بصراااااحهـ الباااااارت عجيــــب

لا تبطـي علينـا بالبارت اليــاااي

عشوووقهـ

السلام عليكم

شكرا ع المرور







«®°·.¸.•°°·.¸¸.•°°·.¸.•°®»ممنـــــــــــــــــوع الدخــــــــــــول لـــــــــــدون سن 18 «®°·.¸.•°°·.¸¸.•°°·.¸.•°®»






الجزء الواحد والعشرين..


قامت غاليه من الرقاد وتمددت براحه، وقابلتها العيون الي كانت تراقبها وهي راقده.. إبتسمت له غاليه وهي تتذكر أحلى يومين مروا عليها بحياتها..
من ليلة زواجهم وخالد معيشنها في جنة.. جنة حبه الي يتجدد يوم بعد يوم.. من ثاني يوم في زواجهم سافروا على إيطاليا بلد الحب والرومانسيه.. البلد الي طول عمرها غاليه تتمنى تروحها في شهر عسلها.. وخالد حقق لها أمنيتها..
خالد قام لها يوم حسها سرحت بعيد عنه، راح له ويلس يمها عالسرير وهو يمسح على شعرها بحنان..
خالد: صباح أحلى عيون تناظرني..
غاليه بإبتسمامه بريئه: صباحك ورد حبيبي..
خالد: تهنيتي في رقادج دلوعتي..؟؟
غاليه هزت راسها هيه..
خالد: الحمدلله..
غاليه وهي تلعب بإيده: سامحني لأني أخليك ترقد على الكنبه، بس للحين ماتعودت على حد يرقد معاي..
خالد: لا فديتج راحتج أهم من كل شي.. ومع الأيام بنتعود على بعض، والحين قومي تريقي لأني مجهز لج مفاجأة حلوه..
غاليه نقزت: وين بتوديني..؟؟
خالد: ههههههههه دومج مستعيله.. إنتي قومي ويصير خير..
قامت غاليه وراحت عالحمام وسبحت ويوم طلعت كانت لابسه روب الحمام وشافت خالد مزهب لها الريوق ومحطنه على الطاوله..
غاليه: أنا الي المفروض أخدمك.. إنت ليش تسوي كل هذا..؟؟
خالد سحبها من إيدها وقعدها: أنا وإنتي واحد.. اليوم بدلعج وإنتي باجر لين ردينا الإمارات بتدلعيني.. صح..؟؟
غاليه: أكيد صح..
ويلسوا يتريقون بهدوء وخالد ما اكل كثر مايلس يطالعها وهي تاكل.. وهي بعدها تستحي منه بس بدت تتعود عليه و.. وتحبه..
خالد: عصفوره تاكل..
غاليه: ههههههه بابا كان يقولي لو يبنا عصفوره وخليناها تاكل وياج، هي بتخلص قبلج..
خالد: معاه حق عمي.. وإنت ماكلمتي أهلج..؟؟
غاليه: لا بس فاليوم الي وصلنا فيه..
خالد: خلاص وقت ماتبين تكلمينهم خذي التلفون بدون لاتستأذنين.. وإنتي ليش مايبتي موبايلج..؟؟
غاليه: ربيعاتي حشره، وأدريبهن بيأذوني فقلت أقطع الشر..
خالد: هههههههههه خلاص عيل قومي إلبسي ثيابج..
غاليه وقفت وهي تأشر على الروب: مايصير أظهر جي..
خالد فتح عيونه: بلى يجوز.. بس للصاله وتردين..
غاليه: ههههههههههه ماسوينا شي..
خالد: أقول روحي لاأقوم لج بالعصا الحين..
غاليه وهي تمشي: شكلها الرومانسيه خلصت..
وماحست بخالد إلا وهو لامنها على غفله منها..
خالد: منو الي خلصت رومانسيته.. خلاص ماشي طلعه..
غاليه بدلع: خاااااااااالد فديتك خل نظهر..!!
خالد: لا..
وفرها عالسرير وسكر باب الغرفه وراه..

بعد ساعتين نزل خالد تحت ويلس شوي فالريسبشن يكلم الموظفه.. وبعد عشر دقايق رجع الغرفه وشاف غاليه تطلع ثيابها..
خالد: على وين..؟؟
غاليه: خالد لاتستعبط.. من يينا ماظهرنا، بليز خل نروح اليوم منتزهات..
خالد: هذا شهر العسل.. كله حب ورومانسيه..
غاليه يلست على السرير: وشو أقول لأهلي يوم بيقولون لي وين سرتي ووين الصور..؟؟
خالد وهو يتقدم لها: قولي لهم رحت لزوجي.. يلست مع زوجي.. زرت حظن زوجي..
غاليه: لالالا خلك بعيد عني.. لاتقرب أنا ناويه أظهر يعني أظهر..
خالد: ههههههههههههه خلاص أنا بقعد فالصاله وإنتي البسي..
طلع خالد ومسك الريموت ويلس يفرفر فالتلفزيون وهو يغني..
خالد: يالله حبيبي خلينا نتمشى شوي قبل وقت الغدا..
طلعت له غاليه وهي لابسه بنطلون بني واسع وقميص طويل بيج وفاتحه شعرها.. وماسكه في إيدها العبايه والجاكيت الطويل..
خالد: وتلوميني ليش مقعدج فالغرفه.. اتخبل عليج من تكشخين..
غاليه: هههههههه عيل غمض عيونك.. حبي ألبس العبايه ولا السويتر..؟؟
خالد وهو يطالع التلفزيون: دلوعتي قلت لج من قبل.. لو لبسج وسيع وحشمه إلبسي الجاكيت بس.. بس لو مب مناسب للطلعه إلبسي العبايه..
غاليه: وإنت شو تشوف..؟؟
خالد بخبث: لو إطالعتج ماشي طلعه من الشقه..
غاليه بعصبيه: خاااااااااالد..!!
خالد: ههههههههههه حبيبي إلبسي الجاكيت..
دخلت غاليه الغرفه ولبست الجاكيت ولبست لإسكارف البني، وحطت لمعة خدود وسحبت شنطاتها الطويله وطلعت..
غاليه: هااااا شو رايك فيني..
خالد بند التلفزيون ومسك من إيدها: لاتسإلين عن رايي.. يالله نسير..
وطلعوا من الفندق ويلسوا يتمشون في شوارع ميلان.. الجو كان رهيييب والهوا يهب عليهم وغاليه طااايره من الوناسه..
غاليه: ياربي إشحلات الجو..
خالد: أصلا الجو مب حلو.. غاليتي هي الي محلتنه..
غاليه: أنا أدري بس خفتك تقول عني مغروره..
خالد: حتى الغرور لو ظهر منج يسمى تواضع..
غاليه: ياعيني عليك.. مجهز لكل شي رمسه.. المهم الحين وين بتوديني..
خالد: ياقلبي بوديج منتزه حلو وبيعيبج..
غاليه: ووين مفاجأتي..؟؟
خالد: للحين ذاكرتنها.. الصبح قلتها لج..!!
غاليه: إنت ماتعرف شو صار فيني.. من الصبح يالسه أحترق وأنا أبا أعرف شو السالفه..
خالد: ههههههههه بوديج بارك فيه رسامين يرسمون أحلى اللوحات.. وبخليه يرسمج..
غاليه: الله وناسه.. أنا من كم شهر ولد ربيع أبويه رسمني وعلقت الصوره في غرفتي..
خالد وهو يطالعها: نعم نعم..!! من متى هالسالفه..؟؟ وليش ماخبرتيني بها..؟؟
غاليه: هههههههههههه حلوه عليك الغيره..
خالد لف بويهه عنها أونه معصب.. وليييه هذا كيف يراضونه الحين..
غاليه: خالد ليش عصبت..؟؟ أنا ماسويت شي..!!
خالد: لا والله خلاص أنا زعلت راضيني..
غاليه: فديتك أنا آسفه وآخر مره..
خالد: برضى بس بشرط..
غاليه: عيوني لك..
خالد وهو يأشر على خده: أبا بوسه..
غاليه إحمرت: شو..!! عيب نحن بين الناس..
خالد: عادي الأجانب عندهم.. يالله بوسيني..
غاليه تسحبه من إيده: خلودي فشله الكل بيطالعنا..
خالد: مايهموني.. ولا الحين بردج الشقه..
غاليه ترددت... ياربيه شو أسوي الحين، والله الكل يطالعونا عنبوا فلم شو..شيلوا عيونكم عني..
غاليه: حبيبي بعدين بعطيك الي تبيه..
خالد: قومي قومي خلينا نرد البيت..
غاليه: لالا فديتك خلاص تعال..
وتجدمت غاليه وحاولت ماتبين إنها تبوسه، بس على منو الإيطاليين من كل صوب يراقبونهم لأنهم عرب وأشكالهم غير.. غاليه طبعت البوسه عالسريع وإبتعدت بس خالد سحبها وحظنها وباسها.. وقاموا كل الموجودين يصفقون لهم ويصارخون..
غاليه: وقسما بالله إنك فظحتنا.. وهالميانين على شو مستانسين..!!
خالد: هههههههه أقولج بلد الحب.. يعني هالسوالف تدل عالحب والرومانسيه بين الإثنين..
غاليه: آخر مره أطاوعك على هذا الشي..
خالد سحبها من إيدها وباسها ومشى معاها للمنتزه..
هناك لقت غاليه أشياء حلوه ووايد إستانست عليها..
غاليه: ماشاءالله الرسم رهيب..
خالد: تعالي هني خلي هالمحترم يرسمج..
غاليه وهي تيلس: خالد أي محترم شكله يخوف..
خالد: هههههههه لاتخافين أنا وياج..
وكلمه خالد وطلب منه يرسمها.. والرسام رد عليه بكلمات خالد ترجمها لها..
خالد: أونه معاك حق تخلد هالملاك برسمه..
غاليه بغرور: معاه حق..
خالد: أموووت فالغرور أنا..
غاليه: ههههههههههههه
الرسام طلب من خالد لايضحكها، وكمل شغله.. وخالد متملل وقالها بيروح عنها إييب لها عصير بس هي مارضت لأنها تخاف تكون بروحها في مكان غريب..
وبعد نص ساعه خلص الرسام رسمته وعطاها لغاليه الي تخبلت عليها لأنها صج كانت فن..
خالد: رهيبه الصراحه.. أحلى عن الواقع بوايد..
غاليه: نعم نعم..
خالد: ههههههه فديت دلوعتي أنا.. محد يقدر يرسم ملامحها عدل غير رب العالمين.. سبحان الي خلقج مانقص فيج ولاشي..
غاليه وهي تطالع اللوحه: بس ماعطاني الصحه..
خالد الي كان يعطي الرسام بيزاته إنقبض قلبه من كلمتها، إلتفت لها وكانت عاديه ومب مهمومه..
راح لها خالد وحط إيده على خصرها وسبحها لقربه..
غاليه: هالصوره بعطيها لبابا.. وايد بيستانس عليها..
خالد: يالله نمشي..
غاليه: تعال بنسير للعربه الي هناك.. بشتري تذكارات لربيعاتي..
خالد مشى وراها بدون لايتكلم، كلمتها يالسه ترن في أذنه.. هو لازم ينسيها مرضها بأي طريقه.. بس كيف.. كيف..؟؟
غاليه: عمري شو رايك بهالتحفه..؟؟
خالد: رهيبه.. لمنو بتاخذينها..!!
غاليه: حق مرام ربيعتي تحب هالسوالف..
إشترتها غاليه ومعاها خاتم إكسسوار شكله رهيب.. ورجعوا يتمشون شوي وإنتبهوا إنه وقت غدا.. وقرروا يمرون المطعم يتغدون..
غاليه: شو رايك بعد الغدا.. نكمل رحلتنا..
خالد: ماتبين تردين البيت ترتاحين..؟؟
غاليه: لالا.. أبا أتعرف على المنطقه أكثر..
خالد بحنيه: حبيبي ودواج ماأخذتيه..؟؟
غاليه طلعت من شنطتها علبة الداو..
خالد: هههههه يوم تبين الشي محد بيغلبج..
غاليه: تربية منصور وفاطمه..
خالد: الله يخليهم لنا إن شاءالله..
وخالد قعد يتمشى هو وغاليه بكل المناطق القريبه، حاول إنه يعرفها على كل معالم ميلان..
وعلى الساعه تسع ونص بالليل رجعوا الشقه وكانوا هلكانين من التعب..
غاليه وهي تفصخ الجوتي: بس تعبت.. وااااي ريولي تعورني..
خالد: قلنا لج.. قلتي لا مابي أرد البيت..
غاليه: آخر مره نظهر جي..
خالد: ههههههههه أنا بنزل بييب لنا عشا.. وإنتي إرتاحي هني..
نزل خالد وراح لمطعم جريب يعرفه أكله حلو وبيعيبها.. أخذ لهم عشا خفيف لأنه يعرفها بتاكل شوي وبتقول مالي نفس..
بعد نص ساعه رجع خالد للشقه ومن دخل قابلته ريحه بخور إشحلاتها.. فالصاله كانت الليتات مبنده ومشغله الشموع بس.. حط خالد العشا ونادى على غاليه.. طلعت له غاليه من الغرفه وهي لابسه برمودا زرقا لتحت الركبه والبادي أبيض بحمالات بس.. خالد يلس يطالعها وهو متخبل عليها وهي ماتبا ترتبك جدامه فراحت على طول للأكياس وبدت تطلع الأكل..
غاليه: شو يبت لي عشا..
خالد يلس يمها: كل خير؟؟
غاليه: ليش يلست..!! قوم بدل ثيابك وتعال بنتعشى..
خالد ماحب يربكها وهي الي بدت تتعود عليه، فقام وراح الغرفه ورجع لقاها مجهزه العشا..
خالد: شو رايج نطلب لنا فلم ونقعد نطالع..
غاليه: حلوو بشرط فلم رعب..
خالد: هههههه قويه..
ويلسوا الحبايب يتعشون وخالد يبا يطالعها بس ماسك نفسه..
غاليه: خالد عطني أكلم أهلي..
خالد: حبيبي الوقت متأخر باجر الصبح نكلمهم..
غاليه سكتت ورجعت تاكل، بس مثل ماتوقع خالد ماكلت إلا شوي وانسدت نفسها..
خالد: حبي أكلج صاير وايد قليل..
غاليه: مادري.. أكلهم ماعيبني وايد..
خالد: ولو.. لازم تاكلين ولابتتعبين..
غاليه: إن شاءالله بس يالله إطلب لنا فلم خلنا نسهر عليه..
طلب خالد الفلم وبدت السهره.. راحت غاليه تودي الوصخ المطبخ ويابت المكسرات ورجعت وشافت خالد يالس عالكنبه الطويله.. حطت له المكسرات جدامه ويلست معاه..
خالد بدا ياكل من المكسرات ويتابع الفلم..
غاليه: شايفنه من قبل هالفلم..؟؟
خالد: لا أول مره.. وإنتي..؟؟
غاليه بعد أول مره..
وحطت غاليه راسها على كتف خالد وهي تاكل المكسرات..
وبعد ساعتين خلص الفلم وقامت غاليه تتمدد وهي تعبانه..
خالد: حلو الفيلم الصراحه..
غاليه: هيه بس نهايته مب شي.. كيف يموت البطل.. وهالفقيره منو بيتم لها..
خالد وهو يسحبها من إيدها: مابقى غير تسهرين تحاتين البطله منو بيظل لها فالدنيا.. قومي أشوفج رقاد..
غاليه: هههههههههههه
ودخلوا يرقدون وغاليه مستانسه من خالد.. وأحلى أيام العمر يالسه تقضيها هني معاه.. ربي يوفقني وأقدر أرد لك ا
لسعاده ياخالد ياقلب غاليه..

قامت غاليه من الرقاد وشافت نفسها راقده في حظن خالد، إستغربت خالد ماصحى قبلها وجهز لها الريوق كالعاده..!!! يالله فرصه أجهز له أحلى ريوق وأسويله مفاجأة..
قامت غاليه عالحمام بكل هدوء تغسلت وغيرت ثيابها، لبست بيجامه ورديه حرير ورفعت شعرها القصير بقباضه كبيره ونزلت المطبخ.. شافت الخدامه تجهز لهم الريوق..
ليلي: good morning madam
غاليه: good morning lele
ليلي: I used to seen mr.khaled befor you
غاليه: tody we change.. what you made for breakfast??
خذت غاليه صينية الفطور ولقت خالد للحين راقد.. حطت الصينيه عالطاوله وراحت الصاله وسحبت لها ورده حمرا جوريه وحطتها في الصينيه وراحت لريلها..
كان راقد مثل البيبي، غاليه مسكت إيده وباستها وراحت لليد الثانيه وباستها وخالد ماحس بها.. وصلت لريوله وباستهم وخالد خبر خير غرقان في العسل..
يلست تمسح له على ويهه وتبوسه إلين حس فيها وصحى..
خالد فتح عيونه وشافها يالسه معاه، سكر عيونه ورجع يفتحها..
خالد: صباح أحلى عيون تناظرني..
غاليه وهي تبوسه عخده: صباحك فل وياسمين ياقلب غاليه..
خالد قام وهو يتمدد بكسل.. وشاف صينية الفطور الي قربتها غاليه من السرير..
خالد: ياسلام اليوم دوري فالدلع.. لو أدري جو روما جي بيسوي فيج كنت يبتج هني بالأول..
غاليه: هههههههههه
خالد: تدرين ياقلبي.. البارحه كانت أحلى ليله بحياتي..
غاليه بخجل: إن شاءالله كل أيامنا حلوه..
خالد: وليلي ما إستغربت منج..
غاليه وهي تسحب صينية الريوق: بلى قالت متعوده تشوفك قبلي..
خالد: يالله بسم الله..
غاليه: لحظه لحظه.. مب إنت تقول اليوم دورك فالدلع، خلاص أنا بأكلك بإيدي..
خالد: لا شكلنا ماشي طلعه اليوم..
غاليه: هههههههههههههه

على الساعه سبع المغرب خالد كان ظاهر من الحمام سابح وغاليه يلست ترتب الغرفه..
غاليه: نعيما حبي..
خالد: الله ينعم على قلبج.. للحين مالبستي..؟؟
غاليه: الحين بلبس..
خالد: عاد لاتتأخرين.. بنروح الأوبرا وبعدين بنتعشى فأحلى مطعم فالدنيا..
غاليه: خلاص عمري عشر دقايق وأنا جاهزه..
الساعه سبع ونص غاليه كانت مخلصه لبس ونزلت تحت، شافت خالد واقف عالبلكونه والهوا يلعب بشعره.. كان لابس جينز أسود وقميص أسود بكاروهات بيضا، وجاكيت جلد أسود، وكان قمه في الروووعه وغاليه وايد تخبلت عليه..
راحت له تتسحب بس هو حس عليها وإلتفت لها ويلس يطالعها من فوق لتحت.. كانت لابسه فستان سكري ناااااعم مخصر من فوق ومن تحت فرنسي وااسع.. كان مب وايد طويل، وعلى خصرها حزام فضي عريض شوي، وتحت لابسه بوت أبيض.. ولابسه إكسسوارات كثيره.. يعني على رقبتها وأذنها وإيدها كل شي مغطي بالإكسسوارات.. وكثرت من المكياج اليوم..
خالد من شافها قام يصفر بإعجاب.. وهي استحت بس لصقت فيه وهي تبوسه برقه..
خالد: أحلى مساء لأحلى غاليه وأحلى قمر يشرق على روما..
غاليه: ههههههههههههه
خالد: شكلنا بنبطل عن الطلعه.. الجو غيم..!!!
غاليه: لالالالالا خلودي قلبي بلييييز أبا أروح الأوبرا..
خالد لمها من خصرها: توعديني تبقين بهالحلاه طول العمر..
غاليه: أممممممممم بتدفع ثمن عمليات التجميل..؟؟
خالد: ههههههههههههههه
غاليه: خلودي شو رايك بلبسي حلو..؟؟
خالد وهو يطالعها من فوق لتحت: بس حلو.. إلا يجنن، والأحلى هو الجسم الي محلنه..
غاليه تحاول تبعد عنه: خلاص حبيبي خلنا نروح..
خالد يعصرها أكثر: خلينا شوي بعد..
مرت عليهم ليلي الخدامه وإبتسمت يوم شافتهم جي عالبلكونه..
خالد: lele, is my wife beautifull??
ليلي: more than the moon..
غاليه: thank you lele
خالد: بسج شو تبين ليلي مدحتج..
غاليه: إنزين خوز عني فشلتنا.. خلني ألبس هالجاكيت الطويل..
خالد: لازم يكون أبيض.. لاتلبسين الأسود..
غاليه وهي تلبس: يعني الحين إنت بتعلمني فالذوق..
خالد: ههههههههههه يالله مشينا..





في لإمارات..

في المستشفى بالتحديد، أبوغاليه كان راقد على السرير وحرمته معاه تقرا عليه قرآن.. الدكتور قالهم إنه ضغطه ارتفع ولازم يرتاح، لأنه وايد متعب نفسه.. وطلب منه يبقى فالمستشفى يومين..
أبوغاليه: فاطمه..!!
أم غاليه سكرت القرآن: هلا عيوني.. آمرني..!!
أبوغاليه: مايامر عليج عدو.. غاليه لاتخبرينها بشي..
أم غاليه: أكيد بدون لاتقول.. مافي شي يستاهل، وإنت بتقوم بالسلامه إن شاءالله..
أبوغاليه رجع يغمض عيونه وهو يتذكر بنته وبخاطره فهاللحظه يشوفها.. بس وينها!! بينها وبينه مسافات طويله، الله يرجعها لنا بألف صحه وسلامه..
دخلوا عليهم فجر وعلي وسلموا عليهم ويلسوا..
فجر: سلامتك ياخوي ماتشوف شر..
أبوغاليه: الشر بعيد عنكم إن شاءالله..
علي: خطاك الشر يالنسيب.. تتدلع علينا أشوفك..!!
أبوغاليه: هههههههههههه شو أسوي أشوف غلاتي عندكم..
أم غاليه: عيل وينهم عيالكم..؟؟
فجر: خليناهم عند ميعاد وييناكم.. شو أسوي ماعندي حد أوديهم عنده، فبليت ميعاد فيهم..
أم غاليه: فديتهم ياربي..
فجر: والعروس شخبارها مادقت لكم..؟؟
غاليه: عاليومين تتصل.. من طاح أبوها مادقت..
علي: خلوها تتهنى لاحقه عليكم..
أبوغاليه: الله يهنيها يارب.. لاحد فيكم يخبرها، مابي أشغل بالها..
فجر: بدون ماتقول ياخوي أكيد مابنخبرها..
دخل ناصر وهو شايل باقة ورد كبيره، ووراه عبدالعزيز..
ناصر: السلام عليكم..
الكل: وعليكم السلام..
عبدالعزيز: سلامات ياعمي ماتشوف شر يالغالي..
أبوغاليه: الله يسلمكم من كل شر..
ناصر: يقصون علينا ويقولون مريض، شوف الويه ماشاءالله كيف منور.. أنا من باجر بسير بخطب لك..
أم غاليه: بس هذا الي محصلينه منكم..
عبدالعزيز: هههههههههه الريال بعده بصحته خليه يتهنى..
فجر: ههههه بسكم من هالخرابيط.. قولولي وينهن حريمكم، ليش مب يايبينهم يزورون عمهم..
ناصر: حرمتي عند أهلها.. إن شاءالله باجر بسحبها معاي..
عبدالعزيز: وحرمتي ميودينها عيالج.. مب كفايه عووشه الحشره، بعد الحين التوأم المرح..
فجر: لاتتحجج بعيالي.. فديتهم اهدا من الريشه..
علي: خلاص خلينا نروح ناخذهم.. لانثقل عالجماعه..
عبدالعزيز: علي.. لايكون زعلت أنا مب قصدي تراني أسولف عليها
علي: لاعادي مافي مشكله..
فجر: علي صاير حساس.. خلاص بنروح الحين..
أم غاليه: فجر مري البيت بتعطيج الخدامه أغراض لمنصور..
ناصر: تراه خليفه بيرقد اليوم عندك ياعمي..
أبوغاليه: مايقصر.. بس على الله يجابلني مب يسير للنيرسات..
عبدالعزيز: ههههههههههه إنت وحظك عاد..
وطلعوا كلهم وخلوا منصور يرتاح شوي..


نرجع لإيطاليا..
غاليه وخالد توهم راجعين من برع، خالد يلس فالصاله يرتاح شوي وغاليه راحت غرفتها تغير ثيابها.. غيرت ولبست جلابيه سودا للبيت كانت مخصره على جسمها وعلى الأطراف خيوط ذهبيه وشكلها رووووعه، غاليه مرت من جدام خالد وخذت الريموت تشغل التلفزيون.. خالد قعد يطالعها وهو ساكت وهي مطنشته وتفرفر التلفزيون..
خالد: تعرفين دلوعتي.. هالجلابيه بشو تذكرني..؟؟
غاليه وهي لاهيه بالتلفزيون: بشو حبي..!!
خالد: فيفي عبده أيام شبابها.. ههههههههههههه
غاليه مسكت المخده الصغيره وفرتها عليه: بااااااايخ..
خالد: هههههههه والله صج حبي.. مب ناقص غير تقومين ترقصين..
غاليه عطته نظره: أصلا إنت تتمنى أرقص لك.. لكن أنا بحرمك من هالمتعه..
خالد: ههههههههههههه فديتج والله..
غاليه: بخاطرك شي معين حق الغدا..!!
خالد: تلاقيها الخدامه خلصت غدا الحين..
غاليه: لاقصدي كيكه سلطه أي شي أسويه لك..
خالد: أمممممممممممم لا مافي شي..
غاليه بحيره: من أمس أتصل بيت أهلي ومحد يرد علي.. وموبايل بابا مغلق..
خالد: دقيتي حق الوالده..!!
غاليه: هيه دقيت وكلمتها، وسألتها عن بابا وقالت لي محد فالبيت، بس قلبي يقولي إنه فيه شي..
خالد: بسم الله عليه.. لاتيلسين توسوسين إن شاءالله يكون بخير وصحه..
غاليه: الله يسمع منك..
خالد: حبيبي اليوم ماشي طلعه إلا للعشا.. تراج اليوم وايد مشيتي..
غاليه بدلع: لاااااا خلنا نظهر العصر.. والله مب حلوه القعده..!!
خالد: أفااا يعني أنا ممل..؟؟
غاليه: مب قصدي بس أنا أحب أطلع وأحوووط
خالد: لا يعني لا.. اليوم بنرتاح وبالليل بنظهر نتعشى ونتمشى شوي وبعدين نرجع للبيت..
غاليه: عيل بمسك تلفونك وبدق لكل ربيعاتي..
خالد: هههههههههههههه يفداج ياقلبي إنتي..
غاليه مدت بوز ولفت عنه تتطالع الخدامه الي وقفت تكلمه وتقوله الغدا جاهز..
خالد: يالله غلايه قومي نتغدا..
غاليه نزلت راسها: باباتي كان دايما يناديني غلايه..
خالد قام ومسك إيدها وقفها: دلوعتي بسج من التفكير.. عمي مافيه غير كل خير.. أنا ببدل ثيابي وبنزل، إسبقيني على غرفة الأكل..

على الليل غاليه وخالد طلعوا للمطعم وطلبوا العشا ويلسوا يتعشون بكل هدوء..
خالد: تدرين حبي.. ماودي نرجع البلاد..
غاليه: أنا عكسك ودي أرجع اليوم قبل باجر..
خالد بزعل: يعني الي فالبلاد إشتقتي لهم، وتبين تفارقيني بسرعه..
غاليه: ياعمري إنت بترجع وياي وبنعيش في بيت واحد كيف تقول نتفارق..
خالد: بس هني محد معانا بس أنا وإنتي..
غاليه: وهناك بعد.. خلودي للحين ماقلت لي وين بنسكن..
خالد: إنتي تبين تسكنين مع أهلي ولا بروحنا..؟؟ أنا بسويلج الي تبينه..
غاليه: على راحتك.. خواتك أحبهم وطيوبات وعمووه بعد فديتها وايد تعلقت بها..
خالد: يعني لو سكنا عندهم عادي..
غاليه وهي تمسك إيده: كل مكان معاك هو جنه.. جنة حبنا..
خالد يلس يطالعها وهو ساكت.. مرت بينهم لحظة صمت، كانت عيونهم هي الي تتكلم بكل حب وغرام..
(( خـــالد..!!!!))
خالد إستغرب منو الي تناديه وإلتفت وشاف وحده واقفه تأشر عليه وهي تضحك له، وهو يحاول يتذكرها..
غاليه: خالد منو هـذي..؟!!
خالد: مادري.. بس..... ماريا..!!!!!!!!!!!
وقف خالد وراح يسلم عالبنيه وغاليه مستغربه منو هالبنيه، وبعدها شاف وراها ريال وسلم عليه وهو يحظنه.. رجع لها خالد وهو يسحب الريال وراه..
خالد: غاليه تعالي بعرفج على عماد ربيعي من لبنان وماريا زوجته..
غاليه وقفت وسلمت عليهم..
خالد: عماد وماريا ربعي من أيام ادراسه.. حبوا بعض وتزوجوا وعاشوا هني.. وأنا خليتهم ورجعت الإمارات..
غاليه: هلا والله فيكم..
ماريا: وإحنا لهلا ماتعرفنا على هالغزال.. لاتقول زوجتك..!!
خالد: طبعا زوجتي ولا أنا من متى عندي حبيبه..
غاليه: اونك عاد.. ماعليج منه خبريني عن كل سوالفه..
عماد: ههههههه لاتخافي خالد إنسان محترم، طول عمره بدبر لنا المواعيد وهو بيفرح لفرحنا..
ماريا: يعني جايين فشهر عسل..؟؟
غاليه: هيه
ماريا: ألف ألف مبروووك.. تقبرني ياخالد تزوجت أخيرا..
خالد: شفتي عاد.. ودعنا العزوبيه..
عماد: الله يهنيك يارب.. بس ماشاءالله زوقك بيجنن..
خالد وهو يمسك غاليه من خصرها: يعني أعرف أختار..؟؟
ماريا: ولك أحلى إختيار..
غاليه بخجل: تسلمون عيونكم الحلوه..
خالد: عيل خلاص باجر غداكم عندنا..
عماد: مافي داعي تغلب حالك..
ماريا: لك شو مافي داعي.. بدي إتعرف على غاليه أكتر..
غاليه: حبيبتي والله.. أنا بعد أبا أتعرف عليج..
خالد: خلاص عيل البيت وتعرفونه، باجر ننتظركم عالغدا..

طلعوا خالد وغاليه من المطعم بعد ماودعوا ربع خالد.. غاليه كانت ساكته طول الطريج..وهي سرحانه وتفكر..
خالد: غاليه قلبي.. بسج من التفكير.. باجر الصبح أنا بدق على بيتكم وبكلم أبوج..
غاليه: الله كريم..

باليوم الثاني العصر.. قامت غاليه من الرقاد وهي تحس عظامها متكسره، دورت خالد ومالقته يمها..
دخل عليها خالد: مســاء الخير وردتي..
غاليه تبتسم وهي تمسح على شعرها: مســائك عسل..
خالد: وايد رقدتي.. من ظهروا عماد وماريا وإنتي راقده..
غاليه: حاسه بخمول وكسل..
خالد راح لها ولمها في صدره.. ويلس يمسح على شعرها وهي غمضت عينها وتنهدت بقوه..
خالد: قومي خلينا نظهر نتمشى إنتي شكلج ملانه..
غاليه: وين بنروح..؟؟
خالد: روما إشكبرها بنتمشى لنا في واحد من هالباركات..
غاليه: خلاص عيل خلنا نتجهز..
خالد: بعدج مكسله..!!
غاليه: يعني شوي..
خالد بنظره خبيثه: لو تبين بساعدج باللبس..
غاليه قامت عنه: طيح مكانك وإستريح..
خالد سحبها: تعالي إنتي تعبانه أنا بساعدج..
غاليه: ههههههه قوم عني.. مايخصك فيني أنا بلبس بروحي..
نقزت غاليه عنه وراحت للحمام..
خالد: ههههههه فديتها ياربي عسل..
وبعد نص ساعه طلعوا وقعدوا يتمشون فالبارك الي كان زحمه وكله إيطاليين.. غاليه كانت مستانسه بالجو الحلو بس بعد تحس بضيج وقلق..
خالد: حبيبي تبين عصير..؟؟
غاليه: هيه والله حاسه بعطش..
خالد: خلاص خلج هني وأنا بروح بييبه لج..
غاليه: لا بروح وياك..!!!!
خالد: إنتي يلسي على هذا الكرسي وأنا دقيقتين وراجع لج..
غاليه خافت بس سكتت وخلته يروح.. ويلست تتطالع الناس الرايحين والراجعين.. الي يحبون بعض والي متزاعلين، أشكال وأجناس من كل الأنواع..
غاليه حست خالد تأخر عليها قالها دقايق وبيرجع والحين كمل الربع ساعه.. حست بخوف شوي لأنه يعرفها ماتحب تقعد بروحها في مكان غريب..
إحساسها بالخوف بدا يكبر يوم مرت نص ساعه وخالد للحين مارجع، ياربي أكيد صار فيه شي.. مستحيل كل هذا يشتري لي عصير.. بدت دموعها تتجمع في عينها وهي مب عارفه شو تسوي، هني مب كلهم يتكلمون إنجليزي وتخاف تقوم من مكانها وتضيع، ولاخالد يرجع ومايلقاها..
خلاص غاليه بدت تصيح من شافت إنه بيكمل الساعه وهو بعده غايب عنها.. والناس يمشون ويطالعونها ولايعبرونها.. عنبوا محد فيه نخوه ومروه يسألها شوفيها، مروا عليها إثنين ريال وحرمته، ويلسوا يطالعونها..
سارا: راشد شوف هالبنيه تصيح.. شكلها عربيه..
راشد: روحي سأليها يمكن مضيعه الدرب ولاشي..
راحت البنيه لغاليه ويلست يمها عالكرسي..
سارا: عسى ماشر ياأختي.. ليش تصيحين..
غاليه إستانست يوم لقت حد تكلمه: الله يخليج ساعديني.. أنا بروحي هني وماعرف إيطالي..
سارا: هدي بالج أختي وقوليلي شو السالفه..!!
غاليه: ريلي راح إييب لي عصير وللحين ارجع، الحين بيكمل الساعه وهو للحين غايب عني..
سارا: راشد.. تعال شوي..
ياهم راشد ووقف يطالع زوجته..
سارا: البنيه تقول ريلها راح من ساعه تقريبا إييب لهم عصير وللحين مارجع..
راشد: من أي طريج راح..
أشرت له غاليه عالدرب الي راحه خالد.. راشد راح ووقف شوي مع الشرطي الي موجود فالمكان وهو بدوره إتصل في الفرقه وبدوا البحث عن خالد.. راشد رجع لغاليه..
راشد: أختي عندج صوره حقه..؟؟ علشان ندوره عدل..
غاليه طلعت من شنطتها البوك الي كان فيه عدة صور لخالد، عطته كل الصور علشان يعرفون شكله عدل..
راشد أخذ الصور وراح عنها، وتأخر البحث وخالد ماله أي أثر.. وغاليه كل شوي يزيد صياحها على ريلها الي إختفى فجأة..
بعد ساعه من البحث رجع لهم راشد وهو يركض..
راشد: أختي ريلج كان لابس جينز أزرق وقميص كحلي..
غاليه نقزت من مكانها: هيه.. لقيتوه.؟؟ وينه..!!
راشد: هدي بالج.. لقيناه طايح في السكة.. شكله حد ظربه وسرق كل الي معاه..
غاليه شهقت: وهو شخباره..؟؟
راشد: لاتخافين، الحين بييبونه وراي.. الحمدلله مب متعور..
سارا: ومنو معاه..؟؟
راشد: الشرطه شافته وصادف دكتور فالمكان.. والحمدلله هو بخير، والحين ياي وراي..
غاليه شافت خالد يمشي ووراه إثنين من الشرطه ساندينه.. غاليه ركضت عليه وحظنته وهو لمها بقو وكان شكله وايد تعبان..
غاليه: حبيبي شو صار عليك..؟؟ منو الي ضربك..!!
خالد: حبيبي خلينا نرجع البيت وبعدين أخبرج..
الشرطي رمس وخالد رد عليه بس غاليه مافهمت..
غاليه: شو يقول..؟؟
خالد: يبا يعرف لو بفتح بلاغ.. بس أنا ماشفت الي ضربني فالبلاغ مامنه فايده..
راحوا خالد وغاليه بعد ماشكروا راشد وسارا على موقفهم النبيل مع غاليه.. ورجعوا على البيت وطلعوا على طول على الغرفه..
غاليه: حبيبي إرقد عالسرير وأنا بغير لك ثيابك..
خالد بتعب: لا أستحي مابي..
غاليه: هههههههه والله إنك متفيج تنكت..
غاليه غيرت له ثيابه وراحت وبدلت ثيابها ويات وإنسدحت يمه وهو محطي راسه على صدرها وهي تعلب بشعره..
غاليه: الحين خبرني شو الي صار..!!
خالد: رحت أييب لج العصير.. ومن ظهرت من المحل حسيت بظربه على راسي من ورا ومن بعدها ظلمت الدنيا..
غاليه: بس إنت لقوك على بعد شارعين..
خالد: شكله سحبني.. ولد الحرام محفظتي فيها 2000 وبطاقة البنك لازم أسير وأقطعها لأنها فيزا كارد ويقدر يسحب منها..
غاليه: تفداك يالغالي.. المهم سلامتك..
خالد: الله يسلمج غناتي.. تعرفين مقهور من شو..؟؟
غاليه وهي تلمه بقو: شو ياروح غاليه..!!
خالد: سرق عني الجاكيت الي هديتيه حقي من يومين..
غاليه: عمري إنت.. بشتري لك غيره، يفداك ياقلب غاليه..
خالد: الحين إسكتي خليني أرقد.. أحس بتعب للحين..
غاليه سكتت وكملت لعب بشعره لين رقد ومن حست نفسه إنتظم فالرقاد مدت إيدها وبندت الأباجوره وهي حاظنتنه وكأنها خايفه إنه يضيع عنها مره ثانيه..

قام خالد من رقاده باليوم الثاني ولالقى غاليه، قال يمكن راحت تييب له الريوق.. بس يوم إطالع الساعه لقاها 11 ونص.. وغاليه مب متعوده تتأخر فالرقاد، لأنها أكيد تبا تحوط..
قام من السرير وراح الصاله الي فوق وشاف حرمته راقد على الكنبه والتلفزيون شغال.. راح لها ولقاها مغمضه عيونها، مسكها من إيدها ففتحت عينها..
غاليه بتعب: خالد..!! متى صحيت..؟؟
خالد: قبل شوي.. شوفيج..؟؟
غاليه: ولا شي.. قولي شخبارك الحين..؟؟
خالد: انا الحمدلله أحسن.. إنتي شو فيج..؟؟ شكلج تعبانه..!!
غاليه: لا بس شوية إرهاق..
خالد حط إيده على جبهتها: قوليلي شو يعورج..؟؟
غاليه: أحس جسمي متكسر.. وصدري يعورني..
خالد: وليش ماصحيتيني أوديج المستشفى..؟؟
غاليه: ماله داعي، شوي وبستوي زينه.. وبعدين إنت بروحك تعبان..
خالد: خلي عنج هالدلع.. قومي بدلي ثيابج وخليني أوديج..
غاليه ماقدرت ترفض لأنها كانت صج وايد تعبانه.. فقامت وراه ولبست عبايتها المسكره لأنها ماقدرت تبدل.. ووداها خالد العياده الجريبه من بيتهم..
وفي العياده خالد شرح للدكتور حالة غاليه، والدكتور سوا لها فحوصات وحطى لها المغذي وقاله لازم تبقى عالأقل نص يوم عندهم لأنها تعبانه..
خالد راح لغاليه لقاها مغمضه عيونها، باسها على راسها ويلس يقرا عليها قرآن، خالد صوته وايد حلو في القراءه.. لدرجة إنه النيرس وقفت تسمعه مع إنها مافهمت ولاكلمه..
غاليه فتحت عينها ولقت خالد يالس يقرأ قرآن وهو منزل راسه، مدت إيدها ومسكت يده الي كان محطنها عالسرير.. خالد على طول ختم الآيه وحط القرآن على الطاوله ومسك إيدها وياها..
خالد: عمري إنتي.. شخبارج الحين..!!
غاليه تبتسم له: أنا بخير لاتخاف علي.. إنت شخبارك..؟؟
خالد: لاتتكلمين.. خلج مرتاحه..!!
غاليه وهي تضحك عليه: عادي بتتعود على طيحاتي.. كل شهر أطيح مره أو مرتين..
خالد وهو يمسح على خشمها: بس إنتي هالمره طحتي بسبتي..
غاليه: لافديتك.. أنا من يومين كنت حاسه بتعب، بس ماقلت لك.. وأمس من الي صار أحس زاد علي التعب..
خالد: عمري ليش ماقلتي لي..!! حبي إوعديني آخر مره تخبين علي شي..!!
غاليه وهي تغمض عيونها: أوعدك حبيبي..
خالد: خلاص خلج مغمضه شوي وإرتاحي..
غاليه سكتت وحست نفسها تبا ترقد، وخالد رجع على كرسيه وريح راسه على ورا..
غاليه: خــــالد..!!
خالد نقز من كرسيه: آمريني..
غاليه وهي للحين مغمضه عينها: طلبــــتك..!!
خالد بدون تفكير: تم.. طلبي الي تبينه، والله لو تبيني أفر نفسي من الدريشه فدوه لعيونج..
غاليه: ههههههه مادري لو سويتها، بيقولون طفر منها من أول شهر.. ولا بيقولون مات في سبيل حبها..!!!
خالد: يقولون الي يقولونه.. المهم عندي أوامرج تتنفذ.. قولي ياقلبي شو تبين..؟؟
غاليه فتحت عينها وشافته: أبا أرجع الإمارات..
خالد يلس ساكت ولاتكلم وهو يطالعها بنظرة تساؤل.. غاليه حست فيه وبشعوره..
غاليه: أدري بتضايج بس.. بس أنا قلبي يقولي أبويه فيه شي..
خالد: حبيبتي لاتحاتين أبوج مافيه إلا العافيه.. ونحن بعد يومين بنسير فينيسيا و.....
غاليه: خالد أنا طلبتك وإنت تممت لي.. الله يخليك لاتردني..
خالد وهو يتنهد: أنا مستعد أفر روحي من الدريشه ماتبيني أردج البلاد.. خلاص ياقلبي باجر بسير وبحجز لنا التذاكر..
غاليه رجعت تغمض عيونها وهي مرتاحه.. هي صح بتخرب عليه شهر العسل.. بس عالأقل تتطمن على أبوها لأن قلبها ماكلنها عليه..






في الإمارات..
أبوغاليه الي بعده فالمستشفى لأن ضغطه مب مستقر طلب إنه يكلم بنته غاليه لو خمس دقايق علشان يطمنها، ولاتيلس تحاتيه وهي فالغربه....
غاليه: هلا بروح غاليه.. حبيبي والله إشتقت لك..!!
أبوغاليه: ماظنتي خالد خلا حقي مكان للغلا بداخلج..
غاليه: والله والله محد يسواك عندي، والله كنت خايفه عليك لأني من يومين ماسمعت صوتك..
أبوغاليه: وهذا أنا أكلمج مثل الغزال..
غاليه: فديتك والله.. الله يعطيك الصحه والعافيه..
أبوغاليه ويخليج لي ياربي..

سكرت غاليه عن أبوها وهي للحين تحسهم مخبين عليها شي، علشان جي مايابت طاري لخالد إنها كلمتهم.. لأنها تبا ترجع البلاد علشان تتطمن على أبوها ويرتاح قلبها..
دخل عليها خالد: ها حبيبي شو تسوين..!!
غاليه: ولا شي.. كلمت ماماتي
خالد: وشخبارها وعمي شخباره..؟؟
غاليه: الحمدلله تقولي كل شي تمام..
خالد: وإنتي للحين خايفه..؟؟
غاليه: بصراحه هيه..
خالد: خلاص فديتج أنا سرت وحجزت التذاكر.. بالخميس إن شاءالله إنتي في حظن أبوج..
غاليه: بعيد الخميس.. مالقيت يوم أقرب..؟؟
خالد وهو يقوم عنها: لو أدري تبين فراقي بسرعه كنت دورت في طيران ثاني.. بس سامحيني تحريت نفسي غالي عليج..
غاليه عورها قلبها عليه، فقامت له وهو كان ماسك الفوطه يبا يدخل الحمام.. حاولت تسحب الفوطه بس هو كان ماسكنها بقوه..
غاليه: خالد أنا............
خالد بدون نفس: أنا بدخل أسبح لأني من الصبح أحوط، بليز مابي إزعاج..
غاليه يلست مضايجه هي ليش سوت جي، يعني صح إنها تحاتي أبوها.. بس بعد هذا زوجها ومن حقه يكمل شهر العسل..
نزلت غاليه تحت عند الخدامه لقتها مسويه حلويات وكبتشينو خذته وودته الغرفه.. لقت خالد منسدح عالسرير ويلعب في موبايله..
غاليه: يبت لك الكيك والكبتشينو..!!
خالد: ...................
غاليه راحت وعطته وأخذه منها بدون لايرد عليها.. غاليه تضايجت لأنها زعلته.. هو من حقه يزعل لأنها بتخرب شهر العسل عليهم.. هالأيام عمرها ماراح ترجع حتى لو كل سنه سافروا إيطاليا.. هالأيام لها حلاوتها الخاصه..
غاليه: دفعت ثمن التذاكر..؟؟
خالد: مستعيله..؟؟ لا باجر بدفع.. و..........
غاليه: لاتدفع.. لأني مابي أرجع..
خالد وهو مستغرب: ليش..!!
غاليه بخوف: لأني اليوم كلمت أبوي وقالي إنه بخير.. بس أنا قلبي للحين خايف.. علشان جي ماقلت لك..
خالد يلس يطالعها، حلو شكلها وهي حاسه بالذنب كأنها بيبي سوت شي غلط وخايفه من عقاب أمها..
خالد: وصح الي سويتيه..!! إنج تجذبين علي..؟؟
غاليه نزلت راسها: لا.. بس والله أنا...........
خالد: الجذب ماله مبرر.. غاليه أنا أفديج بروحي لو تبين، ومايهمني لو نرد البلاد اليوم.. كل مكان معاج هو أحلى شهر عسل.. بس الله يخليج مره ثانيه خلي الصدق والحب هو منهاج حياتنا.. مب الجذب واللف والدوران..
غاليه بدت تصيح وهي حاسه بضيج وذنب وقهر من الي صار..
غاليه: معاك حق، أنا مب ياهل علشان أسوي جي.. وأنا آسفه..
خالد لمها في حظنه: لاتتأسفين.. إنتي ماغلطتي من حقج تتطمنين على أبوج..
غاليه: خلاص خلنا نكمل الشهر وبعدين يصير خير..
خالد: لاحبيبتي بنرجع الخميس، كفايه أحلى ثلاث أسابيع مرت علينا هني.. وأوعدج من نرجع وتتطمنين على أبوج باخذج ونسيرنيلس في بوظبي أسبوعين نكمل شهر العسل..
غاليه وهي تمسح دموعها: يعني مب زعلان من دلوعتك..!!
خالد: أنا الي لازم أسألج مب زعلانه علي..؟؟ لأني أكبر نذل يوم زعلت القمر وصيحته..
غاليه: لا حبيبي إنت مازعلتني.. خالد أنا أحبك..
خالد بفرح: يابعد عمري وأنا أمووووووت عليج.. والحين خلينا نقضي أحلى يومين باقيين لنا فبلاد الحب والرومانسيه..

مروا اليومين الباقيين عليهم مثل البرق، وخلص شهر العسل وحان موعد الرجوع للأهل والبلاد.. إماراتي الحبيبه..
غاليه رتبت أغراضها وأغراض خالد والخدامه نزلتهم تحت.. وكانت باليوم الي قبله رايحه الصالون وقاصه شعرها لأنه من إنخطبت خلته يطول شوي، للجتف مب وايد.. وخلتهم يقصون لها قصه حلوه وكانت تبي تصبغه، بس خالد حلف عليها ماتسويها لأنه يحب شعرها الأسود، وقالها مع الأيام بخليج تصبغينه..
ركبوا الطياره وكانوا حاجزين مقاعد جنب الدريشه، ويلسوا يتظاربون عالكرسي مثل اليهال.. وغاليه طبعا الي فازت..
خالد: تدرين الحين حسيت بالشوق لأمي وأبوي وإخواتي..
غاليه: وأنا بعد أحس بموووت على شوفة هلي..
خالد بحنان: بسم الله عليج من هالطاري.. أقولج تراني وايد أحبج..
غاليه وهي تلعب بأزرار قميصه: حبي بس من هالحركات، نحن فالطياره وإنت تعرف شو نهاية هالسوالف..
خالد: هههههههههههه عادي بعدنا فجو إيطاليا يعني حرية شخصيه..
غاليه: لا بليز مب لهالدرجه..
خالد: ههههههههههه
غاليه: حبي شوف منو الي ركبوا الحين..!! راشد وسارا..
خالد وهو يفكر: منو راشد وسارا..؟!!
غاليه: ماتذكرهم..!! الي ساعدوني يوم ضعت عني فالبارك..
خالد وهو يتذكر: هيه صح.. عاد إنتي لاتقولين ضعت.. الي يسمعج يقول ولدج الصغير..
غاليه: ههههههههه إنزين بقول يوم ضربوك وسرقوك..
خالد: يكون جحلتيها يعني..
غاليه: هههههههههههههههههههههههههه
راشد: السلام عليكم.. شخباركم عساكم بخير..!!
خالد يقوم يسلم عليه: هلا والله.. الحمدلله بخير، إنتوا إشحالكم.. إسمحولي هذاك اليوم ماشكرتكم على الي سويتوه معانا..
سارا: أفا عليك كلنا عيال بلد وحده..
غاليه: تسلمين حبيبتي.. وإنتوا بعد يايين في شهر عسل مثلنا..؟؟
راشد: أي شهر عسل.. نحن معرسين من أربع سنين.. الحين بيمرون عليكم قردين، إعرفوا إنهم عيالنا.. عزوز عواس تعالوا..
خالد: هههههههه الله يخليهم لكم إن شاءالله..
غاليه: وين كراسيكم..؟؟
راشد: هني بالنص.. مافينا يفرون عمارهم من الطياره.. ولو إنها بتكون فكره حلوه يعني..
سارا ظربته: بسم الله على عيالي..
راشد: ههههههه يالله انشوفكم بعدين.. الرحله طويله ولو شفتوا عيالي الله يخليكم رجعوهم لنا..
غاليه: ههههههههه إن شاءالله..
راحوا راشد وسارا لأماكنهم وطارت الطياره، وطول الرحله الي كانت هاديه إلا من أصوات عزوز وعواس، غاليه تسولف مع سارا ويتعرفون وخذوا أرقام بعض، ونفس الشي خالد وراشد الي صاروا ربع..
وصلت الطياره مطار دبي الساعه عشر ونص، ونزلوا الركاب كلهم.. وخالد وغاليه ودعوا ربعهم اليداد وطلعوا من المطار..
كانوا مسويين للكل مفاجأة وماخبروهم عن رجوعهم اليوم، وخالد كان عاطي ربيعه خبر علشان إييب لهم سيارته للمطار.. وبعد نص ساعه تقريبا وصلوا لبيت بوغاليه.. لأن غاليه من كثر خوفها على أبوها خلت خالد على طول إيوديها لبيت أبوها..
دخلت غاليه البيت وهي تحس نفسها بتموت من الشوق للبيت الي عاشت فيه أحى سنين عمرها من الطفوله للمراهقه ولحد ماتزوجت خالد وطلعت عنهم...
غاليه: البيت فاضي وينهم..!! بابا.... ماما وينكم..؟؟؟؟
خالد: يمكن طالعين..؟؟
غاليه: لا بابا مايحب طلعات الليل..
خالد: شو دراج.. إفتكوا منج والحين بيجددون شبابهم..
غاليه عطته نظره ونطت على المطبخ وهو وراها، شافت الخدامات يالسات يسولفن ومن شافوها قامن يسلمون عليها..
ليندا: ولكم غاليه..
ميري: كيف هالك غاليه..
غاليه: الحمدلله شخباركم إنتوا..؟؟ وين بابا وماما..
ليندا: بابا واااايد مريض في داخل مستشفى..
غاليه من سمعت الخبر صرخت بكل قوتها ومسكها خالد قبل لاتطيح.. غاليه ماحست بأي شي ولاعرفت شو تقول، بس فهالحظه حست إنها فقدت أبوها للأبد..







أنتظر آراؤكم بفارغ الصبر..

وإن شاءالله تعيبكم البارت..

وعلى فكره البارت الياي آخر بارت..

والسمــــــــوحه عالقصــــــــــور..:


(غرشوب البدو)