منتدى استراحات زايد - نُهايتيّ أنتَ ، و نهايتكُ أنا . . !

الفصل الخامس ،

" ميثا "

طالعت فارس اللي ظهر من الحمام بعد ما رجع كل اللي كلاه .. فر عمره ع السرير و تلحف عدل ! يقول راسه يعوره و يحس بضغط ع مخه ! صاير غريب شوي بسبت الإرتجاج .. كمل أسبوع و هو فالبيت و كل اللي يسويه ياكل و يرقد .. لين أحينه ما رمس عن اللي صار له ! يقول أنه ما تذكر شي لين أحينه .. ظهرت من الحجره بصينيه الأكل و سكرت الباب .. نزلت تحت ! لين أحينه ما عرفوا منو سوى به جذا .. قامو يشكون أنه بروحه طاح و ضرب راسه ..

عٌمر : كل أكله !

تنهدت : هيه بس رجع .. أنت لا تفكر فيه هو بخير .. فكر فعرسك ترى بعد أسبوع

عٌمر : ما بلبس فستان و بخاف تسريحتي تتطلع هب حلووه .. كلها كندوره و غتره و عقال ! كل شي زاهب و باجي الأمور عليكم

ضحكت : أنزين لا تنسى الحلويات نفس يوم العرس بيزهبونه و تروح تيبه ..

عُمر : لوقتها يصير خير .. ذكروني أنتو بعد ! بروح أشوف فارس

صعد فوق و أنا حطيت الصينيه فالمطبخ و رديت الصاله .. شفت ريم توها يايه من برع ! قالت بتروح عند المصممه فستانها وسيع شوي و طويل وايد .. قالت اليوم بتخلصه ! كان بيدها أكياس ثانيه شكلها شاريه أشياء ثانيه ..

سألتها : شو شاريه

ريم : شويه أغراض حق فارس .. نعال و غتره و خذت لي أكسسوار حق الشعر

أحس أهتمامهم بفارس .. زايد عن اللزوم ! يعني شي مبالغ فيه .. كله فارس فارس فارس ! فارس إذا طلع عٌمر يقلب البيت فوق تحت و أتصالات و وين راح و ويا منو .! و إذا فارس قال " أخ " سحبو و يودونه المستشفى و تحاليل و أمور مالها داعي .. صارت ريموو مثلهم فالفتره الأخيره .. و فارس مستغل كل هذا و صاير يعصي أموار عُمر و ما يسمع الرمسه و يسوي اللي براسه حاله حال كل مُراهق .. بس عُمر ذابحنه بأهتمامه الزايد ! خلاص فارس بيتخرج صار عمره 17 سنه لين متى بيتم عُمر يهتم فيه جذا .. و بعدين عُمر بيتزوج و بيه عيال إن شاء الله .. لازم ينسى فارس و أهتمامه بفارس .. بس فارس من تشوفه ما تقول أنه بو 17 سنه ! جنه 14 سنه !!

تنهدت ..!

صعدت فوق بس وقفت و أنا أسمع صوت عُمر ! صعدت فوق بسرعه و رحت صوب حجره فارس وين صوت عُمر المرتفع .. واضح أنه معصب !

عُمر : ليش ما رمسست !

فارس صرخ : توني أتذكر ي غبي .. أنت ما تفهم ! أقولك توني أتذذكر

قلت : شوفيه !

ألتفت لي عُمر : أيبي تلفوني بتلقينه تحت ع الطاوله .. بسرعه

نزلت تحت طيران و صعدت فوق ها المره كانت ريم موجوده فالحجره .. عطيت التلفون لعُمر و هو ضغط ع أزرار التلفون و طلع من الحجره .. طالعت فارس ! قربت منه ريم و مسكت إيده . عقدت حواحبي ريموو صارت عادي مع فارس واايد .. يعني عادي تقعد وياه فالحجره بروحهم و عادي تيلس حذاله و تمسك إيده ! صارت تقهرني بتصرفاتها

ريم : فارس شو صار ؟! ليش عُمر عصب

رفع عينه بتعب صوبها : يوسف .. يوسف اللي ضربني

فتحت عيني بوسعهن و قلت : ليش !

طالعني : ما أعرف .. جذا بس ! تعرفينه يدور الضرايب

ريم عضت ع شفاتها : السالفه فيها شرطه ..

طالعها فارس بغضب : بس عاد ما بسكت هاذي هب أول مره يضربني .. بغيت أموت و تبيني أسكت لين متى بسكت له ! لين ما يذبحني

" الريم "

صدقه فارس لين متى بيسكت ليوسف .. وصلت فيه يدمي راسه و يسبب له أتجاج ! يوسف متهور و حقده كله ع فارس ما أدري شو الحل وياه ..! طلعت ميثو من الحجره و طلبت من فارس يرقد و يهدي أعصابه .. تميت يالسه فوق راسه لين ما رقد و نزلت تحت .. بها الوقت دخلو أميه و أبويه و فهد وياهم ! قال فهد أنه علي ياي وياهم و بيحدر الصاله .. رحنا فوق أنا و ميثو و لبسنا الشيل و ردينا نزلنا .. أكيد بتكلمون فموضوع فارس و يوسف !

علي : أنت متأكد ..

عُمر : هو يقول ! فارس ما يجذب

علي ضحك بسخريه : هب محتاي يجذب أصلن .. يوسف و أنا أعرفه

فهد : الموضوع فيها شرطه يعني مجرد أنه يقول فارس أنه يوسف بيزخونه و أكيد فيها سجن

علي : طبعاً فيها سجن ..

قلت : فارس قال أنه ما بيسكت

عُمر : هب وقته المشاكل .. يقول أنه طاح بروحه و ينتهي الموضوع .. إذا أنسجن يوسف بيدمر مستقبله

قلت بنرفزه : و ضربه فارس كان ممكن تموته .. دومكم تسكتون ع فعايل يوسف عشان جذا يتمادى

علي : بس ي الريم تعرفين شو عواقب السجن .. بينفصل من المدرسه و ما بيحصل له شغل يشتغله و بيدمر مستقبله كله !

: هذا همكم .. بس فارس بالطقاق

عُمر : منو قال فارس بالطقاق .. بس بعد لازم نفكر فيوسف

: هيه سكروا ع الموضوع و يرد يضربه يوسف للمره الألف و تسكرون ع الموضوع لين ما يذبحه .. راسه صار عجين من ضربات يوسف .. وضع فارس صعب و يوسف ما يرحمه

عٌمر : خلاص الريم قلنا بنسكر ع الموضوع و إن شاء الله ما يتكرر ها الشي

علي : وينه فارس ؟!

: راقد ..

أميه و أبويه صعدو فوق بدون أي كلمه .. واضح أنه أبويه معصب ! قمت من مكاني متقصده أصعد فوق بس حسيت بإيد حد تمسك إيدي بلطف .. ألتفت ، كان علي

همس علي : أنتي مشعجه فارس !

طالعت فعينه : لاء .. هو بنفسه قال أنه ما بيسكت

علي : ريم .. خلينا نشوف مصلحه الكل فها الموضوع يعني يرضيج اللي بيصير ليوسف

جتفت إيدي : و أنت يرضيك اللي يصير لفارس

علي : لاء ما يرضيني .. صدقيني أنا اللي بعاقبه بطريقتي و أبويه ما بيسكت بيعاقبه

ضحكت بسخريه : وين ها العقاب قبل ! ليش ما عاقبتو قبل ! ليش خليتو يوصل للوصله

علي تنهد : أحينه ليش و ولو ما تنفع .. حاولي تثنين فارس عن رايه ! هو يسمع منج

تنهدت و ألتفت له و صعدت الدري .. بس وقفني كلامه

علي : ي حلونا و نحن يالسين نتكلم بهدوء و تفاهم

ألتفت له و طالعت عيونه .. ما فهمت نظراته ! بس كملت دربي لفوق رحت صوب حجره فارس سمعت حسه .. دقيت الباب و حدرت .. كان يرمس بالتلفون ! حدرت و سكرت الباب و يلست ع السرير حذاله و هو سكر الخط ..

سألته : ترمس منو ؟!

: ربيعي

: منو ؟! خلف

رفع عينيه و طالعني : هيه خلف

: فارس أنا ها الولد ما بلعته .. و بعدين هو أكبر عنك ! شتى به

: وضحت لج شو علاقتي وياه .. لا تنسين هو أكثر شخص ساعدني ، مستحيل أتخلى عنه

: حتى لو صرت بنت !!

لف راسه و سكت .. قربت منه و مسحت أصبعي ع عينه اللي بدأ يخف زرقته

ضرب إيدي : إيه ترى بعدني ولد

ضحكت : أنت فعيني بنت .. قولي شو الأسم اللي بتختاره ؟!

: ما أبي أتكلم فها المواضيع

طنشته : أممم .. شو رايك ظبيه ! أو .. مهره .. أمممم .. عليا ! موزه .. مريم .. خلود

: بس بس .. أنا حاط فبالي أسم و ما بختار غيره

: شوه ؟!

: نوره

أبتسمت : حلوو ي قلبي .. نواري .. نويير ههههه

ضحك !

" فارس "

طلعت الريم من حجرتيه .. طالعت فوني .. خلف ! ربيعي خلف .. أخوي خلف ..! أبتسمت و ها الأنسان إي فبالي بعفويه .. و وفائه و حبه لي كأخ .. خلف تعرفت عليه ع الشات و قلتله عن حالتي بدون خجل أو خوف .. يمكن لأنه غريب عني ! م أدري .. بس أحس براحه وياهه هو أكثر أنسان أقدر أفضفض له بكل اللي فخاطري .. طالعت فوني كان مسج ع البيبي من خلف " لازم أشوفك .. " طالعت الساعه كانت ثلاث العصر .. طرشت له " بعد صلاه العصر .. " .. قمت رحت تسبحت و توضيت و لبست كندورتي بموديل قطري لونه ثلجي و تغترت .. طالعت الساعه كانت ثلاث و نص .. وقت الصلاه بروح أظهر بدون ما حد يشوفني .. تريت لنص ساعه و من أذن و شفت عُمر و فهد و عميه طالعين سايرين المسيد .. أنا صليت و ظهرت بالدسيه من البيت ! رفعت كندورتي و سكرت باب الحوي شوي شوي و رحت لدرب غير درب المسيد .. مشيت بهدوء و أنا أطالع الفون .. شوي و رن فوني بأسم " خلف "

خلف : عن تيك ضربه شمس ي ولد مافينا يجيسك شي

ألتفت حولي و من شفت سيارته أبتسمت : لا تحاتيني ..

مشيت صوب سيارته و ركبتها .. تحركينا و طلعنا من الفريج توجهه لوحده من المولات ! من وصلنا للمول نزلنا و رحنا يلسنا فوحده من الكافيات المعروفه و طلبنا لنا .. طالعت خلف ! خلف عاش أكثر حياته فلندن .. أبوه دكتور .. درس فلندن و عاش فلندن و تزوج و خذ حرمته للندن و عاش هناك .. و من خمس سنين يو و ستقروا إهنا عشان يدت خلف اللي ما عادت تتحمل فراق ولدها بعد وفاته ولدها الكبير .. و أنا أعرف خلف من سنتين و هاذي ثالث سنه .. أذكر فبدايه تعرفي عليه كان وايد يستخدم مصطلحات أنجليزيه لين ما هزبته و أجبرته ما يستخدم الأنجليزي معاي ! خصوصاً وقتها كنت مييح فالأنجليزي ..

أبتسم : معجب ؟

ضحكت : أسترجع الذكريات ي أخي

ضحك : أها .. إلا كيف عُمر خلاك تظهر

مديت إيدي لكوب الموكا : طلعت بالدسيه .. محد درى عني

ضحك بصوت عالي : عيل عُمر اليوم بينفجر و بيطرش الدوريات عشان يدورون عليك

أبتسمت .. ألتفت و يت عيني ع بنيه يالسه ع طاوله بروحها و تتطالعني ! مبين أنها كبيره شوي .. يعني أكبر عني ! أبتسمت لها و ألتفت لخلف .. كلت من الكيك .. حسيت لاعت جبدي ! مسكت الكلينكس و طلعت اللقمه من حلجي

خلف : شفيك ؟!

دزيت الصحن : لاعت جبدي وخره عني

عقد حواجبه : من الإرتجاج صح !

هزيت راسي بهيه .. طاحت عيني ع البنت كانت تتطالعني بنظرات واضح عليها الأهتمام ..

أشرت لي " شو فيك ؟!

أشرت لها " ماشي ..

ضحك خلف : إإيييييه .. شها الحركات

أبتسمت : معجبه فيني ليش معصب !

خلف : طاع هاي كبري و لا أصغر شوي .. من صدقكك

سندت إيدي ع الطاوله : عادي ..

مد إيده لأذني و مسك الحلق : محد كشفها !

تنهدت و وخرت إيده : عٌمر عرف

رفع حواجبه : أنزين و شو قال !

: طوف السالفه .. بس هو ما بيودرني أدري به عرف أنه الحلق ألماس

ضحك : كل حد بيعرف أنه ألماس .. واضح من بعيد

ما بنسى اليوم اللي عرفت أنه بصير بنت و تحدد جنسي .. شردت من عُمر و رحت عند خلف ! رحت لشقته اللي ساكن فيها عشان جامعته .. رحت عنده و أنا منهار تماماً .. فنفس اليوم تميت عنده طول اليوم و فنفس اليوم هو اللي خبق أذني ! ما أدري كيف ي ها الشي ع باله .. و ما أدري كيف رضيت بسهوله .. بدأ تلفوني يرن فحولته صامت .. تميت أسولف وي خلف اللي أنسى وياه كل شي حولي ! أحس خلف موجود فحياتي وقت ما أبيه .. إذا قلت خلف قال " لبيه " .. إذا ألتفت يمين أحصله و إذا ألتفت يسار أحصله .. و صدق ما أعرف كيف بفارقه بعد العمليه ! كيف بعيش بدون ما أسمع سوالفه و مصخرته و هزابه .. طالعت الساعه الراهيه اللي لابسنها .. ياب لي وحده مثلها لكني ما قبلتها منه .. الساعه غاليه واايد ! و وجودها عندي ممكن تسبب لي مشاكل مع عُمر .. إذا ع الحلق علق ! شو بيسوي بساعه تسوى أكثر من عشرين ألف ..! خلف من طبقه مخمليه مثل ما يقولون .. عايلته غنيه

طالعت الساعه بين سوالفنا .. كانت سبع المغرب : خلف يلا لازم أرجع ..

: أقعد أقعد .. بنتعشى خلاف برجعك

: لاء برجع .. مالي نفس أكل أصلن

: ع راحتك

طلعنا من المول و رجعني البيت .. وقف ع أخر الشارع و نزلت .. كملت للبيت مشي .. أعرف محتشرين فالبيت و محد يحتشر كثر عُمر .. أوف ! لين متى بكون تحت أمرته يعني .. كلها شهور و بصير بنت وقتها بنشوف منو بيسمح له يتأمر عليه ! حدرت .. البيت هادي ! لا هب هادي هذا يسمونه هدوء قبل العاصفه .. طالعت الكل .. يالسين فالصاله .. وقف عُمر و قرب صوبي بعصبيه و صرخ فويههي : وين كنت ؟!

طالعته ببرود : طلعت

رد صرخ : أدري طلعت .. وين رحت ! أنت تعبان و محتاج راحه وين سرت

جتفت إيدي : هيه ع طاري التعب .. لازم أروم الشرطه أقولهم إني تذكرت و بشتكي ع يوسف

رد صرخ : قصورك تشتكي بعد

طالعته بعصبيه : ليش ! هذا أنتو كل اللي يسويه يوسف تسامحونه عليه .. و إذا غلط غلطه بسيطه قلبتو الدنيا عليه

حسيت بإيد ريم و هي تسحبني من جدام عُمر : أنت تعبان لازم تريح هب وقته

سحبت إيدي عنها : شيلي إيدج تراني ما صرت بـ . . .

سكت فجأه لما تذكرت أنه الكل قاعد .. نافخت و صعدت فوق لحجرتيه .. حدرت حجرتيه و فريت غترتيه ع الشبريه بعنف ! عيل تباني أسكت ي عُمر .. تباني أسكت ! عشان يوسف اللوتي تباني أسكت ! ما بسكت بنشوف ي عُمر بنشووف .. رحت قفلت الباب و بدلت ملابسي و تسدحت ! سكرت عيني .. عُمر .. عُمر .. عُمر ! الكل معطي لعُمر أكبر من حجمه ! أنا اللي من الأول خليته يتحكم بحياتي .. بس أحينه كل شي بيتغير .. الأمور بتتغير ! سمعت صوت دق باب .. كان هادي ! بس من طنشته بدأ الدق يعلى و عُمر يصرخ ورى الباب و يهددني إذا ما فتحته بيكسره .. بس طنشته و ما رديت .. تميت أطالع ستاره البلكونه الشفافه .. قمت .. فتحت باب البلكونه و يلست حذال الباب .. الجو حار شوي و رطوب بس ما عليه .. أحس إني تايهه .. كيف بتكون حياتي بعد العمليه ! كيف بعيش بالوضع اليديد .. ! كيف بيتقبلني الناس اللي حولي ! بقدر أتعايش مع وضعي بسهوله ..! بيتقبلوني الناس و لا بيستحقروني لأني غيرت جنسي ! بس ها الشي هب بيإرادتي .. هب بكيفي أختيار مصيري .. لو بكيفي جان تميت ولد .! بس صعب .. أنا حتى ما أنجذب لأي بنت أشوفها جدامي .. ما أحس بأي شي يستهويني مثل باجي الشباب .. إذا الريم مسكت إيدي ما أحس بأي شي .. يت بنت و طالعتني بنظره و لا غازلتني بكلمه ما أحس بأي شعور بالغرور أو حتى بالأنجذاب .. حاولت أرمس بنات و أنفي شعور البنت اللي بداخلي بس ما حصلت نتيجه ..