منتدى استراحات زايد - من يحبك كثر ماأحبك أنا..

السموحه ع التاخير
بس مشاغل الجامعه ماتخلص

تكلمة الجزء الثاني والعشرين..

قامت غاليه من رقادها على صوت حشرة خالد الي مسونها بالغرفه وهو يتلبس يبا يسير الدوام، كان يفتح الكبت ويسكره بقوه، ويخبط بالعطور والأغراض..
غاليه: خالد شو تسوي..!! أبا أرقد..
خالد: وراي دوام إنتي إرقدي برايج..
غاليه: ليش كم الساعه الحين..؟؟
خالد: سبع ونص.. يالله حبي أنا رايح مع السلامه..
غاليه يلست تتطالعه وهو ظاهر من الغرفه، شو عنده بيداوم ونحن للحين في شهر العسل، أي شهر عسل لله يهداني.. الإجازة خلصت وأنا للحين راقده فالعسل.. وبعدين أنا ليش ماقمت وراه أعدله وأبخره.. زين جي الحين بيقولون عني مهمله.. إنزين وأنا ليش مضايجه بروحي من الله هو مب مهتم ويبي يداوم وبس..
غاليه رجعت ترقد للساعه عشر ونص، وبعدها قامت وتسبحت ولبست بدله عيناويه ربشه.. وتزلت الصاله وشافتهم كلهم يالسين..
غاليه: صباح الخير..
الكل: صباح النور..
وباست عمتها وسلمت على البنات ويلست.. راية كانت يالسه بس غاليه ماعبرتها وسألت عن الريوق..
خلود: بخلي الخدامه تييبه لج..
غاليه: لا خلج يالسه أنا الي بروح..
خلود: لا والله ماتقومين.. إنتي عروس ولازم ندللج..
غاليه سكتت وشافت راية كيف تتطالعها بحقد وكره، حشى أنا ماسويت لها شي.. هي شو عندها كارهتني..
أم خالد: أشوف خالد مداوم اليوم الصبح..!!
غاليه: هيه فديته.. يقولي ياليت الإجازة ماتخلص..
حنان: الي يعيش مع هالقمر أكيد يبي حياته كلها إجازات..
غاليه: الله يخليج حبيبتي..
راية: وععععععع ماعندكم سالفه.. الحين غاليه شو من الحلاه الي فيها، كلها صناعيه.. خلها تغسل الي على ويها وشوفوا شكلها..
أم خالد: راية عيب.. وبعدين غاليه شفناها بكل الأشكال.. مب بس بالمكياج..
خلود: والله إنج ماتسويين ظفرها..
راية: تخسون كلكم..
أم خالد: راية طلعي حجرتج..
غاليه: لاعموه أنا الي بطلع.. بسير بتريق..
وخلتهم غاليه وظهرت كانت تبا تصيح، هي ليش تكرهني أنا ماسويت لها شي.. وبعدين كيف تقول عني مب حلوه أنا ماقلت عنها بشعه.. ياربييييه شكلي بتعذب هني..
غاليه من خلصت ريوقها طلعت على غرفتها مالها نفس تتضارب على الصبح، ورايه شكلها راعية مشاكل.. فالأحسن إنها تتقي شرها..
على الساعه 2ونص خالد وصل وطلع غرفته وشاف غاليه يالسه على كمبوتره..
خالد: السلام عليكم..
غاليه نقزت عليه تبوسه: وعليكم السلام..
خالد: شو تسوين.. تلعبين بجهازي..؟؟
غاليه: كنت ملانه وكمبيوتري للحين في بيتنا.. أقصد بين أهلي..
خالد يفصخ غترته: ويوم إنج ملانه ليش حابسه روحج هني، إنزلي تحت ويلسي مع إخواتي..
غاليه كانت تيمع الثياب الي يفصخها: نزلت الصبح وحرمة أخوك سمعتني كلام مثل السم.. فقلت خلني هني أبرك لي..
خالد فر عمره عالكرسي: سمعيني ياغاليه، هذا بيتج مثل ماهو بيتها، لاتخلينها تفرض رايها عليج وتحبسج فالغرفه..
غاليه: انا ماأحب المشاكل وهي............
خالد: بس خلاص.. لو تحبيني بتسوين الي أبيه.. والحين إنزلي تحت جهزي لي الغدا..
غاليه: من عيوني ياعيوني..
ونزلت تحت وماشافت حد فالصاله، ودخلت المطبخ وشافت راية تجهز الغدا لريلها.. غاليه طنشتها ويلست تجهز الغدا لخالد.. ومن خلصت قالت للخدامه تشيله فوق لأنه ثجيل عليها..
راية: لا.. الخدامه بتشيل لي أنا الصينيه..
غاليه عطتها ظهرها: روز.. ودي لبابا راشد وتعالي شلي حقي الصينيه لغرفتي..
روز: أوكي مدام..
راية: لا والله شو قصدج من هالحركه..!!
غاليه إستغربت: وانا شو سويت..؟؟
راية: تعطيني ظهرج وتطنشيني.. لاحبيبتي انا الآمره والناهيه هني، ولو تبين غداج شليه بروحج للغرفه..
غاليه عصبت: انا بنادي عموه وبقولها وبشوف منو راعية البيت..
غاليه طلعت من المطبخ وشافت عمتها في ويها وقبل لاترمس عمتها سكتتها لأنها سمعت كل شي..
ودخلوا المطبخ مره ثانيه وراية كانت واقفه مع الخدامه وتكلمها..
أم خالد: راية.. محد يامر وينهي هني غيري أنا.. ولو مب عايبنج اظن تدلينه بيت أهلج..
راية: أنا تطرديني علشان وحده مثل هاي..
غاليه: إحترمي نفسج أحسن لج..
راية: أنا محد يطنشني وأسكت عنه.. وانا أكبر عنها وواجب عليها تحترمني..
أم خالد: جان إحترمتيني أنا.. راية لآخر مره أشوفج تسوين مشاكل في بيتي.. والله مره ثانيه مالج يلسة فالبيت..
دخل عليهم راشد الي سمع الرمسه: هذا الي قاصر بعد تطردين حرمتي.. إطرديني وراها أحسن..
ام خالد: ومنو قالك إنك أحسن عنها,, الي مايحترم البيت وأصحابه بقبضه الباب.. تعالي ياغاليه وراي، وإنتي ياروز ودي الغدا لغرفة عمتج غاليه..
راشد: هيه الغلا كله الحين لخلود وحرمته..
خالد دخل عليهم لانه غاليه تأخرت عليه بالغدا وهو ميت من اليوم.. شاف غاليه واقفه ورا عمتها وشكلها شوي وتصيح.. وراشد وأمه يضاربون بصوت عالي..
خالد: راااااااااااشد..!!
راشد من شاف أخوه صخ ولاتكلم وأمه للحين تتنازع..
أم خالد: تصارغ علي يارشود.. وعلشان شو..؟؟ علشان قلت لحرمتك إني أنا راعية البيت.. وقسما بالله مالك يلسه ولادقيقه فالبيت، تشل هالخايسه وتطلعون من بيتي..
خالد مسك أمها: أمايه صلي عالنبي..
أم خالد: عليه الصلاة والسلام.. بس هالعاق العاصي ماله يلسه ولادقيقه هني.. اليوم يطلع من بيتي.. وقلبي وربي غضبانين عليه..
أم خالد طلعت فوق وخلتهم كل واحد يطالع الثاني وغاليه نزلت دموعها عالموقف الي صار..
خالد: غاليه طلعي فوق.. وإنتي راية خذي ولدج وسيري الغرفه.. روز ودي الغدا فوق..
كلن مشى على كلام خالد وراحوا على غرفهم، لأن كلام أم خالد قوي ومحد قدر يتكلم..
خالد سحب راشد ويلس معاه فالصاله، راشد كان يرتجف من كثر الصراخ والغيظ الي فيه..
خالد: راشد صل عالنبي..
راشد حط يده على ويه: اللهم وصلي وسلم عليك يامحمد..
خالد: تلاقيها حلوه تغضب أمك علشان ترضي زوجتك..
راشد: أنا ماقلت برضيها.. أنا دخلت ولقيت أمي تفاتن عليها لأنها ماخلت غاليه تودي الصينيه فوق..
خالد: شوف أنا للحين ماعرفت شو هي السالفه الصايره من بينكم.. بس مهما كانت ماتوصل لدرجة إنك ترفع صوتك على أمك..جنتك ونارك.. إنت الحين شو إستفدت غير إنك خسرت رضاها عليك..
راشد: خلاص أنا بظهر من البيت علشان ترضى أمك علي..
خالد: إنت روح تسامح منها، وصدقني بترضى عليك.. وبعدها إطلع من البيت.. بس لاتظهر وهي زعلانه عليك..
راشد وقف: خلينا الرضى حقك..
وراح غرفته وخالد مستغرب منه.. كيف مايبا يرضي أمه، وأصلا السالفه ماتسوى..
طلع خالد غرفته ولقى غاليه يالسه عالسرير وتصيح.. راح لها وحظنها وهو حاس فيها تعبانه وايد لأنها مب متعوده على أجواؤهم..
خالد: خبريني شو الي صار..
غاليه حكت له غاليه الي صار بسرعه وهي تشاهق من كثر الصياح.. وهو يالس يمسح على شعرها لأنها كاسره خاطره..
خالد: خلاص حبيبي الحين قومي تغدي وبعدين يصير خير..
غاليه تمسح دموعها: إن شاءالله.. بس راشد شو بيسوي..؟؟
خالد وهو يسحبها من يده: هو ريال وأدرى بحياته، ويعرف إنه رضى الوالدين من رضى الله سبحانه وتعالى..

الأجواء كانت متكهربه في بيت أبو خالد.. من جهة مشكلة راشد وحرمته الي مصمم يطلع من البيت وأمه زعلانه ومب راضيه عليه، ومن جهة ثانيه غاليه الي مب عارفه شو الي مغير خالد عليها، كانت متعوده بأسلوب الدلع والدموع إنها تاخذ الي تبيه، بس خالد مره قالها وفي ويها: أنا دلعج هذا مايمشي علي.. وإنتي بتمشين على الي أنا أبيه..
غاليه من يومها وهي مب قادره تاخذ منه لاحق ولاباطل.. كله يطنشها ويكابر على شعوره، وكلما تبي شي يعاند ويقولها لا.. حتى بيت أهلها يضايج من تقوله بروح..
وصلت غاليه لمرحلة إنها مب قادره تفهم شخصية خالد.. وخلاص صارت طول الوقت تصيح وهو ساكت عنها، ويقولها الي يبيه وهي تنفذه.. وماكانت تقدر تخبر حد لأنها ماتحب تدخل حد في أسرار بيتها مثل ماعلمتها امها.. فما كان جدامها غير ميعاد..
غاليه: والله ياميعاد تعبانه.. ومب عارفه هو شو يبا..!!
ميعاد: وهو وينه الحين..؟؟
غاليه: رجع الشركه.. وانا يالسه في غرفتي ومب قادره أنزل عندهم أحسهم بيعرفون إني مضايجه من شي..
ميعاد: انا بقولج ليش خالد متغير..
غاليه: ليش..!!
ميعاد: ريلج يبا يأدبج.. دلعج الزايد طفر به..
غاليه مستغربه: بس خالد يحب دلعي..!!
ميعاد: على العين والراس يحب الدلع.. بس بحدود,, إنتي قمتي تاخذين كل الي تبينه بدلعج هذا، هو يبا نقاش وحوار يصير من بينكم.. يبيج تحسسينه إنج ملكه وبس.. مب ماخذج شراكه مع أهلج..
غاليه: يعني تتوقعين هذا هو السبب..؟؟
ميعاد: أكييييد.. خالد عنده الدكتوراه يعني ثقافته كبيره، ويبا حرمه تناقشه وتتحاور وياه، مب طول الوقت دلع ودموع.. وبيت أهلج مب كل يوم تنطين لهم.. لا، خلج مع أهل ريلج أكثر.. وكل يومين ثلاثه روحي لأهلج.. صدقيني الريال الي يشوف حرمته تحب أهله ومدارتنهم يحطها على راسه من فوق..
غاليه: إنزين شو أسوي.. قوليلي.. والله إني أحبه ومستعده أسويله الي يبيه..
ميعاد: خلاص عيل سمعيني وإفهميني ونفذي من الحين..

خالد كان يالس في مكتبه يشتغل ومعاه إثنين من محاميين الشركه.. كان ماسك أوراق وواقف يقراهم يوم وصله المسج وفتحه وهو واقف..
المسج كان من غاليه:
(( أبسألك حاجه وقلبي خايف..
أبسألك هي الورقه الي بيدك أغلى مني..
هو وقتك بالشغل أهم مني..
دخيل الله بس أسمع همسك..
صوتك يدفيني طول العمر..))
خالد وهو يقرا المسج يلس على كرسيه وعلى طول طرش لها مسج وهو يضحك، ولاهمه الرياييل
الي معاه بالمكتب..

((أحبج.. والورقه الي معاي مب أهم منج..
وجهزي نفسج الساعه ثمان ونص أنا عندج.. وبنتعشى برع..))

غاليه من وصلها المسج طااارت من الفرحه، من زمان ماتعشوا برع، وإن شاءالله هذي بداية خير..
إطالعت الساعه وشافتها سبع ونص.. يعني ماشي وقت.. قامت وسبحت وعطت عمتها خبر إنهم بيتعشون برع علشان مايسوون حسابهم فالعشا..
لبست بدله كويتيه زرقا.. وحطت مكياج هادي وحلو، وجهزت عبايتها اليديده الي للحين مالبستها وكانت فيها شك أزرق غاوي، وتبخرت وبخرت الغرفه.. وجهزت لخالد كندورته الزرقا، أونها يعني بطقم وياه..
وعلى الساعه ثمان وثلث وصل خالد، سلم على أهله وراح فوق.. ومن دخل داخ راسه بريحة الدخون، كانت الريحه يديده عليه وحلوه.. وشاف غاليه واقفه بكل شياكتها تترياه..
خالد: كل هذا حقي.. خلاص عيل ماشي طلعه..
غاليه: هههههههههههه من زمان ماقلت لي هالكلمه..
خالد راح لها وباسها: شخبارج حبي..
غاليه وهي تساعده إنه يبدل ثيابه: الحمدلله.. إنت شخبارك وشو الدوام معاك..؟؟
خالد الي مستانس عليها: الحمدلله كله تمااااااااام..
غاليه: حبيبي جهزت لك الكندوره وكويت لك كل شي.. قوم إسبح وتجهز للطلعه..
خالد: ياسلام شو سالفة الأزرق اليوم..؟؟
غاليه: داقني هوى زرقاوي..
خالد: هههههههه
غاليه: أنا مجهزة لك كل شي..
خالد سحبها: وناقص شي واحد..
غاليه: آمرني..
خالد: تسبحيني..
غاليه إستحت وقامت عنه: خلها مره ثانيه انا لابسه وكاشخه.. وإنت مثل اليهال بتغرقني فالماي..
خالد سحب الفوطه ودخل الحمام وهو يضحك.. ومن طلع لبس بسرعه وطلعوا من الغرفه..
حنان: ماشاءالله شو هالشياكه.. شو هالحلاوه..!!
غاليه: منو أحــلى..؟؟
خلود: أكيد اخونا أحلى..
غاليه ضربتها بالشنطه: ماعليه، أراويج شغل الله بعدين..
حنان: هههههههههههه
خالد: يالله خلينا نروح، انا يوعان..
وطلعوا عنهم وأم خالد تقرا عليهم عن الحسد، ماشاءالله عليهم لايقين على بعض..
بعد العشا راحوا يتمشون عالبحر، الجو كان رهيب مع إنه صيف بس الهوا كان بارد ومنعش..
على الساعه 12 ونص رجعوا البيت.. والكل كانوا رقود..
غاليه: غربيه محد صاحي..
خالد: محد غيرنا نحن السحار..
غاليه: ههههههههههههههههه
خالد: وطي صوتج لايقوم لنا أبو خالد بالخيزران..
غاليه: بيضربك إنت أنا يموت علي..
كانوا خلاص صعدوا الدري، خالد: ومنو يشوفج ولايموت عليج.. حبي طلبتج..!!
غاليه وقفت في ويهه وحطت يديناتها الثنتين على رقبته: عيوني..
خالد: فديت عيونج.. أبا أكمل ليلتي بالأزرق..
غاليه وقفت تتطالعه وتفكر وبعدين فهمت عليه: ماطلبت أنا كلي لك..
ودخلوا الغرفه وخالد طاير من الوناسه، أخيرا غاليه بدت تفهم عليه، حتى ماقالت له بروح لأهلي.. وإن شاءالله دايما متفاهمين..

ومن طلع الصبح غاليه قامت قبل خالد، ونزلت تحت وجهزت له ريوق خفيف وطلعته له فوق.. وجهزت له ثيابه وراحت تصحيه.. وصحته نفس ماكانت تصحيه من تزوجوا..
خالد: احسني عايش فالجنه..
غاليه: جنة غاليه..!!
خالد: أحلى غاليه..

وسموحه عالقصور...
(غرشوب البدو)