منتدى استراحات زايد - ((.. الدنيا يا خلي مدرسه .. وسنين عمرنا حصص الالم منهج ندرسه .. والفرح فيها فرص ..))

الــــــــــــــجــــــــــــــــزء الــــــســـــــــــــــــــــادس عـــــــــــــــــــــــــــــــشـــــــــــــــــ ـــر

الساعه 12 طلعت من الكلاس ويا منى ورحت الرسبشن وهيه سارت كلاسها .. وصلت الرسبشن اتصلت حق عويش وما ترد.. ترييتها ورديت أتصلها ما ترد عليه.. كملت ساعه الا ربع في الرسبشن وعويش ما يت ..اتصلت حق سليم
العنود: ألو
سليم: ألو
العنود: سليم تعال الجامعه بسرعه
سليم: ماما أنا في سير دبي
العنود: ليش.. شو عندك
سليم: هذا بابا حمد ودي أوراق مال شركه
العنود: خلاص برايك
آآآآه تعبت .. ما أقدر أشوف التيلفون من الدموع اللي تتيمع في عيوني من الحمى .. ومن التعب .. اتصلت حق غرين السبال قالت له عويش الساعه 12 يكون عند الباب ما أدري شو اللي أخره ..
غرين: ألووو
العنود: غرين تعال الجامعه بسرعه
غرين: أنا ودي ماما آيشه
العنود: عويش وياك؟
غرين: هيه بنت مال ماما موزه في بعد
العنود: وانت ليش تروح عني أصلاً
غرين: أنا شو سوي ماما آيشه سوي تيلفون ساعه 11:30
العنود: ومتى بترد؟
غرين: ما في مألوم ماما
العنود: انزين يالله مع السلامه
سكرت عنه وأنا بموت من الغيض منقهره .. يعني أنا تعبانه وقلت بحظر كلاسي عشان أترياها وهيه الحين روحت ويا ساروه .. دخلت المصلى اللي في الرسبشن صليت .. لا تفوتني الصلاه .. عقب ما خلصت صلاه يلست في المصلى ما طلعت .. اتصلت حق عويش وبعدها ما ترد... رديت أتصل حق غرين السبال ما طاع يردلي أونه عويش ما خلته يتحرك ما أدري وين سايره .. ما ينلام دامها عويش قالت له ما يتحرك ان راح بيحصل هزبه منها .. آآه أحس اني بموت حتى اليلسه مب قادره أيلسها من الحمى.. فكرت أتصل بحمد بس حمد هالوقت في البيت وآمنه ان درت بتاكل الدنيا يسد الكلام اللي سمعته أمس.. اتصلت لحمدوه..
حمدوه: ألو
العنود: السلام عليكم
حمدوه: هلا عنودي
العنود: حمدوه علي وين ؟
حمدوه: علي بعده ما رد من الدوام
العنود: وسالم
حمدوه: ما أدري بس بعدهم .. الحين وحده ونص على الساعه ثنتين بيطلعون .. ليش تسألين
العنود: أنا بعدني في الجامعه ..
حمدوه: ليش وسليم وغرين وين ؟
العنود: بعدين بخبرج الحين أنا تعبانه بتصل حق علي والا سالم
سكرت عن حمدوه واتصلت حق سالم .. اللي رد عليه من أول رنه
سالم: ألووو
العنود: ألو السلام عليكم
سالم:وعليكم السلام.. هلا العنيدي
العنود: سالم انت وين ؟
سالم: أنا في الشركه .. بغيتي شي
العنود: يوم بتطلع اخطف عليه في الجامعه
سالم: بس أنا سيارتي ما فيها تصريح
العنود: عادي بمشي لين البوابه
سالم: خلاص انشالله
سكرت عن سالم .. والساعه ثنتين اتصلي وقال انه عند الباب .. طلعت ومشيت لين البوابه .. ركبت السياره ..
العنود: السلام عليكم
سالم: وعليكم السلام
تحرك سالم .. من طلعنا وأنا ساكته ما تكلمت ..
سالم: عنودي شو فيج؟
العنود: ماشي بس تعبانه شوي
سالم: شي يعورج؟
العنود: تعبانه من بلاعيمي
سالم: بخطفج العياده
العنود: لالالالاا دخليلك ردني البيت
سالم: شو أردج البيت طالعي ويهج انتي
العنود:سالم فديت روحك .. ما أبغي غير انك تردني البيت
سالم: عنوده .. لو تشوفين ويهج شقايل محمر
العنود: محمر من الشمس
مد ايده وحطها علي يبهتي ..
سالم: عنوده خافي ربج في عمرج ..
العنود( تصيح): سالم دخيلك ودني البيت
.. سكت عني وردينا البيت دخلني داخل جدام باب الصاله
سالم: عنودي غناتي شي مضايجنج
هزيت راسي بالنفي
سالم: انزين ليش تصيحين
العنود: ماأصيح بس أدمع من الحمى
سالم: ليش ما تخليني أوديج العياده
خذت كلينكس من سيارته ومسحت دموعي .. عدلت شيلتي
العنود: ما أبغي أسير العياده .. أبغي أرتاح
نزلت من السياره ونزلت كتبي ويايه ..
العنود: مشكور سالم.. اسمحلي عذبتك
سالم: خلي عنج هالرمسه شو عذبتيني
ابتسمت له وسكرت باب السياره .. وطلع من البيت ..دخلت البيت لقيت حمد وآمنه يالسين في الصاله...
العنود: السلام عليكم
حمد+ آمنه: وعليكم السلام
حمد: مرحبا الساع بالحلا كله
آمنه: عويش وين؟
العنود: ما أدري
آمنه: شووو ما تدرين .. تراج طالعه وياها
العنود: ما أعرف أنا سالم يابني من الجامعه
آمنه: ظاريات تردن رباعه يوم الثلاثا .. ليش رديتي عنها وخليتيها هناك
العنود: قلت لج أنا رديت ويا سالم.. ويوم أتصلها ما ترد عليه
حمد:عنوده هيه قالت لج بترد وياج؟
العنود: لاء .. يوم اتصلت حق غرين قلي انه شلها هيه وساروه وما أدري وين سارن
حمد: ليش راده ويا سالم
العنود: غرين من سار ما رد عليه .. وسليم ساير دبي
حمد: وين سارت يعني ؟
العنود: ساروه بنت موزه وياها يمكن سارت بيتهم
آمنه: أنا بنتي ما تسير بلا شوري
حمد: آمنه شوي شوي على البنت
آمنه: انتي لو تستحين جان ما رديتي عنها وخليتيها
العنود: الحين الساعه 2:30 ونحن متعودات نرد الساعه 12.. وبعدين قلتلج انها هيه اللي طلعت عني ..
عويش( تدخل): السلام عليكم
من شفت عويش داخله طلعت من الصاله سرت حجرتي..مالي خاطر على شي .. دخلت حجرتي تسبحت ورقدت ..
******
الساعه سبع المغرب في بيت شيخه كانت شمسوه يالسه في حجرتها .. دخل عليها سالم
سالم: عنبوه انتي وين من الصبح
شمسوه: عند حمدوه
سالم: متى رديتي من الجامعه اليوم
شمسوه: ليش؟
سالم: انتي قولي
شمسوه: الساعه عشر ونص لأن دكتورنا ما حظر اليوم
سالم: العنود اتصلت لي اليوم وسرت رديتها من الجامعه
شمسوه: هيه .. هييه تخلص الساعه 12
سالم: الساعه12 !! بس هيه اتصلت لي الساعه وحده ونص تقريباً
شمسوه: غريبه أصلاً العنود من تخلص دوام ترد البيت شو ميلسنها .. وبعدين ليش ردت وياك
سالم: فيها حمى ومرتفعه وايد بعد .. يوم قلت الها بوديج العياده تمت تصيح
وقفت شمسوه بسرعه وطلعت شيله من الكبت
سالم: وين سايره؟
شمسوه: عنودي شي فيها .. أنا أعرفها
سالم: مثل شو يعني!!
شمسوه: ما أدري بس من داومت اليوم الصبح وهيه متغيره
طلعت شمسوه من البيت وسارت صوب حمدوه .. عقب سارن عند العنود رباعه .. شافهن سالم يوم كانن طالعات وطلع وياهن ... دخلوا بيت خالهم حمد من الباب الوراني ودخلوا حجرة العنود لقوها راقده شغل سالم ليت الحجره وقعد على طرف السرير .. كان يبين من شكل العنود انها تعبانه واايد..
سالم: عنوده .. عنودي
حمدوه: عنودي بسم الله عليج شو فيج؟
سالم: شمسوه هاتي ماي شويه
عطته حمدوه دبة الماي اللي على الطاوله حط منها سالم على ايده ومسح على ويها
سالم: بسم الله عليج
العنود: آه
شمسوه: عنودي لا تخوفينا
أم حمد( تدخل): بسم الله بلاكم عيالي؟
حمدوه: يدوه عنودي شي فيها
سارت أم حمد ويلست عدال العنود تمسح على راسها وتقرا عليها
سالم( يصارخ): انتن وين عنها عنبوه البنت تعبانه وانتن ما تدرن
شمسوه: انزين نحن شدرانا
سالم: تحيدينها تعبانه الصبح ليش ما ييتي تشوفينها
سكتت وشميس وما عرفت شو تقول حق سالم .. وسالم ما هانت عليه العنود وهيه شكلها تعبان ومحد عندها ورد يصارخ عليها من الضيجه
سالم:منو تبين يشوفها انشالله عويش اللي شايفه عمرها ما أدري على شو
شمسوه: سالم خل هالرمسه الحين مب وقته هذا
بطلت عنودي عيونها من عقب صريخ سالم .. وطاحت دمعه من عيننها من الحمى .. جرب سالم ايده ومسحها
أم حمد: العنيدي بنتي شو ياج
العنود: ..........
سالم: شميس سيري لبسي عباتج بنوديها المستشفى .. حمدوه طلعي لها عباتها أنا بسير أييب السياره وبرد عليكن
حمدوه: شميس هاتي عباتي وياج
طلعت شمسوه عنهم وهيه تربع .. دخلت بيتهم وسارت بيت يدتها .. لقت الحريم كلهن في الصاله بس ما وقفت لهن .. دخلت الحجره لبست عباتها وشلت عباة حمدوه وردت نزلت وهيه تربع ..
سلامه: شمسوه شو بلاج
شمسوه:ماشي عنودي تعبانه بنوديها المستشفى
علي( يوقف): شو فيها؟
شمسوه: ما أعرف .. بس الحمى وايد مرتفعه عندها
علي: منو بيوديكن ؟
شمسوه: سالم
طلعت شمسوه من البيت سارت بيت خالها حمد .. دخلت حجرة العنود لقتها لابسه عباتها .. خذت حمدوه عباتها ولبستها .. دخل سالم الحجره وساند العنود على ايدها ومن الصوب الثاني شمسوه .. ركبوها السياره وودوها المستشفى .. دخلوا قسم الطوائ .. دخلت العنود ويا حمدوه وشمسوه عند الدكتور .. وسالم واقف برا .. عقب ثلث ساعه طلعن البنات من عند الدكتور..
سالم: هاه أخبارج العنود
شمسوه: انت تعال سندها الحين بيحطولها مغذي
وقف سالم وقبض ايد العنود ووصلها عند النيرسات... حطوا المغذي حق العنود.. وسالم واقف برا وحمدوه وشمسوه وياها .. الساعه ثمان ونص دخلوا علي وحمد المستشفى وشافوا سالم واقف .. ومشوا صوبه
حمد: العنود وين ؟
سالم: داخل حاطيلها مغذي
حمد: شو بلاها هيه
سالم: الحمى واصله أربعين عندها
علي: أربعين!!..شو السبب
سالم: أول ما يتها ما خذت شي يخففها رقدت لين تمكنت منها
حمد: منو عندها الحين ؟
سالم:حمدوه وشمسوه
طلعت حمدوه من داخل عشان تطمن سالم ...
حمد: حمدوه شخبارها العنود
حمدوه: الحمدالله .. الحين أهون تقدر تتنفس كانوا حاطيلها أكسجين
حمد: خلونا نطلعها بنوديه عياده خاصه
حمدوه: ما بيسولها أحسن عن اللي سوولها اياه .. خلوها مرتاحه
علي: ما نزلت الحمى
حمدوه: بعدها .. النيرس قالت بتشوفها عقب ربع ساعه
حمد: أبغي أدخل عندها
حمدوه:خالي المكان كله حريم زحمه
حمد: انتوا برايكم سيروا أنا بترياها
سالم: لا خالي أنا ما بسير الا لين تلطع .. علي انت شل حمدوه وسيروا ما له داعي يلستنا كلنا بدون فايده
علي: أنا بشل حمدوه وبنرد البيت ويوم بتردون خبرونا
سالم: انشالله
راحوا علي وحمدوه البيت وشمسوه تمت داخل عند العنود وحمد وسالم برا.. سالم معصب حده من البنات لأنهن ما سارن يشوفنها وهيه تعبانه .. وحمد متلوم فيها لأن آمنه اليوم احتشرت عليها وآخر شي طلعت عويش مروحه عن العنود وشاله ساروه وسايرات بيت موزه والعنود تعبانه من الصبح ومحد سأل عنها طول الوقت اللي كانت راقده فيه .. يحس انه مقصر فيها وايد وانه خان وصية أبوه اللي وصاه عليها.. شمسوه كانت يالسه عدال العنود ومن حطولها المغذي وهيه راقده ما نشت....
.... في بيت أم عبدالله ....
دخلت حمدوه ويا علي الصاله ولقوهم يتعشون
علي: السلام عليكم
الجميع: وعليكم السلام
بو سالم: من وين يايين؟
حمدوه: من المستشفى.. العنود خالتي تعبانه
سلامه: ما ردت؟
حمدوه: لا حاطين لها مغذي بيخلص عقب ساعتين
شيخه: منو عندها الحين ؟
علي: سالم وشمسوه وخالي حمد
أم عبدالله(تصيح وتمسح دموعها بشيلتها): الله يعين هالبنيه اللي تيتمت وما تم لها حد
بوسالم: يالله يا أمايه استهدي بالله
أم عبدالله: الله يرحمج يا عفرا .. ما كنتي مخلتنها محتايه لشي
حمدوه شلت بعمرها وربعت فوق تصيح .. ما تعرف شو سبب صياحها.. يمكن غامضتنها العنود والا يمكن لأنها تحس ان العنود شي فيها .. بس هيه نفسها مب قادره تحدد هيه ليش تصيح .. دخل عليها حارب الحجره لقاها تصيح
حارب( منصدم):حمدوه ليش تصيحين ؟
حمدوه: ما شي
حارب: العنود شي فيها؟!
حمدوه: لا انشالله ما فيها شي وبتطلع
حارب: عيل شو فيج
حمدوه: ما أدري ما أدري!!
حارب: شو ما تدرين
حمدوه: ليش دايماً أحس العنود مب مرتاحه
حارب: هيه قالت لج شي
حمدوه: لاء
حارب: عيل ليش تقولين هالكلام!!
حمدوه: أنا أعرف العنود مستحيل تتكلم
حارب: هيه شو ياها .. طاحت فجأه
حمدوه:ما أدري اليوم الصبح كانت مضايجه .. وتقول بلاعيمها يعورنها قلت لها يمكن من البيبسي عقب نحن ردينا البيت عنها لأن ما عندنا محاظرات وهيه كملت دوامها
حارب: يعني تعبت من البيبسي البارد
حمدوه: ما أدري بس اليوم الظهر اتصلت لي تسألني إذا سالم والا علي موجودين تبغيهم يردونها من الجامعه ما حصلت حد يردها لين طلع سالم من الدوام الساعه ثنتين
حارب: متى تخلص هيه
حمدوه: 12
حارب: ومن 12 لين 2 يلست تتريا حد يردها
حمدوه: هيه
حارب: غرين وسليم وين؟
حمدوه: ما أدري
طلع حارب تيلفونه من مخباه واتصل عى شمسوه
شمسوه: ألو
حارب: هلا شميس
شمسوه: مرحبا حارب
حارب: شخبارها عنودي الحين
شمسوه: هذيه طايحه .. الحمدالله الحين أحسن
حارب: شو قالكم الدكتور
شمسوه: الحمى مرتفعه وايد عندها ... وحطولها مغذي وتوها ناشه فاتحه عويناتها
حارب: برايج عيل .. سلمي عليها وقولي لها سلامات
شمسوه: بكم ؟
حارب: شو بكم!!
شمسوه: توصيل السلام وكلمة سلامات
حارب: واللغثه .. عنبوه حتى السلام تبين عليه فلوس
شمسوه: مافي شي بلاش هالزمن
حارب: سجليه على الحساب
شمسوه: انزين بنشوف آخرة هالحساب.. على فكره تراه وايد زاد الحين
حارب: انزين بندفع لج
سكر حارب عن شمسوه .. وشمسوه وقفت عند راس العنود وصاصرتها ..
شمسوه: يسلم عليج حارب ويقولج سلامات
العنود: الله يسلمه .. قومي عني لا أعاديج
شمسوه: عادي أنا أبغي أكون محلج عشان أعرف غلاتي
العنود: غلاتج!!
شمسوه: خالي حمد وسالم برا .. وعلي كان هنيه وعقب شل حمدوه وراح .. أمايه وخالوه كم مره اتصلن .. والحين عمي حارب توه متصل .. شو تبين بعد كللللللهم غاليه عندهم
تعمدت شمسوه تقول هالكلام عشان تلمح للعنود.. بس العنود في هالحاله ما تفكر في شي ..
************
عقب التعب اللي تعبته طول اليوم والمرض أحس ان عظامي يعورني ومب قادره أتحرك ... دموعي مب راضيات يوقفن من الحمى .. الساعه عشر ونص طلعنا من المستشفى .. ركبت ويا حمد وشمسوه ركبت ويا سالم .. ردينا البيت .. دخلنا الصاله أنا وحمد وسالم وشمسوه نزلوا ويانا
حمد: السلام عليكم
الجميع: وعليكم السلام
خليفه: السلومه عنوده
العنود: الله يسلمك
حمد: تعالي عنودي يلسي هنيه
يلست عدال حمد .. أرتاح من تعب المستشفى اتصلت شمسوه حق حمدوه وقالتلها انا ردينا .. عقب خمس دقايق شفت علي وحمدوه وحارب وحصوه داخلين الصاله
حارب: السلام عليكم
الجميع: وعليكم السلام
علي: سلامات عنودي .. حشى روعتينا
العنود: الله يسلمك
حمد: حصوه غناتي خلي البشكاره تحط عشى حق العنود
حصوه: انشالله خالي
سالم:العنود .. ان شفتج شاربه شي بارد يا ويلج تسمعين ..
العنود: انشالله
حمدوه: انتي ما تقوليلي شو ميلسنج في الجامعه لين ثنتين وانتي تعبانه .. دوامج يخلص 12
العنود: سليم ساير دبي
شمسوه: وغرين السبال وين كان يحيدج تردين الساعه 12.... يستهبل
العنود: برايه... أصلاً يلستي في الجامعه شو دخلها
علي: أنتي حديد ما تحسين يوم نحن الريايل ما نتحمل الحمى .. يالسه ساعتين في الجامعه بلا شغله وعليها حمى.... مب من شي تمكنت منج
حصوه( تدخل): خالي البشكاره تقول ما تم شي من العشى
حمد: ليش ما خليتوا عشى حق العنود؟
آمنه: أحيد بشكارتها دوم تخليلها عشى ..
العنود: أنا ما أريد عشى .. بسير أرقد
حمد: ما سمعتي الدكتور شو قال
العنود: حمد فديتك والله لايعه جبدي ومالي خاطر
حمد: شو مالج خاطر من أصبحتي شو كلتي؟
العنود: لو أشتهي باكل بس مالي نفس
سالم: تعالي يلسي محلج .. الحين بنييب لج عشى .. والا غيضي بطلعه فيج وبصقعج على راسج
....
حارب: أولو .. لو سمحت بغينا اثنين بيتزا خضار وواحد جبن.. وسلطات..
( وقالهم عنوان البيت )
خليفه: الله يعني بناكل بيدزا
علي: انت ما تعشيت؟؟
خليفه: ما تعشيت يالعنود يالس أحاتيج وما هنالي آكل
رشود: يااااااااااااااالله ومنو اللي كل ثلاث قطع معكرونه بالباشميل
خليفه: يجذب عليكم .. ما كلت شي
حمدوه: انتوا ما وراكم مدارس باجر؟
خليفه: عنوده إذا عطوج عذر حق دوام باجر اعطيني اياه بوديه عنج
حصوه : بتودي عذر عنودي مدرستكم!! .. بيشوفون الأسامي
خليفه: الأخصائي ما يعرف انجليزي .. وبعدين من زين خطهم يعني .. والوكيل أعمى ما يشوف زين..لين يقرا سنه
حمد: قول اللهم لا شماته لا تصير شراته
قمنا أنا وشمسوه دخلنا حجرتي وفصخت عباتي وشيلتي توضيت وصليت وشمسوه يت تصلي عدالي .. دخلت حمدوه الحجره عقب ما خلصنا صلاه
حمدوه: العشى وصل
العنود: والله اني ما أروم آكل
شمسوه: انزين كلي على الأقل جاملي عمي اللي طلبها عشانج
العنود: حليلك يا حارب
حمدوه: قومن وخلن الرمسه عنكن .. بسرعه قوارض في الصاله
سرنا الصاله عشان نتعشى .. يلسنا نتعشى وعقب العشى شربت دوايه
حمد: عندج دوام باجر
العنود: لا
شمسوه: سالم أنا برقد عند عنوده اليوم
سالم: زين عيل .. كنت بقولج رقدي عندها اليوم
حمد: انتوا على كيفكم تعزمون عماركم
شمسوه: وانت شو يخصك هذا بيت خالي
حمد: ومنو اللي يرمسج الحين
شمسوه:حمد بن سيف
حمد: هب جنه هو خالج
شمسوه( باستهبال): هيه والله صدق .. خلاص عيل عنوده شو نسوي أخوج راغنا وبنطلع أحسن لا يسحبنا بالغصب
العنود: لا والله حمد ما يسويها
حمدوه: وأنا منو بيسهر ويايه اليوم
حمد: شو سهر بعد ما وراج دوام باجر
حمدوه: نحن من أعداء دوام الأربعاء
حمد: باتي انتي بعد وياهن
حمدوه: لا يدوه محد عندها .. بسير
حمد: أنا بسير أرقد تعبان
العنود: سمحلي حمد عذبتك ويايه اليوم
حمد: شمسوه سكتي خالتج أحسلها
شمسوه:لا ليش خلها تقول اللي في خاطرها
حارب: شو تتحراهن القواطي متعاونات في الخير والشر
حمدوه: يعلكم ما تخلون من القواطي.. لو لاهن جان عشتوا في كآبه
حمد: تراكن مغترات بعماركن
شمسوه: يحقلنا ..
حمد: أنا أسير أرقد أبرك..
شمسوه: تصبح على خير
حمد: وانتوا من أهله.
طلعوا حمد وآمنه من الصاله .. وكل مره ينسحب حد.. ودخلنا وشمسوه الحجره .. فيني رقاد من التعب .. انسدحت على الشبريه وشمسوه على الشبريه الثانيه..
العنود: شمسوه بترقدين ويايه اليوم أخافني أعاديج ..
شمسوه: ما بيصير الا اللي كاتبنه ربج
سكتنا فتره وكل وحده منا سرحانه بتفكيرها .. أبغي أرقد بس مب قادره .. لفيت صوب شمسوه ..
العنود: شميس..
شمسوه: عيونها
العنود: فديت عيونج.. بسألج ..
شمسوه: بجاوبج
العنود: انتوا خاطبين ميثوه حق عمج حارب..
قامت شمسوه وشغلت الأبجوره ويلست لفت صوبي .. طالعتني بنظرات اهتمام ..
شمسوه: ليش تسألين ؟..
خفت من حركتها .. ليش كل هذا شو فهمت من سؤالي..أنا ليش سألتها ياربي الحين شو بيفججني منها...
العنود: ماشي بس سؤال..
شمسوه(بخبث): بسسسسس
العنود: شو قصدج
شمسوه: لا سلامت قلبج.. بس بجاوبج على سؤالج
العنود: لا خلاص ما أبغي أعرف.. حشى
شمسوه: مب على كيفج.. الله يسلمج عمي حارب قال انه ما يبغي ميثوه..
العنود: خلاص رقدي
شمسوه: عندج أسئله ثانيه.. طلعي اللي في خاطرج
العنود: شميس لا يسير تفكيرج بعيد .. رقدي خلاص ما أبغي أعرف شي
مرحبااااااا... شحالكم الشوخ.. هالمره ما اتأخرت عليكم واااايد.. بس رديت وبنزل لكم أطول بارت .. لأني بتأخر عليكم واااايد...لأن عندي ظروف وما بقدر أدخل...والسموحه..
شمسوه: وين سار تفكيري يعني ؟...
العنود: لاااااااا إله إلا الله .. أنا تعبانه وبرقد بترقدين رقدي ما بترقدين سيري يلسي ويا عويش برا
شميس: بعدني ما بعت عمري أيلس وياها تجتلني نكد وضيج وقهر
العنود: خيبه .. حليلها
شمسوه: حلج بطنج ..
العنود: تصبحين على خير
شمسوه: وانتي من أهله
لفيت عنها الطرف الثاني هذي شمسوه محد يفتح لها سالفه والا بيطيح عليه مطر من الأسئله .. أنا ليش سألتها وشو اللي ياب هالسؤال في بالي .. برقد أبرك لأني ان استمريت في التفكير ما برقد لين الفير ...
.........

الــــــــــــجـــــــــــــــزء الـــــــــــــــــــــســــــــــــــــــادس عـــــــــــــــــــــــــشــــــــــــــــر
شمسوه: عنوده .. العنووود
العنود: هااه
شمسوه: قومي صلي .. أنا بسير البيت وبرد عليج عقب الغدا
العنود: الساعه كم؟
شمسوه: الساعه وحده
العنود: انزين
شمسوه: هب تردين ترقدين ..
العنود: انزييين سيري انتي الحين ..
طلعت عني شمسوه وقمت صليت ورديت أنسدح ..زين يوم رمت أوقف في صلاتي .. راسي يدور يوم أكون واقفه ..
حمد( يدخل): السلام عليج
العنود( تيلس): هلا حمد
حمد: شخبارج اليوم
العنود: الحمدالله.. غريبه راد من وقت اليوم
حمد: سرت الديوان أخلص أوراق قوم موزه يوم خلصت رديت البيت ..
العنود:ليش بيسافرون
حمد: هيه يوم السبت انشالله
العنود: والبنات ؟
حمد: بين هنه .. عند عموه
العنود: الله يعينهم
حمد: يالله قومي خلينا نتغدا
سرت أتغدا ويا حمد.. لو قلت له مالي خاطر بسير وياه بالغصب.. يعني مافي مفر لازم أروح..عقب الغدا رديت حجرتي شفت كتاب المجتمع على المكتب .. يوم الأحد عندي امتحان سعي وأنا ما درست شي.. فتحت الكتاب أشوف الكميه.. كيف بقدر أذاكر هالسبال ما طاع يخفف الكميه ما أدري شو يتحرانا.. انسدحت أوني بيمع كلمتين ..أحس فيني رقاد .. طبيت الكتاب وتلخفت ورقدت ...
....
حمدوه: عنودي بسج رقاد
شمسوه: أشك ان ذبابة تسي تسي لادغتنج
العنود: حشى انتن ما تخلن حد يرقد
حمدوه: قومي الساعه ست الحين
قمت أشوف الساعه .. أكيد يجذبن.. خيييييبه وايد رقدت وما حسيت
شمسوه: كم مره اتصلت لج وقلتي لي الحين بنش
العنود: متى؟
شمسوه: بسم الله من عقب أذان العصر
العنود: ما حسيتبج..
شمسوه: أخخخخخخ لو أدري جان سالتج وانتي راقده بتردين على كل الأسئله اللي أباج تجاوبين عليها
العنود: سأليني الحين وبجاوبج
شمسوه: لاااااا اللحين ما ينفع
حمدوه: قومي انتي .. أونه الشيخه بتذاكر.. قومي قومي
... قمت عقب شده .. طلعنا من الحجره سرت عند لامي خليتها تسوي جاهي حليب وعقب طلعنا في الحديقه .. وشليت كتابي ويايه .. حمدوه سارت تيب كتابها وكتاب شمسوه .. خذنا كل وحده منا مكان في الحديقه نذاكر.. أقاوم الحمى بأي طريقه عشان أفتك منها إذا تميت بهالحاله بتزيد عليه أكثر .. أشوف حمدوه وشمسوه يرمسن بين فتره وفتره .. طبيتهن تميت أذاكر... أفففف عله كله حفظ وأنا ما أروم أحفظ.. يلست أشخبط في كل صفحه ما خليت غنيه ولا قصيده" لك حبيب يموت فيك.. حس به الله يهديك.. ومنشغل باله عليك.. وانت ما فكرت فيه.."..."إيه أحبك هذا حظي اللي انكتب .. دربي اللي أمشيه وأدري به تعب".. " القلب لك يا سيد القلب لبى .. من قبل قلبه صاحب القلب لبى.. حرمت عيني تطعم النوم غصبا ".." قبل أحبك وأشوفك كل شي كان عادي.. كل شي بعيني صرت مرخص بشانه.. بك عرفت المحبه وصار قلبك بلادي.. ومن سكن في خفوقي به يلاقي كيانه".."والله أحبك حب وأهواك.. وحبك غزا الفواد واحتل".." خل أحبه سر ماهو جهارى"..
جمدوه( تصارخ): العنيدي
العنود: واللغثه.. شو ياج فلختيني
شمسوه: ونحن نقول تذاكر يا حليلها
حمدوه(تسحب الكتاب): أشوف .. أشوف
يلست حمدوه على الكرسي اللي عدالي وتتصفح الكتاب وفي كل صفحه تقرا اللي كتبته وشمسوه تقرا ولف صوبي و تبتسم بخبث ..
حمدوه: ياعيني ياعيني شو هذا العنيدي؟؟
شمسوه: حيييييييييييي .. منو هذا العنيدي ..
العنود: منو؟؟
شمسوه: حق منو هذا كله..
العنود: بسم الله منكن ...يعني لازم أكتب حق حد
حمدوه: لالالا مايصير يعني أنا لو كان هالكلام في كتابي بتعرفين انتي كاتبتنه حق بو غنيم
العنود: سبالات.. صدق كلن يرى الناس بعين طبعه..
شمسوه: أنا بعد لو اني عوفه ويا عليوي بس إذا كتبت بيكون حقه ...
العنود:تراكن قلتنها عليوي وسلوم..يعني كل وحده كاتبه حق خطيبها بس أنا بعدني
حمدوه: أنا بعدني ما انخطبت
شمسوه: ولا أنا
العنود: لاااااا إله إلا الله ...
حمدوه: تعالي يلسي
العنود: ما فيني حيل خلاص ما أروم أوقف
شمسوه: خلاص بنسير داخل ..
العنود: يالله
دخلنا حجرتي .. توضينا وصلينا العشى..وحمدوه وشميس ماكلاتني ويغلسن عليه .. سويتلهن طاف وانسدحت على الشبريه
حمدوه: منو قال انج بترقدين ...
شمسوه: عنودي سرج في بير قولي ..
العنود: يوم بيكون في سر بيي أقولج ..
شمسوه: أنا بسير ..وحمدوه بتبات عندج اليوم
العنود: والله بعذبكن ويايه .. عادي أنا ما فيني شي والله
حمدوه: لا عادي لاعذاب ولا شي ..
شمسوه: هب اتمن تقرقرن .. إذا ما فيكن رقاد يلسن ذاكرن
حمدوه: أوكي .. وانتي بعد لااا تلعبين ذاكري ..
شمسوه: يالله بااااااااي
طلعت عنا شمسوه .. تعشينا وذاكرنا شوي ورقدنا...
............
خفت الحمى عني يوم الجمعه.. وأخيراً حسيت اني مرتاحه .. هالأيام الجو اعتدل شوي نرتاح في دواماتنا .. نرتاح في اليلسه برا العصر.. المغرب فكرت أيلس في الحديقه أكمل الكميه اللي بقت لي من المجتمع..وعزمت ما أدخل الا وأنا مخلصه كل الكميه اللي باقيه.. يلست أدرس وعقب شفت منصور يمشي صوبي ..
منصور: السلام عليج
العنود: وعليك السلام .. هلا والله
منصور: شو تسوين؟
العنود: عندي امتحان يوم الأحد..يالسه أدرس
منصور: يووووووووم الأحد..أنا عليه امتحان انجليزي باجر وما درسته
العنود: ليش ما درسته؟
منصور: ماعرفت شي .. فتحت الكتاب وفريته عقب وسرت صوب مانع
العنود: انت ومانع من تيتمعون ادمرون الدنيا... سير هات كتابك وأنا بدرسك
منصور: لالا ما أريد .. أنا بيلس أسولف وياج.. ومانع بيي يدورني عقب شوي
العنود: لااااااا .. سير هات كتابك وبنيلس ندرس هنيه يالله أشوف ..
منصور: صدق اني أهبل والا شو اللي خلاني أقولج
راح منصور ياب كتابه ورد عقب عشر دقايق.. يلست أدرسه وأفهمه القواعد ..
العنود: أنا أبغي أعرف انت شو تسوي في حصة الانجليزي
منصور: ألعب جيم بوي ..
العنود: لا والله ..
منصور: خلاص انتي عندي بتفهميني
العنود: منصور أنا بفهمك عادي بس لازم تنتبه حق الاستاذ
منصور: شو لالا ما اروم ..
العنود:لاإله إلا الله منك.... انزين انت حل الأسئله وأنا بسير أييب لنا عصير
منصور: أبغي عصير ليمون اللي تسوينه .. وشي آكله
العنود: من عيوني
سرت المطبخ سويت العصير .. وطلعت كيك وقطعته شليته و رديت عند منصور..أول ما وصلت ما شفت منصور....علي يالس على الطاوله ويجلب كتابي .. وين سار السبال أنا أراويه .. سرت صوب الطاوله
العنود: فدييييت من يالس يجلب كتابي يا ربي فديت روحه
تعرفون احساس الواحد يوم ينصب على راسه ماي بارد.. هذا احساسي بغيت أموووووووت .. أنا ما كنت أشوف اللي يقرا الكتاب لأنه عاطني ظهره بس ما طلع علي.. اللي يقرا الكتاب هو حارب .. ماقدرت أرمس من الصدمه تمنيت الأرض تنشق وتبلعني .. تمنيت أختفي قبل لا أنحط في هالموقف البايخ.. واللي أحرجني أكثر ان حارب لف يطالعني وهو مبتسم ..
العنود: أأ..أأأ...
حارب:.........
العنود: أأ..اسمحلي حارب تحريتك علي
حارب:هههه
قفطططططت ما عرفت شو أقول وطيت الصينيه ولفيت بسير عنه
منصور( توه واصل): عنوده وين سرتي حمدوه ادورج ؟
العنود: قلت لك بسير المطبخ
منصور: شميس وحمدوه في حجرتج
العنود: الحين بسير لهن
منصور: لا تعالي الحين بيطلعن
العنود: لالا بسير لهن ..
مشيت شوي وتوهن حمدوه وشمسوه طالعات من الباب اللي من صوب المطبخ .. لااا يا ربي أبغي أسير ما بتحمل أيلس جدامه
حمدوه: وين بتسيرين ؟
العنود: هاه .. قالي انكن داخل قلت بسير أطالعكن
حمدوه: لا لا تعالي خلينا نيلس هنيه
العنود: أنا أقول نرد داخل أحسن
شمسوه: الجو حلو هنيه .. خلينا نيلس
ما طاعن يسيرن كيف أقولهن خلنا نسير .. ياا ربي والله لأراويكن .. ردينا صوب الطاوله ويلسنا .. الطاولات كانن صغار ... يلست أنا وحمدوه ومنصورعلى طاوله وشمسوه وحارب على الطاوله اللي كنت يالسه عليها .. ما قدرت اجابل حارب يلست وعطيته ظهري.. أكمل شرح القواعد حق منصور.. وحمدوه تدرس عندها امتحان باجر.. شمسوه وحارب ما أشوف شو يسون .. بس عندي احساس انه يخبرها عن اللي صار ... يااااربي متى بيفهم منصور وبخلص..
منصور: بس .. ما أروم أستوعب أكثر ..
العنود: باقي هالقاعده وبنخلص
منصور: هذي فاهمنها
العنود: خلاص .. انت الحين حاول تحفظ معاني الكلمات ..
منصور: لا برايهن بغش الكلمات من عند رامي..
العنود: ما بتخسر شي ان حفظتهن ؟؟..
سالم: السلام عليكم
الجميع: وعليكم السلام
سالم: شو تسوون ؟
شمسوه: ماشي .. ندرس وناكل كيك ونشرب عصير
سالم: وانت حارب شو تسوي وياهم ؟
حارب: أنا آكل كيك وأشرب عصير بس..
سالم: ها عنودي شو الهبات
العنود: الحمدالله
سالم: خفت الحمى ؟
العنود: هيه الحمدالله ما فيني حمى الحين
سالم: حشى أسميها هلكتج هالحمى .. طالع شقايل ضعفت أربع أيام وجيه هلكتي
شمسوه: بتمتن ما عليك ..
حمدوه: حوو العنود خلصتي كمية المجتمع
العنود: باقي كم صفحه .. وانتي؟
حمدوه: خليني أخلص دراسة امتحان باجر انا
ما صدقت أذان العشى يأذن ..راحوا سالم وحارب ومنصور يصلون ... لفيت على شمسوه أبغي أعرف من نظرتها إذا عرفت عن شي..
شمسوه( مبتسمه): شو عندج؟
العنود: بلاج شاقه الحلج
شمسوه: يالهبلا مخليه كتابج .. عمي حارب قرا كل اللي فيه
العنود: جذاااابه
شمسوه: والله .. وكتبنا لج تعليق بعد ...
العنود: لااااااااا ياربي .. مب ناقصه قفطه ثانيه بعدني.. أحس ويهي يعورني
حمدوه: قفطه ثانيه !!! .. وشو القفطه الأولى؟؟
شمسوه: أنا بخبرج ..
العنود: ليش شو قالج ؟
شمسوه: حشى ذبحتيه بالتفدي وما تبينه يقولي..راح فيها عمي
ما قدرت اتحمل شليت بعمري ودخلت داخل .. ربعت حجرتي وأنا مخنوقه أبغي أصيح ما أدري ليش.. انزين أنا ما كنت ادري انه حارب على بالي انه علي .. وهو ليش يفتح كتابي لا يا ربي ما أتحمل هالمواقف كلها مره وحده ..
شمسوه( تدق الباب): عنوده فتحي الباب
حمدوه: عنودي دخليج فتحي الباب
العنود: حمدوه خلني بروحي شوي
شمسوه: إذا ما فتحتي الباب بيي من الدريشه
العنود: شمسوه دخيلج خلوني بروحي
حمدوه: شو بتسوين بروحج .. يالله فتحي الباب
قمت فتحت الباب ولفيت عنهن .. وهن دخلن وسكرن الباب وراهن
شمسوه: عنودي شو صار عشان تضيجين
العنود: قفطه شميس والله مب عارفه وين أودي ويهي .. والله كنت أتحراه علي
شمسوه: وهو ما قال شي .. قالي على بالها اني علي
حمدوه: عادي عنودي ما فيها شي ..
العنود: وين ما فيها شي.. اللي ايده في الماي مب مثل اللي ايده في النار
شمسوه: لا ماي ولا نار.. خلي عنج هالسوالف وعن الدلع
العنود: أي دلع انتي بعد
حمدوه: عنودي موقف ومريتي فيه خلاص انسيه ..
العنود: أصلاً ما بقدر أشوف في ويهه مره ثانيه
شمسوه: بيمرن أيام وبتنسون
العنود: آآآآآخخخخ أحس ويهي يعورني
شمسوه: ههههههههه لو كنت وياكم بموت من الضحك
العنود: شميس قومي طلعي برا
شمسوه: ما أبغي
العنود: مب بناقصه تعليقاتج انا... يالله ما وراج امتحان باجر روحي درسي...
شمسوه: خلصت من الله الا أربع دروس..
العنود: روحي ذاكري مجتمع
شمسوه: لا ما أبغي أخرب معلوماتي
حمدوه: خلاص عنودي ولا يهمج أنا بسحبها عنج ..
طلعن عني شمسوه وحمدوه .. وحسيت اني متلومه فيهن طرشت مسجات حقهن وعقب طلعت أييب كتابي لأني خليته برا .. بس حبيت اني أكمل الكميه اللي باقيه... عقب ما خلصت دخلت الحجره طلعتلي ملابس حق باجر .. ورقدت ...
.........
يوم السبت الصبح الساعه سبع ونص دخلت الصاله لقيتهم كلهم يالسين
العنود: السلام عليكم
الجميع: وعليكم السلام
يلست عدال حمد صب لي كوب حليب ويلست أشرب أتريا عويش تخلص عشان نطلع
حمد: بنات موزه بيين عندنا والا عند يدتهن
آمنه: لا بيين عندنا
خليفه: وين بيباتن ما عندنا مكان
أمنه: ساروه بترقد ويا عويش ولطوف ويا العنود..
أنا ما عندي مانع ان لطيفه ترقد ويايه.. بالعكس لطوف انسانه حبوبه وسوالف.. وعويش وساروه يتياوزن رباعه... نزلت عويش ورحنا الجامعه.. حظرت كلاساتي ورديت الساعه 12 ويا شميس وحمدوه لأن عويش بتتريا ساروه بترد وياها..
....
عقب ما غيرت ملابسي وصليت ..فضيت مكان في الكبت حق لطوف .. وسرت أتغدا.. الساعه ثنتين الدريول ياب عويش وساروه ولطوف.. دخلن البيت وكنا يالسين في الصاله أنا وحمد وآمنه وخليفه..
عويش: السلام عليكم ..
الجميع: وعليكم السلام..
سلمن ساروه ولطوف على خالتهن ويلسن
آمنه: عنود سيري خلي البشكاره تحط لهن غدا
العنود: انشالله..
سرت خليت مرساني تحط الغدا ورديت الصاله ..
حمد: أنا بسير أرقد
طلعوا حمد وآمنه من الصاله وعويش وساروه ركبن يغيرن ملابسهن ..وحسيت ان لطوف مستحيه مني ..
العنود: يالله لطوف انسير الحجره بشكارتكم حطت شنطج في الحجره
لطيفه: يالله
دخلنا الحجره .. مع ان لطوف ربشه بس بعدها مستحيه على بالها أنا بضايج من وجودها ويايه ما تدري ان هالشي فرحني .. لأني أستانس عليها وعلى سوالفها .. لطوف انسانه حبوبه ..
العنود: لطوف لا تستحين صدقيني اني وايد مستانسه انج بتكونين ويايه
لطيفه: سمحيلي عنودي .. أحس اني بثجل عليج
العنود: جب .. والله اني فرحانه انج بتكونين ويايه بالعكس بحصل حد يونسني
لطوف( مبتسمه): مشكوره
العنود: انتي الحين غيري ملابسج وسيري تغدي.. عقب بنرتاح أنا عندي امتحان باجر بنقوم ندرس وعقب بنرتب أغراضج في الكبت
لطوف: لا ماله داعي خليهن في الشنطه
العنود: لا شو في الشنطه بتتعبين وياهن .. يالله سيري تغدي أنا بدرس شوي ويوم بتردين بنرقد
لطيفه: أوكي..
طلعت عني لطيفه ويلست على المكتب أدرس .. عقب ما ردت لطيفه رقدنا .. الساعه أربع ونص قمنا نكمل دراسه لطوف يالسه على المكتب تحل واجباتها وأنا منسدحه أدرس المجتمع ..طلعت عند لامي خليتها تسوي لنا عصير برتقال .. كنا يالسات في نفس الحجره بس ولا وحده تكلم الثانيه كل وحده لاهيه في كتبها .. عقب أذان المغرب خذنا بريك ويا حمدوه وشميس وبدينا نرتب أغراض لطوف ونحن نسولف..
العنود: يالله .. كل وحده تاخذ مكان تدرس خلنا نخلص
لطوف: عنودي أبغي أستخدم النت
العنود: لا تستأذنين سوي اللي تبينه
شميس: أنا بسير أخلي لامي تسوي جاهي حليب وبرد
طلعت شميس من الحجره وردت عقب خمس دقايق .. بدت لطوف تشتغل على النت وانا وحمدوه وشمسوه ندرس.. وكل وحده منا ماخذه مكان .. أنا بين الشبريتين .. حمدوه عند الدريشه .. وشمسوه ورا باب الحجره .. صدق غرفة مذاكره .. عقب ساعه ونص من الهدوء قطعت علينا حمدوه بصرختها
حمدوه: أأوووووووووووووهووووووووووووو
شميس: واللغثه... شعندج
حمدوه: تعبت .. ما أقدر أستوعب
لطوف: تعالي خذي بريك ويايه وعقب ردي كملي
حمدوه: وانتي شو تسوين؟
لطوف: فاتحه المنتدى ؟...
حمدوه: شو رايكن نطلع نيلس في الحديقه نكمل .. بستوعب أكثر
العنود: يالله
طلعنا في الحديقه ويلسنا على الطاولات وبدينا ندرس ..
حمد: ماشاااااااالله عليكن
حمدوه: هلا خالي
حمد: شو تسون
شمسوه: ندرس عندنا امتحان باجر
حمد: الله يوفقكن يا رب العالمين ..
سار حمد عنا وعقب ما خلصنا راحن شمسوه وحمدوه وأنا رديت الحجره ..
العنود: شو تسوين لطافي
لطوف: أبغي أسوي برنت ..
العنود: قلت لج سوي اللي تبينه ولا تستأذنين
لطوف: مشكوره..
يلست أطلع لي لبس حق باجر .. ولطوف على يلستها .. يت البشكاره تزقرنا عشان العشى .. طلعنا نتعشى وردينا الحجره .. دخلت أتسبح وعقبي دخلت لطوف ..
العنود: حلوه بجامتج لطوف
لطوف: هذا ذوق عمي بطي
العنود: يااااااااسلام .. جان هذي من ذوق ريال
لطوف: فديته والله .. ما تعودت أفارقه وايد ..
العنود: تصدقين أنا كنت جذيه وياخالي بس من ييت هنيه قمت ما أشوفه الا في الاسبوع مره يوم الخميس والا الجمعه يوم ايي يسلم عليه والا أنا أسير عند يدوه
لطوف: قالي انه بيمرنا عقب اليومين مره ..
في هالوقت دق خلوف الباب ودخل بدفاشه .. وعقب ما شاف لطوف رقع الباب بقووو .. طلعت أشوفه
العنود: انكسر باب الحجره
خليفه: منو عندج ؟
العنود: تستهبل حظرتك !!
خليفه: لا أحاول
العنود: انت تدري ان لطوف عندي في الحجره ممكن تدق الباب مره ثانيه
خليفه: السموحه منكن..
العنود: شو كنت تبغي
خليفه: ماشي خلاص
العنود: لا والله..
خليفه: خلاص سيري رقدي كنت أبغي أيلس وياج ملان
العنود:روح ارقد باجر وراك مدرسه
خليفه: خلاص انزين فكينا
راح خليفه عني ورديت الحجره ..
العنود: سمحيلنا لطوف .. ولدنا دفش شوي
لطوف: شو قالج
العنود: ما قال شي
لطوف : والله فشله
العنود: عادي .. الا خلوف هوه .. يالله رقدي الساعه 12 ما بتقدرين تقومين بعدين
لطوف: أنا عادي متعوده ..
العنود: لا ماشي خلينا نرقد اليوم باجر بنيلس جان تبين ..
لطوف: أوكي..

الــــــــــــــــجـــــــــــــــزء الــــــــــــســـــــــابــــــــــــــــــــــــ ع عــــــــــــــــــــــــشـــــــــر

يوم الاحد قمت ووعيت لطوف اللي اكتشفت ان نومها ثجيل.. وما تقوم بسرعه .. الساعه سبع وربع قامت مختبصه ..
العنود: ههههه عادي بنترياج لا تختبصين
لطوف: ساروه بتاكلني
العنود: عادي بترياج وبنسير ويا قوم شميس
من قلتلها هالكلام ارتاحت... خلصت لطوف الساعه ثمان الا ثلث .. طلعنا في الصاله
ساروه: تو الناس ..
لطوف: ليش ما ييتي توعيني انتي
عويش: عنود ليش ما وعيتيها يوم نشيتي
العنود: وعيتها كم مره .. ما نشت
ساروه: بسرعه لا نتأخر
طلعنا من البيت وصلنا لطوف ورحنا الجامعه .. عندي امتحان الساعه ثمان وأنا متأخره .. أول ما وصلت الكلاس لقيت الدكتور موزع أوراق الامتحان والبنات يحلن .. سرت يلست عدال شميس وبديت أحل .. سلمت ورقة الامتحان والدكتور ما طاع يطلعنا .. بيعطينا محاظره ..
شمسوه: ليش اتأخرتي؟؟
العنود: لطوف اتأخرت .. عشان جذيه طلعنا متأخرات
شمسوه: عاد لطوف من ترقد ما تنش ..
حمدوه: جان زين لو يت لطوف عندنا الا ساروه السباله ما أدري شو عندها ويا عويش ..
العنود: شحالها حصيص أمس ماشفتها...
شمسوه: انتي قاطعتنا من يوم الجمعه ما ييتي عندنا ..
العنود: يوم الجمعه تحيديني كنت تعبانه.. وأمس كنت أذاكر
شمسوه: خلي عنج.. أنا متأكده انج ما تبين تشوفين حارب
العنود: تبين الصدق ما بعرف أجابله..أنا من تطرين اسمه أتذكر الموقف وأقفط
شمسوه: ما يسوى عليج
العنود: خلي هالسالفه عنج انتي الحين
شمسوه: شو شفتيها لطوف وياج
العنود: حبوبه
شمسوه: زين بعد حصلتي حد يونسج ..
حمدوه: حوووه قومن خلنا نطلع حشى من سلمن ورقة الامتحان ما سكتن
طلعنا من الكلاس .. ورحنا المبنى لقينا ميثوه تتريانا ..
حمدوه: السلام عليكم
ميثوه: هلا والله وعليكم السلام ..
شمسوه: أخبارج ميثوه ..
ميثوه: يسرج الحال.. انتي علومج
شمسوه: ماشي الحال
العنود: يوعانه.. تعالن ناخذ ريوق
سرنا خذنا الريوق وردينا نتريق..
ميثوه: عندكن امتحان اليوم؟
شمسوه: هيه مجتمع .. امتحانا
ميثوه: شو سويتن؟
حمدوه: الحمدالله ..
ميثوه( تجلب كتاب المجتمع): ماشالله شو هالكتاب ؟؟ ديوان... كتاب منو هذا؟
العنود: كتابي ..
حمدوه: هيه والله ديوان
ميثوه: خط منو هذا؟؟
العنود: أشوف..
شمسوه: هذا خطي
العنود: متى كتبتيه ..؟
شمسوه: يوم الجمعه ..
حمدوه: ههههههههههههههههههههه
العنود: ليش تضحكين؟
شمسوه: انا كتبته صح بس مب من خاطري
العنود: مالت عليج .. ليش تعبتي عمرج عيل ..
شمسوه: هو كلام من الخاطر.. بس مب من خاطري أنا..
العنود: أصلاً أنا توني أدري انج كتبتي
حمدوه:ما تنلامين كنتي في حاله يرثى لها
ميثوه: استهبال يعني والا شوه
حمدوه: يعني هو من الخااااااااااطر.. بس مب من خاطر شمسوه
شمسوه: أنا ما قلت ذاك اليوم انا لج كتبناااااااااااا لج تعلييق..؟؟
تذكرت انها كانت تجلب كتابي وياحارب يوم الجمعه .. وعقب ما ساروا يصلون قالت لي ان حارب شاف كتابي.. وبالتحديد قالت" كتبنا لج تعليق" والحين ردت تكرر الكلام بس بنبره خبيثه.. ما أدري شو اللي خلاني أقبض الكتاب من ايد ميثوه.. عشان أشوف شو مكتوب .." ذوقك حلو وذوقك رفيع..ويعجبني الحسن البديع..ماانته حلو انته فضيييع ..طيرت عقلي من حلاك".."صرت بحياتي الروح واللهفه والأشواق ..الصمت لك والبوح ولشوفتك أشتاق.. عمري فدى عيونك ياساحر بلونك..".. أول مره أنتبه عليه لأنه مكتوب في الصفحات اللي جدام عند المقدمه..أحس قلبي بيطلع ما أدري ليش..انزين شمسوه ماقالت شي ..
حمدوه: حوو العنيدي شو ياج جيمتي ..
العنود: أنا بسير الكلاس
شمسوه: بعده كلاسج نص ساعه باقي عنه
العنود: لالا بسير
حمدوه: كملي ريوقج ..
العنود: ما لي نفس.. شبعت
شمسوه: توج يوعانه
العنود: قلتلكن ما أبغي
حمدوه:هههه
العنود: شو يضحكج
حمدوه: ماشي ماشي..
شليت كتبي وشنطتي ورحت عنهن .. متوتره ومرتبكه ما أدري ليش.. اتمنيت شمسوه تبين لي أكثر من اللي كاتبنه.. بس كلامها يدل على انه حارب اللي كاتبنه.. يعني هيه كاتبتنه من الخاطر.. بس مب من خاطرها هيه.. يعني منو تقصد .. وكتبنا لج تعليق شو قصدها به .. يلست على الحشيش ورا اللابات وأنا أفكر..قطعت تفكيري وقت الكلاس .. وقررت اني ما أسألها عن شي .. أن سألهتا بتسوي لي مهاسه وما بطلع من لسانها.. ركبت فوق بحظر الكلاس شفت شموه توها نازله ..
شموه: مرحبا الساع
العنود: مسودة الويه
شموه: مالت عليج أرحب بج
العنود: لو ما شفتج بالصدفه اليوم ما بتسألين عني
شموه :ههههههه فديت هالويه أدري اني مقصره
ما بغيت ألومها أكثر.. يمكن صدق عندها شي يشغلها .. بس اللي أنا تعودته من شموه تخبرني عن كل شي يصيرلها .. ومن دخلنا الجامعه قمت ما أشوفها وبالنادر ما أكلمها في التيلفون.. يوم أتصلها يا انها ما ترد أوعندها خط أو تكلمني دقايق وتسكر
العنود: وين سايره؟
شموه: يوعانه بنزل أشتريلي شي آكله
العنود: شماني أبغي أرمسج عندي سوالف وايد أبغي أقولها .. متولهه عليج..
نوال( ربيعة شموه): شما إذا مطوله بنزل عنج
العنود: برايج شموه سيري
شموه: خلاص برايج عيل
كملت طريقي ودخلت الكلاس .. الساعه 12 طلعت من الكلاس ورحت الرسبشن اتصلت حق سليم ورديت البيت حمدوه وشمسوه يخلصن الساعه أربع اليوم .. وحصوه وعويش وساروه ما أدري عنهن .. رديت البيت قلت بتريا لطوف بتغدا وياها .. ويلست أحل الواجب كانت كميته كبيره هالسبال مايرحم.. الساعه ثنتين دخلت لطوف الحجره
العنود: هلا والله
لطوف: آه تعبت
العنود: يالله غيري ملابسج وأنا بسير أخلي لامي تحط لنا غدا
لطوف: انتي ما تغديتي
العنود( مبتسمه): قلت بترياج
لطوف: خيييبه من الساعه 12 لين الحين
العنود: هيه .. يالله بسرعه تعالي أنا بموت من اليوع
لطوف : انزين
طلعت من الحجره سرت عند لامي قلتلها تحط لنا الغدا .. وعقب رديت حجرة الطعام ويابت لامي الغدا .. يلسنا نتغدا وسرنا نرقد ومن انسدحنا على الشبريه ما حسينا بعمارنا من التعب ..
....
لطوف: عنودي قومي
العنود: هممم
لطوف: قومي يالله الساعه خمس
العنود:انزين ..
...
عقب ما صلينا العصر كملت الواجب ولطوف يلست تذاكر الامتحان اللي عليها .. عقب المغرب رحنا بيت أم عبدالله .. دخلنا ورحنا عند الحرمات وين بارزات ويلسنا ويا البنات ..
العنود: حصيص شحالج ..
حصوه: الحمدالله يسرج الحال
العنود: من يومين ما شفتج ..
حصوه: تولهتي عليه ؟
العنود: أكييد
سالم: السلام عليكم
الجميع: وعليكم السلام
العنود: هلا والله ..
سالم: شحالكن قواطي
شمسوه: الحمدالله ..
العنود: شخبارك كرتون..
سالم: منو كرتون؟
العنود:خلاص قررنا نسميكم كراتين.. سير قول حق ربعك جان نحن قواطي العنود قررت تسميكم كراتين..
حمدوه: وراكم يمشون باقي الكراتين ..
لفينا وشفت علي وحارب وخليفه يمشون صوبنا..
علي+حارب: السلام عليكم
الجميع: وعليكم السلام..
سالم: العنود تقولكم جان هن قواطي انتوا كراتين..
علي: مسودة الويه..
حارب( مبتسم ورافع حواجبه): نحن كراتين؟
لا يا ربي من أشوفه يرمسني وهو مبتسم ورافع حواجبه أحس بطني ينقبض .. وأتلخبط .. نزلت راسي وما رديت عليه ...
حارب: علومج لطفين؟
لطيفه: الحمدالله..
حارب: مسودة الويه ما بغيتنه بيتنا
لطوف: أنا من متى شاوروني.. ساروه قالت بنسير بيت خالوه آمنه
حسيت تيلفوني يهز في مخبايه .. طلعته لقيته خالي غيث ..
العنود: ألو
غيث: مرحبا ملايين
العنود: مرحبتين الساع ..علني ما أعدم هالحس ..
غيث: علومج عنود
العنود: بخير الحمدالله انت شحالك
غيث: أنا جدام الباب طلعي
العنود: الحين!!
غيث: هيه تعالي بس بسلم عليج ..
العنود: جدم عند الباب الثاني أنا بطلع لك ..
غيث: ليش انتي وين ؟
العنود: أنا عند خواتي
غيث: بيت قوم حارب؟
العنود: هيه بيت قوم حارب..
غيث: انزين بسرعه ما أروم أتريا وايد
العنود: انشالله
.. سكرت عن غيث ووقفت وشفتهم كلهم يطالعوني..
سالم: منو ترمسين ؟
العنود: خالي غيث
علي: وين تبين ؟
العنود:خالي جدام الباب بسير أسلم عليه
سالم : خليه يقرب في الميلس..
العنود: لالالا بس بيسلم عليه وبيسير
علي: شو لالا خليه ينزل
العنود: لا دخيلكم بيهزبني ما فيني
علي: صدق انج قوطي.. الريال جدام الباب ما تخلينه ينزل
شمسوه: انزين انتوا شو عليكم يمكن يبغيها في رمسه .. سيري سيري..
مشيت عنهم وطولت لين وصلت عند الباب .. أول ما طلعت من الباب ركبت السياره وسلمت عليه
غيث: حيالله عنودي .. شحالج غناتي
العنود: أنا الحمدالله..وينك ما تسأل عني
غيث: والله متوله عليج. بس تعرفين ما أقدر أيي دوم ..وانتي حظرتج تين يوم الخميس العصر وتروحين المغرب ..
العنود: انت لو تبغي تسأل عني جان اتصلت .. بس عاد خلااااااااص العنيدي نسيتوها ..
غيث: لا والله ما تهونين علينا ..
العنود:ما أظني ياي بس عشان تسلم عليه .. لازم شي عندك
غيث: ههههههه .. ياي أوصل سعيد كان ويايه
العنود: أقول تراني والا مب عشان سواد عيوني
غيث: لا والله أنا قايل بيي أسلم عليج
العنود:عشر دقايق وتسير
غيث: شو أسوي أستحي أيلس عندكم ..
العنود: شخبارها يدوه
غيث: الحمدالله .. يسرج حالها ..
العنود: والعروس؟
غيث: معذبتنا كل يومين والسوق.. تتحرانا نشتغل عندها ...
العنود: حليلها يعني إذا انته ما وديتها منو بيوديها
غيث: حطيت لها الدريول المزرعه والسياره .. تفكني من صدعتها
العنود: افتكيت ..
غيث: يالله أنا بسير فضحه واقف من الصبح جدام بابهم
العنود: خلاص عيل.. سلم على يدوه ونوروه..
غيث: يبلغ بالخير
نزلت من السياره ودخلت البيت .. وأنا أمشي كان حارب توه بيطلع بسيارته ..خطف من عدالي نزل الدريشه طالعني وابتسم رديت له الابتسامه ونزلت راسي..رديت عند البنات وأنا مختبصه من حركة حارب..
حمدوه: شوفيج عنوده
العنود: مافيني شي..وين ساروا الكراتين
شمسوه: كل سار في دربه .
العنود: قومن خلنا نسير نصلي .. شو ميلسنكن انتن ؟؟
حصوه: قلنا نترياج
العنود: قومن خلنا نسير بيتنا بنصلي وعقب بتردن
حمدوه: جيه الحرم بيتكم
العنود: لا يعني بنيلس نسولف عقب الصلاه
شمسوه: أنا بحل الواجب ما حليته
العنود: شو تترين ؟
شمسوه: أتريا حمدوه
حمدوه: وأنا أتريا شمسوه
حصوه: عيل ما بتحلنه
شمسوه: لا شو باجر آخر يوم .. قومي حمدونه
.. ردينا البيت أنا ولطوف .. دخلنا الصاله لقينا ساروه ترمس في التيلفون وعويش حاطه السماعه الثانيه وأول ما دخلنا عطنا إشاره انا نسكت .. طالعنا بعض وطلعنا عنهن سرنا الحجره صلينا ولطوف كملت مذاكرة اللي عليها وأنا كنت أقرا قرآن ...
... عقب العشى ردينا الحجره لأن كل حد دخل يرقد الا خليفه اللي طلع من البيت ..
لطوف: شو بتسوين ؟
العنود: برمس شموه ربيعتي ..
لطوف: أنا باقلي درس بدرسه .. لين انتي ترمسينها
العنود: بحشرج
لطوف: لا عادي ..
يلست لطوف على المكتب وأنا فتحت الدريشه كانت طويله لين الأرض ويلست عدالها .. اتصلت حق شموه..السباله ما ترد ما أدري ليش طالبه خطين عيل .. رديت أتصل مرتين والمره الثالثه ردت ..
شموه: هلا والله
العنود: شو قصدج بهالحركه آنسه شميم
شموه: أي حركه؟
العنود: أتصل وعندج خط وما تردين .. ما تقوليلي منو كنتي ترمسين ؟
شموه: ههههه شو أسوي نوال ما طاعت تسكت ..
العنود: قولي انج ترمسين نوال ...
شموه: انزين انتي شحالج ..
العنود:الحمدالله .. انتي أخبارج يالسباله والله اني اتولهت عليج ولا تسألألين
شموه: والله حتى أن اتولهت عليج ...
العنود: باجر ترييني في بريكج هب تطلعين وتخليني أتصلج
شموه: أوكي.. ونوال بتتريق ويانا
العنود: أوكي.. ولو اني أبغي أيلس وياج من زمان مايلست أرمس وياج وطلعت لج كل اللي في خاطري
شموه: ليش عنودي شو فيج؟
العنود: ما فيني شي.. بس وايد سوالف في خاطري أبغي أرمسج عنها
شموه: انزين قولي الحين..
العنود:ما خبرتج حصلت لي ونيس في الحجره هالأيام
شموه: منو عندج ؟؟
العنود: لطيفه اخت ساروه ..قوم أمها مسافرين ويت هيه وساروه عندنا
شموه: زين بس جان ما تطلع شرا اختها
العنود: فديتها والله انها حبوبه
شموه: أقول عنودي بخليج الحين
العنود: شو عندج؟
شموه: نوال تتصل بشوفها شوبلاها ؟
العنود: أوكي برايج ..تصبحين على خير
شموه: وانتي من أهله
سكرت عن شموه وأنا منقهره يعني أنا أقولها متولهه عليها ويوم أتصلها ما ترد لأنها ترمسها والحين ما كملت وياها ربع ساعه تسكر لأن نوال متصله .. من الله انها طول اليوم في الجامعه وياها وأنا ما أشوفها الا في البريك عشر دقايق..تميت يالسه مكاني أطالع برا من الدريشه .. في الفراغ .. شموه صار لها فتره بعيده عني وما تسأل عني ولا تدري عني شي.. يوم مرضت ما درت الا عقب ثلاث أيام..صرت أحسها بعيده عني وايد وما تكلمني مثل قبل..
لطوف: عنودي.. عنودي
العنود: هاا
لطوف: من متى أزقرج
العنود: سوري بس ما انتبهت لج
لطوف: شو فيج؟
العنود( مبتسمه):ماشي لا تفكرين.. انتي خلصتي الدرس
لطوف: لا بعدني بس من سكرتي وسكتي قلت بسألج شو فيج
العنود: ما عليج انتي كملي الدرس وأنا بتصل حق خالتي
لطوف: إذا بترقدين عادي بطلع في الصاله
العنود: لااااا ما فيني رقاد أنا واعدتنج أيلس وياج اليوم إذا ما فيج رقاد
لطوف(مبتسمه):لا ما فيني رقاد..بخلص لين تخلصين رمسه
ردت لطوف تدرس وأنا اتصلت حق نوروه..
نوروه: هلا والله بالقاطعه..
العنود:جب يالله محد غيرج القاطعه .. مرمستنج يوم الجمعه وسكرتي عني وما رديتي تتصلين .. ما يسوى عليج هالزهاب
نوروه: والله اني متعذبه .. عقب ما حطلي غيث الدريول ارتحت وقت ما أبغي أسير أسير ويا منى ومريوم
العنود: خلصتي البدل
نوروه: أبغي بعدني كم وحده
العنود: شخبارها يدوه
نوروه: الحمدالله بخير ونعمه..عنوده منى بنت خالي تترياج يوم الخميس
العنود: ليش؟
نوروه: عازمه بنات العايله الكريمه كلهن
العنود: وشو المناسبه ..
نوروه: شدراني..بس بدون مناسبه
العنود: لالا ما فيني على مجابل ولد خالج السبال
نوروه: لاااا إله إلا الله الحين شو دخل أحمد
العنود: شو شودخله تراني سايره بيتهم
نوروه: لا أحمد ولا عبدالله ولا حمد بيكونون موجودين في البيت .. طبيعي دام ان اختهم عازمه بنات
العنود: تعرفينه انتي مايغلبه شي
نوروه: عاد انتي لا تسويلنا فيها .. تعالي وما بتشوفينه وان ما ييتي منى بتحط في خاطرها
العنود: ومريوم بنت خالج أوازرها طول الوقت .. لالا ما أقدر
نوروه: عنودي عاد لا تتدلعين
العنود: نوروه والله بنت خالج مغثه
نوروه: لا تيلسين وياها..
العنود: ما تقصر تبسط عدالي وتلعلع الا أحمد وأحمد تتحراني بموت عليه فقدتها هيه وياه
نوروه: انتي الحين بتين والا لاء
النود: انشالله بفكر وبرد عليج
نوروه: تخسين تعالي
العنود: انا الحين متصلتلج عشان تزنين اني أيي عزيمة منى
نوروه: شو أسوي يعني هيه لزمت عليه أخليج تين بصراحه هيه مالها ويه من عقب اللي سواه أخوها
العنود: هيه مالها دخل..وأنا هالبيدار ما حفلته
نوروه: منو البيدار؟
العنود: منو غيره أحمد
نوروه: حرام عليج
العنود: واااااااايه فقدته العوف..جلبي ويهج سديتي نفسي من هالطاري
نوروه: انا ما يبت طاريه انتي اللي رمستي عنه
العنود: انتي ما وراج كليه باجر .. يالله انطبي..
نوروه: ههههه خلاص برايج عيل
العنود: تصبحين على خير
نوروه: وانتي من أهله
سكرت عن نوروه وأنا متنرفزه .. شاللي خلاني أنظرب في مخي وأتصلها سدت لي نفسي بهالطاري الله يسد نفسه أفف
العنود: لطوف ما خلصتي ..
لطوف: باقي هالمسأله ..
طلعت البجامه من الكبت ودخلت أتسبح وطلعت لقيت لطوف مطلعه ملابسها بتدخل تتسبح ..
العنود: أنا بسير أسوي لنا جاهي حليب وبرد
لطوف: أوكي
طلعت سرت المطبخ سويت الجاهي وحطيته في الصينيه ..
خليفه( يصرخ): وااااااااااااااااااا
العنود: يقطعك فلختني عنلاتك ..
خليفه: ههههههههه .. شو تسوين ؟
العنود: قم عني يالسبال.. حشى وقف قلبي
خليفه: فديييييييت قلبج..ههههههههه
العنود: الله ياخذ عدوك شو يايبنك من هنيه
خليفه: سمعت صوت في المطبخ قلت محد غيرج ..يتج
العنود: جلب ويهك اطلع
خليفه: يالبقر ما بترقدن إذا شربتن جاهي
العنود: بعدنا ما بنرقد الحين..اجلب ويهك
خليفه: يالله خطفي جدامي .. لابسه بجامه وطالعه وين تبين
العنود: منو يعني بيشوفني ؟؟
خليفه: تدرين ان خالي حارب وعلي كانوا ويايه بس عقب تعايزوا وروحوا
العنود: انزين خلاص .. يالله خلنا نرد
ردينا داخل البيت .. خليفه ركب فوق وأنا رديت الحجره
لطوف: ليش تأخرتي
العنود: خلوف السبال زيغني
عطيتها كوب الجاهي .. يلسنا نشرب وفتحت المسن مالي وفتحنا المنتديات أنا ولطوف ونحن نسولف ونرمس حمدوه وشمسوه على المسن ونحن نضحك مع بعض..
لطوف: طلعي السيدي اللي في الشنطه وطرشي لهن الصور اللي فيه ..
العنود: أي واحد
قامت لطوف وطلعت السيدي وعطتني اياه ..شغلته ولقيت فيه ملفات وصور وايد .. فتحت الصور كل مره وحده .. الصور تفطس من الضحك ..
العنود: من وين يايبتنهن هالصور لطفين
لطوف: ربيعتي يابتهن لي..
كملت على باقي الفولدرات .. من بين هالصور لقيت صورة خليفه .. استغربت ولطوف أول ما شافتها قبضت الماوس من ايدي تحاول تبندها...بس أنا شفتها خلاص ..بندت السيدي وطلعته وحطته في البوكس ماله وردته في الشنطه بدون ما تتكلم بأي كلمه وانسدحت بترقد ..
العنود: آسفه لطيفه ما كنت أدري انج ما كنتي تبيني أشوفها
لطيفه: لا عادي... لاتفكرين
تلحفت لطوف ومن هالحركه عرفت انها ما تبغي تتكلم في شي .. بندت الكمبيوتر وبندت الليت وانسدحت برقد.. اتجلبت يمكن نص ساعه أول ما غفت عيني انتبهت مره ثانيه عقب ما سمعت صوت عبرة لطوف .. حاولت أركز إذا ما كنت أحلم بس الصوت يطلع بين فتره وفتره .. قمت شغلت الأبجور ووقفت عدال لطيفه
العنود: لطوف ..
لطوف:....
العنود: لطفين فديتج شو فيج ؟
لطيفه:.......
العنود: لطفين إذا عشان الصوره تراني والله ما كنت قاصده .. وانسي السالفه واعتبريني اني ما شفتها
ما طاعت ترد عليه خوزت الكفر عن ويهها لقيت الدموع على ويهها والمخده كأنه ماي مصبوب عليها .. ربعت شغلت الليت ويبت لها ماي وكلينكس من هالصياح عرفت ان السالفه أكبر عن اني شفت الصوره .. عطيتها الماي ومسحت دموعها .. وحاولت أقومها وأخليها تغسل ويهها .. عقب ما طلعت لطوف من الحمام فتحت الدريشه ويلست عدالها فتره وهيه ساكته ما ترمس..
العنود: لطفين .. شو فيج ؟؟
لطيفه: أحبه..
العنود: خليفه؟
لطوف: هيه خليفه..بس هو ولا يدري عني
العنود: وليش تصيحين .. انتي قلتيها ما يدري عنج مب ما يحبج أو يحب وحده غيرج ..
لطوف: يدري اني أحبه
العنود: شدراه... انتي قلتي له
لطوف: لا أنا ماقلت له ...
قمت ويلست عدالها ...
لطوف: أمنت انسانه ما تتأمن وفضحتني
العنود( منصدمه): منو!! وشو سوت ؟؟
لطيفه: عويش السخيفه..
العنود: عويش!!
لطيفه: هيه عويش ومن عقبها أكرهها ومستحيل أقولها شي لها هيه ولا ساروه