乂آآه يا ويـــله .. قلــــبٍ صويــبٍ بانــت أقداره乂

عليا · #1 01-06-2008, 03:26 PM

السلام عليكم ورحمة الله وبركاته
شحالكم ياعرب؟؟ مب جني طولت عليكم؟؟ ويقولكم المثل من طوّل الغيبات ياب الغنايم .. وانا يايبتلكم غنيمة ..
حطينا الافكار وبدينا فكم من جزء وفي من القصة شبيهة بأخت عزيزة وغالية ...وهالمرة قصتي بتكون
مفنودة يعني مميزة ونادرة بس بمشاركة الاخت الكاتبة المبدعة سفرجل .. وان شاء الله اتحوز على اعجابكم.. تراها بتنزل الاجزاء ويايه وبترد عليكم بعد..
ولا تقصرون من النقد .. وعلى فكرة في منها صدق حصل ..وعن الابطال كلهم ابطال وكل واحد بياخذ حقه في
البطولة .. واذا عن الاجزاء ان شاء الله نشوف ردة فعلكم وبعدين راح نقسمها ان شاء الله ...
يالله بسم الله نبدأ

الجزء الأول..
(كانن اليدة ميثاء وربيعتها شما ونشبة؛ و البنات ..هند ومي خوات و فاطمة بنت خالتهم .. فارشين الحصير فحديقة ألمانيا ومجابلتنهم البحيرة ؛)
- نشبة : يالله شو هالمكان الزين !!
- شما: وتزاعج) امايا زهوور لا تسيرين بعيد..
- ميثاء: طاعي السيلانيات كيف متيمعات ..خلي بشكارتج اترد عن يفرون راسها ..
- شما : وابويه الله يسلمني ويثبت رويلاتها..(وتي زهوور وتيلس وياهم..)
- ميثاء:هييي اميه تعالي يلسي ..مافينا بعد ..يشردن ..
- شما: وابويييييييه طاعي الجلاب !! اعنبوا اوادم هب جلاب من كل صوب !!
- نشبة: قومي منج لها !!روحي أتروّع من الجلاب قومن!!!
- ميثاء: ماعنثرنا !! توّنا فارشين وين تبينا نلتعن؟
(اشويـه وانـه يشوفـن جلب عود ياي صوبهم و البنـات اتيودن في بعضهن .. )

- فاطمة: ويييييه !! يدوه الحقي علينا !!!
- مي: ويه ويه امييييه!!!!
(نشبة وميثاء يرفعون نعولهم ..)
- نشبة أونها اتروغـه : ســـّي !!! ســــّي!!! خيرك الله ســــــــــّي!!!
- ميثاء : ســّي !! ســـّي !! روغيه نشيبه روغيه!!!
- شما: ويه ويه ويه !!! واعثرتي ياي صوبنا !! اشتلن اشتلن !!
(عادة العيايـز ولين ينّشن يبالهن سنة !)
نشبة : ســــيّ !! ســـــــيّ !! (- وتزاعج على وحدة -) امايا !!! تعالي شلي جلبج !! عج فوادنا غربله الله !!!
(ياهن ووقف لهن صوب الحصير؛ البنـات متروعات و ينتفضن؛ يت صاحبته .. وهو الهرم؛ عزكم الله مال نحاسـة سواها حذال الحصير إمرة؛ بالضبط، وهن مبققـات عيونهن مب رايمات يقولن شي؛ وسـار عنهن ..)
- شما اتغشت : غربلك الله يالخايس يالنيس!!!
- ميثاء : انا الغلطانة !! انا !! انا اللي يايبتنكم هالمكان !! ولا انتوا ويه حديقة ؟؟؟ انتوا ويه عزبة وخيمة بس!!!
- فطيم : خالوه هذي اصلا حديقة جلاب ..مب اوادم شوفي ..
( بصدتهن و يشوفن لافتـة كاتبين عليهـا إنه الحديقة حديقة جلاب ..)
- نشبة : امايا !! لو انعرف نقرا جان ما سمعنا كلام المدحوبة ميثوووه !! (- وشلشلن اغراضهن - ) ادريبج يا ام النعول ردي نعالي !!!
- مي معصبة : حشا والله ما خذت نعالج ! تتبلين عليّة يا عيوني؟
- نشبة : اسكتي !! اسكتي بنت بالخير !! فطمووه؟ غربل الله منكرج وانا اقول منو ماخذ نعالي !!
- فطيم بكل براءة :والله يايدووه هب نعالج ..
(و هنّود يالسة حذالهـا؛ تسمعها وتأشر عالجلب ..)

- ميثاء : هنود؟ شو تبين به الجلب؟
- هنّود فخاطرها: الجلب ماخذ نعالج !!
(ومادرن لين ردت نشبة بها الحاسية ..)
- نشبة : صدق يوم قالوا عنك جلب !! ردّه !! رد نعالي أقولك !!(- وتلحقه بس بالبطيء ؛ ثرها الا لوتيّة ما تخاف من الجلاب ..سوّت المستحيل عسب نعالها ..لين فره في البحيرة -) انا براويك يالهرم يالهــــيس!!!
(وكانت تركض وراه مع انها عيوز لكن محد يقدر لها ..خلّت من عمرها مضحكة ..وفصخت الطبجة الثانية بتفرها عليه ..بس ذكاءها منعها .. وصاحبة الجلب والبنات ميتين من الضحك .. )
- ميثاء : الله يعوضّج خير بدال هالنعال !!
- شما : الله يعينج !! بتمشين حافية !! عطوها كيس تلف ريولها به !!
- نشبة معصبة : جيييه؟ اتحرين ريولي محناية؟ الا امايا !!!
- فاطمة: هدي الوضع هدي يعلني افداج ..( - وفصخت نعالها وعطته لنشبة –)
- نشبة : يعلج يا فطووم بنت مييثووه بريّل يسترج ويحطج ع راسه ( -وتزاعج - )قولي آمين !!!
- فاطمة: آمين !! آمين عن تاكليني !!
(وهن توهن بيركبن الموتر انتابت وحدة من البنات حالة مثل الصرع بس مب الصرع نفسه ..تنتفض؛ كانوا متجدمين الا نشبة اخر وحدة والبنية طاحت عليهم ..)
نشبة : ويه !! الحقوا عليه !! طاحت البنية !!!
(شما ونشبة يولولن من الزياغ ويركضن صوبها والبنتين يصيحن متروّعات عليها و من الموقف نفسـه؛ ياهن مايد يركض صوبهم وشلاها إيد وريـول؛ كانت شرا الميتـة؛ ودوهـا المستشفـى؛ أسعفوها و خلاف الدكـتور رمّس مايـد .. وسار عنـه ..)
- مايد : يقول الدكتور.. انه الدوا اللي عطاها الدكتور النفساني سوالها آثار جانبية ما رامت تستحمله لأنه قوي و ..
- كلهم : و شو؟
- مايد مرتبك؛ مب عارف شقايل بيخبرهم : قالوا بيغيرون لها دوا . .وبيتريونها تقوم ..لأنه الدوا أثر عليها لدرجة .. إنها مثل .. فغيبوبة ..
(يا الله يا صدمتهن؛ البنيـة من كم من سنة مَب مترقعـة والحينـه هذا اللي زادهـا ؟!)
- ميثاء يدتها :متى بيطلعونها من العناية ؟
- مايد: باجر ..
- نشبة : يالله اتصبرنا ..عمرها ما اتهنت .. (– و اتصيح- )
- ميثاء وماسكة عمرها : ميود اتصل باللي ما يتسمى وخبره !!
- مايد : بس يا امايا
- ميثاء: لا بس ولا شياته ..يمكن يحن قلبه عليها .. بعد اللي سواه فيها !!
- مايد: جهنم كلته !!!
- ميثاء: سير عيل الفندق وبشر يدك واخوك..وهالله هالله فيه ياهل ما يفتهم ...
ان شاء الله عيبكم؟؟ والتكملة بعد فترة ... __DEFINE_LIKE_SHARE__

عليا · 01-06-2008, 03:26 PM

( الجزء الثاني ..)

(و بنرد بعجلة الزمن؛ من يوم هم صغاريـة .. كل شخصية باسلوبهـا؛ و القصة روحهـا بتقول لكم منو هذيـلا؛)

- هنّود : مرررحبا الثاع ولا خلثن ..علوومك ابويه؟؟ (- وحاطة ايدها على اذنيها اتسوي عمرها ترمس في التيلفون – )

- مانع: أنا ؟ أنا بخير علوم أمج؟

- هنود: انا ليولي متكثرة !!

(قصدها ركبتها متكسرة .. اتقلد العيايز يوم يتشكن؛ .. خخخخخخ ما تنلام ما تسمع إلا هالشكاوي .. إلا ركبي إلا ريوليـه و إلا ظهري .. و جان خلصن من رويلاتهن بيدورن على البشاكير و البيادير !)

- مي ملانة : عن الغلاسة الزايدة قوموا خلونا نلعب !!!

- هنود: مابا .. ليولي متكثرة ..

- مي: جاب جاب يالله طوفوا

(مي و هنّود وعيسى ومايد اخوان؛ أما مانع فهـو .. و إلا تدرون شقايل مَب مخبرتنكم .. مفاجعة !؛ أقصـد مفاجأة .. )

- شمايل كانت تترياهم وهي تستوي بنت عم مي و هنّود: توة الناس !!!

- هنوّد: شو نثوي يا امايا .. ليولي متكثرة !!

- شمايل : متكسرة يالجذابة؟ مادري منو يراكض وشبعان من المراكض وطايح ع ويهه !!!

- مي: منّوع جيه ما سرت تلعب ويا الاولاد يا عيوني؟

- مانع: ميود قال لي احرس الحريم عن اييهن شي انته الريال !!( - ويدق على صدره- )انا ريال ولد ريال !!

- شمايل : اخرط !!! احيد امك يابتك مب ابوك !!

(مي من صغرها هي الزعيمة؛ وسارت بهم البقعة اللي دوم يتيمعون فيها البنيـات ..)

- مانع يتصدد : هذا مكانكم؟

- مي: إن علمت حد يا منّوع( – وهي إتقربه-) يا ويلك يا سواد ليلك؛ بييب السجين مال اميه وبقطّعك وبشويك( – وهي تتطالع البنيات؛ بعيونها و الشر يتطاير منهن -) بناكلك واهلك ما بيدرون ! "والخيبة زيغتني !"

(يا الله البقعـة؛ صحراء .. محد هناك؛ وكل وحدة منهن داستلها شيوال؛ تحفر به .. وكانن يحفرن و حفرتهن غزيـرة؛ يعني كل وحدة حسب طولها، و عقب ما خلصن يابن زوليـة و حطنها فوق الحفرة ..)

- هنّود : احلى شي .. ما بغينا انخلث !

(كانن عبيطات؛ بس عبطهن حلو؛ كلهن ماسكات أيادي بعضهن إلا مانع ما طاع .. )

- مي: وييييه جبان ودب بعد !

- مانع بشفايفه الحمر : انتي الجبانة والدبة !! ( " وااايه فديت الكيوووت " )

- مي: يالله عاد منّوع !!

- مانع: مابا يعني مابا !!! اميه موصتني ما العب ويا الحريم !( " خخخخخخخخخخ اسميه جذاب؛ لا ويقول لي حريم بعد ")

- مي: كيفك بيفوتك ياعيوني !

(و يمشن صوب الزولية .. وهن يصفرن و بثلاثتهن ووقفن على الزولية بس ماطاحن ؟!)

- شمايل: اويييه؟ ليش ماطحنا؟

- مانع: قوموا بتطيحون ..مب زين !!! بيعوّركم !!

(قامت هنّود و تنقز هذيجي النقزة النقـزة على الزولية وما تشوف عيونكم إلا النـور ..)

- هنود ومي وشمايل : آآآآآآآآآآآآآآآآي !!

(و طاحن هذيجي الطيحة؛ فوق بعضهن و جنهن يثبتن لعمارهم المثل القايل - من حفر حفرة لأخيه وقع فيها- )

- مانع يشوفهن يحاولن يظهرن : دواكم !! محد بيفزعكن !!

- هنود: منووعي ثاعدنا !! مانروم اتكثرنا يابوك !!!

- مانع يقلدها : بث بثاعدج انتي !!

- مي تصارخ : منووووووع!!

(هن يتساعدن و مانع يعاون و عقب جهد ظهرن؛ ما وحاهم إلا يتهم وحدة متلثمـة ..)

- دومينكا : بابا؟ بابا؟

- مانع: يعلج الساحق ..شو بغيتي؟

- دومينكا : ارباب يريد انته !!

- شمايل : منوووع ؟ بلاها بشكارتكم؟

- مانع يسوي عمره ريال : روحي روحي روحي!!! روحي البيت ويوم بشبع برد !!

- هنود: منوووعي؟ بلاها بشكارتكم غادية غير ام الدوييث؟؟

- مانع: انتي ما اتدلين ..ابويه ما يداني البشاكير ولا شيفتهن حتى انا ..وقايل لأمايا يتلثمن اصلا شكلهن يزيغ انتي شدراج!!!

- مي : الا انتوا يا عيوني اتزيغون!!

(كانوا أعز أخوة بين بعض؛ هنّود الشيطانة، شمايل الحليوة الهاديـة .. مي المسيطرة؛ ومرت

الأيام عليـهم لين تحولوا أهل مانع وكان ما يبغي يفارج ربعه و خصوصا هنّود؛ متعّود إنـه

يتضارب ويـاها و تضربه وإلا تفلعه بأي شي و ترد روحها إتداويـه ولا إتحط له العايدين فراسـه؛

أكثر الفلعـات تيـه على راسه؛ اتفره بحصى بأي شي اتشوفه بحديده .. شرا الأولاد هالبنية

تحب تلعب وياهم؛ كانوا يوم يلعبون كرة القدم دوم يحطونها حارس المرمى؛ لين يوم عن يوم و

سنة عن سنة؛ كبرت و عقلها بدى يفهم إنه لازم ما تلعب؛ من اهنه تبدى القصـة؛ كل

شخصية بتعرف بعمرها و تعليقي بيكون من بينهـا و ما بتتوقعـون منو البطلة .. ) __DEFINE_LIKE_SHARE__

عليا · 01-06-2008, 03:27 PM

طبعا لكثرة الغمووض الملتف في القصة قلت الا احط لكم كواليس سفرجل واحلى البنات وسوينا ويا الشخصيات مقابلة ..

الجزء الثالث

(بعد الحادث)

• انا اسمي مي الاخت العودة الطموحة ..احب الحياة ..جميلة جميلات ليوا ..محد

احسن عني ..عمري 26 (- جذابة هي اصلا 29-) خريجة اعلام بامتياز ( - جذابة ب جيد- )

اشتغلت مذيعة اخبار فقناة واشتهرت وكل الناس حبّوني (- بس كانت تبا تشتهر زيادة-) وياني

عرض ما يتفّوت من قناة اني اكون مذيعة (.- كان معاشها ما يكفيها على حد قولها -) احب

اتكشخ وألبس كله ماركات وكله من تعبي ..اصلا محد تعب عمره وقال بيساعدني ..ما احب

الزواج ..اكره شي عندي - وكله من الحادثة- اممممم شو بعد؟ احب اكون الـ leader فكل

شي ( – بيني وبينكم تراها منافقة ووغدة – من غير ما كان فيها اي ملامح جمال يمكن بس

طولها كانت قبل الحادثة تستحمل كل شي وتنطنش اما الحينه لا .. )

• انا هنّود مريت فمرحلة صعبة فحياتي ..قبل الحادث كنت بنية حبوبة ومرحة (

وكانت "احلى البنات" )والكل كان يحسدني على قلبي الطيب (- لين حصل اللي غيّر مجرى

حياتها -) انا عمري 21 سنة (- ويوم حصل الحادث لها كان عمرها 18 سنة-) ماحب اتكلم

وياحد اصلا منو يستاهل ؛ اصلا من دخلوني هاكي المكان وانا ما عقدت صداقة لا ويا

الممرضات ولا الدكاترة ولا اللي شرات حالتي ( – وتصيح-) هذا شي هب سهل !!! (– أعرف

عن هنّود بأنها أعقلهم كلهم؛ كانت الإخت المثالية ! – وكانت حبوبة وعصبية فنفس الوقت

وشيطانة بعد بس الكل يحبها لحشمتها – وبعد محيّرة لمانع- )

• انا مانع عمري 27 لويش تسألين؟؟ (قصده ليش) ضابط في مركز مكافحة المخدرات

(ومحير لهنود.. ابيضاني البشرة ..خشمه طويل بس مب وايد وعيونه عاديات بس يوم يبتسم

تبتسم الدنيا له من حلاته ..طويل عريض ومافيه متن ..بس يوم ياهل كان دوم يعايرونه بالدب

ومن كبر ضعف ..)

• نشبة : شو تبون فية؟؟ ما روم اقول عن عمري شي اشدراني !! سيري عند حد

ثاني .. (وتزاعج) شموووه يبونج!! _( نشبة تكون عمة غريبة يعني اخت ابوها اللي اسمه

حمد ..وعايشة فبيت روحها حذال بيت قوم ميثاء وعندها بنت بنتها فطيم اللي امها توفت

وتربت على ايدها .. ولسانها متبري منها ودوم تنقع صواريخ مب صواريخ صدقية ..قصدي

فرمستها خخخ)

• شما : مرحبا الساع .. هلا امايا .. انا شميم ..وتقدرين تناديني شما النسيم .. انا يا

امايا ما عندي حد غير خوياتي نشيبة وميثوه وبشكااااااااااااارتي الفقيّرة .. اذكروا الله!! عن

اتوحونها !! الله يثبت رويلاتج يا زهور !! ( ما عندها عيال ولا ريل بس معرسة 3 مرات وكلهم

اتوفوا)

• ميثاء : شو تبون بي؟؟ يالله سيروا مناك عندي 100 شغلى فراسي !! ( ميثاء تكون

يدة هنود وعيسى ومايد وشمايل وهناء..وعلى فكرة اتحب اتلقط كلام بالانجليزي خخخ)

• حمد يد العايلة ..وايد طيب وما يسمع عدل من اذنيه لكن الدنيا ما تسوى بلاه

• عيسى : انا عيسى وعمري 27 سنة فمقتبل عمري على ما يقولون .. مخلص

الثانوية وأشتغل سكرتير فشركة خاصة ( يشتغل في التحريات من 7 سنين بس محد يدريبه

حتى اهله ..كان دوم يتنكر عسب يزخون المخالفين ..لين يته فرصة بتحقيق حلمه انه يستوي

ضابط ويرقونه) انا شاب فأول عمري (ويبين انه كوول عسب شغله ..بس الناس ما يدرون

فشغله ويتحرونه من الشباب اللي يتعاطون ) واحم احم محيّرين لي بنت خالتي فطييم

يعلني افداها يعني يا بنات محد يتقرب خلاص عواس لفطوم... (كان يموت ع ترابها وهو انسان

مثقف وواعي وحبوب وعلى طيبته ما بتحصلون وكان يحّن على خواته واخوه ..ويتريا اليوم

اللي بيعرس فيه..بس العين بصيرة واليد قصيرة ..و الله عاطنه جمال هب على حد كان

اسمروعيون وساع عسليات وغمازته تحت عينه بالضبط ومحلتنه اكثر .. وخشمه الرفيع

والطويل .. وعيبهم الوحيد انهم فقراء )

• فاضل : انا بوعيسى (ويدوخ سيجارة ) عندي حرمتين وحدة عراقية الله ياخذها ان

شاء الله وغريبة وساكنين ف ليوا .. فقراء على قدنا .. حتى الشغل ما يتحصل هالايام ..

وعندي بنتين وولدين .. محد نافعني فهالدنيا غير ميووووه وميوود ولا عواس الجلب جان سمع

كلامي وخذا له وحدة بنت عز ولا بنت الفقر ولا هنود ام لسانين متى الله بيفكني منها وتاخذ

منوّع ويريشنا بالفلوس .. (كان فاضل ماخذ له عراقية وشفطت فلوسه وفيلته اللي في دبي

ويابت له بنية وهي مي .. ومن الغصة اللي جاسته شل عنها البنية ورد ليوا وخلا غروووبة

تربيها.. بس مي ما سلمت من كلام الناس دوم ايعايرونها ببنت العراقية وهي ولا بهمه..وكانوا

عايشين على موتر واحد واالللي هو موتر عيسى مال الدوام ..)

• مايد : يا هلا والله .. مرحبا ملاييين.. انا.؟ انا اسمي مايد بن فاضل ..وعمري 23

سنة .. (ومحير لبنت عمته شمايل .. كان ما يدانيها بعيشة الله مع انه في ليوا محد يمدح في

الجمال والرزانة غير ب شمايل وهنود ..ويشبه وايد عيسى بس طبعا ميود مطول شعره يقلد

الموضة هالايام) وتقدرين اتقولين مب اي بنية اتدش خاطري .. اللي يباني يركض ورايه ..

(والخيبة يالخقاق العود ..من زينها عادة اللي بتراكض وراك مالت عليك)

اتمنى اتوضح لو شي بسيط... __DEFINE_LIKE_SHARE__

عليا · 01-06-2008, 03:28 PM

الجزء الرابع : قبل الحادث :

يالس و مشتط؛ حاشر الدنيا ..

- بوعيسى: غرّوب ؟ غرّوووب ؟ وينها أم السعف و الليف ؟ ( يتكلم عن حرمته غريبة الفقيّرة)

- هنود فخاطرها : حرمتك العراقية أم السعف والليف (– ردت عليه-) لا تقول جذيه عن امييه !

- بوعيسى يودها من شعرها : جاب يالحيوانة !

- هنود ما لحقت تشرد عنه : آآي !! آآآي!! آآآي امااايا !!!

- عيسى نش : ابويه هدها !

- بوعيسى : جاب ولا اتطول لسانك عليه .. صدق انك هب متربي !!

- هنود استغلت الفرصة وردت : سر !؛ سر عند العراقية وبتعلمك الطبوب (– و تركض بعيد- )

- بوعيسى : إن ما يوّزتج منوووع .. متى بتنجلعين عن ويهي !

- هنود : يوم بموت !

- بو عيسى: فكاك .. اسميني بذبح ذبيحة !

- هنود: هذا جان عندك بيزات يوم لهطته العراقية ( – وهي تتطالعهم -) متى تي يا منوع واتفكني من الصدعة !

- عيسى يضحك : جريب، جريب !

(كانت العوايـل من بينهـا متفقـة؛ بس تفكيـر الأبـو كان تفكيـره إنـه يبـا الفكـة من هنّود و إنها تاخذ واحد عنده خير يرفع من مستواهم أكثر من إنه يستـر عليها؛ كيف ؟ .. بسيطة زواج مانع و هنّود؛ مع إنه ما من بينهم قرابـة لكن الفلوس تغّير النفوس؛ و مايد أخوها لـ شمايل بنت عمه ما دروا عنهم قلوبهم ويا بعضهـا ؟؟)

- بو عيسى يدوخ السيجارة : محد نافعني في البيت غير مي وميود !

- ردت عليه هنود و هي واجفتله صوب الباب : إلا قول منو منزل راسك بين العرب غيرهم !!

(كان هم بوعيسى يدور له على شغل ثاني؛ عسب يحسن من وضعهم؛ عصبيته كانت زيادة عن اللزوم؛ نش لها و صفعها هذيجي الصفعة و دفرها على الأرض؛ نعم كانت المتمردة بين اخوانها؛ و هاكي اليوم مول ما يتنـسى كانت مخلصة الثانوية العامة و نتايجها ظهرن ..ومحد باركلها غير امها وعيسى ويدها ويدوتها ..)

- عيسى : لا تزعلين يا هنودتي؛انتي اتعرفين انه مب من خاطره ..

- هنود: مبيّن !؛ من استويت وهو ما يطيقني ..ويبّدي عليه بنت العراقية !

- عيسى : خلي عنج هذا كله ..اتجهزي باجر بوّديج وبحوّطج في دبي ..

- هنود بلهفة : صدق عواس؟ ومنو بيي ويانا؟

- عيسى : فديتج هاتي اللي تبينه ..

- هنود: والله العظيم يا عواس ان خليت بنت العراقية تي ويانا بجتلك !!

- عيسى ضحك كم خاطره؛ كانت ضحكته عذاب : لويش؟

- هنود: هذي كلمة مانع .. تذكرها ؟

- عيسى: اعنبوا يوم اتلاقى وياه لازم هالكلمة تنقال

- هنود تضحك : خلنا من منّوعي ! عادي اييب فطومي ؟

- عيسى : عاشت ! بتيبين حرمتي ؟ الا قولي كيف بتجلعينها وعندها 100 الف حراسة ؟

- هنود: ربك بعد يوم أريد شي !!

(أصبحوا ثاني يوم؛ نش عواس الفير يصلي؛ وهو راد من المسيـد ..)

- عيسى : السلام عليكم ..صباح الخير بغروووبة (امه) اللي ما فيها حييلة (- ويبوسها على راسها – )

- غريبة : يعلني افداك يابويه ..حبتك العافية ؛ يالله اقرب بنتريق ..

- عيسى : جريب يطوليه بعمرج ياغير بسير اتريق عند يدي حمد ..

- غريبة : عيل الله يحفظك وسلم على امايا وأبويه..

- عيسى : ان شاء الله يبلغ .. وعي هنود على الساعة 9 بطلعها ..

(قبل لا يظهر؛ يسمعون زعيج .. )

- مي : والله لأراويك يا ميود ..انا تحط فمرحاضي معجون والله لأراويك (- واتزلزل البيت من صريخ مي-) تعال هنانه ..

- ميود: ما بيي هناانه خخخخخخ شو بتسوين؟؟

(وينزل ميود وياخذها شردة ومي وراه وفصخت نعالها وفرته ..عيسى كان مدبر بيظهر ..)

- عيسى :آآآآآخ

- ميود : ويييييو على راسه !!

- عيسى : ميود !! يوز عنها !!

- مي : آآآخ اسفة يا عيوني !!

- عيسى : لا فديتج عادي ..ان شاء الله لو ضربتيني بجاب ما بنطق بحرف ( - سارت حبته ع راسه – )

- مي : love you brother

- عيسى ويغمز لها : love you too sister

- ميود : يالله عالحب الاخوي انا !! الله لا دامها !!!

- ام عيسى : اعنبوا كلامك كله سم ؟ انفد حجرتك وصل الفيّر !!

- مي: عواسي؟؟ وين بتوّدي هنود؟

- عيسى : بوديها دبي ..

- مي : وانا؟

- عيسى : انتي؟ بوّديج ورا باجر روحج محد وياج ..وين تبين تسيرين؟

- مي: صدق يا عيوني؟ انا ابي اسير امارات موول .. بس باباتي ما عطاني فلوس ..

- عيسى : وانا وين سرت؟

- ام عيسى: خلاص يا امايا ..انا بعطيج ولا يهمج ..

ظهر عيسى عنهم صوب بيت يده ..

- عيسى : هود !! هود!! هيييييييييههههأأأأأأأأ !! وينكم يا عرب؟

- نشبة: مرحبا ... هدا هدا .. يا حمد!!! حمد!!! (وهو يالس حذالها وتزاعج) حمد وصمخ!!!

- حمد اخوها : جيه تزاعجين؟ اصمخ؟ ما اسمعج؟ منو ياينا؟ (- وهو يصد - ) عيسى؟ يامرحبا وسهلا اقرب يا بويه !

- نشبة اتحرطم: انا احينه يهزبني .؟؟ امبونك تسمع اللي تباه !! ( - وعيسى يضحك وهو يسلم على يده اللي قام له – )

- حمد: اسمعج !! اسمعج !!

- نشبة : ماقولكم ؟ يسمع اللي يباه !! اقرب يابويه انته هب غريب !! (- ويحبها على راسها-)

- عيسى : اخبارج خالوه واخبار عزبتج؟

- نشبة : بخير يسلمون عليك..

- عيسى : منو هم؟

- نشبة : هوشي !!

- عيسى يضحك : وعلوم حرمتي؟ تستاهلون نجاحها .. سلمي عليها وباركيلها عني !!

- نشبة : ليش بعد هذا كله ؟ هذي جدامك !!

(يا الله؛ صد لها وهو مكيف آخر كيافة !)

- عيسى : ياويلي وييلاه

(و كانت فاطمة متلثمة وما تبين الا عيونها ..كانت مخبلتبه ..)

- فاطمة: السلام عليكم ..

- عيسى : شكلي احلم ..

- نشبة : لا يابويه ما تحلم ..رد السلام ..

- عيسى : هاااه.؟ عليكم السلام ورحمة الله وبركاته (- وفطامي فخاطرها تضحك – )

- فطيم : شحالك عيسى ؟

- عيسى بلهفة : عمررري ما بنساها هالكلمة ..

- حمد : حووووه!! حوووه !! سيري ازجري ميثووه!!

- فطيم : ان شاء الله ان شاء الله ..

- عيسى بحسرة : يدّي خربت ياخي!!!

- حمد: شو تقول؟

- عيسى يصارخ : ماشي!!! ( - ونشبة تضحك –)

- حمد: انزين جيه تزاعج؟

(عادة يلس عيسى يتريق ويا يده؛ على أمل إنه فطيم ترد تظهر له .. لكن خاب أمله لنه مطرشين البشكارة ويوم هو مروح كان مستانس؛ لكن اييـه واحد شرا الباكستانيـة .. )

- حسن :باجر العملية الساعة 9 والله يوفقك .. (- هو زاغ – )

- عيسى ويصد يمين : ليش ما اتصلت؟

- حسن : قلت لازم اشوفك يا خوك ..هذي العملية خطيرة ..

- عيسى : مانع يدري ؟

- حسن : اكيد يدري .. ولا تنسى اللي دربناك عليه ..وعلى الساعة 10 بالكثير من يطلع من البيت بنزخه ..

- عيسى : الله يوفقنا ان شاء الله

- حسن: ما تباني ايي وياك؟

- عيسى: ما بيصدق ..لازم نزخه هو وجشاره ..

- مايد : اتزخ منو هو وجشاره؟ ( - وزاغوا اثنينتهم- ) هااااااه؟ علومك خان؟

>>لا حوووول شو بيستوي بعواس؟؟ بيعرف ميود بالخطة ولا شو؟؟ وكيف بيكون لقى عيسى ب فطيم << __DEFINE_LIKE_SHARE__

عليا · 01-06-2008, 03:28 PM

(الجزء الخامس)

- عيسى: ما بيصدق ..لازم نزخه هو وجشاره .. (– في لحظة إييد واحد تييي على جتف عيسى – )-
- مايد : اتزخ منو هو وجشاره؟ ( - وزاغوا اثنينتهم- ) هااااااه؟ علومك خان؟-
- عيسى : ميود؟ شو تسوي هني ؟ انزين عبدالله انته توكل وباجر بنتفاهم ..
-
- حسن: اوكي ارباب ..
-
- عيسى فخاطره : عوذبالله من ابليس زيّغني !!
-
- مايد: ياي اعرف شو سالفة الجشار ..
-
- عيسى : عن الغلاسة الزايدة !! اقبض طريجك !!
-
- مايد: بتعطيني موترك فديتك؟
-
- عيسى يتغيلس اكثر : لا فديتك اقبض التكاسي ما يقولن شي!!!
-
- مايد: افااا!!! واخوك حبيبك؟
-
- عيسى : بوّدي قوم هنوّد دبي !!

- مايد: اوووهوووه !! انته الرمسه وياك ما تفيد !! علّك بالحراق !! (- ويسير بعيد – )

- عيسى : الله يسامحك ياخويه ..

(يدري بأنه مايد ما يقصد برمسته؛ بس مايد كان مشتط و يسب ؛ كان يبا كل شي له، بس مب محصلنه لنه أبوه مب موفرنـه ..يعني حتى فاضل كان قاسي على عيسى وهنود ..وحرمته اللي صابرة عليه ..ودخل عيسى البيت)

عيسى : اميه؟ يا اميه؟ وين هنود؟؟ (دق على حجرة امه محد رد ودخل .. ويسمع صوت في الحمام ..حد يهاوع ..) امييه؟ انتي بخير؟

ام عيسى: ياية !! ياية انزل وبييك !! (وهو زاغ على امه ونزل وهو متوتر ..وطلعت من حجرتها ومحمر ويهها مب طبيعي ..)

عيسى مستهم: اميه؟ خير؟ أوديج المستشفى؟

ام عيسى تبتسم: ما فية الا كل خير .. (ويلست تشرب قهوتها)

عيسى بفرحة : لا يكون في عضو خامس بيي في الطريج؟

ام عيسى : يابويه تقدر اتقول جذيييه !!

عيسى حط راسه على ثبان امه : لا حول ولا قوة الا بالله

ام عيسى : خير؟ مب عايبنك؟

عيسى : بيي واحد وبياخذج عني يا غروووبة !! انا روحي اغار !!

ام عيسى : يالغيار العوود !! (وتضحك) وحرمتك فطموه؟

عيسى : هذيجي الرووح آآخ يا ويلي ويلاه ..وانتي يا غروووبة ...انتي؟؟ فشعتي قلبي تفشيع ..

ام عيسى: يامنكرك!! يامنكرك!! ..عادة ابويه مب اتخبر حد ..خلني اتأكد اول ...

عيسى : شو تتأكدين؟ خلاص انا اتأكدت لج ..دامج اتهاوعين وتزاوعين ..احينه بييج الوحام ..ابويه وين؟؟

ام عيسى : سار الشغل ..يابوك رحمنا ..ولا المناجر اللي كل يوم انحصله ..

عيسى : شو نسوي ابونا ولازم نستحمله ..اذا نحن ما استحملناه منو بيستحمله .. (ويتنفس بصوت عالي) انزين يا غرووووبة..

ام عيسى : مالك من الله شين ..

عيسى: عاد انا اقووولج جارانتي انه ولد !!

ام عيسى تضحك : شدراك؟

عيسى : احساسي يقول ..

ام عيسى : خلك يا بو احساس ..

عيسى : هي والله .. تفتح احساسي من شفت فطيم اليوم .. (وهو يسمع بطنها ) اميييه؟

ام عيسى : ها يا بويه؟

عيسى : اتحرك الولد !! والله!!!

ام عيسى تضحك : بعده ما مداه استوى اعنبوا !! يابوك يوعانة وبطني يغرغر !!

عيسى : مرة ثانية غيري نغمة بطنج ..نبا انعرف انفرق ياخي ..

ام عيسى : ياخي اسكت خلنا انطالع الاخبار المحلية !!

(ويسمعون غريبة وعيسى هرنات ..وحد مبطل الباب )

- هنود والغبار وراها وتزاعج : يعني شوه؟ بتخيسنا في الموتر من الحر؟؟ وانته ميّلس اتهذرب هنيييه؟؟

- عيسى : اووووووه نسيناج !! سامحينا ياغرووبة بنسرح جدا دار مكتوم تامرين بحاية؟

- ام عيسى : جان بتمرون الجمعية خذوا لي يونية عيش بو سنارة ...

- عيسى يضحك : والله حالة ..لا يكون (متوحمة)

- هنود: يالله عاد فطسنا حر!!! (وتهف بشيلتها اتقول مهفة ..وسارت على طول ركبت ورا صوب الدبة )

- عيسى : انزين.. انزين ياي !! (وهو توة يركب الموتر ..) لا إلـــــــــه الا الـــله ...

- نشبة وشما وميثاء : مــــحـــــــــمـــــــد رســــول الله .. ( صد ورا منصدم ومبجج عيونه وميثاء جدام راكبة ..)

- عيسى : بسم الله الرحمن الرحيم !!! من وين ظهرتن؟

- نشبة : من بطون امنا !! الله يغفر لهن ويرحمهن !! __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
乂°•..•°乂 جــراجــتي أتـجـرج فونـكم بدون كهـرباء ((مع فيديو للشرح)) 乂°•..•°乂	كوين فاشن	بيع و شراء و عروض التجارية	9	11-27-2012 10:24 AM
乂★乂☆乂(( عروس مسوية الكيكة على شكلهــــــــــــــــــا )) 乂★乂☆乂	♕ وليد الجسمي ♕	فن المطبخ والطبخ	25	08-09-2010 06:13 PM