وطتّ رجليّ علىً دربه و لآآإ آإدريّ وشّ نؤوى فيني .! - الصفحة 930

«ضَحِيًة حِبُيًبُيً ..}● · #1 04-12-2012, 12:39 PM

.

.

.

البارت الـ 210

بعد 3 ساعات . . على الساعه 10 فليل . .

روضة تسير صوبهم : امايا وينها مهوووور . .

ام عبدالله تطالع الارض : بعدها داخل . .

عذاري : الو . .

سلطان : انا في بيتكم والشغاله قالت انج محد !

عذاري : سوري حبيبي نسيت اتصل والله كنت مستعيله ومخي مش وياي

سلطان قابض اعصابه : وينج . .

عذاري : المستشفى . .

سلطان عاقد حياته : عسى خير

عذاري : مهور تولد

سلطان : مهرررررره !

عذاري : هيه . . ياها الطلق بس بعدها ما ربت

سلطان لمح سيف واستغرب . : سيف اهني . . مش عندها

عذاري : اضاربو . .

سلطان : ايووا . .تبيني اي ؟

عذاري : لا سلطان ماله داعي . . انا قاعده اهني ويا امي . . مانبا نسوي زحمه . .

سلطان : دقيلي لو ربت . .

عذاري : ان شاء الله . .

سلطان : تحملي ع روحج . .

عذاري : ان شاء الله

سلطان : صدق ما تبيني اكون موجود ؟

عذاري : صدق . ." تحس بدوخه "

سلطان : ردي علي اول ما اتصل

عذاري : ان شاء الله

سلطان : مع السلامه

عذاري : مع السلامه . .

سارت عذاري صوب امها تبي تقولها شي لكن من شافت امها تصيح ما تكلمت وتمت تحظنها . .

روضة : الله يسهل عليج يا اختي يااااااارب . . الله يسهل عليج . .بسها تعبت . . 3 ساعات وشووووي

>

<

سلطان : سيفوه ؟

سيف يحرك عينه يطالعه . .

سلطان : شفيك

سيف ينزل عينه . .

سلطان : مهره تولد . . المفروض تكون معاها الحين . . شو ميلسنك اهني ياريال . . قوووم خلني اوصلك

سيف قام وطلع من البيت

سلطان : سييييف !!!

.

.

.

على الساعه 3 الفير . .

روضة : اميه انا بروح البيت . . فهد اتصل بي ويقولي وفوي متيبسه صياح وتبيني . .

ام عبدالله : سيري اميه سيرري . . كلنا حواليها .. . ناصر قوم فديتك وصل اختك . .

ناصر كان ميمع ايدينه مع بعض وحاطنهم ع نص ويهه وسرحان . .

منصور يطالع ناصر وتنهد وقام : انا بوصلج . .

ام عبدالله : شوي شوي منصور . .

منصور : ان شاء الله . .

وطلعو . .

ام عبدالله تشوف عذاري ويهها شاحب . .: بلاج انتي بعد . . اذا تعبانه ردي البيت ريحي . . انا بتم وياها

عذاري تطالع امها : مش تعبانه امايا . .

ام عبدالله : ويهج مصفررر

عذاري : متلوعه بس

ام عبدالله : من شوووه . . شوه فيج

عذاري تطالع امها عين بعين . .

ام عبدالله : شوه فيج تكلمي

عذاري : امايا . .

ام عبدالله تطالعها . .

عذاري تحظن امها وتصيح : انا حامل .

ام عبدالله : شوووه

عذاري تصيح . .

ام عبدالله : ليش تصيحين اميييه . . مبروووك حبيبتي مبروك . . لازم تفرحين مش تصيحين

عذاري تطالع ام عبدالله : انا مش فرحانه مول

ام عبدالله :ليش مش فرحانه ؟ وليش ماخبرتيني قبل

عذاري : الاعراض الي مهره حست فيها والي حست فيها روضوه حسيتها انا وشكيت . . وسويت تحليل فالبيت مرتين وتاكدت اني حامل . .

ام عبدالله : الله يبشرج بالخير يا اميه . . الف الف مبروك

عذاري تمسح دموعها: محد يعرف غيرج . . انا ما قلت حق سلطان

ام عبدالله:وليش ما قلتي له

عذاري : خفت

ام عبدالله : من شو خفتي بسم الله؟ شو الي يخوووف

عذاري : خفت اقوله امايا ماعرف ليش خايفه اقوله

ام عبدالله :لا اميه لا تحطين هالافكار فراسج . .ها ريلج الي اطيعينه وماتخبين عنه شي . .المفروض تقوليله وماتتريين دقيقه وحده . . خليه يفرح فيييج

عذاري تبتسم : صدق

ام عبدالله : اكيد صدق . . شوفي ناصر كيف طاير من الفرح . . تبين تحرمين ريلج من هالوناسة

عذاري تهز راسها ب لا . .

ام عبدالله : خلاص عيل من تشوفينه تخبرينه سمعتي . . مابيج تخبين عليه ابااه يهتم فييج وما يغصص بج ويعرف انج حامل ويهتم . .

عذاري : ان شاء الله امايا

ام عبدالله تبتسم وترفع ايدها : الحمدلله يارب . . اللهم لك الحمد . . الحمدلله الي يا اليوم وشفت كل بناتي كبرو وعرسو وحملو . . ووحده فيهم بتربي الحين . . الله يبلغني فيكم كلكم مربيات واشوف عيالكم واشلهم بايدي ياارب وعقب الله ياخذ روحي مابا شي من الدنيا

عذاري : بسم الله عليج امايا . . شو الحياه من دووونج . . لاتقولين هالرمسه فديتج . .

السستر طلعت : مبرووووووك . .

ام عبدالله وعذاري : ربتتتت ؟

السستر المصريه تضحك : اااه الحمدلله

ناصر يوقف : اختي شحالها . .

السستر : كويسه الحمدلله . . تعبت اوووي لكنها حتصير كويسه ان شاء الله

ناصر :نقدر نشوفها

السستر : اااه طبعا بس مش دلوئتي . . بعد ما نطلعها من هنا حتشوفها .

وراحت عنهم . .

ام عبدالله تنزل دموعها وتدعي الله . .

عذاري شلت التلفون واتصلت ف روضة وخبرتها وعقب اتصلت ف سلطان وخبرته . . وقال ان بيمر يشلها . .ومن عقبها طلعو مهره من غرفه الولاده وحطوها ف غرفه خاصة وعطوها ادوية وكمن شي . .

ناصر ماسك ايدها : اختتتتتتي . .

مهره تبتسم . .

ناصر يمسح ع راسها : الحمدلله ع سلامتج حبيبتي . . " تنزل دموعه " الحمدلله ع سلامتج يالغاليه

مهره تغمض عينها وتبتسم بتعب . .

ام عبدالله : يالله ناصر ابويه رووح . . خل اختك ترتاح . .

مهره تفتح عينها :لا ناصر لا تروح . .

ناصر يمسك ايدها بقوة : ما بروح فديتج . .

ام عبدالله تاشر لناصر عشان يروح ..

مهره : امايا اشوفج تراني . . خليه انا اباه يكون موجود

ام عبدالله : لا اميه ما يصير .. انا بتم معاج وبالصبح بيييج اخوج .. الحين لازم ترقدين

ورقدت مهره على طول !

ام عبدالله تهمس : عاطينها ابره مهدأ ومسكن . .لازم ترقد ترتاح . . باجر بتنش بتحس بالعوق اكثر بدون مسسكن . . خلها ترقد وبالصبح جابلها . .

عذاري كانت تبوس الياهل : فدييت عمممرها . .

ام عبدالله بعصبيه : وانتي عطيييهم

عذاري : بلاج امايا محرجه . . " عذاري عطت البنت حق النيرس وشلوها "

ام عبدالله : وينه ريلج . .

عذاري : بعده ما يا . .تبيني اترياه تحت . .

ناصر : يالله انزيين قومي خليني اوصلج

عذاري : لا هكو اتصل . . بنطلع سوى . .

باسو راس امهم وطلعو . . وحطت ام عبدالله راسها ع السرير الثاني وهي تشكر الله وتحمده على سلامة بنتها وبنت بنتها . .

.

.

.

سلطان يبتسم ويمسك ايدها : مبرووك . .

عذاري تبتسم : الله يبارك فيك

سلطان : بتستوين خالوه هاه . .

عذاري تغمض عينها : وااي فديتها يوم بتقولي خالوه بششلها وبدور فيها . . ما بخلي شي فخاطرها مول

سلطان يبتسم ويرص ع ايديها بقوة : تعبتي اليوم . . من متى عندهم . .

عذاري : اختي الي تعبت فديتها انا بس قاعده اتريا . .

سلطان يطالعها : الله يقومها بالسلامه يارب . .

عذاري : بترد الشقه ؟

سلطان : لا . . ماتشوفيني ما لفيت اللفه

عذاري : هيه عسبت جي اسالك .!

سلطان يطالعها : في نسمات هوا بارده . . بننزل نتمشى عالبحر . .

عذاري تشوف ساعتها : الحييين ؟ الساعه 4 الفير

سلطان : ويعني . . ماتبين تروحين ؟

عذاري : بلى عااادي

سلطان : ودام اليوم السبت ماله داعي نرد بدري . . بنتمشى ع البحر وعقب " يطالعها " بوديج نتريق في مكان حلو . .

عذاري تبتسم : بدلعني يعني

سلطان يبتسم : هيه . .

عذاري: زين . . لان في موضوع ابي اكلمك فيه

سلطان يطالعها : عسى خير

عذاري : خير . . كل خير ان شا ءالله

سلطان : اتكلمي انزين

عذاري : لا يوم بننزل البحر . .

وصلو البحر . . ونزلو من السياره . . تجدمو شوي وعقب فصخو نعلتهم وحطو ريولاتهم ع البحر . .

عذاري : باااااارد . .

سلطان يمسك خصرها . .

استانست عذاري وحطت راسها ع جتفه وحطت ريولها على ريوله . .

سلطان يطالعها : لا والله

عذاري : ههههه انزين بردانه . .

سلطان : بردانه خوزي ريولج عن الماي

عذاري : حرام احطها ع ريلك . .

سلطان : حرام تحطين ريل وحده . .الثانية بتزعل . .

قفطت عذاري وابتسمت بحيا وطلعت ريولها عن الماي وتمت تمشي ع الرمل . . لحقها سلطان وقبض ايدينها وتمو يتمشون وهم ساكتين . . وفجاه . .

سلطان جابلها : قولي الي تبين تقوليلي اياه . .

عذاري تطالع عيونه وترد تنزل عيونها

سلطان يطالعها : يالله غناتيه " يبتسم "

عذاري يوم شافت ابتسامته ارتاحت جزئيا ونزلت راسها . . : ماعرف كيف اقول

سلطان يحط ايده ع ويهها ويرفع راسها بصبعه : قولي حبيبي

عذاري تطالعه : اول بسالك سؤال . .

سلطان يتبسم . .

عذاري : ليش مدلعني اليوم . .؟

سلطان : ممم . . يمكن لاني ماشفتج الا الصبح يوم نزلتج بيت اهلج لين الحيين . .

عذاري تبتسم : عيل كل يوم بغيب عنك . .

سلطان : اقدر احظنج بقوه واخشج بحظني واخبيج ؟

عذاري : ههههه

سلطان يطالعها : أقدر ولا

عذاري تبتسم : تقدر . .

تقرب سلطان منها اكثر وحظنها بقوووووه وهو يمسح ع ظهرها : والله وحشتيني . . حسيت بالغربه بدونج

عذاري : صدق

سلطان : صدق . .

باس راسها وتم حاظننها . .

عذاري : سلطان

سلطان : عيونه

عذاري : انا

سلطان يبتسم : وانا احبج . .

عذاري : لا . .

سلطان : شو لا

عذاري : ماكنت بقول احبك

سلطان : عيل

عذاري : كنت بقولك انا . .

سلطان : . .

عذاري : انا حامل . .

سلطان : . .

عذاري : . .

سلطان : . .

عذاري : . .

عم السكوت بينهم دقآآآيق .. كان يمسح ع ظهرها ومن قالت انها حامل ما تحرك من مكانه !

خازت عن حظنه وتمت تشوف ملامح الصدمه الي فيه . .

عذاري تبتسم بخوف : شفيك . .

سلطان عاقد حياته : شو الي قلتيه قبل شوي

عذاري تطالعه

سلطان : سمعيني مره ثانية؟

عذاري : انا . . حامل

سلطان : حاااااااااامل .!!!

عذاري : هيه

سلطان : عذاري ليييييييش . .

عذاري تطالعه باستغراب : شو الي ليش

سلطان : ليششششش حممممملتي الحين . شوه الي يخليج تحملين الحين

عذاري : لحظه سلطان . .

سلطان : عذاري استعيلتي

عذاري بصدمه : استعيلت ؟

سلطان صد ويهه الصوب الثاني : انا مابا يهال

عذاري : عفــــــــوآآآ ؟

سلطان يطالعها عين بعين ويرمس بانفعال لكن بدون ما يعلي صوته : ما ابا يهال . . ع الاقل سنه ولا سنتين

عذاري : . .

سلطان يطالعها ويمسك جتفها : ليش ما خذتي احتياطاتج . . ليش ما كنتي تاخذين منع الحمممممل

عذاري دمعتها نزلت : سلطان

سلطان يودر جتفها ويعطيها ظهره : صدمتيني . .

عذاري بصوت خافت : انت الي صدمتني . .

سلطان يطالعها : ليش انا الي صدمتج . , انا مابا يهال . . انا ماقدر اصرف ع اليهال الحين ولا اقدر على مسؤوليه اليهال الحين

عذاري : سويتهم يهال . . . هو ياهل واحد وسويتهم يهال

سلطان يطالعها : ليش ماكنتي تاخذين مننننننع ؟؟

عذاري تصارخ : شدراني انك ما تبي يهاااال

سلطان يطالعها : كنت اتحرا انج تعرفين . . و الي في بطنج لازم يطيح . .

عذاري تمسك بطنها : شوووه

سلطان يصد راسه الصوب الثاني : الي سمعتيه

عذاري : مستحيل . . ما راح اتخلى عن الي في بطني . . مستحيييل

سلطان يطالعها : عيل اختاري . .يا انا . .يلي في بطنج

ومشى سلطان عنها بعييد . . تمت مذهوووله . . خوفها وارتباكها انها ماتخبره كان في محله . . سلطان ما يبا ياهل . . لدرجه يبا الي في بطنها يموووت !!!!

.

.

.

__DEFINE_LIKE_SHARE__

«ضَحِيًة حِبُيًبُيً ..}● · 04-12-2012, 12:40 PM

.

.

.

.

البارت الـ 211

بعد ساعه كامله . .

عذاري تمشي رايحه صوبه . . كان فالسياره يترياها . .

ركبت السياره وصدت صوبه على طول وتم يطالعها . .

عذاري : انت خيرتني . . بينك وبين الي في بطني صح . .

سلطان يطالعها . .

عذاري : صح ولا لاء؟

سلطان : صح

عذاري تبتسم : وانا اخترت . .

سلطان : اخترتي . . . . شو

عذاري تطالعه وتبلع ريجها . . .

سلطان : . .

عذاري تطالعه وتبتسم : اختارك . .

ابتسم سلطان وتقرب منها بيبوسها لكنها صدت راسها الصوب الثاني : يالله خلنا نرد . . ابا انام

انصدم سلطان بالقو . . وتم متفاجأ يطالعها لكن حاول ما يبين . .

سلطان : تبين تردين الشقه ؟

عذاري : هيه

سلطان : ماتبينا نروح نتريق ف مكان حلو

عذاري : لا

سلطان اتنهد وحرك السياره . .

طول الدرب ساكتين . . حطت ايدها ع البريك . . ومن لاحظ ايدها حطا ايده عليها وعلى طول وخرت ايدها . .

حس انها مضايقه منه لكن تم ساكت ما قال شي . .

اول ما وصلو نزلت قبله وراحت عنه . . اما هو تم فالسياره مغمض عينه ما يعرف شو الي لازم يسويه . .

تم يفكر ويفكر ويفكر لين ما حس روحه انخنق ونزل من السياره . .

اول ما دخل الشقه تم يتلفت يمين ويسار يدورها . . لين سمع صوت صياح فالغرفه . .

راح على طول الغرفه وتم واقف عند الباب ما يقدر يدخل . . ! تم يسمع صياحها وقلبه ينعصصر ما يقدر يقول شي ولا يقدر يسوي شي . . تم واقف عند الباب فتره لين شافها سكتت . . بطل الباب بهدوء وانصدم يوم شافه مقفول . . عمرها ما قفلت الباب عليه من تزوجو . . دق الباب بهدوء بس مافتحت له . .

سلطان : غناتيه

محد رد عليه . .

سلطان : غناتيه فجي الباب . .

تم شوي وقعد ع الارض متساند ع الباب وهو يترياها تفتح . . تم فتررره طويله

لكن يوم حس ان بالمره ماشي حس . . خاف وايد . . قام و تم يدق الباب ويدق ويدق

سلطان : عذاااري افتحي الباب ولا والله بكسسره . . عذااااااااري ردي علي

تم يدق الباب بقوة واخر شي تم يددددقه لين كسسسره . .

كانت عذاري طايحه عالارض . . تخخخخخخخبل يوم شاف منظرها وهي طايحه وكله ادويه حواليها .

سلطان يسير صوبها بخوف ويدق ويهها : عذاااري . . عذااااري دخيييلج قووومي . .

على طول شلها ووداها المستشفى وهو متخبل مايعرف شوه يسوي ولا يعرف يتصرف ابد .. نزلها المستشفى وهو يصارخ ع الدكاتره والموجودين وع طول دخلوها . . كل شوي دكتوره تدخل الغرفه

تم على هالحاله يتريا نص ساعه لين طلعت له الدكتوره . .

سلطان بخوف : شفيها . .

الدكتوره تطالعه : انت زوجها ؟

سلطان يطالع الدكتوره وهو متاكد انه شايفنها ف مكان : هيه . .

الدكتوره : كانت عملية انتحارية . . وانا لازم ابلغ الشرطه

سلطان يطالعها : انتي شو تقولين

الدكتوره : الجنين توفى . .

سلطان انصب الدم كله بويهه . .

الدكتوره : والمريضه سوينالها غسيل معده من عقب العدد الكبير من منع الحمل الي خذته مع ادوية مش معروفة بكمية كبيرة . .

سلطان نزلت دموعه : هيه بخير ..

الدكتوره : بتصير بخير ان شاء الله . . بس اعذرني انا مضطره ابلغ الشرطه . .

عقب ماراحت تذكر سلطان ان الدكتوره كانت ربيعه منال . . وكان وايد يشوفهم مع بعض . . قبل لا يدخل عند عذاري مسك التلفون واتصل فيها . .

منال : سسسلطان !! مستحيل ماتوقعتك تتصل

سلطان : منال . .

منال : بلااك

سلطان بارتباك : ابا منج خدمه

منال: اممرر . . عيوني لك

سلطان : تذكرين ربيعتج الي كانت تدرس طب

منال : اي ربيعه

سلطان : ماذكر اسمها . . بس يمكن عليا ؟ او عاليه . .

منال : هيييه . . عااااليه . . بلاها

سلطان : اباج تكلمينها الحين وتقولين لها ماتبلغ الشرطه

منال : تبلغ الشرطه على شو

سلطان يتنهد . .

منال: اتكلللم خوفتني سلطان

سلطان : عذاري حاولت تنتحر بسبتي " تنزل دموعه "

منال : شوووووووو

سلطان : هيه الحين بخير . .بس بغيتج ترمسينن عاليه قبل لا تبلغ الشرطه . .

منال: خلاص بتصل فيها الحين . .

سلطان : خبريني شو بيصير معاج على طول

منال : تمام وانت طمني عن عذور عقب

سلطان : اوكي

منال : سلطان

سلطان : . .

منال : لا تصيح . .

سلطان مسح دموعه : انا ما اصيح . . يالله بخليج الحين

بند التلفون ودش عند عذاري . . تم يشوفها بقلب مكسسسور . . متحطم . . تقرب منها واول مافتحت عينها وشافته قالتله . .

عذاري تبتسم : استانست الحين

سلطان يطالعها بس ما يتكلم

عذاري : ريّحتك " تبتسم بعذاب " للابد

سلطان يصارخ : ليش سويتي جيه ليييييش . .

عذاري تصد الصوب الثاني : اطلع برع . .

سلطان تنزل دموعه بحرقه . .

عذاري تبتسم : سلطان . . خبروك ؟

سلطان يطالعها : خبروني شو . .

عذاري : انا عقب كل الي خذته . . استويت . . عقييييييم

عقيييييم

عقيييييييم

عقييييييم

عقييييييم

عقييييييم

عقيييم

عقيييم

عقيييم

عقييييييييم

عقييييييم

عقييييم

عقييييم

عقيييييم

عقيييييييييييييييييييييم

عقيييييييييم

عقيييييييييييييم

تمت الكلمه توووون فأذنه لين فز على الباب يوم فتحته . .

عذاري تطالعه . .

سلطان صد يمين ويسار . . عرف انه كان يترياها تفتح الباب وغفل بدون لا يحس . .

سلطان وقف على طول ومسكها من جتفها : شو كنتي تسوين . .

دخل الغرفه وتم يشوفها . . ولقاها مترتبه . . عكس فالحلم . .. كانت كلها ادوية متناثره ف كل مكان . .

عذاري طالعته وطلعت من الغرفه . .

لحقها سلطان ومسك ايدها . . : عذاري كلميني

عذاري وخرت ايدها عنه . .

سلطان : شو كنتي تسوين . .

عذاري تطالعه : كنت ابا اقعد روحي .. حرام ؟؟؟

سلطان ساكت . .

عذاري راحت صوب المطبخ وشربتلها ماي وردت دشت الغرفه لقته منسدح ع السرير ف يايه بتطلع لكن كلمها . .

سلطان بقلب مكسور : وين؟

عذاري : مافيني نوم . . نام انت . .نوم العوافي

وطلعت وصكت الباب . . وراحت الحجره الثانية وتمت قاعده عالسرير وهيه تفكر وتنزل دموعها لين نامت

.

.

,

حمد : سيف . !!

سيف يرفع عينه يطالع حمد . .

حمد : انت من متى اهني . .

سيف بعده مركز ف حمد . .

حمد : شـ صاير ..

سيف : تعرف حمد . .

حمد يطالعه . .

سيف : كان المفروض انت الي تتزوج مهره . .

حمد بلع ريجه . . : انت شارب ؟

سيف يبتسم : لا . . انا صاحي . . وايد صاحي . .

حمد يطالعه . .

سيف : مهره . . .

حمد بخوف : شفيها . .

سيف : فالمستشفى

حمد بخوف واضح : ليش . . شوه فيها

سيف يبتسم : بعدك تحبها ..

حمد : تتتتتتتكلم شوه فيها

سيف : وتحبها وايد

حمد : سيييييييييييييف . .

سيف : ادري . . اعرف انك تحبها وتموت فيها . . " يبتسم " والله ادري ..

حمد تم يطالعه .

سيف : وادري انك بتحبها بقلبك بس . . عشان جي واثق فيك . .

حمد ساكت . .

سيف : مهره فالمستشفى . . ماعرف شفيها . .

حمد : كيف ماتعرف شفيها

سيف يبتسم ببرود : والله ماعرف . . من امس فليل فالمستشفى . .

حمد يطالعه : روح شوفها . .

سيف يوقف و يطالعه : هه . . اروح ؟ " يبتسم " انت روح اطمن عليها . .

حمد يضرب سيف بكسسسسس : بسس خلاااااااص

سيف عقب البكس تم يطالع الارض ودموعه تنزل . .

حمد مسك جتفه : روح شوفها ..

سيف يطالع حمد وعقبها دخل البيت . .

ومشى حمد وراه . . : سيف رووح بلاها هالبرووود . .

سيف يطالع حمد : وينها ؟

حمد عاقد حياته . . : منو

سيف : اختك . .

حمد : راقده . . شو تبا فيها الحين . . ودرها ف حالها . .

مشى سيف عنه وياي يدخل غرفه سلامة بس حمد وقف عند الباب

حمد : سيف . . كافي عاد . .كاااافي

سيف يطالع حمد . .

حمد : روح شوف مهره وخل سلامه ف حالهاا . .

سلامه تبطل الباب لانها سمعت اصوات عند باب الحجره : حممد شسالفه " وشافت سيف "

عينها بعينه . . عييييييينه بعييينها بتركيزززز . . اخر مره شافها فيها بتركييز حيل كاان !

خطفت الذكرى وهو يطالع بعيونها بحذافيرها .!

>

<

>

كل الي موجودين فالغرفه شردو وطلعو براا . .

مسكها من شعرها سيف وهيه منهاره تصيح ولاويه على روحها اللحاف . .

سيف يسحب اللحاف : تستحين منااا اححححححححححححححنا ؟؟: تستحييييييييييييييييييييييييين !! كيف تستحيييييييييييين . . انتي فيج حيييييييييييا اصلااااااااااا ؟؟؟؟؟؟؟؟؟؟ " يعطيها كفف يعقها ع الارض وهيه عاريه " موووووووتي وانتي جي . . موتي وجابلي ربج وانتي جيه . . ادخلي إلقي حسابج من ربج بسوء هالخاتمه . . " ينزل لها عالارض ويدق راسها ع الارض " مووووووووووووووتي . .

يا حمد على طول ومسك سيف من ايده : خلااااااااص . .

سيف معصب وما يشوف جدامه : هاي لازم تمؤؤؤؤؤؤؤؤؤؤؤؤؤؤؤؤؤؤؤؤؤت ما تم عايشه . .

حمد ضرب سيف بكس عشان يودر سلامه . .

ومسك حمد سلامه ووداها شوي جدام وفر عليها ملابسها عشان تلبس . .

ومنصور كل هالاحداث تستوي جدامه . . دقايق ودش ناصر وسار صوب منصور من غير ما يشوف سلامه

منصور يطالع ناصر : عطني تلفونك . .

ناصر عطاه التلفون على طول . .

منصور : ألو . . الشرطه . . انا عندي بلاغ . . اناا زخيت حرمتي " يبتسم ودموعه تنزل بغزاره " في بيت دعاره . . المكان ********************* . . تعالو شلوها وشلو اللوث الي اهني . .

عقب ما لبست سلامه ملابسها وشيلتها وعباها سارلها سيف وفرها ع السرير وتم يضربها ضضضضضضضضرب . . ضرب عمره ما ضربه حد . . ضرررررب عنيييييييييف قطعها فيه . . الدم كان ينزل من كل مكان فيها . . يبهتها . . خشمها ! حلجها . .

منصور سار صوبه وصرخ : وخرررررررر . .

مسك ايدها وسحبها وتم يمشي ويسحب ايدها لين ما وصل عند عبيد الي كان فالصاله يسوي روحه مش خايف وكان يالس يجمع الفلوس الي فـ سدته ! ناوي يشرد ويلم كل شي

منصور يأشرلها : ها في شو احسن عني " يصارخ" شو الي لقيتيه فيه ما لقيتيه فيني ؟ رمسيني شوه ؟؟؟؟؟؟؟؟؟؟؟؟؟؟؟؟؟؟؟؟

سحبها باقوى ماعنده وركبها السياره . . وناصر مش عارف يتصرف بس يلحقه . .

اول ما طلعو منصور وناصر . . راح سيف صوب عبيد وتم يضربه ضررررررررررررب . . وعبيد يضربه وسيف يزيييييييد . . لين ما سحب عمره عبيد وفتح السده وطلع مسدس . .

حمد يصارخ : سييييييييييف . .

سيف مش مفتكر ويضربه وماسك ايد عبيد مش معطنه المجال يوجه المسدس عليه . .

دخلو الشرررطه وحمد يصارخ وخبر الشرطه يتصرفون . . اول ما سارو الشرطه صوبهم يحاولون يفجونهم . . انطلقت الطلقه بصوت يضضضضخ المكان كله .!

حمد يصارخ : سييييييييييييييييييييييييييييييييييييييييييييييييي ييييييييييييييييييييييييييييييييف

>

<

نزلت دموع سيف وغمض عينه بقوه وهو يبا يمحي الموقف من باله . .

عرف حمد ان سيف ما ياي يتضارب . .

فتح عينه وشاف عين سلامه والدموع مغرقتنها . . .

فتح سيف ايده وهو يطالعها بربع ابتسامة . .

ما استوعبت ولا صدقت . . تمت تمشي ووتتقرب منه بهدوء . . لين وصلت له

تقرب منها وحظنها وحظنته . . . تمو يصيحون اثنينهم و حمد ما اتحمل الموقف وتم يدمع . . طلع بو خالد من الغرفه ويوم شاف الموقف وايد تأثر . . وابتسم وتم يطالعهم من بعيد . .

سيف : سامحيني . .

سلامه تصيح : انت سامحننني . .

سيف : مسموحه . . مسموحه ياختي . . مسموووحه . .

ابتسم حمد ومسح دموعه . .

سيف : تعرفين اني وايد احلم في امي

حمد وسلامه يطالعونه باهتمام . .

سيف : حلمت حلم وايد حلو ومؤثر . . ويوم فسرته قالي المطوع انه امك ف نعيم و فراحه . .

حمد ماقدر يتحمل وصد الصوب الثاني وتمت دموعه تنزل بدون توقف . .

سلامه تطالع سيف وماسكه ايده وهي تصيح وترص ع شفايفها بقوة . .

سيف : وعقب هالحلم . . كل اسبوع احلم فيها تقولي كلمة وحده . .

سلامه وحمد يطالعونه . .

حمد : شو تقول . .

سيف : سامحها . . سامحها . .

سلامه تصيح بقوة . . : انا الي ذبحتها . .

سيف يهز راسه ب لا : الي صار مكتوب . . وهذا يومها . .

سلامه تطالعه وتنزل دموعها بعذاب . .

ابتسم سيف ومسح دموع اخته . . : ابا منج خدمه . .

سلامه تطالعه . .

سيف : ابيج تين معاي المستشفى . . مهره اهناك

سلامه : بلاها

سيف : مادري . . خلينا نروح نشوف

سلامه : زين ببدل وبي . .

سيف : بترياج فالسياره . .

وطلع سيف . .

حمد لاحظ ان ابوه واقف . . : ابويه ؟

سلامه طلعت يوم سمعت حمد يزقر . .

تجدم بو خالد وسار صوب سلامه . . وباس يبهتها ومسح ع شعرها وابتسم . .

تخبلت سلامه . . تحس الارض مش شايلتتتتتها . . باست ايده وباست راسه وباست صدره وحظنته وتمت تفرغ كل العذاب الي فيها . .

بو خالد : روحي لحقي اخوج يترياج . .

.

.

.

على الساعه 9 الصبح . .

مهره تفتح عينها : شووقيييي . .

شوق تبتسم : عيوووووووون شووووق . . حبيييييبتي مهوووور . . قلبي عيوووني

مهره تبتسم .

شوق : الحمدلله ع السلامه

مهره : الله يسلمج . . انتي متى يييتي . .

ام عبدالله : من الساعه 7 وحليلها . .

مهره : ليش تعبتي نفسج

شوق : مافيها تعب ماقدرت اتم اهناك . . تميت متحرقصه قلت ماقدر لازم اضرب خط اشوفج . .

مهره : فديتج يا شووقي . .

شوق : شخبارج الحين . . شو تحسين

مهره : جسمي كله يعورني . . ماقدر اتحرك . .

شوق : حبيبتي والله . . ماعليه يبالج بس اسبوع ان شاء الله والالام كلها بتختفي باذن الله

مهره تطالع امها : سيف . . ما يا ؟

ام عبدالله تطالع شوق . .

شوق : لا . .

مهره : معقوله . . " تبتسم باستهزاء " معقوله . .

>

<

>

ناصر : سيف . ! توك ياي . .

سيف يطالعه : هيه . .

نزلت سلامه من السياره وفهم ناصر ليش سيف طول هالوقت كان محد . .

ناصر ابتسم : شحالج

سلامه : بخير . .

سيف : وينها . .؟. وشصار فيها .؟

ناصر يبتسم : وصلت بنتك بالسلامه . .

سيف مذهول : هاه

سلامه : مبرووووووووك . . مبروووووووك سوووواف

سيف : احلف . .

ناصر يبتسم : والله . .

سيف: مهره ربت . .

ناصر : ربت . . ويتريوونك تسجل البنت . . ف لوسمحت قبل لا تروح حق حرمتك سجل البنت . .

سيف بعده مش مستوعب : مهره امس ياها عوق الولاده . .

ناصر ابتسم ويطالع سلامه : عاد يودي اخوج لين يستوعب . .

سلامه مسكت ايد سيف : يالله خلنا نروح نشوفها . .

سيف يطالع سلامه : اكيد شايله علي هي وايد . . ولا بتسامحني لاني ماكنت موجود . .

>

<

>

مهره : يا امايا سيري . . انا بييبولي البنت عقب شوي بتسلى فيها وبخليها عندي وبنرقد مع بعض . . لاتحاتيني انا مش ياهل امايا . . سيري فديتج ارتاحي ادريبه ظهرج يعورج مارتحتي للسرير . . مايريحج الا سرريرج . . شوق عااد وديها

ام عبدالله : وابويه من هالبنت لسانها عقب ما ربت استوا لسان عيايز

مهره : هههههههههههههه . .

شوق : ههههههههههههههههههههههه يالله خالوه خليني اوديج عيل . .

ام عبدالله : بكلف عليج يا اميه

شوق : خالوه لا تعديني غريبه . .

مهره : امايا ماعندج سالفه . . هاي الا شوقو

ام عبدالله تبتسم : ونعم الرفيييقه . . الله يخليكم لبعض

مهره + شوق : امييين . .

>

<

>

سيف يدق الباب : هود . .

مهره تبتسم باستهزاء : توا الناس . .

ام عبدالله :هدا ابويه ادخل محد غريب . .

صدت مهره الصوب الثاني اول ما حست ان في حد يدخل . .

سيف : السلام عليكم . .

ام عبدالله + شوق : وعليكم السلام . .

سيف : شوق شحالج . .

شوق تبتسم : بخير ربي يعافيك . . مبروك ما ياك . .

ام عبدالله : سيف رحت سجلت البنت ؟ يتريونك تسجلها . .

سيف يبتسم : سجلتها . .

سلامه : شحالج عموه . . ؟ " بعدها متعوده تقولها عموه من كانت متزوجه منصور "

ام عبدالله : بخير فديتج . .

مهره صدت على طول وشافت سيف وسلامه واقفين حذال بعض وجتف بجتف . . . واثنينهم يطالعونها ومبتسمين . .

مهره : سلامه !

سلامه تطالع شوق : مرحبا شوق شخبارج

شوق تبتسم : هلا . . بخير حبيبتي . .

مهره تطالع سيف بنظرات ماتنوصف . .

سلامه : مهووووورتي . .

مهره تنزل دمعتها : حبيبتي . .

وسلمت عليها وحظنتها بقوة . .

سلامه تهمس فاذن مهره : مشكورة . . ربي يجازيج كل خير على الي سويتيه . . لولا كلامج جان سيف ماتأثر . . ولولاج جان ما تصافينا في يوم . . ساامحيه . . تراه متلوم وايد لانه ماقدر يمرج . .ماكان يعرف انه فيج عوق ولاده . . وكان طول الليل في كاراج بيتنا يحاول يدخل ماقدر .. لين الصبح قعد فالزراعه وشافه حمد وعقب حظني وطاح الحطب بينا . . سامحيه . . تعرفينه مايروم على زعلج

مهره تبتسم : لا تحاتين . . وانا مستانسه على تصالحكم والله . .

سلامه تبوس راس مهره : مبروك مرت اخويه

مهره تبتسم :الله يبارك فيج . .

ام عبدالله : عيل سيف تم وياها لا تخليها . . شوق بتوصلني البيت بريح وبغير ثيابي وبناكل انا وشوق شوي وعقب بنمر مره ثانية . .

شوق تطالع سلامه وتنغزها : سلامه بتين ويانا

ام عبدالله : هيه هيه تعالي سلامه ويانا . . سيف بيتحمل منها . .

سلامه تبتسم : اوكي . . " تطالع مهره " بيييج عقب . .

مهره تهز راسها ب اوكي . .

طلعت سلامه وطرشت مسج حق حمد " مهره ربت . . واخيرا بتستوي عم ! "

طرشلها حمد " قولي انج ما تتمصخرين "

طرشت له " ما تتمصخرين "

حمد " الحمممممممدلله . .الف الف مبروك . . "

وماردت عليه . . عقبها طرش لها . .

" شخبارها "

ردت عليه " الحمدلله "

طرش لها " والياهل "

ردت " هدايه ؟ "

طرش لها " فديتها سجلو اسمها يعني . . "

ردت " هيه "

طرش " بلاج تجاوبين بحرفين ارمسي بالتفصيل "

ردت " هههههه شقولك مافي شي ينقال . . مهره بخير الحمدلله ومبين عليها صحتها زينه . . توه ودرناها ويا سيف وانا وشوق وام عبدالله بنروح بيتهم بنتم اهناك شوي وعقب بنرد المستشفى "

رد عليها " هيه ويا سيف الحين ؟"

ردت عليه " هيه "

طرشلها " جان قلتيله يراضيها ويستسمح منه "

طرشتله " لا تخاف اصلا من شافته وياي الارض ما شالتها "

طرشلها " الحمدلله . . فرحتيني "

.

.

.

__DEFINE_LIKE_SHARE__

«ضَحِيًة حِبُيًبُيً ..}● · 04-12-2012, 12:41 PM

.

.

.

البارت الـ 212

.

.

.

سيف يبتسم : صباح الخير . .

مهره تطالعه : صباح النور

سيف يتقرب منها ويبوس راسها : مبروك ما يانا يالغاليه . . " ومسك ايدها وباسها "

مهره تطالعه : الله يبارك فيك . .

سيف يشوف ويهها . . متعب ومرهق وهالات سودا . . ومبين عليها التعب . .

سيف : سامحيني لاني ..

مهره تقاطعه : كنت اتمنى . . ايدك اول ايد تمسكني وتباركلي . .كنت اتمنى اول بوسه وواول مبروك اسمعها منك . . " تطالعه وتمسك ايده بقوه " بس يوم عرفت انك ما ييت لهالسبب . . " تبتسم " فرحت . . ما راح اعاتبك ع شي . . لانك بالنسبه لي سويت شي وايد كبير . .

سيف يمسح ع شعرها : انتي احلى عطيه من الرب . .

تدخل النيرس ويايبه النونو عشان مهره تعطيها حليب . .

سيف يروح يشلها : هاتيها هاتيها عند ابوها . . "سيف يطالعها بتمعن " فديييتها . . بااااابااه . .

مهره تبتسم . .

سيف : تشبهج " يطالع مهره " وايد تشبهج . .

مهره : لانها بنتي . .

سيف : وبنتي . . باباااتي . . عيووون باباتي انتي . . " يلاعبها " يالله فديييت هالايد الصغنوووونه . .

يقعد ع السرير الي فيه مهره . .

سيف يطالعها : هاي بنتي ؟

مهره تبتسم . .

سيف : والله هاي بنتي . . .؟

مهره : هييييه . .

سيف : فديييييت روحها . . " يبوس ايدها " فديت هالايد الصغيييره انا . . ياعمر بابا انتي . . ياقلب باااباتج . . " يحط ويهه ع ويهها " ياااه فديت هالريحه . .

مهره : هاتها . .

سيف : اترييييي . . خليني اشوفها اول . .

مهره : انزين خلني اشربها حليب عقب لاعبها . .

قام سيف وحطاها ف حظن مهره . .

مهره : هاتلي الشيله الي اهناك . .

يابلها سيف الشيله وتغطت مهره عدلت وشربت بنتها الحليب وسيف يطالعهم بحنان . . نزلت دمعته

مهره تطالعه : ليش . .ليش هالدمعه

سيف يبتسم : الحين صار عندي عايله . .

مهره تبتسم ..

سيف : واحلى عايله . . ربي يحفظكم لي . .

مهره : ويحفظك لنا . .

تقرب سيف منها : انتي شايله علي . .

مهره تهز راسها ب لا . .

سيف : اكيد . .

مهره :اكيد . .

سيف : مسامحتني على كل شي

مهره تبتسم : مسامحتنك .. واليوم سامحتك اكثر . .

سيف : انا واايد مرتاح قسم بالله

مهره : يعله دوم حبيبي . .

سيف يبتسم : فديت حبيبي من ع طرف شفاتج . .

.

.

.

عنود : شووو . .

روضة : هيييه ليش ما تدرين ؟؟

عنود : لا . . محد خبرني

روضة : يمكن انشغلو

عنود بضيج : ماعليه رواض . .مشكوره لانج خبرتيني

روضة : ولو . . يالله حبيبتي باي . .

عنود : باي . .

محمد : بل بل بلاج لابقه . . " ينفخ ع ويهها " افف افف . .

عنود بعصبيه : حمود مش متفيجتلك . .

حمد الصغير صاح . .

محمد : فديته خوي شما . . مايرضا يشوف ابوه ينهزب . .

محمد يشل حمد . . : بلاج . .

عنود : مهور ربت

محمد : واللللله . . ؟؟؟ ما اتصلت ابارك لـ ابن عممي . .

عنود : ليش تباركلهم ومحد خبرنا . .

محمد : عنود بلاج .. استعوذي من ابليس . . شوفي الجامه ابليس يسوي حبتين لانه قدر يخليج تعصبين

عنود تطالعه محمد بشر ..

محمد : يالله عاد حق شو معصبه . . تعصبين وانتي صرتي عمه الحين . . كل واحد التهى عنود لاتستوين سخيفه وتكبرين الموضوع . . مهره مربيه اكيد تعبانه وماقدرت تخبر حد . . وسيف فرحان مش متفيج . . وتلاقين حمد وسلامه رقود ولا يدرون شسالفه . .

عنود تطالعه . .

محمد : صدق والله . . لا تستوين بايخه

عنود تقوم : هات سويجك بروح المستشفى

محمد عاقد حياته : اقولج ايلسي لا اصمج بطراق اوديج لين السياره واربطج حزام بعد

عنود ابتسمت غصب

محمد ابتسم : ابوي .. فديت هالويه . .

عنود : حمممممموود

محمد : جب جب . . يلااا . . كل ما صار شي عطني السويج عطني السويج . .قوليلي خذلي سياره بعد

عنود: بقولك ليش لا

محمد : اندووووك انته . . عيبتج السالفه انتي . .

عنود : انزين يالله نش بنخلي حمد عند عموه وبنسير سوا

محمد : هيه زين يوم عدلتي الرمسه . .اترياج تقولين جي انا بس . .

عنود : حمود يالله

محمد يغمز لها : ما تبين ياهل ثاني . .

عنود عاقده حياتها : حموود

محمد : مسكين حمد يبا حد يلعب وياه . . شوفيه ما يكسر الخاطر

عنود عاقده حياتها : حموود

محمد : يحليلك يا ولدي . . شسويبها امك ما تبا تيب لك كتكوت ولا كتكوته يونسونك . .

عنود تلبس عباتها : انا بشل السويج وبسير

محمد عاقد حياته : بنشوف منو بيخليج . .

قام محمد ولبس ع السريع . . عنود كانت قاعده ع السرير وتطالعه وهو يتعصب ومبتسمه . .

>> ماشاء الله عليك يا محمد . . وسيم . . نظراتك حاده ولاصقه بحوآجبك الطويله المقرونه . . لحيتك خفيفه حيل وخشمك سيف . . جسمك يخبل . . " تبتسم " الله يحفظك لي

محمد عاقد حياته : بلاج سرحانه فيني . .

عنود تبتسم : اقول فخاطري ماشاء الله على ريلي . . جميل

محمد يلبس نظارته الشمسيه : المفروض يوم تخلصين صلاه الفرض . . تصلين ركعتين شكر لله لاني تزوجتج . . انتي تعرفين كم بنت ماتت والسبه نظرة عيوني ؟

عنود : هههههههههههههههههههههه

محمد : تتحريني اتمصخر . . اصلا مره ابتسمت بالغلط جان 10 سيايير يداعمون . . خليني ساكته ياريال

عنود عاقد حياته : شو

محمد : اوه اسمحيلي . . عشت الجو . .

عنود تبتسم . : يالله زين امشش

محمد يبتسم ويتقرب يبوس خدها . . : احبج . .

ومدالها السويج . .

عنود : انا بسوق . .

محمد : هيه . . اباج تحترفين السواقه اكثر واكثر عشان اطمن عليج واعرف انج تسوقين عدل

ابتسمت عنود وطلعو . .

بو محمد : شدعوووه وييييين . .

ام محمد تبتسم وتشل حمد : راح يقعد عندنا هالصغيرون . .

بو محمد : خليه يقعد فديته . . هاتيه اهني عندي

عنود : ما بنطول عموه

ام محمد تبتسم : عادي يمه . .

وطلعو . . وساقت عنود لين المستشفى . . وبركنت عدل شرات ما علمها محمد . .

محمد يصفق : عفيه عليج . . صدق حرمة محمد . .

عنود تغمزله . .

ونزلو من السياره . .

.

.

.

سلطان : عذور . .

عذاري فتحت عينها . .

سلطان : قومي غناتيه صلي الظهر عشان نطلع نتغدا . .

عذاري بصوت تعبان : مابا اتغدى . .

سلطان يتنهد : عذاري لا تسوين فيني جيه

عذاري تطالعه : شفيك . . شوه سويت

سلطان يتنهد : خلاص قررت

عذاري تطالعه

سلطان : راح نخلي الياهل

عذاري : اوب صراحه " تبتسم بطنازه " كبرت بعيني .

وقامت من ع السرير ويوم بغت تتعداه مسكها من جتفها . .

سلطان بتنرفز : كاافي عاد . . قاعد اكلمج خلج واقفه . . الف مره قايلج لا تخليني ارمس وتروحين

عذاري تطالعه : قول . . شتبي تقول قوول

سلطان يطالعها ومستغرب من اسلوبها معاه . . : انتي ليش تكلميني بهالطريقه

عذاري تتصنع الابتسامه : سامحني . . تفضل سلطان شوه الي تبا توصل له

سلطان يطالعها : الياهل ماراح تنزلينه . .

عذاري تطالعه . .

سلطان يمسك ايدينها الهنتين : اوعديني انج ماراح تسوين اي شي ينزل الي في بطنج . .

عذاري : يعني انت تقبلت فكرة اليهال ؟

سلطان : انا تقبلت فكرة انج ماتعقين الياهل . . ماتقبلت فكرة انه بيكون عندنا ياهل . .

عذاري تبتسم باستهزاء : يا سخافتك يا سلطان . .

ومشت عنه ومسكها وساندها ع اليدار بقوة : وبعدييييييييين معاج . .

عذاري تطالعه . . وتطالع ملامحه . . وجماله الي دوم يـعذبها . .

عذاري : تعرف سلطان . . انا ماعرف شو خذت منك . . اخذ كل شي منك بالحسره . . بالقطاااره . . ولا اقولك . . ما يفيد الكلام . . وايد تكلمت . .

يايه تمشي بس مسكها . . : شوه فراسج ارمسسي . . شوه عندج . .

عذاري : ماعندي شي " تبتسم " ماعندي شي

سلطان يطالعها بغيض . .

عذاري تطالعه وعاقده حياتها . .

سلطان : ولا مره حطيتي عينج ف عيني واطالعتني بهالنظرة . .

عذاري تبتسم : لاني بين ايديك الزوجه المطيعه المخلصه الي تمشي ورى رضا زوجها طول الوقت . . دايما انت الصح وانا الغلط . . حتى لو انا الصح دوم اخلي عمري غلط . . بس عشانك وعشان ما اخسرك وعشان ما اكدرك . . لكن تعرف شو سلطان . .

سلطان يطالعها بحيييره . .

عذاري : من اليوم ورايح راح اكون عذاري يديده . . عذاري حتى انا ما اعرفها . . راح اتصرف بالمزاج الي احس فيه . . ما راح اكابر ع روحي واجبر عمري عشانك . . اذا كنت معصصصبه عليك بعصصصب وبقولك فويهك . . واذا كنت ابا اسبك بسسسبك فويهك ولا بسويلك اعتبار . . ولو كنت مش طايقتنك ولا طايقه قربك " باشمئزاز " راح اخليك تحسس . .

سلطان قلبه عوره وايد . . قدر يبين لها انه مش مهتم لكلامها لكن فداخله كان يموت . .

سلطان : تتحريني بموت . ؟ سوي الي تبين تسوينه . . لاتجاملين ع حساب نفسسج

عذاري : اجامل " تبتسم باستهزاء " انا كنت اقدرررك واحطلك الف اعتبار . . ما اجاملك ابد . . ياما قالولي خواتي . . لاتكونين ساذجه بيركب فوق راسج . .

سلطان : انتي مش ساذجه . .

عذاري تطالعه . .

سلطان : انتي تحبيني بجنون . .

عذاري : وهذي السذاجه بعينها . .

دزت جتفه ع ورا وخازت عنه . . اما هو تم بحيرة وضيج ما ينوصف . .

.

.

.

__DEFINE_LIKE_SHARE__

«ضَحِيًة حِبُيًبُيً ..}● · 04-12-2012, 12:44 PM

.

.

.

.

البارت الـ 213

عنود : سيفوه خل البنت ترقد كل شويه تقومها . .

سيف عاقد حياته : شو تبين انتي . . بنتي ولا بنتج

عنود : انزين ما تخلي الواحد يشللللللها

سيف مطنشنها . .

عنود : مهووووووووور شوفي ريلج

مهره تطالعه : سيفو عطها شويه خل تشلها . .

سيف يبوس راس بنته : اندووج . . عشان مهره بس . .

عنود شلتها : فدييييت البنات الحلوييين . . يختي عليها . . دلقووومه عومري انوووسه

سيف : بسم الله الرحمن الرحيم

محمد : هيه ماعليك منها تحولت اختك .. احين بتقول ابرا تمابرااا . . وبتختفي

يضحكون . .

محمد يبتسم : انا بسير اشوف الحظانه . . احب اطالع اليهال . . بتين عنود ؟

عنود تطالعه : لا بتم اهني . .

محمد : سيفوه ما بتي . .

سيف : لاء . .

طلع محمد وسار صوب الحظانه وهو مبتسم بحنان . . لمح وحده واقفه ويعرفها عدل تحظن واحد . . ركز النظرة عددددددددددددددل . . هالبنت هالبنت هالبنت . . اتشلل !!! (( تتنآهيد )) انبلع لسانه مره وحده من حطت عينها فعينه وعقب نزلت عينها . .

.
ليش نزلتي عيونك ارفعيهاوطالعيني
ولا يعني انحرجتي يوم جاوبتي سؤالي

ليش قلتي لي احبك؟ليش كنتي تخدعيني
ليش قلتي لي(حبيبي)ليش قلتي لي ياغالي

كان ممكن ما(أحبك)..كان ممكن تتركيني
كان ممكن من البدايه تخدعي غيري بدالي

والله اني ماجرحتك!!ليش انتي تجرحيني؟؟
هنت على قلبك حسافه وانقضت اجمل ليالي

والقهر للحين(احبك)وادري انك ماتبيني...!!
والمحبه من طرف واحد نهايتهازوالي..!!

كان عمري بيدينك قولي وش كان بيديني؟؟!!
اذكر انه من غلاتك كان قدرك فوق عالي..

كنت اتجاهل واطنش يوم نغزاتك تجيني..
كنت اقول الحب اكبر من تصرف لا مثالي

ابغى من وقتك دقيقه وليت انك تمنحيني..!!
بس ابي اقول لك3اشياءواروح امشي لحالي

اولا:فعلا كنت احبك كنتي قلبي وعيني
وكانت الدنيا بوجودك شي روعه.شي خيالي

ثانيا:ع اللي بدر مني دخيلك سامحيني
يمكن انه زل لساني وقلت انك راس مالي

ثالثا:اسالك بالله. .واطلبك لا تذكريني!!
احرقي كل القصايدوانسي اشواقه ووصالي

المهم اني اببعد وانتي روحي واتركيني
ارجعي له ومثلي دورالبريئه اللي ما تبالي

ابتسم محمد باستهزاء واطالعها من فوق لين تحت ومشى . . !

.

.

.

شوق : لا خالوه دخيلج بروح . .بسلم على مهور وبرد دبي . .

ام عبدالله : والله ماتروحين الا وانتي متغديه . .

سلامه تطالعها : شوق بس بنتغدا وعقب بتوصليني وسلمي ع مهور وروحي . .

شوق : ممم . .

ام عبدالله : حلفت انا !

وتقوم عنهم . .

ابتسمت سلامه . .

شوق : وين الحمام سلامه ؟

سلامه : اهنااك . . امشي سيدددده وعلى ايدج اليمين . .

شوق قامت وراحت . .

وتمت سلامه تتأمل البيت . . عاشت فيه لكنها ما استمتعت فيه ولا قدرت اي شي فيه . . تمت افكار وافكار وذكريات تخطف ف بالها لين .!

منصور : سلامه . .

سلامه نقزت . .

وعلى طول اتحجبت .!

منصور يطالعها : من متى انتي اهني . .

سلامه بدون ماتطالعه : من الصبح . .

منصور يبلع ريجه : ششخبارج

سلامه: الحمدلله . .

تم يطالعها وهيه لافه عنه . .

منصور تقرب لـ وين ماهي قاعده وجابلها وعقد ريوله ع الارض بحيث يقدر بجابلها ويشوفها . .

سلامه ارتبكت وايد وعلى طول قامت . .

ابتسم منصور . .

منصور : تعرفين اليوم شـو مر في بالي ؟

سلامه ماصدت تطالعه : شو . .

>

<

<

مسكت ايده بلهفه وبدموع غرقانه : انتتتتت بخيييييييير ؟

منصور فاج عينه بتعب : انتي كيف يييتي اهني . . منو يابج

سلامه حطت راسها ع صدره : والله خفت عليك موت والله

منصور يبي يسحب ايده ويربت فيها ع راسها بس شاف انه ايده عليها المغذي والايد الثانيه هيه طايحه عليها وقابضه اصابعه . .

منصور يبتسم بتعب : دخيلج قومي شوي . .

قامت بسرعه :شفيك ...؟؟؟؟؟؟ شي يعووورك . . ايييب لك شي ؟ ازقر لك النيرسس ؟؟

منصور فاج عينه : كيف يييتي اهني جاوبيني . .

سلامه تطالعه : ويا الدريول

منصور يطالع ـها . .

سلامه نزلت راسها : بصعوبه فدرت . .

منصور يبتسم بتعب : راويني دخيلج . .

سلامه تبتسم : مش وقته

منصور : يالله علشان اطيب بسسسسسرعه

سلامه وقفت روحها بشويش ومشت لييين ما وصلت الصوب الثاني من السرير . . كانت شوي تتقبض ف السرير وشوي تعتمد ع ـنفسها . .

منصور يغمض عينه : اللهم لك الحممد يااااااااارب . . اللهم لك الحمد والشكر . . " يفتح عينه " والله لو ان المغذي مش ف ايدي جان قمت وسجدت . . .

سلامه تقعد ع السرير : انا ما حسيت كيف قمت من الكرسي وكيف لبست عباتي وكييف قلت للدريول واللله ما حسسسيت بشي مول . .

منصور : لو ادري جان طحت من زمااااااااان

سلامه : يالله عاد لا تقول جي . .

منصور : مستانس مووت ماقدر اشرحلج كيف انا مستانس . .

سلامه مبتسمه : كله بفضل الله ومن ثم من فضلك . .

منصور : وفضلج . . كله من ارادتج وعزيمتج

سلامه : كله لانك تعبت وياايه . . من ترد من الدواام ليييييييين الليل

منصور : لا وكنت ماخذ اجازه اليوم عشان اي اشلج ونبدا من الصبح . .

سلامه تبتسم

منصور : قربي قربي خدج خليني ابوسج واباركلج

سلامه بحيا: لا شو . . استحي

منصور : يالله عاد . . والله ببوسج ع خدج بوسه صغيره

تقربت سلامه بهدوء وحبها منصور برقه وابتسم وهو ما يردد غير " الحمدلله يارب "

>

<

>

منصور يسير صوبها يجابلها : انتي حبيتيني . . والله حبيتيني . .ماعرف شصارلج عقب وتغيرتي لكن انتي حبيتيني . . انتي قاومتي الالم الي فيج وتعنيتي تيييني لين المستشفى . . خوفج علي يابج لين باب غرفه المستشفى . .

سلامه بلعت ريجها ونزلت راسها . . .

منصور : لاتفكرين اني بس اتذكر الاشياء الشينه . . انا عشت ذكريات وايد حلوه معاج . . تذكرين؟ تذكرين يوم عذاري تتصدق علينا بمكالمه ؟ يوم اسحب التلفون عنها بس عشان اسمع حسج ؟ يوم اطرشلج مسج واحد بليل . . يوم اخذ فونها وادقلج ع اساس انها هيه بس عشان اسمعج تقولين الو؟ تذكرين شطااانتنا كيف كانت؟ كانت وايد حلوه وربي . . وانا وايد اتذكر الايام الحلوه علشان جي متمسك فيج هالتمسك الكبير . .

سلامه رفعت عينها وطالعته . .

منصور يتنهد : سلامه . . اررجعيلي . .

سلامه تطالعه بعين مذهولة . .

منصور : ارجعيلي دخيلج . . اليوم مهره وعتني . . انا ماقدر احب غيرج اصلا . . عاطي عمري فرصه اني احب غيرج وانساج بس كل هالفتره ما جربت ولا حاولت حتى افكر اني اكلم وحده . . انا صايننج في قلبي وفي عيني وماشوف غير سلامه في حياتي . . ارجعيلي لاني تعيس بدونج قسم بالله تعيس . . ومثل ما قالت مهره مابعيش السعاده ولا بذوقها الا معاج . . لانج الشخص الي انا احبه . .

سلامه : لا منصور لا . .

منصور يطالعها : لا ؟؟؟ ليش لا سلامه لييش . . مافي شي يعترض طريجنا الحين . . الكل رد يحبج ويثق فيج ويبانا نرجع لبعض الكلل ..,

سلامه تطالعه : متاكد الكل . .

منصور يطالعها : منو تقصدين

سلامه : اعرف ان عذاري ما تبغي . .

منصور : شو تبين في عذاري

سلامه : منصور عذاري كانت السبب الاول انه نجتمع . . وانا خيبت ظنها . . كسرتها وخليت اعز اخوانها يتعذب . . " تبتسم " صدقني انا مفتشله منها وايد . .

منصور : . .

سلامه : تاكد . . اني من احس بعذاري رجعت ثقتها فيني وسامحتني بفكر بهالموضوع

منصور :سلامه عذاري ماشايله عليج

سلامه : بلى . . ما بتعلمني فيها انا اعرفها . . بينا عشره عمره واعرفها عدل . . هيه ما تبا تبين انها تكرهني . . ما تبا تبين انها شاله علي .. لكن انا اعرف من داخلها انها كارهتني وماتبيني ."تبتسم " وما انا ما الومها والله ابد . .

منصور :بس سلامه انا احببببببببج

سلامه تطالعه : وانا والله العظيييم احبببك . .

منصور انصب الدم كله فويهه . .

وانتبهت سلامه ان شوق طالعه من الحمام وكانت واقفه ع طرف . .

سلامه : بروح عند شوق . .

وخلته ب حاله الصدمه الي فيه والي ما يعرف يوصفها ابد . .!!!

.

.

.

__DEFINE_LIKE_SHARE__

«ضَحِيًة حِبُيًبُيً ..}● · 04-12-2012, 12:44 PM

السلام عليكم ورحمه الله وبركآإته

تم الانتهاء بحمد الله من 5 بآرتآإت . .
مادري ليش اليوم ايدي عورتني وآآيد

البآرتآإت بكبرهآ آإكششنّ .! ان شآء الله حبيتو هالاكششنآت كلهآ

لاتحرموني آرآئكم وانتقآدآتكم وتوقعآتكم .! اترقبهآ‘ بلهقه . .

عندي لكم خببر . . .
بإذن الله الخميس اليآي . .راح تكون البآرتآت الاخيرة .!
فـ نلتقي على خير ان شاء الله . . .
تيك كيير . . .
__DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
وطت رجلي على دربه ولآأ أدري وش نوى فيني ~	ḎmỒ3 Ảl-Я7eL..	تصاميم الاعضاء	7	04-14-2012 07:32 PM
عندمآ نقۈل لآ آله آلآ آلله مآذآ يرد آلله علينآ }	فراشة الشارجة	الإسلام والشريعة	19	02-27-2012 07:31 PM
لك آلله يآ ردى حظٍ زرع فيني .. [ ثلآث قبور! ]..p!cs +bg	همس العشق	المسنجر وملحقاته , توبيكات , ماسنجر بلس , msn	7	02-13-2011 06:09 PM
عليًڪٍ الْبالَ مشًغًلنٍيْ ..	آلـῳـولعيه	عدسة الاعضاء , كاميرا الاعضاء	7	01-03-2011 07:45 PM
مـآت ورسـول آلله [ صلى آلله عليه وسلم ] رآضٍ عـنه ..	» βỊη άℓ đόόŁα «	الإسلام والشريعة	4	12-23-2008 05:19 AM