البوح الخامس والعشرون .~
سلطان .~
بعد ما طلعت الدكتورة . . ردت وهيه بيدها ماي . . رشت شوية على مها . . اللي بدت تصحصح
الدكتورة: شحالج احينه ؟
مها [ هزت راسي يعني بخير ]
الدكتورة: ما تبين ترجعين البلاد ؟
مها: أبي . . اشتقت لهم وايد . .
الدكتورة: حق منو ؟
مها: ماما وبابا . . وخواني
الدكتورة: منو من خوانج أكثر شيء ؟
مها: كلهم . . مايد . . راشد . . ميراني .. حتى سلطان
الدكتورة: [ تبتسم ] الله يخليج لهم . . [ تطالعني ] خلاص هذي أخر جلسة .. .
أنا: مشكورة دكتورة . . مشكورة والله
الدكتورة: واجبي هذا . .
سلمت مها على الدكتورة . . وطلعنا . . سرت دفعت فلوس الجلسة ورديت لها
حضنتها بيدي: فدييتج حبيبي
مها [ تبتسم وتطالع جدام ] : تعبتكم
بدينا نمشي : لا بالعكس . . حستيني نفس أبوج .. وانج بنتي . . ما تنامين إلا بحضني
مها [ بإحراج ]: تعبتك معاي
أنا: مهووي . . إنتي حبيبي أختي الغالية لا تقولين هالكلام
مها: ما إشتقت لسمية ؟
أنا : أه . . إلا إشتقت وإشتقت . . [ أطالع فوني من الجاكيت ] برويج شيء . .
مها: أوكي . .
دورت صورة نوير . . ورويتها
مها : حييييييييييييييييياااااااااتي والله . . شو سميتوها ؟
أنا: نوير . . تصغير إسم الوالدة
مها: يا عيني . . شحالها سمية ؟
أنا: الحمدلله . . [ ابتسم واشل الفون من عندها ] شرايج نغلس عليها شوية
مها [ تضحك ]: حرام عليك . .
دقيت على طول للإمارات . . حق سمية
ترييت دقايق . . وياني صوتها النعسان
سمية: ألوووه
أنا: فدييت هالصوت والله
مها [ تطالعني ]: نحن هنا . . !
حركت شفايفي [ جب ] . .
أنا: شحالج حبيبي ؟
سمية : بخير . . [ بصوت تعبان ] إشتقت لك والله
أنا: وأنا بعد . . شحالها نواري ؟
سمية: زينة . . شلتها أميه
[ عقدت حياتي ] : ليش ؟
سمية: كانت تصيح . . وأنا تعبانة أبي أنام . . ما تخليني أنام
أنا: اها . . ما عليه حبيبي .. هذي ياهل شدراها . . باجر بتكبر وبتفهم
سمية: زين . . بس أنا ما عرف لها . . كله أخليها عند ماما
أنا: زين وعموه بتعرف لها .. وبتعلمج . . تعلمي منها . . ترا يوم برجع بشلكم بيتنا . . مو عقب تقولين ما أعرف لها . . ما أعرف لها . . أوكي
سمية: زين . . شحالها مها
أنا [ أطالع مها ] : بخير الحمدلله . . ترا يمكن نعجل الرده للبلاد
سمية : صارت زينة ؟
أنا: هيه . . صارت زينة . . وايد زينة
سمية: الحمدلله سلم عليها . . [ بتعب ] يلا حبيبي بنام . .
أنا: زين نامي عدل . . وتغطي عدل أوكي
سمية: إن شاء الله . .
أنا: مع السلامة
وسكرت عنها . . إطالعت مها
أنا: تسلم عليج
مها: الله يسلمها . . سلطان ديمووه متى بتسوي عمليتها ؟
أنا: أظني قريب . . بس يسوون لها تحاليل وهالسوالف
مها: أها . . [ ترد تحضن إيدي بإيدها ] أحبك أخوويه
حضنتها . . وبست راسها : وأنا بعد . . يلا خل نرد
مها: أوكي . .
عذبة .~
بعد ما شفت عليا نامت . . قلت أروح أكلم ذياب . . طلعت بالصالة وسكرت على عليا الباب
دقيت على رقمه ع أساس أتاكد لو موجود ولا لا ؟!
ذياب: ألووه . .
أنا: هلا
ذياب: عذبة !
أنا: هيه . .
ذياب: أمري عذبة . . محتايين شيء ؟
أنا: لا سلامتك . . بس . . [ سكتت ]
ذياب : بس شو ؟! تكلمي . . خذي راحتج
أنا: ذياب أنا دريت أنك خطبتني . .
ذياب: إنزين . .
أنا : [ سكتت شوية وعقب قلت ]: شوف أنا عندي كلام أبي أقوله بس هو شوي خاص
ذياب: يعني هالكلام ما ينقال بالفون . . ؟
أنا: تقريباً . . لانه عليا موجوده وما أبيها تعرف
ذياب: أوكي . . شرايج نقعد تحت ؟
أنا: أنت فاضي ؟
ذياب: هيه فاضي . . وأنا بعد عندي كلام أبيج تسمعينه
أنا: خلاص أنا بعد شوية بطلع . . بس بلبس عباتي
ذياب: خلاص أنتظرج ..
رحت بسرعة لبست عباتي . .وتأكدت من عليا انها نايمةة . . شليت فوني وطلعت
جفته واقف ينتظرني .. لابس تيشرت رمادي وجينز . .
هالريال أبداً ما شفته بكندورة !!
ابتسمت له وسكرت الباب . .
ذياب : يلا
نزلنا تحت . . ولقينا طاولة على طرف فاضية وقعدنا فيها . . تقريباً المكان شبه فاضي
ذياب: تكلمي أسمعج ؟
أنا: أممم . . أنت قلت عندك كلام . . قول أنت قبل
ذياب [ يبتسم ] : أنت طلبتيني قبل !! يلا قولي
أنا: الي بقوله شوية خاص . .وو
ذياب: لا تستحين . . [ يبتسم عشان يطمني ] صدقيني بسمعج . . ولو هو سر وما تبين حد يعرفه ما بتكلم
أنا: أنا حالياً ما أبي حد يعرفه بس عقب عادي . .
ذياب: يلا قولي
أنا: قبل كم سنة . . كنا بالعزبة مالتنا . . تعرف رواض أختي تحب الخيول . .
ذياب: صح . . أذكرها
أنا: في هذا اليوم . . كنت ابي أركب الخيل . . وروضة كانت بتركبني معاها . . بس ريموه أختي زقرتها تلعب معاها . . فركبته روحي . . مشيت فيه شوية . . بس عقب ما عرفت لها . . فتم يسرع فيها لين ما فرني من عليه
ذياب [ يطالعني بصدمة ]: زين !!
أنا: الكل التم حولي . . ودوني المستشفى . . بس الحمدلله ماشي كسور ولا شيء
ذياب: الحمدلله . . زين وبعدين !
أنا: بعدين . . عقب يومين . . كان عندي موعد مرة ثانية عشان نستلم التقارير . . والنتايج الثانية . . يعني بيشوفوا لو الطيحة سببت شيء ثاني . . في هاليوم أميه كانت مريضة . . فرحت بروحي مع الخدامه والدريول . . [ أطالعه ] الطيحه سببت لي عقم
ذياب: [ إطالعني بصدمة ] شوو !
أنا: هيه . . [ أدمع ] عقم .. يعني ما بقدر أييب عيال . . ذياب أنا ما أبي أظلمك وياي
ذياب: لا يا عذبة لا تقولي هالكلام . . [ يطالعني ] عذبة بقولج قصة صارت لي من زمان . .
أنا: قول . .
ذياب [ يمد لي كلينكس ] : هاج مسحي دموعج . .
مسحتهم . . وهو بدا يسرد لي قصته . .
ذياب: في يوم من الأيام . . كنا بعدنا صغار . . أرجوان أختي كانت عنيده . . تعاند الكل . . عاندتني وقررت تطلع تلعب بالشارع [ يبتسم ] جي مزاج على قولتها . . تخيلي المنظر الي شفته . . هيه بنص الشارع . . سيارة مسرعة ياية بصوبها . . شو تتوقعين بسوي !!
شهقت : أوييه . . شو سويت !
ذياب: ركضت صوبها . . ودزيتها وخليت السيارة تدعمني . .
أنا: أويه .. شو صار فيك ؟ تعورت !
ذياب: مب وايد . . خدوش بسيطه . . بس تعرفين شو الي صار بعد ؟
أنا: شووه !
ذياب: نفسج . . [ يبتسم بحسرة ] عقيم
انصدمت . . ما توقعت . . يا قلبي .. والله ما يستاهل بسبب تهور اخته استوى جي
ذياب: بسبب تهور أختي صرت جي . .
أنا: ذياب . .
ذياب: عذبة . . من نرجع بنملج . . وبأخذج . .ترا زواجنا عمره ما رح يكون ظلم
أبتسمت له . .
ذياب: يلا خل نرجع .. يمكن أختج تدورج !
أنا: أوكي . .

غاية .~
قاعدة بالغرفة مع مايد . . للحينة تفكيري بس بالي كانت يعرفها مايد قبلي . .
يا ترى من بتكوون ؟! معقولة تكون وحده أجنبية ؟!
هيه ليش لا . . معقولة ونص . .
مايد [ تدزني ] : وين سرحانة . .
طالعته بنظرة بدون أي معنى
مايد : بسم الله بلاج ؟
تنهدت وصديت الجهه الثانية : ماشي
مايد: صدق صدق بلاج ؟
ييت برد . . بطلع كل الي بقلبي . . بصارخ . . بعلن تمردي لأول مرة . . بس قطع علي دقات الباب . .
مايد: بشوف منو . . !
راح صوب الباب ودقيقة ورد وهو حالته حالة
مايد: سيري بسرعة لين ديمة . . عمي سعيد يقول ما يعرف بلاها تصارخ وتصيح وطايحه على الأرض
أنا: شوو !!
مايد: بسرعة يلا
سحبت شيلة من التعليقة ورحت ألبسها . . وسيدة لين ديم
دخلت غرفتهم . . شفتها طايحه على الأرض وتصيح بصورة هستيرية . . وشعرها متناثر على ويهها
حضنتها بالقو . . وأنا أهديها
أنا: ديموووه حبيبي إهدي شو فيج ؟
ديمة: [ تهز رأسها تبي تتكلم بس طريقة صياحها مب عاطنها فرصة تقول شيء ]
أنا: إهدي شوية . . خذي نفس . . يلا تنفسي
تمت شوية . . وعقب قالت
ديمة: كنت أبي أقوم بروحي . . ما أبي سعيد يتعب معاي . . بس في طاولة ما كانت موجوده أمس . . ما أعرف متى يات . . أنا متاكده أمس مب موجوده [ تأشر عالطاولة ] عقب دعمتها وطحت على راسي . . ضرب راسي اليدار . . عقب يووم يا سعيد . . تميت أصيح . . لأنه . . [ سكتت ]
أنا: لأنه شوو . .
ديمة [ تمد إيدها وتحطها على ويههي ] : لاني قمت أشووف . . الطيحة الي طحتها ردت لي نظري . .
إطالعتها بصدمه . . صح صح . . توها أشرت لي على الطاولة . . شقايل ما إنتبهت !
أنا [ بفرحه ]: فديييييييييييييتج والله . . خوفيتنا على الفاضي . . [ أقوم ] بسير أبشر عمي سعيد . .
ديمة [ تبتسم ]: صحت . . لأنه أول ما رديت أشوف شفته . . وأنا اللي ما شفته يوم عرسنا ! والله شكله متغير . . حالق لحيته . . شكله غير غير . .
أنا: هيه تراه معرس . . [ أغمز لها ] والله بيستانس لج . . وبفرح . .
ديمة [ تقوم ] : سيري خبريه [ مسكتت ايدي ] ولا أقولج . . خليه أيي أنا بخبره
أنا: إن شاء الله . . يلا بروح . .
بستها على خدها . . شكثر مستانسة لها والله
طلعت برع والابتسامة بعدها مرسومة على خدي . .
عمي سعيد: هاه شو فيها ؟
أنا: كل خير . . إدخل لها . . ما فيها الا العافية
عمي سعيد: متأكده ؟
أنا: لو تشك بشيء دش وتأكد . .
عمي سعيد دخل غرفته . . وعقب جفت مايد ..
مايد: شو السالفة ؟
انا: ماشي . . عقب بتعرف . .[ مشيت للغرفة ]
قعدت على السرير وجفت مايد ياي وراي . .
مايد: أبي أعرف شو سالفتج إنتي ؟ ترا مب هذي غاية الي أعرفها !
أنا: يعني ممنوع نتغير !
مايد: لو للأحسن بنطوف . . بس الصراحه أنتي صايرة بارده . . وإطنشيني . . وكله سرحانه . . [ بصوت عالي ] لو ما تبيني قولي .؟
أنا: هيه عشان ترد لها صح !!!
مايد [ بصدمة ]: أرد لمنو !
أنا: للي تحبها قبلي . . للي تتمشى وياها قبل لا تتزوجني . . للي كنت تروح معاها السوق وتتشرى لها . . للي تعرفها ذيج الحرمة العيوز ..
مايد [ بجمود ] : غاية !!
أنا [ بديت أضيع . . ما أعرف شو أسوي ] . . ما أقدر أتخيل مايد زوجي . . اللي حسيت بالأمان معاه . . اللي أحسه عوضني عن حنان أبويه . . بيروح مني . . بيتركني . . ما أقدر . .
مايد [ يحضني ] . .: غاية إهدي . .
هذا مايد . . بلحضة يحضني ويذوب كوم الثلج اللي تراكمت على ظهري . . يذوب كومة الهم اللي تناثرت علي . .
أنا [ أدز صدره ] : خلني !
مايد: لا !! . . مابي
أنا: بلا تبي . . خلني . . [ أضربه ] أنت ما تحبني ما تحبني . .
مايد [ ودر حضني وراح بعيد ]: صح أنا ما أحبج . .
هييه هذا اللي كنت خايفة منه . . هذا !!!

بس رد يقولي : أنا أموت في حبج . .
بدور .~
قاعده مع بدوري الصغيرة نحل الواجب . .
بدور الصغيرة: ماماه اليوم الأبلة عطتني هدية مصاصة . .
أنا: عشانج شاطره حبيبي
بدور الصغيرة: صح . . اليوم جاوبت صح . .
أنا: دوم ذاكري عدل وبتجاوبي صح . .
بدور الصغيرة: وبحصل هدايا وايد
خالد [ ايي ويقعد معانا وبحضنه سلطان ]: وأنا بعد بييب لج هدية عووودة
بدور الصغيرة [ بفرحه ] : صدق !
خالد: هيه . . صدق . . اليوم بنروح الألعاب
أنا: خالد ما كلمك أحمد ؟
خالد [ عاقد حياته ] : ليش ؟
أنا: قرروا يسوون حفلة عرسهم . .
خالد: أها . . الله يوفقهم إن شاء الله . . يستاهل أحمد
أنا: هيه .. ترا أحمد بيكمل دراسته في لندن وبيشلها معاه . .
خالد [ يبتسم ]: وإنتي ما تبين تكملين دراستج ؟
انا: لا . . بربي عيالي . .
سلطان يحاول يشل عقال خالد بس ما قادر يوصل له
أنا: خلود عطه العقال . .
خالد [ يبتسم ]: بعطيه . . [ فصخ غترته والعقال وفرهم على الغنفه ] . .
سلطان شل العقال بفرحه . .
خالد: باجر بروح أفصل له كنادير يديده يلبسهم . .
أنا: عيل شرايك اليوم بما أنك وعدت بدوري بالألعاب . . بالمرة بنروح نشتري لهم ملابس أحس يبالهم ثياب يديده
خالد: إن شاء الله . . بدور أنا أبا أرد أشتغل مع أبويه بالشركة شرايج ؟
أنا: شور زين . . وبعدين الشركة شركتكم . . إذا ما عاونتوا أبوكم من يعاونه . .
خالد: صح . . أصلاً ذياب يوم بيتخرج بيتوضف بالشركة بعد
أنا: الله يوفقكم يارب . .
خالد [ يدغدغ سلطان ] : شو تبا بالعقااال هاااه
سلطان يضحك . .
أنا: خلوود مب زين جي تضحكه . . والله
خالد [ يودر سلطان ] : جم باجي لج عن تولدين ؟
أنا [ ابتسم ]: إن شاء الله 6 شهور ولا أقل بشوي
خالد: الله يقومج بالسلامة ..
أنا: خالد البنت بسميها منى . .
خالد [ يبتسم ]: أصيلة والله
جوري .~
طلعت من غرفتي بعد ما خلصت من الرمسة مع عبدالله . . هالإنسان أزعجني الا يبي يخطبني احينه !!
جفت أرجوان طالعة من غرفتها وبيدها سلطان نايم . .
أنا: فديته نام ؟
أرجوان: هيه نام . . جوري أبيج شوي ممكن !
أنا: هيه ممكن . .
أرجوان : جنان ما يات ؟
أنا: بلا هيه موجوده تحت . .
أرجوان: عيل تعالي غرفتي . . عندي لج كم كلمة
رحت وراها وانا مب عارفة شو السالفة !
أرجوان [ تحط سلطان بسريره ] : إقعدي
قعدت وهيه يات وقعدت يمي . .
أنا: شو السالفة ؟
أرجوان: مساعة ييت غرفتج وجفتج تتكلمين بالفون . .
بلعت ريجي [ هذا اللي ما كنت حاسبة حسابه ] : زين
أرجوان: من كنتي تكلمين !
أنا: ربيعتي
أرجوان: وربيعتج بتقولين لها أحبك . .ومابيك تخطبني احينه !
أنا: نانا هذا عبدالله ولد عمي سعيد . .
أرجوان: متاكده [ تطالعني بشك ]
أنا: هيه وهو يبي يخطبني بس أنا أبا أأجل الموضوع
أرجوان: لو تبين تكلمينه براحتج خل يخطبج . . على الأقل الكل بيعرف . . اليوم أنا سمعتج .. الله يعلم منو باجر .. ترا صح أخوانج مخلينكم تقعدون مع بعض . . وتروحين وتردين معاه . . بس كل شيء وله حدود
أنا: زين . .
أرجوان: خل يكلم أبويه . . على الأقل يعرف انج بخاطره
أنا: أوكي . . [ أقوم ] عن إذنج
طلعت من غرفتها ونزلت تحت . . جفت حمدان وعبدالله قاعدين مع أبويه وعلى طرف جنان قاعده ترسم . .
سلمت عليهم وعقب رحت صوب جنان . .
أنا: ما شاء الله . . من زمان ما رسمتي
جنان: صح . . ولهت على الرسم [ تطالعني ] روحي قعدي بعيد عني يلا
انا: حاضر . .
رحت قعدت يم أبويه . .
أبويه: شحال دراستج ؟
أنا: الحمدلله . .
أبويه: ممشية الحال ؟
أنا: أكيد ..
حمدان: وينها أرجوان ؟
أنا: سلطاني ولدها نايم وهيه معاه
حمدان: أها . . [ يطالع أبويه ] أبويه ترا سهيل متصل فيني كم مرة وما شفته . . ما أدري شو عنده ؟
أنا: تلاقيه وله عليك . . لاصقين ببعض دووم
حمدان [ يطالعني ] : تغارين !!
أنا: يقولون . . [ أطالع عبدالله وعقب رديت أقوم ] أنا بروح غرفتي . .
حمدان: شوفي حسين بغرفته ولا لا !!
ابويه: حسين في مزرعة عمه . .
رحت غرفتي . . صح . . حسين شو عنده مطيح في مزرعة عمي !!
عبدالله .~
اليوم طنشتها عقب كلامها . . أونه لا تخطبني . . أدري توها إطالعتني . .
بس ما عبرتها . . خل تتأدب . . شوية . .
عمي سلطان: ما كلمت أبوك ؟
أنا: بلا كلمته مساعه . .
عمي سلطان: شحالهم بخير ؟
أنا: الحمدلله بخير . . وسلموا عليكم
إنتبهنا كلنا على سهيل اللي دخل . . وكانت حالته حالها
عمي سلطان : شو فيك يا سهيل ؟
سهيل: عمي اليوم أبويه عطاك عمره . .
عمي سلطان [ يوقف ] : كيف ؟
سهيل: اليوم وهو طالع من المحكمة . . دعمته سيارة . .
أم سهيل [ من ورا ]: شوو !!
سهيل [ يطالع أمه ويرفع أوراق بيده ] : اليوم رايح المحكمة مسجل البيت باسمج .. وهو طالع دعمته سيارة وتوفى . . [ يمسح دموعه ] توني ياي من المستشفى
أم سهيل: كييف !!
.

البوح السادس والعشرون .~
بعد مروور قرابة خمس سنوات . .
أرجوان .~
واقفة جدام منظرة الحمام [ عزكم الله ] وسرحانه . .
الوضع اللي أنا فيه . . يخليني جد أسرح . . !!
منصو ر [ يدق الباب ]: أرجواااااان يلا تأخرتي !! ورانا حفلة بنجهز لها !!
صح . . المفروض نحن مسوين عزيمة حق يوم ميلاد سلطان . . اللي كمل خمس سنوات اليوم !!
يالله كيف الوقت يطوف بسرعه . . ما كأنه أمس مولود . . !!
منصور [ يدق الباب ]: أرجوااااااااااان . .
صح مصختها . . لازم أطلع . . طلعت من الحمام وجفت منصور واقف ومساند ظهره على اليدار ومجتف ايده . . !!
منصور: توه الناس ..
تحركت وتقربت منه: وين سلطان ؟
منصور: في غرفته ويا أخته روضة . .
[ روضة بنتي عمرها تقريباً . . 3 سنوات ]
منصور [ يحضني ] :بلاج ؟
أنا [ أدزه ] : منصور . . خلني روحي مب طايقة عمري . . !
منصور [ يطالعني بنص عين ]: ليش شفيج ؟!
أنا [ أرفع له تحليل الحمل ] . .
منصور [ يبتسم ]: وهذا الشي يخليج مب طايقه عمرج !!
أنا: إيه . . ماني متخيلة اني ببدأ الوحام . . وبتلوع جبدي . . !!
منصور[ يبتسم ]
أنا [ أقعد على السرير ]: أحينه حرمتك هذيج بتتكلم .. مافيني على كلامها . . بتقول شمعنى أنا احمل وهيه لا . .
منصور: ما عليج منها هيه وأمي . . عليج مني . . أنا أبيج اتيبين لي ياهل . . !
أنا: زين منصور تبي بنت ولا ولد ؟
منصور: اللي ايي من الله يا مرحبا فيه . . ما أتشرط أنا !! [ قرب مني ]
أنا: منصوور خلني والله مابي
منصور: شو ما تبين على كيفج هوو !!
أنا: منصور الليوم معزومين عشان عيد ميلاد سلطان في بيت أهلي . . ما فيني أتأخر !!
بس منصور كالعاده ما عطاني فرصة أبداً . .
ذياب .~
كملنا تقريباً أربع سنين من عرسي على عذبة . . ما سوينا حفلة عودة . . بس عائلية . . وما سرنا شهر عسل عشان دراستنا . . بس عوضتها بعد ما تخرجت . . ومسكت شغلي عند أبويه
عذبة [ تطالعني ] : ذياب أبا أكمل ماستر . .
أنا: عادي [ أبتسم لها ] تلهين روحج شوية . .
عذبة: إن شاء الله . .
رحت فصخت الكندورة . . وفريتها بالسلة . . وييت بنسدح يمها . .
عذبة [ تبتسم ]: والغدا ؟
أنا: المهم أنتي كلتي . . [ أغمض عيوني ] أنا تعبان والله يوم بقوم بكل
عذبة: حفلة ولد أرجوان اليوم !!
أنا: هيه . . [ بعدني مغمض ] عذووب خليني أنام
عذبة : تتوقع العلاج اللي سويناه بيفيدنا ؟
أنا: وكلي أمرج لله . . وبعدين نحن مب ما نبي يهال . . كفاية يهال العائلة . .
عذبة: حراام عليك . . شحلاتهم والله
أنا [ فتحت عيوني ]: عذبة ما ننام اليوم ؟!!!
عذبة [ تبتسم ]: ذياب أنا حامل . . !!
ما أستوعبت اللي قالته . . تميت أطالعها بنظرات مصدومة .. وهيه طبعاً ضحكت . . وتمت تضحك تضحك . .قمت لها أبي أقرقطها . . !
بس صرخت : ذيااااااااااااااااااب اليااااااااااااااااهل . .
أبييييييييييه نسيييييت .. !!!
مريم .~
إطالعت صقر اللي صار ريلي. . ومب عارفة كيف أقوله هالكلام . .!
أنا: صقر . .
صقر [ يطالعني بدون نفس ]: نعم !!
أنا: أنت ليش جي تعاملني !
صقر: وشقايل تبيني أعاملج إن شاء الله !!
أنا: أنت ما كنت جي !
صقر [ يطالع التي في ]: أنتي اللي جبرتيني أعاملج بهالأسلوب . .
أنا: بس أنا تغيرت .. والله
صقر [ يقاطعني ]: شو يضمن لي . . !
أنا: صقر أنا حامل . .
قلتها جي . . ما عندي صبر وهو بحركاته يقهرني
صقر [ يطالعني بعصبية ]: من منووو !!
أنا [ أطالعته بصدمة ]: انت ليش تشك فيني ؟!
صقر: من سواياج . . [ يقرب مني ] قولي من منووه َ!
أنا: والله منك . . والله
صقر: جذااابة أنا مستحيل أخليج تحملين . . [ تقرب مني وضربني على ويهي ] . .
شوية بدا يضربني بهستيرية . . وهو يصارخ جذابة . . لين حسييت أني خلاص بفقد وعيي بالدنيا !!!
غاية .~
حطيت ايدي على بطني . . اهنيه في روح بتكبر . .
مايد [ يحط ايده على جتفي ]: شو تفكرين فيه ؟
أنا: ولا شيء . . مايد خلاص ماشي رده للندن صح ؟
مايد: صح . . إلا لو زياره !
أنا: لا بس عاد الغربة مب حلوة والله . . [ أبتسم له ] صح نكون بروحنا بس بعد قرب الأهل وايد حلو
مايد : خلاص ما بنرد . . [ يبتسم ] تدرين استانست يوم جفت نتايج تحليلج اليوم بالمستشفى ..
أنا: وانا بعد استانست يوم خبرتني . . [ سكتت ] مايد سامحني لو في يوم شكليت فيك
مايد [ يحضني ] : وأنتي بعد سامحيني لانه خبيت عليج الماضي
أنا: بس خلاص أنا نسيت . . وبعدين أنت اللي كنت تحبها . . أووه أقصد بس معجب فيها لانه البنت الوحيده اللي تقربت منك . . وهيه تسهلت لبيت ريلها . . وتحبه . . [ احط راسي على صدره ] مايد أوعدني ما تناظر غيري
مايد [ يمسح على ظهري ]: وعد يا نظر عيوني . .
هذا هو مايد اللي أعرفه . . صح تاخرت في الحمل بس عينه ما ناظرت غيري . . وفي حضنه أحس بالحنان . . والأمان . . الللي ياما فقدتهم في غياب أبويه
جوري .~
توني راده من دوامي . . تعب والله تعب . . أداوم من 8 لين 5 . . صح في استراحه بس بعد تعب . .
فريت جنطتي على السرير وفصخت عباتي . . والشيلة
شوية سمعت صوت الفون يرن . . رحت له وشليته
ابتسمت يوم جفت اسم عبدالله على الشاشة . .
أنا: ألووه
عبدالله: تووه الناس ..
أنا: عبدالله والله توني راده من الدوام . . منهد حيلي وايد
عبدالله: محد قالج اداومين .. اسمعي يوم بنعرس تقدمي استقالتج
أنا: خل نعرس اول !!
عبدالله: أنتتي اللي مأجلة الموضوع . .
أنا: نعرس اليوم . . باجر . . أممم
عبدالله: شرايج نحدد العرس بعد شهر . . وخلاص هالمرة مافي تأجيل !!
أنا: أوكي . . زين عبود بروح أسبح وأكل .. تدري عندنا حفلة اليوم
عبدالله: على شرط . . تتعدلين عشان أشوفج
أنا: أوكي . . إلا شحال أبوك ومرته !!
عبدالله [ يضحك ]: محسسيني مراهقين . . والله يوم أكون معاهم أحس أنا أكبر من أبوية !!
أنا [ ضحكت ]: الله يخليهم لبعض . . من زمان ما شفت ديمة .. اشتقت لها
عبدالله: اليوم أكيد بتشوفيها . . يلا بخليج احينه تخلصين أشغالج
أنا: أوكي . . ربي يحفظك . .
هذا عبدالله . . اللي ما وقف أبداً في طريق دراستي ولا شغلي . . وأدري بعد ما نعرس مستحيل يضغط علي أترك الشغل إلا لو كنت مقتنعة . . إنسان متفتح وواثق فيني . . ومستعد يسوي المستحيل عشاني . .
سلطان .~
قاعد مع نوير بنتي وأمها . . عائلتي صغيرة وايد . . سمية ما تبي اتيب ياهل إلا لما نوير تخلص الروضة عشان تحطيها فرصة أكبر من الرعاية
نوير [ بدلع ]: باباه سووف الأبلة حتت لي ندمه مننيه [ شوف الأبلة حطت لي نجمة منيه ] . .
انا: شاطره بنتي . . عفيه عليج
نوير [ بدلع ]: أستاهل هدييه . .
أنا [ أبوسها ]: تستاهلين أكبر هدية . .
سمية [ تقعد ]: وأنا ؟
أنا: أنتي الأصل [ أغمز لها ] هديتج بعدين بالليل
سمية [ أحمرت ]: مب جدام البنت . .
أنا: واللي يقول بتفهم احينه . . [ أطالع نوير ] نواري قولي لماماه أبي أخت . .
نوير [ بدلع ]: ماماه موبي أخت . . أبي اتم لووحي [ روحي ]
أنا [ بصدمة ]: طااع !
سمية [ تبتسم ]: البنت تعودت تكون بروحها
أنا: إنتي اللي عوديتها . . ماخذه الدلع كله منج . .
سمية: أحسن عشان يوم أكون محد تشوفني في بنتي . .
وفعلاً نوير طبجه أمها . . تشبهها حيل . .
سمية [ تطالعني ]: اليوم رد علي أخويه يكلمني عن مها . . يبي يخطبها مرة ثانية
أنا [ أتنهد ] : قصدج مرة رابعه . . سمية مها مستحيل توافق . . خليه يخطب وحده ثانية
سمية : قلتله . . بس يقولي لو ما خذتها من بيرضى فيها . . كلمها سلطان . . يمكن تسمع منك
أنا: أوكي
سمعنا دق الباب . . رحت بطلته . . جفت ميرة اللي صار عمرها تقريباً 13 سنة وبدت تكبر
ميرة [ تبتسم ]: أبي نوار . .
أنا [ أفتح لها الباب ]: دشي هيه عند أمها . .
ييت بطلع . .
ميرة: وين ؟
أنا: عند مها . .
رحت صوب غرفة مها . . وجفت راشد اللي صار بالعشرين . . ماسك سويج السيارة وشكله بيطلع
أنا: على وين ؟
راشد: طالع
أنا: شوي شوي عن السرعه . . ما فيني أتحمل تهورك إستاذ راشد
راشد [ بخبث ]: تبوني أودر طيشي زوجوني . . !
أنا: راشد صاير جريء . . أنت تكلم حد ؟
راشد [ بتوتر ]: لااه
أنا: صدق !!
راشد: هيه صدق . . إلا صح حسين ولد عمي هو اكبر مني بسنة . . ويوم تخرجت روضة بنت عمي عبدالله من الثانوية . . تزوجها وشلها معاه أمريكا . . يدرسون أهناك . . شمعنى أنا ما تبوني أعرس ؟
أنا: أنت أثبت في شغل أول .. شلك في العرس والمسؤوليه ؟
راشد [ يتحرك ]: أنا مستعيل . . يلا بخليك
أنا [ بخبث ]: سلم على ريم . .
راشد [ يطالعني بصدمة ]
أنا: تتحسبني غافل عنك . . وراك وراك . .
راشد [ بخليني ويطلع ] . . والله يتحسبنا غافلين عنه . . والكل أصلاً يعرف أنا يبيها !!!!!!!!!!!!
رحت صوب غرفة مها
دقيت الباب . .
مها: تفضل
أنا: عادي . ؟
مها [ تبتسم ]: أكيد . . شحالك أخويه ؟
أنا: الحمدلله . . أنتي شحالج ؟
مها: بخير . . زايرني اليوم ؟
أنا: هيه . . عندي موضوع وحاب أنا اللي أكلمج فيه . .
مها: قوول . .
أنا: مها تدرين اليوم كم واحد خطبج مني ؟
مها [ تتنهد ]: كم ؟
أنا: ثلاث . . علي أخو سمية . . حمدان ولد عمج سلطان . .
مها: والثالت
أنا [ بعد مده صمت ]: فارس . .
مها [ تنتفض ]: هاه
أنا: فارس تغير يا مها . . صاير متدين وايد . . صلاته كلها بالمسيد حتى الفجر ما يطوفها وكل سنة لازم عمرة ولو قدر حج . . صلي إستخارتج وجوفي لمنو ترتاحين . . لانه الثلاث مناسبين لج ولو شفت فيهم عيب ما ييت أخبرج يا مها
مها [ تبتسم ]: إن شاء الله . . اليوم بروح معاكم بيت عمي سلطان عشان حفلة سلطان الصغير
أنا: عشانه سميي بوديكم . .
مها: أنا بعد لو يبت ولد بسميه سلطان
أنا [ ابتسمت لأنها بدت تتقبل الفكرة ]: إن شاء الله . .
ييت بقوم بس سمعت حس إميه تزقرني . . وشويه فتحت الباب
إميه: سلطان إلحقني . .
نقزت على طول . .
أنا: خير إميه شو فيج ؟
إميه: أختك مريم بالمستشفى . . تعبانة . . قوم ودني لها
أنا: إن شاء الله الغالية . . ببدل ثيابي وبييج
إميه [ تصيح ]: بسرعة يا سلطان . . ما أعرف صقر هذا شو مسوي فيها عشان اطيح عليهم
مسألة أنه صقر مأذنها أبداً ما دخلت بالي . . هيه دوم تقول أنه يعاملها أوك !!
روضة .~
قاعده في الصالة اللي بشقتنا في أمريكا . . أنا خلصت دراستي . . بس تامة إهنيه عشان حسين اللي يوم بيتخرج بيصير دكتور . . وأنا واقفة معاه وشاده من همته . . !!
حسين [ يطالعني ]: شو فيج ؟
أنا: ولا شيء . . أفكر بالماضي اللي جمعني فيك . . تهورنا اللي تعب كل أهلنا . . وياما حاولوا يمنعونا من بعض . . وعقب زواجنا . . ودراستنا . . ومستقبلنا
حسين : ندمانة على تهورج ؟
أنا [ هزيت راسي ]: مستحيل أندم . . يمكن ندمت إني أعاند .. بس حبك ولو كان مجنون مستحيل أندم عليه . .
حسين: تدرين حفلة سلطان ولد أرجوان اليوم !
أنا: إيه . . شو صار على الهدية ؟
حسين: وصيت ناس يوصلونها على وقت الحفلة بالضبط . .
أنا: زين . . أتريا اللحظة اللي أشوفك فيها متخرج . . ونرد البلاد
حسين [ يلعب بخصلات شعري ]: مليتي مني أشووف ؟
أنا [ ابتسم بشطانة ]: أمل من الكون كله ولا أمل منك
فعلاً هذا حسين اللي أعجبت فيه . . وحبيته . . اللي ياما خواتي مب راضين عن قربي منه . . وحتى خوانه . . بس هو عمره ما خان الثقة . . الله لا يغير علينا يا كل دنيتي . .
جنان .~
واقفة جدام الغرفة ومغمضة عيوني الثنتين بيدي . . وأعد . . 1 ، 2 ، 3 ، 4 ، 5 ، 6 ، 7 ، 8 ، 9 ، 10 . . خلصت العد . . بطلت عيوني ولقيت الجو هادي جداً . .
الكل أختفى بمكان . .
أنا [ بصوت عالي ]: تراني بطلت عيوني . . بيي أزخكم . .
بس بعده المكان هادي . . ابتسمت يعني يبوني أنا اللي أدورهم . .
لفيت الصالة . . ما حصلت حد . . بس قبل لا أطلع منها سمعت همهمة . . صوت خفيف
وقفت أتأكد . . نزلت راسي للمسافة اللي بين الغنفتين . . وجفت سالم [ اللي عمره 2 سنتين ] واقف بالمسافة . . ويضحك على الخفيف . .
رحت له . . وقرقطته . . وأقوله: زخييتك
وهو يضحك بصوت عالي . .
شليته وبست خده هالانسان شكثر أمووت فيه. . كل مرة نلعب اللعبة ويتخبى في نفس المكان كل مرة !!. .
أنا [ أهمس له ]: أششش . . سلوومي تم منيه بروح أشوف وين باباه أشش عن يشرد أوك
سالم [ يضحك ] : دين
رحت للغرفة متأكده بشوفه إهنيه . . دخلت وشفته لابس لبس الشرطة . . تساندت على الباب وإطالعته بنظرة . .
سهيل [ يضحك ]: بلاج ؟
أنا: دوام ؟
سهيل: لا . . قلتلج أجازة . . إجازة . . [ يبتسم ] يعني بكون عندج
أنا [ عقدت حياتي ]: عيل ليش لابس لبس الشرطة ؟
سهيل: أجربها . . اليوم يايبنها من الخياط . . !
أنا: أها . . سهيل دير بالك على روحك . . مابي أخسرك
سهيل [ اييي صوبي ويحضني ]: من عيوني . . مستحيل أأذي روحي وأنا أعرف أنها تهمج !
أنا. . . [ تعلقت في حضنه خايفة يضيع مني ] . . !
مايد .~
لما حسيت بغاية غفلت بحضني . . نيمتها على السرير وطلعت عنها . .
صايرة تنام بأي وقت . . وبدون شعور . . كل هذا من تأثير الحمل . . !
إستغربت لما شفت أميه لابسة عباتها وواقفة . .!
أنا [ بتعجب ]: على وين الغالية ؟ تبيني أوصلج ؟!
إميه: أختك مريم بالمستشفى . . خالتك متصلة تقولي شايفتنها تنزف بالغرفة . . [ بخوف ] خايفة عليها . .
سلطان [ ينزل ]: يالله الغالية مشينا . .
أنا: أنا بيي معاكم . .
إميه: هيه تعال الله يخليك . .
مشيت معاهم . . وركبنا السيارة . . [ طول الطريق وأنا أفكر ] تنزف . . !!
شو سبب النزيف ؟ ! معقولة طايحه . . إنزين لو طايحه ما تنزف وايد !! . .
سلطان [ يزقرني ]: ماااااااااايد . .
أنا: هاه !
سلطان: وصلنا . . يلا انزل ويا امي عشان تشوف شو فيها ولا تكلم الدكتور . . أنا برجع البيت ماله داعي وجودي
أنا: زين . . [ نزلت مع اميه ] . .
أنا: إميه أي قسم ؟
إميه: خالتك تقول قسم الولاده ..
أنا: ولاده !
إميه: هيه تراه شكلها كانت حامل وعقب طاحت وسقطت . .
أنا [ شفت الدكتورة المسؤولة ]: لو سمحتي أنا أبي أسال عن مريضة اسمها مريم علي محمد ال . . .
الدكتورة [ ترفع أوراق كانت بيدها ]: دكتور. . المريضة فقدت دم كتير سبب في وفاة الجنين . . لو كانوا جايبينا أبل بوأت كان ممكن أنقزناه . .
أنا: وهيه الحينه شحالها ؟
الدكتورة: منيحه . . أبل شوي نألناها للغرفة الخاصة . . هيأ بتأربلك موو ؟
أنا: إيه . . هيه أختي . .
الدكتورة [ تطالع إميـه ]: دكتور ممكن شوي نحكي على جَنَب ؟
إطالعت إميـه: إمايه روحيلها الغرفة . . [ أسال الدكتورة ] أي غرفة
الدكتورة: في غرفة [ . . . ] . .
إميـه: زين . . بسير لها . .
عقب ما سارت إميه مشيت مع الدكتورة . . اللي صدمتني بكلامها
الدكتورة: أنا مضطره أستدعي الشرطة . . سبب سقوط الجنين . . ضرب شديد . . وباينه الكدمات على كل جسما . .
أنا [ عقدت حياتي ]: ضرب ؟!! منو ضاربنها . .
الدكتورة: ما بعرف . . عن إزنك دكتور عندي شغل لفوأ رأسي . .
أنا: اوكي روحي . .
كملت طريقي للغرفة . . جفت خالوه قاعده سلمت عليها وبست راسها
إطالعت مريم اللي ويهها جداً شاحب . . !
أنا: إميه . . خالوه . . أبا أكلم مريم شوية ممكن ؟
إميه: كلمها . . هذيه جدامك ؟!!
أنا: لا قصدي بروحنا . . ممكن !
إميـه وخالوه [ قاموا ]: خذ راحتك !
بعد ما طلعوا . . سحبت كرسي وقعدت مقابل مريم . . اللي إطالعتني بتعب تتريا شو بقول !
أنا: مريم أعتقد تعرفين شو بقول . . !
مريم : لا ما عرف !
أنا: مريم صقر ضربج ؟
مريم [ إطالعتني بتوتر ]: لا
أنا: بلا . . هو إعترف لي . . ضربج . . بس ما قال ليش ؟! [ حبيت أكذب عليها واستدرجها للككلام ] . .!
مريم [ تدمع ]: هو كله يشك فيني . . كله يمنعني من الطلعة . . كله حابسني بالغرفة . . حتى فون يشله عني . . [ تعض شفاتها تحبس دموعها ] أمس عرفت اني حامل واليوم خبرته . . عصب علي يقولي من منووه . . [ تطالعني ] والله ما أعرف حد مايد والله ماعرف حد غيره . . بس هو ضربني ضرب ويوم شافني أنزف طلع . .
أنا [ عصبت ]: الحيوااااااااااان أنا الللي بربيه . .
مريم [ مسكت ايدي ]: مايد خله يطلقني . . مابيه يذلني أكثر !
أنا [ ابتسمت لها ]: وغلاتج بقلبي بتردين بيتنا معززة مكرمة !
ابتسمت لي . . مهما يكون هذي أختي اللي ما أبي أي شيء يأذيها . . حتى لو كان ريلها !
عليا .~
طالعة من غرفتي ملانة . . أووف والله كل يوم قاعده بروحي . . !
إميه: بلاج ؟!
أنا [ قعدت يمها ]: ملانه إميه ملانه . . كله بروحي . . حياتي ملل في ملل . .
أبويه [ يطالع الجريده ]: أنتي اللي بغيتيه لعمرج . . خبريني كم مرة ألقى لج شغل وتقولي ماباه . . !
أنا [ أبوز ]: عاد أنته ما اتيب لي شغل يعيبني شو أسوي بك .!
أبويه: حتى الشغل في شركتنا عفتيه .!
انا: ما أبا أجابل عيال عمومتي . . حشى مب واحد ولا ثنين . . كلهم ؟!
أبويه [ يعق الجريده ]: قولي ما شاء الله !!!!!!!
أنا [ أبوز ]: ما شاء الله . . [ أقوم ] بروح أشوف ريمووه أحسن لي من كلامكم اللي يغث !
أبويه : لو شفتيها مشغولة لا تقعدين على قلبها !!
أنا [ أصارخ لاني أبتعدت ]: عشانج بس بقعد عللة على قلبها . . !!
دخلت غرفة ريم بدون لا أدق الباب . . جي مزااج !!
ريم من شافتني عقت الفون تحت اللحاف . . !
إطالعتها بإستغراب . . شفيها ؟!
رحت لها . . وشليت الفون وهيه إطالعتني بنظرة . . طنشتها وشفت الفون
الشاشة بعدها منورة . .بإسم [ راشد ] .. والمكالمة صار لها فوق النص ساعه !!!
أنا: منوه هذاا ؟ !! [ أصارخ ] منووووه ؟!
ريم [ تطالعني ]: مالج خص . . ردي فوني ردييه . .
أنا [ مسكت شعرها ] : إن ما أدبتج ما كون عليا. . هين إن ما خبرت عليج أبويه . . أنا قلتله هذي ياهل بتضيعها من يدك . . قالي تربيتي . . [ أصارخ ] تعال يا أبووي شوف تربيتك !!!!!!
ريم [ تصارخ ]: مالج خص فيني . . [ تصيح ] بطلي شعررررررررررررري
أبويه [ من وراي ]: عليوووووووووووووووه بطلي أختج . . !
نقزني . . وخلاني أبطل شعر ريمووه هالحيوانه . . وريم من هديتها أبويه حضنها وقعدت تصيح بحضنه
أبويه: شفيج على أختج ؟
أنا: بنتج مسودة الويه . . يالسه تكلم مادري منووه بالفون . . ويوم دخلت عليها فرت الفون خيفانة ؟!
أبويه [ يطالع ريم ]: حبييبي منوه كنتي تكلمين ؟
ريم [ تصيح ]: والله أبويه كنت أكلم راشد . . حتى شوف فوني . .!
أنا [ عقدت حياتي ]: طاع أبويه أعترفت لك . .
أبويه [ يبتسم لريم ]: ريامي غسلي ويهج وسيري لأمج خل تعدلت اليوم راشد بيشوفج . .
ريم [ أحمرت خدودها ]: زين أبويه . . [ وراحت ] . . !
أنا: أبويه !!
أبويه [ يقعد ]: سمعيني زين يا علياا . . هذي أخر مرة أسمح لج تمدين ايدج على خواتج . . زين
أنا: بس أبويه . . !
أبويه [ يقاطعني ]: عليا . . يوم أتكلم تسكتين . . ! [ يوم شافني ساكتته ] عليا راشد هذا ولد عمج . . وهو خطيبها . . وأنا اللي سامح لهم يكلمون بعض . . ومن تخلص ريم المدرسة بيملجون . . فرجاءً يعني مابيج تتعرضين لطريق أختج . .
أنا: أبويه من صدقك [ أطالعه بصدمة ] هذي ياهل . . مو كفاية روضة . . !
أبويه: والله اللي أشوفه أنها هي أعقل منج . . !
أنا : شووه ، وبعدين أبويه أنا الأكبر . . أشوف زوجت الأصغر مني وخليتني أنا !
أبويه: انتي اللي يبتيه لعمرج . . تذكرين حمدان المسكين شو سويتي فيه ؟!
غمضت عيوني . . أسترجع الماضي
[ قبل أربع سنين . .
ريم [ تدخل غرفتي بعد ما دقت الباب ]: عليا اميه تقولج بدلي ونزلي تحت تبيج ضروري . .
أنا: زين . . [ عقدت حياتي ] شو تبيني ؟!
ريم [ هزت كتوفها ]: ماعرف . . [ وطلعت ]
رحت لبست لي لبس حلو . . ونزلت . . !
جفت أرجوان أخت حمدان قاعده ومعاها خالوه عايشة . . [ سلمت عليهم ] . .
أرجوان [ تبتسم لي ]: حي الله العروس . .
أنا: عروس . .!
أميه: يايين يخطبونج . . حق حمدان أخوها . . [ تبتسم لي ] هاه شورايج ؟
أنا [ سكتت بصدمة ]: . . .
أرجوان [ تبتسم لأميه ]: خالوه حرام عليج أحرجتيها . . المفروض تسأليها بروحها . .
إميه: ما عليج منها . . عليا . .
أنا [ أوقف بعصبية ]: اميه خبريهم اني مب مال زواج . . [ أصارخ ] مستحيل أخذ واحد مثله . . مستحيل
اميه [ صفعتني ]: أسكتي . . أنتي ما تستحين . . ! الناس قاعده
ابويه [ يطلع من الميلس ] : شو فيكم أصواتكم واصلة لأخر الشارع ؟!
أميه [ تروح صوبه وتيرني معاها ]: بنتك سودت ويهك . . تصارخ جدام الناس مستحيل أتزوج هذا . . !
أبويه [ يطالعني ]: ليش بلاه ؟! . . حمدان ريال ولد ريال . .
أنا [ اصارخ ]: مستحيل أخذ واحد عقيم . . مثل أخوه . . ولا تبوني أتعذب مثل أختي . . هيه أنتو ما عليكم منا . . الأهم منو تناسبو صح
أبويه [ صفعني ]: جااااااااااب . . الريايييل بالميلس . . [ يصارخ ] قسم بالله إن بغا الليلة ياخذج لبيته
حمدان [ اللي صدمني يتكلم من الميلس ]: لا يا عمي . . لا تغصب بنتك على شي ما تباه . . يلا من رخصتك عمي . . وطرش لي الحريم أنا بترياهم برع
أبويه [ يمسك شعري ]: عايبنج اللي صار . . ]
أنا: هيه عيل تباني أخذ واحد عقيم . .
أبويه [ يطالعني ]: ردينا على نفس السالفة . . شدراج أنه عقيم ؟!
أنا: بيطلع مثل أخوه . .
أبويه: ومنو قالج أخوه عقيم ؟
أنا: تكذبون علي مثلاً . . لو مب عقيم . . شحقه عذبة ما حملت للحين ؟
أبويه [ يبتسم ]: سمعيني يا عليا . . أدري كلامي ما بيغير الماضي ولا شيء . . حمدان ما بيرد ياخذج . . هو خطب مها بنت عمج . . بس اسمعي . . ذياب وعليا مب عقيم . . هم عندهم مشاكل بس . . وقدروا يتغلبون عليها ويتعالجون . . أمج أمس طمنتني انه عذبة حامل . .
أنا: صدق ؟
أبويه: هيه . . [ يقوم ] ريم مالج خص فيها . .
أنا: مالي خص بحد أنا . . أنت بتودينا بيت عمي سلطان ؟
أبويه: هيه . . تجهزوا من بعد المغرب بوديكم
أنا: المغرب ؟
أبويه: هيه . .
رحت غرفتي أتريا المغرب يأذن . . وعسب أصلي وعقب أتعدل . . ولا افتكرت في ريم ولا اني أعتذر لها . . !
أرجوان .~
قمت على أذان المغرب . . [ إطالعت منصور اللي كان يمشط شعره بعصبية ] . .
منصور [ يضحك ]: بلاج . ؟
أنا: قلتلك ما أبي . . طاع احينه تأخرنا . . مب نحن أصحاب العزيمة واني أخر ناس !؟
منصور [ يبتسم ]: عادي أنزين . . روحي اسبحي على السريع ولبسي وأنا بلبس اليهال
أنا: لبس سلطان كندورة . . اليوم يبون يشوفونه بكندورة . .
منصور: عاد ولدج مب مال كنادير . .
أنا [ خليته . . رحت سبحت على السريع . . ] . . وطلعت
لبست لي جلابية مخصرة . . لونها عنابي . . وبديت أحط لي ميك أب . . وعدلت شعري . .
منصور [ يحضني من ورا ]: عرووس ..
أنا: منصور خلني أكمل . .
منصور: كملي وسيري لبسي رواض . . معانده تبيج
أنا: فديتها والله . . وسلطان
منصور: سلطان بعد يبيج . . بس عقب رضى ولبسته البدله اليديده اللي شريناها أمساتت له
أنا [ ابتسم ] : العنابية ؟
منصور: هيه . . ولبسي رواض نفسج . . [ يبتسم ] بس أقروا على روحكم . . عن يعطونكم بعين
أنا: إن شاء الله . . [ كملت تعديلي . . وطلعت طقم الذهب اللي شراه لي منصور أمس . . ]
أنا: منصور لبسني . .
منصور: من عيوني . . [ لبسني السلسلة . . والحلق . . ] .
أنا: الخاتم
منصور [ يبتسم وعقب لبسني الخاتم وشل دبلتي اللي على الطاوله ولبسني ياها ]
شليت عباتي ولبستها . . بس تذكرت روضة . . فخليت الشيلة والغشوة . . ورحت لها
أنا [ اطالع روضة مبوزة ]: فدييت المبوز أنا . . شفيج
روضة: لوواادي تبي ماماه . . بابا ما يعلف يلبسني . . [ رواضي تبي ماماه . . بابا ما يعرف يلبسني ]
أنا: فديتها هالرمسة المحيووسة . .
لبستها فستان لونه عنابي . . من نفس درجات لبسي . . بس قصير
ولبستها هيلاهوب . . عشان منصور ما ينازعني . . [ شفت سلطان على صوب قاعد ]
أنا: شفيك بعد ؟! اليوم يوم ميلادك المفروض تستانس
سلطان: أنا مستانس . . [ يبتسم ] يوم الأحد بودي هدايا لربعي . . اليوم هم عطوني وأنا أبا أعطيهم
ابتسمت له : إن شاء الله حبيبي . . بوديك تختار لهم ألعاب . ,
خليته ورحت لبست وخلصت . . وطلعنا
كلها كم دقيقة ووصلنا بيت أهلي . .
وكل العاده . . ذياب واقف لي يم الباب
ذياب: بعد جان ما ييتوا .!
أنا: ذياابي هذا كله من منصور . .
ذياب [ يطالع روضة ]: أهم شيء أميرتي موجوده . . برايكم أنتو !
خليته مع روضة يسلم على منصور ومسكت إيد سلطان . . ملك الحفلة وأمير قلبي . .
دخلت داخل عند البنات . . جفت ديمووه اللي بطنها واصل جدامها
أنا: ديموه متأكده فيج واحد . . مب 2 بطنج كبير
ديمة [ شهقت وتمت تمسح على بطنها ]: بسم الله . . قل أعوذ برب الفلق . .
عمي سعيد : أرجوان لا تأذينها . . بروحي يالله يالله هديتها
أنا: ليش ؟!
عمي سعيد: خايفة من الولاده . .
ديمة [ تطالعني بخوف ]: خايفة . . والله . . وبعد 2 أكيد بمووت
أنا: بسم الله عليج حبي . . طالعي أنا يبت سلطان وروضة . . وما صار فيني شي
ديمة: إن شاء الله ما يصير شيء [ تطالع سلطان ولدي ] يا ربي . . على اللي صارو رياييل . . تعال بعطيك بوسة . .
سلطان [ يطالعها بصدمة ]: مابا . . أنا ريال ماباج تبوسيني !
ضحكت . . ورحت صوب جوري اللي واقفة يم عبدالله وتضحك
أنا: يالله عجلو بعرسكم . . خل نفرح فيكم
عبدالله [ يكلمني ويطالع جوري ]: أختج حددت بعد شهر . . جان أجلته بشله بدون مشاوركم
ضحكت . . الله يخليكم لبعض . .
سمعت صوت خالد أخويه . . يدخل : أحم . .
رحت له . . شفته شال ولده محمد الصغير اللي عمره شهرين . . ووراه بدور اللي شاله منى . . اللي بتكمل خمس سنين بعد كم شهر . .
أنا: يعني بعدها منى ما تبي محمد ؟
خالد [ يتنهد ]: متعلقة بأمها . . وما تبيها تمس البيبي أبداً
شفت وراهم سلطان ولد خالد وبدوري الصغيرة . . بستهم وابتسموا بخجل
أنا: وأنتو بعد ما غرتوا من حمود ؟
بدور الصغيرة: لا نحن نحبه . . بس هذي منى دلووعه . .
خالد [ يهمس ]: طالعه على ماماه صح ؟!
سلطان وبدور الصغيرة [ يهمسون ] : صح !! [ وضحكو ا ]
بدور [ تبتسم ]: جوفي منى خليتيهم يضحكون علينا
منى إطالعتني وبوزت . . هالبنت مادري شفيها ما تبي حد !!
جفت أبويه واقف يدور سلطان ولدي . .
أنا: [ بست راسه ]: أبويه سلطان أكيد راح يلعب مع اليهال !
أبويه : بعطيه هديته . .
أنا: الغالي ما يبي منك شيء !
أبويه [ يبتسم ] : السمي . . فديت روحه
أنا: الله يخليك لنا الغالي . .
دورت حمدان . . بس ما لقيته . . الكل موجود ما عداه . . هو وغاية . . ومايد ومريم . .
سلطان وسمية توهم وصلوا . . وبنتهم قاعده مؤدبة يم أمها
أبويه: حمدان ماسك مها يكلمها . . [ يبتسم ]: إن شاء الله تواقف على خطبته له
أنا: إن شاء الله . .
بدت الحفلة . . ومنصور ياب الكيك . .
أنا: سلطان وين ؟!
منصور: توه إهنيه . .
دخل سلطان ولدي ماسك إيد روضة . .
سلطان: ماماه روضة تبي تركب فوق البيذامه . . [ ينازعها ] سباله إنتي !!!!!!
منصور [ يطالعني ويبتسم ]: . . .
أنا: ماماه تعالو بنقص الكيكه . . سلطان تعال بتقصها
ذياب راح شل روضة . . ووعدهاا باجر يوديها صوب البيذام لانه الحينه ليل . .
حمدان [ يسمع الجرس يدق ]: بروح أشوف . .
راح ورد بصندوق كبير . .
حمدان: بإسم سلطان منصور . . من أمريكا
ابتسمت حسين ما نساه . .
يودت إيد سلطان وقصينا الكيك . . ووزعناه على الكل . . ووزعنا الأكل والعصاي ر..
وكل إثنين قعدوا يم بعض . . ويسولفون . .
اطالعتهم . . وابتسمت . . الله لا يغير علينا . .
[ وإنتهى لقاء الأحبه .. ♥ ]