&* الجــــــــــزء الثـــامن *&


" هــــــــــل أستطيع تسميتها الطــامة الكــبرى ؟؟ لا أعلــم ولكـنها تبدو لي كذلـك !

فــي النهاية وقــع كـل شيء على رأسـي !! أكـــرهــكم جميــعاً .. جميـعاً .. بدون استثناء ..

هــل تسمّون أنفســكم أهل ؟؟ لا .. أنا لـم يكـن لي أهـل سوى أبي .. هل الجميـع هنا عقولـهم متحجرة هـكذا ؟؟ لا أعلــم لأنني لم أعاشــر الكثيرين مـن أهــل هذه البلاد !

لــقد طــردت من البيــت .. تماماً كمــا فعلت بي أمــي .. يا إلــهي لمـاذا أنا منبوذة هـكذا ؟؟ إن كنـت قـد أغضبتـك بأفعالي مع حمــد فإنني أستغفــرك آلاف المــرات .. يا إلـــهي أعفُ عــني .. فإن لــم يكن بك غضبٌ علي فلا أبالــي !..


ابنة الأمريكية الساقــطة .. هذا هو اسمي الجديد في العائلة .. الجميـع صدقوا كـل ما قالتـه شيخه عني .. ولم يأبهوا بأنني أقسمت أنني لـم أفعل شيئاً .. ولم يأبهوا بتوسلاتي إليهم لتصديقي .. كيف سيصدقون ابنة الأمريكية ويكذّبون ابنتهم التي عاشت بينهم طوال حياتها ؟ حتى حمد استسلم لهم ولم يستطع الدفاع عنـي .. لا ألومه فـهم أهله .. !


أنقــل إليــكم كلماتي هــذه من على أرض الحــرية .. أمريكا .. حيث إني أركب سيارة الأجــرة متوجهة إلى آخــر ما أبقاه لـي حمـد .. منزله .. وبما إني سأسكن فيه وحدي فقـد وضع لي بعض الحـرّاس .. "جـــزاه الله خيراً وأبدله عنهم أضعافاً " ..!!!





الله يساعد على فرقا محبيني .. ياللي عليهم بنيت احلام خدّاعه
من عقبهم يا عذابي يا سهر عيني .. أمسيت متولعن والروح ملتاعه



.
.
.


الســـــــــاعه 4:30 العصـــر .. حســب التوقيت المحلــي في كمبريـدج ..



أبوس راسك يا زمن ماعاد فيني للجراح
خلاص كافيني أسى ابوس راسك يا زمن
يامكثر ذنوبك معي ماكل ذنبن لك يباح
ان زعلت وش تستفيد وش مكسبك من ذا الحزن
يالله استسلمي يا عزتي لا صار ايامي سلاح
هو كان نفسي اسعدك بس الليالي طوّلن
انا شعار دنياي الصبر وشعار هالدنيا كفاح
لا قلت يوم وتستوي مرّت سنين وما استون
رغم هذا ما سلمت اسمح ولا القى سماح
كلن يمن بجيته حتى الدمع لا جا يمن
حاولت اداري شمعتي بس المصيبه في الرياح
لاهي ياللي نورت ولا هن ياللي انطفن


كـــنت حاطه هالاغنــيه فالمســجل ومطوّله ع الصوت ومخليتنه يملا البيت كله .. أظني حتى اليران يسمعونه ..


آآآآآآآآآآآخ يا زمــن شو سوّيت فيّه .. ليــش تعشّمنيه بالسعاده وبعدين تاخذها منيه بدون وجه حــق ؟؟


مـــر عليّه اسبوعيــن وانا على هالحــاله .. الا أصيــح وألعــن حظيه .. التعاســه صار لها مكان كبــير في قلبيه وحياتيه .. لكــن اليوم .. قررت انـي ارد أكمــل دراستيه .. باقي لي كورسين وبتخرّج وأكيد مابلقى مشكله لأنيه مابدلت جوازيه الامريكي .. عشت شهر في الامارات وانا بالجواز الامريكي .. يمكن ارد الامارات عقب ما أتخرج عشان اشتغل .. لأنه هنيه نسبة البطاله ارتفعت عقب الازمة الاقتصادية ..



يعت ورحت المــطبخ .. بس ماعــرف أطبــخ !.. لكن لازم أعتمـد على نفسيه .. فجيت الثلاجه .. مافيها غير العصاير والماي والحلاوه .. بندتها وسرت أدوّر في الرفوف والكبتات .. حصلت كيسة شوربه .. يالله شي أحسن من لاشي .. عدلتها وحطيت لها وايــد فلفل أسود لأني ماظن انه طعمها يشجع !!


يلست ع طاولة المطبخ عقب ما حطيتها في طاسه ويبت لي خاشوقه عشان أشرب .. امممممم زيـــنه والله اني طباخه .. هع ..


طالعت المكان .. تذكرت كــل حركه لـ حمد هنيه .. ياليتني ما حبيتك ياليـــت .. انسدت نفسي عن الاكــل .. خليت الشوربه وسرت فوق صوب حجرة حمد .. ماتجرأت أفجها وادخلها من قبـل .. خفت على قلبي لا اييه شي !!


فجيت الباب شوي شوي .. دخلت وبندت الباب ورايه .. طالعت الحجره .. ماتختلف وايد عن الحجره اللي أنا ارقد فيها .. بس الفراش مال الشبريه ماكان مرتب .. اكيد كان راقد فيه ومارتّبه .. كان شي ثياب مفرورات ع الكرسي .. هاذيلا اللي كان لابسنهن أول مره شفته فيها .. أكيد عقب مابدلهن فرهن هنيه ونسا يشلهن .. شليتهن و ضميتهن بقو .. بدت دموعيه اطّيــح بدون لا أحــس .. وتحولت هالدموع لـ صياح قوي .. كل ذكرى تمر عليّه تخليني أشهق .. مابا من الدنيا غيرك يا حمد بس ليـــش افترقنا ليـــش ؟ ليــش قدرنا قـاسي جذيــه ؟؟ ياليتني ماعرفتك ولا شفتك ولا حبيتك .. ياليتني لين الحين عايشه ويا اميه وامراضها أهون عليّه من فراقك !!



ماتقبلت الفراق وما لـ يدّي فيه حيله
آهـ لو أن الظروف المقبله تكشف قدرها
لو يعرف الشخص منا وش مع الغيب بيجيله
كان جنبنا المشاكل من قبل يوقع ضررها !!


قمت وانا بعدني لاويه ع الثياب اللي مب ناويه افج عنهن اليوم .. ويلست ع الكمبيوتر اللي حصلته هناك .. شغلته .. كنت أدور أي شي عن حمد .. بما اني كنت ادق له طول هالاسبوعين بس كله مغلق .. فجيت المسن .. سرت عند السهم اللي يكون عند وين يكتبون الايميل .. يمكن يكون ايميله مسيّف .. وبالفعل حصلت ايميل واحد .. انشالله يكون ماله .. فجيت ايميليه وضفته عنديه .. واتريا قبول الاضافه عل وعسى يسعفنيه حظي العاثر هالمره .. !!


حصلت أمــل يديد أتعلق به .. انشالله ما يخيب أمليه هالمــره .. قبضت التيلفون وييت بدق حق حمد .. بس وقفنيه جرس الباب .. خليت الكمبيوتر شغّال ونزلت تحت .. فجيت الباب .. كانت جودي ربيعتيه .. ماعرف كيف دلّت مكانيه .. لكني يوم شفتها لويــــت عليــها .. أستانست وايد الصراحه يوم شفتها ..

جودي: where the hell have you been in the last month? I looked for you every where.. then someone told me that you are here ..

حموده: who told you ?

جودي: a tall guy I think he's about 35 he doesn't speeks english well I think he's from your country ..

* الترجمــه ..

جودي: وين كنتي الشهر اللي طاف ؟ دورتج فـ كل مكان وبعدين يا واحد وخبرني انج هنيه ..

حموده: منو خبرج ؟؟

جودي: ريال طويل أظني عمره 35 ما يتكلم انجليزي عدل أظن انه من بـلادج ..


انصـــدمـت يوم سعمت كلامها .. معقوووله يكون خــالد ؟؟؟


>باقي الحوار بخليه بالعربي مافيّه اكتب انجلش واترجم <

جودي: انزين انتي شو استوالج .. وين رحتي سمعت انه امج انتحرت ..

خبرتها اللي صار بـ ختصار وبدون تفاصيــل ..

جودي:.. oh my god .. كل هذا استوالج وانا مادري ؟؟ انزين مب ناويه ترجعين الجامعه ..

حموده: اكيـد برجع .. بس على بداية الكورس مب الحين ..

جودي: أهــا .. انزين تعالي نطلع .. أحسن من جو البيت الكئيب .. شلي وياج فلوس .. الليله البنات عندهن حفله وبنروح ناخذ لج لبــس ونعدلج ..

حموده: أوكيـــــه ..

عيبتنيه سالفة الحفــله كنت أحضر وايد حفلات قبــل .. وهاذيلا عاد حفلاتهن غيــر شكل .. بس لاتخافون الحفله للبنات بــس مايدخلونها شبــاب ..


طلعــنا أنا و جودي .. بخبركم عن جودي .. بنت طويله وشقرا أحلى مافيها شعرها الاشقر .. كنت أشبهها بـ "ريز ويذرسبون" في فلم "legally blond " جان تعرفونها .. هي مثلها شقرا وتدرس محاماه !! تعرفت عليها يوم كنّا فالهاي سكول .. كنا انا وياها "منبوذات" فالمدرسه .. طبعاً انا تعرفون ليش منبوذه لأني متحجبه .. اما هي لأنها كــانت وايد شاطره ودبه شوي .. لكنها غدت رشيقه من دخلت الجامعه ..


توجهنا صوب "المول" .. خطّفنا ع المحلات .. خذت لي فستان أحمـر قصيـر .. ونعال حمرا كعبها عالي .. و جودي خذت لها فستان أبيض ونعال فضيّه .. وخذنا اكسسوارات وهدية حق ربيعتنا" آندي" لأنه عيد ميلادها .. وسرنا صوب بيت "آندي" .. قبل اسبوعين كنت ويا الريم وسلامه وشيخه واليوم ويا آندي وجودي والله حـــاله .. بس انا تقريباً بديت أتعود انه كل شي في حياتيه يتغيّر فجأه .. وصلنا بيت آندي اللي هي ابوها "رجل أعمال" وبيــتهم عود .. كنا دوووم نسوي حفلاتنا هنيه .. وأحلى شي كان عيد ميلاديه الـ 18 كان خبااااااااااال .. حطيت حق البنات اغنية راشد الماجد وتمن يرقصن عليها هيب هوب !!!


وصلنا البيت .. حصلنا البنات متجمعات .. "سوزان" اللبنانيه .. و "فيليشيا" اللي من بورتوريكو .. أظني سمعتوا بهالمكان فالافــلام .. واذا ماتعرفونها هي جزيره عدال المكسيك .. و"كرستينا" اللي عاشت طول عمرها في بريطانيا وما يت هنيه الا من سنتيــن .. أكثر شي يعيبني فيها her accent قصدي لهجتها .. أوه جلبت الموجه عنديه .. هع .. وآآآخــر وحده "ميسي" هــاي ملــكة الهيب هوب وبجدااااره ..


كــل وحده لبســت فستانها وتمكيجت وتعدلت .. ويــن كمن بنت ثانيات ..


كـــــــانت الحفله خباااال .. البنات رقصن رقـــص من الخــاطر .. وانا شاركتهن لكني ماعرف ارقص كثرهن .. بس ميسي سكتتهن بالهيب هوب .. قلتلها تشترك في so you think you can dance بس ماطاعت الشور .. وخلاف يوم تعبن وكل وحده انسدحت في بقعه .. حطن اغنية هاديه شوي .. كانت أغنية Almost here .. هالاغنيه كانت مثل ضربه فالصميم حقيه ..

قمت عن البنات و دخلت داخل الحجره اللي كنا نتعدل فيها .. صحت كل اللي جادت به عيونيه من الدموع وكلهن متيمعات عليّه يهدنّيه .. وخلاف لويت على سوزان اللي كانت اقرب وحده وقلتلها بالعربي ..

حموده: أبــا أروح البيت دخيــلج ما أقدر استحمل أنا تعبانه ..

سوزان: أوكي رح آخدك لـ بيتك هلأ بس انتي ما تبكي .. عم تأطعي لي ألبي ..

كرستينا وبلهجتها البريطانيه : whot (what) did she say ?

سوزان: she's tired I'm gonna drive her home

جودي: oh I'm so stupid .. that song reminded her about what happened to her .. how didn't I notice that ?

فيليشيا: what happened to her ?

جودي: I'll tell you later .. now I'm gonna durive her home because Suzan doesn't know where is the house .. it's far from here ..

ودعت جودي البنات وطلعنا من بيت آندي وتوجهنا صوب بيتيه .. او بيت حمد بالاحرى .. وانا حتى ماعقيت الفستان ولا حطيت شي على راسيه .. وصلنا عند البيت .. دخــلنا وانسدحت انا على أقرب كرسي .. ورّت جودي الضو ويلست عداليه وحطت راسيه على ريولها وتمت تمسح على راسيه .. ومادريت بعمري الا وأنا راقــده ..



بالبـــــــــــاجـــر .. كان الثلج ينزل بغزاره .. شفت هالشي أول ما وايقت من دريشة الصاله اللي رقدت فيها البارحه على ريول جودي .. وعتنيه من الرقاد وروّحت عقب ماتريقنا مع بعض .. وماكلت انا غير لقمتين ..


رديت وحيده مره ثانيه .. تذكــرت شــي .. الكمبيووتر .. انا مخليتنه شغّال من البارحه .. ربعت سيده صوب حجرة حمد .. حصلت الكمبيوتر مسوي ستاندباي حق عمره .. شغلته وجيّكت ع المسن .. كالعاده خاب ظنيه .. ماقبل الاضافه .. انسدحت على شبريته .. وتلحفت ورقدت بهدووووووء وبدون كوابيس .. يمكن لأنه هالشبريه فيها من ريحة حمد !


قـــــمت وانا أحس بـ ويع راس فظـــــــيع .. طالعت الساعة اللي ع اليدار .. نقزت من مكاني يوم شفتها 8 فلّيــل .. طالعت من الدريشه .. تأكدت انه فعلاً فلّيل ..


ربعت صوب الكمبيوتر بس للأسف الشديد ماحصلت شي .. ياربي بطنيه يعورنيه آآآآآآآآآآآآآخ .. ماينلام .. من يومين مب ماكله شي يرزا .. الا لقمتين ع الريوق .. نزلت تحت وانا ادري انه المطبخ مافيه شي .. لبست شيلتيه وجاكيتيه .. طلبت تكسي ويانيه عقب عشر دقايق .. توجهت صوب السبرماركت عشان اشتري للمطبخ ..


فالسبرماركت ..

ماخليت نوع خضره ماخذته مجمده وطازجه بما انه كل اكلي هنيه نباتي لأنه ماعندهم ذبح حلال .. من سنين وانا عايشه جذيه والكل يتحسبنيه نباتيه .. خطفت صوب الحلويات وماخليت نوع حلاوه ماخذته هذا من غير العصاير والمعلبات بأنواعها والخبر والصمون .. امره مزرتها العربانه .. سرت صوب الكاونتر ودفعت وظهرت بمليون كيـــس !!


وقفت ع الشارع أدوّر لي تكسي .. عقب فتره طويله وقف لي واحد لكنه كان فيه ريّال .. ماعليه شي أحسن من لاشي .. ركبت وحطيت قراطيسيه فالدبه .. وركبت عدال هالريال اللي ماعرفه من وين ضاوي .. خبرت راعي التكسي بـ مكان البيت وتميت اطالع من الدريشه .. تفاجأت بصوت الريال اللي عداليه ..

......: أفــا ماعرفتيني ؟؟؟

طالعت صوبه .. منو هذا اللي ماعرفته ؟؟؟

شهقــت وقلت: سيـــــــــــــــف !!!!!!!!!!

طبعاً هــذا كان سيف واحد من زملائيه فالجامعه بس هو كان مقرّّب أكثر منهم لا يروح فكركم لبعيد كنا "فريندز" بس .. لكنه انقطع فتره عن الدراسه .. تقريباً من سنه ماشفــته ..هو من الامارات .. هذا أحسن شي فيه ..

سيف: هيه سيـــف زين يوم تذكرتي .. يالعيوووز ..

حموده: ويــــنك انته والله اني تحريت شي استوا فيــك !!!!

سيف: انزين دقي اسألي .. عنبووو أمره ما تخبّرين عن بو هناد ؟؟؟

حموده: والله انه اروحيه صارت لي ظروووووف سرت الامارات شهر ورديت ..

سيف: وانا أقووووول منو اللي شفتها ذاك اليوم فالعين مووول .. ثرج انتي ..

حموده: متى ؟؟

سيف: قبل شهر تقريباً .. أظني كانن فياج حرمتيــن صح ؟؟

حموده: خيـــبه هيه صح .. انزين شقايل انا ماشفتك ..

سيف: مادري يمكن ما انتبهتي .. بس الصراحه شكـــلج كان عذااااب بالعباه ظاهره مواطنه صدق ..

حموده: جــب مسود الويه ..

تم راعي التكسي يطالعنا ويسمع هاللغه الغريبه اللي نرمس بها ..

سيف: خبرينيه بالتفصيـــل شو استوالج مابفج عنج لين تخبرينيه ..

حموده: اللي استواليه يشيّب ماظني تبا تعرفه ..

سيف: ومن متى انتي تخشّين شي عليّه ؟؟ كان كل شي مكشوف امبينا ..

حموده: سيف انا تونيه بديت أنسى فلا تذكرنيه هذا جرح ويباله وقت لين يبرى ..

سيف: أووووه شكلها السالفه جايده .. خلاص متى مابغيتي انا موجود ..

حموده: أوكيه .. انته وين ساير ..

سيف: صوب البيت .. تصدقين اكتشفت شي ..

حموده: شو ؟؟؟

سيف: تذكرين يوم قلت لج اني معجب فيج قبل لا أسافر ؟؟

ياربي شو ياب هالسالفه الحين ؟؟ أنا نسيتها من أساسها !!!

حموده: هيه ..

سيف: كنت غلطان .. يمكن لأني ظنيت اني مابشوفج مره ثانيه قلت هالكلام .. بس انا وانتي مب أكثر عن أخوان صح ؟؟؟

حموده: صـــح .. تبا الصدق ريحتنيه ..

وقف التكسي عند البيت وييت بنزل بس سيف قال بصدمه ..

سيف: هذا بيـــتج ؟؟؟؟

حموده:هيه

سيف: وبيتج القديم ؟؟

حموده: صارت ظروف وييت هنيه ..

نزلت من التكسي .. كانت صدفه حلوه اني شفت سيف اليوم .. تذكرت أيام الخبال يوم كنا انا وهو نشل الجامعه على روسنا من زود الخبال اللي فينا .. ما سألته عن أخباره ؟ ماعرفت شو سبب غيبته الطويــله يووووه والله اني خبله تميت ارمسه عن عمريه وماتخبرته عن عمره ..

هبطت البيت بقراطيسيه .. بس يوم شافونيه الحراس ساعدونيه فيهن وشلوهن داخل ..

أول ماييت رقيت فوق صوب حجرة حمد .. هالكمبيوتر دوم يحبطنيه خاطريه مره ايي وأحصل حمد قبل الاضافه .. انشالله ياربي هالمره مايخيب أمليه .. ياااااارب ..


تقربت من شاشة الكمبيوتر .. اووووووف كـــالعاده ماشي فايده شكليه لازم اتريا.. نزلت تحت صوب المطبخ .. سويت ليه سندويج وشليت عصير وقرطاسه الجبس العووده اللي خذتها وتفيزرت جدام التلفزون .. من زمان ماطالعته .. تميت ابدل بين القنوات .. ماشي يتشاهد .. المشكله انه مب دش بس كيبل .. آخــر شي حصلت قناه حاطه فلم step up 2 the steerts وايد يعبنيه هالفلم .. تميت اطالعه واندمجت فيه .. يوم خلّص كانت الساعه 1:14 .. تميت أجلب القنوات .. ماحصلت شي يتشاهد .. بندت التلفزون ورقيت فوق صوب حجرتيه مب حجرة حمد .. تسبحت ولبست لي بجامه وربطت شعريه .. طالعت الساعه كانت 1:50 توجهت صوب حجرة حمد ويلست ع الكمبيوتر .. عشان أسلي عمريه دشيت يوتيوب وفيس بوك .. و ع الساعه 4:30 صلّيت الفير ورقدت ..



مــــــــــــــرت الايام .. واليوم بداية دواميه فالجامعه .. الله يعين ..


وعيت الساعه 6 الصبــح .. فجيت الدريشه عشان أشوف الجو .. كان الجو دافي شوي اليوم .. والشمس مرتفعه في نص السما .. لا شكله هاليوم حلـو .. تسبحت ولبست بدي اسود ايديه طوال وجنز غامج .. وجاكيتيه الابيض الطويل بس خليته مفتوح ماعقمته .. شليت شنطة اللابتوب اللي كنت فارتنه في حجرتيه ونسيت وجوده أصلاً والكتب اللي البارحه جلبت المكان وانا ادورهن .. طلعت من البيت وحصلت سيارة واقفه جدام البيت .. نزل اللي فيها الدريشه وكان سيف ابتسمت وسرت صوبه ..

حموده: صباح الخير ..

سيف: صباح النور .. يالله ركبي عن نتأخر ..

حموده: بتوصلنيه ؟؟

سيف: عيل بالله عليج انا ليش متفيزر هنيه من الصبح ؟؟ يالله ركبي ..

حموده: انزيـن ..

وركبت عنده جدام ..

سيف: بعدج ماتبين تخبرينيه شو استوا لج ؟؟

حموده: هذا شي ماروم اقولك اياه ..

سيف: ليش شو صار ؟؟؟

حموده: قلت لك ماروم اقولك ..

سيف: تغيرتي وايد يا حموده ..من متى في شي ماترومين تقوليليه اياه ؟؟

حموده: لا بس هذا شي وايد خاص لو كنت انته بنت كنت قلت لك .. لكني ماقدر اقولك اخاف اطيح من عينك..!!!!

سيف: ماطحتي من عينيه يوم نحن نطلع ونظهر ويا بعض لاحسيب ولارقيب الحين من بطيحين من عينيه ويا ولد عمج ؟؟ ماتحيدين يوم كنا كل يوم في بقعه انا وانتي ؟؟ كنا نوصل نيويورك وامج ماتدري !!

حموده: كانت ايام حلوه ..


تنهدت وسكت.. تبون تعرفون شو اللي كنا نسويه انا وسيف ؟؟؟ كنا دوم نطلع ويا بعض ونسوي مشاكل وسيف مايخلي حد مايتضارب وياه .. وفالجامعه الكل كان يعرفنا سيف وحمده أو هانا على قولتهم الاثنينه اللي مايفترقون عن بعض .. الكل كان يتحسبنا نحب بعض بس علاقتنا كانت اخويه حتى انه هالشخص ماقد مره مسك ايديه .. اذكر مره شردنا صوب نيويورك .. كانت ذيج الشرده خباااااال .. اللي يشوف سيف يقول هذا صدق امريكي .. اما انا بعد كنت بس رابطه قطعة صغيره فوق راسيه ولابستلكم ذاك التي شيرت والجنز وشكلنا انا وسيف امره امريكيين واللهجه بعد كانت تساعد .. ماخلا عصابه ماتضارب وياها .. تحوطنا ذاك اليوم في نيويورك وسوينا من المشاكل اللي يكفينا ..كنا انا وياه عصابه .. الله يرحم ذيج الايام ..لكنه خلاف سافر رد الامارات وتم هناك سنه وماعرف شو استواله .. والحين رد فجاه عقب مانسيته من كثر الاشياء اللي استوت فيّه !!!!


سيف: شياج سكتي ؟؟

حموده: لا ماشي .. بس اتذكر ايام قبل .. كنا صدق عصابه ..

سيف: شرايج نسوي آخــر ضرابه لنا قبل لاتردين الامارات ؟؟

حموده: الا على طاري الامارات .. انته ليش تميت سنه هناك ؟؟

تنهد سيف عقب قال : ابويه توفى ..

حموده: شووه ؟؟ (سكت وعقب قلت : الله يرحمــه .. وشعنه ماتخبرنيه ؟؟ مب نحن ربــع واخوان على قولتك يا سيف ؟؟

سيف: والله انشغلت ظروفيه ماكانت سهله .. ترييت بطي اخويه لين اشتغل وخلاف قدرت ارد هنيه .. الا انتي وين امج ؟؟

حموده: انتحـــرت !!!!

سيف: شوووووه؟؟ حلفي انتي بس ..

حموده: والله العظيم .. بخبرك السالفه خلاف .. والله محتايه افضفض حق حد يفهمنيه وماظني بحصل حد يفهمنيه كثرك ..

سيف: افا عليج ..

وصلنا فهاللحظه الجامعه .. توجهنا صوب المبنى اللي فيه محاضراتنا .. يوم وصلنا عند الكافتيريا كلهم تموا يطالعونا مستغربين وخلاف تموا يصفقون ويصفرون .. ردينا الثنائي المرح مره ثانيه !!!


شفت جودي وآندي وسوزان وباقي الشله وسلمت عليهن بس خليتهن وسرت يلست عند سيف ..

حموده: المحاظره عقب ساعه .. يالله بخبرك سالفتيه ..

سيف: يالله مابغيتي ..bring it on I'm hearing ..

خبرتـــه بكــل شي استوا مع اقتطاع بعض الاجزاء المحرجه مثل رقدتيه على جتف حمد !

سيف: خيبه بنت عمتج وتسوي فيج جذيه ؟؟؟؟

حموده: الله يقطعها ويقطع يومن عرفتها فيه ..

سيف: انزين اهلج شقايل يسوون فيج جذيه ؟؟ صدق انهم مافيهم رحمه ..

حموده: الله يسامحهم لابد في يوم من الايام يعرفون انهم ظلمونيه ..

سيف: عيل دامنها عايلتج جذيه لازم مايعرفون عنيه ..

حموده: أكيــــــــد ولا هالمره بيقصبونيه بدال ما يطردونيه ..

سيف: والله لو انج اختيه صدق كنت دافعت عنج ولا خليت حد يسوي فيج شي ..

حموده: شرايك اقولهم انه انته اخويه من اميه ؟؟؟ حلوه صــح ؟؟

سيف: هههه شرايج صدق نسويها .. ؟؟. حرام ربعتنا تروح بلاش !!

حموده: لاوالله ؟؟ وشو اسميك بالله ..؟؟ سوفي ولا سيفان ؟؟

سيف: لا لحــظه خليني بدور اسم ........ سميني شووون .. هههه

حموده: امحـــق .. دخيلك اسكت .. وين الشبه بالله عليك بيقولون هذا واحد لاقطتنه من الشارع ويايه تقولين انه اخوج ..

سيف: صدقج .. الا اقولج شكلها بدت المحاظره يالله قمنا ..

حموده: يالله ..

وقمنا صوب قاعة المحاظرات .. خطفنا ثلاث محاظرات ورا بعض بدون بريك .. عقب المحاظره الرابعه أخيراً يانا البريــك .. يلسنا فالكافتيريا ونحن روسنا دايخه من كثر هالمحاظرات ..

خذنا لنا اكل وتمينا ناكــل .. وفجأه صاح تيلفونيه .. أول ماطالعت الرقــم شرقت بالاكــل وتميت اكــح ..

سيف: شفيــج ؟؟

حموده: هذا رقم عمتيه ..!!!


&* الجــــزء التــاســـع *&


سيف: شفيــج ؟؟

حموده: هذا رقم عمتيه ..!!!

سيف: شووووه ؟؟

حموده: ارد ولا لا ؟؟

سيف: ردي واذا قالت لج شي عطينيه اياها بأدبها ..

حموده: هههههه بصفتك شو ؟؟

سيف: أخوووج ..

حموده :اقول استريح لا تخرب سمعتيه عندهم اكثر ماهي مختربه .. !

رديت ..

حموده: ألوه ..

عليا: حموده ؟؟

حموده: هيه عمتيه شحالج ؟؟

وعاد بدت عمتيه تصيــح ..

حموده: شفيج عموه بسم الله عليــج ..

عليا: شويخ خبرتنيه بكل شي سامحينيه يا بنتيه سامحينيه .. نحن غلطنا في حقج وايــد وظلمنااااج ماظني الله بيسامحنا عاللي سويناه فيج ..

حموده: يعني عرفتوا الحقيقه ..

عليا: هيه شويخ خبرتنيه بـكل شي .. لكني مارمت اخبر باقي العايله اخافهم يذبحونها ولا يسوون فيها شي .. سامحينيه يا بنتيه دخيلج ..

حموده: فديتـــج يا عموه انتي لاتصيحين خلاص والله مسامحتنج انتي مالج ذنب شويخ هي اللي يابت كل الرمسه من عندها وانا مالومكم يوم صدقتوها فالنهايه هي بنتكم ..

عليا: وانتي بعد بنتنا .. والله انه كنا غلطانين يوم ماصدقناج بس لأنه امج اجنبيه وعشتي برا .. بس يشهد ربيه انه غلاتج تفوق غلاة شويخ انتي بنت اخويه يا حمده ..

خنقتنيه العبره وسكت قبل لا اصيح ونفتحها مناحه انا وعمتيه ..

عليا: دخيلج يابنتيه زقرينيه اميه .. ماباج تزقرينيه عموه ..

قلت بغصه : انشالله ...... اميه ..

عليا: يعلنيه فداج يا بنتيه متى بتردين البلاد ؟؟

حموده: انا بكمل دراستيه وانشالله عقب شهرين برد ..

عليا: عاد فديتج لاتقطعينيه ..

حمووده: افا عليج يا عــ .... يا اميه وانا منو لي غيرج ؟؟ يالله عاد ببند مابصرف عليج ..

عليا: يفدنج الفلوس وراعيتهن اهم شي انج انتي ماتكونين زعلانه عليّه ..

حموده: والله هب زعلانه عليج يا عمتيه انتوا تبقون اهليه مهما سويتوا فيّه ..

عليا: والله انه حمد مابيحصل اخير عنج .. ياليته ياخذج بــس .. ماعليه بسير ارمسه ..

سكت انا ..

عليا: يالله عاد عن المستحى أدريبه حمد يباج وانتي تبينه .. والله يا اسير له بوظبي وبرمسه تراه هو ساكن هناك الحين .. الا اقول انتي وين الحين ؟؟ اسمع حشره عندج ..

حموده: انا فالجامعه ..

عليا :هيه عيل برايج فداعة الله ..

حموده: الله يخليج لي يا عمتيه فداعة الله ..

وبندت عن عمتيه ..

حموده: والله انك انته ويهك خير عليّه ياخي كل ما اشوفك يستويليه شي زين !!

سيف: شو استوا ها عسى عمتج عرفت الصدق ..

حموده: هيه بنتها خبرتها بس مارامت تخبر باقي العايله تخافهم يسوون فالبنت شي ..

سيف: هيه والله اللي سوته مب شوي .. يالله منو قدج الحين عمتج ورضت عليج .. شو تبين بعد ..

حموده: الحمدلله يا ربي .. والله انك ياسيف فال خير عليّه .. من روحت عنيه ما استوى فيّه خير ..

سيف: لا تقولين جذيه كل شي مقدّر ومكتوب من عند الله ..

حموده: الحمدلله الحمدلله يارب .. الا اقول سيف .. انته مب ناوي تعرس ؟؟ ما حبّيت ؟؟ ما خطبت ؟؟ تراك شوّبت الحين عمرك 27 وماعرست ..!!!

سيف: انا شوّبت .. ؟؟؟؟؟ انا يبوج مكنسل هالشي اللي اسمه حب من حياتيه .. احسه ماله لزمه وماوراه غير الشقى ..

حموده: في هاي انته صادق .. والله انك مريّح عمرك ..

تم سيف يغني : مستريح البال لاقيلن وقال .. شاري الراحه ومالي بالهموم .. الهوا ياناس لو هو بالعدال .. لو صفالك يوم ماظنه يدوم ..


اجتعوا كمن واحد من الطلاب العرب اللي كانوا يدرسون هناك خاصةً انه صوت سيف حلو .. وتموا يدقون ع الطاولات .. ويرددون وراه الاغنيه ..


سيف : من يذوق الحب عرف طعم الليال .. يشتكي منه ولا يقدر يلوم .. والعمر لاراح مايرجع محال .. لا ولا يرجع حتى فالحلوم .. انا قلبي مايبي هم وسؤال .. مايبي بايع ولا شاري يسوم .. خلني مرتاح يا ولد الحلال .. عاشق الراحه عساها لي تدوم ..

وخلاف تموا يصفقوله ..

عقب عشر دقايق قمنا لنه ورانا محاظرتين .. وعقب ماخلصنا وصلنيه سيف البيت ..

فالبيــت ..

أول ماوصلت سرت وتسحبت وبدلت ثيابيه ورقـــــدت ..

وعيت على رنة تيلفونيه .. طالعت الساعه كانت 7 فلّيــل ..

رديت بدون ما اطالع الرقــم ..

حموده: ألووه ..

سيف: هــلا ..

حموده: شعندك داق الحين ..

سيف: بسم الله شفيــج عليّه ؟؟؟

حموده: والله انك متفيج ياخي ..

سيف: تعالي ان ماييتي بتفوتج احلى سهره الليله .. ربايعج عازمات هاذيلاك الشباب اللي كانوا يدقون ع الطاوله يوم كنت اغني .. العزيمه عقب نص ساعه بتكون في هذاك المطعم اللي صوب المول اكشخي وتعدلي بخطف عليج يالله باااااي ..


طبعاً انا اكيد بسير مابا هالليله تفوتنيه .. الليله بيستوي الخبال ع أصوووول .. بما انه السالفه فيها مطعم .. لازم نكشخ شوي .. لبست فستان عيناوي لين تحت الركبه .. ولبست بوت طويــــل عشان يستّر ريوليه .. ولست جاكيت قصير بس عشان يغطي على ايديّه .. وشيلتيه طبعاً ما أنساها .. كحلت عويناتي وشوي قلوس وبلشر .. ونزلت تحت .. طالعت شكليه فالمنظره .. كــان شكليه أوكيه .. سمعت الهرن .. وطلعت بسررعه ..وركبت عند سيف ..


سيف: عاد قلنا كشخي بس مب جذيه بتغطّين عليهن كلــهن ..!!!

حموده: احم ثانكس ..

تم سيف فتره يطالعنيه ..

حموده: شو اطالع ؟؟ صد مناك ولا ترانيه بنــزل !! لا اتم اطالع جذيه ..

سيف: انشالله ..

وحّرك السياره وانا بعدنيه مستغربه من تصرفه ..

وصلنا عند المطعم اللي كانوا يبون يسوون فيه العزيمه .. كان مطعم عووود .. حصلناهم يالسيــن على طاوله عوده وطويـــله في كبينه خاصه .. والله انهن داهيه هالبنات ..


دخلنا وسلمنا ع الكل ويلسنا .. بخبركم بالموجودين .. جودي وآندي وكرستينا وسوزان وفيليشيا وميسي .. يعني الشله الفاسده .. ومن الشباب كانوا سعود وتركي من السعوديه و فوّاز من الكويت ويحيى اردني و هشام مصري .. كان شي واحد اماراتي اسمه حمدان ..

سألنيه حمدان باستغراب: انتي اماراتيه ؟؟

حموده: انا ابويه اماراتي بس اميه امريكيه .. وعشت عندها هنيه ..

حمدان: اها يعني عندج جواز الامارات ولا امريكا ؟؟

حموده: لا أمريكا ..

حمدان: انزين شو نزقرج يعني ؟؟ حمده و لا هانا ؟؟

حموده: ع كيفك اللي يريحك ..

حمدان: حمده احسن .. بما اني من زمان ماسرت الامارات هع ..

وخلاف تمينا نسولف ويابوا الاكل وكلنا .. وحمدان هذا كان متعلق في كرستينا عيبته وهي الصراحه كانت احلى وحده في الشله .. وخلاف قالت كرستينا ..

كرستينا : oh dany you are so cute ..

حمدان: ياويلي رحت مـــلح ..

تيمنا نحن اللي فهمنا شو قال نضحك ..

تركي: من قدك ياخي ..

حمدان: هــذا اهــداااء لعيووونج الخضــر ..

وتم حمدان يغني ..


أنــا مسلم لكن انته ويش دينك .. انته لك دينك وانا لي غير دين
كان زينك ماكفاني شر شينك .. انا ويني وانته قلي وين وين
بسمتك ومقوّسك ورموش عينك .. تجتمع فيهن صفات الابيضين
مدمعك و مكحلك خلي رهينك .. كيف انا بقدر على رمشن وعين
مشيتك وامّيلك ومعزلينك .. فيهن الموت الحمر للعاشقين
لفتتك بمعنقك تمام زينك .. فيك زينن ماخلق شرواه زين
تبتسم غمازتيك لوجنتينك .. تبتسم دنياي لي في كل حين
لي بغيت اجنبك مشيت لينك .. لا شعورياً ولكن عن يقين
وانا في يدينك من يسار ليمينك .. وانته في قلبي وفي عيني اليمين


تيمنا نصفق له حتى البنات صفقن له مع انهن ماعرفن شو قال .. خلاف ترجمنا لهن شو قال .. تقريباً يعني نحن مانروم نوضح كل كلمات الاغنيه !!

تشققت كرستينا يوم درت انه يغني فيها .. عاد من عقب اغنية حمدان تم كل واحد يهدي حق وحده اغنيه .. وعاد انا منو اهداليه ؟؟ سيــف ..


كــذبت وقلت ما احبك .. عشان ابعدك عن دنياي ..
ولا بي اوقف بدربك .. ولابي اظلمك وياي ..

سمعت وقالوا ان الحب .. يعذب حيل مايرحم ..
وانا والله مالي قلب .. أحب وبعدها أندم ..

كــذبت وقلت ما احبك .. عشان ابعدك عن دنياي ..
ولا بي اوقف بدربك .. ولابي اظلمك وياي ..


سكت انا وتميت اطالعه .. معقوله يعني سيف يحبنيه .. ؟؟؟؟؟

قطع عليّه صوت تيلفونيه كان رقـم من أمريكا بس ماعرفته رقم منو .. المهم رديت ..

حموده: ألووه ..

...: هلا .. حمده ؟؟

حموده: هيه .. منو انته ؟

خالد : أنا خــالد ..

قلت بصوت عالي : خـــالد ؟؟؟؟؟؟؟؟؟

كلهم التفتوا صوبيه .. خاصةً سيف اللي تم يطالعنيه بفضول ..

خالد: هيه انا خالد .. بغيت اخبرج بـ شي .. بــس خايف عليــج ..

حموده: شووه قووول ..

خالد : حمــــد ..

حموده: شو فيــه حمد ؟؟؟؟؟

هنيه سيف توسّعت عيونه وهو يطالعنيه ..

خـــالد : ســوّا حــادث !!!

حموده: شووووووووووووووووووووه ؟؟؟ حمد سوّا حادث ..؟؟ متى ووين وين انته الحين بيي صوبك ..

ووقفت وحالتيه حاله .. ماظني تم ليه عقل عقب اللي سمعته ..

خالد: حمده .... حمد عطاج عــمره .. !!!!

حموده: شووووووووووووووووووووووووووووووووووووووووووووووووو ووووووه ؟؟؟؟؟؟؟

انهارت قوايه كــلها .. وطـــحت .. و ماعرف شو استوا عقــــب ..


.
.
.




" هــا أنــا ذا أواجــه سخرية الـقدر مرة أخـــرى .. لقــد توفي حمــد ..!!!! وتوفي قلبي معه .. لمــاذا أحــس بالألم إلى هــذه الدرجة ؟؟ لماذا أحس بأنني أتمزق من الداخــل .. لقــد بلـغ مني الحــزن والأســى مبلغاً .. ولــم أعد أستطيع احتمــال أي شي .. لمــاذا يلعب بي القــدر هذه اللعبة الدنيئة ؟؟ لمــاذا ؟؟

لــم اعد اعــرف ماذا سأخـط من الكلمات بعد وفاتــه فأعذرونــي .. لأن قلمـي نفسـه أصيب بصدمة وأصبح عاجزاً عن الكتـابه .. "


لواعرف الجاي ماغامرت بأحلامي!!
ولازرعت الاماني فأرض منسيه
والبرد لو هو يحس بشرهة عظامي
ماكان يجرح ضلوعي كل فجريه!!
ياغايب!! الجرح بعدك صار مترامي
وانااتحرى رجوعك كل عصريه!!
هذي تعاليل جرحي..النازف..الدامي
تعاااال ليل الجريح ونزفه شويه؟
كل ماذكرتك احس بشي ف اكمامي
والقاه دمع يغني لك وداعيه !!
من قو صدمة غيابك قلت لإلهامي
مابقى الا اسوي فيك مرثيه
والحين قلي: من اللي يجمع حطامي؟
وانا فغيابك تحطم كل مافيه
مايكفي ان جرح بعدك صار مترامي؟
ماتكفي دموع عيني كل عصريه!!
مايكفي إني ماعاد احس بأعوامي؟
لان عمري رحل مثلك بلا جيه!!
والحين لازم تموت احلامي مادامي
زرعت ذيك الاماني ف ارض منسيه !!




" لم أعد أعرف ماهي فائدة هــذه الدنيـا !! والشيء الذي اكتشفته "حديثاً" أنه ليس بها من فائدة .. انها فقط كــتلة من المصائب والأحــزان .. إنهــا أختبار من رب العالميــن .. لقد كــنت غافلةً عــن كــل هـذا ! .. كنت أجري وألهو في هذه الدنيـا كثيراً .. ولـم أتذكــر هذا الشيء .. موتـك ياحمد ذكرنـي بكـل مانسيتــه .. ولكــن هل كـان يجب ان تموت حتى يحدث ذلك ؟؟ لا أعــلم !! "



يا ليتني كنت قبر وحضنته ... وتراب من بعد طلعة الروح يأويه ..
ياليت قلبي كان دارن وأمنته ... ولا لحودن من بعد موتت القلب تلويه ..
ياليت انا اللي مت بداله وتركته ... أو كان يومي مثل ذاك اليوم أو فيه ..
ياليتني ماعشت عقبه وصحته ... ياليت دمعي مانذرف لجل غاليه ..
هذا حبيبي وفي عيوني دفنته ... ماتضم حبه قبور كوني واراضيه ..



" تلك قصيدة كانت من كلماتي .. لقد أفاقت قريحتي الشعرية بعد أن غفت لمـدة طويــلة .. يا ترى هـل تحتاج قريحتي إلى صدماتٍ عنيفة كهذه حتى تعود إلي ؟؟ لا أعلــم !! "


"لا أعلــم شيئاً .. دعوني في صدمتي فقط .. رأســي يكاد ينفجر من كثرة الأفكار التي تدور بـه.. إنني على حافة الجنون !! "


" هل ترون هذا اللون الذي أكتب به ؟ إنه أشبه بلون عيناي .. لقد أصبح بياضهما مشوباً بالحمــرة الشديدة .. لقد أصبحت أهاب رؤية نفسي في المرآة .. لأنني أهلع بمجرد رؤية عيناي التي كانت تسحر كل من رآها فيما سبق .. أما الآن .. فهما تبدوان كـحبتين من الكــرز الأحمر !! هذا هو أنسب تشبيه !! "








يلا اترياكم


الاحداث الحين صدق بتبدا





شو بيستوي وشو توقعون




اتريا ردودكم