جوز الحمام بطلحة الريع غنّا=حقيقه انه بالمطاويل فرحان
يالقوقسي زاد الولع بالمعنّا=بيني وبينك باللواليح ريحان
لك يا بعيد الشوح بالن ثثنّا=فوق الكنب تاكي وانا بين ضلعان
اليا الصباح بعالي الضلع سنّا=مركاتي الصخره واسمّعها الاذان
والنار تومي والحسوس ارجهنّا=والبال رايق والخفا صار ولهان
في خاليه فيها النجوم اسطعنّا=ما دونها حالت مشاليع الامزان
ما فيها ضانن بالمذاري رعنّا=ولا بها ذود الشعل بين شعبان
ما فيها غير ضباع رقطن سرنّا=والذيب واقف بالعوالي مسيان
تعاوت سباع الخلا يرقبنّا=والكل منها بالمطاويل جوعان

يا زين ضرب البيد منّا ومنّا=حتى ولو فيها عوا الذيب سرحان
رغم الشقا طير الصحاري تهنّا=ورغم النعومه ساكن الدار طفشان
ومرات هتّاش الفيافي يونّا=ونوبات ينعم داخل البيت سليان
يا سعد منهو بالعقيده تحنّا=ويا تعس تبّاع الهوا مخلف الشان
لا تلهج بدنياك حنّا وحنّا=ما حنّا وانتم بالخلايق سوا انسان
مردّنا لآدم وقاعن دفنّا=والخاسر اللي يسحب لهول نيران
والرابح اللي للحدايق يدنّا=يحوش فوده من مساليك الاحسان
حزات جلسات الملا يلهدنّا=واحيان عزلات الخلا ما لها اثمان
ما يبدا للتايه مدا المستكنّا=مير الخفى بين الحنايا له عنان
ياتي على كيف الفتى خلفهنّا=واللي بغا التصريح يفصح ولا هان