ياشين العزايم .. والله ياتفشلت فشلة قبل شوي !!

ايمـــا · #1 11-10-2009, 01:48 PM

الله لايوريكم حصلي موقف محرج قبل شوي مادري من ألي داعي علي الله لا يجزاه خير ..

السالفة ومافيها .

كنا أنا واخوي الكبير معزومين عند بعض معارفنا الليلة بحكم أننا ضيوف عليهم وتونا ساكنين عندهم في مدينه غير مدينتنا..

ويوم جاء بعد صلاة العشاء حصل لأخوى ظرف طارئ بالعمل وقال ماني رايح للعزيمة ورح أنت واحضر العشاء واعتذر لي منهم . قلت والله ماني برايح لحالي امش معي وظرفك ماهوب لازم صرفهم و قل ابتاخر شوي على الأقل ..

المهم قال اخوي ما اقدر اصرفهم .. رح أنت لحالك ولا تفشلنا الناس حاطين عزيمة ومتكلفين على شاننا وتبينا ما نروح ..رح أنت وتعش وتعال وانتهينا ..!

قلت امرنا لله وش نسوي نبي نروح .
والله واركب الموتر وأنواع القلق بي ..يعني ما تعودت احضر عزيمة لحالي دايما أروح مع أبوي وإلا مع إخواني الكبار و أحط رجل على رجل بالعزيمة واترزز يقالي رجال واتقهوى ولا افتح فمي بكلمه وحده ..واليوم راح أروح لعزيمة ما اعرف فيها أحد ذيك المعرفة.. و أصلا كلها محطوطة علشاني ومجتمعين الناس كلهم ويحتروني اجيهم وإذا دخلت عليهم أكيد يبي يرحبون بي ويحتفون والكل يبي يناظر بي ..موقف أحس انه رهيب وما تعودت عليه ...ماهوب ذنبي وش أزين طبعي حياوي.!!!!
ما أقول إلا الله يعيني لا عرست وشلون امسك رجليني من الربكه. .

المهم وصلت للمخيم ألي معزومين فيه والله لايوريكم السيارات وش كثرها تقول واقفه عند جامع يوم الجمعه وفيه بعد الصلاة قصاص ..!! يعني سيارات خيال ..وأقول بنفسي هذي السيارات وشلون لو كل وحده فيها واحد ولا اثنين ...وأنواع التهيجات بالقولون والله العظيم عجزت لاشيل رجليني من الخوف والرهبه كنت أظن أنى رجال وطلعت خرطي ما عندي ما عند جدتي وأقول بنفسي وشلون أنت تتمنى انك تصير ملك وتحكم العالم مثل هتلر وهاذي علومك .....!!

المهم شجعت روحي ودخلت المخيم ولا ذيك العالم مجتمعين شيبان وشباب ومبزره ومن كل الأعمار ...وأول ماشافوني ما تسمع إلا كلمة.. ياهلا ..ويا مرحبا ..ويالله حيه ..وبصوت عالي تقل صراخ ...بغيت ادوير واركب سياراتي واهج....!!!!!

والله وادخل داخل الخيمة وعجزت لا قول السلام عليكم أحس يوم قلتها كأني أتكلم وسط قليب و ما يسمع صوتي إلا أنا .
وابدأ اسلم عليهم واحد واحد ويديني تنتفض ولا اقدر اركز على ايد ألي ابسلم عليه أحس إن أيدي تميل عن ايده شوي .

وكل ما سلمت على أحد وخاصة الشيبان يمسك ايدي بقوه ويقعد يطالع بوجهي ويقول كيف الحال ..وشلونك ..ووشلون من يعز عليك ..وأنا ما اقدر أرد عليه من الحياء ووجهي تقل وجه واحدٍ يبي يصيح ..

ويوم جيت عند ذاك الشايب ألي عمره يمكن متعدن الميه وجالس على كرسي ميلت جسمي عليه وحبيت راسه..إلا ويطيح عقالي واجلس ساعة ادوره تحت كرسي الشايب ..ويوم لقيت عقالي ولبسته ليني خلاص قد وصلت فيني الربكه الحد الأقصى ومن زود الربكه حبيت راس ألي واقف جنب الشايب مع إن عمره ماتعدى الثلاثين . والناس تناظربي مستغربين وشكلهم يقولون وش ذا الخبل ألي عازمينه .....
وأنا أقول بقلبي يا ليت لي سلطه عليكم والله ماخلي ولا واحد فيكم حي مع إن مالهم ذنب

ومن كثر الناس تعبت من السلام ووطيت صحون التمر برجليني وكبيت فنجال شاهي حق واحد منهم والله لا يوريكم يالله بالله انتهيت من السلام حتى المبزرة والهندي ألي يصب القهوة كلهم سلمت عليهم سلام وجه...

ويوم قضيت من السلام كل واحد يقول تعال هنا واقعد جنبي والله لتقعد هنا ومن هالحكي وأنا معطيهم أشكل ورحت جنب القهوجي وقعدت متعود على كذا ...

والله ويقوم المعزب راعي العزيمة ويسحبني مع أيديني وقال ما يصير أنت ضيفنا تقعد بأطرف المجلس والله ما تقعد إلا بذا المكان ويوديني لصدر المجلس ويجلسني جنب المركى ألي تقل شداد ..

ويجي الهندي ويصب لي قهوة ويمد الفنجال لي وأنا ما قدر ارفع ايدي من الربكه ويوم مسكت الفنجال بدأ يتهزز من يديني بغى ينكب على ثوبي ..ويالله بالله أكلت تمره أحس اني قعدت ساعة علشان ابلعها ...والناس ابلشوني كلن يسلم علي ويقول وشلونك.... وعساك طيب....وكيف الحال.... وكلهم يكررون نفس الكلام ....كأن الواحد لازم انه يسجل موقف..المفروض واحد يسألني عن حالي وأخباري والباقين ينطمون ويسمعون بس .....

المهم جلست اتقهوى واقدع من التمر واشوا تقل ارتحت شوي لانهم قعدو يسولفون بسالفة وماهوب لمي ....بس فيه ذاك الشايب ألي جالس قدامي وشكله نجس عيونه مثل عيون الحراميه صغار وحادات وطول الجلسه وهو يطالعني ...وفجاءة بدأ يسولف ويقصد ويقول سالفة عن واحد خبل وفيها قصيده يسب فيه الخبول واذكر منها بيت يقول فيه .
ياللاش يالهلباج يا حصين إبليس .....يا لبوم يا وجه الردى والرذايل .
وهو يقول القصيدة يناظر بي ...والظاهر انه يقصدني بالقصة والقصيدة ...وأنا أطالع فيه بحقد واقول بقلبي يازين من قلاك بقلاية بطاطس ووزع لحمك على بساسة الحارة ..

المهم جاء العشاء وقال المعزب قم يا محمد على عشاك وأنا من الرجه قمت على طول وهو ما بعد كمل كلامه وامشي بسرعة تقل ابركض والناس ألي بالخيمة ما بعد قاموا من مكاناتهم .

يوم قلطنا على العشاء و قال المعزب سمو الله يحيكم على عزيمة محمد واخوه ألي جايين من جدة وسكنو عندنا بالشرقية والله و أمد ايدي على طول على الذبيحة ما كلت لا رز ولا كبد ولاشيء على طول طبيت باللحم وأنا اصلاً ماني جوعان ولا ني مشتهي شيء من الربكه ..بس أسوى نفسي رجال يقالي ماهتميت فيهم والمفروض اني أكل الكبد قبل ابدأ بأكل اللحم ..كذا يضحكون علينا شيبانا منول ويعتبرون هاذي من السلوم والعادات عند البادية ..

وفجاءة نقز واحد منهم و قال ترى عشاكم القابلة عندي قل تم يا محمد وأنا من الحياء ما اقدر أقول لا و قلت تم ودي افتك منه .. بس إيه هين إن رحت لم عزيمته خله يخسر ويتكلف ماني رايح والله لو يشيلوني بكلبش بكيفه من قاله يسوي نفسه رجال وكريم ويعزم .

المهم يالله بالله تعشيت أتغصب اللقمه من الحياء حتى إن بعض اللحم امضغه بسنوني ولا يمضغ واضطر اني ابلع الرز بس واترك اللحمه بفمي ثم اكل عليها رز مرة ثانيه وعلى هالحاله يعني كل قطعة لحمه اكل معها رز على خمس دفعات ..لين بديت أحس إن عضلات الفم عندي خبطت ما عاد تستحمل الآكل ..

المهم خلصو الرجال من العشاء وجلسو ينتظروني أقوم علشان يقومون ..وأنا ادري وش يبون بس من العناد جلست ما قمت ..و أخر شيء قمت من العشاء ولا قلت انعم الله عليكم ..اجتمعت عندي ربكه وعناد وقلت والله ما أقولها قمت من العشاء سكاتي ورحت اغسل بالمغاسل ..

ورحت للخيمه وجلست اتقهوى واجتمعوا الرجال بالخيمة ..وقعدو يسولفون مع واحد منهم توه جاي من الرياض ويقولون له يابو فلان متى جيت من الرياض ومن هالحكي وهو يقول والله مشيت الساعة خمس العصر ووصلت الساعة تسع للدمام..وقال واحد منهم سلم على محمد تراه سكن هو واخوه عندنا وقال الرجال هلا بمحمد وشلونك عساك طيب ...و أنا من الربكه وبنفس الوقت ودي أسوى نفسي اني اسولف اختلطت عندي الافكار إن هالرجال توه جاي من الرياض وانه يقولي وشلونك وش ابرد عليه ...... ومن الربكه ابرد عليه و أقوله أنا طيب وبخير ...قلتله كم تمشي مع طريق الشرقية ..

الرجال قعد يطالع فيني مستغرب من ذا الحكي ..يعني واحد ضيف غريب تسأله وشلونك عساك طيب ..ويقول كم تمشي مع طريق الشرقية .....بس اشوا صرفها وقال امشي ميه وستين واشوفه يبلع الضحكه ما وده يضحك بوجهي ...

المهم طلعت من المخيم وتجرأت شوي وقلت أكرمكم الله بأمان الله ...واللي يقول بدري والي يقول القهوة عندي بكره وأنا معطيهم ظهري والبس جزمتي ولا رديت عليهم أشكل ...والله واروح اركب السيارة وامشي واقول بنفسي الشرهة ما هيب عليكم الشرهه علي أنا الي حاضرن عزيمتكم ياهالبقر.. مالت عليكم وعلى عشاكم ... والله لو أنا حاكم ولي سلطه اني لا أبيدكم إبادة جماعية كلبوكم انتم وحريمكم وعيالكم... مع أن مالهم ذنب ولا سوى أحد منهم شيء غلط ....

وسلامتكم وانتهت الحتوته ...
ولاتصدقون تراها قصه مــنقــووووولــه

__DEFINE_LIKE_SHARE__

AD_Lover · 11-10-2009, 02:56 PM

تسلميين ع القصه ..

ربي يعطيج العافيه ..

وتقبلي مروري .. __DEFINE_LIKE_SHARE__

Дјறàl Диsǎήһ · 11-10-2009, 07:42 PM

[grade="00008b ff6347 008000 4b0082"]السلام عليكم ورحمة الله وبركاته

موضوع رائع و قيم
و طرح رااقي و مبدع
جهد تشكرين عليه
ربي يسعدك خيتوووووو على روعه موضوعك
ألف شكر عزيزتي على رقي مانثر هنا

ايما
سلمت أناملك على مانثر قلمك
دمتي محلقه بإبداعك
لا خلا و لا عدم يالغـــلا

مع ودي و باقة وردي . ..*اجمل انسانه*..[/grade] __DEFINE_LIKE_SHARE__

ريـــف.. · 11-10-2009, 09:49 PM

x

.

.

موضوع حلو يآعسسل
آي والله يآشين العزآيم كلها رسميآت ومجآمله ~

يعطيك العآفيه

’’

تسلملي هالديآآت ..

مآننحرم^^ __DEFINE_LIKE_SHARE__

З k a a S h · 11-10-2009, 10:08 PM

السلام عليكم ..

ههه ،، شكلك عانيت من هاي الليله

بس صراحه موقف لا يحسد عليه

خاصه انك رايح لناس اول مره تشوفهم

و يشوفونك ..!

تسلم حبوب على الطرح

السموحه

© __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
حق العزايم حق التوزيعات حق رمضان .. اقربوا شوفوا	محروم.كوم	منتدى أخبار المواقع والمنتديات العربية والأجنبية	0	05-20-2010 01:40 PM
اللي يعرف مقهويين في العزايم في العين	محروم.كوم	منتدى أخبار المواقع والمنتديات العربية والأجنبية	1	03-31-2010 01:25 PM
بشرى سارة لاصحاب العزايم	Bu" 7amDan	بيع و شراء و عروض التجارية	4	05-23-2009 07:58 PM
والله والله والله أتمنى أن يحصل كل سعودي على أعلى الوظائف	محروم.كوم	منتدى أخبار المواقع والمنتديات العربية والأجنبية	0	04-22-2009 09:30 AM
اللي ينقلوون المواضيع والله موضوع مهم جداا مهم والله مهمم بسررعه ادخلوو...والله مهم	سَوّافْ	الإستراحه العامة	88	07-15-2008 05:36 PM