سآلفتي مع خويي : جبت العيــد قبل مايجي العيـد

محروم.كوم · #1 11-15-2011, 10:10 AM

السلام عليكم ورحمة الله وبركاتة

صبحكم الله بالخير جميــع / ومسآكم الله بالخير لمن بيدخل موضوعي في المســآء

سلمكم الله سالفتي بتكون فيها نوع من الشطحآت
وأعذروني أن كان مكان موضوعي خطآ وعلى ركآكة الاسلوب

هذا سلمكم الله

عزمت أنا وواحد من الشبآب أننا نسافر للجنـوب في أجازة عيــد الاضحـــى
ولأن خويي لكم عليــة .. نوااااام درجة أولى في السـفر فـ أنا متولي دفة القيآدة " "

كان مخطط الرحلـة
من الرياض على الطآئف على الباااحة النماص تنومة أبهــآ

وأمحق مخطط

بسم الله حركنآ الساعة 11 بالليل

وصلنا الطايف على الفجــر
قال خويي بننام إلى الليل وبعدها نحرك على الجنوب قلت شورك وهدآية الله يالنكبة

طبعاً انا ما ارتاح في الطايف نهائيا ولا اعرف اناااام فييييييييييه كذا من الله ما ارتاح بالمنطقة هذي ماهو قصور في أهلها ولا في المنطقة نفسها لكن ما احبها " جيت بكحلها أعميتها "

المهم سلمكم الله
ولانمت زين .. نوم مقـطع وهواجيس وحالة

قمت ولا اخذت كفايتي
والله ونحرك الساعة 11 بالليل من الطايف على الباحة
وجسمي باقي تعبان ولانيب واثق في خويي لان صار لنا موقف قبل سنتين بغى يدخلني تحت تريلة بغى يخلينا شكشوكـة بس ربكم ستر

وتعرفون الطريق مابين الطايف وابهااا
مُتتتتتتعب جدااا طلوع في نزول طلوع في نزول
ياخذ الحــيل
وليل ولازم تكون منتبة ورايح جاااي وخوي[ن] : نكبة

وامشي لي كذا ابو ثلاث ساعات الا والله خويي بدى يطفى جاه النوووم .. قالي اسسوق ..
قلت ياشيخ انزلك مع هالوديييان واقلبك ولا اخليك تسسسوق

والله يالربع يوم انتصف الطريق
وانا ماعد اشوف الدررررررب

وخويي نااايم

واقعد اطقطق مشاريع برااسي واخذ فصفص واقووم اسولف وأردد خرابيط في راسي

الا وشوووي
وقداامي ترييييييييييييييييلة جايه بأتجاهي على نفس مسآري يعني بنتصادم

وأضرب الفراااااامل ويخبط خويي في الدرج
بغى يبلـع المكينة والرديتر
ههههههههههههههههه
والله لافي تريــــــلة ولاشـــيء بس مع الهواجيس وظلام الليل والنوم تخيل لي أن فيه تريلة بأتجأهي وقسم بالله مافيه شيء

ويقوم خويي قال وش فيـك قلت يبن الحلال مافيييه شيء بس حسبت فيه خشبة طايحة قال واذا فيه تمسك بالقوة هذي / قلت ماعلييييييييك يبن الحلال ارقد

قال والله ما اناام ما امداه يقول والله ما انام 40 ثانية الا وهو في ساابع نومــة " قايلكم نكبة "

وخلال سير الرحلة
واشوف ذأك المخرج اللي في الجبل
من بعيد وأشوف واحد بيديور مع المخررج
يالربع وافتح واغمض وافتح عين واسكر عيــن

لامخرج ولاشيء اللهم الطريق يميل بــي وفيه لوحآت حقت التنبيه وتعكس نور السيارة واحسبها مخرج وواحد بيديوور

،
يوم شفت الامور كــذا وأناظر في خويي وهو نايم
واقول والله ماتدري قمت أشوف تريلات ومخارج ولاهنآ شيء

ونوصل ابها على الساعة 6 ونص 7 حولها كذا

من هنا بدآ الاكشــن
كان مخطط الرحلللة اننا نقعد في أبهــا

يعني الهدف النهائي أبها " "

ويجيكم عطيب الضراايب " محآكيكم "

ويدخل نص أبها ويطلع على الخميس

واطلع من الخميس على طريق الرياض
وأنزل على طريق الرياض السريع اللي يودي على الدواســر

ههههههههههههههههههههههههههههههه
يالربع مخي قفــل ماعد ادري وش قاعد اسوووي
ساااااااااكت وفوق السبع ساعات ورجلي على البنزين
وسهران وحالتي حالــة
فـ انا مكمل مدري وش اللي جاب الرياض على باالي

وأمسك الطريق السريع

وتجيني نقـطة سمر " متجه لوادي الدواسر " قايلكم بطير الله لايعوق بشــر

شوي ويقوم خويي ويتلفت قال وين وصلنااا

الان شبك السلك اللي براسي وقمت اسئل وين حنا فيــة

وأتذكر زي الحلم والله ان دخلنا ابها والخميس والاشياء هذي مهيب غريبة علي

ويناظر لي خويي ويقعد يصايح انت وش جابك هنــآ

يالربع ماعد عرفت أرقعهااا
قلت اصبر نعدي النقطة < مصمم على اني ابي الرياض

وانا متلخبطة اوراقي وحسيت بلحظتها أني رجع لي الريموت حق التحكم والسيطرة

واناظر بخويي قلت سلمك الله صارت سالفة الله لايعيدهآ ( اخترعت له سالفة )
قال خلك من السالفة وش جابك هنا وش طلعك من ابها
ههههههههههه
قلت خلني اعلمك وهو اللي يصايح علــي
واصرخ عليه قلت ياولد بغينا نرووح غلـطة واااحد سكران مدري مهرررب مدري وش سالفتة

قال تتكلم صادق

قلت قبل ما ادخل أبها الرجااااااااال حدني على جنب الطريق وبغيت ادخلك بجبل وقمت لحقـــتة
ولاجأبني هنا الا هو حسبي الله عليه

خويي شاف ان الموضوع فيه مطآردة واحد يحدحد

قلت يبن الحلال الحمدلله على سلامتنا

قال اي والله الحمدلله على السلامة

قال والله ماحسيت بشيء قلت أكيد منتب حاس نايم قال لا ماحسيت بالسرعة قلت يارجال عين عليك وعين على الرجال

وانا انا منصددددددددددددددددددم من الفضيحة اللي سويتهاااا
وهو منصدم من أن صارت مشكلة مع واحد

قايلكم الشغلة خربانة من اساسهاااا

واوقف على جنب الطريق قلت اقول يافلان تعاال ســق

قالي تعبت ؟

يالربع بغييييييت افتح شنطة السيارة وافك السير حق شنطة الملابــس وألززززززخ فيـــة اليييييييييين
مايقول ثلث الثلاثة كــم
" بعد كل هالفلم يسئلني يقول تعبت "

اول ماركبت وجاء هو يسوق ماحسيت بنفسي ورجعنا لابها
الا يقولي قم قم وصلنا الفندق

ونستآجر ونعين من الله خيــر

واروح ارقع ذيك النوومة

وصحيت العشآء
تقولون كأني طالع من حــرب

وقمت مدري وش الدنيا بـة
ولا ادري انا ويني اعرف غرفتي انا كيف صارت كذا واقوم اتلفت واتذكر أننا مسافرين واتلفت ولا القى خويي قلت يمكن طلع يشتري شيء

واقوم اغسل واعين من الله خير

واشوف الساعة

والدنيا مظلمة مافيه الا لمبة الممر

وابي افتح الشبااك
وانا فوق البطآنيات تحت الشباك واقعد افتح احس اني منب متزن في وقفتي
ووأحد يقول " أأأأأأهمممم أأهم هييييييه هييييه "

اثاري خويي مثل الشيبان لانااام يتغطى ويعفس نفسة ولادريت أنه هو اثاريني طالع عليييييييية

وابعد عنة واسمي عليــة بغييييت اقضي عليــــة

ويقوم خويي
انت وش فيييييك ماتشوووف اهبل اعمى ويرفع صوتة

بغت تطلع رووحي
وارد عليه وانت مثل الشيباااان تتلفلف لي بالبطانيات والله لو أنك في القطب الشمالي
ويجي زعلان يبي يروح يغسل ولا انتبة المفتاح في الارض
ويشوووووووووووتة برجلة وبررررررررد يالربع وسراميك

قام ينسدح ويتعـــصر

انا هنااااااااااااااااااااا ماعد قدرت أمسك نفسسسسسسسي
تفقعععععععت من الضحك
وقام يحلف علي الحرام ما اعد اطب معك روحة عقب هالمررررة

ويقووم ينافخ

وعادت المياة الى مجاريها بعد 4 ساعات
وعلمتـــة بالسالفة حقت الصبااااح

مايستفاد من القصـــة
لاتسافر وانت فيك نوم .. < ادري ماجبت شيء جديد

الشيء ثاني ياحبذا لو تكون السفرة أكثر من شخصين
في حال انه كأن فيه نكبتين على الاقل يطلع فيكم واحد صااحي

---

والشيء الاخير تآكدوا قبل ماتفتحون الشبابيك أن مافيه أحد تحتكم

وسلامتـــــكم يالربع
--

وأنتظروني في قصــــة حصلت لي قبل سنة
وهي بعنوااان " غرزنــآ الين بغينا نطبق المكينة على راس الشيطآن ونفس الشيء مع خويي النكبة "

ملاحظة / انا اختصرت القصـة بشكل كاااامل / أهملت بعض الجوانب في ذكر القصـة كـ الصلاة وتعبيــة البنزيـن وما إلى ذلك ::good2:

إخوكم مركز

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
•°o.O ( مـــبـــارك علـــيكم العيــد السعـــيد) O.o°•	محروم.كوم	منتدى أخبار المواقع والمنتديات العربية والأجنبية	0	09-11-2010 03:00 AM
أجواء العيــد : عقلة الصقور ـ الطرفاوي ـ قطن من 9 الى 17/12/1430هـ	محروم.كوم	منتدى أخبار المواقع والمنتديات العربية والأجنبية	0	12-06-2009 10:30 AM
[ عرض دعم فني ] : :: عروض العيــد :: من l!nux لخدمات المواقعـ ..	محروم.كوم	منتدى أخبار المواقع والمنتديات العربية والأجنبية	0	09-17-2009 06:30 AM
راح رمضـان ~ وأقـبل العيـد بالخيـر ‘بحضـور [ هـلي ] يصبـح العيـد " عيـديـن	محروم.كوم	منتدى أخبار المواقع والمنتديات العربية والأجنبية	0	09-15-2009 01:10 AM
سيــد الغيــد { أحمد الكيبآلي ..	Dxbya Prestige	المواضيع المكرره	1	06-29-2008 01:05 AM