قصة حقيقية حصلت في مستشفى راشد (دبي)

|؛¤ّ,¸¸,ّ¤؛|الظاهري|؛¤ّ,¸¸,ّ¤؛| · #1 02-02-2008, 07:15 PM

قصه حقيقية مؤثرة قرأتها من منتدى
وحبيت انقلها لكم وان شاء الله تعجبكم..

قصة حقيقية حصلت في مستشفى راشد (دبي)
في يوم الاثنين

الموافق 7-1-1986

الساعه 7:15 الصبح

المكان

مستشفى راشد في دبي

طلعت الممرضة من غرفة الولادة و شافت علي يالس على الكرسي

ويدعي ربه أن الولادة تتم على خير

يت الممرضة عداله

الممرضة : "..sir.. mabrook .. you got aboy .."

(مبروك ياك ولد)
علي من الفرحه شوي و بيطير من مكانه

اخيرا ربي رزقني بالولد

الحمد لله و الشكر

شاف علي ولده و استانس و فرح و سماه محمد

في الغرفة

علي : " الحمد لله على السلامة يا أم محمد"
ام محمد : "الله يسلمك .. أخيرا تحقق الحلم ويا محمد "
>

وتموا يرمسون عن احلامهم في المستقبل

محمد من يوم هو صغير

كان يجنن والممرضات متخبلات عليه

اليوم الثاني

الصبح الساعه 9

دخلت الممرضة تنظف الحجرة

محمد كان في المنز عدال امه

والام شبه راقده

الياهل مثل ما كل اليهال وهم صغر

توه راضع و زاع

الممرضه يوم زاع

شلته و حطت بطنه على ايدها و قامت تضربه على ضهره

ام محمد فزت من النوم و فتنت عليها و شلت الولد

ما مرت دقيقتين الا محمد يزوع مره ثانيه

بس هالمره الزواع لونه وردي

مش طبيعي

زقرت ام محمد الدكتور و خبرته

شلو عنها محمد و راحوا

و عقب شوي ياها الدكتور و قاللها تطمني

بس قلب الام

ام محمد على طول اتصلت في علي وقالتله تعال المستشفى

علي كان رايح العين

لانه يداوم هناك

و كان على اساس ان ام حرمته بتسير تيلس عندها

قالتله ام محمد

الحين ترد

ما تسير

رجع علي باسرع ما يمكن

و حصلله رادار في الطريق صورة

من وصل المستشفى خبرته ام محمد بالسالفه

سار يدور الياهل

ما لقاه في الحضانه

طلب الدكتور و يوم يا قاله وين ولدي

الدكتور : " ابنك موقود ..كا تخفش.. مافيش اي حاجه "
بو محمد :رد الحجره و يلس ويا حرمته يتريا اييبون الاهل ..

عقب شوي دخلت ممرضه تصيح
هالممرضه كانت الوحيده المسلمه في هالقسم

علي : " .. خير شو فيج "
الممرضه : " بابا... مال انته بجا واجد تعبان... ممكن موت .. كلش دم يجي من هلج مال هو .."

ام محمد :من سمعة هالرمسه اضلمت الدنيا في عينها..

و يتعافدن الممرضات ينعشنها

بومحمد سار عند الدكتور و قبضه من رقبته

وقاله الحين ابا اشوف ولدي و لا تراني باجتلك

و عقب بو محمد عرف السالفه كلها

و الصدمه

محمد عنده نزيف داخلي--- ثقب في الحجاب الحاجز للقلب

علي : " ... دكتور .. ولدي بيموت وانتو مخبين علي.. شو ممكن نسويله الحين.."

الدكتور : " الصراحه ما اعرف شو اقوللك... نحنا ممكن نسويله عمليه نلحم فيها الحجاب الحاجز.. بس نسبة النجاخ فيها 3% "

علي :" لا حول ولا قوة الا بالله العلي العظيم .. حسبي الله و نعم الوكيل " مرت الايام

و علي مب عارف شو يسوي

شهر مر و محمد عايش على الاجهزه

ابو علي قاله خلنا نسفره برع

بس المشكله ان حالته ما تسمح بالسفر

الدكتور طلب يقابل علي

علي :" دكتور طلبتني ..."

الدكتور : " هي نعم ... يا علي حالة ولدك صعبه و نسبة نجاح العمليه تكاد تكون معدومه .... شو رايك تتبرع بولدك لخدمة الانسانيه و نحن عندنا خبير الاماني يبا يجرب علاج جديد للقلب.. فشو رايك تتبرعلنا بولدك"

( على ذمتي ان كل كلمه من هالحوار صحيحه)

علي شو وكان بيقتل الدكتور

بس الدكاتره الباقين قبظوه

اليوم الثاني سائت حالت محمد

الساعه 2 في الليل اتصلوا المستشفى و قالوا ان النزيف اشتد و لازم تتسوى العمليه خلال 6 ساعات ولا الولد بيموت

بو محمد يالس على نار

اتصلبه ابوه و قاله لا تسوي العمليه

بنحجز طياره طبيه خاصه و بنطرشه برع يعالج

علي قاله لا

انا بستخير و بشوف

بو محمد استخار ربه و قرر يسوي العمليه

الساعه 6:15 الصبح محمد داخل غرفت العمليات

و امه يالسه عند الباب تصيح و تذكر ربها

الساعه 7 ..... ماشي خبر

الساعه 8 ... ماشي خبر

الساعه 9 ... طلع الدكتور و قال الحمد لله لحمنا الحجاب الحاجز و القلب بعده يدق بس باقي نسكر مكان العمليه

ام محمد الله سجدت لربها شكر في الممر و تمت تصيح

رجع الدكتور غرفت العمليات

الساعه 12:30 طلع و ويهه كله عرق

و نظراته حزينه

قال حق بومحمد : " للاسف اخ علي ... من عقب ما سكرنا الجرح و قف القلب..."
بو محمد : " لاحول ولا قوة الا بالله .. اللهم اجرني في مصيبتي و اخلفلي خيرا منها..انا لله وانا اليه راجعون "
الدكتور تعجب من ردت فعل علي و توقع انه يصيح و يولول

ام محمد : " لا حول ولا قوة الا بالله.. بس لا ... ولدي ما مات.. انا متأكده "
الدكتور : " انا اقوللج قلبه و قف تقوليلي ما مات "

ام محمد : " انت ما تعرف شي.. انا في داخلي شعور يقوللي و لدج حي .. و انا مؤمنه بربي و متأكده انه ما بيخذلني"

ما لحقت ام محمد تخلص كلامها الا النيرس طالعه تصارخ

"his heart is beating again... i cant believe it"

(ما اقدر اصدق ... قلب الولد رجع يدق)

الدكتور ما عرف شو يقول

تم يطالع ام محمد اللي كانت متغطيه من راسها لين ريلها

و يقول في خاطره : " من وين لها كل هالقوه و الصبر"

( عقب بتعرفون كيف عرفت اللي في خاطره )

رجع الدكتور غرفة العمليات

و تم فيها 3 ساعات

قلب محمد يدق و عقب يرجه يوقف

عقب ما خلصت العمليه و استقر قلب محمد

نقلوه غرفة العنايه المركزه

الحين عمر محمد شهر و نص

بعد 3 ايام فتح محمد عينه

طبعا من عقب العمليه كان ممنوع حد يدخل عنده

حتى امه

يوم فتح محمد عينه فرحت امه

و بطلت شنطتها و ما خلت فيها شي

فلوس و ذهب

كل شي وزعته

و تمت تشكر ربها على ان ولدها فتح عينه من اول و يديد

بس الفرحه ما تكتمل

اليوم الثاني ياها الخبر

و الله محمد عنده تسمم بكتيري في الدم

بسب تلوث شي من المعدات اللي استخدمت في العمليه

بس تمت صامده

وكان محمد كل يوم يغيروله دم 3 مرات

ذبل و شحب

و امه صابره

بعد 3 اسابيع شفي من المرض

وبعد ما طلعوه من العنايه المركزه

ام محمد يالسه في الحجره تطالعه و تقرا عليه

و تطالع آثار العمليه اللي في بطنه

دخل الدكتور الماني

يلس الدكتور وقال حق ام محمد ممكن اكلمج في موضوع خارج شغلي

ام محمد تمت ساكته

قاللها : " انا ابا اعرف انتي شو اللي كان مثبتنج و مخلنج تصبرين كل هالمده "
ام محمد : " و هي ماسكه المصحف في ايدها .. ربي و هذا.. وانا كنت واثقه ان ربي ما بيخذلني و قرتله الآيه اللي تقول : "وقال ربكم ادعوني استجب لك " و قالتله ان اللي يتوكل على الله خلاص ما يهمه شي"

الدكتور ما علق و طلع من الحجره

اول ما وصل علي يا الدكتور وقاله ابا ارمسك في شي خصوصي شوي

علي طلع وياه الممر و قاله تفضل

الدكتور : " ممكن اعرف ليش حرمتك جيه متغطيه ... حتى شو لونها ما يبين "
بو محمد : " انا بقولك ليش ... نحن عدنا الحرمه مثل الجوهره الثمينه .. لازم نغطيها و نحفضها من عيون الناس و تكون حق صاحبها و بس "

الدكتور :" والله ان هذا هو اكرام الحرمه ... بو محمد انا قررت شي .. و ابا اقولك اياه"
بو محمد : "قول"

الدكتور : " أشهد ان لا اله الا الله و ان محمد رسول الله "

بو محمد : " الله اكبر .. الله اكبر"

و اسلم الدكتور من ورا قصة محمد و امه

هذه قصة حقيقيه

محمد الحين عمره بين 22 23 سنه

وهوطالب في جامعة الامارات يدرس في كلية الاداره __DEFINE_LIKE_SHARE__

حوريه بارض السعوديه · 02-02-2008, 10:51 PM

مشكوووووووووور اخوي عالقصه

صدق مؤثره ........ __DEFINE_LIKE_SHARE__

بنت عيمان · 02-03-2008, 03:23 PM

القصه وااااااااااايد مؤثره

تسلم اخويه

والله ان الام قلبها يحس ف عيالها لو شو ماكانو يسوون ..... __DEFINE_LIKE_SHARE__

fo0oshy0_0 · 12-22-2011, 02:26 PM

تسلم اخوووي ع القصهه صدج مؤثرة ... __DEFINE_LIKE_SHARE__

عنجهيه بوظبي · 12-22-2011, 05:46 PM

سبحان الله صدق المفروض ما نياس من رحمه الله الواسعه بس بعد الدكاتره المفروض يخافون ربهم فشغلهم اكثر لانه امانه وبيتحاسبون عليها ويزاك الله خييير عالقصه الحلوه __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
‏وفاة الطفل «راشد»في مستشفى القاسمي‏	7αsSỚoη	اخبار محلية و عالمية	24	04-09-2010 08:15 PM
قصه حقيقيه حدثت في مستشفى راشد...؟؟	محروم.كوم	منتدى أخبار المواقع والمنتديات العربية والأجنبية	0	11-22-2009 01:30 AM
قصه حقيقيه حدثت في مستشفى راشد...؟؟	محروم.كوم	منتدى أخبار المواقع والمنتديات العربية والأجنبية	0	11-22-2009 01:10 AM
حادثة حقيقة حصلت في مستشفى الوصل ؟؟؟	سماري كشوخي	قصص و روايات	27	09-16-2009 03:52 AM
قصة حقيقية حصلت لشاب فالعين	دبدووب	قصص و روايات	31	02-05-2009 01:15 AM