لله مني لك سلام وتحيه=اريد منها بالجزا عند مولاي
يا كيف ابنسى شلتن شوشليه=لو التقي معهم هوا البال وامناي
عسى لنا في مقبل الوقت جيه=يكون معنا كل غافل ولهّاي
تلايموا ياهل القلوب النقيه=هذا تمام القول واكفاية الراي
والا ترا الدنيا قصيرن مديه=بارادة الخالق ترا قضاك واقضاي
ما تذعن الرغبات في كل نيه=ما تاتي الذكرى على راس نسّاي
عيد الفطر يمضي وجانا الضحيه=واعمارنا تهفي وميعادنا جاي
نخشى يحول القاع من دون فيه=ما يبقى بالصاحب سوى قول روّاي
مير النهايه حفرتن سرمديه=ما تخطي الهارب ولو كان عدّاي

جنيت من بالي كما السكريه=اريدها للي كما غصون دبّاي
داروا على علوق الحشا الصيرميه=قلبانهم تملا من الجمه دلاي
ترا الكريم الذرب ما فيه زيه=ما يدركه غاوي ولو كان قصّاي
الطيب عالي مكسب العارفيه=والصيد ولعه يدرك بكف رمّاي