منتدى استراحات زايد - ((.. الدنيا يا خلي مدرسه .. وسنين عمرنا حصص الالم منهج ندرسه .. والفرح فيها فرص ..))

مشكور غرشوب البدو و هذا البارت لعيونك

.........
طلعت من الصاله وسرت أتصل حق غيث قالي بيكون عندي عقب ساعه .. سكرت عنه وحطيت لي ملابس وطلعت خبرت عموه وبعدين رحت عند حمدوه وشمسوه
دخلت الصالة في بيت أم عبدالله لقيت منصور ورشود ومانع ربيعهم كبر منصور يلعبون سوني
العنود: منصور البنات وين؟
مانع: بسم الله الناس يسلمون... ماتعرفين تسلمين
العنود: لو والله أخ مانع.. طلع لك لسان بعد
مانع: من يومي عندي لسان.. ولا تضيعين السالفه ليش ماتسلمين
عرفت اني مابطلع من لسانه ولا بيخطف الموضوع المفعوص
العنود: انزين السلام عليكم فكنا من صدعتك.. وين البنات؟
منصور: توهن ركبن فوق
رحت عندهن فوق دخلت الحجره لقيت شموه تعابل في الكبت وحمدوه منسدحه تقرا مجله
العنود: السلام عليكم
الجميع: وعليكم السلام والرحمه
العنود: أقول قواطي أنا بسير اليوم
حمدوه: وين اليوم بعد ؟
العنود: بسير عند يدوه .. بيلس عندها لين يوم الثلاثا
شمسوه: شوووو.. ليش يعني
العنود: اتولهت عليها من متى ما شفتها
حمدوه: اسبوع عاد.. اتعودنا عليج
العنود: اتحملوا هالاسبوع بس .. أدري انكم تحبوني.. وأدري اني غاليه عندكم .. بس شو أسوي
شمسوه( تقاطعها) : بس بس بس انتي صدقتي عمرج
حمدوه: خلاص عيل بنتواصل بالتيلفون
العنود: والمسن بعد .. دامني هناك أربع وعشرين ساعه على المسن
شمسوه: زين يعني المهم انتي موجوده يوم الخميس
العنود: هيه انشالله بس ليش يعني ؟
حمدوه: ماشي يعني أهم شي ما بتطولين وايد .. يسدنج خمس أيام
طلعت عنهن وأول ما وصلت البت اتصلي غيث وقالي انه عند الباب .. لبست عباتي وشليت الأغراض وطلعت لقيت غيث يسولف ويا منصور ومانع وشالين الدنيا جدام الباب ترييتهم لين خلصوا وركب غيث ورحنا .. سرت بيت يدتي أول ما دخلت استانست لأني ببات عندها كم يوم ..
.........
على طول يلستي في بيت يدتي كان الروتين المعتاد لي ويا نوروه .. سهر لين الفير نتريا يدوه تقوم نتريق وياها عقب نرقد لييين الظهر .. نقوم عن خاطر يدوه على الغدا .. الظهر يدوه ترقد ونحن على النت ليين المغرب والمسن أكون أرمس حمدوه وشمسوه وأكيد شموتي.. وبنات خال أمايه يكونن عندنا في هالفتره .. ونكمل اليلسه على النت لين الفير .. أبداً ما أرقد .. يوم الأثنين الساعه ثمان كنت فاتحه المنتدى والمسن مفتوح .. دخلت نوروه الحجره
نوروه: عنودي بسج .. قومي خلينا نسير الصاله
العنود: بنات خالج روحن ؟؟
نوروه: هيه روحن
العنود: سبالات قلتلهن لا تسيرن تعشن عندنا
نوروه: بيردن عقب العشى .. قوميي
العنود: انتي شو عندج؟؟
نوروه: قومي بنتعشى
العنود: شو من العشى هالوقت .. شو هالجذب !!
نوروه: أنا شو يخصني أمايه اللي طرشتني أزقرج
العنود: انزييين
طبيت المنتدى والمسن وسرت الصاله ويا نوروه ..أول مادخلت انصدمت البنات ما روحن وانصدمت أكثر من وجود عبدالله و.. وأحمد .. الله ياخذ عدوج يا نوروه وين بتسيرين عني .. والله لأراويج ..
العنود: السلام عليكم
الجميع: وعليكم السلام
عبدالله: شحالج العنود
العنود: بخير ربي يسلمك شحالك عبدالله
عبدالله: يسرج الحال
أحمد: احم شحالج العنود
العنود: الحمدالله بنعمه.. شحالك أحمد
أحمد: الحمدالله بنعمه ومن صوبكم
العنود: ما نشكي باس
كنت بطلع بس الشيخه نوره قابظتني من ايدي ومب طايعه تبطلني سرت ويلست عدال يدوه
غيث: لا خليت من العنيدي .. باجر بتروحين ؟؟
العنود: هيه باجر انشالله
عبدالله: امره ما تبانا أول الصيف كله ما تسير عنا
العنود: لاوالله بس حمد قالي يوم الثلاثا ردي
أحمد: ليش انشالله .. يتحرنا بناكلج
العنود: لاا بس حمد ما يصبر عني
أم غيث: حتى نحن ما نصبر عنج فديت نصخج
العنود( تلوي على يدتها): يعلني فدوى أرض توطينها يالغاليه .. ولا أنا أصبر عنج
غيث: شوفوا عاد البزا.. أبوي روحي روحي باجر من تيين انتني نحن مسويلنا أكبر طاااف
العنود: أكيييييد أنا العنيدي
غيث: والعااافيه.. قومي خليني أردج الحين... أنا أبغي أعرف حمد شقايل متحملنج
العنود: والله حمد ما يسويبي مثل ما تسويبي انته .. حشى انته حاط دوبك من دوبي تقول ماخذه حرمتك
غيث: هيه بس حمد ما تلاسنينه شرات ما تيرين لسانج عليه
نوروه: عنودي تمي لين الجمعه .. بنسير وياج دبي
العنود: وانتي منو بيوديج دبي !! غيث ساير بنا الاسبوع اللي طاف!!
أحمد: أنا بوديهن كلهن .. ما بتسيرين ويانا؟
العنود: لااا ما بروح أنا قلت يروح ويا البنات انشالله يوم الخميس..
نوروه: روحي وياهن الخميس الياي ..
العنود: انتي شو على بالج .. قالن ودونا شلوهن!! ..لين تاخذين الموافقه على السيره عند بنات أختي يبالها مؤتمر بحاله
منى( اخت أحمد): خلاص عيل سيري ويانا دام ان الموافقه صعبه هناك
العنود: خلاص تمت الموافقه بحمد الله
منى: انزين سيري يوم الخميس وياهم بس ردي هنيه
العنود: لالا أستحي من حمد
أحمد: أنا أبغي أعرف شو لاقيه هناك عندهم.. ومب قادره تصبرين عنه
كنت يالسه وياهم وأنا أطبخ في عمري وأتحلف لنوروه ... سخيييييييف شو قصده شو لاقيه عندهم وما أصبر عنه .. على باله الكل شراته لا واللي قاهرني ان الشيخ احمد يطالع ويبتسم وأونها عاشقة زمانها مريوم ميته من الغيره .. مالت عليج انتي وياه .. أنا أدري شو يايبنكم اليوم .. والله ما أطوف لج الليله على خير يانوروه .. هين خليهم يروحون وبراوييج .. يلسنا مع بعض وأول ما أذن الأذان
العنود: الصلاه الصلاه
أحمد: مات الشعراوي خلفته العنود
العنود: أذن من متى
عبدالله: يالجذاااااااابه .. توه مأذن
العنود: جذابه حرمتك هب أنا ... يدوه طالعيهم مب طايعين يسيرون يصلون
اليده: حوووه يالله قوموا عنبوا هالمذاهب لكم
طلعوا أحمد وغيث وعبدالله ساروا يصلوا .. والبنات كلهن روحن .. أنا دخلت الحجره ورضيت الباب بقووو .. وقفت في نص الحجره دقايق من القهر مب قادره حتى اني أيلس ..دخلت نوروه .. لفيت صوبها وطالعتها بنظره سمممممم
نوروه: بسسسسممم الله شو عندج
العنود: مشكوره على العشى السنع خالتي... والموقف البايخ اللي حطيتيني فيه
نوروه: عنودي...
العنود: ممكن تقوليلي ليش سويتيبي هالحركه البايخه
نوروه: عنودي والله حرام عليج قلبي عورني عليه
العنود: حرام!! حرام عليه أنا!! والكلام اللي قاله عني مب حرام .. نسيتوه ؟!!
نوروه: عنودي هالكلام من سنه تقريباً .. وأحمد تغير
العنود: بااااين انه تغير والدليل كلامه اليوم .. شولاقيه هناك انتي .. صدق انه حقير
نوروه: عنودي لا تظلمينه
العنود: إذا كان حاط في باله انه بيقدر يلعب عليه لأني بلا سند في هالحياه قوليله تحلممم والله والله
نوروه: قبل لا تحلفين هدي أعصابج ... ليش معصبه
العنود( تصارخ): شو ليش معصبه!! .. نوروه حطي عمرج مكاني .. تخيلي عبدالله اللي قال عنج هالكلام بترضينها
نوروه( تتنهد): خلاص على راحتج أنا آسفه
طلعت عني نوروه وعقب تلومت فيها وطلعت أراضيها .. مهما كان بس خالتي وما أحب أزعلها أو أصرخ في ويهها ..بس هالحركه قهرتني ...
**********
في بيت أم عبدالله كانت حمدوه وشمسوه وعويش يالسات في الصاله يتابعن الحلقه وحارب كان توه يدخل الصاله راد من المسيد
حارب: وين أمايه
أم عبدالله( تدخل الصاله): أمك تسمعك .. فديت روحك
سار عبدالله صوبها وقبض ايديها ويلسها عداله
أم عبدالله: شميس سيري خلي زينب تحط العشى
شمسوه: انشالله يدوه
أم عبدالله: خالتك شمسه تسلم عليك
حارب: الله يسلمها
أم عبدالله: تشره عليك ما تسير صوبها ..
حارب: حتى هيه ماتي صوبنا
أم عبدالله: باجر بتغدي صوبنا .. هب تجفي بها
حارب: انشالله
أم عبدالله: علني ما خلا منك .. يعلني أشوفك معرس
حارب: شوووو لالالا بسم الله عليه من هالطاري.. هب الحين أمايه بعدين
أم عبدالله : متى بعدين بعد؟؟
حارب: أمايه أنا يوم أبغي أعرس بقولج
أم عبدالله: أنا بموت وانت ما قلت تبغي تعرس
حارب: بسم الله عليج .. عقب عمر طويل انشالله
أم عبدالله: شو تتريا .. الحمدالله ريال وعندك الخير والعروس موجوده
حارب: وين عروس؟!.. متى ليقيتيها أمايه؟؟
أم عبدالله: وااابويه عليك.. جيه وميثوه بنت خالتك
حارب: منو قالكم اني أبغي ميثوه أنا.. على كيفكم تخطبون!!
أم عبدالله: يا بويه البنت بتخلص دراسه ورحيم وحشيم ماشالله عليها
حارب: أمايه انتي ما تبيني أرتاح يوم أعرس؟
أم عبدالله: وأنا ما بغي غير راحتك
حارب: خلاص عيل ميثوه ما باخذها ..عندها عيال عمها يبونها
أم عبدالله: ياااااويلي منك .. صدق يوم بزيتك دمرت
حارب( يلوي على أمه): فديييييييت قلبج أمايه .. يوم أبغي أعرس بيي أقولج .. انتي لا تستعيلين
شمسوه: حارب خلص البيبسي
حارب: محد غيركن تشربنه
شمسوه: أنا ماشربت شي عنبوه الكرتون كمل اسبوع الحين ..
أم عبدالله : يعلك ما تلقاه وانت سالم.. شو تباه هالسقم
حارب: أنا ما أروم أتعشى بلاه..( يلف على حمدوه) اتصلي حق الدكان خليه اييب كرتون
أم عبدالله: ما سمعتهم هذيج السنه يقولون طاح ريال في مكينة البيبسي .. وانتوا تشربون دمه ولحمه
حمدوه: واااااااعععععع
حارب: هيه لقيت ظرسه داخل الغرشه
شمسوه: الله يلوع بجبدك .. يدوه هذا من زمان من ست سنين الحين .. ويقولن هذا كله جذب
أم عبدالله: صه انتي مسودة الويه .. وين العشى بنت عبدالله
شمسوه: الحين بتيبه زينب
...........
يلسوا يتعشون وعقب العشى طلع حارب وأم عبدالله دخلت ترقد وشمسوه وحمدوه تمن في الصاله .. حمدوه تشوف التلفزيون وشمسوه فاتحه النت على لاب توبها
دخلوا ىمنصور ورشود ومانع ومسوين فرقه ايولون حاشرين البيت
شمسوه: لااا إله إلا الله
حمدوه: شو هالصدعه انتوا ماتتعبون ... ليش ماسرتوا ترقدون!!؟
فرها رشود بمخده صغير فالصاله
مانع: اهب من عينج بتاكلينا.. يالسين ع راسج
شمسوه: مانع ورشود كل واحد منكم يسر بيته ومنصور اذلف ارقد والا تراني بخبر عليك أبويه
منصور: عادي أبويه شافني قبل ما يسير يرقد ما قالي شي
مانع: حطي سبيس تون الشبح اليوم المباراه الأخيره
شمسوه: سيروا بيتنا طالعوا اللي تبونه
مانع: لاحووووووول ذبحتينا بصدعتج انتي
شمسوه: حمدوه قولي شي
حمدوه: مالي بارض عليهم
قامت شمسوه بتروغهم وماشافت الا غبرتهم
حمدوه: حشى ياصدعتهم
.. تمن يالسات لين الساعه وحده وعقب دخلت العنود المسن ولقت ميثوه
بس أحبك هذا حظي اللي انكتب :" هلا والله ملاااااااااااييين"
أم ظروس:" مرحبا الساع .. شحالج قوطي .. وشخبار القوطي الثاني ... اشتقتلكن"
بس أحبك هذا حطي اللي انكتب :" وينج اليوم ما دخلتي من الصبح؟؟"
أم ظروس:" كنت يالسه ويا بنات خال أمايه"
بس أحبك هذا حطي اللي انكتب:" ظاريه تيلسين وياهن وانتي على المسن.. شمعنى اليوم"
أم ظروس:" بعدين بخبرج السالفه.. المهم شخبار حمدونه"
بس أحبك هذا حظي اللي انكتب:"الحمدالله .. هذيه موازره التلفزيون "
أم ظروس:" والله اشتقت لكن .. واتولهت على حصيص.."
بس أحبك هذا حظي اللي انكتب:" خلي عنج .. عنبوه ما شبعتي من اليلسه هناك"
أو ظروس:" بصراحه لا .. بس بعدني أتوله عليكن"
بس أحبك هذا حطي اللي انكتب:" شخبارها نوروه"
أم ظروس:" تسلم عليج"
بس أحبك هذا حظي اللي انكتب:" الله يسلمها سلمي عليها"
الساعه وحده دخل حارب لقى حمدوه وشمسوه فاتحات اللاب توب جدامهن ونااقعاااات من الضحك ...
حارب: الحمدالله والشكر .. شو يضحكن؟؟
شمسوه: العنود اطرش لي ريل بلير يجتل من الضحك
حارب: موجوده على المسن
شمسوه: هيه
حارب: عنلاتها .. متى بتي؟
حمدوه( تغني بنشااااز): أنا مو ولهان آنا... آنا دنيا من الوله محتاجك أبيك
حارب: جب يالله ..( شل اللاب توب عنهن وحطه جدامه)
حمدوه: حارب .. حرام عليك
حارب: ما بقولها شي.. فكينا من الصدعه
شاف المسن ويلس يقرا اللي فيه
حارب: هههههه صدق انها خريش شو هالنك
حمدوه: أنا من دخلت المسن ويا العنود ما شفت نك مثل العالم والناس
يلس حارب يرمس العنود وحمدوه وشمسوه يشوفنه بس العنود ما تدري انه حارب
بس أحبك هذا حظي اللي انكتب:" ههههههه عنودي شو هالنك هذا"
أم ظروس:" ليش مب حلو؟!"
بس أحبك هذا حظي اللي انكتب:" بصراحه .. اللي يشوف المسن يعرف انج خريش"
أم ظروس:" خلي عنج انتي مب أعقل عني"
بس أحبك هذا حظي اللي انكتب :" انزين غيريه.. حطي واحد حلو"
أم ظروس:" صبري شوي"
.....
البقره الحلوب:" شو رايج في هذا"
حارب: ههههههه والله انها خريييش
بس أحبك هذا حظي اللي انكتب:" ههههههه ...متى بتردين .. يالسباله "
البقره الحلوب:" قلت باجر انشالله"
بس أحبك هذا حظي اللي انكتب:" أي وقت ؟؟ "
البقره الحلوب:" العصر انشالله "
بس أحبك هذا حظي اللي انكتب:" بتروحين ويانا دبي يوم الخميس"
البقره الحلوب:" لالا أستحي"
بس أحبك هذا حظي اللي انكتب:" قاولوا لج ما بياكلونج .. ليش ما تروحين عيل"
البقره الحلوب:" لا والله أستحي .. وبعدبن أنا مخلصه أغراضي "
حارب: شوو هذي خالتكن مذله .. شو أقولها
شمسوه: قولها نبغيج تختارين ويانا ..
بس أحبك هذا حظي اللي انكتب :" بغيناج تختارين ويانا.."
حمدوه: قولها بناخذ بدل .. بنطقم فيهن
حارب: شو يعني
حمدوه: يعني بناخذ شراتها نفس الشي يعني
بس أحبك هذا حظي اللي انكتب:" ونبغي ناخذ لبس نفس الشي"
البقره الحلوب:" أممم .. أستحي والله "
بس أحبك هذا حظي اللي انكتب:" بس عاد ذليتينا"
البقره الحلوب:" انزين أوكي بس على شرط"
بس أحبك هذا حظي اللي انكتب:" شرطي يالقوطي"
البقره الحلوب:" تقولن حق علي يروح ويانا.. أستحي أروح ويا حارب بدون علي والا خليفه"
بس أحبك هذا حظي اللي انكتب:" أصلاً حارب قايل لازم حد منهم يروح وياه..وإذا ماراحوا ترانا نحن وياج"
البقره الحلوب:" وبعدين لازم تقولن حق عمكن الشيخ حارب يخطفنا نتغدا في أرقى المطاعم.. أنا ما أتحمل اليوع"
حارب: بعاااااااد ..
بس أحبك هذا حظي اللي انكتب:" فااااااااااالج طيب... انتي تامرين بنت سيف"
البقره الحلوب:" حوووووه أقص عليكن .. امره ما صدقتن .. عن الخبال أدريبكن تسونها وتفشلني جدام عمكن"
بس أحبك هذا حظي اللي انتكب:" ماعليج انتي .. ولو تقوليله انتي ما بيقولج لاء"
البقره الحلوب:" شوووووووو.. سيري لاه .. أنا ما أروم أرمس من أشوفه ولا حتى أطالع في ويهه .. شو قالوا لج عني ماعندي مذهب"
بس أحبك هذا حظي اللي انكتب:" خيبه خلاص خلاص لا تقوليله"
البقره الحلوب:" أخبركن أنا بطلع من المسن .. في واحد غلس مأذني"
بس أحبك هذا حظي اللي انكتب:" منو هذا؟؟"
البقره الحلوب:" خالي غيث يبغيني أروح المطبخ .. مب جنه يا من تحت صينية العشى.. رض منها لين تناقعن ظلوعه "
بس أحبك هذا حظي اللي انكتب:" خلاص برايج .. تصبحين على خير"
البقره الحلوب:"وانتن من أهله... أشوفكن باجر"
بس أحبك هذا حظي اللي انكتب:" سمعي غنية عيظه أشتاق أنا لك.. اهداء من الخااااااطر"
البقره الحلوب:" أوكييي... مع السلامه"
طلعت العنود من المسن وحارب عطى حمدوه اللاب توب وابتسم ووقف بيسير حجرته
حمدوه: تعال تعال تعال.. شو هالغنيه؟؟
حارب: عندج النت سمعيها
شمسوه: وانت من صدقك!!
حارب: لا تخبرنها اني أنا اللي رمستها
شمسوه: والله بعدنا ما تخبلنا .. أصلاً هيه لو تدري بتجلب الدنيا على روسنا
دخل حارب حجرته حمدوه لفت على شمسوه وتمن يطالعن بعض بهبل وعقب نقعن من الضحك على حارب
حمدوه: الله يعينك ياالحربي
شمسوه: فتحي دبي مون وخلينا نسمع الغنيه
حمدوه: صبري
....
حمدوه: هذيه لقيتها صبري بسيفها
شمسوه: شغليها بسرعه
شغلت حمدوه الغنيه (( أشتاق أنا لك وأتلذذ بالأشواق .. والبعد منك يالغلا زاد شوقي... انت حبيبي ولك غلا وسط الأعماق.. سار بدمي وساري في عروقي .. محد معي يسواك يازين الأخلاق .. يا مالك عقلي وروحي وذوقي.. خذني بروف الله وبلطف وارفاق.. وارحم خفوق لجل شوفك يتوقي.. لالا تعذب من عنا الشوق مشتاق.. وأنا لوصلك ياغناتي شفوقي.. ارحم معذب من وصل فوق الآفاق .. بسك دلع يا ساكنن في خفوقي..))
حمدوه: أسمييييييك ياعمي..مخشع
شمسوه: تتوقعين العنود توافق عليه؟؟
حمدوه: والله ما بتلقى أحسن عنه
شمسوه: مممم الله كريم
*****
و بسكم اليوم ....