منتدى استراحات زايد - نُهايتيّ أنتَ ، و نهايتكُ أنا . . !

" الفصل العاشر "

" بعد مرور شهر "

" ميثا "

هب مصدقه أنه اليوم ملجه نوره .. ولد خالها مايد خطبها و وافقت و اليوم ملجتهم ، مايد الجنتل الرزه اللي كان ماخذ عقلي يأخذ نوورو أساساً ما توقعت وحده مثل نوره تتزوج كيف رضى ياخذ وحده كانت ولد و صارت بنت ! ما أنكر نوره حلووه بس الجمال مو كل شي .. لو حد سأله منو تزوجت بيقول بنت عمتيه ، و الناس بترمس عادي عنده ! بيتحمل كلام الناس ، ما أدري شقايل فكر فيها كزوجه .. يمكن خذاها لأنه أبوه يباه يأخذها ما أدري بس مايد ضاع من إيدي .. أنا أعجبت فيه وايد بشخصيته و بطوله و عرضه بس ما ألتفت لي موول كنت أشوفه إي يأخذها عشان يوديها بيتهم أو يظهرون كان ما يشوف شي غيرها معني كمن مره يلست فالحوي عشان ينتبه لي بس ما ألتفت لي حتى و لا كأني موجوده كل عيونه و نظره ع نوره ، توقعته يكون ثجيل عشان جذا ما ألتفت لي و يمكن يكون منتبه لي لأنه صار يأخذ نوره وايد توقعت أنه حبني و يبا يشوفني بس أنصدمت أنه من أسبوع خطبها و نوره واقف و اليوم ملجتهم .. مسوين الحفله فبيت خالها الكبير و الفخم ، لو تزوجني جان كل هذا بيكون لي أنا بروحي بس راح من إيدي ، أصلن لين أحينه مستنكره كيف وحده مثل نوره تتزوج !!

" الريم "

يلست فالسياره و قلت بخوف : علي بعدك ما تعافيت بالكامل خليني أنا أسوق

أبتسم : حياتي ليش متروعه مافيني شي الحمد لله و صحتي زينه

مسكت إيده : أنت لازم ترتاح أكثر أنا بروح بروحي أرجع لسريرك و إذا تبي ما بروح

ضحك : مافي شي ي بنت الحلال ، بنروح خلينا نستانس اليوم ملجه نوره

أبتسمت لا إرداي : فديت قلبها ربي يسعدها

تحرك علي ساير صوب بنت خال نوره .. من بعد الحادث وعدت نفسي أكشف حبي لعلي و ما أضيع و لا دقيقه عليه معاه و أعيش وياه بسعاده و راحه ، و شفته أستقبل حبي له بكل رحابه صدر كنت خايفه أنه ينفر مني و مشاعره ماتت بس لاء مثل ما هو طيب و حنون و يحبني .. اليوم كلنا مرتبشين لأنه ملجه نوره فديت روحها ربي يسعدها والله مستانسه لها واايد و مايد هب غريب ولد خالها و علي يقول أنه مناسب لنوره و شخصيته حلوه .. وصلنا بيت خال نوره و نزلنا علي راح صوب الميلس اللي مجتمعين فيه الريايل و أنا دخلت الصاله ، الصاله وايد كبيره كانو شالين الأثاث و حاطين الطاولات و الكرسي أساساً ما بيعزمون وايد نحن بس نحن و خوال مايد .. كوشتهم كانت واايد جميله و هاديه ، سمعت أصواتهم فوق و رحت فوق قالو بيبون الكوافييره للبيت و بيكون في ثنين عشان تخلصنا بسرعه .. صعدت فوق و لحقت الصوت و دقيت الباب و حدرت ، سلمت عليهم .. ميثا كانت مخلصه و أميه هب مسويه شي لا فشعرها و لا ويهها تقول هب لي ها السالف كبيرت عليها ، و علياء الكوافيره يالسه تعدلها محد مستانس غيرها لأنه نوره بتتطلع من البيت و صارت ملك شخص ثاني و تأكدت أنه مافي شي بين عُمر و نوره .. ألتفت شفت جواهر متسدحه ع السرير يحليلها من أسبوعين عرفت أنها حامل و وحامها واايد متعبنها خلال ها الثلاث أسابيع .. سألتهم عن نوره قالو فالغرفه الثاني ع اليمين طلعت و دقيت الباب و حدرت ، شفتها يالسه و مكياجها مخلص و باديه فشعرها ، قربت منها و سلمت عليها

: مبروك ي قلبي

أبتسمت بخجل : الله يبارك فيج

طالعت الحجره حولي كان مبين أنه حجره رجاليه خصوصاً من العطور و الأغراض : شو غرفه بو الشباب

نوره : هيه

ضحكت : عادي أقعد عندج بخليها تعدل شعري هم بعدهم ما خلصوا

نوره : حياج

قبل ما أفصخ عبايتي أندق الباب و سمعت صوت أبويه .. رحت فتحت له الباب كان بيده الدفتر دخل و عطاها الدفتر و أشر لها وين توقعت و بجذا صارت حرمته ، حبها ع راسها و بارك لها و أنا باركت لها و سرت خبرتهم أنه نوره صارت حرم مايد و أميه يببت ..

" جواهر "

قمت شربت عصير ليمون عشان معدتي ترتاح شوي .. و يلست عشان الكوافيره تعدل شعري ، رن فوني كان محمد .. الحمد لله حياتي وياه تعدلت تقريباً بس لين أحنيه ما عطيته ويهه وايد و هو صاير مراهق و من عرف بالحمل متخبل بزياده

: هلا محمد

: حياتي تعبانه ! تبين أوديج المستشفى .. أتسدحي لا تتحركين واايد

ضحكت : تعبانه شوي بس يصير أحسن و المستشفى لاء ما يحتاي هم ما بيسون لي شي .. و كنت متسدحه و أحينه بسوي مكياجي و تسريحتي .. أنت لو تشوف دوين طالعه عروس ما شاء الله

: ي رب نشوفها عروس و نشوفج أنتي و البيبي بخير

أبتسمت : إن شاء الله

سكرت و أنا أحس براحه كبيره .. بدت الكوافيره تسوي مكياجي و بعدها سوت شعري محد بقى غيري و صارت الساعه ثمانيه ، و ع ساعه تسعه تقريبا خلصت و لبست فساتني و حاسبنا الكوافيرات و راحوا ، رحت عشان أشوف عروستنا الجميله .. دخلت الحجره شفتها يالسه بفستان ذهبي أنيق و محليها أكثر و تفرك إيدينها فبعض و تهمس ، كانت تقرى ع عمرها فديتها المتوتره .. قربت منها و يلست حذالها

: ألف مبروك ي الغاليه عقبال ما نشوف عيالج

أبتسمت بتوتر : عقبال ما نشوف دانه عروس

: أمين .. هدي أعصابج مافي شي يخوف أصلن مافي ناس وايد

: نزلتي تحت !

: لا بعدني بس قالو ما بيعزمون وايد ناس ..

بديت أقرى عليها و أميه دخلت و قرت عليها .. تميت فوق بعدني أحس بتعب فما نزلت قلت بنزل لما تنزل نوره ! تميت أسولف وياها لين ما ي الوقت أنها تنزل

" علياء "

الحمد لله نوره ملجت يعني صدق مافي شي بينها و بين عُمر .. شو أسوي والله غصبن عني نوره بنت حلووه و عُمر يهتم فيها وايد ، هو كان مأيد ها الزواج و كان يباها تأخذ مايد و ها الشي وايد ريحني .. أحينه أحس بعيش بسعاده و أستقرار .. نزلت نوره و بهرت الجميع و لما دخل المعرس كلنا تغطينا و لبسها الخاتم و الدبله حليلهم محد حولهم ، لا أم و لا أبو و أبو مايد ريال كبير و تعبان ما يروم يشل عمره .. مايد و هو يلبسها القلاده توهق فراحت خالته تساعده و تصورو و قصوا الكيكه و راحو يلسو فحجره بروحهم شوي ! الله يسعدهم

" نوره "

تزوجت .. أثبت للكل أنه اللي مثل حالتي يتزوجون و يعيشون و يكملون حياتهم مثلهم مثل غيرهم ! و اللي تزوجته ريال كل البنات تتمناه ، وسيم و جنتل و صاحب مال .. بس كل ها ما يهمني اللي يهمني أني أعيش وياه حياه سعيده و مستقره و هاديه ، بعيش وياه و ويا خالي بكرس حياتي له و لخالي و بقطع لسان كل من يرمس عني بسوء ..

مايد مرر أصابعه ع خدي : لا عاد تحطين مكياج

حاولت أتنفس وسط ها التوتر

تنحنح : بس محلوه .. لكن بدون مكياج أحلى ، عيبتج الدبله ما خذت رايج فيه

هزيت راسي بهيه

: سمعيني صوتج شوي .. وين اللي كانت ترمس وياي عاادي

ضحكت ،

مايد : الله يسعدنا و يحفظج ي رب

همست : و يحفظك

أنتهى