منتدى استراحات زايد - من يحبك كثر ماأحبك أنا..

الجزء السادس عشر..

لوتبكي ياعيوني الدمع دم ***
مغرم أنا بك حيل مغرم **
لو الثمن فالحب روحي **
ماندم أنا عالحب ماندم **
في المستشفى غاليه كانت مع ريل خالتها تأكله ومحد معاهم غير شروق، وأم جاسم راحت تزور وحده ربيعتها..
أبوجاسم: بس ياغاليه شبعت..
غاليه: عمي للحين ماخلصت صحنك..!!
أبوجاسم: لا يالغاليه الحمدلله شبعت..
شروق: بسه أكل، الدكتور قال لاتضغطون عليه..
غاليه: مالت عليج وعلى برودج، الحينه هو أبوج وانا الي أأكله.. صج فيج برود اليهود..
شروق: مالت عليج إنتي..
أبوجاسم: شروق بس عيب..
غاليه: عمي متى بتظهر..؟؟
أبوجاسم: هاليومين إن شاءالله، شروق أخوج شو سوا..؟؟
شروق وهي تتثاوب: البارحه رحنا لهم وخطبناها..
أبوجاسم: وهو راح معاكم..؟؟
شروق: هيه راح.. غاليه ربيعتج هـذي زينه..!!
غاليه: زينة البنات بعد..
شروق: مادري مب وايد إرتحت لها..
غاليه: بتحبينها يوم بتعرفينها أكثر.. وينها خالووه للحين ماردت..؟؟
أبوجاسم: تلاقينها شافت الحريم ونستنا..
غاليه: أنا أبا أروح البيت..
شروق: وديني معاج ملانه..
غاليه: عيل لازم ننتظر خالتي، مابنخلي عمي بروحه..
شروق: غلوووي شو رايج نسير نتمشى عالممزر شوي، من زمان ماتمشيت..
غاليه: أوكي..
ودخلت عليهم أم جاسم وهي شايله في يدها حلويات..
شروق: أمييه عطيني كاكاو..
أبوجاسم: وين سرتي طولتي علي..!!
أم جاسم: سرت لأم فيصل حرمة ولدها مربيه يابت ولد، عاد مسكتني ويلسنا نسولف..
غاليه: خلاص خالووه أنا وشروق بنروح البيت، تبين منا شي..؟؟
أم جاسم: سلامتج الغاليه، غاليه عطيني رقم بيتهم فتون بكلم أمها..
وعطتها غاليه الرقم وطلعوا من المستشفى هي وشروق، وراحوا يتمشون بالسياره وشروق طول الوقت ساكته وغاليه تقرقر وحاشره الدنيا..
غاليه: شروووووووووق..!!!!!!!!!
شروق: خيبه ليش تزاعجين..؟؟
غاليه: إنتي الي وين سرحانه..؟؟ صار لي اعه أهذر وحاشره الدنيا وإنتي خبر خير..
شروق: أممممممممم ولاشي..
غاليه: مب علي أنا.. أعرف إنج تفكرين في سالفة خطوبتج وإنج متردده وخايفه..
شروق: غاليه، ناصر للحين ماخطب نجود يمكن.. يمكن بعده، أنا أقول يعني..
غاليه: شروق... ناصر بيخطب نجود جريب، بس أبوه يقوله إنه غلط عليج وجرحج ويمكن يكون قطع نصيبج بحركته هذي، وبخطوبتج إنتي بتنحل المشكله وبيوافق عمي..
شروق سكتت ورجعت تتطالع من الدريشه، يعني خلاص ياشروق المفروض تنسينه وتعيشين حياتج..
غاليه: شروق..!!
شروق: غاليه مابي أسمع ولاكلمه، خليني فحالي..
سكتت غاليه وهي مضايجه لحالة شروق، بس شو بإيدها تسوي لها، هي الي جنته على نفسها يوم إنها من البدايه هملت مشاعرها..

في بيت بوحميد الي كان يالس في الميلس يشرب قهوه مع ولده حميد، دخل عليهم ناصر وهو لابس كندوره سودا وسفره حمرا، ومتكشخ وريحة العطر شاله الدنيا..
حميد: شو هالريحة الي شلت الدنيا..!!
ناصر: السلام عليكم.. شو الريحه غاويه..؟؟
أبوحميد: وعليكم السلام، حياك إدخل..
حميد: ياربيه ذبحتني الريحه، شو هالعطر الي متعطر به..؟؟
ناصر: أنا متعطر دهن عود.. بس فالعرس كانوا محطيين دخون وعطور وبلاوي.. وعاد أنا تسبحت بالعطور..
أبو حميد: ماشاءالله عرس منو رايح..؟؟
ناصر: عرس سالم ولد جاسم الرميثي، ماتذكره..!! ابوه الي كانت شقته جنب شقتنا فإيطاليا..؟؟
أبوحميد: جاسم الرميثي.. والنعم والله، ماشاءالله زوج ولده..؟؟
ناصر: هيه.. وسالم هذا أصغر عني بسنه وماشاءالله تزوج..
حميد: ههههههههههه شو تبا تقول..!!
أبوحميد: بعد شو يبا، يبا يعل قلبي بسيرة العرس..
ناصر: الحين عرسي يعل قلبك.. الله يسامحك يابوي..
حميد: حرام عليك يابوي هذا ولدك نصووور لازم تتحمله..
أبوحميد: أنا خطبت له مره وهو الي تركها..
ناصر: بس يابوي إنت ماترضى إني أظلمها ويايه.. أبويه الله يخليك..
وقام يبوس راس أبوه ويلمه فحظنه..
ناصر: الله يخليك يابويه البنيه بتضيع مني، حرام والله إني أباها..
أبوحميد: وشروق مب حرام تقطع بنصيبها، منو بياخذها بعد الي سويته فيها..
ناصر: أبويه شروق إنخطبت..
أبوحميد: والله..!! منو..؟؟
ناصر: جماعه من الفجيره.. وأهلها موافقين وهي بعد..
أبوحميد: .......................
حميد: أبوي الله يهديك البنيه وراحت في نصيبها ليش تحرم ناصر من الزواج..
ناصر: أبوي وافق عسى الله يطول بعمرك وافق..
أبوحميد تنهد بقوه: خلاص الله يبارك لك فيها، لو تعرف رقمها دق وخبرهم إنا باجر بنكون عندهم..
ناصر من الفرحه مب عارف شو يسوي، قام وباس أبوها وطار يحظن حميد وعقبها قام يرقص وفصخ السفره ويلس ينط عالكنبات بالميلس ومن بعد الشياكه تبهدل وحالته حاله إستوت..
أبوحميد: لعنة الله عالحب والي يسويه فيكم..
حميد: ههههههههههههههههههه
وناصر سار لأمه يبشرها وعطاها الرقم تحجز لهم موعد، وطار لحجرته يبشر نجود..
ناصر: مساء الحب لأحلى حب بحياتي..
نجود: مساء الفرح والسرور ياقلبوو
ناصر: عمري شو تسوين..؟؟
نجود: أمممم يالسه أطالع صورتك بالكمبيوتر وأسوي بها حركات..
ناصر: ياويلي أنا عالحب.. حبي بقولج شي..
نجود: قول قلبوو
ناصر: باجر شو عندج بالليل..؟؟
نجود: قلبوو ماقدر أظهر وياك.. إخواني كلهم هني..
ناصر: عز الطلب.. وأنا بشوفج غصبن عنهم كلهم..
نجود: ناصر بلا خبال.. مافي داعي للفضايح..
ناصر: فديتج إنتي.. حبيبتي بشوفج يعني بشوفج وحتى أمي بتشوفج..
نجود: أمــــك..!! ناصر شو السالفه..؟!!!!
ناصر: مافي شي، بس أبويه خلاص لان راسه ورضى بزواجنا..
نجود: .........................
ناصر: فرحانه حياتي..!!
نجود: مب مصدقه.. والله أحسني بحلم.. حياتو قولي الصج، لاتتغشمر وياي وتخليني أحلم..
ناصر: والله والله والله وغلاتج عندي صج.. وباجر المغرب نحن في بيتكم..
نجود: أحبك نصوووور أحبك
ناصر: يابعد عمري إنتي..

اليوم الخميس وماشاءالله عندنا خطوبتين وملجه.. أول شي كانت ملجة جاسم على فتون، املجوا العصر وتمت السالفه على خيربدون حفله، والمغرب كانت خطوبة ناصر ونجود وبعد كانت بسيطه وبدون دق لأن نجود من جريب متوفي ولد عمها، ونوصل آخر شي لشروق الي كانت حفلتها بعد صلاة العشا والكل كانوا مجتمعين عندهم بالبيت..
ميثه: وأخيراااااا خطبنا، يعني كل يوم بنط عندكم أونه نشوف عروسنا..
غاليه: إنتي مب محتاجه عزيمه، بعيد الشر كله رازه بويهج..
ميثه: لا والله.. أقولج غلوووي حد قالج من قبل إن دمج ثجيل..
غاليه بدلع: لافديتج كلهم قالولي دمج عسل وشربات..
ميثه: مااااااااااااالت عليج..
غاليه: موووتي قهر..
دخلت عليهم أم جاسم ومعاها فجر وأم غاليه..
أم جاسم: يالله بنات خلونا نظهر العروس بالصاله..
شروق: لازم يعني..!!
فجر: هيه حبيبتي الناس برع ينتظرون، أهل الفجيرماشاءالله يالسين يرقبونج تظهرين لهم..
شروق: بطني عورني..
ميثه: يالله عاد عن الدلع..
نوره: كلنا بنكون وراج لاتخافين..
وقامت شروق ووراها البنات ودخلوها ميلس الحريم على الأغاني والصهيل.. وغاليه كانت على يمينها ومروى على يسارها، وفي وحده من الحريم قالت.. منو فيهم العروس ماشاءالله عليهم كل وحده أحلى عن الثانيه..
شروق تهمس لغاليه: غلوووي قوموا بعيد علشان يعرفون إني العروس..
غاليه: ههههههههه إن شاءالله عمتي..
وقاموا عنها كلهم وخلوها بروحها يالسه وهي تتأمل الكل وتتخيل عيشتها اليديده مع أهل الفجيره.. يارب تسهل علي كل أموري..
غاليه: ماما.. وينه بابا..؟؟
أم غاليه: في مخباتي إصبري بظهره لج..
غاليه: مامااااااااااااا
أم غاليه: يعني وين بيكون أكيد في ميلس الرياييل..
غاليه: أمممممم أبا أقوله شي..
أم غاليه: إتصلي عليه وقوليله..
غاليه: خلاص يوم بنرجع البيت..
شذا: غلوووي شروق تقول إنها تبا خاتمها الأبيض نست تلبسه..
غاليه: لازم يعني..!!
شذا: هيه.. تقول لو مايبناه لها بتقوم عن الحريم وبتطلع حجرتها..
غاليه: خلاص أنا بسير بشوفه..
غاليه ظهرت من الميلس وراحت للصاله، كانت تبا تسير لغرفة شروق.. الصاله في بيت خالتها مفتوحه وجدرانها زجاجيه وتقدر تشوف الي برع، بس برع مايقدرون يطالعونهم..
غاليه شافت جاسم واقف يرمس فالموبايل وشكله مضايج.. فوقفت ورا الباب تسمعه..
جاسم: فتون إنتي شفيج اليوم، يعني تبيني أودر الناس وخطوبة أختي وأروح أعشيج برع.. إنزين أدري تونا مالجين، باجر فديتج.. باجر من عيوني بوديج.. والحين خليني أروح، بـــاي..
وسكر التلفون وهو يتأفأف.. ومن دخل الصاله شاف غاليه في ويهه يالسه تعدل شيلتها، وقف يطالعها وشكله مضايج..
غاليه: ماعليه باجر بتتعودون على بعض..
جاسم: مب جي السالفه.. فتون وايد تتطلب ولاتقدر الظروف..
غاليه: ههههههه كلنا جي، بنات ودلوعات..
جاسم: هه الحمدلله ما أخذتج إنتي، إنتي أكبر دلوووعه..
غاليه: هههههههههه بس حبيت أقولك فتون طيبه وحبوبه، والي سوته مب معناته إنها مب زينه، بس هي تحبك وسوت الي سوته علشان تثبت لك حبها..
جاسم: أوكي.. الحين بسير حجرتي شوي، باي..
غاليه طلعت وراه وسارت لغرفة شروق وسحبت الخاتم من على الطاوله ونزلت تحت تبا ترجع للحفله، بس شافت ناصر واقف يرمس فالتلفون..
ناصر: يعني شو تبيني أسوي لازم أحظر الخطوبه أبويه ملزم علي.. الله يهداج يعني تعرفين أخوج مابيخليني أشوفج، يعني حتى لو يلست في بيتكم مابتظهرين لي، عالأقل هني أكلمج بالتلفون..
وبعد التلفون عن حلجه وهو يتأفأف شوي ويتحرطم..
ناصر: ياقلبي.. ياعمري وشو فيها لوحظرت الخطوبه، ويعني شروق.. لو كنت أبيها ماكنت تركتها.
وفي هاللحظه نزلت له غاليه وهي ميته من الضحك..
ناصر: يالله يالله أسمع أصوات حريم بدخل المطبخ، باي...
وسكر عنها بسرعه قبل لاتقول أي كلمه، ويلس يطالع غاليه الي شوي وبتطيح من عالدري من كثر الضحك..
ناصر: إضحكي إضحكي..
غاليه: ههههههههه شوفيها عليك نجود..
ناصر: شو دراني، قبل لا أخطبها كل الرقه والحب، وخلاص تونا خطبنا حتى الأنوثه راحت منها..
غاليه: ههههههههه الله يعينك.. وجاسم قبل شوي نفس حالتك، يظارب حرمته..
ناصر: كلنا إبتلينا بعيد عنج..
غاليه: هههههه خلاص بسير للحفله.. تشاااو تشاااو
وطلعت عنه ورجعت للحفله وكانوا شذا ومروى يرقصون، فراحت ويلست ترقص معاهم.. وهي تتخيل إنها بعد كم يوم بتكون في مكان شروق وبتكون أحلى عروس..

اليوم بدت غاليه جامعتها فالكورس الثاني لأول سنه دراسه لها، راحت وحظرت كلاساتها وتعرفت على مدرسينها والبنات، وشافت سعيد ولد عمها واقف مع ربعه، فأشرت له فراح يسلم عليها..
سعيد: هلا هلا ببنت عمي الحلوه..
غاليه: هلا سعيد.. إشحالك عساك بخير..!!
سعيد: الحمدلله بخير..
غاليه: إن شاءالله دووم بخير..
سعيد: إنتي إشحالج عساج بخير..!!
غاليه: الحمدلله نشكره عالنعمه..
سعيد: عسااااج دوم مرتاحه ياربي..
غاليه: خلصت محاظراتك..؟؟
سعيد هيه خلاص وبروح مع ربيعي الإمارات مول..
غاليه: زين والله.. أمممم ممكن خدمه..
سعيد: عيوني لج آمريني إمريني بس...
غاليه: تسلم عيونك.. أباك تمر على محل في طريجك تييب لي منه أغراض مسويه طلبيه عليها..
سعيد: وليش إنتي ماتمرين..؟؟
غاليه: عندي واايد أشغال وماقدر أزيدهم شغله زياده..
سعيد: ليش شو عندج اليوم حفله..
غاليه: مب حفله عزيمه، عازمه فتون ونجود وشروق.. جمعة عرايس يعني..
سعيد: دام السالفه فيها بنات من عيوني أخدمج..
غاليه: إنت صج فيك هذاك المرض..
سعيد: بسم الله علي.. مافيني شي..!!
غاليه: بلى فيك مرض إسمه عشق البنات..
سعيد: ههههههههههه أحلى مرض والله..
غاليه: هههههههه خلاص يود البيزات وإسم المحل..
وراحت غاليه عنه وركبت سيارتها وراحت لكذا محل قبل لاترجع البيت..
غاليه: ليندا.. ليندااااااااا..
ليندا: يس غاليه..؟؟
غاليه: سيري السياره وييبي الأغراض، وسكري السياره وييبي المفتاح.. زين..!!
وراحت عنها غاليه لغرفتها تبدل ثيابها، وبعدها نزلت الصاله وشافت أمها يالسه تشرب شاي..
غاليه: السلام عليج أم الحلوه..
أم غاليه: وعليكم السلام الحلوه.. شو كل هالأغراض الي دخلتهم ليندا..؟؟
غاليه: ماما قلت لج عازمه ربيعاتي يعني لازم فواله..
أم غاليه: جان قلتي للطباخ بيسوي لج الي تبينه..
غاليه: قلت له، وبعد يبت أغراض من برع..
أم غاليه: منصوريه ماينرام عليج..
غاليه: منصوريه بنت منصوري ومنصوريه.. فديتكم أنا..
وراحت للميلس تشيك عليه وتشوفه.. وعدلت المخدات ورتبت شوي، وقامت وسارت غرفتها تتعدل..
على الساعه ثمان ونص وصلت فتون ويلست مع غاليه يسولفون تقريبا ثلث ساعه قبل لايوصلون نجود وشروق مع بعض..
شروق: غلووووي شو هالبدله الي تخبل..
غاليه: إحم إحم وصلتني هديه..
نجود: صج عذاااااب..
غاليه كانت لابسه تنوره سيلفر قصيره للركبه فرنسيه، والبودي مالها وردي على سيلفر، وتحتها برمودا ورديه مخططه بالسيلفر لتحت الركبه..
فتون: من ورانا.. منو يايبها لج..!!
غاليه: هههههههههههه بابا
نجود: واااايد حلوه الصراحه..
غاليه: عيونكم الحلوه.. يقولي كان رايح مع ربيعه محلات الديكور لمحلهم اليديد.. ومن هناك مر على السوق وشافها وخذاها لي..
شروق: الله يهنيج بها..
نجود: شكلج بيبي فيها..
غاليه: هههههههههههههه
فتون: أنا يوعانه متى بتحطين لنا العشا..
غاليه: مفجوووووعه الحين بيحطونه لج..
شروق: شوي شوي على حرمة أخوي..
غاليه:إن شاءالله عمتي.. والحين قولولي متى بتعرسون خلوني من الحين أفصل لي فساتين..
فتون: أنا أول وحده الشهر الياي عرسي..
نجود: أنا الشهر الياي بملج، وبعد شهر ونص بعرس..
شروق: أنا بملج فالصيف وبعرس الصيف الي بعده..
غاليه: وليش جي بعيد..؟!!
شروق: أنا طلبت هالشي، مافيني أعرس من الحين بعدني بيبي..
نجود: أنا عني كبرت وايد وناصر لو الود وده العرس مع الملجه، بس أنا أبا أتزهب للعرس..
غاليه: الله يوفجكم كلكم، وعقبااااالي ياااارب..
الكل ابتسموا وظحكوا لها ومن داخلهم يصيحونها، مسكينه ماتدري بحالتها ولا شو بيصيبها..