العنود: وشو دخل ساروه
طاحت لطيفه على ريولي وملتفته على الدريشه وعيونها يتغارقن
لطيفه: من يوم كان عمري 16 وأنا أحبه..كنت دايماً أحب أتقرب منه.. وما عرفت كيف الطريقه اللي ما لقيت غريها .. اني أخبرعويش ويا ليتني ما خبرتها لو قلت حق حمدوه والا شمسوه بيكون أحسن لي ..
العنود: عويش شو سوت ؟؟
لطوف: عويش خبرت ساروه اختي .. وساروه دايماً تهددني انها تخبر أمايه .. عشان جذيه صرت ما أحب أحتك فيها وايد .. وعويش خبرت خليفه وردت فعله كانت طبيعيه .. كل اللي قاله " بس أنا ما أحبها "
العنود: وانتي شدراج
لطوف: ساروه قالت لي .. هالكلام صار العيد اللي طاف وأول ما عرفت ساروه يت تذبحني بهالرمسه .. كأنها تتلذذ بعذابي ..
العنود: وانتي الحين تكرهين خليفه صح؟
لطيفه: هذا الشي الوحيد اللي ما قدرت أسويه .. ابتعدت من عقب العيد لين يوم عزيمة خالي كنت أتهرب كل ما اشوفه يالس .. والحين انجبرت اني أعيش فترة غياب أمايه وأبويه في بيت خالوه.. مع اني حاولت كم مره انا نسير بيت يدوه بس أمايه أصرت انا نكون أنا وساروه مع بعض.. وطبعاً عويش لعبت براس أمايه عشان تكون ويا ساروه .. ومثل ما فضحتني جدام ساروه وجدام خليفه أنا بقولج انها حاطه عينها على عمي وتباه يخطبها ..
انصدمت من اللي سمعته .. شو اللي يصير .. عم لطوف!! عويش شدراها به ووين تعرفه
العنود: وعويش شعرفها بعمج؟؟
لطيفه:شافته كم مره يوم يا بيتنا .. وهو شافها مره بالغلط.. وساروه تحاول تقنع خالي انه ياخذها ..
بس تحلم ..
العنود: مب قادره أستوعب اللي تقولينه
لطيفه: واليوم يوم دخلنا الصاله .. أنا متأكده مليون بالميه ان ساروه كانت ترمس عمي وعويش تسمع الكلام اللي بينهم
سكت فتره أستوعب الكلام اللي أسمعه.. مب قادره أصدق .. أحس راسي يعورني من كل هذا . كله مره وحده .. الشي الوحيد اللي أفكر فيه الحين ان أحسن شي شمسوه وحمدوه ما يدرن والا رووووووووووح بتصير عويش علوج في حلوجهن .. صح ما بيخبرن حد بس هن من الله يكرهنها.. لو درن بيطنزن عليها سنه ..
لطيفه: دخليج لا تبينين لهن .. عويش مهددتني ان خبرت حد بتخبرهم كلهم اني أحب خليفه
العنود: لا نخافين .. انسي انج قلتي لي أصلاً ... بس تعرفين أبغي أعرف شو اللي أكد لج ان كلام ساروه وعويش صدق
لطيفه: أي كلام؟
العنود: انهن قالن حق خليفه وخليفه قال انه ما يحبج
لطيفه: ما أدري.. بس ما لهن مصلحه انهن يجذبن ..
العنود: أنا وايد جريبه من خليفه.. في عمره ما قالي عن هالشي
لطيفه: ما أدري ..
العنود: انتي خلينا نرقد وصلت الساعه ثنتين .. باجر بنكمل سوالفنا
سكرت لطوف الدريشه وأنا بندت الليت وانسدحنا بنرقد .. وأحسن حل اني أشرد من التفكير وهو النوم ...

الـــــــــــــــجــــــــــــــــــزء الــــــــــــــثـــــــــــــــــــــامــــــــــ ــن عـــــــــــشــــــــــــــــــــــر

يوم الأثنين في الجامعه .. في البريك طلعت من الكلاس شفت شموه و نوال جدام الباب سلمت عليهن ..
شموه: حشى استاذكم لازم على الوقت..
العنود: كم مره قلت له خلص الوقت طلعنا.. عاطني اذن صما يعلني بلاه..
سرنا الكوفي خذنا الريوق.. ويلسنا نتريق طول الوقت أتكلم ويا شموه ونوال ساكته .. يمكن في شي مضايجنها.. الساعه عشر ردينا نكمل باقي الكلاسات..
..
الساعه أربع العصر ..
لطوف: عنودي.. عنووووووود
العنود: شووو
لطوف: قومي ..
العنود: شو تبين ..
لطوف:قومي صلي
العنود: انزين
قمت صليت .. شفت لطوف منسدحه
العنود: متى نشيتي ؟
لطوف: ما رقدت
العنود: غريبه
لطوف: ما قدرت أرقد..
العنود: شو فيج ؟؟
لطوف: من أمس أفكر..
العنود: في شو ؟؟
لطوف: شو اللي يضمن لي ان كلام عويش صح ..
العنود: شو وصلتي في تفكيرج ..
لطوف: ما أدري ..
العنود: ممكن تخلين هالسالفه عنج..وتدرسين لأنج إذا فكرتي في شي ما تقدرين تسوين شي فيه بينقع راسج ..
لطوف: عنودي ساعديني ..
العنود: في شوو
لطوف: ما تقولين انج جريبه من خليفه..حاولي تعرفين منه بأي طريقه ..
العنود: انتي عندج امتحان باجر ..
لطوف: لاء
قمت واتصلت حق حمدوه وشموه كانن في السياره رادات من الجامعه ..
حمدوه: هلا العنيدي
العنود: مرحبا حمدوه
حمدوه: حشى يالحس..خستي رقاد
العنود: احمدي ربج سمعتي صوتي ..
حمدوه: الحمدالله.. شو تبين؟
العنود: يايه أطلب منج انا ..
حمدوه: السموحه منج الشيخه عنود.. آمري تدللي شي في خاطرج
العنود: هيه
حمدوه: شو
العنود: يالله بنروح ويا عموه العزبه
حمدوه: شوووووووو ... بتبطين الساع جانج خايسه رقاد أنا تعبانه وأبغي أرقد
العنود: حرام عليكن
حمدوه: لالالالا شو ما أقدر عندي ربورت لازم أسلمه باجر وأنا من الله تعبانه فيني رقاد جانج فاضيه نحن لاء
العنود: جلبي ويهج ..
سكرت عنها ..
العنود: خلينا نسير أنا وانتي .. حمدوه وشميس ما بيروحن
لطوف: أنا أقولج ساعديني تقوليلي العزبه .. أنا اللي ما عندي سالفه اللي قلت لج
العنود: قومي انتي..
طلعنا في الصاله شفنا عموه الحين بتطلع ..
العنود: عموه بتروحين العزبه ؟
أم حمد: هيه
العنود: أنا ولطوف بنلحقج عقب ويا خليفه ..
أم حمد: زين جانكن بتونسنا
لطوف: انتي لين تخلصين شغلج وعبالتج ويالعمال بتلقينا يينا ..
أم حمد: برايكن عيل ..
طلعت عموه ورحت ويا لطوف المطبخ .. سوينا القهوه والعصير وسويت خبيصه سريعه وطلعت من المطبخ .. دخلنا داخل البيت توني بركب فوق أوعي خليفه لقيته على الدري
خليفه: خفي البترول شوي .. بلاج تربعين ..
العنود: صح النوم
خليفه: صح بدنج
العنود: وين بتسير؟
خليفه: ما بسير مكان ..
العنود: شو رايك تودينا العزبه عند عموه
خليفه: شووو.. جلبي ويهج ناش مالي بارض
العنود: خليفه دخيلك ..
خليفه: العنيدي ما أروم أوديج ..جان سرتي وياها
العنود: لين خلصنا الفواله ..
خليفه: ما أروم
العنود: دخييييييييلك
خليفه: لااااا إله إلا الله
مشيت عنه وخليته .. مستحيل أقوله كلمه ثانيه خلاص دامه ما بيودينا .. مستحيل يغير رايه
خليفه: تعالي
العنود: شووو
خليفه: تلببسي بسرعه
العنود: بتودينا
خليفه: منو بيسير وياج
العنود: أنا ولطوف
خليفه: يالله بسرعه بترياكن في السياره
العنود: لا تطلع من البيت جدم السياره
خليفه: انزين
رحت الحجره لبست شيلتي وطلعت ويا لطوف .. خليت لامي تييب الفواله السياره .. ورحنا العزبه
العنود: خطف الدكان نبغي بيبسي
ما رد عليه وخطف الدكان طلب ثلاثه بيبسي وكملنا دربنا ..طول الدرب وأنا أفكر كيف أفتح الموضوع ويا خليفه .. ما لقيت أي مدخل يدخلني في السالفه... وصلنا العزبه وعموه بعدها عند الهوش.. لفيت أشوف أم عبدالله كانت توها واصله .. قبلنا بشوي .. نزلنا الحصير والفواله ويلسنا .. قامت لطوف عنا تتمشى..عرفت من حركتها انها تباني أسأله بس أنا بروحي مب عارفه كيف.. قطع عليه خليفه
خليفه: عنودي شو فيها لطيفه ؟؟
العنود: ما فيها شي
خليفه: طول الدرب ساكته .. والحين سارت تتمشى بروحها
العنود: ليش ما سألتها؟
خليفه: أستحي أسألها
العنود: حد يستحي من لطفين .. ماشالله عليها ماتخلي حد يستحي منها
خليفه: لأنج دوم تيلسين وياها
العنود: وانت ليش ما تيلس وياها؟
خليفه: وين أيلس وياها .. أصلاً أنا استغربت انها ركبت ويايه اليوم
العنود: ليش؟
خليفه: مم ما أدري.. عندي احساس انا تكرهني
العنود: هههههه ليش يعني ؟؟
خليفه: إذا دخلت مكان تطلع.. وإذا ما طلعت مستحيل ترمس ..
العنود: أنا ما لاحظت .. بس يمكن صار لكم موقف خلاها على هالحال ..
خليفه: أي موقف انتي بعد..أقولج ما تيلس ويايه ..
العنود: لا يعني يمكن .. بس أنا على طول ما يلست وياها ما قالت لي شي عنك أبداً
خليفه: زقريها
العنود: ليش شو تباها
خليفه: عن الاستهبال وخليها تي ..
العنود: تباها ترد ازقرها بروحك
..طنشني ولف وراه
خليفه( بصوت عالي): لطفيييييييييين
لطوف: هاااااااه
خليفه: وين تبين تعالي ..
ردت لطوف صوبنا ويلست
العنود: قوم شغل لنا الإف إم
خليفه: مستطربه
العنود: هيه يالله قم
شغل خليفه الإف إم ورد يلس
خليفه: شو فيج لطوف ؟
لطيفه: ماشي
خليفه: ألقاج مويمه ما ترمسين
لطيفه: شو أقول؟
العنود: قولي أي شي بس لا تسكتين ..
خليفه: ما تعطيج هاللي عدالج
العنود: لا ما تحتاي اللي عندها بروحها اللي يسدها ..
لطوف: قوموا خلونا نتمشى ..
وقفنا ورحنا صوب العراقيب اللي عدالنا .. وأنا أمشي تخرطفت وطحت .. طيحه لو ماكانت على رمل جان رحت فيها ..
لطوف: ههههههههههههههههههههههههه
العنود: تضحكين يالعنز .. آآآآآآآآآآآآخخخ
لطوف: ههههههههه والله ما أروم أوقف من الضحك
يلست لطوف عدالي وهيه تضحك لفيت على خليفه لقيته مبتسم ومركز على لطوف وهيه تضحك .. لفيت على لطوف بعدها ناقعه من الضحك .. دقيتها على ريولها وأشرت لها على خلوف .. رفعت راسها شافته استحت ونزلت راسها ووقفت ..
العنود: عطيني ايديج
ساعدتني لطوف ووقفت ومشيت عنهم صوب عموه شفتها يالسه على الحصير روحها
خليفه: تعالي وين سايره
العنود: ما بسير وياكم ..
لطوف: ردي محد بيضحك هههههه
العنود: بعدج ما ضحكتي ..
طنشتهم ورديت عنهم وردوا يتمشون .. عقب ما يلسنا شفت سيارة حارب يايه صوبنا
خليفه: لازم يوم نيي العزبه حروب يلحقنا
وقفت سيارة حارب عدالنا ونزلن منها حمدوه وشمسوه .. وحارب نزل عقبهن
حارب: السلام عليكم
الجميع : وعليكم السلام
العنود: غيرتن رايكن
حمدوه: لا غيرناه ولا شي بس مجبورين
شمسوه: والله ان فيني رقااد
أم عبدالله: شو يابكن عيل
حمدوه: حارب لزم علينا
أم عبدالله: شعنه ؟
شمسوه(تشوف العنود بنظرة بخبث):مااااااا أدري تخبريه
حارب: شفتهن توهن رادات من الجامعه وانا ضايج حملتهن ويايه وييت أشوفج العيوز تولهت عليج
أم عبدالله : مكاار.. شي عندك والا ما بتييبهن ..
شمسوه: شو في هالطبقه؟
خليفه: ما فيها شي.. خلص كله
العنود: يجذب عليج .. فيها خبيصه..
فتحت شمسوه الطبقه وحطت لها في الصحن ويلسن ياكلن .. عقب ما كلنا وخلصنا قمنا نحن البنات وسرنا نتمشى...قبل أذان المغرب نحن كنا على العرقوب ..شفناهم يركبون السيايير وراحوا عنا .. نزلنا نربع من فوق
حمدوه: حووووووووو لا تتخبل
لطوف: عن الخبال .. نحن شو اللي خلانا نفكر في سيرة العزبه وياهم
والنزله على العرقوب سرييعه وما قدرت حمدوه تتوازن واندبغت وتدربحت من فوق لييييييييين تحت .. جربوا خليفه وحارب ووقفوا عدال حمدوه
حارب: ههههههههههههههههههههههههه السلومه
خليفه: ههههههههههههه صدق انج قوطي
حمدوه: يعللللللللللني بلاكم .. كله منكم
حارب: تستهبلن .. تعرفن انا مستحيل نخليكن ونسير
ركبنا السيايير وردينا البيت .. يوم احتفضنا فيه بذكريات بنذكرها السنين اليايه..
..عقب صلاة المغرب..فتحت لطوف تحقيق ويايه واللي فهمته من خليفه انه ما صار أي موقف بيينهم ..
لطوف: بس أبغي اتأكد أكثر
العنود: ممممم ما أدري بس بقولج في طبعة الريال لو عرف عن وحده انها تحبه مستحيل يطنشها .. وخصوصاً إذا ما كانت تبين له هالشي
لطوف: ما فهمت
العنود: يعني لو عويش قالت له انج تحبينه ما بيقول أنا ما أحبها .. ممكن انه ينصدم ويا انه يطنشج إذا ما يحبج أو انه يتقرب منج إذا ارتاح لج ... ومن كلامه اليوم بصراحه لو صار أي موقف بيقولي .. وأنا متأكده انه مايدري انج تحبينه وعويش ما قالت له شي..
لطوف: أففففففففف تعبت بحل الواجب وبروح أتصل حق عمي..
طلعت لطوف الكتب من شنطتها ويلست تدرس وأنا طلعت في الحديقه واتصلت حق باقي القواطي..بس ما طاعن يردن تذكرت انهن مشغولات قلت بسير لهن ..
رديت البيت الساعه ثمان .. دخلت الصاله لقيت لطوف ترمس في التيلفون .. يلست عدالها .. كملت سوالفها وعرفت انها ترمس عمها .. دخلوا حمد وخليفه الصاله وعلى طول سكرت لطوف عن خالها ..
حمد: السلام عليكم
لطيفه+العنود: وعليكم السلام
حمد: وين الباقيين ؟
العنود: نحن سرنا العزبه وياعموه ومن ردينا ما لقينا حد في البيت ..
في هالوقت دخلن ساروه وعويش وآمنه
آمنه: السلام عليكم
الجميع: وعليكم السلام
حمد: وين كنتن ؟
آمنه: كارفور
حمد: حطن العشى ..
وطبعاً أنا ولطوف اللي سرنا لأنهن توهن واصلات من السوق ..
سرنا المطبخ حطينا العشى و خليت البشاكير يودنه .. عقب العشى الكل دخل يرقد وطلعنا من الصاله أنا ولطوف وعويش وساروه في نفس الوقت .. ركبن ساروه وعويش على الدري ونحن مشينا صوب الحجره.. وقفت لطوف ووقفت وياها
لطوف: ساروه عمي بطي بيي يوم الخميس
وقفن ساروه ولطوف ولاحظت الاهتمام في نظرة عويش ..
ساروه : متى رمستيه؟
لطوف: اليوم
ساروه: ما قالي انه بيي
لطوف: اليوم قلتله وقال يوم الخميس بيخطف علينا
ساروه: الحين ترمسين
لطوف: المهم أنا قلت لج .. وتراه ما بييلس بيطلعنا
ساروه: لا منو قال بنيلس وياه هنيه
لطوف: ما بيشاورج ..
...
ركبن ساروه وعويش ونحن دخلنا الحجره ..
..................
عندي امتحان سعي اليوم وأنا من يوم الأثنين أحاول أقسم الدروس .. أبغي أكتب الورقه وفيها القوانين يمكن تساعدني.. من عقب صلاة الفجر ما رقدت شليت كتبي وكنت بطلع من الحجره
لطوف: عنودي وين سايره ؟
العنود: بروح أدرس برا .. الجو حلو
لطوف: صبري بييب كتابي وبروح وياج
ولعت الليت وغيرت لطوف بجامتها وطلعت كتابها .. ورحنا في البلكونه اللي عند الباب الوراني .. فتحت الباب شفت خليفه يالس وسرحان ..استغربت منه لفيت أشوف لطوف ورايه لقيت الاستغراب في عيونها ..
العنود: خليفه !
خليفه: بسم الله يالسحار شو موعنكن ؟
العنود: بندرس..
خليفه: وشو مطلعنكن
العنود: الجو حلو قلت بنيلس هنيه .. غريبه انت واعي
خليفه: قمت سمعت الأذان سرت صليت ورديت هنيه .. ما فيني رقاد
العنود( مبتسمه): سرقت النوم من داخل عيوني
خليفه:جلبي ويهج
وطيت كتبي ويلست ويلست عدالي لطوف .. بديت أكتب القوانين ولطوف عيونها في كتابها وترفعها تشوف خليفه دقايق وإذا لاحظتها أدقها على ريولها .. وخليفه يجلب تيلفونه ووسرحان ..
العنود: بروح أسوي جاهي حليب
لطوف: بروح وياج
العنود( تغمز حق لطوف): لا انتي يلسي درسي وأنا ما بطول ..
... رحت المطبخ لقيت البشكاره مجهزه الحليب .. شليته وتعمدت اني أطول .. يمكن هالمخبل يرمسون .. وصلت عدال البلكونه سمعتهم يرمسون ..
العنود: وصل الجاهي
خليفه: ماشالله عليج سريعه
العنود: لقيته جاهز
صبيت لي كوب حليب ورديت مكاني..
خليفه: صدق ما فيج مذهب..ما ترومين تصبيلنا
العنود:No
قامت لطيفه وصبت كوبين حليب واحد حطته جدام خليفه والثاني شربت منه .. خلصت الورقه اللي كنت أكتبها وبديت أحل كم تمرين .. ولطوف وخليفه يسولفون
حمد( يدخل): صباح الخير
الجميع: صباح النور
حمد: شو موعنكم من وقت؟
العنود: ندرس عندنا امتحانات
حمد: الله يوفقكم يا رب .. أنا سمعت صدعه دقيت على العنيدي ومالقيت حد في الحجره سمعت ضحك وتبعت الصوت ..
خليفه: ولقيت مصدر الازعاج
حمد: منو غيركم
راحوا خليفه ولطوف يغيرون ملابسهم .. وتميت أنا ويا حمد
حمد: علومج العنيدي ..
العنود: الحمدالله
حمد: الساعه كم امتحانج
العنود: الساعه عشر
حمد: درستي زين؟
العنود: أعجبك أنا .. تراني اختك
قبضني من راسي وقرب مني وباسني بين عيوني .. أول مره حمد يسوي هالحركه .. قفطت وما قدرت أرفع راسي ..
يلست ويا حمد لين الساعه سبع ونص وعقب راح الشركه وأنا دخلت الحجره .. تعبت من الدراسه اتصلت حق شموه ما ترد عليه .. طلعت ويلست في الصاله أول مره تنفتح نفسي للريوق تريقت ويلست أطالع التلفزيون .. الساعه تسع رحت تلبست واتصلت حق سليم ورحت الجامعه .. لقيت بنات كلاسي في الرباعيه ويلست وياهن لين وقت الامتحان ..الساعه عشر دخلنا الكلاس كان الامتحان صعب وعلى قد الدراسه اللي درستها الله يستر من النتيجه ..أول ما طلعت رحت الرسبشن لقيت حصوه واقفه ويا ميثوه
العنود: السلام عليكم
حصوه: وعليكم السلام هلا عنودي
العنود: شحالج ميثوه
ميثوه: يسرج الحال انتي شحالج
العنود: بخير ربي يسلمج
حصوه: هاه بشري شو سويتي
العنود: صعب والله
حصوه: الله يعينكم
العنود: بتروحين؟
حصوه: هيه توني اتصلت حق غرين..
طلعنا من الجامعه 12:30 .. وصلت البيت صليت ورقدت وما حسيت بلطوف .. قمت الساعه خمس ونص العصر وأنا شبعانه رقاد .. وعيت لطوف ودخلت أتسبح طلعت من الحمام لقيتها بعدها منسدحه
العنود: لطووووووف بسج رقاد قومي
لطوف: انزين
العنود: يالله قومي بنروح بيت يدتج .. لبسي أحمر بنطقم
لطوف: شو عندج اليوم مستانسه
العنود: ما أدري
دخلت لطوف تسبحت ولبست كندوه حمرا .. ورحنا بيت أم عبدالله .. دخلنا الصاله لقينا علي يضارب حمدوه
العنود: السلام عليكم
حمدوه: عنودي دخليييييييج شليه وطلعي وياه
العنود: شو صاير ؟
حمدوه: غلس ولد اختج .. طفرني
علي: قاهرتني ما عندها دوام يوم الأربعا
شمسوه(تدخل): السلام عليكم
الجميع: وعليكم السلام
شمسوه: بلاج حمدوه تصارخين
حمدوه: واحد غلس يالس ما تشوفينه
شمسوه: لا ما أشوفه
علي: غريبه العاده من حد يقول هالرمسه تقولين محد غيره هذا عليوي( يقلدها)
في هالوقت نزل حارب من فوق ..
حارب: السلام عليكم
الجميع:وعليكم السلام
حارب: غريبه علي في البيت
علي: ضجت ما عرفت وين أسير
حارب: قم خلنا نطلع
شمسوه: نفسي مره وحده تعزمونا على الطلعه
حارب: وين تبين ؟
شمسوه: أيييييييييييي مكان ..
علي: بتسيرين العزبه؟
شمسوه: ماشي مكان غير العزبه؟!
حارب: بعدين بوديج المبزره
شمسوه: من متى وانت بتودينا .. ولا حتى روحناها
حارب: قلت لج بوديكن.. بس مب اليوم
شمسوه: متى عيل؟
حارب: يوم بيدق في راسي
شمسوه: عيل ما بنسير
العنود: هيه والله ودونا المبزره
علي: نحن ما افتكينا من وحده طلعت الثانيه .. المبزره ماااااااشي
العنود: دخيلك علي والله ضجنا ..
حارب: قلتلكن بوديكن يعني بوديكن .. بس مب اليوم
علي: شو توديهن ... يابوك لا تفتح لنا بيبان مسكره
حمدوه: دامك ما بتتكرم علينا .. ليش تمنع كرم غيرك
حارب: اظهر اظهر.. حشى صدعه
طلعوا عنا علي وحارب .. راحت شمسوه يابت لنا بيبسي وردت
حمدوه: تدرن ان عرس حصوه في الاجازه
شمسوه: أي اجازه ؟؟!
حمدوه: عطلت الربيع
العنود: والله وبتعرسين ياحصيص
شمسوه: أول مره حد بيعرس عندنا ... الله وناسه
حمدوه: عاد أنا اخت العروس
شمسوه: طالع لحقتلنا اليهال
حمدوه: هيه ما بخليكن تدخلن عندها.. ومابخليكن تركبن على الكوشه تقطعن الورد
العنود: فضل عنج .. من الحين خقت علينا الله يعين يوم العرس
حمدوه: ههههه ويوم العرس لا تون الا فليل .. أعرفكن بتيلسن في بيتنا من الصبح
العنود: لا منو قال ببات عندكم أنا ..
شمسوه: تعالي انتي شو سويتي في امتحانج اليوم ..
العنود: الله يغربلهم وياه .. وايد صعب ..
لطوف: شميس حطي لنا نجوم ..
العنود: باجر بروح بيت يدوه
حمدوه: شو تسوين .. من اسبوعين كنتي عندهم
العنود: ما ببات بسير بس العصر وبرد.. منى يامعه بنات العايله ..
شمسوه: شو المناسبه ؟؟..
العنود: من غير مناسبه
حمدوه: هههههه عاد لا تردين منتفخه باجر
العنود: لا انشالله .. لا تفاولين عليه ..
يلسنا وياهن لين عقب صلاة العشى ..وردينا البيت كنت بكلم حمد اني بروح باجر بيت يدوه بس غيرت راي ..عقب ما راحوا كلهم يرقدون يلست ويا لطوف نتابع الفلم الهندي..الساعه 12:30 دخل خليفه الصاله
خليفه: السلام عليكم
العنود+لطيفه: وعليكم السلام
خليفه: شو تشوفن ؟
العنود: فلم الهندي
خليفه: وين باقي القواطي اليوم
العنود: عليوي السبال ما خلاهن يطلعن
خليفه: هههههه تستاهلن ..
العنود: خلوف قوم خلنا نسير عندهن
خلوف: ماشي سيره يالله .. كملن السهره هنيه
العنود: دخليك والله أحلى السهره وياهن ..
سمعنا دق على باب الصاله الثاني .. مشى خليفه وفتح الباب ..
خليفه: هذن القواطي بتريحيني من السيره
حمدوه: مرحباااااااااااااااااااا
العنود: هلا والله
لطيفه: منو يابكن .. علي وين ؟؟!
حمدوه:عنودي حارب بيدخل ..
لبست شيلتي .. ودخلوا حارب وشمسوه
حارب: السلام عليكم
الجميع: وعليكم السلام..
العنود:علي وين عنكن ؟
حارب( مبتسم): شو ما يستوي أنا أييبهن
العنود(قافطه):هاا.. لابس قلت لي علي ما خلاهن يطلعن
حارب: ماعلينا من عليوي نحن .. وين ما نبغي نسير نسير..
العنود: انزين ما قلت شي
قهرني .. ليش يقفطني .. سكت وما رديت أتكلم ..صدق انه سخيييف .. كملنا الفلم ..بس ما كنت منتبهه لأي شي يصير فيه .. من القهر اللي فيني ما أدري ليش ..
خليفه : عنوووووووووووود
العنود: واللغثه ...شعندك تصارخ
خليفه: كم مره زقرتج
العنود: خير شعندك..
خليفه: قومي سويلنا شي ناكله
قمت وطلعت من الصاله ولحقتني شمسوه .. رحنا المطبخ وما تكلمنا في شي .. دخلت المطبخ وما عرفت شو أسوي لهم
شمسوه: شو بنسويلهم
العنود: شدراني .. مافيني أطبخ شي
شمسوه: شو ياج انتي عصبتي فجأه
العنود: ماشي..
شمسوه: شو ماشي .. بس منه والدرب تعصبين
العنود: قلت لج ماشي ..
دخل حارب المطبخ وسار صوب الثلاجه صب له كوب ماي ويلس يشرب منه تقول يشرب عصير ..
حارب: شو بتسون ..
شمسوه: ما لقينا شي جاهز .. وماشي خبز عشان نسوي سندويجات ..
حارب: بروح الكفتريا
شمسوه: بتسوي خير فينا
حارب: شو تبن انتن ؟
شمسوه: أنا أبغي فيليه
حارب: وانتي عنودي شو تبين؟؟
العنود: ما أبغي شي
حارب: إذا ما طلبتي ما بييب لهم
سكت وما رديت عليه ...
شمسوه: يا سلام إذا هيه مب يوعانه نحن يوعانيين
حارب: أنا بروح بس عشان أراضيها .. والا مابتاكلون اليوم
شمسوه: ليش تراضيها ..شو سويتبها حروب
حارب: جب انتي مايخصج
شمسوه: عنودي خلينا نرد الصاله أحسن
وقفت وكنت بطلع من المطبخ
حارب: عنودي قولي شو تبين .. والا تراني ما بييب شي
العنود: مالي خاطر والله
حارب: طلبي أي شي .. المهم ترضين
العنود: على كيفك ..
حارب: بييب لج شراتي فيليه وبيبسي طبعاً
طلعنا من المطبخ وقفنا أنا وشمسوه وحارب مشى بيطلع من البيت
شمسوه: تعال بنسألهم شو يبون
حارب: سأليهم واتصلولي..المهم عرفت العنيدي شو تبغي .. مانروم على زعلها نحن
راح عنا وأنا واقفه مكاني ما تحركت ..منصدمه منه ياربي هالانسان بيذبحني مب قادره أستوعب اللي صار.. في عمري ما شفت حد جريئ مثله
شمسوه: حووه ... العنيدي مشي مشي
العنود: هااه ..( وبعد تفكير) شمسوه حارب شوفيه ؟
شمسوه: بعدين بقولج شو فيه .. خلينا نسير نكمل الفلم ..
ردينا الصاله وأنا بعدني في صدمه مب قادره أستوعب
خليفه: شو هذا.. أنا وين مطرشنكن
شمسوه: مالقينا شي نسويه ماشي خبز
خليفه: سون أي شي أنا يوعان ما تعشيت
شمسوه: حارب راح الكفتريا .. اتصلواله قولوا له شو تبيون
.. اتصل خليفه حق حارب وطلبوا اللي يبونه .. عقب نص ساعه رد حارب البيت .. كملنا الفلم لين خلص.. ما قدرت آكل شي .. كلت شوي من السندويجه وشربت البيبسي الأول ولقيت غيره على الطاوله .. قمت فتحته
حارب: تعالي تعالي .. منو قالج تاخذينه
العنود: محد قالي ما آخذه
حارب: ومحد قالج خذيه
العنود: خلاص فتحته الحين أنا وبشربه
حارب: توج مخلصه واحد
شمسوه: انتي كلي قبل عقب شربي
لف حارب صوب الطاوله وشاف سندويجتي
خليفه: عنودي إذا ما تبينها أنا باكلها
حارب: تبين البيبسي كلي قبل
العنود: باكلها المهم أشرب البيبسي
حارب: على بالي أنا أكثر واحد يشرب بيبسي .. بس طلعت ولا شي جدام عمتك
خليفه: انتوا أظني جبودكم رايحه خلاص
حمدوه: ما أظني تمت جبد فيهم تلقاها انطحنت خلاص ..
...
الساعه أربع طلعوا حارب وشمسوه وحمدوه .. ونحن رقدنا عقب ما صلينا
................
الـــــــــــــــــــجــــــــــــــــــــزء الــــــــــتـــــــــــــــاســــــــــــع عـــــــــــــــــــشــــــــــــــــر

يوم الخميس عقب الغدا كنا يالسين في الصاله .. وأبغي أقول حق حمد اني بروح اليوم.. قمت ويلست عداله
العنود: حمد
حمد: عونج
العنود: بروح بيت خالي مانع اليوم( خال أمي)
حمد: ليش .. شو تسوين ؟
العنود: اليوم بنتيمع كلنا عندهم ..
حمد: سيري.. بس منو بيوديج
العنود: هههه خليفه
خليفه كان يشرب جاهي .. قطع الشرب وسوى حركه بينت انه احترق لسانه لف صوبي
خليفه: منو قال؟؟.. على كيفج؟!؟
العنود: انت قلت
خليف: متى قلت يالجذابه !!
العنود: بعدين بذكرك .. في السياره
خليفه( بنقمه): والله..
العنود: هيه يوم بتوصلني بذكرك
خليفه: بتبطين الساع .. ما أروم...
العنود: لا بتوديني .. غيث اليوم ساير دبي محد غيرك
خليفه: خلي علي يوديج
العنود: محد بيوديني غيرك
آمنه: يقولج ما بيوديج .. بتروحين عندج الدريول
حسيت اني سببت مشكله .. وعادي حمد يعصب.. بس الحمدالله قطع عليهم التيلفون .. كانت موزه متصله .. شليت بعمري ودخلت الحجره .. واتصلت حق سالم
سالم: مرحبا مليون بالحلوين
هالانسان يحسسني بغلاتي عنده .. ما أدري ليش أستانس وياه وأحبه وأحس غلاته عندي غير عن الباقين ..
العنود: مرحبا الساع ..
سالم: شحالج الغالي
العنود: الحمدالله .. انت أخبارك
سالم: لو تبين تعرفين أخباري جان ييتي صوبنا
العنود: أمس أنا عندكم من العصر لين عقب أذان العشى
سالم: كنت بعدني في الشركه
العنود: عنبوه حمد ما ييلس كثرك
سالم: عندنا شغل..يالله تخرجي وتعالي ساعدينا
العنود: بساعدك في الشركه اللي انت بتفتحها
سالم: انشااااااالله .. يسمع منج رب العالمين
العنود: أقول بوغنيم
سالم: آمري.
العنود: إذا ما عندك شغل أبغي أروح صوب بيت قوم يدوه العصر
سالم: من عيوني .. بوديج وبردج بعد جان تبين .. كم عنود نحن عندنا
العنود: فديت روحك .. مشكور
سالم: أنا برقد الحين وعند الأذان بصلي وبرد البيت وقت ما تبين تروحين اتصليلي
العنود: انت ارقد الحين .. مشكور سالم
سالم: أوكي فديتج .. يالله شي فخاطرج
العنود: سلامت قلبك
سالم: الله يسلمج.. مع السلامه
العنود: الله يحفظك
سكرت عن سالم وأنا مقرره إذا أبغي خليفه يوديني مكان ما أقوله جدام آمنه وإذا رحت اليوم ويا خليفه آمنه بتسوي لي سالفه وأنا مافيني عليها ..قمت صوب الكبت بطلع لي بدله ناويه أكشخ اليوم سمعت دق قوي على الباب وعقب دخلوا خليفه ولطوف بدفاشه
العنود: شعندكم..
لطوف: أنا ما يخصني كنت بدخل ولحقني.. قالي بزيغها
العنود: رمستي أمج؟
لطوف: هيه .. تسلم عليج
العنود: الله يسلمها .. شحالهم ..وأخبارها عفاري
لطوف: مستمرين في العلاج .. بعدهم مطولين
العنود: الله يردهم بالسلامه..
لطوف+خليفه: آميين
خليفه: عنودي متى تبين تروحين؟
العنود: وين؟
خليفه: تراج تقولين تبين تروحين عند يدتج
العنود: خلاص برايك سالم بيوديني
خليفه: ليش؟
العنود: تراك قلت ما تروم توديني .. اتصلت حق سالم وقلت له
خليفه: لا ماشي أنا بوديج
العنود: سالم عنده شغل بيخطفني عندهم وعقب ما يخلص بيمر ياخذني
خليفه: أنا بوديج وبردج شو تبين بعد
العنود: ما أبغي شي.. فديتك خلوف خلاص أنا اتصلت حق سالم .. والله انت قلت لي ما تروم
سكت عني خليفه وشكله متلوم فيني .. بغيت أحسسه اني مب حاطه في خاطري بس ما عرفت شو أقوله .. وقف وطلع من الحجره ولحقته
العنود: وين ساير خلوف
خليفه: بسير مواعد الربع ..
العنود: لا والله أونه مواعد الربع وكان يبغي يوديني .. عزالله ما رحت الحمدالله اني اتصلت حق سالم ..
خليفه: كنت ما بروح وبيلس في البيت عشان أوديج العصر
العنود: مب لازم تيلس عشان توديني.. يستوي تيلس في البيت بدون سبب ولا شغله
خليفه: لا ما أروم أمرض
العنود: هيه عيل نحن محد يسوي لنا سالفه حليلنا
خليفه: انتن محد يفتح لكن سالفه فيها طلعه ..
العنود: خلاص يابوك روح وين ما تبغي محد بيقولك شي
راح خليفه عند ربعه وأنا دخلت الحجره .. لقيت لطوف منسدحه على بطنها وحاطه سماعات تيلفوني في اذنها وتغني
العنود: شو تسوين ؟
انسدحت على ظهرها وبندت الإف إم ولفت صوبي
لطوف : أسمع دوار الساعه ونص
العنود: بتطلعين ويا عمج اليوم
لطوف : بنطلع .. لاااااااازم نطلع حريمتها عويش شوفته .. أنا رمسته أمس ووعدني يطلعني
العنود: يالله قومي عيل.. أنا صدق من زمااان ما كشخت
لطوف: انتي تروحين الجامعه كل يوم ليش ما تكشخين .. اللي يشوفج يقول رايحه المدرسه
العنود: الجامعه كلها رياييل ما فيني
قمت طلعت كل البدل اللي عندي في الكبت وكل مره أركب وأختار وأقايس ..ولطوف مخترشه ويايه .. آخر شي اخترت تنوره بلون الوردي الفاتح ونفس لونها بدي هاي نك وعليه بدي مفتوح وايد ايده طويله عليه خطوط بنيه وورديه غامج
لطوف: بصراحه .. روووووووووووعه
العنود: والله
لطوف: صدق والله يجنن .. الهاي نك وايد حلوه عليج
العنود: تسلمين
لطوف: بتلبسين عباه مفتوحه
العنود: أكيد .. دامني سايره عزيمه
لطوف: تعرفين لو قلتي لي اسلاميه كنت بصفعج
العنود: لا الاسلاميه حق الجامعه ..
لطوف: عنودي أبغي بدي من عندج
العنود: أنا كم مره قلت لج اخذي اللي تبينه
لطوف: ما عرفت شو ألبس
العنود: كم بدله جربتي لين الحين
لطوف: ههههههه ست .. وما عيبتني أي وحده منهن
العنود: شوفي لبسي التنوره السودا وهالبودي عليها
لطوف : كنت بقولج من قبل بس قلت بشوف اللي عندي أول
العنود: لأنج سباله تدرين ..
لطوف: تراه ماشي وقت خلينا نخلص ..
شليت الملابس ورحت أوديهن عند لامي تكويهن وشفت عويش وساروه في المطبخ ويا نارمين .. استغربت أول مره أشوفهن يطبخن ... رديت الحجره كنت بدخل أتسبح ولطوف فاتحه المسن .. دخلن عويش وساروه الحجره ..
ساروه : وين بتروحين لطفين ؟
لطوف: ما بروح مكان
ساروه: عيل ليش مخليه الخدامه تكوي ملابسج
لطوف: هيييه .. تراني قلت لج بنطلع ويا عمي
ساروه: وأنا قلت لج ما بنطلع بنيلس وياه هنيه
لطوف: والله ما بتطلعين على راحتج .. أنا عمي واعدني انه يطلعني
ساروه: لطوف لا تتدلعين على عمي .. قلت لج ما بنطلع يعني ما بنطلع
لطوف: بدلع على كيفي.. وما تبين تطلعين على راحتج والله محد بيجبرج
ساروه: انتي قلتي حق خالوه انج بتطلعين ويا عمي
لطوف: بقولها العصر .. وبعدين عمي ما بيطيع ييلس تدرين بيقول فضحه انه ييلس في بيتهم
عويش: منو قال فضحه بالعكس أمايه بترحبه وبتيلس وياه
لطوف: بس أبوج العصر يطلع وخليفه طلع وما بيرد لين المغرب.. وعمي مستحيل ييلس في البيت وما فيه ريال
ساروه: عمي ياي يشوفنا .. وبييلس ويانا
لطوف: بس أنا أبغي أطلع مليت من يلست البيت .. يوم قلت له قالي بيطلعني ..
ساروه: جلبي ويهج يالسخيفه .. الحين أنا بروح أتصله ..
طلعن عويش وساروه ورقعن بالباب رقعه قويه ..
لطوف: ما عليج منهن سخيفات وما عندهن سالفه ...
دخلت تسبحت ودخلت لطوف عقبي .. عقب أذان العصر يلسنا نتعدل وسحيت شعري ونحن نسولف فاجأني سؤال لطوف ..
لطوف : العنود انتي مرتاحه ويا خالوه وعويش ؟
العنود: عادي ..
لطوف: بس أبداً ما أشوفج تيلسين وياها .. ولا تحتكين فيها
العنود: هالشي أريح لي ولها
لطوف: اليوم حمد أخوج عصب عليها .. وخليفه تلوم فيج والله
العنود: الحمدالله ان أمج اتصلت والا حمد عادي يفر أي كلمه ..
لطوف: قلبي عورني على خليفه يوم شفته متلوم
العنود: يالله عاد انتي قلبج جاهز في شي يخص خليفه
لطوف: يالله فديته
العنود: حنينا
لطوف: آآآآآآآه والله اني مرتاحه الحين .. أحس ان هالسبالات كانن يجذبن عليه .. ولو اني مرات أرد أنجلب وأتذكر رمستهن
العنود: لو تخليني أقول حق خليفه عن كل شي .. بييب لج الخبر الأكيد
لطوف: لالالا مب الحين .. بعدين
العنود: متى بعدين
لطوف: هالفتره اللي يينا عندكم جربت من خليفه وصرت أرمسه عادي ...قبل مستحيل أيلس وياه في مكان وان يلست ما أرمس..
عقب ما خلصت لبست شغاب حلقه ورديه وسشورت قصتي ورتبتها ..
لطوف: شو رايج
العنود: جان زين لو خليفه في البيت .. يمكن يحس شوي وينجذب لهالحلاه
لطوف: مستحيل أطلع جدامه أصلاً
العنود: وين العبي؟
لطوف: ما يا بتهن .. أنا بسير أشوفها
طلعت عني لطوف من الحجره وأنا اتصلت حق سالم ووعيته .. ما نش يصلي .. يعني بياخذ وقت لين يقوم ويتسبح ويصلي .. لبست شيلتي وطلعت من الحجره بشوف لطوف شو اللي أخرها .. طلعت سرت عند لامي قالت لي ان لطفين شلتهن .. دخلت داخل سمعت صوتها في الصاله .. أكيد شافت خلوف ويلست السباله أونها ما بتطلع جدامه مسودة الويه... دخلت الصاله ..
العنود: لطفين يالسباااا......
انصدمت .. منو هذا لفيت على ورا وتغشيت وطلعت من الصاله .. ربعت حجرتي وأنا ميييته خلاص.. أشوى اني كنت لابسه شيله .. يا ربي فضيييحه .. دخلت لطوف الحجره
لطوف: هههههههه
العنود: منو هذا لطفين؟
لطوف: هذا عمي بطي
العنود: يالفضيييييييحه .. والله ان ويهي قطع ..
لطوف: ههههههه عادي الا عمي هوه
العنود: ليش ما ييتي تقوليلي انه في الصاله
لطوف: ما دريت به .. رديت من برا قالت لي ساروه انه في الصاله
العنود: وليش يلستنه في الصاله .. يالفضيحه
لطوف: عااااااااادي .. عيل أنا خلوف شافني بالبجامه وفاله الشعر
العنود: لا تقولين عادي .. تقهرني يوم تقولن عادي .. شو عادي
لطوف: بس عاد عنودي أصلاً عمي ما انتبه لج .. بسرعه لفيتي عنه
العنود: يااااااااربي والله مب عارفه وين أودي ويهي .. الحمدالله اني بشيلتي
لطوف: متى بتسيرين؟
العنود: الحين بطلع عطيني عباتي ..
عطتني لطوف عباتي .. لبستها وطلعت ..رحت بيت أم عبدالله شفت شمسوه عند المطبخ اللي برا شاله المدخن .. يوم شافتني ربعت صوبي
شمسوه: أوووووووب .. شو هالكشخه العنيدي
العنود: أمحق كشخه .. جحال وغلوس
شمسوه: البدله روحها تسد وياهالجسم
العنود: من حلاته
شمسوه: شو فيج
العنود: سالم وين ؟
شمسوه: توه دخل الصاله بسرعه بسرعه .. سولي دخون
دخلنا أنا وشمسوه بيت أم عبدالله لقيت سالم وحمدوه يالسين في الصاله ..
سالم: ليش ييتي .. بخطف عليج
العنود: عادي ما فيها شي
سالم: حمدوه سيري هاتيلي عود من حجرة يدوه
سارت حمدوه تييب العود ووقف سالم يدخن .. لفيت ورايه شفت حارب توه نازل من فوق .. لفيت عنه وتميت منزله راسي ..
حارب: هاه بو غنيم وين العزم انشالله
سالم: عندي شغل
حارب: عندك شغل وكاشخ هالكشخه .. وبعدين اللي عنده شغل ما يشل حريم وياه
حمدوه: منو حريم ؟
ضحكنا كلنا عليها وعلى حركتها كيف نطت في ويه حارب تصارخ
حارب: أعوذ بالله صرطتيني
شمسوه: ههههههههه تستاهل
حارب: أشوف العنيدي بتسير وياه
سالم: العنود ما بتسير ويايه بخطفها بيت يدتها
شمسوه: ياااااااااالله يا سحيله
حارب: منو سحيله ؟
شمسوه: وحده عارفه عمرها
سار حارب يضارب شمسوه وأنا وسالم فضلنا انا نطلع من أرض المعركه بسلام .. وصلني سالم بيت يدوه لأني قلت بروح ويانوروه..
سالم: يوم بتخلصين اتصليلي..
العنود: انشالله..مشكور بوغنيم
ابتسملي ابتسامه ريحتني .. نزلت ودخلت البيت شفت غيث واقف ويا أحمد عند باب الصاله ... هذا شو يابه لازم تنسد نفسي أول ما أدخل .. وغيث السبال قال بروح دبي.. مشيت لين باب الصاله وفي نفس الوقت طلعت نوروه..
نوروه: مرحبا الساع
غيث: منو .. العنيدي!!
العنود: السلام عليكم
الجميع: وعليكم السلام
العنود: شحالكم
غيث: بخير ربي يسلمج .. انتي علومج
العنود: نوروه يدوه داخل؟
نوروه : هيه تعالي يلسي عندها لين ما أخلص
دخلت الصاله و نوروه سارت حجرتها ..
العنود: السلام عليكم
أم غيث: مرحبا ملااااييين ..فديييت هالحس
هويت وسلمت عليها
العنود: شحالج يدوه
أم غيث: الحمدالله .. شحالج غناتي
العنود: بخير ونعمه .. ماسرتي عند هوشج اليوم
أم غيث: قالت لي نوره انج بتين قلت بترياج
العنود: فدييت قلبج.. منوقدي أم غيث تخلي هوشها عسبي
أم غيث: فديت عمرج ..
دخلوا غيث وأحمد الصاله..قمت بروح عند نوروه حجرتها ..
غيث: وين تبين ؟؟
العنود: دبي
غيث: ههههه خيييبه يا نقمتها .. والله توني واصل
أحمد: جيه شو بلاها ..
طلعت من الصاله.. دخلت حجرة نوروه ..
العنود: هذا شو يسوي عندكم؟
نوروه: كان ساير دبي وياغيث
العنود: أفف والله اني من شفته لاعت جبدي
نوروه: طبيه عنج.. بصراحه مستوي وقح وما يحشم ..
العنود: يوم أقولج ما تصدقيني تدافعين عنه
نوروه: أمس كنت عندهم تعرفين شو قالي
العنود: شوو
نوروه: دخل الحجره بدون ما يدق الباب .. وهو يدري اني ويا منى في الحجره ..
العنود: جذاابه..عبدالله وين عنه
نوروه: فديته عبادي الحشيم مايدري به
العنود: تفداج بعير .. شو قالج
لبست نوروه شيلتها وتعطرت ويلست عدالي
نوروه: أون شو .. شخبارها بنت اختج .. ما رديت عليه جدم مني ورد يسألني شخبارها العنود قلت له بخير ومرتاحه .. سألني شو بتدرسين قلت له هندسه احتشر وكل الدنيا
العنود: وهو شو يخصه .. مب من حقه يتدخل ..
نوروه: أون قوليلها محد بياخذها غيري وتحلم أخلي حد غيري ياخذها ..
قمت بطلع من الحجره .. خلاص مابتحمله أكثر .. قبضتني نوروه
نوروه: تعالي يالخبله
العنود: بطليني والله يا أخبر غيث ويدوه عليه
نوروه : طبيه عنج .. لا تخليني أندم اني خبرتج
العنود: وربي فسماه والله والله لو أموت ما خذته لو يكون آخر ريال في هالدنيا ..
نوروه: انزين محد بيغصبج عليه .. خليه يزول عنج
العنود: قوليله ان ما اصطلب وحل عني بخبر خالي مانع عليه
نوروه: انزين انتي خلينا نروح الحين
العنود: بعدج تبيني أروح بيتهم وهذا كلامه
نوروه: انزين انتي شو تبينه نحن بنيلس في الميلس
العنود: مابروح ..
نوروه: دخيلج عنودي توها منى اتصلت تتخبرني عنج .. لا تفشليني جدامها
العنود: قوليلها ماحصلت حد اييبها
نوروه: تستهبلين أحمد شافج تراه
العنود: أنا لو مفتكه من أحمد جان أنا بخير
نوروه: يالله بسرعه سمعت صوت عبادي في البيت خليني أروح أشوفه
العنود: مالت عليج ..
طلعنا من البيت .. وجدام الباب كانوا غيث وأحمد واقفين .. خطفنا عنهم ودخلنا بيت خالي مانع .. دخلنا الميلس..
أسما: الحمدالله يوم شفناج
العنود: شحالج أسامي.
أسما: الحمدالله .. انتي علومج
العنود: الحمدالله يسرج الحال
نوروه: خواتج وين عيل
أسما: منى في حجرتها وموزه في المطبخ
موزه(تدخل): لا أنا مب في المطبخ
سلمنا عليها ويلسنا شوي ودخلت منى .. وعقب دخلن مريوم العله وخواتها .. كلهن بلا عبي الا أنا
منى: عنودي هاتي عباتج ..
العنود: لا أنا مرتاحه بها
أسوم: شو تبينها عقيها .. راوينا شو لابسه تحت
العنود: تراج تشوفينه
.. حاولن بس مستحيل هالسبال أحمد عادي يدخل في أي وقت .. دخلنا الميلس الصغير عشان الفواله .. وعقب ردينا الميلس العود.. طول الوقت أسولف ويا أسوم وبنات خالها لأنهن صدق نكته وحبوبات وهالعله مريوم يالسه يانوروه .. لأني قلت حق نوروه إذا عصبت مابسكت عنها ..
قبل أذان المغرب .. دخل أحمدوه .. حسيييييييييت انه بيدخل .. عدلت شيلتي ولفيت بويهي ..
منى: خير أحمد..بغيت شي
أحمد: شحالكن بنات..
البنات : الحمدالله ..
وقفت موزوه وسارت صوب أحمد .. شكلها تبغيه يطلع
أحمد: صبري أعوذ بالله بسلم عليهن
منى: أحمد اطلع
أحمد: هاه روضه شو تخصصتي؟
روضه: رياضيات ..
أحمد: وانتي العنود؟
ما رديت عليه وكملت رمستي ويا أسوم .. كأني ما أسمعه ..
أحمد: أرمسج أنا حوو العنود..
العنود: نعم
أحمد: أرمسج ليش ما تردين
العنود: ماسمعتك شو تبغي؟
أحمد: شو تخصصتي؟؟
العنود: بعدني ما تخصصت
ما بغيت أقوله هندسه بيفتح سالفه وأنا ما أشتهي أشوفه .. وإذا قلت له هندسه بفتح مواضيع وسوالف ..
أحمد: وشو بتتخصصين؟
لاااااا إله إلا الله هذا شو يبغي .. أففففف الله ياخذني يوم فكرت أدخل بيتكم .. عناد فيه لفيت على أسوم .. وقلت له
العنود: هندسه انشالله
أحمد: شوووو .. ليش انشالله شو تبينها الهندسه .. أبوي نحن ماعندنا بنات يشتغلن برا المدارس
سخيييف .. وقفت ولفيت على نوروه
العنود: يالله نوروه سالم الحين بيي ..
منى: عنودي يلسي
العنود: لافديتج بروح ..
مشيت صوب الباب وبكل وقاحه حط ايده وما خلاني أطلع
العنود: ممكن ؟
أحمد: شوو
العنود: بطلع
أحمد: لا
( دخل مانع أبو أحمد صوب الميلس وشاف أحمد وعصب عليه )
مانع : أحمد
أحمد( يفز): نعم أبويه
مانع : شو تسوي هنيه عند البنات انت ما تستحي
أحمد: ماشي بغيت أسلم عليهن
سرت صوب خالي سلمت عليه ..
مانع : شحالج العنيدي؟
العنود: بخير ربي يسلمك ... شحالك خالي
مانع : الحمدالله .. شخبار أهلج
العنود: يسلمون عليكم
مانع: الله يسلمهم .. ردي السلام عليهم
العنود: سلام يبلغ بالخير
مانع: أحمد يالله أشوف جدامي .. الصلاه
أحمد: انشالله أبويه
طلع خالي من البيت وهالخام وياه ورديت ويانوروه داخل الميلس واتصلت حق سالم .. قالي بيصلي وبيخطف عليه..
منى: عنودي لا تروحييين
العنود: لا بروح ..تعبانه
أسوم(بهمس): ماعليج من أحمدوه السبال
العنود: ماحفلته أخوج .. ولا طرالي
أسوم: عيل لا تروحين
العنود:خلاص أنا اتصلت حق سالم والحيين بيوصل
مريوم: موزوه تعالن سهرن عندنا اليوم
منى: عبدالله ما بيطيع
مريوم: تعالن ويا أحمد صدق وناسه
أسوم: البارحه أحمد اللي ماطاع يخلينا نسهر عندكم
مريوم: مستحيل ..انتي قوليله اني أباكن تسهرن عندنا وخليه هو بعد ايي وياكن .. قوليله بنطبخ لكم اللي تبونه ..
منى: خير لين فليل ..
فقدتج انتي وياه .. مالت عليج تتحراني ميته عليه .. عقب ما طلعوا الرياييل من المسيد اتصلي سالم وقالي انه جدام الباب .. قلت له اني بطلع الحين
العنود: أسوم تعالي وصليني بروح
أسوم: حرام والله ما بغيتج تروحين
العنود: مره ثانيه انشالله
موزوه: ما ظني من عقب اللي سواه أحمد اليوم
العنود: ماحفلته السبال
أسوم: هههه ياقواتج .. تسب أخويه جدامنا ..
مريوم: هو ماقالج شي عشان تسبينه
العنود: والهلا .. هذا اللي ناقص.. مريوم خلج في حالج محد ياج
منى: هدن هدن .. ماصار شي
نوروه: عنودي خلينا نروح ..
العنود: لا انتي برايج .. سالم جدام الباب ..
منى: أسوم روحي ويا العنود ..
طلعت ويا أسوم وأنا منقهره من هالعنز .. أففف ما جذبت حمدوه حشى ويا فالها ..
أسوم: عنودي سمحيلنا
العنود: أسامي انتي ما يخصج ..سلمي على أمج وخواتج ..
أسوم: الله يسلمج
طلعت ولقيت سالم جدام الباب واقف ويا عبدالله وغيث وأحمد .. ركبت السياره عقب ماشافني .. وقف دقايق وعقب ركب السياره وغيث دق عليه الدريشه .. ما فتحت له ضحك سالم وفتح له الدريشه من عنده
غيث: خيييييبه يوم تنتفخ
العنود: بغيت شي الشيخ
غيث: الرقم لو سمحتي
العنود: روح دور خايسه غيري .. أنا بنت عرب وماعندي هالسوالف
غيث: هههه .. شو عندج منتفخه
العنود: ماشي
سالم: قالج انه سار دبي ووصل العصر
العنود: سالم غيث مايتصل ولا يسأل .. وأن اتصلت له مايردعليه وان رد بيرمسني دقايق وبيسكر
سالم: يستاهل دعمه صدق
غيث: مالت عليك أونك بتساعدني
سالم:جلب ويهك جانك انت يالخام تزعل بنتنا
غيث: السموحه منج ..
سالم: قم خلنا نتحرك
مشى غيث شوي بعيد عن السياره وتحركنا نحن.. رديت البيت دخلت الصاله ما لقيت حد رحت حجرتي .. لطوف محد أكيد بعدها ما وصلت..غيرت ملابسي واتصلت حق حمدوه وشمسوه.. دقايق ودقن عليه باب الحجره
العنود: دخلن
حمدوه: واي انتوا .. قوطي أناناس وصل
شمسوه: من شكلج يبين انج شفتي حبيب القلب
العنود: حبتج سيه وعقرب حيه
شمسوه: ههههههههه قلت لج
حمدوه: خبريني شو قالج اليوم
العنود: تقلقلت فجوجه .. أكررررهه
خبرتهن عن اللي صار..
حمدوه: قومن خلن هالسالفه عنكن .. خلنا نروح نشوف الحلقه
رحنا الصاله .. شغلت التلفزيون وقعدنا نشاهد التلفزيون .. دخلت عويش الصاله ويلست بدون ماتتكلم .. عقب أذان العشا ردن لطوف وساروه .. كنت في الحجره دخلت لطوف
لطوف: أنا يييييييييييت
العنود: هلا والله
لطوف: متى رديتي ؟
العند: عقب المغرب
لطوف: شو سويتي وأنا محد
العنود: لا تخافين ما يلست أصيحج
لطوف : عنلاتج يالخام .. هذا وأنا أقول اتولهت عليج
العنود: ههه .. حمدوه وشميس كانن عندي
غيرت لطوف ملابسها وطلعنا نتعشى.. عقب العشى قعدنا كلنا في الصاله وعموه راحت ترقد..الساعه 11 حمد وآمنه راحوا يرقدون ..
العنود: لطفين وين سرتن اليوم؟
لطوف: تمشينا شوي وخطفنا كارفور
ساروه: ماشالله على دفاشتج يا العنود
العنود: أنا !! ليش!!؟
ساروه: ضحك عمي عليج داخله الصاله تصارخين
لطوف: ساروه
العنود: والله أنا ما كنت أدري ان عمح في الصاله ما تعودت يوم حد ااينا ييلس في الصاله..
ساروه: انشالله تبيني أستأذنج وين أيلس عمي يوم بيي
العنود: ساروه أنا ماقلت شي
عويش: أصلا انتي شو اللي خلاج تدخلين الصاله
لطوف: عويش ساروه سكرن السالفه ..
عويش: لطوف فكينا من الصدعه
لطوف: عويش ساروه ان ماسكتن عن السالفه بتندمن
ساروه: لطفين بس لمي ثمج .. أنا اختج وأكبرعنج
لطوف: العنود ما تدري ان عمي كان في الصاله وصدقني ان سمعت ان حد غيرنا درى عن شي يا وييلكن
عويش: شو بتسوين يعني؟؟ ..
لطوف: انتن تعرفن شو أقدر أسوي
عويش: وأنا بعد أقدر
لطوف: على قولتهم عليه وعلى أعدائي
طلعت لطوف من الصاله وهيه تصيح .. لحقتها الحجره كانت على الشبريه متلحفه ..
العنود: لطفين بس لا تصيحين
لطوف: أبغي أبويه
العنود: لطوف انتي تعرفين ان أبوج مسافر .. لا تنجلبين علينا ياهل
لطوف: في عمري ماشفت اخت جذيه ويا اختها
العنود: انتي لا تعاندينها .. هيه اختج وأكبرعنج..
لطوف: ما تسمعينها كيف تهددني تقول مسويه فضيحه وساروه ساكته عنها
العنود: صدقيني ما يقدرن يسون شي .. لأنهن لو تكلمن انتي بعد بتتكلمين
لطوف: عويش منقهره لأن عمي شافج .. وان تكلمن ما بيقولن انج ما تدرين انه في الصاله أنا أعرفهن ..
بصراحه هالشي ما فكرت فيه .. صح عادي عويش تقول اني طلعت جدامه .. وان دروا بيسوولي سالفه ... استغفر الله شو هالحياه سمعت دق على الباب ..
العنود: حياااك
انفتح الباب شفت ساروه
العنود: تعالي ساروه
جربت ساروه ويلست على شبريتي .. شكلها تبغي تكلم لطوف .. قمت شليت تيلفوني وطلعت من الحجره .. يلست في الصاله واتصلت حق خليفه .. أريد أساله متى بيرد عشان يوصلنا عند حمدوه وشميس .. الساعه 12:30 دخل خليفه البيت
العنود: حشى ما بغيت
خليفه: شو تبين ؟؟ حشرتيني بالتيلفون
العنود: وصلنا عند حمدوه وشميس
خليفه: انتن لازم تسهرن رباعه
العنود: تراكم انتوا تحبون تسهرون ويا ربعكم ..
خليفه: قومي يالله بوصلج وخلي حد يردكن ..
العنود: انزين
رحت الحجره ويا خليفه دقيت الباب ودخلت وخلفيه عند باب البلكونه يترياني
العنود: بروح عند البنات .. ما بتروحن ويايه؟
لطوف: اروحج !!
العنود: لا خلوف بيوصلني .. ما بتروحن؟؟
ساروه: لا أنا فيني رقاد
لطوف: أنا بروح
طلعنا من الحجره ساروه راحت فوق وأنا ولطوف رحنا ويا خليفه .. وصلنا بيت أم عبدالله لقينا حمدوه وشميس وحصوه يتابعن فلم أجنبي ..
خليفه: سمعن لا تطلعن اروحكن
حمدوه: ما عليك بنوصلهن ..
طلع عنا خليفه وكملنا السهره لين الساعه 3:30 دخلوا حارب وعلي .. ووصلنا علي البيت ..

يلا وين البارت

يلا نبغي البااااااارت بسرعه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟