منتدى استراحات زايد - أنا وأنت ، وسما بوظبي تجمعنا / بقلمي

البــــــارت التـــاسع عشــــر .

/
\
/
\
/
سيف وميره"صرخوآ" : بننننروووح دبيييي ..
ندى : شو نسوي هننـاك ؟
سيف : ماعرف .. بس مـاما قالت لـ بابا ان لازم نغير جو ..
ندى " دآم بنروح دبي اكيد بشوف عممي ؟ وآو " : اوك بيي .. "ونقزت من ع السرير .. و بعدها رجعت للشياطين ، تذكرت شي " ليييكون خلوف بيي ؟
ميره : لآ مآبيي .. ! يقول عنده شغل .
ندى "بصوت واطي " : إلا موآعد هه .
ميره : شو ؟
ندى : ماشي ماشي حبيبتي .. خلاص بتجهز وبييكم ..
سيف : بسرعه بسرعه عشان مانتأخر ..
ندى : زين يَ قلبي .

- - - - - - - - -

ندى : وآو و أخيرًا و للمره الأولى .. طلعه عائليه !
ميره : يالله نننندى ..
ندى : زين زين .. طلعو انتوآ .. " وطلعتهم و سكرت الباب "

" تسبحت و صليت وشوي إلا زنوب تدخل علي "

زينب : صبآح الخير .
ندى : صبآح النور ..
زينب : ماشاءالله تجهزتي ؟
ندى : ايي يعني ..
زينب : زين ندى جهزي شنطتج بعد ..
ندى"بصدمه": ليي ليش .. ليكون بتردوني عند عند عمي !!
زينب : هههه لآ حبيبتي بس بنبآت فـ فندق ف دبي ..
ندى : وآو ونآسه ! اول مره .. بس اي فندق عاد ؟
زينب : خلها مفآجأه ..
ندى : ههه زين بنشوف ذوقكم ..
زينب : إن شاء الله يعيبج عاد "وغمزتلها "
ندى"ابتسمتلها "
زينب : يالله عيل اخليج .. ترا بنطلع بعد نص ساعه .
ندى : اوك اوك .. ما بأخركم والله ..

" و خلتني بروحي عسب اجهز اغراضي .. سبحآن مغير الأحوال .. صرآححه زينب يوم طيبه حتىى ملامحها تصير احلى .. ان شاء الله ما تتغغير.. بحاول اسمع كلامها و احسسها اني نفس بنتها .. يمكن تحبني ؟! أوه خل اجهز احين عن اتأخر عليهم وعقب يهونون ويخلوني فالبيت ههه .. - جهزت شنطتي .. حسب علمي بنقعد طول الويكند هناك يعني لين السبت … المهم عقب ماجهزت الشنطه لبست فستآن سمبل ابيض و عليه لولو *ترآ لو تلاحظون أحب ألبس الفسآتين السمبل* و كمملت بالاكسسوآرآت كآنت كلها لولو .. و حطيت ميك اب نآعم وخفيف .. وبعدها لبست عبآتي المفتوحـه اللي ايدينها وآسعه *عسب تبين الاكسسوآرآت* .. و تعطرت و تبخرت و حطيت دهن عود .. وخلصت أم الكشخه .. و بعدها نزلت من الدري و انا اسحب شنطتي . . "

خليفه : ماشاء الله الشيخه ندى .. سايره عرس ؟
ندى : مايخصك..
خليفه : جب بلا قلة ادب .. !
ندى : بل .. جب يجبك شفيك علي ..
خليفه : يالله فكينا لاه اخرتينا ..
ندى"فجت عينها" : اننت بتتي ؟! "وإلتفتت لميره وسيف" قلتوولي مابيي !!
سيف : مماعرف توه الا قال بيي ..
ميره : اوف بيسوي زحمه ..
خليفه : جب كيفي .
ندى "سبحان الله حتى الصغآر مايبونه .. زين شكلهم صآروآ فـ حزبي انا "
بورآشد " توه يآي صوبنا ومعصب " : خلاص عاد انت وياها .. لاتصدعونآ من احين .. يالله ع السيـاره تأخرنا ..
ندى"اتطالعت سآعتي" : بـل السآعه 9 ويقولون تأخرنا .. ترا مب رآيحين امريكا ،، إلا هي دبي .. فرة حصى !
زينب : نعم ؟
ندى : لالا مآشي ..

"ومشينا كلنـا للسيآره العآئليه اللي هي نيسآن بترول اليديده - لونهـا ابيض + كروم .. ، طبعـًا ابوي يسوق وحذاله زينب و ورآه خلوف و ميره و سيف و انا تبرعت وقعدت ورا اخر شي *عشان اكمل رقاد* كـان خليف جدامي بالضبط .. وشاشه فونه واضضحه بالنسبه لي ! كآنت محادثاته سخيفه يعني يكلم بنات وو حبيبتي وحياتي ومادري شو فـ مآفي شي مثير للاهتمام .. ارقد احسنلي .. "

ميره : ننندى قوممي ..
سيف : هاااي كله ترررقد ..
ندى"فتحت عينها بكسل وبصوت كله رقآد" : وانتوآ كله توعوني .. مسرع ماوصلنا ..
سيف : لا مآوصلنا بعدنا الا هاي شيشه السمحه ..
ندى : وليش وقفنآ .؟
ميره : ععشان عشان ناخذ أكل وو ريوق ..
ندى : زين هاتولي معاكم مافيني انزل ..
سيف : اووك . . " ورآحوآ الثنآئي المرح وبعد نص سآعه رجع الكل للسيآره "
خليفه "مآسك الجيسه ويوزع ،شكلهم يتأكدون لو مآنسوآ شي" : ها كروسونج ميروه ؟
ميره : ايي ماليي ..
خليفه : وهذا مالج يمآ ،، و ييود سيف هذا مالك .. "وتم يوزع وبعدها فرالجيسه"
ندى"كنت بموت من اليوع فـ قاعده اترقب ههه" : واننا مالي ويين ؟
خليفه : ممالج ؟
سيف وميره"إتطالعوآ خليفه"
سيف : انا خبررتك انها تبي ..
ميره : وانا عطيتك كروسون و جبس وعصير حق ننندى !
خليفه "بنذاله" : اووه نسيت اييبه ..
ندى"اشكره قآصد؟!" : خلاص ممابي اصلن ..
بورآشد "رجـع للبآركن .. كان توه متحرك فـ مابعد .. مآهآن عليه بنته تموت من اليوع . . " : يالله ندى انزلي اشتريلج شي ..
ندى : سيف .. انزل خذلي .. مافيني ..
سيف : انزلي معآآي مايستوي اروح بروحي ..
ندى : آوف زين انا ورا اخر شي ..
سيف : صبري بنزلج السيت ..
"ونزل السيت و نزلت مع سيف .. "

- - -

سيف : ردبببول ؟! مبب زين ..
ندى : شفييك .. عادي دوم اشرببه ..
سيف : لا ننندى بعدين بيستويلج شي مب زين ..
ندى "ماقدرت ع براءته": ياقلبي ع اللي يخافون علي ! خلاص بآخذ شي ثاني ..
سيف : تبين دونـات ؟
ندى : ايي شي .. ؟
سيف : صبري بيبلج .. "ورآح بعيد"
ندى "خذتلي خرآبيط وبعدها ، شكلي ضيعت سيف فـ قعدت اناديه بصوت عالي" : سسييف ، سييف .. سيف ووينك ..
"إلتفت وآحد لـ ندى .. شكله إسمه سيف ! مآكآن يقصد شي بس لآتلقائي يوم حد ينادي بإسمك وترد عليه " : عيون سيف .. ؟!
ندى"اتطآلعته ، انا ناديته ؟ آححمريت من الحيآ ووجاوبت بتوتر و كأني متخربطه " : لآ ممب انننت ، "أشرت بايدي" سيف الصغير …. "وقلتلها لا إرادي " أخوي الصغير ..
سيف : أفا ضيعتي سميّيِ ..
ندى"نزلت رآسي و هزيته بمعنى نعم" ..
سيف : صببري بدورلج اياه .. "وقآل بصوته الرجولي العآلي " سييف ؟ "ورآح ينادييه لين مالقاه وسحبه لـ ندى"
ندى"بخوف" : اننت ويين كننت ..
سيف : مممآعرف شفت وحده تحريتها انتي ولحقتها ..
ندى "ضربته ع راسه بالخفيف" : حممار خوفتني عليك ..
سيف"الكبير هه" : خلاص لقيتي اخوج ؟
ندى : ايي مششكور اخوي ..
سيف"الكبير" : العفوو بس ترآ مآسويت الا الوآجب "ورآح"
ندى " وأخيرًا ؟ وآحد فهالبلاد يسآعدني لوجه الله بدون مآيطلب رقم ولا يكون معجب أو شي ههه .. الله يكثر امثـاله .. "
سيف : ننندى شو اتطالعين يالله تأخرنا ..
ندى "كـ عادتي سرحت شوي! " : انتوآ كله متأخرين .. زين خلاص خلصت اصلن ..
" وحآسبت و رجعنـا للسيآره .. ترست بطنـي و تليقفت شوي وتميت اتطالع شآشه بلاكبيري خلوف .. كآننت كل محادثاته ممله ماعدا وحده "

أحمد : حرام عليك اللي سويته بـ ندى .. اظن ابوك ذبحها عقب الفضيحه .
خليفه : تستآهل والله واصلن تستاهل اكثر من الذبح بس للأسف ابوي ماسوى شي !
أحمد : غريببه ليش ؟
خليفه : والله روحي مادري .. شكله غسل ايده من هالندى .
أحمد : الحمدلله ماسوالها شي .
خليفه : أحمد ؟ شفيك متعآطف معاها تراك ماتعرف عنها كثري ..
أحمد : ليش شو تعرف انت ؟
خليفه : نفس مآخبرتك البنيه قذره . !
أحمد : استغفر الله .. انا للحين متلوم من اللي سويته فيها .. والله يا خليف عمري ما طلعت مع وحده شريففه نفس ندى .. ماتكلم شباب ولايخصها بهالحركات .
خليفه : هذي ؟ هذي شريفه ؟ شكلك غلطان .
أحمد : والله يا خليفه .. الكتاب مبين من عنوانه .. شوفها عدل وبتعرف .
خليفه : ههه خسي .. هذي الشيله مآتلفها كآمله .. والعباه عمرها ماسكرتها ، وتقول شريفه ؟
أحمد : خليفه ؟ بعدها ياهل .. وبعدين شدخل ياما بنات متحجبات و متسترات وهم من تحت لي تحت ، و ندى لأنها طلعت شوي من شعرها و فتحت عباتها صارت صايعه ومنحطه ؟!
خليفه : اوف لاه غير الموضوع ..
أحمد : زين زين ..

" ندى ؛ و رجعوآ يسولفون عن البنات ،، استآنست يوم حسيت ان في حد واقف ف صفي مثل أحمد .. هذا اللي يستحق يكون أخوي … مب خليفه اللي مب ويه أخوه .. أوف خل اكلم البنات فالقروب احسنلي "

- *قروب البلاكبيري* القروب ؛ ندى ، رنا ، عليا ، خلود ، امون -

ندى : بننات شو تسسون ؟
عليا : ماشي .
رنا : مي تو .
خلود : حتى انا ملل والله.
امون : ويو ، انا فـالدرب سايره دبي ..
ندى : وي ياحليلكم ، أوب امون نفسي .. مي تو سايره .
خلود : أوف وجع قهرتوني ، بسير اتطالع فلم ع osn movies احسنلي.
رنا : خلود قلبي بيي بيتكم . "ترا رنا وخلود جيران"
خلود : حياج افا عليج ويت بجهز البوبكورن..
عليا : أوف خلود ورنوش زقوم يالجلاب ماتعزمون ..و امون و ندوي انتوا الثنتين يالعلل هاف فن فدبي وإنجوي .
امون : هههه ياحليلهم شفتي كيف ياندى محد مستانس الا نحن .
ندى : ايي ياحظنا .. قولوا ماشاء الله عن تحسدونا .
عليا : وي وجع وجع .. شكلي بروح بيت خلود ابركلي .
امون : هههه وحليلهم .. إلا اقولج ندى وين بتسيرين فدبي ؟
ندى : ماعرف وانتي ؟
امون : جميرا يَ روحي !
ندى : ترا ماعرف شي فدبي .. شو هاي جميرا ؟
امون : يَ قلبي هاي اكبر تجمع لـ بنات وشباب دبي هههه .. وجي كله مطاعم وفنادق و بحر وونآسه ودرآجآت ونآس من كل الدول وو تطمشين ع كيف كيفج .
ندى : حمستيني .. خلاص بييج افا عليج .. حآجزين فـ فندق ؟
امون : ايي حاجزين فـ السوفتيل اللي فجميرا.. وانتوآ ؟
ندى : مآعرف .
امون : كل شي ماتعرفين ويا هالويه .
ندى : هههه مآدري ماخبروني .. خلاص بعرف وبخبرج .
امون : اوك .. خل نتلاقى عاد .
ندى : افا علييج .

- و خلصت المحآدثـه ، وأخيرًا وصلنا دبي . . سمعت أبوي يقول -

بورآشد : سمعوآ .. زينب وميره خلكم فالفندق نحن بنسير نصلي اليمعه وبنرد .
زينب : تصلي اليمعه ؟ بس بعده بآقي سآعه !
بورآشد : بالمره بنشوف مطعم عسب نطلب غدا .
زينب : زين اللي تشوفه .
ميره : بابا .. خل نتغدى فالمول .
بورآشد : بس ؟
سيف : هييه بابا خل نآآآكل فالمول احلى .
بورآشد : زين زين يصير خير .

" وصلنـا للفندق ودخلنا الغرف.. ويت بنسكن هنـي ؟ مستحيل عمري ما توقعت ان ادخل هالمكان. . !! تعرفون وين ؟ أوك بسآعدكم .. تعرفون وين هالصور ؟ "

\
/
\

http://im55.gulfup.com/zmVjBQ.gif

" عرفتووآ ؟ برج خليفه . وآو .. أحلى مفاجأه .. وأحين بنقسم الغرف .. مثل مآخبرتكم بما إنه الصغآريه فـ حزبي فـ لزقوآ فيني ويبون يبنامون معاي .. اما خليفه فـ فغرفه بروحه و زينب و ابوي فـ غرفـه .. ماعلينا . أحين ابوي و خلوف و سيف طلعوآ ومحد بقى إلا انا وزنوب وميره "

ميره : ندى كلممي ماما .
ندى : شتبين حبيبتي ميره شو اقوللها ؟
ميره : خل نروح دبي مول ملل هني .
ندى : دبي مول ؟ وين هذا ؟
ميره : هننني تحتنا شووفي "وقعدت تأشر من الجآمه"
ندى : وآو !
ميره : شفيج اول مره اتين هني ؟
ندى : الصرآحه ايي !
ميره : ههه عيل تعالي خل نروح .
ندى : زين يمكن ماماتج ماترضى .
ميره : انتي كلميها يالله ننندى خل نروح .
ندى : انزين انزين بشوف ..
"ورحت لها "
زينب : شتسوون فدبي مول ؟
ندى : ميره تبي ترووح و بشوف بنتمشى وجي ويمكن نتغدى .
ميره"بصوت وآطي": بنلعب فالألعاب .
ندى : ايي بنلعب فالألعاب بعد .
زينب : زين ماعليه ..
ندى : يعني عادي ؟
زينب : ايي .. بس تحملي من ميره .
ندى : أوكك " وطرنا لـ دبي مول "

. .

ندى : ميرووه تعبت لعبنا كل الألعاب .
ميره : تعاليي هذي حلوه بعد .
ندى : ميرررره لعبناها قبل شوي .
ميره : بسس البطاقه ماخلصت خل نخلصها .
ندى : إهئ .. ميره بلييز ..
ميره : انزين هذي اخر وحده .
ندى : ميييروه كل شوي تقوليلي اخر وحده و آخر وحده .
ميره : انزين بس هذي .
ندى : آآه ياربيه .. زين بس مايخصصصني اخر وحده هذي.

"ولعبنـا اللعبه الأخيرررره "

ميره : بعد ؟
ندى : لآآ لو تموتين ماشي بعد "وسحبتها من ايدها ورحنا بعيد عن الألعاب"
ميره : نننندى شو ها انتي ماتخليني استانس ابي العب بععععد.. "كآنت تصآرخ والناس يتطالعون"
ندى : شش ميره ، كل حد يطالع .. ترا لعبتج كل الالعاب .
ميره : بسس انا ماشببعت شو ها ندى خلينيي ألعببب ..
ندى " يآربيه عشان جي مآحب اليهال ! و قطع علينا صوت من بعيد "

أم سعيد : أوه ندى ؟ ومنو هذي .. ميره .. شتسون هني .
ندى : أوه عموه .. شحالج "وسلمنا عليهم "
فاطمه : وحشتينا ، ليش ماخبرتيني انكم ييتوآ ..
ندى "مآدري شو اقوللها ؟ نسيتكم ؟ ع اساس نحن قراب من بعض؟" : مادري كل شي صار بسرعه .
أم سعيد : ماعليه يابنيتي معذوره .
ندى : إلا وينهم الباقي ..
أم سعيد : خليناهم فالكوفي اللي هناك "وأشرت على باباروتي "

ندى : زين بنسير نسلم "وسحبت ميره المعصبه"
سعيد : اوه نيدووو هون .. شحالها الحلوه ؟
ندى : الحمدلله .. وانت؟
سعيد : تمامم ..
ندى"إلتفتت لـ عمي وتجاهلت سعود " : عممي شحالك ؟
بوسعيد : تمام يابنيتي انتي شحالج ؟
ندى : الحمدلله .. "وظليت متجاهله لسعود " إلا سالم وينه ؟
بوسعيد : سالم ؟ فالبييت شفناه راقد فـ طلعنا عنه .
سعود"إقترب اونه بيتجاهلني وبيروح لـ ميره "

سعود : ميره شفيج معصبه ؟
ميره : هذذي ندى ماخلتني ألعب .
ندى : نعم ؟ لعبت معاج كل الالعاااب !
سعود"تجاهلني وكمل" : ماعليج منها هالندى ماتحس وقآسيه .
ندى" انا مآحس وقآسيه ؟شكرًأ ياسعود"
ميره : تعال معاي انت ؟
سعود : آوه .. حبيبتي مياري نحن بنروح بعد شوي بيأذن مانقدر نلعب .
ميره : انزين بعد الصلاه ؟!
سعود : أوك حبيبتي .. "وباسها ع خدها"
ندى"كنت اتطالعهم وسعيد حذالي مب فاهم السالفه ، اها ياسعود تبي تقهرني اونك ؟ انا اراويك ، إلتفتت لسعيد " : انتوآ بتون بعد الصلاه ؟
سعيد : ايي ، قوم امايه يبون يتشرون اثاث ومادري شو وبالمره بنتغدى هني و فطيم بتسوي شوبنق ..
ندى : اها ، زين شرايك ندخل سينما ؟
سعيد"تحمس للفكره" : انا وانتي ؟
ندى : لا قصدي مع فطيم .
سعيد : فطيم عمرها مادخلت سينما وماتحب ..
بوسعيد"إلتفت لنا" : خلاص ندى لو فخآطرج دخلي مع سعيد .
ندى" مآكنت اقصد ندخل بروحنا!" : زين شرآيك اخلي سيف يدخل معانا .
سعيد : منن سيف ؟
ندى : سيف الصغغير .. اخو ميره .
سعيد : اها اوكك مافي مشكله افا عليج انتي تامرين !
سعود"نآر الغيره قآمت تشب" : ميرره انتي بعد ماتبين تدخلين السينما ؟
ميره : إممبلا خل نروح معاهم .
سعود : من عيوني .
- - -
ندى : إلا اقولك سعيد ماتعرفون رآشد متى بيرد ؟
سعيد : باجر إن شاء الله .
ندى : صجج ونآسه يعني بشوفه !!
سعيد : ليش انتي للحين مآشفتي شكله ؟
ندى : لآآآآ ..
سعيد : شرايج اتين معاي المطآر نستقبله ؟
بوسعيد"حس إن ولده مصخهآ" : سعييد ؟
سعيد : ها يببا ؟ نندى نفسس اختي صح ؟ عادي مابسويلها شي الا بوديها عند اخوها ولا شرايج ندى ؟
ندى"سعيد تم يتطالعني بنظرات ان اعطيه الدعم ههه" : ايي صح عممي .. واصلن عادي ابوي مايقول شي ولا رآشد لان اصلن سعيد نفس اخوي ..
سعيد : يعني بتين معاي ؟
ندى"غصبن عني" : إن شاء الله ><"!

بوسعيد"إتطالع لـ سآعته " : يالله بآرك الله فيكم ققوموآ عسب يمدينا نلحق ع الصلاه ..
سعيد : يالله مع السلامه .. "وهمس" تجهزي للفلم "وغمزلها" .
ندى"إبتسمت" : ان شاء الله ..

" وهم فالطريييج "

سعود : انت مآتستحي آشوف وآيد مطيح الميانه بينكم ؟
سعيد : وانت شحآرنك ؟
سعود : أوففف سعيد وخر عنها .
سعيد : تستهبل ؟ تراها مب لك ، وبعدين هذي بنت عمي ونفس اختي .
سعود : أوفف يآكرهي لك .
سعيد : تكرهني عشان بنت ؟
سعود : هذي مب مجرد بنت .
سعيد : سعود خلاص عاد تراني مب قادر استحملك اكثر عن جي .
سعود : ليش يعني .. تراك بتعرس وبتاخذ اللي تبيها انا اللي بتم وحيد طول عمري .
سعيد : اللي ابيها ؟ تتحراني يعني ميت ع هاللي اسمها هدى ؟ انا مابيها ولا اطيقها وباخذها غصب .. وبعدين انت مب وحيد يا اخوي "وحط ايده ع جتف اخوه " انا معاك وبظل معاك ..
سعود"ابتسم" : واللي احبها ؟
سعيد : تحب ندى ؟
سعود"حآول يبعد الفكره عن اخوه" : لآآ من قال احبها ، هذي بنت عمي واختي الصغيره .
سعيد : عيل شفيك بتموت من الغيره .
سعود : لآ مآشي ..

- وعند البنـات -

فاطمه : اوه بتدشين السينما وياهم ،، هههه الله يعيينج .
ندى : هههه ليش .. والله خاطري من زمان مادخلت السينما .. مابتين ؟
فاطمه : لا ويين ، ماحببب هالاشياء .. انا فالبيت مآتطالع افلام تبيني اتطالع هني .
ندى"بصدمه" : ماتطالعين افلام ؟ عييل شو تحبين .. ؟؟
فاطمه : هههه مب ماتطالع .. بس جي مب وايد ..
ندى : وي الله يعينج ع حياتج .
فاطمه : ههههه شفيج الا هم افلام .
ندى : انا حياتيي هالافلام عششق .
فاطمه : ههههه انتي عيل اللي الله يعينج على حياتج .
ميره "تسحب ندى من عباتها" : ندى خل نرجع الفندق .
ندى : انزين انزين .. عن اذنكم .. شكلها تمللت !
فاطمه : يمكن تبي امها .
ندى : مادري .. خلاص بخليكم عيل .
ام سعيد : تحملي ع عمرج يابنيتي .
ندى : إن شاءالله "وراحت عنهم "
ام سعيد : الله يحفظها هالبنيه حبيتها احس انها .. فقيره و ع قد نياتها .
فاطمه : ايي والله .. حبيبتي ندى .
ام سعيد : انتي ليش مب وايد معاها ؟
فاطمه : ماعرف يما .. بس احسها مب نفسي ..نختلف بـ وايد اشياء .
ام سعيد : حاولي تتقربين منها ترا ماعندها حد هالمسكينه .
فاطمه : إن شاء الله يما ..

" عنـد نيدو كانت تكلم رنا فـون "

رنا : يعني بتدخلين الموفي ويا ولد عمج ؟
ندى : ايي بس مب اللي يحبني ، الثاني ..
رنا : وه طلعتي داهيه ياندى هههه .
ندى : تتترا بس جي عشان اقهره .
رنا : زين يالققو انتي .
ندى : بس مادري اخبر امون اني بروح المول عشان اتي ؟ لان قالتلي اخبرها لو بروح مكان .
رنا : لالالا اليوم استآنسسي ويا اهلج .. باجر خبريها .. ولا يوم بتخلصون من الموفي .
ندى : اوكك بشوفف .
رنا : ياويلج لو خبرتيها احين بتخرب عليكم ترا هههه .
ندى : هههه صدقج .. احسها بتتضارب ويا كل حد .
رنا : بالضببط . انتي احين روحي تجهزي عسب اتطيحينهم .
ندى : هههه اييه عيب عيب .
رنا : لا يعني قصدي كشخي وجي شوي .
ندى : شوي هآ .. زين زين .. يالله بروح اصلي انا ..

- و صآرت الـسآعـه 2 الظهر ،خلصنا غدا و رحناآ ع حسب الاتفآق \ خلوف شل الموتر ورآح يغآزل مادري مواعد.. أما بورآشد وزنوب رآقدين ، وأنا واليهال فالمول ويا قوم عمـي -

سعيد : يالله خل ندخل موفي .
ندى : سعيد ؟ بعده الظهر .. بروح اتمشي ويا عمتي و فطوم .
سعيد : ننندى احين السينما فاضيه خل نروح .
ندى : لالا فاضيه ولا زحمه عادي .. خلنني احين ويا عمتي وفطوم .. وانتوآ لعبوآ اليهال .
سعيد : آوف .. زين عمتي ندى .

" ندى ؛ كنت ابيهم يذوقون اللي ذقته ههه ، وبالمره ابي اسوي شوبنق فـ دبي مول .. بمـا إنه شفت وآيد محلات حلـوه "

ندى : شرآيج فـ هالبجآمه حلوه؟
فاطمه : نيدو عيب تلبسين جي قصير حق البيت .
ندى : ففطوم مب وايد عيب انتي مكبره الموضوع .. إلا شوي قصيره .
فاطمه : انا جدام بنات مابلبس جي كيف بتلبسين جدام اهلج والله عيب .
ندى " آوف مآتوقعتها لهالدرجه متدينه ومعقده! أوك هو قصير شوي .. يعني حرآم مثلًأ ؟ " : بس عيبني شكلي بشتريه .
فاطمه : ندى ؟ شو تشترين هالاشياء اشتري شي محتشم احسن .
ندى " يآربيه عمتي ليش خلتني مع بنتها المعقده وسآرت ، أوف فرصه محصله هالبجآمه الروعه و هالبقره بتضيع علي ، وين احصل هالبجآيم فـ بوظبي " : فطططوم .. شفيج عادي عادي ..دوم ألبس جي .
فاطمه : نندى ! لاتشترينها ..
ندى " أوف احسها شوي وتقول يا أنا يالبجآمه " : زين خلاص مآبشتريها " مآعليه فالليل بيي المول بروحي وبشتري اللي ابيه "

فاطمه"اشرت ع بجامه طويله و ايدينها طوال ومبين بجامه شتويه" : طاعي هذي زينه وسآتره .
ندى : نعم يَ قلبي ؟ اشتريها انتي .. "ومشيت عن البجآيم لأن هالانسآنه طلعتلي قرون "
فاطمه : أوف خل نطلع من هالمحل ماحصلت شي عدل .
ندى"بطنآزه" : قصدج شي محتشم ؟
فاطمه : ايي نعم !
" ومشينا وشوي إلا " .
فاطمه : ندى دخلي قصتج أكوه الشباب كلهم يتطالعون .
ندى"اللهم طولج يآروح ،" : زين بدخل "ودخلت شوي"
فاطمه : نندى حبيبتي سكري عبآتج .
ندى"ياربيه هذي بتذبحني" : فطيم تراني لابسه لبس مسترر !
فاطمه : بس حتى لو ، مايصير تفتحين عباتج حرام وحتى شعرج ترا كل شعره بجمره و فتنه جدام الشباب وحتى ريحه عطرج لو شموها تعتبرين زانيه .
ندى " يآربيهه .. استغرالله أحس عمري من كفآر قريش و انا مع هالانسآنه اللي مب موقفه نصآيح ، كل شي فيني غلط وحرآم .. استغفرالله يعني صح إني اصلي وخايفه ربي .. بس هالاشياء خط احمر .. انا حره فيها "

فاطمه : ندى زعلتي ؟
ندى : لا ابدًا ! "وابتسآمه كاذبه و الحمدلله انقذني صوت فوني"
" كآن سعيد ، رديت عليه " : هلا سعيد ؟
سعيد : ترا حجزنا مب تقوليلي تو الناس .
ندى : ها زين اصلن اصلن تعبت من المشي وخاطري احين ادخل الفلم .. يايه احين .
سعيد : لاتتأخرين .
ندى : اوك يالله باي "وإلتفتت لـ فاطمه" يالله فطيم وين السينما ؟
فاطمه : تدرين اصلن ، حرام البنت تدخل سينما .
ندى : فطييم ؟ اسمها سينما مب ديسكو .
فاطمه : لآ يعني قصدت بدون محرم .
ندى : استغفر الله . . فطامي حبيبتي .. وين السينما ؟
فاطمه"اشرت ودلتني وبعدها قالت " : سوري مآروم اروح هنـاك كله شباب .
ندى : لا ماعليه .. " ورحت بروحي ،، احين هذي متدينه و حالتها حاله وتحب ولد جيرانهم ؟ يآمآ تحت السوآهي دوآهي ،، و مشيت ع حسب كلامها" .

سعيد "يصفر": هنني هني نحن .
ندى : أوه .. " رحت لهم " .
سعيد : يالله الشيخه ندى .
ندى : إن شاء الله عاد حاجزين فلم حلو .
سعيد : ايي رعب .
ندى : أوه ، وناسه عيل .. ممتى بيبدأ ؟
سعيد"يتطالع ساعته" : بعد نص سآعه تقريبـًأ .
ندى : اها ، زين زين ، وينهم الباقي ؟
سعيد : اظن رآحوآ يشترولهم آكل .. تعالي نروحلهم .
ندى : أوكك .
" ورحنـا ، كآنوآ سعود و اليهال مخلصين فـ رحت مع سعيد بروحنا نشتريلنا "
سعيد : هآ شو فخآطرج ؟
ندى : همم ، سلآش كولآ .. وبوبكورن كرآميل .
سعيد : بتخليني آكل معآج ؟
ندى : لآآآآ .. تبي خذلك بروحك .
سعيد : بل حتى بفلوسي وزطيه .. زين زين "وطلبلنا ودفع و قعدنا عند القآعه نسولف لين مآفتحوآ القآعه ، دخلنا " .

ميره : انا ابي اقعد يم سعود .
سيف : حتى انا .
ندى : طع وانا ؟ يالكلاب نسيتوني :( ؟؟
ميره : لآآآ بس اكلنا عنده ..
سيف : اصلن بناكل مع بعض .
ندى : جب جب غصبن عنكم بتيلسون حذالي .

" وقعدنا ، فالنص كلنا .. اول شي سعيد وبعدها سعود و اليهال حذاله وانا حذال ميره والكرسي اللي ع يساري فاضي .. وشوي إلا ويقعد وآحد مآعرفه"

سعيد " إنتبه للـريال اللي قعد حذال ندى ، ع طول نقز و رآح بدل معاه .. و فهمه ان ندى اخته .. و رآح قعد حذالها . "

ندى"شفت الريال رجع قعد مآدريت انه هذا سعيد " : انتت ايه انا ماقلتلك روح ؟
سعيد"إلتفتلها" : هآآ ؟ متى قلتي ..
ندى : أووه سعيد .. تحريتك ذآك الكريه .. ايييه سعيد صح شـ يابك يممي .
سعيد : ليش تخآفين ؟
ندى : ممآخآف بسس قووم مآبي .
سعيد"أونه مندمج فالفلم" : شش خلينا نتطالع .
ندى : ايييه يالسخيف ققوم .

"وحده من ورآ ندى " : لو سمحتي ممكن توطين صوتج ؟

ندى"طآح وييهها " : إن شاء الله اختي .. "وكلت تبن "

سعيد"يتطالع ندى" : وييو اشوف سكتي .
ندى : جب جب .
ندى " سوت عمرها مندمجه وهي أصلن شبهه خايفه من الفلم كل شوي تشهق و سعيد يضحك عليييها " ..
ندى : يالسسسبال جب مايضحك .
سعيد : هههه والله لو تشوفين شكلج .
ندى : جب كرييه .

" كـان الفلم قمـه فالرعب .. و حتى مآوصل النصص بعده .. > "

ميره : إههئ إهئ سعود خل نطلع مابي اشوف .
سيف : ححتى انااا .. ممابي .
سعود : آآخ هاللي ايي مع يهال .. " وإلتفتت لـ ندى و سعيد و شآفهم يسولفون ويضحكون ،، أه يا اخوي هاللي يقول انه معاي "

سعيد"إلتفت لـ اليهال و سعود " : شفيهم وقفوآ ؟ "وصرخ" ع وين ؟
سعود : مماشي بنروح شكله ماعيبهم الفلم .
سعيد : خلاص حتى نحن بنروح .
سعود : لا خلكم ! .. "وشل اليهال ورآح"
ندى : شفيه اخوك ؟
سعيد : والله روحي مآدري .. خل نطلع .
ندى : لالا .. صبر ابي اشوف شو بيصير بعدين "قصدها فالفلم"
سعيد : وييه شكلج اندمجتي .. زين زين بنشوف شو اخرتها .

نهــــــايـــــه البـــــــارت التـــــاســـع عشـــر . .
أتمنى ينال إعجآبكم .
وبإنتظآر آرآئكم و تعليقآتكم .
واليآي قريب ان شاء الله ، والسموحه .