سالفة:تفيختنا الشيطانيه..قوافي

محروم.كوم · #1 06-08-2013, 09:30 PM

حياكم الله مشرفينا الافاضل

ويامرحبا بكم جميعاً أخواني ،،أخواتي ،،زوارنا الكرام

مواقف ولحضات ليس لها تفسير تمر كشيئ كان ،،لكن لا تمر معنا وتضل ذكرى مضحكه او محزنه..

كنت بدوله غير عربيه ولا يعرفون للاسلام طريق إلا القلة منهم هداهم الله وادخل بقلوبهم الأيمان ..

والزمان يصادف عيد طرد الارواح الشريره (الهلاوين) ..

قبل هذا اليوم بأسبوع كنا بالسوق واشتريت لبنتي الصغيره تفيخه اللي تعبى ماده غازيه (الهيليوم )تخليها دايم مرتفعه عن الارض وان ماربطنا فيها شي ثقيل طارت ويجي عليها رسومات لشخصيات كرتونيه معروفه يحبونها الاطفال..

التفيخه مع الوقت نسمت وصارت شبه فارغه من الغاز وخلاص استقرت على مسافة مترين من الارض ولا عاد تطير حتى لو شلنا منها الحديده اللي مثقلتها ..

نرجع للعيد

يوم حفلهم او عيدهم يلبسون ملابس على شكل هيكل عظمي او ساحرات او جنيات صغيرات ويعلقون اعشاش عنكبوت وحشرات كبيره لأعتقادهم ان الارواح تتمركز فيها والباب يزين بأضائات خافته وامام الباب يحطون قرع مدور مفرغ من الداخل مخصوص لهذا اليوم ويولعون فيه شمعه بعد تفريغ عيون وفم له اسنان معوجه وإما مبتسم او غاضب شكل الوجه..

بهاك اليوم طفى الكهرب على الساعه 2 من الليل ومافيه احد بالصاله غيري والجميع نيام وكنت أكلم وحده من الاخوات السعوديات اللي هناك بالتلفون تستفسر عن رحله تابعه للملحقيه بنطلعها بكره وقاعده اقولها وش تجيب معها ..

نرجع للتفيخه اللي صارت ماعاد تتحرك ولولا بنتي كان قد حطيتها بالزباله خلاص مامنها فيده قرطاسه صايره ،،

استئذنتها وجبت شمعه وولعتها ورجعت اكمل كلامي مادريت إلا والتفيخه الميته تتحرك ،، الصاله كبيره تقريباً 6×8 وهي بزاويه وانا بالزاويه المقابله والمسافه كبيره ،،وتتحرك وتمشي باتجاهي انا قعدت اناظر طارت عيوني وكذبت اللي اشوفه وذي تقرب شوي شوي لين صارت الاعصاب خرطي وما وقفت إلا قدامي وانا اقول للي تحاكيني والله لو تدرين يام فلان وش انا اشوف الحين!! قالت وش تشوفين ؟؟

قلت تفيخت بنتي خربانه وطارت لحاله لمين وقفت عندي !! واجدع السماعه وركض على فوق واعوذ بالله من الشيطان الرجيم باسم الله الرحمن الرحيم والله ما عاد ادري اي الرجلين تمشي ولا انا اركض أو اناقز من الخوف ‘‘ المهم وعلى فوق البيوت خشب وزط زط وانت تمشي عاد مابالك وانت تركض !!

قام ابو العيال مفزوع وجع وش بتس قلت اللي صار وهو يناظرن يحسبن اختفيت :

نامي نامي وسمي بالله

اي انام اقولك التفيخه تمشي

قال :

افتحي الباب هي وراتس هذي تهيؤات قلت لا لا

فتحت باب غرفتي ولا التفيخه ورى الباب وانا اللي امسكها من حر مانس والشجاعه على قرطاسه واقصها بالمقص الين نصها موب كلها وفتحت شباك غرفتي وجدعتها يوم جا بكره ولينه لا زقه على الباب القزاز حق الصاله للحديقه الخلفيه(بيك يارد) وغرفتي على الجهه الثانيه بوجه البيت يعني وشلون لفت وجت وطيران مستحيل،، والبيت عباره عن كوخ على شكل 4دبلكسات ملتصقات كبار..

انا شفتها وبصراحه صكيت الستاره واسكت وتعوذت من الشيطان وقلت لين قضى عيدهم وراحت فتحت الستاره..

تحياتي للجميع

اختكم

..قوافي..
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
سالفة :السماوه..قوافي	محروم.كوم	منتدى أخبار المواقع والمنتديات العربية والأجنبية	0	02-01-2013 06:10 AM
سالفة:من خاف سلم..قوافي	محروم.كوم	منتدى أخبار المواقع والمنتديات العربية والأجنبية	0	01-20-2013 01:40 AM
سالفة:عرس الأراضي..قوافي	محروم.كوم	منتدى أخبار المواقع والمنتديات العربية والأجنبية	0	11-18-2012 02:40 AM
سالفة:رسب ثمن سقط..قوافي	محروم.كوم	منتدى أخبار المواقع والمنتديات العربية والأجنبية	0	07-07-2012 01:20 AM
سالفة:طين جدي.قوافي	محروم.كوم	منتدى أخبار المواقع والمنتديات العربية والأجنبية	0	10-11-2011 08:30 PM