منتدى استراحات زايد - ((.. الدنيا يا خلي مدرسه .. وسنين عمرنا حصص الالم منهج ندرسه .. والفرح فيها فرص ..))

تسلم اخوي

الــــــــــــــــــــــــــــــــجـــــــــــــــ ــــــــــزء الــــتـــــــــــــــــــــــــــــــــــــاســــ ــــــــــــــــــــــــــــــــع

رديت البيت دخلنا الصاله لقيت حمد وعموه وآمنه سلمت عليهم
حمد: ياااااالله عنبوه ما بغيتي تردين
العنود: احمد ربك ان باجر إجازه والا بعدني بداوم باجر وبرد فليل
أم حمد: شحالهم أهلج؟؟
العنود: يسلمون عليكم
أم حمد: الله يسلمهم
خليفه: عنودي منصور البارحه حشرني يباني أوديه عندج ويامانع
العنود: فديت قلبه جان يبته
آمنه: عنبوه هو بيتم الا يسير على حسابج
الحين أنا شو قلت... أففف أسير الحجره أبرك .. عنبوه مب محشمه لا حمد ولا عموه.. المشكله أني ما سويت بها شي ليش تكرهني ما أدري ..
أم حمد: وااابويه تراها عمته
حمد: العنيدي تعالي براويج المكتب
العنود: اشتريت المكتب؟؟؟
حمد: وإذا ما عيبج .. لا تسميني حمد
العنود: عيل يالله .. من الحين بسيمك حموود
حمد: عنلاتج .. شوفيه قبل
طلعنا من الصاله دخلت حجرتي .. بصراحه المكتب كان وااايد حلو .. صدق عيبني
العنود: مممم يعني
حمد: شو يعني؟؟
العنود:هههههه لا والله حلو روعه.. خلاص أعطيك عشره على عشره
حمد: شو تتحرين أخوج أصلأً أنا كل اللي دخل عندي في الشركه يسألون منو المهندس اللي اللي مسوي الديكور
العنود: هيه يعني انته اللي مهتم بالديكور في الشركه
حمد: هيه نعم
العنود: الله يعين الموظفين عيل
حمد: شوووو
العنود: هههه خبرني انزين متى خذته
حمد: أمس .. كان عندي شغل في شارع خليفه وخطفت آخذه
العنود: تسلم حمد ماتقصر
طلع حمد عني وأنا من سار عني حمد غيرت ملابسي ولبست شيلتي وسرت بيت أم عبدالله ..دخلت وسمعت صوت البنات في المطبخ التحظيري .. هاي محد غيرها شميس اطبخ .. فجيت الباب بقووو وفجأه
العنود: مرحبااااااااااااا .. قوطي صلصل وصل
لاااااااااااااا.. قففففففطه أحس ان ويهي استوى حاااار .. منوهذي .. الله يغربل العدو دوم هالمواقف البايخه تصير.. الحين شو بخسر لو دخلت وسلمت بهدوء.. نزلت راسي
العنود: السلام عليكم
حمدوه: ههههههههه
شمسوه: هلاااااااا ميلااااااايين .. فدييييييييييت هالويه ياربي
سلمت على البنات
حصوه: ميثوه هذي العنود
ميثوه: هلا والله
حصوه: عنودي هذي ميثوه بنت خالة أمايه
العنود: مرحبا شحالج ميثا
ميثوه: بخير ونعمه .. شحالج انتي
العنود: بخير ربي يسلمج
حمدوه: يالسباله تولهنا عليج
العنود: حتى أنا والله
شمسوه: العنود تعالي يابوج من متى حاطه الكيكه في الفرن من ساعه .. افتشلنا في ميثوه يبناها ويلسناها في المطبخ
ميثوه: لا فديتج عادي أنا الا من أهل البيت
العنود: وهالكيكه اللي من ساعه في الفرن كم مره فجيتي الفرن عليها
شمسوه: ما أدري
العنود: عنز
قمت وخلطت خلطه يديده وحطيتها في الفرن ويلسنا نسولف
حصوه: قومن خلنا نطلع .. عنبوه دوم زابنات في المطبخ
حمدوه: اللي يرابع شمسوه بيبات في المطبخ
العنود: شي بيبسي؟
حمدوه: من سرتي محد يشرب منه غير حارب.. عقب ما روحتي هزبنا أونه انتن مخلصاتنه
قمت وفتحت الثلاجه وطلعت غرشة بيبسي وفتحتها ويلست أشرب منها ..
العنود: عويش وين؟؟... ما لقيتها في البيت
حصوه: كانت ترمس ساروه في الصاله
حمدوه: عنودي الكيكه
العنود: بعدها صبرن
حارب( يدخل): حوووو قواطي شو تسون أنا يوعان
حمدوه: نسوي كيكه
حارب( مبتسم): شحالج العنود؟
العنود( مستحيه): الحمدالله يسرك الحال ومن صوبك
حارب: الحمدالله .. وفي خاطره ( من شفت محياج)
( وقف لحظه مركز عينه على العنود ومبتسم)
شمسوه: أحم أقول حارب
حارب: هاااا
شمسوه: انت سير وعقب ما تخلص الكيكه بييب لك منها
حمدوه: اللي يسمع يقول انج انتي مسوتنها .. طالعي كيكتج كالعاده في الزباله .. هذي كيكة العنيدي
حارب: إذا مثل كيكة المره اللي طافت هاتلي منها
حصوه: انشالله
حارب( يشوف البيبسي على الطاوله): منو منكن اللي شاربه بيبسي
حمدوه: العنود
حارب: أنا شو قايل
العنود: ما يسوى عليك الا بيبسي هوه
حارب( في خاطر): حشى ما بغت تنطق وترمسني بشي غير السلام .... يالله حتى لو شو ما قالت المهم رمست
سار حارب صوب الطاوله وشل غرشة البيبسي وشرب منها ..
حارب: أححححححح حلوه بارده.. شكلي بظرب الثلاجه بقفل
حمدوه( بخبث):ما نهون عليك
طلع حارب من المطبخ وأنا أحس اني بمووووت من الفشله .. صدق اني عنز .. ليش خليت الغرشه على الطاوله .. أصلاً ليش أشرب بيبسي.. صح هو يغلس علينا بس فشششله ..يلست وأنا منصدمه من جرأته .. شل البيبسي مالي وشرب منها .. على كيفه هو..
حصوه( تصرخ): الكيكه
فتحت الفرن بسرعه وطلعت الكيكه
العنود: لا سليمه سليمه
حمدوه: آآآخ.. لو احترقت كنت بنتحر من طابوقتين
العنود: وايد عليج
قطعت الكيك وحطته حصوه في صحن وسرنا الصاله .. سلمت على الحريم ويلسنا على طرف نحن البنات
حمدوه: أقول ميثوه ما انخطبتي؟
ميثوه: لو انخطبت بتسمعين لا تخافين
شمسوه: يااااااااربي متى بعرس
العنود: واللغثه.. عنبوه انتي ما تستحين
شمسوه: لا ما أستحي كلكن بنات
حصوه: لا تستعيلين عليوي سنه وبيقول أبغي أعرس
شمسوه: وانتي على كيفج تيوزيني عليوي
حصوه: لا مب على كيفي هذا اللي أسمعه
العنود: مسودة الويه بتحصلين أحسن عن علي
شمسوه: بس بس انتن محد يفتح لكن سالفه
العنود: ههههه لالا تبينها هالسوالف افتحيها
يلسنا نسولف لين أذن المغرب وعقب ما روحن ميثا وأمها دخلنا نصلي وردينا نيلس في المكان المعتاد..الحريم على صوب والبنات على صوب
شمسوه: عويش بتسيرين ويانا دبي؟
عويش: هيه بسير أكيد دام انه خالي حارب بيودينا
شمسوه: قولي حق خالي ان العنود بتسير ويانا
العنود: شمسوه..
شمسوه( تقاطعها): جب انتي .. عويش قوليله اننها بتسير ويانا هيه ما بتقوله أدري بها
عويش: انشالله

السلام عليكم .....

مشكور اخويه " غرشوب البدو " لانك كملت القصه وانا الحين بكملها عنك ...

التكمله
:
:
:
عويش: انشالله
شمسوه: قولي له انتي وعنودي .. تفهمين
عويش( بعصبيه): انزييين.. شو تفهمين هذي بعد شو تحيديني
شمسوه( تهمس لحمدوه): عنز .. صدقيني ما بتقوله
حصوه: انتن وين بتسيرن بالتحديد؟
حمدوه: أكيد الستي..
حصوه: أخبركن هب تفضحنا في عمي .. تسمعن
حمدوه: ورا باجر سيره معتبره .. وبتتغدون في أحلى مطعم
حصوه: عمي حارب بيخطفج مطعم!! تحلمين انتي
شمسوه: أكيييد عيل تبينا نموت من اليوع.. هو قال أمس وين ما تبن بوديكن
عويش: إذا أبويه ماسوها قبله .. خالي حارب بيغدينا في مطعم
حمدوه: أوووكي بنشوف
عقب ما اذن العشى رديت البيت وياعويش وعموه وآمنه .. صلينا العشى وسرنا نتعشى .. وعقب العشى كنا يالسين في الصاله..
عويش: أبويه
حمد: عونج..
عويش: بسير ويا خالي حارب دبي
حمد: سيري برايج ..
بصراحه يتني ضحكه .. حسيت اني بنفجر من كثر مب كاتمتنها .. شمسوه لو تدري انها ما قالت له بتصرطها. وما قدرت أقول حق حمد اني بسير وياهم بعد.. لوكان علي بيودينا بقوله .. بس أقوله اني بسير ويا حارب مستحييييييل...الساعه 11 دخلن حمدوه وحصوه وشميس
حصوه: السلام عليكم
الجميع: وعليكم السلام
حصوه: شحاك خالي
حمد: حمدالله .. شحالج غناتي
حصوه: بخير ربي يسلمك
شمسوه: هيه حصوه شحالج ونحن أكبر طاااااف
حمد: ههههه شحالج شماسي
شمسوه: الحمدالله .. وحمدوه بعد بخير الحمدالله
خليفه: عنبوه .. خليه يسألها وهيه ترد عليه .. على كيفج اتبرعتي بالسؤال والجواب
شمسوه: هيه...
حمد: يااااالله بالستر ..محد منكن يت عاقل غير حصيص!!
حمدوه: أفااااااااااا .. أفااا ياخالي أفااااااااااااا.. ونحن امره طلعتنا ميانين
خليفه: حي الميانين عنكن يالقواطي
العنود: خل عنكم عاد انتوا...ما ترومون علينا
خليفه: أبويه أنا أبغي أعرف اختك ليش خقاقه هالكثر
حمد: يحقلها..منو مثل حلاة أختي
العنود: هييييه والله صدقت .. وغير جذيه بعد يسد اني بنت سيف بن حمد.. وعندي أحسن أخو في هالدنيا ..
حمد: ياااااالله يالمكاره
خليفه:هههههههه تستاهلين
العنود: أصلاً حمد يعرف اني ماأجامله
شمسوه: عويش.. قلتي حق خالي؟؟
حمد: عن شوو؟!
شمسوه: خالي يوم الخميس عمي حارب بيودينا دبي وعويش والعنود بيسيرن ويانا
حمد: العنود بتسير بعد؟؟
شمسوه( تخز عويش بنظره سممم وتهمس لحمدوه): قلتلكن عنننننز وما بتقوله .. وياراسج أنسه شحروره أنا أراويج
حمدوه: هيه نباها تسير ويانا
حمد: مرخوصات برايكن .. بس عاد عن الخبال انتن من تيتمعن تشلن الدنيا شلول
شمسوه: لالا ما عليك
يلسنا ويا حمد تقريباً لين الساعه وحده وعقب سار يرقد ونحن كملنا السهره لين الساعه ثنتين ونص وعقب دخلنا نرقد...
.................
( يوم الخميس)
قمت أسمع التيلفون يرن .. رفعت التيلفون أحاول أشوف منو متصل.. طولت لين قدرت أفتح عيني أركز على شاشة التيلفون..
العنود: أألووو
شمسوه: صبااااح الخير
العنود: بسم الله من حسج شو موعنج من الحين
شمسوه: أولاً الحين الساعه ثمان الا ربع وحارب قال بنطلع ثمان ونص
العنود: وثانياً
شمسوه: ثانياً أنا يا حبيبتي مثل اليهال إذا قالوا لهم بترحون مكان ما اييني رقاد.. وسيرة دبي بالنسبه لي اليوم افراااااااج من السجن الصيفي اللي محكوم علينا فيه
العنود: هههههه انتي متى بتكبرين
شمسوه: خلينا عايشين حياتنا ونحن في هالسن.. تعرفين شو أكثر شي شاطني على السيره اليوم
العنود: شوووو؟
شمسوه: الغدا في المطعم أول مره تستوي في تاريخ عايلتنا البنات يتغدن في مطعم
العنود: شمييييييس لا يكون قلتي حق عمج اني أنا قايلتلج
شمسوه: لا والله .. هو بروحه أصلاً اللي تكرم علينا .
العنود: حمدوه وحصوه نشن ؟
شمسوه: حصوه عادي كالعاده هذا وقت نشتها القاله في البعير المكود
العنود: منووو؟
شمسوه: حمدووه
العنود: هههههه
شمسوه: يالله قومي..وطالعي آنسه شحروره إذا قامت .. إذا ما قامت لا توعينها مانباها تروح
العنود: لا والله .. مابسير عنها .. بوعيها
شمسوه: مالت عليج
العنود: جلبي ويهج
شمسوه: بااااااااااااي
سكرت عن شمسوه وقمت أتجهز... عقب ما خلصت طلعت في الصاله ولقيت عموه توها بتطلع سايره بيت أم عبدالله بتتريق وياها ..سرت صوبها وايهتها..
العنود: شصبحتي عموه؟
أم حمد: بخير الحمدالله.. وين تبين بنتي من الصبح
العنود: بروح ويا البنات السوق
أم حمد: هيييه أشوف عويش متلبسه بعد
العنود: راحت؟؟
أم حمد: أحيدها يالسه في الصاله
لفيت ورايه شفت عويش يايه صوبنا
عويش: متى نشيتي ؟
العنود: ثمان الا ربع اتصلت لي شميس
طلعت ويا عموه وعويش رحنا بيت أم عبدالله.. دخلنا الصاله لقيت البنات كلهن جاهزات ويالسات يتريقن
أم حمد:السلام عليكم
الجميع: وعليكم السلام
أم حمد: شصبحتي أم عبدالله
أم عبدالله: بخير ربي يسلمج
أم حمد: ماشالله كلكن بتسيرن
حمدوه: هيه يدوه كلنا
أم حمد: منو بيروح وياكن ؟
أم عبدالله : حارب بيوديهن .. مابيروحن ويا الدريول
أم حمد: هييييييه... تعالن العنيدي عويش.. تعالن تريقن
العنود: لا عموه ما أشتهي
أم عبدالله: وين تبن تسيرن السوق تهلكن بلا ريوق
حارب( يدخل): ان طاحت وحده هناك بسير عنها وبخليها... بسوي عمري ما أعرفكن
حمدوه: هب غريبه عليك
حارب: يالله تعالن كلكن تريقن
تريقنا .. وطلعنا في سيارة البيت ( استيشن) لأن حارب سيارته bmw وطبعاً ما تسدنا .. ركبت حصوه جدام وركبنا نحن الأربع ورا.. أول ما طلعنا من البيت حسيت تيلفوني يهز.. فتحت الشنطه أطالع تيلفوني .. هذي نوروه .. شو موعنها من الصبح ؟؟... استحيت أرمس في التيلفون جدام حارب..
شمسوه: شو عندج .. حووو العنيدي
العنود: صبري .. شوي
...
العنود: ألووووو
نوره: السلام عليكم
العنود: وعليكم السلام..شو عندج متصله على هالصبح
نوروه: ليش نسيتي انا بنروح دبي
العنود: هيه والله نسيت
نوروه: انتي وين ؟
العنود: نحن طلعنا من البيت
نوروه: حتى نحن تونا طالعين
العنود: منو وياج؟
نوروه: أنا ومنى وحمده ومريم.. وأحمد مودنا
العنود: الحمدالله ماسرت وياكن عيل
نوروه: يالله يانتي..قوليلي وين بتروحون قبل
العنود: ما أدري
نوروه: شو ما تدرين
العنود( بهمس): شمسوه وين بنسير قبل؟؟
شمسوه: حارب وين بنسير قبل
حارب: ليش تسألين؟؟
شمسوه: انت قول وخلاص
حارب: أول قولي ليش تسألين؟؟
شمسوه: ييييييهاااا علينا .. العنود مواعده خالتها.. بتسير دبي بعد
حارب: مب انتن تبن الستي!!؟
حمدوه: هيه
حارب: خلاص بعد شو
العنود:ألووو نوروه بنسير الستي قبل
نوروه: أوكي برايج أشوفج هناك
العنود: خلاص برايج عيل
نوروه: أحمد يسلم عليج
العنود: الله لا يسلمج لا انتي ولا هوه .. جلبي ويهج ..
سكرت عن نوروه منقهره منها.. وين يبى يطرش سلام أفففففففف والله انه سخيف من أذكر رمسته أحس اني بموت من القهر
شمسوه: خيبه العنود بلاج احترقتي..
حمدوه: منو مطرشلج سلام
العنود( بهمس): وويعه انشالله ما ترومن تسكتن لين بعدين
حمدوه: حارب يابوك شغل الإف إم خلنا نغير المود شوي
شغل حارب اللإف إم ..
حارب: شوفن بدال هالصدعه سكتن وسمعن الاإف إم
حمدوه: أنا ما أروم أسكت في السياره تلوع جبدي
حارب: عاد انتن طمعتن ما بغيتن بوظبي .. نطيتن دبي
شمسوه: نحن طول الإجاره ماسرنا مكان..
حارب( يقاطعها): بس بس خلاص ما يسوى عليه شغلت شريطها شمسوه .. يابوج وين ما تبين اليوم بوديج فكينا من الصدعه
حمدوه: أول مره أدري ان لسان شمسوه يكون له فوائد
العنود:ههههههه
شمسوه: والله لو ما لساني جان محد وداكن غير العين مول وكارفور
حمدوه: لا والله هب عشانج هالسيره عشا...
حارب: حمدووووه..ماتبين تاخذين حمام شمس في الدرب لين نسير ونرد
حمدوه:لالا خلاص بسكت
يلسنا نسولف شوي وقبل ما ندخل دبي كنا نسمع الإف إم وسمعنا المذيعه( استاذ بيبسي يطلب غنية حمد العامري .. لايق عليك..ويهديها لجميع شلة القواطي) سكتنا فتره نستوعب اللي سمعناه ..
حارب: شو رايكم ؟؟
حمدوه: يعني انت استاذ بيبسي
شمسوه: وأنا أقول شعنده يقول سكتن واسمعن
عويش: انزين لايق عليك حق شلة القواطي .. وأنا وحصوه ؟؟
حارب: تراكن منهن
شمسوه: هههههههههههااااهاااااي
حصوه: بسم الله عليكم شو ياكم اليوم .. حد ساطعنكم على روسكم .. مخترشين
طول حارب على المسجل وربشنا لين دخلنا السيتي .. أول مره أعرف انه سوالف جذيه.. وصلنا السيتي ما أروم أمشي من الضحك....
حصوه: يالله يا حارب حد يضحك العنود الحين بتنقع من الضحك في نص الستي
حارب: هاه العنيندي .. بسج ضحك خلاص خلينا ننزل
حمدوه: بطني عورني .. الله يسامحك يا حارب
حارب: سمعن ما أبغي ضحك ومصخره.. يبتكن اليوم وخلني أيبكن مره ثانيه وما أندم على هالمره
حمدوه: انشااااااالله
حارب: يالله نزلن
نزلنا من السياره ودخلنا .. كنا في الطابق الثاني بندخل المحل واتصلت لي نوروه تقول انهم وصلوا قلت الها اني ما أقدر أخليهم وخليتها تسير وياهم ..
دخلنا مانغو وكل وحده منا خذت مكان تشوف اللي تباه وحارب واقف ويا شمسوه أشوفه يرمسها ويضحك وهيه معصبه مامخلنا تشتري .. يلست أختار اللي أبغيه وسرت عند حمدوه
العنود: حمدوه أي وحده أحلى؟؟
حمدوه: بصراحه كلهن حلوات
العنود: ممم محتاره مب عارفه شو أختار منهن
حارب: حمدوه البنيه أحلى
حمدوه: مب حقي هذي للعنود
حارب: السموحه منج
حمدوه( ترمس حارب بصوت واطي): أونك الحين ما تعرف انها هيه اللي محتاره بينهن هب أنا
حارب: أعرف بس أستهبل
العنود: بسير صوب حصوه
سرت عند حصوه ووقفت أختار وياها.. خلصنا ووقفنا نحاسب ..
( استانس حارب يوم شاف ان العنود خذت التنوره البنيه )
طلعنا من مانغو ودخلنا كذا محل وكل محل نيلس فيه أكثر من ساعه ..
حارب: ما خلصتن .. متنا من اليوع
حمدوه: خلنا نسير الكوفي بنشرب شي وبنرد
حارب( بنقمه): لاا والله .. شو رايج تعقين الغشوه وتخطفين بنص الكشه برا بعد
العنود:هههههههه
حمدوه: أنا أبغي أعرف انتي ماعندج شغله غيرالضحك
حصوه: عمي فديتك تعبان؟
حارب: علني مالخلا من الزين كله.. مالت عليكن
حمدوه: انزين اسمع الحين الساعه وحده .. الساعه ثلاث بنطلع
حارب: ياااااااالله كل هاللي اشتريتيه وبعدج تبين ثلاث ساعات
شمسوه: مب انت قلت لنا بتودينا وين ما نبغي
حارب: حشى انتن من دخلتن ما بغيتن تظهرن
شمسوه: احمد ربك ان المحلات اللي نبغيها كلها هنيه
حارب: الناس يدخلون المحلات اللي في الطابق الأول وعقب يسيرون الطابق الثاني .. انتن كم مره ركبتن ونزلتن
العنود: هيه والله حشرتنا شمسوه الا ننزل فوق ونركب تحت
حارب( يبتسم يااااربي بموت عليها هالبنت): تستخفين دمج العنيدي وتطنزين عليه هااه
العنود: لا حشاااك.. محشوم بس أغلس عليكم
حمدوه: انزيين خلونا ندخل زارا الحين من متى خاطري أدخله
حارب: والله أنا ما أشوف فيه زود ..أونكن عاد تعرفن تشترن.. لبسهم كل قطعه من صوب شمسوه:تراها هذي الموضه
حارب: انزين يا أم الموضه سيرن خلصنا
تفرقنا في المحل وأنا وقفت أركب تنوره على البودي اللي عندي من متى أدور تنوره تركوازيه ما حصلت .. والحين لقيت تنورتين يناسبن .. رفعت التنوره شوي وما حسيت الا بايد من ورايه تسحب التنوره .. تصنمت مكاني هذي ايد ريال.. وبعده واقف ورايه .. وأنا مب قادره ألف على ورا

رفعت التنوره شوي وما حسيت الا بايد من ورايه تسحب التنوره .. تصنمت مكاني هذي ايد ريال.. وبعده واقف ورايه .. وأنا مب قادره ألف على ورا

وبس ... اتريوا الجزء العاشر...