السلام عليكم
اسموحه منكم
بس انا اليوم الصبح طلعت من المستشفى انا وربيعي سوينا حادث


الجزء الثالث والعشرين..



بدت السنه الدراسيه اليديده والكل بدا يمارس حياته الطبيعيه، غاليه رجعت لجامعتها بكل نشاط وحيويه.. وتحاول كثر ماتقدر توفق بين حياتها ودراستها، اهل ريلها ناس طيبين ووايد مرتاحه معاهم.. وأبوها وأمها بدوا يتعودون على غياب غاليه عن حياتهم.. صارت تزورهم كل يومين ثلاثه مره، بس مدام هي مرتاحه أكيد هم بيستانسون لها..
اليوم أبوغاليه مسوي عزيمة عالعشا لأنهم من فترة لاهين بحياتهم، والعيله صارت جمعاتها قليله.. فقرر بيسوي لهم عشا ويعزم الكل..
غاليه: شروق وينها..؟؟ لاتقولون في الفجيره..!!
شذا: لا أمس يات بس راحت مع ريلها يشترون شوية أغراض للبيبي.. وتلاقينهم الحين على وصول..
غاليه: أهااااا.. عمووه وينهم عيالج المفاعيص..؟؟
فجر: عند أبوهم.. أنا قلت البنيه بتلزق فيني، طلعت ورا أبوها هي الثانيه..
ميعاد: أنا بعد عواشه طول الوقت مع أبوها، تقولين مربينهم عالفاضي..
غاليه: ههههههه الله يعينكم التعب لكم والحب لهم..
أم غاليه: يعني إنتي الي أحسن منهم، ربيتج وتعبت عليج وتاليتها تموتين على أبوج..
غاليه: يعني هي مسألة غيره..!!
أم غاليه: لاغيره ولاشي.. المحبه من الله..
دخلوا عليهم خليفه وسعيد الي كانوا شايلين باقة ورد كبيره..
شذا: ياسلام منو هالذويق الي يايب الباقه..
خليفه: كلنا ذويقين بس في واحد غلس حب ياكل علينا الجو..
سعيد: هو بس غلس.. لكن ماعليه أراويه شغل الله عدل..
غاليه: إنتوا عن منو تتكلمون..؟؟
سعيد: هذا ولد عمكم سلطان يايب هالباقه للكل بمناسبة الجمعه الطيبه.. والله كريه..
شذا: ههههههههههه تموتون لو حد غلبكم فالخقه..
خليفه: وعععععع الله وخقته، راس ماله هالشعرتين الي في راسه..
مروى: سيروا تمشوا ثلاثتكم وشوفوا منو الي بيسحر البنات.. أراهنكم لايطيحكم بالقاااع..
خليفه عصب عليها: مرووه تأدبي وإحشمي الي يالسين..
مروى حست إنها تمادت فضحكت بإرتباك وسكتت، خليفه حط الباقه عالطاوله..
خليفه: يقول كل واحد ووحده ياخذ له ورده وحده.. طبعا نحن الشباب أخذنا باجي دوركم إنتوا..
قاموا البنات ياخذون لهم ورد وغاليه تتطالع مروى الي كانت منحرجه من الي صار، وكانت حاسه إنه الكل صايدنها في موقف محرج..
غاليه: وإنتي ماتبين وردتج..؟؟
مروى: هاااااه بلى الحين باخذها..
بعد نص ساعه الكل قاموا على العشا وكانت اليلسه كلها سوالف وضحك، وأحلى شي فاليلسه اليهال الي مالين البيت.. عيال فجر التوأم حمد وهند، وعواشي بنت ميعاد وعبدالعزيز.. ومتعب ولد عبدالله وجميله.. ماشاءالله عليهم كبروا وبدوا يتحركون أكثر، متعب وعواشه خلاص يراكضون بالبيت والتوأم المرح بعدهم يحبون بس على وشك الإنطلاق هاليومين..
غاليه: فجر.. عيالج متى بيمشون..؟؟ تقولون عيايز باجي شهر وبيكملون السنه وهم للحين تاتا تاتا..
فجر: خليهم على راحتهم.. أنا جي ومب قادره عليهم، ماشاءالله عليهم شياطين..
ميعاد: ومافي غيرهم فالطريج..؟؟
فجر: هههههههههههههه خلينا التفريخ كل سنه حقج..
غاليه: ميعادووو إنتي حامل..؟!!
شروق: هيه حامل.. وفالثاني بعد..
غاليه: زين والله مبروك.. يعني عادتني غريبه ولاولدج تخبريني؟؟
ميعاد: لافديتج بس مب من زمان عرفت.. من يومين بس..
أم غاليه: الله يسعدكم وتشوفونهم معاريس إن شاءالله..
غاليه: أنا بقوم بسير لأبوي لأني صج متولهة عليه..
طلعت غاليه برع البيت وشافت سياره غريبه عنهم، معقوله عندهم حد غريب..!! أنا بقعد فالحديقه وبشوف لو حد بيظهر..
راحت غاليه تتمشى فحديقة بيت أهلها.. حديقتها الي إهتمت فيها سنين طويله، ورعتها وسقتها وكل يوم تزرع شي يديد فيها..
وهي تتمشى وتتذكر أيامها الحلوه قبل، لفت إنتباها شي طايح من العواميد الي تفصل الشجر عن الورد.. راحت غاليه وسحبته وكانت كراس.. وبالتحديد كراسها الوردي الي كانت تكتب فيه قبل..
غالي: أوييييه أنا كيف نسيته..؟؟ ومعقوله محد شافه من هذاك اليوم...!!
غاليه فتحته ويلست تقراه وتذكرت الفتره الي مرت عليها من الضيج والهم.. أيام إسودت الدنيا في ويها وحست الحياة مالها طعم..
غاليه: سبحان الله.. الي يشوفني في هذيك الأيام يستغرب من الي أنا فيه الحين.. سبحانك ربي إغفر لي ذنوبي..
(( يارب تغفر لها تراها بنت عمي شيطانه ودايما تسوي الذنوب، بس طيبه وتستاهل الخير..))
غاليه: ههههههههههههه ناصر..!! من متى هني..؟؟
ناصر: توني.. بس لحقت عالإستغفار..
غاليه: ههههههه شخبارك.. عساك مرتاح بحياتك..؟؟
ناصر: الحمدلله ولا أروع.. قريبا بصير أب.. ومرتاح مع نجود واااايد..
غاليه: الله يهنيك يارب.. ويرزقك من واسع نعمته..
ناصر: آمين يابنت عمي.. والحين خبريني إنتي شخبارج وعساج مرتاحه مع خلودج..!!
غاليه وهي تسكر الكراس: الحمدلله.. خالد إنسان طيب وحنون، وطبعا غاليه تتدلع عليه ومطلعه عيونه..
ناصر: ههههههههههه غاليه منصور مب أي كلام..
غاليه: ووينه منصور عني..؟؟ صار لي ساعه أنتظره يفظى حقي. مشتاقه حقه مووووت..
ناصر: تعالي بوديج له.. الميلس محد فيه غريب..
غاليه: أنا شفت سياره غريبه وقلت يمكن حد هناك..
ناصر: أي وحده الرنج..!! هاي حق سلطان حليله شاري سياره يديده..
غاليه: أهااااا.. علشان جي يايب لنا الورد، وحارق قلوب السبلان خلوف وسعود..
ناصر: هههههههههههههههه
غاليه: يالله عيل قوم خلنا نسير لهم..
وراحت غاليه مع ناصر ودخلوا الميلس، وسلمت غاليه على أبوها وعمامها.. ويلست يم ريلها الي كعادته هادي وساكت..
عبدالعزيز: شخبارج غاليه عساج مرتاحه..!!
غاليه: الحمدلله وايد مرتاحه.. إنتي شخبارك يقولون ماشاءالله بتصير أبو للمره الثانيه..
عبدالعزيز: ههههههههههه الله يبارك بحياتج عقبـا...، يالله شو نسوي بعد.. الله رزقنا..
غاليه حسته كان بيغلط وإنحرج: الله يرزقكم ويوفجكم..
خالد: غاليه.. متى بتروحين البيت..؟؟
غاليه: يوم تبا تروح بسير وياك.. بس لو بتسهر مع ربعك خلني هني شوي..
خالد: لا أنا شوي وبروح مالي مزاج للسهر اليوم..
غاليه: خلاص أنا بدخل وبتجهز للروحه..
إستأذنت غاليه وطلعت عنهم.. وراحت الصاله وشافت الكل يالسين ويضحكون على شذا الي كانت تلاعب حمد ولد فجر ورجع كل الي في بطنه على بدلتها..
شذا: أخييييه ماحب ريحته أفففف
غاليه: ههههههههههههههههه الله يعينج، سيري غيري ثيابج ريحتج خايسه..
شذا: غلووووي بس عاد بروحي لايعه جبدي..
غاليه: ماما أنا بسير البيت..
أم غاليه: بتروحين..!! تو الناس خلج يالسه معانا..
غاليه وهي تلبس عبايتها: لافديتج ريلي يبا يروح البيت تعيان شوي، باجر بمرج وبتغدا عندج قبل دوامي..
أم غاليه: خلاص فديتج الله يحفظج..
طلعت غاليه وركبت مع خالد السياره وكان ساكت وهو يسوق ومشغل أغنية عيضه المنهالي..
بي ضيقة ودعت أنا اليوم غالي..
وأسهر من فراقه أيام وليالي..

غاليه: الله لايجيب الضيج ياقلبي..
خالد: آمين حبيبي.. هذي وردة سلطان..؟؟
غاليه: هههههه هيه.. والله إنه سوالف.. وإن شاءالله يكون من نصيب مروى..
خالد: إشمعنى مروى..؟؟
غاليه وهي تحط الورده يم وردة خالد: لأنها تحبه وكلنا حاسين بها، بس هو مايندرى منو في باله..!!
خالد وهو يبركن السياره في بيتهم: الله يجمعهم على خير..
نزلوا من السياره ولقوا الأهل كلهم قاعدبن يسولفون، غاليه كنت تبا تقعد معاهم ولو شوي، بس خالد سحبها لأنه تعبان ويبا يرقد..

غاليه كانت منسدحه عالسرير والنوم مخاصمنها وودها تطلع برع، بس خالد يبيها ترقد معاه، وفي نفس الوقت تحسه مضايج من شي ويتجلب يمين ويسار ومب قادر يرقد..
غاليه مسكت إيده ويلست تمسح عليها وهو من حس بيدها على طول مسكها بإيده الثانيه وضغط عليها بقوه..
غاليه: شو الي تبا تقوله..؟؟ حاسه فيك من ظهرنا من بيت أهلي وإنت شايل الهم..
خالد تنهد وغمض عيونه: أخاف أقولج وتزعلين.. والله ياغاليه رضاج بالدنيا كلها..
غاليه يلست تتطالعه وهو مغمض عيونه، فمسكت خده وخلته يفتح عيونه..
غاليه: أي شي بتقوله أنا راضيه فيه، لو شو ماكان..
خالد عدل نومته شوي: مب عايبني دخلتج علينا ونحن فالميلس.. يعني كلنا رياييل إنتي ليش تدخلين..؟؟
غاليه إستحت: بس كلهم عمامي وعيالهم..!!
خالد: بس ما أشوف وحده غيرج من البنات تدخل، غاليه.. إنتي زوجتي وأنا ما أرضى عليج تقعدين بين الرياييل، منهم المتزوج ومنهم العازب.. وأنا ريال ولا أرضى على حرمتي.. وأنا لو قاسي كنت خليج تغطين ويهج لأني مابي حد يشوف هالجمال غيري..
غاليه: لا بلييييز كله ولا الغشوه..
خالد: أدريبج ماتحبينها بس الله يخليج لاتخليني أضطر لهالشي.. لأني صج أحبج وأغار عليج من أقل شي..
غاليه حظنته: خلاص حبي أوعدك من اليوم أسوي كل الي تبيه.. وصدقني بسويه عن طيب خاطر لأنها أوامر يايتني من أغلى الناس على قلبي..
خالد باسها وتنهد براحه.. الحمدلله يارب لأنك كبرت لي عقلها، الحين أقدر أتفاهم معاها على كل شي.. مب قبل كله صياح ودلع..
الحين خلاص حياتنا بتتحسن وبنصير أحلى حبايب..

باليوم الثاني غاليه كانت تتغدا مع أمها، أكلت بسرعه لأنها مستعيله وتبا تلحق على كلاسها..
غاليه: ماما فديتج سامحيني مره ثانيه يييج من وقت، بس الحين مستعيله وتأخرت.. أخاف الدكتور يروغني..
أم غاليه: هههههههه لا برايج سيري، ولاتنسين تمرينا باجر..
غاليه وهي تبوس أمها: من عيوني يالحلوه إنتي..
راحت غاليه وركبت سيارتها المرسيدس اليديده الي إشتراها لها خالد.. كانت معترضه عالسياره لأنها تحب سيارتها الجديمه، بس هو مصر إلا يشتري لها سياره يديده هديه منه لها بمناسبة السنه الدراسيه اليديده..
وصلت غاليه الجامعه وهي تمشي بسرعه تخاق تتأخر، ومن وصلت الكلاس إنصدمت إنه الدكتور معتذر فوقفت مكانها تنافخ ومعصبه، أففففف تعبت نفسي عالفاضي.. أمممم أحسن شي أسوي مفاجأة حق أبويه وخالد وأروح لهم الشركه.. بس أخاف خالد يعصب، أحسن شي أدق له وأسأله لو عادي..
دقت غاليه وخذت الإذن من ريلها وراحت لهم الشركه..
غاليه من وصلت الشركه لقت في ويها ناصر وأحمد واقفين يتعازمون على العصير..
ناصر: حلفت عليك تشربه..
أحمد: ياريال إنت أكبر عني والإحترام لك..
ناصر: الحين أنا أكبر عنك يالشيبه..
أحمد: هيه.. مب إنت بتصير أبو قبلي خلاص يعني أكبر عني..
ناصر: والله مب مشكلتي يوم إنت مب شاد حيلك..
أحمد: هههههههههه يالسخيييييييف.. يالله العصير حلالك..
غاليه: لا إنت ولا هو عطوني أشوفكم بشرب هالعصير..
ناصر: غااااااااليه أشرقت وانورت وإستهلت وأمطرت..
غاليه: أمطرت..!! جي ماخبرتني كنت بييب مظليتي..
ناصر: هع هع هع ثجيلة الدم وصلت...
أحمد وهو قافط: شخبارج ياغاليه..
غاليه بمرح: الحمدلله كله تمام.. إنت شخبارك، وسلمى إشحالها..!!
أحمد: الحمدلله بخير.. ناصر أنا بسير المكتب..
ناصر: أنا بلحقك بس بوصل غاليه قبل..
ناصر مشى معاها وهو حس أحمد وايد كان مرتبك من شافها، وغاليه كانت تمشي وتسولف وتسأله عن حرمته والبيبي متى بيي..
ناصر: أمممممم ممكن أسألج سؤال..؟؟
غاليه: بس واحد..؟؟ تفضل..
ناصر: شو شعورج لمن تشوفين أحمد..؟؟
غاليه إستغربت من سؤاله ويلست تتطالعه: تبا الصراحه.. عادي وكأني أشوفك إنت.. ولا كأني في يوم حبيته..!!
ناصر: والله..!! يعني عادي لمن تشوفينه..؟؟
غاليه: هيه.. لأني إكتشفت الحب مب بس كلام حلو وهدايا.. الحب عشره وتضحيه.. الحب مشاعر يكبرها الزواج اكثر من العلاقه قبل الزواج..
ناصر: الحمدلله.. الله يهنيج ويسعدج.. والحين أخليج تروحين للزوج المحب، اخافه يغار مني بعد..
غاليه: هههههه انا ماخذه ريال مب ياهل..
ودخلت عنه مكتب ابوها وشافته يالس مع خالد ويشتغلون فالأوراق الي جدامهم..
غاليه: السلام عليكم..
ويلست معاهم غاليه وهي تسولف ولاهتنهم عن الشغل..
ناصر رجع لأحمد الي كان يالس ويدخل البيانات عالكمبيوتر..
ناصر: احمدوو.. شو شعورك يوم تشوف غاليه..؟؟
أحمد تيبست يده عالكيبورد: مادري.. بس من أشوفها يعورني قلبي.. والي يحرقني أكثر إنها تكون هاديه وطبيعيه أكثر من اللازم..
ناصر: إنت مب مرتاح مع سلمى..؟؟
أحمد: بلى بس... بس أحسني مب متعلق بها وايد، يعني عادي لو تغيب عني.. عادي لو تروح لبيت أهلها يومين..
ناصر: تحس نفسك للحين تحب غاليه..؟؟
أحمد: بصراحه.. هيه، والله للحين قلبي يدق كلما شفتها، واكره نفسي أكثر كلما شفت خالد.. أقول في خاطري ليش أنا ماكنت الي أضحي مثل خالد.. ليش إنعميت عن كل شي.. والله الحين مب هاميني اليهال.. يعني حتى لو قالت لي سلمى إنها حامل بيكون الأمر عااادي جدا..
ناصر سكت وهو يقارن بين كلام الإثنينه.. من فتره غاليه هي الي نظرتها للحياة سوده.. وماكانت تبي غير إنها تسعد أهلها وحب أحمد بيظل بداخلها.. والحين إنجلبت الآيه وصارت نظرة أحمد هي السوده وكل الي يبيه حب غاليه..


مر شهر حلو وخفيف على كل البيوت.. الكل كانت ماشيه حياتهم طبيعيه وعاديه، ووصل شهر رمضان المبارك.. ولأول مره غاليه ماتكون عند أهلها في رمضان..
أبوغاليه: بابنت الناس بسج صياح..
أم غاليه: أول مره أصوم وبنتي مب معاي..!!
أبوغاليه: عيل بعده بييج العيد بدونها والعيد الثاني.. ومناسبات كثيره شو بتسوين ساعتها..؟؟ بتيلسين تصيحين وبس..
أم غاليه تمسح دموعها: أنا بدق لها وبخليها تفطر عندنا..
أبوغاليه: لاتتصلين ولاشي.. خلي البنيه عندهم، لو ريلها يبيها تفطر عندنا بروحه بييبها..
ومالحق يكمل جملته إلا بدخلة غاليه عليهم..
غاليه: مبروووك عليكم الشهر..
ام غاليه قامت تحظن بنتها وهي تصيح وتبارك لها بالشهر..
أبوغاليه: زين ييتينا ولا أمج قالبتها مناحه من الصبح..
غاليه: فديت أمايه أنا.. قلت لخالد وين بنفطر، قالي في بيت أهلج تلاقينهم الحين بخاطرهم يشوفونج.. وهو بيي قبل المغرب..
أم غاليه: فديته والله.. عسى الله يخليه لنا إن شاءالله..
يلست غاليه مع أمها تسولف وأبوها طلع عنهم راح إييب لغاليه السمبوسه الي تحب تاكلها بعد الفطور..
بعد الفطور إجتمعت العيله كلها عند بوغاليه.. ويلسوا يتفاولون..
غاليه: خاطري آكل سمج عالسحور..
شذا: هذي غاليه ماتغيرت.. بعده الفطور في بطنها وهي تقولي سحور..
غاليه: هههههههههههه
أم عبدالله: بعد يومين أميه العوده بتيي من الفجيره.. مع شروق..
غاليه: فديت يدووه تولهت عليها..
أم غاليه: الساعه صارت سبع ونص، يالله ورانا صلاة التراويح..
أم حميد: هيه والله مر الوقت علينا.. يالله قوموا خلونا نلحق عالصلاة..
وطلعوا الجماعه على أمل يلتقون كل يوم على فوالة أبو غاليه..

أم منصور وصلت دبي وقررت تبقى لبعد العيد، وبدر وسلطان مب عايبنهم مايقدرون على فراقها شهر كامل، بس هي أصرت على قرارها.. فما كان منهم إلا إنهم يوافقونها رايها.. بدر بعد يومين رجع الفجيره يكمل أشغاله هناك.. وسلطان طلع له شغل في دبي وقرر يستقر هناك.. ويرجع لأهله في الويك إند..
أبومنصور: سلطان قول تم..
سلطان: تمـ طال عمرك..!!
أبوغاليه: الله يطول لي فعمرك، طول ما إنت تشتغل في دبي، إنت بتسكن عندي، تاكل وتشرب وتنام..
سلطان إنصدم: بس ياعمي انا.....
أبو غاليه: لا بس ولاشي.. أنا وخالتك ماعندنا حد هني، غاليه تزوجت وخلى علينا البيت.. وإنت إن شاءالله بتونسنا وبتوفر عليك مصاريف السكن ولإيجارات..
سلطان الي كان مستحي من عرض عمه: والله ياعمي ما أدري شو أقولك.. إنت عمي وكلامك على راسي من فوق، بس أحس إني بكون مستحي طول الوقت..
أم غاليه: وليش تستحي..!! هذا بيت عمك يعني بيتك.. والحمدلله البيت عود وإختار لك أي غرفه تبي.. وحتى يوم بتعرس بعد بتبقى عندنا..
سلطان: بعد..!! لا هذا وايد..
أبوغاليه: وعرسك وكل شي علي أنا..
أم غاليه: وعروستك وجهازها علي أنا..
سلطان: وانا شو دوري في كل هذا..؟؟
أبوغاليه: ولا شي.. تستانس وتييب عيال يملون علينا البيت..
سلطان: بــــــس..!!
أم غاليه: هيه بس بعد شو.. نحن نتمنى يهال يترسون علينا البيت، مثل ما إنت عارف الله ماعطانا اليهال وبنتنا نفس الحاله، يعني البركه فيك إنت..
أبوغاليه: بس لو إنت بخاطرك يوم تعرس تستقر فالفجيره، فإنت مب ملزوم تحقق أمنيتنا نحن الشايب والعيوز..
سلطان: الله يطول بعماركم ياعمي.. وأنا أصلا مقرر أستقر هني حتى بعد الزواج... بس الي إنتوا قلتوه وايد علي الصراحه..
أم غاليه: الله يخليك تحقق لي أمنيتي وتترس لي البيت يهال، والله كل مايجتمعون عندنا الصغاريه أحس البيت فيه حياه فيه روح..
أبوغاليه: كانت غاليه ماليه علينا البيت، بس الحين خلاص الله وفقها وراحت..
أم غاليه: بس لازم تستأذن من غاليه يمكن ماترضى حد ياخذ مكانها..
أبوغاليه: ههههههههه بتستوي حسوده يعني..!!
سلطان: خلاص ياعمي من عيوني الثنتين.. اليوم بخبر الوالد ومايصير إلا الي إنتوا تبونه..
أم غاليه: ومتى بنسير نخطب لك..؟؟
سلطان: ههههههههههههه الله يهداج ياخالتي إصبري علي شوي..
أبوغاليه: لا ماشي صبر.. حار بحار.. اليوم نخطب لك وباجر نملج والي بعده تعرس وتييب اليهال على طول..
سلطان وهو يقوم عنهم: هههههههه باخذ قطوه مب حرمه.. أنا أستأذن بطلع شوي وبرجع لكم عالسحور.. تامروني بشي..
أبوغاليه: سلامتك ياولدي..
أم غاليه: أنا أقول وإنت طالع دور لك عروس عل وعسى نفرح بك قريب..
سلطان وهو يفتح الباب: خلاص اول بنيه أشوفها بخطبها.. يالله مع السلامه..
طلع سلطان وأول ما إلتفت على ورا شاف مروى وهي تدخل البيت وماسكه في يدها أكياس وتحطهم عند باب البيت.. مروى ما إنتبهت له لأنها كانت لاهية بالأكياس الي شايلتنهم.. وسلطان يلس يطالعها وهو سرحان.. مروى..!! بنت حلال وطيبه وسبحان الله من قلت أول بنيه أشوفها بخطبها طلعت لي في ويهي.. وأنا أساسا كنت أفكر فيها من بعد غاليه بس خفت أتجرأ وأتقرب لها لاأنصدم مثل ما إنصدمت في غاليه.. خلاص بحاول الحين أجس النبض..
سلطان: مرحبا الساع بنت عمي..
مروى تيبست من سمعت صوته: هلا والله بسلطان.. شخبارك..؟؟
سلطان: الحمدلله بخير.. خساره الحين واصله وأنا خلاص بظهر، بس لو تبين بيلس علشانج..!!
مروى الي تفاجأت بكلامه: خذ راحتك ياولد عمي، المره اليايه نتقابل إن شاءالله..
سلطان قرب منها وهي تنزل الأغراض: يعني عادي ماتبيني أقعد عندج..!!
مروى في خاطرها تقول هذا شو عنده يلمح بالرمسه، بس أنا ماعلي من حد والله لا أقول الي بخاطري لو شو مايصير.. بس نعبت من كثر ما كتمت الي بداخلي..
مروى: ماتعنيت وييت إلا لأني يايبة لك الكيكه الي تحبها، لأن ميعاد قالت لي إنك تحبها..
سلطان خلاص تشقق: يعني متعنيه علشاني..!!
مروى بتهور: أكييييييييد..
سلطان: خلاص عيل يلعن أبو الربع.. اليلسة معاج تسوى الدنيا ومافيها..
مروى من الوناسه شوي تنط عليه وتحظنه.. من سنه وهي تعرفه وبودها بس يعبرها بنظره واليوم يعطيها كل هالكلام الحلو.. لالا أكيد أنا يالسه أحلم.. يارب الي في بالي يتحقق..

يسلت مروى في بيت عمها جريب الساعه، وسلطان كان يالس معاهم وهو يسولف ومستانس وأم غاليه شكت بالسالفه بس قالت مب وقته أحرجهم..
وصلت غاليه مع زوجها ويلسوا معاهم نص ساعه، وبعدها خالد طلع عنهم وخلى غاليه الي كانت تبا تتسحر اليوم مع أهلها.. وخالد قالها بيرجع لها بعدين..
غاليه: بتاكلين معانا دبوه..؟؟
مروى: لو تبوني..!! بس لو محد يبيني بسير بيتنا..
غاليه: أكيد نبيج، وبعدين من متى هالرقه والدلع..!!
مروى وهي تعطيها نظره: دايما فديتني رقيقه..
سلطان: ومتى بناكل والله إني يوعان..
مروى: والكيكه ماشبعتك..؟؟
سلطان: شبعت شي بداخلي بس بعدني يوعان..
مروى نزلت راسها وسلطان يلس يخزها بنظراته..
غاليه الي شكت فيهم: شو الي شبعته بداخلك..؟؟
سلطان: غاليه أبا أكلمج على إنفراد..
مروى بدا قلبها يدق.. وغاليه حسته خلاص بيخطب مروى، لأنها من يلست وهي ملاحظه نظراته صوب مروى..
قامت غاليه معاه ووقفوا بعيد عن مروى، وكلمها سلطان بكل صراحه إنه يبي مروى..
غاليه: والله ماتمنيت لك غيرها.. تستاهلها شيخة البنات..
سلطان: يعني إنت موافقه..!!
غاليه: أكيـــــــد.. والحين قوم بسير بخبرها..
سلطان: إنزين إصبري نعرف راي عمي..
غاليه: إنت إستشير عمك وأنا بسير بخبرها..
غاليه راحت تخبر مروى الي شوي وبيغمى عليها من الوناسه، وسلطان راح لعمه ولقاه يالس فالميلس مع الشياب ربعه..
يلس سلطان معاهم وبعدين الرياييل إستأذنوا وراحوا.. سلطان مب عارف كيف يدخل فالسالفه وأبوغاليه حس عليه..
أبوغاليه: تبا تقول شي..!!
سلطان: أمممم لقيتها..
أبوغاليه مافهم عليه: شو الي لقيتها..؟!!
سلطان وهو مرتبك: عروستي..
أبوغاليه تشقق من الوناسه: والله.. مبروك تستاهل كل خير..
دخلوا عليهم فهالحظه غاليه وأمها، وأم غاليه شوي وبتطير من الفرحه..
أم غاليه: مبروووك ياسلطان، يازين ما إخترت..
سلطان يبوس راسها: الله يبارك بحياتج.. وليش مخليين عروستي بروحها..؟؟
أم غاليه: لا خلاص ماتقدر تقعد في بيت خطيبها لبعد العرس..
سلطان: يعني مابتزورنا هني خلاص..؟؟
غاليه: شو يعني بيت خطيبها..!! شكلك حلت لك اليلسه هني..
أم غاليه: ههههههههه إنتي ماتدرين.. أنا وأبوج تبنيناه بعد ماتخليتي إنتي عنا.. وقررنا إنه يعيش معانا للأبد..
أبوغاليه: والحين هو وحرمته وعياله بعد..
غاليه: ياسلاااااااام هنت عليكم ترموني من حياتكم..!!
أم غاليه: هههههههههههه إنتي الي رحتي وتركتينا..
دخلت عليهم أم منصور: إنتوا وينكم صار لي ساعه يالسه بروحي..
غاليه: يدووه تعالي شوفي.. سلطان خلاص قرر يستقر وبياخذ مكاني في البيت..
أم منصور: شو يعني..؟؟
أبوغاليه: أميه سلطان قرر يخطب مروى بنت راشد..
أم منصور: ماشاءالله ماشاءالله.. عسى الله يوفقكم إن شاءالله..
سلطان: الله يخليج لنا إن شاءالله.. وتفرحين بعيالنا..
أم غاليه: لا وبيسكنون عندنا بعد..
أم منصور: زين تسوي علشان البنت ماتحس بالغربه بعيد عن أهلها.. كفايه شروق مسكينه راحت آخر الدنيا عن أهلها..
سلطان خلاهم وطلع حاس إنه مستانس لقراره هذا.. مروى طيبه وتستاهل كل خير، والله يقدرني وأسعدها إن شاءالله..
وعمي بعرضه علي هذا بيخليني أوفر البيزات الي بقطها فالإيجارات وبأمن مستقبلنا عدل.. عسى الله لايحرمني منهم إن شاءالله..

الكل وصله خبر خطوبة سلطان لمروى، وباركولهم وفرحوا لهم، بس عمر ولد إبراهيم كان حاز في خاطره لأنه طلبها قبله، هو مايحبها بس يحسها حبوبه وتناسبه.. سبحان الله طلعت مب من نصيبه..
غاليه كان في راسها مخطط شيطاني تحاول تنفذه.. كانت تبي تجمع عمر ولد خالها وخلود حميتها يمكن يصير بينهم إنسجام وتفاهم، بس مب عارفه كيف..!! فقررت تسحب خلود وحنان ويسوون زياره لبيت خالها الي من زمان مادخلت بيتهم..
خلود: إنزين إنتي بتزورين خالج نحن شو خصنا..!!
غاليه: قلت لج من نظهر من هني بنروح السوق..
حنان: زين لأني أبا أشتري كيكه عندنا عيد ميلاد منايه باجر..
خلود: بتسوونها فالمدرسه..؟؟
غاليه: أحلى الحفلات فالمدرسه..
خلود: يالله وصلنا خل ننزل..
ونزلوا البنات ويلسوا في بيت أبوحميد، الي ياهم وسلم عليهم ويلس معاهم شوي..
أبوحميد: ماشاءالله الحلوه غاليه عندنا اليوم..
غاليه: شو أسوي قلت خالي مايسأل عني قمت وييتك البيت..
أبوحميد: الله يخليج لي إن شاءالله..
غاليه: عمووه وينها ميعاد..؟؟
أم حميد: داخل تغير لبنتها..
غاليه: أنا بطلع لها وإنتوا خلكم هني..
غاليه طلعت فوق ودخلت عند ميعاد الي كانت مشاركه فخطة غاليه..
غاليه: السلام عليكم.. اشحالج دبووه..!!
ميعاد: هلا بالمدبره الشيطانيه.. حياج دشي..
غاليه: ماشي وقت حمياتي مستعيلات.. وينه حميج الدب..
ميعاد: في غرفته، من العصر وأنا أقنعه يقعد بحجة إنج تبين تشوفينه وتسلمين عليه..
غاليه: خلاص أنا بنزل تحت وإنتي سيري دقي عليه وقوليله إنا تحت..
نزلت غاليه ويلست شوي معاهم، وماكملت ثواني إلا وميعاد وراها.. سلمت عالبنات ويسلت معاهم.. خلود خذت عائشه ويلست تلاعبها.. خلود تحب اليهال وكانت تلاعبها بصوت طفولي حلو وعواشه مستانسه وتضحك لها..
دخل عمر عليهم بس قبل لايسلم إنتبه للصوت الغريب الي فالصاله، وطل براسه وشاف بنيه غريبه شايله عواشه، كانت بيضا ومليانه شوي.. فهاللحظه خلود وقفت لأن عواشه صاحت وكانت تبي تسكتها.. ويلست تغني لها وتهزها، وهي تمشي فالصاله إنتبهت للي واقف يطالعها..
خلود رجعت ويلست بعد ماعطت عواشه لأمها، خلود من النوع الي يستحي موووت.. يلست وهي تمسك إيد غاليه الي ضحكت عليها..
غاليه: حي الله ولد خالي الي مايسأل علي..
عمر: الله يحييج ويبجيج يابنت عمتي.. إنتي إلي وينج..!! خذاج خالد من أهلج وطنشتينا بعدها..
غاليه: ههههههههه الي يسمعك يقول رحت آخر الدنيا كلها الجميرا..
عمر: عاد ماعرفتينا عالبنات..!!
خلود ماتت على عمرها من المستحى على عكس أختها حنان ماشاءالله عليها فرفوشه وتاخذ عالواحد بسرعه..
حنان: وليش غاليه تعرفك أنا بعرفك علينا.. أنا حنان وهذي أختي خلود ونحن خوات زوج غاليه..
عمر الي عيبته شخصيتها: ماشاءالله.. وبأي صف حنان..؟؟
حنان: الحين ثانويه عامه..
عمر بفضول يبا يسمع صوت خلود: وخلود فالمدرسه ولا مخلصه..؟؟
خلود لو يموت ماترد عليه نزلت راسها زياده ولصقت بغاليه..
عمر: هههههههه ماباكلج إنزين..
خلود شوي وتصيح بس مسكت إيد غاليه تبا تقولها خل نطلع..
حنان: خلود فالتقنيه.. وبتخلص السنه اليايه..
عمر: ماشاءالله.. خلاص أنا بظهر إسمحولي..
ووقف عند الباب وإطالع خلود: آسف لو ضايجت فيج..
وطلع عنهم وخلود قامت على طول وسحبت غاليه الي ميته من الضحك ومستانسه وتحس خطتها نجحت 50%
روحت غاليه مع البنات وراحوا السوق، وبعد ساعه رجعوا البيت شايلين أغراض كثيره للمطبخ..
أم خالد: وليش كل هالأغراض..!!!!
حنان: حرمة ولدج تبا تسوي لنا عشا اليوم..
غاليه: وايد قاصه على عمرج، أنا بسوي لخالد مب لج..
خلود: إنزين زيدي الكميه.. حبيب حبيبك حبيبك..
حنان: ههههههههههههههه هيه صح..
أم خالد: بسكم ظرابه فضحتونا.. غاليه حبيبتي قولي للخدامه الي تبينه وبتسويه لج..
غاليه: لا عمووه.. ابا أطبخ له بنفسي.. خله يذوق طباخي، كله يقولي إنتي فالحه فالدلع وبس.. اليوم بيشوف حقيقتي..
حنان: وأنا بسير بحجز له سرير فالمستشفى..
أم خالد: بسم الله على ولدي.. حنانوو بسج من هالرمسه الماصخه..
غاليه: أنا بطلع ببدل ثيابي وبنزل أسوي العشا..
نزلت غاليه بعد عشر دقايق وبدت تسوي العشا، هي ماتعرف تطبخ وايد فقررت تسوي له أشياء بسيطه علشان لاتتفشل جدامهم..
خلصت غاليه العشا وحطت لها ولريلها وطلعته الغرفه والباجي خلته لأهل زوجها..
طلعت غاليه فوق وجهزت الأكل في خيمة الصاله ورتبته عدل، وبندت الليتات وشغلت شموع بريحه حلوه.. وحطت موسيقى كلاسيك هاديه..
ودخلت الغرفه ونثرت ورود حمرا على الأرض والسرير، وشغلت الشموع بعد.. وبخرت الغرفه والصاله، ودخلت تسبح..
طلعت بعد نص ساعه وبدلت ثيابها وراحت ويلست فالخيمه بعد مادقت لخالد وعرفت إنه في الطريج..
دخل خالد الغرفه وهو يشم الريحه الحلوه من قبل لايفتح الباب، دخل وسكر الباب وراه بالمفتاح.. شاف غاليه يالسه فالخيمه وهي كاشخه ومتعدله، راح ويلس معاها وهو يلعب بشعرها الي بدا يطول شوي..
خالد: مسـاء الخير والإحساس والطيبه..
غاليه: مســاء مايليق إلا بأحبابه..
خالد: وحشتيني يابعد عمر خالد..
غاليه: حياتي إنت.. شوف شو سويت لك..!!
خالد وهو يطالع الأكل: والله..!! إنتي الي طابخه..؟!!
غاليه: هيه والله أنا طبخت لك اليوم..
خالد مسك إيدها وباسها: تسلملي أحلى إيد.. فديت قلبج ياربي.. عسى الله يقدرني وأسعدج طووول العمر..
وإنتهت ليله حلوه في حياة قلبين عشقوا بعض وحبوا بعض بالحلال.. وإن شاءالله الله يكمل لهم سعادتهم ويعيشون مع بعض طول العمر بحب وفرح..

تمت ملجة سلطان ومروى على خير، والعرس إن شاءالله على إجازة الربيع، مروى محد مثلها مستانسه أخيرا حلمها تحقق، وتحاول كثر ماتقدر إنها تحبب سلطان فيها.. وهو بعد بدا يتعرف عليها أكثر وينعجب في شخصيتها الحلوه..
بعد أسبوع من الملجة غاليه راحت تزور بيت أهلها، وشافت أبوها وامها وسلطان يالسين فالحديقه يشربون شاي..
غاليه: أول لو جينا على بالك كنت بلهفة تسأل.. والحين صار الوقت يهنالك مايهمك حتى تسأل.. يرحم أيامج ياغاليه، أيا ماكانت اللقمه تنزل بدونج.. واليوم سلطان ماخذ الغلا كله..
سلطان: شو أسوي يوم الله خلقني جميل وحبوب ونسيت أهلج طاريج..
غاليه: لا والله..!! أصلا محد يقدر ينسى غاليه منصور..
أبوغاليه: فديتج والله.. تعالي حبيبتي..
غاليه سلمت على أهلها ويلست وتحاول تقهر سلطان.. اونها هي الكل بالكل وهو بس إحتياط..
سلطان: هههههههه هالبنيه حتى يوم زوجتوها بعدها ياهل..
أم غاليه: ماتشوف خالد متشيب منها..
غاليه: فاطمه المنصوري شوي شوي على روحج..
أم غاليه: ههههههههههههههه
أبوغاليه: وإنتي ماعندج جامعه اليوم.؟؟
غاليه: لا فديتك اليوم off day
سلطان: يالله عيل جهزي روحج وخلينا نزور حرمتي المصون..
غاليه: بفكر فالموضوع..
أبوغاليه: فاطمه وين دواي..؟؟
أم غاليه: زين ذكرتني لأني نسيته..
راحت أم غاليه تييب الدوا لريلها.. وغاليه يلست تغلس على سلطان وتاخذ عنه صحن الكيك..
وبعد نص ساعه طلعت عنهم وراحت لبيت خالها إبراهيم تجس النبض وتشوف شو صار فالسالفه..
دخلت غاليه وسلمت على عمتها سميره ويلست تسولف معاها، وتنتظر ميعاد تنزل لها من فوق.. بس ميعاد تأخرت فدقت لها غاليه وردت عليها ميعاد وهي تضحك..
غاليه: وينج إنتي أنا من ساعه يالسه تحت..!!
ميعاد: ههههه عمر فاتح معاي تحقيق يبا يعرف القمر الي كان معاج هذاك اليوم مخطوبه أو لأ..؟؟
غاليه بفرح: يعني نجحت الخطه.. خلاص خليه ينزل لي تحت..
سكرت ميعاد التلفون وهي تتطالع عمر الي كان محرج عليها ليش تخبر غاليه عن الي بينهم..
ميعاد: إنت غبي.. لو البنيه في خاطرك أكثر وحده تقدر تساعدك هي غاليه.. إنزل لها تحت وإفتح تحقيقك معاها..
عمر ودر ميعاد فالممر ونزل تحت وسلم على غاليه ويلس يسولف معاها في كل شي إلا خلود..
غاليه: أفففففف مللتني، إدخل فالمفيد على طول..
عمر: أممممممم كم عمرها..؟؟
غاليه: الشهر الياي بتدخل العشرين..
عمر: شو شخصيتها..!!
غاليه: هي مرحه حبوبه.. دلوووعه وتحب السوالف، بس واااايد تستحي جدام الغرب..
عمر: حسيتها البارحه وايد إنحرجت مني..
غاليه: شوف ياولد خالي وولد عمتي.. البنيه ماعليها كلام ذوق وأخلاق وأدب.. وقبل يومين متقدم لها ضابط قيمه ومركز وكل شي فيه أوكي.. بس عمتي رفضت لأنها ماتبيها تروح عنها بعيد.. والريال من بوظبي..
عمر: يعني ممكن تطير مني لو ماتقدمت بسرعه..؟؟
غاليه: أكيد مايبيله كلام..
عمر: عيل يالله أستأذن..
وراح عمر على طول لأمه وخبرها بالسالفه وإنه يبي خلود..
رجعت أم حميد الصاله وشافت غاليه وميعاد يسولفون..
ام حميد: غاليه.. خالد عنده أخت للزواج..؟؟
غاليه: هيه عموه..
ام حميد: يعني كيف شكلها وكم عمرها..؟؟
غاليه: عموه الي يات وياي من أسبوعين.. ماتذكرينها..؟؟
أم حميد: لا والله ما إنتبهت لها عدل.. بس ماعليه لو هو يبيها أنا بخبر أبوه وبنتصل لهم ناخذ لنا موعد..
غاليه وااايد إستانست لأنها تعرف عمر وتعرف خلود، وشخصياتهم حلوه ومتقاربه لبعض..
طلعت غاليه عنهم وراحت لبيتها ويلست مع خلود تسولف وتبا تفتح معاها السالفه وتجس نبضها بس حنان لاصقه فيهم ومب راضيه تقوم..
غاليه: خاطري في كباتشينو من إيد أحلى حنان..
حنان: يالله يالله.. أنا مالي نفس أروح المطبخ..
غاليه بدلع: فديتج حنون علشان خاطري، ولا مالي خاطر عندج..
حنان وهي تقوم: مادري كيف خالد متحمل دلعج هذا..
غاليه: ههههههههه عسل على قلبه..
خلود يلست تفرفر بالتلفزيون ، فخذت عنها غاليه الريموت،وبندته عنها..
خلود: يالحاسده خليني بطالع المسلسل..
غاليه: أبيج في موضوع..
خلود مستغربه: خير.!!
غاليه: تذكرين يوم رحنا بيت خالي.. تذكرين عمر الي شفناه هناك..؟؟
خلود إستحت: هيه أذكره..
غاليه: اليوم رحت لهم ولمح لي إنه يبيج..
خلود ماعرفت شو تقول وتلون ويها ميت لون: كيف يعني..!!
غاليه: يعني يبا يضربج..
خلود: شوووو..!!!!
غاليه: هههههه يالغبيه شو يعني يبيج، يعني هاليومين بيطرش أهله يخطبونج، وعمتي بتيي تشوفج.. فأنا قلت أعطيج خبر قبل لا الوالده تكلمج وآخذ منج الرد..
خلود بدت تلعب بالمخده بإرتباك: مادري إنتي شو رايج..؟؟
غاليه: الشور شورج، أنا خلاص تزوجت.. ومب انا الي لازم أعطي رايي..!!
خلود: أقصد هو كيف.. يعني شخصيته أسلوبه.. أي شي عنه..
غاليه حستها ماعندها مانع: إسمه عمر.. عمره 26 سنه الولد الثالث فالبيت، عنده دبلوم عالي في إدارة الأعمال، يشتغل أعمال حره.. يعني عنده مشاريعه الخاصه، إنسان مستقل يحب الحريه والإستقلال.. يعني مايحب يعتمد على غيره..
خلود: و... يعني
غاليه: شوفيج إسألي الي تبينه عادي..!!
خلود تشجعت: وإشمعنى انا الي إختارني..؟؟
غاليه: عادي.. شافج وإنعجب فيج وسأل عنج، وتقدم لج..
خلود: معقوله..!! بس هي كلها دقيقتين الي يلسها معانا..
غاليه: الإعجاب مايبيله أكثر، وعلى جدام بتتعرفوون على بعض أكثر وإن شاءالله تتفاهمون..
خلود: مادري.. بتقولين لأمي..!!
غاليه: لا.. هم الي بيدقون عليكم وبيطلبونج من الوالد..
سكتت خلود وهي تتذكر عمر.. إنسان وسيم ويستاهل الوحده تنعجب فيه.. بس ماشفته عدل.. ولفت على غاليه تبا تقولها إنها تبي تشوف شكله عدل، بس حنان دخلت عليهم وعطتهم الكابتشينو ويلست تسولف مع غاليه..
خلود تهمس لغاليه: أبا أشوف شكله عدل..
غاليه تشرب شربه من كوبها: تونا خدودنا حمر والحين نبي صور..
خلود الي صج إنحرجت: غاااااليه..!!
غاليه: هههههههههههههههه تعالي وراي عندي صور على كمبيوتري..
قامت غاليه ووراها خلود وحنان الي لصقت فيهم.. ومن دخلوا الغرفه غاليه راحت تشغل الكمبيوتر وحنان يلست فالخيمه تشوف التلفزيون..
غاليه: أمس ميعاد طرشت لي صوره..
خلود: ليش هو من متى كلمكم فالسالفه..؟؟
غاليه: أنا أمس.. بس ميعاد عندها خبر من أسبوع تقريبا، وقالت لي بطرش لج الصور علشان لو تبي تشوفه على راحتها..
طلعت غاليه الصور وعرضتها حقها..
خلود: إنزين روحي بعيد خليني أطالع على راحتي..
غاليه: هههههه إن شاءالله بس لاتاكلينه شوي شوي عليه..
خلود تفرها بالمخده: باااااايخه.. روحي هناك..
غاليه: على فكره عمر من النوع الي يشيل حديد، وفيه صوره له تبين عضلاته، فلاتخافين منه..
خالد: أوكي..
وبدت خلود تتطالع الصور وبدت تكون فكره عن شخصيته، يعني مبين عليه إنسان متفتح مستقل، يحب يهتم بنفسه حبوب، ومبين عليه لمحة غرور.. وبالنسبه للشكل وايد حلو.. طويل وعريض يميل للسماره أكثر على عكس خلود الي تشع بياض.. بس بشكل عام جميل وماينعاب..
رجعت خلود الصاله بعد ماسكرت الكمبيوتر ولقت غاليه وحنان يولعون الفحم..
خلود: شو عندهن البدويات يولعن الفحم فالخيمه..
حنان: ههههههه شميت هالدخون الغاوي، قلت لغاليه أبا أدخن شوي..
غاليه: هاااه شو رايج حلو..
خلود: الله حلوه ريحته عطيني شوي منه..
دخل عليهم خالد وهو شايل أوراق وملفات..
خالد: السلام عليكم..
البنات: وعليكم السلام..
غاليه راحت له وباسته وخذت عنه الأوراق..
خالد: لالا خليهم ثجيل عليج.. وبعدين إنتوا الثنائي المرح outside
خلود: أفااااا طرده يعني..
خالد: لا روووغه.. يالله أبا أرتاح وراي شغل..
طلعوا البنات عنهم وغاليه تتطالع خالد الي شكله كان تعبان..
غاليه: عمري شو فيك..؟؟
خالد: تعبان شوي من الشغل.. فديتج حطيلي الغدا، لأني لازم أراجع هالأوراق بسرعه وراي محكمه بعدين..
غاليه: من عيوني ياقلبي..
ونزلت غاليه تحت تجهز له الغدا.. ويوم خلصت ماشافت حد من الخدامات علشان يشيل الصينيه فوق..
رايه: روز راحت الجمعيه وكريس طلعت غرفتي ترتبها..
غاليه توهقت: خلاص برايهن، بوديها بروحي فوق..
شالت غاليه الصينيه الي كانت ثجيله عليها، وركبت فيها الدري وراحت الغرفه، خالد كان فالحمام ولاشافها يوم تدخل الصينيه وتحطها بالصاله..
غاليه وهي تتنفس بصعوبه: يالله حبيبي تعال تغدا..
خالد طلع من الحمام وهو ينشف راسه: الحين ياي..
غاليه: لحقت تسبح..!!
خالد: عالسريع.. لأني ماعندي وقت..
غاليه بتعب: خلاص عيل تعال تغدا..
يلس خالد يتغدا وغاليه محتاره تقوله عن خلود ولا لأ..!! عقب قالت خل يعرف من أهله أحسن..
خالد بعد ماخلص الغدا قام ودخل الغرفه وتغسل ويلس يكمل أشغاله، غاليه قالت خل تخليه بروحه يشتغل وهي بتنزل عند البنات..
نزلت غاليه وهي حاسه بضيج من شالت الصينيه، كانت تنزل عالدري وهي تترنح.. وشافت حنان واقفه تقولها شي بس مب قادره تستوعب الرمسه.. كانت دايخه والدنيا تدور فيها.. وفجأة ظلم كل شي في عينها..


فتحت غاليه عينها وشافت خالد الي كان ماسك إيدها ويمسح عليها، إبتسمت له بتعب وهي مب مستوعبه الي صار للحين..
غاليه: صبــاح الخيــر..
خالد باس جبهتها: حبيبتي إنتي.. بعدنا بالليل، إنتي فالمستشفى..
غاليه تتطالع المكان وإنتبهت إنهم صج فالمستشفى: ليش شو الي صار.. هيه صح أذكرني كنت دايخه عالدري وبعدها ما أذكر شي..
خالد: حمدلله على سلامتج ياروح خالد..
غاليه: الله يسلمك.. حبيبي أبا أطلع..
خالد: قالي أبوج بنتي ماتكره شي كثر المستشفيات..
غاليه: يالله عيل طلعني..
خالد قام عنها وراح سأل الدكتور عن حالتها، والدكتور طمنه وقاله إنه بيطلعها بعد شوي..
وهم طالعين من المستشفى مرت عليهم بنوته صغيره إشحلاتها، كانت لابسه تنوره قصيره وبوت طويل كانت إتهبل.. البنيه مسكت خالد ويلست تسحب إيده، خالد نزل لها وشالها ويلس يبوسها..
خالد: فديتها ياربي إشحلاتها.. غاليه شوفيها تشبهج..
غاليه: حرام عليك هالقمر أحلى عني بوايد..
البنيه يلست تسحب غترة خالد وتناديه بابا..
غاليه: لايكون بنتك وإنتي تسويلي فيها حنون عالياهل..
خالد: هههههههههه الله يقطع سوالفج..
خالد دور بعينه على أهلها بس ماشاف حد وقف، فقال لغاليه تقعد عالكرسي لحد مايدور أهل البنيه.. غاليه يلست وهي تتطالع خالد الي كان طاير بالبنيه ويلاعبها، ووداها المحل الصغير الي يبيع حلويات وإشترى لها كاكاو وعصر.. وهو راجع شاف حرمه متغشيه وتزقر على البنيه..
أم ملاك: ملاك تعالي هني.. وين خليتيني سرتي..؟؟
ملاك ركضت لأمها وهي تأشر على خالد والحلاوه الي فيدها..
أم ملاك: مشكور أخوي ماقصرت..
خالد: العفو.. عن إذنج..
ورجع لغاليه الي كانت سرحانه في منظر خالد مع البنيه، قامت وركبت السياره معاه وتحسه طاير من الفرحه لأنه شاف البيبي ولعب معاها..
خالد: شو تحسين الحين.. إن شاءالله أحسن..؟؟
غاليه: الحمدلله وايد أحسن..
وصلوا البيت وإستقبلتها أم خالد بالأحضان، وهي تلوم غاليه ليش كلفت على نفسها وشلت الصينيه، المفروض تخلي الخدامات يشيلونها مب هي..
خالد وهو مستغرب: شلتي الصينيه..!! غاليه الله يهداج ليش سويتي جي..؟؟
غاليه: محد كان فالمطبخ، فقلت أشلها بنفسي..
خالد: آخر مره تتصرفين بهالطريقه صحتج بالدنيا ياغاليه..
وفي هاللحظه ياهم حمد ولد راشد يركض لعمه، وخالد فتح إيده وشله فوق ويلاعبه، وحمد كان شايل كورته ويلس خالد يلعب معاه فالصاله..
غاليه يلست تتطالعه هي دايما تشوفه يلاعبه بس أول مره تحسه متعلق باليهال بهالطريقه.. معقوله خالد يحب اليهال وأنا الي حرمته من إنه يصير أب مثل باجي الناس..!!!!!!!!!!!!!!!!
خلود: غاليه.. غاليه وين سرحتي..؟؟
غاليه: هاااه لا سلامتج ولاشي..
خلود: تعالي بوديج الغرفه ترتاحين..
وودتها الغرفه وهي تحكيلها عن ام حميد الي دقت لأمها وقالت إنهم بيونهم باجر بالليل..
غاليه: والله..!! شكله مستعيل عمر..
خلود: عاد لاتحرجيني.. أنا بروحي مب عارفه شو أسوي ولا شو ألبس..
غاليه: إنتي قمر بدون أي شي..
خلود: الله يخليج حبيبتي.. بس قوليلي شو ألبس..؟؟
غاليه وهي تفصخ عبايتها: أممممم إلبسي البدله الكحليه وايد حلوه عليج..
خلود: أوكي.. بس والله خايفه ومستحيه..
غاليه: عادي لاتخافين.. أصلا بيت خالي فاضي، إثنين معرسين وعمر الثالث وسعيد من عمري وبعده يدرس، وماعندهم بنات.. يعني بترتاحيم معاهم..
خلود: يمكن لأني متعوده عالحشره هني..
غاليه: عندج عواشي بنت عزيز مسويه زوبعه فالبيت.. وميعاد طيوبه وبتستانسين معاها..
خلود: الله كريم.. يالله أخليج ترتاحين..
غاليه: نادي خالد.. ولو يلعب مع حمودي برايه خليه..
طلعت خلود وخلت غاليه تفكر في خالد وإنها ممكن تكون قاسيه لأنها ربطته فيها وخلته ينسى فكرة اليهال بسبب مرضها..
دخل عليها خالد ولقاها منسدحه عالسرير وتتطالع السقف، راح لها ورقد يمها وهو يطالع السقف مثلها..
غاليه: خالد.. تحب اليهال..؟؟
خالد: منو مايحب اليهال، وأنا عاد محظوظ عندي زوجه وياهل بنفس الوقت..
غاليه: هههههههههههه شو قصدك يالدب..!!
خالد وهو يسحب إيدها: أقصد يادلوعتي قومي وبدلي ثيابج وتعالي إرقدي وراج دوام باجر..
بدلت غاليه ثيابها ورقدت وهي بس تفكر في الي ممكن يصير لو إنها حملت ويابت البيبي الي خالد يبيه..

باليوم الثاني بالليل غاليه وأهل زوجها يالسين ينتظرون بيت خالها يزورونهم ويشوفون العروس..
أم حميد وصلت ومعاها ميعاد وجميله حريم عيالها، واليهال عواشي ومتعب.. دخلوا ويلسوا يسولفون ويتعرفون على بعض لأنهم إن شاءالله بيصيرون نسايب..
أم حميد: عيل وينها عروستنا..؟؟
أم خالد: موجوده.. غاليه فديتج سيري زقريها..
غاليه: إن شاءالله عموه..
راحت غاليه فوق وشافت خلود مرتبكه ومب عارفه شو تسوي..
غاليه: جاهزه.. يالله يبونج تحت..!!
خلود: أنا خايفه..
غاليه: إنزين هم بس بيشوفونج.. وبعدين إنتي قمر والمفروض ماتخافين..
خلود تشجعت ونزلت مع غاليه، كانت تمشي وتحس إنها ترتجف وخايفه من شي.. دخلت الصاله وسلمت على أم حميد وحريم عيالها ويلست يم أمها..
أم حميد: ماشاءالله عليها.. شخبارج خلود عساج بخير..
خلود بالعافيه طلع صوتها: بخير الله يسلمج..
ميعاد: ماشاءالله عليها قمر بتصك علينا..
خلود ماتت على عمرها من المستحى، وأمها شوي وبتصيح لأنها تحس هالمره خلاص خلود بتروح في نصيبها..
بعد ساعه روحوا الضيوف وهم يوعدونهم فأقرب فرصه بيونهم مره ثانيه إن شاءالله..
غاليه رجعت لغرفتها وهي حاسه بداخلها شي غريب، إحساس يديد عليها عمرها ماعاشته، إحساس إنها فاقده شي أو تدور على شي ومب لاقيته..

مر شهرين على خطوبة عمر وخلود وباجي شهر على زواج سلطان ومروى، في هالوقت غاليه كانت لاهية مابين زواج ولد عمها من بنت عمها والعرس بيكون في بيت أهلها، ومابين الترتيب لملجة خلود وعمر.. وطبعا دراستها الي للحين مستمره فيها..
اليوم عرس سلطان ومروى، كان العرس حلو وفخم، وسلطان ماشاءالله عليه كان مب مقصر على مروى بأي شي، وخلص العرس على خير وسافروا المعاريس فرنسا لشهر العسل..
وتبعهم عمر الي ملج على خلود وكان مستعيل يبي العرس الحين، بس خلود كانت معارضه لأنه مب باجي شي على الكورس اليديد.. وهي ماتبي تعرس في نص السمستر.. وبالعافيه رضى عمر إنه يأجل العرس للصيف..





الأيام تمر بسرعه واللحظات الحلوه عمرها قصير.. سنين العمر تمضي في ثواني والي مايستغل الثانيه راح تفوته أحلى أيام العمر..
منو يصدق إنه الحين مرت علينا سنتين من آخر الأحداث.. نحن يالسين والعمر مر جدام عيونا.. وحبيت أذكر لكم بعض الأحداث الي طافت علينا ونحن ماندري عنها..
نبدأ بمروى وسلطان الي صار عندهم ولد مثل القمر إسمه ياسر.. وعمر وخلود الي يابوا بعد ولد وسموه سعود.. وحنان تزوجت ولد عمها راشد، وميعاد يابت البنيه الثانيه وسمتها شهد، وعندنا عبدالله وجميله الي زادت عيلتهم وصار عندهم متعب وزينه وفرح، وتوفت أمها الي كانت تعاني من المرض من سنين وإخوانها بعدهم معاها تراعيهم وتنتظرهم يكبرون وتشوفهم قد المسؤوليه.. وناصر ونجود الي الله عطاهم فارس وآلاء.. والحين عندنا شروق الي مب راضيه تحمل وتبا ترتاح من الحمل الأولاني، وماشاءالله عندها عيسى الصغير.. ونوصل للعزابي خليفه الي للحين رافض الزواج ومصر عالعزوبيه والصياعه.. والخبر الصاعقه هو سعيد الي خطب شذا وملج عليها وينتظرها تكمل دراسه وهو يكون نفسه..وجاسم وفتون الي الله رزقهم بولد وسموه على الوالد طلال.. وبنيه سموها رغد.. وأحمد وسلمى الي الله عطاهم توأم بنات سماهم غاليه وعاليه مع إنه سلمى ماكانت راضيه بس هو أصر على رايه..
والحين دور هشام الي تزوج وحده تشتغل معاه فالدوام والله رزقهم ببنوته حلوه سماها غاليه على إسم حبه الجديم..
هذي العيله الي عشنا معاها أيام حلوه كبروا وتزوجوا والله رزقهم بالعيال.. وبقت عندنا غاليه منصور الي للحين على حالها، تحب ريلها وهو يموت عليها.. وعايشه في بيت أهل زوجها بعد ماطلع منه راشد وتزوجوا البنات..
خالد عمره ما إشتكى منها ولاحسسها بأي نقص، وإنه مستعد يعيش معاها طول العمر، بس فالفتره الي طافت غاليه وايد تغيرت عليه، كانت كله مضايجه وسرحانه كانت تدور على الشي الي للحين فاقدته.. كانت بس تبا تعرف هي على شو تدور..!!
هالسنه آخر سنه لها فالجامعه، ماشاءالله عليها من درست وهي من المتفوقين.. وخالد من تييب له أي نتيجة يعطيها أحلى الهدايا وأغلى المجوهرات.. وأحيانا يسفرها برع.. مب مقصر معاها أبدااااا..
دخل خالد على غاليه الغرفه وكانت منسدحه تفكر في شي، راح لها ولمها في حظنه وهو يبوسها..
غاليه: ههههههه شو هالحب..
خالد: فديت قلبج ياروح خالد.. حبيبي في شو تفكرين..؟؟
غاليه: ولا شي بس أنتظر شي مهم..
خالد: شي مهم، شو هو..!!!
غاليه: بعدين بتعرف، المهم الحين قولي إخواتك وصلن..؟؟
خالد: خلود وصلت هي وولدها، وحنان إتصلت وقالت بتخلي ريلها إييبها بعد شوي..
غاليه: أحس أمس تخرجت من الثانويه وسوينا لها حفلة التخرج..
خالد: سبحان الله الأيام تركض..
قامت غاليه وبدلت ثيابها ونزلت تحت تسلم على حمياتها وتلعب مع اليهال.. وصلت حنان وهي شايله معاها خبر مفرح.. خبر حملها الأول..
غاليه: ألف مبروك حبيبتي تستاهلين كل خير..
خالد: مداج تحملين أمس مزوجينج..!!
خلود: هههههههههه
حنان وهي مستحيه: صج ماتستحي على ويهك.. وبعدين أنا من ثلاث شهور من عرست..
خالد: ههههههههه الله يهنيج يارب وتفرحين فيه وفي عياله بعد..
غاليه كانت يالسه وهي شوي سرحانه عنهم، وإنتبهت لولد خلود وهو يسحبها من إيدها يباها تعطيه من الكيك الي تاكله..
غاليه: فديتك ياروحي تبا كيكه..!! هاك يود هممممم حبيب عمووه إنت..
غاليه كلما شافت ياهل ولا خالد يلاعب الصغاريه قلبها يتقطع، ليش ياربي أنا مب مثل الباجين..!! ليش ياربي حرمتني من هالنعمه الي الكل متنعم فيها.. إستغفر الله العظيم.. اللهم لا إعتراض على حكمك..
بعد أسبوعين على الأحداث الي طافت، غاليه كانت يالسه مع ريلها فالغرفه، هو كان يطالع الجريده ويسرق نظرات تجاه غاليه الي كان مبين عليها الفرح والسعاده..
غاليه: حبيبي..
خالد: هلا عمري..!!
غاليه: أممممممم شو شعورك لو صرت أب..
خالد الي صعقه السؤال فر الجريده ويلس يطالع غاليه بإستغراب..
خالد: شو تقصدين من ورا هالسؤال..؟؟
غاليه وهي تتدلع عليه: ولاشي، أشوفك وايد تحب تلاعب اليهال فقلت أسألك لو الله رزقك بالصغاريه شو بتسوي..
خالد: أنا ألاعبهم وأمشيهم وأأكلهم وبس، يعني حزة الرقاد مابي غير دلوعتي.. ما أحب حشرتهم بالليل..
غاليه حسته يتهرب من الحقيقه: ولو ياك ولد شو بتسميه..؟؟
خالد: غاليه شو هالرمسه اليوم..!!
غاليه: بس جي أتخيل لو أنا مب مريضه وأقدر أييب لك عيال شو بنسميهم وكيف بتكون أشكالهم..!!
خالد وهو يرجع لجريدته: مابي أتخيل.. شو يهال نحن..!!
غاليه: يعني إنت ماعندك مشاعر أبوه..؟؟
خالد: غلووي فكينا من هالطاري، هالمشاعر مب موجوده عندي وإنتهى الموضوع..
غاليه: بس أنا محتاجه أتكلم عن هالمشاعر.. أنا بنت ومن حقي أحس بإحساس الأمومه.. أنا من سنه تقريبا وأنا أدور على الي فاقدتنه.. واليوم بس لقيته..
خالد بدا قلبه يدق: شو الي فاقدتنه، أناموفر لج كل شي..
غاليه وهي تمسك إيده: أدري ياقلبي والله إنك مب مقصر.. بس الي أقصده إني بخاطري ياهل يملى علي البيت، أحبه وأحظنه وأكله، يصيح ويقولي ماما.. أدلعه وأدللـه..
خالد: عادي بنتبنى ياهل يملى عليج البيت.. ولو تبين بنسرق لنا واحد من عيال أهلنا..
غاليه: أنا أباه من صلبي.. أبا أحمل وأحسه يكبر في بطني، أباه يرفسني بالليل وأحس بالحياة داخلي..
خالد خلاص وصل حده: غاليه.. إنتي بديتي كلامج بإنج فاقده شي واليوم لقيتيه.. شو.... شو تقصدين..؟؟
غاليه حطت عينها في عينه وبكل قوه ردت عليه: أنـــا حـــــامــــل..

الفصل الأخير..

ليش يالحياة دايما تعاكسيني..!! أنا إنسان بسيط ومالي مطالب كبيره، حياتي بسيطه وما أريد غير السعاده.. أريد أبقى بقربها، أريد أعيش كل ثواني العمر معاها.. هي حاضري ومستقبلي وقلبي وروحي وهواي الي أتنفسه.. ليش تحرميني منها ليش..!!!!!!!
خالد كان يائس لحد الجنون، من قالت له غاليه عن حملها وهو مثل الي مضيع زمانه.. كان عايش ومب عايش، طلع عنها من ساعتين راح للبحر يرمي عليه همه.. إشتكى وصرخ وبكى.. هيه نعم بكى..!! بكى حبه الجنوني الي خايف يفقده.. بكى لحد ماورمت عيونه، بس شو الفايده الي صار صار وإنتهى، وهو لازم يواجه الواقع ويحاول بكل قوته إن غاليه تبقى معاه للأبد..
رجع وركب سيارته وهو محطي المسجل على أشعار فزاع الي غاليه تموت عليه..

شف دمعتي تنتحر لمواصلـك يـا بعـدي من كل دمعه معـي لهفـه تسلـم عليـك
من عيني الي ذبحهـا بعـدك السرمـدي من قلبـي الـي يبيـع العالـم ويشتريـك
يا اجمل صدف عمري الهجران ذكره ردي لا تغيب وتطول الغيبـه وانـا محتريـك
تروي ظما قلبي اطلالـة ثغـرك النـدي سكنت قلبي ولا لك فـي الحنايـا شريـك
يا طول ليلي مـا بيـن دلالـي ومسنـدي مشتاقـه ايدينـي الثنتيـن ضمـة ايديـك
تعال باموت في ايدك وانت موت فـيـدي الموت لذه مـا دام المـوت منـك وفيـك
غلاك مهره فـي ميـدان الملـوك تعـدي تهز عـرش الملـوك ويهتويهـا المليـك
يا سيد العشق لا يطول الهجر يـا بعـدي ترى عيونـي مـن اللهفـه تسلـم عليـك


خالد كان يحاول يجهز لها كلام ويرتب أفكاره الي تشتتت من بعد ماواجهته بأصعب خبر، هو المفروض أحلى خبر.. بس والله قلبه قاعد ينزف ويتمنى لو إنها تمزح معاه..
دخل خالد البيت ولقى أمه وإخواته يالسات بالصاله كان مبين عليه الضيج والهم، بس محد قدر يسأله شو الي فيه لأنه على طول خلاهم وطلع عنهم فوق.. دخل غرفته ولقى غاليه واقفه وماسكه الموبايل ومن شافته ركضت عليه وحضنته وهي تصيح..
غاليه: وينك صار لي ساعتين أدق عليك وموبايلك مغلق..!!
خالد طلع الموبايل من جيب كندورته ولقاه عالصامت فره عالكرسي وسحب غاليه وقعدها عالكرسي وهو يطالعها وعيونها مليانه دموع.. خالد مسح دموعها وباس خدها وهي على طول حطت راسها على صدره ويلست تصيح..
يلسوا على هذا الوضع تقريبا ربع ساعه لين هدت مشاعرهم شوي وسكتت غاليه عن الصياح..
خالد: الحين ممكن نتفاهم..؟؟
غاليه: ممكن..
خالد: الي قلتيه صج ولا تمزحين معاي..؟؟
غاليه مسكت إيده وحطتها على بطنها: ولدك قاعد يكبر بداخلي..
خالد غمض عيونه وهو يحس كل حرف تنطقه ألف سكين تطعنه.. حاول يسحب إيده عنها بس هي كانت ماسكتها بكل قوتها..
غاليه: أبيك تحبه مثل ماتحبني.. خالد أنا حملت لأني أتمنى شي يبقى وراي لمن أروح..
خالد رفع راسه وحظنها: أباج إنتي الي تبقين لي..
غاليه: خالد.. أنا أحبك وبظل أحبك طول العمر..
خالد: يعني إنتي كنتي متعمده تحملين.. مب بالغلط..؟!!
غاليه: لا مب بالغلط.. أنا الي كنت أدور الأمومه الي الكل متهني بها ماعداي أنا.. خواتك لمن إيونا وعيالهم وحشرتهم، أقول بخاطري متى الله بيرزقني بعيال يحشرونا طول الوقت..
خالد بصوت مخنوق: ياغاليه نحن متفقين من البدايه و......
غاليه: أدري بس أنا ماعدت أتحمل.. والله ياخالد بخاطري أعيش هاللحظات.. أحس بحركات في بطني أكلمه وأحبه..
خالد الي صج بدا يصيح: وأنا ياغاليه مافكرتي فيني قبل لاتسوين الي سويتيه.. منو بيبقالي فالدنيا من بعدج..!!
غاليه عورها قلبها عليه: فديت روحك أكيد فكرت فيك، خالد.. أنا مريضه وممكن في أي وقت أروح عنك.. علشان جي فكرت فيك وقلت لازم أخلي لك ذكرى من بعدي..
خالد: بس الي إنتي سويتيه هذا يسمونه إنتحار..!!
غاليه: إذا بنتحر علشانك فأنا راضيه.. صدقني ياخالد إنت بروحك في يوم بتشكرني على الي سويته..
خالد ماكان متقبل ولا راضي عن هالوضع بس ماكان بيده غير إنه يجاريها ويرضخ للأمر الواقع..
خالد: رحتي للدكتور..؟؟
غاليه: بس سويت الفحص لكن ماراجعت دكتوري..
خالد: خلاص الحين بدق عليه وباخذ موعد لج باجر الصبح..
غاليه بدلع: والحين خلنا ننزل ونخبر أهلك..
خالد بضيج: إنتي وايد ماخذه الموضوع ببساطه..
مسكته من إيده وهي تسحبه: وإنت بعد لازم تكون عادي وفري.. صدقني الحياة حلوه خلنا نعيشها بكل لحظاتها..
نزلت غاليه وهي شوي وبتطير من الفرح على عكس خالد الي يفكر في كل شي إلا إنه يستانس بإنه بيصير أب..
شافوا أمه وخواته يالسات يتعشن وولد خلود حاشرنهم بالصراخ..
غاليه: سعود حبيبي ليش تصيح..؟؟
أم خالد: دلوع طالع على أمه..
خلود: ياسلاااام الحين ولدي انا مب عايبنج..
حنان: لمن بيشرف ولدي بياخذ الغلا عن ولدج..
أم خالد: أكيييد فديته من الحين مشتاقة له، هذا ولد آخر العنقود..
خلود: أماااااااايه شو هالتفرقه..!!
حنان: إنتي كل شي تبينه حقج، خلي لي من الغلا شوي..
خالد بدون نفس: عيل شو بتسوين لو شرفوا عيالي..؟؟
الكل إنصدم من كلام خالد، هم يعرفون إنهم مستحيل يكون لهم عيال.. بس ليش خالد قال هالرمسه..
أم خالد وهي مستغربه: أحطهم بعيوني..
خالد شوي ويصيح جدامهم: عيل زهبي عيونج أول واحد ياي فالطريج..
أم خالد شهقت من الصدمه والبنات وقفوا وهم مستغربات..
خلود: خالد شو هالرمسه..؟؟؟
حنان: خالد لاتستهبل علينا.. إنت شو يالس تقول؟؟
خالد: أقول الصج.. غاليه حامل..
أم خالد مسكت غاليه وحظنتها: غاليه ليش حملتي..؟؟ إنتي نسيتي حالتج والي ممكن يصير لج..؟؟
غاليه بحيا: لاعموه مانسيت بس خاطري بياهل والي الله كاتبه بيصير..
حنان: بس هذا إنتحار.. وإنتي..............!!!!!!!!!!!!
غاليه بضيج: أنا شو..؟؟ أنا حالي من حال غيري، وحده تتمنى اليهال وتتمنى تجرب شعور الأمومه..
خلود: ماقلنا شي بس إنتوا متفقين من البدايه..
غاليه: خلاص الي صار صار.. وأنا حامل وولد أخوكم بيوصل بعد ثمان شهور..
خالد سحبها ولمها لصدره: خلاص مابي أسمع ولاكلمه، الي تبا تبارك حياها الله.. والي تبا تجرحها خلها ساكته طول العمر..
محد قدر يعترض على كلام خالد.. معاه حق المفروض الحين الكل يبارك لهم وبس، وأي كلمه ثانيه مالها داعي..
عند دكتور غاليه الي شال الدنيا ولاقعدها من عرف بخبر حملها، هو من صغرها يعالجها وهي بالنسبه له أكثر وأقرب من بنته..
الدكتور راشد: ياغاليه إنتي مينونه.. حرام عليج الي سويتيه..!!
غاليه: ههههههههههه ماعمري شفتك إلا وقلت عني مينونه، وهاي المينونه عاشت إثنين وعشرين سنه بصحه، وعرست ومرتاحه بحياتها..
الدكتور راشد: إنزين هي مينونه ومافيها عقل.. إنت وينك عن الي صار..؟؟
خالد: أنا ماكنت أبا هالشي يصير، بس والله يادكتور إني كنت أراقبها وهي تاكل دواها، بس من فتره لهيت عنها شوي..
الدكتور راشد وه ينافخ: هذا الي يلتهي عن اليهال شوف شو الي صار..!!
غاليه: هههههههههههه شو يهال الله يهداك يا دكتور راشد، أنا إستويت حرمه الحين وجريب بصير أم..
خالد: شو أقولك يادكتور، إنت تعرفها أكثر عني.. عنادها مخرب علينا عيشتنا..
الدكتور راشد: الله يصلحج ياغاليه..
خالد: والحين شو الترتيب يادكتور..!! شو تنصحنا وشو الي مفروض يصير علشان نحافظ عليها..
الدكتور راشد: أهم شي الراحه التااااامه.. ولاتفكر أبدااا تجهد نفسها، يعني بس تسير الكليه ومن ترجع منها تنسدح وترقد..
غاليه: ياسلااام يعني أقضي التسع شهور فالسرير..
الدكتور راشد بغيض: لمن الكبار يتكلمون الصغار يسكتون، وبعدين لو مانفذتي أوامري بنيمج فالمستشفى..
غاليه بخوف: لالالالالالا كله ولا النوم هني.. خلاص بسوي الي تبيه وبريح نفسي..
خالد كان مضايج بس مجبور يتحمل ويصبر علشان غاليه، هي وايد مستانسه ومايبي يخرب عليها..
الدكتور راشد: وأهم شي الفحص كل شهر.. ولاتهملين هالموضوع، لأني بسويلج فحص كل ثلاث أسابيع..
غاليه: إن شاءالله..
الدكتور: نوصل لأهم مرحله وهي مرحلة الولاده، أول ماتدخلين التاسع على طول تيين المستشفى، وطبعا أنا أعرف موعدج فمن أشوفج تأخرتي أنا بنفسي بطرش لج الإسعاف..
غاليه: ههههههه لا أكيد أني بيي بنفسي..
خالد: إنزين دكتور.. ولو نزلنا الياهل..؟؟
غاليه وهي مصدومه: شوووووووووو.....!!!!!!!!!!!!!!
الدكتور راشد: الإجهاض ماينفع لأنه مضر لصحتها أكثر من الولاده نفسها..
خالد بخوف من هالسؤال: والولاده يادكتور..!! هل بيكون فيها خطر على حياتها..!!
الدكتور فهم عليه: أخطر شي الولاده.. قلب غاليه مايتحمل آلام الولاده والحاله والنفسيه الي تمر فيها أي حامل، علشان جي أنا طلبت إنها تدخل المستشفى من تدخل الشهر التاسع.. علشان نسوي لها قيصريه..
غاليه: عمليه..!! لييييييش أنا أبا أولد طبيعي..!!
خالد: غااااااااااليه.. إنتي ماتسمعين الكلام شو..؟؟؟
الدكتور راشد: غاليه قلبج مايتحمل.. والعمليه هي الحل الوحيد علشان نحافظ على حياتج.. وأنا مب يالس أشاورج هذا إجباري..
غاليه ماكانت مقتنعه لأنها من عملية الدوده الزايده الي سوتها فالفجيره وايد عانت وتعبت، فكانت تفضل الطبيعي.. بس مثل ماقالها الدكتور الأمر مب إختياري، الأمر إجباري..
خالد: خلاص يادكتور في شي ثاني لازم نسويه..؟؟
الدكتور راشد: الحين لأ.. بس الله يخليك ياخالد لاتخليها تقص عليك بدلعها الزايد.. حاول من تشوف تتميـع عليك إطلع عنها..
خالد: الله يعيني عليها الصراحه..
غاليه: شو قصدكم إنتوا الإثنينه.. ماعليه بخبر عليكم باباتي..
خالد: ما أقول غير الله يعين أبوج على هذا الخبر..

وطلعوا عن الدكتور وراحوا على طول لبيت أبوها الي كان اليوم على حظهم ماخذ إجازه لأن ضغطه رجع يرتفع..
أم غاليه: حي الله من يانا.. هيه جي الواحد يصبح على الويوه الحلوه..
غاليه: البركه في الي تبنيتيهم مكاني.. مروى وسلطان والقرد ولدهم..
أم غاليه: هههههههه فديته والله إنه مالي علي البيت.. داخل ظاهر على حجرتج بس يبا يلعب فيها..
غاليه: أنا أوريه شغل الله عدل.. يلعب في حجرتي السباااال..
خالد: غاليه هدي شوي..
غاليه: عيل بابا وينه.. منصووووور...!!!!!!!!!
أبوغاليه دخل عليهم وهو لابس كندورة النوم..: السلام عليكم..
غاليه نقزت له تبوسه: هلا والله بأبو غاليه الحلوه..
خالد قام وراها: غاليه شوي شوي لاتناقزين..
ودخلت مروى شايله ياسر: السلام عليكم غلوووي الحلوه..
غاليه: وعليكم السلام.. إشحالج أم ياسر،عساج بخير..!!
مروى: الحمدلله كله تمام..
غاليه: ياسر حبيبي تعال لعمووه..
ياسر راح لها وهو مستانس، يحب غاليه لأنها دايما تعطيه حلاوه.. أم غاليه لاحظت على خالد إنه وايد مهتم بغاليه اليوم ومايخليها تناقز وتحتشر مثل كل مره.. يعني مهتم فيها وكأنه خايف من شي..!!
أبوغاليه: خالد شو فيك خلها على راحتها، والله البيت مشتاق لحشرتها..
خالد الي قرر يفتح السالفه: غاليه ماعادت تتحمل كل هالمناقز..
أم غاليه: من يبتها للدنيا وهي تناقز إشمعنى اليوم خايف عليها..!!
غاليه: مب خايف علي أنــا..
خالد لف عليها بقوه: مب لهالدرجه.. ولعلمج أصلا أنا مب مستانس من الموضوع..
أبوغاليه: شو السالفه..!!
غاليه: ماعليه مع الأيام بتتعود وبتتقبله..
مروى: ممكن تفهمونا شو السالفه..!!
خالد: عمي عمتي.. أبيكم تعرفون إنه الي بقوله أنا مب راضي عليه وصار غصبا عني..
أم غاليه: بسم الله شو صاير..!!
خالد: غاليه.. غاليه حــامــل..
من نطق خالد الكلمه عم الهدوء المكان وكأنه إعصار مر وهدم كل أشكال الحياة على وجه الأرض.. بس إنتهى الهدوء بضحكة أم غاليه..
أم غاليه: هههههههههههه الله يخس إبليسكم.. والله إني صدقتكم..
غاليه: ماما نحن نرمس جد..
أبوغاليه بعصبيه: شو الجد يعني.. غاليه إنتي أكثر وحده تعرفين عن وضعج وصحتج.. معقوله فريتي كل هذا وراج وحملتي..!!
غاليه بكل بساطه: هيه..
خالد: ياعمي الي صار صار خلاص.. وغاليه عاندتني في هذا الشي وحملت من وراي.. ونحن سرنا للدكتور وقالنا إنه إن شاءالله بيحاول وقت الولاده يسوي لها قيصريه..
أبوغاليه: أنا مب مصدق.. يعني معقوله تحملين ياغاليه ولاتسوين لي إعتبار.. تحملين وتخليني كل دقيقه أحاتي اللحظه الي خلاص بتفارقيني فيها..
غاليه راحت وحظنت أبوها، هو الوحيد الي كانت شايله همه يوم بيسمع بالخبر..
غاليه: إنت بتصير يد.. وأنا..........
أبوغاليه: إنتي شو..!! غاليه أنا مابي أصير لايد ولاشي.. أنا أباج إنتي وبس.. كفايه علي طلتج تسوى الدنيا ومافيها..
أم غاليه بدت تصيح: حرام عليج ياغاليه أنا ماربيتج كل هالسنين علشان تهدمين كل شي بلحظة طيش..
غاليه: وأنا شو سويت..؟؟
مروى: شو سويتي..!! إنتي يالسه تذبحين روحج.
غاليه: حرام عليكم أنا ماسويت شي.. كل حد يقولي بتذبحين روحج، أنا كل ال أبيه إني أصير أم، ليش الكل يهزبني وينازعني.. انا ما إرتكبت جريمه.. حتى مبروك محد راضي يقولها لي من خاطره..
ووقفت بعيد عنهم ويلست تصيح.. خالد راح لها ولمها.. وهي بدت تصيح بصوت عالي.. قامت فاطمه وراحت لبنتها وحظنتها وهي تبارك لها وتصيح وراها..
أبوغاليه ماكان يبا يصدق الموضوع كان حاس بالضيج لأنه يمكن يخسر أغلى إنسانه بحياته، بنته الي تعب عليها إلين خلاها عروس وفرح فيها..
أبوغاليه: غاليه.. لو إنتي مستانسه نحن بعد بنستانس لج.. مبروك حبيبتي، وإن شاءالله تكونين أحسن أم بالدنيا..
غاليه خلتهم وطاحت في حظن أبوها.. خلاص هي الحين إرتاحت يوم أبوها وأمها باركوا لها.. خلاص كل شي يهون الحين.. والله يعين على الي ياي..
إنتشر الخبر عند الكل، الي تضايج والي فرح والي صاح.. فعلا الموقف غريب والواحد مايعرف شو يرد عليهم، غاليه الله يهداها حتى ماناقشت ريلها وأهلها حطتهم جدام الأمر الواقع..
خالد دخل الغرفه بالليل كان توه واصل من الدوام، مالقى غاليه فالصاله مع أهله فقال أكيد إنها فالغرفه، من حملت وهو حالف عليها ماتتحرك أبداااا..
من دخل خالد شم ريحة الدخون الغاوي الي متعود عليه، تضايج لأنها كسرت كلامه وتحركت من الفراش، راح لها الغرفه ولقاها منسدحه عالسرير كانت مثل الملاك.. فاتحه شعرها القصير الي بدا يطول.. ولابسه بيجامه حمرا حرير وتذاكر بكل هدوء..
خالد: السلام عليكم حبيبتي..
غاليه: هلا قلبي وعليكم السلام..
خالد فر الغتره عالكرسي: يعني مصره تعانديني..!!
غاليه استغربت: ماسويت شي.. من وصلت من الدوام وأنا منسدحه..
خالد فر عمره عالسرير: وهالدخون بروحه إستوى فالغرفه..!!
غاليه: والله مب أنا.. خلود يات تسلم علي وطلبت منها تدخن الغرفه..
خالد: أهاااااا خلاص سامحتج..
غاليه رفعت حاجب واحد: مشكور عمي الشيخ..
خالد قام عنها يبدل ثيابه: هههههههه أمووووت فيج..
خالد رجع لها ورقد معاها عالسرير سحب عنها الكتب أونه بيذاكر لها دروسها.. وغاليه تسحب عنه الكتب..
خالد: تعالي براجع لج..
غاليه: شو تشوفني بيبي فأولى إبتدائي..!! قوم خلني أخلص دراسه..
خالد رقد على ورا: غلوويتي.. تحبيني..!!
غاليه لاهية بدراستها: يمكن..
خالد: أمممممم أنا أحبج..
غاليه: مشكور..
خالد: هههههههههه عاد عن المصاخه كلميني عدل..
غاليه تسكر كتبها: وحده تذاكر شو تبيها ترد عليك..
خالد وهو يقوم: خلاص خلاص برايج ذاكري أنا بسير أطالع التلفزيون..
غاليه مسكته من إيده: لالا خلصت..
وفرت الكتب عالطاوله وسحبت إيد خالد وباستها، خالد أونه زعلان ومب راضي يسامحها.. وهي كل شوي تبوسه في مكان، على خده وراسه وخشمه..
غاليه: هههههههههههه بسك عاد عن هالدلع الزايد..
خالد: يالله رضينا عنج..
ورجع يرقد وهي يالسه وتتطالعه فحبت تغلس عليه وتتدلع عليه شوي.. فمسكت بطنها ويلست تإن شوي..
خالد فز من مكانه: شو فيج..؟؟ شو يعورج..؟؟
غاليه: بطني يعورني خالد بموت..
خالد: قومي قومي بوديج المستشفى، تعــالي بلبسج العبا.........
وشاف غاليه الي إنفجرت بالضحك وطاحت على ورا، قعد يطالعها ثواني وبعدين إستوعب المقلب الي سوته فيه..
خالد: قسما بالله ماصخه، حرام عليج طيحتي قلبي..
غاليه يلست: ههههههههههه والله شكلك حلووو وإنت خايف..
خالد صج عصب عليها فقام عنها وراح الصاله ويلس فالخيمه وهو ينافخ من العصبيه.. والله بتذبحني هالبنيه حرام عليها الي تسويه فيني أنا بروحي على هاويه من الإنهيار، الحين هي يايه تقضي علي.. إستغفر الله العظيم..
خالد إستغرب ليش إنها مايات تراضيه فرجع الغرفه بعد ربع ساعه ولقاها يالسه عالسرير تنتظره..
غاليه: وينك تأخرت علي..!!
خالد المستغرب: مب أنا زعلان عليج، ليش ماييتي تراضيني..!!
غاليه بكل دلع الدنيا: مب إنت حالف علي ما أقوم من فراشي ولا أتعب نفسي..!!
خالد خلاص راح فيها، راح لها وحظنها بقوه وحط راسها على صدره ويلس يمسح على شعرها..
خالد: غاليه إرحمي شيباتي.. أنا مب حمل الدلع هذا كله..
غاليه: فديت شيباتك أنا.. إنت قلبي وعمري وكل دنيتي، لو ماتدلعت عليك إنت بتدلع على منو..!!
خالد: إستغفر الله العظيم، حبيبتي قومي إرقدي أحسن لج..
غاليه: ههههههههههه أوكي..


في بيت أبوغاليه الي كان يالس يلاعب ياسر ولد سلطان وأم غاليه يالسه معاهم تقرب له الريوق..
أبوغاليه: والله هالولد مالي علي البيت..
أم غاليه: فديته.. الله يحفظه إن شاءالله..
أبوغاليه: عيل وينها مروى..؟؟
أم غاليه: راحت جامعتها خلاص هذي آخر سنه لها وبتتفرغ لولدها..
أبوغاليه: وين تتفرغ أكيد بعد الجامعه بتشتغل، وسلطان راح دوامه..؟؟
أم غاليه: هيه راح.. وإنت مب ناوي تسير الشغل اليوم..!!
أبوغاليه: لا والله برتاح اليوم، أحس صدري يعورني وفيني دوار، وأخاف يرتفع علي الضغط..
أم غاليه: بسم الله عليك.. خلاص الغالي خذ راحتك وخلك يالس اليوم، الحين بسير سوي لك كركديه يعدل لك الضغط..
راحت فاطمه وخلت منصور يلاعب ياسر الي مستانس على يده ويسحب لحيته ويضحك معاه..
دخلت عليه الخدامه وهي شايله صينية الريوق وحطتها جدامه، ياسر سبقه وسحب البيض..
أبوغاليه: هههههه طالع على يدك تحب البيض، فديت غلايتي تحب البيض بعد.. الله يحفظها يارب..
دخلت أم غاليه وهي شايله كوب الكركديه وعطته لريلها ويلست تاكل ياسر من البيض وهو يصفق بيده ومستانس..
أم غاليه: ههههههه هذا بيض مب بيزات.. والله صج من صلبك يحب البيض طالع عليك..
أبوغاليه: ههههههههههه
ودخل عليهم أبو حميد وسلم ويلس وكان مبين عليه الضيج والهم، يلسوا يسولفون وياسر حاشر الدنيا يضارب يده على آخر بيضه..
أبوغاليه: ههههههههههه خلاص بنجسمها من بينا..
أبو حميد: ماشاءالله عليك ياخوي راجع شباب مع ياسر..
أم غاليه: هيه والله، أنا وغلوي شيبنابه.. والحين يسوري فديته رده شباب..
أبو حميد: الله يحفظكم إن شاءالله..
أبوغاليه: خير ياخوي عشى ماشر.. شكلك إلا مضايج..!!
أبو حميد: ماشر ياخوي، بس والله ولدي خليفه شاقني بحياتي، من صغره وهو أبو المصايب ومابقى حد ما إشتكى عليه، والحين يايني على آخر العمر يبا يذبحني..
أبوغاليه: ليش بعد شو مسوي..؟؟
أم غاليه: لاتغصبه عالعرس، خله على راحته..
أبوحميد بضيج: أبشرج نوى عالعرس أخيرا..
أم غاليه: أخيراااااااا الحمدلله الي الله هداه..
أبوحميد: منو الي الله هداه..!! ليته مانوى بس..
أبوغاليه: وليش عاد..؟؟
أبوحميد: يبا وحده مطلقه وعندها بنت.. وأكبر منه بسنتين..
أم غاليه: شوو..!! شو صار فيه هالولد..؟؟
أبوغاليه: صبري خلينا نفهم السالفه.. هو من وين يعرفها..؟؟
أبوحميد: يقول معاه فالدوام.. بس والله قلبي مب مرتاح..!!
أم غاليه: إنزين يمكن البنيه زينه، ولا يمكن هو يحبها..
أبوحميد يتنهد: ماعرف والله ماعرف..!!
أبوغاليه: خلاص خلني أكلمه لك، وإن شاءالله خير..

في نفس اليوم وتقريبا الساعه سبع المغرب وصل خليفه لبيت عمه الي طلب منه يشوفه، خليفه كان متأكد إنه أبوه كلم عمه فالسالفه بس هو ولاهامنه، البنت يحبها وبيزوجها..
دخل خليفه الميلس وسلم على عمه ويلس يشرب القهوه، ومنصور ينتظر اللحظه المناسبه علشان يفتح السالفه..
خليفه: وشخبارها غاليه عساها بخير..!!
أبوغاليه: الحمدلله بخير، بتييب لك عروس جريب إن شاءالله..
خليفه: ههههههه لاخلاص عروستي جاهزه، ومب باجي غيرالوالد الله يهداه يوافق لي عليها..
أبوغاليه: بنت منو الي تبيها..!!
خليفه: عمي إنت تعرفها، تذكر سالم المزروعي الي كان دايم مرافق للشيوخ..
أبوغاليه: هيه أكيد أذكره، ماشاءالله عليه ريال عن عشر رياييل، بس هو ماعنده بنات، لأنه تزوج متأخر واايد وحرمته يابت ثلاث صبيان..
خليفه: لاياعمي الي أقصدها لك تصير بنت أخته، وهو الي مربنها من توفت أمها في حادث سياره.. وأبوها من كثر حزنه على حرمته طار عقله وإستوى مثل السفيه..
أبوغاليه يتذكر: هيه صح أذكرها هالسالفه..
خليفه: هو تزوج ورباها مع عياله، وكبرت وزوجها بس الله ماكتب لها النصيب وتطلقت..
أبوغاليه: إنزين وليش تطلقت..؟؟
خليفه: بصراحه ياعمي ريلها كان يشرب وراعي بنات وإستغفر الله راعي خرابيط وايده، ومن كشفت سوالفه وواجهته قام كل يوم يضربها ويحبسها فالبيت، ومن يابت بنته قام بعد يضرب البنيه.. عاد هني هي ماتحملت وشردت من البيت وراحت لخالها الي طلقها منه بالغصب، وحبسه فالسجن فتره طويله..
أبوغاليه: لا إله إلا الله.. وإنت كيف عرفتها..!!
خليفه: بعد ماتطلقت ماحبت تثقل على خالها بتربية بنتها فطلبت منه يشوف لها شغله وشغلها فالدائرة الي أنا أشتغل فيها، وهناك عرفتها بس والله ياعمي عمرها ماكلمتني لأنها وايد تستحي وخجوله، وكل هالسوالف أنا عرفتها من برع، بنيه خلوقه ومؤدبه ووالله إني حبيتها وتمنيتها لي زوجه..
أبوغاليه: دام تربية سالم أكيد بتكون محترمه، وياولدي كفايه إنها ماتكلمك ولاتكلم حد غريب..
خليفه: يعني بتقنع أبويه..!!
أبوغاليه: ههههههه أبوك يبيني أقنعك، والحين بسير بقنعه هو..

أبوغاليه قعد أكثر من ساعتين وهو يحاول يقنع أخوه إنه يوافق على البنيه، وآخر شي وافق بس قال لازم يسأل عنها بطريقته الخاصه، وبعدين يبا يشوفها قبل لايسير ويخطبها..

مرت أيام حلوه بعد الأحداث السابقه، غاليه بدا بطنها يكبر بعد مادخلت الشهر السادس.. وخليفه كان عايش في حالة حب، أول مره بحياته يحب بهالطريقه، وخطيبته علياء ماليه عليه حياته..وهو الحين مالج ويجهز للعرس بعد أسبوعين..
اليوم عرس سعيد وشذا.. الكل كانوا في صالة العرس مابين الرقص والدق وشذا ماشاءالله عليها قمر من حلاتها، وكل البنات متعدلات ومحلوات.. الي يشوفهن مايقول ماشاءالله متزوجات وأمهات.. وأم غاليه تراكض ورا بنتها تباها تقعد وترتاح وهي مستانسه عالعرس وتناقز في كل مكان..
غاليه: ماما شوفيج..!! خليني على راحتي..
أم غاليه: كفايه خليتج تلبسين هالفستان، حشى ياعيون هالحريم بتاكلج.. وماشاءالله بطنج كبر ليش جي لابسه..!!
غاليه: الي يسمعج يقول محد غيري فالقاعه، الحريم بيطالعن البنات مب المعرسات..
ميعاد: خالووه خليها برايها.. تبا تستانس البنيه..
أم غاليه وهي تمشي عنهم: إستغفر الله العظيم..
ميعاد: ههههههههه الله يعينج.. صايره عليج حرس من بدا العرس..
غاليه: فديتها تحاتيني بس مب جي عاد..
شروق: وشخبارها خطيبة ولدي..!!
غاليه تمسح على بطنها: زينه تسلم على خطيبها..
مروى: يعني فيج بنت..!!
غاليه: والله للحين العلم عند الله، بس أنا أتمنى ولد..
شروق: ياستي كله نفس الشي..
ميعاد: يالله خل نلبس عبينا المعرس الحين بيدخل..
بعد عشر دقايق دخل سعيد ومعاه أمه وأبوه وإخوانه عبدالله وعمر.. طلعوا للكوشه وسلموا على شذا، بس عبدالله وعمر وقفوا بعيد عنهم علشان مايخربون على المعاريس، خلود راحت لعمر وهي متغشيه ومسكت يده..
عمر: هلا والله بأم عيالي..
خلود: ماقلت لي إنك بتدخل معاهم..!!
عمر: هههه كنت واقف برع وسحبني عبدالله وقالي يالله خلنا نسير نزف آخر العنقود..
خلود: انزين بسك يالله أطلع برع..
عبدالله الي كان يسمع رمستهم: جميله وينها مايت تطردني معاج بعد..!!
خلود: الحين بزقرها لك لو تبا..!!
عمر: لا مايحتاي أشوف أبويه نازل، يالله غزالي أشوفج بعدين..
وراح عمر مع أبوه وأخوه، ورجعت الفرقه تدق وتربش القاعه.. سعيد ماكمل النص الساعه وتملل من القعده وقال لأمه خلاص يبا يشل حرمته ويظهر..
غاليه طلعت برع بعد ماسلمت على أمها وبنات عمها وركبت السياره مع خالد..
غاليه: إشتقت لك..!!
خالد: فديت روحج، شيلي عن ويهج لاتختنقين..
غاليه رفعت الغشوه وإطالعت ريلها وأشرت على خدها، هالحركه عند هالإثنينه يعني إنها تبي بوسه..
خالد: ههههههه لا مافيني أختم هالليله الحلوه بحادث..
غاليه: بسم الله علينا.. حبي أنا حلوه..!!
خالد يطالعها ويرد يطالع الشارع: حلوه..!! حرام عليج مايخصج فالحلا..!!
غاليه مدت بوزها: ليـــــش..!!
خالد: إنتي الجمال.. إنتي الورد إنتي ملاك بين البشر، حلوه شويه عليج..
غاليه: فديـــــت قلبك ياربي.. حبيبي وين موديني..؟؟ هذا فندق..!!
خالد بإبتسامه حلوه: اليوم بخاطري أغير جو مع أحلى ماخلق ربي..
غاليه: من زمان مارقدنا برع، إنزين عموه من بيبقى معاها..؟؟
خالد: لاتحاتين حنان اليوم بترقد في بيتنا..
ونزل خالد وفتح الباب لغاليه وطلع معاها لغرفتهم، ومن دخلوها غاليه تخبلت عالغرفه الي كانت معدله لهم وكأنها غرفة معاريس..
غاليه: ياقلبي وايد حلوه.. عسى الله يخليك لي إن شاءالله..
خالد: عسى الله لايحرمني منج ويخليج لي طول العمر..
غاليه وهي تفصخ عبايتها: وليش ماقلت لي من وقت ..!! الحين ماعندي شي ألبسه..!!
خالد راح وفتح لها الكبت وشافت بيجاماتها وجلابياتها الواسعه الي شاريتنهن للحمل..
غاليه: يعني مسوي حساب لكل شي..
خالد وهو يلعب بشعرها: أول مره أشوف وحده حامل تحلو بهالطريقه.. يالله عليج إشحلاتج صايره..
عيونك: عيونك الحلوه حبيبي..
خالد أخذ عبايتها وفرها بعيد وهو يطالعها من فوق لتحت ويلعب بطرف فستانها، ووصل لعيونها ويلس يطالعها..
خالد: تعرفين ياقلبي شو بخاطري..!!
غاليه: شو حبيبي..؟؟
خالد: بنتنا ولا ولدنا ياخذون عيونج.. ياربيــــــــــــه إشكثر أمووووت في نظرتج الي تدوخني وتحسسني كأني طفل بين إديج..
غاليه: خلوووودي والله أستحي..
خالد لمها لصدره: فديت الي يستحون، تعالي فديتج إرتاحي إنتي تعبتي اليوم وايد..
وخلصت ليله حلوه من ليالي عيلة المنصوري.. وعسى الله لايجيب الحزن ولايفرق من بين القلوب العاشقه..



في بيت خالد الخيلي الي كان يدور على حرمته في طول البيت وعرضه ومب لاقيها، سأل أمه وقالت له إنها قبل عشر دقايق شافتها في الحديقه تلاعب سعود ولد خلود.. فراح الحديقه ولالقاها فرجع البيت وطلع غرفته وشافها منسدحه عالسرير وسعود معاها يلعب بالكمبيوتر..
خالد: إنتي وينج تعبت وأنا أدورج..!!
غاليه: هلا غناتي، أنا كنت فالحديقه مع سعودي وقبل شوي رجعنا..
خالد: الله يسامحج خوفتيني عليج..
ومسك سعود ويلس يلاعبه، وسعود مايبي يلعب معاه يبا يرقص عالأغاني الي بالكمبيوتر.. غاليه محطية له أغاني نانسي عجرم..

الي بيسمع كلمة أهله شو بنقوله.. شاطر شاطر..
والي بيقعد عاقل وحده شو بنقوله.. شاطر شاطر..

سعودي فديته يالس يرقص ويهز كتوفه ويحاول يغني وراها..
خالد: صاع الولد، خلاص راح فيها..!!
غاليه: هههههههه فديته إشحلات رقصه..
خالد: هههههههههههههه والله لو تشوفه خلود بتحتشر علينا، اونه ولدها بيظهر مطوع..
غاليه: خله يصيع من صغره، لين كبر يصير خير..
دخلت عليهم خلود وشافت سعود يرقص وخالد وغاليه يصفقون له وهو مستانس وماخذنه الطرب..
خلود: ياسلااااام.. خربوا الولد خربوه..!!
خالد: ولدج خربان وخالص..
غاليه: هيه والله من يسمع أغنيه قام يهز ولافيفي عبده..
خلود وهي تسحب ولدها: يوم بييكم الولد صيعوه، وإنت سعود كم مره قلت لك ماشي رقص وغنا..!!
سعود يصارخ: ثاطر ثاطر..
خالد: شفتي يقولج، ثاطر ثاطر.. وينها ظروسك ماكلنهم الفار..
غاليه: ههههههههههههههه
خلود: مايخصك في ولدي..!! وبعدين الفاره حرمتك هي الي خربت له أسنانه بالحلاوه الي تعطيهم له..
غاليه: ههههههههه بس بطني عورني من الضحك..
خالد: مايخصج في غلايتي.. تأكله الي تبيه والحين مقفاج لو سمحتي..!!
خلود: أصلا أنا ظاهره بكرامتي..
غاليه: هي بقت فيها كرامه..!!
خلود: مالت عليكم..
وطلعت عنهم وخلتهم ميتين من الضحك عليها وعلى ولدها..
خالد: يالله حبي قومي تأخرنا..
غاليه تحاول تتذكر: تأخرنا على شو حبي..!!
خالد: والله هالحمل أفقدج الذاكره.. نسيتي اليوم عزيمة في بيت أهلج..
غاليه قامت من مكانها: هيه والله نسيت.. خلاص دقايق وبجهز..
راحت غاليه مع ريلها لبيت أهلها.. ولقت الكل هناك مجتمعين ويسولفون والبنات يجهزون لعرس خليفه، هالعرس الكل ينتظره من زمان، خليفه الكل كان قاطع الأمل فيه إنه يتزوج ويستقر، بس الحمدلله الي هداه وخلاه يصطلب..
غاليه: إنزين وينه المعرس..!! من يينا ماشفناه..؟؟
ميعاد: رايح لحرمته يتغدا عندها.. وقال بييبها بعدين..
شروق: عشنا وشفنا اليوم الي بيتزوج فيه خلفون..
مروى: هيه والله، وإلا منو يتخيل إنه عزوبي دبي يتزوج..
أم غاليه: يالنقاشات بسكن من الحش في الريال.. قوموا يالله فوق جهزوا توزيعات العرس..
طلعوا البنات فوق يجهزون العده للعرس الي بيكون بعد يومين، وياتهم جميله وهي شايله بناتها..
جميله: غاليه وين شنطة الثياب الي خليتهن هني مساعه..؟؟
غاليه: مادري والله..!! يمكن ياسر خذاهم...
مروى: هيه صح مساعه شفت في يده شنطه وكان رايح بها على حجرتي..
جميله: ولدج طفس طالع على منو مادري..!!
ميعاد: على أمه بعد على منو بيظهر..
مروى: خلوا أمه في حالها..
غاليه: إنتي هالحمل وايد متعبنج.. على عكس الحمل الأولي كنتي عاديه..
مروى: هيه والله.. حتى سلطان طفر مني..
شروق: علشان جي أنا مابي أحمل، والله للحين حاسه بتعب..
غاليه: الله يهداج إنتي الثانيه، ولدج بيدخل الروضه الحين، شو تتريين بعد..!!
شروق: بعده صغير.. خليه يتدلع بروحه..
ميعاد: الله يعين ريلج عليج..
وعلى الليل الكل روحوا على بيوتهم على أمل يتلاقون باجر في بيت أبوجاسم.. غاليه راحت لغرفتها وبدلت ثيابها وبعدها نزلت تحت تتعشى مع خالد وعمها وعمتها..
أم خالد: غاليه دخلتي السابع..!!
غاليه: الأسبوع الياي إن شاءالله..
خالد: مب أمس داخله السادس..!!
غاليه: أي أمس الله يهداك، أنا من ثلاث أسابيع قلت لك إني دخلت السادس.. والحين باجي أسبوع وبكمل الشهر السادس..
أبوخالد: الله يقومج بالسلامه..
غاليه: تسلملي ياعمي..
ومروا يومين حلوين وخفاف وتزوج خليفه وسافر إيطاليا شهر العسل، وكانت معاهم بنت علياء نغم الي مارضت تفارقهم ولا ثانيه..
اليوم كان يوم الجمعه، إجازه والكل راقد ومريح من الدوامات.. غاليه كانت راقده مع ريلها عالسرير يوم بدت تحس بآلام في بطنها، فالبدايه طنشت وإنجلبت عالجهة الثانيه.. بس الآلام بدت تزيد وتزيد، هي من أمس حاسه بنغزات بس مطنشه واليوم زايد عليها الويع، مستحيل يكون ولاده توها داخله السابع..
بعد عشر دقايق ماقدرت تتحمل لأن الألم يزيد كل شوي، فحاولت تصحي خالد بهدوء بدون لاتخوفه.. بس هو من سمع صوتها نقز من مكانه ومسكها..
خالد: خير غاليه شو فيج..؟؟؟!!!!
غاليه تصك على شفايفها بأسنانها: بطني وايد يعورني..
خالد: من متى يعورج..؟؟
غاليه: من يومين بس كان الخفيف والحين أشوفه بدا يزيد..
خالد وقف: وليش ماقلتي، غاليه إنتي نسيتي حالتج..!!
وركض برع ينادي أمه الي يات وراه تركض وشافت غاليه طايحه عالسرير ومب قادره تتكلم من الألم..
أم خالد: بنتي من وين يعورج..؟؟
ويلست غاليه تأشر لها وهي تعبانه ولاقادره تنطق بحرف..
أم خالد: بسرعه إلبس أي شي وخلنا نوديها شكلها على ولاده..
خالد بخوف: بس هي للحين فالسابع و...........
أم خالد: لاتكثر رمسه بسرعه وأنا بلبس عبــ.......
وماقدرت تكمل جملتها لأنها شافت خالد وهو يركض يمسك غاليه الي طاحت وظلمت الدنيا في عينها..

في المسشفى خالد كان مثل المينون، يراكض من قسم للثاني ومن ممر لممر.. ويمسك كل دكتور وكل ممرضه يحاول يعرف أي شي عن حالة غاليه، الدكتور ماقاله غير إنه حالتها صعبه لأنها بدت آلام الولاده المبكره وكان المفروض يتلاحقونها قبلها بيومين.. بس إن شاءالله الله يسهل أمورها..
أم خالد الي حالتها مب أحسن عن ولدها من الخوف على حرمته الي صارت لها أكثر من بنت.. وأبوخالد الي يالس يقرأ قرآن بصوت عالي ومرتجف وهو مع كل حرف يدعي إن الله يعدي هاليوم على خير.. ووصل منصور ومعاه حرمته فاطمه بعد ماوصلهم الخبر..
أبوغاليه:خااااالد.. وينها بنتي..؟؟ غاليتي وينها..!!
خالد وهو يصيح: خذوها عني ولا أعرف وين سارت، والدكتور ماطمني ولاقالي غير إدعيلها الله يقومها بالسلامه..
أم غاليه: شو يعني..!! بنتي شو بيسوون فيها..؟؟
أم خالد: هدوا بالكم، الدكتور خايف لأن الولاده مبكره.. بس إن شاءالله مايصير إلا كل خير..
أبوغاليه مب عارف شو يقول: لو صار فيها شي أنا.... أنا والله بمووت بموت..
خالد بعصبيه: لاتقول هالرمسه.. غاليه بترجع تفهمون ولا لأ..!! بترجع لي وهي تضحك..
ويلس عالأرض وهو يصيح بصوت عالي هز القسم كله.. أمه راحت له ومسكته وهي تصيح وراه، أبوخالد راح لهم وسحب ولده ويلسه عالكرسي وهو صامد أكثر عنهم..
أبوخالد: خالد.. إذكر الله ياولدي.. وأي شي يصير تراه حكم من رب العالمين، وإنت خل إيمانك بالله قوي..
خالد الي ماسمع ولا كلمه من الي قالها أبوه رجع يوقف ويروح لباب غرفة العمليات.. وبدا يصيح من يديد، محد قدريوقف دموعه هو وأبوغاليه، وبعد أكثر من ساعتين طلع لهم الدكتور راشد وهو يمسح على ويهه بالمنديل..
خالد: دكتور والي يرحم والديك طمني على غاليه..!!
الدكتور حط يده على كتف خالد: سوينا لها عمليه قيصريه وولدناها ويابت...........
خالد الي خلاص وصل حده: أنا ماطلبت منك تقولي شو يابت، طلبت أعرف حالة غاليه.. حرمتي شو صار فيها..؟؟!!!!
الدكتور قام يقلب أياديه: أنا سويت الي أقدر عليه، وحالتها كانت مستقره لآخر العمليه، بس في آخر لحظه تغيرت المؤشرات وماقدرت أسيطر عليها و.......
أبوغاليه: شو صار..!! غاليه صار لها شي..؟؟
الدكتور بحيره: هدي يامنصور وأنا بفهمكم، حالة غاليه ماتحملت البنج ولا العمليه و...........
سكت الدكتور وهو مب عارف كيف يوصل لهم الخبر، كان يطالع الكل وهو يعرف إنه خبر مثل هذا ممكن يحكم على عيلتين مب وحده، فنزل راسه وهو مب قادر يواجهم الحقيقه..
خالد مسكه من كتفه قوه: دكتور راشد بس خلاص إحترقت أعصابي، وين غاليه..!! شو صار فيها..؟؟
الدكتور بضيج: طاحت في غيبوبه عميقه، ورب العالمين هو الوحيد الي يعرف متى تقوم منها..
نزل الخبر عليهم مثل الصاعقه وأولهم خالد الي طاح من طوله وتكور على نفسه ولاقدر ينزّل ولاحتى نص دمعه.. وأبوغاليه الي أخذ له زاويه ويلس يصيح مثل الياهل الي خذوا منه لعبته، والحريم حدث ولاحرج مسكن بعض وفتحوها مناحه.. الوحيد الي كان متماسك هو أبوخالد.. الي رجع للقرآن ويلس يقرا فيه..
بعد نص ساعه قدر خالد يتماسك شوي فوقف وراح للدكتور راشد ولقاه في مكتبه بروحه محطي راسه على الطاوله ويدعي بصوت عالي إن الله يقوم غاليه بالسلامه.. دخل خالد وإنتبه له الدكتور ويلس يمسح على دموعه، الدكتور حس إنه خالد مستغرب ليش إنه يصيح فأشر له يقعد وهو يقوم ويغسل ويهه، ورجع ويلس مجابل خالد وهو يمسح على ويهه..
الدكتور: أنا أعالج غاليه من كان عمرها يوم، وأحسها بنتي الي إنحرمت منها.. أنا عندي سبع أولاد، والله ماعطاني البنات.. وكنت كلما أشوفها أقول الحمدلله الي عوضني فيها..
خالد وهو متأثر:غاليه كانت الدوا لجروح الكثيرين..
الدكتور: صدقني ياخالد إني سويت كل الي أقدر عليه وزياده بعد..
خالد: رايتك بيضه يادكتور.. بس الي أبا أعرفه، تقريبا متى بتقوم غاليه من الغيبوبه..!!
الدكتور تنهد بقوه: العلم عند الله ياخالد.. يمكن اليوم يمكن باجر، يمكن شهر أو شهور.. يمكن سنين كل هذا بعلم الغيب..
خالد بصدمه: سنيـــــن..!!!!! وأنا كيف أعيش هالسنين من دونها..!!
الدكتور: لازم تعيش ياخالد.. علشان بنتكم عالأقل..
خالد: بنتنا..!!!!!
الدكتور: هيه ياخالد.. غاليه يابت بنيه مثل القمر تبا تشوفها..؟؟
خالد ماكان قادر يفكر في أبوته، ماحس أنها بنته، كل الي يبيه هو إنه يتطمن على غاليه، غالية قلبه.. حبه الجنوني الي مايقدر يتخيل كيف طعم الحياة من دونها..
طلع عنه بدون لايرد على سؤاله، لقى في ويهه عمته أم غاليه الي سألته شو قاله الطبيب بس هو ماسمعها وراح عنها، إستغربت منه بس طنشته ودخلت للدكتور الي كان يالس ومهموم مثلهم..
أم غاليه: دكتور.. بنتي شو يابت..!!
الدكتور إبتسم لها بهم: بنت.. الله عطاها بنيه تشبها، ذكرتني في أمها أول ما ولدتيها..
أم غاليه بخوف: دكتور.. عندي سؤال..!! البنيه.. يعني هل هي....!!!!
الدكتور مب فاهم عليها: خير ياأختي أم غاليه.. شو تبين تقولين..!!
أم غاليه وهي تبلع ريجها: بنت غاليه بخير.. يعني ماخذت مرض أمها..!!
الدكتور الي أخيرا فهم عليها: هيه فهمت عليج، أنا أول شي سويته هو إني فحصت عليها وأبشرج غاليه الصغيره بخير وعافيه، والحمدلله صحتها تمام..
أم غاليه حمدت ربها ميت مره وطلعت عن الدكتور وهي تشكره من كل قلبها.. وراحت لمنصور الي كان مثل الياهل يصيح عند باب غرفة الملاحظه الي فيها غاليه.. فاطمه يلست مع ريلها وخبرته عن الي قاله لها الدكتور، أبوغاليه حمد ربه ورجع لأفكاره الي شوي وبيستخف منها.. معقوله اللحظه الي كان خايف منها طول عمره خلاص قربت..!! يعني خلاص الغاليه الي عاش عمره كله يداريها وينفذ لها أوامرها بتروح عنه..!! ليش ياربي ليش..؟؟ ليش ياربي تحطني في هالإختبار الصعب.. اللهم إني لا أسألك رد القضاء ولكنني أسألك اللطف فيه..

مروا أول يومين من طيحة غاليه فالغيبوبه مثل الكابوس.. خالد الي مافارقها ولا ثانيه من يصبح إلين يمسي وهو يالس يمها ويقرأ قرآن وهو يصيح، وساعات يمسك يدها ويكلمها وكأنها صاحيه وتسمعه.. كان حاس بشوية راحه، يعني قضاء أخف من قضاء.. عالأقل بعدها يمه يشوفها ويلمسها ويكلمها، لكن لو لا قدر الله راحت عنه شو الي بيبقى له من بعدها..!!!!!!!!!!!!!!!!!!!!
كانوا أهلها كل يوم يزورونها.. من أمها وأبوها وبنات عمها وخالتها وعيال عمامها، محد نساها ولاحد قصر في حقها، بس الي ماقدر يوصلها ولايزورها هو هشام.. الي كان وقع الخبر عليه وايد قوي، إعتزل الدنيا وكره كل شي، وصار مثل المينون الي ينتظر أي خبر يطمنه عليها أو حتى يقضي على آخر أمل له بحياتها.. حتى حرمته الي ماكانت تعرف عن حبه لغاليه اليوم إكتشفت الحقيقه الي تقبلتها بكل مراره بس شو بإيدها تسوي..!! البنيه بين الحياة والموت ومب وقته تلومه ولا حتى تزعل عليه..
في يوم أبوغاليه رجع البيت بعد ماقضى اليوم كله فالمستشفى ينتظر أي خبر يفرحه أو.. أو حتى يذبحه..!!!! حط راسه عالمخده وغمض عيونه وحاول يرقد لو شوي، بس النوم خاصمه وراح عنه لبعيد..
دخلت عليه فاطمه وهي شايله ياسر على إيدها وتشربه العصير، من شافها منصور قام وأخذ عنها ياسر ويلس يلاعبه..
ياسر: يدي عتاني حواوه..
أيوغاليه: حبيب يديه إنت، لو تعشيت عدل بعطيك حلاوه..
أم غاليه: باجر بتلاعب إن شاءالله بنت غاليه..
أبوغاليه لف عليها بإستغراب: بنت غاليه..!!
أم غاليه: هيه بنت غاليه، اليوم الدكتور يقولي هاليومين نقدر ناخذها معانا للبيت..
أبوغاليه: بس هي بعدها صغيره.. ومولوده قبل موعدها..!!!!
أم غاليه عورها قلبها عليه: حبيبي البنيه كملت شهرين من إنولدت.. وخلاص صار لازم نظهرها من المستشفى..
أبوغاليه: شهريـــــــــــن..!! متى مروا هالشهرين..؟؟
أم غاليه: أنا بروحي مب حاسه بالوقت إلا يوم خبرني اليوم الدكتور..
أبوغاليه: يعني غاليه كملت شهرين وهي فالغيبوبه..
أم غاليه مسحت على خدها: الله يقومها لنا بالسلامه..
أبوغاليه: خلاص من باجر بنسير السوق بنشتري السرير وبنييب لها ثياب..
أم غاليه: أم خالد تقول إنه غاليه كانت شاريه كل شي قبل الولاده، الملابس وأغراض البيبي مب باجي غير السرير..
أبوغاليه حط ياسر عالسرير ورقد مره ثانيه: إن شاءالله خير..
طلعت أم غاليه عنه ولقت سلطان ومروى واقفين وهم يهمسون لبعض.. راحت لهم وهي خايفه لأن أشكالهم مترددين وخايفين..
أم غاليه: خير شو صاير..؟؟ لايكون بنتي تعبانه..!!
سلطان: لا ياعمتي مافيها شي..
أم غاليه: إحلف إنها بخير..
مروى لمت عمتها: لا عموه والله مافيها شي، تعالي قعدي تعالي..
يلست ام غاليه: بس ويوهكم تقول شي وراكم..
سلطان: هو في شي، بس مروى تقول مب وقته..
أم غاليه: خير..!!!!
سلطان: مروى حامل..
أم غاليه إبتسمت وحظنتها: مبروك حبيبتي الله يرزقج بالذريه الصالحه.. وليش تقولون مب وقته..
مروى وهي شوي وتصيح: علشان غاليه و.......
ام غاليه: غاليه الله يقومها بالسلامه، والحمل مايتخبى يابنتي..
سلطان: قلت لها بس هي تقول تخاف تضايجكم بهالخبر..
أم غاليه: الله يسامحج يامروى الحين هذا خبر يزعل، والله إنه غلاتكم من غلاة غاليه..
مروى: وإن شاءالله هالمره بنيه وبنسميها غاليه..
أم غاليه عورها قلبها: الله يقومج بالسلامه وتفرحين فيهم..
نرجع لغاليه الي راقده ولاحاسه بالي حواليها، راقده مثل الملاك البرئ وعلى ويها كل علامات الطمأنينه والسكينه.. على عكس خالد الي كان يالس يصيح وهو يقرأ قرآن وغلبه الرقاد ورقد على الكرسي وحط راسه على إيد غاليه..
وفي حلمه لقى غاليه يالسه في حديقه كلها ورود وأشجار وكانت لابسه أبيض في أبيض وشعرها كان طويـــــل يوصل لركبها، راح لها خالد ومسك إيدها وكانت ناااعمه بدرجه فظيعه..
خالد: حبيبتي..
غاليه إلتفتت عليه بكل براءة الدنيا: آمرني حبيبي..
خالد: أحبج أحبج أحبج
غاليه: فديت روحك ياقلب غاليه..
خالد مسح على شعرها: ياسلام شو هالشعر الحلو، منو الي قالت لي يوم العرس إتهنى بالشعر الطويل لأنه آخر مره بتشوفه طويل..
غاليه: من كثر ما أحبك طولته لك..
خالد: تحبيني..!!
غاليه حظنته: أموووت فيك..
خالد حس بحظن غاليه دفا وحنان، فغمض عيونه وهو يعيش لحظات حلوه ولو إنها فالأحلام بس كفايه عليه دامها تجمعه بغاليه..
صحى خالد من الحلم الجميل وهو مستانس ولف براسه يعدل من وضع رقبته الي عورته يوم سمع صوت غاليه تناديه.. غمض عينه ورجع يفتحها وهو يضحك..
خالد: الظاهر إني للحين أحلم..
بس الحلم ماكان حلم كان واقع، وتأكد منه يوم حس بإيد غاليه الي بعدها تحت إيده تتحرك ببطء.. خالد من الصدمه مب كان عارف شو يسوي في هاللحظه، فقام وضغط عالزر علشان الممرضه تييهم..
وصلت الممرضه وشافته ماسك إيد غاليه وهو يصيح..
الممرضه: خير شو صاير..!!
خالد من بين دموعه:مسكت إيدي.. مسكتها..
الممرضه:متأكد..!!!
خالد: والله العظيم مسكتها..
الممرضه راحت تنادي الدكتور الي ياهم يركض وهومب مصدق الي يالسه تقوله النيرس، بس إنصدم يوم شاف خالد لام غاليه لصدره وهو يصيح ويكلمها..
خالد: كنت أعرف إنج بترجعين لي، كنت متأكد إنج ماراح تتخلين عني في يوم من الأيام..
وزادت صدمة الدكتور يوم سمع صوت غاليه وهي ترد على خالد وتكلمه بتعب..
غاليه: خالد.. أنا من متى هني..؟؟ وشو الي صار..!!
خالد: ماصار إلا كل خير..
غاليه تتحسس على بطنها بتعب: وين بنتي..؟؟ خالد وينها..!!
خالد يلس يمسح دموعه ومب عارف كيف يرد عليها ولا كيف يكلمها، أخيرا الغاليه رجعت له وبيعيش معاها..
الدكتور: غاااليه..!! الحمدلله عالسلامه..
غاليه: الله يسلمك يادكتور راشد.. شو الي صار لي..!!
الدكتور: إنتي ولدتي الحمدلله ويبتي بنوته عسل مثلج..
غاليه: والله..!!!!! وينها بنتي..؟؟ خالد أبا أشوفها..
خالد: عند أهلج فالبيت.. الحين بدق لهم إييبونها لج..
غاليه: وليش خذوها.. بعدها صغيره المفروض تقعد فالمستشفى لحد ما تكمل التسع شهور..
خالد وهو يمسح على شعرها: حبيبي إنتي ولدتي من ثلاث شهور، بس طحتي في غيبوبه..
غاليه منصدمه: والله..!!!!!!!!!!!!!
الدكتور وهو يفحصها: لاتتكلمين وايد، بعدج مريضه..
غاليه: أبا بنتي.. وينها ومنو الي يهتم فيها..؟؟
خالد قام عنها: الحين بدق لهم.. وعمتي هي شايلتنها على راسها..
طلع خالد برع يدق لعمه ويبشره بالخبر الحلو، ومنصور من سمع الخبر على طول خبر حرمته وطاروا على المستشفى..
خالد كان يبا يرجع للغرفه يوم شاف الدكتور ظاهر منها، ومسكه من إيده قبل لايدخل على غاليه..
الدكتور راشد: خالد.. غاليه للحين تعبانه..
خالد: بس هي قامت وبخير و.......
الدكتور راشد: خالد.. مؤشراتها الحيويه وايد ضعيفه، ولو إنت خبير فالطب كنت بتعرف إنها المفروض للحين فالغيبوبه..
خالد يود على قلبه: شو تقصد..!! دكتور أرجوك لاتخبي علي..
الدكتور راشد ماحب يخوفه: تطمن إن شاءالله خير.. إنت روح لها ولاتفارقها ولادقيقه..
خالد ركض لغاليه ولمها ويلس يبوس راسها وهو خايف تفارقه مره ثانيه.. والدكتور راشد رجع لغرفته وهو مب عارف شو يسوي ومضايج.. ومن الهم طاحت دمعته على خده..
الممرضه: دكتور إنت تصيح..!!!!
الدكتور راشد: أصيح بنتي الي بتفارقني..
الممرضه: بس هي قامت من الغيبوبه..
الدكتور راشد: بس المؤشرات تقول إنها للحين فالغيبوبه.. وأخاف..
وسكت وهو مب عارف كيف يكمل جملته..
الدكتور راشد بكل خوف الدنيا: أخافها تكون صحوة الموت..


خالد الي كان حاظن غاليه وهي ساكته بين إيديه مثل الطفل البرئ الي ماصدق لقى الصدر الحنون الي يلمه ويحبه..
غاليه: خالد..
خالد: ياروح وقلب وعيون خالد..
غاليه: بنتي.. بنتي بخير ولا خذت مرضي..
خالد: لاتخافين طمنا الدكتور عليها، وقالنا مافيها إلا العافيه، يعني بتاخذ جمالج ودلعج ودلالج..
غاليه غمضت عيونها: الحمدلله الحمدلله..
خالد: حبيبي والله إشتقت لج..
غاليه رجعت تفتح عيونها: خالد.. طلبتك..
خالد: آمري بروحي تفداج يالغاليه..
غاليه: الله يخليك لي إن شاءالله.. البنيه تسميها غاليه..
خالد يسحب خدها: أنا وحده ومب قادر عليها كيف لو الله عطاني غاليه ثانيه.. شكلي من الحين بسير بحجز لي في مستشفى الميانين..
غاليه: الحين أنا ميننتنك..!!
خالد: أحلى ينون..
غاليه وهي تتكلم جد: خالد.. وصيتي لك غاليه الصغيره لاتهملها ولاتخليها تحتاج شي.. عيشها مثل عيشتي وأحسن..
خالد الي بدا يخاف: حبيبي بنربيها مع بعض..
غاليه ودموعها على خدها: أنا ياخالد راح أفارقكم، بس أعرف إنك ماراح تبخل على بنتك بأي شي..
خالد الي بدا يصيح وراها: غاليه لاتقولين هالكلام إنتي بتعيشين وبتربينها وبتشوفين عيالها وعيال عيالها بعد..
غاليه: خالد.. أنا حاسه إنه ساعتي قربت و............
خالد: لا يا غاليه لاتكملين لاتطعنين قلبي الله يخليج..
غاليه تمسح دموعه: خالد إسمعني.. أنا لازم أقولك الي بخاطري لأني ما أظمن أعيش ساعه زياده..
خالد سكت ودموعه مثل النهر على خده، وغاليه غمضت عينها ورجعت تفتحها وهي تتأمل زوجها وحبيبها وقلبها..
غاليه: أتمنى ماتنساني.. أتمنى إنك تذكر أحلى أيام من عمري عشتها معاك.. خالد أنا لمن قررت إني أحمل وأييب لك الياهل كل الي أبيه إنك تذكرني بهالطفل طول العمر.. والله عطاني بنيه علشان تذكرك فيني مهما طال بك الدهر..
خالد: غاليه كفايه والله حرام والله حرام..
غاليه الي صار خدها مسبح للدمع: أنا كنت أموت علشان أوهب الحياة لبنتي الي بتعيش بإذن الله أحسن من عيشتي.. وطلبتك ياخالد طلب لاترده لي لو صار عمرك مليون سنه..
خالد: تم يالغاليه طلبي روحي تفداج..
غاليه: غاليه الصغيره.. خلها عند أبوي، محد كاسر خاطري كثر أبوي.. أبيه يربي البنيه علشان مايموت قهر من فراقي.. أعرفه وأعرف إني أنا بالنسبه له كل دنيته..
خالد: وأنا ياغاليه من بيبقى لي من بعدج، من بيسليني في وحدتي.. من بيكون ونيسي وحبيبي..
غاليه: أنا ببقى معك طول العمر.. وبشوفك في كل شي تسويه، لاتنسى تزور قبري وتقرا علي قرآن، إدعيلي ياخالد إنه الله يغفر لي ويشفع لي..
خالد خلاص ماقدر يتحمل ويلس عالأرض يصيح وهو مب قادر يسمع ولاكلمه زياده منها، والي رحمه من كلامها دخول أبوها وأمها وهم شايلين غاليه الصغيره..
أبوغاليه من شاف بنته ركض عليها وحظنها وهو يصيح مثل الياهل الي كان ضايع ولقى أمه.. قعد حاظنها دقايق وهو يكلمها ويعبر لها عن شوقه ووله عليها..
أبوغاليه: والله ياغاليه إنه حياتي مالها معنى بدونج.. والله إنج كنتي الشمعه الي منوره لي البيت..
غاليه: أحبك بابا أحبك..
أم غاليه حطت بنت غاليه عالسرير وسحبت منصور من حظن غاليه ولمتها لصدرها..
أم غاليه: الله يخليج لي إن شاءالله، يارب تاخذ من عمري وتعطيها، يارب مالي أغلى منها فهالدنيا لاتحرمني منها..
غاليه: الله يطول بعمرج يالغاليه.. لاتدعين على نفسج..
أم غاليه: تفداج روحي وكل شي فيني ياغاليه..
أبوغاليه: ومتى قمتي..!! وشو الي صار..؟؟
غاليه: الحين عطوني بنتي أشوفها، ياربي معقوله صار عمرها ثلاث شهور وأنا للحين ماشفتها..
أم غاليه وهي تشيل البنيه: اليوم كملت أربع شهور.. سمي بالله قبل لاتشيلينها..
وعطتها البنيه وغاليه سمت عليها ومن صارت بين إيديها نزلت دموعها وهي تتطالع بنتها الي فعلا تشبها لأبعد درجه، في لون البشره والخشم والشعر الأسود.. و العيون.. العيون الي تمنى خالد إنها تاخذها منها.. العيون السود الواسعه الحلوه..
غاليه: ماشاءالله عليج.. حبيبي أنا مــامــا.. حبيبة ماما إنتي..
البنيه كانت ساكته وهي تتطالع أمها وتضحك لها ومستتانسه.. وغاليه وايد فرحانه لأنها أخيرا حست بالإحساس الي الكل يتكلم عنه وهي بخاطرها تجربه **إحساس الأمومه**
بس بعد بداخلها حزن وجرح لأنها بتفارقها في فترة أقل من فترة لقاؤهم.. فحظنت البنت ويلست تصيح بصوت عالي..
أم غاليه: حبيبتي لاتصيحين خلج مرتاحه إنتي بعدج تعبانه..
وخذت عنها البنت وحطتها يمها عالسرير وخالد واقف من بعيد يودع غاليه بعيونه، خلاص أجراس الفراق بدت تدق بداخله، ويحس إنها بتكون آخر لحظات تجمعه بحبيبة قلبه وعمره.. غاليه..
فجأة الجهاز الي موصول بقلب غاليه بدا يطلع أصوات غريبه وأبو غاليه وأمها وخالد نقزوا من مكانهم خايفين على غاليه الي يودت على قلبها بإيد وبالإيد الثانيه مسحت على راس بنتها وهي تودعها بعينها آخر وداع.. وعطت خالد نظره وهي تقوله بصوت مخنوق..
غاليه: خالد.. لاتنسى وصيتي لك..
أبوها كان أقرب واحد لها وكان لامنها لصدره باسته وهي تهمس له: إرضى علي.. وغمضت عيونها وطاح راسها على ورا..
دخل عليهم الدكتور ونط على الأجهزة وهو يسحب جهاز الصدمات يبا ينعش قلبها وطلب إنهم يشيلون بنتها من السرير، حاول الدكتور مره ومرتين وثلاث بس ماشي فايده، الروح الي تنجلع من الصدر عمرها ماترجع له.. الدكتور راشد كان يحاول ينعشها وهو يصيح أكثر من أهلها.. كان يحاول ويحاول وهو متأكد إنه ماشي فايده بس مب قادر يلتفت لهم ويواجهم بأصعب حقيقة، حقيقة موت أغلى إنسانه بقلوبهم.. موت غاليه..
الممرضه: خلاص يادكتور ماشي فايده، إعلن وقت الوفاة..
كانت كلمات الممرضه مثل القشه الي قسمت ظهر البعير.. كلماتها هي المنبه الي نبهم لرحيل الغاليه عنهم، وهذي المره رحيلها للأبد..
أبوغاليه صرخ وطاح على ركبه وهو ماسك عمود السرير ويصرخ بإسم بنته وهو يتذكرها من يوم الي ولدتها أمها وطفولتها ودلعها ودلاله لها الين لحظة زواجها وفرحه فيها.. الحين خلاص راحت عنه راحت ولاحد بيرجعها له..
وأم غاليه حظنت غاليه الصغيره وهي تصيح وتصرخ ومب ملاقيه الي يخفف عنها فهاللحظه، وغاليه الصغيره تصيح معاهم وكأنها حاسه إنها خلاص فقدت أمها للأبد.. أمها الي بعدها ماحست بحبها وحنانها.. راحت عنها وخلتها لدنيا الله يعلم شو الي بيصير فيها..
الدكتور نفسه مب قادر يرفع راسه ولا يترك جثة غاليه، كان حاس بإحساس الأب الي ربى وشقى وكبر ولده وفالآخر يخسر ضناه بغمضة عين.. الله يصبر قلوبكم..
وخالد الي كانت مصيبته أكبر مصيبه، طلع عنهم وراح يمشي على ريوله، طلع من المستشفى بكبرها.. لاركب سيارته ولا شي.. قعد يمشي ويمشي إلين وصل للبحر.. وصل للمكان الي جمعه بغاليه لوقت طويل.. وصل للبحر الي شال همه سنين طويله..
خالد: غاليه راااااااحت.. حبيبة قلبي راااحت وخلتني.. يابحر وينك عني..!! ليش خليتها تروح ليش مامنعتها، انا منو لي بالدنيا غيرها.. أنا تعبت والله تعبت.. ماكنت أبي شي بس أبيها هي.. حرااام والله حرااام..

على المساء وفي بيت أبوغاليه الكل كانوا موجودين ياخذون عزا غاليه، عزا الإنسانه الي الكل يحبها ولاعمره حد زعل عليها.. عزا غاليه منصور المنصوري الي راحت عنهم فجأة وبدون أي مقدمات.. راحت وخلت وراها أحلى ذكرى ممكن تخليها وراها.. خلت لهم بنتها الصغيره غاليه..
عزا الرياييل كان صامت ومحد قادر يتكلم من هول الصدمه، بس الكل ملاحظ غياب خالد وقالوا معذور الي صار له مب شويه..
دخل عليهم أبوخالد وعزاهم وهو يشد على يد منصور الي ماقدر حتى يقوم من كرسيه وياخذ العزا..
أبوخالد: سامحنا عالقصور يابوغاليه..
أبوغاليه ودمعته على خده: مامنكم قصور.. بس خالد وينه..!!
أبوخالد: خالد.. من طلع عنكم من المستشفى ماندري عنه شي، وقبل ساعه يابوه شباب الله يجزيهم الخير، لقوه عالبحر مغمى عليه.. وهو الحين راقد فالبيت..
أبوغاليه: الله يعينه ويعينا كلنا على الي صار.. الي راحت قطعه من دمي ولحمي.. وهي حرمته وشريكة حياته.. الله يلوم الي يلومنا..
أبوخالد: الله يصبر قلوبكم..

وعندالحريم الحاله كانت وايد صعبه، من جهة أم غاليه الي مب قادره تسكت من الصياح وهي تذكر بنتها وسنين عمرها الي قضتها في هذا البيت.. وبنات عمامها وخالتها الي فاتحينها مناحه وللحين مب مستوعبين خبر وفاتها..
وبنتها الصغيره الي مب قادرين يسكتونها من بدا العزا، كانت تصيح بدون صمت.. أغلب وقتها صياح مب راضيه تشرب الحليب ولا ترقد، من تصبح الين تمسي وهي تصيح.. وكأنها حاسه بالمصيبه الي عايشينها بفقدهم لأغلى غاليه عندهم..

مرت أيام العزا كئيبه ومهمومه، والقلوب للحين الحزن مب راضي يتركها.. يوميا العيله تجتمع في بيت منصور من الصبح للمساء، يحاولون يهدون من المصيبه على منصور وفاطمه وهم بروحهم يبيلهم من يهديهم..
بعد مرور خمس أيام على وفاة غاليه دخل عليهم خالد.. كان شكله غيـــــر لدرجة إنهم ماعرفوه من أول نظره، راح خالد لعمه وحظنه وعزاه..
أبوغاليه: تعزيني وإلا أعزيك..!! كلنا فقدنا قطعة من قلوبنا..
خالد: عمي.. وين بنتي..!!
منصور وقف وخذاه لميلس الحريم وبعد ما أخذ له طريج بين الحريم دخل خالد.. الكل شهقوا من شافوه معقوله هذا خالد.. خالد الأنيق الشيك يصير فيه جي..!! كان مربي لحيته وعيونه جاحظات من الصياح، وثيابه وصخه..
أم غاليه: خالد..!! تعالي ياولدي تعالي إمسك بنتك..
خالد وقف يطالع البنيه الي كانت حاشره الدنيا من صراخها، راح لها وشالها على يده وحظنها وباسها.. غاليه الصغيره من حست بحنان أبوها سكتت ولا كأنها كانت تصيح ومن كم يوم مب قادرين يسكتونها..
أم غاليه: الظاهر كانت فاقدتك، لأنها من كم يوم تصيح ومب قادرين نسكتها..
خالد يلس عالكنبه وهو يحرك ريوله ويلاعبها وهي بدت تاخذ عليه وتلعب معاه.. أم غاليه مدت عليه بالحليب..
أم غاليه: رضعها، صار لها يومين مب ماكله شي..
خالد حط المرضعه في حلجها وهي بدت ترضع بكل هدوء، الكل صاح على هذا الموقف.. يعني غاليه الصغيره كانت تدور حنان أبوها بعد مافقدت حنان أمها.. سبحان الله عرفت أبوها مع إنها ولا مره شافته ولا لاعبها..
خالد: عمتي.. أنا باخذها معاي شوي وبرجعها بعدين..
أم غاليه: بنتك وإنت حر فيها.. بس ماقلت لي وين بتوديها..؟؟
خالد وهو يقوم عنهم: بعرفها على أمها..
وراح خالد عنهم وخلاهم مذهولين من جملته.. كيف يعني بيعرفها على أمها..!!!!!!!!!!!!!!!!!!!
وصل خالد للبحر ونزل ويلس عالكرسي الي متعود يقعد عليه مع غاليه، وحط الصغيره في حظنه وهو يكلمها وكأنها كبيره وتفهمه، قالها كل الي بخاطره.. وكلمها عن أمها وإنها أعظم إنسانه فالوجود ويتمنى في يوم إنها تكبر وتصير مثل أمها..
خالد: غاليه.. أنا بخليج مع يدج ويدتج، لأني ما أقدر أعيش بدون أمج، أنا خلاص الدنيا بالنسبه لي إنتهت.. وإنتي لازم تعيشين العيشه الي أمج طلبتها لج.. وأنا خلاص الدنيا ماتت في عيني.. ومحد بيعيشج أحسن عيشه غير يدج منصور..
غاليه الصغيره كانت تتطالع أبوها وكأنها تقوله إن شاءالله.. وإبتسمت له بكل براءه..
خالد: في يوم بتكبرين بس لاتقولين بابا تخلى عني ولا تركني مثل ما أمي تركتني.. لا ياحبيبتي أنا بظل معاج طول العمر، بقلبي وروحي وكياني.. بس سامحيني بعيش بعيد عنج وعن حياتج..
وباسها بوسه قويه ورجع معاها للسياره..
وصل لبيت عمه ودخل داخل وعطاها ليدتها فاطمه الي خذتها ويلست عالكرسي..
خالد: غاليه وصتني قبل لاتروح إني أسمي البنيه غاليه، ووصتني بعد إنكم تربونها لأنها تعرفكم بتتعذبون من بعد ماهي تروح عنكم، وأنا بخلي البنت عندكم تربونها وتهتمون فيها.. وفاليوم الي بتكبر فيه وبتفهم قولوها أبوج يحبج ويغليج بس سامحيه لأنه خلاج عندنا.. أبوج يحبج بس يحب أمج أكثر وماقدر يتحمل فراقها..
وخلاهم وطلع للمجهول.. المجهول الي محد يعرف شو بيكون مصير كل واحد فيهم.. خلاهم وراح بس خلى معاهم ذكرى من بنتهم تذكرهم بها طول العمر.. وتغير حياتهم للأبد..

النهــــــــــــايه