تسلمين

ونتريا اليديد



وسموحه

تسـلميـن الغلاآ ع القصة الروعة....

ونترقب البارت...وياليت اتطولينه

الـــــــــــــــــــــــجــــــــــــــــــــــــ ـــــزء الــــــــــحــــــــــــــــــــــــــــــادي عشـــــــــــــــر

حمدوه( تصارخ): حووووو عنووووووووووود
العنود:بسم الله .. الله ياخذكن فلختني
شمسوه: قومي يالله .. الساعه كم رقدي أمس؟
العنود: الساعه 11 ونص
شمسوه: عيل بسج قومي
العنود: الساعه كم؟
حمدوه: تسع
العنود: شو موعنكن من وقت غريبه
حمدوه: بس خلاص شو بعد الجامعه مجربه .. خلينا انظم رقادنا
العنود: شوووو.. لالالا ماشي خلنا نكمل وناسه هالأربع أيام
حمدوه: هيه دمرينا
شمسوه: قومي ببشرج بشاره انتي وحمدوه بعد
حمدوه+العنود: شووو
شمسوه: ياللغثه.. ما بقول أول قومي تسبحي وتعالي نحن بنسير الصاله
العنود: يالله كش كش برا..برا
حمدوه: عنلاتج يالقوطي .. جانج تروغينا
العنود: قومن بتسبح وبييكن
طلعن عني شمسوه وحمدوه دخلت اتسبح بس ما طولت .. عقب ما خلصت سرت لهن في الصاله .. ومالقيت حد غيرهن
العنود: تريقتن؟؟
حمدوه: هيه
شمسوه: تعالي بنسير حجرة الطعام أباج في سالفه
العنود: انتي قولي بشارتج قبل
شمسوه: لااااااا أول بسألج عن شي وعقب بخبركن
العنود: انزين يالله
طلعنا من الصاله صبيت لنا جاهي حليب وعقب سرنا حجرتي ..
حمدوه: حووووه شميس ذليتينا شو البشاره
شمسوه: أول أبغي أسأل عنودي عن شي من أمس وأنا أتحرقص من الفضول
العنود:شوووو
شمسوه: أبغي أعرف سالفتج ويا أحمدوه كلها
العنود: وويعة يدي انشالله يعلني بلاج انتي وهو.. حشى هذا طاريه على الصبح عيل راح اليوم كله
حمدوه: خيبه خيبه خيبه ..
شمسوه: هههههه .. ماشي لا مفر بتقولين بتقولين
.... خبرتها عن السالفه من البدايه كلها لين آخر ما صار أمس....
حمدوه: انزين انتي ما حبيتيه أبداً
العنود: حبتج سيه وعقرب حيه انتي وهوه
شمسوه:انزين هذي حمدوه ترمس ليش تدعين عليه
العنود: تدعدعن مصارينج انتي وياه
حمدوه: يا بوج سكتي بنستاثم فيه
العنود: تعرفن السخيف شو قالي أمس... يوم سرتي عنا شمسوه
شمسوه: شو قال..؟
العنود: يوم وقفت وياج انتي وعمج حارب.. أون شو.. هذا اللي طابتنا عسبه ومب طايعه تيلسين عندنا عشانه..
حمدوه: قولي والله!!
العنود: النذل .. وين بيسيير عني خله يسوي أي شي والله لخبر غيث وحمد بعد عليه
حموده: جب وعن الخبال طبيه عنج.. ولا تسويله سالفه
العنود: أفففففففف حشى أحس بضيج يعلني بلاج يا شميس ويا هالطاري..شو بيخوز الضيج عني الحين..
شمسوه: بقولج بشارتي وبيخوز الضيج كله
العنود: يالله قولي نحن من متى نترياج
شمسوه: الله يسلمكن سوف يصل أخي سالم سالماً غانماً إلى أرض الوطن يوم الأحد الموافق.. ما أعرف التاريخ..المهم وهذه الأخبار موثوقه من صاحبة السعاده شيخه بنت سيف .. شميس عبدالله,, قناة البشاره,, بيتنا.. آآآآآه
حمدوه: والله
العنود: فدييييييييييت شميس عبدالله وقناتها أنا.. قولي والله
شمسوه: أمس سرت أرقد في بيتنا وأمايه قالت لي قبل ما أرقد
العنود: آآآآآآآآآآآآآه والله اني متولهه عليه
حمدوه: فديييييييييييييت هالطاري
شمسوه: ايه انتي جب يالله .. صدق ما تستحين
العنود: خليها تتفداه.. هب انتي مالت عليج فديته علي مب محصل منج الا هالسان الطويل
شمسوه: هاه عيل تبيني أتفداه لا فديتج.. خليه جذيه أحسن.. وبعدين في فرق عليوي مجابلني طول اليوم بس سالم من أربع سنين في أمريكا وإذا بيي ما تيلس وياه
العنود: الحين بيوصل بيقول .. يالله أبغي أعرس
شمسوه: لالا شو يعرس بينط عليوي وياه ونحن بعدنا
حمدوه: انزين ما تبين تعرسين زولي
شمسوه: مسودة الويه .. صدق مستقطعه وما تستحين
كملنا سوالفنا لين الساعه 12:30 وعقب طلعنا في الصاله..الغدا في بيتنا اليوم
...........
عقب المغرب كالعاده كنا يالسات في بيت أم عبدالله ومنصور ومانع عندنا..
العنود: منصور سير هات لي بيبسي
شمسوه: وهات لي أنا بعد..
حمدوه: فديييييت روحك هاتلنا ثلاثه وتعال
منصور: حد بعد!!
حمدوه: لاء
منصور: نقعن في درام
العنود: سباااااااال..
منصور: بييب لج انتي بس والا محظوظه ومبروكه يحلمن
حمدوه: ماعليه مسود الويه
العنود: فديت خشمك حبيبي سير اليوم ماشربت
سار منصور ياب ثلاثه بيبسي من المطبخ ورد
مانع: والعثره منصور المدارس جربت ونحن ما اتصلنا حق رامي
حمدوه: منو رامي هذا بعد؟؟
منصور: واحد زلمه عندنا
شمسوه: ومن متى انتوا تتصلون حق ربعكم
منصور: لازم نتصله عشان ما يقول يتصلون وقت المدارس حق الحايه بعدين ما بيشرح لنا ويغششنا
العنود: ههههههه وأونكم الحين بتتصلون له هب حق حايه يالمصلحه
منصور: خليه يساعدنا.. أنا ما أعرف من وين عنده وقت يذاكر ويحل واجباته ويقرا جرايد
حمدوه: عنده وقت من يرد لين اليوم الثاني
مانع: ياكل الكتاب أكل .. مخه كمبيوتر ما أدري حتى المعلومات الخارجيه يجاوب عليها..
شمسوه: حشى فاتح موقع google في راسه
العنود: حرام عليكم صلوا على النبي بتاكلونه
منصور: ما عليج كم حسدناه ما صار له شي
حصوه: حرام عليكم..
راحوا عنا منصور ومانع أول ماسمعوا صوت حشرة ربعهم برا في نفس الوقت اللي كانوا علي وحارب يايين صوبنا ..
حمدوه: حارب حارب.. دسن البيبسي ..
أنا من سمعت حمدوه مشتطه توني كنت أشرب من البيبسي .. عشان ما يقول شي قطعت الشرب ونزلت الغرشه.. بس روووووووح خلاص أحس اني بموت بختنق شرقت شرررررقه
العنود: كح كح كح كح كح كح
حمدوه: حلال حلال
( دحتها شمسوه على ظهرها كم مره بس ما شي فايد)
العنود: كح كح كح كح
أم حمد: حلو .. حلال .. اعطنها ماء اعطنها ماء
شيخه: بسم الله شو ياها
حارب: ههههههههههههههههه شربي شربي ما بقولج شي
علي: هههههههههههههه ما يسوى عليكن حروووب جانكن زغتن هالزيغه
أم عبدالله: حسبي الله على عدوك يا حارب جانك فلخت البنت
حاولت أتحرك خلاااااص ويهي قااااااااااااافط استحيييت .. حاولت أكتم الكحه
حارب: ههههههه حلو حلو.. السلومه بنت سيف
علي: حشى ما يسوى عليج يوم ما متي
أم عبدالله: حسبي الله على عدوك يا حروب قم قم .. يوم ما جتلتها
آمنه: هو ما سوى شي هيه مستلغثه على الشرب ..
أم عبدالله: هو من يشوفهن يهزبهن عنه .. يسوى عليك جانهن بيشربن منه
آمنه: هن شو يبنه ماله.. مالهن حايه فيه..
قمت يكفيني الاحراج اللي ياني .. ومب ناقصه كلمه زياده
حمدوه: عنودي وين سايره
العنود: بسير البيت
شمسوه: شو عندج في البيت .. بتسدين العيال
اكتفيت بابتسامه باهته مني للبنات ولفيت عنهن .. مب هينه اني أتفشل جدامهم .. أبغي أسير بأسرع وقت ..
حمدوه: قومي نسير داخل الحين بتبدا الحلقه
العنود: لالا بسير أرمس يدوه ما رمستها أمس
وقفن ويايه شمسوه وحمدوه وحصوه مشن ويايه لين الباب ولا وحده منا تنطقت بكلمه .. دخلت حجرتي..وأنا مضايجه.. أحرجتني جدامهم كلهم.. أنا أبغي أعرف هيه ليش ما تحبني .. إذا عموه مب ماخذه موقف مني..انزين أنا شو ذنبي في هذا كله... من الله انها ما تشوفني الا وقت الغدا والعشى .. وطول الوقت ويا البنات .. آآآآآآآآه لو كنت عند يدوه أبرك لي.. على الأقل محد بيتضايج من وجودي..الله يسامحك يازمن .. سمعت أذان العشى يأذن دخلت توضيت وصليت العشى وعلى طول انسدحت برقد .. والله مالي خاطر أشوفها على العشى.. مرت فتره طويله وأنا أتجلب ..دخل رشود الحجره..
رشود: عنود تعالي تعشي
العنود: ما أبغي عشى
رشود: ليش
العنود: بس مالي خاطر
رشود: أحسن يعني بيتم لي أكل وايد انتي وخليفه محد
رض بالباب بقو وطلع .. غصبن عني ضحكت عليه
****
في بيت أم عبدالله كانت حمدوه يالسه ويا شمسوه في الصاله اللي فوق
شمسوه: والله قلبي عورني على عنودي
حمدوه: هيه فديتها .. حتى ما بغت تيلس
شمسوه: والله لو شفتيها وهيه اطالعني تبتسم لي بس والله عيونها يتغارقن
حمدوه: أنا انصدمت من عموه
شمسوه: لا انصدمت ولا شي كم مره هازبتنها جدامي..مره دخلت المطبخ أسمعها تتحرطم عليها
حمدوه: الله يهديها .. المشكله انها مب مأذتنها في شي ...
علي( يدخل): السلام عليكم
البنات: وعليكم السلام
علي: حمدوه
حمدوه: عونك
علي: عانج الله.. بتخبرج العنود مرتاحه بيت خالي حمد
حمدوه: هيه مرتاحه ليش تسأل
علي: أكيد والا قالت لكن شي وماتبن تخبرني
حمدوه: العنود في عمرها ما اشتكت لنا
علي: وينها عنكن اليوم ..وانتن ليش ما سرتن لها
حمدوه: أمس نحن كنا عندها .. والعاده يوم هيه تينا واليوم الثاني نحن نسيرلها
علي: لا أمس كنتن في دبي
حمدوه: يعني يوم الأربعا
علي: أحس انها روحت مضايجه
شمسوه: لا تحس.. هيه روحت مضايجه
علي: وانتي شدراج
شمسوه:أعرفها العنيدي بتزعل وما بتبين اللي في خاطرها
علي: قومن نسير لها
حمدوه: نحن بنسير لها...انت وين تبا
علي: جب يالله قومن جان بتسيرن ما تبن بسير بروحي
حمدوه: سير بروحك نحن ما بنسير
علي: عيل جلبن ويوهكن
شمسوه: لالا تعال بنسير
******
بتوصل الساعه 11 وأنا ما رقدت من ساعه ونص وأنا منسدحه..يااالله مع اني واعيه الساعه تسع اليوم ...
علي: مررررررررررررررحبننننننننننننننننن
العنود: أعووووووذ بالله شو هذا
حمدوه: وين اللي يبغي يستانس في هالأربع أيام
شمسوه: حبيبي شربتي حليبج قبل ما ترقدين
علي: حشى يالديايه قومي
العنود: منو مسلطنكم عليه اليوم
علي: شو مرقدنج من وقت؟
العنود: صليت وقلت برقد..فيني رقاد
علي: تعشيتي
العنود:لاء
علي:ولا أنا
حمدوه: خيييييييبه جانك ييت من تحت الصينيه وتقول ما تعشيت لو ما تعشيت صدق ما أدري شو بتقول...
علي: قومن قومن .. خلنا نسير نتعشى
حمدوه: انزين شو رايك تسير تييب لنا عشى
علي: وبطن انشالله..بييب حق عنودي بس
... دخل حمد الحجره
حمد: ماشالله عليكم شو تسوون
حمدوه: سلامة نظرك خالي
حمد: العنيدي ليش ما ييتي تعشين
العنود: مالي خاطر قلت برقد.. بس يعني يوم يتطفلون عليك ناس ..
علي: مالت عليج .. هب منج منا نحن اللي يينا عندج ومسوين لج سالفه
حمد: قومي تعشي الحين
العنود: ما أشتهي
شمسوه: لا لا علي قال بييب لنا عشى
علي: أناااا!! جذب ما قلت ولا شي أنا قلت بييب حق عنودي
حمد: متى بيوصل بو غنيم؟؟
علي: بيوصل باجر فليل يعني يوم الأحد بيكون في البلاد
حمد: الله يرده بالسلامه.. ومن يرد بيكون شغله ويايه في الشركه
علي: هو من متى يترياها
العنود: شو متخصص هو؟
علي: الحمدالله والشكر .. لين الحين ما تعرفين؟
العنود: لاء
حمدوه: متخصص الله يسلمج هندسة كمبيوتر
العنود: عيل أنا بتخصص شراته
حمد: عزالله راحت كمبيوترات الجامعه
العنود: طالع هذا.... انت ما تعرف اني بخترع نظام يديد غير الوندوز
حمد: والله .. وشو بتسمينه؟
العنود: بسميه العنود طبعاً
حمد: مالت عليج أنا قلت بتسمينه عليه
العنود: ما بيشتغل عيل
حمد: أنا أبغي أعرف انتي شبه زامطه عليه
العنود: ههههه لا فديتك والله ما تهون عليه
.... طلع عنا حمد سار يرقد ونحن طلعنا في الصاله وعلي سار الكفتريا ياب لنا سندويجات وكوكتيل ويلسنا في الصاله مرتبشين ونشوف التلفزيون لين الساعه ثلاث
علي: اييييييه الله يغربلكن أنا ورايه دوام باجر شو بيقومني
حمدوه: وانت منو ظربك على ايدك وقالك ايلس ويانا
علي: قومن قومن .. والله اني مينون يالس وياكن
خليفه: سير انت سير أنا بييبهن عقب
علي: شو عقب بعد.. الحين الساعه ثلاث
العنود: علي دخيلك بنوصلهن لين البيت أنا وخليفه
علي: خل عاد انتي يالديايه .. يوم انتي بتوصلينهن
حمدوه: علي دخيلك خلنا
علي: زولن
طلع عنا علي وكملنا السهره و لين عقب صلاة الفجر ما رقدنا .. طلع خليفه ويا البنات وصلهن وسار يصلي وأنا دخلت أصلي وأرقد...
..............
يوم السبت المغرب ما سرت بيت أم عبدالله .. قضيت وقتي على النت عقب ما حط لي حمد خط خاص في حجرتي .. طول الوقت على المسن ويا نوروه وشموه.. اتصلت لي حمدوه
العنود: ألوووو
حمدوه: السلام عليج
العنود: وعليج السلام
حمدوه: شحالج
العنود: الحمدالله شحالج انتي
حمدوه: أنا الحمدالله.. عرفتيني
العنود: خييييييبه يالنقمه
حمدوه: مسودة الويه وين عنبوه ما ييتي صوبنا اليوم
العنود: في البيت
حمدوه: قومي يالله أشوف تعالي
العنود: أوكي الحين بيي
حمدوه: بسكر السماعه وبشوفج
العنود: حشى كاسبر
حمدوه: يالله بنجرد حجرة سلوم الله يعينا
العنود: له له له ما أروم أنا مافيج حيله
حمدوه: جب جب يالله أترياج
سكرت عن حمدوه وسرت لهن بيت شيخه على طول كانن تحت في الصاله يطالعن التلفزيون
العنود: العنود بنت سيف و يعل الكل يفدها وصلت
حمدوه: ظويتي يالحمااره
العنود: حمار ريلج
حصوه: وينج اليوم؟
العنود: في البيت
شميس: عنبوه ولا اتخبر ولا تسأل شو ياج زعلانه علينا
العنود: لا زعلانه ولا شي لو زعلانه ما شفتني اليوم
حمدوه: يالله قومن بنسير نبدا في الترتيب
شمسوه: أنا ما أروم خلي مرساني تنظفها انتي ليش متعبله
حموه: عنلاتج جانج حجرة أخوج متعايزه عنها
حصوه: قومن خلنا نتسلى والله ملل
ركبنا فوق في حجرة سالم وبدينا جرد كامل للحجره ما خلينا شي على حاله.. وحمدوه متعبله في كل شي..الساعه تسع خلصنا الترتيب وسرنا بيت أم عبدالله ..
شمسوه: أنا اليوم ما برقد لين يوصل سالم
حصوه: أنا بوطي راسي ما فيني أسهر بيوصل الفير شو كاظني أعذب عمري
حمدوه: عنودي تمي ويانا.. عمي حارب بيسير المطار
العنود: أممممممم أوكي
شمسوه: يوعانه
العنود: أنا بسير البيت وبرد عليكن ويا خلوف
حمدوه: أوكييي.. بااااااي
العنود: مع السلامه
.........
رديت البيت صليت ويلسنا في الصاله عقب العشى نلعب ورقه أنا وحمد وخليفه وعويش .. الساعه 11 دخلن حمدوه وشمسوه ..
حمدوه: أنا يييييت
خليفه: الله يعييييين
حمد: انتن ما تخافن تحوطن في هالليل
حمدوه: شو يخوفنا من بعد المدى الا في نفس البيت
حمد: حشى ما جذبت يوم سميتكن سحار
حمدوه: أنا بلعب وياكم
شمسوه: قوموا بنسير بيتنا بنلعب هناك
حمد: لا ماشي يلسوا هنيه لا تتحركون
شمسوه: لالا بنسير بيتنا بنتريا سالم
حمد: سالم ما بيطير
شمسوه: بنسير هناك عشان يوم يرد يحصل حد يترياه
حمد: والحين انتن بتترينه
شمسوه: هيه نحن
حمد: عزا الله بيرد أمريكا.. بيقول اليلسه هناك أبرك
شمسوه: الا قول .. بيتمنى انه ماسار وفارقنا كل هالسنين
خليفه: منو
شمسوه: سالم
خليفه( باستهبال): هييه..
حمدوه: يالله قوموا قوموا .. بيبدا الفلم..
حمد: أنا بسير أرقد عنكم .. لا اتمن خفاي رفاي
خليفه: سويحرة الليل منو يردها
حمدوه: منو سويحرة الليل
خليفه: وحده غزاااال
العنود: هذي أنا
شمسوه: لا أنا سويحرة الليل
حمدوه: أنا قمر الليل
حمد: فدييييييييييييت القمر محلاه
شمسوه: منو القمر
حمد: ريماني يعلكم تفدونها
خليفه: حمد شل بنتك وسير رقد فكنا من الصدعه
يلس حمد يتلفت أونه يدور .. منو هذا اللي خليفه يرمسه
حمد: منو ترمس انته ؟؟
خليفه: راعي الدكان
حمد: لا والله
سار حمد صوب خليفه وتم يتظارب وياه .. ونحن طلعنا من الصاله لا تيينا رصاصه من الطلقات اللي صايره في هالمعركه.. طلع حمد من الصاله ويا خليفه .. حمد سار يرقد وخليفه وقف ويانا
حمدوه :يالله خلوف
خليفه: شووو؟؟
حمدوه: بنسييير... الفلم بدا
خليفه: لا أنا فيني رقاد ما أروم أسير
شمسوه: انزين برايك بس تعال وصلنا
خليفه: ييتن روحكن ردن اروحكن .. ما بييكن شي
شمسوه: لا نخاف
خليفه: لا تخافن... أصلاً الينون يخافن منكن
العنود: تعال وصلنا يالله .. حمد بيحتشر ان درى انا سرنا بروحنا
خليفه: لااا حوووووووووول هذا حمد أخوج صدعه
حمد( يتكلم من فوق): سمعتك
خليفه: والعثره عثرة العدو
حمد: عثرة حرمتك يالهرم
خليفه: السموحه منك بو خليفه
العنود: عويش ما بتسيرين ويانا
عويش: امممم لالا ما أروم بعدل رقادي خلاص
العنود: على راحتج
وصلنا خليفه بيت أم عبدالله دخلنا الصاله نتابع الفلم .. الساعه وحده دخل حارب وعلي الصاله..
علي: أهااااااااااب حتى الحين ميتمعات
حارب: قواطي شو ميلسنكن .. خلاص ماشي باقي عن الجامعه
حمدوه: عااااادي من يومنا ونحن نسهر
حارب: وانتي العنود منو يابج
العنود: خليفه
علي: هب اتمن تيولن عنودي ماشي سيره ولا طلعه من الباب
العنود: من عيوني
شمسوه: متى بتوصل الطياره؟؟
علي: الساعه ثلاث
العنود: يالله عيل .. لين توصلون يبالكم ساعتين ان تأخرتوا بتسرعون
علي: انتن ما بترقدن؟
العنود: لالا بنتريا بوغنيم
علي: أنا بسير أبدل ثيابي .. يالله الحربي هبابنا
شمسوه: حارب اتصل حق اسماعيلوه خله اييب لنا شي يوعانه ما تعشيت
حارب: مشكلتج
حمدوه: هيه حتى أنا والعنود يوعانات
شمسوه: هيه توها العنيدي تصيح من اليوع .. ويوم كانت بتشرب بيبسي خافتك تدخل وتاكلنا مثل كل مره
حارب: هههههههههه قلنالج شربي خلاص يابوج ما بنقولج شي ... سدتنا هزبة العيوز
العنود: تجذب عليك انا مب يوعانه ولا قلت أبغي بيبسي هن رواحهن يوعانات
شمسوه: شو مب يوعانه.. تجذبين!!
حارب: طلبن اللي تبنه وخلنه اييبه يوم بيوصل أنا بسير له
حمدوه: يعيش عمي حارب
شمسوه: يعيش يعيش يعيش
العنود: بطن سليح .. انشالله
حمدوه: ما بتذوقين شي عيل
حارب: لا تطلبين شي عيل
العنود: ههههه أحسن
حمدوه: شو... السالفه مذله
حارب: هيه مذله كيفي
ركب حارب فوق وأنا ربعت صوب التيلفون بتصل حق الكفتريا
حمدوه: شووو ألقاج ربعتي تتصلين توج ما تبين
العنود: لا والله يوعااانه
شمسوه: لالا ماشي توج مب يوعانه
العنود: جب مب على كيفكن.. قولن شو تبن كل وحده تشتري بدرهمين بسس
حمدوه وشمسوه تمن يطالعن بعض بنظرات مستغربات منها
حمدوه: هاتي لي دبة ماي
شمسوه: أنا ما أعرف شو أشتري..بصراحه حيرتيني
العنود: أنا بخبرج ... أمممم طلبي سندويجة فلافل وبيبسي
حمدوه: لا ليش بيبسي عندنا في الثلاجه .. هاتي فلافل بس
العنود: أوكي
رفعت السماعه واتصلت للكفتريا وحمدوه حطت ايدها على التيلفون
حمدوه: مسودة الويه جانا ذلينا عمارنا وانتي اللي تطلبين
العنود: بسرعه حمدوه عمج بينزل وبعدين بنتحرم الأكل.. ان مت يوع بتكون روحي في ذمج
شمسوه: بسرعه انتن اتصلن
العنود: بييب لكن سندويج همبرقر وطبقات
حمدوه: طلبي فلافل بعد
اتصلت حق عبدالسلام
عبدالسلام: مرهبااااااااااااا
العنود: ألو السلام عليكم... عبدالسلام هات ثلاثه فلافل وثلاثه همبرقر دياي
عبدالسلام: شو هدا .. انتي ليش ما في سوي سلام
العنود: سويت سلام
عبدالسلام: مافي قول كيف حالك
العنود: لا والله ما تبناي أسولف وياك بعد... بسرعه هاته بيت عبدالله
عبدالسلام: شو يريد بعد
العنود: هات ثلاثه كوكتيل طبقات
عبدالسلاه: انتي شو سوي بيت باباه عبدالله؟ .. انتي بيت باباه حمد
العنود: مسود الويه .. وانت شلك؟؟
...سكرت في ويهه
عنود: صدق انه سبال
شمسوه: حليله جان سولفتي وياه
العنود: انتي اللي عاطتنه ويه والا هو ما بيدق سالفه.. أوين ليش ما في سوي سلام
حمدوه: ههههههه انزين سلمي عليه
العنود: جب يالله .. ماعندكن سالفه ترمسن هنود .. اتصلن واطلبن شو بعد!!
سرت عنهن دخلت المطبخ يبت لي بيبسي ورديت الصاله .. دام انه الاستاذ حارب صرحلنا خلاص بشرب بدون ما أحط في بالي انه بيقول شي
حمدوه: العنود تعالي طالعي منو على المسن عندج
العنود: ما أروم راسي يعورني
حارب( يدخل): حوووو بسج من البيبسي بتموتين
حمدوه: طالعوا منو يرمس
حارب: حيني أنا ما أشرب مثلها .. هذي خبله
شفته يمشي صوبي وخذ الغرشه من ايدي وسار صوب الباب فرها في الزباله وفتح باب الصاله
حارب: لا تشربين وايد بيضرج.. هذا الا سمم
ياااااااااااااربي من جرأته .. يلست على الكرسي منصدمه منه وما رمست قفططططططططت .. أنا الهبلا ... صدق ما أنعطى ويه والا يقولي شربي وأشرب جدامه.. وبعدين هو شو يخصه يضر والا ما يضر
حمدوه: عنودييييييييييييي
شمسوه: العنوووووووووووود
حمدوه( تفرها بالمخده): حووووووووووه
العنود: سمممم
شمسوه: وين وصلتي؟
العنود: أأأأأأأأأأخ ويهي يعورني..أنا بسألكن عمكن ليش جذيه يقفط .. أحس اني بموت
حمدوه: ما بتموتين الا في يومج
حارب( يدخل): هاه يودن ..
شمسوه: مشكور حارب .. تسلم يعلني أشوفك معرس
حارب: آآآآآآآآآآآآميييييييييييين
حمدوه: ياللغثه
حارب: جب انتي
طلعوا حارب وعلي سايرين دبي .. ونحن كملنا يلستنا على النت والتلفزيون والرمسه ...
******

الجــــــــــــــــــــزء الــــــــــــــــــــــــثـــــــــاني عــــــــــــــــــــــــــشــــــــــــــــــــر

في المطار الساعه ثلاث وصلت طيارة سالم .. خلصوا الاجراءات وخذوا الشنط لين الساعه ثلاث ونص .. وطلعوا من المطار..
في السياره .. كانوا حارب وعلي مرتبشين بردت سالم قطع عليهم السوالف تيلفون علي..
علي: ألوووو
العنود: ألو السلام عليكم..
علي: مرحبا العنيدي
العنود: وين انتوا؟
علي: رادين في الدرب
العنود: شخباره سلوم الدب
علي: بخير .. مبيض تقول شامي
العنود:ههههه ما عليك بيرد يسمر..قولي متى بتوصلون
علي: الساعه خمس انشالله بنكون عندكم
العنود: شوووووووووو..حوعليوي عن الخبال لا تسرع
علي: مب أنا اللي أسوق هذا حروووب
العنود: قوله لا يسرع ما بيطير البيت .. تسرعون في هالليل
علي: حروووب تقولك العنود لا تسرع
العنود: برايكم بغيت أتطمن عليكم ..
علي: يالله عيل جلبي فيسج
العنود: باااااااااي
.........
سالم: منو ترمس؟
علي: العنود
سالم: العنود..خالتي!!
علي: هيه .. سهرانه ويا شمسوه وحمدوه يترينك
سالم: غريبه..! ما أحيدها تبات عندنا وتخلي أمها
سالم ما كان يدري ان أم العنود توفت.. والحين حارب وعلي يبون يخبرونه..بس أكيد انه بعصب أم العنود بتكمل شهرين من توفت وسالم ما يدري
حارب: سالم..
علي: سالم العنود الحين بيت خالي حمد
سالم: ليش؟؟!
علي: عمتي عفرا توفت
انصدم سالم بهالخبر..انربط لسانه وما قدر يتكلم .. يترياهم يكملون يقولون أي شي بس ولا واحد قال شي
سالم: من متى .. وشو السبب
حارب: من شهرين تقريباً...
سالم: من شهرين وانا ما أدري.. شو طرطور أنا عندكم
علي: سالم استهدى بربك يعني لو دريت .. شو بتسوي
حارب: يوم توفت كان فترة امتحانات.. ما بغوا يخبرونك وتضيج
سالم: لا حول ولا قوة إلابالله .. والعنود
علي: العنود يالسه بيت عمي حمد
ما رد سالم يتكلم ولا يسأل اكتفى بالسكوت..ومن عقبها علي وحارب سكتوا ولا واحد تكلم لين وصلوا البيت .. وقبل ما ينزلون
علي: سالم..خلك عادي جدام عنودي نحن ما صدقنها تنسى ضيجها
سالم( يتنهد): انزييين
******
الساعه خمس ونص كنت يالسه أرمس شموه على المسن .. وحمدوه وشمسوه مدوخات يبغن يرقدن
العنود: هههههههههههههههه
شمسوه: شو يضحكج .. ايه الهبلا
العنود: أضحك على شموه
حمدوه: فيني رقااااااااااد
شمسوه: سيري رقدي
العنود: قومن نلعب برا
شمسوه: شو بتلعبين ؟؟ متفيجه
العنود: قومن انتن خلنا نطلع خلاص الشمس طلعت وعموه واعيه.. محد بيقولنا شي.. وبعدين الحين بيوصلون انشالله .
حمدوه: كملي رمستج ويا شميم ... مافيني طاقه أتحرك خلاص
العنود: هذا من كثر الزط.. يالدحنه
انفتح باب الصاله شفت سالم يوايق من الباب
العنود: مرحبا ملاااايين يعلني فدى أرض توطاها
علي: خيييييييييبه يسوى عليج سويلم
فريت اللاب توب على شميس وربعت صوبه .. سلمت عليه
سالم: شحالج عنودي
العنود: بنشكر الله
سالم: شي اللي بايتين عندنا اليوم
العنود: هذا كله عشانك
قامن شمسوه وحمدوه سلمن على سالم .. وشفت شميس مجفيه بتركب فوق
العنود: وين سايره..حووو الياعده
شمسوه: ياعده محد غيرج بسير أرقد خلاااص ما أروم
العنود: والله ما تسيرين .. تعالي
علي: انتي مركبه انرجايزر اليوم
سالم: هب هباك الله .. بتاكلها
علي: ما عليك قطوه بسبع أرواح
.. دخلت أم عبدالله الصاله يوم شافها سالم سار صوبها .. لوا عليها وحبها على راسها ..
سالم: شحالج يدوه
أم عبدالله: فدييييييت هالهايه ياربي .. علني ما خلا منك.. حمدالله على سلامتك
سالم: الله يسلمج
أم عبدالله: بتسير أمريكا مره ثانيه والا خلاص
سالم: لاااااا خلاص ما بطلع من البلاد متوله عليها
علي: هيييييه شهرين وبسمعك تبغي تسافر
أم عبدالله: شميس وحمدوه قومن حطن ريوق..فديتهم يايين تعبانين
حمدوه: شو هالريوق الساعه ست
حارب: ريوق.. ما تعرفين شو ريوق
شمسوه: بعده ناصر منطب ما نش.. وزينب بعد راقده محد سوا ريوق
العنود: وانتن شو شغلتكن قومن سون ريوق
حمدوه: وانتي الشيخه عنود
العنود: لالا أنا ضيفه .. عيب عليكن تخلني أدخل المطبخ
يت شمسوه صوبي وقبظتني من ايدي
شمسوه: لا ضيفه ولا شي .. بتقومين ويانا
طلعنا من الصاله في نفس الوقت اللي دخلوا فيه شيخه وعبدالله وسلامه وراشد...
سرنا المطبخ اللي برا وقفنا فيه
حمدوه: منو طرشكن تكشفن المطبخ .. يالله بسرعه خلنا نخلص والابنحصل هزبه
شمسوه: ناصر يخبز .. شو تبينا نسوي نحن
حمدوه: عيني عيينة جباب بسرعه
العنود:أنا ما أعرف أطبخ شي حق الريوق
حمدوه: انتي سألي ناصر إذا سوى القهوه والجاهي حليب إذا ما سواهن .. انتي سويهن ووديهن الصاله..
طلعت أسأل ناصر قالي ما سوى شي .. دخلت المطبخ .. سويت القهوه والجاهي حليب وحطيت الدلال في الصينيه ووديتهن الصاله .. ورديت المطبخ .. خلصنا الريوق وحطيناه على الساعه ثمان ونص.. وعقب رديت البيت برقد..
.................
قمت من الرقاد الساعه خمس العصر.. مضايجه رقاد العصر مرض الواحد ينش ماله بارض على شي .. طلعت من حجرتي وسرت المطبخ بسوي لي شي آكله .. لقيت لامي مخليتلي غدا بس ما كان لي خاطر عليه .. يلست في البيت ما طلعت لين عقب أذان المغرب .. رحت بيت أم عبدالله .. لقيت شمسوه يالسه في صالة بيتهم
العنود: السلام عليكم
شمسوه: هلا وعليكم السلام
العنود: بلاج مضيجه
شمسوه: ماشي بس توني ناشه من الرقاد
العنود: خستي رقاد عيل ..
شمسوه: راسي يعورني
العنود: حمدوه وين؟
شمسوه: بيتهم أظني بعدها ما نشت
شميس مالها بارض .. طبيتها ويلست ألعب بليستيشن .. وهيه تتحرطم عليه ..
سالم( يدخل): شو تسون؟
العنود: نبيع سمج
سالم: بكم المن
شمسوه: عنودي قومي خلينا نطلع ضجت من داخل
سالم: وين بتسيرن؟
شمسوه: بنسير نشوف حمدوه وبنيلس عند الحرمات ورا
طلعت ويا شمسوه سرنا صوب حمدوه ..ويلسنا عند الحرمات برا
حصوه: بشاره عندنا عزيمه يوم الجمعه
شمسوه: لااااااا
حمدوه: ما فينا والله
العنود: انزين انتن شو عليكن
شمسوه: يا حبيبتي إذا في عزيمه معناته نشه من الصبح ونيلس في المطبخ
حصوه: ويقولكم حريم ورياييال بعد
حمدوه: أمايه يعني سالم راد من برا ليش الحريم بعد
سلامه: لازم عيل شقايل
حمدوه: والله ما فينا على الصدعه
شيخه: ما بنعزم حريم وايد الا أهلنا
شمسوه: من قلهن بينكتن وبيمزرن البيت .. ودولهم الغدا بيوتهم
أم عبدالله : وااااابويه عليكن أنا جيه شعندكن
شمسوه: والله ما فينا على العزايم
أم حمد: صه قطعن ما نفعتن طول هالرخصه .. الا رقاد وهوامه
شمسوه( تتحرطم): أمحق هوامه ما طلعنا من البيت طول هالصييف
العنود: بعدج تبين هزبه ثانيه جنج
حمدوه: انزين أمايه ما يبنا العبي .. أنا أبغي أسير كارفور
سلامه: يوم بنسير يوم الخميس بييبلكن اياهن
حمدوه: أنا أبغي أسير كارفور .. أبغي آخذلي جوتي
سلامه: ماخذه جواتي شو بعد
حمدوه: أبغي جوتي أسود.. أنا ماخذه بني
سلامه: تياوزي باللي عندج
سكتت حمدوه وشكلها مفوووله ..
العنود: حشى انتي وشمسوه امره ما اتحاجن اليوم
حصوه: مرقدات لين الغرب.. أكيد بينشن مضيجات
حمدوه: أفففففففف
قامت عنا حمدوه ودخلت داخل ولحقناها أنا وشمسوه وحصوه
شمسوه: ولا يهمج حمدوه أنا بدبر لج سيره
حمدوه: شوو بتخلين ريلج يودينا
شمسوه: لا ريلي هب مكلف عنج ...بخلي ريلج يوديج
حمدوه: وويعة يدي انشالله .. خليه يضوي قبل عشان يوديني
شمسوه: رد اليوم من امريكا والا ما دريتي
حمدوه: شميس لا تيلسين تتمصخرين ..مالي بارض عليج
شفت سالم نازل من فوق.. يمكن كان عند حارب ... كان بيطلع من الباب اللي ورا
العنود: سالم سالم
سالم: هااه
العنود: تعال برمسك
يلس سالم عدالي .. وبيسمعني .. شكله مهتم باللي بقوله
العنود: أأ.. أ.أقولك شي
سالم: شوو
العنود: طالبتنك
سالم: تم امره بنت سيف...آمري
العنود: امممم نبغيك تودينا
سالم: وين؟
شميس: حمدوه تبغي تشتري جوتي حق الجامعه .. نبغي نسير كارفور
سالم: ولااااااااا يهمها بنت العم الحين جان تبغي بوديها
شمسوه: هيييييييييه لو أنا بتقولي عادي سيري حافيه
سالم: محشومه بنت عبدالله ما تهونين
العنود: هاه متى بتودينا
سالم: تبن الحين يالله
استغربنا .. شو الحين يعرف ان كارفور الحين كله شباب عليوي قلناله الصبح رضا عقب موت.. وهذا يقول الحين
العنود+ شمسوه: الحييييييييين!
سالم: هيه الحين ... شو يعني
العنود: شو الحين كارفور زحمه كله شباب
سالم: عيل متى تبن تسيرن؟
حصوه: باجر الظهر
سالم: باجر الظهر بوديكن.. شي تبن عليه بعد
العنود: هيه.. وين هديتي والا ياي ايد ورا وايد جدام
سالم: سيرن حجرتي الشنطه البنيه خذن اللي تبنه منها أنا عني ما أعرف شو فيها
شمسوه: عيل منو اللي شارنه؟
سالم: واحد من الربع بيخلص السمستر الياي وأهله يايين عنده زياره عطيته فلوس وخواته سارن يتشرن
العنود: وشدراهن بقياساتنا وأذواقنا
سالم: يعني أنا اللي أعرف .. سيرن شوفن اللي ايوزلكن
ترابعنا كلنا حجرة سالم .. واللي تسبق تاخذ اللي يعيبها .. سبقتنا شمسوه دخلت الحجره وشلت شنطه بنيه صغيره .. بس أنا وحمدوه ربعنا صوب الشنطه الكبيره وفتحناها .. الشنطه اللي عند شميس ما كان فيها شي غير العطور
شمسوه: لالا ما ايوز أنا اللي غلبت
حمدوه: بس نحن اللي فتحنا الشنطه
شمسوه: لااااا ما يخصني
طلعنا كل اللي في الشنطه .. لقينا فيها شنط وبديات .. بصراحه حلوات.. أول مره أعرف ان في محلات بضاعتها حلوه جذيه في أمريكا
العنود: غريبه الأمريكيات اللي يطلعن في الأفلام لوووووووووث
حصوه:حوووه عن الخبال خلن شي حق عويش ولطوف وساروه
شمسوه( بنقمه):شوووووووووو
حمدوه: ماشي ماشي.. وحده ما خلت مكان ما حاطته تشتري من كل شي .. والثانيه مسافره تايلند مازرتلها شنط
حصوه: كيفكن انتن بتنهزبن
حمدوه: نحن بنختار اللي نبغيه وبنفر لهن اللوث
شمسوه: ماشي لوث بصراحه كله حلو...خساره فيهن
العنود: أنا باخذ هالشنطه وهالبدي..بس يسدني
شمسوه: لاااا شو أنا أبغي هالبدي
العنود: يوم بتشوفين ذنيج من ورا
أنا وحصوه خذنا اللي عيبنا وشمسوه وحمدوه بعدهن غايصات في الشنطه ويطالعن ويقايسن .. أذن العشى وأنا رحت عنهن
......................................
يوم الجمعه الصبح قمت من الرقاد الساعه ثمان ورحت بيت أم عبدالله .. اليوم عزيمة سالم وبسير أساعد البنات ... دخلت المطبخ اللي برا لقيت الحرمات كلهن (عموه أم حمد وأم عبدالله ..آمنه و سلامه وشيخه وموزه والبشاكير).. غريبه مع انهم بيطبخون في المطعم ليش كلهن من الحين موجودات...
العنود: السلام عليكم
الجميع : وعليكم السلام
شيخه: العنيدي غناتي البنات في المطبخ اللي داخل
العنود: ما تبغني أفازعكن في شي
شيخه: لا فديتج .. أصلاً ما عندنا شغل وايد
طلعت عنهن.. ورحت المطبخ التحظيري في بيت أم عبدالله ..
العنود: السلام عليكم
البنات: وعليكم السلام
حمدوه: يالمينونه شو موعنج.. ما عطيتج والله لأرقد لين الظهر
العنود: قلت بيي أساعدكن
شمسوه: وانتي شو تبينها.. خليها تساعدنا عيل ترقد ونحن نشتغل
العنود: مسودة الويه بس عشان ما تبيني أرقد وانتي تشتغلين
شمسوه: هيه بس..جان يبتي آنسه شحروره وياج
العنود: ما قدرت أوعيها أخافها راقده متأخره
حمدوه: انزين نحن من متى على يلستنا هذي ولا سوينا شي...
العنود: انزين شو بتسون هنيه انتن؟
شمسوه: نحن بنقطع السلطه وبنسوي التبوله ..
حمدوه: والعصير وبنترتب صياني القهوه والجاهي والماي والعصير والبيبسي
حصوه: هذي شغلتنا في كل عزيمه
العنود: بسيطه .. وانتن تتحرطمن اتحريتكن بتوازرن الظو وبتشون اللحم .. ما بتخلن لا محمر ولا مشمر
حمدوه: تتطنزين.. بشوفج على الساعه 12
العنود: أنا وحصوه بنسوي العصير وانتن قطعن السلطه..عقب ما نخلص بنسوي التبوله..
بدن حمدوه وشمسوه يقطعن حق السلطه وأنا أسوي عصير الليمون وحصوه تعصر البرتقال .. الساعه عشر خلصنا العصير وويلسنا نساعد شمسوه وحمدوه في التقطيع .. الساعه 11 خلصنا ..
العنود: أنا بسير أتسبح وأصلي وبرد
حصوه: سمعن بنسير كلنا نتسبح الحين وبنرد نكمل الشغل
شمسوه: بعدهن الصياني ما رتبناهن
حصوه: باقي ساعه عن لا يسيرون الريايل المسيد حاولن تخلصن وتردن بنرتب كل شي وبنخلص انشالله .. بسير أزقر زينب تغسل كل الصياني الحين
طلعنا كلنا من المطبخ.. رديت البيت تسبحت ولبست لي كندوره محترمه .. أكيد اني بجابل أي حرمه حتى لو مابدخل الصاله .. حطيت جحال في عيوني.. وهذي أول مره أتجحل من عقب وفاة أمايه.. الساعه 1 رديت بيت أم عبدالله ..دخلت المطبخ لقيت حمدوه وشمسوه وحصوه ..وهالمره وياهن لطيفه وساره بنات موزه وميثا بنت خالتهم ..
حمدوه: أوه أوه أوه شي العيون
شمسوه: فدييييييت سود العيون
العنود: جيه أول مره تشوفني متجحله
حصوه : هب أول مره بس من زمان ما شفنا الجحال في عينج
شمسوه: حمدوه .. الله يعينهم
العنود+ حصوه: منو هم ؟
حمدوه: هاااه .. لا ماشي أقول الله يعين الحريم الحين اللي ادور حرمه حق ولدها بتحط العين عليج
لطيفه: عنودي..تعالي علميني شقايل تسوين عصيرج
العنود: بعدين بعلمج مب الحين.. تعالي بنرتب الصياني وياج وبنوديهن الصاله.. بين الحريم عقب شوي
يلسنا نرتب الصياني.. أنا ولطيفه نرتب صياني الماي وحمدوه وشمسوه وحصوه يسون القهوه والجاهي .. وميثا وساره يرتبن صياني البيبسي وباقي أنواع البارد ..دخل سالم المطبخ.. عقب ما رد من الصلاه
سالم: هاه بنات شو الأخبار عندكن؟
شمسوه: انتوا سافروا وتخرجوا ونحن اللي نبتلي
سالم:عنودي صقعيها على راسها بالكرتون اللي فيديج
العنود: لاااا ما تهون عليه
سالم: ماعليه مسودت الويه... يالله بسرعه خلصن وخلن البشاكير اييبن الصياني ميالس الرياييل
حمدوه: انشالله... خلاص انت سير الميلس يوم بنطرش الصيايني بنتصل لك تيلفون
سالم: لا خليت من اللي ينفعون
كلنا عرفنا انه يقصد حمدوه بهالرمسه ..طلع من المطبخ وسمعت حمدوه تتحرطم
العنود( بهمس): بلاج تتحرطمين
حمدوه: شو يدور يدخل المطبخ يشوفه كله بنات
العنود: عادي محد غريب هنيه
حمدوه: لا والله .. وميثوه وساروه
العنود: عن الاستهبال حمدوه .. تعرفنه سالم يباج انتي
شمسوه: حمدوه اتصلي حق اخوج وقوليله لا ايي هنيه فاهمه
العنود: هههههههههههههههه مالت عليكن
بصراحه نقعني من الضحك صدق مخبل .. شميس أول مره أسمعها تقول جذيه .. رن تيلفوني كانت نوروه متصله ....
شيخه( تدخل): شلن شي من الصياني ودنهن الصاله
شمسوه: ليش حد يا من الحرمات
شيخه: لا محد بس الحين بيين
وطيت تيلفوني في الصينية والسماعه بعدها في اذني..
العنود: لطيفه تعالي أنا وانتي بنوديهن
ميثوه: أنا بشل وياكن
شليت الصينيه قبلهن ومشيت
العنود: يالله نويره جلبي ويهج
سكرت عن نوروه وفريت السماعه قبل ما أوصل باب المطبخ ... توني بطلع في نفس الوقت اللي دخل فيه حارب مطير.. وطوووووووووووووووب....


الــــــــــــــــــجـــــــــــزء الـــــــــــــثـــــــــــــــــــالـــــــــــــ ــــــث عــــــــــشـــــــــر

دعمت فيه وطاحت الصينيه من ايدي وتكسرن الأكواب.. أنا طحت وأجبت بايدي وحده منهن على الأرض وبالايد الثانيه قبظني حارب
حارب: سلمتي.. شي ياج؟
نزلت راسي.. مستحيه دعمت فيه .. وقبظني من ايدي.. فوق كل هذا خاست كندورته
حمدوه: عندوي شي ياج
العنود: لا لا .. اسمحلي حارب ما شفتك
حارب: انتي سمحليلي أنا داخل بسرعه
حصوه: عنودي ايدج تصب دم
ذاك الوقت حسيت بايدي رفعتها أشوفها.. كانت كللللللها دم ينزف بشكل فضيع..لأني حطيت ايدي على الأكواب اللي تكسرت يوم طحت
شمسوه: تعالي غسليها
سرت صوب المغسل أغسل ايدي بس ما شي فايده بعده الدم يطلع وبزياده بعد
حارب: يالله بوديج المستشفى
العنود: لالا ما عليكم بيوقف الحين
شمسوه: شو يوقف انتي ما تشوفين اليرح اللي في ايديج.. يمكن زجاج دخل فيها
العنود:لا برايها أنا برد الحين بحط عليها لف
مشيت عنهن وقبظتني حصوه
حصوه: انتي مينونه وين بتسيرين وايديج تنزف جذيه
دخلن سلامه وآمنه المطبخ
سلامه: شو هذا .. شو صاير؟
حمدوه: العنود شاله الصينيه وطاحت عنها .. ايديها انيرحت ودم وايد يصب منها
سلامه: أشوف..
آمنه: وانتن .. ما تروم تحكمن ايديكن ..
حمدوه: الصينيه ثجيله ودعمت حارب جدام الباب عشان جذيه طاحت عنها
آمنه: تعالن نظفنه هاللي طايح ..
سلامه: حمدوه اتصلي حق غرين بنوديها المستشفى
العنود: لالا..بسير البيت بلفها وبرد
مشيت عنهن وحمدوه يت ويايه بس قبل ما أطلع من المطبخ سمعت حارب يصرخ
حارب( بعصبيه): تعالي هنيه
لفيت عليه أنا أحس اني مدوخه ما أشوف جدامي .. وراسي يعورني .. شل السفره عن راسه وفرها على حمدوه..
حارب: لفي ايديها .. بترياكن في السياره يالله بسرعه
طلع من المطبخ وحمدوه لفت ايدي بالسفره وسارت يابت عباتها وعباة شمسوه حقي..طلعنا من الباب اللي ورا .. وحارب كان واقف جدام باب الصاله .. ركبنا السياره وسرنا مستشفى توام .. وقفنا جدام باب الطواري .. سويت الفحوصات المعتاده في الطوارئ.. ودخلنا على الدكتور.. فحص الدكتور ايدي و يت النيرس تحاول توقف الدم وتنظف الجرح والدكتور وياها.. المطهر كان فضيييع حار بدرجه فضيعه
حمدوه: عنودي تحملي شوي
العنود( عيونها تدمع): حمدوه حااار
حارب( بعصبيه): شوي شوي عليها
النيرس: لو سمحت يا استاز خلني شوف شغلي وما في داعي تعصب
الدكتور: استحملي شويه.. دلوأتي حنديكي ابرة بنج عشان الخياطه
حمدوه: خياااطه!
الدكتور: الجرح محتاق خياطه
العنود: لاااااا ما أريد( نزلت دمعتين من العنود.. وحارب ما قدر يتحمل وطلع من الحجره)
النيرس: ما رح تحسيبا بالبنج
من سمعت كلمة خياطه خفت .. حسيت ان الدكتور بيسمع دقات قلبي.. نظفوا الجرح وحمدوه كل مره تطلع وتدخل علينا
******
حارب: هاه .. شو أخبارها
حمدوه: بيخيطون اليرح الحين
حارب: لاااا إله الا الله
حمدوه: ما عليها شر
حارب: والله اني متلوم فيها
حمدوه: هذا المقدر.. حارب لا تزيغني الحين
حارب: والله هب هاينه عليه .. سيري لا تخلينها بروحها
******
شفت حمدوه داخله مره ثانيه
العنود: حمدوه والله اني زايغه
حمدوه: اقري اللي حافظتنه من القرآن.. وهذي الا خياطه عيل ناس يطرون بطونهم
العنود: ما أبغي خياطه
حمدوه: شو ما تبغين .. شقايل بيلتحم اليرح عيل
.. عقب ما بنجوا ايدي طلعت عني حمدوه وخلتني بروحي.. الله ياخذ عدوها أنا بروحي خايفه ليش طلعت عني.. والدكتور رد على المكتب ...لفيت عن النيرس الصوب الثاني وهيه تخييط الجرح وما رديت أشوف الا عقب ما لفته بالشاش
*****
حارب: حمدوووه دخلي طالعيها
حمدوه: ما أتحمل أشوف أنا .. بطيح عدالها
حارب: انتي ما منج فايده لو يبت شميس جان أبرك
حمدوه: انزين بس فكنا
حارب: أفففففففف والله اني متلوم فيها
حمدوه: ماعيك عنودي قويه
*****
طلعت النيرس عقب ما خلصت ودخلوا حمدوه وحارب .. حاولت أعدل شيلتي بس ما قدرت أرفع ايدي .. حاولت أعدلها بايدي اليسرى بس صعب.. يت حمدوه وعدلت شيلتي
حارب: شخبارج الحين
العنود: الحمدالله
حارب: سمحيلي العنود
العنود: بالحل امره..ماصار شي أصلاً
حارب: وين ما صار شي وهم مسويلج خياطه
الدكتور: ما تخفوش.. حنخلي الخياطه اسبوع .. وبعد كده حنفتحها ونشوف الجرح.. هي حتحس بدوخه بسبب الهبوط والبنج.. بس لازم تاكل ..عشان يرتفع الضغط لأن الهبوط اللي بتحس بيه نتيجه الدم اللي نزف من الجرح.. أصل الجرح نزف كتير .. وانتوا شايفنها ازاي
العنود( بعصبيه): أنا مافيني شي الحمدالله مرتاحه
حمدوه: شعندج بردتي ضيجج فيه
العنود( بهمس): تشوفينه شقايل يرمس.. عمج اروحه متلولم.. عنبوهالحلج له
( بس حارب سمع رمسة العنود كلها)
حارب: انزين دكتور هاليرح ما بيسبب لها مضاعفات
الدكتور: أولت لك ما تخفش..انتوا عليكم بس تخلوها تاكل كويس بدل ما هي مفعصه كده
العنود: سكس ويل عفص راسك انشالله
شليت بعمري وطلعت من حجرة الدكتور ولحقتني حمدوه
حمدوه: حووو العنيدي شو ياج
العنود: ايدي الميروحه .. شو دخل الأكل
حمدوه:حليله هو ينصحج وانتي تاكلينه
العنود: حلج بطنج انتي وياه
طلعنا من المستشفى الساعه ثنتين ونص .. وردينا البيت .. حارب نزل من السياره ودخل الميلس ونحن دخلنا من الباب اللي ورا من بيت أم عبدالله وسرنا الميلس الصغير ومحد كان فيه غير البنات ...
حمدوه: السلام عليكم
البنات: وعليكم السلام
شمسوه: أخبارج عنودي
العنود: الحمدالله
حصوه: حمدوه سيري عند أمايه من متى تحاتي
حمدوه: انشالله
سارت حمدوه عند سلامه وعقب ردت صوبنا
حمدوه: يالله عنودي تعالي تغدي
العنود: ما أبغي شي.. بس أبغي أرقد
حمدوه: شو ترقدين سمعتي الدكتور يقولج كلي
العنود( بضيج): لا أبغي أرقد
وقفت عنهن بسير البيت .. بس من وقفت ما قدرت أتوازن .. ما أحس بشي..
.................
فتحت عيوني كنت على الشبريه وعدالي شمسوه والبنات كلهن في الحجره
العنود: أنا وين ؟
شمسوه: الحمدالله والشكر.. الحقن خالتكن فقدت الذاكره
حمدوه: فال الله ولا فالج
حصوه: ههه عنودي أنا حصيص
لطيفه: لا تسويلي فيها..بتعلميني شقايل تسوين العصير يعني بتعلميني
ابتسمت لهن أبغي أرمس بس مب قادره أقول شي .. دخلن عويش وميثوه الحجره
عويش: شميس خالي حارب يباج..
شمسوه: وينوه؟؟
ميثوه: برا في الممر
عويش: هاه العنود.. شخبارج
العنود(بهمس): الحمدالله ..
حصوه: قومي كلي لج شي
العنود: أبغي أرقد
حمدوه: كلي وعقب رقدي
العنود: ما لي نفس..بس أبغي أرقد
لطيفه: قومي كلي قبل.. خالوه شيخه بتحتشر عليج
ما رديت عليهن .. رقدت شوي وطلعن عني
*****
طلعت شمسوه عند حارب اللي ماقدر يتحمل يلسته فالميلس .. كان متلوم فالعنود ويحاتيها.. يحاتي الانسانه اللي قدرة تسلب قلبه وتشغل باله وروحه.. شافته شميس واقف صوب حجرة أمه لأنهن ودن العنود الحجره اللي عدال حجرة أم عبدالله تحت
شمسوه: شو مدخلنك انت والبيت متروس حريم
حارب: تعالي حجرة أمايه
دخلوا حارب وشمسوه حجرة أم عبدالله
حارب: شخبارها العنود؟
شمسوه: راقد مب طايعه تنش
حارب: كلت شي؟
شمسوه: لا بعدها
حارب: ليش ما خليتنها تاكل.. الدكتور قال عندها هبوط من كثر ما نزف اليرح
شمسوه: شو أسوي بها عنيده .. وهيه يوم وقفت طاحت علينا وما صدقناها تنش من عقب
حارب( منصدم وخايف): قولي والله
شمسوه: هيه توني قبل ما أييك قومتها .. بس مب طايعه تاكل
حارب: لاااا حووول.. والله اني متلوم فيها
شمسوه( بخبث): بس متلوم فيها
حارب: متفيجه انتي
شمسوه: ياحظج يالعنيدي
حارب: طلعي فكيني من الصدعه
شمسوه: رد يالله الميلس شو طلعك عن الرياييل
طلع حارب من الحجره معصب وسار الميلس وشمسوه طلعت سارت عند البنات
شمسوه: جيه طلعتن عنها؟
حصوه: رقدت وما طاعت تاكل شي
شمسوه: الله يغربل عدوها..الدكتور قال لازم تاكل تعوظ الدم اللي نزف من اليرح
حمدوه: شو بلاه حارب شفته طالع سته وستين شيطان بين عيونه؟
شمسوه: يتخبر عن العنود.. متلوم فيها
ساره: ما يسوى هاللوم كله تراه وداها المستشفى
شمسوه: والله لو أي حد مكانه بيتلوم فيها ..
ميثوه: يالله عاد خالتكن دلوعه .. الا يرح هذا
لطيفه: حرام عليكن والله انها تعبانه عنبوه انتن ما شفتنه
حمدوه: تتحرن الخياطه هينه انتن .. أنا بروحي ما تحملت أتم وياها طلعت عنها
شمسوه: يااااااااااالله يا رب العالمين.. يامجيب الدعاء تنيرح ايديكن مثل ما انيرحت ايد عنودي .. وتحسن بويعها
ساره: هب هباج الرب .. ليش تدعين؟
شمسوه: عشان تتدلعن شراتها وتحسن بالويع .. جانها من متى تفازع في المطبخ وآخر شي تنيرح ايديها ويخيطون اليرح والشيخه ميثا تقول تتدلع
ميثا: انزين ما يسوى علينا قلنا شي .. رافعه كفوفج تدعين
شمسوه: كيفي خالتي وما تهون عليه
*****
الساعه أربع دخلن حصوه وشميس ووعني من رقادي
حصوه: بسج رقاد يالله
شميس: قومي عاد أنا يوعانه.. ولين الحين ما كلت شي باكل وياج..
العنود: الساعه كم ..؟
حصوه: أربع
العنود: يااالله جني راقده من يومين
حصوه: ليش؟
العنود: راسي يعورني.. أحسه ثجيل
شميس: هذا من البنج.. قومي صلي العصر و كلي بترتاحين
قمت صليت وعقب طلعت في الصاله .. الحريم كلهن روحن .. محد غير موزه وبناتها وميثوه وأمها .. ويا الحرمات في الصاله
أم حمد: العنيدي.. شو هباتج الحين
العنود : الحمدالله
شيخه: شميس سيري حطي لها غدا
العنود: لااااااا ما أبغي
سلامه: شقايل ما تبغين بعد.. ماذقتي شي طول اليوم
شميس: ما عليكن أنا بتغدا وياها
حمدوه: قالوا لج حطي لها غدا ما قالوا لج تغدي وياها
شمسوه: جانج تغديتي أنا ما تغديت بموت من اليوع
حمدوه: حرام عليج والله ما طاح بطني..
سرنا يلسنا في الطرف الثاني من الصاله ويا البنات .. بعيد عن الحرمات ...
شمسوه: أنا ما أبغي عيش ولحم.. بطلب من الكفتريا
حمدوه: عنودي شو تبين ؟
العنود: أبغي بيبسي
حمدوه: شووو.. جلبي ويهج لاه
حصوه: شو بيبسي طلبي شي ينكل
العنود: أي شي بس يعني بيبسي وياه
عويش: مب زين تشربين بيبسي على الريج..عن الخبال
لطيفه: حشى في حياتي ما شفت حد يشرب بيبسي كثر خالي حارب والعنود.. ما أعرف كيف تشربونه
عويش: عنودي .. اندوج رمسي أبويه.. يحاتيج
خذت التيلفون من عند عويش
العنود: ألووو
حمد: مرحبا العنيدي
العنود: هلا حمد
حمد: هااه علومج؟
العنود: الحمدالله
حمد: جانج تعبانه بوديج المستشفى
العنود: لا الحمدالله ما فيني شي.. سرت الظهر
حمد: تغديتي؟؟
العنود: توني نشيت من الرقاد.. الحين بتغدا
حمد: عنودي جانج تعبانه بوديج المستشفى
العنود: لا فديتك والله ما فيني شي
حمد: برايج عيل انتي تغدي الحين
العنود: الله يحفظك
عطيت عويش تيلفونها .. وشفت منصور ومانع داخلين الصاله ومنصور يلس عدالي
منصور: عنودي .. تعورج ايديج
العنود: انت وين يالسبال ؟
منصور: هالقواطي اللي عدالج ما خلني أدخل عندج الظهر
شمسوه: تراك شفتها راقده .. وين تبا بعد
مانع: وحده مستويه دكتوره والثانيه نيرس .. يتحرن عمارهن في مستشفى
شمسوه: منصور سير تريا راعي الكفتريا
منصور: يعلج بطن عنبوه اليوم عزيمه وبعدج طالبه من الكفتريا
شمسوه: وانت شعليك..
حمدوه: سير أسمع هرن دراجته..
طلع منصورويا مانع عند راعي الكفتريا وردوا محملين بالأكياس
أم حمد: غربلا هالبني .. مابغنه العيش واللحم.. بياكلن هالسقم
شيخه: الصينيه اللي حطينها رديناها شرا ماهيه .. محد دار عليها
حصوه: من التعب ما رمنا نذوق شي
... يلسنا ناكل ومشتلات بالسوالف والضحك
حصوه: شقايل بتقبضين الماوس في الامتحان هههه
العنود: عادي بتخف لين ورا باجر.. باجر الا ارشاد
حمدوه: بترومين تسيرين ؟
العنود: هيه عادي..
شمسوه: عويش بتسيرين الجامعه باجر؟
ساره: هيه أبغيها تسير ويايه
شمسوه:أنا بسير وياكن.. بس أبغي أعرف متى ارشاد كلية الهندسه عشان نسير على الوقت
حمدوه: انتن سيرن الساعه ثمان
حصوه: انتي ما بتسيرين وياهن
حمدوه: لا أنا بسير يوم الأحد..وانتي يوم الاثنين
ميثوه: لازم مرافق يعني
شمسوه: بنتنا خريش بتسير ادعم الا جذيه
العنود: مسودة الويه صدق ما تستحين
لطيفه: انزين أكيد حد وياج من ربعج
العنود: هيه شموه ..
لطيفه: دام ما بتكون بروحها عادي.. وبعد ساروه اختيه وياها
سمعنا دق على الباب
علي: هود
أم عبدالله: هدا.. اقرب فديتك محد غريب
اتحجبن البنات .. ودخلوا علي وخليفه وحارب وسالم..
كنت يالسه بين حمدوه وشمسوه.. أسمعهن يتحرطمن
العنود: ههههه ما يسوى عليكن
حمدوه( بهمس): عنودي قومي سحبيهم برا
العنود: خليهم يمتعون عيونهم.. شو بيشوفون من الخير
شمسوه: والله لأراويك يا عليوي .. ان ما طلعت لك قورن
سالم: قومي شمسوه.. اشتلي من هنيه
شمسوه: ليش انشالله
سالم: برمس العنود
شمسوه: خل حمدوه تقوم أنا ما أروم
كانت حمدوه بتقوم من مكانها بس سالم ما خلاها
سالم: يلسي محلج .. شميس قومي أشوف
قامت شمسوه ويلست من الطرف الثاني ويلس سالم عدالي
سالم: هاه العنود أخبارج الحين
العنود: الحمدالله
سالم: خساره فاتج العزيمه .. ولا يهمج الاسبوع الياي بنسوي غيرها
العنود+ شمسوه+ حصوه+ حمدوه: شووووووووووو
علي: خيييييييييبه ..
حصوه: والله نحن اللي نتعب وانتوا مرقدين
العنود: ومنو قالك اني زعلانه.. لالا عادي برايها
علي: صدق هالبنات مخبل.. الناس يتغدون عيش ولحم اليوم.. وهن قاص عليهن عبدالسلام بسندويجاته..
لطيفه: خالي حارب يعللللللللللني أشوفك معرس يارب
حارب: هاه شعندج .. شو تبين هالدعوه ما تطلع بلاش
سالم: عادي خله على الحساب
حارب: صبروا خلونا نعرف شو تبغي
لطيفه: ودنا المبزره
حارب( بنقمه): شووو
لطيفه: دخييييلك والله خاطري أسير
حارب: يلسي محلج وين تبين المبزره مدحوب أنا أوديكن
سالم: عادي شو فيها
علي: عاد انته رديت متفتح أبوي نحن بعدنا ما غيرنا عاداتنا
حصوه: انزين شو فيها لو وديتونا
حارب: المبزه زحمه الحين ..
لطيفه: كلها هنود ماشي مواطنين
علي: منو قالج ماشي ..؟؟
حصوه: حرام بنبدا دوام ونحن ما طلعنا
حارب: بعدكن الاسبوع الياي بتداومن .. شو هالجذب حصيص علمنج القواطي
ميثوه: منو القواطي؟؟
مانع: حمدوه وشمسوه والعنود
ميثوه: هههه منو مسمنهن قواطي
عويش: خالي حارب وعلي
منصور: حمدوه قوطي أناناس.. شميس قوطي فول.. عنودي قوطي صلصل
لطيفه: خلوا القواطي عنكم .. خالي ودونا
حصوه: نحن بنبداوم الاسبوع الياي ساروه وعنوده بيداومن باجر
حارب: الاسبوع الياي
علي: لا الاسبوع الياي ولا غيره .. مااااااااشي سيره مينون حارب جان بيشلكن لا والقواطي وياه بعد.. أسمينا تفشلنا.. حد يشل مخبل المبزره
كلهم ضحكوا من تعليق علي ...أنا خطفت ما يهمني بس شميس وحمدوه يثورن من القهر
من دخلوا الشاب وشمسوه وحمدوه يتحرطمن والحين ساكتات ومنفخات .. وسالم وعلي ولا على بالهم .. بصراحه شكلهن ينقققققققع من الضحك .. بس غمضني قربت من سالم
العنود( بهمس): أقول بو غنيم
سالم: عونج
العنود: عانك الله.. تراه في ناس بتموت تنطبخ من القهر وانت يالس ولا عليك
سالم: منو!!
العنود: حمدونه
سالم: ليش؟؟؟
العنود: يالس بين البنيات.. قم يالله .. انت يوم دخلت المطبخ الظهر انطحنت وما كله الدنيا
سالم: هههههه.. برايها خليها
العنود: حرام عليك
سالم: قوليلها غيرتك تذبح فوادي المولعاني.. غيرتك تذبح ولا عاد تحييني
العنود: ياعيني يا عيني.. سمعتي حمدوه (لفت على سالم) تقولك عليك أغار من لمس الهبايب
سالم: تجذبين بعد .. لو قالت شي بسمعها
ظربني سالم على ايدي ظربه عورتني لأني جذبت
العنود : آآآآآآآآآآآي
سالم: سوري والله نسيت
علي: شعندك تخبلت
سالم: والله نسيت
حارب: شو نسيت ما تشوف ايدها ملفوفه
العنود: برايه عادي عادي
شمسوه: انتوا من ييتوا حشرتوا الدنيا.. قوموا طلعوا.. شو ميلسنكم في البيت اليوم
علي: مب يالسين على راسج
شمسوه عصصصببببت من رد علي.. حمدوه كم مره قالت له شمسوه ما تحب ان علي يضاربها والبنات يالسات .. يلست فتره عشان محد يحس وعقب شلت بعمرها وطلعت من الصاله .. قمنا أنا وحمدوه لحقناها
العنود: شمسوه.. شميس
شمسوه: هاااه
حمدوه: شو ياج
العنود: يعني انتي متعوده على الظرابه وياه
شمسوه: حمدوه كم مره قلتي له ما يحط عليه جدامهن
العنود: حتى لو قالت له تحيدينه علي بيموت ان يلس وما تغايض وياج
شمسوه: خلوهم ييلسوون مستانسين .. شو نباهم بزوالهم
العنود: هب هباج الله.. حشى ما يسوى عليج
شمسوه: أنا براويك يا عليوي ..جانك تغيضني جدام عويش وساروه ولطوف وميثوه
حمدوه: لا وأون شو... منو القواطي( تقلد ميثوه).. مالت عليكن
العنود: ههههههه برايكن سيرن أنا برد داخل
شمسوه: زولي عندهم
مشيت عنهن لفيت ورايه لقيت كل وحده سايره بيتهم .. دخلت الصاله يلست عدال علي
العنود: تعرف انك سبال
علي: ليش؟
العنود: كم مره قلنالك لا تعيب والبنات يالسات
علي: ما يا على بالي من أشوفها أنسى كل شي وأموت على غياضها ..تبين الصدق
العنود: شوو!!
علي: أموت عليها وهيه معصبه
العنود: حرام عليك والله صدق كانت مضيجه
علي: وين سارت؟
العنود: ردت البيت مضييجه .. صدق مفوله
علي: سيري زقريها
العنود: ما فيني أصك لين هناك
علي: اتصليلهن تيلفون
قمت واتصلت حقهن وأصريت عليهن يردن .. ردن وكل وحده منهن منتفخه ويلسن عدالي .. أنا على كثر التعب اللي فيني أبغي أضحك عليهن ضحك.. والله انهن مخبل ...
يلسنا نسولف ونضحك.. وعلي اصطلب عن التعليقات و أكثر سوالفه ويا شمسوه .. يت صوبي لطيفه شاله شي فايديها
العنود: شو عندج؟
لطيفه: يايبتلج هديه
العنود: شوو
لطيفه: بتموتين من الضحك يوم بتشوفينها
العنود: انزين بطلي ايديج
عطتني تيلفوني.. أي تيلفون هذا بقايا تيلفون ... كنت حاطه التيلفون في الصينيه ويوم طاحت الصينيه طاح اليلفون وتبطل الكفر عنه والأكواب تكسرن عليه والماي كله على التيلفون .. مستحيل ينفع خلااااااااص
العنود: هههههههه شو هذا
شل علي التيلفون من ايدي ..
مانع: خيييييييييييبه .. داعمه سكس ويل انتي مب حارب
حمدوه: شو سويتي به عنودي ؟
العنود: طاح وتفجج وكل شي تكود عليه
سالم: أشوف
فرعلي التيلفون على سالم .. وكل شي طار في صوب
سالم:هذا امره ما ينفع
العنود: برايه .. برمس خالي ياخذ لي غيره عقب
طالعوني علي وسالم بعيون فيها نظرة استنكار من رمستي
العنود: بسم الله شو فيكم ؟
علي: جيه نحن هب مازرين عينج
العنود: أنا ماقلت شي انزين
سالم: أنا باخذ لج تيلفون
حصوه: اليوم خذلها بتداوم باجر
العنود: لالا عادي.. باجر شمسوه بتسير ويايه .. يعني مب محتايه التيلفون
سالم: بسير اليوم آخذ لج واحد
حارب: لا أنا اللي باخذلها
سالم: ليش؟!
حارب: أنا السسب في كسره وانا اللي باخذ غيره
علي: شو كسرته .. قول طحنته
حارب: طحنته .. كسرته المهم أنا اللي باخذلها
سالم: لا برايك مايرزا الا تيلفون
حارب: والله محد بياخذلها تيلفون غيري ......
العنود: برايه أنا مب محتايه التيلفون أصلاً.. حتى يوم عطاني اياه غيث قلت له اني مب محتايتنه
حارب: باجر بتداومين.. وبتحتايينه في الدوام
شمسوه: حشى كلهم يتعازمون عشان يشترون التيلفون .. كل واحد منكم اييب تيلفون ونحن بناخذهن.. ماعليكم انتوا
علي: تبين تيلفون شميس.. فالج طيب اليوم يوصلج واحد
سالم( يفر علي بالمخده): حووو... عليوي قم اطلع قمممم
علي: يالس على راسك؟؟
سالم: قوموا خلونا نسير الحين بيأذن
حارب: يالله قوموا
فر علي التيلفون عليه
علي: سيري عقيه في الزباله
العنود: لا ما بفره بخليه أباه
طلعوا الشباب من الصاله وتمينا بس البنات في الصاله
العنود: والله ما أبغي تيلفون أنا ..
شمسوه: احمدي ربج.. لو تيلفوني المكسور بتم شهر بلا تيلفون
العنود: انزين ما بحتايه دامج انتي ويايه باجر
حمدوه: بتحتايينه عقب ...
طلعت عن البنات قبل صلاة المغرب ... رديت البيت اتصلت حق نوروه رمستها ورمست يدوه.. عقب ما سكرت عنه فتحت النت أحاول أضيع وقت لين أذان العشى قبل ما أرقد.. ما بغيت أرد صوب البنات ما ارتحت لميثوه وساروه .. أحسهن ما يبلعني.. أيلس هنيه أبرك لي.. لقيت شموه على المسن رمستها لين أذن العشى طلعت ملابسي اللي بلبسهن باجر عطيتهن لامي تكويهن وعقب صليت وطحت برقد .. شفت حمد يدخل الحجره
حمد: عنودي .. العنود
العنوه: تعال حمد بعدني ما رقدت
حمد( يشغل الليت): تعبانه
العنود: لا ما فيني شي بس بغيت أرقد
حمد: قومي بوديج المستشفى
العنود: ما فيني شي حمد بس أبغي أرقد ناشه من وقت ويلسنا نشتغل في المطبخ وباجر ورايه دوام في الجامعه
حمد: العنود صدق ما فيج شي
العنود: انت ليش حنان قلت لك ما فيني شي
حمد: حتى وانتي مريضه لسانج طويل
العنود: أنا لو مريضه من أشوفك أنسى المرض كله
حمد: ياااالله.. شو تبين هالرمسه ما تطلع بدون مقابل
العنود: دعواتك بس.. أبغي أعدي مستويات
حمد: حد قالج اني السديس
العنود: ربك يجيب دعوت كل حد مب شرط السديس.. ودعوة الوالدين مقبوله... بس عاد انته ولي أمري الحين لازم عليك انته تدعيلي
( حمد من سمع رمسة العنود قرب منها ولوى عليها ... يحاول يقبض دمعته.. ماهانت عليه اخته .. يدري انها مب مرتاحه .. وان حرمته مب متقبله وجودها في البيت .. وبنته ما تحتك فيها أبداً .. بس العنود غاليه عليه وما يقدر يخليها تعيش بعيد عن عينه لأنه هو اللي بيسوي الها أي شي تبغيه.. أبوه قبل ما يموت أكثر شي وصى عليه هوه العنود)..
حسيت بحنان كبير فاقدتنه من زمااان..حمد عوظني عنه ما أدري شو اللي خلاني أحس بالأمان.. وأنا في حظن أخويه.. كنت حاسه اني محتايتنه طول الفتره اللي طافت .. مع انه ما قصر ويايه
حمد: عنودي غناتي صدقيني ما تهونين عليه
العنود( عيونها تدمع): أدري حمد..بس بعد أحس ان وجودي مثقل عليكم .. مهما كان أي حرمه تحب تكون في بيتها وياريلها وعيالها رواحهم
حمد: وأنا ما بخليج تعيشين عند أي حد ثاني .. لأني ما برتاح الا يوم أشوفج مرتاحه وجدام عيني
العنود: حمد انت ما خليت عليه قصيره بالعكس موفرلي كل شي
حمد: العنود.. أي شي تكونين مضايجه منه والا تبين شي تعالي خبريني تسمعين
العنود: انشالله
حمد: ما أبغيج تطلبين من أي حد ثانيه .. تفهمين
العنود: هههه مستوي استاذ.. الا تسمعين وتفهمين.. لا استاذ الثانيه صعبه ما فهمتها ممكن تعيدها
حمد: هههه دام هذي هيه الدروس أكيد بعيدها عشان تفهمينها وتحفظينها بعد
العنود: انشالله ..
حمد: يالله قومي تعشي
العنود: لا فديتك والله مالي خاطر .. أبغي أرقد.. والا ما بقدر أداوم باجر
حمد: على راحتج .. بس بخليهم يخلولج عشى جان يعتي فليل قومي كلي
العنود: ما عليك أصلاً لامي لازم تشوفني إذا تعشيت وإذا ما تعشيت تخليلي عشا
حمد: حليلها أسميج ما قصرتي يوم خليتيها .. نافعتنج
العنود: هيه حليلها
طلع عني حمد وبند الليت وسكر الباب وانا رديت انسدحت برقد
*****

الجـــــــــــــــــــزء الـــــــــــــــــــــــرابــــــــــــــــــــــ ـــــــع عــــــــــــــــــــــــشـــــــــر
******
في بيت أم عبدالله عقب ما روحن البنات كانن حمدوه وشمسوه وحصوه يالسات في الصاله حاطات نجوم ويسولفن .. دخل عليهن حارب
حارب: قصرن عليه
قبظت حصوه الرموت وقصرت على التلفزيون وحارب يلس وياهن
حارب: العنود وين عيل ؟
حصوه: روحت قبل أذان المغرب وما ردت
حارب: ليش بعدها تعبانه؟
حمدوه: يوم روحت ما فيها شي
شمسوه: أظني تعبانه يعني بس تبغي ترتاح والا ما فيها شي.. بصراحه أحسن افتكت يوم روحت.. حشى ساروه وميثوه وعويش محد ييلس وياهن
حارب: ليش شو سون؟
شمسوه: أون شو!! ..خالتكن تدلع والا ما فيها شي
حمدوه:شميس.. خلاص سكري السالفه
شمسوه: انزين ما قلت شي
حارب: ما سرتن تشوفنها؟
حمدوه: لاء
حارب: مالت عليكن.. قومي شمسوه اتصليلها شو فيها
قامت شمسوه اتصلت على تيلفون البيت لأن العنود ما عندها تيلفون الحين... رد عليها حمد
حمد: ألووو
شمسوه: ألو السلام عليكم
حمد: مرحبا وعليكم السلام
شمسوه: شحالك خالي
حمد: الحمدالله شحالج شميس
شمسوه: دامك بخيرأنا بخير ونعمه
حمد: ما ييتن صوبنا اليوم
شمسوه: نتريا العنود تينا
حمد: وييييين العنود ويهاااات
شمسوه( بمزح): شو ماتت
حمد: هب هباج الله يالحماره
حارب من سمعها سطعها على راسها
حارب( بهمس): وويعه انشالله .. شعندج تفاولين عليها..
شمسوه: لا صدق خالي عنودي وين؟؟
حمد: العنود راقده من متى
شمسوه: ليش شي يعورها
حمد:لا ما يعورها شي .. بس تقول تعبانه شوي
شمسوه: حليلها.. برايك خالي عيل
حمد: الله يحفظج
سكرت شمسوه عن خالها
حارب: هاه شو أخبارها .. ليش ما رمستيها؟
شمسوه: راقده
حارب: شي يعورها؟
شمسوه: خالي يقول ما يعورها شي بس تعبانه شوي
سكت حارب عنها وهيه حست انه متلوم فيها
حمدوه: العنود قطوة رقاد واليوم ناشه من وقت أكيد بترقد من وقت
شمسوه: أقول حارب.. اشتريتلها التيلفون
حارب: أوووووه نسيت التيلفون .. برايكن بسير الحين آخذ لها
طلع حارب من الصاله ولفت حصوه على شمسوه وحمدوه وهيه فاجه عيونها وحلجها مستغربه ومنصدمه ع الأخير
حصوه: تعالن خبرني شو سالفته عمكن
حمدوه: منو عمنا
حصوه: منو غيره حرووب
شمسوه: شو سالفته بعد!!؟
حصوه: لا لا سلامتكن .. ما تشوفنه
حمدوه: نشوفه منو قالج انا عميان
حصوه: عن الاستهبل انتن تعرفن أنا شو أقصد
شمسوه: الله يسلمج عمج رايح فيها
حصوه: شقايل رايح فيها بعد
حمدوه: يعني مخشع .. ظووا راسه
حصوه( منصدمه): من متى .. ما أحيده الحربي
شمسوه: من أول يوم يت العنود بيت خالي حمد
حصوه: وميثوه!!
شمسوه: شو بلاها ميثوه بعد
حصوه: أحيد يدوه تبغي تخطب له ميثوه
حمدوه: قطيييييعه ما لقيتي غيرها.. يعلها تفدى العنيدي..
شمسوه: أنا بروحي سمعته يوم قال حق يدوه انه ما يبغي ميثوه
حمدوه: شفتنها ميثوه شقايل ميته يوم شافت حارب.. يعله بلاج ما لقى غيرج
شميس: أنا يوم سمعت حارب يقول أنا باخذ لها تيلفون .. لفيت عليها أطالعها بغت تموت
حصوه: وعنوده؟!
شمسوه: شو بلاها عنوده
حصوه: تدري عن كل هذا؟
حمدوه: لا والله خالتج الهبلا ما تدري عن شي راقده على اذنيها
حصوه: شو تبينها تسوي يعني
شمسوه: ولا يهمنكن ... أنا بحاول وياها وما بخلي عمي يموت في وحده ما تدري عنه
حمدوه: يا ويلج محلفنج ما تخبرينها
حصوه: والله وطيحتي عمي يالعنيدي.. ماعليه السبالات ما تخبرني
حمدوه: شدرانا انج هبلا وما تلقطينها على الطاير
حصوه: أنا مب قوطي شراتكن
حمدوه: لا ما شي عمي حارب قال انكن قواطي شراتنا..
******
اليوم أول يوم بداوم فيه .. قمت من الرقدا ايدي تعورني ومب قادره أحرك صبوعي على طول حركتي أحاول ما أحركها وايد عشان ما أحس بويع فيها .. لبست خلصت وسحيت شعري بصعوبه .. خلصت وحطيت أغراضي اللي أحتايها في الشنطه وطلعت في الصاله لقيت عويش يالسه ترمس التيلفون من رمستها عرفت انها كانت ترمس ساروه رن تيلفون البيت .. رديت عليه
العنود: ألووو
شمسوه:صباح الخير
العنود: صباح النور
شمسوه: هاه خلصتي
العنود: هيه خلصت أترياج
شمسوه: قومي تعالي
العنود: ليش بعد خطفي عليه
شمسوه: لا تعالي انتي أباج الحين ضروري
العنود: انزين جلبي ويهج
سكرت عنها ولفيت على عويش
العنود: أنا بسير عند حمدوه إذا ما بتسيرين بنخطف عليج
عويش: لا برايكن سيرن انتن أنا بسير ويا ساروه
العنود: على راحتج
رحت بيت أم عبدالله .. دخلت الصاله لقيت أم عبدالله وشمسوه وحارب
العنود:السلام عليكم
الجميع: وعليكم السلام
شمسوه: له له شو هالكشخه ما أروم أنا
العنود: شو كشخه تجذبين بعد
شمسوه: والله انج تخبلين
( لف حارب يشوف العنود استانس يوم شافها لابسه التنوره اللي اختارها يوم كانوا في دبي)
حارب: شحالج العنود
العنود: الحمدالله
حارب: شخبارها ايديج
طالعت ايدي ورفعت راسي أبتسم عشان أطمنه أدري انه متلوم فيني
العنود: الحمدالله ما تعورني
حارب: لا تجذبين أدري انها تعور
شمسوه: تقولك ما تعور
حارب: جب انتي
أم عبدالله : تريقوا انتوا وتوكلوا على الله
تريقنا وطلعنا من البيت وفي الكراج ركبنا نحن السياره وحارب ركب سيارته يا صوبنا وفتح الباب صوب شميس
حارب: العنود يودي .. سمحيلي أمس ما قدرت أييب لج اياه رديت متاخر
العنود: شو هذا ؟
حارب: تيلفون
العنود: حارب مشكور بس ..
حارب( يقاطعها): لا بس ولا غيره ..أنا كسرته ويبت غيره
العنود: بس هذا مب نفس تيلفوني .. هذا تيلفون يديد
حارب: هذا اللي عيبني .. يالله أنا بسير أتأخرت
سكر حارب باب السياره وأنا متلومه ومتقطعه من المستحى طلع سليم من البيت وسرنا الجامعه
شمسوه: اندوج يوي
العنود: والله اني مستحيه من عمج ..
شمسوه: ليش حد قاله يطير صوب المطبخ
العنود: أنا بعد كنت حاطتنه في الصينيه ما أدري شو شركاتي بتخسر مالت عليه
شمسوه: خلاص انزين ماصار شي كسر التيلفون ياب غيره شو صار
خذت التيلفون وحطيته في الشنطه.. وصلنا الجامعه نزلنا في الرسبشن وكان زحمه اتصلت حق شموه من تيلفون شمسوه ويت صوبنا .. الساعه ثمان كان ارشاد كلية الهندسه ويا كليات ثانيه.. سرنا ويا شمسوه الصاله الرياضيه .. كم مره حصلت ضربات على ايدي من كثر الزحمه .. دخلنا الصاله الساعه ثمان وطلعنا الساعه عشر
شمسوه: هاه وين تبين الحين
موه: البيت وين بعد
شمسوه: أول بنتريق وعقب وبنروح
العنود: بطن هب جنج مضاربه الصينيه الصبح
شمسوه: هب منكن مني أنا اللي بغيت أراويكن الجامعه
العنود: لاحقات عليها
شموه: خلاص بنسير نتريق ولا يهمج
سرنا تريقنا .. وردينا البيت الساعه 11:30 .. دخلت الصاله لقيت آمنه يالسه ويا عموه
العنود: السلام عليكم
آمنه+ أم حمد: وعليكم السلام
أم حمد: من وين يايه عنود؟
العنود: راده من الجامعه عموه
آمنه عويش وين ؟
العنود: ما أدري بها
آمنه: شو ما تدريبها مب سايره وياكن هيه
العنود: لا سارت ويا ساروه... خطفت عليها
آمنه:وليش ما ردت وياكن
العنود: ارشاد كلية ساروه يبدا الساعه عشر ونحن خلصنا الساعه عشر
آمنه: ليش ما ترييتنها
العنود: ما عندنا شغل نيلس هناك .. وهيه ما قالت لي بترد ويانا
آمنه: انتن من يوليكن على سياره
أم حمد: بترد دامها ويا بنت خالتها
آمنه: هن ليش ما ترينها لين تخلص
أم حمد: دام مالهن حايه شو ايلسهن يردن
طلعت من الصاله .. بصراحه ما فيني على هزبه من آمنه أطلع بكرامتي أبرك لي.. دخلت حجرتي كانت الساعه 12 ... صليت الظهر ورقدت ما كلن لي خاطر على الغدا .. تريقت في الجامعه وأحس اني شبعانه.. أصلاً أحس ايدي تعورني ..
... الساعه خمس العصر قمت من رقادي تسبحت وعقب ما خلصت سرت بيت أم عبدالله بيت شيخه .. دخلت حجرة شمسوه لقيتها مختبصه ويا ملا بسها.. توها طلعت الملابس من الأكياس ورتبتهن .. وحمدوه تتطنز عليها
العنود: شو هذا أنا جني غلطت في المكان
حمدوه: انتي وين تبين؟
العنود: حجرة شميس
حمدوه: لا هذا محل للملابس النسائيه
شمسوه: حمدوه وعنود عن السخافه وطلعن برا
حمدوه: والله هذا بيت عمي متى ما أبغي بطلع
العنود: وهذا بيت اختي بعد
شمسوه: بس هذي حجرتي
العنود: عاد تحملينا
فرت عليه شمسوه كيس من الأكياس اللي كانت اطلعهن من الكبت
حمدوه: توزعين هدايا انتي
العنود: هيه أول زوار للمحل نحن
شمسوه: هب مكلفه عنكن .. هذا اللي خذتيه من زارا ولا شليتيه آنسه عنود
بطلت الكيس وطلعت اللي فيه .. هذا اللي اخترته من زارا يوم سرنا دبي .. بس ما شليته لأن الخام أحمد ضيجبي وفريت السله ويوم عطتني اياها شمسوه ما شليتها
العنود: ليش خذتيه؟
شمسوه: ليش يعني؟
العنود: أنا فريت السله وقلت لج ما أبغيه
شمسوه: عاد أنا مالي شغل يوم خليتي سلتج أنا بعد خليت سلتي وعمي حارب شلهن وحاسب عنهن
العنود( منصدمه): جذااابه
شمسوه: والله
العنود: ياااااااااالفضيحه
حمدوه: ليش عادي
العنود: عادي لأنه عمج
شمسوه: ما فيها شي.. لو حاسب عن مالج بروحج قولي فضيحه بس هوه شل سلتي وسلتج
العنود: لا بصراحه ما أقدر أشلهن
شمسوه: برايهن بعطيهن زينب خليهن
حمدوه: عنلاتج تعطينهن زينب مشرايات بذيج الحجيه
شمسوه: يعني أنا وانتي مطقمين في هالتنوره وحصيص قياسها غير .. شو بنسوي بهن
العنود: حطيهن في محلج
شمسوه: والله مب بكيفج .. بتشلينهن وبنطقم فيهن أول يوم دوام
حمدوه: الحين انتي متى امتحاناتج
العنود: الأثنين والثلاثا
شمسوه: هب تسوين شراتنا .. ركزي في الحل
العنود: انشالله ... بحاول قد ما أقدر
......................
امتحنت امتحانات المستويات .. وباجر أول يوم دوام... الحمد الله قدرت أعدي الانجليزي .. والعربي والرياضيات طلعت بمستوى ثاني .. والكمبيوتر مستوى أول ...
رديت اليوم من المستشفى .. كل مره يغيرون اللف بس اليوم بطلوا الخياطه عني .. حسيت فوادي تقطع يوم بطلت الغرز.. الله ياخذها ذبحتني .. ومن رديت البيت ما طلعت منه منصور اليوم ما راح عني طول اليوم ويايه .. كان ويايه يوم سرنا المستشفى ونزل ويايه طول الوقت نلعب ألعاب على الكمبيوتر ومانع ويانا بعد.. توني سكرت عن نوروه وقالت لي انها قدرت تسجلي المجتمع .. عطيتها الشعبه اللي مسجلات فيها حمدوه وشمسوه..
منصور: عنود..نحن بنسير عنج الحين
العنود: وين ساير؟
مانع: الساعه عشر باجر عله بنسير أرقد.. وانتي بعد وراج دوام
العنود: أنا ما برقد .. بسير عند شميس وحمدوه
منصور: يالله
طلعت ويا منصور ومانع راح بيتهم دخلنا بيت شيخه لقيت شمسوه عند الباب
شمسوه: لحقي لحقي
العنود: شووو
شمسوه: تعالي ويايه
العنود: شو صاير
ما عطتني فرصه يرتني من ايدي وسرنا بيت سلامه دخلنا البيت وركبنا فوق .. بسرعه .. الله يستر شو صاير... وصلنا فوق وعند الدري شفت حمدوه واقفه شكلها تتريا شميس
شمسوه: وين حصوه؟
حمدوه: متفيزره في حجرتها
العنود: شو صاير؟
شمسوه: بنت اختج الخاينه
العنود: حصيص!!؟
حمدوه: هيه ..
العنود: شو بلاها؟؟
حمدوه: تدرين انها انخطبت وشاوروها وردت عليهم وما خبرتنا
العنود: والله
شمسوه: تعالن
سرنا حجرة حصوه فتحت شمسوه الباب بدفااااااااااااشه
حصوه: بسم الله
حمدوه: هاه خفتي
حصوه: فلختني يعلني بلاكن
شمسوه: أفااااااااا.. أفاااا يالدنيا
حصوه: هاه شو عندج بايعه بخساره
حمدوه: يااااالله يا حصيص كل هذا يصير وما تخبرينا
حصوه( تستهبل): شو صاير ؟
العنود: لااااااا تستهبلين ..
حصوه:أنا ما أستهبل..وضحن شو تقصدن
شمسوه: انتي تعرفين شو نقصد
حصوه: لا ما أعرف
حمدوه: أوكي... رديتي على قوم أمايه بالموافقه
حصوه: انتن منو خبركن؟
شمسوه: المهم درينا ...
حصوه: خلاص شو صار يعني.. الحين دريتن
حمدوه: عقب شوه الحين عقب ما رديتي عليهم
حصوه: أمايه وصتني ما أخبر حد
حمدوه: ونحن مب أي حد نحن خواتج
حصوه: أمايه قالت لي حتى البنات لا تخبرينهن
شمسوه: ليش يعني؟!
حصوه: ممم ما أعرف
العنود: منو قوم منو؟
حمدوه: يستوي عم ميثوه
شمسوه: على العموم مبروك
حصوه: الله يبارك فيج
قمت يلست عدالها وبستها على خدها
العنود: مبروك حصيص ..
حصوه: الله يبارك فيج عقبالج
العنود: هه لا تستعيلين وايد . عقب كم شهر بتسمعين اني بعرس
حمدوه: شي الواثقين
العنود: لا ثقه ولا شي .. ما سمعتي المثل اللي يقول لي طاح الجمل كثرة سجاجينه
( سكتن البنات منصدمات من حالات خالتهن.. لهالدرجه هيه يائسه من حياتها)
حصوه: شو هالرمسه العنيدي انتي هب رخيصه عشان نفرج
العنود: بس عند غيرج رخيصه ووايد بعد
شمسوه: منو تقصدين
العنود( توقف): ما عليكن أخربط يالله قومن نسير نرتبش حق العروس
شمسوه: لا منو قال الحين بتكملين رمستج
العنود: خلاص قلتلكن أخربط
حصوه: قومن خلنا نسير نشوف يدوه اليوم ما شفتها
طلعنا من بيت سلامه سرنا عند عموه..بس دخلنا ولقينها راقده ويلسنا في الصاله ...
حمدوه: آآه مالي خاطر على الدوام باجر
شمسوه: شو رايكن نسويها حركه وما نداوم باجر
حصوه: شو تسون ما شبعتن من اليلسه .. خلاص
حمدوه: انتي شعليج خريجه
حصوه: بتتخرجن انشالله
حمدوه: عنوده سجلت لج نوروه
العنود: هيه سجلت لي في نفس الشعبه
حصوه: فلحتن الساع
شمسوه: الله وناااااااسه
حمدوه: بنطقم باجر شو رايكن
شمسوه: أوكي لبسن التركوازيه
حمدوه: أوكي
حارب( يدخل): السلام عليكم
البنات: وعليكم السلام
حارب: مب بسكن من السهر .... ما وراكن دوام باجر
حصوه: أنا بسير أرقد عقب شوي
حارب( مبتسم): شحالج العنود
العنود: الحمدالله
حارب: شخبارها ايديج
العنود( مبتسمه): الحمدالله اليوم بطلوا الخياطه
حارب( يجرب منها): أشوفها
انصدمت منه يجرب مني بيشوف اليرح .. تغير شكلي وبينت الصدمه على ويهي
حارب: ما باكلج بشوف اليرح بس
( البنات منصدمات من جرأت عمهن .. اللي طاحت عليه فجأه )
العنود: شو تشوف بتلوع جبدك
حارب: برايها أشوف
مديت له ايدي وهو واقف جريب شوي مني
حارب: السموحه منج
العنود: مسموح
حارب: تعورج
نزلت راسي وهزيته بالنفي ووقفت
حمدوه: وين؟
العنود: بسير
شمسوه: بعده الوقت يلسي
العنود: خلاص باجر دوام .. بسير أرقد
حمدوه: قوموا نوصلها
طلعنا كلنا حتى حارب طلع ويانا .. وصلوني البيت دخلت حجرتي سكرت الباب وخذت نفسي اللي أحسه انكتم من دخل حارب الصاله ... ياااااربييي يا جرأة هالإنسان ما شفت منها .. يلست على المكتب .. يوم ريحت نفسي قمت وحطيت الملابس على طرف وانسدحت برقد
..............


الـــــــــــــــــــــجــــــــــــــــــــــــــ ـزء الـــــــــــــــــــــخــــــــــــــــــــــامــ ــــــــــس عــــــــشـــــــر

الساعه سبع الصبح سمعت المنبه يرن .. فتحت عيني بضيج بعدني ما شبعت رقاد بس متحمسه للدوام ... مب عشان شي بس عشان شمسوه وحمدوه بيكونن ويايه
دوامي بيكون اليوم الساعه ثمان عربي وعقب بريك ساعه وعقبها ساعتين كمبيوتر .. اليوم الثاني بيكون دوامي الساعه ثمان لين تسع وعشرين مجتمع و الساعه 10 لين 12 رياضيات دوامي مريح وايد وعندي بريك في وقت مناسب ..
عقب ما تجهزت طلعت في الصاله لقيت عويش توها نازله من فوق
عويش: دوامج الساعه ثمان
العنود: هيه أنا كل يوم ثمان.. وانتي
عويش: أنا بعد..
دقايق يلسنا وعقب وصل سليم .. طلعت ويا عويش سرنا الجامعه .. وعندالبوابه كانت سيارة غرين توها داخله قبلنا .. هالشي ريحني.. لأني ما أعرف وين كلاساتي وطبعاً مستحيل عويش تيي ويايه .. نزلنا الرسبشن وشفت حمدوه وشمسوه جدامي
العنود: السلام عليكم
حمدوه: هلا والله .. من متى انتي هنيه
العنود: توني
من وصلت وكل مره هالثنتين يسلمن على حد.. وأنا واقفه متفشله ما أعرف هالبنات .. سحبت حمدوه على طرف..
حمدوه: شو عندج
العنود: انتن موقفاتني ويا ربعكن وأنا ما أعرفهن
حمدوه: تعرفي عليهن
العنود: لا والله .. صدق ما عندج سالفه شوفي الساعه كم
حمدوه: كم
العنود: الساعه ثمان الا خمس وأنا ما أعرف وين كلاساتي
حمدوه: انزين أنا بوصلج الحين .. بسرعه عشان ما يحطج آبسنت
العنود: قولي حق عمرج..
شموه: هااااااااااااااي صبايا ( سلمت شموه على حمدوه والعنود)
العنود: فدييت عمرج يا ربي انتي وين
شموه: والله اني متولهه عليج
العنود: خلي عنج .. من متى وانتي منطبنه في بوظبي ولا سألتي عني
شموه: فدييييت خشمهم اللي زعلانين
العنود: لا تحاولين خلاص
شمسوه: شحالج شموه( يسلمن على بعض)
شموه: الحمدالله ..انتي شحالج
شمسوه: يسرج الحال .. يالله ما عندكن دوام
شموه: أنا ما أعرف وين أدعم
شمسوه: تعالن بنوصلكن كلاساتكن
طلعنا من الرسبشن وأنا وشموه ساكتات ما رمسنا وحمدوه وشمسوه يت وياهن وحده من ربعهن وماشالله بالعات ستريو .. ماسكتن من طلعنا لين دخلنا الكلاس.. أنا كان عندنا عربي في اللابات وشموه طلع كلاسها الكلاس اللي مجابلني .. والشي اللي ريحني أكثر انها عندها بريك من تسع لين عشر ويايه .. وصلنا الكلاس متأخرات .. وقوم حمدوه على قولتهن ان الدكاتره يتأخرون .. يعني ما بتلوم فيهن ..
حظرت أول محاظره وطلعت من كلاسي الساعه تسع الا عشر وشفت البنات في كلاس شموه توهن يطلعن .. طلعت وكأنها متوقعه تشوفني
شموه: عنودي والله اتولهت عليج
العنود: خلي عنج .. عنبوه حتى لو مسج.. ما يسوى عليج مطور من سرتي بيتهم ما سألتي عني
شموه: وييين ما شفته الا مره وحده
العنود: ليش ؟
شموه: عنده دوره في دبي
العنود: انزين أنا يوعانه خلينا نسير الكوفي
شموه: يالله.. بس هنيه في الكوفي ما فيني أسير بعيد.. برد هنيه بعدني
دخلنا الكوفي وطلبنا الريوق ويلسنا على وحده من الطاولات
شموه: عنودي شو هذا عنبوه عندج اجتماع على هالطاوله
العنود: يلسي انتي متفيجه .. خلينا ناكل
شموه: انزين عنودي أخبارج في هالاسبوع اللي غبته عنج
العنود: عايشه تراني..تدرين لو ما حمدوه وشمسوه وحصوه جان تلقين عندي اكتئاب
شموه: يحهن مونساتنج..احمدي ربج عليهن
العنود: الحمدلله.. تعرفين
شمسوه: شو
العنود: لو قدمنا على الكليه ويا باقي ربعنا هب أبرك لنا
شموه: لا فديتج .. خلينا ندور مصلحتنا.. شويخ وريموه يبن رباعه ويا خواتهن .. ويزوي ما يابت نسبه ونوروه ما تبغي الجامعه ..
العنود: متولهه عليهن
شموه: أمس رمست نوروه تسلم عليج
العنود: الله يسلمها
يلسنا نتريق.. حسيت في شلة بنات واقفات في صوب يأشرن علينا ويرمسن
العنود: شموه لا حظتي البنات للي هناك
شموه: كملي ريوقج وطنشي
العنود: شي عندهن
شمسوه: لا تسويلهن سالفه
كملت ريوقي وأنا أرمس شموه .. عقب تجدمن ثلاث بنات صوبنا
البنت: السلام عليكم
شموه+ العنود: وعليكم السلام
البنت: شحالكن
العنود: الحمدالله
البنت: لو سمحتن هذي طاولتنا
طالعتها باستنكار ولفيت صوب شموه ..
شموه: طاولتكم!!
البنت : هيه نحن من كورسين نيلس عليها
العنود: سمحيلنا بس ما شفنا شي عليها يدل انها طاولتكم
البنت: مثل شو يعني
العنود: والله ما أشوف اسم مكتوب عليها
نطت وحده من ورا تصارخ: والله نحن هب ملزومين نكتب اسمنا على الطاوله اللي متعودين نيلس عليها.. لو بتلاحظين محد يلس عليها غيركن .. لأن الكل يعرف انا نحن نيلس عليها
العنود: ونحن هب ملزومات نسأل عن الطاوله اللي بنيلس عليها إذا مالت حد والا لاء
شموه: عنودي قومي
العنود: أنا ما بقوم وإذا حبيتن تيلسن تراه الطاوله كم كبرها مرحبابكن الساع
البنت: يعني
العنود: بغيتن تيلسن حياكن ما بغيتن على راحتكن بس انا ما بقوم لين يبدا كلاسي
... روحن عنا البنات ولفيت على شموه
العنود: عنززز قسم بالله انج ما تصلحين للجامعه .. امره بتخلي ريوقها وبتنش
شموه: انزين طاولتهن
العنود:وانتي شدراج انها طاولتهن .. شافنا يداد ين بيقصن علينا وانتي صدقتي
شموه: انزين بس..
ردن البنات ووياهن باقي ربعهن ويلسن على الطاوله .. صريخ وضحك واللاب توب يشتغل.. بس عناد أنا ما قمت عن الطاوله .. لين الساعه عشر الا خمس وسرت كلاسي وشموه سارت كلاسها ..
الساعه 12 طلعت من كلاس الرياضيات مب عارفه وين أسير.. البنات اللي تعرفت عليهن بيسيرن عند ربعهن وشموه بعدها ما بتخلص الحين .. وهالقواطي ما عطني جداولهن .. فكرت أرد البيت بس شمسوه قالت لي أترياهن لين ثنتين وأنا البدلا واقفت .. حمدوه العنز ما ترد على تيلفونها ولا حتى شمسوه .. رديت الكوفي مره ثانيه وانا أتصلهن ويلست على نفس الطاوله لأني ما لقيت حد عليها .. حاطه السماعه لأن تيلفوني فيه كيمره وما فيني أطلعه .. وماشي فايده ما يردن .. عقب عشر دقايق حسيت بتيلفوني يهز فتحت الشنطه.. ورديت على التيلفون
العنود: ألو
شمسوه: هلا عنودي خلصتي
العنود: هيه من نص ساعه .. وانتي؟
شمسوه: الدكتور طلعنا .. تعالي عندنا
العنود: شدراني انتن وين ؟
شمسوه: تعرفين المبنى البرتقالي.. اللي كله زجاج
العنود: هيه أعرفه
شمسوه: تعالي عند الباب وبتشوفيي
العنود: أوكي
سكرت عن شمسوه وطلعت من الكوفي وسرت صوب شمسوه.. وصلت ولقيتها تترياني وياها وحده من ربعها .. سلمات عليها ودخلت وياهن .. سرت وياها يلستني على طاوله ما أعرف حد من البنات اللي عليها غير حمدوه .. يلست عدال حمدوه وانا ساكته وكل حين تعرفني على وحده من البنات .. من كثرهن ما عرفت أي وحده منهن .. شالات الدنيا على روسهن من الضحك والسوالف .. يتنا ساره بنت موزه وسلمت علينا ..وعويش يالسه على طاوله ويا ربعها .. وصدق ما جذبت ظنوني ربع عويش من حالها.. كشخه ورزه.. حصيص فديت روحها ماشفتها اليوم..
حمدوه: عنوده شو فيج
العنود: مافيني شي
حمدوه: تعبانه؟
العنود: انتن ما خلصتن؟
حمدوه: خلصنا بس قلنا بنيلس شوي لأن حصوه آخر محاظره لها بتبدا الساعه وحده وأربعين وأكيد الدكتور بيطلعهم من وقت .. قلنا نترياها
سلامه: شكلها خالتكن ملت منا
العنود: لا أبداً بس تعبانه شوي .. البارحه رقدت متأخر يمكن الساعه 2
شمسوه: وشو اللي رقدج متأخر مروحه عنا الساعه 12
العنود: ما بقولج .. موتي غصه
شمسوه: منو قال... أدري بعدين بتردين تخبريني
العنود: جلبي ويهج
شمسوه: حوووووه بنات ما بتتغدن
مريم: عندي كلاس بحظره وبنتغدا تريني
شمسوه: لا فديتج ما فينا بنحصل هزبه يوم بنرد البيت خلينا على هالحال .. بنتغدا وبنسير
فطامي: وأنا بموت من اليوع .. خلنا نسير
اتفقن البنات انهن يتغدن .. سرنا طلبنا الغدا وردينا شفت عويش عند المطعم وقلت الها انا بنروح .. بس ما بتسير ويانا شكلها عندها محاظرات متأخره
ردينا على طاولتنا تغدينا وطلعنا من المبنى .. مرينا عند استلام الكتب بس كان زحمه .. ردينا البيت الساعه ثنتين ونص..
وصلت الحجره وأنا تعبانه خلاص ما فيني حيل .. ما تعودت على هالدوام ... غيرت ثيابي ورقدت .....
*******
من شهر من ابتدا الدوام في الجامعه .. قمت اليوم الصبح وأنا تعبانه.. مضايجه مب قادره أنسى كلام آمنه أمس يوم كانت تكلم موزه أختها في التيلفون .. جمله مستحيل أنساها .. العنود عله وعلى قلبي وبلوه ابتليت بها ما أدري متى بفتك منها.. من أمس وأنا مب قادره أرقد الله يسامحها المشكله اني مب عارفه أنا في شو مضايجتنها الحين حتى الغدا والعشى ما تشوفني يالسه وياها مع انا في نفس البيت يمر يوم كامل ما تشوفني فيه...قمت بالغصب تلبست وطلعت الصاله
العنود: السلام عليكم
الجميع: وعليكم السلام
حمد: عنودي تريقتي؟
العنود: ما أشتهي شربت حليب بس
خليفه: أففففف متى بتخلص المدارس لاعت جبودنا
حمد:بعدك الا من شهر من داومت
عويش: أمايه شو أخبارها عفاري ( عفاري بنت موزه تعبانه من اسبوعين تقريباً)
آمنه: ما أدري يمكن يسافروبها
أم حمد: الله يعينهم
عويش: وساروه ولطوف
آمنه: أظني بيسيرن عند يدتهن ..
طلعت ويا عويش من البيت سرنا الجامعه... دخلت كلاس المجتمع شفت حمدوه وشمسوه
عند الباب ...
حمدوه: فديييييييت هالويه يا ربي
شمسوه: علني ما خلا من الحلا كله
لفن البنات يشوفن حمدوه وشمسوه يرحبن بمنو... الغريبه ان ميثوه واقفه وياهن من أول ما داومت في الجامعه هذي أول مره أشوفها...
العنود: السلام عليكم
البنات وعليكم السلام
شمسوه: غريبه متأخره اليوم
العنود: مشيت على الراحات
شمسوه: ما عليج دام حمدوه ويانا بندخل حتى لو ثمان ونص ما بيقول شي
ميثوه: ليش يعني؟
العنود: شدرانا عاد انتي بصريبه من يشوفنا أنا وشمسوه شياطين الدنيا بين عيونه ويوم يشوف حمدوه يخوز الضيج كله
مريم: ههههههه ساحرتنه
سلامه: خلنا ندخل والله بياكلنا
ميثوه: برايكن ادخلن أنا بترياكن جدام باب الكلاس عقب ما تخلصن بتلقني
دخلنا الكلاس .. والدكتور ما قالنا شي .. في المحاظره كنت يالسه وما تكلمت ولا حتى فتحت كتابي
شمسوه: عنودي شو فيج؟
العنود: تعبانه شوي
حمدوه: شو فيج؟
شمسوه: حشى شو اذنيج انتي
حمدوه: سمعتها وبس
العنود: بس جب الدكتور بيسمعنا
شمسوه: شي يعورج؟
العنود: منهد حيلي .. وبلاعيمي يعورني
شمسوه: من البيبسي البارد أمس
الدكتور: بس يا بنات وبعدين بأه .. انتا اللي ورا إزا مش عوزين تحضروا اطلعوا برا...
سكتنا .. افتشلنا البنات كلهن يتلفتن يدورن منو اللي يقصدها الدكتور
حمدوه: هههههه تستاهلن .. دوااكن هذي حوباتي
سكت عنهن وتميت أشخبط في كتابي ...
كتبت على الكتاب في الصفحه الأولى" على كثر الجروح اللي في قلبي ما شكيت الآه.. كلى كثر الهموم اللي تمادت أكتم العبره"
أحس اني تعبانه ومب قادره حتى اني أيلس ... حطيت راسي على الطاوله أتريا هاللغب اللي جدام يسكت ... الساعه تسع طلعنا من المحاظره رحنا المبنى ..
شمسوه: عنودي شو تبين ريوق؟
العنود: مالي خاطر
حمدوه: انتي شو فيج اليوم ؟
العنود: ماشي سيرن انتن اخذن اللي تبنه
سارن شمسوه ومريوم وتمينا أنا وحمدوه وسلامه وعقب يتنا ميثوه .. ردن شمسوه ومريوم ماخذات الريوق
شمسوه: عنودي يبت لج هوت شوكليت
العنود: تسلمين فديتج
حمدوه: مره ثانيه شربي بيبسي ورقدي .. انزين
شمسوه: أمس عقب ما روحتي دخل حارب الصاله شاف الغراش تعرفين شو قال
العنود: شوو!!
شمسوه: أكيد عنوده اللي شاربتنهن
العنود: خلاص دام انه صرح لنا لا يحاسبنا
حمدوه: لا والله احتشر ليش تشربين اثنينه
العنود: عادي خلاص جان بيصيبني شي بيكون صابني وخلاص
ميثوه: بعدكن تيلسن المغرب ويا بعض
مريوم: أي المغرب أنا كل ما أتصلهن دوم ويا بعض
حمدوه: بسم الله الله أكبر من عينكن بتاكلنا
كملنا الريوق وحمدوه فتحت لاب توبها ... فتحت البلاك بورد وصرخت
شمسوه: واللغثه شعندج
حمدوه: الدكتور ما بيحظر اليوم
شمسوه: جذااااااابه
حمدوه: هذوه منزل اعلان
العنود: يا حظكن .. مالت علينا دكاترتنا ما يتعايزون
شمسوه: يالله بسير البيت
حمدوه: هيه والله بنروح
ميثوه: وين تبن .. ماشي يلسن
حمدوه: لا بنروح الساعه عشر ( وغمزت للعنود .. على أساس انهن بيترينها لين يبدا كلاسها ).. ما عندنا شغله
العنود: الحين عشرالا ربع .. قومن يالله
شمسوه: حمدوه أنا بوصل عنوده كلاسها وبرد اتصلي حق غرين خليه ايي والا سليم
حمدوه: خلاص أوكي
طلعنا أنا وشمسوه نتمشى سايرين كلاسي ..
شمسوه: عنوده شو فيج
العنود: كم مره قلت لج ما فيني شي
حطت شمسوه ايدها على يبهتي
شمسوه: فيج حمى شوي
العنود: من البلاعيم
شمسوه: الله يغربل عدوج .. والله ان درى حارب ان فيج حمى بيحتشر
العنود( مستغربه): ليش يعني!!
شمسوه: هاه .. شو ليش يعني هب جنج شاربه من عندنا
العنود: أنا بروحي شربت محد غصبني
شمسوه: سويها مره ثانيه .. وبتشوفين
وصلنا الكلاس .. دخلت وروحت عني شمسوه .. حظرت كلاسي وكل مره أحس الجو يحر أكثر في الكلاس وما أقدر أتنفس ..
منى: عنود شي يعورج
العنود: تعبانه شوي
منى: تبيني أقول للسير انج بتطلعين
العنود: لالا ما شي باقي بيخلص الكلاس
منى: بتحظرين الساعه الثانيه
العنود: ما أدري
.. أحس الوقت طويل وأنا مب متحمله عمري .. أبغي أرد البيت بس شو الفايده عويش اليوم تخلص ويايه .. يعني بترياها .. طلعنا في البريك عشر دقايق
منى: عنودي حرارتج وايد مرتفعه ..خلينا نسير عند النيرس
العنود: لا ما أبغي .. بحظر الساعه الثانيه
منى: شو تحظرين وانتي بهالحاله
العنود: تحملت الدوام من الساعه ثمان ... وما بقى غير ساعه بتحملها ..
سرت صوب كلاس شموه ما لقيتها شكلها ما داومت اليوم .. اشتريت لي دبة ماي وردت الكلاس .. ما شي فايده كل ما يمر الوقت أحس ان تعبي يزيد أكثر عن أول... مب قادره أشرب الماي حتى...

السلام عليكم ...

السموحه منكم انا نزلت اكثر عن بارت لأني يمكن ما انزل الباقي هذي الفتره ..

و السموحه ...