رثاء للشيخ: محمد بن سليمان المهوس التميمي رحمه الله

محروم.كوم · #1 05-16-2013, 06:30 AM

‏هذه قصيدة صالح الهديرس في رثاء لخاله

الشيخ :
محمد بن سليمان المهوس التميمي
رحمه الله وأسكنه فسيح جناته

مرحوم ياشيخ(ن)بحايل دفناه
عصر السبت قالوا عليه الصلاتي

شيخ المهوس ياحسافه فقدناه
وياليت ربي ماكتب له مماتي

موته عزالله شب بالقلب حسراه
دلت تلهّب بالحشى له لضاتي

خسارة(ن) وياكبرها من خساراه
من حرها يبست اشروك النباتي

لو به مصد عنه نصد المنياه
غصب(ن) علينا ومابيدينا اسواتي

حايل عزالله حزّنت مع قراياه
وصارت ضواوي شرّعه طافياتي

والله يالو به حيلة(ن) كان نفداه
واقول ترها فدوة(ن) لك حياتي

وماهي عزالله لوفديته كثيراه
خيوره علينا هالوفي سابقاتي

شيخ(ن) جمال الطيب يوضي امحياه
وقدره رفيع ابعالي النايفاتي

ومرحوم ياللي بالمراجل عرفناه
مايموت ذكره باتل(ن) له حياتي

ننساه هذي سابع المستحيلاه
وتبتل افعوله للأبد ثابتاتي

مثل الجبال الشامخه والمنيفاه
اللي على طول الزمن راسياتي

كل(ن) يحبه هالسنافي ويبغاه
شيخ(ن) عزالله ادرك الطايلاتي

ياما اجزلت من طيب الجود يمناه
طيب(ن) جهربه وطيب يذكر خفاتي

وياما عزالله أرخص المال واعطاه
حيثه كريم(ن) ماذكر به قصاتي

كم فزعة(ن) للي تنصاه لباه
راح لبو محسن منجز اللازماتي

ابعد عن اللي جاه عسره وضيقاه
وخلى اهمومه كلها طايراتي

حيث المراجل هي أساسه ومجناه
حمولته أمجادها ثابتاتي

عقب الامير اللي حلا الجود يزهاه
يوم الليالي عدوه كايداتي

له شهرة(ن) بذيك السنين القديماه
بدور(ن) مضى له بالوسيطاء وفاتي

شيخ(ن) معروف(ن) بالوفاء والاماناه
وسنينه اللي عاشها شاهداتي

راع الشعيب بعلم المراجل عرفناه
وماتنسي افعاله الماضياتي

ومن المؤسس جاه عده خطاباه
يقول خبر من يسوق الزكاتي

خلاه يآمر ونصّبه للقياداه
حيثه سمع بعلومه النابياتي

حمولة المهوس ونعم الشكلاه
مشايخ(ن) أفعالهم موضياتي

وهذا أبومحسن بالقصايد رثيناه
اللي عليه أدموعنا ساكباتي

عسى على قبره تصب الغزيراه
مزون(ن)تهل أمطارها صافياتي

وعسى اجنان الخلد بيته ومثواه
عند السؤال ويوم وقت الثباتي

وسنين الزمن ياشين غدره وبلواه
تقلب علينا أمرار عقب الحلاتي

أحد(ن) بهالدنيا يعيش ابمعاناه
وأحد(ن) اسنونه دايم(ن) ضاحكاتي

العمر والله خاسر(ن)من ترجاه
يبقى العمل واعمارنا رايحاتي

وأكبر حضيض اللي على الزين ممشاه
ويكسب بهالدنيا جميل الصفاتي

الذكر يبتل له اسنين(ن)طويلاه
وتبقى فعول أهل الكرم شامخاتي

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
أكثر من 700شريط للشيخ محمد بن صالح العثيمين رحمه الله تعالى	محروم.كوم	منتدى أخبار المواقع والمنتديات العربية والأجنبية	0	07-26-2012 03:50 AM
200 ريال ذهب بروف للشيخ خالد بن محمد القاسمي رحمه الله	rama6974	بيع و شراء و عروض التجارية	1	03-18-2012 07:47 PM
قصيدة رثاء / سعيد بن محمد بن صالح الشهري - لوالده ( رحمه الله )	محروم.كوم	منتدى أخبار المواقع والمنتديات العربية والأجنبية	0	02-15-2012 01:40 PM
رثاء للشيخ أحمد بن زايد آل نهيان رحمه الله من كلمات الشاعر مطر سالم النيادي	محروم.كوم	منتدى أخبار المواقع والمنتديات العربية والأجنبية	0	04-03-2010 03:30 AM
مدرسة سيدنا محمد صلى الله عليه وسلم - للشيخ عبدالحميد كشك رحمه الله تعالى -	محروم.كوم	منتدى أخبار المواقع والمنتديات العربية والأجنبية	0	06-10-2009 02:00 AM