منتدى استراحات زايد - نصيحة مجرّب..!

السلام عليكم ورحمة الله وبركاته

إليكم هالابيات انصحكم بقراءة القصيده كامله واترك لكم التعليق.. صح لسان شاعرها

الله ياكثـر مايطـري علـى بـالـي
. . . . . .من الطواري ولا ادري وش يطريهـا

تطري عليه ليامـن صـرت بلحالـي
. . . . . .أسباب دنيا العنا واللي حصـل فيهـا

قضيت عشرين عـام ايـام وليالـي
. . . . . .ايامهـا عذبتـنـي مــع لياليـهـا

عانيت فيها وذقـت المـر والحالـي
. . . . . .مـن مرهـا عيفتنـي طعـم حاليهـا

مشيت فيها الدروب قصـار وطوالـي
. . . . . .في كـل الاحـوال رجلينـي معنيهـا

سيـري مسافـات لكـن مالها تالـي
. . . . . .وارجع ماكملت مهما سـرت تاليهـا

اوجـه يميـن والا اوجـه شمـالـي
. . . . . .التيه بارضٍ مـن الضيـق متلقيهـا

اصبحت محتار في حلـي وترحالـي
. . . . . .مامن فوايـد مـن الاثنيـن جانيهـا

ياكثرهمـي مـن الدنيـا وغربالـي
. . . . . .مالله كتبلـي سلامـه مـن بلاويهـا

أحاول اصبر على ماصار فـي حالـي
. . . . . .لوعلتـي مالقيـت اللـي يداويـهـا

ماني بداله مثـل غيـري ولاسالـي
. . . . . .العالـم الدالهـه مانـي مخاويـهـا

عشقت بنتٍ مهرها طيـب الافعالـي
. . . . . .ولاكل شخصٍ من العشـاق يغريهـا

عوصاً طلبهـا يبيـد حيـل الانذالـي
. . . . . .ومن لايلبي طلبهـا كيـف يرضيهـا

اتعب على شانهـا واطـول حبالـي
. . . . . .مايبرد الجاش ليـن اكسـب تحديهـا

دامي من اللي تروم الشامـخ العالـي
. . . . . .اللي صعيبه علـى الدالـه هقاويهـا

قومٍ بوقـت الشدايـد تسعـد الفالـي
. . . . . .يقـر تاريخهـا بأفـعـال اياديـهـا

ماهوب انا اللي يعيش وهمه المالـي
. . . . . .أمـلا رصيـدي مراجـل يامخليهـا

ماعذربـو عمـي بفعلـه ولاخالـي
. . . . . .روسٍ عـن الطامنـه ربـي معليهـا

عن دربهم ليش اجنب عيب ومحالـي
. . . . . .أحسلي امـوت قبـل انـي اسويهـا

والمرجله ماأشغلتني عنها الاشغالـي
. . . . . .على المشاغـل لـزوم انـي ابديهـا

مدهال جدي وابوي يصيـر مدهالـي
. . . . . .اعـرف مداهيلهـم مانـي بغاويهـا

احيـي مواريثهـم فينـي وتبقـالـي
. . . . . .مرجع وطـرقٍ مشوهـالازم امشيهـا

والله ماارتاح ليـن آصـل لمنزالـي
. . . . . .في قمـة الطيـب وأصيـر متعليهـا

لـو ماتزيـن الظـروف ولاتهيالـي
. . . . . .أعنز على اللي هشيم القشع يحييهـا

المجتهـد لـه نصيـب ولازم ينالـي
. . . . . .وأنـا بذلـت الجهـود الله يهيـهـا

لوان عيني تشوف الـوان واشكالـي
. . . . . .مـن سودالايـام واحـداثٍ تخبيهـا

لابدماتعـتـدل والـدهـر مـيـالـي
. . . . . .سبحانـه القـادر بلحظـه يصفيهـا

مانيب يائـس وأجـدد دايـم آمالـي
. . . . . .لـو ماتحقـق فأنـا مانـي بناسيهـا

ومن عقب ماادركت مخراجي ومدخالي
. . . . . .اليوم نفسي عـن الميـلات حاديهـا

والك النصيحه هديـة غالـي لغالـي
. . . . . .من تجربة دنيـةٍ عايشـت ماضيهـا

صل الفروض وتراها خير الاعمالـي
. . . . . .ولاتكـاسـل تــرا لازم تـأديـهـا

وترى الرجوله ماهيب شماغ وعقالي
. . . . . .والا جديـد الثيـاب اللـي تكويـهـا

مناظـر الزيـف ماتسوالهـا ريالـي
. . . . . .دعها لمن يشتقـي فيهـا وهاويهـا

ولاتجلس الا بمجلس نـاس عقالـي
. . . . . .خـل الجهاهيـل لاتطربـك أغانيهـا

ولاتستمع في كثيـر القيـل والقالـي
. . . . . .واهل النميمـه لاتآخذمـن دواديهـا

اللـي نقلـك حكـي لحكـاك نقالـي
. . . . . .قصده يشـب الفتـن بعلـوم يلويهـا

واحذرصديقٍ بوقت الضيـق محتالـي
. . . . . .يوعـدك لكـن وعـوده مايوفيـهـا

لاتقول هذا بطيـب وخيـر يسعالـي
. . . . . .حتـى يبيـن نوايـاً فيـك ناويـهـا

ولاتآمن الغدر لومن شخـصٍ موالـي
. . . . . .بعض الاقـارب عقـارب لاتواليهـا

واحذر ترى اللي يعيل يجيـه عيالـي
. . . . . .الناس توذيك لامن صـرت موذيهـا

تميت قولي واقـول لجاهـل أقوالـي
. . . . . .النـار ماتحـرق الا رجـل واطيهـا

الـخـالـدي