيد..
مهرة و فاطمة و حمده و روضة قاعدين مع بعض ..
وسارة قعدت مجابل حماده.. و حماده ما معطنها سالفة ..<<مسكين حالها..
طبعا ما تخلى السوالف ويا القعدات..
تموا لين الساعة 2 بعدين كلهم رجعوا بيوتهم ..
سارة ما قدرت تسوي خطتها لان حماده ماكان مسوي لها سالفة حتى يوم ترمسه ماكان يرد عليها ..
و طبعا عمار ماشل عينه عن .....<<بعدين بتعرفون عن منو ..

بيت ام وليد..
اول ما وصلوا على طوول مهرة دخلت غرفتها و قفلت الباب و اتصلت في سارة ربيعتها تخبرها كل شي صار..
مهرة:سلام عليكم ساروووتي..
سارة:اهلين ها شو صار قولي لي بسرعة..
مهرة:مافي شحالج شخبارج على طول تبين تعرفين ..
سارة:شحالج تمام هي انا بعد يلا قوووولي ..
مهرة:خلاص خلاص هدي بقول لج ..
و خبرتها الي صار...
((سارة و مهرة وااايد مع بعض ))
بعد ماسكرت من سارة تمت تفكر في الي شافته في العزيمة كيف كان عمار يشوف .........<<مب الحين..
تمت تفكر و قالت في خاطرها:لازم ادور في الموضوع ..
و طلعت من غرفة و راحت لغرفة فاطمة و قالت لها الي شافته عن عمار.. على طول قرروا ان يوم الاثنين يروحون بيت خالهم علي عسب يتناقشون في الموضوع مع حمده و روضة..
اتصلوا فيهم عسب يرمسونهم بالموضوع و يعرفون اذا كانو بيطلعون و لا لاء..
مهرة:السلام عليكم..
حمده:وعليكم السلام ها شو تبين..
مهرة:مالت عليج جي تردين المهم ماعلينا يوم الاثنين وين بتروحون؟
حمده:مابنطلع يوم الاثنين ليش ؟
مهرة:خلاص عيل الاثنين نحن في بيتكم..
حمده:اوك..
مهرة:لحظة قبل ماتسكرين وين روضة ؟
حمده:عند حمد..
مهرة:افففف انزين يوم بتشوفينها قولي لها تتصل فيني .. ترا في سالفة خطيرة يوم الاثنين بنرمسج فيها..
حمده:انززين يلا سكري خليني ارقد..
مهرة:انزين بخليج.. بني بعد الفطور..يلا باي
حمده:باي..
و سكروا..
___
بعدها مهرة دخلت قروب (Unique Girls) و تمت تسولف مع البنات بعدين رجعت تقرا روايات شارلوك هولمز..<<وااايد تحب هذي الروايات..
<<بعدين بخبركم عن شو يرمسون في هذا القروب..
___

__DEFINE_LIKE_SHARE__

MahraA · 07-23-2013, 01:58 AM

البارت الثاني..

في مدينه ثانية غير عن دبي..

ad

نشت عليا الساعة 3 الفجر عسب تتسحر.. و اول ما طلعت من الغرفة شافت في وييها اخوها محمد كان ياي يقومها عسب تتسحر ..

عليا:بسم الله الرحمن الرحيم .. خرعتني..

محمد:ييت اقومج زين انج ناشة يلا تعالي نتسحر..

عليا:ليش انت ماتسحرت؟

محمد:كنت اترياج..

عليا:انزين يلا نسير..

راحو المطبخ و طلعوا الاكل وياسين ياكلون..

محمد:ماتعرفين من عيال عمي بيون ؟

عليا:بعد المشكلة ما اعتقد بيخلونهم ايون..

محمد:كملت 4 سنين !!

عليا:ماعرف بس الي اعرفه ان فاطمة بعد ماتتخرج من الثانوية لازم اتي هني عسب الجامعة يعني بتشوفها..

محمد:ومهرة؟

عليا:ماعرف يمكن اتي عندها في الاجازة..

محمد:اشرايج نرمس بابا يسوي عزيمة 3 يوم العيد؟

عليا:يعزم منو ؟

محمد:كل اخوانه و يعزم عمي محمد و عياله جي يرومون ايون..

عليا:انت ليش تبا تشوفهم؟

محمد:ياخي مليت بروحي في البيت اخوج 24 ساعة بيت عمو و انتي راقدة!شو اسوي يعني ؟

عليا:و هم شو بيسوون وياك تراهم بيقعدون معايه انت ولد هم بنات!

محمد:خلاص لايون..

عليا:ليش ما ايون انا اباهم..

محمد:انزين خلهم ايون..

عليا:ليش تباهم؟

محمد:ماعرفنا لج قلنا لايون ماعيبج قلنا ايون قلتي ليش!o.o

عليا:خلاص اسكت خلني اكل ..

((نبذة عن عائلة ad

بو طارق الله يطول في عمره(سعيد)

ام طارق الله يطول في عمرها(عفراء)

بوطلال(طارق)-ام طلال(دلال)-عليا 17سنة-طلال15سنة-محمد13سنة-امنه-ناصر..

بوليد<<وضحت في البارت الاول..

ام مروان(موزة)-بو مروان(جاسم)-اروى 20 سنة -مروان 17 سنة-محمد15 سنة-منصور11سنة..

ام عبدالله(عائشة)-بوعبدالله(فهد)-عبدالله 15 سنة-فيصل 13 سنة-علي9 سنين..

((طارق-محمد-موزة-عائشة-راشد))اخوان

في بيت بو مروان..

مروان قاعد يفكر:4 سنين مرت و لا شفتها و لا قدرت اعتذر لها على الي صار ..بسبب المشكلة ما يون لبوظبي..لو ماسويت ذيج الحركات جان الحين هم هني..

محمد:4سنين مرت مانسيت؟

مروان:كيف انسى؟

طلال:على كل الي صار بيتمون بنات عمنا..

مروان:هم بنات خالي ..بنات عمك انت..

طلال:المهم من لحمنا و دمنا لازم نتقابل يوم..

مروان:تتوقعها بتي السنة الياية عسب الجامعة؟

طلال:انا سمعت من عليا انها ماتبا اتي هني تبا تدخل جامعة دبي او الشارقة..

مروان:كله بسبتي..

طلال:خلاص لا تفكر وايد بتشوفها في المستقبل..

مروان :متى هذا المستقبل ايي عسب اشوفها..

طلال:لين الحين تحبها؟

مروان:هيه..

طلال:حالك مايسر ولد عمتي ..

مروان:خلاص قوم يلا نطلع..

طلال:وين بنسير و انتي جي نكدي..

مروان:بنروح فراري وورلد..

طلال:ناسي ان رمضان .. بنرروح بعد الفطور..

مروان:تمام..عيل اتصل عبدالله اذا بيي ويانا و لا لاء..

طلال:انزين..

طلال يتصل في عبدالله..

طلال:سلام عليكم عبوود..

عبدالله:وعليكم السلام..<<من النوع الهادي

طلال:بتي اليوم بعد الفطور بنروح فراري؟

عبدالله:منو بييبني ؟

طلال:انا و مروان بنمر عليك ويا الدريول..

عبدالله:خلاص اوك ..

طلال:باي..

عبدالله:مع السلامة..

طلال يرمس مروان..

طلال:باجر بنمر عليه وافق..

مروان:اوك انا برقد..

طلال:بسك تفكر ياخي عيش حياتك مثل ما هي عايشة حياتها..

مروان:خلاص اسكت ..

طلال:بسكت بسكت..

بيت بوعبدالله..

عبدالله نزل تحت بعد ما رمس طلال..

عبدالله:يبه اليوم بعد الفطور بروح فراري وورلد مع مروان و طلال..

بوعبدالله:انزين..خذ الفلوس من البوك في غرفتي..

عبدالله:تماام..

دخل غرفة امه و ابوه لقى امه قاعدة على السيادة تقرا قران..

عبدالله باس راسها و قال لها:بروح اليوم بعد الفطور مع مروان و طلال فراري وورلد اوك..

ام عبدالله: اوك روح و افتح شنطتي خذ لك الي تباه..

عبدالله:لا ابويه قال خذ من بوكي..

ام عبدالله:خلاص كيفك يلا خلني اخلص..

عبدالله:اوك..تصبحين على خير..

عبدالله خذ الفلوس و طلع..

dxb

بيت ام وليد..

مهرة:خالو خالو ودينا فراري وورلد من زمان مارحنا..

شيخة:بنسير بعد العيد رمضان مايستوي..

فاطمة:لا خالو يصير بنروح الصبح بنوصل على الفطور بنفطر و بنروح فراري وورلد..

شيخة:انزين منو بيي وياكم...

مهرة:فاطمة نتصل في حمده و روضة ايون ويانا ؟

فاطمة:هي يبالنا..

مهرة:يعني ميوود بيي وياهم بعد خلاص خالو نحن الحين بنجهز اتصلي في احجزي الفندق بنقعد ليلة وحده..

شيخة:خلاص انتو اتجهزوا و انا بتصل في ناديه خليها تجهز بنروح بنمر عليهم..

مهرة:يعني يعقوب بيي!!

شيخة:اكيد نادية ماتهد عيالها..

فاطمة:يعني عبدالله و يعقوب و هدى بييون..

مهرة:طبعا..خلاص بسكم تصيعون الوقت سيروا اتجهزو..

الكل راح يتجهز و يتصل بإلي يبااه ايي..

((نادية ربيعة شيخة روح بالروح.. عيالها:عبدالله13سنة-هدى9 سنين-يعقوب سنة (1)..))

(شيخة خالة فاطمة و مهرة واايد وياهم و عايشة معاهم في نفس البيت..)

على الساعة 10 الصبح الكل كان متجهز قوم مهرة و فاطمة و شيخة مروا على حمده و روضة و مايد و على نادية و عيالها..

وصلوا ad راحوا الفندق الكل راح غرفته يصلي الظهر و يرقد ..

نشوا على الفطور فطروا و تجهزوا..

مهرة كانت شاله يعقوب (وااايد تحبه)..

في نفس الوقت مروان و طلال راحوا يشلون عبدالله..((بالدريول))

و وصلوا فراري وورلد..راحو الالعاب و تمو يلعبون...

من طرف ثاني كانو توهم داشين..

خذوا التذاكر و دخلوا نادية و شيخة يلسوا وين المطاعم وياهم هدى ..

عبدالله و مايد و مهرة و روضة و حمده و فاطمة راحوا عسب يلعبون .. مهرة شلت يعقوب وياها لانها مابتلعب بكل الالعاب ..

بغوا يدخلون لعبة فورمولا روسّا طبعا مهرة تمت مع يعقوب برع لانها لعبة ماتسمح للاطفال و روضة تخاف من السرعة فتمت وياها...

طابور هذي اللعبة وايد طويل .. في مقدمة الطابور كانو مروان و طلال و عبدالله..

و اخر الطابور فاطمة و حمده و مايد و عبدالله ولد نادية...

و مهرة و روضة مع يعقوب برع ينتظرونهم ..

بعد ماخلصوا من اللعبة طلال و مروان و عبدالله طلعوا .. في طلعتهم لمح مروان مهرة..

مروان:هاي مب مهرة؟

طلال و عبدالله صدوا عسب يشوفون..

طلال:اوويه هاي مهرة!!o.o

عبدالله:منو هذا الولد الصغير؟

مروان:و انا شدراني؟

طلال:يمكن مضيعين؟

عبدالله:ماعتقد لانه ياسة تسولف..

طلال:خلونا نسير نسأل..

مروان صد له:من صجك من 4 سنين ماشافتنا الحين نروح نسألها..

عبدالله:نسير ؟

طلال:هي هي نسير..

مروان:يلا امشي..

و هم يمشون عسب يقربون من مهرة و روضة .. فاطمة و عبدالله و مايد و حمده طلعوا..

جان يوقفون طلال و مروان و عبدالله.. و كانوا يسمعون الحوار الي دار بينهم ..

مهرة:ها مايد اشرايك في اللعبة؟

مايد:اففف تخرع زيين ما زعت..

عبدالله؛ولد نادية:اصلا انت خوااف..

مايد:اييه انا مب خوااف انززين..

مهرة:انزين عبوود اوزيل ماقالت خلاص مابركب..

عبدالله؛ولد نادية:اكيد قالت نفس اخر مرة بس انا و حمده ماخليناها..

فاطمة:الله ياخذكم كان قلبي بيوقف..

حمدة:بعدين اخوي يموت مافينا ..

فاطمة بحايب مرفوع:تتمصخرين..

مهرة و روضة:هههههههههه في الجبهة..

عبدالله؛ولد نادية:تقصدون حماده..

حمده:انت كيف عرفت..

فاطمة:مهرة تقدر تيود لسانها..!!

مهرة:هي حبيبتي اقدر لو ما اقدر جان انا و انتي الحين في القبر..

فاطمة:انزين خلاص جب..

مهرة:لو انا مو شاله حبيبي جان عطيتج كف يدوخج..

فاطمة:لا الله يخليج خفت ..

روضة:بس انتوا دايما تضاربون عورتوا راسي تراكم !!

مهرة:اووب منو الي راسها يعورها ليش امس ما رقدتي؟

روضة:جي انا قدرت انام حمد عور راسي من كثر ما يتأمر عليه..

فاطمة:ريل مهرة!

مهرة:ريل ريلج!:@

حمده:مهرة رمسي عربي..

مهرة:ريلي اونه!!

فاطمة:يعني ريلي..

مهرة:خلاص امشوا امشوا يعقوب مل منكم..

فاطمة:مل منج يمكن..

مهرة:ريلي ما يمل مني..

مايد:مهرة بس بس انتي و يعقوب مالج..

مهرة:اتغاار؟؟

ماايد:امريكية..

فاطمة:اشمعنه مهرة بس تقول لها امريكية!؟

ماايد:انتي ماتشوفين صورها كيف جنها امريكية مع شعرها..

مهرة:انت ماصدقت اراويك صوري تروح تنشر الخبر!!

روضة:هي والله خبر الكل..

رن تلفون عبدالله؛ولد نادية رد..

نادية:وينكم ؟

عبدالله:الحين يايين باي..

و سكر..

عبدالله؛ولد نادية:يبونا تعالو نرد بعدين بنروح نلعب لعبة ثانية..

روضة:خاطري في شعر بنات..

مهرة:هي انا بعد يلا نروح..

و مشوا رادين لهم..

__

و الي كانو يسمعونهم كان منصدمين لانهم مايعرفون منو عبدالله و منو ماايد .. و عن شو كانوا يرمسون.. بس مروان كان معصب من الي سمعه عن فاطمة و حماده..

__

يوم وصلوا عند شيخة و نادية..

شيخة:يلا بسرعة نرد بتصير الساعة 3 و نحن هني متى بنرجع باجر..

نادية:عبدالله شل الاكياس الي هناك..

مهرة:انزين نحن بننزل لين ما اتون انتو بناخذ لنا ايس كريم و بنترياكم تحت..

نادية:اوك..

بعد الي صار على طول طلال و مروان و عبدالله راحوا بيت مروان..((بيباتون هناك))..

و قوم مهرة و فاطمة اول ما رجعوا الفندق رقدوا...

مروان كان يفكر بالكلام الي سمعه ..

يقول في خاطره:كيف فاطمة بتاخذ حماده !! ككيف!! و انا ما اعتذرت لها على الي صار...

و ظل يتذكر المشكلة الي صارت و سببت الانقطاع عن اهل بوظبي..

((بسبب المشكلة الي صارت فاطمة ومهرة ما يحبون ايون بوظبي وايد ايون ويرجعون اليوم الثاني .. و هم يرمسون عماتهم و عميمهم بس مايرمسون عيالهم ..بس عليا الوحيدة لانها في الاجازة اتي دبي و تبات عندهم شهر في كل اجازة))<<مابخبركم الحين عن المشكلة..

نشوا على الساعة 10 يتجهزون عسب يرجعون دبي..

مهرة:رووضة لا تنسين الايفون في الجرج ..

روضة:شليته حطيته في شنطج..

مهرة:فاطمة حطي مرضعة يعقوب في شنطتي برضعه في السيارة..

فاطمة:حطيته في شنطة خالو نادية..

مهرة:خلاص بشله منها..

عبدالله؛ولد نادية:مهرة ترا يعقوب شرب حليبه..

مهرة:تتمصخر!!!o.o

عبدالله؛ولد نادية:والله صجج!!

مهرة:و انا مجهزه عمري ممااالت..

حمده:مهرة بسج كلام و خذي الشنط حطيهم جدام الباب عسب ايون يشلونهم..

مهرة و هي تشل الشنطة:اففف الشنطة وايد ثجيلة..

عبدالله؛ولد نادية:ييبي انا بشلها عنج..

وشلها راح يوديها عند الباب..

مايد:مهرة يلا لبسي عباتج و شليتج و نزلي..

مهرة:شعري مبهدل بعدله بعدين بنزل..

فاطمة:خلاص عيل نحن بننزل..

روضة:اوك انتو نزلوا و انا بتم ويا مهرة..

بعد مانزلوا هم تمت روضة مع مهرة..

روضة:شو الشي الي كنتي تبين تقولين لي اياه..

مهرة:تدرين انا شفت مروان و عبدالله و طلال..

روضة:o.o متىى!!

مهرة:امس يوم كنا نتريا قوم حمدوه يطلعون من اللعبة شفتهم هم يطلعون ..

روضة:اوووي!! هم شافوج؟

مهرة:ماعرف شفتهم بعدين خليت عمري ما اشوفهم..

روضة:شو بتسوين الحين ..

مهرة:طاااف ما بهتم..

روضة:نخبر فاطمة و حمده؟

مهرة:أكييد بس اتريا انتم بروحنا..خلاااص خليني اعدل شعري..

عدلت شعرها مهرة و لبست عباتها و شيلتها و نزلت مع روضة تحت و اتلاقينا..

فاطمة:وينكم تأخرتوا..

روضة:لين ما اختج تخلص طبعا بطول..

حمده:تتحرين عمرج برينسس يلا جدامي السيارة..

مهرة:وين يعقوب ؟

حمده:هذا الي يهمج!!:@:@

فاطمة:يعقوب مع امه..

مهرة:امشي روضة بنروح نشله..

مشينا شليناه و رحنا السيارة خلصوا اجراءات الفندق ركبوا السيارة و رجعنا دبي من ككثر التعب رقدنا في السيارة كلنا الا شيخة طبعا لانها كانت تسوق..
__DEFINE_LIKE_SHARE__

MahraA · 07-23-2013, 02:05 AM

الشخصيات خيالية و الاحداث خيالية و مب حقيقية..

اتمنى البارتين يعجبكم..

شكرا لكم.. __DEFINE_LIKE_SHARE__

tamy99 · 07-23-2013, 02:44 AM

الرواية وايد حلوه الله يعطيج العافية و اتمنى لج التوفيق ... استمري حبيبتي __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
قصة خيالية : رواية : بشويش ضمّينـي علـىَ الصـدر تكفيـن ..وإذاا طلبـتـك شــيّ .. لااا تمنعيـنـي للكاتبة :Broken Dream R3	L_almuhairi	قصص و روايات	5	06-15-2013 01:59 AM
رواية : بعيد عني لكن أحس أنفآسه هنآ ..~ للكاتبة : حلوة ومخترشة ~	F 6 A M Y	استراحة قصص وابداعات الاعضاء	10	02-16-2013 05:27 PM
رواية جديدة للدكتورة ناعمة الهاشمي 2012 تعالوا يا بنات رواية شما وهزاع احلى رواية	محروم.كوم	منتدى أخبار المواقع والمنتديات العربية والأجنبية	0	04-21-2012 05:50 PM
نقاش رواية مدينة النجوم للكاتبة فرح الصُماني	محروم.كوم	منتدى أخبار المواقع والمنتديات العربية والأجنبية	0	03-27-2012 07:50 AM
[.. بسوي مثل ماشوفك تسوي وفعل افعالك \\ من صنع مزاجي الحب ..~	»●مزآجيئےآلحـب●«	تصاميم الاعضاء	11	11-18-2009 01:43 AM