قصة اماراتيه اتصييح .. - الصفحة 4

forza alain · 01-12-2013, 02:38 PM

المشاركة الأصلية كتبت بواسطة بَنتْ ذآگ آلأمٓير

ما في بارت؟

لا امبلى شي بارت __DEFINE_LIKE_SHARE__

forza alain · 01-12-2013, 02:39 PM

حصة : سالم ، جنك طولت ويا روضه يلا خلص منها عندي لك صيده غيرها .
سالم: جريب يا حصة ، بس خليني احصل الي آباه منها ، أنا ما حصلت شي من وراها الي فواتير تليفون وإنترنت ،والبترول بعد عشان هالدرب الي أصكه لين الجامعة .
حصة : أصلا هاي السخيفة ما ايي من وراها إلا الخساير ، انته استغل الوضع دام أخوها وريلها مسافرين .
سالم : جريب بتسمعين خبرها ، وبتفرحين وبتتشمتين في نفس الوقت بأعز صديقة لج .
حصة : لا تقول أعز قول اكره وحده في حياتي.
سالم : فقيرة روضه تتحراج اربيعتها المخلصة الوفية، ما تدري بالكره الي في قلبج .
حصة : ههه ، وما تدري بعد انك تلعب عليها ؟ اعتقد انه أنا و انته متساوين .
سالم : آخ منج مب لسان .
حصة : برايك الحينه ، ابغي البشارة هل الأسبوع . سالم : أكيد انشالله ، اطمني واستريحي.

سالم اتصل بروضه وهيه في الجامعة ..
سالم : هلا والله بحياتي .
روضه وهيه أتصارخ : ســـالم فديت روحك أنا ؟ البنات كلهم صدوا عليها .
سالم : روضه ممكن اطلب منج طلب ؟؟ بس ما أترديني.
روضه : لو تطلب عمري بعطيك إياه .
سالم : ابغي اطلع وياج ، أنا وأنتي بس روحنا .
روضه : امم ، اوكي موافقة ، ناصر و محد مسافر ما بيدري ، و أمي مسكينه تتحسبني أتأخر في الجامعة عشان الدارسة ، خلاص تم .
سالم : يالله يا فرحتي أنا ، اليوم الساعة 4 ونص بمر عليج .
روضه : لا تعال قبل دوامي يخلص 1 ونص ، عشان ايلس وياك .
سالم : خلاص تم .
وظهر سالم ويا روضه ، وحاطوا ويا بعض ، وعقب ساعتين ساروا برج العرب ، وحجز لها سويت ،
روضه في هاييج اللحظة نست كل شي ، نست انه ريال غريب ... وطبعا ...
و ياليت لو روضه عقب الي استوي بينها وبين سالم ندمت أو شي بالعكس عادي ، أتكرر الي استوي من بينهم ، كانت واثقة 100% انه يحبها ، وكانت واثقة انه سعيد بيطلقها ، واثقة انه عقب طلاقها من سعيد بتاخذ سالم .
طبعا سالم كان مستانس حصل الي يباه ، وخبر حصة ..حصة ما قصرت فضحتها من بين البنات ، وصل الخبر لريسه ، ريسه ما صدقت انه روضه جي أتسوى ، وسارت ريسه عشان اترمس حصة واتخليها تسكت عن الرمسه الي تقولها..
ريسه : حصة ، انتي شو هالرمسه الي اتقولينها عن روضه ؟؟
حصة : أنا ما قلت غير الصدق وأنتي ما يخصج ؟
ريسه : شقايل ما يخصني روضه اربيعتي وأخت ريلي ؟
حصه : السالفة سالفة أخت ريلج ، انتي بس كنت مرابعه روضه عشان أخوها ، شو تبين بعد حصلتي ناصر الحلو؟
ريسة وهي مغيظة : انتي قليلة أدب وهلج ما عرفوا يربونج ؟
حصه : أنا قليلة أدب ، يالصايعه يالضايعه .
ريسه وهيه فاجه عينها : شو هل الألفاظ الوقحة .

حصة : أنا وقحة ؟؟ يا حيوانه .
ونشت سطعت ريسه وضربتها ، وشرمخت ويها ، واستوت فضحيتهم فضيحة من بين البنات ، ريسه طبعا حمدت ربها انه ناصر مب موجود لانه لو عرف بيجلب الدنيا على راس روضه ، فقالت أنا بتفاهم وياها .
ريسه سارت لروضه البيت على أمل إن يكون كلام حصه غلط ، دقت عليها باب الحجرة ..
روضه : منو ؟
ريسه : أنا ريسه يا روضه ؟؟ . روضه : افتكيت من ريلج طلعتي انتي ؟
ريسه : روضه ممكن بس ابغيج بكلمتين ؟
روضه : أوف لحظه ؟ كانت اترمس سالم على المسن ، حطت brb
ونشت وفجت الباب ، روضه : نعم شو تبين ، ناصر مب هني .
ريسه : أنا يايه عشانج انتي .
روضه : والله أنا ما قلت لج تعالي عندي ، أوه مسكينه ليش ويهج جي متشوه .
ريسه وهي مب عارفة شو تقول : الي في ويهي هذا بسببج انتي ؟
روضه : والله أنا ما قلت لج رزي ويهج وسيري دافعي عني.
ريسه : روضه انتي شو تقولين ، أتعرفين حصه شو قالت عنج .
روضه : أتقول الي أتقوله انتي ما يخصج وأنا ما يهمني كلامها.
ريسه : روضه انتي اتخليني اصدق الكلام الي ينقال عنج .
روضه : صدقي ما يهمني .
ريسه : الله يسامحج يا روضه ، بس أبا اقولج كلمه أخيره ، قبل ما أسير عنج ؟
روضه : الله لا يسامحني انشالله قولي وخلصيني .
ريسه : صدقيني كنتي وبتظلين أغلى واعز صديقه في حياتي ، وبتم أدافع عنج لين ما أموت ، وبدعي لج دوم من قلبي ، وأنا متاكده انج في يوم بتصحين .
روضه : يالله على الصديقة المخلصة والحنونه والوفية .
ريسه : واقولج بعد إذا خفت عليج اكثر بخبر ناصر ، ولا تزعلين مني ؟
روضه : تهددني بناصر ، خبريه ما يهمني تسمعين يا .... مرت أخويه .
ريسه والدموع أتصب من عينها : حرام عليج انتي ليش جي اتعامليني يا روضه ، ليش اتحسيسني اني حشره عندج
، اني ولا شي. دزت روضه ريسه وسكرت الباب في ويه ريسه
روضه و هيه أتصيح : طلبت شي من حقي ، سعيد مثل أخويه ، ما أتخيله يكون ريلي.
ناصر : اخوج ، وين هالرمسه هاي من زمان؟؟ وشو تتخيلين وما تتخيلين .
روضه : هدني انته ما يخصك فيني ، أنا وسعيد كيفنا .
ناصر : الظاهر انه يبغيلج تربيه من أول ويديد و محد بيربيج غيري .
روضه وبكل وقاحة: رب عمرك و سنع حالك عقب تعال ربني ، انته أصلا لو ريال ما بتمد ايديك عليه.
ناصر : أربى عمري واسنع حالي أنا بعلمج شقايل الرياييل الحينه ؟
ضرب ناصر روضه ضرب من الخاطر سطرها من الطارقات ، أم روضه و ريسه سمعوا الصريخ وربعوا لحجرة روضه ..
أم روضه : ناصر هد أختك ذبحتها من الضرب.
ناصر: بنتج هاي ما تستاهل إلا الضرب .
أم روضه : و غلاتي عندك اتهدها ، استهدا بالله و أتعوذ من إبليس . و خذت ألام ناصر وطلعته من الحجرة . تمت ريسه ويا روضه ، والدم يصب من خشمها ..
ريسه : شو سويتي يا روضه ، أنتي أتعرفين انه ناصر عصبي ؟
روضه وهي أتصارخ : جب ، طلعي براع ، أنتي هني عشان تتشمتين فيه ، طلعي براع ؟؟
ريسه : أنا اشمت فيج .
روضه : أنتي حماره ما تفهمين طلعي براع..براع .
وطلعت ريسه وهيه مستغربه روضه وصل مستوى ألفاظها لهاي الدرجة ، وينها روضه الهادية الخجولة المؤدبة ، وين طار هذا كله .
أم روضه هدّت أعصاب ناصر عقب ما خلته يتوضي وشربته ماي.
أم روضه : ناصر انته شقايل أتمد ايديك على أختك ، محد من إخوانك جد سواها ، انته أتعرف لو أبوك عرف شو بيسوي؟؟ .
ناصر وهو محرج : أنتي أتعرفين بنتج مسودة الويه شو تبا ، بنتج تبغي تفضحنا .
أم روضه : بعيد الشر عن الفضايح ، شو مستوي زيغتني ؟
ناصر وبكل قهر وغيط : بنتج المحترمة تبا تطلق وتوها ما كملت شهر حتى من ملجت ، شو بلاه سعيد يامي والله إنها ما بتحصل حد يحبها شرات سعيد ، أنا اكثر شي قهرني حالة سعيد ، امايه حرام الي فيه سعيد بسبة بنتج حرام والله حرام .
روضه : تطلق ؟ وا فضيحتي من بين الحريم والعرب ، ينيتي يا روضه ويلستي ، محد جد أطلق من عايلتنا ، بعدين سعيد ما بلاه شي عشان تتطلق؟!!! .
ناصر : تقوليلي أنا سيري رمسي بنتج ، والله يا أمي على قص ارقبتي إذا أطلقت ، موتها على ايديه ، ولا تتحسب عشان خاطر عيونها هذا كله ، بس عشان خاطر سعيد لانه سعيد ما يستاهل .
أم روضه : ما عندي بنات يطلقون ، هكن خواتها عرسن وكل وحده في بيت ريلها معززة ومكرمه، أنا بعرف أتصرف وياها ، انته هد عمرك وما بيتسوي إلا كل خير ، وشوف لا تخبر أبوك ولا حرمتك حتى ، ووص سعيد وقوله انه ما يخبر هله تسمعني .
ناصر : انشالله يامي لا توصين حريص ، أنا الحينه بسير عند سعيد ، ويلسي انتي ويا هل ريسه.
ناصر سار بيتصل في سعيد ،شاف 10 مس كول من سعيد ..
ناصر : هلا سعيد وين انته ؟
سعيد وهو بيتخبل : أنا هني ، انته وين ، شو سويت بروضه يا ناصر ؟
ناصر : غسلت شراعها ، هذا ويها شوهته ، سويت لها اعاده تصنيع .
سعيد وهو يصارخ: ليش يا ناصر ، هاي أختك حرام أتمد ايديك عليها ، هاي روضه يا ناصر ؟
ناصر وهو محرج : سعيد لا تقهرني كثر ما أنا مقهور، عقب الي سوته فيك و أدافع عنها بعد .
سعيد : هاي مب أختك يا ناصر ؟؟ ناصر: أختي واحبها ، بس روضه دلوعه ، والدلع الزايد يفرط البنت ، يعني هاي سوي تبا أتسويها تتطلق ؟؟
سعيد : من حقها تتدلع ، وهيه ما طلبت إلا حقها ؟ . ناصر : يااالله منك ، انته وين ؟

سعيد : أنا على بحر جميرا . ناصر : رومانسي انته وايد تراك أنا الحينه ياينك .
ناصر كان من داخل إنسان وايد طيب وحنون ، وكان زعلان لانه هاي أول مره يمد ايديه على أخته ، بس في نفس الوقت ما قدر يتمالك نفسه يوم حس بالحزن الي كان في سعيد.
روضه يلست أتصيح ، ويوم هدّت اتصلت بسعيد ، سعيد كان على البحر يترايا ناصر ، ويوم شاف في الموبايل ( حبيبتي ) فز من مكانه وفز قلبه وياه ..
سعيد : روضه ؟؟
روضه : يالحقير ، ارتحت الحينه هذا الي كنت تباه استوي ، بس صدقني بعرف شقا آخذ حقي منك . سعيد : روضه عطيني فرصه أدافع عن نفسي ، أنا ؟؟
روضه : جب ولا كلمه ، وبعد مطرشلي مسج بودعك يالضنا ، مالت عليك وعلى مسجاتك ، أتعرف أنا شو ردي على المسج الي طرشته .( بخلي دمعتك دايم على خدك نهر جاري ) وسكرت التليفون بويه.

سعيد من الصدمة ما عرف شو يسوي ولا شو يقول ، وصل ناصر ونزل من سيارته ,,
ناصر : شو بلاه ويهك جي ؟
سعيد : ماشي يا ناصر ، اسمعني باجر لازم تيي ويايه عشان اقدر اخبر أبويه وعمي بالطلاق .
ناصر : سعيد انته ينيت ؟؟ تبغي أتخرب الدنيا انته ؟ روضه ياهل وباجر بتعقل عقب العرس.
سعيد وصوته مخنوق : لا يا ناصر ، بس حرام عليكم ما اقدر استحمل ما اقدر ، أنا أحس أني ضعيف و أحس اني تعبان ، أحس بضيج أبا اطلع الي في خاطري ما عرف شو أسوي؟
ناصر وهو زايغ على سعيد : سعيد قوم بوديك المستشفي ؟؟
سعيد : اخـــخ يا ليت لو دوايه في المستشفي ؟
ناصر : دواك عند الله ، اشكي لربك همك والله بيفرج عليك انشالله ، سعيد قوم ويايه أنا ما بخليك وانته بهل الحالة ؟
سعيد : خلني يا ناصر بهمي ؟
ناصر : الله يغربل عدوج يا روضه ؟؟ والله ما تستاهل هذا كله ، غيرها وايد الي يبوونك ، سعيد؟
سعيد الدموع ما كانت توقف من عينه ، ناصر ما عرف شو يسوي يرد يضرب روضه ، الضرب ما بيخلي روضه تحب سعيد .. ناصر : إذا الطلاق بيريحك أنا بساعدك وبقنعهم يوافقون .
سعيد هو يصيح : اااه يا ناصر، يا ليت لو الطلاق بيريحني ، وانته أتعرف انه أبوي وأبوك ما بيرضون نسيت تفكيرهم ؟، بعدين حب هاي الانسانه كان في قلبي من أول ما عرفت كلمه حب ، كنت دوم احلم إنها هيه زوجتي وأم عيالي ، من سنين وأنا اترايا اللحظة الي بتجمعني فيها، والحينه تطلع تكرهني ما تحبني.؟؟
ناصر وهو حاط أيده على ظهر سعيد : سعيد والله انته جي أتعذبني وياك ، انزين انته ابتعد عنها فتره وعقب رد لها يمكن تتغير مشاعرها .
سعيد وهو يبتسم ابتسامه باهته : مستحيل يا ناصر ، أختك تكرهني ؟؟
ناصر : وشو الحل ، الطلاق من سابع المستحيلات ، وانته صعب انك تنساها ، وروضه صعب إنها تحبك ، شو الحل .؟
سعيد : الحل بأيد رب العالمين ، خلها على الله يا ريال ، بستحمل الويع الي فيه والله بيهون عليه انشالله .ناصر : شو رايك انسير العمره ؟؟ شوف الكعبة واطلب ربك .
سعيد : هيه والله فكره يمكن ارتاح ، أنا أبا ارتاح ؟
ناصر فرح حس انه قدر يسوي شي : خلاص يا بو عسكور ، بس شوف السفر على حسابك ؟
سعيد : هه، ما طلبت شي ؟
ناصر : والله انه روضه اغبي انسانه في هاي الدنيا ، صدق إنها ما تعرف قيمتك ، ما تستاهل دمعة وحده من عيونك ، وما تستاهل حبك .
سعيد : لا أتقول جي يا ناصر ، مثل ما أنا حب روضه غصبن عني ، أكيد هيه تكرهني غصبن عنها .
ناصر : يمكن الحب يكون غصبن عن الإنسان ، لكن الكره لا يا سعيد ؟؟ الكره ينوجد في قلب الإنسان الحقود و الي يحب يحب كل الناس ، والي يكره يكره كل الناس .
سعيد : لا روضه ما تكره كل الناس ومب حقودة ، روضه شفافة وطيبه واتحب الناس، بس أكيد في شي غيّرها . ناصر : حبك عجيب !!!!لهاي اللحظة وانته أدافع عنها ؟؟
سعيد : لهاي اللحظة ولباجر وللي عقبه ولين ما موت .
ناصر : حبك لروضه بهاي الطريقة ، عماك عن وايد أشياء وبيضعيك آخر شي ؟
سعيد : ضعت وخلصت ، خلها على الله .
حجز ناصر التذاكر وسافر هو وسعيد ، روضه كأنها ما صدقت اتصالاتها بسالم ما توقف ، والمواعد ما يخلص عند باب الجامعة ، و حصوه ماشالله مب مقصرة ، روضه اختربت سمعتها وهيه مول مب هامنها بس الي كانت تبا سالم، ما فكرت إنها هيه على ذمة ريال ثاني عادي ، وهل روضه عاطينها الثقة ويا غافلين لكم الله ، وحصه أتمهد الدرب اكثر واكثر ، سالم صار حياة روضه يوم واحد إذا ما شافته خلاص أتموت ، سالم حس إنها امتلكها ولو طلب منها أي شي بيحصله .
حصة : سالم ، جنك طولت ويا روضه يلا خلص منها عندي لك صيده غيرها .
سالم: جريب يا حصة ، بس خليني احصل الي آباه منها ، أنا ما حصلت شي من وراها الي فواتير تليفون وإنترنت ،والبترول بعد عشان هالدرب الي أصكه لين الجامعة .
حصة : أصلا هاي السخيفة ما ايي من وراها إلا الخساير ، انته استغل الوضع دام أخوها وريلها مسافرين .
سالم : جريب بتسمعين خبرها ، وبتفرحين وبتتشمتين في نفس الوقت بأعز صديقة لج .
حصة : لا تقول أعز قول اكره وحده في حياتي.
سالم : فقيرة روضه تتحراج اربيعتها المخلصة الوفية، ما تدري بالكره الي في قلبج .
حصة : ههه ، وما تدري بعد انك تلعب عليها ؟ اعتقد انه أنا و انته متساوين .
سالم : آخ منج مب لسان .
حصة : برايك الحينه ، ابغي البشارة هل الأسبوع . سالم : أكيد انشالله ، اطمني واستريحي.

سالم اتصل بروضه وهيه في الجامعة ..
سالم : هلا والله بحياتي .
روضه وهيه أتصارخ : ســـالم فديت روحك أنا ؟ البنات كلهم صدوا عليها .
سالم : روضه ممكن اطلب منج طلب ؟؟ بس ما أترديني.
روضه : لو تطلب عمري بعطيك إياه .
سالم : ابغي اطلع وياج ، أنا وأنتي بس روحنا .
روضه : امم ، اوكي موافقة ، ناصر و محد مسافر ما بيدري ، و أمي مسكينه تتحسبني أتأخر في الجامعة عشان الدارسة ، خلاص تم .
سالم : يالله يا فرحتي أنا ، اليوم الساعة 4 ونص بمر عليج .
روضه : لا تعال قبل دوامي يخلص 1 ونص ، عشان ايلس وياك .
سالم : خلاص تم .
وظهر سالم ويا روضه ، وحاطوا ويا بعض ، وعقب ساعتين ساروا برج العرب ، وحجز لها سويت ،
روضه في هاييج اللحظة نست كل شي ، نست انه ريال غريب ... وطبعا ...
و ياليت لو روضه عقب الي استوي بينها وبين سالم ندمت أو شي بالعكس عادي ، أتكرر الي استوي من بينهم ، كانت واثقة 100% انه يحبها ، وكانت واثقة انه سعيد بيطلقها ، واثقة انه عقب طلاقها من سعيد بتاخذ سالم .
طبعا سالم كان مستانس حصل الي يباه ، وخبر حصة ..حصة ما قصرت فضحتها من بين البنات ، وصل الخبر لريسه ، ريسه ما صدقت انه روضه جي أتسوى ، وسارت ريسه عشان اترمس حصة واتخليها تسكت عن الرمسه الي تقولها..
ريسه : حصة ، انتي شو هالرمسه الي اتقولينها عن روضه ؟؟
حصة : أنا ما قلت غير الصدق وأنتي ما يخصج ؟
ريسه : شقايل ما يخصني روضه اربيعتي وأخت ريلي ؟
حصه : السالفة سالفة أخت ريلج ، انتي بس كنت مرابعه روضه عشان أخوها ، شو تبين بعد حصلتي ناصر الحلو؟
ريسة وهي مغيظة : انتي قليلة أدب وهلج ما عرفوا يربونج ؟
حصه : أنا قليلة أدب ، يالصايعه يالضايعه .
ريسه وهيه فاجه عينها : شو هل الألفاظ الوقحة .

حصة : أنا وقحة ؟؟ يا حيوانه .
ونشت سطعت ريسه وضربتها ، وشرمخت ويها ، واستوت فضحيتهم فضيحة من بين البنات ، ريسه طبعا حمدت ربها انه ناصر مب موجود لانه لو عرف بيجلب الدنيا على راس روضه ، فقالت أنا بتفاهم وياها .
ريسه سارت لروضه البيت على أمل إن يكون كلام حصه غلط ، دقت عليها باب الحجرة ..
روضه : منو ؟
ريسه : أنا ريسه يا روضه ؟؟ . روضه : افتكيت من ريلج طلعتي انتي ؟
ريسه : روضه ممكن بس ابغيج بكلمتين ؟
روضه : أوف لحظه ؟ كانت اترمس سالم على المسن ، حطت brb
ونشت وفجت الباب ، روضه : نعم شو تبين ، ناصر مب هني .
ريسه : أنا يايه عشانج انتي .
روضه : والله أنا ما قلت لج تعالي عندي ، أوه مسكينه ليش ويهج جي متشوه .
ريسه وهي مب عارفة شو تقول : الي في ويهي هذا بسببج انتي ؟
روضه : والله أنا ما قلت لج رزي ويهج وسيري دافعي عني.
ريسه : روضه انتي شو تقولين ، أتعرفين حصه شو قالت عنج .
روضه : أتقول الي أتقوله انتي ما يخصج وأنا ما يهمني كلامها.
ريسه : روضه انتي اتخليني اصدق الكلام الي ينقال عنج .
روضه : صدقي ما يهمني .
ريسه : الله يسامحج يا روضه ، بس أبا اقولج كلمه أخيره ، قبل ما أسير عنج ؟
روضه : الله لا يسامحني انشالله قولي وخلصيني .
ريسه : صدقيني كنتي وبتظلين أغلى واعز صديقه في حياتي ، وبتم أدافع عنج لين ما أموت ، وبدعي لج دوم من قلبي ، وأنا متاكده انج في يوم بتصحين .
روضه : يالله على الصديقة المخلصة والحنونه والوفية .
ريسه : واقولج بعد إذا خفت عليج اكثر بخبر ناصر ، ولا تزعلين مني ؟
روضه : تهددني بناصر ، خبريه ما يهمني تسمعين يا .... مرت أخويه .
ريسه والدموع أتصب من عينها : حرام عليج انتي ليش جي اتعامليني يا روضه ، ليش اتحسيسني اني حشره عندج ، اني ولا شي. دزت روضه ريسه وسكرت الباب في ويه ريسه
ريسه ردت البيت ، وطول الدرب وهيه مب عارفه شو اتسوي عشان اترد روضه مثل ما كانت ، مب عارفة كيف اترد صديقة عمرها ..
ناصر وسعيد عقب 3 اسابيع ردوا من العمره وهم في الطياره ناصر يقول لسعيد..
ناصر : والله اني متوله على البلاد وعلى الربع .
سعيد : بس ؟ .، ناصر : يا الملعون ، شو قصدك ها ؟
سعيد : ههه ، يالله على الي يستحون ؟. ناصر : يالله عليك الي يقول انك مول مب متوله علىناس .
سعيد : لازم اتذكرني؟ اه الله يستر من الي ياي يا ناصر ؟. ناصر : خير انشالله ، انته الحمدالله الحينه احسن ، الله بيفرجها انشالله ، وروضه بتعقل .
سعيد : يااارب ، انشالله والله اتمني من كل قلبي انه كل شي يتعدل للاحسن.
ناصر : اقولك رومانسي .
وصلوا البلاد ، واليوم الثاني يا سعيد بيسلم على قوم عمه وروضه .
ام روضه : حيالله سعيد شحالك ؟ ، عمره مقبوله انشالله ؟
سعيد : منا ومنج صالح الاعمال ، انشالله انتي بخير ياعموه .
ام روضه : بخير ، ها عاد يا سعيد ماشي سفر بعد.

سعيد : انشالله.
ام روضه : بسير ازقر لك روضه .
وسارت ام روضه تزقر بنتها ، والحبيبه اترمس سلوم ..
روضه : سالم برايك امي تباني ، برمسك عقب .، ها امي شو تبين .
ام روضه : طلعي سلمي على ريلج .
روضه : أي ريل ؟؟؟ قصدج سعيد مسافر .
ام روضه : لا قصدي ولد الجيران ، سعيد منو غيره بعد ، رد من السفر يالراكده.
روضه : يعني هو وناصر ردوا ، اوف الله يعيني الحينه ناصر بيصك عليه .
ام روضه : حد يقول جي ، الحينه بدال ما تفرحين جي ردج ، سمعي الحينه بسرعه اتبدلين وتطلعين لريلج ، وشوفي رمستج هاييج الماصخه ماباها ، ولا صدقيني بخبر ناصر هاييج المره فجيته عنج ، بس هالمره لا .
روضه في خاطرها : شقايل لزقه ، متى يموت والله يفكني منه .
سعيد يالس في الصاله وهو متوتر ، وفجأه دشت روضه ، وقف وابتسم لها ، روضه ما ردت الابتسامه ، مد ايديه اطالعت ايديه بكل احتقار ومامدت ايديها ..
سعيد نزل راسه : شحالج ؟ . روضه : اووف بخير .
سعيد : يالله حتى السلام من ورا خاطرج . روضه : ورقة طلاقي متى بتوصل .
سعيد : انتي اتعرفين انه الطلاق من سابع المستحيلات .
روضه : ابغي لو مره تثبت لي رجولتك ، انتي ما تفهم والله لو حمار جان فهم .
سعيد : حمار ؟؟؟ سمعي روضه انا بطلقج ، بس اذا ما يهمج زعل ابوج وابويه انا يهمني زعلهم .
روضه : بتتطلق غصبن عنكم كلكم ، وانا الحينه مب فاضيه لك ، عن اذنك ، نسيت اقول جابل التلفزيون احسن بدال ما تيلس روحك .
طلع سعيد من البيت ، كان صدق حاس انه مخنوق ، رد للمكان الوحيد له في هاي الدنيا البحر ، وصاح وصاح وصاح .. دموعه ما خلصت يقول في خاطره : يالله يالدنيا ليش هل الكره هذا كله انا شو سويت؟ لهاي الدرجه انا انسان مب زين ، الشي الوحيد الي اباه ما احصله ، ليش ما اقدر انساها واكرها مثل ما هيه تكرهني ؟؟
(أنا القلب المجروح ..ضاع منى حبيب الروح ...بقت في عيني بقايا دموع ..حيرانة وين تروح ...بعد اليوم مافي شروق في قلبي ظلام وغروب ..هذي القصة وفيها قلوب والفرح فيها مسلوب)
اتصل سعيد بناصر ، وقال ايمر عليه بسرعه ، وصل ناصر عند سعيد ..
ناصر : شو بلاك سعيد ماخليتني اركد ، شو بلاك ؟ ليش عيونك جي منفخه وحمرا
سعيد : اسمعني ، ما بغيك اتحرج ، انا قررت اطلق روضه ؟
ناصر وقف : شو اطلق روضه ؟ ليش ؟ احنا شو قلنا ، ابويه وابوك ما بيرضون ؟
سعيد : بقوللهم اني انا الي ما بغيها ، انا شايف شوفه ثانيه ؟
ناصر : بعد وتبغي اترد على عمرك الرمسه ؟؟ انته مادري ليش ساكت عن روضه والله لو انا جان عرفت شقايل اصلبها ؟
سعيد : احبها ياناصر ماقدر..ماقدر ، بس والله خلاص خلاص ، بنفجر والله بنفجر ورد يصيح . ناصر : انته الي يشوفوك يا سعيد يقول انه اقوي عنك ماشي ، محد يتخيلك في هالمنظر .
سعيد : هذا كله يا ناصر وما سدك انا من متى وانا مستحمل ، طفح الكيل عندي ، ساعدني يا ناصر.
ولوى ناصر على سعيد وتم ايصيح وياه..
رد ناصر البيت وهو نفسيا صدق تعبان ، من عقب الحاله الي شاف فيها سعيد ، وكان مصمم انه ما يخلي الطلاق يستوي ، سار ناصر عند ابوه وقاله السالفه
ابو روضه : تتطلق ، هبت ؟؟ والله لو تحلم ؟؟ روضه .. روضه
روضه : نعم يا ابويه ؟؟. ابو روضه : تبين الطلاق ؟؟
روضه : ابويه انا ؟ . ابو روضه : شوفي انا عمري ما صارخت عليج ، ولا مديت ايدي عليج ، ولا غصبتج على شي ، بس لا تجبريني اسوي هالشي ، الطلاق هذا اتشيلنه من راسج .
روضه : ابويه انا ما بغي سعيد ، أحس انه مثل اخويه ما قدر اتزوجه .
ابو روضه : الحينه يايه اتقولين هالرمسه ، سمعي ياروضه انا بجدم العرس ، بخليه عقب شهر .
روضه وهيه اتصارخ :لالالا يا ابويه ، خلاص مابا اطلق ، بس لا اتجدم العرس .
ابو روضه : كلمة ومب راد فيها ، رضيتي ولا انرضيتي. وسار عنها .
ناصر كان واقف ، وروضه اتصيح . ناصر : تستاهلين ؟
روضه : جب يا حقير ، الله ياخذك انته وسعيد .
ناصر : جب انتي ، انتي والله نعال سعيد ما تستاهلينه .
روضه : علكم الموت .
ناصر : انتي ... ؟؟ ، اعوذ بالله من ابليس ، اطلع احسن .
وطلع ناصر وروضه خلاص ، مب عارفه وين ادق راسها ، وكالعاده سارت اطلع حرتها بسعيد ..
سعيد : ليش متصله ؟ بس كفايه اهانات ؟
روضه : شو تتحراني متصله اعتذرلك يالحقير يالتافه ، انا اكرهك جدموا العرس كله بسببك ، طلقني الحينه في التليفون ، وخذ هالموقف الرجولي .
سعيد : من دون رضا ابويه وعمي ، ما يهمج شعورهم ؟؟ احنا حتى ما كملنا شهرين من الملجه ، شو تبين الناس يقولون ؟.
روضه : محد يهمني ، طلقني ولا والله ان عرسنا بتشوف الويل ، حياتك هاي بخليها سواد في سواد .
سعيد : الي يحب يستحمل ؟؟ والي يبغي يرضي هله بعد يستحمل ، الله بيساعدني .
روضه وهيه تتطنّز : يا حرام ، مسكين وايد انته، تبغي اتسوي عمرك مثالي
سعيد وبكل ما كان فيه من غيظ وقهر وحزن : مااابطلقج ، عناد فيج اتعذبي مثل ما انا متعذب ، وسووي الي تقدرين عليه ، وبنشوف ، وصك التليفون في ويها .
روضه احترقت صدق ، لاول مره سعيد يرد عليها جي ويسكر التليفون في ويها .
سعيد قال الكلام الي قاله من الغيظ الي فيه ، لكن في نفس الوقت تم زعلان شقا جي قال لروضه حبيبته ، الود وده كان لو يعتذر ، لكن كرامته وين سارت ، يلس يسمع ..ليه كذا ليه وش سويت لك ,, كل الي حبيتوا لعمري .. اه حبيتوا لك ، كانت الدنيا كلها انتي وكل حياتي ومناي انتي ، غريب.. غريب مثلك علي يقسي ، وغريب غريب مثلي انا ينسي.
الكل قام يجهز للعرس ، والكل فرحان ماعدا روضه الي كانت اتسوي كل شي بالغصب ومن ورا خاطرها ، وسعيد ماكان يعرف يزعل ولا يستانس
اتصلت روضه بسالم ، عل وعسي يقدر يسوي شي ..
روضه : سالم ، العرس جرب وانا مب عارفه شو اسوي ؟
سالم : لا تسوين شي ، عرسي واتوكلي على الله ؟
روضه : سالم انته شو تقول ، نسيت اني مب بنت ، ولو سعيد ... بننفضح ، وموتي بيكون على ايد ناصر .
سالم : لا تخلين سعيد يقاربج ، قفلي على عمرج باب الحجره .
روضه : لا تخاف سالم انا بعرف اتصرف ، بس شقا عقب بقدر اكلمك وبطلع وياك
سالم : انتي لاتاخذين اجازه من الجامعه اكثر من اسبوع ، وقصي على سعيد وقوليله انه دوامج من 8 لين 5 ، عاد انا وانتي بنقدر نطلع ويوم بنخلص حواطه بردج انا الجامعه .
روضه : هيه والله فكره ، بعدين بقولك سعيد يموت فيني ، فبستغل ها الشي ، وصدقني ما بطول لين ما اخليه يطلقني .
سالم : بتم على نار لين هاليوم مايي .
روضه : احلى شي في دنياي حبك ، سالم انا ما اقدر اعيش بدونك ، شو رايك اشرد وياك ، ونعيش انا وانته ويا بعض براع البلاد .
سالم : ههه ، حشا فليم هندي استوي ، لا حياتي خلينا هني من بين هلنا وناسنا احسن والله بيفرجها في يوم انشالله .
عقب ما سكرت روضه عن سالم ، اتصلت حصه ..
حصه : سلملم .؟ . سالم : سلالم .
حصه : وينك انته ؟ . سالم : يا بوج هالبنات ما يفجوني ؟
حصه : يالله توم كروز وانا مادري ؟ ، وشخبار روضه ، مب حصلت الي تباه منها، خلاص ودرها ؟
سالم : لا بعدها تنفع ، ودام انها لين الحينه غبيه وتتحراني احبها ، خليني اتسلى وياها ؟
حصه : كيفك ؟؟ بسير عرسها ابا اتشمت واطمش واضحك ؟؟
سالم : هيه سيري وشوفي سعيد وقارني منو احلى انا ولا هو ؟
حصه : اكيد خسف وغبي بعد دام انه يحب روضه ؟
سالم : ههه .
حصه : خلاص عيل برايك ، see you .
سالم : باي .
اليوم عرس روضه وسعيد ، سعيد كان يفكر شو الي بيتسوي ، لانه متاكد روضه 100% ما بتسكت ، ولازم بترد تجرحه بكلمه ، كان يقول في خاطره ليش انا مب مثل أي معرس في هاي الدنيا المفروض اكون مستانس ، اسمي سعيد وانا تعيس ، يارب تستر ..

ابا ردوووووووووود __DEFINE_LIKE_SHARE__

forza alain · 01-12-2013, 02:45 PM

روضه كان الود ودها لو يقطعونها 60 ألف قطعه ، ولا يزفونها لسعيد، اليوم ليلة عرسها و هيه ترمس سالم ..
روضه : سالم ، ما عرف كيف اعبر لك عن الي في خاطري أحس اني أموت ألف مره .
سالم : بعيد عنج الموت يا بعد روحي ، انتي سوي الي قلت لج عليه وخلاص .
روضه : انشالله يا عمري ، أتأكد أنا وانته بنرد لبعض ، قريبا ، ما بغي اسكر عنك.
سالم : لا يا روضه ، انتي جي بتفضحين عمرج ، سكري الحينه واتراياج فليل عقب الزفة
وظهرت روضه من بين الحريم ..
وصلت للكوشة وهلها كلهم فرحانين ومر الوقت بسرعة والمعرس وصل زفه ناصر وأبوه وعمه وسلموا عليهم واتصوروا وياهم .. ناصر قبل ما يظهر صاصر سعيد وقاله :
مبروك ، شد حيلك ؟؟؟ وغمز له . سعيد : وايد متفيج تراك ، الله يعين يا ناصر .؟
ناصر : انشالله بتكونون اسعد اثنين في الدنيا هاي ؟؟ روضه ؟؟
روضه من ورا الخاطر : نعم ؟ ناصر : وهو حاط ايده على كتف روضه : سامحيني ياختي ، ادري اني دوم كنت اعاملج بدفاشه ، وادري اني مديت ايدي عليج ، بس والله هذا كله من خوفي عليج ، و أتمني لج كل خير و سعادة ويا سعدون ، هالله هالله فيه .
روضه ماردت حتى دمعة من عينها ما نزلت على فراق هلها وإخوانها ، هيه وسعيد يالسين على الكوشة بس كل حد بصوب ولا يخصهم في بعض ..
حصة شافت سعيد بغت تتخبل ما كانت تتوقعه بهل وسامه و الشخصية ، كانت تتحراه خسف وماله شخصيه عشان جي روضه ما تحبه ، نشت اونها بتسلم على روضه مب عشان شي بس عشان سعيد عيبها..حصة : مبروك يا روضه ؟ . روضه : على شو أتباركين قولي احسن الله عزاج .

سعيد صد و اطالع روضه بكل استغراب ، حصة : افا ليش جي اتقولين عندج هالريل الغاوي وجي اتقولين ؟؟ . سعيد تم يطالع حصة وهو مستغرب من الجراه الي فيها هالبنت ؟؟؟!!! . حصة : سعيد ترا أنا ربيعة روضه الروح بالروح ، ما أوصيها عليك هالله هالله فيها.
عقب ما سارت حصة قال سعيد روضه : هاي أشكال انتي مرابعتنهم ؟؟
روضه : صدقت بعمرك انك صدق ريلي ، وتبغي تمارس هالدور؟؟ .
سعيد : كفاية اني حلمت بها الدور ، يسدني حتى لو ما صار حقيقة ، وهو بس شكل وصوره جدام الناس ، أنا راضي الحمد الله .
روضه و هيه رافعه حواجبها : والله انته مسكين .
سعيد : اتعرفين روضه على الرغم طريقتج الوقحة ، ما اقدر اكرهج ارجوج ساعدني على كرهج بتكونين سويتي لي اكبر خدمه في حياتج .

روضه : أنا وقحة يا حقير ، انته أصلا ما تروم تكرهني ، حبي بيتم في قلبك لين ما تموت ، بس عموما بقولك شي الظاهر انه حصة انعجبت فيك شو رايك نتبادل الأدوار أنا و حصة ؟؟. سعيد : الله يسامحج دنيا وآخره ، ويصبرني عليج ، و يفكني من حبج ، لاني صدقت تعبت والله تعبت .روضه : انشالله دوم .
سعيد : حتى الراحة ما تبينها لي ؟؟ . روضه اطالعت سعيد وابتسمت له ابتسامه فيها كل خبث و طنازه ، عقب شويه زفوهم وكان ناصر حاجز لهم سويت في الفندق لمدة أسبوع، هديه عرسهم ، وأبو سعيد وروضه كان حاجزين لهم تذاكر للسفر .. خلص العرس والمعازيم ساروا بيوتهم ، وهلهم سلموا عليهم وساروا .
روضه ما صدقت الكل يروح وربعت الحجرة وقفلت الباب ، سعيد شل بعمره وسار لاعز صديق له في هاي الدنيا .. صديقه الي ما يمل منه ويستحمل همومه .. البــحر
يلس على شاطي البحر وهو حاس بألم كبير في قلبه ، بس مب عارف شو يسوي عشان يرضي هل الانسانه .. هاي هيه ليلة العمر الي كان يتمناها ؟؟ لكن مافي كلام يعبر عن الي في خاطره ..
بس أنا أقول لسعيد : قصتك رحلة طويلة ما تلملمها المشاعر .. الحزن ذوب نهارك و الساهمي يعيقه..ما بقا لك غير ذكري تحتضر في قلب شاعر ..الظما ادمي حياتك والأمل مابل ريقه ؟؟
روضه ولا افتكرت حتى ولا كأنها عروس واليوم ليلة عرسها ، تفكيرها مجرد عن كل شي إلا سالم ، الحب أعماها عن كل شي ، أعماها حتى عن فكرة انه سالم يخدعها ، اليوم الثاني اتصل سعيد بناصر ، و حليله سعيد كان راكد في السيارة عند البحر ..
ناصر : ها سعيدان ، شحالك يا لمعرس ؟؟
سعيد : أي معرس هذا الي ترمس عنه ؟. ناصر : شو بلاك ، جنى خربت عليكم الحينه الساعة 12 الظهر ، قلت يمكن قمتوا من الركاد .
سعيد : ضحكتني يا ناصر وأنا ما فيه ضحكه ؟ . ناصر : شو بلاك يا ريال ، روضه بعدها على رمستها الاوليه ؟؟ هاي مول مب ناويه تعقل ، ياخي أنا شاك فيها أتصدق ؟
سعيد : لا يا ناصر ، كله و لا الشك بس هيه عشان تكرهني جي اتسوي ، ولأنها خذتني غصبن عنها .
ناصر : أقول سعيد لو درست محاماة مب احسن عن الهندسة الي درستها ؟ والله انك تقهر طيبتك الزايده وتفكيرك الزين في الناس هو الي وصلك لهاي الحالة ؟؟ وأنا إحساسي يقول انه روضه وراها شي . سعيد : لاه يا ناصر ، انته ترمس عن شرف أختك ، وروضه مستحيل جي أتكون ، انه بعض الظن إثم . ناصر : أبا اسالك سؤال و ابغيك اجوابني ؟
سعيد : أتفضل ؟ . ناصر : ليش تحب روضه لهاي الدرجة ؟؟؟
سعيد : اااه يا ناصر، مادري شو أقولك ؟؟ الحب يوم يدش في قلب الإنسان ما يكون له أسباب ، حتى لو الي تحبه ما يفكر فيك ويكرهك ، بتم تحبه غصبن عنك .
ناصر : رومانسي سعيدان ؟ بس والله انك ما تستاهل هذا كله يا سعيد ، مب حاله هاي الي انته فيها، أنا روضه لازم ارمسها و اتافهم وياها واعرف شو الي في راسها.
سعيد وبكل غصة : ماله داعي ، بترمس عمرك خلها على الله .
ناصر : خلها عليه وعلى الله وانته بتشوف. سعيد : لا تجبره من عافنا ما ينجبر ، يا ناصر. .ناصر : إحنا عمرنا ما غصبناها على شي ، ولو إحنا غصبنها عليك ، فإحنا غصبنها على شي زين ، عمرها ما بتحصل حب وراحه و سعادة مثل الي بتحصلهم عندك، أصلا نادر في هالزمن الحب الي مثل حبك.
سعيد : يا خسارة حبي الكبير ؟؟ يا خسارة كل شي.
ناصر وهو يحاول يخلي سعيد يبتسم : شو رايك انزين انسير نشقح في مير كاتو ؟؟ يا حلوهم البنات الي هناك .
سعيد : يا حلوهم البنات ها ، وين ريسه عنك ما عليه إن ما خبرتها عليك . ناصر: يا سعيد أنا ابغيك تضحك وتنسي انته ولا جنك معرس البارحة ، والله جنك طالع من عزا.
سعيد : خليني أنا الحينه برد الفندق ، بتصل بك ، في مال الله .
روضه طبعا كان مستغله غياب سعيد عنها وان غاب القطو العب يا فار ، رد سعيد الفندق ويوم دخل الحجرة ما حصل حد ، قال يمكن سارت عند هلها بس هاي قواة عين منها وهيه عروس أتسير من دون ريلها ، سعيد حس في هاييج اللحظة حس انه انطعن في رجولته ، حتى لو هيه ما تباه بس ما وصلت لحد تتخلى عن تربيتها وتعق الحيا مره وحده..عقب ساعتين وصلت روضه و أول ما دشت اطالعت سعيد بنظره ويت بدش وقف لها سعيد : لحظه يا الشيخة ، داشه جي ومب مسويه اعتبار لحد ؟
روضه : ليش منو يالس هني عشان أسوى له اعتبار ؟؟؟.
سعيد : جان ما اشوفين بلسبج نظارات ، وين كنتي ؟؟. روضه : ما يخصك ؟
سعيد : يخصني ونص بعد ، شوفي دام انج على ذمتي ما بتمشين على هواج ، لا تتحريني عشان احبج يعني بستوي عبد تحت ريولج ، وانه ما بتكون لي كلمه عليج .
روضه وبكل طنازه : يا قوي انته يا قوي ؟ شو بتسوي يعني بتضربني.
سعيد وهو كان فعلا بادي يفقد أعصابه : اقدر اضربج ، واقدر اجتلج بعد ، والله يا روضه تراني خلاص مب رايم استحمل اكثر عن جي ، ولا تخليني اطلع الويه الثاني .
روضه : لا أرجوك خفت ؟؟
سعيد كان فعلا بادي يفقد أعصابه : روضه ، شلي شلولج وردي بيت هلج ، ورقة طلاقج بتوصلج .روضه وهيه فرحانة : ألف الصلاه والسلام عليك يا حبيب الله محمد ، كلووولوووش .
سعيد يلس وهو منهار ، وتم يطالع روضه و الفرحة الي هيه فيها وما صدقت ردت لبيت هلها. اتصل بابوه وعمه وبناصر ، واتفقوا على انهم يتيمعون في بيت بو ناصر .
أبو روضه : خير يا سعيد ، شو مستوي ،ليش روضه ردت البيت ، وهيه توها عروس ؟
سعيد : أبويه ..عمي اسمعوني أنا وروضه ما نصلح لبعض ، عشان جي قررت اني أطلقها أبو روضه : افا يا سعيد ما هقيتها منك ؟ توك ثاني يوم من عرست وتبا أطلق ؟
أبو سعيد : ليش يا سعيد ، تبغي تفضحنا ؟
سعيد : لو تبوون راحتي ، وافقوا الله يخليكم ، أنا ما بسوي شي غصبن عنكم ، أنا بطلقها الحينه بس لا تخبرون حد لين عقب سنه وقولوا ما اتفقوا ؟
ناصر : راحتك انته ولا راحة روضه ، أبويه ترا روضه هيه الي ما تباه؟؟
أبو سعيد : ما هقيتها منج يا روضه ؟؟. أبو روضه : صدق يا سعيد ، عشان روضه تبغي تتطلق . سعيد : والله شو أقولك يا عمي .
أبو روضه : الشور شو الرياييل هب شور البنت ، وإذا انته شاري لين الحينه إحنا مب بايعين ، وروضه ما بتمشي كلامها علينا ؟؟؟. أبو سعيد : والله ياخويه انته فصل ونحن نلبس ولا شو قولك يا سعيد . سعيد : ما أخالفكم .
ناصر طلع ويا سعيد وهم في السيارة ..ناصر : إحنا متي انشالله بنخلص من هاي السالفة ؟؟ متى بترد سعيد المرح ؟
.سعيد : يا ناصر ، أنا مكتوب عليه العذاب والشقا ، لازم استحمل تصرفات أختك عشان ارضي أبويه وعمي ، لازم استحمل كرهها لي عشان اني احبها .
ناصر : ياخي أدبها عندك إياها ؟. سعيد : صح أنا الحينه ما اسكت لها ، بس ما اقدر أمد ايدي عليها ، ما دري شي يمنعني ، ما تهون عليه يا ناصر ، احبببها. ناصر : انسي هالحب لو مره وحده. سعيد : يا ليت يا ناصر ، الكلام سهل ، لكن الفعل لا .وانجبرت روضه أترد لسعيد ، وعرفت انه ما في أمل للطلاق ، لكنها كانت مصره على تعذيب سعيد الي ذنبه الوحيد انه يحبها ، كأنها تنتقم منه، كانت حاطه في بالها انه هو الحاجز الي بينها وبين سالم، هو الي منع إنها تكون ويا حبيبها سالم
هذا هو الجزء الاخير من ضاعت ...
سعيد خذ روضه وسار بيت هله ، طبعا السفر اتكنسل ، ورد سعيد الداوم وروضه ردت الجامعة بعد أسبوع واحد من العرس ، اكثر من مره رن موبايل سعيد وكان الرقم غريب ، في مره رد ...
سعيد : نعم ؟؟. (؟) : نعم الله عليك يا لغالي.
سعيد : الظاهر انج غلطانة.
(؟) : لا أنا مب غلطانة ، انته مب سعيد عبد الله ، وتوك معرس و ماخذ روضه خليفة بنت عمك.
سعيد: هيه أنا هو، شو تبين.
(؟) : أنا وحده انعجبت فيك ينيت عليك ، حبيتك والله صورتك مول ما أتسير عن بالي.
سعيد: أنا ريال معرس ، واحب حرمتي وما عندي هالسوالف ، سيري دوري لج حد ثاني تتسلين وياه، ولو سمحتي لا تتصلين مره ثانيه .
(؟) : انته تحب حرمتك ، بس هيه ما تحبك تكرهك ، اتحب غيرك.
سعيد وهو مصدوم : مب معني إنها ما تحبني يعني اتحب غيري.
(؟): والله انك مخدوع فيها، روضه يا سعيد اتحب واحد اسمه سالم ، وصخت سمعتها وياه ، حبها لسالم مثل حبك لها ، حب مول مب طبيعي ، بس روضه هالحب عماها ، طير عقلها من راسها ، فضيعت كل شي سمعتها وشرفها ، فإذا هيه لين اليوم وبعد ما عرست وهيه أتخونك ، شو الي يمنع انك ما اتخونها ، أو حتى أتعرس عليها وتاخذني أنا ، أنا حبيتك وعمري ما قلت هالكلمه لحد بها الصدق .
سعيد بهت وما حس إلا وهو مسكر التليفون بويه (؟) ، و سار لروضه الجامعة ، طبعا روضه كانت محد ، وانكشف كل شي لسعيد ، عرف إنها كانت تخونه، تم يترياها عند باب الجامعة ، ومره ثانيه اتصلت (؟) .. سعيد : نعم شو تبين ؟؟
(؟) :أنا ادري انك عند باب الجامعة تترايا روضه ، ماله داعي أنا بقولك وين هيه ، وانته تقدر تتأكد من خيانتها . و عطته عنوان لشقه ، وطار سعيد بسيارته وصل للشقه وتم يدق الباب ، وفتح له سالم ، دزه سعيد ويوم دخل شاف روضه بوضع .....؟؟ روضه انصدمت ما كانت تتوقع ، سعيد ما قدر يستحمل الي شافه شل بعمره وطلع .
سالم : روضه منو هذا ؟؟. روضه : هذا سعيد .
سالم : سعيد ؟؟؟. روضه : هيه سعيد ريلي، يا ويلي جان خبر ناصر ، سالم شو رايك ما أرد البيت ، بتم هني في الشقة .
سالم : نعم ، لا يا روضه أنا من عايله محترمة ومعروفه وما بغي أي مشاكل ردي لبيت ريلج .
روضه : يعني انته الي من عايله محترمة معروفه وأنا لا ،انته مب خايف عليه ؟؟
سالم : والله أنا ما قلت لج خوني ريلج ؟؟ . روضه : خنته عشان احبك ، بعت عمري وسمعتي وشرفي ودراستي وهلي وربعي والدنيا عشانك ؟؟ والحينه هذا يزايه ؟؟؟
سالم : شوفي يا روضه ، دام انه سعيد عرف كل شي ، فخلاص إحنا مب لازم انتم ويا يعض كل واحد يسير في حاله
روضه وهيه أتصيح : لا يا سالم لا ، إلا انودر بعض لا ما اقدر .
سالم : يلا اطلعي براع ، وانسي واحد اسمه سالم .
وطلع روضه براع وهيه أتصيح ، كانت مب مستحمله فراق سالم و مب متصورة حياتها من دونه ، ما فكرت شو الي ممكن يستوي بسعيد بعد الي شافه ، وردت البيت ولا رمست حد ودشت الحجرة ، وعقب شويه وصل سعيد ويوم دش الحجرة شاف روضه .
سعيد : ولج ويه أتردين هني مره ثانيه ؟
روضه : أوه اسكت عني روحي بحاله مب متفيجه لك ؟
سعيد : مب متفيجه لي ، متفيج عيل لسالم ؟؟
روضه : سالم عمك، انته ما تسوي ظفره ؟؟
سعيد : هذا الي خسرتي كل شي عشانه ، أنتي اتعرفين سالم هذا شو من بين الشباب ، صايع و ضايع لا دين ولا تربيه ، لّعاب .
روضه : انته الصايع الضايع ، أتغار منه أتعرف ليش لانه خذني منك ، خذ اكثر شي أتحبه في هاي الدنيا ؟؟.سعيد : براويج الحينه حبي لاكثر شي في هاي الدنيا.
سعيد ضرب روضه بطريقه وايد فظيعة ، طلع كل الي كان في خاطره وعقب شلها وفرها بيت هلها ، ومن غير ما يحس خبر ناصر بكل شي ، ناصر الدنيا اسودت في عينه وكمل على روضه زين ما ماتت فيه أيده والكل عرف بسالفة روضه.
سعيد كان مثل الضايع التايه مب حاس بشي ، مب عارف شو يسوي مب مصدق ..
روضه كانت خاشه الموبايل ، وعقب كل الضرب الي حصلته ولا اتادبت اتصلت بسالم
روضه : سالم الحقني ذبحوني من الضرب.
سالم : احسن تستاهلين ، بعدين أنا ما قلت لج لا تتصلين .
روضه : سالم انته شو تقول ، أنا روضه حبيبتك ؟؟
سالم :أي حبيبه ، انتي صدقتي ، انتي اتعرفين أنا ليش اتعرفت عليج ، سالي حصة بتخبرج ؟، وسمعي أنا مب متفيج لج ، على فكره بغيت اخبرج ، أمي تبغي اتيوزني لبنت خالتي والصراحة بنت خالتي بنت مؤدبه ومحترمة وايد وما عندها سوالف بطاليه مثل غيرها ، عشان جي أنا قررت أنى املج عليها ، الملجه الأسبوع الياي لو أتحبين تين يعني .
روضه وهيه أتصارخ : يا لنذل يا لحقير وين كلامك وين حبك ، سالم حرام عليك أنا حتى شرفي خسرته ؟ أنا احبك .
سالم : انتي نذله وحقيرة ، وأنا حصلت الي أباه منج ، والصراحة مليت منج ، اقولج أنا رقم الموبايل بغيره خلاص ببدا حياة زوجيه ولازم أتكون حياة حلوه مع وحده محترمة ، روضه كلمتي الوداعيه لج كنتي غبية و مينونه، وأنا عمري ما حبيتج أنا حبيت جمالج وبس ، اكرهج يا حلوه ،باي للابد .
روضه انهارت ما صدقت الي سمعته واتصلت بحصة ..
روضه : حصة ، صدق سالم بيملج الأسبوع الياي ؟؟
حصة : هيه و بياخذ أختي نوره ؟ . روضه : وأنا يا حصة ؟؟.
حصة : شو انتي بعد خلاص انسي سالم وانسيني وياه ؟؟
روضه : حصة انتي ليش عرفتيني على سالم ، انتي قلتي انه يحبني ويبغي يتزوجني ؟
حصة : ها ها ها ي، سالم أتعرف عليج عشان ينتقم لي منج ، انتي كنتي دوم مثال للأدب والجمال والأخلاق ، كنتي دايماً احسن عني ، نسيتي يوم كنت اتعايريني انتي و ريسه أيام الثانوية ، نسيتي يوم كنت تين وتعطني محاضرات في الأدب والاحترام ؟؟
روضه : كنت خايفه عليج ؟؟
حصة : إلا كنتي تحبين اتراويني انج احسن عني ، عموما أنا وأنتي متساوين الحينه ، لا انتي أعلى بشويه.
روضه : يا حقيرة.
حصة : اقولج مبروك على طلاقج من سعيد مقدما، انشالله يوم أنا وهو بنعرس بنعزمج ، على فكره أنا الي خبرت سعيد عليج. وسكرت التليفون بويه روضه .
عقب ما سكرت عن روضه ، رن الموبايل ومن دون ما أتشوف الرقم ردت . وكان سعيد الي متصل : روضه ، بغيت اقولج سامحيني أنى مديت أيدي عليج ، وكلمه أخيره يمكن أنا أسير وما أرد ، بس عقب كل الي سويتيه احبج .
وسكر سعيد ، وروضه ما ردت بكلمه مجرد انه كانت تصيح وهيه مب حاسة بشي ، انهارت تماما.
اليوم الثاني ياها ناصر وشكله وايد تعبان ..
ناصر : اتعرفين إحنا وين من البارحة ، كنا في المستشفي ، سعيد سوي حادث وهو في العناية المركزة والله يعلم يحيا ولا يموت وأنتي السبب انتي ؟
روضه مول ما ردت كانت بس أتصيح مب حاسة بشي ، وطلع ناصر عنها ، الحينه توها حست بطعم العذاب والخيانة ، عرفت ليش سعيد كان متعذب ، الحينه توها حست هيه شو كانت أتسوى ، وكيف جرحت الي يحبونها ، توها عرفت كيف نست تربيه أبوها و أمها الي ما قصروا عليها بشي،توها عرفت ليش ناصر كان شاد عليها توها صحت بس عقب شو عقب ما خسرت كل شي ..
سارت روضه المستشفي تبغي تتطمن على سعيد وتتعذر له ، هلها كلهم يطالعونها باحتقار سعيد أتفاجأ ..
ناصر : شو تبين يايه هني ها ؟
روضه : أرجوك يا ناصر خليني بس اعتذر وبطلع أرجوك . ناصر: اوكي نحن كلنا بنطلع بس 5 دقايق وتطلعين.

روضه : سعيد ، أنا اسفه توني انتبهت أنى كنت مخدوعة ، سامحني يا سعيد سامحني.
سعيد وهو صاد عن روضه: تو الناس يا روضه ، الجرح الي في قلبي كبير ، ما اقدر اسامحج لو أنى احبج ، ما اقدر عقب خيانتج .
روضه وهيه أتصيح : أرجوك سعيد أرجوك ، بس قولي سامحتج ، يمكن هاي آخر مره اتشوفوني ، سامحني ، سامحني.
مارد سعيد ، وطلعت روضه و شافت أبوها وسارت بتعتذر ..
روضه : أبويه سامحني ، الله يخليك سامحني .
أبو روضه بكل مافيه من حزن : قلبي غضبان عليج ليوم الدين.
روضه طاحت على ريول أبوها : لاه يا أبويه لا ، أنا محتاجة رضاك ، سامحني عشان الله يسامحني . أبوها ما رد ويوم صدت على أمها شافت الدموع في عينها بس في نفس الوقت عرفت إنها مستحيل أتسامحها ، ريسه كان تبغي اترمسها لكن ناصر منعها .
ردت روضه البيت وهيه عرفت إنها خسرت كل شي ، يومين وروضه حابسه عمرها في الحجرة محد حتى افتكر يسال عنها ، اتصلت بريسه ..
روضه : السلام عليكم ، شحالج ريسه ؟
ريسه : يا مرحبا بج ، عليكم السلام ، شحالج روضه ؟؟ اتولهت عليج وايد يالغاليه؟
روضه : بخير ، ريسه ، حبيت اعتذر لج عن كل الي سويته اسفه ؟؟ سامحني .
ريسه : مسموحه لو ما اعتذرتي، قلت لج أنا عمري ما بزعل عليج ، وأنا اعرف انه الي سويته لانج كنت مب في وعيج ، و حصة كانت قاصة عليج.
روضه : قبل ما اسكر، قولي لناصر يسامحني ، وامي وأبويه حطيهم في عينج عقب ما تاخذين ناصر ، وسعيد ابغيج أتزوجينه وحده تستاهله ، وسلمي على الربع كلهم عويش وهدي ومريم والكل ، وقولليلهم يسامحوني ، اسمحيلي ريسه بسكر عشان أبا أسير اصلي ، دعواتج لي.
سكرت ريسه عن روضه، و ريسه عندها إحساس غريب ، كانت خايفه على روضه.
سعيد والحمد الله حالته كانت تتحسن سال ناصر : شو أخبار روضه ؟؟.
ناصر : لين الحينه وتسال عنها وتفكر فيها؟؟.
سعيد : حرام يا ناصر حتى لو إنها غلطت ، انتوا مول ما افتكرتوا فيها ، الحينه من يومين انتوا عندي ، أسالوا عنها على الأقل .
ناصر : انشالله يا سعيدان ، مع إنها ما تستاهل بس معاليه ، بس عشان خاطرك .
رد ناصر البيت عشان يريح شويه ، وقال قبل ما يسير المستشفي بيطالع أخته ، عقب ما ريح واتسبح وبدل ، مر على روضه .. ويوم فج باب الحجرة شاف روضه جثه ما تتحرك .. جرب ناصر وهو مب مصدق ، الشبريه كانت كلها دم ، روضه انتحرت قطعت شرايينها إحساس اليأس وانه محد بيسامحها وصلها لهاي الحالة ، زخ ناصر أيد أخته وتم أيصيح...ناصر : ليش سويتي جي يا روضه ، ليش؟؟
روضه كانت ميوده في أيديها رسالة وكاتبه عليها من ورا توصل لسعيد
أبو روضه طاح مريض لانه روضه كانت دلوعته ولأنها ماتت وهو مب راضي عليها ، ألام حالتها حاله مسكينه بنتها الصغيرة وراحت عنها، ريسه كانت حاسة بالذنب ، آخر شخص كلمته روضه هيه ، كانت على الأقل تقدر تيلس وياها وتمنعها من إنها تنتحر، روضه كانت وحيده ومحتاجة لوقفه أي حد ..
طبعا الكل درى بموت روضه إلا سعيد ، الكل كان خايف عليه ، ناصر وريسه ساروا لسعيد المستشفي والرسالة كانت في جيب ناصر.
سعيد : ناصر شو إخبار روضه ؟ ناصر بكل ضيج : بخير .
سعيد : ناصر انته مب طبيعي ، روضه شو بلاها ، قلبي يقولي انه فيها شي؟
ناصر والدموع في عينه :شوف أنا ما أروم اخش عنك اكثر عن جي ،روضه اتوفت البارحة فليل وهاي الرسالة ودرتها لك .
سعيد فز من مكانه وزخ ناصر وهو يصارخ : روضه ماتت ، لاه يا ناصر انته شو تقول ، روضه ما ماتت، انته تجذب ، قولي انك تتمصخر عليه ، ريسه قو للي انه ناصر يجذب .
ريسه ما قدرت أترد وبالذات إنها كانت ميته من الصياح وطلعت من الحجرة .
سعيد وهو منفعل : اليوم بطلع من المستشفي اليوم، بسير اقوللها أتسامحني ، هيه أكيد ما ماتت، لازم أشوفها بعيني .
ناصر وهو مب عارف شو يقول لسعيد : بعدها جروحك من الحادث ما برت يا سعيد .
سعيد وهو يصيح: اااخ يا ناصر ، جروح الجسم بتبرا ، بس الجرح الي في قلبي لا، موت روضه ما بيبرا في قلبي، قولي يا ناصر انه روضه ما ماتت.
حضن ناصر وسعيد وقاله : والله أهون عليه اني استحمل كلام الناس ولا موتها .
سعيد : اخــخ يا ناصر، ما اقدر اصدق إنها ماتت ، بموت والله ، أحس بويع في قلبي ، أحس قلبي بيطلع من مكانه ، وينها روضه يا ناصر ، يبلي روضه .
ناصر وهو يمسح دموع سعيد: هاي رسالة كتبتها روضه لك ، اقراها لين ما أسير أشوف الدكتور بيطلعك ولا لاء.
ناصر طبعا ما قدر ييلس ويا سعيد ، عقب ما شاف الحالة الي هو فيها.
خذ سعيد الرسالة وهو يقول في خاطره كنت أتمني ابتسامه منج وأنتي حية ، والحينه حصلت رسالة منج، بس وأنتي ميته..

وأنا أقول لسعيدعقلي وروحي داخل العين .. وإلا أنا جسم بلا روح
مسكين أعين شاقي المزايين ...مثل الغريق الي على لوح
الحب كم طبّع ملايين .. راحوا وأنا بالمثل باروح
ياما سقاني كاس حرفين .. وأصبحت في الفراش مطروح )
**********النهايه********* __DEFINE_LIKE_SHARE__

دااانه غير · 06-15-2013, 03:08 AM

والله حرام عور لي قلبي سعيد والله يرحمها رواضي اه الحمدالله على كل حال
ومشكوور على الطرح الرائع واستمري الى الامام فديتج وبتوفيق
تقبلي مروري:داانه غير __DEFINE_LIKE_SHARE__

la6oof · 06-22-2013, 03:46 PM

بسالكككمم الحين هاي القصصه صججج ولاا ؟؟؟ يعنيي صج روضه توفتتتت وقصتها وجييه __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
قصه حب اماراتيه.........حقيقه !!	BĐσσr♥Al3іή	قصص و روايات	22	10-17-2012 05:49 PM
هل انتهينا من اتصحيح وبدينا موجة صعود	محروم.كوم	منتدى أخبار المواقع والمنتديات العربية والأجنبية	0	07-05-2010 04:30 AM
بصمه اماراتيه ف عالم الدخون والعطور بايدي اماراتيه	محروم.كوم	منتدى أخبار المواقع والمنتديات العربية والأجنبية	0	06-29-2010 11:10 PM
فلل 150 الف فقط ول عوااائل اماراتيه فقط	محروم.كوم	منتدى أخبار المواقع والمنتديات العربية والأجنبية	0	06-07-2010 10:50 AM
نكت اماراتيه ~*	* ريانة بوظبي *	نكت , سوالف للشباب والبنات	44	06-23-2009 01:46 PM