وجـــع الأذن..وفزعـــة الحرمــــه

محروم.كوم · #1 11-24-2012, 10:40 PM

..بــــسم الله الرحمن الرحيم ..

,, السلام عليــــكم ورحمة الله وبركاته ,,

هذي السالفه من ربعنا الله يرحم ميتهم ويطول في عمر باقيــــــهم..

يقول كان فيه رجال راكب ناقته راجع لهله وهو يمشـــي.. جاته هاك العجـــه..

اللي ماهي بمبروكه .. شوي لاداخل اذنه شيء يتحرك ويخرفـــش .. قال يمكن غبار

ولاشي.. يقول لاوالله البلاء قوم ياكل فاذنه لين وصل ربعه شوي ويصيح

الرجال وينخى ربعه ياااااوه ابكم افزعولي اذني فيها بلاء افزعولي

ويجون ربعه,ويفتحون اذنه يدورون يمين يسار فوق تحت مالقوا شيء قالوا ..

الشكـــوى لله يافلان مالقينا شيء .. وهو اللي يقول ابكم الموت قدامي ..

ياذني اذناه والله ان فيها بلاء يتحرك فيها... ويمر عليه ٣ ايام مذاق النوم يصرخ طول الوقت..

واللي في اذنه,كلماله ياكل ..فمعاد تحمل ماخلا ولا شيء الا وحطه ولا سلم يقول ..

لافيه حرمه طيبه فيها من الخير ماشاءالله وكان بينه وبينها مساااااافه

وراح لها اللين جاها ويوم شافها قووم ينخاها ياااااوه تكفين ياام فلان ..قالت ابشر بسعدك

قال بلاء في اذني مايخليني ارقد ولااروح وذلحين مابه الا الله ثم انتي تكفين

ويصيح قدامها وهي ذي الحرمه عندها بنت جايبه لها ولد قدله ٣ شهور

فقالت الحرمه للرجال انسدح وتحط تحته وساده وتسمي بالله وتكب زيت شوي شوي

في اذن الرجال ..الا وهو اللي يصيح ياااااوه ياام فلان ..الموووت جاني الموووت جاني يااااااوه

قالت له اذكر الله وتعوذ من الشيطان ..وتحرك الزيت فماطلع شيء.. وتكبه وتمسح

اذنه وتشوف وتشوف الا وتجيها هاك الفكره وتدعي بنتها اللي جابت ولد.. وقالت احلبي

في اذنه قالت بنتها لاوالله يمه مقدر ..ماني مضهره صدري قدام الرجال وتقولها امها احلبي

الا والرجال اللي يتكلم.. ويقول احلبي في اذني والله العظيم ماشوفك

من حر الوجع اللي ينسه.. ويجي ويغمض وياخذ غترته ويغطي عيونه

وتجي البنت وتصب الحليب فاذنه والرجااال من صيااااح في صيااااح وتجي الحرمه

وتحرك وتحرك الحليب فاذنه وتحرك وتحرك الا وتشوف هاااك الشنبات في وسط اذنه

يااااااوه اصبر اصبر لا تحرك وتجيب المنقاش وتمسك البلاء اللي فاذنه الا وطلعه..

والرجال يصيح صياحه يسمعه ..القاصي والداني .. المهم وتجي الحرمـــه

وتطلع هاااك الدوده مرتويه من الدم..وتذبحها وتكب الحليب من اذن الرجال,,

ويوم حسس بالعافيه وهو اللي يعاينها قال الله يوفقك ويجعلك من اهل الجنه فقالت امين وتروح تجيب له

غدا قال ياام فلان مايحتاج .. قالت الابالله عشان سلامتلك .. وياكل لين شبع

قال ياام فلان ابي ارقد ..راحت عطته الوساده ويرقد من عقب الغداء اللين المغرب..

ويقوم وتبي تعشيه .. الا وهو اللي يحلف ويقولها الله يقيك من المرض اللي جاني

والله مابعد ذقت نومه احلا من هذي النومه ويودعها وراح لهله فسبحان الله هذا الرجال

حي الله يطول بعمره .. والحرمه اللي شالت منه المررض ماتت الله يرحمها

ويسكنها فسيح جناته اللهم امين سبحان الله من اول ماعندهم فتنه..

الرجال الغريب .. يحسب البنت اللي قدامه اخته .. ولو يقعد في بيتهم .. عادي

سبحان الله العظيم والله زمان راح وراحت طراته ..وسلامتكم

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
مشكلة في عمل سماعة الأذن Hs-45 على الـ C6-01	محروم.كوم	منتدى أخبار المواقع والمنتديات العربية والأجنبية	0	09-03-2011 09:30 AM
أبو مقص:ثاقبة الأذن (ريم البراري)	محروم.كوم	منتدى أخبار المواقع والمنتديات العربية والأجنبية	0	06-18-2010 08:30 PM
ثقب طبلة الأذن والغوص..	محروم.كوم	منتدى أخبار المواقع والمنتديات العربية والأجنبية	0	02-12-2010 12:30 PM
تعلية صوت الأذن	محروم.كوم	منتدى أخبار المواقع والمنتديات العربية والأجنبية	0	04-13-2009 12:50 AM
الحرمــــه إلي الكل يتمنا يشوفهـــا	عيوز كشخه	المواضيع المكرره	13	02-19-2008 10:55 PM