|
العنود: السلام عليكم الجميع : وعليكم السلام شمسه: عنبوه وين اللي بتي تو الناس العنود: شموه كانت عندي ... شحالك علي علي: تعالي هنيه عدالي سرت صوب علي وايهته ويلست عداله علي: علومج العنيدي العنود: ماشي الحال علي: من أمس انتي هنيه ولا ييتي صوبنا العنود: أمس سرت العزبه عند عموه ويا خليفه حمدوه: ماسرتي دبي وياهم العنود: لاء علي:عنودي بتسيرين الجامعه؟ العنود: انشالله علي: شو بتتخصصين ؟ العنود:هندسه انشالله شمسوه: عنبوووها .. وين ترومينها؟؟ العنود: ليش؟؟ حمدوه: صعبه ترها العنود: الله بيوفقني انشالله علي: ما تنرم بنت سيف بعدي والله .. عويش: وشو كاظنج عليها .. عباله العنود: ممممم .. في خاطري واللي تبغي تدرس بتقدر علي: مالت عليكن اللي داخل إداره واللي غاويه العربي شمسوه:عقب ثلاث أسابيع امتحانات المستوى صح العنود: انشالله حمدوه: أنا ما سويت شي حق الجامعه أبداً شمسوه: العنود .. خلصتي أغراضج العنود: امبوني ما باخذ شي .. كل اللي عندني يسدني .. بس حمد أخويه لزم عليه اني أسير أشتري لي ثياب يداد حمدوه: لا لا شو .. قلت حق ربيعي ان خالتي بتي الجامعه ويترينج .. بظمج لشلنتا.. بتطيحين سوقنا كلنا.. شمسوه: عاد العنود الحلاه والرقه والدلع .. فوق هذا الكشخه .. أسميج ما بتسلمين من البنات علي: منو رقه؟ جان الدفاشه كلها تستوي رقه العنود: دفشه حرمتك هب أنا علي: وانتي يالعنز .. شو بتسلمين من البنات .. ليش انتن وين عايشات حمدوه: وانت شلك في سوالف البنات العنود: متى بتسيرن تتشرن؟ شمسوه: بنشوف متى بيتكرمن علينا خواتج يسيرن ويانا حمدوه: علي ودنا العين مول باجر علي: جب يالله شمسوه: انزين باجر السبت .. استأذن من دوامك وودنا الصبح علي: لينن دبي وأبوظبي .. وان شفتكن في المول يا ويلكن العنود: علي انزين بس الصبح محد فيه علي: عنودي أنا بوديكن بس انتي تعرفين الشباب .. والله ما يحشمون حد العنود: الصبح الشباب في دواماتهم .. ومحد في المول الا اللي صدق بيقضي له حايه علي: سمعن بتسيرن.. عندكن من 10_ 12 وتردن البيت حمدوه: ساعتين شو يسون شمسوه: انجبي انتي .. انزين بنسير علي: آنسه شمسه ما بتقصن عليه بتصل حق الدريول وبتخبره .. جانكن بتقصن على الحريم .. ما بتقصن عليه شمسوه: لالا بنسير ساعتين صدقني حمدوه: عنودي بتسيرين ويانا العنود: مممم ما أدري .. بشاور حمد قبل حموده: وانتي عويش؟ عويش: لا لا أنا ما أحب أبلس شي من هنيه.. حشى التنوره تلقين مية بنت لابسه شراتها .. حمدوه: انزين عادي على الأقل أي شي والباقي خذيه من دبي أو أبوظبي ماشالله عليج أربعا وخميس تسيرين عويش : لا مابسير سمعت علي يهمس علي: والعافيه ما أدري منو تتحرين عمرج آنسه تريزا ظحكت بصوت عالي وما قدرت أقبظ عمري شكل علي وهو يرمس يفطس من الضحك ..شليت بعمري ووقفت وأنا أضحك شفت علي ياي صوبي يبتسم علي: شو بلاج تضحكين العنود: ماشي قبض ايدي وحاسها وصلها لين ورا ظهري علي: رمسي بلاج تتكركرين العنود: ههههه آآآآآآي علي والله ان يعور أم حمد: علوه حسبي الله على عدوك بتكسر الها ايديها شيخه: من زين عظامها الحين .. تظاربها فج علي ايدي ودزني على شمسوه علي: ذلفي عند بنت اختج .. (ولف على عويش وحمدوه) عطنها شوي من لحمكن وقوتكن عويش: بسم الله من عينك .. يوم بتحيدنا ناكل من جيسك تعال تاوح علينا سلامه: علوه انت شو ميلسنك في البيت .. اظهر يالله اظهر علي: أتريا حارب وخليفه ساروا يغسلون السياره ما ردوا العنود: علي ليش ما عندك دوام باجر؟؟ حمدوه: كنا مرتاحين قبل.. بس الشوخ حولوا دواماتهم العين شمسوه: ويلسوا عله على جبودنا علي: يالسين على روسكن .. شمسوه: أقول العنود باتي عندنا اليوم أنا وحمدوه ما نتفارق الا يوم نرقد العنود: اليوم... لالا خليها يوم ثاني شمسوه: أنا برمس خالي حمد العنود: لا لا خليها يوم ثاني علي: شو تباكن علل على القلوب العنود: علوه .. أشوف ليت سياره من طرف البيت أكيد حارب وخليفه ردوا .. سر صوبهم قبظني من اذنيه ويرها بقوووو علي: تبين الفكه هاه العنود: يالس صدعه على روسنا قبظني عقب من شعري ويره .. العنود: علي حرام عليك .. حارب بيي صوبنا الحين سار عنا علي ولفيت شعري .. كنت خايفه لا يطب علينا حد من عيال أم عبدالله حمود: عنبوه يالعنود هب سير يسير شعرج.. من شهرين أحيده قصير أم حمد: الله أكبر من عينج .. صلي عالنبي .. تفلي عليها تفلي العنود: لالا بنتج تسويها .. بس صلي على النبي .. لا اتفلين ولا شي شمسوه: غريبه ما بترتيه شيخه: ولا بيطيحه المقص.. الا جان بتساويه من تحت العنود: لاااا ما أدانيه طويل وين أبا شيخه: شو فايدتها البنت بلا راس شمسوه: خيييييبه .. أمايه بلا راس خليتيها حمدوه: أخبركن قومن خلنا نسير نطالع الحلقه الحين بتبدا قمنا أنا وشمسوه وحموده حمدوه: عويش ما بتسيرين ويانا؟ عويش: لا أنا برد البيت بسير أرمس ساروه بنت خالوه .. قالت بتينا اليوم وما يت ؟ حمدوه: برايج عيل شمسوه( تهمس): أحسن بعد مشينا ودخلنا فلة أم عبدالله شمسوه: حمدوه خلينا نسير بيتنا .. الحين بتي يدوه وبتقول حطوا الأخبار حمدوه: خطفي انتي .. يوم بتي يدوه بنسير الصاله اللي فوق شمسوه: أصلاً باقي ثلث ساعه عن الحلقه دخلت حمدوه المطبخ التحظيري ودخلنا أنا وشموس وراها حمدوه: شمسوه من زمان ماسويتيلنا كيكتج اللوعه شمسوه: ما أرووم حمدوه: دخليج انتي شو ترومين .. حياتج كلها رقاد شمسوه: تراج انتي بنت عمي العنود: حيكن مونسات بعض شمسوه: هيه فديتها حمدوه ما أروم أصبر عنها حمدوه: يالله تونسي ويا عويش الحين شمسوه: يالله عاد مالقيتي غير عويش اللي الخقه تطلع من عيونها حمدوه: يلسي طالعي عروض أزياء ورمسي في التيلفون شراتها شمسوه: ههه ما أتخيلج مثلها حمدوه: حشى والله الله يعينج..ما أتخيلج نكديه لا تيين صوبنا سكت وما رديت عليهن وما بغيت أقولهن ان عويش مب متقبلتني أبداً بطلت حمدوه الثلاجه وطلعت لنا ثلاثه بيبسي وطلعنا من المطبخ ويلسنا في الصاله شمسوه: أقول عنودي .. في ذمج شو شفتي عويش في هاليومين اللي يلستيهن عندهم العنود: ما لحقت أيلس وياها أمس كانت في دبي واليوم كانت عندي شموه والحين عندكن .. وأمس يوم ردت من دبي زقرتني أشوف أغراضها .. شمسوه: لا تحطين في بالج زاقرتنج عسب سواد عينج .. تبغي تخق عليج حمدوه: يااااااااااالله .. العنود طبيها عنج .. وقوليلي بتسيرين ويانا باجر العنود: بشاور حمد قبل شمسوه: خالي ما بيقولج لاء حمدوه: والله أحس ما بيسدنا ساعتين شمسوه: على الأقل نسير ناخذ لنا أي شي .. وعقب انتي اقنعي أخوج يودينا دبي حمدوه: عاد انتي ما لقيتي غير علي يركبنا وياه مينووونه العنود: انزين سمعن نحن بنسد عمارنا باللي عندنا في البدايه وعقب بنسير شمسوه: هذي انتي يالمستجده عندج ثياب ما لبستيهن .. أما نحن كل اللي عندنا هتيانات حمده : خالي حمد كل أسبوع يسير ويا عياله مكان .. وعويش كل أسبوع بشي يديد .. يعني انتي محصله حد يوديج هب نحن مالت علينا العنود: وأنا إذا سرت ما بنساكن شمسوه: الله عاد ويا لبس عويش.. تقول سايره حفله مب جامعه.. حشا أنا أستحي أقولهم انها تقرب لي حمدوه: لاااااا إله إلا الله .. انتي ما عندج سالفه شمسوه( تغني): روح وروووووح .. ابعد بدنيااااك .. يا متعب .. قلبي بصدك .. الدرب لي ضحك بكااك .. موت وتكوى .. بنار حقدك العنود: شميس لا ينطر لج عرج حمدوه: هههههه العنود: حشى نشاااااز شمسوه: العنيدي .. انتي اطولين تسمعين صوتي حمدوه: ياااالله يعلهم يفدونك .. كلهم ما يسونك يالحشيم .. لفينا أنا وشمسوه نطالع التلفزيون .. كانت حمدوه حاطه قناة ستار أكاديمي وطالعه غنيه من أغاني البيرايم العنود: منو انشالله حمدوه: أحمد صلاح...أف من خلصوا وأنا ملانه العنود: فظلوا عنج .. يالعنز شمسوه: شو رايكن نلعب ستار أكاديمي حمدوه: وشقايل بعد نلعب ستار أكاديمي شمسوه: سمعن .. بنكون في البيت ما نطلع منه أبداً حمدوه: الله عاد والطلعات .. ماخلوا بج مكان شمسوه: انزييين .. انتي سمعي .. بنيلس هنيه .. أنا وانتي والعنود وحصوه أختج والشباب علي أخوج و حارب وخليفه ... حمدوه: وعويش؟ شمسوه: لا قطيعه ما نباها .. بتم لنا متعنطزه العنود: وعموه .. بنخليها رولا حمدوه: هههههههه الله يغربل عدوكن .. والله لو يدرون انا كنا نشوفه بياكلونا .. نسوي شراتهم بعد العنود: انتي أفكارج تيبنها من وين؟؟ شمسوه: أحلااااااام اليقظه ماجد سمعتي بها في هالوقت شفت حارب نازل في نفس الوقت اللي دخوا فيه علي وخليفه حمدوه: ياااااااالله على الكاشخين .. وين تبون عباس وفرناس وابن بطوطه شمسوه: هالكشخه ماتكون على ماشي حارب: وانتن شو يخصكن محظوظه ومبروكه علي: بنسير السنما حمدوه( تنط): ودوناااا .. خاطري مره أدخل سنما علي: والله .. من متى وأنا أترجاج تسيرين ويانا ... يالله بسرعه قبل ما تغيرين رايج العنود: ههههههه حمدوه: أنا بسألج انتي ما شي عندج شغله غير انج تظحكين علي: حلاااتها وهيه تظحك .. انتي شو حارنج حمدوه: يقهرني هالطيس اللي يطلعن في خدودها خليفه: حلاتهن أصلن يوم يطلعن ويقهرنج والا شو فايدة هالضحكه العنود: فديت روحك يارب .. علي: انتن شو يالسات تسون؟ شمسوه: ونحن شوعندنا غير انا مجابلات بعض ... حارب: هاه عيل شو تبن تسون حمدوه: يا أخي مليييييييينا .. ما سرنا مكان في هالاجازه بطولها.. طلعونا علي: أقول حارب .. بدا البرنامج اليومي خلنا نطلع أبرك حارب: لحظه لحظه منو سمح لكن تشربن من البيبسي مالي حموده: عيب عمي حارب عيب .. نحن عندنا ظيوف حارب: ومنو الظيوف انشالله شمسوه: عيب يعني العنود تموت على البيبسي ما بنخليه في خاطرها... حمدوه: وبعد ما بنخليها تشرب بروحها العنود( منصدمه): تجذبن ايه انتي مسيلمه .. انتي روحج طلعتيه من الثلاجه أنا مايخصني حمدوه( تخز العنود بنظره): عنودي عادي لا تستحين .. عمي حارب ما بيقولج شي .. حارب: أدريبكن محد غيركن محظوظه ومبروكه .. انتن ان وصلتن المطبخ اللي داخل مره ثانيه .. بزوالكن حمدوه: حشى ما يسوى عليك .. الا بيبسي هوه طلعوا حارب وعلي وخليفه وحمدوه تسحبت وراهم .. يلست شوي .. عقب ما حسيت انهم طلعو من البيت وقفت وشمسوه ربعت عني وربعت وراها بطلت باب الصاله شفتها تربع .. قبضت أقرب نعال وفريتها بها .. شوي وان السياره خاطفه جدام الباب ووقفوا وبطل علي الدريشه.. حارب: بعدج ما تعرفين تجادين بنت سيف خليفه: شو على بالك .. هذا انتاج عايلتنا تموا يضحكون عليه .. أنا دخلت الصاله وسكرت الباب ورايه بقوو وأنا منقهره منهم ووقفت شوي عند الباب .. يوم سمعت ان السياره طلعت .. فتحت الباب ووقفت برا أترياهن .. شفتهن واقفات عند فلة سلامه .. لفيت ودخلت داخل وطلعت من الباب الوراني وكنت بروح البيت .. وسمعتهن يزقرني حموده: عنوووووووودي والله ما تروحين شمسوه: تعالي برمسج العنود: جلبن ويوهكن يالسخيفات حموده: تعالي تعالي وقفت ترييتهن لين وصلن عندي العنود: هاه شعدنكن بعد حمدوه: والله ماتزعلين العنود: ما زعلت بس قفطت شمسوه: عاااااادي هذا الا حروب العنود: هيه الحين حروب والا مساعه .. قلتن أنا اللي أبغي البيبسي حمدوه: انتي بيستحي منج والا نحن عادي يصب الباقي في الغرشه على روسنا شمسوه: يالله ردي .. بتتعشين ويانا اليوم العنود: لا لا بسير .. عندي شغل حموده: الله والشغل عاد العنود: لا صدق .. اليوم شموه ربيعتي يابت لي هديه .. كلها ديكور للحجره .. بسير أرتبها شمسوه: الله !! يا حظج العنود: شو يا حظي؟؟ شمسوه: عندج شي تسوينه.. وبعدين تغيير ديكور الحجره بيغير نفسيتج بعد شو تبين حمدوه: انزين سمعي ... نحن على الساعه 11 بني صوبج .. وبنيلس نرتب وياج العنود: صار أترياكن .. طلعت عنهن ورديت البيت.. أحس براحه كبيييره .. ارتحت لأني حسيت ان حمدوه وعلي وشميس وايد متقبليني.. قبل كنت وايد أرتاح لهم .. وهم اللي أيلس أسولف وياهم .. بس مب وايد .. لأني ما كنت أطلع من البيت وايد .. عشان ما أخلي أمايه الله يرحمها بروحها .. ومن عقب وفاة أبويه أول ما تبدا الإجازه أسير ويا أمايه عند قوم خالي .. صح مب بعيد وايد .. يعني أقدر أسير وأرد البيت في نفس اليوم.. بس حلاة السهر وانت حد وياك .. كنت أسهر ويا نوروه لين الفير ونرقد.. وهالاجازه ما قدرت أسير عندها .. ... دخلت الحجره صليت العشى وطلعت في الصاله .. كانت آمنه وعموه يالسات يطالعن الأخبار ييت ويلست عندهن العنود: السلام عليكم آمنه+ أم حمد: وعليكم السلام أم حمد: وينج العنيدي .. وين كنتي العنود: توني راده عن شمسوه وحمدوه أم حمد: ماشالله عليج ... أتحراج روحتي يوم قمتي عنا العنود: لا لا دخلت داخل وياهن ما روحت يلسنا دقايق وعقب دخل علينا حمد وراشد رادين من المسيد حمد: السلام عليكم الجميع: وعليكم السلام حمد: شحالج أمايه أم حمد: بخير ربي يسلمك الغالي حمد: العنيدي غناتي .. حطولنا العشى العنود: انشالله طلعت من الصاله سرت المطبخ .. وأمرت على البشاكير يحطن العشى ويلست أحط وأرتب وياهن .. وعقب دخلت الصاله وزقرتهم يتعشون .. يلسنا نتعشى وكالعاده عويش ما نزلت تتعشى حمد: عويش وين ؟؟ آمنه: تقول ما تبغي عشى حمد: هالبنت مره ما تاكل آمنه: تقول تسوي رجيمم حمد: هذا هب رجيم هذا هلاك العنود: بسير أشوفها آمنه: لا لا تسيرين شو تبينها .. خليها على راحتها سكت .. أصلاً أنا من البدايه شو يخصني.. خلصنا عشى وراحت عموه ترقد .. ونحن دخلنا الصاله .. لقينا عويش ورشود محتشرين.. حمد: شو عندكم رشود: أنا يالس ألعب .. يت وبندت اللعبه عني حمد:عويش شو ياج على أخوج ؟؟ عويش: منزل اللعبه يلعب هنيه... عيل ليش حاطين له تلفزيون في حجرته حمد: رشود قم سر فوق العب رشود: عنبوه فوق مقطعه .. صخه .. ما أداني أتم بروحي آمنه: نزل التلفزيون في الصاله اللي تحت والعب فيها طلع رشود من الصاله وشغلت عويش التلفزيون ويلست اتابع المسلسل قمت ويلست عدال حمد .. العنود: حمد حمد: عونج العنود: باجر بسير المول ويا حمدوه وشميس حمد: منو بيوديكن؟ العنود: الدريول وبتسير ويانا شيخه طلع حمد فلوس من بوكه وعطاني اياهن العنود: حمد أنا ماقلت لك عشان تعطيني فلوس أنا عندي اللي يسدني وزياده.. أنا بس بغيت أستأذن منك حمد: سيري مرخوصه .. وخذي الفلوس واشتري اللي في خاطرج العنود: مشكور حمد يلست في الصاله أتابع المسلسل وياهم وعقب طلعت .. وسرت الحجره .. سمعت التيلفون يرن العنود: ألوووووووو شموه: وين كنتي العنود: كنت في الصاله ... شموه: عنبوه .. حرقت التيلفون العنود: سوووري شموه: شو سويتي عقب ما سرت عنج العنود: سرت عند شمسوه وحمدوه شموه: يااالله من متى أعديبهن ... اتولهت عليهن.. سلمي عليهن العنود: يبلغ.. يوم خبرتهن عن هديتج قالن بيين يرتبن الحجره ويايه شموه: زين حصلتي حد يساعدج العنود: شموه بسير العين مول باجر شموه: شو عندج العنود: بسير آخذ ملابس للجامعه شموه: أشوفج غيرتي رايج العنود: حمد أصر عليه شموه: عنودي من متى أترياج .. رمسي شو اللي في خاطرج العنود: خلااااص نسيت كل شي .. والله حمدوه وشميس نسني كل شي شموه: ولو.. الحين تقوليلي شو فيج العنود: خلاص شماني الحين ما يهمني هالشي ولا حفلته شموه: أنا ما برد عليج لين ترمسين.. أعرفج عنيدي تخلين في خاطرج .. لين تموتين تنهدت .. أدري انها ما بتخليني الا لين أخبرها بكل شي .. خبرتها عن اللي صار بيني وبين عويش وهيه طول هالوقت ساكته ما تكلمت .. خلصت السالفه ومن عقبها ما سمعت الا صريخ وما فهمت شي منه العنود: والله مااااااا فهمت شي من يرعوطج شموه: نوروه تدري عن هذا كله العنود: لا ما خبرتها شموه: سمعي يالبدلا .. يوم الخميس تقولين حق خالج يوديج بوظبي والا دبي .. أي مكان المهم تشترين العنود: انزين انتي شو حارقنج .. أنا ما اهتميت لها شموه: جااااااااب.. ولا كلمه.. مثل ما قلت لج .. والله والله يا العنود ان ما سويتي اللي قلت لج عليه لا تعرفيني ولا أعرفج العنود: مايسوى عليج شموه: الا يسوى ونص .. الحين مالقت غيرج أون بيفشلها جدام ربعها.. من زينها ومن زين ربعها العنود: شمييييم لا تقولين جيه شموه: الا بقول .. أنا بتخبرج انتي انشالله بتمين على هالحال .. لا والله سمحيلي والله لو توصل اني أرمس خالج برمسه العنود: لا ترمسينه ولا غيره .. انتي محد يقولج شي.. قلنا لج ثياب وبنشتري شو بعد شموه: مب أي ثياب .. انتي شفتيها شو شاريه .. اشتري أحسن عنها.....آآآآخ أحس اني بموت من القهر العنود: هههه حرقي أعصابج على شي ما يسوى شموه: أنا أبغي أعرف شو هالبرود اللي فيج.. ما أحيدج.. قبل من تعاندين خلااص محد يروم عليج العنود: يا حبيبتي الناس أذواااق .. يعني أنا اللي يعيبني يمكن ما يعيبها شموه: حبيبتي هذي بنت أخوج اللي يعيبها الماركات يعني أي شي ماركه ويديد .. فهمتي العنود: أنا وحده ما يهمني .. اللي يعيبني آخذ ماركه والا غيره شموه: ولا تطيحين في العين مول وتاخذين كل شي .. اشتري أشياء خفيفه باجر العنود: انشالله .. أي أوامر ثانيه شموه( تصارخ): العنيدي لا تذبحيني .. انتي بتجتليني قاصره عمر سمعت صوت سعيد أخوها اللي توه داخل سعيد: محد يموت قاصر عمر .. شو عندج تصارخين .. ومنو ترمسين شموه: عنودي برايج بخليج الحين العنود: برايج عيل تصبحين على خير شموه: وانتي من أهله سكرت عن شموه وأنا أضحك عليها .. خبله هالبنت .. من يوم يومها ما تحب هالسوالف.. وان حطت شي في بالها ما ترتاح لين تسويه .. خلبه أنا شلي أخبرها .. الحين بتحشرني .. شو سويتي وشو خذتي وشو قالن .. شمووه وأعرفها..ترييت البنات تأخرن شو ياهن .. طلعت الصاله لقيتهن يالسات ويا حمد وآمنه وعويش ********** و السموحه منكم باجر بنزل الباقي ... |
تسلمببن ختيه ع القصة الرووعة و نتريا يديدج |
~,,مرحبآآ رووعه يسلموو ع الطرح [ :ast7eee: ] |
تسلمين ريماني ونتريا اليديد |
تسلمون على المرور و الحين بنزل البارت العنود: متى ييتن ؟؟ تو الناس حصوه: أوووه المهندسه... قالوا لي بتدخلن هندسه العنود: انشالله.. بس بعدها كلمة مهندسه... وايد مستعيله عليها حصوه: عاد العنود واللاب توب .. الله يعينج حمدوه: هذوه نحن كلنا نشل اللاب توب ما يانا شي شمسوه: الحين انتي تحطينا ويا العنيدي .. هاي اسبوع وبتنكسر نصين العنود: الله عاد ياشميس من زينج .. لا تعيبين تراه الحال من بعضه حمد: يبالها لاب توب بعد؟؟ حصوه: هيه بس مب من أول سنه ولازم من عندهم يشترونه.. آمنه: وانتي شو تبينها الهندسه .. سيري أي تخصص ثاني العنود: في خاطري هندسه من يوم أنا صغيره حصوه: حلوه الهندسه بس صعبه آمنه: صعبه ومصاريف اللاب توب .. وآخر شي تقول ما أباها حمد: ليش بكم اللاب توب عندهم حمدوه: بسبعه حمد: فاااااالها طيب العنيدي امره تامر بناخذ الها اللاب توب ومن أول سنه بعد العنود: تسلم حمد ما تقصر بس أبغي آخذه من فلوسي حمد: شو من فلوسج انتي بعد العنود: الفلوس اللي تحطهن في البنك كل شهر بسحب منهن .. باخذه بالأقساط الشهريه .. حمد: شووو لالا فلوسج ما تين صوبهن .. باخذ لج اللي تبينه وأنا هب عيزان عنج العنود: مشكور حمد .. بس أنا إذا ما خذت اللاب توب بفلوسي .. ما بدخل هندسه بغير الكليه حمد: عنودي غناتي .. خلي اللاب توب عنج الحين خير لين سنه حمدوه( تغير السالفه): قومي قومي خلينا نسير نرتب الحجره وقفنا بنطلع من الصاله حمد: شمن حجره؟؟ شمسوه: حجرة العنود حمد: شو عندكن فيها؟؟ العنود: كنت أرمس ربعتي أقولها أبغي آخذ أغراض حق الحجره وبغير اللون .. يابت لي كل اللي أحتايه .. هدية نجاحي وقف حمد ومشى صوبي وقبظني من اذنيه حمد: يوم انج تبين تغيرين اللي في الحجره ليش ما قلتي وأنا بييب لج العنود: آآآآآآآآآي .. ماشي شغله أعتمد على ذوقك واااااااااع حمد: وع في عينج .. أنا ذوقي أحلى عنكن انتن اللي ما تعرفن تشترن العنود: لووو سمحت أخ حمد أنا بدخل هندسه معماريه .. يعني .. فيها قسم من الديكور .. يعني أنا أفهم عنك في هالسوالف حمد: أمحق.. يالخقاقه هذا وانتي بعدج ما درستي وانتي جيه العنود: يحقلي أخق .. مب حمد أخويه حمد( يبطل ايده عنها): في هالحال صدقتي يحق لج تخقيين العنود: آآآه .. يالخقاق .. هات اذني جلعتها من الير حمد: أحسن طلعنا من الصاله وسرنا حجرتي .. طلعنا كل الأغراض اللي في البوكس.. بصراحه شموه ماخلت شي .. حتى أغراض المكتب اشترتها ..كل شي تتوقعونه للحجره موجود في هالبوكس .. طلعت حمدوه الكفرات واللبس مالهن ورتبتهن على الشباري بطريقه وايد حلوه ..لأن الكفر كان أكثر من قطعه.. بلونين الأحمر والبيج .. حصوه طلعت الشموع والبراوويز ورتبتهن .. شمسوه: عنودي .. ماتبين مكتب .. حليله غمظني كمبيوترج العنود: هي والله حليله الشيبه مريض حمدوه: شو رايج باجر نسير ندور العنود: لا عيني على خير باجر بناخذ للجامعه من الله ساعتين حصوه: من متى اتفقتن وما قلتلي شمسوه: وانتي من متى تنشافين أصلا ً حصوه: سخيفاااات وأنا من متى أصيح عليكن .. العنود: انزين أنا يعت حمدوه: أول مره أسمعج تقولين يوعانه حصوه: خلنا نخلص وبنسير ... حمد( يدخل): وين بتسيرن؟؟ العنود: بسم الله من وين طلعت انته حمد: انتي بعدج ما تبتي من القرصه العنود( تركب على الشبريه): لا لا خلاص والله انها تعور حمد: الله الله .. لالا صدق حلوه طالعه الحجره العنود: هيه مب حلوه ... بس انت عيونك اللي تشوف كل شي حلو حمد: انتي آآخ منج .. سحييله العنود: فديتني يا ربي حمد: أنا بسير أرقد .. لا اتمن مخترشات تسيرن وتردن ..أدريبكن شمسوه وحمدوه مخرش.. والعنود ما تصدق تلقى حد شراتها حصوه: لا ما عليك خالي أنا بصلبهن حمد: لا خليت من العقل أنا يا ربي طلع عنا حمد وكملنا نحن ترتيبنا .. عقب ما خلصنا طلعت الصور من الكبت وحطيتهن في البراويز .. حمدوه: العنيدي .. منوهذا؟ العنود: هذا خالي حمدوه: ثرج ماخذه الحلاه من عندهم.. معرس؟ معرس؟ العنود: هههه لا حمدوه: يوزيني اياه العنود: صدق ما عندج سالفه شمسوه: شووو... تراني بتصل حق سالم( أخوها اللي مسافر يدرس في أمريكا) الحين وبخبره حصوه: حمدوه صدق ما تستحين العنود: شميس سالم متى بيرد شمسوه: شدراني... حصوه: انتي شو تعرفين أصلاً..سالم الحين عنده امتحانات ما بقى شي ويرد العنود: فدييييت روحه يا رب شمسوه: خطفن خطفن خلنا نسير المطبخ .. طلعنا من الحجره ومريت على الصاله العنود: عويش ما بتين ويانا .. بنسير المطبخ عويش: لا بتابع هالفلم حصوه: شو هالفلم شكله حلو عويش: ما أدري توه بادي كنسلنا سيرة المطبخ ويلسنا نطالع الفلم ويا عويش .. كان وايد حلوو .. في الاعلان اتصلت حق خلوف وقلت له اييب لنا شي من الدكان.. عقب نص ساعه رد خليفه البيت خليفه: بسم الله السحار عندنا اليوم حمدوه: علي رد؟؟ خليفه: هيه رد حصوه: اتصله قوله انا نحن هنيه خليفه: يالله قومن روحن .. ما عندكم تلفزيون في البيت شمسوه: صدق ما تستحي .. حد يروغ أهله من بيته خليفه: الحين الساعه وحده حد يزور أهله الساعه وحده حصوه: خلوف اتصله لا تعاند اتصل خليفه حق علي وقاله.. كملنا الفلم وعقب ما خلص .. طلعنا أنا وخلوف وصلنا حمدوه وشمسوه وحصوه .. وعقب ردينا البيت .. كان فيني رقااد من الخاطر .. دخلت على طول غيرت ثيابي ورقدت .. ........... الصبح سمعت التيلفون يرن عدالي .. قمت شفت التيلفون .. كانت الساعه تسع وحمدوه تتصل رديت عليها العنود( بصوت ثجيل): ألووو حمدوه: بعدج راقده؟؟ قومي يالله الساعه تسع ونص بنسير العنود: انشالله قمت في نفس الوقت .. عشان أخلص .. ما أحب أخلي حد يترياني .. تجهزت وخلصت .. خطفت على الصاله ما لقيت حد .. دخلت حجرة الطعام بعد مالقيت حد صبيت لي كوب جاهي حليب وشربته وطلعت من البيت سرت صوب البنات .. دخلت بيت أم عبدالله كانت حصوه يالسه ويا يدتها وأمها .. واختي شيخه.. العنود:السلام عليكم الجميع: وعليكم السلام مشيت صوب حصوه ويلست عدالها العنود: وين محظوظه ومبروكه حصوه: بعدهن توهن واعيات العنود: حمدوه من متى مسويتلي تيلفون حصوه: الأميره الناعسه لين تخلص سنه أم عبدالله: العنيدي .. تريقتي؟؟ العنود: هيه عموه أم عبدالله: تعالي كلي شويه من هالخبيصه العنود: لا فديتج عموه ما أشتهي أم عبدالله: لا لا تعالي هذي أنا مسوتنها كلت شوي عن خاطرها وعقب شفت حمدوه وحصوه نازلات من فوق شيخه: جانكن خلصتن خلنا نسير ما بخليكن غير ساعتين .. مافوقي علوه يحشرني بعدين حموده: يالله خلصنا طلعنا أنا وحصوه وحمدوه وشميس وشيخه.. عقب ربع ساعه وصلنا العين مول .. أول ما دخلنا كانت المحلات توها فاتحه ... بدينا نشتري وكل وحده منا تشاور الثانيه وتاخذ رايها.. من أمس لين اليوم أحس اني وايد جربت من حصوه وحمدوه وشميس .. حصوه انسانه هاديه وأحسها تتفهم الواحد وتحاول تشجعه.. حمدوه وشميس خراشه من الزين وهالشي يردلي حيويتي ووناستي اللي من فتره طويله ما حسيت بها ... الساعه 12 طلعنا من العين مول وفي نفس الوقت علي اتصل حق شيخه شيخه: ألووو علي: مرحبا خالتيه .. شحالج شيخه: الحمدالله علي: وين انتن؟ شيخه: تونا طلعنا .. الحين في السياره علي: زيييييين شقايل رمتي تردينهن شيخه: انا ما رديتن الساعه 12 قالن بنرد رواحهن علي: شي طيب .. دوم أباهن جيه.. برايج خالتي.. بغيت أتطمن عليكم الا شيخه: الله يحفظك يا أبوويه ..... حمدوه: بصراحه أول مره يعطوني مهله في السوق وأطلع في الوقت المحدد شمسوه: حكم قرقوش شو نسوي بعد حصوه: احمدن ربكن يوم خلوكن تسيرن حمدوه: يالله دور الخطه اليايه بعد شيخه: شمن خطه شمسوه: دبي شيخه: شو تبنها دبي بعد .. ماخذتن حايتكن حمدوه: خالتي .. بعدنا هذا اللي خذناه .. ماشي جدام الباقي.. وبعدين مافصلنا عبي شيخه: باجر بوديكن كارفور شمسوه: شوووو .. لالالالا أنا ما أبغي أبغي أسير فير ليدي حصوه: ليش انشالله .. خلنا نفصل هنيه حمدوه: لا ما أبغي أنا عاد خاطري أفصلها هناك .. لا تغيرون مخططاتي العنود: أخبركن خلن هالسالفه بنتفاهم بعدين عليها وصلنا البيت حمدوه: غرين دخل داخل بيت خالي حمد غرين: ليش؟؟ شمسوه: انت ادخل ومالك شغل حصوه: حشى كلتنه شيخه: غرين سير داخل وقف جدام البيت دخل غرين البيت ووقف جدام الباب .. نزلت من السياره ..دخلت الصاله لقيت عموه وآمنه وريموه العنود: السلام عليكم الجميع: وعليكم السلام أم حمد: من وين يايه العنيدي العنود: من السوق .. سايره ويا البنات أم حمد: عويش ما سارت وياكن؟ العنود: لا ما سارت أم حمد: شقايل تسيرن عن أختكن يا أمايه العنود: عمو.. آمنه ( تقاطعها):عموه عويش ما تشتري من هنيه .. يوم نسير دبي تشرى اللي تباه أم حمد: هييييييه العنود: بسير داخل أتسبح وأصلي .. تامرين عشي عموه أم حمد: لا بنتي برايج دخلت حجرتي وطلعت ملابسي دخلت تسبحت وصليت وسرت فوق .. بشوف عويش .. توني بدق الباب .. لقيتها فاتحتنه العنود: صح النوم عويش : صح بدنج العنود: متى نشيتي عويش: من نص ساعه العنود: ييت أوعيج ... عويش: بغيتي شي العنود: مممم .. لا بس بغيت أيلس وياج عويش: أوكي خلينا ننزل نزلنا تحت وتريينا حمد يرد من الشركه .. أول ما وصل حمد من الشركه حطوا الغدا وتغدينا.. عقب الغدا يسلنا في الصاله نشرب جاهي عويش: سرتي العين مول اليوم العنود: هيه سرنا عويش: شو خذتي العنود: قومي براويج شو خذت عويش: يالله... طلعنا أنا وعويش من الصاله ودخلنا حجرتي .. طلعت الأكياس من الكبت وحطيتهن عدالنا ويلست أراويها اللي اشتريته عويش: ممممم حلو .. بس يعني ماعرف العنود: كيف يعني عويش: يعني مافي شي يديد ..ديزاينات لابسينها الكورس اللي طاف العنود: هذاآخر شي نازل.. بالعكس أشوفه مرتب ومناسب للجامعه عويش: لا هو حلو ومرتب .. بس يعني الكشخه العنود: شو كشخه وين أبا أنا عرس والا حفله .. هذي الا جامعه تعمدت أقولها هالشي .. صح ملابسها وبدلها كلهن حلوات بس بصراحه صدقها شميس ما يناسبن للجامعه.. يلست عويش ويايه يمكن ربع ساعه .. وعقب طلعت لأنها مواعده ربيعتها على المسن ***** في الصاله كانوا حمد وآمنه وأم حمد يالسين يسولفون آمنه : أقول حمد حمد( وعيونه في الجريده):همممممم أمنه: تعرفه راشد بن سليم حمد: شوبلاه آمنه: اليوم اخته رمست سلامه اختك .. يبون .. حمد: شو يبون؟؟ آمنه: يبون يخطبون العنود حق راشد حمد: راشد!!؟ آمنه: هيه راشد.. شو فيه حمد: آمنه .. راشد معرس والا نسيتي آمنه: لا ما نسيت .. راشد طلق حرمته من متى حمد( باستهزاء): وتبيني أيوزه العنود آمنه: الريال ما يعيبه شي...وهو طلق حرمت... حمد( يقاطعها): آمنه راشد ريال عود والفرق بينه وبينها اكثر من عشر سنين .. ولا تنسين انه عنده عيال آمنه: عياله عند أمهم .. والفرق ما يهم ( تلف على أم حمد) عموه قولي شي أم حمد: شو أقول بعد .. أخوها مسؤل عنها وأدرى بمصلحتها حمد: هالرمسه قطعيها انتي وسلامه وقوليلها.. العنود بعدها ياهل ومب قد المسؤوليه .. وهيه هب طايحه في جبدي عشان أيوزها .. واختي ألف من يتمنها .. وغير هالمره ما أبغي أسمع هالرمسه فاهمات .. هب أنا اللي بخون في أبويه والوصيه اللي وصاني عليها .. ردن عليها وقوليلها ما عندنا بنات للعرس طلع حمد من الصاله معصصب .. " شو هالناس شافوها بلا أم وبلا أبو على بالهم بفرها لأي واحد اييها .. مب أنا اللي بخون فيك يا أبويه ومب أنا اللي بفرط فيج يالعنود.. أيوزج لأي حد وبعدين الناس تاكل ويهي .. الله يعينج يا العنيدي على ما ابتلاج .. بس وربي فسماه ما أخلي حد يمس منج شعره ويضرج" دخل حمد حجرته ورقد وهو معصب ومب هاينه عليه اخته .. ويشوف حال هالناس الطماعه اللي ما ترحم..صدق لي طاح الجمل كثرة سجاجينه .. **** عقب ما طلعت عني عويش .. فضلت اني أرقد لأني أمس رقدت متأخره ونشيت من وقت اليوم وسرت المول ورديت تعبانه .. والحين أسمع المنبه يرن عشان صلاة العصر شليت التيلفون وبندت المنبه وتميت أتجلب بعدني ماشبعت من الرقاد .. نشيت يمكن عقب ربع ساعه دخلت الحمام أتوظا .. يوم طلعت سمعت حد دق الباب وعقب دخل .. طلع حمد اللي عند الباب .. بصراحه استحيت كنت لابسه بجامه وحمد أول مره يشوفني بها الشكل .. نزلت راسي وما عرفت شو أقول قفطت حمد: خستي رقاد العنيدي العنود: حرام عليك الا ساعتين حمد: سااااااااعتين .. أنا ساعه وحده ما رقدت وانا أقووول الرقاد ليش ما ياني .. ثرج طمعتي فيه كله ..هههه العنود: ياااالله عاد انته راقد من وقت أنا راقده الساعه ثلاث حمد: أنا قلت دامج ويا حمدوه وشمسوه ما بتعقلين العنود: لا فديتهن مونساتني حمد: عنودي ..يودي هذ بطاقة البنك وين ما تسيرين شليها .. سمعيني وقت ما تحتايين فلوس تعاليلي لا اتمين تستخدمين البطاقه دوم العنود: لا حمد الحمدالله معاش أبويه لين الحين ينزلي وبعدين كل الاجارات تنحط في الحساب وهذا يبكفيني طول الشهر حمد: انتي لا تعاندين وتخليني أشل عنج البطاقه الحين .. أنا قلت بعطيج ايها عشان إذا احتيتي شي وأنا مب عندج استخدميها.. أنا ما بحاسبج على صرفج هذي فلوسج وكيفج فيها .. بس صدقيني ان دريت انج محتايه وما طلبتي من عندي بزعل عليج العنود: ليش تزعل .. حشى انتوا زاهب الزعل عندكم حمد: هيه .. العنود: حشى شو هذا .. بقولك شي تراني أنا ما أعرف أراضي حمد: أدري أنا أخوج وما أهون عليج تخليني زعلان العنود: لا أصلا ً ما تهون عليه أزعلك حمد: علني ما خلا من الحلا كله .. أنا بسير الحين شي في خاطرج ؟ العنود: سلامة راسك حمد: مب محتايه شي؟؟ العنود: لا تسلم حمد: متأكده العنود: هي متأكده حمد( يظربها بالمخده): يالجذاااابه العنود: ليش ؟ حمد: وهذا الكمبيوتر من يبتيه منطور .. ما تبين له مكتب العنود: هيه أباله .. بس قلت يوم بتفضى بقولك حمد: أنا بسير عندي شغل جان خلصت من وقت بخطف اطالع لج واحد العنود: عادي لا اتعب عمرك .. بخلي علي يوديني يوم من الأيام حمد: أدري بعدج مب واثقه في ذوقي .. بس أنا بسير أشتريه وبييبه ان ما عيبج لا تسميني حمد العنود: خلاص انت لين تسير تشتريه أنا بيلس أدور لك أسم حمد: عنلاتج .. يالسباله أنا أقول خلوف على منوه طالع ثرها عمته جيه العنود: فدييت اللي طالع عليه علني ماخلا منه طلع عني حمد وقمت أصلي وطلعت لي ثياب بغير ثيابي وبسير عند حمدوه وشمسوه صرت أتعلق فيهن أكثر وأكثر .. مرحبااااااااااا.... بصراحه أنا وااايد مستانسه لأن القصه عيبتكم ومستانسه على تشجيعكم بعد... وأنا قلتلكم من قبل اني بتأخر هالفتره بسبب الامتحانات .. واليوم خلصت والحمدالله .. والقصه انشالله بكملها حتى النهايه .. والمنتدى اللي نزلت فيه القصه منقبل صارت لي فيه شويت مشاكل وتسكرت القصه ... مابطول عليكم وأتمنى ان البارت اليديد يعيبكم.... تلبست ووقفت أسحي شعري سمعت تيلفوني يرن ... طلعت نوروه العنود: ألووووو نوروه: وويعه انشالله العنود: شلت ريلج.. الناس يسلمون نوروه: وين انتي عن تيلفونج أمس؟ العنود: كنت أرتب الحجره وعقب يلسنا نشوف الفلم وما شفت المس كول الا الساعه ثلاث نوروه: ليش ما تخبريني عن عويش الزفته؟ شموه محد غيرها أكيد هيه اللي قالت لها العنود: هاي محد غيرها شميم اللي قالت لج نوروه: شموه والا غيرها ليش ما تخبريني العنود: نوروه أنا ما حفلتها انتن ليش محترات نوروه: سمعي سحيله يوم الخميس بسير دبي هب تقولين ما قلت لج .. والله ان قلتي ما بسير بتنصقعين على راسج العنود: ومنو بيوديج ؟ نوروه: غيث بيوديني .. أنا اليوم رمسته العنود: لاااااا تقوليلي خبرتيه نوروه: هيه خبرته العنود: علني بلاج يانوروه انتي وشموه فوقج .. محد يقولكن شي .. أوكي هب منكن مني أنا اللي بطلت حلجي نوروه: هيه لمي ثمج وخليها تركب على راسج العنود:انزين لو قلتي له يودينا بدون لا يدري عن كل هذا نوروه: لا يا حبيبتي في فرق العنود: وشو الفرق يا أم الفروق انتي نوروه: تعرفين أول ما قلت له وحايلته عقب موت وافق يودينا .. بس يوم خبرته عن السالفه قال بوديكن وين ما تبن .. أي مكان تبنه بسير بكن وقال مب أنا اللي بخلي وحده من هالأشكال تقول جيه عن بنت أختي العنود:ما أظني انه سكت غيث أكيد بيعصب نوروه: ومنو قالج انه ما عصب بالعكس الا احتشر وكان بيوعي أمايه العنود: وتقولينها بكل بروود نوروه: برااايني .. أنا هذي بنت أخوج ما أدري ليش شايفه عمرها ومتعنطزه .. تقول محد أحسن عنها العنود: انتن ليش محترات .. أففففف منكن نوروه: العنيدي جب ولا كلمه العنود: انزين غيث وين ؟ نوروه: أظني بتلقينه جدام بيت قوم شموه العنود: شو عنده؟ نوروه:شو عنده بعد ..مكان بيسير ويا سعيد العنود: انزين أخبرج ..أنا سرت اليوم العين مول وخذت لي بدلتين وكم بدي نوروه: انتي ما فصلتي عبي صح العنود: لا... حمدوه وشمسوه محتشرات يبن فير ليدي نوروه: تخبلن هذيلا .. أنا كنت مرمسه حصوه قالت ما تبغي تفصل عنده العنود: ما أدري أنا وين ما بيسيرن بسير.. ما فيني أعبل عليهم نوروه: سمعي انتي فصلي هنيه في العين سيرن فيرست تشويز .. فير ليدي خذي الشيل من عنده العنود: بسير صوبهن بشوفهن .. وبرد عليج نوروه: انتي اخذي كل اللي يعيبج .. وكسري عينها هالسباله .. ما أدري ليش شايفه عمرها .. والله يتموت قهر يوم بتين الجامعه الكورس الياي العنود: مهما كان بنت أخويه وما تهون عليه نوروه: ما أدري لين متى بتمين هبلا العنود: أهبل ريلج نوروه: على طاري ريلي تعرفين منو سأل عنج اليوم العنود: منو ؟؟ نوروه: أحمد العنود: وهذا ولد خالج متى بيصطلب .. صدق ما يستحي يسأل بعد صدق قوات ويه نوروه: العنيدي حرام عليج العنود: حرام في الدرام .. صدق ما عندج سالفه نوروه: عنودي والله انه يحبج العنود: حبج برص.. خليه يسير يدور غيري نوروه: هو ما يبغي غيرج العنود: يحلمم .. أنا مب لعبه عنده يسد اللي صار الصيف اللي طاف نوروه: انتي تعرفينه أحمد خريش العنود: لا خريش ولا غيره نوروه: حشى امره ما اتعايين العنود: نوروه يا تسكرين السالفه يا تجلبين ويهج نوروه: تصدقين أسمع صوته خاري .. بسير أشوفه يمكن عبادي وياه العنود: سيري سيري لا تموتين عليه .. وسلمي على عبادي مالج هذا نوروه: بس عبادي العنود: لاااااااااتسلمين امره نوروه: انزين انزين حشى جبريت سكرت عن نوروه وأنا منقهره منها .. لازم تفتح سالفة أحمد .. خلاااص صرت ما أداني أسمع طاريه.. كرهته .. الله يسلمكم هذا أحمد ولد خالت أمايه كنت وايد أحب أيلس وياه .. سوالف ويحب ينكت وأنا من طبعي أتعلق في الانسان الخريش اللي شراتي .. طول الصيف اللي طاف وأنا أيلس وأسهر وياه وطبعاً خواته ونوروه وغيث ويانا .. لين ذاك اليوم اللي يتني فيه بنت عمه مريوم .. ورمستني .. صدق ما أنساها ++ مريوم : عنود العنود : هلا مريوم: بسألج .. انتي تحبين أحمد العنود: نععععم !! مريوم: انتي تحبين أحمد؟ العنود: مريوم انتي ينيتي! مريوم: لا ما ينيت .. أنا أشوفج دوم وياه أربع وعشرين ساعه .. ولا تنسين اني أنا محيريني لأحمد وطبعاً ما أرضى أنج تتجربين منه العنود: والله جانج تقولين أيلس ويه أربع وعشرين ساعه .. بتعرفين انا نيلس هنيه يعني هو اللي ايي مب أنا أسير بيتهم .. ليش ما تسيرين تحاسبينه هو مريوم: ومنو قالج ما سألته .. بالعكس خليت منى ( اخت أحمد) تكلمه العنود: وشو قال؟ مريوم: والله اللي قاله أحمد انه ما يحبج وانج انتي اللي متعلقه فيه والا.. العنود( تقاطعها.. وبعصبيه): سمعي آنسه مريم أنا أحمد ما في عمري حبيته ولا بحبه .. كنت أعده حاله حال غيث بس دام انها هذي هيه السالفه.. سلمي على أحمد وقوليله مب العنود بنت سيف اللي انت بترمس عنها من وراها بهالرمسه .. طلعت عن مريوم وأنا معصبه منه ويوم خبرت نوروه قالت لي لازم نتأكد ان أحمد قال هالكلام صدق وما نظلمه .. وفعلاً تأكدنا وأحمد قال هالكلام ومن يومها وأنا ما أداني أسمع طاريه .. ++ طلعت من حجرتي وسرت الصاله شفت فلم توه بادي على تو ويلست أتابعه دقايق وشفت منصور يدخل الصاله منصور: السلام عليكم العنود: هلا والله مرحبا بالشوخ .. وينك انت اليوم؟؟ منصور: في البيت ما طلعت .. مانع سار دبي ويا أهله وأنا ماطلعت العنود: ليش ما ييت عندي؟؟ منصور: شفت شميس راده من السوق وقالت لي انج كنتي وياهن قلت أكيد بترتاحين العنود: يعلني فداك يا ربي.. البنات شو يسون ؟ منصور: راقدات ((دخلت عويش الصاله وقبضت الرموت وغيرت القناه ويلست اتابع حلقه سوريه )) منصور: حووه انتي ليش تبدلن ما تشوفينا نتابع الفلم عويش: نعم .. شو حوو انت بعد شو تشوفني جدامك بقره منصور: عزالله البقره عنج .. بعدها البقره منها فايده .. انتي اللي ما منج نفع عويش: منصور يا تيلس ساكت يا تنجلع وتطلع برا منصور: والله يوم تحيدينه بيتج رمسي هذا بيت خالي عويش: منصور خلني أتابع الحلقه تبغي تشوف الفلم سير بيتكم منصور: أنا بسير بيتنا وعنودي وين تسير عويش: أوووووه منصور فكنا من صدعه العنود: منصور يوعان؟ منصور: هيه العنود: قوم بنسير نسوي كيكه منصور: والفلم العنود: تو دوم تعيد أفلامها أكيد بيعيدونه طلعت ويا منصور وسرنا المطبخ سويت الكيكه وعصيري المفضل .. عصير ليمون .. طلعت الكيكه من الفرن وحطيها في صحن ويا عصير الليمون ودخلت أصلي المغرب .. وعقب المغرب شليت الصينيه بيت أم عبدالله لقيتهن يالسات وين كنا يالسن أمس منصور: مررررحبا بالمحمول العنود: مسود الويه المحمول بس والا الحامل ماشي منصور: لولا الحامل مايا المحمول .. مره وحده بالمحمول حطيت الصينيه ويلست في صوب ويا البنات نقرقر العنود: أخبركن بسير ويا خالي دبي يوم الخميس شمسوه: جذاااابه.. ياحظج حمدوه: شلينا وياج العنود:مرحبا بكن الساع .. ما بقولكن لا حصوه: احلمن انتن حمدوه: حرام والله أبغي أسييييييير شمسوه: ايه حصيص رمسي أخوج حصوه: رمسته أمس قالي مايروم الحين شمسوه: متى عيل حمدوه: يوم بتعقص الرخمه تعرفنها حصوه: حمدووووه لمي ثمج العنود: ولا يهمكن أنا بحاول وياه بس مب هالخميس حمدوه: متى عيل .. شعليج انتي بتسيرين تراج العنود: الخميس الياي .. عشان أسير مرتين شمسوه تفرها بالدبه) زولي عيل يلسنا نسولف وعقب شفت علي وحارب يايين صوبنا حارب: السلام عليكم الجميع: وعليكم السلام حارب: يوعااااااان .. أمايه عندكم عيشه علي: هي والله .. ميتين يوع أم عبدالله: فدييت نصخكم تعالوا كلوا يلسوا حارب وعلي ياكلون .. شكلهم عيبتهم الكيكه .. الحمدالله بصراحه مافيني على التعليقات علي: اممممم .. حلوه هالكيكه منو مسونها شمسوه: أنا علي: جذذذذذذذذب شيخه: هذي العنود بنتسيف مسوتنها علي: يعلني ما أعدمها .. وانتي ليش تجذبين حمدوه: شميس جذبتج معروفه .. انتي متى سويتي كيكه ونجحت حارب: كله ولا الكيكه اللي تريينها لين الساعه ثلاث وطلعت عيين شمسوه: احمدوا ربكم حد عاطنكم ويه .. لولاي ما كلتوا شي طول السهره علي: بصراحه أنا أعترف لولاج جان متنا يوع ونحن على تجلا حمدوه ((شمسوه طباخه درجه أولى .. بس مشكلتها الكيك مهما تسويه ما يظبط عندها .. بعكس حمدوه ما تعرف تسوي شي)) |
| الساعة الآن 03:31 PM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir