عمــلية اســــتئصال اللـــــــوزتين وتـــــجربتي ..

محروم.كوم · #1 10-12-2012, 06:20 PM

السلام عليكم ورحمة الله وبركاته
وبعد،،،

في السنتين الاخيرات بدأت معاناتي مع اللوزتين وتكرر التهابها وظهور الصديد عليها وبعد عيد الفطر الماضي 1433هــ بدأت ابحث عن تجارب بالانترنت لكي اقرأ عنها ولكن لم اجد الا القليل ولهذا السبب طرحت الموضوع بموسوعة (مكشات) راجيا الاجر من الله..
راجعت الكثير من الدكاتره بعدد من المستوصفات والمستشفيات بالرياض عند كل مرة تبدأ بالالتهاب وظهور الصديد وكان الغالبيه يصرف لي مضاد حيوي (أوجمنتين) ويوصي باستخدامه لمدة اسبوع 7 ايام..
بعدها لاحظت انه مايسوي شي معها ..
رحت لدكتور وقررت اني استمر معه بعد ماعطاني علاج اسمه كلاسيد وفعلا لاحظت انه قوي العلاج اول مره عقب 3 ايام خفت وبدت تطيب ..
وبعد معاناة 6 شهور وتكرر الالتهاب قال الدكتور شلها ضررها بالمرحله هذي اكثر من نفعها ..
وبما انه جراح قلت له خلاص شلها لي ..
تنومت وسوا العمليه :
تقوم من العمليه واذانك توجعك من الالم والبلع تقل تبلع عظم ومجبور انك تبلع عشان تمرن الفك بعد العمليه ولا تخليه وبعدها يلتئم واذا جيت تاكل يتشققن الجروح اول يوم بعد العمليه معروف عند الكثير انه يكون عسكريم وجلي وبوارد اي شي بارد ولكن الافضل عصير وماء وهنا نقطه (ممنوع عصير الليمون والبرتقال والحوامض عموما) لمدة عشر ايام مع البعد عن العطور والدخان سواء تتن والا شيشه والا حطب والا بخور عشان مايلتهب ..
وممنوع اكل الحار الحبحر والشطه ولا البهار ولا الحار الشاهي ولا اليابس مثل الشابوره والبسكوت ..
اللي صار معي اني بعد كم يوم تقريبا 7 ايام حسيت اني بديت اطيب وطلعت مره اتقضى وتعرفون ريحة عطور بالسوق والتهب الجرح رجعت للبيت وكملت لي يومين والا الجرح ينزف كلمت الدكتور ورجعت للمستشفى وبدأ النزيف القوي ودخلوني العمليات وسكرو النزيف وصحيت قال الدكتور حصلت عندك شريان منفتح وخاطوه (بسبب الالتهاب )جلست عندهم 3 ايام ثاني يوم بعد العمليه الثانيه نقط دم خفيف وبلغت الدكتور وسوا لي كوي بعود نحيف يشبه عود الكبريت بس طويل وحط بنج بخاخ على مكان العمليه وكواه وبعدها الحمدلله راح النزف ..
وطلعت والحمدلله ..
لاحظت بعدما طبت اشياء :
1- الطعم موب مثل اول فيه اختلاف واول افضل.
2- تحس انك بتغص بالذات مع اكل الرز .
3- بشرب الماء تحس بعض المرات انك بتشرق(تغص)
بعض النقاط:
سألت رجال كبير قال النزيف هذا افضل لك لأن الدم اللي طلع هو المرض اللي يسوي الالتهاب ولو مانزفت قد يحصل لك جلطه لاقدر الله او على الاقل يستمر التهاب مكان اللوزتين..
ظهر مع الالتهاب بياض مكان العمليه مثل الصديد ..
يستلزم اكل العلك بين الوجبات ..
يلزم مضغ الاكل وطحنه بالاسنان طحن جيد عشان يكون ناعم عند مروره من مكان العمليه..
يلزم اكثار الاكل بعد العمليه وخصوصا اللحوم والدجاج لبناء الجرح..
عدم حمل الاشياء الثقيله وعدم الصعود مع الدرج وعدم الاجهاد..
منطقة العمليه منطقه حساسه والنزيف وارد بعد العمليه ..
طبعا تدرون ان اللي يسويها وهو كبير مؤلمه له اكثر من الصغير وانا عمري 33 وقت العمليه..

(ملاحظه)
اذا صرف الدكتور لك مضاد لاتوقفه ابد حتى ينتهي مدة تحديد الدكتور لك حتى لو طبت اوحسيت بالعافيه لأنه قد يزيد عندك المشكله لو تركته فجأه وتتضاعف وهذا شي معروف عند الكثيرين بس ذكرته للتذكير..
وارجوا ان اكون افدتكم..
وبالسلامه والصحه للجميع.
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
نسيج \| السنابس \| بلدة السنابس عمــلية نداء الأســيرات على شارع الدانة	محروم.كوم	منتدى أخبار المواقع والمنتديات العربية والأجنبية	0	05-10-2012 12:40 PM
نسيج \| السنابس \| بلدة السنابس عمــلية نداء الأســيرات على شارع الدانة	محروم.كوم	منتدى أخبار المواقع والمنتديات العربية والأجنبية	0	05-10-2012 11:50 AM