تسلم ع البااارت


والله حراااام غالية يستوي فيها جي

نتريا الباارت اليااي

الجزء الثامن عشر...

مر أسبوع على طيحة غاليه فالمستشفى، وهي حالتها كل يوم تسوء أكثر عن قبل.. مب راضيه تتجاوب مع العلاج وكله ساكته ولاينسمع لها صوت.. من طاحت ونقلوها عالمستشفى الدكتور قالهم إنه إنهيار عصبي..
أمها وأبوها تعبوا من إنهم يحالون يطلعونها من الحاله الي هي فيها، بس ماشي فايده.. طول الأسبوع أبوها يحاول بكل الطرق إنه يخليها تنطق ولو بحرف واحد.. بس هي تجاوبه بشي واحد وهو الدموع..
دخل ناصر غرفة غاليه فالمستشفى هو ونجود، شافها يالسه عالسرير وماسكه فإيدها ورده حمرا.. كان لونها شاحب وسواد عيونها الي عمرهم ماشافوه اليوم مبين بكل وضوح الدنيا..
ناصر: شخبار غاليتنا اليوم..؟؟
أبوغاليه: الحمدلله ماتشوفها مثل البدر المنور..
ناصر: وين بدر عمي الله يهداك.. هــاي حدها هلال..
نجود: خل عنك عاد، غاليه قمر 14.. محد يتحداها..
أم غاليه: حياج نجود حبيبتي تعالي هني..
راحت نجود وسلمت على فاطمه ويلست تمسح على إيد غاليه الي كانت تلعب بالورده الي فإيدها وكأنها بعالم ثاني، ولاحاسه بناصر ونجود يوم دخلوا ولا بالرمسه الي يقولونها..
نجود: غاليه حبيبتي.. شو رايج أول ماتظهرين نروح كلنا السينما، حبيبج توم كروز منزل فيلم يديد..
ناصر: عاد انا قلت لنجود مستحيل أشوف الفلم بدون غاليه..
نجود: أنا صح غرت شوي، بس يالله علشانج بس بسكت..
أبوغاليه: ياسلااام سينما.. وغلايتي أكيد تبا تروح.. صح حبيبي..؟؟
غاليه رفعت راسها واطالعت أبوها شوي ورجعت تتطالع ناصر لأكثر من دقيقه وهو مستغرب شو تقصد بنظراتها.. شو الي تبا تقوله له ومب قادره..
ناصر: عمي أبوي يسلم عليك، ويقولك اليوم بيمر عليك..
أبوغاليه: إن شاءالله خير.. ناصر تعال برع أبيك بسالفه..
طلع ناصر مع عمه برع ويلسوا على كراسي الإستراحه، منصور كان شايل مسباح في يده ويالس يسبح وهم يمشون.. ومن يلسوا إلتفت على ناصر..
ناصر: عمي شو يقولون الدكاتره عن حالة غاليه، أحس مب قاعده تتقدم فالعلاج..!!
أبوغاليه: غاليه رافضه العلاج، علشان جي حالتها ماتتحسن..
ناصر: وليش كل هذا ماعرفت..؟؟
أبوغاليه: يعني إنت ماتعرف السبب..؟؟
ناصر: شو دراني ياعمي.. الود ودي أعرف علتها وأعالجها..
أبوغاليه: وأحمد.. ماخطبها منك..؟؟
ناصر الي إنصدم: أحمد..!! كلمني فالموضوع وانا خبرته عن حالتها وقلت له لايفكر فيها ولايتقدم رسمي لأنه ماشي فايده..
أبوغاليه: والحب الي كان من بينهم.. ماكنت تعرف عنه..؟؟
ناصر هني وقف الدم في عروقه، أحمد وغاليه يحبون بعض..!! كيف ومتى..!! وكيف أنا ماحسيت بهم..؟؟
ناصر: والله ياعمي أنا ماعندي علم بالسالفه إلا الحين..!!
أبوغاليه: غاليه ياتني وهي منهاره ويلست تصيح وتقولي عن الحب الي كان من بينهم وآخر شي قالت إنه راح يكلمك ومن هذا الليوم وهو متغير عليها وبعدها قالها ماشي نصيب..
ناصر: علشان جي صار لها الي صار..!! بس أحمد..!! والله ماتوقعت.. ولو كنت أحس بأي ميول منه لها كنت وقفته على طول، بس والله ياعمي مالي دخل بالسالفه..
أبوغاليه: أعرف ياناصر ماله داعي تحلف..أمممم إنت تعرف أحمد عدل وواثق منه..
ناصر: طبعا.. ربيعي من سنين وقلوبنا على بعض وشرفي من شرفه..
أبوغاليه: ناصر.. كلمني شو تعرف عن أحمد..؟؟
ناصر: كل خير ولد مؤدب ومحترم، ولد ناس طيبين، ولو هو مب زين ماكنت أنا رابعته..
أبوغاليه: عيل محد بيطلع غاليه من حالتها غيره هو..
ناصر: بس ياعمي غاليه الحين عرفت كل شي.. يعني صعب تتقبل تشوف الإنسان الي حبته ولاتقدر تتزوجه في ويها..
أبوغاليه بنبره حزينه ومكسوره: عيل كيف أطلعها من السجن الي هي فيه.. كيف أخليه ترجع للحياة من يديد.. ناصر غاليه يالسه تموت جدامي وأنا مب قادر أسوي لها شي..
ناصر عوره قلبه على عمه: خلاص ياعمي أنا بكلم أحمد وبقنعه إيي هني ويكلمها وبنقعد مع غاليه بس بروحنا.. وإن شاءالله بنقدر عليها..
ناصر خلى عمه وراح لبيت أحمد على طول.. دق الجرس وظهرت له الخدامه وقال لها تزقر له أحمد وهو دخل الميلس ينتظره..
بعد دقيقتين أحمد دخل الميلس وهو يعدل غترته الي لبسها بسرعه وطلع يشوف منو الي يبيه..
أحمد: ناصر..!! بسم الله إشفيك شو صاير لك..!!
ناصر: وليش خايف..؟؟ حرام إني أزورك..!!
أحمد: مب حرام حياك البيت بيتك.. وعلى الراس من فوق بعد..
ناصر: إنزين روح ييب لي قهوه تعدل الراس وتعال..
راح أحمد وهو قلبه يدق يحس السالفه فيها غاليه.. رجع أحمد بالقهوه ولقى ناصر يرمس فالتلفون..
ناصر: آسف بس إضطريت إني أظهر من المستشفى بسرعه، خلاص إنتي مناوبتج الحين خلصي شغلج وبكلمج بعدين.. باي..
أحمد وهو يمد عليه بالقهوه: إنت كنت فالمستشفى..
ناصر: هيه.. عند غاليه بنت عمي..
أحمد: شخبارها الحين عساها بخير..!!
ناصر: وليش مادق لها تتطمن على أخبارها..؟؟
أحمد إستغرب منه: كيف أدق لها الله يهديك إنت بعد.. إنت طمني عنها..
ناصر: أحمد.. أنا عرفت كل شي.. غاليه خبرت عمي وهو طلب مساعدتي..
أحمد حط دلة القهوه على الطاوله ويلس مع الكرسي وهو منزل راسه ومب عارف كيف يواجه ناصر..
ناصر: ليش سكت..!! أنا ياي أعرف السالفه من أولها لآخرها..
أحمد: مالي ويه أطالعك.. أحسني خاين في نظرك..
ناصر: إنت ماسويت شي علشان تقول خنتك، إنت حبيت ونيتك شريفه والدليل إنك خطبتها مني..
أحمد: أنا بحكي لك كيف تعارفنا وإنت إحكم..
ويلس أحمد يحكي حقه كل شي، وناصر يسمعه بكل هدوء، وشرب بدل فنيال القوه ثلاثه..
ناصر: وليش ماقلت لي أنا رفيجك وكل سوالفي عندك، وإنت الحين تخبي علي كل شي..؟؟
أحمد: سامحني ياخووي بس هاي كانت رغبتها..
ناصر: يعني يوم كنا نشوفها فالسينما والمولات.. ويوم رحنا الفجيره كله كان مواعيد من بينكم..؟؟
أحمد: وكل شي كان جدامكم ماسوينا شي حرام وإلا بالغش والدس..
ناصر: محشوم عن الحرام ياأحمد.. بس الحين انا ياينك في طلب وأتمنى إنك تساعدني..!!
أحمد: عيوني لك.. والله إطلب الي تبيه مب مقصر..
ناصر: مب حقي.. حق غاليه..
أحمد: عيل لو تطلب الروح ترخص..
ناصر: أباك تروح معاي المستشفى وتحاول إنك إطلع غاليه من الحاله الي هي فيها..
أحمد نزل راسه: مالي ويه أجابلها..
ناصر: عيل وينه الي بيسوق روحه علشانها..!!
أحمد: أسوق روحي وعمري كله لها.. بس إني أواجها بعد الي سويته، أحس إني بزيد الطين بله..
ناصر: بالعكس غاليه تحبك.. وإنت الوحيد الي بطلعها من عزلتها..
أحمد يلس يفكر كيف بيواجها وكيف بتكون ردة فعلها، ممكن ماتتقبل وتنتكس حالتها بزياده..
أحمد: أوكي.. بس إنت تدخل قبلي وتهيأها لدخلتي، مافيني أصدمها وأدخل مره وحده..
ناصر قام: خلاص تم.. قوم إلبس وإلحقني بسيارتك..
أحمد: شايفني يربان ولا مالك نفس توصلني..
ناصر كان واقف عند الباب يبا يطلع يوم قال أحمد هالرمسه، إلتفت عليه بكل حزن الدنيا..
ناصر: مادري بس أحس فهالحظه إني شايل عليك من الخاطر، عمري ماتخيلتك تخبي علي إنك تحب.. ومنو بنت عمي غاليه.. الله يسامحك..
وطلع وخلى أحمد مضايج من حالة ناصر، وقام بعدها ولبس وراح وراه للمستشفى ووصل لغرفة غاليه بس يلس برع، وشاف العم منصور وحرمته طلعوا من الغرفه وراحوا للإستراحه الثانيه بدون لاينتبهون لأحمد الي كان يالس..
وداخل الغرفه ناصر كان يحاول يكلم غاليه وهي ماسكة ورقه في إيدها وتشخبط عليها بالقلم.. كانت شيلتها طايحه على كتفها وشعرها مب مرتب، بس ماكانت حاسه بنفسها ولا بأي شي ثاني..
ناصر قام ورفع شيلتها ولبسها.. وهي ولا كأنه حد مسكها ولا كأنه ناصر أساسا موجود بالغرفه..
ناصر: غاليه.. تعرفين منو ياي يزورج..؟؟
غاليه ماردت عليه وحطت الورقه الي في إيدها عالطاوله وسحبت غيرها وكملت شخابيط..
ناصر: غاليه سمعيني، برع في واحد يالس ويبا يدخل يشوفج.. تعرفين منو..!!!!
غاليه: ...............................
ناصر: أحمد..
غاليه من نطق ناصر إسم أحمد رفعت راسها بسرعه ويلست تتطالعه، ناصر شوي ارتاح من ردة فعلها..
ناصر: إنتي تبين تشوفين أحمد..؟؟
غاليه إبتسمت إبتسامتها الطفوليه الحلوه.. وهزت راسها هيه.. ناصر إستانس وقام وراح للباب وزقر أحمد..
أول مادخل أحمد وطاحت عينه على غاليه حط يده على قلبه، كان شكلها غييير عن غاليه الي تعود عليها، كان لونها أصفر وشاحب.. وضعفانه واااايد وعيونها مبين عليها التعب.. وغاليه من شافته ماحست بعمرها أبدا.. إبتسمت له وحاولت إنها تقوم من مكانها أو تسوي أي شي ومب عارفه..
ناصر راح لها: لالا خلج يالسه..
أحمد: غاليه لاتحركين إرتاحي مكانج..
غاليه هزت راسها هيه.. وهي طايره من الوناسه..
ناصر: تعرفين ليش أحمد هني.. يبا يسلم عليج ويقولج حمدلله عالسلامه..
أحمد: وطبعا ناصر لازم يخرب علي..
غاليه طلعت منها ضحكه خفيفه وناصر إستبشر خير..
أحمد: حمدلله على سلامتج.. ماتشوفين شر..
غاليه هزت راسها بس..
أحمد: الأخت هنديه تهز راسها.. أتشاااا بابا أتشاااا
غاليه: هههههههههههههه
أحمد: هيه جي ضحكي.. يالله نعيد مره ثانيه.. شخبارج غاليه عساج بخير..
غاليه بصوت خفيف: زيــنه..
أحمد: الحمدلله على كل حال... أمممممممم يالله متى بتقومين وبتسوين لي كيكه..؟؟
غاليه إبتسمت إبتسامه عريضه: الحـــين..
ناصر: ههههههههه الحين.. لالا خلج مرتاحه هذا بس يبا ياكل..
أحمد: إنت مايخصك أنا وياها بنتفاهم..
غاليه وريجها ناشف: أنا.. أنا مب زعلانه منك..
أحمد: والله..!!
غاليه: هيه.. ناصر أبا ماي..
ناصر: من عيوني..
وعطاها كوب ماي شربته دفعه وحده..
غاليه: أنا طيحتي هني لأني إكتشفت الي مخباي عني طول هالسنين..
ناصر: هذا أمر الله.. وماتدرين الخير وين..!!
غاليه: والنعم بالله..
أحمد: غاليه.. أنا حبيتج من كل قلبي والله يشهد على كلامي، ومب معناته إني قلت ماشي نصيب يعني إني بدون قلب ولا أحس..
غاليه: أدري والله أدري..
أحمد: وصحيح إني تركتج بس أنا مثلج قررت ما أتزوج من غيرج، قررت إني أبقى بدون زوجه.. لأني عرفت فيج كل بنات الدنيا، وصعب ألقى لج بديل..
غاليه: لا ياأحمد.. لاتحكم على نفسك هالحكم.. إنت من حقك تتزوج ومن حقك تشوف عيالك وعيال عيالك..
أحمد: بس أنـــا.......
غاليه: أحمد.... لو تحبني تزوج، وعيش حياتك وأنا بدعي لك من كل قلبي ربي يسهل لك كل خطاويك..
أحمد نزل راسه وتم ساكت ماعرف بشو يرد عليها، وهو يشوفها تضحي التضحيه الي هو ماقدر يضحي بها علشانها..
ناصر: غاليه معاها حق.. الدنيا لازم تستمر والحياة ماتوقف أبد..
غاليه: أحمد.. إوعدني إنك تتزوج وتعيش حياتك وأهم شي بنوتك تسميها علي.. غالية أحمد..
أحمد: إن شاءالله.. وسامحيني ياغاليه على كل شي.. سامحيني لو غلطت بحقج أو زعلتج بيوم..
غاليه: مسموح.. وأنا مب شايله بخاطري عليك ولازعلانه من أي شي بعد..
وقف أحمد وطلع عنهم يحس نفسه مايقدر يتحمل أكثر، راح بيته وهو يفكر في كلام غاليه، معقوله غاليه هالملاك البريء تتحمل الصدمه وتضحي علشاني وأنا ماقدرت أسعدها.. ياربي ليش حطيتني فهالموقف الصعب..!! ليش..!!




























مر يومي على طلعة غاليه بالسلامه من المستشفى وأهلها وربيعاتها مافارقوها ولا لحظه، طول الوقت حد معاها.. أمها أبوها فتون مرام.. بنات عمها بنات خالتها.. العيله كلها عندها.. وعاليومين منصور يسويلهم عزيمه عالعشا وإلا الغدا ويجتمعون كلهم..
بس غاليه تغيرت من يوم ماظهرت من المستشفى، مب هي غاليه الي يعرفونها دايما سرحانه ومالها نفس لأي شي.. وإبتسامتها الحلوه الي ماتفارقها إختفت.. وحلت مكانها إبتسامه رسميه ترضي فيها الكل إلا نفسها..
اليوم الجمعه وأبوغاليه مسوي عزيمه عالعشا وعازم الكل عليها.. إخوانه وإخواته وعيالهم، وقال لغاليه إنه عنده مفاجأة لها..وقبل لايحظرون كلهم، غاليه طلعت الحديقه تغير جو شويه.. راحت لنافورة الماي ويلست عندها وهي شايله دفترها الصغير الي ماعاد يفارقها.. ويلست تشخبط فيه وتكتب كل الي بخاطرها ولاتقدر تقوله لأحد..
خلصت غاليه كتاباتها وحطت الدفتر على جنب، وفصخت نعالها وحطت ريولها فالماي.. ويلست تغني بصوت عالي وهي مب حاسه بنفسها..



فقدتك يا أعز الناس.. فقدت الحب والطيبه
وأنا من لي فهالدنيا.. سواك إن طالت الغيبه
رحلتوا من بقى وياي.. يحس بضحكتي وبكاي
وحتى الجرح في بعدك.. يغزيني وأهلي به
أنا من لي فهالدنيا.. سواك إن طالت الغيبه
غاليه كانت تغني وهي عاطيه ظهرها للباب ولاحست بالي دخل عليها ووقف يسمعها ويده على قلبه.. غاليه كانت تغني بكل إحساس وحب.. ومن سمعت الي وراها يتنحنح يبا ينبها لوجوده نقزت وطلعت من النافوره وهي تتحراه ناصر أو أي حد ثاني من العيله..
بس من إلتفتت تشوفه وقفت متصنمه في مكانها معقوله.. إنت.. غاليه إبتسمت إبتسامتها الرسميه الي ماعادت تفارقها..
غاليه: هلا والله.. منوره دبي بطلة المزيون سلطان..
سطان: شخبارج ياغاليه.. حمدلله على سلامتج..!!
غاليه: الله يسلمك من كل شر.. يعني إنت المفاجأة الي قال لي عنها أبوي..
سلطان: هو عازمنا صح بس ماظنتي إني أنا المفاجأة، أعتقد يقصد يدتي..
غاليه بفرح: هي يايه وياك..؟؟
سلطان: هيه أبوي قالي أزقر الخدامه تنزل أغراضنا، والحين بروح بدخلها..
غاليه: عمي بعد..!! خلاص روح دخلهم وأنا بنادي الخدامه وبيي وراك..
راحت غاليه داخل تزقر ليندا وشافت أمها في طريجها وقالت لها يدووه يات ونطت برع تستقبل يدتها..
أم منصور: فديـــــت هالويه ياربي.. عسى الله لايحرمني من طلتج الحلوه..
غاليه: يدووووه وحشتيني وااااااااااايد
أم منصور: حبيبتي إشحالج الحين عساج أحسن..؟؟
غاليه: الحمدلله على كل حال.. عمي بدر شخبارك..!!
وراحت تبوس عمها وتستقبله، ودخلتهم للبيت داخل ويلست معاهم وياتهم أمها وسلمت عليهم ويسلت وياهم يسولفون..
غاليه: أسمع صوت الجرس أكيد حد من البنات وصل..
راحت غاليه تفتح الباب وهي مستانسه.. بس سلطان لاحظ تغير حالتها ونفسيتها، مب هذي غاليه الي أعرفها.. البيبي الحبوبه الي كله تراكض وتناقز.. هذي حتى إبتسامتها غير وردودها علينا رسميه ومالها معنى..
رجعت غاليه ومعاها عمتها فجر وريلها وبنات خالتها شروق وشذا.. سلموا على يدتهم وعمهم ويلسوا يسولفون..
فجر: إشحالك أخويه عساك طيب ومرتاح..!!
بدر: الحمدلله بخير ونعمه.. إنتوا إشحالكم عساكم طيبين..
فجر: الحمدلله على كل حال..
غاليه: أميه وينه أبويه..؟؟
أم غاليه: موجود حبيبتي، الحين بينزل..
أم منصور: ماشاءالله شو هالبيت الحلو الغاوي، عاد أنا لاتحطون حجرتي فوق، ماروم على الدري..
أم غاليه: أفا عليج أمايه أحسن حجرة فالبيت حجرتج ومحطيينها لج تحت بدون لاتوصينا..
غاليه: يدووه كم يوم بتقعدون عندنا..؟؟
أم منصور: أنا بقعد إلين تطردوني..
فجر: عيل بتقعدين هني العمر كله..
بدر: لالا نحن مانصبر عنها.. حدها يومين بس..
أم منصور: شو يومين أنا بقعد هني شهرين ولو عيبتني اليلسه بمدد شهرين زياده..
بدر: تبطرت أمي علينا..
سلطان: أفااا وأنا منو بيقعد عندي وبيونسني فالفجيره..!!
أم منصور: تزوج وحرمتك بتسليك..
بدر: خلاص مابنرجع البلاد إلا والدبله في إيد البنيه..
فجر: ههههههههه حار أخويه..
أم غاليه: ههههههه يالله نسير غرفة الأكل ويالله الشباب على الميلس وغداكم بيوصلكم هناك..
راحوا كل في سبيله وغاليه يلست مع عمتها تسولف معاها، تحس عمتها متغيره عليهم اليوم بس مالها نفس تسألها شو الي شاغلنها..
ميعاد: غاليه بنتي رقدت بوديها حجرتج..
فجر: حطيها في غرفه قريبه بتودينها فوق وين بتسمعينها..
ميعاد: صح.. خلاص بحطها فالغرفه الصغيره الي حذالنا..
غاليه: أممممم وينها مروى للحين ماوصلت..؟؟
ميعاد: قالت بتتأخر شوي، مادري شو عندها فالبيت..
فجر: إلا تعالي صج عمر حميج يبا يخطب مروى..؟؟
ميعاد: يقول.. بس مادري أحسها مابتوافق.. أنا قلت بسألها ولو موافقه بقولهم بس مب حلوه يتقدمون رسمي ومايستوي النصيب..
غاليه: صح.. ونحن عيله وحده وممكن تصير حساسيات..
ميعاد: الله كريم.. وينها جميله للحين مايات..؟؟
غاليه: قالت لي بتوصل بعد شوي.. لأن عبدالله راح شوي عنده شغله صغيره وبيرجع..
وبعد نص ساعه الكل كانوا موجودين يتعشون ومستانسين، يضحكون ويسولفون والكل يعلق ويضحك ماعدا فجر وغاليه..
أم غاليه: فجر فديتج شو فيج..؟؟ أشوفج ساكته..!!
فجر: هااا لا بس...
غاليه: عمووه شوفيج.. شي صاير..؟؟
فجر: أممممممم هيه
غاليه: شو..!! قولي..
فجر: انا.. أنا حامل..
الكل صرخ مره وحده وإشتل المكان بالتهاني والصراخ، والصوت وصل للشباب فالميلس..
ناصر: بسم الله منو يصرخ جي..!!
أبوغاليه وقف: لايكون شي صاير..!!
علي: لا ياعمي إستريح..أكيد فجر خبرتهم..
عبدالعزيز: شو تخبرهم..؟؟
علي بإبتسامه عريضه: إنها بتصير أم وبصير أبو..
أبوغاليه: والله... مبرووك تستاهلون كل خير..
وقاموا الشباب يباركون لعلي وهو طاير من الوناسه..


بعد العشا غاليه إنسحبت من القعده وطلعت برع، صايره ماتحب الجمعات ولا السوالف والضحك، تغيرت شخصيتها وإستوت إنطوايه بشكل فظيع..
غاليه راحت الحديقه تدور مذكرتها الي نستها يوم وصلت يدتها، راحت للنافوره ولقت سلطان عاطنها ظهره ويالس، إقتربت منه وهو ماحس فيها.. ووقفت وراه وتوايج من فوق جتفه تبا تشوفه شو يسوي.. لقته ماسك مذكرتها بس مسكرنها ويعصرها بين إيديه بقوه وشكله يفكر ولا حاس الدنيا..
غاليه: إحم إحم ممكن آخذ مذكرتي..
سلطان رفع راسه وشافها ويلس يطالعها فترة وهو ساكت.. وهي حست إنه قرأ مذكراتها..
غاليه: أكيد قريت دفتري..!!
سلطان بصوت مبحوح: ليش كل هالحزن ياغاليه، الدنيا بعدها بخير..
غاليه سحبت دفترها: هههههه ادري.. وبعدين هالكلمات بس يوم أكون مضايجه.. يعني مب كل يوم..
سلطان: حتى ضحكتج من ورا خاطرج..
غاليه بدلع: ياسلااام ياطبيب علم النفس..
سلطان إبتسم لها: غاليه.. نحن إخوان، وأي شي تبينه من عيوني.
غاليه: ماتقصر ياولد عمي..
سلطان قام وراح عنها داخل يوم شاف مروى يايه صوبهم، سلم عليها بكل برود ودخل الميلس، مروى على طول راحت لغاليه الي يلست مكان سلطان ودمعتها على خدها..
مروى: حبيبي ليش تصيحين..؟؟
غاليه: أنا ما أصيح.. بس الهوا البارد دخل في عيوني..
مروى: هوا بارد..!! نحن داخلين عالصيف وإنتي تقولين لي صيف، شو شايفتني هنديه..
غاليه: هههههههههههههه لافديتج.. بس إنتي تبالغين.. وأنا غزال مافيني أي شي..
مروى الي مب مقتنعه: أوكي يالغزال.. بعديها هالمره، والحين قومي يدووه تناديج..
راحت غاليه مع بنت عمها وهي مضايجه.. ياربي كيف بجابل هالناس كل يوم، كيف بكمل كليتي وأنا بهالحاله.. الحمدلله بابا وقف لي هالكورس لأني صج مالي خلق أداوم..
رجعت غاليه لداخل البيت وهي تغصب نفسها على إبتسامتها البايخه الي ماعادت تخدع أي أحد..





























في شركة أبوغاليه..

ناصر وأحمد كانوا معتفسين بالأوراق الي عندهم، يبون يخلصون شغلهم بسرعه لأنهم ماخذين باجر إجازة وبيطيرون على عوافي.. ودهم يغيرون جو بدل الشغل والملل، ومن بعد المشاكل الأخيره ناصر حب إنه يظهر أحمد من حالة الحزن الي هو فيها ويوديها عوافي يتسلون لهم يومين مع الربع والشله الي إنقطعوا عنهم من فترة طويله..
أحمد: ناصر شوف هالورقه أحسها محتاجه تدقيق من المحاسبه..
ناصر: أممممم محتاجين لمساعده.. تعرف رقم البنات فالمحاسبه؟؟
أحمد: هيه لحظة شوي..
ومسك التلفون وإتصل بالقسم، وردت عليه وفاء وقالها لو هي فاضيه أو وحده من البنات إتييهمم لمكتب ناصر محتاجينها ضروري..
ورجع يكمل الشغل مع ناصر، وبعد خمس دقايق ياتهم سلمى الي للحين بداخلها جرح من أحمد..
سلمى: السلام عليكم..
ناصر+أحمد: عليكم السلام..
ناصر: تعالي ياسلمى محتاجين مساعدتج..
أحمد بداخله ماشي غيرج يطرشونها والله للحين أحس السوالف الي من بينا ما إنتهت..
سلمى راحت ويلست وعطاها ناصر الأوراق.. سلمى يلست تدقق فالأوراق وتعطيهم تعليقاتها وهي بداخلها قلب ماوقف دق من يوم قالولها أحمد يبي وحده تساعده، ومع إنها مقرره إنها ماتتقابل معاه ولاتعطيه ويه، بس ماتدري ليش من قالوا أحمد محتاج مساعده نقزت مره وحده وراحت له..
ناصر: سلمى.. سلمى.. شو فيج..!! خلج معانا..
سلمى: هااا آسفه بس إندمجت فالأوراق..
أحمد: سلمى خذي هالورقه بعد ودققيها..
سلمى خذت الورقه ويدها ترتجف حتى ناصر إنتبه لرجفتها بس أحمد كان يعطيها الورقة وهو يطالع ورقه ثانية..
سلمى: أممممم في أوراق ثانيه..؟؟
ناصر: شكلج مستعيله..!!
سلمى: لا بس قلت باخذهم مكتبي وبدققهم على راحتي..
أحمد بإستهزاء: وهني ماتاخذين راحتج..!!
سلمى اقهرت منه: مب قصدي بس......
ناصر: على راحتج ياسلمى، بس تخلصين الأوراق قبل نهاية الدوام، لأنا باجر إجازة وبعدين ويك إند..
سلمى: إن شاءالله.. كلها ساعتين والأوراق بتكون عندكم..
أحمد: ساعتين مب يومين.. أدريبج لج سوابق فالتأخير..
سلمى وقفت وهي مقهوره ومنجرحه من أحمد، بس ماردت عليه وناصر عطاه نظره وخلاه يسكت..
ناصر: السموحه ياسلمى.. تفضلي على مكتبج.
راحت سلمى وهي ماسكه دمعتها بالقوه، ومن سكرت الباب ناصر مسك أحمد من جتفه..
ناصر: حرام عليك البنيه شو سوت لك..؟؟
أحمد: مادري.. بس أحس من أشوفها لازم أعق عليها رمسه..
ناصر: بس مبين عليها تعزك وايد..
أحمد مستغرب: تعزني منو قالك..!!
ناصر: يا أحمد بدون لاحد يقولي.. كلامها حركاتها، ولاحظت وهي تاخذ لأوراق منك يدها كانت ترجف.. ياخي يكفي إنها متحمله كلامك الي مثل السم..
أحمد: هذا الي قاصر بعد ترد علي..وبعدين هي من النوع الهادي الي مستحيل يرد على حد..
ناصر: ههههههههههه والله إنك ماتعرفها.. لسانها أطول عنها، ومره ندى قالت لي إنها مابقى حد ماهزبته..
أحمد: سلمى..!! معقووووله..!!!!!!
ناصر: هيه سلمى.. وإشمعنى إنت الي ساكته عنك مادري..
أحمد سكت ويلس يطالع الدريشه وهو يفكر.. معقوله سلمى تحبني وأنا مب حاس فيها، بس هي تشتغل هني من قبل لا أحب غاليه ليش ماحسيت فيها..
ناصر: حووووووووه بسك لاتفكر وايد.. فكر بعدين خلنا نخلص شغلنا..
وبعد ساعه دخلت عليهم ندى وهي شايله الأوراق الي خلصتهم سلمى..
ناصر: ووينها سلمى..؟؟
ندى: ياسلاام وندى ماتنفع..!!
ناصر: ندى على الراس من فوق.. بس نحن عطينا الأوراق لسلمى..
ندى: أمممممم سلمى مادري شو الي مضايج فيها، وحليله مراجع واقف يسألها ردت عليه وهو مسكين ماسمعها ويوم سألها مره ثانيه صرخت فيه..
ناصر: ههههه والله بنخسر عملاؤنا بسببها..
أحمد: سلمى وايد هاديه كيف جي تسوي..
ندى وهي مستغربه: سلمى.. هههههههههههههه والله لو قلت لي إبليس أهدا منها بصدقك بس سلمى مستحييييييييل..
ناصر: ههههههههه الله ياخذ عدوج.. بس هي وااايد هاديه مع أحمد، لدرجة إنه مايصدق عليها هالكلام..
ندى بنظره خبيثه: الله أعلم بالنفوس..
أحمد: شو قصدج..؟؟
ندى: أممممممم ولا شي.. يالله تامروني بشي ثاني..
ناصر: سلامة راسج..
ندى: باي..
ندى طلعت وأحمد سرحان وحاير ومب عارف شو يسوي..
ناصر: لاتفكر وايد، قوم ورا ندى شوف شو الي تبا تقوله..
أحمد كأنه ينتظر حد يقوله قم، نقز وراح ورا ندى ومسكها قبل لاتوصل للمكتب..
ندى: هههههههههه
أحمد: ليش تضحكين..؟؟
ندى: السالفه مايبيلها إثنين يفتون فيها، الي فداخلك صح..
أحمد: يعني سلمى..................
ندى: هيه سلمى تحبك ومن زمان مب من اليوم ولا أمس..
أحمد: وإنتي شو دراج..!! إحساس..؟؟
ندى: لا مب إحساس.. هي بلسانها إعترفت لي فاليوم الي صرخت فيه عليها.. وخليتها تستأذن في نص الدوام وتروح البيت..
أحمد: هيه تذكرت هذاك اليوم..
ندى: لو إنت تبادلها أو بديت تميل لها.. ترى هي طيبه وتستاهل كل خير..
أحمد سكت شوي وبعدين شكرها وراح عنها رجع لناصر وهو سرحان حتى باجي الشغل خلصه ناصر بروحه..

نرجع لغاليه الي يالسه في الصاله مع يدتها وعمها بدر، كانوا يالسين ينتظرون منصور يرجع من الشركه علشان يتغدون مع بعض..
أم منصور: منصور متى بيرجع والله يوعانه..
بدر: أمييه قلنا لج تغدي قلتي لا بنتظر ولدي..
أم منصور: هيه بنتظره، عيل أخلي ولدي يوعان وأنا هي أتغدا أشبع..
غاليه: خلاص يدووه كلها ربع ساعه وإن شاءالله بيكون هني..
دخلت عليهم أم غاليه: عمووه أحط لج الغدا، إنتي راعية سكر وضغط مب زين ماتاكلين..
ام منصور: لالا توني كليت مع غاليه بسكوت وكيك..
بدر: هههههههههه الله والأكل..
غاليه: أميه إنتي حطي الغدا وأبويه الحين بيوصل..
بدر: وينه سلطان تأخر..!!
غاليه: راح مع سعيد وخليفه..
أم منصور: سعوود وخلووف هالسبلان وينهم، من ييت ماشفتهم غير اول يوم..
أم غاليه: وإنتي بتصيدينهم.. هالإثنين رايحين فيها حتى اهلهم مايشوفونهم..
ام منصور: غاليه تعرفين أرقامهم..؟؟
غاليه: لا.. بس بدق على مروى وباخذ رقم خليفه..
راحت غاليه تتصل لمروى وتاخذ عنها الرقم، ويوم رجعت لقت أبوها واصل ويسلم على أمه.. راحت وسلمت عليه وعطت يدتها التلفون بعد مادقت على خليفه..
أم منصور: السلام عليكم..
خليفه: وعليكم السلام.. نعم الوالده آمريني..
أم منصور: الوالده.. لا الغالي انا داقه اتعرف.. ممكن..؟؟
الكل إنفجر من الضحك على أم منصور الي تعرف تلعبها صح، وأولهم خليفه الي مات على روحه من الضحك..
خليفه: هههههه ماظنتي خلصوا غراشيب دبي وحولت على العيايز..
أم منصور: أنا صج كبيره بالسن بس مب عيوز.. وعندي بيزات ومستعده أعيشك بنعيم..
خليفه: لو على البيزات الحمدلله ماعلي قصور..
أم منصور: زيادة الخير خيرين..
خليفه: هههههههه لاحووول شو هالبلوه اليوم..
أم منصور: انا بلوه يالخام..
خليفه: يدوووووووووووووووه
أم منصور: ماعليه أنا تقولي عيوز وبلوه.. هاااااا
خليفه: فديتج يدووه سامحيني ماعرفتج..
أم منصور: الحين أباك إتييني..
خليفه: ماطلبتي من عيوني.. كلها عشر دقايق وأنا عندج..
بندت أم منصور وشافت الكل ميت من الضحك على سوالفها..
أبو غاليه: والله أميه إختربتي.. تعرفين بعد فالمغازل..
أم منصور: أفا عليك إنت بس.. بس زين ولدكم طلع ريال ولا ركض ورا الفلوس..
غاليه: خليفه ماتهمه البيزات..
بدر: الله يخليه لكم إن شاءالله.. وعسى سلطان معاه..؟؟
أم منصور: هيه سمعت صوته يوم يكلم سعيد..
أم غاليه: يالله قوموا تغدوا..
وتغدوا الجماعه مع بعض وبعدها يلسوا يشربون الشاي وسمعوا أصوات الشباب برع.. غاليه لبست شيلتها ويلست بعيد عن يدتها لأنها تعرف خلوف زين بيقعد يتلزق بيدته وبيلزق فيها..
دخل أول شي سلطان ووراه سعيد وخليفه منخش وراهم..
سلطان: السلام عليكم..
الكل: وعليكم السلام..
أم منصور: وينه مسود الويه خلوووف..!!
سلطان: يدووه طلبتج..
أم منصور: أبدااا لاتتوسط له.. وينه أقولك ظهره لي..
سعيد: ماشي فايده لازم ينداس في بطنك..
وطلع خليفه من وراهم وهو ماسك سعيد يحتمي فيه..
خليفه: يدووه فديتج سامحيني.. بسويلج الي تبينه، بوديج كل مكان.. بستوي لج دريول بس الله يخليج إلا عصاتج..
أم منصور: دام بتصير لي دريول خلاص بسامحك..
خليفه: والله..؟!!
وكان بيروح يعفد على يدته ويبوسها بس سلطان مسكه..
سلطان: صبر صبر.. يدوه اول شي عطيه الأمان.. أعرفج فجأة تخونين..
أم منصور: مااااااالت عليكم.. عليكم الأمان.. والله لو مامعزة المرحومه كنت براويك شغل الله..
خليفه راح ليدته بسرعه ويلس يبوسها ويحظنها والكل يضحك عليه..
أم منصور: خووز عني بسني من الحباب..
خليفه وهو يبوس يدها: كم يدووه عندي وغاليه علي .. بس وحده..
أبوغاليه: ياللواااات..
سلطان: هههههههههههههه خالتي ماشي قهوه..
أم غاليه: بلى فديتك فيه قهوه..
وعطته الفنيال: ماشاءالله عليك تشرب قهوه، عيال اليوم مامنهم فايده ودروها القهوه..
غاليه: قولي ماعرفناها علشان نودرها..
أبوغاليه: أنا إسمحولي بسير برقد شوي، العصر وراي شغل..
أم منصور: سير فديتك ربي يحفظك.. خلوف عطني دلة القهوه أشوفك..
خليفه: يدووه إنتي من كم يوم هني، ليش ماتيين بيتنا تغيرين جو..
أم منصور: والله ركبي تعورني مافيني أغير المكان كل شوي..
سعيد: مابتغيرين البيت يدوه.. من بينهم يدار واحد وحتى في باب فالحديقه..
أم منصور: والله..؟؟
خليفه: هيه يدووه.. بيتنا وبيت عمي متلاصقين.. بس بيت عمي بوجاسم شوي بعيد..
أم منصور: خلاص عيل اليوم بالليل بسير عندكم..
غاليه: نعم نعم.. شو هالصرقه عيني عينك.. تسرقون يدتي من بينا وجدام عيني بعد..
خليفه: إنتي جب جب.. مب يدتج بروحج..
أم منصور: خلووف ويعه لاتسكت بنت عمك هالشكل..
سعيد: هاااي دلوعه ماعليج منها.. موقفه هالكورس من الجامعه وباركه لي فالبيت.. أمحق تعب الي فيج..
غاليه: مايخصك فيني كيفي..
أم منصور: سعوود مايخصك في بنت عمك، إسكت يالله..
غاليه: أنا بسير برقد.. ويدوه بسير معاج فالليل بيت عمي..
أم منصور: إن شاءالله فديتج..

طلعت عنهم غاليه ويلست في غرفتها، هي مافيها رقاد بس مالها نفس تقعد معاهم وسلطان نظراته كلها شفقه عليها وهذا الشي واااايد يزعجها..
على المغرب غاليه نزلت تحت ومالقت حد بالصاله غير أمها..
غاليه: عيل الدنيا فاضيه.. وينهم الشعب..
أم غاليه: يدتج راحت المطبخ مادري شو تبا تييب.. وأبوج راح الشركه، وعمج بدر طلع مع عمج بوحميد..
غاليه: وسلطان وينه..؟؟
أم غاليه: راح مع أبوج الشركه يقول تعب من اليلسه فالبيت..
غاليه: أميه كنت أبا أسألج.. جاسم متى عرسه..؟؟
أم غاليه: الأسبوع الياي.. بس مابيسوون عرس.. حفله بسيطه بس..
غاليه: وليييش.. الواحد كم مره بيعرس..!!
أم غاليه: خالتج تقول هذي رغبة العروس.. ماتبي عرس..
غاليه: فتون أم الكشخه والخقه ماتبي حفله.. غريييييييييبه..!!
أم غاليه: أنا بسير المطبخ أخاف يدتج تظارب الخدامات وإطفشهن عني مافيني أيب غيرهن تعودت عليهن..
غاليه راحت ورا أمها المطبخ وسحبت يدتها وخلتها تتجهز لأنهم بيروحون بيت عمها.. بعد نص ساعه كانوا في بيت بوحميد يسولفون، بس غاليه ماطولت معاهم إستأذنت وطلعت عنهم، راحت بيتها وخذت مفتاح سيارتها وطلعت فيها..
غاليه من ظهرت من المستشفى وهي حابسه نفسها فالبيت ماتبي تظهر ولا تبي تجابل حد.. واليوم حست بنفسها لو ماظهرت بيستوي فيها.. فقامت وراحت تتمشى عالبحر.. الجو كان هادي وحلو.. وقفت بسيارتها عالبحر وهي مشغله سي دي أغاني وتسمعه وهي سرحانه فالبحر..








[color=#FF0000]إوعدني عني ماتغيب.. تبقى هنا جنبي قريب..
محتاج أنا مثلك حبيب.. يفهم عيوني وضحكتي..
فيك إنت حلمي من زمان.. وإنت الهوا وأدفا حنان..
تلقى معاك روحي الأمان.. ياأغلى بشر في دنيتي..[/color

















غاليه بندت السياره ونزلت تقعد عالبحر، لقت لها كرسي ويلست عليه وهي مب حاسه بالي حواليها، كانت يالسه وهي تشكي للبحر حزنها وضيجها.. كانت تبا تفر همومها عالبحر بس كانت تحس البحر مليان هموم ومشاكل..
ليش يادنيا ماترحمين.. ليش تعطي باليمين وتاخذين بالشمال، عطيتيني أحسن أب وأم.. عطيتيني البيزات والبيت وكل شي، بس حرمتيني من أغلى شي فالدنيا.. حرمتيني من الصحه.. ليش ياربي ليش، إستغفر الله انا شو يالسه أقول.. هذا حكم الله وقدره، وأنا لازم أصبر على الي الله كاتبه..
(( الســــلام عليــــكم ))
حست بصوت حد يسلم عليها وكأنه ياي من بعيــــــــــد، الصوت هزها وصحاها من أفكارها وهمومها.. إلتفتت وشافت الريال الي سلم واقف ويبتسم لها.. إبتسمت له بالرغم من دمعتها الي على خدها..
غاليه: وعليكم السلام.. أستاذ خالد!! شو تسوي هني..؟؟
خالد: مب إتفقنا على خالد بس..
غاليه: آسفه.. خالد، شو تسوي هني..؟؟
خالد: هذا مكاني كل يوم أقعد هني هالوقت.. بس اليوم شفت غزال سرحان محتل مكاني..
غاليه: هههههههه عيل إسمحلي اليوم سويت إحتلال على منطقتك..
خالد: المكان وصاحبه تحت أمرج.. كم غاليه عندنا.
غاليه: الله يخليك.. تعال إقعد ولا تبيني أروح وإنت تقعد بروحك..
خالد يلس عالطرف الثاني: لالا أبدا خليج مرتاحه، ولو تبين أنا الي بمشي..
غاليه: لا بالعكس.. خذ راحتك..!!
سكتت غاليه ورجعت تتطالع البحر.. وخالد يلس يطالعها ولاحظ الحزن الي تارس قلبها ومبين على ويها.. كسرت خاطره، كل هالجمال والعز وتغزيها كل هالهموم والمشاكل..
خالد: غاليه..
غاليه رسمت إبتسامتها الرسميه: نعم..!!
خالد انصدم منها: معقوله ياغاليه.. ليش جي..!!
غاليه مستغربه: شو..!!
خالد: كل شي فيج تغير.. ضحكتج.. كلامج.. أسلوبج.. برائتج..!!
غاليه: أنا مثل ماأنا ماتغيرت..!!
خالد: غاليه الي عرفتها من سنتين مب هي غاليه الي يالسه جدامي.. غاليه منصور ضحكتها تنسمع من آخر الدنيا، كشختها ومرحها وسوالفها تحبب الكل فيها.. والحين ماشوف غير شبح إبتسامه بالغصب تظهر على ويها..
غاليه وهي تتنهد: شو تباني أسوي، وإنت شايفني جدامك بدون مستقبل ولا أحلام.. كل أحلامي ماتت جدامي وأنا واقفه أتفرج عليها.. كل شي ضاع وأنا.. وأنا ضعت..!!
خالد: لا ياغاليه.. الدنيا ماتوقف عند تحطم الأحلام.. الدنيا تستمر وتمشي، ونحن عايشين في إمتحان من رب العالمين والي يخسر فالإمتحان يخسر دنيته وآخرته..
غاليه بخصه في حلجها: خالد إفهمني.. أنا مهما درست وتعلمت وإشتغلت وشغلت أكبر المناصب فالبلاد بظل.. بظل وحده مريضه اليوم أو باجر بتموت..
خالد: بسم الله عليج من طاري الموت.. غاليه (( إعمل لدنياك كأنك تعيش أبدااا.. وإعمل لآخرتك كأنك تموت غداا..))
غاليه: مافهمت..!!
خالد: يعني كلنا بنموت فيوم من الأيام صح.. المريض وغير المريض، أنا يدي مريض من هو توه شباب، يعني من كان أبوي بعده فالعشرين.. تخيلي الحين يدي مريض من أكثر من ثلاثين سنه.. وسبحان الله للحين عايش..
غاليه: سبحان الله..
خالد: الي أبي أقوله لج.. الإنسان مايعيش لنفسه بس، يعيش للي معاه أكثر من نفسه.. أبوج كل يوم يكلمني ودمعته على خده، يقولي غاليه يالسه تموت جدامي وأنا مب قادر أسويلها شي..
غاليه: حرام.. بس أنا أسولف معاهم وأضحك علشان ما أحسسهم بشي..
خالد: إنتي بس تسولفين وتضحكين لكن شوفي نفسج، إوقفي جدام المنظره لو دقيقه وسألي نفسج هل انا غاليه الأوليه..؟؟ شوفي لبسج.. شوفي مكياجج.. شوفي ضحكتج الي ماتت..
غاليه نزلت راسها وشوي وبتصيح..
خالد: وأهم من هذا كله.. شوفي كلامج، بالأول بابا وماما.. والحين أميه وأبويه، أبوج واااااايد مضايج من هالكلمه، يقولي تحسسني كأني السبب فالي قاعد يصير لها.. علشان جي غيرت معاملتها معانا..
غاليه: فديت أبويه والله مب قصدي أزعله.. بس أنا........
خالد: إنتي فكرتي في أبوج وكيف بترضينه، وطلعتي من المستشفى وبديتي تتكلمين وتسولفين معاهم بس... بس بدون نفس بدون روح..
غاليه مسحت دمعتها: خلاص ياخالد.. إوعدك إني أعيش مثل قبل وأحسن بعد.. وأسعد أبويه وأميه..
خالد: إن شاءالله يارب.. وأنا كل يوم أقعد هني لو تبين تقولين لي أي شي وتحكيلي أنا مستعد أسمعج..
قامت غاليه وودعته وراحت لسيارتها، ركبت السياره وراحت على طول على البيت وهي تبا تغير أشياء وايد بحياتها، تبا تسعد الغير.. تبا تعيش أحلى سنين عمرها ولو كانت الأخيره..
دخلت البيت وماشافت حد فيلست تدورهم..
غاليه: بـــابــــــــا... مــــامـــــــــا وينكم..!!
طلع لها أبوها من غرفة الأكل وهو مصدوم من الي يسمعه..
أبوغاليه: أنا هني بابا تعالي..
غاليه راحت له وحظنته: فديـــــــتك إشتقت لك مووووت..
أبوغاليه: فديت روحج وانا بعد إشتقت لج..
غاليه: ووينها فاطمه المنصوري، أكيد يالسه تاكل ولا تترياني..
أم غاليه: هههههههههههههه تعالي هني ياأم لسانين..
وراحت غاليه وباست أمها وحظنتها بقووو
أم غاليه: هههههههه بسج ذبحتيني..
أبوغاليه: يلسي فديتج تعشي معانا..
غاليه: أممممممممم أوكي بس بشرط..
أبوغاليه: عيوني لج.. إنتي آمريني بس..
غاليه وهي تيلس على ريول أبوها: أبا أقعد على ريول بابا وماما تعشيني مثل ماكنتوا تسوون وأنا صغيره..
أبوغاليه: هههههههه ولو إنج بتكسرين ريولي.. بس يالله كل شي علشانج يهون.. تعالي يافاطمه أكلي هالدلوعه..
أم غاليه: ههههههههههههه والله هالبنيه ماتكبر أبد..
ويلسوا يتعشون وهم يضحكون ومستانسين للتغير الي بدا على غاليه، وإن شاءالله كل حياتها تكون ضحك وفرح..













وتم بحمدالله البارت الثامن عشر..

وأنتظر ردودكم الغاليه على قلبي..

ومره ثانيه السمــــــوحه عالقصور..

وفإنتظار آراؤكم الحلوه وتعليقاتكم وأفكاركم





(غرشوب البدو)

يسلمووو
ناايس
غمضتني غالية ..
واللع ان الدمعه نزلت من عيني ..
الله يعينا ..
نترياا البارت

تسلم ع البااااارت


ونتريا الباارت الياااي

السلام عليكم

شكرا ع المرور

انا راح انزل هي البارات الحين وحاول انزل الباقي باقرب فرصه
لانه الاسبوع الياي عندي جامعه انا واختي

السموحه




الجزء التاسع عشر..



ياحبيب الروح بكتب لك وصاتي ..
إن غديـت الـيوم فـي حـبك جتيـل..
أنشــدك بــالله لـي طـفت برفــاتي..
لاتخـــلي دمــعــة عيونــك تسيــل..
لاتـذكــرني بــحــبك يــاغــنــاتــي..
لاتذكـرنـــي بماضيــك الجــمــيــل..
فــي صــدى ذكــراك بــقزر حياتي..
مــستحيــل أحــب غيــرك مستحيـل.






اليوم عرس جاسم وفتون، الحفله كانت بسيطه وعاديه في بيت بوجاسم.. العايله كلها حظرت وربعهم المقربين.. فتون كانت واااايد حلوه فستانها الأبيض فخم وحلو من إختيار شروق وشذا.. والحفله كانت فالحوش برع لأن الجو بعده بارد وحلو..
غاليه ومرام كانوا يالسات مع فتون عالكوشه يسولفون معاها ويضحكونها..
فتون تهمس لغاليه: ماتحسيني دبه بالفستان..؟؟
غاليه: هههه إنتي من بونج دبه..
فتون: لا أقصد علشان....
مرام: إنتي لاتفكرين فهالشي وإن شاءالله محد بيلاحظ..
فتون: إن شاءالله..
غاليه: بتروحون الفندق..؟؟
فتون: هيه.. جاسم حاجز لنا هناك، أنا قلت له خل نقعد فالبيت قالي لا الفندق أحسن..
غاليه: أحسن لكم..
فتون: وباجر بنسير أبوظبي بنقعد أسبوع وبنرجع..
مرام: الله يهنيج يارب..
وإستمرت الحفله للساعه 12 بالليل، وبعدها دخل جاسم وسلم على حرمته ويلس معاها عالكوشه.. وبعد نص ساعه نزلوا من على الكوشه ودخلوا غرفتهم يتجهزون لروحة الفندق..
أم غاليه: غاليه فديتج يالله نروح..
غاليه: إن شاءالله ماما.. بس صبري بحط باقة الورد عند غرفة المعاريس وبرجع..
غاليه دخلت البيت وهي لابسه شيلتها بس مب متغشيه، طلعت فوق وحطت الباقة عند غرفة جاسم ونزلت تحت.. وهي على الدري تمشي بسرعه طلع لها هشام الي كان يركب الدري ومنزل راسه وكانت شوي وبتدعم فيه..
غاليه: هشام ماشفتك..!!
هشام: ههههههههه انا شفتج وإنتي تحطين الورد شكلج مثل الحراميه الي أول مره بحياتها تسرق..
غاليه: ههههههههههه ماعليه تتطنز علي.. أنا مستعيله ولا كنت عرفت دواك عندي...
هشام وهو يمشي عنها: good night baby
غاليه نزلت وراحت لأمها وروحوا عالبيت، فالبيت كان أبوها يالس ينتظرهم وهو يطالع التلفزيون..
أبوغاليه: لا جان يلستوا عند المعاريس في حجرتهم تونسونهم..
أم غاليه: نحن عادي بنسويها بس قالولنا عيب..
غاليه: هههههههههههههههههه
أبوغاليه: زين يوم تعرفون العيب..
غاليه: بابا بعدها الساعه وحده.. إحمد ربك العرس فالبيت ولا لو فصالة العرس والله مانظوي إلا ثلاث الفير..
أم غاليه: ويمكن أربع بعد..
أبوغاليه: وليش مستعيلات تريقوا عندهم وبعدين تعالوا..
غاليه: ههههههههه مره ثانيه إن شاءالله.. يالله أنا بطلع غرفتي تصبحون على خير..
راحت غاليه غرفتها وبدلت وحطت راسها عالمخده بس الرقاد اليوم مخاصمنها.. ياربي شو هالأرق اليوم..
قامت غاليه وفتحت الكمبيوتر صار لها أكثر من شهر مادخلت النت، ويوم بطلت المسن لقت أحمد أون لاين.. قام قلبها يدق طبول.. ياربي أنا من صارت السالفه مادشيت المسن ولاسويت له بلوك..
ويلست غاليه تتطالع النك نيك مالته وهي سرحانه وتتذكر كل الأشياء الحلوه الي كانت من بينهم..
مزيون بوظبي: غــــاليه..!!
غاليه تيبست في مكانها، شو أرد عليه شو أقوله..؟؟
غالية أبوها: أمممم أحمد..!!
مزيون بوظبي: لا.. أنا هيا أخته، أحمد رايح عوافي من يومين.. ولارجع للحين.
غاليه إرتاحت شوي يوم عرفت إنه مب أحمد، هي تعرف هيونه دايما أحمد يحكيلها عنها، وتدري إنه قايلها عن علاقتهم..
غالية أبوها: هلا هيا اشحالج..؟؟
مزيون بوظبي: الحمدلله على كل حال..
غالية أبوها: مايدري عنج أحمد ولا هزبج على يلستج على جهازه..
مزيون بوظبي: ههههههههههه لا مابيقول شي.. لأني قايلة له بستخدمه أبا أزدهب من النت لعرسي.. ولقيت المسن شغال..
غالية أبوها: والله خلاص بتعرسين..!! الله يوفقج يارب..
مزيون بوظبي : مشكوره حبيبتي.. عقبالج..
وتندمت إنها كتبت هالكلمه لأنها فلحظه نست مرض غاليه، حتى غاليه من شافت الكلمه تيبست في مكانها.. وسكتت ولاردت عليها..
مزيون بوظبي: فديتج بخليج الحين بكمل شغلي..
غالية أبوها: الله يحفظج الغاليه.. أمممممم سلمي على أحمد..
مزيون بوظبي: يوصل غناتي.. باي..
وبندت غاليه وراحت وإنسدحت عالسرير.. باربي ليش فتحت الكمبيوتر بس علشان أضايج في نفسي.. خلاص من باجر ببيعه وبشتري غيره مافيه ولا شي عن أحمد..
نامت غاليه وهي تفكر كيف بتقدر تنسى أحمد الي أول شخص تعيش معاه تجربة حب من طرفين..


صارت عاده عند غاليه إنها كل يوم بالليل تروح البحر تغير جو، تشوف هناك المحامي خالد الي ماشاءالله عليه حبوب ويحب يسمع للغير.. غاليه تقعد ترمس وتشكي له الحال.. وهو يسمعها وأحيانا ينصحها، أحلى شي فيه إنه إبتسامته ماتفارق ويهه.. ودايما ردوده لأي سؤال موجوده وبالمنطق..
اليوم غاليه يلست جريب الساعه عالبحر بس خالد اليوم مب موجود، وغاليه تشرب العصير وتسولف للبحر.. ويوم ملت وحست إنه خلاص مب ياي اليوم شالت أكياس الأكل الي بيدها وقامت تبا تفرهم فالزباله.. واول ما لفت تبا تفر الوصخ إلا وتشوف في ويها خالد، بس للأسف إنتبهت متأخر..!!!!!!!!!!
وكانت النتيجه حمام بارد من علبة الماي..
غاليه: انا آآآآآآآآآسفه والله مب قصدي.. سووووووري خالد..!!
خالد: هههههههههههه والله توني متسبح، حضرتج شامه فيني ريحه..!!
غاليه وهي من الخاااطرمفتشله: السموووووحه والله ماشفتك..
خالد: لا والله عادي.. هذا ماي بس.. ولا في شي ثاني..!!
غاليه: لالا بس ماي.. صبر بييب لك كلينكس..
خالد: تعالي تعالي ماله داعي.. الحين بينشف فالهوا..
غاليه: أبيييييه والله فشيله..
خالد: يابنت الناس لاتكبرين السالفه.. عادي تحصل في أحسن العائلات..
غاليه: أمممممم ليش متأخر اليوم..!!
خالد: إسمحيلي بس اليوم كنت معزوم على العشا في ميلس ربيعي، وتأخرت عندهم شوي..
غاليه: اهاااا خلاص عيل مسمووووح..
خالد: شكلج بتروحين..!!
غاليه وهي تفر فالزباله: هيه والله تأخرت عالبيت.. وأبوي من يومين صاير شيبه عسى مانتأخر أنا وماما دقيقه إلا وحشر الدنيا..
خالد: هههههههههههههه الله يخليه لكم إن شاءالله..
غاليه: بشوفك مره ثانيه.. باي..
خالد: الله يحفظج مع السلامه..

رجعت غاليه البيت وهي تفكر في خالد، ياربي أنا ليش كل يوم يالسه أشوفه وأكلمه.. مب كفايه أحمد والي صار معاه، مافيني على تجربه يديده وأنا عارفه إنه كل هذا مامنه فايده..
وصلت غاليه البيت وشافت سيارات غريبه عند باب البيت، راحت لأمها وشافتها فالمطبخ..
غاليه: ماما في ضيوف عندنا..؟؟
أم غاليه: هيه حبيبتي.. أبوج ربعه يايينه من السعوديه، وبيقعدون عندنا يومين..
غاليه: يعني بيرقدون هني..!!
أم غاليه: هيه.. فالملحق الي برع..
غاليه: منو معاهم، عسى بنات بعد..؟؟
أم غاليه: ربيع أبوج وحرمته وولده لؤي وحرمة ولده مزنه، وولده الثاني مشعل وبنتهم جنى..
غاليه: والله..؟؟ كم عمرها جنى..!!!
أم غاليه: تقريبا 21 أو أكثر..
غاليه: وشفتيها..!!
أم غاليه: هيه يات وسلمت وعاد أبوج حلف عليهم يلغون حجز الفندق وإيون هني يباتون.. والحين راحوا إييبون أغراضهم..
غاليه: عيل منو الي هني..؟؟
أم غاليه: أبوهم.. يالس مع أبوج..
غاليه: خلاص عيل بسير ببدل ثيابي..
وطلعت غاليه فوق تبدل ثيابها وهي محتاره شو تلبس.. الي أعرفه السعوديات كشيخات.. وأكيد بنتهم بتكون كاااشخه.. وانا لازم أكون أحلى وأكشخ منها.. أمممممم بلبس هالبدله السوده أعرف الأسود يحليني أكثر..
لبست غاليه البدله الكويتيه.. كانت بنطلون أسود طويل وواسع.. ومعاه القميص الطول الأسود لتحت الركبه، شكله خبااااال وصج حلاها بزياده.. وخلت شعرها مفتوح ونزلت تحت..
لقت أمها ترحب بالحريم.. كانت الأم بس لابسه شيله، والبنات لابسات بدل بدون شيل.. قالت يمكن فصخوهم يوم دخلوا..
أم غاليه: هذي بنتي ووحيدتي غاليه..
أم لؤي: هلا هلا حبيبتي كيف حالك..؟؟
غاليه وهي تسلم عليها: الحمدلله إنتي اشحالج عساج طيبه..!!
أم لؤي: الحمدلله بخير..
غاليه سلمت على مزنه حرمت ولدهم الي كانت حامل في الشهر السادس..
مزنه: كيف حالك يا غاليه.. إن شاءالله طيبه..
غاليه: أنا الحمدلله بخير..
جنى: يالله جا دوري تعالي أسلم عليكي..
غاليه راحت تسلم عليها وهي عايبتنها رمستهم..
جنى: شخبارك ياغاليه والله بيتكم يجنن..
غاليه: يامرحبابج الغاليه.. البيت بيتج خذي راحتج..
جنى كانت تطالع غاليه من فوق لتحت كانت متخبله على لبسها وكشختها، كله كوم والبيت كوم ثاني.. قصر تتمنى تعيش فيه أي بنيه.. إن شاءالله عندهم أخو أكبر عني ألزق فيه ويتزوجني..
أم غاليه: حياكم تفضلوا..
غاليه: جنى إنتي تدرسين..؟؟
جنى: لا.. خلصت الثانويه وجلست فالبيت..
غاليه: ليش..؟؟ الدراسه مهمه..
مزنه: كويس خلصت الثانوي طلعت روحنا بعنادها.. خليها تجلس فالبيت تستنى الزواج أحسن لها..
جنى: إيه والله.. الزوج الصالح أبرك لي من الدراسه..
غاليه: هههههههههه إن شاءالله تلاقين معرس عندنا..
جنى: الله يسمع منك ياغاليه.. مره عجبتني دبي..
غاليه: أمممممممم صبري بدور لج حد من العيله وبلزقه فيج..
جنى بتكبر: لالا حبيبتي زوجي لازم يكون من أحسن الرجاجيل، أجل أنا جنى خليفه أتزوج أي كلام..
غاليه فخاطرها وععععع تحمدين ربج لو حد رضابج..
أم غاليه: إن شاءالله تلاقين الي يسعدج ويهنيج.. غاليه أمايه قومي وريها حجرتج والبيت..
غاليه قامت وجنى جدامها متخبله تبا تشوف البيت العود الي خبل فيها.. راحوا فوق وشافت كل الغرف.. وبعدها نزلوا للمطابخ وغرفة الأكل والميالس..
جنى: عروتني رجولي من المشي..
غاليه: ههههههههههههههههه
جنى: بس ليه كل الغرف فاضيه بس غرفتك وغرفة وأمك وأبوك..
غاليه: منو تبين نسكن عندنا الجيران..!!
جنى: لا أقصد إخوانك وإخواتك وين غرفهم..؟!!!
غاليه: أنا وحيدة أهلي ماعندي إخوان وإخوات..
جنى: من جد..!!!!!! وااااااااو ياحظك ياغاليه..
غاليه: تعالي نروح الصاله ماما تنادينا..
وراحت غاليه قبلها ودخلت الصاله شافت أمها وأبوها واقفين يتكلمون وأم لؤي يالسه حذالهم.. ومزنه مب موجوده..
غاليه وقفت قبل لاتدخل يوم شافت أبوها..
غاليه: جنى أبويه داخل..
جنى: إيه شفته مساعه وسلمت عليه.. ماشاءالله عليه شباب وحليوه..
وتجدمت ودخلت ويلست فالصاله.. وغاليه عيونها بتظهر، هــذي كيف تقعد مع بابا بدون شيله...!!!!!!
دخلت غاليه وراحت وباست أبوها ورجعت تقعد مع جنى..
جنى: أجل وينها مزنه..؟؟
أم لؤي: راحت تشوف لؤي..
جنى: غاليه تعالي نروح المجلس أعرفك على أبوي..
غاليه: لحظه بلبس شيلتي..
وراحت غاليه غرفتها وسحبت شيلتها وهي مقهووره من جنى كيف جي تتصرف على راحتها تقول البيت بيتها وأبويه أبوها..
نزلت غاليه وشافت جنى واقفه عند الباب وفاجه الباب كله والهوا يطير شعرها الأحمر..
غاليه: يالله نروح..
جنى مسكت غاليه من إيدها وركضت معاها للميلس.. غاليه بخاطرها الحين هذي أكبر عني وأنا أعقل منها الله يعيني هاليومين..
دخلت غاليه الميلس ولقت أبولؤي يالس مع عياله الإثنين.. أبو لؤي ريال كبير فالسن والشيب تارس راسه، ولؤي شاب وسيم ومبين عليه الإحترام.. ومشعل بعد وسيم بس لؤي أحلى منه.. مشعل كان ماسك في يده ورقه ويكتب فيها..
غاليه: السلام عليكم..
الكل: وعليكم السلام..
جنى: أبوي ذي غاليه بنت العم منصور..
أبولؤي: هلا حبيبتي شخبارك عساك بخير..!!
غاليه: الحمدلله بخير.. إنتوا إشحالكم..
أبو لؤي: الله يخليكي يابنتي..
جنى: غاليه شوفي هذا لؤي أخوي الكبير زوج مزنه.. والي هناك مشعل أخوي الفنان الصاعد..
غاليه: فنان..؟؟
جنى: إيه فنان رسمه مره جميل.. بخليه يفرجيكي عليهم..
غاليه: لو هو موافق..!!
جنى: إلا موافق.. أخوي ومايردني فأي شي..
مشعل: خلصتي تعارف ياحضرت الصحفيه..
جنى: شو قصدك..؟؟
مشعل: أقصد إنك صدعتي راس هالمسكينه بهذرتك.. نصيحه ياغاليه خلك بعيده عنها..
غاليه: ههههههههههههههه
جنى: لا ياشيخ خلك في رسوماتك وخل غاليه عنك..
أبو لؤي: جنى لاتكلمي أخوك بذا الطريقه عيب..
جنى: أبوي هو الي يبتدي.. أجل تبيني أسكت له..
غاليه: هيه تسكتين.. ويالله قومي بوديج السرداب نلعب شوي..
مشعل: عادي أروح معاكم..!! يمكن آخذ أفكار للوحاتي..
غاليه: حياك..
جنى تجدمت عنهم أونها معصبه ليش مشعل بيروح معاهم، وغاليه تمشي تبا تلحقها بسرعه لأنه مشعل خطوته واسعه ويمشي بسرعه..
دخلوا السرداب الي طبعا سبق ووصفته لكم..
جنى: الله عالجمال.. أنا ماريد القصر الكبير بس سكنوني هنا..
غاليه: هههههههههه البيت كله تحت أمرج..
مشعل: قلت لك جيبي لبس السباحه.. كيف بتسبحين الحين..!!
جنى: يعني دبي بكبرها مافيها لبس سباحه.. بكره بروح وبشتري لي واحد جديد..
غاليه في خاطرها ياحبيبي ناويه تسبح فالمسبح الحبيبه..
غاليه: خلاص باجر بنسير السوق وبنتسوق..
جنى: نروح الصبح أحسن.. بخاطري أتمشى شوي..
غاليه: خلاص عيل باجر الصبح..
جنى: بالله نروح داخل..
مشعل: لا أنا بقعد هني أرسم..
غاليه: أوكي..
وراحت غاليه مع جنى داخل وهي مستانسه إنها لقت حد تسولف
وتغير جو معاه.. جنى حشره ماسكتت وطول الوقت تسولف وصدعت راس غاليه بالهذره لنص الليل..


اليوم غاليه قامت وهي صج مصدعه من أمس.. مب قادره من عوار الراس.. الله يسامحها جنى للفير وهي تسولف لا وتبا تقوم اليوم الصبح للسوق.. هذا ويهي إن قامت الظهر..
ومالحقت تكتمل هالفكره في راسها إلا وجنى تدق الباب..
جنى: قومي ياكسوله نبي نلحق على السوق.. يالله تحركي..
غاليه: صااااااااااحيه.. ربع ساعه وبكون تحت..
غاليه تسبح وبدلت على راحتها ولاهمها جنى الي كل شوي تنقز تستعيلها.. بعد عشرين دقيقه نزلت غاليه وهي لابسه بدله ورديه وشايل شيلتها وعبايتها على إيدها.. شافت أمها وجنى الي لابسه بنطلون جينز ويالسه تتطالع التلفزيون..
جنى: أخيرا جيتي.. قفلت كل الأسواق..
غاليه: خافي ربج توها الساعه عشر ونص..
أم غاليه: ههههههههههه عذريها يايه بلاد يديده..
غاليه: مب جي عاد..
جنى: لاتهذري واجد خلينا نروح..
غاليه: خليني أفج ريجي شوي..
جنى: لالا بناكل فالسوق..
غاليه: صكي الأرض أشوفج.. بتريق وبعدين بنروح..
جنى نفخت بقوو أونها معصبه، وغاليه لبستها وراحت تتريق.. وبعد عشر دقايق طلعت غاليه مع جنى للسوق..
جنى: مره حلوه سيارتك.. عطيني أسوقها..!!
غاليه: عندج ليسن..؟؟
جنى: لا.. ولابعمري سقت سياره..
غاليه: وتبيني أعطيج سيارتي..
جنى: المهم الحين وين بنروح..؟؟
غاليه: إنتي شو تبين تاخذين..؟؟
جنى: أمممممم فخاطري أشتري ملابس جديده وبنطلونات ولبس السباحه لاتنسينه أريد أسبح فالمسبح حقتكم..
غاليه: ههههههههههه
جنى: ليش تضحكين..؟؟
غاليه: ولا شي.. بس عندي سؤال، إنتي ليش ماتلبسين العبايه مب عيب عليج جي تظهرين..
جنى: ياشيخه فكينا من العقد.. كفايه إني ألبسها فالسعوديه، أريد أتنفس وأشم هوا..
غاليه: والله على راحتج هذي حريتج وإنتي أبخص بها..
وكملوا البنات مشاويرهم وجولاتهم ومابقى سوق ماراحو له، ورجعوا البيت على الساعه وحده ونص، ولقوا سيارات عيال عمها غاليه كلهم برع..
غاليه: ماشاءالله العيله كلها هني.. يالله جانج تبين معرس..
جنى: شباب العيله..!!
غاليه: هيه.. قومي ننزل وبنادي ليندا تاخذ الأغراض..
ونزلوا البنات وراحوا داخل وشافوا ناصر وسعيد وسلطان واقفين برع يسولفون..
غاليه: السلام عليكم.. شخباركم شباب..!!
الكل: وعليكم السلام..
ناصر: من وين يايه ست الحسن..؟؟
غاليه: من السوق..
سعيد: ماعرفتينا على الغزال الي وياج..
غاليه: جنى بنت أبو لؤي ضيف أبوي..
جنى: هــاي كيف حالكم..!!
سلطان: بخير ونعمه يسرج الحال..
ناصر: نورتي دبي..
جنى: النر نوركم.. والحين عرفيني عليهم..
غاليه: عندج هذا ناصر ولد عمي.. وسلطان بعد ولد عمي وسعيد بعد ولد عمي..
جنى: ماشاءالله.. إخوان يعني..!!
سلطان: لا عيال عم..
غاليه: وينهن البنات..
سلطان: دخلوا داخل..
جنى: أجل خلينا نروح نتعرف عليهم..
ودخلت غاليه ووراها جنى.. الي حشرتها تبا تعرف أكثر عن كل واحد..
غاليه: أففففف صكيتي راسي.. ناصر مالج وبيعرس جريب.. عندج الحين سلطان وسعيد، بس سعيد أصغر عنج فخليج على سلطان..
جنى: يجنن هالسلطان..

وعند الشباب..
سلطان: بذمتكم هــذاي ماتستحي على ويها جي تطلع.. وغاليه ليش مرابعتها مب زين..
ناصر: ضيفتها ولازم توجبها..
سعيد: خل عنكم عاد البنيه قمر.. بس شكلها أكبر عني..
ناصر: ههههههه دق على خلوف بيعاونك فالمغازل..
نرجع للبنات الي دخلت عليهم غاليه ومعاها جنى ويلسوا يتعرفوون على جنى الي ماشاءالله عليها ماتعرف تسكت..
غاليه: شوفي ياجنى.. الي هني شروق وشذا وشيماء بنات خالتي.. والي هناك مروى وميعاد الي أخوهم ناصر الي قبل شوي شفتيه برع..
جنى: هلا فيكم..
غاليه: والدبه الي هناك عمتي فجر.. حامل ومنتفخه..
فجر: حرام عليج توني في ثاني شهر وين إنتفخت..
غاليه: هههههههههههههههه
جنى: ماعليكي منها ماشاءالله عليج واجد حلوه..
فجر: الله يخليج يالذوق.. مب هالفيل غلووي ماتعرف تقول كلمه حلوه..
ميعاد: غاليه وينها خالتي..!!
غاليه: مادري والله.. أنا بسير بفصخ عباتي وبنزل لكم..
ويلسوا البنات يسولفون ويضحكون وجنى من بينهم كأنها وحده من العيله، لاتستحي ولاشي.. عادي الحياة عندها..
وبعد الغدا نزلوا البنات السرداب ومعاهم يدتهم أم منصور.. وجنى متخبله تبا تسبح.. والكل يضحك عليها..
أم منصور: وااابوي ماشي مذهب..
مروى: إنتي مينونه شو..؟؟ شو تسبحين..!!
جنى: ليش شو الغلط.. أنا معاي لبس السباحه..
شذا: وبعد لبس السباحه..!! إنتي ماتستحين..
ميعاد: شذا.. عيب يالله..؟؟
أم منصور: ضعين المذهب هالبنات..
جنى: من جد مو عارفه شو الغلط ..!!
غاليه: لأن هني عندنا عيب الوحده تتسبح جي جدام الناس ويمكن حد من الشباب يدخل..
جنى: خلاص لاتزعلون بشل الفكره من راسي.. إرتحتوا الحين..
شروق: خل عنكم هالسخافه وسمعوني أنا حفلة ملجتي الأسبوع الياي، بس مابي أسوي حفله وهم مصرين عالحفله..
غاليه: ميثووه أم الخبال لازم تسوي حفله وتكشخ.. إنزين سويها ولو بسيطه..
شروق: ماااااالي نفس..
جنى: ليش البنت كم مره بتتزوج.. إفرحي وإنبسطي..
شروق: مادري..!!!!
خليفه: ممكن ندخل ياحسناوات الكون..
مروى: ولييييييييه الله يعينا الخقاقين وصلوا..
غاليه: حياكم تفضلوا..
دخلوا خليفه وسلطان وسعيد.. ويلسوا على جهة من البنات..
جنى: من هذاك الي معاهم..!!
غاليه: هذا خليفه، خقاق رقم واحد..
جنى: هههههههههه
خليفه: مرحبا بأهل السعوديه نورتوا البلاد..
أم منصور: هه إشتغل ولد راشد.. الله يعينا عليه..
خليفه: هههههه فديت يدوووه والله..
جنى: ماشاءالله عليهم كل واحد أحلى عن الثاني..
سعيد: إحم إحم..
شذا: بصراحه جنى منو أحلى واحد..؟؟
جنى: أمممممممم كلهم..
خليفه: لالا قولي الصج..
سلطان بخاطره والله سخافه، ماشي غير هاي تحكم منو الأحلى فينا..
سلطان: أنا أترخص بسير حجرتي العصر بروح مع الشباب البر..
جنى: إجلس معانا لاحق على النوم..
مروى: خلي الريال يمكن عنده شغله خاصه..
سلطان: هيه صاجه مرااوي عندي شغله خاصه..
مروى رقص قلبها من قالها مراوي وحست الفرحه صج بانت عليها جدام الكل..
غاليه تكلم ميعاد بهمس: كلمتي أختج عن عمر حميج..؟؟
ميعاد الي فهمت عليها: هيه.. ورفضته، قالت لي ماتبي العرس من الحين..
غاليه: ماتبي ولا..!!!!!!
ميعاد: ولا القلب مشغول..!! بعينج شفتي كل شي ماله داعي تسإلين..
غاليه: بس أحس سلطان....... مادري ماحسه يميل لها..
ميعاد: أنا مارديت على عمووه قلت يمكن هاليومين يصير شي وتحس إنه سلطان مايبيها وترجع توافق على عمر..
غاليه: زين سويتي.. عسى الله يهديها بس..
على الساعه أربع ونص العصر الكل روحوا على بيوتهم ورجعت غاليه لغرفتها تبا ترتاح من قامت الصبح ما إرتاحت.. دخلت عليها أمها وهي شايله كوب الماي..
أم غاليه: قومي خذي دواج..
غاليه خذت الحبوب: ماما وينها الحشرة جنى؟
أم غاليه: فالميلس مع أبوها وإخوانها..
غاليه: والله طبايعا غير وأحس تفشلنا جدام يدووه والشباب..
أم غاليه: مشكله يوم تنحطين في موقف مع ناس فري..
غاليه: هههههههه كله كوم ومايوه السباحه كوم ثاني..
أم غاليه: تخبلت هـذي تسبح والشباب كلهم هني..
غاليه: ولا خلوف وسعود بعد..
أم غاليه: الله يهديهم بس..
نامت غاليه للمغرب وهي مب حاسه بالوقت.. على الساعه ست ونص قامت وهي حاسه أعصابها مرتاحه.. سبحت ولبست بدلتها الكويتيه ونزلت تحت.. وشافت أمها وأم لؤي يسولفون بالصاله..
غاليه: مســـاء الخيــــر..
أم غاليه: مساء النور حبيبتي..
أم لؤي: هلا هلا حبيبتي .. شخبارك الحلوه..!!
غاليه: والله الحمدلله بخير ونعمه.. وينها جنى؟
أم غاليه: طلعت مع إخوانها ومزنه..
أم لؤي: متعبتني واجد هالبنت تحب الطلعه، ولو جلست فالبيت يوم واحد تقلبه عزا..
أم غاليه: إن شاءالله تكبر وتعقل..
غاليه: ماما أنا بقعد فالحديقه شوي..
طلعت غاليه ويلست فالحديقه شوي وهي تكتب في دفترها الي من يومين مامسكته.. وتذكرت خالد.. حليله أكيد كل يوم يروح هناك ومايلاقيني.. ومنو أنا علشان يروح يشوفني، هو أصلا دايما يروح هناك من قبل لا أعرفه إنه يسير هالمكان.. يعني ماظنتي إني أهمه بشي غير وحده تشكي له همها..
ودخلت جنى معاها إخوانها وحرمة أخوها، غاليه لبست شيلتها ويلست تتطالعهم، كانوا شاريين أغراض واايد وجنى تنادي الخدامات يشيلون معاها..
جنى: غاليه كيف حالك.. زين صحيتي من النوم..
غاليه: هلا جنى.. ماشاءالله مابقى شي فالسوق..
جنى: هههههههه خبرك بكره راجعين السعوديه ولازم أشتري هدايا لصديقاتي..
مزنه: شخبارك غاليه.. زين الي نمتي ولارحتي معانا.. دوخت راسنا جنى بطلباتها..
غاليه: هههههههههه هيه والله الحمدلله الي نجاني منها..
رولا: يعني أنا مصيبه.. زين ياغاليه أفرجيكي الحين.. بس خليني أروح أحط الأغراض بالغرفه وأرجع لك..
غاليه: ههههههههههه
دخلوا كلهم داخل بس مشعل ظل واقف يطالع غاليه وهي إستحت ورجعت تمسك دفترها وتشخبط فيه.. مشعل راح لها وهو يطالعها ولا شال عينه عنها..
مشعل: غاليه أريد أطلبك طلب..
غاليه: أفا عليك تم..
مشعل: الله يخليكي.. أمممممممم ممكن أرسمك..!!
غاليه مستغربه: ترسمني..!!!!!!!
مشعل: إيه أرسمك.. أنا مره أحب الرسم، وإنتي فيكي الملامح الي أدورها من زمان..
غاليه: لالالا مابي أكون صنم في لوحاتك..
مشعل: هههههههههههه لا مو كذا الحكايه..
غاليه: أجل كيف..!!
مشعل: هههههههههههه علمتك جنى حكينا..
غاليه: ههههههههههه شفت عاد.. والحين قولي كيف تبا ترسمني..!!
مشعل: أنا برسم لك صورتين الأولى صورتك وإنتي جالسه هون بالحديقه وتناظري الشجر.. وهذي الصوره بتكون لك.. يعني من أخلصها إنتي بتاخذيها..
غاليه: حلوو..والثانيه..؟؟
مشعل: والثانيه.. بتكون بس عيونك.. مع مناظر من مخيلتي..
غاليه: عيوني..!! إشمعنى عيوني..؟؟
مشعل: فيهم حزن جذاب.. فيهم لمسة جمال صورها الخالق في عيونك..
غاليه: حزن..!! إنت تحس فيهم حزن..؟؟
مشعل: الحزن واضح وضوح الشمس.. بس مالي دخل اتدخل في خصوصياتك..
غاليه: أممممممم أوكي.. متى نبدأ..؟؟
مشعل: ياليت دحين.. لأن أبا الليل يطغى على الرسمه، وبكره الظهر إحنا مروحين..
غاليه: ومتى بتعطيني اللوحه..؟؟
مشعل: خليني أسهر عليهم اليوم وبكره قبل لانسافر بتكون عندك..
وافقت غاليه وإختار لها المكان الي بتقعد فيه والحركه الي بتسويها.. وهو راح إييب اللوحات والألوان..
رجع بعد دقيقتين ولقى جنى معاها..
مشعل: جنى لاتعملي لنا أي إزعاج.. خلينا نشتغل براحتنا..
جنى: ياسلام ياشيخ شو شايفني مزعجه..!!
غاليه: خلاص عاد لاتبدون بالضرابه.. ويالله أنا جاهزه.. إشتغل..
غاليه يلست على كرسي صغير ووراها الشجر.. وكان بس نص ويها مبين وهي تتطالع القمر..
جنى: لاتكسر رقبتها على ذي الجلسه..
غاليه: إكسروا راسج قولي آمين..
جنى: إيش..!! وأنا الي جالسه أدافع عنك وخايفه عليكي..
غاليه: مابي خوفج علي.. روحي داخل..
جنى: أحسن بعد بروح بجرب الفساتين الجديده الي أخذتها..
مشعل: غاليه نزلي راسك شوي.. أيواااا بس خلاص..
وبعد ساعه من الشغل والتلوين.. خلص مشعل شغله وراح غرفته يكمل اللوحتين..
وغاليه راحت داخل تريح رقبتها الي عورتها شوي.. ومالقت حد بالصاله، وطلعت غرفتها وياها طيف أحمد ويلست بحزن عالكرسي.. فديته له وحشه، ليش ناصر اليوم ماقالي أي شي عن أخباره..؟؟ أمممممم عاد ليش أنا بعد ماسألته..؟؟
ويلست تقريبا نص ساعه تتذكر الحب القديم وسوالفها مع أحمد، وتذكرت هيا الي بتعرس جريب.. إن شاءالله تعزمني على عرسها عالأقل أشوف أحمد لو من بعيد..
وفجأة دخلت عليها جنى مثل الصاروخ لدرجة إنه غاليه نقزت من على سريرها ووقفت وقلبها يدق بقوه..
غاليه: خير شو صاير..!!!!!!!!!!!
جنى بكل برود: ولا شي تعالي تعشي معنا..
غاليه صج عصبت: ويعه تويعج.. زولي من ويهي عساج اليهد..
وسكرت الباب في ويه جنى وقفلته، ووقفت متسنده عالباب وقلبها يدق بقوه داخلها وتحسه يهز عظامها هز..
جنى نزلت تحت وهي مستغربه من تصرف غاليه، ليش صرخت عليها بهالطريقه.. وشافت في طريجها سلطان الي كان فاصخ الغترة وكان ظاهر من الحمام..
جنى: شعرك يجنن..
سلطان إستحى: الله يخليج..
جنى تبا تفتح مجال للكلام: غاليه سكرت الباب في وجهي..
سلطان: غااااليه..!!! ليش..؟؟
جنى: ماعرف.. قلت لها تعالي تعشي معنا، بس شكلها كانت مضايقه من شي..
سلطان: خليني أروح أشوفها.. وإنتي سيري تعشي معاهم..
طلع سلطان الدري بسرعه يبا يهرب منها، ياخي أستحي أطالعها وهي هي سافره لا غطا ولاشي ومترصصه.. الحمدلله يوم إنهم باجر بيسافرون..
وصل لغرفة غاليه ودق الباب بهدوء..
ووصله صوت غاليه تصرخ: ذلفي عني ياجنى مابي عشا..
سلطان وهو مصدوم: أنا سلطان..
شوي وإنفتح الباب وطلعت عليه غاليه وهي مب قادره حتى تبتسم، وقف يطالعها وحسها تعبانه..
سلطان: خير ياغاليه شو فيج..؟؟
غاليه ظهرت برع غرفتها: ولا شي.. بس مالي نفس عالعشا..
سلطان: خلي العشا على صوب.. صرختي على جنى وشكلها زعلت والحين تصرخين علي من ورا الباب وشكلج تعبانه..
غاليه: لا بس كنت يالسه بروحي وفجأ جنى دخلت علي تقول إعصار كاترينا.. وقلبي قام يدق بقوه وللحين مب راضي يوقف..
سلطان: بسم الله عليج.. قومي خليني أوديج الدختر..
غاليه تتسند عالباب: لالا برتاح وبصير زينه..
سلطان: أي زينه الله يهديج.. إنتي بكبرج يالسه ترتجفين..
غاليه صج كانت ترجف ومب قادره توقف، وبدون إحساس نزلت عالأرض ويلست وإيدها على قلبها..
سلطان: غاليه.. غاليه شو فيج..؟؟
غاليه بصوت مخنوق: إزقر لي أمي.. سلطان بسرعه..
ركض سلطان ينادي فاطمه الي يات ركض ولبست بنتها العبايه وركبوا مع سلطان السياره وطاروا بها عالمستشفى..