راعي العجرا والرومنسيه والفول

محروم.كوم · #1 06-06-2013, 05:00 AM

السلام عليكم ورحمة الله وبركاته
اليكم هذه السالفه
قبل كم سنه طلعت انا والمدام نتمشى بالسياره في قمة الرومنسسيه
تونا شباب هالكلام قبل عشرين سنه او اكثر او اقل
قلت لها قبل مانروح للبيت نبي ناخذ عشانا ونجلس بحديقه والا على رصيف نسولف شوي ونتعشاء ونكمل باقي سواليفنا
قالت مايخالف وانا اسفط عند ذاك الفوال واخذ صحن فول قلابه وصحن فول جره وببسي كولا
واحطهن بالسياره وارجع وامسك سرا عند الخباز التميس اللي ريحته تجيب سارحات امس
المهم جيت وركبت بالسياره
ويارومنسيه ماكملت يوم جيت ولا خاطرها ماهوب زين وصوتها ابح وانا ماخبرت اني مسوي شي يكدر خاطرها غير اني وقفت عند الفوال وسرا الخباز
قلت يمكن ماتبي الفول
سالتها وش فيك عسى ماشر ياام جلنبو
ماتبين فول
قالت بس ودني للبيت قلت للبيت لبيت بس ودي افهم نوع الخطا اللي سويته
المهم هي طول الطريق ساكته ماتحكي وانا ان شغلت بالتفكير يارب وش سويت وصلت للبيت ولم اصل الى معرفة الغلط اللي ازعلها
رومنسيتنا من فتحت باب السياره وهي محوله قبلي وين راحت مدري المهم ان الرومنسيه هجت
من فتحت الباب
المهم دخلت البيت معي الفول والخبز والببسي نسيته بالسياره
قلت لها وش مكدر خاطرك يوم جالنبو
قالت مابي شي
يابنت الحلال علميني ريحيني
قالت منهي منى جوغيم وش عرفك فيها
قلت يبنت الحلال منى هذي ماعرفها هي سوريه والا مصريه
قالت مدري ولكن بينك مراسلات وهدايا
قلت منى مرسله لي هديه
قالت ايه
قلت منى جوغيم ماعرفها حتى اخذ منها هديه
يبنت الحلال اذكري الله وتعشي بس
قالت انت تبي تسكتني
كنت طيب وين الهديه خليني اشوفها
قالت بالسياره
قلت طيب وش نوع الهديه
قالت شريط مكتوب عليه منى جوغيم
قلت الشريط معي بالسياره
قالت ايه
قلت روحي جيبيه وانزل انا وياها للسياره يوم عطتني الشريط

اطالع فيه ولا فعلا مكتوب عليه منى جوغيم
قالت شفت منهي منى قلت مدري
واطالع بالخط يوم جتني الذهانه وان اضحك ضحك لما صارن رجليني اليسرى محل اليمنى
قلت هذا هو قالت ايه هذا
قلت يابنت الحلال
هذا مكتوب عليه اغنية محمد عبده في الجو غيم نقطة الفا صايره بين الفا واليا وطالعه نون
واللي يشوفها يقراها منى
والحين اشغل الشريط واحط اغنية في الجو غيم
وهي تضحك وتتاسف زاد ماخبر وراي شي يكدر الخاطر
عاد وش يرجع الرومانسيه من جديد التحويله من السياره ياسرعها والرجعه من قل مارجعت بالسهوله يبيلها حول كامل حتى ترجع
وانا ادخل البيت وانا اقول الله يرحم حال هالدميجه اللي مابراسها كوره قصدي رومانسيه
والقراده تدور اهلها
انتهت السالفه
وقبل الختام
سبحانك اللهم وبحمدك لا اله الا انت استغفرك اللهم واتوب اليك

مع تحيات
راعي العجرا
مكشات
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
راعي العجرا ..... ودك اللي مايعرف يسولف يسكت	محروم.كوم	منتدى أخبار المواقع والمنتديات العربية والأجنبية	0	05-31-2013 04:40 PM
راعي العجرا وبقايا الذكريات (مبارة في كرة القدم )	محروم.كوم	منتدى أخبار المواقع والمنتديات العربية والأجنبية	0	05-13-2013 01:10 PM
راعي العجرا والتفحيط والموقف المحرج	محروم.كوم	منتدى أخبار المواقع والمنتديات العربية والأجنبية	0	04-12-2013 04:10 PM
راكب اللي راعي العجرا قد ساقه(جديد)	محروم.كوم	منتدى أخبار المواقع والمنتديات العربية والأجنبية	0	12-12-2012 01:40 AM
راعي العجرا وغصة اللحمه	محروم.كوم	منتدى أخبار المواقع والمنتديات العربية والأجنبية	0	11-26-2012 02:00 PM