عديت بالدّلجه على راس لولاح=ودليت اخيل بقبلة المشرفه ضوح
لقيت بالنابي عن الضيق مشراح=وحيد ما عندي شياهن وسرسوح
واشوف مد العين بالبيد مصباح=مشيت يمه يلتوي كنه شبوح
دنيت عشر امتار وادعيه باصياح=قال اقلط ويا مرحبا طيبك يفوح
قلت السلام ورحمة الله يا صاح=رد السلام وبادر بلطف وامزوح
تكيت حوله واستقريت مرتاح=لقيته غلامن على وجهه سموح
له لحيتن سودا على كتفه سلاح=اظنها الشرفا بها اللون ممسوح
من قدمها النيشان مايل ومنزاح=باين عليها الدم قد كان مسفوح
قال انت وش جابك وحيدن بالابطاح=قلت احتري صيد الخلا قبل ما يروح
قلت انت وحداني على غير صحصاح=قال الرفاقا تالي العيشه شحوح
ورديت له نشاد وش فيك باطلاح=ما غير نارك باخر الهضبه تلوح
قال احتري رزقي على صيد الاصباح=اريد انا الوبران لو دونها سفوح

قلت ابرك الساعات ونسات وافراح=طريقنا واحد عسى النجعه فلوح
سمرنا ما نوحي بالانجاد نبّاح=في خاليه ما فيها مرحان واسروح
يوم استبان النور والطير صدّاح=لقينا وبرن سارح بجال سالوح
قال الغدا عندي ولا يروح مبراح=مد العطيبه واردف طلوق وارزوح
يا صاحبي ظنيتك اليوم ذبّاح=راح وتدسس واختفى قال مذبوح
تبعنا الاثره والدمن كنها سباح=واثري لقيته داخل شطاب مسدوح
دعيته وجاني تقل عوم سبّاح=فوق الحصى يشمر وسيقانه جروح
استبشر بصيد الخلا حاش الارباح=رزقي ورزقه سابق الدنيا مشروح
هدا فضل ربي والارزاق باكفاح=ما يسري لمقسومي اليوم مشفوح
نصينا منزال الخلا ما به ارياح=ما دار فيه من المقاريد سرموح
باقصى شعيب الدوح ما جاه سوّاح=ما غير فيه الذيب يبرد عن الفوح
فيه الحطب وافر بالاشجار ما طاح=يابس عليه من الخشاخيش ذرنوح
قضينا قيلتنا على ابريق مفواح=والدلة الصفرا لها فوح بالصوح