منتدى استراحات زايد - رواية "خلك على صدك ترا خاطري طاب نفسي عزيزه والعرب خابريني"

*البارت السابع*

يارب على بعده تقويني يطيب الجرح ولا اشكي الالم منه ~

بعد ثلاث ايام في غرفة بو زايد

ام زايد وهي معصبه: ليش بلاه ولدي عشان يرفضونه هو من البداية قال ما يبا بنتهم بس انت الي لزمت عليه وجوف الحين النتيجة

بو زايد: خلاص يا ام زايد لا تعصبيني الناس رفضو قالو بنتهم استخارت وما ارتحات نجبرها على الزواج ولا شو

ام زايد: لو سمعنا كلام الولد وايد زين

بو زايد: شصاير ام زايد تخبلتي ولا شو انا قلت خلاص سكي الموضوع الزواج قسمه ونصيب

ام زايد: لا ما بسك الموضوع لانه كل الي صار ما كان لازم يصير من البدايه

بو زايد: لا حول ولا قوة الا بالله بتسكتين يا مرا ولا اطلع عنج

ام زايد: لا تطلع انا الي بطلع

طلعت ام زايد وجافت عيالها كلهم متيمعين سلمت وقعدت

زايد: بلاج امي ليش معصبه

ام زايد: مافيني شي ولا تكلموني سكتو عني مب ناقصه حد

حمدان: ول شكلها الزعله جايده هالمرا

ام زايد: بلاك انت تولول شرا الحريم

فهد وهو كاتم ضحكته: سكتو عنها لا احين تفجر فيكم

ام زايد هدت: فهد حبيبي بلاك

كلهم استغربو هدوء امهم لما فهد تكلم

فهد: مافيني شي الغالية انتي شفيج شي يعورج

ام زايد: لا مافيني شي بس ابوك معصبني شوي

دخل بو زايد: انتي الا طلعتيلي قرون امكم كبرت وصارت حشرة اكثر

ام زايد: احين تقول هالكلام يعني مايحقلي اعصب ولا حرام انت بس ما تفهمني

بو زايد: استغفرالله تراني بموت من حنت امكم

فهد: امي هدي بلاج جي معصبه مب زين حق صحتج

بو زايد: اسمعو يا عيال

كلهم سكتو ويطالعون صوب ابوهم

بو زايد: اليوم اتصلت في امكم ام سعود

فهد: انزين وشو ردو

ام زايد وهي معصبة: الي ما يستحون على ويهم رفضو ولدي مادري شو الشي الي بنتهم ملاقتنه فيها وما حصلته عند ولدي

فهد طار من الوناسه: انزين امي ليش زعلانة

ام زايد: لا ولله تباني استانس من قهري ليش ترفضك تتحسب بتحصل واحد مثلك

فهد قام وباس راس امه وقعد جدامها ع الطاولة: حبيبتي امي انتي قلتيها ما بتحصل حد مثلي خلاص فكي عمرج منها

بو زايد: ولدج راضي انتي ليش زعلانة

فهد: خلاص سكو ها الموضوع انزين امي اخطبيلي خولة

بو زايد بعصبية: وانت كل شي خولة وخولة فكنا منها ومن طاريها خولة مابتاخذها ام زايد باجر تروحين تخطبيله اي بنت زينة

فهد: لا ولله انتو تبيعوني ولا شسالفة قلتو ميثا وبروحها رفضت جنها كانت حاسه اني بعيشها ف تعاسة واحين تبوني اظلم شخص ثاني خلاص انا حر واسوي الي ابيه

بو زايد: لا ماتسوي الي تبيه تسوي الي نحن نبيه وخولة ما تتزوجها

فهد: انزين ليش

بو زايد: بس بسالك انت تعرف اهلها تعرف وين عايشة تعرف اي شي عن اهلها وعمرها

فهد: طبعا اعرف هي يتيمة امها وابوها ميتين وماعندها خوان وتعيش ف شقة

بو زايد: ههههه انزين بس ابيك تتاكد من معلوماتك ولو طلعت صح صدقني لازوجك اياها

فهد بشك: ليش انت شو تعرف ابويه

بو زايد: اعرف عكس ها كله اعرف انها لقيطه وانها من بيت لين بيت عشان تعيش

فهد: لا مستحيل ابويه جذب الي قالولك اياه

بو زايد: عندك لين باجر تتاكد وترد لي خبر

ام زايد: فهد اسمع كلام ابوك خلاص انا وانت مقتنعين بالكلام الي قاله ابوك وانت تعرف انه الكلام الي انقال صح

فهد: سوو الي تبونه انا طالع

ام زايد: ع وين

فهد: بروح اتمشى شوي

شيخة: بنروح وياك

ساره: امي روني بروه

فهد شلها وباسها: ي روح عمي انتي يلا روحو لبسو بترياكم ف السيارة بس بسرعا

حمد: امي حمد باد بروه "عمي حمد بعد بيروح"

فهد: اوكي عمي روح البس نعالاتك وتعال وعلى صوته خمس دقايق لو ماجفتكم ف السيارة بروح

طلع راح فتح سيارته وقعد يترياهم شووي وكلهم يوو

ريم: وين بنروح

فهد: انتو وين تبون تروحون

شيخة: المول

فهد: لا مافيني اروح المول

ريم: الجو حلو خل نروح ستي ووك

فهد: ها شواخي بتروحين

شيخة: اوكي عادي بروح

فهد: ناخذ شيما ويانا

ريم: هي خل ناخذ دانة وشيما

فهد: وميثا

شيخة: لو بتاخذونها انا مابروح

فهد: ليش

شيخة: بس ما اطيقها

فهد: ع فكرة انا الي قلتلها ترفض

شيخة وريم: شوووو

فهد: هي انا ماكنت اباها وهي عرفت وقالت انها بتساعدني

ريم: كيف عرفت

فهد: ماعرف المهم يعني لا تحطون الوم عليها وعاملوها اوكي حتى لو هي اختي وانتو اكثر شي كنتو وياها لا تخلون شي مثل ها يخرب علاقتكم فيها

ريم: اوكي انا بكلم دانة لو بتيي

فهد: وانتي شيخوه كلمي ميثا

شيخة: انا مايخصني انت كلمها

فهد: اوكي

فهد اتصل على ميثا

فهد: هلا ميثوه

ميثا: اهلين فهود شحالك

فهد: تمام وانتي

ميثا: انا بخير امر فهد صاير شي

فهد: لا كل شي تمام بس بطلع انا وخواتي بتين ويانا

ميثا: سوري فهد بس انا مشغولة شوي مرا ثانية انشالله واستانسو

فهد: يلا عاد عازمنج وتقولين مرا ثانية يوم بترجعين كملي شغلج يلا البسي انا احين ياي صوب بيتكم

ميثا: بس فهد

فهد قاطعها: لابس ولا شياته يلا باي اترياج

ميثا: اوكي باي

بعد ما سكر عنها

شيخة: اففف فهد مب غصب تيي ويانا

فهد: شيخة خلاص انا كلمتها ريم كلمتي دانة

ريم: هي تقول بتكلم ميثا تلبسها لانها هي مب ف دبي

فهد: اوكي

*******

قاعدة ف غرفتها تفكر كيف احين لما تجوفهم تعاملهم ولا جنه شي صاير ولا شتسوي: الله يسامحك فهد حطيتني ف موقف صعب

شيما: يلا اموه بروه

ميثا: يلا حبيبي

نزلو تحت وجافو فهد عند الباب: السلام عليكم

كلهم: وعليكم السلام

فهد: ها شيمو مافي بوسه حق خالي

شيما راحت عنده وباسته

حمد: امي ابي اسوق وياك

فهد: هههه انزين تعال

شيخة: فهد لا تستهبل شو تخليه يسوق

ريم: شحالج ميثا

ميثا: بخير بنت عمي انتي شحالج

ريم: بخير

ميثا: شحالج شيخة

شيخة: بخير بخير

فهد: حمود وين بتودينا

حمد: بروه بهر

فهد: انزين يلا ودنا البهر يالهندي

شيخة: هي فهد خل نروح البحر

فهد: اوكي بس ريوما ما تبين تروحين ستي ووك

ريم: خلاص خل نروح البحر بس خل ناخذ جباتي وكرك

فهد: اوكي

*************

قاعدة ف غرفتها الي تتشاركها ويا اختها

وفاتحة اللاب والفلم يشتغل بروحه وهي بالها بعييييد

: سهام شفيج

: ........

راحت وقعد حذالها ع الكرسي: سهام هللو وينج

سهام: هلا شما شفيج

شما: انتي الي شفيج وين وصلتي

سهام: شما انتي متاكدة انج مسامحتني

شما: وليش ما اسامح[ وانتي ماضريتيني بشيونحن الحين عايشين حياة حلوه

سهام: بس هاذاك اليوم وايد تماديت وياج ف الرمسه

شما: وانا نسيت هاذاك اليوم مهما يكون انتي اختي والغلط مب منج من ابوي

سهام حضنتها: ولله شما انا احبج وفرحانه لانه طلع عندي اخت

شما: ههههه سهام قومي عني يالمنحرفة

سهام: ههههه انزين شموه

شما وهي رايحه صوب المنظرا: همممم

سهام: كنتي قاعدة عند امي

شما: هي

سهام: ابي اروح وياج لما تسافرين مابي اقعد هني ومابي اسافر بروحي

شما: بس انا مابرجع عند امي

سهام: تكرهينهم

شما: منو

سهام: الي خلفونا ونسونا

شما: بلاج سهام انسي انسي الحين ماعدتي وحيدة انا عندج

سهام: انزين خل نطلع

شما: اوكي يلا قومي لبسي

********

: فهد عمي سيف بيي ويانا

فهد: ماكلمني عيل

ريم: ما اعرف بس توا هو قالي

فهد: اوكي قلتيله انه بنروح البحر

ريم: هيي

فهد: انزين يلا ولا مابتنزلون

شيخة: طبعا بننزل ياين عشان نقعد ف السيارة

فهد: بسم الله كلتيني سوال ترا

ريم: يلا ميثا خل ننزل

ميثا بابتسامه تعرف بنت عمها شقد طيبة: يلا حبيبتي

***************

دخل عليهم الغرفة بدفاشة: شتسوون

: حميدوه اطلع برع خل نلبس بنطلع

حميد: سهاموه انتي منو كلمج

سهام: افف حميد لا تسوي فلم احين

حميد: انزين من منو استاذنتو

سهام: استاذنا !!!! ومن متى انشالله نحن نستاذن

حميد: من اليوم وساير

شما: حميد حبيبي بنطلع عادي

سهام: هي شما عادي حبيبتي روحي

شما: ههههه سهام شو ها

سهام: اجوفج صدقتي وتستاذنين حميد حبيبي نحن نعرف انك الريال بس لو سمحت مب على الطلعات

حميد: عموما روحو وين ماتبون وانا مسافر اليوم انشالله لو محتاجين شي كلموني قبل ما اروح

سهام: وين بتروح حميد ما صدقنا نتيمع كلنا مع بعض واحين تسافر بعد

حميد: بروح عندي شغل اسبوعين وراجع

شما: تروح وترد بلسلامة مانبي الا سلامتك وجوفتك

حميد: الله يسلمج يلا انا بروح اجهز اغراضي مابطول عليكم

***************

في بيت بو زايد

ام زايد قاعدة ويا ربيعتها ام مروان

ام زايد: حي الله ام مروان

ام مروان: الله يحييج يا ام زايد

ام زايد: من زمان ما قعدنا هالقعدة الحلوة

ام مروان: هي ولله يختي الاشغال لهتنا عن بعض

ام زايد: مشالله كبرت اسما ما عادت البنت الصغيرة

ام مروان: سنة الحياة يكبرون ويكبرونا وياهم

ام زايد: لو كنت اعرف انج بتيبين البنات جان خليت بناتي يقعدون ف البيت

ام مروان: خليهم يستانسون

اسما: لا عادي خالوه نحن بنقعد وياكم

ام زايد: فديتج ولله ام مروان بقولج كلمة راس بعدين ذكريني

****************

كانو يتمشون صوب البحر وكل واحد ساكت ويفكر

فهد "ماكنت ابي ابوي يعرف عنج ياخولة كنت ابي اطلعج من الي انتي فيه انا اسف خولة وهمتج بحبي بس ها الي كان المفروض يصير"

ميثا "يريت لو ما فرطت فيه يريت لو وافقت وقلتله اهلي جبروني يريته يحس بس مايفكر الا ف عمره خلاص عشان انا احبه بدور سعادته حتى لو ويا غيري"

ريم "احب ابوي بس وايد يقسى على اخواني واكثر واحد فهد الله يهديه ويهدي اخواني ميثا وايد تغيرت لازم انا ارجع علاقتي ب ميثا مثل قبل محد يفهمني الا هي هي اختي بس ماعرف ليش سويت جي وسمعت كلام خواتي"

سيف "ااااااه مشتاقلها ماعرف شصار عليها اختفت ابي اجوفها اشتقتلها كله منهم محد يعرف شقاعد يصير فيني تعبت من كل شي هه وبنات اخواني طالعيلي بسالفة يديده الزواج جنه انا ناقص هموم ومشاكل الله يعين بس"

شيخة " كل حد يتحسب اني قاسيه ما يعرفون انه الزمن يبي جي انا مابي اتعلق ف حد عشان ما اخسره بس كلهم يتحسبون الشي قسا خلهم اهم شي انا وبشو افكر ماعلي من حد"

فهد وهو مشتت نظرة: بلاكم ساكتين

سيف بهمس: ولاشي

رفع عيونه وجاف شي ماكان يتوقعه قال بصدمه: فهد

فهد رفع عينه عشان يجوف عمه وانصدم مثله: كييف جي

شيخة: شو تعرفونهم !!

ريم: هاي شما الي ف كلاسنا

ميثا: هي تعالو نسلم عليها

شيخة بصوت عالي: شما

رفعت راسها هي واختها يجوف مصدر الصوت انصدمت شماا من الي قاعدة تجوفة

سهام: شما تعرفينهم

شما:.......

استغربت سهام من شما تكلمها وماترد لفت على اختها وانصدمت لما جافتها تصيح: شما ماماتي شفيج شما ردي علي شما شصاير

مالقت نفسها الا وهي متصله على حميد

حميد: مسرع ما اشتقتيلي

سهام: حميد تعال بسرعا ماعرف شما بلاها

حميد: شفيكم انتو وين

سهام: ف البحر الي ف ****

حميد: اوكي احين ياي صبرو شوي

**************

فهد هدهم كلهم وراح صوب شما ولحقوه خواته: شما نورة وين

شما: .....

سهام: انت منو وشو تبون منا

فهد: شما بروح بس الله يخليج قوليلي نورة وين بس ابي اعرف مكانها شما تكلمي

وقفت شما: يلا سهام بنروح

فهد: شما لا تعذبيني الله يخليج قوليلي نورة وين

شما: ماعرف ماعرف فهد روح عني الله يخليك

سيف: شماا

شما لفت ويها عنه

سيف: شما انا اسف اعتذرلج جدامهم كلهم

شما: الي سويته فيني مب شوي

فهد: شما نورة وين لا تسكتين انتي اكثر وحدة تعرفين الموضوع تكلمي

: خير شتبون

فهد: خير انت الي شتبي

سهام: حميد خلهم يروحون عنا الله يخليك

فهد: شما قوليلي نورة وين وروحي بعدين

حميد: هي هي انت منو

فهد: انا كلامي ويا شما لاتدخلون

حميد: وشما وراها ريايل تعال كلمهم مب تروحلها

فهد: سيف رجع خواتي البيت وتعال انا بتكلم وياهم وتعال

سيف: يلا بنات

شيخة: انا مابتحرك لين ما اعرف شو المهزلة الي صايرة

فهد: شيخة روحي مب ناقصنج انا

ريم سحبت شيخة: فهد نترياك ف البيت

**************

نهاية البارت