مع خالص "احتقاريـﮯ " محبوبتگ لعام 2007 م - الصفحة 5

! ĐįƠЯ ƒάṦђịǑη ! · #1 12-19-2011, 10:16 AM

عرف فيصل انه ها المسج من صوب غايه لكن انقهر من المسج شو تقصد بها الكلام ..؟؟ يعني هي اللي سوته شويه ... خيانه عيني عينك .. احبك واموت فيك تقولها لولد عمها .. ويسمعها باذنه وتباه يسامحها ...

كذبت وقلت ما احبك عشان الحب يعذب حيل مايرحم ابعدك عن دنياي ولا ابي اوقف بدربك ولا ابي اظلمك وياي ...
وانا والله مالي قلب احب بعدها
اندم ..

وفي ها اللحظه عند قوم غايه وصل حمدان وشلت روضه تيلفونها وركبت غايه وهي متغشيه وتذرف دموعها من تحت الغشوه وكل حد ساكت في السياره وبس صوت الاف ام ...

فيصل تم يتريا رد من صوبها بس ماطرشت شي جان يقول " احسن انا مابا ا وارد ارمسها ... واحبها اكثر واندم .."

دش علي وامه وياه .. وتمو يسولفون ... ويحاول فيصل انه ينسى غايه ويبدى حياه يديده بعيد عنها وعن ذكراها خلاص بها اليوم حس انه لازم ينهي كل شي له علاقه بغايه ... شويه ودشت عفرا بنت خالته وهي مبتسمه وكانت متحجبه ... ويلست وياهم ...

ام علي : ها فيصل يقوولون باجر ملجة اللي كنت خاطبنها قبل بنت حارب ... ( طبعا بدفاشه )

فيصل قلبه عوره : هيه الله يهنيهم

ام علي : ان شالله بنسيرر وبنطالع

فيصل " اففف ليش ياخالتي اتمين تقولين لي جي كفايه اللي فيني "

تمت عفرا تطالع فيصل ولمعة الحزن في عيونه ومنزل راسه ويشرب الجاهي

علي : احم انا بعد بعرس

ام علي : خل اختك اول اتعرس

فيصل : متى العرس

ام علي : عقب شهر اونه مستعيلين

فيصل : زين زين بالبركه ان شالله

ام علي : وانته متى ناوي اتعرس

فيصل رفع راسه وطالع خالته بنظره جنه يقولها " بس كافي .." وشاف عفرا اطالعه واستحى ونزل عينه عنها

فيصل : يوم الله بيريد ولا انا مالي خاطر في العرس

ام علي : عيل كان لك خاطر يوم سارو يخطبون لك هاايج

فيصل بعناد : هيه كان لي خاطر ومن عقبها خلاص ...

ام علي : والبنات انزين مكودات وجدامك سير واتنقى

فيصل يصد وبعناد ويطالع عفرا : وانا مابا .. حد من البنات انا باخذ لي بنت من الشمال

ام علي ..: جان مب شايفلك شوفه

فيصل : ههههههههه ياحسره انا اصلا من متى اسير الشمال عشان اشوف لي شوفه يالله عن اذنكم بترخص الربع يتريوني

وظهر بدون لا يسمع ردهم لانه كان متضيج من كلام خالته يدري بها دفشه من يومها ..

وظهر وراه علي : ياريال انته تدري بها الوالده

فيصل : ماعليك مني بس ابا اعرف ليش يسالوني متى بتعرس ومتى بتعرس شو يالس ع راسهم انا

علي : هههه برايهم طبهم عنك ..

وتنهد فيصل من الخاطر اليوم بالذات ماله نفس لاي شي ...

.................................................. .................................................. ...........................................

غايه في البيت دشت حجرتها وفتحت مناحه وتمت تصيح من خاطرها فيصل بايعنها مايباها .... مخها عيا يفهم شو استوى . مب رايمه تستوعب انه خلااص كل شي انتهى ... مرت على امها وتمت تسولف وياها بهدوء لين ما استوت الساعه 12 .. عقب امها سارت ترقد ونشت غايه بتسير حجرتها وهي قلبها يعورها لانها مب رايمه توقف اللي يستوي ... وكاتمه دمعتها في عينها واول مادشت الحجره سكرت الباب واتساندت عليه وغمضت عينها بقوو عشان تحاول تمنع دموعها ... وتتذكر مواقفها من يوم كانت صغيره لين ماكبرت ويا فيصل .. كلامهم .. حبهم .. شوقهم .. ضرابتهم .. كل شي .. كل شي .. جمعها بفيصل .. فتحت عيونها ببطىء ونزلن دموعها بسرعه التفت للباب وقفلته قفلتين بالمفتاح من غيضها ... ومشت بتعب لين الشبريه ويلست ورفعت ايدها وتمت تجلبها في الهوى بين عيونها وتطالع اثار الحنا المنقوشه على ايدها ... وابتسمت من بين دموعها ..

" بياخذوني عنك يافيصل .. حرام عليك والله احبك .. ليش بتخليني ..؟؟ ليش قلت لي جي .؟؟ شو استوى .. شو تغير .. مب رايمه افهم شو يصير ..؟؟ ( ردت ايدها في ثبانها ونزلت راسها وتمت تصيح بهدوء ) .."

عقب فتره من الهدوء والصياح اللي ماينفع ... نشت غايه بعصبيه صوب التواليت وتمت تفتح السدات بعصبيه كبيره وهي ترمس بصوت مسموع وهي تصيح : مستحيل اخليهم يكملون اللي سووه .. مستحيللل .. بوقفهم عند حدهم ... بوقفهم ...

ومن عصبيتها قامت اتطلع السدات من مكانهن وتفرهن في الحجره بقوه ع اليدار لين مااتحولت الحجره لدمار ... وقفت غايه مذهوله للي سوته بين حطام حجرتها وتطالع الحجره بنظرات خاليه من اي شعور ...

" حياتي خذتوها .. !! دقيتو المسامير في نعش حبي ... وصلبتو اطهر واشرف مشاعري ... اللي هي حبك يافيصل .. ( ويلست ع الارض ولمت عمرها وحطت راسها ع ركبتها في نص الحجره وتشهق من كثر الصياح .. ) حبك يافيصل ... "

جان تنتبه للشي اللي تدوره من الصبح ومدت ايدها للولاعه اللي كانت دوم في حجرتها عشان تلبق شموعها ... سحبت الولاعه وتمت تجلبها من الايد اليمين للايد اليسار وهي تبا تتاكد من صحة اللي تسويه .... وبصوت مسموع : ماعاد شي يهمني ..!! ذبحتو قلبي .... وانا اللحين بذبح عمري عشان تفتكوون كلكم مني .. (وطالعت بيت قوم فيصل من الدريشه ) وانته اولهم يافيصل بفكك مني ....

هوست ع الولاعه وطلعت الضوو فكرت في فكره غبيه انها تحرق عمرها ..بس هزت راسها بالنفي .. هي اكبر من جي ... نار جهنم ماتقول لا للي يبون ينتحرون ؟؟؟ بس .. كيف اتوقفهم عند حدهم ...

انطفت الضوو ردت تشغلها مره ثانيه وتقربها من ايدها وتحس بحرارة النااار وبدت تحرق الحنا عشان يخووز وتتألم .. لين ماقتربت الضوو وايد منها وسوت أثر للحرق .. ومن كثر الالم صرخت غايه من الالم ونشت تركض الحمام وشغلت الماي البارد وتمت حاطه ايدها تحت الماي البارد عشان الحرق ... وتطالع انعكاس صورتها في الجامه وهي تصيح ... وتقول : غبيه ياغايه ... من يومج غبيه ... حمد واقع في حياتج انفرض عليج .. مثل ما انفرض عليج بعد فيصل ... ( سكتت فتره ) لا لا كله ولا فيصل .. ادري يحبني .. ادري يباني ... ادري بيرد لي ..

سكرت فوز الماي بهدوء وانسحبت للحجره وفتحت كبتها طلعت فستانها وحطته ع الارض بين حطام حجرتها ردت اتصيح بشده .. واتطالع الفستان : اكررهكم .. كلكم ... اكرهك حمدااااااااان ... اكرررررهك ...

سارت وداست ع الفستان وع طول سارت للشبريه وتلحفت وتمت اتصيح واتصيح ... لين مارقدت ... وماحست بكل الغباء اللي سوته في ليلتها الماضيه ... وغفت عينها على حلم مزعج .. وكابوس الواقع ...

.................................................. .................................................. ........................................... __DEFINE_LIKE_SHARE__

! ĐįƠЯ ƒάṦђịǑη ! · 12-19-2011, 10:16 AM

اليوم الثاني ..

علايه نشت من وقت يعني ع الساعه 8 وربع ... سوت لها عصير برتقال وشلت الام بي 3 مالها وظهرت خاري في الجو الحار ... وتمت تتحوط في الحوي وشافت سيكل حمود اخوها جان تسير وتركبه وتمت تسوق السيكل ... جان تشوف سياره داشه داخل ع طول علايه سارت ورا الفله عن يشوفونها سارت لبست شيلة البيت واتحجبت ونزلت تحت وتمت توايج من الدريشه .. وشافت حريم ينزلون ... وعقب انتبهت انهم عيال عمها .. وطلعت برع تركض وع الدري تنقز جان اتطيح ع الدري طبعا .. كل اللي صوب السياره صدو عليها .... علايه رفعت راسها اتشوفهم

فطيم من بعيد تزاعج : هههههههههههههههههه وانتي هاي ماركتج مانعرفج الا يوم تنجلبين ..

علايه تبتسم بس ركبتها تعورها من الطيحه ونشت على حيلها : ااي ... تعالي دبوه ببوسج

فطيم يت تمشي ونشت لها علايه وحضنتها اول ماشفتها .. طبعا دمعوو ... وسلمت عليها عقب سلمت على بنت عمها الكبيره ميثا ومرت عمها وكان الدريول يايبنهم ودشو كلهم داخل

علايه : ماشالله عليكم يايين من وقت

فطيم : جب يالسباله انتو من متى يايين ونحن ماشفناكم متولهين عليكم

علايه : طالعي ساعتج

فطييم : الساعه عشر طعش كيفنا البيت بيتنا متى مانبا ني بني ..

ام حسن ..: هههههه اسميج ياعلايه سووالف ... امج راقده

وتدش ام محمد .. وسلمت عليهم

ام محمد : ماشالله شو ها المفاجاه

علايه : افف مايخلون الواحد ياخذ راحته حتى الصبح بيلزقون فيه

فطيم : يارج الله نحن يايين نسلم علي خالتي مب عليج مالت عليج

ميثا : هههه اميه قومي نضرب عليوه تامه مستقويه

علايه : ههههههههه اسوولف بلاكم والله نورتوو ... البيت بيتكم كلكم الا فطيم

فطيم طالعتها بنظره وضحكت علايه وتمو يسولفون ... وكانت لمه حلوه .. ويقولون لهم سوالف السفر .. شوي ويسمعون دق ع الباب وصوت رجالي ...

...: هوود هوود

ام محمد وام حسن اتحجبن لكن علايه من سمعت حسه ع طول نقزت للباب وحضنت عمها الصغيرون " أحمد " عمره 20 ووايد حبوب ووايد ويا علايه ... تمت علايه حاضنتنه وتصيح من خاطرها ... تم احمد مستانس ويمسح على ظهرها .. ودمعت عينه هاي دلوعته عليوه ... بعدها عن حضنه وهي تمسح دموعها وتضحك

احمد : ههههههههه توني ادري اني غالي لها الدرجه

علايه تدزه بالخفيف : جب

احمد : عليوه خلنا نعيد اللقطه ههههه

علايه : احمدوووه بات عندنا اليوم والله اتولهت عليك

احمد كان يطالع صوب بنات اخوه والحريم في الصاله ومتلوم لانه ماسلم عليهم : احم احم السلام عليكم ياقووم

فطيم تيلس : نحن مب لازم انسلم ملينا منك

احمد : امره الغياره ..

فطيم : هاهاها ما اغار

علايه لزقت في عمها وسارت تمشيه لين الغنفه ويلست حذالها امره لاصقه فيه شويه وبتيلس في حظنه جان يصد عليها وهو يسولف : اخبرج تعالي ايلسي في حضني بعد ..

علايه : احمدووه والله اني اتولهت عليك

ام محمد : علايه بس عاد خلي عمج ياخذ راحته

علايه ويمت : انزيييين

احمد طالعها بنظره وابتسم ... وتم يسولف وياهم

.................................................. .................................................. .......................................

بيت قوم حمد ... ع الظهر ...

كل حد مرتبش من صوبه عشان الملجه اليوم والاتصالات شغاله من الصبح ... وكان كل شي اوكي .. . باستثناء روضه اللي ياها اتصال اليوم الصبح ونرفزها .... بس حاولت تبين للكل العكس .... وقت الغدا دشت روضه حجرة حمد على اطراف اصابعها وهي تفكر في كل اللي تسويه بس في النهاية قالت .." انا عبدا مأمور " ..

وقفت في نص الحجره ويايه بترد من وين مايت ولفت بتسير صوب الباب ... " لاياروضه .. هي طلبتج طلب وانتي مابتردينها .... بس حمد اخويه .. ليش احطمه كثر مما هو متحطم ... ااااه انا بسوي والله يعين اخويه بس .. "

ولفت تاخذ شغلها وظهرت تركض لحجرتها ....

اما غايه من نشت الصبح شافت حطام حجرتها ورتبتها ع السريع وطالعت مكان الحرق قي ايدها استوى الحرق قبيح ولونه مايل للزرق والاخضر والاحمر .. مخلي علامه قبيحه في ايدها .. بين نقوش الحنا .. ويتها امها وتمت تسولف وياها عن الملجه وامها قلبها معورنها على بنتها اللي انظلمت وسايرت ظروف العادات والتقاليد ... على حساب سعادتها ورضت بولد عمها اللي كان يبا غيرها ويتمنى ويرتجي حب غيرها ... طبعا ها الكلام حسب وجهة نظر ام حمدان ..

ويت اللي بتعدل غايه وغايه متوتره حدها

ام حمدان : ها يابنتي تبين شي ..؟؟

غايه سرحانه والحرمه يالسه تسوي شعرها : هااه لا خلاص اميه ماشي ..

ام حمدان شوي وبتصيح : انتي راضيه ياغايه

غايه وهي تطالع للمدى البعيد وتتنهد بتعب : اااااه راضيه ياميه راضيه ... ( وابتسمت بهدوء ) ها النصيب ( وصدت على امها ) ولا شو رايج ؟

ام حمدان ريحتها ابتسامة بنتها : بارك الله فيج يامايه .... يالله بخليج بسير اطالع البشكاير شو سون وخل الحرمه تنقفض اللحين العصر شوي وبين الحريم .... وبيمتزر البيت

عقب شوي قام البيت يمتزر من الناس ... والحريم ... وبرع يابو فرقة المزيود ويرزفون ... وطبعا يابوهم قبل المغرب بساعه عشان الحر ومايرومون يتمون وايد برع ... واتيمعن سيايير واايد جدام بيتهم وقامو الشباب يمارسون هوايتهم يصيحون ويلات ويحرقون التايرات ... الخ ... والحشره لين داخل ... غايه يالسه في الحجره ويحطون لها لمساتهم الاخيره وقلبها يدق بسرعه وكانت هاديه وايد دشت روضه عليها اللي كانت متعدله وتامه حلوه وايد ... وفي ايدها اوراق وايد ... ووطتهن على طرف الشبريه ... واول مادشت روضه غايه ابتسمت لها ولكن روضه تمت مكتفيه وهي تراقب لمسات المكياج الاخيره على ويه غايه الطفولي اللي يعكس مشاعرها الشريره المتولده في قلبها من يوم ابعدوها عن فيصل ... شويه وخلصت الحرمه ودشت ام حمد على غايه وسلمت عليها

ام حمد : ماشالله عليج عيني عليج بارده ربيه يحفظكم لي ... ويخليني لين ما اشوف عيالكم

غايه دمعت وبصوت واطي : اميين

ام حمد تمت تطالع غايه وهي تحلم احلام اي ام بتكون اليوم ملجة ولدها ..وغايه تبادلها الابتسام وهي تحس بانه كل اللي يستوي مثل الحلم .. ياما اتمنت ها الليله ويشاركها فيصل فرحتها وتكون فرحتهم وحده ... هي وفيصل وبس ..

ام حمد : يالله بترخص بسير اجابل الحريم ... واقري على عمرج قبل لاتنزلين ان شالله غناتي

غايه تبتسم بهدوء : ان شالله من عيوني ..

وطلعت ام حمد ولمت الحرمه قشارها وطلعت ورا ام حمد وسكرت الباب وراها ... روضه ماتحملت كل اللي يستوي تحس بالذنب عشان اخوها وتحس باحساس مب حلو صوب غايه لانها تعبانه نفسيا ونفسيتها مووول ... مب شي

سارت روضه بدون لاتقول شي وحضنت غايه .. غايه خذت راحتها في حظن روضه وتمت مغمضه عيونها وتبتسم ع سخرية القدر .. انها اليوم حرمة حمد .. مب حرمة فيصل

روضه دمعت وبعدت غايه عن حضنها ومسحت دموعها عشان لايخربن الميكب .. وصدت صوب الاوراق وشلتهن وحطتهن جدام غايه ...

غايه تناولت الفايل من ايد روضه وفتحته وقرت اول صفحه بصوت مسموع : وصية ميت مب مرحوم ... اتصدقين عنوان غريب ... كيف يكون الميت مب مرحوم ؟؟ هذا اي نوع من الموت ؟؟ شو مرتكب ها الميت من جرائم عشان يكون مب مرحوم غريب ها الحمد ... غريب ...

روضه بألم : ماعرف بس ياغايه فكري في كل اللي تسوينه

غايه تجلب الفايل : فكرت ...وفكرت ... ( وتسكت شوي لانها تقر اللي مكتوب ) اتصدقين .. الحياه لعبه ( رفعت راسها ) وانا خسرت في اللعبه واحس اني يوم عن يوم استسلم للقدر .. يعني لازم اعترف ... Game Over
وفيصل ... ااه يافيصل ... بيتم لي الحبيب الاول .. والاخير

روضه انسحبت بهدوء برع عشان تسلم وتنسى اللي تقوله غايه وتخربط وتقول في خاطرها " مينون بياخذ مينونه .. عاشو والعيال شو بيطلعووون .. ههههههههههههههههههههه جني اتمصخر عليهم بس والله عيزت منهم ابا افهم كل واحد شو في خاطره ليش كل ها العالم يعيشون في غموض ..الحياه بسيطه مايبالها كل ها التعقيد .. !! "

نزلت روضه تحت والحريم اللي كانو موجودين كانو كلهم تقريبا من الاهل والمعارف لانه المعازيم بيوصلون عقب المغرب ... يوم الجو بيتعدل شوي وكان الحوي روعه مزين بطريقة راقيه .. المرواااح في كل مكاااان كبار وصغار يعني اللي يشوف الحوي من فوق بيحس انه الحوي استون له اجنحه وبيطير .. من الكثر المرواح .. وكانت فيه كوشه صغيرونه على طرف الحوي كرسي حديدي يلتف بكريقة حديديه حلوه وجدام الكرسي قوس ورد منسق بطريقة حلوه والورد منتشر ع كل الحوي ... عقب المغرب تيمعو الحريم واستوت الزحمه وفي حجره غايه كانن بنات غايه كانت تربطها بهم معرفه سابقا ..

فجأه دشت علايه اول مادشت الحوي بطلت الغشوه عن وييهها وطلعت شعرها برع العباه وتمت تنقل نظراتها في ارجاء الحوي الواسع وتحاول انها تحصي بنظراتها عدد الحريم اللي ياليسين ... وقام قلبها يدق بسرعه بسرعه ..

" شو فيج ياعلايه شو ياج ؟؟ ليش جي قلبج يدق بسرعه ... معقوله بها السرعه حمد يخطب ويعرس ... ليش انا زعلانه ؟؟ ليش !! "

ام محمد صدت على بنتها اللي تمت واقفه عند الباب : عليا يالله اميه طوفي

عليا شوي وبتصيح : مابا ابا اروح . مابا اتم .. ابا اروح اللحين ..

ام محمد : عليا طوفي يامايه شو ها الرمسه .. مب حلوه جي الناس قامت تطالعنا

عليا دمعت : دخيلج اميه اابا اروح ..

شويه وينفتح الباب اوتدش حرمتين وبنت ع كرسي متحرك ...

الحريم : السلام عليكم

ام محمد تمشي صوب الباب عند علايه : وعليكم السلام

ام محمد: يالله عليا فديتج طوفي امشي شو ياج

علايه اتطالع امها بنظرات خوف : مابا اميه ابا اروح .. اللحين اللحين مابا اتم

ام محمد ماعرفت شو تسوي الحريم قامن يطالعن علايه .. وعلايه مصره ع رايها انها تروح .. اتقربت ام محمد من بنتها وهمست لها في اذنها : ايلسي شويه عشان خاطر ام حمدان وام حمد وعقب بتروحين يالله عاد عليا استوي حرمه

عليا هزت راسها بالايجاب ومشت ويا امها وسلمو على ام حمد وام حمدان ويتهم روضه وسلمت عليهم وتمت يالسه ويا علايه .. علايه كانت تبتسم بألم ... " اللي كانو يحبوني اشوفهم كل يوم ينسحبون من حياتي ... اتألمت لفراق سعيد ورحل عني وخلاني ... ومن عقبها حمد .. مع اني ماحبيته لكنه هو كان يحبني ... بعد رحل عني .. واليوم .. اليوم سجل ياتاريخ واشهد يازمن على معاناتي(وتتذكر اهانة حمد لها ) مع خالص احتقاري محبوبتك لعام 2007 .. " __DEFINE_LIKE_SHARE__

! ĐįƠЯ ƒάṦђịǑη ! · 12-19-2011, 10:17 AM

روضه شافت بنت تاشر لها من بعيد نشت روضه عقب ما استاذنت من علايه وسارت لها البنت وها البنت كانت عنود بنت يران قوم غايه طبعا اتعرفها من زمان

روضه : هلا هلا وينج من زمان ماشفناج ( وسلمت عليها

عنود : شو نسوي انتي وينج اللي مختفيه ... ؟؟

روضه : اتعرفين كنا مسافرين

عنود : ايووا الحمدللله ع السلامه

روضه : ها الحمدلله ع السلامه مامن شر اشوفج على كرسي ؟ والريل متكسره

عنود : صخي عني اتكودت وانكسرت ريلي

روضه : ههههه مب احسن من حال عليوه

عنود : منو عليوه بعد ؟

روضه : هاذيج اللي يالسه هناك ( وتاشر صوبها )

عنود : ايواا قصدج راعية الفستان الحمر هههههه من الصبح انطالعهم ماشالله عليها الحمر طالع عليها غاوي

روضه : ههههه اسمحلينا ماينفع التقردين

عنود : احم وديني صوبها بنتعرف وبنتقردن

روضه : لا يالله عيب عيب

عنود : هههههه ويا راسج ...

روضه : اوويه يالفشله ماسلمت على اهلج

عنود : ياللي ماتستحين ولاتخيلين يالله نشي مافيج مذهب امره

روضه تضحك وتسير اتسلم على ام فيصل وام علي ... لكن ام فيصل كانت شويه وبتصيح عشان ولدها اللي حالته ماتسر لاعدو ولاصديق ... عشان ملجة غايه ...

غايه في الحجره وجدامها الكتاب تطالعه بنظرات غريبه وبشعور بايخ .. وبابتسامه صفراء خادعه للناس .. وبقلب مجروح مزيف ... وقعت بلامبالاه .. وع طول فرت القلم وسط الكتاب الكبير وحطت ايدها على وييها ... وتنهدت بحيره وبتعب كان الوحيد اللي موجود في الحجره وياها حمدان عشان توقع ويضمن انها وقعت ..

حمدان يطالعها وكانه هم وانزاح : مبروك يا .... ياا .. اتصدقين احترت فيج .. انتي اختي ولا ابليس

غايه بنظرات كره وحقد والشرار يتطاير من عيونها لانه هو السبب الاول في تحطيمها وصدت عليه وبعيون حمر : استانس يا .. ياا .. ماعرف شو اقولك .. اتصدق احترت فيك انته اخويه ولا عدوي ...؟؟

حمدان ابتسم عمره ماتخيل ها المشاعر الكريهه تكون متبادله بينه وبين اخته عقب الموده والمحبه والانسجام .. ماتوقع عقب ها كله يستوي من بينهم هاالخصام .. سحب الكتاب بهدوء وظهر عنها وتمت غايه ... تطالع الكتاب اللي بين ايد حمدان واعلنو للكل ها الحزه ... غايه لحمد ....

في هاا للحظه فيصل قافل على عمره الباب ضاربنه ضيج فضيع البخاخ في ايده كل دقيقه يرش رشتين ولايحاسب على عمره تقريبا لين اللحين حول 44 مره رش البخاخ في حجله .. ويدخل عليه نور فرحة بيت يرانهم ويتسلل لعيونه نش بضعف وانكسار وسكر الستاره عشان يحجب ليت الكشاف الساطع في الحجره .. يحس انه بيختنق الهم يعصره .. حبيبته راحت ... وماتم له الا الذكرى ....

نزلت غايه للحريم تواجهم بابتسامه حلوه للناظرين ... لكنها ترسلها مجامله للالم .. حطو لها زفه وهي تمشي عليه وكانت في ايدها باقه صغيرونه كانت تمشي بثقه انها خلاص فقدت كل امل في رجوع غاليها .. امتلت عيونها بدموع واستوت لها غمامه دموع حجبت عنها من شوفة ويوه الناس مدت اطراف اصابعا لطرف عيونها وضغطت بصبعها على طرف عينها وتسربت دمعتها السجينه على طرف صبعها مانتبه لها الحركه انها دموع الا ام فيصل ... وصلت غايه للكرسي وابتسمت بألم ورفعت راسها ليت قوم فيصل .. شافت ظل فوق البيت منعكس ليت الكشاف يمنعها من شوفة الملامح لكن غايه عرفته عرفت انه فيصل ..... تمت مركزه نظرها فوق صوب فيصل وفيصل ماخوز عينه عنها ومب طايع يرمش حتى وهو يطالع حبيبته لغيره ... عنود اخته حست وع طول صدت صوب بيتهم وانتبهت للظل وع طول ظهرت تيلفونها وطرشت له مسج (( عيب هي على ذمة ريال ثاني ... )) ...

مد فيصل ايده في مخباه وقرى المسج ... ماتوقع انه بيصيح صد صوبها ووشافها لاخر مره وطالع السما وتمنى لها حياه سعيده من عقبه ونزل لحجرته وسحب سويجه وطلع من البيت ...

دش حمد بابتسامه وبخطوات واثقه يوزع ابتسامه علىالخلق .. علايه كانت تبا اتروح قبل لايدش حمد تم قلبها يدق بقوو بقوو ... تمت تسمي بالرحمن .. وتتعوذ من الشيطان ماشي فايده .. قلبها يعاندها ... اتحس بقفصها الصدري من داخل اتكسر من قوة ظربات قلبها .... رفعت عينها طالعتهم ع طول يت عينها في عين حمد

حمد يحس بالخيبه .. يحس بضعفه عمره اللي قضاه يترياها فيه راح .. واحتلته انسانه ثانيه نبض احساسه مب قادر يوجه لها اي مشاعر ... !! يمكن اتعاطف وياها .. حاول يحبها .. بس مايوصل لنص حبه لعلايه .. ع طول غير نظره لصوب غايه ويقول في خاطره ..

" تمنيتها وايد .. ودعيت انها اتكون من نصيبي ..بس هي هدمت كل شي ... ماتباني .. تبا فيصل و سعيد ... الله يهنيها وياهم ... "

[تمنيت قلبن يحس فيني ثواني.. ويعطف على قلبن متيم ومفتون
تمينت لكن ما هي بيدي الأماني.. ما كل من طلب حبيبن له يكون]

واخيرا نطق حمد : مبروك غايه

غايه ببراعة وجوده في التمثيل : الله يبارك فيك الغالي

حمد شل العقد من الصندوق الضخم البني اللي ميودتنه روضه ولبسها بحنان واللي يشوفهم يقول احلى اثنين ... علايه مب رايمه تتحمل اكثر نشت بسرعه وقالت لامها بتسير الحمام ... سارت علايه تركض ذرفت دمووع ماتدري دموع شو بالظبط ... بس الي عرفته انها زعلانه على عمرها ... !!

بدو المعازيم يشتلون واستوى المكان هادي ومحد فيه الا القليل .. حتى قوم علايه روحو وماتم الا الاهل .. اهل غايه واهل حمد وبس .. روحو ام حمد وبو حمد روضه واليهال عقب ماسلمو على غايه وحمد وروحو وعقب سارو بوحمدان وام حمدان يرقدون لانه تعبو عنثر اليوم وتم حمدان وحمد وغايه .. وطبعا حسب طلب حمد يبا يشوف غايه وييلس وياها حمدان مامانع بالعكس وافق ... سار حمدان ييلس في الصاله وياه اتصال من ربيعه وقال له انه بيمر عليه وطلع وياه شويه وبيرد لانه مايبا يتاخر وايد عشان حمد في البيت .. ووهو واثق في حمد وايد عشان جي برايهم ودام انها ويا ريلها برايها المهم افتك من هم اخته ... وللابد

كانت يالسه غايه وتهز ريلها وحاطه ظفورها في ثمها وتقرضهم من كثر ماهي متوتره ومب حاسبه لوجود حمد اي حساب ..

حمد يلس ع الكرسي اللي حذالها ورمسها بحنان : شوبلاج ؟

غايه صدت عليه بعيونها اللي ولعن باللون الاحمر تنذر بليله صعبه ع الشخصين : ومابلاني غيرك ذاك اللي بلاني

حمد ابتسم على تعليقها واعتدل في يلسته وعدل غترته اللي تامه جنها كوبرا لول . : تصدقين انتي طالعه حلوه اليوم

غايه مب متحمله كلام حمد وتحس انه روحها بتطلع ..: بس دخيلك بس .. ارحمني

حمد هني زاغ ويودها من ايدها اللي كانت ترتجف ..: بسم الله عليج شو ياج

غايه بنفاذ صبر : حمد بليز ثواني بسير وبيي

حمد : لو تبيني اروح بروح بس لاتضايجين بعمرج

غايه : لا لا اباك دقايق اوكي

حمد من قالت له ( اباك ) قومو عنه اتشقق من الفرحه ... وتم يطالعها بعيونه وهي تظهر ... ومن غمض عينه اتذكر نظرة علايه له ..... واتحولت ابتسامة الفرحه لابتسامة حزن .... شويه ودشت غايه وهي شاله رزمة اوراق في ايدها ... ودشت الميلس وقفلت الباب وراها والتفت لحمد وابتسمت بخبث .... وتقول في خاطرها " اللحين بخليك تهون عني بالتحطيم المعنوي .... "

حمد يطالعها باستغراب وهو يخمن في باله شو بتسوي وليش قفلت الباب ..؟؟ ولو يا حمدان شو بيقول عنهم ؟؟؟

حمد : بس ليش قفلتي الباب ...

غايه ابتسمت ولمعت عيونها بالدموع .. وفرت الملف عند ريل حمد ونزل عينه للملف اللي طايح عند ريله وحس انه مب غريب عليه ها الملف وهني سرت بجسمه رجفه رفع عينه يطالع غايه منهاره حاضنه اورااق واايد

توقعاتكم ؟! __DEFINE_LIKE_SHARE__

! ĐįƠЯ ƒάṦђịǑη ! · 12-19-2011, 10:18 AM

البارت 14

غايه بألم ودموع يتيمة وتقوي قبضتها ع الاوراق :ليش فهمني ...؟؟ ليش انا يستوي بي جي ؟؟؟ انته تبا علايه سير لها علايه ... اعشقها وموت فيها ....

حمد : اناا ...

غايه تقاطعه : انته تحب علاايه ماتحبني ... ( واستخدمت وصية اوراق ميت مب مرحوم عشان تشهد ضده )

حمد اتنرفز واعصابه قام يفقدها ويحاول يهدي عصبية غايه : افهميني خلينا نحل كل شي بالهداوة ...

غايه تفر الاوراق في الهوى وتتناثر الاوراق في سما الميلس وتطير في الهوى وجنه الميلس تحول للون الابيض لفجأه غمض حمد عينه بالرغم من خفة حجم الاوراق ..... ولكن اللي مكتوب في ها الاوراق اعظم مشاعره ...

غايه نفس الشي من تناثرت واتطايرت فوقها الاوراق غمضت عينها بقوه وهي تحاول تستوعب اللي يستوي لها

حمد مب عارف شو يسوي ؟؟؟ هي في اللحظه تهين قلبه ... وتهين حبه ومشاعره اللي خطتها ايده في ها الاوراق ... وصيته ... وصيت ميت مب مرحوم بددتها غايه ...

غايه تصيح وساح جحالها واستوت جنها ( مدمنة مخدرات ) [ احم احم كح .. ونعم التشبيه الصراحه لوول طوفو ] ..

حمد ع طول انقبض قلبه تذكر علايه ... تذكر اللي كان يحبها ...

غايه مدت ايدها لكمن ورقه كانن حذالها وقريبات منها وسحبتهن صوبها ونشت ع حيلها وقامت اتطر ورقه ورقه واتفرهن في الهوى من اول ويديد واتقول له : تبا علايه صح ... سير لها ... خذ علايه لكن انساني انا .. انا تعبت خلاااص

حمد : غايه انتي اليوم حرمتي وعلايه اعتبرها ماضي ارجوج افهمي ها الشي ..

غايه تفر الاوراق جدامه : تباني اعيش وياك وانته تفكر في غيري

حمد : علايه عشاني انسي لانه ها كله ماضي وقسم بالله ماضي خلينا نبدى صفحه يديده من اليوم انتي لي وانا لج

غايه بعصبيه مبالغ فيها : بعد علاااااااااايه ... بعد علااااااااااااااايه ... الله ياخذ ها العلاااااايه ... خلاص ياحمد انساني خلني ... انا وانته ما اناسب بعض

وظهرت غايه تركض عنه ورفعت طرف فستانها لحجرتها ووقفت في نص الدري تبا فيصل .. تبا اترمسه ... رفعت راسها تدعي ربها (( يارب يارب ... رد لي فيصل .... ))

حمد تمنى ها الليله ليله يحطم فيها كل ذكرى لعلايه .. ليله ينهي فيها الماضي بالمره .. ليله تبعده عن علايه وللابد .. بس اكتشف العكس ها الليله خلته يعيد حساباته مليون مره ... ويرد يصارح عمره بجرح دومه مفتوح ومستحيل يندمل .... تم واقف يطالع جريمة غايه ... يطالع نفورها .. عصبيتها .. فصخ غترته وعقاله وفرهن ع الغنفه ويلس ع الارض ويلم وصيته ... وصية ميت مب مرحوم ... عمره ماحس بعنوانه الا اليوم ... يمع اوراقه وفتات اوراقه ومخلفات ماضي تعيس ... يبشره بمستقبل اتعس منه بعيد عن علايه قريب من جنون غايه ...

سار صوب الغنفه ونزل شوي وحط الغتره ع جتفه وشل عقاله وضمهن ويا اوراقه وع طول سار للبحر ... فر الغتره والعقال في السياره وشل وياه الاوراق ...

حمدان رد البيت وحصل هدوء ودش الميلس محد فيه وين اختفو هاذيل سار يركب فوق وفي الدرب يالس يطالع تيلفونه ويتصل لحمد ... وحط التيلفون على اذنه وهو يدق الباب على غايه اللي كانت تصيح من خاطرها وهي مب مستوعبه اللي سوته اليوم .. سواه ماتسويها وحده عاقله لا وفي ليلة ملجتها .. انتي شو من البشر ياغايه ؟ !!

حمدان باستغراب : غايه ؟؟

غايه تصيح وتحاول تعدل نبرة صوتها : اصبر حمدان ابدل ثيابي ..

حمدان : عيل برايج بس وين حمد ..

غايه : روح ماتم وايد بس عشر ... دقايق

حمدان : اها اوكي ..

وسار حجرته وهو يرد يضرب اتصال على رقم حمد اللي كان فار تيلفونه في السياره ويالس يدوخ ويطالع البحر .. حس حمد بانه تيلفون يرن ورد للسياره وسحبه وشاف حمدان يتصل ... وشله

حمد يبين عمره انه عادي ومب متضيج : الووو

حمدان مستاانس : هلاااا والله بالمعرس وينك ياريال ...

حمد يتنهد : موجود ع البحر

حمدان : ياعيني والله ع الرومنسيه توك الا طالع عن الحرمه

حمد : لا وحياتك اطالع الرومنسيه على وصيتي ؟؟

حمدان : شو السالفه ياحمد شو فيك نبرة صوتك متغيره شو تقصد

حمد : مافيني شي سلامت راسك الغالي ...

حمدان : انا بيي عندك اوكي

حمد : لا ماله داعي ...

حمدان : ياريال احس انه فيه شي .. ( وبشك ) غايوه قالت لك شي ؟

حمد يتذكر ويكتفي بابتسامه تجرح قلبه : لا حليلها .. كاانت ( ويمد الكلمه وجنه يقولها باستخفاف ) طيييييييبه

حمدان : حمد شو فيك ؟

حمد : مافيني شي انا اللحين بروح البيت لاتحاتي ...

حمدان تم قلبه ناغزنه وحس انه مستوي شي بس غايه كانت وايد عاديه يوم ترمسه وحمد حس انه فيه شي عقب استوى عادي ..... حط حمد التيلفون في جراجة السياره وحط السي دي اغنية عبد المجيد " بريحك مني " ..

وشل اوراقه اللي كانن ع السيت الثاني ومرتبنهن ترتيب مال اي كلام ... ووصل للسيف وعقهن على بعض واستون شرات العرقوب الصغير .. وظهر جيكاره وتم يدوخ ..

" اليوم اللي فكرت اني بقتل حبج ياعلايه ... ردت غايه تحي حبج في قلبي ... وانا اتحرى انه اليوم هو اليوم اللي ببتعد فيه عنج لكن بتصرفها احس اني اتعلق فيج اكثر .... ( ويدمع ) عادي علايه لو كنتي تبين فيصل .. لو كنتي تبين سعيد ... لكن انا انا اباج ... والله احبج .... وانتي عمري ماحسيتي بي ... ادري غلطت ... بس ماغلطت عليج الا من كثر ما احبج ... من كثر ما احبج ياغناتي .."

نفس الشي حال علايه ... لابسه بجامتها الحرير الورديه وعلى اطراف اكمام البجامه دانتيل بالاسود وفاله شعرها الاسود ومبنده ليتات الحجره ومشغله الابجوره وقافله الباب ... وميوده الستاره بايدها وتطالع من الدريشه النجوم والسما ... وتدمع بهدوء وكل ماتنزل دمعه تمسحها وهي تبتسم ..

" علاايه ليش زعلانه ؟ شو الشي اللي يستاهل انج تصيحينه .. انه سعيد خلاج ... ( ابتسمت ) وانه اليوم حمد خلاج ... ماعليه ربج كريم ... ( غمضت عينها ) اليوم اشهدووو عليه يانجووم ... واشهدو لمشاعر الحب والاحتقار بتوديع قلبين ... اشهدوو عليه .... مع خالص احتقاري محبوبتك لعام 2003 ( تقصد هني سعيد ) ومحبوبتك لعام 2007 ... ( تقصد حمد ) "

وحست بطعم مالح في ثمها ومسحت على شفايفها بلسانها ..ها طعم دموعها مالحه ... شرات ايامها ... مافيه شي حلو في ايامها ... كل يوم والثاني يتشابه ويا اللي قبله

ع البحر بين هدوء الليل ... وتاليه ... عشاق يتهامسون ... قلوب ترتجف من لوعة الفراق .. انين الحزن ... صرخات حب لكن محد يسمعها ... هذا هو تالي الليل ...!! على ارض دولتنا

صد حمد وهو مربع ايده ويطالع كومة الاوراق اللي حذاله ويطالع الشخص الغريب اللي ياي صوبه .. ها الغريب حس بحمد وسمع الاغاني اللي كان مصدرها السياره .. وانتبه للاوراق ويا يمشي بهدووء مايختلف عن هدوء الليل .. وغربة المشاعر ..

الريال الغريب : السلام عليك

حمد بنظرات مافيها اكشن : وعليك السلام

الريال الغريب كان شكله مبهدل ماكان حاله احسن من حمد وكانهم حاسين ببعض .. بس ملامحهم ماكانت تبين في ظلمة الليل

حمد : خير اخويه ؟

الريال : والله كل خير بس شفتك وقلت ايي عندك

حمد : اها

الريال : شو ها الاوراق ؟

حمد يطالع البحر مره ثانيه ويحول نظره عقب للسما ويبتسم : وصيه ...

الريال باستغرابب : وصيه !!!!

حمد يطالع الريال المنصدم ويضحك : هههه هيه وصيه شو فيك ؟

الريال : وصيه ها الكثر اوراق ...

حمد يحول نظره للاوراق : هيه هاي وصية ميت مب مرحوم

الريال استغرب منه وايد .. : كيف يكون الميت مب مرحوم ؟؟؟ واي نوع من الموت يكون ؟؟ عشان ماينرحم عوذ بالله ..

حمد : ها الموت بدون موت ...

همستي انا فواغي ونظرتي لـ [ الموت بلا الموت ]

(( فبيننا الكثير من الموتي يتحدثون .. يتحركون .. يأكلون .. يشربون .. يضحكون .. لكنهم موتى يمارسون الحياه بلا حياة ... فمهاميم تحتلف من شخص الى أخر فهناك من يشعر بالموت حين يفارق شخصا عزيزا ويخيل اليه ان الحياه قد انتهت وان ذلك العزيز قد رحل واغلق ابواب الحياه خلفه .. وان دوره في الحياه بعد قد انتهى !! __DEFINE_LIKE_SHARE__

! ĐįƠЯ ƒάṦђịǑη ! · 12-19-2011, 10:18 AM

فلم يعد المعنى الوحيد للموت هو الرحيل من الحياه فهناك من يمارس الموت بطرق مختلفه ويعيش كل تضاريس وتفاصيل الموت .. وهو مازال على قيد الحياه !! ..

فالكثير منا يتمنى الموت لحظة الانكسار .. ظنا منه ان الموت هو الحل الوحيد .. والنهاية الوحيدة لسلسلة العذاب .. ولكن هل سأل احدهم نفسه ..؟؟ ياترى ماذا هناك بعد الموت ؟

نعم ماذا بعد الموت ..

حفرة ضيقه
دامسه ومظلمه
وغربة موحشه
وسؤال عقاب وعذاب !!
اما جنه او نار ... !!

ونحن مازلنا هنا
مازال في الجسد دم
وفي القلب نبض
وفي العمر بقية
فلماذا نعيش بلا حياه
ونموت بلا موت ؟؟

فاكس عاجل من فواغي الى حمد ..

مازلت تتنفس وقلبك ينبض وجسدك يتحرك ولكنك ياحمد منذ زمن فارقت الحياه !!

حمد عفوا .. ربما ادخلتك دائرة الموت فاكسر سياج الدائره وأقفز فوق الباب فان لم يفتح لك ... فالحياه تستحق ..^_^ ))

اردكم لعالم الواقع بعيدا عن خطوط خيالي لـ أغرب تناقضاتي [ حمد ]

الريال : انته غريب والله

حمد : .......

وفجأه فر الجيكاره الملتهبه بين الاوراق وطاحت على ورقه وتحولت طرف الورقه لرماااد ...

حمد : اليوم نهاية ها الموت بدون الموت ...

ونزل لمستوى الاوراق يعني يلس على ركبه وحط ايده في مخباه وظهر الولاعه وتم يهوس عليها ومايظهر الضوو .. يعني خلصت... حمد مد ايده للريال .. : لو سمحت ولاعه ..

الريال ابتسم وحط ايده في مخباه وظهر الولاعه وفرها على حمد .. ولقفها حمد .. صفق له الريال : برافو لقيف ..

حمد يهوس ع الولاعه ويبتسم ابتسامه باهته : اعجبك ..

وبدى حمد يحرق اطراف مختلفه من عرقوب الوصيه ... واتوجهت انظارهن صوب كتلة الضو الملتهبه على الارض عشان تزيد من حرارة الجو .. وتزيد من تلوث القلوب ... بالدخان .. وتزيد من حرارة ولوعة الفراق .. وألأم الماضي .. وتعذيب وجرح الماضي ...

ولا واحد منهم رفع عينه عن الضوو ... وكلهم ساكتين ويطالعون الاوراق وهي تتاكل جدام عيونهم ... رفعو عيونهم بابتسام لكن فجأه اختفت الابتسامه ...

حمد : فيـــــــــــصل

فيصل انصدم لسانه انشل .. ماتخيل انه ممكن يكون ها الشخص حمد .. المكان ظلام .. وع طول ها العشر دقايق اللي يسولف فيها ويا حمد عمره ماشك ولو بنسبة 1% انه يطلع حمد .... ولا حمد شك انه يكون فيصل .. اعتبرو نفسهم كل واحد غريب عن الثاني .. لين ما اشتعلت الضوو .. واشعل لقااائهم ... وياه

فيصل نزل راسه وده يصيح شرات اليهال على صدر ها الرمل ... ريل حبيبته واقف جدامه ... لكن حمد بالعكس استانس لانه من زمان ماشافه من شهور .. صداقتهم عاديه يعني السلام عليكم وعليكم السلام ... فيصل ربيع حمدان لكن مب وايد ويا حمد وماجمع حمد وفيصل الا حمدان ...

حمد : شو تسوي هني ؟

فيصل عيونه تتألم تبغي تدمع تصيح ظلم وقهر : ماشي عن اذنك بترخص ...

ومشى في الرمل وهو يتعثر وحركته تقل لانه يمشي ع الرمل او لانه تخربط وحس بعمره مدوخ وحساباته تخربطت بس من ظهر ها الحمد .. وماحسب لشوفته اي حساب ... كيف اليوم ملجته وهو حاله ماكان احسن عن حال فيصل ؟؟؟

اختفى فيصل .. قبل لايرتكب جريمه تذكرها صفحات العشاق ويذكرونها على مدى الايام ... ويطلع عاشق ومينون ثاني ... !!

حمد استغرب منه ورفع جتفه على اساس انه مايدري شو السالفه ... وتم مركز نظره على اسم علايه بالخط الكبير ويالس يحترق جدامه ورد قلبه ينقبض ... " ليش احبج ؟؟ وانتي عمرج مافكرتي فيني .. بلعنه ها القلب اللي يذكرج ... بلعنه يا اللي حطتمتيني .. انتي يا عليا خليفه ... انتي ... "

بدت النار تخمد ورد الظلام يخيم ع المكان بس فيه اطراف ناريه باقيه على اطراف الاوراق وريحة الاوراق ... قصدي ريحة الميت غير مرحوم ... انتشرت في المكان ... تعلن عن الموت بدون الموت ... حرك حمد ريله ودفن االاوراق ومشى للسياره ودق سلف ورجع بيتهم وسبح وحط راسه وع قولتهم ... [ النوم نسيان اليوم ]

.................................................. .................................................. ............................................

عدت الايام ... طافت بدون اي تفاعل بين حمد وغايه .. وكل حد مصر على رايه .. روضه ماحبت تسال عن اخوها ... حمد حاول يبتعد عن البيت وعن امه بالتحديد اللي كانت تساله دوم عن غايه ... ويتم برع البيت تقريبا طول اليوم ... علايه سارت تتدرب عشان تاخذ ليسن ... وهي بروحها اتعرف من قبل تسوق ونجحت في التراي ... وطبعا كانت تسير المستشفى ع المراجعات اللي عندها عشان تنشيط الذاكره ... بس في تحسن .. لكن تنسى بسرعه بعدها .. وخاصه ويا الاشياء المؤقته انا وضحت قبل يعني تحط شي ويسالونها وين تحطه تنسى ؟؟؟ وياما ضيعت فواتير هههههههههه

قبل الدوامات بـ 3 ايام ...

علايه طايحه راقده ع الساعه 9 تسع دق قوي ع الباب نشت تفتح الباب وهي متأففه ... وترتب شعرها من فتحته حصلت عمها في وييها ..

عمها يود قبضة الباب ورد يسكره ورد يفتحه : بسم الله الرحمن الرحيم .. عوذ بالله من الشيطان الرجيم .. سكنهم في مساكنهم

علايه وهي مب فايجه : احمدووه وقسم بالله اني مب فايجه فيني رقااااااد ( وتزااااعج ) رقااااااااد اهل الكهف ..

احمد يصد على اذنه : وصيييييييييخ

علايه : امبيدوووووو ( اونه تدلعه لانه في مسرحيه كانو يقولون لواحد اسمه احمد امبيدوو وهي علقت عليها من هاك اليوم ) فكني شو تبا ؟؟

احمد : اليوم ببات بيتكم

علايه تتثاوب : مبروك

احمد يعطيها على راسها : وياراسج اقولج ببات تقولين لي مبروك مالت عليج .. بخبر اميه

علايه : فديتك امبيدو وقسم بالله فيني رقاد ..

احمد : لا ماشي يالله انزلي براويج شي

ويودها من ايدها وهي تقاومه وتتيود في مقبض الباب وهو يسحبها

احمد : قسم بالله شي حلوو

علايه : اييييي احمدوه صبر بسير اتغسل وبصلي وبنزل

احمد يصد في ويييها : والله حلوه يالله تعالي ..

ويسحبها من ايدها وحتى انه بجامتها نزلت عن ايدها وطلع جتفها وطلعها في الحوووي ... : اففف اصبر( وترد بجامتها عشان تستر جتفها ) فصختني

علايه من شافت الشي بغمت من قمة راسها : اللللللللللللللللللللللللللللللللللللللللللللللللل لللله

كلهم سدو اذنيهم وهي تنزل ع الدري اللي جدام الصاله وتطالع الي اللي طول عمرها تحلم به ... وتندبغ الدري ويركض لها احمد عمها وهو ناقع من الضحك ويودها ... وتصد على ركبتها اللي ظهر منها الدم بس ماسوت لها سالفه ... وتمشي صوب حلمها وعشقها ... حطت ايدها عليه وجنها مب مصدقه ... وتصد على عمها ..

علايه بحلم وبغباء : احلم صح !!

احمد : هههههههههههههههههههههههه هيه

علايه : اقرصني ..

احمد ماقصر سار وقرصها : ايييييه يعور وبعدين عيب يالطفس

احمد : ههههههههههههههههه

جان يحط السويج جدام عيونها وتسحب السويح بسرعه وتفتح الباب وتدش السياره اللي حلمت بها من يوم عمرها 15 وهي تبا ميني كوبر .... وتحلم بالميني كوبر ... صح انه السياره عاديه بس هاي احلام علايه .. عمها اشترى لها سياره ميني كوبر حمرا .... لونها المفضل ... ركبت علايه السياره بسرعه وقفلت البيبان وشغلتها واول ماشغلتها كان فيها سي دي ... كان عمها يرمس اول شي

احمد يرمس في السي دي : بنت اخويه العزيزه ... والله من كثر مااحبج يبت لج ها السياره لج ولعيونج ... ان شالله تستانسين بها الهديه وادري انها مب قدرج يالغاليه بس اعرف انه هاي غرامج ... ووو الله يعطيج خيرها ويكفيج شرها .. ما اوصيج مب تستوين جوله وتتدعمين شبج العزبه ... وتعفدين فوق اشخر شرات قبل يوم كنا في البر ... ها الله ها الله في الرزانه والعقل يمدحونه ... مع خالص ... احتقاري ... احمدوه والعالم .. هههههههههههههههه ... وتبدى مقاطع اغاني ... وتطالع احمد عمها بعيون كلها امتلت دمووع ... محد علمها ها الشعار غيره .. كان دوم يقولها مع خالص احتقاري احمدوه والعالم .. ماتعلمت مع خالص احتقاري الا من عمها ... احمد عرف انها يالسه تسمع السي دي ... جان تفتح الدريشه وبشطانه ركبت ع الحد مال الدريشه مال السياره شرات يوم تستوي المسيره .. واحمد يود قلبه : اييييييييييه يديده قسم بالله وكااااله كاش مب اقساط .. اخ قلبي ..

علايه والرقاد طار : لو شاطر الحقني ..

احمد فج عينه : ايييييه يالخبله تعالي ... بعدها ع التمرين ..

علايه ردت يلست ع السيت مال السياره ودقت سلف وردت ريوس وطلعت برع البيت وهي تضرب هرناااااات وسوت زهبه وحشرت الفريج .. ع طول ركب عمها احمد سيارته وشخطها ورا ها الخبله لا ولابسه بجامه وبدون شيله والسياره ماعليها مخفي واحمد متخبل لو يدري ابوها جان نحره قبل لاينحرها ... واحمد ياشر لها انه خل ترد لانه مب لابسه وقايه ... يوم رفعت راسها تشوف احمد من الجامه انتبهت انها بدوون شيله ... وعند بيت يراانهم عطته ريس وكان واحد واقف في السياره ويطالع ها البنت اللي في السياره

......: هههههه شكلها عراقيه يخرب بيتها عاطتنه ريس عن تدعم ...

عاد علايه من كثر ماهي متلومه لانها نست سالفة الشيله واكيد عمها بينحرنها .. والسياره ماعليها مخفي دحت بريك عند الزباله اللي مجابله بيت يرانهم وكانت بتدعم ومن قوة البريك سوى صوت وطلع غبار شويه صدت ع السيت اللي ورا حصلت دبدوب وحاطين له عصامه وبوكسات هدايا وايد .. سحبت الغتره ولفتها ع راسها واتلثمت .. الولد ركض يشوف البنت

الولد من شافها متغتره وتوه بدون شيله ... استغرب تم واقف في النص الشارع الخالي مب عارف يسير لها ولا يرد مكانه ... يا عمها بسرعه ونزل من السياره ومن شافها نقع من الضحك لانه موخيه ع السكان وماتباه يشوفها اونه مول ماشافها وشاف الولد اللي واقف في نص الشارع

احمد يدري انه ها زايغ : ههههههه لاتتروع تراه بنت اخويه خبله توه مظهرين لها السياره

ابتسم له الولد ورد عند سيارته ... وسار احمد يدق الدريشه : عليوه افتحي والله مابهزبج ..

علايه موخيه ومب طايعه ترفع راسها : قول وقسم بالله ما اضربج ( وبدت ترمس بالمصري )وما امدش ولا صباع .. ولا خطااااف على بيتربان( اونه حافظه مال الرسوم مال بيتر بان ) .. اوه قصدي على علايه

احمد ميت من الضحك : افتحي والله مابضربج ... بس شويه ... عشان تتادبين

علايه فتحت القفل وفتح احمد الباب جان تحضنه قبل لايضربها تم يضحك : اييه بس فجيني ها تام فاتح ثمه يقول شو ها الميانين على صباح الله خير ...

علايه دمعت : عمي احمدوه

احمد نزل ع ركبه وهي فاتحه صوب الباب مالها وتمسح دمعتها : لاتخليني اوكي ؟؟

احمد استغرب : بلاج عليوي ؟

علايه : احلف انك مابتخليني .

احمد : اولله مابخليج ... بس شو ياج ؟

علايه : لانه احس اني بموت قريب ...

احمد يعطيها على راسها : عن ها الرمسه يالله زين انج غطيتي شعرج ولا اقولج صبري قبل لاتفضحينا

سار فتح الباب اللي ورا وطلع من بوكس عباه وشيله وطقم ااونه هديه وناولها اياها ولبستهن

احمد يصفر : كاااشخه وسامته

علايه ابتسمت لعمها الطيب .. : ههههههه يالله بنحووط

احمد : اول بنرد البيت وسيري بدلي ثيابج وبنمر على ابوج المكتب ... وبنسوي له سبرايز ...

علايه : هيه هيه يالله اوكي ...

تم هاك الولد يشوفهم وعلايه حركت السياره وسار احمد صوب سيارته وصد ع الولد ... :اسمحلنا ..

( ورفع ايده جنه يسلم عليه من بعيد )

الولد من بعيد : مسموووووح ... __DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
بلاك بيري تورش 9860 فل تتش مع بن ممير """"""""""""""""""""""	محروم.كوم	منتدى أخبار المواقع والمنتديات العربية والأجنبية	0	10-28-2011 11:00 AM
""""""""مطلوب لكزس lx570 الدفع كاااش """"""""""	محروم.كوم	منتدى أخبار المواقع والمنتديات العربية والأجنبية	0	07-19-2010 03:50 AM
"""""""""""""""""""""""""""فساتين زفاف راقية ومميزة """"""""""&am	محروم.كوم	منتدى أخبار المواقع والمنتديات العربية والأجنبية	0	07-13-2010 12:00 AM
"سيتي" يصدر تصنيفات إيجابية لـ "إعمار" و"الدار" و"العربية" و"الخليج الأول"	محروم.كوم	منتدى أخبار المواقع والمنتديات العربية والأجنبية	0	09-29-2009 01:20 PM
"""""للبيع باترول سوبر سفاري موديل 99 ديزل """""""""	محروم.كوم	منتدى أخبار المواقع والمنتديات العربية والأجنبية	0	04-28-2009 02:40 PM