منتدى استراحات زايد - من يحبك كثر ماأحبك أنا..

الجزءالخامس عشر

**إتحبني وإلا تحب الدراهم.. إختار لك وحده علشان ماضيع..
علاقـة مـاتنبـني بالتفـاهـم.. حتى تحت نور القمر يمكن تميع..**
شروق كانت يالسه بغرفتها تلعب بالموبايل بعد مابندت عن ميثه الي خذت منها رقم أبوها على وعد يدقون اليوم ويحددون الموعد..
دخلت عليها شذا أختها الي هي أصغر عنها بسنتين وأسرارهم مع بعض..
شروق: ميثووه خذت رقم أبويه علشان يكلمونه اليوم..
شذا: والله...!! وناااااااااااسه بيستوي عندنا عرس..
شروق: شذا.. أنا خايفه ومتردده وايد..
شذا: من شو بعد..؟؟
شروق: أحسني للحين متعلقه بناصر ومب قادره أنساه..
شذا: مافي طريقه تنسينه غير إنج ترتبطين بغيره، وصدقيني الزوج المحب الحنون هو الي يستاهل تفكيرج كله..
شروق طاحت على الشبريه وسحبت من تحت المخده صوره، كانت صورتها هي وغاليه وناصر وهشام..
شذا: هههههههه للحين أذكرها هالصوره..
شروق: وتذكرين شو كنا نقول.. غاليه لهشام وشروق لناصر..
شذا: كل شي قسمه ونصيب.. وإلا منو الي يتوقع غاليه فديتها تكون مريضه ولاتقدر تتزوج، وهشام حارم نفسه عن الزواج علشانها..
شروق: كلها أقدار..
شذا: خلاص قومي ننزل تحت أميه تناديج.. وأنا ييت هني ونسيتها..
شروق قامت ونزلت لأمها الي كانت يالسه وتتطالع التلفزيون..
شروق: اشحالج أمايه يقولون تسإلين عني..
أم جاسم: وانتي ماتذكريني إلا يوم بسأل عنج، مب جنج بنتي العوده..!!
شروق: فديتج أمايه يالسه فوق بحجرتي..
أم جاسم: إنزين خبريني أهل الفجيره مادقوا..؟؟
شروق إستحت نزلت راسها، بس شذا ملقوفه وتدخلت..
شذا: بلى توهم دقوا وشروق عطتهم الرقم..
أم جاسم: حبيبتي وإنتي موافقه..؟؟
شذا: لو مب موافقه ماكانت عطتهم الرقم..
أم جاسم فتنت عليها: إنتي إسكتي وسيري المطبخ زهبي العشا مع الخدامه..
راحت شذا وبقت شروق مع أمها، شروق وايد تحترم أمها وتعتبرها ربيعتها مب أمها لأنها البجر ووايد قراب من بعض..
أم جاسم: شروق حبيبتي.. محد ياخذ فالدنيا إلا نصيبه، إنتي جربتي حظج مع ناصر بس ماشي نصيب.. ويمكن الي صار هذا كله علشان تقابلين زايد ويخطبج..
شروق: بس أنا مابي أسير بعيد عنكم..
أم جاسم: هههههه الله والبعد كلها ساعه ونص..
شروق: ولو.. أحسني مب قادره على فراقكم..
أم جاسم: أنا يوم خطبج ناصر قلت ويلي بنتي بتروح عني شارعين.. والحين بتروحين عني ساعه ونص..
شروق حظنت أمها: أمايه والله مابي أروح بعيد عنكم، الله يخليج قوليله ينتقل هني..
أم جاسم: عيب ياشروق.. الحرمه تتبع الريال مب العكس..
شروق: خلاص أميه برايج.. بس قولي لأبويه إني مابي العرس إلا السنه اليايه, عالأقل أمشي شوي فالدراسه..
أم جاسم: إن شاءالله حبيبتي.. والحين خليني أسير لأبوج فالميلس..
راحت أم جاسم وخلت شروق تفكر شو بتسوي وهل بتوافق على زايد وإلا إنها بترفضه..

من ناحيه ثانيه غاليه كانت فالسيتي سنتر مع عمتها فجر وربيعتها مرام.. كانوا توهم واصلين للسنتر ويتمشون فيه ويتشرون أغراض حق الكورس اليديد فالجماعه وفجر تتشرى أغراض للبيت..
مرام: غاليه شو بتاخذين..؟؟
غاليه: بعد شو.. كالعاده بناطلين وتنانير وبديات..
مرام: أممممممم أنا متردده شو آخذ.. أباأغير الستايل، الكورس الي طاف كله تنانير وبدل كويتيه..
فجر: خذي نفس الي بتاخذه غاليه..
مرام: هذي منو يقدر عليها.. مافيني على كشختها..
غاليه: هههههههه خلاص عيل باخذ لج نفسي علشان نكشخ يميع..
مرام: هههههههههه لا مشكوره بيزاي على قدي..
غاليه: أفاااااااااا ومن متى نحن بينا هالكلام..
مرام: غاليه لاتحرجييني.. أنا..................
غاليه: بس جب جب.. الحين تعالي خلينا نخلص اغراضنا..
فجر: أنا بسير تحت ويوم بخلص بدق عليكم..
راحت عنهم فجر ويلسوا هم يتشرون بهالجنزات والبديات..
مرام: أممممم غاليه.. شخبار فتون..!!
غاليه إتوهقت: الحمدلله، أمس كلمتها..
مرام: هي ليش قطعتني.. نحن كنا أكثر من خوات..!!
غاليه وهي تسحب لها بودي: كلن بعذره، شو رايج بهالبودي..؟؟
مرام بدون نفس: نايس.. بس ماقلتيلي شو قالت لج يوم كلمتيها..؟؟
غاليه: ولا شي.. سوالف عاديه..
مرام: غاليه قلبي يقولي مرام فيها شي.. نحن خوات وطول عمرنا مع بعض، والحين أحس صاير معاها شي..
غاليه: أفففففففف قولج بس خليه سر من بينا، ولاتفاتحينها بشي..
وخبرتها بالسالفه بالمختصر المفيد، ومرام من الصدمه دمعت عيوناها ويلست تمسح على خدها..
غاليه: مرام لاتصيحين.. أنا إن شاءالله بحل السالفه..
مرام: حرام عليها ليش ضيعت مستقبلها.. ليش فظحت أهلها..؟؟
غاليه: الله يهديها..
مرام: ولو جاسم مارضى ياخذها شو بنسوي!! والله أبوها بيذبحها..
غاليه وهي تتنهد: بروحي ميته خوف، والله يعني على جاسم.. إنسان حقير ومايحترم حد..
مرام من الخوف على ربيعة عمرها سكتت وكملت مشترى بالأغراض وهي سرحانه وتفكر..
وبعد ساعه راحوا تحت ينتظرون فجر تخلص، ويلسوا يتكلمون عن فتون والي بيسوونه وياتهم فجر شايله أغراض الدنيا معاها..
غاليه: أشك إنه بقى شي بالسيتي..
فجر: ههههههههه لابعدني ماخلصت.. بخلص باجر مع علي..
غاليه هي تفتش بأغراضها: حشا كله كاكاوات وشيبسات.. شو سالفتج..؟؟
فجر: شو دراني مستويه وايد أحب الأكل.. المهم بتسيرون اليوم لجميله..؟؟
غاليه: هيه إن شاءالله.. بس تعرفين إنها في بيت عمي، مارضت خالتي تخليها تروح البيت..
فجر: لازم.. هي بروحها تعبانه وأمها مريضه منو الي بيهتم فيها..
مرام: غاليه أبوي يدق لي، لازم أروح البيت..
غاليه: خلاص عيل خل نظهر..
وروحوا كلهم على بيوتهم وغاليه راحت البيت وشافت أمها يالسه ترتب الصاله وتعدلها..
غاليه: السلام عليج أم الحلوه..
أم غاليه: وعليكم السلام بنت منصور.. اشحالج شي بقى فالسوق..
غاليه انسدحت عالكنبه: هههههههههههه
أم غاليه: وينها عمتج..؟؟
غاليه: روحت بيتها تتجهز بتروح معانا بعدين لعند جميله..
أم غاليه: وإنتي سيري بدلي ثيابج ونزلي تعشي..
غاليه تفصخ عباتها: مافيني أبدل، بقعد جي وبتعشى وبعدين بلبس عباتي وبسير معاكم..
أم غاليه: انتي الي بتوديني وين بسير معاكم..
غاليه: أوكي, بس خليني أريح وبعدها بتعشى وبعدين بوديج..
أم غاليه سارت المطبخ وغاليه تمت منسدحه وتلعب بالريمونت كونترول للتلفزيون، وسمعت صوت الجرس يدق وما إهتمت لأن الخدامه أكيد بتفتح.. بس رجع الجرس يدق، واستغرت ليش محد سار يفتح الباب.. فقامت ولبست شيلتها ووقفت عالباب الداخلي وشافت المحامي خالد واقف برع..
راحت غاليه ووقفت ورا الباب..
غاليه: حي الله من يانا..
خالد: الله يحييج ويبجيج.. عساج بخير ومرتاحه..
غاليه: الحمدلله تمام.. حياك تفضل..!!
خالد: تسلمين الشيخه بس العم منصور نسى هالأوراق بالمكتب..
غاليه: بابا للحين ماوصل..!!
خالد: والله.. صار له ساعه من ظهر..
غاليه: والله..!! شكله بابا يغازل..
خالد: هههههههههههههههههه
غاليه: شخبارهم خواتك..؟؟
خالد: الحمدلله تمام يسإلون عنج..
غاليه: سألت عليهم العافيه، سلم عليهم وايد..
خالد: يبلغ إن شاءالله، والحين اسمحيلي بخليج..
غاليه: حياك تفضل.. أكيد بابا الحين بيوصل..
خالد: لاتسلمين.. مره ثانيه إن شاءالله..
راح خالد ودخلت غاليه البيت وشافت أمها يالسه وقالت لها عن الأوراق..
أم غاليه: أبوج سار لربيعه بو مروان عندهم خطوبه اليوم..
غاليه: أهاااا.. وأنا تحريت أبويه يغازل فمكان..
أم غاليه: ياشينج إنتي وأفكارج الخايسه..
غاليه: خخخخخخخ إنزين دامه بابا فالخطوبه أكيد بيتعشى هناك، عيل يالله خلينا ناكل ونسير لبيت عمي..
أم غاليه: يالله قومي..
وبعد ساعه إلا ربع غاليه وأمها كانوا في بيت بوعبدالله الي كان يالس بالصاله هو وحرمته..
غاليه وهي تبوس عمها: إشحالك عمي.. عساك بخير..
أبوعبدالله: هلا ببنيتي الحلوه.. إشحالج عساج بخير..
أم غاليه: شخباركم وعساكم إلا مرتاحين..
أم عبدالله: والله الحمدلله بخير.. وجميله مونستنا بعد..
غاليه: ميعاد هني..؟؟
أبوحميد: هيه بتلاقينها عند جميله..
أم غاليه: إنتي دخلي عندهم وأنا شوي وبلحقج..
غاليه: أوكي..
وراحت غاليه لهم ولقتهم يالسين يسولفون، وميعاد يالسه عالكرسي ومبين عليها التعب من الحمل..
غاليه: السلام عليكم..
ميعاد+جميله: وعليكم السلام..
ميعاد: هلا والله تو مانور بيتنا..
غاليه: أدري غاليه منصور هني..
وبعد مابستهم كلهم..
غاليه: جميله متى بتييبون البيبي..؟؟
جميله: فديته والله.. يمكن بعد شهر..
غاليه: واااااايد
جميله: عيل أنا شو أقول بخاطري يرقد بحظني، بس شو أسوي الله كاتب لي أبتعد عنه..
غاليه: الله كريم، وإنتي الدبه للحين مقاومه..!!
ميعاد: إسكتي عني.. مستويه ثجيييله ومالي خلق لأي شي، حتى عزيز فديته كله أزاعج عليه..
غاليه: هههههههههه وليش كل هذا..
ميعاد: مادري، بس خلاص تعبت أبا أولد وأفتك.. أنا حملت قبل جميله والحين هي ولدت وأنا بعدي..
جميله: هههههههه غيره يعني..!!
غاليه: الظاهر جي..
دخلت عليهم أم عبدالله ووراها أم غاليه الي راحت تسلم على جميله وميعاد..
أم عبدالله: عيل غريبه عبدالله مايانا من ساعتين من ظهر..
جميله: لاتحاتين الحين بيطب عليج..
وماكملت جميله جملتها إلا وعبدالله على روسهم..
عبدالله: السلام عليكم..
الكل: وعليكم السلام..
غاليه: ياليتنا طرينا مليون..
جميله: فديت عبدالله أحسن عن المليون..
عبدالله: فديــــــتج والله..
غاليه: هه بدينا الغزل..
جميله: هههههههههههههه
عبدالله راح لحرمته ويلس معاها عالسرير وهو يهمس لها فإذنها وهي تضحك وتدزه عنها..
غاليه: شو يعني نظهر نحن..!!
عبدالله: لاعادي وجودكم والعدم، حرمتي وبينا أسرار..
غاليه: والله إنك ماتستحي..
جميله: ههههههههه رحت تشوف البيبي..؟؟
عبدالله: هيه قبل ساعه راجع من عنده..
جميله: ومن ساعه وين كنت..؟؟
عبدالله: مريت البيت أشوف إخوانج وعمتي، ورحت السوق وإشتريت سرير للياهل لو تشوفينه إشحلاته..
جميله: ما اخذت الي كنا متفقين عليه..
عبدالله: لا.. يوم سرت لقيتهم يايبين ديزاينات يديده وخذيت واحد وااااايد حلو..
غاليه: إلا ماقلتوا شو بتسمونه..؟؟
عبدالله: بنسميه متعب.. لأنه تعب أمه..
غاليه: ههههههههه لا صج شو إسمه..
عبدالله: صج والله..
جميله: مصر يسميه متعب مع إنه في خاطري مايد..
عبدالله: الي بعده بنسميه مايد، بس هذا متعب يا أم متعب..
ميعاد: بداوه إستويتوا..
أم غاليه: الله يحفظه لكم.. يالله غاليه خلينا نسير، أبوج أكيد ينتظرنا فالبيت..
قامت غاليه وروحت مع أمها للبيت وشافوا منصور يالس ينتظرهم سلموا عليه وغاليه راحت لغرفتها تبا تكلم شروق..
شروق: يعني ماتبيني أنا تبين هشام..
غاليه: هههههههه لاحبيبتي أباج.. بس أبا أشوف هشام شو سوى في موضوعي..
شروق: وأنا تحريت شذا قالت لج عن الخطيب اليديد وداقه تباركين لي..
غاليه: صج والله اتصلوا..؟؟
شروق: هيه..وبعد يومين بنرد عليهم..
غاليه: الله يوفقج يارب.. والحين هشوم وينه..!!
شروق: والله لو يسمعج تقولين له هشوم لايدفنج..
غاليه: حبيبتي إنتي.. بقوله هشوم وبشوف منو الي بيدفني..
شروق: إصبري بسير بناديه لج يالدلوعه..
وبعد ثواني رد عليها هشام: Good evening
غاليه: ههههههههه Good evening
هشام: اشحالج بنت خالتي عساج بخير..
غاليه: الحمدلله.. أمممم شو سويت بموضوعي..
هشام: حشى حار بحار ماتبا تضيع تايم..
غاليه: هههههههههه
هشام: لحظه.. شروق بليز عطيني مقفاج الحين..
شروق: الحمدلله إني بعرس وبتفتكون مني..
هشام: هههههههه عصبت ماي سيستر..
غاليه: ههههههههههه خلها تولي دلوعه..
هشام: مب أدلع عنج..
غاليه: جب جب.. والحين قولي شو سويت..!!
هشام: جاسم صار له أسببوع مارد البيت، وكل مادقيت له جهازه مغلق، والوالده تقولي إنه رايح البر مع ربعه..
غاليه: بر أسبوع كامل..!!
هشام: أنا بروحي مستغرب.. بس خبريني النيه فأي شهر..؟؟
غاليه: تقصد الحمل..!! تقريبا الثاني..
هشام: ماشي وقت لازم نتلاحق الموضوع.. إسمعي أنا بكلم أبوي لأن لازم يخطب البنيه رسمي..
غاليه: أخاف جاسم يعاند يوم يعرف..
هشام: يخسي إلا هو.. والله لايتزوجها ولو أذبحه..
غاليه: الغربه ماغيرت فيك أصالة العرب..
هشام: لا طال عمرج.. الغربه أصلتها فيني..
غاليه: المهم الحين بخليك بس لازم باجر ترد لي الخبر الأكيد..
وبندت عنه غاليه وهي سرحانه فالي ممكن يصير لربيعتها.. وتفكر لو جاسم مارضى وأبوه ماقدر عليه شو بيكون مصير فتون.. والله أبوها بيذبحها

علمتني الليالي بعدك إنت ياغالي **
أمشي بين البرايا وأشعر إني لحالي **
نزلت دمع عيني كرهتني سنيني **
بعد مارحت عني وإنكسر شي فيني**
هشام الي محتار شو يسوي وكيف يفاتح أبوه فالسالفه، يعني الخبر بروحه يجلط فكيف الخبر بينزل على أبوه..!!
وآخر شي قرر إنه لازم يواجهه ويحط حد لسخافة جاسم..
راح الميلس وشاف أبوه ومعاه ريالين، سلم عليهم ويلس يسولف وهو يعرف الشياب مايسهرون وايد، وتقهوا وسولفوا شوي وماكملوا النص ساعه إلا وترخصوا وساروا على بيوتهم..
أبوجاسم: زين ماشاءالله مجابلني اليوم.. وزين بعد يوم لست كندوره ومافشلتني ولبست بنطلون..
هشام: ههههههههههه أفا عليك يابوي أنا ذراعك اليمين.. أصب لك قهوه..؟؟
أبوجاسم: لا بسني منها، وأمك محرصه علي بس فنيالين قهوه ماشي غيرهم..
هشام: ههههههههه حليلها أميه تحبك وتخاف عليك..
أبوجاسم: الله يخليها لنا إن شاءالله..
هشام: آمين يارب.. طلال بغيتك بسالفه..
أبوجاسم: سود الله مذهبك.. لاعب وياك فالسكه أنا..
هشام: هههههههه أسولف وياك أبويه، وبعدين تعرف الأجانب كله ينادون آباؤهم بأسماؤهم علشان مايكبرونهم..
أبوجاسم: أنا أبيكم تكبروني.. ولا إني أسمعكم تزقروني بإسمي..
هشام: خلاص حقك علي وهذا خشمك أبوسه..
وباس خشم أبوه وراسه ورجع يقعد..
أبوجاسم: والحين خبرني شو سالفتك..!!
هشام ارتبك وحس نفسه نسى كل شي، بس آخر شي تجرأ وقال السالفه كلها لأبوه، وحاول على كثر مايقدر إنه مايصدمه قوه..
أبوجاسم: لاحول ولاقوة إلا بالله..
هشام: هذا الي صار.. والبنيه مب عارفه شو تسوي، أهلها بيذبحونها، هذا شرفهم..
أبوجاسم: الحينه أنا ولدي العود وبجري يسود ويهي جدام الناس، حسبي الله ونعم الوكيل..
هشام: أبويه هدي أعصابك، وقولي الحين بتكلم جاسم..
أبوجاسم: لازم أكلمه.. أنا مارضى على بناتي الي صار.. ولابرضاها لبنات الناس.. وهالهرم وينه..
هشام، مادري يابوي، ظاهر من البيت من أسبوع على قولته ساير البر وللحين مارجع..
أبوجاسم: خلاص أول مايرجع أنا بكلمه، وإنت الحين روح وخلني بروحي..
هشام خاف على أبوه لأنه كان ماسك على صدره، بس قام ووقف برع الباب يبا يطلع وماطاوعه قلبه يخلي أبوه فيلس عند باب الميلس من برع.. وشوي وسمع صوت خبطه قويه داخل، قام ودخل الميلس بسرعه، وشاف أبوه طايح على الأرض ومغمى عليه..

بعد ساعتين من الي صار، الكل كان فالمستشفى، هشام وأمه وأخواته.. دقايق ووصلوا وأبوغاليه وأبوحميد وأبوعبدالله وناصر وعبدالله..
أبوغاليه: خير ياهشام أبوك شو صار عليه..
هشام وهو ماسك نفسه: جلطه فالمخ..
أبوحميد: لاحول ولاقوة إلا بالله..
أبوعبدالله: ليش.. شو الي صار له..
هشام مارد عليه ورجع يطالع إخواته الي بيموتون من الصياح على أبوهم، وأمه الي واقفه ومتماسكه بس ساعات دموعها تخونها وتنزل، وهو حاس بالذنب يمكن تسرع يوم خبره.. بس ماكان بيده غير هالحل..
أبوغاليه: تصبر ياهشام وإدعيله بالشفى، وإن شاءالله أزمه وبتعدي..
هشام: الله يسمع منك ياعمي..
أبوحميد: وشو قال لكم الدكتور..؟؟
هشام: قال الجلطه شللت أطرافه شوي، بس مع العلاج الطبيعي بيرجع يتحرك..
أبوعبدالله: لو محتاج للسفر سفروه ياولدي ونحن كلنا بنساعدكم..
هشام: ماتقصرون ياعمي.. بس الدكتو يقول الحاله مستقره ومب محتاج للسفر إن شاءالله..
أبوغاليه: إن شاءالله يقوم بالسلامه..

وبعد نص ساعه ظهر لهم الدكتور وهو يبشرهم بإستقرار حالة طلال، وقالهم يروحون كلهم وممكن يبقى ولده معاه..
راحوا الجماعه على بيوتهم، وبقى هشام ومعاه ناصر..
ناصر: هشام.. في سبب وصل حالة أبوك لهالدرجه، أبوك ومتقاعد من سنين يعني مب تعبان من الشغل علشان ينجلط..
هشام: أنا السبب كله مني..
ناصر: ليش..؟؟
وخبره ناصر بالسالفه بس ماقاله إنها ربيعة غاليه ولا شي، بس قاله عن المصيبه الي سواها جاسم..
ناصر: إستغفر الله العظيم، هذا مايخاف ربه شو هالمصيبه..!!
هشام: وأبوي مب عارف شو أسويله، والحين هو طاح، وأتوقع السالفه بتطول وبتكبر، والبنيه بتروح فيها..
ناصر: جاسم أنا أعرف مكانه وأعرف ربعه وأنا الي بييبه لكم..
راح ناصر يدورعلى جاسم ويلس هشام مع أبوه يدعيله بالشفا وإن الله يقومه لهم بالسلامه..

من يحبك كثر ماأحبك انا **
ومن بحبك حاول وياما إجتهد**
ومن بعينه شوفتك كل المنى**
لا ورب العرش ماغيري أحد**

غاليه يالسه تكلم أحمد على النت وتخبره بالي صار لبيت عمها وربيعتها فتون..
مزيون بوظبي: أنا جاسم هذا ما ارتحت له أبداااا
غالية أبوها: والله حرام فتون وايد تعبانه ونفسيتها Down
مزيون بوظبي: الله يفرج همها يارب.. وإنتي قوليلي عمج الحين شو أخباره..؟؟
غالية أبوها: يقولون بدا يستجيب للعلاج.. بس المشكله مب لاقين هالنذل جسوم..!!
مزيون بوظبي: حتى ناصر يدق له من يومين ومب لاقيه، حتى ربعه مب لاقينهم.. بس لاتحاتين إن شاءالله بنلاقيه وكل شي بيتصلح..
غالية أبوها: الله يسمع منك يارب..
مزيون بوظبي: غلووي حبي، أنا أباج بسالفه بس أحسج مب متفيجه لهالشي..
غالية أبوها: لا فديتك عادي، قول شو بخاطرك..!!
مزيون بوظبي: أمممممم بصراحه أنا خلاص نويت أتقدم لج..
غالية أبوها: .......................
مزيون بوظبي: والحمدلله كل شي متوفر عندي، الوظيفه والسياره والبيزات والسمعه الطيبه، ومب باجي غير زهرة حياتي تنور لي بيتي ودنيتي..
غالية أبوها: .......................
مزيون بوظبي: السكوت علامة الرضا وإلا التفكير..؟!!!!!!
غالية أبوها: من قلت بتقدم لج وأنا أفكر في ردة فعل أبويه عالموضوع، أكيد بيقولك لالالا...
مزيون بوظبي: وليش عاد.. أنا مب قاصرني شي، وإلا تتحرون عماركم أحسن عني..
غالية أبوها: ههههههههه مب قصدي، بس أنا في نظره بيبي..
مزيون بوظبي: وفي نظري شيخة البنات، وأميرة قلبي، ووردة حياتي..
غالية أبوها: أممممم أحمد لاتستعيل عالموضوع، تو الناس..
مزيون: شو تو الناس الله يهداج، نحن نعرف بعض من أكثر من سنه، ومتفاهمين ونحب بعض.. وخلاص أنا كبرت ومحتاج لوحده بقربي تهتم فيني وتجابلني..
غالية أبوها: أدري بس أنا بعدني صغيره، ومابي أترك أهلي..
مزيون بوظبي: ياقلبي منو قال بتتركينهم، هذي عمتج تزوجت وللحين رايحه وراده عليكم..
غالية أبوها: ....................
مزيون بوظبي: إنتي فكري على مهلج وردي لي خبر.. لأني صج صج خلاص نويت تكونين غالية منصور حرم أحمد الهاملي..
غالية أبوها: وععععععععع خلني غالية منصور وبس..
مزيون بوظبي: يالسباله الحين إسمي وععع..!!
غالية أبوها: ههههههههههه الحين بخليك بسير برقد وراي بلاوي باجر أخلصها..
مزيون بوظبي: ربي يعينج ويوفقج..
بندت غالية عنه وحطت راسها تبا ترقد، بس وين ترقد بعد الرمسه الي قالها أحمد، معقوله خلاص بتزوج من الي أحبه..!! وخلاص بترك بابا وماما والبيت..؟؟ لالا كيف أروح عنهم..!!
الحين أحس نفسي مابي أتزوج ولا أترك البيت، بس أحمد شو ذنبه علقته فيني والحين أقوله مابي أتزوج..!! يمكن هذا شعور طبيعي لكل بنيه قبل الزواج.. الله يعين على الي ياي..

باليوم الثاني...
ناصر كان يالس فالكوفي شوب مع أحمد ينتظرون ربيعهم الي قال لهم يعرف مكان جاسم..
أحمد: ناصر.. لاتشد فالرمسه معاه..!!
ناصر: الحين خلنا نلاقيه وبعدها يصير خير..
أحمد: أنا أقصد جاسم يوم بنلاقيه، بروحها السالفه عوده ومافينا نكبرها بعناده، تراك بتخسر عمك والبنيه بتخسر شرفها..
ناصر: أدري أدري..
أحمد: وإنت ليش مهموم وزعلان..؟؟
ناصر: أففففففففففففففففف
أحمد: خيبه حرقتني هالأف.. عسى ماشر ياخوي شو صاير لك..!!
ناصر: نجود.. متقدم لها واحد وأهلها يبون يزوجونها..
أحمد: وإنت ليش ماتتقدم لها..!!
ناصر: أبويه معند، يقولي سير إخطب بروحك دامك ودرت بنت عمك..
أحمد: الله يهداه بس.. الحين شروق وخلاص انخطبت شو الي مخلنه معاند ومب راضي..
ناصر وهو مستغرب: شو عرفك إنه شروق إنخطبت..؟!!!!!!
أحمد بإرتباك: أمس.. هيه أمس شفت غاليه فالسوق ونحن نسولف قالت لي.. عاد أنا قلت لها أحسن يوم إنخطبت شو تبا فنصور..
ناصر: هيه..
ناصر كانت سالفة نجود شاغله باله وما إنتبه لأحمد وإرتباكه، وبعدين سالفة جاسم بروحها مصيبه فكيف بينتبه لأي شي ثاني..
أحمد: الحمدلله وصل يوسف..
يوسف: السلام عليكم..
ناصر+أحمد: وعليكم السلام..
ناصر: إشحالك يوسف عساك بخير..
يوسف: الحمدلله تمام، إنتوا اشحالكم عساكم إلا بخير..
أحمد: الحمدلله مانشكي باس..
يوسف: دووم إن شاءالله..
ناصر: الله يخليك.. والحين خبرنا ماشي أخبار..؟؟
يوسف: بصراحه جاسم صار له أسبوع وزياده فالبحرين، وربيعي شايفنه هناك..
أحمد: البحرين..!! شوعنده هناك..؟؟
يوسف: علمي علمك..
ناصر: ورقمه عندك..؟؟
يوسف: عندي.. بس تراه مايرد على أرقام هله، ولو تبي تتصل به من تلفوني الحين بدق لك عليه..
ناصر: إتصل شو تتريا، أبوه مريض ويبي يشوفه، إنت كلمه وقوله أنا مابيرضى يرد علي..
اتصل يوسف لجاسم ومارد عليه، ورجع يتصل مره ثانيه وتم يرن فترة طويله قبل لايرد جاسم وكان شكله راقد..
يوسف: ياريال صار لي ساعه أدق عليك.. وينك راقد فالعسل..
جاسم: هههههههه شو تبا موعني من رقادي..؟؟
يوسف: جسوم اهلك يدورونك.. و.....
جاسم: حسبالي عندك سالفه، أنا شارد عنهم وإنت تقولي أهلك..
يوسف: جسوم أبوك مريض، طاح عليهم وياته جلطه..
جاسم: .......................
يوسف: حرام عليك إرجع أبوك يبا يشوفك، ويمكن ماتلاقيه يوم ترجع، الدنيا غداره إرجع وشوف أبوك..
جاسم يبلع ريجه: من متى هالكلام..؟؟
يوسف: من يومين ومب قادرين يوصلون لك.. والحين قلت لهم إني أعرف رقمك فالبحرين.. دخيلك ياجاسم إرجع أبوك وايد تعبان..
جاسم بند بدون حتى لايودع ربيعه..
ناصر: هااا بشر عسى تأثر وبيرد..؟؟
يوسف: إن شاءالله.. لأنه تم ساكت ومتأثر..
أحمد: الله يهديه يارب..

تفرقوا الجماعه وكلن راح لمكان.. وناصر راح المستشفى وطمنهم إنه لقى جاسم وإن شاءالله اليوم بالليل بيكون هني..
مر النهار على خير بدون أي حوادث، وحل الليل والكل ينتظر رجعة جاسم.. أبوجاسم بعده مايتحرك بس يفتح عينه ويحس في الي حواليه..
على الساعه تسع ونص الكل كانوا واقفين يودعون بوجاسم وبيروحون على بيوتهم.. بس دخل عليهم جاسم وهو متبهدل وشكله كان يركض يبا يلحق على أبوه..
طلال من شاف ولده تحركت إيده بس ماقدر يتحرك أكثر، وجاسم على طول سار لأبوه وطاح على راسه يبوسه ويلس يصيح مثل اليهال..
جاسم: أبويه شو صار فيك.. وليش فالمستشفى..؟؟
أبوغاليه: تعال ياجاسم.. تعال وخل أبوك يرتاح..
جاسم: أبا أعرف شو الي صار له، وليش متشلل..؟؟
أبوحميد: خل أبوك يرتاح الحين، وتعال معانا برع..
طلعوا كلهم برع وخلوا أبوجاسم يرتاح.. راح جاسم مع اخوه وعمامه للبيت.. وفالسياره قالوله إنه ياته جلطه وتشلل، والحين بدا يستجيب للعلاج وإن شاءالله بيقوم بخير..
ووصل للبيت مع أخوه هشام الي مسكه وماخلاه يدخل البيت..
جاسم: شو فيك..؟؟
هشام: تعال أباك بسالفه..
ودخل الميلس، جاسم يلس عالكنبه وهشام مجابلنه..
جاسم: خير..!!
هشام: من وين بيي الخير..؟؟ جسوم تعرف ليش أبوي فالمستشفى؟؟
جاسم: .................
هشام: لأنه سمع عن سالفتك مع فتون.. تعرفها البنيه وإلا نسيتها..!!
جاسم انصدم ونزل راسه..
هشام: نزل راسك لأن الي الي مسوي سواتك حرام يرفع راسه ببين الناس..
جاسم: منو خبره..؟؟
هشام: أنا الي قلت له، بعد مايتني غاليه تطلب مساعدتي، ودورتك ومالقيتك، وماكان عندي حل غير إني أخبر أبويه يحط حل لهالمهزله الي ولده مسونها..
جاسم حط يده على ويهه وبدا يصيح، وهشام خف عليه وماكمل الكلام الي مجهزنه له..
جاسم: خلاص بسوي الي تبونه بس أبويه مايصيبه شي..
هشام: باجر من الصبح تسير لأبويه المستشفى وتحب راسه وتقوله إنك خلاص بتتزوجها، وتطلع من عنده لأهل البنت وتخطبها وتاخذ معاك أمك إخواتك..
جاسم: إن شاءالله..
وقام هشام وراح عنه داخل، وجاسم يلس يلوم نفسه على الي صار لأبوه بسبته، بس شو فايدة الندم الي صار صار خلاص.. وباجر لازم يصلح غلطته..