نصائحكم في ترهيم لاندكروزر من 2001 إلى 2007

محروم.كوم · #1 03-29-2013, 07:00 PM

السلام عليكم ورحمه الله وبركاته

حي الله كلن بأسمه

وش علومكم يالربع عساكم طيبين ؟

مثل ماهو مكتوب بالعنوان

السالفه ومافيها إني لفيت المعارض عن بكره ابيها ادور لي لاند 2003 - 2007 نظيف و سعره معقول ولا حصلت للأسف الشديد .. حصلت نظاف للامانه لكن الاسعار نآرر !!

فـ طرت على بالي فكره و قلت مالها الا رجالها .. استشير اعضاء مكشات وهم اللي بيجيبون العلم

عندنا لاندكروزر GXR 2001 فل كآمل خلفيه لكزس

لكن عذروبه انه اوتوماتيك و انتم تعرفون الجكسار الاشكال الاوله لا صار اوتوماتيك شلون .. يالله يالله يشيل نفسه

بس بما انني ما اقوى على اسعار اللاندات المستعمله النظاف فـ مالها الا اني انفض هاللاند نفففض !!

طبعاً ميزه الموتر انه على يد الوالد و بعد اجتماعات سريه و مفاوضات تم الوصول إلى اتفاق اني اخذ موتر الوالد و اعطيه موتري " فكتوريا " بما انه ماهوب راعي برآن

طيب نجي الآن للزبده :

الموتر ماشي 340 الف إلى ساعه كتابه هالموضوع !

الموتر قيره حول تخبيط و يبي له شغل و ان شاء الله الاسبوع الجاي ابنقز به لتشالنجر بالصناعيه القديمه بالرياض و يشوفون وش علته

الشيء الثاني بطن الموتر ماهوب ذاك الزود يبي له شغل شوي فيه اصوات قرقعه و يبي له شغغل ايضضاً .. المساعدات جدد لكن فيه بلاوي مدري وشن و هذي ان شاء الله دواها عند العضيب ينخل الموتر نخل !!

الشيء الثالث .. الموتر فيه تهريب زيت دركسون ولا اتوقع ان التهريب من العلبه لأني صلحتها قبل كم شهر .. اتوقع ان البلا الدوده و معروف هالموديل وبالذات 2001 بمشاكل الدوده فيه .. الموتر يلعب مع الخط و الدركسون لفته ثقيله عند الوقوف و هذي إن طلع العلم بالدوده شكلي برخي الريال و اغيرها بجديده بدون اصلاح ووجع راس لأن هالموديل معروف بمشكلته مع الدوده زي ماقلت لكم ,,

الشيء الرابع : الموتر يطلع منه دخان ازرق احياناً و فيه ريحه من عند الشكمان كأنها ريحه زيت محروق اتوقع انه شنبر ولا ؟ وهل شغلتها شغله و بتكلف ؟ او تنصحوني ادور لي مكينه فكسآر ياخذ الرجيع واخذ الفكسار وادفع الفرق واسقطها على موتري ؟ وش تشورون عليه به ؟

خامساً : البدي ابنخخله نخل ايضاً , رفارف قدام يمين ويسار بغيرها بجدد و برش الموتر كامل فررن عند ورشه شغلها مضبوط رشيت عندهم موتري الاول و جلس 6 سنوات و ماشاء الله مابان عليه انه مرشوش .. مع تعديلات ايضاً على الشكل الخارجي نتطرق لها في النقطه السادسه

سادساً : بعد كل هالشغل إن شاء الله اذا تم انجازه نجي للنقطه الاهم .. وهنا مربط الفرس .. تغيير شكل السيارة من كذا :

* الصورة ليست لي ( مع اعتذاري لصاحب الصورة )

إلى هالشكل " بأذن الله " و هذا هو طموحي :

طيب .. بعد قرأتكم للنقاط اللي فوق هل فيه تشورون علي بشيء معين ؟ هل عندكم اضافات ؟ ان جزمت ان شاء الله الاسبوع الجاي ببدأ مع قير الموتر و راح اسوي تقرير و موضوع متكامل من لحظه الصفر إلى ان شاء الله يظهر بالشكل اللي اطممح له

* نقطه اخيره : هل يوجد مشاكل من تجديد شكل السيارة الخارجي عند الفحص الدوري ؟

لا تبخلون علينا ياللحى الغانمه بالمشورة

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
لاندكروزر 2001 جي اكس ار	محروم.كوم	منتدى أخبار المواقع والمنتديات العربية والأجنبية	0	09-15-2012 01:50 PM
ترهيم انوار لاندكروزر الى 2007	محروم.كوم	منتدى أخبار المواقع والمنتديات العربية والأجنبية	0	08-25-2012 11:10 PM
ترهيم ماكينة جمس 1995 الى 2007	محروم.كوم	منتدى أخبار المواقع والمنتديات العربية والأجنبية	0	06-04-2012 01:50 PM
لاندكروزر 2001 للبيع	محروم.كوم	منتدى أخبار المواقع والمنتديات العربية والأجنبية	0	04-19-2010 12:00 PM
ترهيم جي اكس الى 2007 مساااعدتكم لاهنتم	محروم.كوم	منتدى أخبار المواقع والمنتديات العربية والأجنبية	0	03-06-2010 06:10 PM