بسم الله الرحمن الرحيم


تحيه طيبه للجميع

حبايبي هذي القصيدة كانت في نهاية شهر رمضان المبارك
حيث اشتاقت النفس لظهور سهيل
وطال الوقت
والعرافه كانوا يقولون انه بيظهر سادس العيد

في تلك الاثناء مرت علي قصيدة الشاعر بندر بن سرور

اللي يقول فيها :
الله من عينن الى عسعس الليل
عافت لذيذ النوم ما تهتني به

فجاريتها بهالبيت
الله من نفسٍ الى دلمس الليل
تاقت لجوٍ خاليٍ مالفيبه

وهذي القصيده بين أيديكم :

الله من نفســـن إلى دلمس الليـــــل
تـــاقت لجــوٍ خــاليٍ مــا لفي بـــه

ويلي على الودان والقشع والسيـل
تصطـــك شعبـــانه وتمــلى قليبــــه

متى على الله يا عرب يظهر سهيـل
النفــس تـــاقت للفجـــوج الرحيبـــه

مع رفقــة الطيب زبــون المشــــاكيل
الصاحب اللي مــا يخــالف صحيبه

في رَمشتن حاف الحطب والمعاميــل
مــا نقــــدره إلا بحلـــوف وغصيبـــه


ضــوّه تلضى والنجر يطحــن الهيــل
مع دنـتن تبـــري الكبــــود العطيبــــه

ثم ســـاق فنجـــالٍ وجــــرّ المـواويـــل
يجيـــب لــــه بيـــتن وبيــــتن أجيبـــــه

هذي طـــراة الروح يا سـاهر الليــــل
والا السهــر من دونهــا ويش ابي به

وأطيبهـــا ميقــاف ودموعن هماليـــــل
يـــوم العـــرب كــلن تحضــن حبيبــــه