..هوآجس ظميل..

شآعرة يآلبيه · #1 10-11-2011, 06:22 PM

السلام عليكم ورحمه الله وبركاته..

حياكم الله في قصتي وأحداثها مكس واقعية + خيآلية
وأتمنى تتحمسون فيها وتندمجون ..^^
نبدأ بسم الله..^^

عايلة زعيل ،أسرة مكونة من 4 أفراد,أبو زعيل،أم زعيل،شريفة"متزوجة"،و زعيل"19".ويسكنون في بوظبي،ويوم كالأيام العادية من الإجازة قرروا يسيرون ليوا،مع عايلة فهد ولد عم زعيل.وفهد متزوج بنت عمه شريفة،وعنده 3 أخوان هم جابر ومسعود وصوغة"16".
وكان وياهم بعد باجي الأعمام،عبدالله،منصور،نوفل.وبنكتشف العايلة الأخيرة مع أحداث القصة كالتالي:-

زعيل يسوق السيارة وعداله أبوه وباجي عايلته يالسين ورا.كان مشغل أغاني قديمة لميحد حمد.وكان متجه إلى ليوا.وهناك في فيلا كبيرة كاستراحه لهم.
وصلوا قوم زعيل وفهد والبقية عقب صلاة العشا.وكان في مقدمة المستقبلين:-

أبو سلطان:هلااا وااالله ..حيا الله العرب حيا الله العرب..قربوا قربوا....(وتم السلام فيما بينهم ودشوا الرياييل الميلس والحريم ساروا ميلسهن)..
أبو سلطان(في الميلس) : بلاكم بطيتوا جذا عنّا..
أبو زعيل : ماعلييه كانا وصلنا.
أبو فهد :والتم شملنا (ويضحك)
سلطان( شاق الفيس) : حي هالشمل عمي .
أبو فهد : الله يحييك..
أبو زعيل (يناظر في الميلس يدور زعيل) : زعييل ..زعيييل
سلطان : زعيل قال ناسي تلفونه في السيارة راح إييبه .
أبو زعيل : دامه برا ..سير قوله يضرم النار .
سلطان : إن شالله عمي ..أحيين بسير له.
وظهر سلطان من الميلس وسار عند الكراج وتم يصرخ: زعييييل زعيييييل..
زعيل : هاه؟ أنا هنيه حذالك.
سلطان: أوو أنت هنيه..زيين اسمع..أبوك يقول اضرم النار .
زعيل (بغرابه) : أضرم ؟؟!!!!.. زين إن شالله.
وسار سلطان الميلس ويلس هنااك مستاننس بالسواااالف ولا قال حتى بيساعد زعيل.
سار زعيل يحليله بروحه..وجدام الفيلا المكان مظلم شوي ..وياب الحطب وقعّر الرملة شوي وحط الحطب فيها..كان زعيل في هالوقت مضايج وماكان له خلق إيي وياهم ليوا فقال:

أضرم النار وهي فالأصل مضرومة ...بداخلي لوحدتي وكياني المقفر
ألقاها من أهلي ولا الأسباب معدومة...أمرك يبوي حطب الضمر متوفر..

وتم يدفى ..واتصل على سلطان وقال: قول لهم إيون ،الجو غرااام.
ويو الرياييل ويسلوا قرب النار وكل واحد يسولف مع اللي يمبه..وفهد كان قاعد عدال زعيل.
فهد: عساك بدفا الحنااان (يقولها وهو غامز).
زعيل : هههههههههه ..ممكن ليش لاء.
فهد(يدق بكوعه على إيد زعيل) : إعترف منو؟
زعيل(مستغرب) : !!!!!! ....آهااااا فهاااامت ..ههههههه (عقب باحباط): محد.
فهد(يواسي زعيل باحباط) : أحسن لك.
زعيل (منصدم) :أفا ..إنت تقول جي..لييش شومستوي ...
عقب يا سلطان واتضاك ويلس بينهم(يعني خرّب عليهم) : اشحالكم شخباركم ؟؟
زعيل وفهد(معتفس ويهّم) : بخيييييير.
سلطان (شاق الفيس) : هههههههههههههههههههههه ...أما أنا طاير من الوناسة..مستانس مستانس.
فهد : مالت عليك .
زعيل :خير ..ونسنا معاك.
سلطان(أونه مستحي ) : لالا شي خاص .
زعيل وفهد يناظرون بعض ويضحكون على سلطان.
فهد : أونك يعني تتحراني غبي ..أدري الخاص هذا هو (ويبدا فهد يعلي صوته) الخاص هذا هووو (ويعلي أكثر) ويقول : صووو..
سلطان عصب وحط كفه على حلج فهد يبى يسكته.و زعيل ميت ضحك عليهم.

....ستوب..
هاه البارت الأول..ياترى شو بيصير عقب..ليش فهد قال لزعيل أحسن لك؟ وياترى فهد كان يقصد منو يوم قال:صووو ..؟وشو صار في ميلس الحرييم؟
ترقبوا البارت 2
__DEFINE_LIKE_SHARE__

♕ وليد الجسمي ♕ · 10-11-2011, 07:30 PM

وعليكم السلام ورحمة الله وبركاته

شآعرة يآلبيه

يسعدني أنك أول مشاركين في المسابقة

القصة حلوة واقعية + خيالية

ماشاء الله عليج موهوبة و مبدعة في الكتابة القصة

ربي يعطيج العافية و بانتظار بارت 2 الثاني

بالتوفيق إن شاء الله

__DEFINE_LIKE_SHARE__

الهآجس · 10-13-2011, 01:29 AM

وعليكم السلام ورحمة الله وبركاته
مرحبابج اختي شاعره
عشنا الجو الصراحة
القصة تجذب الشخص ان يقراها للأخير
بإنتظار الجرء الثاني
تحياتي الهآجس __DEFINE_LIKE_SHARE__

..بـو قحيــــط.. · 10-13-2011, 02:16 AM

بداية جميلة إختي شاعرة !!! وجميل سردج للأحداث !!! وننتظر باجي الفقرات !!! بس إختي عندي ملاحظة وعساها تكون فمكانها !!! إختي ليش ماتذكري لنا طبيعة المكان ؟؟؟ رائحته !!! لونه !!! شكله !!! مكانه !!! فأي وقت بس مب نقول فالليل !!! لا تقولي فالليل والبدر مكتمل مثلاً والغيوم تغطيه وجذيه !!! لن عندج بداية جيدة بس إذكرينلها بيئة القصة عشان نحس وكأننا مع زعيل وفهد وسلطان !!! وتذكري بعض التفاصيل الدقيقة !!! ولو تذكري بعد سمات الشخيصات من طريقة كلامها وكيف ملابسهم وكيف شكلهم !!! على العموم هاذي مجرد بداية لج وأول بارت وأنتظر بفارغ الصبر الفقرات الياية وعساها تكون رائعة !!! وفالج الناموس بإذن الله !!! __DEFINE_LIKE_SHARE__

شآعرة يآلبيه · 10-13-2011, 11:42 PM

..كل الشكر لكم..وعالراس كلامك بوقحيط وإن شاءالله بطبقه..^^..

.
.

بارت 2

فهد : أونك يعني تتحراني غبي ..أدري الخاص هذا هو (ويبدا فهد يعلي صوته) الخاص هذا هووو (ويعلي أكثر) ويقول : صووو..
سلطان عصب وحط كفه على حلج فهد يبى يسكته.و زعيل ميت ضحك عليهم.

سلطان(معصب بالقو) : فهد؟؟ إشفييك ينييت انته ؟؟؟
فهد(يضحك من خاطره) : شو إشفييك ..ههههههههه ..(عقب همس في إذن سلطان) صوغة ها (ويغمز).
..زعل سلطان وايد من هالحركة..وحزت بخاطره حييل لانه فهد ألفت انتباه الجميع ..فقام سلطان وقال:أنا بترخص يا جماعة الخير ..بسير أرقد.
الكل استغرب ..بس ماحد اهتم ياغير فهد وزعيل.
فهد : هاا وسلطان وقومته..تبى تعرف السبب؟
زعيل(مستغرب) : سبب شو؟
فهد( محبط ) : مسرعك مانسييت ..يومك استغربت ليش انا قلت لك أحسن لك.

زعيل(بطنازه) : ماعندك سالفة أبد ..أحين مزعل سلطااان ومقومنه عشان تحل قضاياك.
فهد(مستغرب) : أنا؟؟...حشى علي..هو روحه زعل.
زعيل: لأنه جد..الحركه أبد مو حلوة.
فهد(عصب وانقلب 180 درجة ) : إنت اسمعني..انا مب فايج لك ..إيه والله..يهال ويزعلون ،وانا وش قلت يعني ..لاتيلس تتلاوم فيني..أنا ريال كافيني مشاكل بتي بتحط شي تافه في ذمتي..سر بس(وصد ويهه الصوب الثاني).

تم زعيل يطالع فهد مصفن فيه..عقب قام بدون مايتكلم ولا يعرف ليش فهد جي تصرف..سار دخل البيت وراح عند سلطان عسب يراضيه.

الحريم في الميلس ..
صوغه(بدلع) : خالوه أم سلطان تعاي نتمشى برع،والله ملييييييت.
أم سلطان (بحنيه) : ميصير حبيبتي ،لانه عقب شوي بنسير نزهب العشا.
أم فهد (اطالع صوغه بغضب) : صوغه عن الدلع ..ماشي طلعه برا..إلين وقت العشا.
صوغه (تترجى) : ماما حرااااااام ،والله ملييييت تعرفيني ماحب أيلس جذي.
أم فهد : من الدودة إللي فيج..ماشي يلسي يلسي مكانج..إنتي دواااهي .
صوغه (مقهورة،وتقول بصوت واطي) : أففففففف شو ها ياخي .
أم سلطان (تواسي صوغه) : ماعليه ..لاتزعلين ..ماماتج تخاف عليج لتمريض لانه برد براا،ووقت العشا بنسير نتعشا برا وساعتها أطلقي عنانج.
صوغة(فرحت وطارت من فرحتها وقالت في نفسها) : يييييااسسسس وأخييييرا بشوف الححبب (وهي حاطه إيدها على قبها وتناظر السقف وتصفن).
أم سلطان(تضحك) : صووغوه ويين سرتي..عنبو هالكثر فرحانه..إلا هي يلسة برا عسب نتعشا.
صوغه (تبتسم ) :هيه هيييه ..ههه ههه .
عقب قامن الحريم وسار يزهبن العشا. ويوم زهب..يلسوا كلهم على سفرة طوييلة فيها مالذ وطاب..ثريد ومجبوس دياي ومعكرونة باللحم والسلطة والروب والشتنه والأشار ودقوس..هاه كله تعويض عن الغدا ..دايم الدوم يوم تكون الطلعة للبر يكنسلون الغدا عسب العشا يكون مضبوط..و الجو الغاوي ونسيمه البارد ..من يلامسك كأن يداعب وجناتك..وذاك الدفا اللي لا يلست حوالينه يواسي بردك..ويحل مكانه بالتدريج..إلين يتناغم مزاجك وتريييق..

أثناء العشاء..
أم زعيل (بفرح) : ماشاءالله تبارك الله ..كلن كلن بالعاافية عليييكن.
صوغة(والاكل كلله في حلجها وترمس ) :واااايد حلووو وااااااايد تسلم أياديكن خالوتاتي.
أم فهد(تحرّج على بنتها صوغه) : كم مرة قلت لج لاترمسين وانتي تاكلين.
صوغه(تاكل ولا عالبال أهم شي بطنها) : إنشالله أميي .
شريفة :الحمدلله شبعت..والله أحس بطني ثقلااااااان.
أم فهد(فرحت بالقو ) : الحمدلله ...أكييييد...
شريفة(تقاطعها) : لا خالتي ..لايروح فكرج لبعييد.
أم فهد(باحباط وزعل) :يالله..في كل حال نحمدك.
أم سلطان :ماعليه شرووفه ..صبري والله بيرزقج.
شريفة (بلا مبالاه) : خير خير .
وقامت شريفة عن السفرة..وعقبها قامن الحريم وحده وحده..وتمت صوغه تاكل من ها ومن هذاك وتغرف صحن ورا صحن ..عقب رفعت راسها وتناظر سيده وهي تاكل كأنها تشوطت ..تذكرت شي ..وييين الححببب ..وين سلطان مالاحظت وجوده ..قامت من السفرة والكدر راكبها من ساسها لراسها ودشت داخل.
وكانت الساعة 11 و35 دقيقة..ويو الخدم وشلوا السفرة.

عبدالله و أبو سلطان ونوفل..كانوا يالسين برا..
نوفل(قاعد وريله وحده مثني ركبها،وبيده اليسار خيزرانه) : ترا سلطان أنا هب عايبني ..والله إنه ودي أشخطه بذا .
أبو سلطان : لاتقول عن ولدي جذا..سلطان رزين وسنع.
نوفل(بغرور واحتقار ) : رزين وسنع بذي العصا.
عبدالله : لا إله إلا الله...يا نوفل اشفييك انته ..ماشفت عم يكره عيال اخوه..
نوفل صد ويهه وسكت وماعرف وش يقول.
أبو سلطان : اسمع ياخوي نوفل ..لاتدخل عيالي بمشكلة الورث، أنا قلت لك بعطيك نصيبك ومارضيت ومع ذلك عطيتك إياه وأكثر ..إلا أنك مصر تبيع هالاستراحه .
نوفل(بتكبر) :مابغي بيزاتك ..وهالاستراحه لي أنا وببيعها.
أبو سلطان (قام وأشّر صبوعه على ويه نوفل) : إسمع ياللي مكبر راسك ..هالاستراحه أبونا وصّى انه تكون لي بشرط ما آخذ ولا فلس ، وإنت وأنا وأخونا عبد الله نعرف بهالشي من زمان وصكينا عالسالفة ،لاتييلس تهذر وتفتح أرشيفات قديمه مايي من وراها غير المشاكل.
عبدالله (بقوة) : صدقت يابو سلطان..(عقب بترجي) وياخوي يانوفل اقصر الشر والمشاكل وخلنا نرتاح.
نوفل(بعصبيه ويعلي صوته) : أنا قلت بتنباع الاستراحه يعني بتنباع ..واذا ما بالطيب بالقوة ..أنا باجر الصبح راد بوظبي،ومابتشوفون خير ،هين يابو سلطان ويا عبدالله.

وظهر نوفل عنهم ودش الاستراحه..وهو ظاهر كان ياي منصور..
منصور(فزعان) : خير خير شو صااير؟؟ !!!
أبو سلطان (يالس حزين وحاط كفه على يبهته ومنزل راسه) :....
عبدالله( يواسي أبو سلطان ) : ماعليك منه تدريبه نوفل كلام بس.
أبو سلطان على نفس الحاله.ومنصور محتار مايعرف شو يسوي.

منصور(بـطفر وبذمر ) : والله انا تعبت من هالنوفل ...صحيح أخونا الكبير لكنه ..(ويحرك راسه ).

صارت ساعة 12 والكل دخل البيت وكلن في غرفته...المشكلة انه زعيل وسلطان سمعوهم.. بالصدفة..وكل واحد انصعق ماتوقعوا أبدا مثل هالشي يصير..ولايدرون أصلا بسالفة الورث..

ياترى نوفل بيسوي شي....وشو بيصير من أحداث في اليوم التالي؟؟؟؟

ترقبوا بارت 3
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
نقاش حول عميل ما لدي	محروم.كوم	منتدى أخبار المواقع والمنتديات العربية والأجنبية	0	08-08-2011 11:50 AM
طلب مساعدة عأجل !	محروم.كوم	منتدى أخبار المواقع والمنتديات العربية والأجنبية	0	10-07-2009 05:40 AM
طلــب عآجل	غلا الروحـ	طلبات الاعضاء	2	07-12-2009 12:47 AM
طلب ترقيـه .. عآجل	محروم.كوم	منتدى أخبار المواقع والمنتديات العربية والأجنبية	0	04-13-2009 01:00 PM
--{ بقآيآ هوآجس --{ مسموح مآلك فـ الهوى ذنب ..~	εïз~اَلِمَيّث}●	تصاميم الاعضاء	18	06-04-2008 01:06 AM