|
تسلمين غناتي على البارت الحلو :30: |
لا لا لا لا لا لا لا لا لا لا لا لا لالا بآآآآآآآآآآآآآآآآآآآآآآآآآآآآآرت قصييييييييييييييييييييييييييييييييييييييييييييير :30::30::30::30::30::30::30::30::30::30: |
مشكووره ياحبوبه على القصه الرووعه .. ونتريا التكمله بفارغ الصبر .. |
الــــــــــــــجـــــــــــــــــزء الــــــــــــــــــــرابــــــــــــــــــع والـــــــــــثلاثـــــــــــيــــــــــــــن طلعنا من البيت شليت دفتري ويايه .. حطيته على وحده من الطاولات الخشبيه اللي في المزرعه عدال البيت .. كانوا فارشين برزه للرياييل والثانيه للحريم .. عدال حوض السباحه .. الكشافات كلها تشتغل .. الجو رهييييييييييييب ويا اضاءة الكشافات .... توني شفت حمد أخويه وبو سالم وبوعلي .. من عقب الغدا وهم يعابلون في هالمزرعه وشغلها.. قعدنا عند الحرمات .. وعقب رحت أنا وشمسوه عند سيارة سالم .. فتحناها دورت بين الأشرطه والسديهات .. طلعت سيدي يولات وشغلته .. رديت الكرسي على ورا ورفعت ريولي على الطبلون .. والباب اللي صوبي مفتوح .. وشمسوه يالسه على الأرض .. تجلب دفتري .. ونحن نتبادل الخراريف .. سالم( يصرخ): ايييييييييييييييييييه .. شو تسووون أقرب شي عندي فريته على ويهه وأنا وشمسوه نصارخ .. كان ياي من ورا السياره وما انتبهناله .. .. دق علينا من الدريشه الثانيه وصرخ سالم: ههههههههههه .. زغتن العنود: الله يقطعك .. فلختنا سالم: تستاهلن .. شو تسون عند سيارتي العنود: مايسوى عليك .. قولنا نزلن .. هب تزيغنا سالم: طولن على المسجل العنود: هاه .. ظربتك هبة يوله سالم: لا طولن خلنا نرتبش وياكن مديت ايدي وطولت على آخر شي .. بحيث ان اللي عدالي ما يسمعوني شو أقول ارتبشوا الشباب ومنصور شل عكاز علي ايول به .. وفي هالوقت حمدوه وعويش يجهزن الأغراض عشان نشوي.. انقسمنا فريقين .. وابتدينا الشوي عقب صلاة العشى فريق حمد وخليفه وعويش وأنا وعلي ومنصور وحصوه .. والفريق الثاني بوسالم وحارب وسالم وراشد وحمدوه وشمسوه وميثوه .. حمد: هاه أمايه شو رايكم شو أحلى... أم حمد: كله رمه زين فديتك بو سالم: عموه لا تجاملين ولدج .. قوليله ان اللي نحن شويناه أحلى حمد: أممممممممممحق .. من وين يته الحلاه .. أنا من متى أروح شي يحترق حارب: أي يحترق الله يخليك .. من الحين استسلموا .. شواينا أحلى العنود: لااااااا منو قال أحلى .. أصلاً عيال سيف بن حمد ما يحطون ايديهم في شي الا حطم الدنيا وخذ الصداره ************* حارب( بهمس): آآآآه .. هيه والله وأنا أشهد بس المصيبه ان حارب ما حس ان سالم وشمسوه سمعوه وكانت ردت فعل شمسوه .. انها ماتت من الضحك وسالم قبض صيخ اللحم اللي عداله سالم: حروووووووووووب ... تشوف هالصيخ بدخله في عينك بو سالم: شو ياكم حارب : هذا ولدك سالم: أبويه جانك تبغي أخوك ... خله يصطلب بو علي : الحشم ... شعندكم ؟؟؟ حارب: خلاص.. ماشي ماشي بو سالم: عاااااااااااااااااشوا بنت سيف .. ما تنلامين أخوج ماخذ الخقه جدامج حمد: منو أخوها العنود: أنا اللي أعرفه ان عندي أخو واحد بس .. حارب: حمد بن سيف حمد: تصدقون .. هب منكم من اللي يالس يشوي لكم ردوا كلهم عند العشى يتعشون الرياييل في طرف والحرمات في الطرف الثاني وكملنا أنا وشمسوه باقي اللحم سالم: حووووه شميس العنود .. وين اللحم؟؟ العنود: اصبر بعده ما خلص علي: عنبوه .. ما تصبر انته سالم : شعليك متفيزر من الصبح ...القاله منا نحن اللي نعابل اللحم وانت تزط طولنا واللحم ما خلص .. صرخ سالم مره ثانيه سالم: بخبركن انتن .. شو تسون هالكثر شمسوه: سالم حرام عليك.. شو تبانا نسوي .. كل من اللي جدامك لين يخلص اللحم العنود: مشتل تصارخ وشال الدنيا على راسك .. نحن لين الحين ما كلنا والفحم لفح وويوهنا وانت تصارخ سالم: الله عاد ويالرقه اللي حلت عليكن فجأه .. حارب: خلنه وتعالن كلن .. علي: تعالن وخلن حمدوه وعويش يكملن .. تعالن تعشن سالم: عليوي وحروب .. كلوا وانتوا ساكتين .. لا أخلي لحمكم هوه اللي ينشوى اليوم علي: مالك خص .. أنا خطيبتي ما أباها تعابل اللحم بو علي: علي اصطلب وحشمنا نحن يالسين علي : السموحه منكم أبويه شلت شمسوه صحن اللحم صوب الرياييل وردت صوبي العنود: أنا بروح أتسبح شمسوه: حتى أنا .. ريحت ثيابي كلها شواي العنود: شبعت الا من الريحه ... وشرب الماي مشينا صوب البيت .. بندخل بو سالم: العنود شميس وين؟؟ شمسوه: بنروح نتسبح أبويه بو سالم: تعالن اتعشن وعقب تسبحن شمسوه: فديت عمرك الغالي ما نشتهي حمد: تعالن أشوف .. شو ما تشتهن .. من متى تعابلن .. نحن تعشينا وانتن بعدكن تعابلن العنود: فديت روحك حمد .. والله ما نشتهي دخلنا داخل .. أول ما وصلت الحجره طلعت ملابسي ودخلت أتسبح وشمسوه راحت الحجره الثانيه .. طلعت لقيتها منسدحه .. العنود: نعيييييماً شمسوه: الله ينعم عليج .. صدق ان السبوح راحه العنود: تعالي بنطلع .. خاطري أيلس صوب الحوض شمسوه: الحين بتلقينهم متودنين فيه .. خلينا نروح الصوب الثاني طلعنا .. ورحت صوب الحوض .. ومثل ما قالت شمسوه من عقب ما اتعشوا وارتاحوا شوي .. ودخلوا الحوض يسبحون .. استحينا نتم أكثر .. مريت عند الطوله اللي خليت دفتري عليها وشليته ... رحنا الصوب الثاني .. وين البنات قاعدات .. حمدوه: مرحبا ملاييييين عويش: وين كنتن ؟؟ العنود: نتسبح شمسوه: تعالن .. بنلعب هاند عويش: العنود .. أبغي باونتي أو أي شي من جمعيتج اللي فاتحتنها حمدوه: وييييين .. ذلتنا .. ما بتعطيج العنود: لا منو قال بعطيها بنت حمد ما تهون عويش: هب على كيفج غصباً عنج العنود: دامه هذا ردج .. تحلمييين عويش: منو قال بترياج ربعت عويش صوب البيت .. وأنا ورها .. فتحت باب الحجره بحركه قويه .. وأول ما دخلت طاحت عند الباب .... العنود( بصوت عالي): هههههههههه .. سلمتي شي ياج عويش: علني بلاج تضحكين .. تعالي شليني نزلت عندها ومن كثر الضحك انا وياها .. انسدحت عدالها .. وأنا ناااااااااااااااااقعه من الضحك .. حمد( يدخل): بسم الله عليكن .. اتخبلتن قعد حمد عدالنا .. عويش: اختك السباله يوم طحت بدال ما تسمي عليه .. نقعت من الضحك .. ظحكه بلا ظروس العنود: تراج روحج ضحكتي ههههههههههه عويش: ضحكت عنز على باب مقصب العنوده: هههههههههههههههههههه .... جان زين لو مصورتنج اعتدلت في القعده وأنا مجابله حمد .. شفت نظرة الحنان في عيونه .. لي أنا وعوش .. عويش من عقب اللي صار اتغيرت واااايد .. من عقب ما رديت بطي عشانها قدرت أكسب شوي من ثقتها .. وهالشي فرح حمد أخويه بطريقه ملحوظه ويبين عليه الفرح .. ومن الصوب الثاني آمنه ما عيبها هالاندماج بيني وبين عويش .. وكل ما تشوفنا مع بعض تحاول بطرقها الخاصه تنكد علينا .. حمد: علني ما خلا من الغويليات ياربي عويش: آآآآآآآآآآآآآآآميييييييييين العنود: مالت عليج ... وايد مصدقه عمرج .. هو يقصدني أنا وريموه .. علني ما خلا منه الغالي حمد: بس عاد .. العنود عويش .. قالوها العقل زينه اطالعنا بعض باستغراب استهبالي عويش: العنود العنود: هاه عويش: جنه .. جنه .. جنه .. أخوج سبنا العنود( تهز راسها بالنفي): هب جنه .. الا أكيد .. صدق ما يتهيألج أبوج سبنا حمد: عنلاتكن .. ترمسن جنكن ما تعرفني العنود: انت ليش ما رقدت؟ حمد: سمعت دبغه قويه .. وعقب صريخ .. نشيت أشوفكن العنود: اسمحلنا حمد .. درام طاح من فوق البيت عويش: وهالصرخه .. كانت انفجار الألعاب الناريه .. في مزرعة يرانا لفينا أنا و حمد صوب عويش.. كانت بعدها على طيحتها ما تغيرت .. ردينا ضحكنا عليها من الخااااااااااااطر.. سولفنا شوي وعقب طلعنا عند البنات وشلينا الحلويات ويانا .. وصلنا عند البنات ونحن نضحك حصوه: عنبوه .. هذي ما صارت حلويات بتيبنها العنود: قعدنا ويا حمد شوي شمسوه: شو عندكن تضحكن لفيت على عويش ونقعت من الضحك ونظراتها كانت ترجي .. كأنها تقولي دخيلج لا تخبرينهن العنود: ماشي .. استهبال حمد ويانا كالعاده يلسنا نلعب وناكل .. لين الساعه 12 حصوه: أنا بسير أرقد شمسوه: تعالي وين تبين .. بعده وقت حصوه: لا فديتج أنا متعوده أرقد من وقت .. انتن خربتني العنود: بتروحين ترقدين والا متولهه .. على بو سلطان بتروحين ترمسينه حصوه: يالله فديت هالطاري .. بروح أرمسه والله اني اشتقت له العنود: قولي بروح أرمس ريلي .. لا تقولين فيني رقاد ميثوه: انزين هيه بترمس ريلها .. انتي شو حارقنج العنود: الله يهنيها .. أنا ما قلت شي حصوه: تصبحن على الطاعه البنات: وانتي من أهل الشفاعه ميثوه: عويش .. أريد أمشي قومي خلينا نتمشى عويش: وين .. الشباب كلهم يتسبحون .. مافيني أجابل حد منهم أستحي ميثوه: ما بنروح صوب الحوض راحن ميثوه وعويش يتمشن العنود: مالت عليكن .. أونه هب لهالدرجه عوفه .. تشوفينها شميس شمسوه: طبيها عنج .. ما تستاهل تضيجين بسببها العنود: ليش عويش راحت وياها .. بفرسها شمسوه: خليها .. محد يتحملها كثر عويش وساروه ... دامج تبين الفكاك منها خليها تروح حمدوه: عاد امره صرتي ما تستغنين عن عويش أونج العنود: لا والله .. هب جذيه السالفه .. أنا ما صدقت عويش تتغير ويايه ونندمج مع بعض ... مافيني تترس راسها الحين حمدوه: ما عليج منها مسكت دفتري .. أبغي أكتب فيه وشمسوه وحمدوه يرمسن مع بعض .. فتحت على القصيده اللي كتبتها في كتاب المجتمع .. ونقلتها في هالدفتر .. وابتديت أكمل عليها أنا في دنيتي مثل الغريب اللي بلا ديره حياته بالشقا تبدا ولا يعرف نهايتها وأنا في دنيتي مثل اللي ضاعت مشاويره أنا صوت الالم والآه .. في جوفي تعاستها أنا صرخة عذاب بقلب يشكي طول تفكيره أنا صمت السنين اللي كثير الهم موتها أنا ونة وحيدٍ تاه .. يعاني كثر تكديره أبد ماعاش في الدنيا ولا يعرف حلاوتها أنا دمعة عيون تعيش في غربه وفي حيره على خد الأسى يرسم عزير الدمع قصتها أنا جرح غدا ينزف وكسر صعب تجبيره أنا رحلة قلوب ما درت حتى بوجهتها أنا ماضي.. أنا حاظر .. خليط من تعابيره على كف القدر تبدا رياح العمر رحلتها أنا اللي يرسم الفرحه وهي تمشي إلى غيره ولا أيامه .. ولا أحلامه.. ولا الآهات ردتها أنا حلمٍ .. نعم يصعب على دنياي تفسيره أنا دنيا من الآمال .. ما تفرح بلمتها أنا حظي من أيامي سراب وصعب تصويره أنا لو كانت أيامي مع الأيام .. ملتها قدر من ربي وعشته .. ولا في اليد تغييره حياتي والله العالم .. وش اللي في نهايتها عوض النعيمي شمسوه: خاطري في كستر حار وسمسم العنود: انتي مشتهاج غير غير شكل بعد ..على آخر الليل كستر شمسوه: قومن .. والله في خاطري رحنا المطبخ أنا وشمسوه وحمدوه ... قعدنا أنا وحمدوه وشمسوه تعابل الكستر .. حمدوه: شحقه هالكثر شميس شمسوه: انشالله تبني أسوي كوب واحد .. لا فديتج يمكن يكون في خاطر بو حسن .. مايهون فديته حمدوه: تفداج بعير .. قولي آمين شمسوه: خليني ساكته .. دوم طايحه تفدي في سويلم وأنا ما أقول شي العنود: آآآآآآآآآآهه شمسوه: هااااااااااااااااه العنيدي .. شعندج .. شو سر هالتنهيده العنود: ماشي حمدوه ( بخبث): ماشي .. أونه ماشي .. شو فخاطرج العنود العنود: فكني من الصدعه .. عشان أفتك من الصدعه ... رحت بساعد شمسوه .. حارب: فدييييييت اللي يسوولي كستر يا ربي من سمعت صوته .. انتفظت .. وحركة ايدي وشمسوه بدال ما تصب الكستر في الدله صبته على ايدي .. فريت الدله على صوب ووقفت .. أحس بالألم .. بس هب قادره أرمس شمسوه: عنودي شو ياج حارب: حشى شو ياكن رحت صوب المغسل .. فتحت الماء وحطيت ايدي تحته .. أحس حرارة الحرق توصل لراسي حارب: عنودي شي ياج .... حارب: ردي انزين .. وايد حرقج حمدوه: أشوف مسكت ايدي .. كان فيها زلغ بسيط من الحرق راح حارب عند الثلاجه طلع مكعبات الثلج وطلعهن وحطهن في طاسه .. يا صوبي .. مسك ايدي وحطها في ثلج .. ويزيد ماء بارد عليها شمسوه: خلاص حارب .. انت روح الحين ان يا سالم بيصفعك اليوم حارب: ماعليه من أخوج أنا حارب: عنودي يعورج عويش( اللي كانت من الصبح عند الباب تدخل): شو تسوون ؟؟ حارب: تعالي شوفي وبتعرفين عويش: انزين اظهر .. نحن بنداويها .. ان دروا بك حمد وسالم بتترحم على عمرك الليله حارب: مالت عليج ... حتى انتي.. طلع حارب من المطبخ .. وخليت ايدي في الثلج وكل مره أحط ثلج عقب ما يذوب حمدوه: ميثوه وين ؟ عويش: خليتها وين كنتن يالسات .. وقلت بيي أطالعكن ... لقيتكن مرتكبات جريمه في عمتي شمسوه: عفيش.. انطبي لا أصفعج .. عمتج اروحها مشعوره .. انتفظت وحركت الدله عويش:عفيش في عينج ( تلف صوب العنود) شو ياج العنيدي ؟؟ العنود: شدراني شمسوه( بخبث): شدراااااااج عويش: مالت عليكن .. مخليات حارب يتعبل .. لو ميثوه يت ويايه .. وشافته ؟؟ العنود: انزين .. وشو يعني عويش: ما تعرفنها .. شو دراكن ما تسير اطلع رمسات من وراكن .. ما تعرفنها سألني أنا عنها رفعت راسي أطالع عويش مستغربه من رمستها العنود: شو قصدج .. ؟؟ عويش: ما أقصد شي.. حمدوه: لا لا .. تعالي شو قصدج عويش: فديتكن .. أنا كل اللي حوليه أحسبه .. حركات حروب هذي ما تخطف عليه طلعت عنا وخلتنا في حيره وأنا أحس بتوتر فضيع .. شو قصدها .. شو شافت أو سمعت عشان تقول هالرمسه شمسوه: ههههههههههههههههههههه العنود: واللغثه .. شو يضحكج شمسوه: بسم الله .. بنت أخوج ساحره العنود: يااااااا ويلي .. شو قصدها حمدوه: ما عليج منها .. وبعدين عويش تغيرت يعني صارت أليفه ما منها خوف العنود: شو أليفه انتي بعد .. مالت عليكن .. ليش هيه شو شافت شمسوه: سأليها .. وبتعرفين شلينا دلة الكستر وطلعنا عند عويش وميثوه .. لقيت حارب يالس وياهن ويقرا دفتري .. مشينا صوبهم .. وقفت مجابله حارب أنقل نظري بينه وبين الدفتر اللي في ايديه .. العنود: ممكن حارب: شو ؟؟ العنود: الدفتر حارب: دفترج؟؟ العنود: هيه عطاني الدفتر وهو مفتشل .. أنا بعد تلومت فيه لأني رمسته باسلوب زفت حارب: السموحه .. ما أدري انه دفترج العنود: لا عادي .. حارب: قريت آخر قصيده لفيت صوبه وعيوني مبققه أترياه يكمل .. شو قرا بعد .. حسيت قلبي طاح في بطني حارب: ما قريت شي غيره لا تخافين العنود: وليش أخاف .. عادي حارب: عيل هاتي بكمل العنود: لا استريح ... عفيش عويش: هااااااااااااااااااه العنود: وويعاااااااه .. قومي تعالي برمسج عويش: في شو ؟ العنود: انتي قومي ( في هالوقت حارب خز عويش بنظره .. على أساس انها ما تقوم عشان العنود تيلس ) عويش: ما أروم .. مافيني حيل أمشي العنود: ما بنمشي بنيلس عويش: بعدين عنودي .. يوم بنروح نرقد العنود: برايج عيل أنا بروح أرقد عويش: لالالالا تعالي برمسج .. بس بسرعه بنرد العنود: خطفي انتي مشيت ويا عويش .. وقعدنا عند طاوله بعيده عنهم عويش: هاه آنسه عنود .. شعندج رمسي العنود: عويش شو كنتي تقصدين من رمستج في المطبخ عويش : أي رمسه ؟؟ العنود: عويش .. انتي تعرفين شو أقصد لا تستهبلين عويش: ما أستهبل .. ما أذكر أي رمسه بالضبط العنود: يوم قلتي لو يت ميثوه وشافتكم عويش: أوكي .. تعالي يلسي على هالكرسي العنود( بضيج): عفيش تراج متفيجه عويش: لا متفيجه ولا شي .. انتي تعالي وبتعرفين قمت ويلست عدالها .. عويش: منو تشوفين مجابلنج ؟ سايرتها وما بغيت أظاربها العنود: حمدوه وشمسوه وميثوه وحارب عويش: وأنتي من هنيه .. شوفي حارب كم مره بيلف صوبنا رفعت راسي ومثل ما قالت أول مارفعت راسي صوبه طاحت عيني في عينه وابتسم ورديت له ابتسامه خفيفه عويش: هاه شو شفتي ؟؟ العنود: ما شفت شي عويش: عنودي .. تذكرين يوم قلتي لي اني أحب بطي وهالشي كان معروف بالنسبه لج العنود: هيه عويش: وانا هالشي معروف وواضح بالنسبه لي العنود( منصدمه): شو هالشي ؟؟ عويش: عنودي . بغيتي ترمسيني بصراحه .. برمسج بصراحه .. يمكن محد يلاحظ هالشي كثر البنات .. بس شي واضح اهتمام حارب فيج .. بذمتج هالاهتمام شو تفسرينه ؟ العنود( منزله راسها): مم ما أدري عويش: لا تدرين .. وأنا متأكده انج تدرين العنود: ................. عويش: عنودي أنا ما أشوف انه بدر شي منج والا من خالي حارب أي شي غلط .. بس في نظر ميثوه مجرد انه سلم عليج بتسويها كبيره العنود( بضيج): شو اللي ياب طاري ميثوه الحين عويش: بالعكس ..ميثوه اللي المفروض نييب طاريها الحين .. العنود: يعني شو تبيني أسوي بها .. من الله ما تنزل من مصرطي عويش( بخبث): ليش؟؟ العنود: كفيش .. تشوفين الحوض اللي وراج عويش: شو فيه؟ العنود: بودنج داخل ان ما خليتي هالتنغيزات عنج عويش: قومي خلينا نرد .. حارب بغى ياكلني بعيونه توه وقفت سرت صوبها قرصتها فايدها قرصه قويه .. عوشي: يعلللللللللللللني بلاج ... يالسباااااله .. أنا براويج مشيت بسرعه صوبهم ويت ورايه .. أول ما وصلت ووقفت عدالي العنود: عويش دخيلج دخيلج .. بعدين بضارب وياج عويش: الله عاد ويا البرستيج حارب: وين كنتن في هالليل؟ عويش: ليش تسأل؟ حارب: طولتن العنود: ماطولنا ... ما خذنا ربع ساعه (حارب في خاطره " والله انها سنه وما تحمل فرقاج دقيقه") عويش: أونك عاد ماتشوف .. حروووب خل عنك أعرف سوالفك حارب( ببراء): أنا !! سوالف شوو ؟؟ العنود: أنا بروح أرقد .. تصبحون على خير شمسوه: ويين ؟؟ ماشربتي كستر العنود( بطنازه): لا بعدني ماشربت .. أنا شربت منه قبلكم كلكم .. شربه معتبره حمدوه: هاه أخبارها ايدج العنود: هالايد منحوسه .. أول اليرح .. والحين الحرق شمسوه: وسببهن واحد حمدوه+ عويش: هههههههههههههه خزيتهن بنظره قويه .. سكتن منها العنود: مقدر ومكتوب .. ماشي سبب ثاني شمسوه: أكيد مقدر .. بس لازم سبب العنود: تصبحين على خير الجميع: وانتي من أهل الخير حارب: أنا بعد بسير أوطي راسي فديييييته .. أكييد ما بييلس لأني أنا بروح أرقد ... ههههههه والله لو سمعني شميس وحمدوه وعويش .. جان أنا بترحم على عمري اليوم قبل ما أموت .. دخلت الحجره .. غيرت ثيابي وانسدحت برقد .. دخلن عويش وشمسوه وحمدوه شالات الدنيا العنود: واللغثه .. شو عندكن شمسوه : بعدج ما رقدتي؟؟ العنود: لا ما رقدت .. عويش: رقدن عشان نقوم الصبح رقدنا تقريباً الساعه وحده .. ونحن نحس بتعب بس مستانسين على تغيير الجو ................. الساعه ست الفير عويش: عنودي .. حمدوه شمسوه .. عنودي .. حمدوه.. شمسوه.. عنود حمدوه( تصارخ): عويييييييييييييييييييييييش .. طلعي برا عويش: ما بطلع .. قومن صلن حرام عليكن البنات : لا جواب عويش: قومن .. عنبوه الحين القايله .. صدق ما تستحن مرقدات لين الحين شمسوه: انتي منو مسلطنج علينا عويش: انزين برايكن قومن صلن وردن رقدن قمت أبغي أصلي وأنا أعرف اني ما برد أرقد .. عقب ما صليت حمدوه وشمسوه بعدهن ما نشن من الرقاد.. عويش: ماشي فايده .. ما بينشن العنود: لا منو قال .. وين تيلفونج؟ عويش: وراج رحت شليت تيلفونها وتيلفوني .. وتيلفون حمدوه وشمسوه .. فتحت الاستيديو وكل مره أحط رنه وغنيه .. والتيلفون على المستوى الخامس .. قعدت حمدوه وطالعتنا بطرف عينها حمدوه: شو قصدكن من هالحركه؟ العنود: قومن شمسوه: عويش شلي عمتج وانفدن برا العنود: نوووووو وووويييي ... قومن عويش: قومن كم مره بني المزرعه نحن قامن شمسوه وحمدوه .. وعقب ما صلن طلعنا كلنا برا .. لقيت عموه أم عبدالله يالسه جدام الباب ووياها أم ميثوه وعموه أم حمد وشيخه وسلامه وآمنه .. البنات : السلام عليكم الجميع: وعليكم السلام أم حمد: ماشالله واعيات من وقت .. شو عندكن؟ حمدوه: من وقت .. العنود تقول القايله العنود: أنا!! جذابه وين قلت قعدنا كلنا .. وأنا قعدت عدال عموه أم عبدالله .. مسكت الدله صبت لي كوب حليب وناولتني اياه العنود: مشكوره عموه فديت روحج .. ليش تعبتي عمرج أم عبدالله: شربي غناتي .. شربي عويش: انزين حتى أنا صبيلي حمدوه: وأنا أم عبدالله: صبن لعماركن حمدوه: يااااسلام .. شحتنها عنودي أم عبدالله: بس لا تصدعبنا شمسوه: أنا بصب لكن لا خليت منكن العنود: هههههههههههه .. يالله شمسوه بتعوضكن سويت لهن حركة غياظ .. شمسوه: العنود.. حرق أمس بعده مابرد .. لا تخليني أصلخه الحين شيخه: شمن حرقه؟ عويش: أمس نسوي كستر والعنود حرقت ايديها العنود: هب أنا هذي شمسوه شمسوه: حسبي الله على العدو .. وين أنا !!! تخبري عمرج شو اللي خلاج تحركين الدله أم عبدالله: أشوف ايديج مديت لها ايدي.. كانت محمره شوي أم عبدالله: بسم الله البنت شي ياها .. عين صكت هالايد أول الييرح والحين الحرق عويش: هب منها خزيتها بنظره عشان تنطب .. يو حمد وبوسالم وبوعلي صوبنا .. وقعدوا على طرف .. بس على نفس الحصير .. بوسالم: يا هالشباب اللي مايقعدون لين القايله حمدوه: ماعليك عمي.. عقب شوي بتلقاهم واعيين وبالفعل ما كملت حمدوه رمستها الا وعلي وخلوف توهم طالعين علي: السلام عليكم الجميع: وعليكم السلام سلموا على الشواب .. وقبل لا يقعدون العنود: لالالا صبروا علي: هاه .. شعندج العنود: أنا بعد ما وايهتوني علي: مالقيت مونه خليفه: الحمدالله والشكر...كل يوم عن يوم يخف العقل .. وأنا أحيد الناس من يزيد عمرهم يكبر عقلهم .. عمتي العكس ووالحمدالله العنود: ودك أصلاً انته .. احمد ربك عندك عمه شراتي علي: الحمدالله الذي عافانا مما ابتلى به بعض من الناس العنود: شقصدك ؟ علي: أبد سلامتج العنود: قواطي مالت عليكن .. أونكن من شلتي دافعن عني بوسالم: سالم وحارب ما قعدوا خليفه: يوم طلعنا... كان حارب توه واعي قعدنا شوي وطلع سالم .. سالم: صباح الخير الجميع: صباح النور ....... سالم: حصيص .. صبيلي كوب حليب شلت حصوه الدله وما حصلت فيها شي حصوه: ماشالله عليكم .. خلصت الدله حمدوه: هاتيها بروح أسوي غيره العنود: أنا بروح وياج عويش: وأنا بعد شمسوه: وأنا بعد خليفه: هاه .. عبدالغفور وربعه الصعايده شمسوه: صعايده في عينك دخلنا البيت .. وبنطلع من الباب الثاني .. قبل من نوصل عند الباب الوراني .. سمعنا صوت حارب وميثوه طالع من ممر الحجر .......... ميثوه: اصبر حارب .. لا تطلع عني بطلع وياك حارب: يالله بسرعه ميثوه(بدلع): اصبر انزين حارب: بسرعه ... أنا ما أدري هالبنات ليش يطولن هالكثر ميثوه: لزوم الكشخه حارب: يالله انزين بسرعه .......... مشيت قبلهن .. عشان أتهرب من نظراتهن .. أول ماسمعنا الصوت توجهت ثلاث أزواج من العيون صوبي .. كنت بطلع أول ما وصلت الباب اللي يودي المطبخ .. بس عويش قبضتني من ايدي .. لفيت صوبها كانوا حارب وميثوه توهم طالعين من الممر حارب: صباح الخير البنات: صباح النور حارب: شصبحتن؟ شمسوه: الحمدالله يسرك الحال حارب: كلهم واعيين عويش: هيه كلهم .. قاعدين برا حارب: بسير صوبهم عويش: ميثوه مابتين ويانا ... بنروح نسوي جاهي ميثوه: لالا .. بروح ويا حارب .. ماقدرت أتحمل وقفتي أكثر .. سويت عمري مش مهتمه ولا فيني شي .. رحت المطبخ .. وحطيت الغوري ( الابريق) على الغاز وغسلت الدله .. دخلن البنات المطبخ .. وعلى كثر القهر والضيج اللي أحس فيه الا اني مابينت شي حتى حقهن .. بكل بساطه عشان ما أخرب وناستي حمدوه: عنودي ... شو فيج؟ العنود: مافيني شي .. بسم الله عليج .. شو فيني بعد كانن يطالعن بعض بنضرات .. فهمت انه مستغربات .. ومش عارفات شو يقولن .. بس أنا حبيت أغير الجو وقعدنا نسولف لين خلص الحليب .. صبيناه في الدله وردينا صوبهم .. قعدت شمسوه مكاني عدال أم عبدالله العنود: شميس .. اشتلي مكاني شمسوه: لالا أنا اتولهت على يدوه مابقوم عنها تحركت أم عبدالله وسوت مكان بينها وبين ميثوه .. أم عبدالله : تعالي غناتي .. فديت قلبج يلسي هنيه عويش: ييييييييها .. العنيدي ماخذه الغلا كله اليوم .. شو مسويه يالساحره شمسوه( تهمس لعويش): شكلها عدوى تنتقل من الولد لأمه أم عبدالله : صبي كوب حليب لاختج انتي عويش: بسها عنبوه هذا الثاني بوسالم: ههه لالا صدقها عويش .. العنود خذت الغلا كله .. من قدج بنت سيف يوم أنا البجر فروني ..وين الباقين ... خلاااص راحت عليكم من قالي بوسالم هالكلام .. قفطططططت وما عرفت شو أقول .. كنت ماخذه السالفه مزح بس دام ان الرياييل دخلوا فيها .. مابقدر أبطل حلجي بكلمه حارب: لالالا منو قال .. أنا أبغي أمايه .. يالله قومن عنها شمسوه: من الحين أقولك .. أنا بقوم عن يدوه حارب: بتقومين .. وانتي حرمه شمسوه: أقوم وين أسير .. أنا مالي غنى عن يدوه حارب: سيري عند أمج .. يالله أشوف .. أنا أدري ان الغاليه ما تستغني عني لاخليت منها .. يا حارب صوبنا ووقف جدام شمسوه ودزها بريله دزه خفيفه حارب: يالله .. قومن قامت شمسوه من مكانها ولف حارب صوبي حارب( بغياض): حتى انتي العنود .. يالله قومي كنت منقهره منه .. ماحسيت عمري الا وأنا أفر القنبله اللي انفجرت وسكتت الكل بصدمه ... بس وأنا أتكلم .. كنت أحس بالحزن اللي يعصر قلبي .. العنود: أوكي .. شمسوه بتسير عند أمها .. أنا .... وين أسير؟ الكل سكت وانتبه لردة فعلي .. أدعي ربي ما أضعف جدامهم كلهم وتنزل دموعي.. اللي يطالعني واللي منزل راسه واللي رافع راسه موجهنه على حارب .. حارب من سمع كلامي نزل راسه وتم مغمض عينه وما تحرك .. يوم حسيت عمري اني ما بقدر أتحمل أكثر .. قمت ولفيت عنهم أم عبدالله: العنيدي فديت قلبج وين سايره بنتي؟؟ العنود: بسير أتصل حق يدوه .. أحيدها أمس هب صاحيه أم عبدالله: تعالي فديتج بترمسينها عقب .. تعالي تريقي العنود: ما أشتهيه عموه حمد: العنود .. تعالي يلسي غناتي .. تعالي أنا مابتريق لين انتي تتريقين رديت مكاني .. ويلست ساكته وحارب قاعد من الصوب الثاني عدال أمه .. وزعنا الريوق في صحون وحطينا للرياييل ريوقهم بعيد عن الحرمات شوي .. وحطينا الباقي للحرمات .. قعدنا نتريق ومن الضيج اللي أحسه مش قادره آكل .. بس من أحس ان عبرتي بتطلع رديتها بشرب ماء .. أو أي لقمه من الأكل .. دقايق وقمت عن الريوق شيخه: العنود تريقي العنود: بسني ... شبعت أم عبدالله: يالله يابنتي .. جان هاللقمتين شبعنج العنود: بسني عموه مشيت برد داخل البيت .. رحت حجرتي .. اتصلت حق غيث .. غيث: مرحبا مليون العنود: المرحب باجي .. ما اتوقعتك بترد عليه قلت بتكون راقد غيث: لا .. نشيت يابوج .. خالتج تخلي حد يرقد العنود: ليش شو عندها غيث: قوم خالي عندهم عزيمه اليوم وتباني أسير أشتري الفواكه العنود: غريبه .. خالي وعبدالله وين غيث: عبدالله دوام .. وخالي بعد روحه يعابل العنود: أها .. شخبارها يدوه اليوم .. أحيدها أمس هب صاحيه غيث: الحمدالله بخير .. سرحت للهوش وتوها راده العنود: فديييت قلبها ياربي غيث: وين انتوا .. بعدكم في المزرعه العنود: هيه .. انت شدراك انا في المزرعه ؟؟ غيث: حمد خبرني العنود: وانت متى رمسته حمد ؟ غيث: أمس مرمسنه .. انتوا متى بتردون؟ العنود: اليوم العصر انشالله غيث: عنودي .. بنزل الجبره أنا الحين .. شي في خاطرج العنود: تسلم فديت عمرك سكرت عن غيث وانسدحت على الشبريه .. نزلت دمعه من عيني اليسار .. أول ما حسيت ان حد دخل الحجره .. مسحتها بسرعه واعتدلت... حمدوه: شو ميلسنج هنه العنود: كنت أرمس خالي شمسوه: عنودي أحس ان شي فيج العنود: مافيني شي.. انتن لو مافيني شي .. غصب بتخلني مضايجه عويش: انزين قومن خلنا نطلع .. الحرمات بيطبخن عقب ساعه .. بنروح نفازعهن العنود: مالي خاطر .. روحن انتن عويش: نحن ما بنروح الا عشانج .. يالله قومي العنود: بعدين بلحقكن .. سيرن حمدوه: عنودي .. حاولي تغيرين نفسيتج .. كم مره بني المزرعه نحن .. قومي العنود: انزيين .. سيرن وبلحقكن شمسوه: لا منو قال .. شلي اللي بقى من الدكان وخلينا نطلع .. بنروح صوب النخل العنود: خيييييييبه حرام عليكن .. بعيد حمدوه: قومن خلنا نسير ونرد بسرعه ... عشان نقطع السلطه طلعنا من الحجره .. مرينا على البرزه ... حمدوه: هاه وين تبن ؟ شمسوه: بنروح صوب النخل بو سالم: ماشالله عليكن .. فيكن حيل تصكن لين هناك حمدوه: هيه عادي عمي لا تحاتي شيخه: لو حد مطرشنكن تسيرن تقضن حايه هناك ماسرتن شمسوه: أمايه متى تحيدين البنات يغترهن شي .. شيخه : ماجذبتي الساع العنود( بهمس): عفيش .. زقري ميثوه خليها تيي ويانا عويش: ميثوه ما بتروحين ويانا ميثوه: لالا مافيني حيل مشينا وانا بموت من القهر .. حضرتها يالسه وياحصوه وحارب وسالم .. بس منو قال أتم منقهره اروحي .. العنود: ماشالله . ليش ميثوه ماطاعت تروح ويانا عويش( بخبث): شدرنا عاد انتي ابصريبها العنود: عويش.. بذبحج عويش: هههههه وأنا شو قلت حليلي العنود: متفيزره وياحارب وسالم .. عايبتنها اليلسه شمسوه: ههههههههههههههههههههههههههههه ... ماشالله عليج يا عنودي حمدوه: خلها تيلس .. بوغنيم مايطالع حد غيري العنود: وانتي شدراج حمدوه: أدري منقهره من حارب .. وقهرج بتصبينه فيني .. بس بردي ما بغيض شراتج العنود: هههههههههههههههه .. حشى يا برودج حمدوه: مش برودي .. بس دام انه هوه بغى هالشي انه يرمس ويسولف وياها وما عبرني .. ليش أعبره وأحرق أعصابي عسبه .. مثل انه ما عبرني .. أما ما بعبره عويش: صدقها حمدوه وصلنا عند النخل عقب ربع ساعه .. مكان النخل أبعد مكان في المزرعه كلها .. بس شكل المكان روووووعه .. قعدنا نتصور ونصور النخل .. وانا كل مره أحط تفكير معين في بالي .. لعبنا كم لعبه .. ذكرتنا بأيام أول ونحن ميتين على عمارنا من الضحك .. قعدن عويش وشمسوه على واحد من مساطيح التمر وصورناهن أول مانزلن اندبغت شمسوه وحمدوه ما فوتت هاللقطه .. كل الضيج اللي حسيت به اليوم الصبح راح عني في هالوقت والربشه .. الساعه 11 ردينا صوبهم .. الحريم كانن في المطبخ .. الرياييل طلعوا .. والشباب قاعدين في الصاله وياهم حصوه وميثوه .. البنات: السلام عليكم الجميع: وعليكم السلام سالم: وين كنتن؟ العنود: عند النخل سالم: لين الحين ..؟؟ أتحراكن رديتيين .. العنود: لا ما ردينا .. تونا واصلات علي: شمسوه سيري هاتي الكيرم من الصاله اللي برا شمسوه: انشالله راحت شمسوه تييب الكيرم وردت علي: منو بيلعب ؟؟ سالم:أنا .. علي: يالله انت وحارب وأنا وخليفه حارب: على كيفك تحط فريق .. أنا وخليفه ما قلنا بنلعب خليفه: لا أنا بلعب علي: منصور ولا رشود .. حد منكم بيلعب منصور+ رشود: لا حصوه: لاهين عنكم بهالبليسيشن .. وين تباهم يلعبون حارب: أنا أنا بلعب خلاص ابتدوا اللعب ونحن رحنا عند الحرمات في المطبخ .. العنود: شورايكن نقطع السلطه حمدوه: خلنا نشل الأغراض ونقطع داخل .. مافيني على الدخان شمسوه: أوكي .. يالله حطينا الخضره في الطاسه .. وشلينا صحون وطيس بنحط فيها السلطه .. دخلنا الصاله ... فرشنا على طرف .. قطعنا أنا وحمدوه الخيار .. وشمسوه الخس .. عقب ما خلصوا الشباب لعب .. قعدوا عندنا سالم: له له له .. طالعوا منو متبرض للسلطه اليوم خليفه: من الخاااااااطر بعد علي:أحلى سلطه اليوم باكلها سالم: لا والله علي: هيه .. العنود: روحوا كملوا لعبكم علي: أنا بقطع وياكم حمدوه: لا لا .. عين من الله خير علي: أعرف أقطع جربوني شل علي السجين من ايدي وطلع خياره وقطعها كل وحده أكبر عن الثانيه .. العنود: حووووو تقطع حق هوش انته علي: شو على بالكم .. أنا أحسن واحد يقطع سلطه في هالعيله سالم: مالت عليك .. أقول .. قم قمممم شمسوه: قوموا خلونا نخلص شغلنا العنود: حصيص بتردين اليوم بيتج حصوه: انشالله خلصنا تقطيع السلطه .. حارب طول الوقت مجابلني بس ما حطيت عيني في عينه أبداً رحان المطبخ .. ردينا داخل الحجره وهالمره ميثوه كانت ويانا وتخبرنا عن السوالف اللي صارت يوم رحنا عند النخل . وأكثرها تخص حارب ..واللي صدم البنات اني كنت أضحك وياها على سوالفه ولا اهتميت لأي شي .. قبل الغدا تبلنا السلطه أنا وعويش وحطيناها في صحون .. وأنا ماكلت شي عند الغدا غيرها .. عقب الغدا كنا في الصاله سالم: ماشالله .. صدق لذيذه السلطه اليوم العنود: عاد الا سلطه وايد مدحتونا اليوم علي: لذيذه والا ما بنمدحها ....... عقب صلاة العصر شيكنا على البيت وحمد يوصي العمال .. واقفين بنركب السيايير .. شمسوه: العنود تعالي ويانا العنود: شوو .. لالا مابي وياكم ولا الله قاله حمدوه: العنود عن البزا تعالي العنود: لا مابخلي خليفه اروحه حمدوه: عويش بتركب وياه العنود: مينونه انتي عويش وخليفه في سياره وحده حارب كان واقف عند سيارته .. بس لابس نظارته الشمسيه عشان جذيه ما كنت أشوف وين يطالع العنود: خلن هالسالفه عنكن .. شوفيه حارب شمسوه: مافيه شي .. شوفيه بعد العنود: ماتشوفينه معصب شمسوه: هديه وتعالي ويانا العنود: شمسوه مايهون عليه خلوف يروح بروحه .. وبعدين أنا أستحي .. وين أبا حمدوه: مااستحيتي يوم رحنا دبي العنود: محد غيره بيودينا .. ماشي سياييرغير .. اليوم ماشالله بدال الوحده أربع حمدوه: حارب متلوم فيج أصلاً العنود: لا يتلوم ولا شي .. قوليله طاف حمدوه: مالت عليج ..ما أدري راسج يابس على منو ردينا العين بنفس الترتيب .. وصلني مسج من شمسوه .."" من ركبنا حارب ما نطق بكلمه .. معصصصصصب .. الله يستر .. والله العالم يسوق 150 " تخبل هذا .. ماصار له شهر من طلع من المستشفى .. كانوا طالعين ورانا .. خطفوا عدالنا في هالوقت طهف .. مايشوف جدامه .. اتصلت حق شمسوه ***** في سيارة حارب .. كانوا كلهم ساكتين ولا واحد منهم تكلم بكلمه .. شمسوه كانت يالسه ورا حارب وتطالعه في المرايه .. رن تيلفونها حمدوه: منو شمسوه( بصوت عالي .. وتشوف المرايه): العنود شمسوه: ألو العنود: السلام عليكم شمسوه: هلا العنود العنود: شو هذا تخبل عمج .. ما تاب من الحادث القبلي .. ليش يسرع شمسوه: شدراني .. العنود: شمسوه خليه يساير خلوف( يصارخ من بعيد): لو خطف جدام الشواب بياكلونه شمسوه: حارب خليفه محتشر .. يقولك ساير حارب: انتي منو ترمسين ؟ شمسوه: العنووود حارب: انشالله خفف حارب من سرعته .. وهو يتنهد .. وشغل المسجل .. ***** الــــــــــــــجـــــــــــــــــزء الــــــــــــــــــــخامــــــــــــــــــس والـــــــــــثلاثـــــــــــيــــــــــــــن وصلنا البيت الساعه سبع المغرب .. دخلنا البيت نرتاح .. ماطلعت من حجرتي لين الساعه تسع .. طلعت من الحجره شفت عويش وشمسوه وحمدوه جدام باب الحجره العنود: بسم الله .. من وين طلعتن عويش: وين تبين العنود: بروح أييب بيبسي شموه: شو تسوين العنود: كنت أحل الواجب .. ورم راسي من المسائل .. شو عندكن ؟ عويش: ماشي .. بس أبويه يقولج تعالي تعشي العنود: مالي خاطر عويش: انزين خلينا نروح الصاله رحنا الصاله .. كانوا يالسين يتعشون .. قعدنا نسولف عقب العشى .. رن تيلفون حمد كان يتكلم .. وأحس اني طرف في الموضوع .. وفهت ان حد ياي يوم سمعته يقول اقرب في الميلس .. عقب ماسكر لف صوبي حمد: عنودي ..خالج غيث من متى يتصلج العنود: تيلفوني في الحجره حمد: كان عند الباب .. قربته في الميلس .. قومي نسير صوبه العنود: انشالله لبست شيلتي ورحت وياحمد الميلس حمد+ العنود: السلام عليكم غيث: وعليكم السلام سلمنا عليه وقعدنا العنود: غريييييييبه .. الشيخ غيث تكرم علينا بزياره .. مع اني اليوم الصبح مرمستنك .. ماقلت لي غيث: ما عرفنا لج .. يينا طحتي فينا هزاب وتعليقات .. مايينا تشرهتي وزعلتي انتفختي صرتي كبر الدرام .. العنود: هب منك من اللي يتوله عليك حمد: مرحبابك الساع والله بو مطر غيث: هاه حمد .. العلوم حمد: علوم الخير والله .. نترياك غيث: وأنا ييتك .. والحين حمد: يالله .. افتح حلجك غيث: لالالا .. هب هذا اتفاقنا العنود: شو عندكم؟ حمد: عنودي .. نحن بغيناج في رمسه يرمسون بينهم بالألغاز وأنا مش فاهمه شي العنود: شو عندكم ؟ حمد: عنودي أنا بغيت خالج يرمسج بس بصراحه اكتشفت ان ييته بلا فايده غيث: أفااااااا .. بطلع عيل حمد: أكرم عليك .. ما تتحمل سوالف العنود: لا تيلسون ترمسون رباعه وتخلوني .. شو عندكم حمد:عنودي أنا قلت لج ان أكثر من واحد وخطبوج من قبل .. وما شاورتج في حد غير بطي .. اليوم يايين نشاورج ... العنود: تشاوروني في شو؟ حمد: خاطبنج ريال وأنا عني أشوفه ريال زين وبيحشمج صدق سكت وأنا أطالع في عيونهم .. أحس عمري شرا الهبلا اللي تسمع وما تفهم شي من اللي تسمعه .. مارديت عليهم .. وكمل حمد كلامه حمد: حتى غيث شاورناه في الريال .. غيث: أشهد انه ريال وأنا ياي اليوم بس لأني أبغي مصلحتج .. وانتي ان طال الزمان والا قصر ان الله كتبج لج نصيب بتعرسين .. كلامهم وترني وما أقدر أتكلم تبلمت.. من كلامهم أفهم انهم مقتنعين فيه .. ومابقدر أعارض.. ومالي عذر أرفض .. أخافهم يقولون ان حد في خاطري .. لازم أوافق وحارب انسان لازم أنساه .. هو مافكر فيني وبيعيش حياته .. خلني أنا أعيش حياتي دامهم يشوفون فيها مصلحتي .. رفعت راسي صوبهم .. العنود: على راحتكم حمد: نحن ندور راحتج انتي غيث: انتي لين الحين ماعرفتي الريال العنود( منزله راسها): ما تفرق .. أنا ما أعرف حد .. بس دامكم تشوفون انها مصلحتي .. مابقدر أعارض ..لأنكم انتوا أدرى عني غيث: لا من حقج تعارضين لو ما تبين العنود ( بصعوبه وهمس): منو؟ غيث: حارب انصدمممممممممممت .. ماقدرت أطالع في عيونهم ... وما أقدر أعبر عن الاحساس اللي تملكني ذاك الوقت .. حسيت اني في مكان بعييييييد وحمد وغيث يرمسوني وأنا ماأسمع الا أصوات خفيفه وبعيده .. ردني غيث للواقع .. غيث: العنووود العنود: هلا غيث: شو ياج ؟؟ العنود: ماشي غيث: شو رايج ؟ العنود: مم ماأدري .. على كيفكم حمد: شو على كيفنا .. نحن نبغي شورج انتي العنود: اللي يريحكم ... أنامالي شور من عقبكم غيث: الا في هالشي .. الشور شورج انتي العنود: اللي يريحكم خالي .. حمد: العنود غناتي .. أنا مابمدح لج حارب لأنه أخو آمنه بس أنا لو ما أشوف انه صدق بيعزج وبيكرمج جان ماشاورتج فيه ورديته .. غيث: عنودي عيوني إذا ماتبن محد بيغصبج العنود: ما عرف حمد: سمعي الاسبوع اللي طاف يوم كانوا كلهم عندنا عقب العشى حارب وبوسالم رمسوني .. والحين مرن ست أيام .. مافينا نطول عليهم أكثر .. أنابخليج اليوم فكري .. باجر عقب ماتردين من الجامعه أبغي أسمع ردج هزيت راسي وقلت له انشالله بصوت خفيف .. حتى أظني انهم ماسمعوها ..كملوا سوالفهم وأنا أسمعهم بس بالي بعيد عنهم .. وقفت عقب دقايق العنود: أنا بروح عنكم غيث: وين ؟ العنود: بروح أرقد .. عندي دوام باجر غيث: بترقدين والا تفكرين خزيته بعين وحمد ظربه بخفه على جتفه .. غيث: هههههههههه خلاص يابوج مايسوى علينا .. طلعت من الميلس أمشي بمهل صوب البيت رحت ورا البيت بدخل من الباب الوراني .. مالي خاطر أشوف آمنه.. وأنا أقول هيه شو فيها عليه هالفتره.. أكيد عارفه الموضوع وهب راضيهوبردت حرتها فيني ... شفت عويش وشمسوه وحمدوه واقفات عند الباب يطالعن من بعيد كأنهن يراقبن حد .. العنود: شو تسون شمسوه: بسسسسسسسسسم الله .. من وين طلعتي عويش: أعوذ بالله .. نحن نترياج تدخلين حجرتج العنود: وشعندكن تتريني .. وما ترومن تتريني في الحجره حمدوه: لا المراقبه من بعيد أحسن العنود: سخيفات .. صدق ما عندكن سالفه صدق ما كان لي بارض لحد متوتره ... خايفه ... منصدمه ... فرحانه ... حزينه ... خليط من المشاعر المتضاربه في نفسي ومش عارفه شو أسوي .. رحت حجرتي ودخلن البقرات الثلاث ورايه شمسوه: عنودي شو فيج العنود: مافيني شي عويش( بخبث): شو كان يبغيج أبويه في الميلس؟! العنود: شو بعد .. تراج تدرين ان غيث هنيه حمدوه: انزين غيث شو بلاه ... شو في خاطره؟! العنود: انتن شو تحت روسكن!! عويش: ماشي .. نترياج ترمسين العنود( تتنهد): ما أعرف شمسوه: شو ما تعرفين ؟ العنود( تدمع): ما أدري .. ما أعرف حمدوه: عنودي شو فيج ؟ العنود: مافيني شي .. بس تعبانه برقد طلعن عني البنات وعقب دقايق ردت شمسوه .. وأنا في مكاني ما تحركت .. ولا حسيت بها يوم دخلت الا يوم يلست مجابلتني شمسوه: عنودي .. شو في خاطرج؟؟ العنود: ماشي شمسوه: عنودي انا أعرف انه شي في خاطرج العنود: ما أدري شمسوه .. محتاره محتاره شمسوه: في شوه محتاره ... خالي شاورج ويبغي ردج اللي انتي مقتنعه فيه .. العنود: وقبل ما أقتنع في وايد أشياء لازم أفكر فيها شمسوه: عنودي في البدايه فكري بنفسج وبراحتج العنود: وهذا اللي أفكر فيه شمسوه: وشو تشوفين ؟؟ العنود: شمسوه عموه ما كانت تبغي تخطب له ميثوه؟ شمسوه: كااااااانت العنود: والحين هيه راضيه؟ شمسوه: عنودي انتي شو تقولين !! ... يعني أونج ما تعرفين غلاتج عند يدوه .. من البدايه يوم حارب قال ما يبغي ميثوه عصبت .. بس من درت انه يباج ما تتخيلين شقايل استانست العنود( تتنهد): ما أدري شمسوه: بس عاد... شو ما تدرين ... أول تبغي الشي .. يوم وصل ليديها قالت ما أدري .. صدق هب ويه نعمه ياااااااالله ياشميس .. دخييييييييلكم أريد حد يفهمني ... شمسوه: سمعي قلت لج فكري براحتج انتي ... ولا تضيعن اللي في ايديج .. انتي تعرفين انا حارب يبغيج من خاطره .. انسدحت وما رديت عليها .. طلعت عني وأنا مكاني ما تحركت في دوامة تفكير في حياتي .. صح اني أحب حارب وأتمنى أكمل حياتي وياه .. بس يوم صارت السالفه جد وتحقق اللي تمنيته .. أحس اني متردده .. رن تيلفوني .. نوروه متصله العنود: ألو نوروه: مرحبا الساع العنود: ملايين نوروه: شحالج العروس العنود( تتنهد): بعدني ماصرت عروس نوروه: شوفيج عنودي العنود: ما أدري نوروه تعبت من التفكير .. حمد يبغيني أرد عليه باجر نوروه: عنودي انتي تحسين انج مرتاحه العنود: مرتاحه .. بس ما أدري نوروه: صح أنا مايخصني بس ما أدري ليش مرتاحه منه .. أحس انه صدق بيسعدج العنود: ............... نوروه: وبعدين جاسم غيث وعبدالله وايد يمدحون فيه ... وصدقيني لو غيث وجاسم شافوا فيه عيب واحد .. صدقيني ما بيوافقون العنود: لين باجر الصبح بكون متخبله نوروه: عن هالحركات .. كل انسان ونصيبه .. ردي على اخوج بالشي اللي انتي مقتنعه فيه .. كلمت نوروه لين الساعه 12 .. سكرت عنها ووقفت عند الدريشه أفكر .. طرى على بالي سالم .. حسيت اني محتاجتنه في هالوقت .. ****** في بيت أم عبدالله .. كان سالم في سيارته يرمس في التيلفون .. أول ماشاف العنود تتصل على الخط الثاني سكر ورد عليها سالم: عللللللللللني فدى غزال بن (.....) العنود: مرحبا سالم .. سالم: علومج الغاليه العنود: علوم الخير والله .. وين دارك؟ سالم: توني واصل البيت العنود: سالم أبغي أرمسك شوي سالم: رمسي فديتج .. شو في خاطرج ؟ العنود: لا ما ينفع في التيلفون تعال عندنا سالم: عنودي شي فيج ؟؟...شي يعورج ؟؟؟ العنود: لالا انته تعال سالم: انشالله .. الحين ياي صوبج نزل سالم من سيارته .. وعلي توه واصل .. وقف علي السياره في القراج .. ونزلوا علي وحارب علي: حييييييييييه سالم: من وين يايين؟ علي: من العزبه سالم: حوووه الحربي .. شو ياك حارب: ماشي سالم: شياك مغندم علي: هب منه ..شالنه الشوق .. طول الدرب صااااخ ومويم... من خبروه ان غيث وحمد شاوروا العنيدي وهوه على هالحال.. سالم: ههههه على طاري الشوق .. عنودي متصله توها تباني أسير صوبها حارب: ليش شو فيها؟ علي( يظربه على جتفه): يا أخي انت شلك ؟ سالم: يالله أنا بسير حارب: سالم ما أوصيك عاد سالم: لا توصي .. خالتي بنصحها .. مابخليها تدمر مستقبلها وياك حارب: عنلاتك يالنذل .. مالت عليك ... أقوووول سلم سلم لف سالم على حارب وخزه بعينه علي: أقول الحربي ... الشرده نص المريله ***** وقفت جدام باب الصاله أتريا سالم .. شفته يدخل البيت .. دخلنا الصاله سالم: اروحج يالسه؟ العنود: هيه كلهم راقدين سالم: وانتي شو مسهرنج؟ العنود( تتنهد): ما أدري سالم: عنودي شو فخاطرج ... العنود: انت تدري باللي فخاطري قعد عدالي سالم: عنودي لا اتعبين عمرج في التفكير .. مابيصير شي انتي ما تبينه العنود: أدري سالم .. بسس سالم: بس شو ؟؟ العنود: ما أدري .. انت شو تشوف؟ سالم: شوفي عنودي حطي راي غيث وحمد في بالج قبل رايي .. لأن حارب عمي وهم بيعطون رايهم فيه بالحق أكثر عني .. صح والا لاء .. العنود: غيث موافق سالم: أدري ان غيث موافق .. العنود( شوي وتصيح): سالم .. أنت بشو تشور عليه سالم: عنودي غناتي صدقيني ماتهونين عليه ... وأنا لو أشوف ان حارب بيضرج في شي صدقيني مستحيل أوافق وبسوي المستحيل عشان ما ياخذج العنود: يعني؟؟ سالم: أنا لو ياني واحد بمواصفات حارب ويخطب ما برده .. سكت وما رديت عليه .. تنهدت من الخاطر .. ما أدري شو اللي خلاني أصيح ذاك الوقت .. قبظني سالم من ايدي ورص عليها سالم: عنودي عيوني .. ليش تصيحين .. صدقيني والله لو ماتبينه محد بيغصبج هزيت راسي .. وتكلمت بصعوبه العنود: لا سالم .. أنا بس أحس اني صدق محتايه أبويه وأمايه سالم: عنودي عيوني .. اطلبي لهم الرحمه .. مسحت دموعي عشان أطمن سالم ومايحاتيني .. العنود: ماعليك مني .. هذا الا دلع بنات سالم( يمسح على راس العنود): فديييت غرشوبتنا ... خلها تتدلع من حقها العنود: اسمحلي سالم .. عثرتك في هالليل .. بس حسيت اني محتايه أرمسك سالم: بس عاد ... سمعي غناتي .. انتي بتسمعين من كل حد وبتاخذين شور كل حد .. أحسن شي شاوري ربج .. صلي الاستخاره قبل ماترقدين وصدقيني ربج مابيختار لج الا الخير.. طلع سالم عني ورديت حجرتي .. وصليت استخاره ووكلت ربي في شوري .. وانسدحت الساعه ثلاث برقد وعلى طول رقدت من غير ما أفكر بشي... ..... قمت الساعه خمس أحس اني مرتاحه بس ما أقدر أقبض دموعي .. قمت أصيح بشكل فضيع وبشهقات قويه .. رحت طلعت الصندوق من الكبت وطلعت صور أمايه وأبويه الله يرحمهم .. حطيتهن جدامي وأنا أحضنهن ... محتاجه لهم في هالوقت أكثر من قبل .. محتاجه لأبويه ينصحني وأمايه تعطيني رايها ... الحلم رد لي ذكريات وايده .. انفتح باب الحجره ودخلت عويش ..يت وقعدت عدالي عويش: عنودي شو فيج .. العنود: ..... عويش: عنودي دخليج لا تخوفيني ... شوياج .. ليش تصيحين ؟؟ سحبت الصور اللي في ايدي .. عويش: عنودي فديت روحج استهدي بالله... قومي صلي الفير وارتاحي العنود: عويش أحس اني بموت عويش: بسم الله عليج .. لا تقولين هالرمسه حرام عليج .. قومي صلي انتي الحين .. مسحت دموعي ولميت شعري ودخلت الحمام أتوضى .. طلعت شفت عويش تلم الصور وتحطهن في الصندوق .. صليت الفير وقعدت ويا عويش ولا وحده منا تكلم الثانيه .. قطعت الهدوء عقب فتره العنود: انتي شو نزلج؟ عويش: قمت أصلي .. قلت بيي أوعيج للصلاه .. ظاريه تتصلين قلت يمكن ما قمتي اليوم .. العنود: روحي رقدي .. عويش: مافيني رقاد وبعدين عندي واجب بحله .. العنود: خلينا نطلع في الصاله .. عويش: انتي روحي وأنا بركب أييب اللاب وبيي طلعنا من الحجره .. عويش ركبت فوق وأنا رحت المطبخ أييب الحليب .. وأخلي لامي تييب الريوق بسرعه .. أحس اني يوعاااانه .. رديت الصاله .. شغلت التلفزيون وانسدحت أطالع .. وعويش تحل الواجب ... عويش: خلصت العنود: أمحق واجب .. شوهذا؟؟ عويش: مخلصتنه بس ما طرشته .. العنود: وين الريوق؟؟ .. يوعانه عويش: ماشالله مفتوحه شهيتج اليوم العنود: أمس ما تعشيت تراني عويش: عنودي .. شو قررتي؟ العنود( تتنهد): ما أدري ... أمس استخرت عويش: وشو حسيتي من عقب الاستخاره ؟ العنود: من صليت رقدت .. ماحسيت بشي .. عويش: وبعدين ؟؟ العنود: بس حلمت حلم عويش: شو حلمتي ؟؟ العنود: حلمت اني كنت مع أمايه وأبويه وحارب سايرين العمره في سياره عويش: يعني!! العنود: ما أدري!! عويش: مالت عليج .. شو ماتدرين؟! العنود: شوو؟؟ عويش: شو ... أنا من متى أفكر وأحاتي .. والحين تخبريني عن الحلم .. من شفتج تصيحين قلت ما بتوافق العنود: انزين أنا بعدني ما وافقت .. عويش: قصورج بعد ما توافقين .. العنود: انزين جب .. الحين بينزل حمد عويش: وأول ما ينزل شو بتقوليله العنود: ما بقوله شي عويش: برايج أنا بقوله العنود: والله يا ويلج .. يوم بيسألني أنا بقووله .. وبعدين هوه قال عقب ما أرد من الجامعه عويش: يعني انتي موافقه ؟ العنود: انشالله عويش: واااااااااااااااااااااااااي فديييييييييييت روحج يا ربي أم حمد( تدخل): واللغثه .. عويش شعندج تباغمين .. مسودة الويه العنود:هههههههههه عويش( تحاول تهدي يدتها عشان تسلم من الهزبه): صباح الخير يدوه ... شصبحتي ؟ أم حمد: الحمدالله .. انتن شو موعنكن .. العنود: صلينا وقعدنا .. دخلت لامي بالريوق .. وأول ما حطته هجوم عليه أنا وعويش .. كلنا من الخاطر خليفه( يدخل): السلام عليكم الجميع: وعليكم السلام خليفه: غريبه القواطي واعيات ..ما أحيدكن عويش: ياناس نحن دوم نقعد من وقت بس ما نطلع من حجرنا لين الساعه سبع ونص خليفه: وشو طلعكن اليوم .. الله يعين يومي نحس جان اتصبحت على هالويوه عويش: ودك انته يوم اتصبح على هالويوه خليفه: حووو العنود شوياج .. يايه من مجاعه؟! العنود: هيه .. أم حمد: انت شو تباها .. خلها تاكل عويش: عاد هذا هب أكل .. هذا توحش .. يلست أتريق ويا عموه وما قمت الا عقب ما شبعت من الخاطر .. عويش: يالله ماشي وقت العنود: صبري .. بعدني ما خليتها تكوي لي عويش: ماشي وقت يالعنز .. بسرعه طلعنا من الصاله .. طلعت لي بدله كشخه وخليت لامي تكويها .. سحيت شعري وقصيت قصتي ... تجحلت وحطيت شدو خفيف أول مره أسويها على قولتهم هفه ما أدري شو اللي خلاني أسوي هالشي اليوم .. تلبست وخلصت ... ربعت عند عويش فوق .. كانت شاريه شنطة لاب توب يديده وماشلتها... دقيت الباب ودخلت أول ما شافتني .. خلت اللي في ايديها وطالعتني من فوق لين تحت عويش: شو هذا العنود؟؟ العنود: شوو؟!! عويش: بتداومين جذيه العنود: ليش .. عندج مانع آنسه عفيش رفعت راسها فوق .. عويش: من وين طالعه الشمس اليوم .. العنود: خلصيني خلصيني .. هاتي الشنطه اللي شارتنها من اسبوعين عويش: نعم !! العنود: شوو عويش: أنا ما شليتها .. انتي تشلينها!! العنود: هب لازم .. رحت صوب الكبت أدور فيه .. طلعت الشنطه عويش: تعالي .. أنا بشلها اليوم العنود: يالله يالله .. ماشي هب دوم هوه عويش: شو يالله .. هب جنها شنطتي العنود: عويش حرام عليج عويش: شليها تفداج .. عروس ما نقدر نقولج شي العنود( بعصبيه): عويش .. بس عاد .. عن الغلاسه عويش: خلاص يابوج ذلفي .. الحين بيين حمدوه وشميس بياكلن الدنيا طلعت عنها وأنا أحس بفرحه كبيره ما أدري شو سببها .. دخلت حجرتي حطيت اللاب توب في الشنطه .. وحطيت أغراضي في شنطتي الصغيره .. وطلعت من الحجره .. اتصلت حق سليم .. ودخلت ويا عويش الصاله .. من شفت حمد قفططت .. عويش: السلام عليكم حمد: وعليكم السلام.. مرحبا الساع .. هلا والله بالغراشيب عويش: اختك غرشوب اليوم ... ما أدري شو عندها قرصتها في ايدها .. وأنا أتحرطم عليها حمد: هب جنكن متأخرات اليوم عويش: الساعه كم حمد: ثمان الا عشر عويش: يالله العنود بسرعه ركبنا السياره وخطفنا بيت أم عبدالله .. نتريا حمدوه وشمسوه .. ركبن السياره ورحنا الجامعه .. دخلنا الرسبشن .. أول ما شافني حمدوه وشمسوه عقب ما عقيت الغشوه شمسوه: له له له ..شو هذا العنود .. من الحين بدينا العنود: لااااااااا إله الا الله .. شو ياناس محد يروم يكشخ منه والدرب حمدوه: منه والدرب في يوم غير هاليوم العنود: فكنا من الصدعه خلنا نلحق الكلاس .. حشى محد يطيح في حلوجكن تعلجنه .. طلعنا من الرسبشن .. رحنا المدرجات عشان كلاس الأمن .. عقب ساعه طلعنا الدكتور .. أول ما طلعنا لقينا عويش عند الباب تاخذ أمن في الكلاس اللي عقبنا ... دخلنا نرمس وياها في الكلاس والدكتور يطالعنا الدكتور: إيه ده يا بنات .. مش حاسين بنفسكوا مزعجين مريم: عيل لو تدري دكتور انهن أهل وعايشات عدال بعض العنود: بسم الله من عينج الدكتور: إيه ده يعني انتوا الأربعه بتأربوا لبعض!!؟ حمدوه: هيه دكتور .. عايشه بنت خالي .. وبنت عمتي في نفس الوقت العنود: عايشه بنت أخويه دكتور .. وهذيلا بنات خواتي الدكتور: بس بس بس .. لخبطتوا دماغي .. شجره ملخبطه العنود: عاد ما أوصيك على بنت أخويه دكتور .. الدكتور: أيوه منتوا من طينه وحده .. ماتبطلوش رغي حمدوه(باستهبال): نحن دكتور.. الله يسامحك الدكتور: بتستعبطي يا بنت .. انتوا من أول المحاضره لأخرها بتدود ودوا .. ومش عارف بتجيبوا الدرجات من فين العنود: بسم الله بتاكلنا دكتور عويش( بهمس): هب عشان سواد عيونك الدرجات .. هذا القلب وما يهوى العنود: كفيش انطبي الدكتور: يالله يا شباب امشوا .. خلونا ندي المحاضره الثانيه شمسوه: أفا يا دكتور تطردنا الدكتور: ايه يا بنتي حتخدي المحاضره مره تانيه شمسوه: لا مشكور دكتور .. عندي كلاس الدكتور: طب يالله امشوا امشوا عويش: حتى أنا دكتور الدكتور: لا انتي ارجعي .. على طول وراهم طلعنا من المدرجات ونحن نضحك على سوالف الدكتور .. رحنا المبنى .. حضرنا كلاساتنا وخلصت الساعه ثنتين وأربعين .. رحت لهن .. كانن يتريني على الغدا العنود: السلام عليكم البنات: وعليكم السلام منى: له له العنود .. شو هالكشخه؟ العنود: راحت الكشخه من هالدوام .. هدلي حيلي حمدوه: يالله خلنا نروح نتغدا .. بموت من اليوع العنود: اصبرن بتصل حق كفيش شمسوه: عويش راحت تصلي وبترد .. رحنا نشتري الغدا .. و طلبت حق عويش ويايه .. رديت على الطاوله ويا عويش لأنها يتني عقب ما صلت .. لقيت حمدوه ومريم وميثوه ... سلمت على ميثوه حطيت الصياني ورحت أشتري بيبسي من الثلاجات .. ردينا نتغدا ... عويش: متى بتروحن؟؟ شمسوه: عندنا اجتماع قروب الساعه ثلاث العنود( تتنهد): ما أريد أرد البيت برد وياكن حمدوه : لا بتردين .. ليش تأخرين .. رديتي الحين والا بعدين وراج وراج شمسوه: شو وراها؟ عويش( بهمس): أبويه قالها يوم بتردين من الجامعه أبغي أعرف ردج وأونها مستحيه شمسوه: قومن نرد عيل العنود: قري محلج عقب ما خلصنا الغدا .. كل وحده منا فتحت لاب توبها .. عويش: تعالن براويكن شي كنت قاعده عدال عويش من اليمين وشمسوه من اليسار وحمدوه عدالي من اليسار .. من سمعنا عويش تقول هالرمسه تكودنا .. وطالعنا اللاب توب عويش: بسم الله ... بلاكن تكرودتن .. لاتخافن براويكن .. كلكن بتشوفن ... فتحت صوره .. أول ما فتحتها بغيت أمووووت .. حسيت البنات بيسمعن دقات قلبي وهن كلهن التفتن صوبي... كانت صورة حارب .. بدون سفره والشعر مش مرتب في السياره .. راد السيت على ورا ومنسدح .. ورافع ريله على السيت وفايده البيبسي .. حمدوه: أوووويييليييييي أنا على الحربي شمسوه: من وين يبتي هالصوره؟؟ عويش: سرقتها عن خلوف .. ما طاع يعطيني اياها ميثوه: أشوف شلت ميثوه كمبيوتر عويش وطالعت الصوره .. انقهرت من عويش ... وين بتسيرين عني خلينا نرد البيت أنا أراويج شمسوه: عويش .. سيفي لي الصوره في الفلاش ميثوه: حتى أنا ضربت عويش على ريلها ضربه محترمه بريلي .. عويش( بصوت مخنوق): أأأأ ... لالا حمدوه: أحلى ... ههههههههههههه تستاهلين ميثوه: حرام عليج عايبتني ... اعطيني اياها عويش: لا شو مافيني .. الصوره عند خلوف بس ان انتشرت بيعرف انها مني ميثوه: مابشاورج الحين بسيفها قرصت عويش قرصه خليتها تفز .. شلت الكمبيوتر عن ميثوه سكرته وحطته على ريولي عويش: لالا ما أقدر سمحيلي ميثوه .. وعلى طول غيرت عويش مكانها وشلت الكمبيوتر شمسوه: شو ياج انتي فزيتي عويش: يابوج ظورب جسمي ... العنود: حوه عويش كلاسج بدا .. الساعه ثلاث شمسوه: قومي خلينا نسير نخلص بسرعه راحن شمسوه وحمدوه وعويش .. وأنا ترييتهن برد وياهن .. قعدت أحل الواجب اللي عليه .. ومريوم وميثوه ومنى يالسات يسولفن .. شفت سلامه ربيعتي يت صوبي العنود: مرحبا الساع سلامه: ملاااييين ... فديييت هالويه ياربي العنود: انتي وين عنبوه ماتنشافين سلامه: في هالجامعه .. الا انتي شو عندج محلوه هالأيام العنود: ما عندي شي... خلصتي دوام سلامه: هيه توني مخلصه العنود: متى بتروحين؟؟ سلامه: بعدني بتريا شويخ بنت عمي وبرد وياها .. اتغديتي أنا يوعانه العنود: تغديت بس يوعانه .. شهيتي مفتوحه بزياده اليوم سلامه: عيل قومي خلينا نروح نطلب .. من أصبحت ماذقت شي رحت ويا سلامه طلبنا غدا وردينا منى: العنود أنا أشك انج ماخذه حبوب فتح الشهيه العنود: هههه لا ما عليج مفتوحه طبيعي سلامه: ها العنود أخبار الدراسه وياج العنود: يالله بالدز .. بس الحمدالله سلامه: وين الباقيات عيل؟ العنود: عويش عندها كلاس وحمدوه وشمسوه عندهن اجتماع قروب سلامه: عويش ما أشوفها ويا بنات شلتها الحين العنود: لا ماشي .. نحن دوم مع بعض الحين ... ما نتفارق سلامه: الله يدوم المحبه ... ماشالله عليكن العنود: انتي وين البنات عنج اليوم .؟؟؟ سلامه: ردن البيت ... بتخبرج شموه ربيعتج وين ... امره ما تنشاف العنود: وييين شموه حولت الكليه سلامه: ليييش؟ العنود: أونه ما أروم على الجامعه تعب .. وبعد بتعرس عشان جذه تبغي تخلص بسرعه سلامه: وانتي متى بتعرسين ؟ ساروه: جريب انشالله العنود: بسم الله من وين طلعتي؟ ساروه: مالت عليج ... بدال ما ترحبيبي .. وين عويش محد يرحب فيني غيرها ميثوه: أفا عليج مرحبابج ملايين وان زادن لاباس سلمنا عليها وقعدت ساروه: دامكن تتغدن بروح أطلب لي غدا وبرد العنود: تعالي وين تبين محد بياكله هذا كله ساروه: لالا خاطري في باشميل العنود: لا تبطين .. ساروه: انتن لا تاكلن بسرعه سلامه: لا الشهيه مفتوحه اليوم .. راحت ساروه تشتري الغدا ... من تغيرت عويش في معاملتها ويايه .. ساروه تغيرت وأحسها متقبلتني أكثر عن قبل .. ردت ساروه بسرعه وقعدنا ناكل .. وردت عويش ووياها حمدوه وشمسوه حمدوه: السلام عليكم البنات: وعليكم السلام عويش: العنود بسج بتموتين من كثر الأكل العنود( وفي ثمها أكل): بسم الله بتاكليني حمدوه( تقلدها): بسم الله بتاكليني .. ابلعي اللي في حلجج وعقب رمسي العنود: حشى ياكثر ما اتاوح عليه .. انتن شعليكن آكل من حسابكن ؟؟ ... ماعليه ان ماخبرت حمد عليكن ساروه: لا خلاص حمد الحين...اشتكي عند ناس غير استحيت من رمست ساروه .. في البدايه يوم قالت اني بعرس جريب على بالي طلع الكلام عفوي .. بس من سمعتها الحين شكيت انها تدري بكل شي شمسوه: بس بس استحي بعدين .. كملي أكل خلينا نرد البيت العنود: لا بعدين خلونا نقعد شوي حمدوه: لالا مافينا على الهزبه .. عويش: وبعدين أبويه اتصل يتخبرني متى بنرد؟ العنود: جذااابه حمدوه: تجذب عليج .. يالله قومي منى: انتتن شو عندكن ترمسن بالألغاز شمسوه: ماعندنا شي .. شو عندنا بعد ؟؟ مريم: شو ماعندكن شي .. أنا بصراحه جني فهمت السالفه كلها العنود: شو فهمتي ؟؟ مريم: مابستعيل .. بتأكد من الخبر عقب كم يوم قمنا كلنا شله وحده رايحات الرسبشن .. ردينا البيت .. دخلنا بيت أم عبدالله وصلنا شمسوه وحمدوه وشفت حارب توه طالع من اليبت رايح صوب سيارته .. كلهن لفن عليه العنود: حووه البقرات الثلاث .. خلهن هالنظره يالله نزلن خلنا نروح الحين ما اريد حد يقول ان البارت قصير و انا داخله على امتحانات يعنى ارحموني اشوي :3096.gif: |
مشكووووووووووره الغاليه على البارت والله يوفقج و يوفق اليميع يارب والله كلنا نعاني من هالامتحانات :GIF_13.gif::GIF_13.gif: |
| الساعة الآن 03:29 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir