شاركت بأجمل صوره من عندي وشاركوا بأجمل صوره من عندكم مع السوالف

محروم.كوم · #1 04-25-2009, 02:30 AM

بسم الله الرحمن الرحيم

السلام عليكم ورحمه الله وبركاته

مسيتم بالخير ياعضاء مكشات كلن باسمه من الكبيرللصغير جيناكم بها المشاركه بعد فتره طويله من الغياب غير المقصود

وهو الطير اللي طرحته وسبق ان انزله واحد من خوياني على عضويتي وارى في هذه الصوره شي من الجمال اللي كل من شافها

قال صوره مركبه واتمنى من الاخوه المشاركه بصوره جميله تخصهم علشان ايامنا هذي ايام

ربطه الطير واقول مثل ماقال ابن فطيس

الله على الربطه يعين الصقاقير اللي تعد الريش وتعد الايام

يقطعون اوقاتهم بالتسايير وشوف المقانيص القديمه بالافلام

وهذي هي صوره الطير فرخ حمر كاشف 16 ونص في 16 ونص واللي شايل الطير سعد الجهني الثاني ولد العم محمد الحربي

وأبي أعلمكم سالفة الطيرلأن خويي اللي نزل الموضوع على عضويتي ما قصر طبطب وليس ما طلع كويس في السالفه ههههههههههه

وفي يوم 28/11/1429هـ تم الأفراج عني من لا تحسبونه سجن تراها دورة عسكرية ههههههه

بعد 35 يوم خرجت من ذاك المكان وأنا كني سجين لي 20 سنه ذابحني الشوق يم هلي وربعي وطيري ردام طبعا ما نسيته كان في الساحل مع خوي هاشم الحرازي قنصبه شهر ما قصر وأكيد كان خروجي مع نهاية هجرة الطيور ودخولي هالمكان المبروك 24/10/1429هـ في عزها وكان خروجي يوم الأربعاء وفي يوم الخميس رحت عند خويي هاشم تقهويت عنده وقلت له أبسري قال على وين قلت الساحل عسى الله يرزقنا قال الله يرزق بس حنا في إقفاية المقناص قلت الله كريم ومشيت أنا وخويي أبوعرادة وكان في جبال صلى حر يحاولونه أسبوع ما طرحوه وما دريت عنه إلين طرحته وفي صباح يوم الجمعه قنصت بهاك الديرة إلى الساعة 11 ورجعت يم العزبة وكان عندنا حمام وكانت العزبه بالقرب من صلى إسمها جبال العد وكنا الحمام مطيرنه كالعاده لجذب الطيور وكنت جالس أسولف أنا وخوياني وكان ردام في وسط المجلس لحظات والا هو يتهايق من على وكره يبصر يم الحمام شوي ويطيح من على وكره ويلتفت أبو عراده ويشوف ظل الطير من جنبنا والطير كان يهد على الحمام كان مار من فوق العزبه ومن الله كنت مجهز الزريق ولا فكيته ويروح خويي ويحذف للطير سمانه مشبكه بدون ثقاله وهذا أكبر غلط نحذفله وسط الجبال بدون ثقاله وهذي من الربكه ولكن الله لا كتب رزق للعبد يجيه و يحول عليها الطيرويضفها ويرتفع ويعلف منها والطير بدا يحوم وحنا نجهز الزريق ونثقله ونحذف ولا حياة لمن تنادي وهي لحظات والطير يطش العلفه وهي عالقه فيه طشها من لسعة النايلون وحول من ورى الجبل في الوادي وجيت في حروته ومعاد أدري وين هي أرضه وأفرع عن ردام لعله يطلعه وكان يقف ردام ومعاد تحرك وأنظر يم شوفه ولا الطير بين الحصى شفته من بعيد وردام ما هوب بشايف العلفه مدروقه بين الحصى وأقربله بالموتر وكان يلبد الطير أنشهد إن ذكي وأنزله وردام ما هوبطالبه وأترجى في طيري الله يرحم أبوك هد وكان أرميه في الهوى من القهر وقلت في بالي ياتجيبه يا تروح عني وكان يطير الحر وشافه ردام والعلفه منه مطوحه وكان يحول عليه ويعلقه وأجي وأضف الطير تذكرت كلام الفيتو عن ضفت الطير شعور لايوصف إيه والله ما أقدر أعبر عن ذيك اللحظه وتجمعوا القنوص من مجيرمه والشعيبه وأول الحاضرين رجال معروف بالساحل شاف الطير وقال مثلوث ومشي وعلم القنوص بالجهاز إن الطيرمثلوث وكانو عيال هاشم الحرازي موجودين وقتها وقالوا إن الطير تام ما فيه شك وجانا إبن العود بنفسه وقال إن الطير تام وكل القنوص تماموه وحددنا في اليوم الثاني المزاد وشرها أبو ظفر القحطاني بــ12ـــألف وراح الطير عند معزبه الله يباركلهم فيه واللي عذرب فيه الله يسامحه وأقول :

أنا ليا شفت أحمر الريش ينطرب بالي على شوفه طرب

صافي ظهر بلا رش ونقاريش نادر ما به عذاريب مثل الذهب

وهذا الصقار عبدالله الحرازي مبسوط ماتقول إلا طيره الله يطول في عمره

والصوره اللي في التوقيع صوره طيري ردام وسلامتكم
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تميز بأجمل القصائد بأنسب الاسعآر	محروم.كوم	منتدى أخبار المواقع والمنتديات العربية والأجنبية	0	12-20-2009 08:10 AM
يطلع عندكم صوت بالعدسه لين تصور صوره لل Hd؟	محروم.كوم	منتدى أخبار المواقع والمنتديات العربية والأجنبية	0	09-04-2009 06:40 PM
:: شاركنا بأجمل مسج MMs ::	احلاهم واتحداهم	هواتف , مسجات , وسائط , برامج , ثيمات , نغمات , بلوتوث	5	08-31-2008 06:36 PM
شارك بأجمل بيتين	мžιόùη.ŭāэ	المواضيع المكرره	1	01-16-2008 11:08 AM