للي ما فتح عندي الرابط

انا بكمل القصه ...

الــــــــــــــــــــــــــــــجـــــــــــــــــ ـــــــــــزء الـــــــــثــــــــلاثــــــــــــــــــيــــــــ ــــــــــــــــــن

*** عقب شهرين من الأحداث السابقه وبالتحديد في الاسبوع اللي عقب عيد الأضحى***

طلعت من كلاسي .. من فوق شفت حمدوه وشمسوه طالعات يربعن .. خفت شو ياهن .. نزلت بسرعه وركضت وراهن .. أول ماشفتهن زقرت عليهن من بعيد
العنود: حمدووووه .. شميس
وقفن ولفن صوبي .. مشيت بأسرع خطوات قدرت عليها لين وصلت عندهن وأنا ألهث
العنود: شو بلاكن تربعن
سحبتني حمدوه من ايدي ومشينا بسرعه .. طلعنا من الجامعه وركبنا السياره
العنود: شو صاير .. شو فيكن
حمدوه: حارب وعلي في المستشفى
شمسوه: غرين روح مستشفى توام بسرعه
العنود: ليش .. شو السبب
شمسوه ( تصيح): سووا حادث اليوم الصبح
العنود( منصدمه): حادث!!
رديت الغشوه على ويهي من حسيت بالدموع ينزلن على ويهي .. مب قادره أتحمل هالصدمه .. وصلنا المستشفى .. وقف غرين عند قسم الطوارئ .. نزلنا بسرعه .. ماعرفنا وين نروح .. مشت حمدوه عند الرسبشن وسألت عنهم ... وشمسوه اتصلت حق شيخه تتخبرها .. شفت خليفه توه داخل المستشفى .. رحت صوبه
خليفه: العنود!! شو تسون هنيه
حمدوه: خليفه دخيلك ودني عند علي .. أبغي أشوف حارب
خليفه: انتن هدن الحين .. ردن البيت الرياييل كلهم ميتمعين
شمسوه: ما بروح .. دخيييلك خلوف فديت روحك ..
خليفه: لا إله الا الله .. مشن
رحنا ويا خليفه .. مشينا في ممر كان زحمه .. كله رياييل دخلنا في وحده من الحجر لقيت شيخه وسلامه وعموه أم عبدالله فيها .. رحنا صوبهن ..
حمدوه: أمايه حارب وعلي وين ؟
محد رد علينا .. وكل وحده منهن يالسه وتقرا من صوب .. دخل سالم ويبين على وييه انه تعبان ومهموم ورحنا كلنا صوبه
أم عبدالله: سالم دخيلك ودوني عند عيالي
سالم: استهدي بالله يدوه ماعليهم شر
أم عبدالله : وين ما عليهم شر وحارب محطوط في العنايه
العنايه!! .. حارب في العنايه!! لا يا ربي لا .. ياااااااااالله يا ربي انك تخليه ..دام انه في العنايه أكيد ان حالته خطيره ..
سالم: أمايه ادعوله .. لا اتمن تحنن لا أردكن البيت كلكن الحين
سلامه: وعلي .. فدييتك يا وليدي طمني على علي
سالم: علي الحمدالله مافيه الا كل خير.. بس بيسووله عمليه
سلامه: شمن عمليه؟
سالم: بيسووله عمليه في ريله ..
شمسوه: سالم دخيلك أبغي أشوفهم
سالم: وين تشوفينهم .. علي الحين في العمليات .. وحارب تشوفين الزحمه عنده .. الدكاتره داشين طالعين ..
قعدت عموه على الكرسي اللي عدالها .. كأنها منهاره .. قعدت عدالها مب قادره أستوعب اللي يصير .. طلع عنا سالم وعقب دقايق رحنا وراه صوب العمليات .. ماقدرنا نتحمل القعده في غرفة الانتضار .. الوقت يمر ببطئ فضيع .. والأصوات توترني أكثر .. طول الدكتور داخل ولا حد منهم طلع .. كنت واقفه على طرف بعيد عن أي كلمه .. وقفت شمسوه عدالي ومسكة في ايدي بقووو
شمسوه: عنودي علي بيموت ؟
هالكلمه كانت بمثابة طراااق على ويهي .. من سمعتها حسيت الدنيا تدور بي
العنود: شمسوه انتي شو تقولين
شمسوه: عنودي أنا أحبه .. ما أتخيل اني ما بشوفه من عقب اليوم
خرت على الأرض ويلست على ركبها .. يا ناس أنا اروحي محتايه حد يهديني ..قعدت عدالها
العنود: شمسوه علي بخير .. الحين بيطلعونه .. ادعيله انتي بس
شمسوه: من ساعتين من دخلوه لين الحين محد طلع منهم ..
وقفتها ويلستها على الكرسي اللي عدالي
العنود: الحين بيطلع ..الله بيعينه وبيطول في عمره
شمسوه: ياااااااااارب .. اني لا أسألك رد القضاء انما أسألك اللطف فيه ..
قعدنا تقريباً ساعه زياده .. طلع الدكتور من داخل شمسوه ماقدرت توقف
العنود: شمسوه خلينا نروح نسمع الدكتور شو قال
شمسوه( تصيح): عنودي مب قادره أوقف أحس ريولي ما تشلني
العنود: بروح أشوفهم وبرد
خليتها ورحت عندهم .. قده الدكتور راح عنهم
العنود: حمدوه بشريني شو قال
حمدوه( تصيح): الحمدالله الحمدالله
من شفتها تصيح .. صحت وياها .. وبعدني ما أدري شو صار
العنود: حمدوه بشريني
حمدوه: نجحت العمليه ..
رحت عند شمسوه أبشرها بسرعه ..
العنود: شمسوه .. شمسوه
بس شمسوه ما ردت عليه .. هزيتها طاحت على الأرض .. يت النيرس وشلتها .. اغمى عليها .. ما قدرت تتحمل أكثر .. عقب ما قامت شمسوه بشرتها .. ردينا صوب العنايه المركزه .. حارب وعلي كانوا عدال بعض .. علي حطوه في العنايه لحد ما تستقر حالته من عقب العمليه..
سالم: أمايه قومن .. لا اتمن هنه فضحه .. ردن في الحجره
أم عبدالله : مابروح عن وليدي .. خلوني عنده
عبدالله: يا امايه فديت روحج .. يلستج مانها فايده
أم عبدالله: انتوا شدراكم .. أنا أعرف الحربي مابييرتاح الا وأنا عداله وأقرى عليه
عبدالله: لاااا إله الا الله امايه توه الدكتور واصل والحين بيمر يشوفه
أم عبدالله: أنا برمسه الدختور أعرفكم انتوا بتقصون عليه
سالم: برايج يدوه انتي تمي وانتن روحن
رحنا غرفة الانتضار .. كنا نتريا الدكتور يمر يشوفه .. من البدايه كان الدكتور المناوب .. والحين بيوصل الدكتور المسؤول ... شفناه مار رايح صوب حارب .. طول عنده ونحن نترياه يطلع .. لحظة الانتضار صعبه تخلي الواحد يتوتر ... طلع الدكتور عقب ساعه عن حارب .. ماقدرنا نروح صوبه .. الرياييل التفوا حوله ... بس اللي ألاحظه الرهبه والخوف على ويوهم .. عقب ماراح الدكتور ..دخل سالم وقعد على أقرب كرسي له .. شكله مايطمن بخير ..
سلامه: سالم فديت روحك ريحني .. قولي شو أخبار حارب
سالم: ادعوله الله يشفيه
شيخه: شوقالكم الدكتور
نزل سالم راسه وحطه بين ايديه ..
حمدوه: سالم دخيلك ارمس ..
سالم: يتريون حالته تستقر ... محتاي 48 ساعه .. اذا مااستقرت حالته ..
العنود(باندفاع): اذا مااستقرت حالته شوووو ...
شيخه:سالم شوقالكم الدكتور .. قولنا الصدق ..
طلع سالم عنا وخلانا في حالة ذهول .. ماخذنا منه لاحق ولا باطل .. وكل وحده منا تشوف الثانيه .. قعدنا في المستشفى لين الساعه سبع ونص ... وردينا البيت .. من وصلت البيت دخلت تسبحت .. عقب ماطلعت خذت وقتي أصلي وأدعي حق حارب وعلي .. الأمل في حياة حارب ضعيف .. هذا اللي سمعته من واحد من ربعه يوم رحنا نتوضا بنصلي العصر.. بس سالم ماقالنا هالشي .. عرفت بالصدفه وخواتي مايدرن .. شمسوه وحمدوه ما يدرن .. تميت على حالتي ماتحركت من مكاني لين الساعه عشر .. طلعت في الصاله لقيت عويش يالسه اروحها شكلها تعبان ومهموم .. بغيت أخفف عنها بس ما قدرت .. رحت حجرتي .. انسدحت أبغي أرقد .. بس النوم جافاني .. مش مستعده أتحمل صدمه ثانيه .. مش مستعده أخسر انسان غالي عليه .. أبويه ومن عقبه امايه والحين حارب .. هيه حارب غالي عليه وأحبه هيه أحبه لين متى بكابر وبسكت .. وبقص على عمري .. أحبه وأموت فيه بعد .. نزلت دمعه من عيني وتبعتها دموع .. أتمنى لو أشوفه الحين .. أتمنى أخفف عنه .. يالله لو أقدر أشل شي من التعب اللي يحسه .. تجلبت على الشبريه وأنا أهويس وأوسوس .. أهدى وأرد أصيح .. قعدت مكاني .. أبغي أرقد أشرد من هالوسواس ومن التفكير بس مش قادره .. انصدمت يوم سمعت صوت الأذان .. يمكن يتهيأ لي مديت ايدي للتيلفون شفت الساعه .. كانت الساعه خمس .. ماحسيت بالوقت .. ولا قدرت أرقد .. قمت صليت ويلست أقرى قرآن وأدعي ربي ان الله يشفيهم .. الساعه سبع .. أحس مالي خاطر أروح الجامعه .. أريد أروح المستشفى .. أريد أروح أشوفهم .. بس القعده في البيت مابتفيد .. اتصلت حق شمسوه ..
شمسوه( بصوت مبحوح): ألو
العنود: هلا شميس
شمسوه: هلا عنودي
العنود: بتروحين الجامعه
شمسوه: هيه عندي امتحان اليوم
العنود: لحظه شمسوه ..
رحت صوب المكتب فتحت الدرج طلعت الجدول .. اكتشفت اني أنا بعد عندي امتحان اليوم ..
العنود: تصدقين .. أنا بعد عندي امتحان اليوم
شمسوه: الساعه كم
العنود: الساعه عشر
شمسوه: أنا بعد امتحاني عشر
العنود: خلاص عيل .. بغير ثيابي وبييكن
سكرت عنها .. الامتحان غاااب عن بالي .. مع ان الدكتور ذكرنا فيه المحاظره اللي طافت .. آآآآآآآآه .. غيرت ثيابي ورحت بيت أم عبدالله .. دخلت الصاله مالقيت حد فيها .. العاده إذا بدخل عندهم هالوقت .. حارب وعلي وسالم ..يتريوقون ويسولفون وام عبدالله وياهم .. اليوم محد منهم موجود .. ياااااااااالله ياربي انك تردهم سالمين .. ياااااارب ترحمنا .. نزلت دمعه من عيني وأنا مركزه على المكان اللي متعودين يقعدون فيه
شمسوه: عنودي !!
مسحت دمعتي ولفيت على ورا عنها ..
شمسوه:عنودي شو فيج
العنود: شوفيني بعد ..
شمسوه: ادعيلهم يالعنود ..
العنود: حمدوه وين؟
شمسوه: تعالي بنروح صوبها
رحنا عند حمدوه ...رحنا الجامعه .. كانت محاظرتنا الأولى أمن كلنا مع بعض .. حظرناها وكل وحده تدرس في صوب .. بس مالي خاطر على الدراسه .. وطيت راسي على الطاوله .. أحبس دموعي .. مافيني حد يشوفني وأنا أصيح .. ماصدقت الدكتور يقولنا طلعوا .. طلعت من القاعه وربعت صوب الحمامات .. أغسل ويهي ودموعي بعدهن ما وقفن ...
شمسوه: أنا عقب ما أطلع من الامتحان بروح المستشفى
حمدوه: اتصلي حق سالم .. مافينا أمس هزبنا
شمسوه: ماعليه من حد بروح يعني بروح
العنود: أنا بروح وياج
حمدوه: خلنا نروح ندرس شويه .. هذا مدتيرم ونحن مافتحنا كتبنا
رحنا المسيد .. صليت ركعتين وقعدت في الزاويه.. حطيت المذكره عدالي .. وسرحت أفكر .. ولاحتى اهتميت بالامتحان..الساعه عشر .. رحنا كلاساتنا ... امتحنت ماعرفت أحل شي .. لازم أدرس عشان أعرف أحل .. سلمت الورقه للدكتور وطلعت .. نزلت تحت أتريا حمدوه وشميس شفت ميثوه سلمت عليها ..
ميثوه: شحالج العنود
العنود: بخير ربي يسلمج انتي شحالج
ميثوه: الحمدالله .. منو تتريين ؟؟
العنود: حمدوه وشمسوه .. بنروح المستشفى
ميثوه: أمس فليل رحت ومالقيتكن
العنود: هيه سالم ماخلانا نيلس .. المغرب ردينا
ميثوه: العصر بروح ويا أمايه انشالله
العنود: انشالله
يلست وياها ساكته ما أتكلم إلا إذا هيه سألتني ... كلامها وترني أكثر .. كل كلامها يبين انها تحاتي حارب ومهمومه عليه .. ما أعرف شو الشعوراللي حسيت به .. بس كان خاطري أروح عنها .. الحمدالله ارتحت يوم شفت شميس وحمدوه نازلات من فوق .. ماعطيتهن فرصه ..
العنود: سمحيلي ميثوه بروح الحين
رحت عنها وفوادي شااااب ظو ... رحت عند شمسوه وحمدوه وعيوني يتغارقن
شمسوه: عنودي شو سويتي في الامتحان ؟
العنود: ماسويت شي ..ولا عرفت أحل سؤال واحد .. لازم أكون دارسه وانا شو الفصول اللي داخله في الامتحان ما أعرفهن
رحنا المستشفى .. لقينا سالم يتريانا عند الباب ..
سالم: الله يهديكن .. ييتكن مامنها فايده لوكملتن كلاساكتن أبرك
شمسوه: وين لنا بال نداوم ..
العنود: سالم .. شخبارهم
سالم: ادعيلهم يالعنود
وصلنا عند قسم العنايه ... شفناهم مطلعين علي ..
شمسوه: وين بيودونه؟
سالم: طلعوه من العنايه الحمدالله حالته مستقره .. بس شوية رضوض اللي في جسمه
حمدوه: وحارب؟
سالم: الله يرحمه برحمته ... ربي اني أسألك رد القضاء بل أسألك اللطف فيه يارب العالمين ... لا حول ولا قوة الا بالله ..
طلعوا علي من العنايه .. ودوه الغرفه وراحن وياه شيخه وسلامه .. مشينا لحد ما وصلنا عند حارب ... دخل سالم داخل ورد
العنود: ليش طلعت ؟
سالم: الدكتور عنده
حمدوه: يدوه وين؟
سالم: يدوه الله يهداها داخل هب طايعه تطلع ..
وقفنا نتريا الدكتور يخلص .. كمل نص ساعه داخل .. طلع وطلعت وراه عموه .. راح سالم يتفاهم وياه .. ونحن نسمع بس مش فاهمين شي .. قبضت ايد شميس..
العنود: شمسوه أريد أدخل عنده
شمسوه: عنودي !!!
العنود: دخيلج شمسوه أريد أشوفه
سحبتني شمسوه بسرعه ودخلنا .. شفته طايح على الشبريه مايتحرك .. شكل الوايرات والأجهزه وصوتها عنده يخوف .. هالمنظر أبداً ما يطمن .. مشيت بخطوات بطيئه عنده .. وقفت عند راسه .. وابتدن دموعي ينزلن .. حارب الانسان المرح اللي دايماً أشوفه يروح ويرد .. يسولف ويضحك أشوفه بهالحال ..
شمسوه:عنودي خلينا نطلع .. مافينا سالم يدخل
طالعتها بترجي .. دخيلكم خلوني عنده ماريد أروح عنه
العنود( بهمس): حارب ... حارب رد عليه ...
شمسوه: عنودي ماشي فايده .. حارب ما يسمعج
العنود: حارب دخيلك فديت روحك .. رد عليه ..
العنود: حارب حبيبي إذا تسمعني .. سو أي شي .. تحرك أي حركه.. المهم اطمني عليك ..
مايرد عليه مايرد .. ابتديت أرجف .. أحس ريولي ماتشلني
العنود( تصيح): شمسوه حارب مايرد .. مايرد عليه ..
لفيت صوبه .. شفت دمعه تنزل من عينه .. دمعه وحده بس .. ماأدري شو الجرأه اللي يتني وخلتني أمسحها ..
شمسوه(تسحب العنود): خلينا نطلع قبل مايدخل سالم ..
طلعت وياشمسوه ..وأنا منهاره .. دمعة حارب مانزلت من هين .. حارب تعبان .. تعبااان وااايد وااايد ..
شمسوه: عنودي ادعيله ..
حمدوه: انتن ينيتن .. شو اللي دخلكن داخل
شمسوه: شو قال الدكتور
حمدوه: بيتريون لين باجر .. باقي أربع وعشرين ساعه يتريون حالته تستقر ..
شمسوه: ياااااااااااالله انك تعينا يارب
حمدوه: عمي قال بيسفره .. بس حالته ما تتحمل سفر
العنود: حارب تعبان يا حمدوه .. حارب تعبااااان
شمسوه: عنودي .. أكيد انه بيكون تعبان .. انتي ادعيله
سالم: يالله بنات .. قومن بوصلكن البيت
شمسوه: لا مانريد نروح
سالم: شميس غناتي يلستكن ما منها فايده
شمسوه( تصيح): سالم ماريد أروح
حمدوه: سالم .. دخيلك خلنا ..
سالم( يتنهد): انزين قومن بوصلكن الحجره عند علي ..
لا .. ماريد أطلع .. علي الحمدالله واستقرت حالته .. أريد أتم عند حارب ..بس مستحيل اني أقول حق سالم هالكلام .. رحنا عند علي كان راقد وسلامه وشيخه قاعدات عنده يتكلمن بهمس عشان مايزعجنه ..
سالم: أمايه أنا برد صوب يدوه شي في خاطركن
شيخه: سلامة قلبك أبويه ..
أمنه : رد صوبنا عقب ما يرد عليكم الدكتور
سالم: انشالله
قعدنا عند علي .. الساعه 12 دخلت علينا حصيص تصيح .. ريلها أخر في بريطانيا بسبب ظروف الدراسه عنده .. أول ماشفنا مايد طلعنا أنا وحمدوه وشميس .. وشفنا بوسالم توه بيدخل
بوسالم: شو طلعكن بناتي
شمسوه: مايد توه داخل ..
بوسالم: ليش ماتردن البيت ترتاحن .. الا قيس متعبات عماركن
حمدوه: عمي نحن مابنرد البيت .. يلستنا في البيت تزيدنا فوق الهم هم
بوسالم: بس من العصر الرياييل كلهم بيتوافدون على يسلمون على علي
شمسوه: قولهم نبغي الغرفه اللي عدالها .. محد فيها
بوسالم: خلاص أنا بسير أشوفهم وبرد انتن لا اتمن موقفات هنيه دخلن في هالحجيره
دخلنا في غرفة الانتضار .. والساعه وحده عقب ماصلينا الظهر .. ردينا عند علي في الغرفه .. الساعه ثنتين ..
علي: حا .. حارب .. حارب
كلنا ربعنا صوبه .. وقفت سلامه عند راسه
شيخه(تصيح): علي عيوني فديت عمرك
علي( بصعوبه): حارب وين .. وين حارب
سلامه: حارب بخير .. لا تحاتي
سكت عنا علي ورد غمض عينه فتره ..
شمسوه: علي ... علي .. دخيلك رد عليه
فتح عينه دقايق ورد سكرهن كأنه يبغي يطمنا بأي طريقه .. بو علي أول ماسمع علي يتكلم راح وزقر الدكتور .. شفنا الدكتور يدخل ويا النيرس .. رحنا الحجره اللي عدالنا عقب ما خذناها عشان نقعد فيها إذا كان حد موجود ..
.. عقب ماخلص الدكتور الفحص ردينا عند علي مره ثانيه ..
شيخه: شو قال الدكتور؟
بو علي: الحمدالله بخير .. بس من التعب والبنج ماخذ وقته كله رقاد ..
سلامه: أنا بسير صوب عمتي بشوف حارب
تعلقت عيوني في سلامه .. أبغي أقولها بروح وياج بس في شي يمنعني .. لفيت على حمدوه ونزلت راسي .. وكأنها حست فيني
حمدوه: نحن بنخاوييج
سلامه: قومن عيل .. خلنا نروح
رحنا صوب قسم العنايه وأنا أسحب ريولي سحاب .. مب قادره أتوازن .. من قمت الصبح ماكلت شي وأمس عيوني ماشافت النوم .. وأهم شي الهم اللي ياكل قلبي وفوادي ..وصلنا قسم العنايه .. سالم ماخلانا ندخل .. عموه كانت يالسه عند الباب .. سالم مبين على ويهه التعب من أمس وهوه في المستشفى عندهم ماراح عنهم .. الله يعينه طول الليل وهوه واقف .. بيحاتي علي والا حارب .. وكلهم عدال بعض مرقدين ..
سلامه: شخباره عمك؟
سالم: ادعوله ياأمايه
سلامه: الله يعنه ويخليه يارب العالمين
قعدنا يمكن ساعه .. وتعبنا ويا عموه لين أقنعناها تيي ويانا .. يلستها هنيه مامنها فايده .. وهيه من أمس ماذاقت شي .. رحنا الغرفه اللي خذناها .. علي استرد وعيه الحمدالله بس حد عنده .. دخلنا الحجره .. قعدنا فيها .. والساعه خمس ردينا صوب علي ..
أم عبدالله: يعلني أفدى ريحتك يالغالي
علي: فدييت هالحس .. شحالج يدوه
أم عبدالله(تصيح): حالي عثير يالغالي من شفت حالتكم .. ماشوف غير الموت في عيوني
علي: الله يطول بعمرج ويخليج
أم عبدالله: عمك طايح ميهود .. مايرد عليه ..
آمنه: الله بيشفيه ويعينه .. أمايه لا اتعبين عمرج
بو سالم: أمايه قومي ردي البيت ارتاحي
أم عبدالله : مابظهر الا وأنا مرمسه وليدي
بوسالم: سيري ارتاحي يا امايه ..
أم عبدالله: وين برتاح والغالي مسدح ومايرمسني
سالم: أقولكن .. حمدوه والعنود وعويش وشمسوه .. يلستكن مامنها فايده .. خلنا نرد البيت
شمسوه: أنا مابرد
سالم: شو مابتردين .. طالعي شكلج شقايل تعبان ..
شمسوه: أنا مرتاحه مب تعبانه .. ومااشتكيت
سالم: شميس .. شوفي أشكالكن كل وحده منكن ممترضه بشكل
العنود: نحن هب تعبانات وإذا في حد يحتاج الراحه .. فهو انت
سالم: يا بنات الحلال الحين الحجره بتمتزر من الراياييل
شمسوه: بنروح الحجره الثانيه
أم عبدالله: منو تم عند الحربي الحين
سالم: عمي وخالي حمد .. ..
عقب صلاة المغرب قعدنا في الحجره الصغيره .. ويتنا أم ميثوه وميثوه وياها
أم عبدالله: قومن بناتي .. مابتردن البيت ترتاحن
ميثوه: انتن من الصبح هنيه؟؟
شمسوه: هيه .. من الساعه عشر
ميثوه: انتن ماعندكن امتحانات؟
شمسوه: ما أدري
عويش: أنا عندي امتحان باجر
ميثوه: وانتي العنود؟
العنود: ماأدري .. ماشفت الجدول
سلامه: شو ماتدرن .. وانتي عويش يوم انه عندج امتحان باجر لش ما تروحن تدرسن
عويش: رحنا البيت والا مارحنا مابنقدر ندرس
أم حمد: الله يهديكن يا بناتي .. لو تردن البيت .. هب أحسن لكن
حمدوه: يالله يا يدوه .. تبينا نهلك من كثر مانحاتي ونحن في البيت
أم عبدالله: أنا بسير صوب الغالي .. فوادي ياكلني
ميثوه: خالوه أنا بخاويج
كنت ألعب بدبة الماي .. ومن سمعت ميثوه انها بتروح عند حارب .. فجيت ضغطي كله في الدبه .. ضغطت عليها بتوتر وغيض
شمسوه: ميثوه شو يوديج .. مابيدخلونج
ميثوه: برايه .. المهم أتطمن على حارب
أم ميثوه: برايها خلنها تسير من البارحه ماكلتلي فوادي ..
من سمعت كلام أم ميثوه شليت بعمري ودخلت الحمام .. أغسل ويهي وأهوس عليه بقوو .. أحاول أرد دموعي .. ما أبغي أصيح .. ما أبغي .. لا ياربي لااا
حمدوه: عنودي شو ياج ..
العنود: ماشي ماشي حمدوه لا تحاتين
حمدوه: عنودي شي يعورج
العنود: لا لا مافيني شي .. قلت لج لا تحاتين ..
طلعت من الحمام .. مالقيت حد ..
العنود: وين راحن؟
حمدوه: يدوه وأمايه وميثوه راحن عند حارب .. والباقي دخلن عند علي ..
العنود: تعالي نروح عندهن ..
دخلنا عندهن يلسنا نسولف ولاحظت نظرات شمسوه لعلي .. تذكرتها وقت ما كان علي في العمليات .. آآآآآآآآآه يا شميس .. حسيت بعذابج ذاك الوقت .. لوتحسين بموتي وعذابي الحين .. عذابي من الصوبين .. ان حارب طايح ومايتكلم .. بين الحياه والموت .. وان ميثوه عنده .. أدري انه مايحس بها ولا بتشوفه .. بس مجرد ما أعرف انها جريبه منه أكثر مني أحس فوادي يعتصر ..

الساعه ثمان ردينا البيت .. أول ماوصلت دخلت تسبحت وصليت العشى وأنا في كل سجده أدعي حق حارب .. كل ما جربن الأربع وعشرين ساعه ينتهن أحس لحظات موتي تجرب أكثر .. الدقايق تمر كأنها ساعات .. والساعات أحس بها أيام .. شيكت على جدولي .. ماكان عندي امتحان باجر .. وباجر الساعه عشر بتكون آخر ساعه من الأربع وعشرين ساعه .. اللي المفروض تستقر فيها حالة حارب .. رحت انسدحت على الشبريه .. وأنا مب قادره أفتح عيني من كثر الرقاد ... من قمت أمس الصبح الساعه ست لين اليوم ماشافت عيني النوم .. تكورت على عمري وأنا سرحانه أفكر ..

الــــــــــــــجـــــــــــــــــزء الـــــــــــــــــــــواحــــــــــــــــــد والـــــــــــثلاثـــــــــــيــــــــــــــن

فتحت عيني وأنا أتذكر اللي صار من يومين .. أحاول أستوعب .. هذا حلم والا صدق .. أجذب على عمري لا أنا أحلم .. بس من قعدت مكاني انتبهت لكتبي واللاب توب في نص الحجره .. استوعبت ان اللي صار صدق مب حلم .. أمس عقب ما رديت من المستشفى نطرتهن في نص الحجره وماشليتهن .. لفيت على تيلفوني .. ليقيتها الساعه خمس .. رقدت من الساعه ثلاث لين خمس .. ساعتين تقريباً بس الغريبه اني على قد التعب اللي كنت احس فيه ما قدرت أرقد .. رحت الحمام توضيت وطلعت أصلي وأدعي ان هالساعات تعدي على خير.. طلعت من حجرتي رحت الصاله .. فتحت الباب والدرايش .. قعدت وحطيت راسي على يولي وأنا متسانده على الباب
عويش( تدخل): عنوي
لفيت عليها .. غريبه عويش شو موعنها من الحين
العنود: عويش!!
عويش: شو موعنج من الحين
العنود: ماطاع اييني رقاد .. وانتي
عويش: قمت أحاول أدرس لي كلمتين .. مادرست شي أبداً
العنود: الساعه كم امتحانج؟
عويش: الساعه ثمان
العنود: يلسي درسي هنيه وأنا بروح أسوي جاهي حليب وبرد
عويش: ما بترقدين؟؟
هزيت راسي بالنفي .. وطلعت من الصاله .. رحت المطبخ سويت دلة جاهي دخلت الصاله ما لقيت حد فيها .. طلعت جدام الباب شفت عويش فارشه الحصير وقاعده تدرس .. صبيت لها كوب وصبيت لي كوب وقعدت عدالها وهيه تدرس وأنا كل تفكيري عند حارب ... آآآآآآه ليتني عندك الحين .. ليتني أعرف أخبارك
حمد( يدخل مبتسم): صباح الخير
العنود+عويش: صباح النور
حمد: الغزلان شو موعنهن من وقت
عويش: رمنا نرقد نحن
حمد: عليج امتحان اليوم
عويش: هيه
حمد: وانتي العنيدي
العنود: لا ماعندي امتحان اليوم
عويش: منو تم في المستشفى وياهم أمس ؟؟
حمد: خليفه وبو علي .. سالم حليله كان تعبان ورد يرقد .. بس شفته توني صلى وراح عندهم
عويش: باقي أربع ساعات ..
حمد: الله بيعين .. لا حول ولا قوة الا بالله العلي العظيم
من سمعت عويش تقول باقي أربع ساعات حسيت جنه حد يحسبلي عدد الساعات اللي بتفرق بين موتي أو حياتي .. قعدت وما تكلمت ولا حتى نطقت بكلمه .. الساعه سبع دخلت عويش حجرتها وأنا دخلت حجرتي .. أحاول أهدي عمري فيها.. رن تيلفوني ربعت أشوف منو متصل .. التيلفونات هالوقت ما تبشر بخير ..
العنود: ألو
شمسوه: هلا عنودي
العنود(تصيح): حارب شي ياه؟؟
شمسوه: لا بسم الله .. العنود شوياج عنبوه مستويه دقني وبنقع
العنود: .........
شمسوه: عليج امتحان اليوم؟؟
العنود: لاء.. وانتي؟؟
شمسوه: هيه عليه امتحان الحين الساعه ثمان
العنود: أنا ما بداوم اليوم
شمسوه: سمعي .. تلبسي بنروح الجامعه بنمتحن وعقب مانطلع بنروح مع بعض المستشفى
العنود: والله ياشمسوه فوادي ما يتحمل الصبر .. أبغي أروح المستشفى الحين
شمسوه: الحين أمايه وخالوه بيروحن .. بس أنا قلت تروحين ويانا أحسن
العنود: خلاص الحين بخلص وبيكن
سكرت عن شمسوه تلبست بسرعه .. طلعت شفت عويش في الصاله
عويش: بتداومين؟؟
العنود: لاء .. بس بروح الجامعه بتريا شمسوه وحمدوه يخلصن وبنروح المستشفى
عويش: خلاص عيل أنا امتحاني يخلص تسع .. بروح وياكن .. رحنا الجامعه نحن الأربع .. دخلن حمدوه وشمسوه وعويش يمتحنن وأنا رحت أترياهن في الرسبشن .. قعدت على الكرسي وأنا طول الوقت أدعي ورافعه ريولي على الكرسي وراسي على ريولي .. آآآآآآه يا حارب .. اكتشفت انك انسان غالي وما أقدر أستغني عنه .. مجرد التفكير في اني مابشوفك من عقب اليوم يسبب لي انهيار وعذاب غير طبيعي .. كيف لو صار هالشي صدق ... لالالا .. بسم الله مابيصير الا كل خير .. الله بيشفيه وبيرد مثل أول وأحسن ..
عويش: عنودي ..
العنود: هلا عويش .. شو سويتي
عويش: لا اتخبرين امره
العنود: حمدوه وشميس ما ين
عويش: صبري .. يمكن امتحانهن طويل
شو أصبر يا عويش .. خلاص نفذ صبري .. ماعاد فيني قوة تحمل وصبر ..
شمسوه(توها واصله): يالله قومن بسرعه
العنود: حمدوه وين؟
شمسوه: الحين بتي .. خلنا نطلع
.. طلعنا من الجامعه الساعه تسع وربع .. أول ما وصلنا المستشفى نزلنا من السياره .. نمشى مع بعض بخطوات سريعه ..كل ماتمر دقيقه أحس قسم العنايه أبعد عن الأيام اللي طافت .. خلاص دقايق تفرق عن تحديد المصير في حياة حارب .. اذا مااستقرت حالته بيكون الأمل في حياته ضعيييف واااايد .. دخلنا قسم العنايه .. وقفنا نحن الأربع منصدمات عند الباب .. شيخه وسلامه قاعدات ويصيحن .. محد عندهن .. وين الباقين .. حطيت ايدي على حلجي أمنع الصرخه تطلع مني .. لا ما أتخيل .. لاااااااااااااا حارب.. تغارقن عيوني .. مشينا بسرعه عند شيخه وسلامه
شمسوه( تصرخ): أماااايه شو فيكم
محد يرد .. ارحمونا ردوا علينا .. حد يخبرنا شو صار دخيلكم ..
عويش: عمووووه فدييييتكن .. خالي حارب وين؟؟ شو صار ..
والله أشكالهن ما تبشر بخير .. شي صاير ..
طلع سالم من داخل .. رحت صوبه وأنا ما أشوف الدنيا مضببه جدامي من الدموع ..
عويش: سالم .. شخباره خالي
سالم: الحمدالله استقرت حالته .. الحمدالله
من سمعت كلام سالم ارتخت أعصابي .. خذت نفس طوييييييل ورديت على ورا .. الحمدالله الحمممممممممممدالله .. طلعت من القسم .. مشيت في الممرات هب عارفه وين أروح .. أمشي بدون وجهه محدده .. دخلت الحمام توظيت ورحت المصلى .. دخلت صليت ركعتين شكر .. أشكر فيها ربي انه استجاب دعواتنا .. عقب ماطلعت من المصلى رحت الحديقه اللي في المستشفى .. الورانيه .. قعدت فيها تقريباً نص ساعه .. عقبها اتصلت لي شمسوه .. رديت عليها ..
العنود: ألو
شمسوه: عنودي انتي وين؟
العنود: أنا في الحديقه ورا
شمسوه: وشو وداج هناك ..
العنود: ما أدري .. من طلعت تميت أمشي ومب عارفه وين أسير
شمسوه: عنودي ما تبين تشوفين حارب
العنود: شخباره الحين
شمسوه: الحمدالله .. بيخلونه يومين في العنايه .. وعقب بيطلعونه ..
العنود: اترييني عند باب القسم الحين بيي
سكرت عن شمسوه .. وأول ما وصلت قسم العنايه لقيتها تترياني عند الياب .. قبضتني من ايدي ودخلتني داخل .. ماقدرت أدخل أشوفه .. ما أدري شو اللي منعني من هالشي .. اتصلت حق غرين ورديت البيت .. المهم اني تطمنت عليه .. ومن رديت من المستفى ماطلعت من حجرتي .. الساعه تسع دخلن عليه حمدوه وشمسوه ..
حمدوه: السلام عليكم
العنود( بصوت مبحوح): وعليكم السلام
شمسوه: عنودي .. ليش روحتي ؟؟
العنود: كنت تعبانه وماقدرت أتم أكثر
شمسوه: شوفيج .. امره الحس رايح
العنود: ما أدري
شمسوه(بخبث): ما تدرييين !! .. سمعي حمدوه أونه ما أدري
حمدوه: ليش رحتي والله ماعطتج هالعنز اللي عدالج .. قوات ويه يالسه ويا علي وهو منقعنا كلنا ويالس يسولف وياها
ابتسمت لهن .. .. وكانت ابتسامه باهته ويبين الحزن عليها
العنود: شخباره بو حسن
شمسوه: يسرج حاله
العنود: فديييته .... وحارب شخباره ؟؟
حمدوه: الحمدالله .. احتمال باجر يطلعونه من العنايه .. احتمال هب أكيد ..
تنهدت تنهيده من الخاطر.. الله يشفيك ياحارب
شمسوه: ماشي فديته حق حارب بعد ...
تنهدت .. فديته وفديت قلبه وروحه بعد ..
حمدوه: عنودي شو فيج ؟؟
العنود: مافيني شي
حمدوه: عيل ليش ساكته من الصبح
العنود: ما عندي رمسه أقولها
شمسوه: بتروحين باجر المستشفى ؟؟
العنود: ما أدري
شمسوه: شو ما تدرين .. بوحسن اتخبر عنج اليوم .. وحارب يمكن يقوم باجر ... ان تخبر عنج وعرف انج مب موجوده بيحط في خاطره
.. يحط في خاطره !! ليش؟؟ رفعت راسي صوب شمسوه وطالعتا باستنكار ..
شمسوه: هب ترصيلي عويناتج .. بتروحين غصباً عنج
في خاطري سؤال أريد أسألهن بس مافيني على غلاستهن .. بس أبغي أعرف بمووت .. فكرت أييبه بطريقه غير مباشره ..
العنود: متى رديتن ؟؟
شمسوه: الساعه ثمان .. من ساعه تقريباً
العنود: ومنو تم في المستشفى؟؟
شمسوه: خالي حمد وأبويه
بعدني مب قادره أسألها .. هب عارفه كيف أطلع الرمسه منها ...
العنود: حد ياكم اليوم
شمسوه: عموه موزه وبناتها ... وميثوه وأمها
هذي هيه .. كنت متأكده ان ميثوه بتكون موجوده .. ياااااربي ليش أعلق عمري في خيوط مقطعه .. بالنسبه لأم عبدالله بنت أختها أولى في انها تيوزها ولدها .. ليش تروح بعيد .. نفسي أعرف شو اللي في خاطر حارب عشان أحدد موقفي وأنهي كل شي
...
مارحت المستفى لين يوم الخميس الصبح .. الساعه 11 الصبح .. طلعت ويا سالم .. وفي السياره ما تكلمت بكلمه .. الحين بشوف حارب .. كيف بيكون .. تعبان والا مرتاح ؟؟.. واعي والا راقد ؟؟ .. من كثر الوله اللي فيني ماأقدر أتحمل طول الدرب .. وصلنا المستشفى .. مشيت ويا سالم رايحين صوب الحجره اللي فيها علي وحارب .. حطوهم في حجره وحده بو سالم طلب هالشي .. وهالشي أريحلنا وأريحلهم ... قبل ما ندخل القسم شفت شمسوه عند الباب ..
سالم( بضيج) : انتي شو موقفنج هنيه
شمسوه: أتريا راعي الجرايد ..
سالم: ردي داخل .. أنا بروح أييب لج .. مره ثانيه ماتطلعين اروحج فاهمه
شمسوه: انشالله
دخلنا سالم القسم وراح اييب جريده .. مشينا لين وصلنا عند الباب .. وقفت ماقدرت أدخل.. هب هاين عليه أشوف شكله تعبان .. خذت نفس طوييييل .. مسكتني شمسوه من ايدي
شمسوه: عنودي .. شو فيج !! ليش ترتجفين
العنود: ما أدري
شمسوه: ما بتدخلين؟؟
العنود: لالا بدخل
دخلت عقب خمس دقايق .. ماشالله الحجره زحححمه .. العايله الكريمه كلها هنيه .. حمد وخليفه بوسالم وبوعلي قاعدين وياهم والحرمات في الحجره الثانيه ..
العنود+شمسوه: السلام عليكم
الجميع: وعليكم السلام
العنود: شحالك علي
علي: تو الناس العنيدي .. وين انتي أمس
العنود:كنت تعبانه شوي .. اتصلت لك المغرب ما رديت عليه
علي: رياييل كانوا عندي
لفيت صوب حارب وأنا أحس ان كل اللي في الحجره بيسمعون دقات قلبي .. طاحت عيني في عينه .. يااالله فديته شكله تعبان وايد
العنود: شحالك حارب.. الحمدالله على السلامه
حارب: الحمدالله .. الله يسلمج من الشر ..
ماقدرت أتحمل أتم في الحجره أكثر لفيت على ورا وطلعت ..
شمسوه: عنودي ليش طلعتي
العنود: أستحي أيلس ..ماشالله كلهم فيها
شمسوه: شو تستحين .. صدق ماعندج سالفه
العنود: تعالي انتي ..
دخلنا عند الحرمات .. يلسنا لين صلاة الظهر .. كلهم راحوا بقيت أنا وحمدوه وشميس .. نتريا سالم يرد من عند الدكتور وبنروح وياه ..
علي: عنودي فديت روحج .. عطيني كوب ماي
العنود: انشالله
عطيت علي كوب الماء ورديت يلست مكاني .. كل ما أتحرك أحاول أطرف عيني على حارب بس ما أقدر وهوه من دخلنا ما تكلم .. شكله تعبان وراقد ..
سالم(يدخل): يالله بنات .. خلنا نروح
علي: هاه سالم شو قالك الدكتور
سالم: هذا تأثير المسكن .. يعطونه منوم عشان يرقد ومايحس بالويع
عرفت انهم يقصدون حارب.. يعني هوه الحين راقد ... طلعنا من المستشفى ورديت البيت .. ماتغديت تميت في الحجره ماطلعت منها .. كان خاطري اقعد أكثر عندهم .. بس ما نقدر من طلعوا حارب من العنايه والشباب ماوقفوا زياراتهم .. صرنا مانقدر نروح الا الصبح أو الظهر ..
يوم الجمعه الظهر غقب الغدا .. كنا يالسين في الصاله ..
أم حمد: منو عندهم علي وحارب اليوم
أم عبدالله: عبدالله توه راد عنهم قبل الصلاه .. وبوغنيم أسمعه بيويه صوبه الحين .. جان ماأروح وياه
آمنه: امايه الله يهداج انتي ماترومين على قعدة المستشفى .. روحي لهم من العصر لين المغرب
شمسوه: أنا بروح ويا سالم
شيخه: وين تبين .. قري محلج .. ماشي سيره
شمسوه: والله يسير .. نحن من الله مانقدر نسير الا الصبح والا الظهر .. إذا ما رحت الحين مابيخليني سالم أروح العصر
حمدوه: يالله عنودي روحي تلبسي .. بنروح وياهم ..
طلعنا من الصاله اتصلنا حق سالم .. اللي مااقتنع الا بالزور ومن حمدوه بعد .. رحنا المستشفى .. قبل ما ندخل الحجره فتح سالم الباب بيتأكد إذا محد موجود فيها .. عقب دخلنا ..
سالم: السلام عليكم
حارب: مرحباااا ملاااايييين
شمسوه: غريبه الحربي واعي .. ما أحيدك
حارب: حسيت انكم بتون ..
سالم: ياااااالله .. شو هالاحساس اللي عليك
حارب: شو أسوي قلبي قالي
سالم(بنقمه): شوووو
شمسوه: خلوا عنكم انتوا .. شخباركم اليوم
علي: الحمدالله يسرج الحال
حارب: شميس عليوي يسوي علاج طبيعي
شمسوه: انزين !! شو يعني
حارب: لو تشوفين الدكتوره اللي عند العلاج الطبيعي .. قطعه .. وصغيره بعد
شمسوه: شوووووووو
سالم: هاه آنسه شميس .. عندج مانع
شمسوه( مستحيه): ...............
علي: يجذب عليج .. ماسمعتوه اليوم دخلت علينا وحده من النيرسات أسميه طاح فيها مدح..
مالت عليكم أونكم امرض وطايحين تعبانين ..
حارب: جذااااااااااااااب .. ووالله هب أنا هذا غيث
شمسوه: منو غيث؟؟
حارب(يطالع العنود): خال خالتج
العنود: في ذمتكم
علي: هههههههههه .. دخلت علينا نيرس سودانيه .. وطايح سوالف وتعليقات عليها وهيه تكمل هب فاهمه شي.. والله انه نقعنا من الضحك
حارب: شمسوه اعطيني رموت التلفزيون
علي: ياااالله والله ان يلست المستشفى مرض
حمدوه: وانت بعدك .. وايد مستعيل على هالرمسه
شمسوه: هيه والله .. صدق ان اليلسه في المستشفى مرض .. عنبوه نحن بدال لا نداوم في الجامعه بدينا دوام المستشفى وامترضنا
حارب: وانتن من متى ما داومتن ؟؟
شمسوه: من يوم الاثنين كنا نمتحن ونرد
علي: ليش انشالله .. شو بتفيدكن يلسة المستشفى
حمدوه: وين تبونا نيلس في المحاظره وقلوبنا شابه ظو
شمسوه: عنودي شو سويتي في الامتحان اللي امتحنتيه يوم الاثنين
العنود: ههه .. أمس فتحت البلاك بورد كان منزل الدرجات .. والله لو تشوفين الدرجه ..
سالم: كم؟؟
العنود : سته ونص من خمسه وعشرين
علي: ليش انشالله؟
العنود: الامتحان كان يوم الاثنين
علي: وشو يعني
العنود: يوم الاثنين علي
علي: أوكي ويوم الاثنين .. شو صار
العنود: اللي صار انكم يوم الأحد مسوين الحادث .. وماكانت قلوبنا بذاك القو عشان ندرس ونطبكم مانحاتيكم
سالم: أفااااا .. ما بتكملين في الهندسه بهالدرجات
العنود: لا منوقال .. بنت سيف اللي في راسها بتسويه ...
قعدنا نسولف .. لين عقب صلاة العصر
سالم: يالله صبايا .. على البيت
حمدوه: بعده ما دق الجرس
حارب: وين تبون يلسوا مونسينا
سالم: مونسينك هاه ... ماشي موت... الحين بنروح
حارب:ياسالم شوفه ناظري مايمله ... حدٍ يمل من شوف حور الجنان
سالم: حرووووب تشوف هالكبت اللي عدالك
حارب: هيه أشوفه
سالم: لاتخليني أعفصك وأخشك فيه
حارب: لا يابوك بنسكت خلاص
شمسوه: انتوا شو سالفتكم
حارب+سالم: جب انتي ما يخصج
شمسوه: مالت عليكم .. تتحروني بسكت .. لاحبايبي الي أبغي أعرفه بعرفه
سالم: انزين يالله خلنا نروح البيت ..
ردينا البيت ... وتوني بديت أدرس أمن .. باجر الامتحان الساعه ثمان فليل .. قعدت أدرس في بيت أم عبدالله .. في حجرة شمسوه وحمدوه وماطلعت منها لين اذان العشى .. نزلت تحت كانت أم عبدالله توها راده من المستشفى
أم عبدالله: السلام عليكم
الجميع: وعليكم السلام
حمدوه: هاه يدوه أخبارهم حارب وعلي
أم عبدالله: الحمدالله بخير ونعمه ..
شمسوه: متى بيرخصونهم .. ماقالوالكم
سلامه: بعدهم مطولين .. حارب بعده تعبان
فدييت هالطاري .. ليت التعب في لسانج ياشميس .. هههههه حليلها شو ذنبها والله لو تدري شو قلت بتسفرني ورا الشمس .. رديت البيت وعلى طول رقدت .. عشان أنش باجر الصبح من وقت ..
.....
الساعه سبع ونص كنا في السياره بنروح الجامعه ..
العنود: أنا الساعه 11 بروح المستشفى
شمسوه: وليش انشالله ؟؟
العنود: الساعه 2 الدكتور ما بيحظر والساعه 12 بستأذن من الدكتور ..
حمدوه: وما بتردين تدرسين
العنود: الساعه 4 برد الجامعه بدرس لين الامتحان
حمدوه: نحن عقب ما نخلص بني صوبكم
اتصلت حق محل جناين حفيت وصيته على باقه ...
شمسوه: ياعيني ياعيني
حمدوه: ليش الباقه بعد
العنود: جب ما يخصكن
شمسوه: يالله يا العنود لو تحيدين شكلج يوم كنتي في العنايه
توني تذكرت ان شمسوه كانت ويايه وتذكرت كل اللي صار .. قففففففففطت .. ما عرفت شو أقولهن .. وصلنا الجامعه رحت كلاسي وأنا ميته من القفطه ..
الساعه 11 اتصلت حق سليم طرشته اييب الباقه ويا الجامعه .. ركبت السياره لقيت شيخه وسلامه فيها ..
العنود: السلام عليكم
شيخه: وعليكم السلام
العنود: سايرات المستشفى والا رادات
شيخه: لا بنروح كارفور
العنود: هييه
شيخه: تبين تسيرين المستشفى
العنود: هيه
وصلني المستشفى ونزلن ويايه وسليم شل الباقه لأني ما رمت أشلها .. شليت كتابي ويايه يمكن أقرالي كلمتين .. دخلنا الحجره كانت عموه أم عبدالله موجوده
شيخه+ العنود+ سلامه: السلام عليكم
الجميع: وعليكم السلام
سلامه: علي وين؟؟
أم عبدالله: راح العلاج الطبيعي .. توه ظاهر ما لاقفتنه
سلامه: لا ماشفناه
يلسن شيخه وسلامه ويانا شوي وعقب راحن ..
أم عبدالله: وين خواتج اليوم ؟؟
العنود: في الجامعه
أم عبدالله: جان درستي وياهن
العنود: أنا درست في المحاظره الأولى والثانيه استأذنت من الدكتور
أم عبدالله : بنتي انتي تمي هنه ويا خوج أنا بسير صوب حرمه ولدها مرقد عدالنا
من سمعت هالرمسه بغيت أموووت .. ما أتخيل اني أتم ويا حارب اروحنا .. لفيت صوبه شفته يعابل في تيلفونه ويبتسم ..
أم عبدالله: خواتج بيين الحين .. وأنا ما بطول
العنود: انشالله عموه ..
طلعت عنا عموه ومن طلعت رحت على الزاويه فتحت كتاب الأمن وما قدرت أرفع راسي صوبه
حارب: شو هالباقه الحلوه
العنود: .........( لا جواب)
حارب: ليش ما حظرتي كلاساتج ؟؟
العنود: حظرت كلاس والثاني استأذنت من الدكتور والثالث الدكتور ما بيحظر
حارب: شو تدرسين ؟؟
العنود: عندي امتحان اليوم
حارب: عاد لا تخبصين فيه شرا الامتحان اللي طاف .. راسبه بجداره
العنود: ههههه انتوا خبصتونا
حارب: متى امتحانج ؟؟
العنود: الساعه ثمان فليل
حارب: ما بنرضا بأقل من a
العنود(مبتسمه): انشالله
سكت عني... خف التوتر وابتديت أقرا وأدرس .. لاحظت ان ساكت وما تكلم .. خذت فتره لين اتجرأت أرفع راسي صوبه... رفعت عيني شفته يطالعني ومبتسم
العنود: شو عندك ؟
حارب: لا أبداً .. ماشي
العنود: خلني أدرس
حارب: وأنا ما لهيتج .. بالعكس سكت عنج عشان تدرسين .. قلت لج ما برضى بأقل عن a
العنود: لا تيلس تطالعني .. ما أعرف أتحرك وحد يراقبني
حارب: شو أسوي يعني .. أغمض عيوني
العنود: العب بتيلفونك .. طالع التلفزيون ..
حارب: لا ما أبغي .. وانتي طبي الكتاب الحين يلسي سولفي ويايه ..
العنود: شو تباني أقولك
حارب( بخبث): قوليلي شو سويتي يوم خبروج عن الحادث
العنود: خل هالسوالف عنك الحين .. متى بيطلعونكم؟
حارب: طالع شقايل تغير السالفه.. والله ما أدري متى بيطلعونا انشالله نهاية الاسبوع
العنود: أنا يوعانه .. انت ما يعت ؟
حارب: تصدقين .. يوعان وخاطري في تفاحه بس مستحي أقولج
طالعته باستنكار .. ونقع من الضحك .. وطيت كتابي وقطعت له فواكه.. وأنا كل شوي آكل منهن .. وطيت الصحن على طرف وقعدت آكل بقلاوه وباتشي
حارب: حووو .. اعطيني الصحن .. تاكل ومخلتني بيوعي
العنود: ههههه .. السموحه .. نسيتك
حارب: أفاااا ..
العنود: ههههه لا والله بس أقهرك
عطيته الصحن .. كان يطالعني بنظره ورافع حياته ومبتسم .. نزلت راسي ولفيت عنه
االعنود: لا تطالعني جذيه
حارب: ليش؟
العنود: بس ما أحب هالنظره
حارب: لييش؟
العنود: بس كيفي
يلست تحت أقطع خوخ وآكل .. وما رديت أرمسه ..
الساعه 12 ردت أم عبدالله ومن عقبها وصل علي
علي: أوه أوه العنيدي عندنا
العنود:شخبارك اليوم
علي: يسرج حالي .. وين شميس وحمدوه عنج
العنود: الساعه ثنتين بيين ..
سمعت حد يدق الباب .. رحت فتحته .. لقيت ميثوه وأمها .. غريبه أول مره ايين هالوقت ..
العنود: مرحبا الساع ..
سلمت عليهن ودخلن ..
أم ميثوه: شحالك حارب
حارب: بخير ربي يسلمج .. شحالج خالوه
أم ميثوه: مانشكي باس يا وليدي .. هاه بو حسن علومك
علي: بخير ونعمه . ربي يسلمج
ميثوه: شحالك حارب..
حارب: الحمدالله ... شخبارج ميثا
ميثوه: الحمدالله يسرك حالي .. شخبارك علي
علي: الحمدالله بخير ونعمه .. انتي شحالج
ميثوه: بخير ونعمه
أم عبدالله: تعالي ميثا بنتي قعدي عدال اختج
يت ميثوه يلست عدالي .. وأنا كنت أخطط في الكتاب
ميثوه: عندج امتحان أمن اليوم ؟
العنود: هيه
ميثوه: ليش يايه عيل .. جان يلستي تدرسين
العنود: مخلصتنه .. والحين أراجع ..
ميثوه: ما عندج دوام .. ؟
العنود: حظرت أول كلاس ... وانتي؟؟
ميثوه: عندي بريك لين الساعه خمس
أم ميثوه: حشرتني .. خلينا نسير وخلينا نسير ..ما عندها دوام قلت بخطف عليها وبني صوبكم
أم عبدالله: رحوم فديتها ..
حارب: عنود اعطيني الرموت ..
الرموت كان قريب من ميثوه شلته وعطته حارب.. حسيت بقهر منها .. أففففف شو اللي يابها أصلاً
حارب: العنود .. تعالي شلي صحنج .. يالبخل ماقطعت شي .. تعالي شليه
أم عبدالله: شو عندك؟
العنود: حرام عليك جان الصحن مقطع فيه تفاحتين وخوختين وكمثرى ..ومن كل نوع في هالصينيه
لف علي على الصحن وما حصل شي فيه
أم ميثوه: حشى بتاكلينه .. خليه ياكل
ميثوه: أقطع لك فواكه حارب؟؟
علي: عنبوه .. بطنك بينطر .. جان كل هالفواكه في الصحن وبعدك تقول ما قطعت شي .. العنود هاتي الصينيه بكبرها
حارب: هههه ... تعالي شلي صحنج
ميثوه: أنا بقطع لك الحين
حارب: لالا ما أبغي بس أغلس عليها .. والا أنا ما أروم أتنفس من كثر ما كلت .. اللي في الصحن كله كلته
قمت رحت صوبه .. خذت الصحن خزيته بنظره ولفيت عنه
حارب: ههههههههه
علي: شعندك تضحك
حارب: ماشي ماشي
قعدت أدرس شوي وأنا أشوف علي وحارب يطالعون التلفزيون ومعلين على الصوت
العنود: قصروا
حارب: لا ما أبغي
العنود: شو ما تبغي ... الصوت وايد عالي .. قصر
طالعني بنفس النظره.. سباااال مع اني قلت له ما أداني هالنظره .. لفيت عنه وما سويت له سالفه
أم عبدالله: قصروا عليه .. فضحتونا انتوا في المستشفى
علي: يدوه ما أسمع
أم عبدالله: قصروا .. خلوا ختكم تدرس
قبض حارب الرموت وطول أكثر على التلفزيون
أم عبدالله: حارب .. أقولك ختك تدرس وانت تطول عليه
أم ميثوه: لو يلست تدرس في البيت أبرك لها
العنود: لا عادي .. أصلاً أنا مخلصه ..
علي: عنودي فديت روحج روحي اشتري لنا جرايد ..
وقفت بروح
حارب: شووو ... تباها تروح اروحها!!
علي: وشو فيها؟؟
حارب: شو شو فيها .. انت تخبلت بتطرش بنت اروحها عنودي ماشي سيره
العنود: عادي مابييني شي
حارب: لا ماشي سيره قعدي درسي .. ما بيضوي شي من الجرايد
العنود: وين أدرس وانت صوت التلفزيون مخلنه شال البقعه
حارب: الحين بقصر قعدي
شمسوه( تدخل): شو عندكم .. قصروا عليه
علي: مرحبا الساع
حارب: جب انته .. وانتي ما تعرفين تسلمين
حمدوه: السلام عليكم
الجميع: وعليكم السلام
العنود: الحين أنا وشميس وبنروح
حارب: لا ماشي سيره أقولكن قعدن
شمسوه: وين؟
العنود: علي يبغي جرايد
حمدوه: جان اتصلتي ونحن بنييب
العنود: نسيت مايا على بالي
شمسوه( بهمس): وين بيي على بالج ..
العنود(بهمس): شميس دخيلج .. قوليله أبغي أطلع
راحت شمسوه عنده وتكلمه بس ما نسمع شو يدور بينهم
علي: شو تقولون
حارب: انت ما يخصك
شمسوه: يالله عنودي بنروح
علي: لا تعالي لا تروحين .. خلاص ما أريد جرايد ..
حارب: هب على كيفك خلهن يروحن
علي: خلاص ياخي ما أبغيهن
حارب: أنا أبغيهن
طلعت وياشمسوه .. رحنا عند راعي الجرايد اللي في المستشفى .. خذنا جرايد ومجلات من كل نوع وردينا ..
شمسوه: ليش كنتي تبين تطلعين
العنود: بس مليت من اليلسه داخل
شمسوه: جذووووووب .. تملين من اليلسه وحارب يالس .. قصي على غيري..
العنود: اييه شميس سكتي .. لا تخليني أندم اني قلت لج
شمسوه: لا تنسين انج ما قلتي لي أنا سمعتج في لحظة صدمه وانهيار
تنهدت .. وما رديت عليها من أذكر شكل حارب قلبي ينقبض ..
شمسوه: ليش كنتي تبين تطلعين
العنود: بصراحه منقهره من ميثوه .. شو يايبنها
شمسوه: عليك أغار من لمس الهبايب
العنود: جب ..
شمسوه: هههههههه خيبه شقايل متفتفه
دخلنا الحجره لقينا النيرس توها طالعه معصبه
العنود: شو ياها
حمدوه: يت تهازب عشان الصوت عالي
العنود: هههههههههههههههههه .. تستاهلون
حمدوه: صدق قفطه
العنود: يوم قلتلكم قصروا بدرس.. ما طعتوا
حارب: خلاص تعالي درسي
سالم: وين كنتن؟؟
شمسوه: نشتري جرايد ومجلات
سالم: كم مره قلت لج لا تروحي اروحج
حارب: تراه العنود وياها
سالم(يغني وهو منزل راسه ويلعب بالتيلفون): .. شرفت قلبي بالحظور,, وانت على بالي تدور,, شعورما بعده شعور,, واحساس ما مثله مثيل ,,
حارب( يتنهد): هيه والله
سالم: جب انت .. في كل شي رزه
حارب: مالت عليك
علي: شو عندكم .. وانت شو ياك مستطرب جنه داقنك الهوى
سالم: داقني أنا والا عمك
علي: هااااااااه الحربي شو ياك
حارب: أمايه .. عيالج خليهم يسكتون والا بكسر له ريله الثانيه والثاني بسدحه عدالنا .. بتلقينا ثلاثه بدال اثنينه
أم عبدالله: بسم الله عليه .. شو ياكم
سالم: ههههههه ماشي يدوه ..
عطيتهم الجرايد والمجلات وقعدنا أنا وحمدوه وشميس ندرس أمن لين الساعه أربع .. ميثوه يالسه تسولف ويا حارب .. سالم رد البيت وعلي لاهي بالجرايد ..
العنود(بضيج): قومن بنروح الجامعه
حمدوه: بسم الله شو ياج
العنود: ماشي بس بنروح ندرس في الجامعه
حارب: بعده امتحانكن الساعه ثمان
شمسوه: بنروح ندرس هناك أبرك .. هنيه ما قدرنا نركز
علي: أفااا .. خلاص بنسكت محد بيرمس.. وانت حروووب لم ثمك ماخليتهن يدرسن
لف حارب صوبنا
حارب: صدق
حمدوه: لالا .. بس نحن متفقات من قبل انا نرد الجامعه الساعه أربع ..
مشينا بنطلع من الحجره
شمسوه: ميثوه ما تبين تروحين الجامعه ويانا
ميثوه: لالا بروح عقب .. بعده باقي ساعه عن كلاسي
شمسوه: برايج
حارب: هااه . لا تقولن ماقلتلكن .. ما أرضى بأقل عن a
شمسوه: متى قلت!؟
سحبتها من ايديها وطلعنا من الحجره ..
شمسوه: حشى فدعتي ايديه .. ليش يرييتيني
العنود: بس ..
شمسوه: لا والله عصبي من حرووب .. وعقب كسري ايدي وقولي بس
حمدوه: وليش معصبه من حارب
العنود( بضيج): خلاص سكرن السالفه
حمدوه: عنودي شو ياج اتفين
شمسوه: عمج داق سالفه ويا ميثوه ما تبينها تعصب
حمدوه: ههههه مايسوى عليج
العنود: هيييه .. الحين مايسوى عليج نسيتي عمرج
شمسوه: ركبن انتن فضحتنا تضاربن جدام العالم
ركبنا السياره ورحنا الجامعه .. رحنا المدرجات وكل وحده منا كانت في كلاس ندرس .. درست بضمير ومركزه أكثر عن قبل .. انشالله أقدر أييب a
الساعه سبع ونص كنت يوعانه .. رحت عند شمسوه ورحنا صوب حمدوه
العنود: اييه .. أنا يوعانه
شمسوه: خلنا نروح الكوفي
رحنا الكوفي خذنا لنا عشى ورحنا صوب النافوره .. قعدنا ناكل وعقب دخلنا الامتحان .. الحمدالله الامتحان كان سهل .. بس فيه سؤالين مب متأكده منهن .. وأبغي أتأكد مصره ما أطلع الا لين ما أسأل الدكتور بس شكلهم بيطلعون عنا .. وكل ما أزقره ما يعطيني التأكيد .. بس منو قال أخليه .. ما خليته يطلع لين ما خبرني بالاجابات .. طلعت من الصاله الرياضيه كانت حمدوه تتريانا
حمدوه: شو سويتي؟
العنود: انشالله درجه كامله
حمدوه: عنبوه .. هب منج من اللي يخلص المذكره ثلاث أربع مرات
العنود: بسم الله من عينج
حمدوه: شميس وين؟
العنود: بعدها داخل
طلعت شمسوه عقبي بعشر دقايق ..
رحنا الرسبشن شفنا ميثوه ... ويت صوبنا
شمسوه: بعدج ما رحتي
ميثوه: أتريا سميه بنت عمي .. تمتحن وياكن
حمدوه: متى طلعتي من المستشفى؟
ميثوه: الساعه خمس الا ربع .. وما كنت أبغي أطلع .. دقيناها سوالف أنا وحارب
مسكت كتابي بقوووو أفج غيضي فيه ..
حمدوه: محد يا عقب ما طلعنا؟؟
ميثوه: أمج وخالتج وآمنه
شمسوه( تطلع التيلفون): هذا حارب يتصل ..
شمسوه: ألو
حارب: السلام عليكم
شمسوه: مرحبا الساع
حارب: هاه .. امتحنتن؟؟
شمسوه: هيه.. تونا طلعنا
حارب: شو سويتن؟
شمسوه: منو بالتحديد؟
حارب: منو يعني؟
شمسوه: لا ما عليك دحيحه .. انشالله a
حارب: خلاص عيل .. برايج .. سلمي
شمسوه: يبلغ انشالله
ميثوه: سلمي عليه
شمسوه: تسلم عليك ميثوه
حارب: الله يسلمها .. العنود ما طرشت سلام
شمسوه: ههه لاء
حارب: مالت عليج
شمسوه: وأنا شو يخصني
حارب: جلبي ويهج
حمدوه: يالله بنروح .. سمحيلنا ميثوه
ميثوه: مسموحات
طلعنا من الرسبشن .. وطول الوقت كنت ساكته في السياره
شمسوه: عنودي يسلم عليج حارب
لفيت صوبها ..
شمسوه: متصل يتخبر شو سويتن في الامتحان
حمدوه: من متى حارب يتصل يتخبر عن امتحاناتنا
شمسوه: مالت عليج .. متصل عشان سواد عيونج؟؟ متصل يسأل عن العنود شو سوت
العنود: لا والله ... على كيفج ؟؟!
شمسوه: لا هب على كيفي .. هو اتصل تخبرني عنج .. وقالي سلمي عليها
العنود: الله يسلمه
شمسوه: تعرفين شو قالي يوم قلت له ميثوه تسلم عليك
العنود: شووو ؟؟
شمسوه: الله يسلمها .. العنود ما طرشت سلام
حمدوه: مالت عليج .. طرشي له سلام
العنود: ما أريد
نزلت من السياره ودخلت الصاله مالقيت حد غير عويش
العنود: السلام عليكم
ما ردت عليه وباين عليها انها معصبه
وقفت عدالها
العنود: عويش شو فيج ؟؟
بدن عيونها يتغارقن .. رفعت راسها صوبي
عويش: خير شو عندج .. شو تبين؟
العنود: شو فيج؟
عويش: ماشي
طلعت من الصاله وهيه تربع لحقتها وركبت فوق .. دخلت حجرتها ودخلت وراها
العنود: عويش شو فيج؟؟
عويش: وانتي شو يخصج .. طلعي عني
العنود: شو أطلع .. ما بخليج وانتي بهالحال
عويش: خليني ما أريد أشوفج خلاص عفتج
عفتيني وأنا شو سويت؟؟؟ شو فيها .. أكيد شي صاير والا ما بتقول هالكلام
العنود: انزين قوليلي شو صار .. أنا شو سويت
عويش: ماشي .. قلت لج طلعي عني
طلعت عنها وأنا مستغربه من اللي صار .. شو فيها عويش .. أول ما وصلت عند الدري تحت شفت حمد ..
حمد: هلا والله
العنود: هلا حمد
حمد: توج يايه
العنود: هيه توني واصله
حمد: شو سويتي في امتحانج
العنود: الحمدالله
حمد: تعالي أباج في رمسه
العنود: شووو ؟؟!
حمد: تعالي انتي
....

مش جنه بسكم ^_^

مشكورة ريماني
وانا وحدة من الي ما اشتغل عندهم السيرف نتريا
البارت الياي

مشكوووووووووووووره الغاليه على البارتات
اللي روعه شويه عليهن
يلا نتريا البارت الياي
لا تبطين