أنت واثق ان موترك موتر بر..أنت غلطان..موترك لوري***

محروم.كوم · #1 10-01-2010, 08:10 PM

مساكم الله بالخير جميعاً..
اليوم نبي نتناقش نقاش منطقي بمبدأ العقل..
يعني نبي نقاش حقيقي..
ولكن بما أننا عرب فمن الصعب علينا أن نجتمع على رأي واحد صحيح كان أوخطاء..
فلو أعطينا قطعة ولونها أحمر..فالبعض مننا بيقول هاذي حمراء...
وبيطلع لنا عرب يقولون لاذي برتقالية..
وناس بيقولون لاخضراء..
فالإختلافات فكرة عربية بحته فاهلاً بكل العرب...

المهم
الموضوع اليوم هو(التــرهيمــات)أو (التعــديلات)للسيارة..
بالنسبة لي أشوف أن بعض الزيادات في السيارة تعتبر أخطاء يرتكبها الكثيرون مننا ويصرون على أنها هي الإجراء الصحيحة لصالح السيارة ..
فيه ترهيمات ماني ذاكرها لأن من يعارض فيها ويقول أنها صحيحة فهذا عربي حقيقي يحول الأحمر أخضر حباً للمغالطة لافهماً منه..

فمن هذه الترهيمات الإضافات للمحرك هدر بواجي رياضية اسلاك بواجي رياضية..
تغيير قطعة في قير الامريكي بقطعة لسيارة رياضية لينطلق كالرصاص..
اخواني مثل هذه الترهيمات اوجدت لتستهلك مافي جيبك من الدريهمات..
وتخلي سيارتك الجيب والجمس المرهمة ينطلق بسرعة الرصة..
ويخبط بسرعة الرصاصة..
ويمكن تتسبب في موت راعيها لاسمح الله وبسرعة الرصاصة..!!
والله مدري وش عاجبهم في ذالتغيير ..
لامن وقف راعي المرهمة عند الإشارة تقول بجنبك دردعة بدون شكمان وهي جديدة..
الهم لك الحمد..
فهذه الترهيمات تعجل بعمر السيارة وتنقص قيمتها بشكل كبير وتنقص من عدد زبائنها ولو زعل الكثيرين فهذه هي الحقيقة...!!
*

خلونا نتكلم عن ترهيمات البران...!!
بعض ترهيمات البر أشوف أنها(تدمر السيارة)فأستغرب من إقبال الناس على هذه الترهيمات بالرغم من قلة فائدتها.!!

بعض أصحاب الجيوب اللاند كروزر والباترول إذا شفت موترهم كأنك تشوف لوري..ايه(لوري)...!!
فكفرات السيارة الجيب اللي معه كفرات صنعت لملاك اللواري..!!

وأخينا طاقها على اللأند خير ياخونا وين ناوي تروح للقمر..
وعشان ماتحك كفرات اللوري في رفارف الجيب حطوا له مساعدات لوري..ويايات لوري..
والله يابعض سيارات الشباب لامن شفتها تحسبها السيارة اللي بيرسلونها للقمر..
لامن جاء بيعبي بنزين يحرج البنقالي المسيكين يخليه يروح يجيب كرتون ولا بلكه يرقى فوقهاعشان يطول التانكي حق الجيب اللوري..

أنا مدري كيف يتحملون مطبات جيوبهم اللواري في البر.!
دايم راعي اللوري في البر متمسك في الغمارة فالحالة غير مستقرة في الداخل من كثر المطامر والشيل والحط ..!!

السيارة صنعت وفق قوانين ومعادلات رياضية وفيزيائية..
فأي تحريف في هذه المعادلات يسبب أختلال في أداء السيارة..
فمثلاً تبديل الكفرات والجنوط للأكبر والأعلى فهذا ينعكس المحاور فيزداد الضغط فيها ..فيتسبب في الإحتكاكات في العكوس ورماناتها والكارونا وصولاً للقير وحتى المحرك تطاله هذه التغييرات وتزيد من الجهد عليه وتعجل بأيامه..
وكذلك تركيب اليايات العالية والقاسية تقوم بتفكيك السيارة
وزيادة مطباتها فاليايات تعتبر ماصة للصدمات فعندما يرتطم الكفر أثناء المشي بأشياء صلبة تقوم اليايات القاسية بإيصال الصدمات القوية لكل أجزاء السيارة مما يحدث مشاكل كثيرة تبدأ من الكفر وتعبر للأجزاء الداخلية المتحركة في السيارة كرمان العكس والعكس والرفرنس وبقية الهيكل..
كل سيارة ياياتها ومساعداتها وكفراتها هي الأفضل لها..
والشركة الصانعة هي الأعرف بما يناسب السيارة والسيارة مصنوعة مجهزة للبر..

أما يايات اللواري الإستراية ومساعداتها وكفراتها..
فماهي الا خسائر يعتقد الكثيرين مننا أنها هي الصح..
والشركة اللي صنعت السيارة ماعندها سنع..

تدرون
الله لايحرمنا من هل العرف أثاري عندنا علماء واحنا ياغافل لك الله..

لاوالمشكلة ياكثر شكواهم من جيوبهم اللواري..
مرة موتري يرج وش بلاه ناسي كفرات اللوري..!
ومرة موتري طالع فيه صوت..!
ومرة يقول موتري خبط بدون سبب..!
ومرة يشتكي القير وش جاه..!
ومتناسي إنه متلاعب في معادلات تعبت فيها الشركة لتوصل السيارة للأداءالأفضل..!
والأكثر أماناً له كشخص ولسيارته...
ومصدق هربدة الترهيم..!

الله يصلحهم قولوأ آمين..

في أمان الله..

الروقي
__DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي الانتقال إلى العرض المتطور العرض الشجري