منتدى استراحات زايد - ((.. الدنيا يا خلي مدرسه .. وسنين عمرنا حصص الالم منهج ندرسه .. والفرح فيها فرص ..))

العنود: علي تعال عدالنا شوي
علي: ليش؟؟
العنود: تعال انته
علي: لالالا انا أخاف على عمري منكن
حمدوه: مسود الويه شو بنسوي بك نحن
شمسوه: برايك انته حرووب تعال
حارب: حروب في عينج أول .. قولي اسمي زين وعقب زقريني
شمسوه: عمي حارب تعال
قرب حارب صوبنا وعلي وقف ويا يلس عدالي
علي: هاه خير
حارب: شعندكن؟؟
حمدوه: عنوودي رمسي
بصراحه ما قدرت أرمس أنا زقرت علي .. وهالبدلا اللي عدالي زقرت حارب .. استحيت أبطل حلجي
علي: حوووو العنود شو ياج
شمسوه: يالله فجي حلجج
العنود: ممم ماشي كنت أبغيك تودي البنات دبي
علي: ليش انشالله ؟؟
العنود: علي انت تدري انا نحن نحتاي أغراض حق الجامعه.. حرام والله ما خذن شي
علي: وشو سويتن اليوم في المول
العنود: ساعتين ما كفنا وبعدين محلات معروفه .. ومب كل شي يعيبنا ونبغي من محلات ثانيه مب موجوده في العين ..
علي: وانتي الناطق الرسمي باسم شلة القواطي
العنود: مقبوله منك .. قواطي قواطي.. المهم شو قلت؟؟
علي: ما أروم
العنود: أفااااا هذا وأنا مسويه الكيك وتحملنا لقب القواطي الحين تقول لاء.. مايصير جان قلت من قبل
علي: انتن ما تخلصن بسرعه وبعدين منو المينون اللي بيشل مخبل دبي وياه
العنود: انت
علي: ما أروووم
حمدوه: عليوي دخيلك
علي: لا وعليوي بعد ماشي لو كنت بوديكن ماشي سيره الحين
العنود:انتي يوم تبطلين حلجج ما تقولين خييير.. انجبي صدق يوم قالوا قوطي.. برايكن هب لازم تسيرن
شمسوه: شعليج ظامنه السيره هالخميس
علي: انتي منو بيوديج؟؟
العنود: بسير ويا غيث
علي: خلاص عيل ليش رابطه راسج بلا ويع
العنود: لالا مايصير أنا ألبس وباقي القواطي مايلبسن أفااا عليك يا علي انت روحك ماترضاها
علي: أنا هالخميس عندي دوام
العنود: خلاص الخميس اللي عقبه
علي: الخميس اللي عقبه مواعد ريال
حمدوه: الحين بيحط خطه لسنه جدام
شمسوه:حارب قول شي
حارب:هذا الخميس عندي شغل الخميس اللي عقبه بوديكن بخمسكن
حصوه: منو خمسنا؟؟
حارب: كلكن اللي يالسات
شمسوه( تصارخ): يعيش عمي حارب
حمدوه: يعيش يعيش يعيش
أم حمد: قطع الله هالحسوس فضحتنا
العنود: هههههه تستاهلن
حارب: شميس وحمدوه .. سيرن نظفن الحجره
حمدوه: بديينا بالذل
حارب: كيفكن عندي اسبوع ونص أفكر فيهن إذا بوديكن .. يعني كل طلب أطلبه يتلبى بسرعه
حمدوه: انزين بذمتك هالمتحف اللي انظفه متى بنخلصه
حارب: كيفكن
قامن حمدوه وشميس ودخلن بيت أم عبدالله وسرت وياهن ركبنا فوق .. دخلن حجرتهن
العنود: انتن تباتن هنيه؟؟
حمدوه: هيه .. عشان يدوه .. يعني نيلس لين الفجر تحت وفليل نركب فوق.. لأنها يوم تتعب محد يكون عندها
شمسوه: بس في الاجازه نسهر لين الفير وعقب نرد بيوتنا
طلعنا من حجرتهن ودخلن حجرت حارب وأنا تميت في الصاله وما دخلت وياهن .. انتبهت للبلي ستيش شغلتها ويلست ألعب وسمعت حمدوه ترمسني من داخل الحجره
حمدوه: العنود تعااالي
العنود: لا لا بيلس ألعب
شميس: يالخاينه تعالي ساعدينا والا تبين السيره بلاش
العنود: أولاً انتن ما فجيتن حلوجكن ورمستن عشان السيره حليلي أنا اللي رمست ولساني اعتوى من كثر الرمسه.. ثانياً شو قالوا لج عني .. شو أسوي أدخل حجرة عمكن لالا يابوج بعدني مافصخت الحيا أنا يايه وياكن ومتلومه بعد أدخل حجرة الريال .. وثالثاً وهو الأهم أنا مابسير وياكن ..
في هالوقت طلعت حمدوه من الحجره اللي كانت مجابلتني
حمدوه: نعم نعم ليش انشالله ما بتسيرين؟؟
العنود: لا والله .. أستحي حمدوه وين أبا رازه عمري وياكم لو علي اللي بيوديكن بسير بس عمج حارب .. نوووو وييي
حارب: الشيخه عنود منو قالج اني أعض
من سمعت صوته تبريدت .. هذا من وين طلع .. قال بيطلع ويا علي .. آخ يالفشله والله مب قادره ألف بويهي .. أحس الصاله حااره .. وهالهبلا حمدوه واقفه جدامي تضحك .. وطيت القير وقمت يلست على الكنبه
العنود: لا حارب اسمحلي أنا ما قلت جيه
حارب: ماعليج بوديج وبردج كامله لا تخافين
ما قدرت أتحمل شليت بعمري ونزلت تحت وأول ما وصلت الباب ربعت ربعان .. منقهره منه والله انه سبال .. منو يتحرا عمره صدق انه خقاق ..
******
++ في بيت أم عبدالله نزلت العنود وروحت وحارب من مشت لين نزلت تحت وهو يلحقها بعيونه
حمدوه: شمسوه تعالي الحقي عمج صدق تخبل
شمسوه: حارب جنك قفطتها
حارب: ما قلت شي عادي
حمدوه: وين عادي .. أون أنا ما أعظ .. وبردج كامله .. أبوي البنت تستحيي
حارب: وأنا ماجذبت ما أعظ وبردها كامله ليش ما تسير عيل
شمسوه: جان كان فيه ذرت أمل انها تسير الحين عدمت الأمل كله
حارب: عيل ماشي سيره
حمدوه وشمسوه تمن يطالعن بعض منصدمات من عمهن .. شو هذا تخبل والا شووه ..
حمدوه: حارب تعال بطالع عليك حمى .. يمكن تعبان .. شي فيك
حارب: لا مافيني شي لا تخافين
شمسوه: عيل شو ياك ؟؟ تخيرشت مره وحده
حارب: سألن خالتكن
حمدوه: لااا بالله ينان .. شي من الاثنين يانحن ينينا يا عمي حارب تخبل
حارب: لا عمكن حارب اللي تخبل.. بسبب خالتكن
شمسوه: هااااااااي انت .. شو نسيت انك خاطب
حارب: أنااااااااااااا .. متى؟؟ ومنو!! أنا ماخطبت ولاشي.. يالله يا هالحريم باجر بيقولن عرست وأنا ما أدري
حمدوه: شمسوه تعالي بصفعج إذا عورج قوليلي بعرف اني ما أحلم
حارب:ههههههه حتى في الأحلام رباعه
حمدوه( ربعت ويلست عدال عمها): الحربي قولي قولي ..كيف حبيتها
شمسوه: شو الموقف اللي صار بينكم
حارب: حووو قواطي عن الخبال وقومن كملن ترتيب
شمسوه: لااا .. أول خبرنا
حاررب: انتن محد يقولكن شي
حمدوه: خبرنا بنساعدك
حارب: شو تساعدني وين نحن .. قومن قومن والا تراه ماشي سيره دبي
حموده: يا هو عزر معزر علينا ..
دخل حارب يتسبح وحمدوه وشمسوه كملن تنظيف وبعدهن مب مصدقات اللي صار توه جدامهن والكلام اللي قاله عمهن ...حارب في عمره ما انجذب لوحده .... وإذا كان يرمس بنات فهو يتسلى وبس ... ومن متى وأمه تحاول تخطب له وهو مب راضي .. واستقروا آخر شي انه يخطبوله ميثا بنت خالته ..++
******
شو راااااااااااايكم؟؟؟؟
السلام عليكم جميعا...
بنزل اليوم بارت يديد وأطول من أمس شوي..
بغيت أقولكم لا تستعيلون واتريوا الأحداث اليايه وشو التغيرات اللي بتستوي فالشخصيات...
مابطول عليكم وبخليكم تقرون البارت ...
الجزء الســـــــــــــــــــــــــــــــــــــــــــــــ ـــادس
دخلت حجرتي وأنا أحس عمري لابقه من القهر .. منو يتحرى عمره هذا يقفطني .. صدق انه مايستحي يعني يشوفني ما أحتك فيه ولا أرمسه.. ليش نا وي يحرجني هب منه مني انا اللي دخلت ويا البنات والا أنا شو مركبني فوق .. أستاهل صدق اني عنززز ...
طلعت أتعشى وعقب رديت الحجره غلقت موبايلي ورقدت .. كنت متأكده ان حمدوه وشمسوه بيتصلن يبني أييهن ..لأنهن كانن سهرانات عندنا أمس.. بس ما أقدر خليفه بعده ما رد وانا ما أبغي أسير عندهن دامه هالسبال عمهن هناك ...
... مر هالاسبوع كله ما دخلت بيت أم عبدالله الا الصبح يوم الثلاثا يوم كنا بنسير نفصل عبي .. كنت أسير أيلس ويا البنات برا في الحوش..واتفقت ويا شموه تخلي سعيد أخوها يوديها وبنتواعد وياها في دبي ..
قمت الصبح تلبست وسرت الصاله .. شفت حمد يالس ويا آمنه وعموه
العنود: السلام عليكم
الجميع: وعليكم السلام
حمد: شصبحتي العنيدي ؟
العنود: الحمدالله
حمد: تعالي هنيه عدالي
يلست عدال حمد صب لي كوب حليب و ناولني اياه .. شربت شوي ووطيته .. سمعت تيلفوني يرن .. كان غيث يتصل وقالي انهم عند الباب .. وقفت وشليت شنطتي وييت بطلع من الصاله شفت حمد بيطلع ويايه .. طلعنا من الصاله ومشيت ويا حمد
حمد: يودي هذيلا
العنود: حمد فديت روحك والله عندي .. والله ما أقص عليك
حمد: انتي يوديهن وماعليج .. ان ما سدن استخدمي البطاقه
العنود: بيسدن وبيزيدن .. حمد شو تتحراني حصاله
حمد: ماشي حرمه في هالدنيا حصاله .. الحرمه من يطيحن في ايديها الفلوس تستقطع
وصلنا عند الباب وطلعت ويا حمد ونزل غيث من السياره
حمد: مرررحبا الساع .. حيالله بو مطر
غيث: حيييه .. مرحب باجي .. علومك بوشهاب
حمد: مانشكي باس ومن صوبكم
غيث: يسرك الحال
حمد: عاد اسمع هالله هالله في العنيدي .. ما أوصيك عليها
العنود: هييه تراني أغلى من عيونه
حمد:جب انتي لا تخقين وايد
العنود: أفااا يا بو خليفه
حمد: ركبي السياره يالله
ركبت السياره وقبل لا أركب شفت سيارة تطلع من بيت قوم شموه كان عندي احساس انها شموه في هالسياره .. وفعلاً احساسي ما خاب .. وصلني مسج منها انها توها طالعه .. ركب غيث السياره وتحركنا
غيث: علومج عنودي
العنود: ويييين عنودك تجذب على منو انته امره ما اتخبر ويوم أتصل خمس دقايق ما أروم أرمسك
غيث: فديت روحج تتصلين يوم أكون ويا الرياييل
العنود: وانت يوم محد يكون عندك ليش ما تتصل
غيث: ولا يهمج خلاص بحرقه تيلفونج
نوروه: مهو كلو كلام في كلام
غيث: جب انتي
العنود: شخبارها يدوه ؟
غيث: اييييييييييه حشرتنا اليوم ..
العنود: فديييت روحها يا ربي
غيث: لا تودونها ما تروم على الدروب .. وماعنثرها على السوق والزحمه في دبي
العنود : اخطف الدكان خذلي كروسان .. يوعانه
غيث: ليش ما تريقتي قبل ما تطلعين.. يعني لازم الخساير
العنود: يالزط .. بروحي بدفع .. اخطف وخذلنا جريده
خطف غيث الشيشه وصب بترول واشترالنا كروسان وعصير والجريده ..
وصلنا دبي عقب ساعتين وأول شي دخلنا السيتي .. شفت شموه وأخوها في الباركنات توهم نازلين من السياره .. مشينا نحن قبل ولحقونا .. نحن ندخل المحل وغيث يوقف ويا سعيد جدام الباب لين نشتري ونخلص .. دلخنا زارا ويلسنا نختار ونركب البوديات على التنانير وشموه ونوروه ماخلن شي جنهن أول مره يشترن ..
شموه: طالعي انتي طالعي
العنود: شوو!!
شموه: طالعي الاثنينه اللي هناك صدق مايستحون( سعيد وغيث)
نوروه : ياااااااربي يالفضايح
كانوا سعيد وغيث واقفين ورا وحده ويعطونها رايهم في اللي تختاره بس بشكل غير مباشر
العنود: هي ما تستحي واقفه وتضحك بعد فقتها يالعوفه من زين ويهج انتي الحين
نوروه: خلصتن؟؟
شموه: هيه خلنا نطلع الحين عادي يشوفهم السكيورتي
نوروه: يااااربي يالفضايح صورهم باجر في الجرايد
العنود: امشن امشن
حاسبنا اللي اشتريناه وعقب طلعنا من المحل شافونا وطلعوا بسرعه ..
.. طلعنا الساعه أربع ونحن منهدين خلاااص ما أروم أمشي حطنا محلات السيتي كلهن وما خليت شي ما خذته مب عشان شي بس دام انها السالفه سالفة عناد ليش لاء .. سرنا نفصل شيل .. فصلت حقي وحق باقي القواطي ويايه لأن ماشي وقت يخلصن الشيل .. سعيد وشموه ردوا العين .. ونحن بعدنا ما طلعنا
غيث: هاه وين تبن الحين ؟؟
العنود: باااااااس ما أروم أمشي ريولي يعورني
نوروه: أنا يوعانه
غيث: سمعن أنا ما أروم أييبكن غير اليوم .. تبن شي يالله دام اني فاضلكن اليوم
العنود: خلاص ما نبغي شي .. الساعه ست خلونا نروح
نوروه: لالا أنا ماخلصت .. سمعوني خلونا نسير برجمان بنتغدا وعقب بنتشرى وعقب بنرد
غيث: نوروه أمايه محد عندها
نوروه: لالا بنات خالي عندها توني اتصلت لهن
غيث: عيل يالله برجمان برجمان .. والله إنّا مخبل والا حد يحوط هالحواطه في يوم واحد...الشارع الواحد نخطف منه أكثر من مره ساير ردا
العنود: كل هذا عشانا.. يعلك ما تخلى منا منو عندك غيرنا نحن
غيث: أنا ابتليت بكن والا ما بوديكن
بصراحه حطيت في خاطري إذا غيثي يقولي هالكلام.. عيل ما ألوم الباقين.. سكت وماقدرت أقوله شي ...
غيث: عنودي لاتزعلين والله أسولف وياج
نوروه: انت بعد شو هاي ابتليت بنا
غيث: عنودي لاخليت منج والله أغلس عليكن
العنود: لا ماعليك عادي
غيث: لا والله انج حطيتي في خاطرج .. أدري بج
العنود: ماعليك بنسى
غيث: لا أنا ما أباج تضيقين أصلاً ... عنودي لا تخليني اتلوم فيج
العنود:عادي فديتك والله ما زعلت أصلأ منو لي غيرك أنا
غيث: انزين ضحكي عشان أتأكد انج ما زعلتي
العنود: شو مينونه أضحك بدون سبب
نوروه: حووو غيث وقف كم باركن خطفت .. عنبوه
غيث: ما بوقف بتم أدور في الباركنات لين ترضى العنيدي
العنود: حوووه عن الخبال من الله داير راسي من اليوع .. وقف وقف
غيث: الحين تأكدت انج مب زعلانه
نوروه: شقايل اتأكدت .. استاذ غيث؟؟
غيث: من يرعوطها ما تيره الا يوم تكون راضيه .. والا يوم تزعل ما تفج حلجها
العنود: يالله غدنا متنا من اليوع
غيث: الحين اللي يسمع يقول أنا اللي معزر عليكن
نزلنا برجمان وأول شي سرنا نتغدا وعقب تمينا نتحوط على المحلات .. شميس وحمدوه كم مره اتصللي اليوم وهالشي فرحني .. هن الوحيدات اللي افتكرن فيني .. وحمد اتصل يتطمن عليه عقب صلاة العصر .. طلعنا من دبي وردينا العين.. دخلت البيت الساعه 11 وأنا أحس اني مدوووخه خلاص .. تعبت اليوم من الحواطه.. دخلت الصاله لقيتهم يالسين يطالعون التلفزيون
العنود: السلام عليكم
الجميع: وعليكم السلام
حمد: ياااااااااالله .. قلنا لج سيري ماقلنالج باتي هناك
العنود: ههههه حد قالك تعطيني ويه
خليفه: الله يعين باقي البنات ما تملهن شي يشترنه
حمد: العنيدي قلنا لج اشتري ثياب ما قلنا لج فتحي محل
العنود: شوأفتح محل .. لا محل ولا شي هذا الا شويه
شفت لامي عند الباب يايبه الحليب حق ريموه خليتها تشل الأكياس وشليت أنا وياها
العنود: برايكم عيل .. أنا بسير أتسبح وأصلي
حمد: أنا بسيرأرقد
خليفه: شو ياك أبويه ترقد من وقت الحين لحقت أمك جنك
حمد: تعباااان اليوم سرت المزرعه وتعبت .. أحس اني منهد حيلي
طلعوا حمد وآمنه وشلوا ريموه وساروا يرقدون
العنود: عويش تعلي براوييج اللي اشتريته
عويش: لا بتابع الفلم الحين
العنود: على راحتج
سرت حجرتي .. طلعت لي بجامه ودخلت أتسبح ... طلعت وصليت ودخلن حمدوه وشمسوه وحصوه الحجره وأنا أصلي
حصوه: اييييه انتن ما تستحن اصبرن خلنها تراويكن
شمسوه: انتي تتحرينها عويش لا لا عادي العنود مابتقول شي
حمدوه: يااااااالله أسميها صدق ما خلت شي
سلمت من الصلاه والتفت لهن ..
العنود: سحاار منو يابكن؟؟
حمدوه: أنا ريولي يابتني
شمسوه: عنيدي .. شو هذا ما خليتي شي
العنود: تعالن براويكن
حمدوه: بنسهر لين الصبح نشوف
العنود: بس عاد سدني حمد من التعليقات .. وبعدين مب من كثر اللي اشتريته الا الأكياس وايد وبعدين مب كله حقي تراني اشتريت لكن
حصوه: ومنو عبلج نحن بنسير يوم الخميس
العنود: انتي قبضي هذيلا فواتيير الشيل و خذت لنا تطقيمتين في البديات
شمسوه: آنسه شحروره ما شافت اللي اشتريتيه؟
العنود: منو آنسه شحروره
شمسوه: منو غيرها عويش
العنود: لا ما شافته ... وانتي متى بتعقلين عنها
حصوه: الله يعينج عليهن .. تحمليهن
يلست وياهن لين الساعه ثنتين .. كنت متولهه عليهن وطار الرقاد من عيني من يلسنا وأخبرهن شو ووين سرت .. عقب ما طلعن انسدحت على الشبريه برقد ما أدري شو اللي خلاني أذكر أمايه وأبويه .. حسيت بظيج فضيع .. ما قدرت أتنفس ..دموعي تحرقني وأنا أقاومها .. مع ان اللي حواليه محسسيني بالاهتمام بس بعد كنت أبغي أمايه وأبويه احس اني محتاجتنهم متولهه عليهم .. كل محاولاتي اني أرفه عمري تنجح لحد ما أكون بروحي وراسي على المخده .. قبل ما أغمض عيني .. أسرح وأتذكر كل لحظات الماضي من حياتي .. صعب ان الواحد يعيش بلا سند في هالدنيا .. والمشكله لو كانت بنت.. الريال بيتحمل مشؤولياته بس البنت طول عمرها بتحس عمرها عاله على غيرها .. حاولت أطرد هالأفكار من بالي ما قدرت ... دموعي بدن ينزلن بكثره ..أحاول أقبض عمري بس ما أقدر الضيج اللي في خاطري أكبر مني ..شليت تيلفوني طلعت من حجرتي وسرت يلست في البلكونه اللي عدال باب الصاله الوراني.. فكرت أتصل في نوروه اتصلت لها وماردت .. أكيد راقده.. ومستحيل اتصل حق شموه في هالوقت... أبغي أتصل حق حمدوه وشميس بس أستحي منهن .. وفي نفس الوقت إذا تميت على هالحال أحس اني بموووت .. ليش يا أمايه خليتيني في أهم وقت أحتاجج فيه ما ألقاج .. آآآآآآآآآه أحس اني مخنوووقه
*****
في بيت أم عبدالله كانن حمدوه وشمسوه يالسات في الصاله اللي فوق يرمسن ويطالعن التلفزيون ودخل عليهن حارب
حارب: بعدكن واعيات
حمدوه: وانت توك ظاوي .. تو الناس
حارب: جب ما يخصج
حصوه: من وين ياي هالوقت
حارب: وانتن شو يخصكن
حمدوه: يدوه كم مره سألت عنك .. جذبت عليها وقلت لها رد..
حارب: يالله انزين قومن رقدن
شمسوه: بعدها ثلاث
حارب: شو بعدها .. عنبوه بيأذن الفجر
حمدوه: بنصلي وبنرقد
حارب: برايكن عيل .. أنا فيني رقاد ما صدقت عليوي يتحرك
مشى حارب عنهن وقبل لا يدخل حجرته سمع تيلفون يرن لف صوبهن
حارب: تيلفون منو هذا ؟
حمدوه: تيلفوني .. هذي العنود.. غريييبه!!
شمسوه: غريبه عنودي بترقد .. شو فيها!!
حارب: انزين ردي عليها
حمدوه: ألوووو
العنود: ........
حمدوه: ألووووو
العنود( تصيح):........
حمدوه( منصدمه): عنووودي ..
شمسوه: شو بلاها
حمدوه: عنودي غناتي شو فييج؟
العنود(تصيح): حمدوووه
حمدوه: عنودي رمسي زيغتيني
العنود: حمدوه أحس اني بموووت
حمدوه: بسم الله عليج شو فيج ؟
العنود: حمدوه تعالي عندي
حمدوه: خلاص خلاص الحين بيي
سكرت حمدوه عن العنود ولفت صوب حارب
حمدوه: حرووب وصلني عند العنود
حارب: الحييين !! ليش شو فيها العنود؟؟
حمدوه: ما أدري ما أدري .. حارب دخييلك العنود تصيح
حارب: يالله قومن
طلعوا حارب وشمسوه وحمدوه من البيت ودخلوا بيت حمد من الباب المشترك.. كان ليت البلكونه مشتغل والعنود واقفه.. تشوف من الطرف يعني ما تشوف اللي يدخل من الباب من بيت أم عبدالله ..دخلوا حارب وحمدوه وشمسوه وحارب أول ما شاف العنود وقف دقايق وعقب لف عنهن وما قدر يسير وياهن ..لأن العنود كانت لابسه بجامه وفاله شعرها..
حارب: سيرن أنا بترياكن داخل البيت
مشن البنات صوب العنود.. العنود أول ما شافت حمدوه لوت عليها وتمت تصيح
حمدوه: عنودي غناتي شو فيج
شمسوه: عنودي بس حرام عليج قطعتي قلبي لا اتمين تصيحين
بس العنود تمت تصيح فتره وحمدوه وشمسوه سكتن عنها لين ترتاح..هدت العنود عقب فتره.. وسارت يلست على الكرسي
العنود: سمحلي زيغتكن في هالوقت
حمدوه: عادي .. بس انتي قوليلي شو يصيحج
العنود( بحزن): اتولهت عليها
عرفن انها كانت تتكلم عن أمها
شمسوه: عنودي غناتي بدال لا تطلبيلها الرحمه تصيحين عليها
حمدوه: العنيدي ادعيلها .. وصياحج هذا بيعذبها وما بيريحج
العنود( تتنهد): أنا أصيح على حالي
حمدوه: عنودي قوليلي شو مضايجنج؟؟
العنود: حمدوه .. أحس ان مالي حد في هالدنيا مب قادره أتحمل وجودي عاله على غيري وأشوف الناس من حولي تشفق عليه..لو تشوفوني أضحك وأحاول أتهرب من اللي أنا فيه .. بس ما أقدر أطلع من الضيج اللي فيه ما أقدر ما أقدر ..
شمسوه: وانتي منو قالج انج عاله على غيرج .. خالي حمد يموت عليج وما أتوقع انه يتأذى منج
حمدوه: تشوفين انج غاليه عندنا حتى العيايز من يشوفنج طبنا.. وشو شفقه ما شفقه حبيبتي محد يشفق على أهله .. انتي وحده منا وفينا من لحمنا ودمنا ومستحيل إنا نشفق عليج يالهبلا
شمسوه: هييييييييييه يالسخيفه الحين عرفت ليش سويتي جذيه .. أونها العنيدي تبغي تعرف غلاتها عندنا .. هب هينه ثرج
حمدوه: لا حبيبتي هيه تولهت عليه وما قدرت تصبر عني عشان جذيه اتصلت تبغيني أيي
العنود: ههههه
حمدوه: هيه جذيه أباج تضحكين .. لو أني أنقهر من غمازاتج بس يالله بنتحملهن عشان نسمع ضحكج
.....
حمدوه وشمسوه حاولن يهدن العنود ويطلعنها من الضيج اللي عايشه فيه ويغيرن المود الزفت عندها.. وحارب في هالوقت كان واقف عند الباب من داخل بيتهم .. قلبه يحترق يحاتي العنود.. وصورتها كيف واقفه وهيه لابسه البجامه وفاله شعرها .. واضحه جدام عينه ..شافها واضحه وضوح الشمس.. مب عارف شو يسوي وده يسير صوبها يعرف شو فيها .. شو اللي خلاها تصيح ؟؟... من شاف العنود أول مره وغلاها يكبر ويكبر..هو مب متأكد انه يحبها بس هيه أبد ما تخوز من باله.. وده يتجرب منها بس هيه ما تعطيه فرصه لها الشي.. طولن البنات داخل وحارب منقهر يبغي يدخل بس هن يالسات في البلكونه وإذا العنود ماشافته المره اللي طافت أكيد بتنتبه له الحين .. .. وما عرف شو يسوي غير انه يتصل حق حمدوه
حمدوه: ألووووو
حارب: ويعه
حمدوه: شووو بلاك
حارب: عنبوه من متى أترياكن
حمدوه: انزين صبر الحين بنرد
حارب: شو فيها العنيدي؟؟
حمدوه: يوم برد بخبرك
حارب: يالله خلنها تدخل وردن
حمدوه: انشالله
حارب: وقوليلها ما تطلع بروحها مره ثانيه .. ينت هذي
حمدوه:انشااالله
سكرت حمدوه عن حارب وطالعت العنود
حمدوه: عنودي الحين انتي ردي داخل ونحن بنسير .. أوكي
العنود: سمحلي عذبتكن ويايه .. بس مالقيت حد غيركن عويش ما أتعامل وايد وياها
شمسوه: لا تقولين جذيه .. انتي ما تهونين علينا .. وبعدين الأميره الناعسه بتلقينها راقد الحين
حمدوه: شو نسيتي انج من شلة القواطي
العنود: هههه لا ما نسيت
حمدوه: عمي حارب يقولج ردي داخل .. ولا تطلعين بروحج مره ثانيه ..عن الخبال
العنود(منصدمه):هوه اشدراه... لا تقولين انه شافني؟؟!
حمدوه: أأ.. لالا ما شافج عنبوه ماسمعتيني أقوله انا نحن في البلكونه جدامج..
العنود: خلاص انزين سيرن انتن وأنا بطالع عليكن لين توصلن
حمدوه:لا انتي دخلي ..نحن حارب يتريانا عند الباب وبعدين هو قالي خليها تدخل وعقب ردن
العنود: انشالله .. تصبحن على خير
حمدوه: وانتي من أهله
دخلت العنود داخل وحمدوه وشمسوه سارن صوب البيت
شمسوه: حمدوه حارب شاف العنود صح؟؟
حمدوه: والله ما أدري بس أكيد انه شافها .. والا شدراه.. وبعدين الحين ليل وظلام يعني لو شافها مابيشوف غير هيكل
شمسوه: يالفشله والله لو تدري العنود بتتجتلنا.. لا وحظرتها بالبجامه وفاله الشعر
حمدوه: ههههههه الحقي خالج .. راح فيها
وصلن حمدوه وشمسوه عند الباب
حارب( يصارخ): تو الناس
شمسوه: وويعة يدي .. سخييييف فلختني
حارب: عنبوه خيستني وأنا أترياكن
حموده: انزين جان رديت .. عادي ما بيينا شي
حارب: لا والله.. قولي شو فيها العنود؟
شمسوه: ما فيها شي
حارب( بنقمه):شووووو
شمسوه: ما فيها شي
حارب: قواطي بترمسن والا
حمدوه: حارب البنت مضايجه شوي .. بسسس
حارب: انزين شو مضيجنها
حمدوه: وانت شو تبغيها سوالف بنات
حارب: سوالف بنات .. خلاص ماشي سيرة دبي يوم الخميس
شمسوه: برايك ما نباها
قبض ايد حمدوه بقووو
حارب: وبتنظربن بعد
حمدوه: آآآآآآي حارب والله يعور
حارب: يالله قولي عيل
حمدوه:حارب بطلني أول
حارب: أول رمسي
حموده: انزييييين برمس بس بطلني
بطل حارب ايدها ومشى وياهن بيدخلون البيت وحمدوه تخبره عن كل شي قالت لهن اياه العنود..فعلاً العنود بعدها صغيره على انها تتحمل كل هذا.. توها مخلصه 17 وداشه

*****
بصراحه ارتحت يوم رمست حمدوه وشمسوه .. طلعت كل اللي في خاطري وهالشي ريحني .. حتى كلامهن لي وايد عدل من نفسيتي.. دخلت الحجره توظيت ويلست أقرا قرآن وأتريا الأذان يأذن .. صليت الفير ورقدت ..
....
((( الجـــــــــــــــــــــــــــــــــزء الساااابع )))
الساعه12 سمعت دق على الباب كنت مب مستوعبه إذا كنت أحلم والا هالشي صدق .. بس الدق استمر .. قمت ومشيت صوب الباب وأنا أتسحب .. كانت لامي يابه المدخن
العنود:yes lame
لامي: its12 … are you fine?
العنودyes .. you can go :
خذت المدخن عنها وسكرت الباب.. نسيت ان اليوم الجمعه.. والغدا بيت أم عبدالله.. يااالله ما فيني حيل حتى أمشي .. ريولي يعورني من المشي البارحه .. طلعت ملابسي ودخلت اتسبح .. حاولت أخلص بسرعه لأني بطيئه وايد في السبوح .. خلصت بسرعه وطلعت أحاول أخلص ماشي وقت وبيردون الرياييل من الصلاه .. الساعه وحده ونص رن تيلفوني
العنود: ألووو
حصوه: وينج انتي؟
العنود: في البيت
حصوه: يدوه وعمتي وعويش ين ما شفتج اترييتج وايد
العنود: ما قاللي .. خلاص الحين طالعه
سكرت عن حصوه وسرت بيت أم عبدالله .. دخلت الصاله لقيت موزه بنت أم عبدالله وبناتها موجودات
العنود: السلام عليكم
الجميع: وعليكم السلام
سلمت على موزه وبناتها عفاري ولطيفه
سرت صوب حصوه ويلست عدالها
العنود: حمدوه وشميس وين؟
حصوه: بعدهن الحين يصلن
العنود: زين يوم نشن
حصوه: مارمت لهن .. حشرني أمايه وخالتي روحي وعيهن روحي وعيهن
العنود: رمستي خالتي نوروه
حصوه: أمس ما رمستها .. برمسها عقب الغدا
شمسوه+ حمدوه( توهن يدخلن): السلام عليكم
الجميع: وعليكم السلام
سلامه: عنبو هالمذهب.. شو مرقدنكن لي هالحين
حمدوه:أمايه من الله اجازه وما تطلوعونا خلونا نسهر ونحلل هالإجازه
شيخه: عنبوه لو يدغر حد علينا الصبح ما دريتبه
شمسوه: شو نسوي انش من الصبح .. الا بلا فايده
شيخه: الرقاد بيفيدكن عيل
سلامه: سيرن حطن الغدا .. قومن
حمدوه: هذوه الغدا وصل .. ساحره أمايه .. لا يكون عندج خاتم سليمان
حطوا الغدا ويلسنا نتغدا .. وعقب الغدا سرنا المطبخ ويبنا بيبسي وردينا الصاله
شيخه: عنبوه ويا هالسقم .. بسكن منه راحت جبودكن
شمسوه: ما بعد اللحم الا البيبسي.. ونحن ياحينا شوفي اختج شقايل تصب في بطنها منه تتحراه ماي
.. يلسنا نحن البنات في صوب والحريم في الصوب الثاني
العنود: ساره بتسيرين الجامعه؟؟
ساروه: انشالله
العنود: زين عيل انشالله بنشوفج دوم
ساروه: انشالله ..
لطيفه: خاطري أسير الجامعه
حصوه: اتريي ماشي باقي الا سنه
عويش: ساره اشتريتي شي حق الجامعه
ساروه: يوم سرنا تايلند ماخليت شي ما شحنته
لطيفه: والله ساره بروحها شنطتين من الكبار
حمدوه: حشى ساروه يايه اتاجرين هنيه
شمسوه: ساروه البياعه
ساروه: بياعه في عينج .. حبيبتي لزوم الكشخه
شمسوه( تهمس للعنود): تراها من نفس طينة آنسه شحروره
العنود: هههه.. انتي ما بتودرينهن عنج
شمسوه: تظربني حجه منهن .. ياختي يقهههرررنيييييي
العنود: رابطه راسج بلا ويع .. مايسوى عليج
حصوه: أي كليه سجلتي ساروه
ساروه: إداره
العنود: بشوفج عيل في أيام امتحانات المستوى .. بكون أنا وربيعتي شموه
شمسوه: أنا بسير وياكن
حصوه: ماعليكن عندنا مرشد سياحي هنيه
شمسوه: بس الارشاد سيرن رواحكن مافيني عليه
عويش: أنا بسير وياج أول يوم ساروه
حمدوه: وأنا بسير ويا عنودي .. بنتخيرش هناك وبواعد ربعي
ساروه:عويش انتي خلصتي ملابس الجامعه
عويش: يوم الخميس بسير بعدني أبغي آخذ لي ملابس ..
حمدوه: عويش بتسيرين ويانا
عويش: هيه أكيد دام خالي حارب بيودينا
في هالوقت دخلوا حارب وخليفه وعلي ومنصور
علي: السلام عليكم
الجميع : وعليكم السلام
حارب: قواطي .. كم مره قلتلكن لاتشربن بيبسي من مالي
شمسوه: حارب عيييب صدق ما تستحي كم مره بقولك عندنا ضيوف
حارب: منو ضيوف .. العنود مب ضيفه وبتنهزب شراتكن
حمدوه: وانت محد غيرك يشتريه .. هذا نحن طالبينه رواحنا من الدكان
شمسوه: هيه .. جنه محد غيره يشتريه
علي: عنودي شو فيج؟
العنود: ماشي!!
علي: شكلج زياغ .. عيونج مسودات
العنود: ما رقدت أمس وايد
خليفه: وين ما رقدتي .. الساعه 2 راقده .. هب أ نا
العنود: ومنو ير الرقاد عنك انته
خليفه: حلمتج ومن قمت ما رمت أرقد
العنود: مسود الويه .. يوم الا حلمتني ياحظك اللي طايح من السما والكل يحسدك عليه
حارب( يهمس في اذن حمدوه): هيه والله ياحظه
حمدوه: ايه انتي الخقاقه .. شو هالخقه كلها
العنود: بنت سيف بن حمد يحقلي أخق ليش لاء
ساروه: انتي من الحين جيه الله يعين اللي بياخذج .. أسميج بتخقين عليه
شمسوه: ياااااحظه اللي بياخذ عنودي .. يحب ايديه ورا وجدام
خليفه: عطوني دبوس.. حووه شميس عمتي بروحها منتفخه ما تزداد
منصور: خالوه عنود انا اللي بيوزها .. ومحد غيري
حصوه : منو بتيوزها ؟
منصور: سررررر
العنود: بس بس سكروا السالفه
علي: أول مره أعرف ان العنيدي تستحي
العنود: لااا لوح
علي: تراج من شلة القواطي ما بتين ينب عنهن
ساروه: منو القواطي ؟
منصور: حمدوه والعنود وشميس
حمدوه: شمعنا حصوه وعويش ما قلتوهن
حارب: عزا الله عويش وحصوه العاقلات عنكن انتن الخراشه كلها
علي: علني ما خلا من العقل كله
حارب: علي الخميس الياي يا انته يا خليفه يسير ويايه أنا هب سايربهن روحي أدريبهن بيخلني موقف وهن في كل محل ساعه
خليفه: لا لا أنا عندي شغل
علي: أنا مواعد واحد من الربع
حارب: لا تجذبون .. واحد منكم بيسير
حمدوه: العنود تعالي شوي
طلعت ويا حمدوه ورحنا المطبخ التحظيري .. حمدوه كانت تبغي تشرب ماي بس عقب ما شربت يلست وما طاعت تطلع
العنود: بلاج حمدوه ؟
حمدوه( معصبه): ماشي بس ما بغيت أيلس وياهم
العنود: ليش يعني ؟
حمدوه: أتحمل أي شي الا ان حد يقولي جذيه جدام ساروه وعويش
العنود: عادي شو يعني أنا وشمسوه ما تحسسنا
حمدوه: شميس تلقينها تطبخ في عمرها الحين .. وانتي لا تستعيلين يوم بتسيرين الجامعه بتسمعين كل اللي ينقال من سوالف في البيت عند شلة عويش..
العنود: كيف يعني .. الحين عويش تخبر ربعها
حمدوه: الكورس اللي طاف في بنات من شلتها قامن يزقرنا القواطي .. نحن بناخذها على مزح من حارب وعلي وخليفه بس من بنات ما يداننا .. بصراحه ما اتحملها .. ومن ذاك اليوم اتجنب أي شي من هالكلام يطلع جدامها.. ومحذر عليوي وحروب
العنود: لا تحرقين اعصابج على شي ما يسوى
حارب( يدخل): حمدوه السموووحه والله نسيت وما يا على بالي
العنود: أنا بروح عند شمسوه
حمدوه: لا عنودي يلسي عادي
العنود: لا لا بروح
طلعت من المطبخ ودخلت الصاله عند البنات
*****
في المطبخ كان حارب يراضي حمدوه...لأن حمدوه أكثر من مره قالت له لا يقولهن من هالكلام جدام عويش لأنها خبرته عن الموقف اللي صار ويا ربع عويش
حارب: والله نسيت
حمدوه: عادي عمي والله أنا انقهرت في ساعتها بس
حارب: تعالي انتي .. هذي خالتج ليش شايفه عمرها
حمدوه: العنود!!
حارب: هيه العنود
حمدوه: ليش يعني .. بسرعه غيرت رايك
حارب: حمدوه لا تيلسين غيرت رايك وغيرت رايك .. أنا ما قلت لكن شي .. بس يعني حطيتها في بالي فتره
حمدوه: كيف يعني فتره
حارب: ممم ما أدري بس كنت حاط في بالي .. يعني إذا صارت لي فرصه اني أخطبها
حمدوه: الفرصه جدامك الحين .. وبعدين ليش كنننننننت حاط في بالك .. شو شفت عليها عشان تقول خقاقه .. انت ما لقيت غيرها تقول عنها خقاقه!!
حارب: من أدخل تروح .. من تشوفني ما تبطل حلجها بكلمه
حمدوه: يعني لو كانت البنت حاشمه عمرها قلتوا عنها خقاقه وشايفه عمرها.. وإذا دقت وياكم سوالف قلتوا ما فيها مذهب .. حارب اسمعني العنود ما تخالط حد انت تعرف انها وحيده .. حتى نحن ما كانت تخالطنا وايد .. وهيه تستحي وايد .. حتى انها تظحك جدامك.. بذمتك بذمتك الحين لو أنا والا شميس مكانها بترضى انا نحن نكلم واحد يقربلنا من بعيد
حارب: ممم صح حمدوه ..بس نحن الحين تقريباً يومياً نشوف بعض
حمدوه: اصبر شوي بتتعامل وياك .. بس لا تتوقع انها تزيد في هالشي العنود وأعرفها .. تبغي الصدق ما بتحصل أحسن عن العنود صدقني .. والله ان العنود أحسن عن ميثا بمية مره
حارب: أقولج شي .. بصراحه بصراحه.. أنا البارحه قلت لج اني ما انتبهت لها بس الصدق اني شفتها .. شفتها واضحه بعد
حمدوه( منصدمه): شووووووو
حارب: والله اني من شفتها ما رمت أرتاح .. خبلت بي هالبنت
حمدوه: حارب انت كيف سمحت لنفسك انك...
حارب( يقاطعها): أنا ما كنت متعمد لها الشي .. أنا شفتها وعقب نزلت راسي ولفيت عنها
حمدوه: والله لو تدري بتلعن خامسنا
حارب: والله قلبي عورني عليها أمس
حمدوه: تعرف لو سمعت منك هالرمسه عادي تكرهك
حارب: ليش يعني ؟؟
حمدوه: شو ليش يعني .. كل حد منا ما يحب ان حد يشوفه بنظرة انه انسان ضعيف
حارب: لا تسيرين بهالتفكير ... أنا اقصد انها ماهانت عليه
حمدوه: هههههههه أسميها يابت راسك العنيدي
حارب: شلت قلبي قولي مب يابت راسي
حمدوه( بخبث): تستاهل العنيدي
******
دخلت الصاله عقب ما طلعت من المطبخ .. بصراحه ما قدرت أرتاح وحارب هناك .. ما أعرف أحس اني ما أعرف أتعامل وياه ... رحت يلست بين شمسوه وحصوه .. وصدقها حمدوه شميس كانت يالسه ومعصصبه عليهم ومنصور وخليفه وعلي طايحين فيها وهيه ما ترد عليهم
العنود: حووو بس عاد زودتوها
خليفه: دام ان حمدوه قوطي أناناس .. شميس قوطي ذره ..عنيدي قوطي شوو
علي: قوطي حمص
خليفه: لالا قوطي صلصل على قدها
العنود: جنكم زودتوها .. بس عاد
شمسوه: عنودي خليهم عنج .. لا تسوين لهم سالفه
منصور: خييييييبه صنفرت
حصوه: منصور وعلي وخليفه قوموا يالله .. انتوا شو ميلسنكم عند البنات؟؟
عويش: أقول ساروه قومي خلينا نسير بيتنا
شمسوه( بهمس): حشى ما بغت ..أففف بلا رده انشالله
طلعن عويش وساروه وردن البيت وخليفه وعلي ومنصور طلعوا عنا ويا حارب وتمينا انا وحصوه ولطوف وشميس وحمدوه.. يلست وياهن لين أذا ن العصر وعقب رديت البيت ... عقب ما صليت العصر يلست في الصاله أتريا حمد يرد من المسيد .. دخلوا حمد وخليفه عقب ربع ساعه..
حمد+ خليفه: السلام عليكم
العنود: وعليكم السلام
خليفه: حطي سبيس تون حطي سبيس تون بسرعه
العنود: القناص الأخيره خلص أول أمس
خليفه: قولي والله .. جيه ما تقوليلي من متى أترياها
العنود: بعدني ما أدري اني السكرتيره الخاصه عندك ترتب مواعيد الرسوم حققك
خليفه: ما علييييه هب منج من اللي بييب لج فلم كمامارو( رسوم متحركه جديمه)
العنود: لا دخيلك من متى أدورها
خليفه: والله ما أحيد اني مطراش عندج
حمد: الحمدالله والشكر تخبلوا ولدي واختيه
العنود: هههههه مب أنا هذا ولدك
حمد: خلي عنج انتي من يوم يومج خريش
العنود: حمد .. ممم
حمد: خير العنيدي بغيتي شي
العنود: هيه .. بغيت أقولك اني أبغي أسير عند يدوه.. تولهت عليها
حمد: فالج طيب قومي بوديج
العنود: لا أنا أبغي أبات عندهم
حمد: خير عنودي مب مرتاحه عندنا
العنود: لا والله مرتاحه بس اتولهت عليها قلت بسير عندها هالاسبوع
حمد: اسبووووع !! لا اسبوع وايد
العنود: انزين برد يوم الخميس
حمد: ما سويتي شي .. ما مات الا بلق عينه .. أنا ما أروم أصبر عنج أكثر عن يومين
العنود: شو رايك.. أنا بسير اليوم وبرد يوم الأربعا جني سايره أداوم
حمد: وشو رايج تاخذين الأربعا إجازه وتداومين من اليوم لين يوم الثلاثا
العنود: خلاص صار عادي .. أهم شي اني أبات عندها
حمد: خلاص عيل باتي اليوم و ردي باجر
العنود: لاااا شو أنا ما صدقت
حمد( يمطها من اذنيها): شو ما صدقتي
العنود: هههههه لا والله ما صدقت أقنعك يعني
حمد: تبيني أوديج
العنود: لا برايك بسير ويا الدريول والا بتصل حق غيث
حمد: خلاص عيل برايج
العنود: أنا بسير أتصل حق غيث
.........
و بسكم اليوم و ان شاء الله بكمل باجر .....