حي الجواب اللي طلوقه طخايخ=من واحدن تقديره بخاطري غمس
من واحدن محسوب ظمن الطنايخ=خلا مشاريس الوحش كنه النمس
مداح ميضاح الصبوغ اللطايخ=يجذب بها الغرنوق ما توحي الهمس
الجير يشدي للجروب المنايخ=كالهرش للقصاب مع سايق الجمس
طير الوحش ما يلتفت للنفايخ=ديقان جيرات التفاريخ قبل امس
ما بالجناح تنال روس المشايخ=ذيك العمايم رحمة الله على الرمس
العلم الاصلي ما يزول بنسايخ=ما يقبل التزييف بالمسح والطمس
يا كيف نقال الوحش قيل بايخ=وهو شعاق النور بالخرمس الدمس
هذي علومن مثل لطم اللزايخ=على الرجايب والحصى ما درا بلمس
ياهل الوحوش الطلح فاق المرايخ=ترا الوحش فاق ابيض الخيشه بخمس
السبق بالمقناص وقت الصرايخ=والصبر يوم الشمس بالقايله حمس
والكفخ الاقشر حزة الجير دايخ=ومتابع الصيده ولا يضربه عمس
مغذاه الارنب ما شبع من فسايخ=في راس عيطا ما ذكر مثله يمس
ما هوب صندوق الضعوف الفرايخ=مخطوط بافرنجي على لوحه قرامس
كم نوبتن بحريتن بالكفايخ=من الشراسه تحسب اللي بها مس
ما ضاع قنديل الوحش بالفلايخ=عقب المسا بالتايهات الخرامس