| ||||||
| مشاهدة نتائج الإستطلاع: ~»{ڜۈ رآيڱمِـ بآڵقڝـۂ ? .. | |||
| طــڕڕ .. ڱڜــــخـــۂ .. فنتــڱ ~ |     | 57 | 90.48% |
| ڕۈؤۈع‘ـــــۿ .. حڵــۈۿ .. مِـمِــــيزۿ ~ |    | 6 | 9.52% |
| آۈڱــيۿ .. مِـآڜـي حـآڵۿآ .. مِـحــآۈڵـۂ جيڎۿ ~ |    | 0 | 0% |
| المصوتون: 63. أنت لم تصوت في هذا الإستطلاع | |||
 |
| | LinkBack | أدوات الموضوع | انواع عرض الموضوع |
| |
|
#1
04-21-2010, 10:54 PM
| |||
| |||
 سلمتن فديت روحكن [ l3bt-mbd3 , معذبة الوصف , آلغنآه ] ع ردودكن و ع آلمتابعة ماقصرتن وآلحين بنزل لكن البآرت 27 ^^ .. __DEFINE_LIKE_SHARE__  |
|
04-21-2010, 10:58 PM
| رقم المشاركة : [ 2 ] | |
| عضو فعال  | آلبآرت آلـ27 .. ]
__DEFINE_LIKE_SHARE__
------------------------- اليوم: الاثنين.. المكان: غرفة مهرة.. الوقت: الحادية عشره والنصف مساءا.. --------------------------- (مهرة).... اسندت ويهي على كفوفي وانا اراقب سمجتي اليديده وهي ادور وادور في الحوض الصغير... كانت حلوه... وفرحت بها وايد... والحين يالسه افكر شو اسميها..!!.. ياترى ان كلمتها بتسمع مثل باقي الحيوانات؟...والا السمج مايسمع بسبب الماي؟؟.. تحول تفكيري بالتدريج لشيخه اللي يابت لي هالهدية... ومن شيخه لسهيل والكلام اللي سمعته منه وهو يتكلم مع شيخه...!!.. ابتسمت يوم تذكرت كيف كان شكله يوم طلع وحصلني واقفه عند الباب.... قال لي.. سهيل: شو تسوين انتي؟ ساعتها قلت له ببراءه مصطنعه.. مهرة: انته قلت لي تسمعي...!! سهيل: وانتي ماصدقتي..!.. ابتسمت ابتسامه واسعه وانا مستانسه بالكلام الي سمعته منه لشيخه... وهو المسكين احمر ويهه حرج وراح حجرته وماطلع منها لين الحين ...يمكن رقد..لكن حتى العشا ماتعشى لانه شيخه تعشت ويانا...!!.. ساعتها يوم دخلت على شيخه حصلتها منعفسه فوق تحت...تبتسم بتوتر ومحمره... صحيح انا ماكلمتها عن الموضوع اللي دار بينها وبين سهيل..لكن تمين من ارمسها تسرح...وتفكر... !! انا ماعرف شو هو الحب او كيف الوحده ممكن تحب شخص...لكني حسيت اني اشوف الحب جدامي يطفح من عيون شيخه..!!... هل من الممكن انها حبته بمجرد انه كلمها عن الخطبه..؟؟ والا هي تحبه من قبل..!!!.... مادري... ما انتبهت لهالشي من قبل... للحظة وحده بس حطيت نفسي مكانها... باني متزوجه او مخطوبه..واحب شخص معين... لكني رجعت وصرفت هالفكره نهائيا من بالي...!!.. مش كل الرياييل مثل خواني... صحيح خواني كل حد وسيئاته اكثر من حسناته....!...لكن بعد يتمون خواني... واحبهم.. لكن اني اتحمل شخص غريب عني ايي ويسوي عمره ريلي ويتسلط علي ويطالبني بالاحترام والمحبه..!!!..لالا يخسي.. شحقه ابلي عمري ..!!.. جذي احسن لي.. مفتكه.. فجاه انفتح الباب بكبره وبخشوونه.... شهقت انا من الخوف وقمت من يلستي.. مهرة: بسم الله ...ســـــــــيــــــــف...!!!.. ضحك سيف ظحكه حلوه زينت ويهه.. سيف: ههههههههه يالذلاله...شفيج.. مهرة: اوووووف...انته وخوانك غير شكل ماتعرفون ادقون الباب..!!.. سيف: ليش داخلين على حريم نحن ندق الباب..؟؟ مهرة: لا داخل على واحد من الشباب... شو بعد ماتشوفني حرمه جدامك بنت ولي خصوصياتي؟؟.. طنشني وبحلق في السمجه والحوض اليديد...تقرب منه وقعد يطالعها بفضول... سيف: حلييييييييييييييلها.... من وين يبتيها؟ مهرة: شيخه يابت لي اياها هدية... سيف: اهاااااااااااا.... انزين سمعي مهرووه... ويلس عالشبريه وخش ايده في مخباه يطلع شي....وعقبها عطاني كاسيت (شريط) صغير.. وقال لي بابتسامه وسيعه... سيف: سمعي هذا.. يلست عداله عالشبرية وخذت الشريط... مهرة: شو هذا... سيف: انتي بس سمعيه... وقوليلي رايج... بروحج بتعرفين منو انا منهم لانه فيه ذكر اسامي قبل كل اغنية... عقدت حياتي..!!!.. شووووه.!!!!.. مهرة: سيف...شو تقول انته؟... أي اغاني أي ذكر اسامي ...شو مسوي بعد.؟!.. سيف: مب مسوي شي ابا اسمعج بس حرام؟... مهرة: تسمعني شوووه؟ سيف: صوتي.. مهرة: تغني.؟!!!!... سيف: اوهوووو قعده شبابية عاديه يابنتي يالسين نلعب بس المهم انتي سمعيه وباخذه عنج باجر وعطيني رايج...بس هااه...بيني وبينج ومايطلع ولا تخبرين حد عنه... وكانه موافقتي مضمونه... خلاني وطلع من الغرفه قبل مايسمع ردي عليه...شكله بيروح يرقد... اطالعت الشريط برعب... ياويلي ويلاه من هالولد اللي كل يوم شي... امس زقاره واليوم غنا... وليته ودر الزقاره بعد لاني شميته في ثيابه اليوم رغم اني ماشميتها فيه الايام اللي طافت...الظاهر رجع لها ...!!.. او قعد عند حد ثاني يدوخ ...ولصقت الريحه فيه...! الله يستر من بلاويك ياسيف...! ------------------------------- اليوم: الثلاثاء... المكان: المستشفى.. الوقت: العاشره صباحا.. ------------------------------- (ناصر)... وصلنا غرفه مايد..مديت ايدي وفتحت الباب لامايه اللي كانت يايه وياي...دخلت قبلي وانا ترييت لين ماتقولي ان الدرب امان... ام محمد: تعال ابويه محد غريب...!! تحنحنت ودخلت الصالة الملحقه بغرفه مايد... هناك حصلت يدووه..وام مايد...ميثا حرمه اخوي مع عيالها سلطان الصغير وشمووس...واخيرا نوره... اللي من شافتني نزلت عينها للارض على غير عادتها...تلومت.. الظاهر كلامي ياب نتيجه... لاباس فتره وبتتعود عالوضع... حطيت الكيس اللي محملتني اياه امي عدال الباب..اللي كان فيه ريوق وفواله وغيره... ناصر: السلام عليكم... تقربت وسلمت على يدوه وحبيتها على راسها... ام سلطان: مرحبتيين الساع بالغالي..شحالك فديتك؟ ناصر: بخير الحمد لله يدوه شحالج انتي..وشو اصبحتي؟ تبادلت السلامات الرسمية مع الكل حتى نوره ماقصرتها سلمت عليها برسمية وردت هي بعد علي برسمية شديده...!!... شماس يوم شافتني ابتسمت ابتسامه وسيعه وطلعن ظرسين صغار على وشك انهن يكتملن.. ورفعت ايدها فوق تباني اشلها... ميثا: ههههههههه شوفي امايه...شوفي شقايل اتخبل على عمها... ظحكت انا ومديت ايدي وشليت شماس اللي تمت تلعب باذني بصبعها الصغير وهي تصدر اصوات غير مفهومه.. ناصر: ههههههههه فديتها انا...ماتنلام اصلا...مب الا هي...كل البنات يتخبلن علي...!!! نورة اللي كانت تشرب ماي من كوب صغير بغت تختنق يوم سمعت كلامي هذا....التفتنا لها كلنا مستغربين...اما هي فتمت تسعل وتسعل... ام مايد: حلال حلال... وبعد ما انتهت نوبه السعال... مسحت نوره دموعها اللي طلعت بسبب الشرقه..وقالت بصوت واطي.. نوره: سوري..احم...الله يحلي ايامج امايه.. التفت عنها واطالعت ام مايد ... ناصر: مايد واعي؟..بسير اشوفه.. ام مايد: هي نعم واعي مايد ... ناصر: زين..عن اذنكم.. طلعت من الصالة وتوجهت لغرفة مايد وانا الاعب شماس وارمسها وهي مب فاهمه شي... كانت غرفه مايد مفتوحه.. دخلت وانصدمت بيوسف متفيزر مع مايد وداق سوالف معاه... ناصر: السلام عليكم ورحمة الله... ردوا علي السلام..تقربت من مايد ووايهته.. ناصر: هاااه مايد ..شو الهبات اليوم ان شاء الله احسن.؟؟ مايد: الحمد لله بخير لكن هالجتف لعوزني مارمت ارقد منه... عقدت حياتي باسف... وانا مازلت احس نفسي السبب في هالحادث.. ناصر: يعورك وايد.؟؟...وراسك؟.. مايد: لا الحمد لله راسي مافيه شي لكن مازلت احس بخدر فيه.. وانته شو حالك؟؟.. سحبت لي كرسي عدال شبرية مايد ويلست ويلّست شماس على ريولي وعطيتها سويج سيارتي تلعب به وتتسلى.. ... ناصر: الحمد لله بخير وسهاله.... (نقلت نظري ليوسف).. وانته شو تسوي هني احيدك ساير الجامعه..!!.. يوسف: حظرت محاظرة الصبح وعقب ييت ..وبيلس لين ما ايي ابويه الظهر ....وعقب برد الجامعه... ناصر: وابويه وين..؟؟ يوسف: يقول بيسير يعابل في سيارة مايد.... ناصر: اهااا...شحقه محمد مايسد عنه..!! يوسف: مادري والله محمد وايد شاغلينه في الشغل هالايام...!!.. مايد: وانته ناصر شو تسوي في العين.؟؟.. وراك سفر..!!.. ناصر: همممم...والله يامايد شكلي باجل السفر.... (التفت لشماس وقلت بسرعه)..لالا حبيبي اخ لا تحطينه فحلجج..!.. مايد: شحقه تاجل السفر عاد.؟؟..انته مجهز كل شي وحاجز... ناصر: ماقدر اسافر مايد وانته بهالحاله..يوم تقوم بالسلامه بلحقهم... هز مايد راسه برفض.. مايد: لا... سافر اليوم وماعليك مني انا عقب يومين ثلاثه بظهر مافيني شي غير العافيه... ناصر: بس يامايد.. قاطعني مايد وقال... مايد: لا بس ولا شي... لا تخليني احلف عليك... تحيدني ماحب حد يتعبل مني زود والله اتظايج... وبعدين انته ماقصرت ويايه ولو مب انته موجود وقت الحادث مادري شو بيصير بي...!!.. سكت عنه وانا افكر..باني اذا ماكنت موجود على ذاك الخط كان الحادث ماصار اصلا...لكن سبحان الله هذي ارادة الله وحمد لله يت سليمه وبسيطه... ناصر: على راحتك... بس من احين اقولك بسافر وانا مب مرتاح... مايد: قلت لك انا مافيني غير العافيه روح واستانس حتى اتصل يوم بتوصل وبتشوفني بخير مافيني شي.. دام هذا رايه ومصر عليه... عيل لازم اني اروح لبوظبي عشان اروح مع عبدالعزيز وعلي ... ناصر: يوسف بتوصلني؟... لاني ابا اخلي سيارتي في العين عشان ينظفونها خايسه دم داخل.. يوسف: الحين..؟؟.. والله ياناصر مادري انا وراي عرض اليوم في المحاضره الساعه اربع.. وابويه قال لي ايلس بعد.. ناصر: خلاص بتصل بمحمد بخليه هو يوديني... يوسف: اسمحلي ناصر والله لو ماورايه شي جان وديتك... ناصر: ادريبك ماتقصر يوسف ماعليك... شماس قامت تتظايق وتتحرك ...شليتها وطلعت عن الغرفه اوديها لامها... ويوم دخلت الصاله حصلتهن على حالهن يالسات ويسولفن... ناصر: اندوج بنتج... الا عشقه..شويه وعقب تزهق مني... ظحكت ميثا وخذت شماس فحظنها... ناصر: ميثا وين محمد.؟؟ ميثا: في الدوام... ناصر: زين... امايه تراني بسافر اليوم... حسيت كل العيون تتوجه صوبي باستغراب... حتى نوره...اللي تركت كل شي من ايدها وبحلقت فيني... ام سلطان: وابويه ياولدي وين بتسافر وين بتروح عنا وهذي نحن حالتنا..!!!!.. ابتسمت... هالعيوز دوم تبالغ... اللي يسمع يقول ميت عندهم حد لا سمح الله..!!... ناصر: يدووه بغيت اني اأجل سفري بس مايد ماطاع مووول..وطال عمرج بسافر سوريا اغير جو شوي انا وربعي... ام محمد: انزين فديتك اجله يوم يومين... وعقب الحق ربعك... ناصر: بغييت والله يامايه لكن مايد ماطاع مول...شوية وبيحلف عليه اسير.. اشرت لي يدووه بايدها المحنايه وعقب حطت ايدها عالارض وادق عليها تباني ايلس عدالها... ام سلطان: تعال انته تعال هنه انا بتخبرك..!!.. ظحكت انا وظحكوا كلهم على حركه يدووه...وقلت اكيد بتسويلي تحقيق...ييت ويسلت جدامها... وفعلا فتحت معاي تحقيق ... الا وين بتسير... وشو بتسوي...وويا منوووه؟.. وعيال منو ربعك؟... من عرب والا لا... معرسين والا لا... ويوم جاوبتها عالسؤال الاخير قالت ام سلطان: هذيلا كلهم معرسين انته وين تبا داير من بينهم ماعندك حرمه..!!!.. ناصر: يعلني ماخلى من هالمنطق هذا... يدوه مابيشلون حريمهم بنسير رواحنا... ام سلطان: اسميهم مافيهم خير ربعك جان بيخلون حريمهم وبيسيرون عنهن يتحوطون..!!.. ناصر: والله انتن يالحريم مادري شو تبغن بالظبط.. تسحتن الريال سحااااات وتبنه اربع وعشرين ساعه مجابلنكن..واذا جابلكن تقولن له اطلع شو هذا اف زهقنا من مجابلك...واذا طلع قلتن له ياحافظ عليك انته مول ماتقعد في البيت ولا تدري عن هوا دارنا.... عنبوو خلونا شوي نعيش حياتها نتفرج عالمناظر ونشم هوا بعيد عنكن..!!!... سكتن كلهن يطالعني مب عايبتنهن رمستي....فجأه مدت ايدها يدوه وظربتني ظرب... لكن كله ماحسيت فيه وانا اظحك عليها... ام سلطان: قم ...قم منييه مسود الويه ماتستحي...!!! هذا انته مب معرس هاذي رمستك شقايل عيل يوم بتعرس الله يعينها حرمتك...!!.. ناصر: مالكم انتوا غير هالطاري..؟!!... قضية عرسي صارت اهم من قضية الشرق الاوسط والعراق.. مسحت يدوه على ويهها تهددني... ام سلطان: هذا ويهي ان حد يوزك انته..!!!... ناصر: وين تمسحين على ويهج بعد يدوووه وين تبين ماعندج لحية..!!.. تلفتت يدوه حواليها بشكل يظحك.. ام سلطان: وينها عصايه هي..!!!...عطوني اياها بأدب هالولد...!! مت من الظحك عليها وقمت عنها....انا ولد..!!..ريال شكبري خلتني ولد ولااا بعد تبا تادبني... ناصر: محد قالج تيلسيني وترمسيني... ماتدرين يعني اني طالع عليج ملسون..!!.. ام سلطان:انا ملسونه.. عنبو هالطوله لك ماتستحي صدق... ناصر: هههههههههههههههه...ذكريني الوي عليج قبل ماسير... ام سلطان: ماباها لويتك انا روح ...ياربي من هالولد..!!!... وخليتهم وسط الضحكات وانا كنت اظحك بعد عليها وطلعت عنهم برا القسم...والله طماشه يدوه صراحه...!!.. وقفت في الممر اتصل بمحمد عشان ارتب وياه وخليه يوصلني لبوظبي قبل موعد الطياره... وبعد مااتفقت معاه عالترتيبات ..رجعت ادخل الغرفه في نفس الوقت اللي وصلت فيه بنت عمي كنه مع الخدامه الي شاله شنطه صغيره الظاهر فيها ملابس لمايد وكيسه ثانيه فيها المزيد والمزيد من الفواله ... اذا ماترسوا الغرفه كلها اكل مايرتاحون هذيلا..خليتهن ورحت عند مايد ويوسف... ------------------------------------ اليوم: الثلاثاء... المكان: المستشفى.. الوقت: الثانيه الا ربع ظهرا.. ----------------------------------- (يوسف).... قمت من مكاني وسلمت على مايد وخليته مع ابويه... مسكين ابويه محد بيقعد غيره ...محمد راح يوصل ناصر بوظبي ومابيرجع الحين...وانا مضطره اروح اجهز لمحاضرة الساعه 4... عندي عرض وبرزنتيشن مايندرا اذا قدرت اخلصهم مع خالد او لا... وصلت للغرفة اللي يالسات فيها الحريم... وسمعت كنه محتشره.. كنه: شووو هذا احين شو بسوي انا..؟!!!.. نوعا ما استانست لانها متظيجه... وتمنيت "بخبث" ان المشكله اللي هي فيها ماتنحل... عشان شوي تتادب..!!!.. تحنحنت ودخلت الغرفه.... التفتوا كلهم يطالعوني لكن انا طنشت الكل واطالعت امايه... يوسف: امايه انا بروح تامروني بشي؟ ام محمد: وين بتسير ابويه؟.. يوسف: بسير البيت باخذ اغراضي وبروح الجامعه.. ام سلطان: الجامعه بتسير؟؟.. عيل وصّل بنت عمك صدعت لنا روسنا... بطلت عيني منصدم... ونفس الشي كنه... كنه: يدوووووه..!!!.. يوسف: جي مب مختلط نحن يدووه جامعتهم غير ونحن غير... ام سلطان: انزين مب هي هذي الجامعه اللي جدام توام؟ الا هني عدالنا.. قلت بقهرمكبوت.. يوسف: هي يدوه.. ام سلطان: عيل وصلها بطريجك... مت من غيظي... احين انا ادعي ان مشكلتها ماتنحل اخر شي يشوفون الحل فيني انا..!!!!!!... ماقدر اتحمل وجودها فسيارتي بتطنز مره ثانيه عليها ..!!!. وهالمره عاد شو بيردني عنها ما اظربها..!!.. بروحي انا مب ناقص وشال عليها فخاطري وايد...اوف.. يوسف: ان شاء الله يدوه... ام مايد: برايها ابويه اذا مافيك خلها.... يوسف: انا عادي عندي خالتي... ام سلطان: بارك الله فيك... حسيت بكنه متظايجه... تغشت وقعدت ادور شنطتها عشان تطلع معاي... وعقب ماحصلتها قالت لنوره.. كنه: يالله نوره نسير... نورة: شووه؟.. لا انا مب سايره وياج.. بيلس هني... مالي حاجه في البيت اسير هناك اتم يالسه اروحي... كنه: نورووووه...!!!!.. ام مايد: سيري الريال يترياج ربّه مستعيل والا شي وانتي يالسه تتشاورين..!!.. كنه: انزين الخدامه..!!.. يالله روز.. ام مايد: وين تبيبها محتايينها نحن هني.. ام سلطان: يابنتي سيري صدعتيلنا روسنا سيري..!!!.. تاففت كنه ومشت ويوم وصلت عدالي فتحت لها الباب عشان تمشي وانا في عيني نظرة سخرية... ورطتني بمشكلتها.. لكن ماعليه هذا وقته عشان اطفربها... طلعت وراها وسكرنا الباب ورانا .. مشينا خطوتين وعقبها قلت وانا اطنز عليها.. يوسف: شو فاكره نفسج حلاوه تتحسبيني باكلج..!!..(وعقب قلدت صوتها بسخريه) ..يالله نوره...يالله روووز.... !!! وقفت كنه واطالعتني من ورا الغشوه.. كنه: شويعني تباني اسير وياك رواحنا محد عندنا..؟؟ عيــــــب... مشيت عنها وقلت... يوسف: اووووه تعرفين العيب... شي طيب...!!.. لحقتني كنه بخطوات سريعه.... كنه: اكيد اعرف العيب وحاشمه نفسي... يوسف: طوفي طوفي... وصلنا للمصاعد.. ويوم فتحته كان فيه هندي مسكين واقف على طرف...ركبت انا ويوم التفت حصلت كنه واقفه بعدها برا المصعد ... يوسف: دخلي.. كنه: ماتشوفه ريال في المصعد وين تباني اركب..؟!!.. يوسف: لا والله... لا اسمحيلي انا اعرف العيب وبعدين اخاف منج بصراحه ماقدر اركب وياج المصعد رواحنا لازم معانا حد....!!!.. عرفت انها مقهوره....تمت واقفه مكانها وتعابيرها غير معروفه بسبب الغشوه...جان اصرخ عليها.. يوسف: اركبي خلصيني... خافت كنه وركبت ...تسكر الباب وانا اقول.. يوسف: مشكله دلع بنات ماصخ بعد...!!.. من طريقه كنه بتكتيف يديها حسيت انها مب عارفه بالضبط تزعل او تعصب... او الثنينه مع بعض...!!.. ماعليه مابوقف الا يوم اصيحها فيوم...وعقب بسكت عنها...!! انفتح المصعد وطلعنا منه...تعمدت امشي بخطوات واسعه وسريعه...وكنه تحاول تجاريني لكن ماتقدر..بالتالي تاخرت عني على بعد خطوات...التفت لها وقلت لها وانا اتصنع العصبية..لكن من داخلي اضحك عليها... يوسف: بتمشين عدل والا..؟!.. قالت لي بصوت يترجا ويتمسكن... كنه: يوسف عاد الكندوره مافيها فتحه وماقدر امشي بخطوات واسعه انته تتعمد تسوي جي... يوسف: لا تتوقعين اني بتمخطر شراتج...امشي بسرعه... قالت بصوت واطي.. كانها تكلم نفسها...لكني سمعتها على أي حال... كنه: اووفففففف... انذلينا ذل على هالتوصيله..!!. يوسف: شو قلتي..؟!!!.. كنه: ماشي..ماقلت شي ... كتمت ابتسامتي غصب لين ماوصلنا السياره... اللي كنت عارف من قبل انها مبهدله عالآخر هالمره.. في السيت الوراني مجموعه كتب وسفر..وفيها جهازين كومبيوتر مال ربيعي يباني اشوف شو المشكله معاهن... باختصار.. السيت الوراني لايث من الخاطر... ركبت انا في كرسي السايق وترييت كنه تركب بعد..فتحت كنه الباب الوراني وتمت مبحلقه في الفوظى.. وقبل ماتقول أي شي.. يوسف: كلمه وحده عن لعوزه سيارتي بطراق... كيفج عاد...!!! سكتت كنه وهي تدري اني ماداني حد يطنز بسيارتي اللي دوم لايثه...وبعدها قالت بهدوء.. كنه: اوكي مابقول شي...بس وين تتوقع اركب؟؟...بين هالفوضـــ... آآه...بين هالاغراض ؟؟؟!!!.. كتمت ابتسامتي للمره الثالثه.... الاخت تتريا مني اعزمها تركب جدام عدالي... ده بعدك..!!.. قلت لها ببرود.. يوسف: ركبي في الدبه...!!.. سكرت كنه الباب بعصبية ..ومشت..توقعت انها يايه بتركب جدام وبتخلصني...لكنها ولدهشتي التامه... تخطت سيارتي وعبرت الشارع ناويه ترجع للمستشفى....!!!! شو اقولكم.... ساعتها صدق نقعت من الظحك بصوت عالي...!!!... لبست نظارتي الشمسية بسرعه وبطلت الباب وركظت وراها....وقفت جدامها .. يوسف: خلاص خلااص الا اسوي سوالف عليج ردي السياره بوصلج... لكنها تخطتني واجاهلتني وكملت مشي... يوسف: كنوووه..وين سايره.. كنه: خز عني.... كانت تمشي بسرعه ورافضه نهائيا انها توقف وتكلمني...مديت ايدي ومسكت شنطتها وسحبتها على ورا... ماقدر امسك ايدها او أي شي..وهذا اللي وصلت له ايدي..!!.. كنه: قم عني لا تصكني... يوسف: ماصكيتج انا... كنه: خل شنطتي خلني ارووح ماريد اروح وياك... يوسف: بتسيرين غصبن عنج....تعالي... مشيت وسحبت شنطتها وراي وهي متمسكه في الشنطه وتمشي... كنه: طالع..!!.. اييه ماريد اسير وياك والله خلاص غيرت رايي....فجني... يوسف: جب كنوووه... امشي وانتي ساكته... عنبو ما اتحملين سوالف..!!.. كنه: هذي مب سوالف... يوسف: متى ماتبين انتي سويتيها سوالف لو هي تعور القلب...ومتى ماتبين سويتيها مب سوالف مع انها عادية جدا... سكت انا ولعنت عمري يوم زل لساني..... احين بتسالني شو اقصد...وليش قلت هالكلام..وبتسحب مني الرمسه لين تعرف اخر شي اني انا اللي كلمتها ذاك اليوم مب منى....!!.. لكن كنه سكتت....وماقالت شي...مشت وراي بهدوء تام....في الاخير فجيت شنطتها يوم شفتها مستسلمه وانها خلاص بترجع معاي السياره... يوم وصلنا السياره رحت وفتحت لها الباب اللي عدال مقعد السايق وترييتها تركب وعاملتها مثل مايعاملون الاميرات بكل سخرية... يوسف: تفضلي سمو الشيخه... كنه: هههههههههههههههه سبال... يوسف: ماغيرج... عاد صدقتي عمرج اشوف... كنه: بسم الله.. ركبت كنه وسكرت الباب وراها ودرت حوالي السياره وركبت في مقعد السايق .... شغلت سيارتي وحركتها...وانا اتنهد... احس اني بذلت مجهود.. يوسف: وين دريولكم.؟؟ كنه: سار اييب لطوف وعويش من مدارسهن... يوسف: اهااا...شو...شو تسوين...؟؟!!.. كانت كنه تفتش في سيارتي...وتفتح السدات وحالتها حاله.. كنه: يعيبني افتش بالسيايير.. يوسف: هااااي انتي...ياللي تعرفين العيب ....احشمي نفسج على قولتج ووفري عليه هزبه محترمه... لا تفتشين...!! كنه: ادور شريط عدل...!!!.. يوسف: كله ميحد ماعندي اللي تبغينه... بحط لج اف ام... وحطيت لها اف ام لكنها ما اعطت أي اهمية للموضوع واستمرت بالتفتيش... يوسف: كنوووووه..!!.. مدت ايدها داخل السده اللي جدامها وطلعت عطري المفضل... كنه: الله...هالعطر احبه... هذا اللي تتعطربه دوم صح..!!.. عقدت حياتي...شو دراها هذي.. دام اني ما انزل لها من زور شحقه مفتكره تشم ريحة عطري وتعرفها.؟؟ وفوق هذا قالت احبها..!!!...غريبه هالبنت... يوسف: هي هذا هو.. فتحته كنه وتعطرت شويه منه ورجعته....ظحكت غصبن عني...تتعطر بعطر رياييل..!!!.. يوسف: شليه جان تبينه. واصل..! كنه: لا شاريه مثله في البيت... يوسف: شاريه عطر رجالي..؟؟؟.. شو تبينه؟.. كنه: اشمه بس... يوسف: هالعطر غالي...شارتنه بس عشان تشمينه؟؟!!!!.. كنه: هي لاني احبه ماقدر اتعطر بعطر رجالي... يوسف: مب صاحيه انتي... ظحكت كنه ورفعت راسها تشوف الشارع عقب على طول اختفت ظحكتها.. كنه: وين ساير؟... يوسف: الجامعه... كنه: ماريد اسير الجامعه الحين... صارت عندي العصبية فووووول... يوسف: شووووووووووووووه..!!!.. توج تقولين بسير الجامعه..!!!! كنه: بسير البيت اول بعدين الجامعه...مايبت كتبي ولا شي وبعدين مابروح الجامعه بجلابية..!!!.. مت قهر...بعدني بوصلها البيت وبردها الجامعه..!!!. بيتهم بعيييييييييييد... اووووف..وقفت عدال الرصيف خارج البوابه من غيظي.. يوسف: نزلي...نزلي لابركةٍ فيـ... عدوينج انزين... !!.. انزلي... كنه: ههههههههههههههههه...يوسف الله يرضى عليك حرك السياره .... يوسف: مابااا... كنه: بلييييييييييز.. وبعد تافف حركت سيارتي وزدت سرعتي ساير صوب البيت.. بيت يدووه...عشان ست الحسن والجمال كنه تقدر تبدل ملابسها وتتعدل وتيب كتبها واوصلها الجامعه....شو هالقهر...!!!.. ---------------------------------- اليوم: الثلاثاء.. المكان: بيت ام سلطان.. الوقت: الثانيه وعشر دقائق ظهرا... -------------------------------------- (كنه).. دخلت حجرتي بسرعه وسكرت الباب وراي وانا قلبي يدق مثل الطبل... فديييته فديييييييته كيف يخبل.... حتى لو ينازعني ويشرشحني اموت فيه...ياربي كيف بتحمل طريج الجامعه مره ثانيه وانا متماسكه..!!.. بدلت ثيابي بسرعه ودخلت الحمام اغسل ويهي عالسريع.... يوسف عطاني عشر دقايق...طلبت منه ربع ساعه بس عشان اتجحل وماطاع قال لي مب لازم تجحلين سيري جلحا ملحا... ماعليه بحط الجحال والشادو في شنطتي وبتجحل في الجامعه...!! طلعت من الحمام ورحت التواليت ارتب شعري...طاح نظري عالعطر اللي شارتنه مخصوص بس لانه مثل عطر يوسف...اللي دايما اشمه فيه... كل ما اشتاق له افتح العطر واشمه واظيع في عالم وردي ماله آخر..ظحكت..زين ماكشفت نفسي جدامه انا الخبله يوم قلت له انه عندي مثله... بس المسكين شكله من خاطر مقهور عاللي قلته له...وحازه فخاطره...عشان يعاملني بكل جفاف... لكن في النهاية عندي احساس غريب باني ماهون عليه.... ياربي كيف احبه... كيف اقدر اخليه يحبني بنفس القدر.... ماظن حتى لو حبني مع ذلك ماظن انه بيحبني نفس ما انا احبه.... اووه..شو يالسه اسوي انا الريال يترياني وانا يالسه احلم هني...!!!.. فتحت الكبت وطلعت بدله خفيفه ولبستها..رجعت البس عباة الجامعة مع الشيله ..حطيت شوية اغراض في الشنطه... شليت كتبي ودفتري وطلعت ركظ... في طريج الجامعه كان يوسف ساكت وهادي... وحسيت بالتوتر يسيطر عالمكان... لازم حد يكسر الصمت هذا.. كنه: آآه... اخوك ناصر وين بيسافر؟ يوسف: سوريا... كنه: اهاااا... غريب سفره فجاه... يوسف: زهق من الروتين بيروح يغير جو.... سكت مره ثانيه مب عارفه شو اقول....ويوم خطر على بالي سؤال رجعت اسال.. كنه: انته عندك جامعه الحين؟ اطالع يوسف ساعته وقال.. يوسف: عندي محاضرة الساعه اربع...بس عندي بريزنتيشن فيها ولازم احضر له... كنه: سوري عطلتك... يوسف: هي عطلتيني..مالت على ويهج.... قال جملته مع شبح ابتسامه على شفايفه الحلوه...عشان جي ماخذت بخاطري وظحكت... وانا افكر باني اشوف في يوسف كل شي حلوو حتى لو ماكان حلو... بس الحق يقال...شفايفه حلوه..!! رن تيلفون يوسف ومسكه... كان واحد من ربعه..وسمعته يذكر اسم خالد...هذا هو الي متعلقه به منى..!!.. الله يعينها... تواعد معاه يوسف انهم يتلاقون في قاعه من القاعات في الجامعه... وبعدها التفت لي وقالي.. يوسف: متى محاظرتج انتي؟.. كنه: الساعه 3... يوسف: وعقب؟ كنه: بنقعد شوي انا ومنى بعد الكلاس وبنرد البيت... يوسف: ماشي يلسه في الجامعه بلا حايه...ردن البيت سيده..وقوليلها هالرمسه قوليلها يقولج يوسف ردي البيت سيده لانه فاظي وامي في المستشفى عندكم مب زين... كنه: ان شاء الله.... وباندفاع مفاجئ قلت له.. كنه: يوسف لاتستوي عصبي مايليق عليك..!!.. عقد يوسف حياته اكثر... يوسف: مزاجي هالايام مايسمح اني اكون رايق... حسيت انه يقصدني بكلامه وباني انا السبب بمزاجه المعتفس... بديت اتندم عاللي قلته....يعني ماكنت اقدر اجاوبه بشي ثاني اخف من كلامي..؟؟... ياربي انا شو سويت..!!! -------------------------------- اليوم: الثلاثاء.. المكان: الجامعه... الوقت: الرابعه عصرا.. ---------------------------------- (مهرة)... طلعت من كلاسي وانا اتنهد مستانسه انه خلص دوامي...فجاه سمعت حد يزقرني... التفت حصلت سلوى... اطالعتها باستغراب... اول مره تترياني بعد كلاس الساعه اربع.. مهرة: اهلييين سلوى...شو تسوين هني.. سلوى: اتريااااااج... يت سلوى وحطت ايدها على كتوفي وهي تمشي معاي... مهرة: خير شو مستوي؟؟؟... كنت مستغربه من انتظار سلوى لي اليوم...اول مره تسويها.. سلوى: ابد حبيبتي بس نسيت اطلب منج وقت البريك شي... مهرة: آآمري... سلوى: اباج تتاخرين معانا اليوم... مهرة: اتاخر؟؟ وين؟ سلوى: هني في الجامعه.. مهرة: شو نسوي؟؟؟ سلوى: حبيبتي اليوم الثلاثاء...وكل ثلاثاء البنات يتاخرن لانه اخر الاسبوع يقعدن ويسولفن ويلعبن ويظحكن ويفرفشن شوي .... مهرة: ماقدر ماقلت لاهلي... سلوى: بسيطه اتصليبهم قوليلهم عندي بحث بقعد في المكتبه شوي وعقب برجع... مهرة: شو تقولين انتي اجذب عليهم يعني..؟!!.. سلوى: اذا كانوا بيتفهمون قعدتج مع ربعج عشان تسولفين وتظحكين قوليلهم الصدق...لكن اذا مابيتفهمون وبيقولولج لا ورجعي..قوليلهم عندي بحث وجي...مابيرومون يقولون لا...في النهاية هم شو دراهم انتي شو تسوين بالجامعه..!!!!.. طلعنا من المبنى اللي كنا فيه ومينا في الممرات... افكر بكلامها..شو اقولهم..!!..اجذب مثل ماقالت سلوى..والا اقولهم الصدق... مهرة: عاد شو بتسووون الا جذي يلسه؟.. سلوى: قلت لج نغير جو نسولف نظحك نلعب..نغلس على بنات..,, يعني..!! بتستانسين مهاري بليز حبيبي تاخري معانا..جربي انزين هالمره اذا ما استانستي لا تتاخرين مره ثانيه... فكرت بكلامها... ليش ما اتاخر..؟؟ اروح البيت شو اسوي..؟!! بجابل منووه..؟ السمجه؟.. مهرة: اوكي.. تعالي معاي عند الكابينات... سلوى: فديت هالويه والله ( وباستني على خدي)...بروح وياج وين ماتبين افا عليج بس... رحنا للكابينات وهناك عرضت علي سلوى اني استخدم موبايلها بدل ما اخسر نفسي.. اطالعتها باستغراب.. مهرة : انا بتصل باخوويه... رفعت سلوى كتوفها ببرود.. سلوى: عادي.. مهرة: رقمج بيطلع عنه...عادي عندج؟ سلوى: ليش اخوج مغازلجي يعني بيرد يتصلبي..؟!! قالت سلوى جملتها ساخره..وبصراحه مارظيت هالكلام على سهيل...سهيل على وشك انه يخطب.. مهرة: لا الغاليه خواني مب من هالنوع... سلوى: ياعمري كل الشباب من هالنوع...عالعموم استخدمي الكابينه على راحتج...!!.. انقهرت..كل الشباب اوكي بس خواني لا...خواني غير..رغم عيوبهم لكنهم مايتحرشون ببنات الناس...مب مثل ذااك الريال...الله يخسه.. رحت للكابينه واتصلت بسهيل... سهيل: آآآلوووه...!! مهرة: هلا سهيل...انا مهرة.. سهيل: هااا مهرة تبيني اييبج؟؟ مهرة: لا سهيل..هممم..اقولك...ربايعي كلهن بيتاخرن شويه يسولفن وجي مابيطولن وايد.. وانا ابا اتاخر معاهن شويه اغير جو...عادي..؟ سهيل: لين متى.. مهرة: مابطول وايد... سهيل: ماتتاخرين اكثر عن المغرب...الساعه ست بوقف عند الباب واحصلج موجوده...تسمعين؟ مهرة: ان شاء الله..مشكور... سهيل: يالله باي. مهرة: باي.. سكرت عن سهيل مبتسمه...والحمد لله اني ما اضطريت للجذب.. رحت مع سلوى للكافتيريا ويلسنا مع الشله... سلوى: لين متى بتتاخرين؟.. مهرة: قال لي حدج لين ست... سلوى: حلوو ساعتين لاباس كبدايه... مهرة: ههههه عاد لازم نستغل هالساعتين احسن استغلال... سلوى: اكيــــــــد... تبينا نشتري كابتشينو..!!.. مهرة: على شرط انا ادفع... سلوى: هممم مب مشكله.. مهرة: صبري بطلع بوكي.. حطيت شنطتي اللي فيها يميع الاغراض عالطاوله..وقعدت ادور فيها على بوكي الصغير.. طلعت كم غرض من الشنطه عشان تعطيني مساحه للتفتيش... مدت سلوى ايدها ومسكت شريط سيف اللي عطاني اياه امس عشان اسمعه..لانه كان من بين الاغراض الموجوده في شنطتي.. حطيته في الشنطه لاني خفت حد يحصله في حجرتي وسيف موصني ما اعلم حد عنه.... سلوى: شريط شوو هذا مهاري.؟!.. مهرة:..آآه..هي هذا شريط عطاني اياه اخويه امس عشان اسمعه... سلوى: منوعات؟ والا لمطرب معين؟ مهرة: لا هذا الشريط مسجلين اصواتهم هم يغنون هو وربعه..تعالي صدق ماسمعته لين الحين وهو قالي اسمعيه لانه بيشله اليوم عني...مابيواحيلي اسمعه في البيت... سلوى: بنسمعه هني شو رايج..؟؟ تعيبني هالسوالف ابا اسمع معاج... مهرة: هههههه اوكي عندج مسجل صغير مع سماعات.؟!.. سلوى: موجود اكيد عالطاوله بس صدعه هني مابنسمع شي.. مهرة : عيل شو نسوي؟ سلوى: نروح غرفتي في السكن...عندي هناك مسجل بنقعد نحن وربعنا وبنسمع الشريط وبنطمش عليهم..شرايج؟ مهرة: مره ثانيه السكن؟ سلوى: ليش حد ظرّج فيي المره الاولى... مهرة: لا ..بس... سلوى: لا بس ولا شي.. هالمره بنسير كلنا وبنستانس هناك..بعدين في السكن براااااد وهني حر.. قومي قومي... قمت معاها بتكاسل وعرضت سلوى الفكره على بنات الشله..حد منهن قال بيسير معانا وحد كانت عنده خطط ثانيه وبيقعد في الكافتيريا... بالتالي رحنا كلنا للسكن...واللي ريحني شوي وجود كذا بنت من بنات العين معانا...يعني السالفه عادي بس انا مصعبه الامور ومكبره السالفه..!!!.. في الغرفه انتشرن البنات بقعدات مختلفه في الغرفه...اللي منسدحه... واللي ماده ريولها... واللي لاصقه بالمسجل.. واللي متربعه... وكلهن ذايبات من اصوات الشباب اللي يغنون... وعجبهن صوت اخوي سيف وااايد...بصراحه انا نفسي انصدمت بصوته ماتوقعته يتقن الغنا لهالدرجه وصوته حلوو جذي...ودق العود بعد حلوو وهذا شي ثاني انصدمت منه...من متى سيف يدق عود؟ متى يحصل الوقت اصلا يتدرب..؟؟..ووين العود اللي يتدرب عليه؟؟.. والله سيف عنده امور وايده مغبايه عنا والله يستر ..!!.. ظحكني البنات وهن متحسفات يوم عرفن ان سيف اصغر مني بسنه...يعني اصغر منهن كلهن...ماعدا وحده قالت لي.. البنت: عادي اخذ واحد اصغر عني بسنه صح؟.. مهرة: ههههههههههههههههههههههههههه مادريبج والله... البنت: ياختي والله جنان صوووته ياحظج على هالاخو..الله يخليه لج ان شاء الله.. مهرة:.. آآميين... بعد ماخلص الشريط رجعته في شنطتي... وقعدن البنات يسولفن عن اشياء مختلفه.. وحده منهن قالت... البنت: هاااااه سلوى بتطلعين الليله..؟؟ سلوى: اكييييييييييد ما افوت... مهرة: سلوى بتطلعين وين؟؟ من السكن؟... مب ممنووع..؟؟ سلوى: أي ممنوع حبيبتي اليوم الثلاثاء... نحن مابنطلع من السكن...لكن بننزل لشارع الحب... بحلقت فيها منصدمه من اللي قالته.... مهرة: شارع شووو؟؟...مافهمت.. ضحكن البنات على بلاهتي وقلة معرفتي...اما سلوى فقعدت تشرح لي.. سلوى: شوفي حبيبتي...مثل ماقلت لج كل ثلاثاء يسون البنات شي يرفه عنهن وينسن فيه تعب الاسبوع كامل... الثلاثاء معروف في السكن ان البنات يتكشخن ويتعدلن..كانهن رايحات عرس..ويلبسن لبس كاشخ..وينزلن تحت في الشارع بين السكنات...وبس..يقعدن ويسولفن مع ربعهن.. هذي تتعرف على هذي ..وذيج تنعجب بهذي...وكذا..تستوي سوالف يعني وربشه... مهرة: شو هذا صدق ماعندكن سالفه... يعني تقعدن في الشارع وانتن متعدلات اخر شي تسولفن..؟؟ سلوى: حبيبتي شارع الحب هذا ماتنزل له بنت الا وهي في خاطرها تتعرف على بنات يداد... مهرة: وبعدين؟ سلوى: اذا شفتي بنت وعيبتج وحبيتي تتعرفين عليها...تسوين لها حركه تفهمينها بانج تبين تتعرفين عليها.. مهرة: حركة مثل شو يعني؟؟ اروح واسلم عليها... سلوى: تقدرين تسوين هالشي لكن بتطلعين رسمية... مهرة: عيل شو اسوي.؟؟؟ بدن البنات الموجودات كل وحده تطلع لي حركه ودخلن في النقاش... البنت 1: ترسلين لها بيبسي او كيك... البنت 2: تروحين تمطين شعرها.. البنت3: او ترسلين لها رساله... سلوى: تقدرين تروحين تبوسينها بعد... البنت4: او تظربينها أي ظربه خفيفه ...المهم تنتبه لج... حسيت ان راسي داير...شو يخرفن هذيلا شو يقولن؟؟ في أي عالم عايشات... مهرة: انزين وبعد ما اسوي هالحركات شو يصير؟؟ سلوى: اذا البنت اللي عيبتج بادلتج الاعجاب...تتعارفن... مهرة: ونستوي ربع؟... سلوى: ههههههههههههههه ياعمري..تستون حبايب...كلوزات... مهرة: وشو الفرق بين هذا وهذا..؟؟ سلوى: الربع غير... والحبيبه غير... الحبيبه اربع وعشرين ساعه وياج..حافظه اسرارج.... تغار عليج من اقل شي... تتواصلين معاها دايما.. يعني اكثر من الربعه بوايد... تحنحنت وانا مسطله من كلامهن... صحيح فهمته...لكني ماقدرت اهـــضــــمــــه...!!!!... مهرة: وانتي سلوى ادورين لج حبيبه؟؟ غمزت لي سلوى وقالت.. سلوى: لاااااه انا اروح اطمش واطالع الحركات واضحك بس... انا اووريدي عندي حبيبه... مهرة: هههههه لاوالله..ومنو حبيبتج هذي ماعرفناها... سلوى: انتي...هههههههههه.. ظحكت معاها ...تحسبتها تمزح.... لكني شفت الجد فعيونها.... ساعتها بس عرفت ليش هالكثر تتصل فيني وتسالني اساله خصوصيه...!!!.. ــــــــــــــــــــــــــــــــــــــــــــــــــ نهاية آلبآرت آلـ27 .. آتريـآ ردوودكم و رآيكم و توقعآتكم .! فدآعة آلله | |
| ||
| |
|
04-30-2010, 08:48 PM
| رقم المشاركة : [ 3 ] |
| عضو جديد | روعه روعه روعه روعه ,. وحليله يووسف تورط بكنه هع ,. كملي حيااااتي بلييز , من متى اتريا الباارت ,. يعطييج الف عاافيه ,. تقبلي مرووري ,. __DEFINE_LIKE_SHARE__ |
|
| |
| |
|
06-17-2010, 02:01 PM
| رقم المشاركة : [ 4 ] | |||||||||||||||||||||
| عضو فعال |
تسلمييين مزيووونه ع المتااابعه الله يعاافيج .. __DEFINE_LIKE_SHARE__ | |||||||||||||||||||||
| ||||||||||||||||||||||
| | ||||||||||||||||||||||
|
06-17-2010, 02:03 PM
| رقم المشاركة : [ 5 ] | |
| عضو فعال | [align=center] البآرت الـ28 ..
__DEFINE_LIKE_SHARE__
---------------------------- اليوم: الاربعاء.. المكان: بيت خلفان.. الوقت: الواحدة ظهرا... ----------------------------- (سهيل)... دخلت بيتنا وانا ماسك راسي واهوس عليه ....فيني صداع حاد..وهالشي اللي خلاني اطلع من دوامي من وقت اليوم... حصلت عمتي يالسه في الصاله... وبعد السلام... سهيل: عمووه عندج بنادول.؟!.. راسي بينقع... آمنه: هي نعم عندي...لحظة بييبلك.. وبعد ماكلت البنادول يلست عالكرسي ارتاح..فكرت اروح انسدح لين مايزقروني للغدا...رغم ان التفكير بالغدا يابلي لوعه الجبد..لاني ماشتهي...لكن مع ذلك احس بطني خالي ولازم اكل شي... لكن قبل ما انفذ اي شي...سمعت جرس بابنا يرن... عقدت حياتي... هذا مب وقت رجعه سيف من المدرسه.. ولا وقت زيارات..!!!... آمنه: منوو ياينا هالحزه؟.. سهيل: مادري...آآآآآآآآآآآه يالتعب اللي فيني... بقوم اشوف منووه..!!.. طلعت من الصاله وسكرت الباب وراي ومشيت للباب الرئيسي...وفتحته... اطالعت الرياييل اللي واقفين جدامي باستغراب تام... ملامحهم مثلنا..اماراتيين اقصد..لكنهم لابسين بناطلين وقمصان.... واحد كبير في السن ...مب كبير وايد ...والثاني اصغر سنا...توه في العشرينات يمكن... سهيل: مرحبا الساع.... اطالعت فعيونهم مستغرب..كلهم لهم نفس النظره...نظره لهفة..حماس..مادري... تكلم الريال الكبير وقال.. الريال: السلام عليكم... سهيل: وعليكم السلام والرحمه ياهلا... الريال: آآآه...هذا بيت خلفان الـ.....؟؟!.. سهيل: هي نعم هذا بيته... ابتسم الريال وقال.. الريال: منوو الريال.؟!... ابتسمت انا بعد رغم اني بصداعي هذا ماكان لي نفس.. سهيل: وياك سهيل بن خلفان.... توسعت ابتسامته وامتدت ايده بحركه غريبه كانه يبا يلمس ويهي او كتفي او شي...لكنه تراجع ورجع نزلها... استغربت...كانه اللي اشوفه فلم... الريال: والنعم ... انا يابر وهذا ولدي مبارك... مد مبارك ايده وسلم علي مع ابتسامه وسيعه.. مبارك: هااااااي... آي مين... شحالك؟؟!!.. عساك طيب؟ عقدت حياتي وظحكت غصبن عني... هالولد صاحب العيون الخضراللي لونهن مايل للرمادي.. غريب شوي...لكن شكله مالوف..!!.. سهيل: بخير الله يعافيك ...ومن صوبك....؟ مبارك: آم اووكي. ربي يسلمك... التفت يابر لولده يطالعه بنظره غريبه...حسيت انها نظره عتاب...!! او مثل الواحد المتنرفز جي.. سهيل: قربوا..حياكم الله.. يابر: نقدر ندخل شنطنا ...التكسي راح مانروم نخليهن في الشارع...!! سهيل: اكيد اكيد... خل عنك انا بشلهن... ورغم اعتراضه لكن انا ومبارك الغريب هذا...تعاونا على حمل الشنطتين الكبار اللي كانن برا..ودخلناهن للحوش عدال الباب...وبعدها قربتبهم داخل الميلس... واتصلت بعمتي قلت لها اطرش الفواله مع الخدامه... وبعدها التفت مرتبك للرياييل...انا ماعرفهم ...اول مره اشوفهم...لكن اشكالهم مب غريبه كاني شايفنها مكان.. يشابهون حد...بس منووه..!!!!.. سهيل: حيالله من يانا... شكلكم يايين على طول من المطار....!! ابتسم يابر وقال.. يابر: صح كلامك... تونا واصلين من المطار...يايين من لندن... !!.. وين ابوك؟ خلفان... سهيل: الوالد مب موجود في البيت حاليا... آآه.. سمحلي عالسؤال لكن..ماعرفتك..انته ربيع ابويه والا شي؟.... ابتسم يابر بارتباك..بينما مبارك تم يطالعني بفضول... يابر: لا انا مب ربيعه... انا ....انا نسيبه..!!.. اختفت ابتسامتي عن ويهي....شو يقول هذا.؟؟..احين يبا يقولي ان ابويه متزوج وحده غير امي.؟؟؟... والا من وين يا هالنسيب هذا..؟؟؟ شو يقول هذا اكيد تخبل....!! سهيل: شوو؟!!...نسيبه؟.. يابر: انته ماتعرفني...بس مادري جان سمعت بي... عالعموم..وين مريم؟... حد غرس سكين في قلبي؟..والا يتراوالي؟.. حسيت بالم ماتتصوروونه.... ليش هالريال ذكر اسم امي؟؟... امي ماتعرفه هذا...هو من وين يعرفها؟ وفوق هذا يقولي نسيب ابويه؟؟.... قلت له بانفعال غير مقصود.. سهيل: شو تبا بامي؟؟؟ ابتسم يابر.. يابر: ابا اسلم عليها...متوله عليها وايد.. تميت ساكت مب عارف بشو افكر او شو اقول.... ركزت انظاري على ويه يابر احاول استشف منه بواطن الامور...احاول اعرف شو يقول هذا وشو يقصد بكلامه وليش يسال عن امي؟؟؟... فجاه قال لي بصوت واطي والخوف واضح على ويهه... يابر: انا خالك يا سهيل... سهيل: لا.. قمت من كرسيه وانا اقول هالكلمه الصغيره اللي طلعت مني بدون ما حس....كنت رافض اللي يقوله ورافض اللي اسمعه باذني...ورافض وجوده هو ومبارك هذا هني فبيتنا....!!.. ليش يا هذا ...يا وعق عليه كلمتين زعزعت كل شي فحياتي كنت اظن اني اعرفه عدل...طلعت مب عارف حياتي زين..!!!... انا خالك.؟؟؟.... من وين طلع هالخال؟.. امي ماعندها خوان غير خالتي...ماعندها حد وماكد ذكرت حد... تراجعت بعيد عنهم بخوف..لكن عيني كانت متعلقه فيهم ... قام يابر وتقرب مني ومسكني من كتوفي بقو... يابر: انا خالك ياسهيل... انا اخو مريم امك... سافرت بريطانيا من 27 سنه..يوم كنت انته فبطن امك...سافرت ومارجعت للبلاد الا فيومك هذا..وما استغرب ان مريم ماذكرتني جدامكم... تنفست بصعوبه وبعدت ايده عني بنفوور.. سهيل: غلطان انته غلطان... انا عمري 24 سنه... عقد يابر حياته وقال.. يابر: عند اخو؟.. غمضت عيوني بالم...يقصد حمد....فعلا حمد عمره 27 سنه تقريبا... اكيد يقصد حمد...قلت له بكراهية.. سهيل: حمد.. ابتسم يابر... يابر: ماشاء الله على مريم صفت الاولاد ..بارك الله فيكم...ارتاح ياولدي وخلنا نتفاهم على كل شي... مسكني من ايدي وسحبني ويلسني عالكرسي غصب...اما انا فكانت فعلا ريلي ماتشلني من هالاخبار اللي سمعتها... صداعي زااااد اضعاف..احس فعلا ان راسي بينقسم نصّين... قعدت اطالع يابر وولده مبارك برعب ونفور واضح... كرهتهم...!!! وين كانوا طول هالمده..!!!... يابر: انا بأجل شرح اوضاعي وحياتي لكم لين نتجمع كلنا.. لاني ماحب اعيد كلامي وايد...لكن اللي اقوله لك صدق واتمنى انك تتقبله ...انا خالك... وخالك الوحيد.... انا كنت الاخو الوحيد لمريم امك وميره خالتك.. صح شحالها خالتك..؟ عرست؟؟.. مادل بيتها ولا عرف وين ساكنه... سرت بيتنا الجديم لكني حصلته ماجر.. ادري ان ابويه وامي توفوا سمعت خبرهم وانا متغرّب.. لكني توقعت تسكنون فيه ماتخلونه لاني احيد بيتكم هذا صغير لكن الظاهر انكم وسعتوووه وسويتوا تغييرات فيه.....وينها هي؟ قلت له ببرود وانا يئست من اني افهم اي شي من اللي يقوله هالريال الغريب علي..... مب فاهم شي ولا بفهم....ولا اريد افهم... سهيل: منوه؟ يابر: خالتك ميره...شحالها؟ سهيل: بخير.. يابر: عرست ؟ عرست صح؟ سهيل: هي معرسه.. ريلها خليفه الـ... وعندها ثلاث عيال كبار ماشاء الله.... ابتسم يابر ابتسامه واسعه... ابتسامه مثل ابتسامه امــ..... لا...لا ياربي لا...توني بس عرفت منو يشابهون... يابر وولده كلهم لهم نفس الملامح اللي تحملها امي وخالتي ميره...!!.. يابر: ياحليلها ميره تستاهل... كم عيال عندها؟ سهيل: فاطمه العوده معرسه وساكنه في دبي..وبعدها راشد اكبر مني بسنه مب معرس...وعقب شيخه ..بعد مش معرسه.. يابر: ماشاء الله...وانتوا؟ سهيل: نحن شوو؟ يابر: كم انتوا؟؟ منو خوانك؟ سهيل: حمد.. معرس من فتره قريبه... وانا... وبعدي مهره توها في الجامعه... وعقب سيف..ثانويه عامه...بس يابر: ماشاء الله.... سهيل... ازقرلي مريم...ابا اسلم عليها.. من سافرت وهي زعلانه علي حالها حال ابويه وامي الله يرحمهم... وماتهون عليه بصراحه... لا تقولها اني انا بس قولها ريال بيسلم عليج لانها مابطيع تشوفني... حرقتني عيوني...حسيت ان الدموع بتتجمع فيهن... يطلب شوفه امي...مايدري انها ماتت..!!... كيف اقوله انها ماتت.؟!!.. ريال توه ياي من الغربه متوله على اهله اقوله ماتوا؟...يارب ساعدني لاتحطني بموقف مثل جي... وكان ربي سمع دعواتي ... سمعت صوت سياره تدخل البيت... سهيل: آآه..لحظة شوي..بشوف منو ياي.. قمت من قعدتهم وطلعت برا الميلس وانا اغمض عيوني بشده وافتحهن عشان امنع دموعي من انهن يتجمعن... فعلا كان ابويه... ومعاه سيف..اللي الظاهر انه تلاقى معاه في الطريج ويابه وياه... سهيل: ابويه...تعال رياييل في الميلس... عقد ابويه حياته ونفس الشي سيف مستغربين منو هالرياييل اللي يايين هالحزه... يا ابويه وسيف ودخلوا الميلس معاي...لكن ابويه ماتخطى عتبه الباب من الصدمه اللي بانت على ويهه...!! --------------------------------- اليوم: الاربعاء... المكان: بيت خلفان.. الوقت: الواحدة والنصف ظهرا.. -------------------------------- (سيف).... كنت ماسك كتبي وانا اطالع الرياييل باستغراب...واطالع ابويه باستغراب اكثر واكثر.... التفت لسهيل ابا احصل تفسير معين...لكني حصلته يطالع ابويه هو الثاني بتوتر واضح...!!!! شو السالفه.!!! حد يخبرني... كان المفروض اني اسلم ..اتكلم...اي شي...لكن موقف ابويه سكتني... وتعاديت منهم وتوترت انا بعد... كان الريال االلي باين عليه اكبر من الثاني واقف وهو يطالع ابويه بعيون تلمع وابتسامه كبيره... وابويه بعيون تلمع صحيح ...لكن من دون ابتسامه... والذهول مرتسم على ويهه...وبعد دقايق..قال ابويه باستغراب واضح.. بو حمد: يابر..!!!!... يابر: هي ياخليفه...يابر... بعد كل هالسنين... تنفس ابويه بحده ومد ايده لجدام بعد مابدت الابتسامه ترتسم على شفايفه وتنور ويهه... حظن الريال اللي اسمه يابر بقوو وشده.... خيم علينا الصمت...وعليهم بعد... تموا جذي متلاويين وكل واحد يربّت على كتف الثاني ... وبعد مافجوا عن بعض.. كانوا مازالوا متماسكين كل واحد ماسك كتف الثاني كانهم مايبون يفجون بعض من زود الوله... وانا فاج حلجي مستغرب...تقربت ودخلت..حطيت كتبي عالطاوله... وسهيل راح ووقف جدام كرسي بعيد....كانه بهالطريقه يبعد نفسه عن الموقف كامل... اطالعت الريال اللي شكله صغير ...وغريب...عيونه خضر...بسم الله الرحمن الرحيم....من وين يايين هذيلا..!!.. مديت ايدي له وانا ارسم ابتسامه على ويهي...سلم عليه هو بنفس الطريقه والبلاهه... مبارك: سيف..!!!.. عقدت حياتي...لا ويعرفني بعد؟... سيف: هي نعم انا سيف.... مبارك: انا مبارك...شحالك؟ سيف: بخير الحمد لله شحالك انته؟ مبارك: great,... التفت مبارك وهويحط صبوعه الابهام داخل سير بنطلونه الجينز ليابر وابويه يطالعهم وهو واقف باسترخاء .. وانا تميت اطالعه هو... بالاخص عيونه.... حلو ال***... من وين يا هذا..؟!!. سالت نفسي هالسؤال للمره العاشره... منو هالناس؟!.. موقف ابويه غريب جدا... بو حمد: شحالك يا يابر...والله زماااان عنك ياريال... يابر: هاي الدنيا وماتسوي..انا بخير وسهاله..شحالك انته وشو الدنيا وياك... بوحمد: مانشكي باس ياخوي...نقصتنا شوفتك بس...والحمد لله انك فكرت بالزياره.. يابر: انا رجعت للبلاد كليا ... مابرجع اسافر ...انا ياي عشان استقر في البلاد مره ثانيه... توسعت ابتسامه ابويه اكثر واكثر... بوحمد: والله فرحتني بهالخبر...والحمد لله عالسلامه... يابر: الله يسلمك ياخلفان... هذا ولدي مبارك... التفت ابويه لمبارك... بو حمد: ماشاء الله ...ماشاء الله ... ونفس الشي..خذ مبارك بحظنه لكن ابتعد عنه بسرعه ... بوحمد: شحالك ياولدي؟ مبارك: بخير الحمد لله شحالك انته خالي؟ بوحمد: طيب وفرحان بشوفتكم والله... يابر.. سهيل اظني وعرفته...هذا ولدي سيف اصغر واحد... تقربت انا من يابر ووايهته... يابر: شحالك ياسيف....؟ سيف: بخير وسهاله شحالك انته ربك بخير؟ يابر: بخير وعافيه الحمد لله... بوحمد: استريحوا استريحوا... وبعد مايلسنا...عق ابويه فويهي قنبله....مابعدها قنبله... بوحمد: سيف... يابر تراه خالك اخو امك... تميت ساكت مب عارف شو اقول ...وشو افهم...!! ابويه خرّف الظاهر... سيف: هاه؟! بوحمد: مثل ماسمعت... وشكله يتوقع مني اني استوعب بسرعه وبشكل طبيعي...طنشني والتفت ليابر.. بوحمد: متى واصلين يا يابر؟ يابر: من ساعه تقريبا او ساعه ونص... حسيت بنفسي اختنق... شو يقولون هذيلا....انا بحاجه لتفسير... سيف: ابويه...!! قاطعني سهيل وقال.. سهيل: سيف...تعال ابغيك شوي... وحسيت من كلامه ان هو الي بيشرح لي ... طلعت معاه لبرا الميلس... سيف: سهيل..شو يقول ابويه..؟؟. سمعته؟؟..اون هذا خالي.؟؟ سهيل: الظاهر ان كلامه صدق...يابر هذا خالنا...ومبارك ولد خالنا... سيف: بس كيف.؟؟؟.. ماكنت ادري ان امي عندها اخو... سهيل: دام انا مادريت كيف انته بتدري..؟؟؟.. الظاهر ان يابر هذا سافر من 27 سنه حسب ماقالي...يوم كانت امايه حامل بحمد... وحسب مافهمت انه يدي ويدتي من امي..وامي..كانوا زعلانين عليه يوم سافر ..وتموا زعلانين عليه.. عشان جي محد ذكره جدامنا... ولا درينا بان عندنا خال..!!.. مديت ايدي وسحبت سفرتي من راسي وانا احس اني مختنق ومدوخ... سيف: معقووله ياسهيل..؟!..معقوله هالكلام..!!!... سهيل: الظاهر جي ياسيف...ولازم نتقبل هالفكره.... سيف: ماقدر...ماقدر...وين كان طول هالسنين... ليش مايسال عنا...عنبو ماعنده اهل ؟؟..شو من الدم فجسمه هذا.. سهيل: مادري والله بروحي معصب من هالشي...واللي قاهرني انه حتى مايدري ان...ان امي توفت...يسال عنها ويبغي يشوفها...كنت على وشك اني اخبره بانها ميته لو لا ان ابويه وصل الحمد لله...بخلي هالمهمه عليه هو...انا ماقدر بصراحه... انصدمت... سيف: عنبوو حتى مايدري بوفاة اخته؟؟؟؟.. سهيل: مايدري ياسيف... كان قاطع اهله نهائيا...عنبوا ماكان يدري ان خالوه معرسه اصلا ..تم يسال عنها عرست والا لا... سيف: لهالدرجه..؟!!!.. كنت حاس برعب وقهر فظيع... هز راسه سهيل باسف.. سهيل: لهالدرجه...وانا حاس ان السالفه فيها اكثر من جذي... قال لي مابشرح شي لين مانتجمع كلنا عشان مايعيد كلامه لكل حد.... سيف: يقصد نحن وقوم خالوه؟ سهيل: اظن..!! وبعد ماتمالكنا اعصابنا..رجعنا دخلنا الميلس... حصلنا ابويه قاعد بحزن... ومبارك نفس الشي.. اما يابر فكان حاط راسه بين ايديه والدموع على ويهه... ادركنا ان ابويه خبره بوفاة اخته... وبعد المناقشات بيني وبين سهيل وابويه... خذنا شنطهم وحطيناها بغرفتي... وسوينا درب ليابر وولده مبارك وخليناهم يرتاحون في الغرفه ...لين وقت الغدا... اما انا فبقعد في حجرة سهيل هالفتره...شونسوي بعد مجبورين....!! اما عمتي وعفرا ... فكانن في ذهول تام من هالريايل اللي دخلناهم بيتنا بهالطريقه...!!! وكنا انا وسهيل متعايزين بانه نشرح لهم اي شي....بالتالي توجهنا للطابق الفوقي..دخل سهيل غرفته..ودخلت انا غرفة مهرة ارتاح فيها شوي على انفراد... مستغل فرصه غيابها عن البيت...عشان افكر شوي باللي صار فينا اليوم..وجلب حياتنا فوق حدر.. اليوم: الاربعاء.. المكان: في احد فنادق حلب.. الوقت: العاشره صباحا بتوقيت سوريا.. --------------------------------- (ناصر)... وقفت جدام عبد العزيز اعرض نفسي بطريقه مضحكه... عبدالعزيز: اووش اووش ياخطير...كاشخ بصراحه .. ناصر: ههههههههههههه ظنك؟ .. عبدالعزيز: هي والله..ههههههههه... ناصر: انزين عاد تراني ميت يوع... عبدالعزيز: محد قالك امس ما تعشيت في الطياره... ويوم وصلنا بعد ماطعت تاكل شي وسيده رقدت... ناصر: كنت تعبان ومتعايز عن الاكل... المهم يالله ننزل نتريق تحت... عبدالعزيز: يالله.. قفلنا الغرفه ورانا ونزلنا انا وعبدالعزيز تحت.. لمطعم الفندق.. بعد ماوصلنا امس لسوريا كان الوقت ليل تقريبا ...وانا كنت ميت من التعب.. حجرنا انا وعبدالعزيز غرفه وحده بسريرين ..اما علي فحجز له غرفه هو وحرمته وعياله وباتوا فيها ..وقاموا اليوم من الصبح ووداهم صوب اهلهم...وقال انه بيتلاقى ويانا وقت الغدا ... بعد ماترست بطني وتريقت انا وعبدالعزيز..طلعنا من الفندق وتمشينا حواليه لين الغدا... بصراحه الجو هني برايي انا ..رائع... ابرد عن الامارات وجو منعش وحلوو يعني... الناس هني اشكال وانواع...كل الاصناف تحصلها موجوده .... شدتنا المناطق القديمه وتمشينا فيها لاكثر من ساعه ونص... وبعد مارجعنا الفندق..قررت اتصل باهلي اللي ما اتصلت بهم لين احين اطمنهم علي... ولاني ماكنت ابا ارمس وايد...اتصلت بيوسف..طمنته علي وخبرته انا وين موجود وفي اي فندق.. وسالته عن حالهم وخصوصا حال مايد...وعرفت انه بيطلع ورا باجر..الجمعه...بعد مايسوون له فحص اخير لكتفه وراسه.. اللي شاكين ان الظربه اثرت عليه اكثر مما كانوا يظنون ..لانه مايد كان يعاني من دورة راس دايمه..لكنهم طمنوهم بانه ماشي خطير ان شاء الله.. سكرت وانا احس براحه نفسيه...حلو الواحد يوم يحس انه بدون التزامات...وبلا ويع راس... ياي عشان يستانس وبس... والحلو ان الجو فعلا يشجع عالوناسه..ومعاي هالناس الطيبه...!!.. عالغدا كان علي معانا ...يسولف عن المناطق اللي بنسيرلها باجر... عبدالعزيز: شحقه مابنسير مكان الليله؟؟؟ علي: لا الليله عازمنكم عمي عالعشا... ناصر: عازمنا عالعشا..؟؟؟... علي: هي...عمي انسان كريم بشكل ماتتصوره هههه...ونفس الشي عياله الثلاثه... سكت وانا مستحي ارفض الدعوه... ومستحي في نفس الوقت اني اسير... ناس ما اعرفهم ... كيف بقعد معاهم... لو كانوا مواطنين ممكن اتاقلم بسرعه...لكن بصراحه ماتعودت اقعد مع ناس غير... صح مافيها شي وعااادي... وعلي يمدح فيهم دايما... لكن المساله بكل بساطه اني مب متعود...!!! لكن لكل شي تجربه اولى... مابتظرني التجربه...بنسير وبنشوف... وبعد الغدا المنوع اللي كلناه...طلعنا مره ثانيه نتحوط في المناطق ومعانا هالمره علي... اللي كانه مرشد سياحي... يعرف اغلب الاماكن... باختصار... حسيت اني برتاح هني...مدينه جميله وهادية... --------------------------------- اليوم: الاربعاء.. المكان: المستشفى.. الوقت: السادسه مساءا.. ------------------------------- (يوسف)... سلمت على مايد والشباب اللي عنده وطلعت عنهم ساير البيت... اول ماطلعت من غرفة مايد.. طلعت كنه وهي شاله صحن فيه حلاوه مغلفه... اطالعتني بعيون بريئه وقالت.. كنه: بتروح؟!. وقفت جدامها .. يوسف: هي بسير..شي تبين؟ ومديت ايدي لصينية الحلاوه وخذت منها وحده فتحتها وكلتها... كنه: لا ماريد منك شي... عيبتني الحلاوه ..مديت ايدي مره ثانيه وخذت وحده غير.. يوسف: حتى لو طلبتي شي مابييبه لج... بعدت كنه عني الصينية بعصبيه وقالت.. كنه: مبونك بخيل... اييه لا تاكل الحلاوه حق الحريم هذي... يوسف: احين انا الي بخيل والا انتي يالزطّيه... كنه: لا تسب.. يوسف: وانتي لا تستوين وقحه بتعاملج... بطلت كنه عيونها وقالت.. كنه: انا احين وقحه؟ مادري منو اللي وقح... يوسف: شوو شووه؟..احين تقولين اني انا وقح بعد ماتستحين انتي؟؟؟ كنه: انته اللي بديت... يوسف: لانه انتي مافيج سنع... عيل انا اسالج شو فخاطرج تقوليلي ماريد منك شي.؟!!!... كنه: لاني ماريد منك شي.. يوسف: الناس يقولون سلامتك...مب ماريد منك شي.. كنه: والناس يقولون بعد شو في خاطرج بنت عمي..مب شو تبين..؟!!..... عشان جي قلت لك ماريد منك شي ... معناته انته كلامك غلط.. يوسف: ترا لسانج طال كنووه.. انتبهي.. قالت بدلع.. كنه: شو بتسوي يعني.؟؟.. بتظربني؟ يوسف: شو رايج بـــ اذبحج..؟!.. كنه: هههههههههه جــــــرّب.. يوسف: فيوم ثاني ان شاء الله احين انا مستعيل... جلبي ويهج... وقبل ماروح خذت لي حلاوه زياده بالغصب من عندنا وحطيتهن فمخباي وانا اضحك.. وهي محتشره.. ورجعت للمطبخ تعيد ترتيب صينية الحلاوه عشان مايبين انها ماخوذ منها شي... اما انا فطلعت من الغرفه ...ومن القسم الخاص... في الممر الخارجي...صار لي شي ماتوقعت يصير لي فيوم من الايام... شفت اخو وضحه... هي وضحه... كنت اعرف اخوها بالشكل.. مب معرفه شخصيه... ومثل ماتعرفون العين صغيره والشباب يتعارفون فيها بكل سهوله... حسيت بقلبي ينقبض... ماقدرت امنع الاهتمام اللي طلع فعيوني يوم شفته ... كان هو داخل المستشفى... وعلى ويهه ملامح قلق... ياترى منو في المستشفى؟!!... الله يستر... وغصبن عني غمرتني ذكرى وضحه بشكل كبير...لدرجه اني ماقدرت اطلعها من بالي نهائيا هالمره... واول ماوصلت البيت ارسلت لها رساله اخبرها اني شفت اخوها...وسالتها عن احوالها..واحوال اهلها...وفي النهايه سالتها منو عندهم في المستشفى وعسى ماشر.؟!! مادري اذا بترد علي او لا ... عندي احساس انها بترد عليه.... وضحه مستحيل تجاهلني.. بكل كل اللي مرينا به..ماظن انها تتجاهل رسالتي... رغم اني انا اللي طلبت منها الفراق في النهاية ... وطلعت وهي زعلانه علي... لكن مازالت حبيبتي وضحه...ومازلت بالنسبه لها يوسف حبيب العمر...!! والا هالشي تغير الحين..؟!!... محد يعلم.. ---------------------------------- اليوم: الاربعاء.. المكان: بيت خلفان... الوقت: السابعه والنصف مساءا.. --------------------------------- (مهرة).... رفعت ريلي على الكرسي وحضنها واسندت راسي على ركبتي... معقوله اللي يصير معانا ياناس...معقول..؟!!... بعد كل هالسنين يطلع لنا خال...وولد خال..!!!.. تظاربت داخلي مشاعر غريبه.... حسيت بفرح غامر...وخوف كبير...واستغراب اكبر... وين كان هالخال طول هالسنين...وين؟.. رفعت نظري... كانت عمتي يالسه بقلق جدامي... وعفرا اطالعنا بفضول... تذكرت كيف اكتشفت وجود هالخال الغريب بينا.... الساعه 2 كنت توني يايه من الجامعه... وفي ايدي شريط سيف اللي نسيت اعطيه اياه في اليوم اللي طاف... وعلشان ما انسى...ركبت على طول ودقيت على سيف باب الحجره... وانفتح الباب...لكن ماكان سيف... كان شاب غريب عيونه خضر يطالعني بفضول..!!!... انصعقت...منو هذا.؟ اول مره سيف يدخل واحد من ربعه البيت..!!! صرخت وتغشيت على طول وابتعدت...سمعت صوت غريب من وراي يقول.." اكسكيوزمي..!!... " وكان الصوت مرتبك ..لكني كنت مرتبكه اكثر...منو هذا ياربي.؟؟!! لقعه..!!... طرت لغرفتي وانا متغشيه...سكرت الباب وراي وقفلته وانفاسي تتسارع وتتزايد... عقيت غشوتي...وصرخت مره ثانيه يوم شفت حد راقد على شبريتي... تقربت اكثر وشفته سيف...اللي قام وهو معقد حياته بسبب صراخي.. مهرة: سيــــــــــف.!!. سيف: شو بلاج تصارخين جذي..شو صار بعد اوفففف... مهرة: سيف..شو تسوي هني؟؟؟... قال لي سيف بتملل وهو يقعد عالشبريه... سيف: هذيلا تراهم فحجرتي... يلست عداله عالشبريه بعد ماعقيت اغراضي على الكرسي... مهرة: منو هم هذيلا..؟!!!.. اطالعني سيف للحظات كانه يتذكر شي...عقب مسك راسه وقال بتافف.. سيف: اووووه لا لا مافيني اخبرج... مهرة: تخبرني بشووو..؟؟؟ سيف ارمس روعتوووني...منو هذيلا اللي فحجرتك.؟!!. اطالعني سيف بسخريه وقال.. سيف: افرحي ياختي...طلع لنا خال وولد خال... بهالطريقه عرفت بوجود هالخال...وولد الخال صاحب العيون الغريبه...!!... شي غريب فعلا بانه نكتشف ان عندنا خال بعد كل هالسنين.... كان خالي (اليديد) يابر وولده مبارك وابويه وسهيل وحمد وسيف يالسين في صالة الحريم الصغيره المخصصه للضيوف... اللي ماتنفتح الا للمناسبات... وكنت انا والحريم في الصالة المعتاده...اتريا وصول قوم خالتي بفارغ الصبر... وبعد ماوصلوا...كانت على ويه خالتي اللهفة والفرح الكبير بهالخبر...اما ريل خالتي بو راشد فكان ويهه جامد ... اما راشد وشيخه فكانت ويوههم مثل ويهي...دهشة كبيره..وعلامات تعجب...!!!!.. بعد السلامات دخلوا كلهم الصالة الصغيره...وشيخه معاهم... من المفترض اني ادخل معاهم لكني ماحصلت الجرأه... باختصار... احس ان خالي وولده ناس غرب..وانا ماحب الناس الغرب... كيف اطلع جدامهم واقعد معاهم؟؟ انا لين الحين ماشفت خالي هذا... شفت ولده بس مثل ماخبرتكم...لكني لين احين ماشفته وخايفه من شوفته... سيف: مهرة... التفت بسرعه لمصدر الصوت..شفت سيف يطالعني وهو معقد حياته... سيف: تعالي..يتريوونج تين... مهرة: ماعندي الجراه اطلع جدامهم سيف...بالنسبه لي هم غرب.. سيف: بس هذا خالج ولازم تتعودين من الحين...وهو يسال عنج وايد يبا يشوفج... قمت بتردد من الكرسي ورحت مع سيف...تمسكت في ايده..تقريبا كنت مندسه ورا ظهره .. ويوم دخلنا الميلس...وشفت الخال يابر...خاز الخوف كله عني لكني تميت منحرجه.. صحيح رحب بي خالي وطلب مني اني اتقرب منه لكني انحرجت اكثر وماقدرت اتجدم.. نازعني ابويه وقالي لي اروح... بس انا ماقدرت... يابر: خلووها على راحتها مع الايام بتتعود..انا احين بالنسبه لها غريب... ابتسمت لتفهمه هذا...شكله طيب...ذكرني بامي...يشبهها... اما مبارك...احس انه يشبه سيف...بالتالي يشبهني... راودتني فكره مضحكه..باني لو حطيت عدسات خضر يمكن اطلع مثله تقريبا....!!!!. غريبه هالعيون الخضر.. وغريب شعوري تجاه هالمبارك...احس انه مب من الشباب...وراودتني فكره مضحكه ثانيه يوم حسيت اني اقارنه بالاساتذه في الجامعه... يمكن ماقدرت اعتبره من الشباب اللي تعودت عليهم بسبب لبسه لبنطلون وقميص...!!!..وعيونه الخضر.. يلست انا عدال سيف..لاصقه فيه..خالتي كانت يالسه عدال اخوها بفرح كبير .... مالومها..مافي شي يعوض عن الاخو..والسند... وخالتي من بعد وفاة امي صارت وحيده تقريبا...!!!!... بدا خالي في الكلام.... يابر: انا ادري ان كلكم مصدومين ... ادري ان كلكم ماكنتوا تدرون بوجودي... ظهوري فجاه سبب صدمه لكم... لكن اباكم تعرفون ان فرحتي اليوم بجمعتكم جذي ماشي يسواها... طول فتره غيابي وانا احلم بالرجعه لبلادي وبين اهلي... صحيح ان خبر وفاة مريم صدمني بشكل كبير... لكني اتمنى انكم انتوا عيالها بتعوضوني عنها..مع اني ادري انه هالشي صعب يصير... صعب انكم تتقبلوني كخال...وواحد من الاهل... انا بالنسبه لكم غريب كليا... لكن انا ماحس انكم غرب... احين كلكم تتساؤلون من وين طلع هالخال...ووين كان..؟؟ انا اجلت شرحي للحين عشان ما اعيد كلامي واقوله مره وحده... انا يابر..اصغر من مريم المرحومه بسنه..واكبر من ميره بسنه... (والتفت لخالتي وابتسم لها)... دايما كنت علىخلاف مع المرحوم الوالد...مادري ليش..دايما كان يقلل من شاني واحس انه يحقر بي احيانا..لكني ادري انه يباني احسن من الكل... لاني ولده الوحيد... بعد ماخلصت ثانوية عامه سافرت بمنحه لدراسه الطب... ابويه وامي..ومريم كانوا رافضين الفكره... لسبب اني الولد الوحيد وبخليهم رواحهم وهذا الشي مايصير... مريم كانت متزوجه وحامل...اما ميره فكانت بعدها ما عرست وساكنه مع قوم ابويه ... فعلا كانوا محتاجيني بينهم انا ادري...لكني كنت اناني وفكرت بمستقبلي...فكرت..اني بدرس وبييب شهاده يفتخر فيها ابويه وبرجع لهم... لكن بعد سنتين وصلني خبر وفاة ابويه ..وبعدها بفتره امي من بعده... كنت ايامها في وسط امتحانات مهمه وماقدرت ارجع البلاد...لكني كنت اتصل واتصل...بس محد يرد علي...قلت اكيد ميره عند اختها مريم...ماكنت ادري ان ميره معرسه ايامها...!!!.. وبعدها صارلي انا هناك حادث...ماصار لي شي لكني فقدت الذاكره للماضي..لكني كنت اتذكر الايام القريبه...يعني ماكنت اعرف انا من وين وماكنت اعرف اهلي لكني اتذكر اني في بريطانيا لدراسه الطب... اتذكرت بشكل ظبابي زملائي اللي معاي... لكن اهلي ماتذكرتهم...للاسف.. لكن شوي شوي قامت الذكريات ترجع لي.. لكن بشكل بطيئ وعلى مراحل... وماتذكرت كل شي تماما الا بعد سنوات...كنت خلالها تخرجت..واشتغلت دكتور في واحد من المستشفات وكان مستشفى راقي... وتزوجت ... هي تزوجت بريطانيه لكنها اسلمت بعد الزواج ... كانت هي بعد دكتوره...ويبنا مبارك اللي سميته على ابويه المرحوم...حاولت اربيه مثل ما انا متربي.. دايما كنت اكلمه عن خواتي اللي افتقدهن وابويه وامي اللي فقدتهم فعلا.... حاولت ماانسيه دينه ولغته رغم انه صعب جدا بوجوده بين مجتمع اجنبي ... لكن اعتبر اني نجحت دامه يرمس شراتنا عدل رغم انه يحيس لسانه دووم بحكم العاده.. ظحكت غصبن عني... سيف ابتسم...ونفس الشي سهيل...خالتي ظحكت..ونفس الشي ابوي وحمد... راشد وشيخه مازالوا يطالعون خالي باستغراب كانهن في حلم... اما مبارك حمر ويهه واطالع الارض وهو يهز ريله بارتباك وخجل... كمل خالي كلامه.. وهو يتامل مبارك بفخر.. يابر: علمت مبارك كل شي اعرفه..خبرته عن الامارات..زرعت فيه حبها حتى بدون مايشوفها...ويوم كبر واستخدم الانترنيت كان شغله الشاغل انه يبحث عن بلاده...يتابعها بشغف...واظن انه يعرف عنها اكثر عن سكانها اصلا... كنا انا وهو نتابع بفرح تطور الامارات... اذكر اني قلت له يوم صغير ان الامارات مب متطوره ذاك الزود على ايامنا...لكن يوم كبر وشاف في الانترنيت شكل الامارات الحين قال لي انته قصيت عليه... الامارات حلوه... هههههههههههه...مبارك خلص دراسته وكان ينتظر دخوله للكولج...لكن.. فاطمه.. اللي اسمها الاصلي جينين قبل ماتغيره بعد دخولها الاسلام... توفت في حادث سير من سنه تقريبا... حالة مبارك ماكانت تسمح انه يكمل دراسته فقام اجلها.... بعد مرور سنه اكتشفنا انا وهو انه ماعندنا حد نقعد عشانه في بريطانيا... اقترحت عليه نرجع البلاد... ونستقر هناك بشكل نهائي.. ماتتصورون فرحته...فرح اكثر مني بهالخبر.. وتشجع وتحمس... حسيت انه رجع حي مره ثانيه بعد وفاة فاطمه.. .. وفرحت انا لفرحه هذا... فرحت اكثر اني بشوف خواتي بعد طول غياب... ومثل ماتشوفون... مااخرنا يوم واحد.. وصلت الامارات ..رحت لبيتنا توقعت ان مريم وخلفان خذووه لانه اكبر... وعشان ميره اتم وياهم..لكني حصلته ماجر .. وييت هني ويالله يالله تعرفت عالبيت بعد التغييرات اللي سواها خلفان فيه عشان يكبر البيت ويحسنه بهالشكل... لكني الحمد لله وصلت.... سكت خالي..حسيت انه تعب من الكلام...تعب من كونه غريب...حسيت انه يبا يرتاح..ويتاقلم بسرعه... بصراحه انا حبيته من اول ماشفته...وبعد اللي قاله حبيته اكثر...يمكن اكون الوحيده اللي تقبلته بهالسرعه.. لكني ماصدقت علىالله اشوف حد من طرف امي... دارت الاساله والسوالف بين الموجودين كلهم...على خالي يابر...وعلى ولده مبارك... اللي اكتشفت انه عمره عشرين سنه ... بينما خالي عمره 46 سنه... دكتور قد الدنيا...ياسلام عليه... اما ولده مبارك فما دخل الكولج على قولتهم لين الحين... ويفكر يلتحق بجامعه في البلاد هني... يوم ذكروا موضوع الاقامه...اصرت خالتي انها تستقبلهم في بيتها... لانه بيتها فيه غرفه فاظيه وهي غرفه فاطمه الاوليه...يقدر يسكنها مبارك.. اما يابر فبيحتل غرفه الضيوف... لين مايحصلون لهم مسكن خاص فيهم... خالي تقبل هالفكره عادي... اما مبارك فكان ويهه يقول " لا تعليق".. كانه مش في الصوره ابدا... لاحظت انه فرفوشي ويسولف وايد..ومثل ماقال خالي يابر... مبارك كان يخلط في رمسته كلمات انجليزيه وايد ..وبشكل يخلينا كلنا نضحك عليه... مادري شو اللي خلاني مانفرت منه من اول.. ما احسه من الشباب مثل ماذكرت سابقا... يمكن لاني حسيت انه مايشكل اي تهديد او خطر...!! بس فعلا عيونه اغرب عيون شفتها لين الحين.... ــــــــــــــــــــــــــــــــــــــــــــــــــ ــــ نهاية البارت الـ28 .. اتريـآ ردودكـ/ـم ,. [/align] | |
| ||
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
العرض المتطور
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| ٱحبَڪ ۈٱڎرـﮯ تحبَنـﮯ فڎيتڪ يٱنظر عينـﮯ !●₪●.. | رحلت عن بلادي | استراحة قصص وابداعات الاعضاء | 594 | 04-28-2012 10:45 PM |
| آنّآ معآگّ ۈڷآ بڎۈنّگّ يسعڎگّ ربي | خوية الشقا | عدسة الاعضاء , كاميرا الاعضاء | 11 | 05-19-2010 02:03 AM |
| آڛآڷڼيے ڷۈ פـپـِـِيے"ـٽ آڼآ غيرّڪ םـِآآهۈـِـِيے"ـِـِٽ (»● ڷڛعّـِـِۃ عّ ـڎآپ »● | مـِŏـلِوِ۶ أِשּׂِـِتِأنِدِرِ | تصاميم الاعضاء | 4 | 05-13-2010 01:09 PM |
| أنّآ ۈڎّي ۈإنّت ۈڎّگّ ,, ۈآڷجۈآب يآرۈحي عنّڎگّ ..!ّ | خوية الشقا | عدسة الاعضاء , كاميرا الاعضاء | 24 | 01-23-2010 11:11 AM |
الساعة الآن 10:33 AM
- اخبار رياضية
- اخبار الامارات
- اخبار ريال مدريد
- اخبار برشلونه
- العاب فلاش
- مسلسلات وافلام
- مسجات
- فيديو كليبات
- سيارات للبيع
- ارقام سيارات
- ارقام هواتف
- هواتف للبيع
- حيوانات للبيع
- قوارب ويخوت للبيع
- ملابس واكسسوارات
- ساعات ومجوهرات
- اناشيد اسلامية
- نغمات اناشيد
- نغمات اسلامية
- ادعية اسلامية
- رقية شرعية
- قران كريم
- ديبيات اسلامية
- اذكار المسلم
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227