أرز مجبوس مع مضبي دجاج ع الحجر
 

خلال الاسبوع الماضي قلنا بنغير جو نشوفلنا مكان نرمس فيه وبنطبخ فيه بأنفسنا تكون لمتنا حلوه وسوالف ونعيد ذكريات أول لما نطلع للبر والحمدالله الكل يعرف بلادنا الحبيبه سلطنة عمان تتمتع بطبيعه خلابه ومتنوعه وحتى أجوائنا متنوعه من منطقه لمنطقه

المهم اعذروني عاد على النقل يمكن تكون التغطيه ما مكتمله واتمنى من الاخوه المراقبين أظهار الصور عن بدل رابط لاني اول مره اشارك في هذا القسم.

طلعنا وقت العصر

أشترينا خمس دجاجات الصفاء عماني طازج حجم 1000

http://www.imgur.com/Tpz3rsr.jpeg


قطعنا الدجاج بالنص من دون لا نفصلهن عن بعض وقمنا بضرب الدجاج باليد حتى فرشناهن مثل اللي يمعلوه بالمطاعم ودعكناهن بملح بعدين صبغة أكل برتقاليه من ثم فلفل أسود وبهارات هنديه متنوعه وخليناهن 3 ساعات لحد ما يتشبع الدجاج بالبهار .

http://www.imgur.com/yDgmmUi.jpeg


خذينا موقعنا وقمنا بتشعيل الحطب


http://www.imgur.com/5eKnrS9.jpeg


لحد ما يطيح الحطب صرنا نلقط حجر ويكون عريض شوي وما سميك عشان يكتسب حراره بسرعه بعد ما جمعنا الحجر قمنا بغسله وتنشيفه

http://www.imgur.com/Mbk0KII.jpeg


بعدها قمنا بغسيل الارز وتقطيع طماط وبصل نص حق الشوي ع الحجر ونص حق الارز

http://www.imgur.com/cEJE9xs.jpeg


قمنا بوضع قدر الطبخ وشعلنا تحته النار وصبينا فيه زيت وبصل وثوم وجزر مبشور وفلفل رومي


http://www.imgur.com/HxHOJBj.jpeg


من بعدها عملنا قياس الماي وصبينا به الارز وورق غار وقرنفل وفلفل وبهارات هنديه متنوعه بعد ما طلع الارز شوي فوق صكرنا ع القدر وقصرنا النار ع آخر شي


http://www.imgur.com/kboXEkL.jpeg


بعد ما طاح الحطب اللي اشعلناه حق الشوي خلينا فوقه الحجر ووزعناه بتساوي وشكل متراص وخليناه ربع ساعه لحد ما يسخن وبعد ربع ساعه قمنا بدهن الحجر بزيت عشان الدجاج والطماط والبصل ما يطبق على الحجر

http://www.imgur.com/7GAfpoo.jpeg


وهذا شكل الدجاج والطماط والبصل بعد ما وضعناه تقريبا 35 دقيقه مع التقليب ع فترات صار خلاص جاهز حق الأكل

http://www.imgur.com/esrlt5A.jpeg


رجعنا لقدر الارز بعد ما اكمل 20 دقيقه على نار هاديه وهذا كان شكله

http://www.imgur.com/38ftv3O.jpeg



صبينا الارز في صينية كبيره ووضعنا الدجاج الطماط والبصل

http://www.imgur.com/hA4AXuD.jpeg


وهذه صوره تبكي الحجر

http://www.imgur.com/PAryc0H.jpeg


ماشاءالله كان طعمه لا يقاوم


وسلااامتكم المره الجايه التغطيه بتكون أن شاءالله أحسن