|
بيدي دفتــري بصفحاته البيضاء المعهودة.... قد تبدو صفحاته { فارغة} للجميــــع ... ولكنني أرى // بوضوح // ×× خفاياهم مسطــّرة بها... جلست في مكاني المعتاد...عند هذا { البــاب} .... فتحت صفحـــة جديــــدة من دفتري...وبدأت أخــط مـــا أرى... هــــا هــــي ملامحهم بدأت تظهر لي شيئاًً فشيئاًً........ لـــــــي ولكــــــــــم لخفــــايا قلــوبهُم { بيــــبان } دقـيتهــا البــارحة و // طلـــّيت ×× ××××××××××××××××××××××××××××××××××××××× الجـــــــــزء الســــــــابع ][- الســــاعة 11 …..جــــــــامعة الامارات سمـــــــوي وليلوه توهن ظاهرات من الكلاس…سموي البارحة دقت ع ليلوه وتمت تتأسف منها..تمت اتييب اعذار من كل صوب واتحاول اتغطي ع تصرفها يوم كانن في الحمام …قالتلها ان ياها اتصال مهم خلاها اتفر الاغراض وتظهر والسالفه فيها وفات حد من الهل…ليلوه ما اهتمت …كان اهم شي عندها ان سموي ما درت انها اترمس خلفان …وفي نفس الوقت كان هدف سموي ان ليلوه مـــا تعرف انها تدري بإن رقم خلفان عند ليلوه ويرمسون بعض….ليلوه مشت السالفه مب لغلاة سموي ..بس لنها كانت حاسه بالملل في هالفترة لي مضت …و محد غير سموي ايصافيها وايونسها … توهن ظاهرات من الكلاس و يمشن في المبنــى 80 ….متوجهات صوب كافيتيريا الرباعية….وهن يتمشن سموي يالسه تتخبر ليلوه عن حارب ..وليلوه تقول سوالف من عندها ع اساس انه مب مقصر وياها ويعشقها موت..وهو صح ان حارب ايحبها لكنها اتييب سوالف ما استون ….. .وفي نص السوالف وهن يتمشن ليلوه لمحت بنيه يالسه ويا ربيعتها ع طاولة صوب مطاعم مبنى 80 …. ليلوه :أقولج سموي…. سموي : هلا ليلوه وهي اتيود ايدين سموي : تعالي تعالي بنيلس هنيه ….( ويلسن على طاوله اتجابل طاولة بنتين ….."ريــــــم و رواضـــي " …….سموي من حطت شنطتها ع الكرسي انتبهت ع ريمان انها يالسه ع طاوله مجابلتنهن....وبرد فوادها لنها درت ان ليلوه تغار من ريم…وان ليلى في قرارة نفسها اتعرف ان هالمشاعر الكبيره لي في قلب حارب مب لها ….لريــــــم…. في نص سوالف سموي لي حست ان ليلوه مب وياها…. قاطعتها ليلى … سموي : اقولج وجان اضحك عليها يوم …. ليلى : منــــوه احلى ؟؟؟ سموي استغربت : اشو ؟؟ ليلى : منوه احلى انا والا هالبنيه ؟؟ سموي فهمت و حبت تستهبل : اي بنيه تطرين ؟؟؟ ليلوه : هاي لي مجابلتنا …ام روج وردي؟؟؟ سموي بنذاله : هيــــــــــه ما عرفتيها ..هاي نفسها راعية الصور… ليلوه تأففت : انزين منوه احلى خلنا من صورها .. سموي مستانسه : انتي انتي احلى هذي كلها مكياج …( وفي الواقع ريمان لو بتحط مكياج ايكون مكياجها خفيـــف …والصدق ان جمال ريمان بسيط وايد…وليلى تقدر انها اتكون احلى عنها ..بس هي تخرب ع عمرها بمكياجها الثجيل وعدولها المبالغ بشكل ينفر العين عنها ..هذا غير طبعها الشين لي ايشينها في عيون الناس) …. سموي طرى ع بالها انها تبدا تنفيذ خطوتها الاولى من خطتها …. سمــــــوي : أقول فديتج ليلوه …( صدت ليلى صوبها )….انا اليوم بظهر بشوف خلفان …شرايج تظهرين ويانا …بنستانس لو تبين بنيلس رباعه ؟؟؟ ليلـــى وهي تقلب الفكره في راسها وجنها عايبتنها : اممممممم زين والله اروحي ملانه….عيل بيي وبخلي رشود ايي بعد … سموي : وليش ما اتيبين حارب …( صدت ليلوه صوبها …وفي هاللحظة نشن ريمان و رويض بيروحن كلاسهن) … …. ليلــوه وهي نظرتها سارحه بعيــــــد وبصوت خفيف لي يسمعه ايقول انها اترمس عمرها : اتصدقيـــن …كنت اقدر اشوفه ….كان ممكن انه ايكون لي وبس….لكن الظاهر اني خربت ععمري…ما كان له داعي ارويه صور البنيه …الله ياخذها …كل ما يتغزل في عيونها والا ابتسامتها انقهر …. سموي سكتت عنها ….واستانست ان ليلوه بتي وبتييب وياها رشود ع قولتها …لأن في الأساس سموي ما تبغي حارب ايكون موجود ويا ليلوه..هي يهمها انه يحظر فنص اليلسه وعلى غفله من ليلى….غيرت السالفه وتمت اتسولف ويا ليلوه واتحاول قد ما تقدر ان ليلوه ما تغير رايها …كله ولا انه الخطه تخترب عليها……. ++++++++++++++++++++++++++++++++++++++++++++ الســــــــــــاعة 2 الظهــــر….بيت العم خــــــالد ( بو سالم )… خولـــــه بنت عم ريمان منسدحه ع شبريتها ….في غرفتها واروحها ….واتفكر …تسترجع ذكرى عمرها اكثر عن 4 سنيــن….ذكرى كل ما تذكرها تضحك من الفضيحه لي خلت عمرها فيها ….وفي نفس الوقت رغم الالم لي حست به يومها هي مستانسه …ان الانسان لي انقذها من وفاتها ذاك اليوم هو نفسه …" نــــــاصر " ولد عمها و خو ريمان …..سرحت خوله بأفكارها ….وابتسمت عــــــــودة للمــــــــاضي ….. من 4 سنين و زود …….ريمان و بنت عمها ووياهن ام سالم وام ناصر ….يتمشن في حارة قوم ريمان …كانت بداية الشتا ….عقب صلاة العشا ….اتمشن الحريم … وعذيح الايام كان بيت قوم خوله جريب من بيت الريم. ….. خولة : اقولج ريمان ….. ريمان : هلا … خولة : شرايج نظهر بالدراجات ؟؟ ريمان فجت عيونها ع وسعهن : ويــــن تبين بيذبحونا …. خولة : الا هنيه ورا البيت … ريمان : لا مستحيل والله نصور بيعصب وعادي بويه يغسل ظهورنا بعقاله… خولة : حرام ريمان ….انزين يوم انتي ما تبين برايج ..والا انا صراحه خاطريه العب بالدراجه …. ريمان : خوله تعرفينه عمج على طول بيخبر بوج ..وبعدين امج توها حادره الصاله ..وكلهم ايعرفون ان محد في البيت ..…فمن يسمعون حسوس الدراجه بيشكون فينا على طول … خوله وهي اتسوي بيدينها حركة حق ريمان : ما عليه منج انا والله بسوقها ومحد ايروم يقوللي شي …. ريمان : كيفج ما ايخصني انا … وفعلن يابت ريمان السويجات من غرفة نصور وفرتهن ع خوله …. خوله : ابغي الدراجه الصفرا ..هالسويج صح ؟؟ ريمان : هيه هو ….خولوه تراج بتودين عمرج في مصيبه مالها اول ولا تالي … خوله : حشا عادا ريمان اتخلين الواحد ايحس انه مسوي جريمه ….وهي الا دراجه وبسوقها .. ريمان : انا غاسله يديني منج بويه سوي لي تبينه …. اتلثمت خولوه وسارن ورا البيت والبقعه كلها تراب وغبرا ….وجان تركب الدراجه .. ريمان اللي تغشت : على فكره منظرج فضيـــــــحه ….كندورة مخوره على شيلة ساري وصروالج الدق هذا ( كان صروالها ظاهر لن كندورتها ارتفعت من يلست )…اتيملي خشيه ما فينا ع الفشايل …. خوله شغلت الدراجه لي ظهرت حسوس عاليه وسوت طاف حق ريمان …وتمت اتحاوط الا فذيج البقعه ... لكن حبت انها تجازف وتبتعد عن البيت اشوي ….خطفت سيـــدا وبسرعه لنها استغلت المكان الخالي من الناس ذاكي الوقت …..ريمان هنيه حست بقلبها يتراقع من الخوف ..ابتعدت خوله وايد ..ووصلت صوب بيوت ييرانهم هالخبله …..لو حد ظهر من عيال الحاره بيروحن فيها ..خاصه انهم ايعرفون هالدراجه وانها حق ناصر وعبود خوها …فبيقولون ختهم استخفت وخطفت بالدراجه …بس خوله الله يهديها شيطانه … خوله صدت صوب ريمان وسوتلها باي وحركات ..ولا انتبهت ع السياره لي دخلت الحاره مستعيله …كل لي تذكره خوله صرخة ريم وهي زايغه اتقولها :" خولة سيارة جدامج !!"….والألم الكبير لي حست به من دعمتها هالسياره ….وراعي السيارة …من دعمها نزل بيشوف شو استوى ع الصبي لي دعمه..وكانت صدمته يوم اكتشف انها بنيه مب صبي….....وريمـــان …من اندعمت خوله حست ان ريجها نشف خاصه انها شافت الدعمه كيف انها يت قويه ومن قوتها شلت خوله ع صوب …ما رامت توقف ع ريلها …واكبر خوف حست به يوم انتبهت عالسياره ونزل منها الريال ….واللي كان خوها نـــــــــــاصر ،، ناصر من شاف منظر البنيه والدم حولها مات من الزيغه ….انتبه ع الدراجه وانها دراجتهم…على طول صد البنيه يبغي ايشوف ويهها اتحراها ريمان …من ركز عرف انها خوله وعلى طول اتصل بالاهل وشل خوله وياهم المستشفى …خوله من التعب ما كانت تقدر ترمس…تذكرت صياح ريمان في السياره وامها اتزاعج بخوف وام ناصر تلوم ولدها وويه ناصر وهو ايسوق بتهور وايصد ورا يطالعها بين فترة وفترة….. كل هذا وهي مب قادره ترمس …ثواني وغابت عن الوعي …..ما وعت الا وهي في المستشفى ولافين يدها اليمين وريلها ….وذراعها اليسرى وايد اتيرحت ويتها كدمات ….هزبوها عدل من نشت وناصر كان اييها هو وخته….بس الحمدلله كلها ايام وتعافت …… ردت خوله للواقع وهي تضحك يوم تتخيل شكلها بصروالها الدق لي اتقطعت اطرافه من الدعمه….يالفضيــــحه يا ناصر ….وهو بعده يذكر …ولين احينه كل ما ايشوفها ايقولها بفصل لج صروال دق بدل فاقد لا اتحاتين …. بينها وبين نفسها حاسه بشي مميز صوب ناصر …وان له مكانه خاصه عندها ….هالشي لي محد يعرفه غير خواتها ….ولا عمرها فكرت انها اتصارح ريمان هالفكره مستحيــــــــله ….. خوله وهي اتطالع عمرها في المرايا واتبوز …." انقهرت يوم دريت انك رحت السعوديه وانت مب مكمل اسبوع في البلاد …عنبووووه اشو عايلنك" …( دوم معودنها انه يتمصخر وياها وايلعوزها ولا يودرها في حالها يلين يومكم …) ما طولت خوله ويا افكارها لي صارت شبه يوميه …لن خوها الصغير ياها يزقرها ع الغدا ….. +++++++++++++++++++++++++++++++++++++++++++ الســـــــاعة 5 العصر …. …. نــــاصر يالس وسط شلته العوده….عقب ما أوهم هله انه ساير السعوديه ….وهو في الاساس عارف انهم بيظهرون من البلاد وعلى طول بيسيرون لدوله ثانيه مب المملكة…من وصلوا لهالدولة وهو احساسه متناقض.. ربعه مستانسين ومسوين جو …وناصر يتأملهم ويفكر ….للأسف القعده ما كانت تخلوا من البنات الاجنبيات " نجمات السهره " شرات ما ايسمونهن ربعه ، في البدايه ما كان راضي انهم اييبونهن وياهم ....وكان يقول هالحركات حق بلاد برا ...مب فبلدانا ..لكنه رضا ويا الوقت وقال يللا ...ترانا نبغي نتونس ونغير جو فما بعلق عليهم....بينه وبين نفسه كان رافض بشكل قطعي انه ايطور علاقته بأي وحده من البنات ....حاط حدود بينه وبينهن ....وحتى لو كانن اجنبيات ....لكن بعض ربعه فيهم اصرار غريب ولا يستحلون السوالف بليا هالمنكر .....نصور كان يحس انه هالجو مب جوه ..لكنه مضطر ايساير ربعه ..ما يبغي يكون مخرب الفرحه وسطهم ...فكان يسكت و يمشي لي ايشوفه ...وهو ساكت عن ربعه لنهم ما تمادوا في نظره لين احينه...كل لي يستوي سوالف و بس ...ما يختلف عن لي كان يستوي في كندا....وفي حال حس ان حد فيهم تمادى بيتصرف ويعلن انسحابه ..... ++++++++++++++++++++++++++++++++++++++++++ الســــــــاعه 7 المغرب ......بيت بو حميد .... شموه اترمس حصوص ع التيلفون .... حصوص : ما عليه شموه اونج ييتي عدنا اتسلمين ع نوف و روحتي . ولا كملتي 10 دقايق...جنه حد يربع وراج ....خيبه مب خوف لي مسونه فيج هالمبارك... شموه : حرام عليج حصوص ..والله امبوني ما بيي الا من غلاة نوف فديتها قلت بسلم عليها عن تزعل...وبعدين ختيه فطيم بتيكم هي وامايه عقب اشوي و بيسدون عني.... حصوص برجا : حاولي اتيين شمامي...لين متى يعني بتتهربين منهم؟؟؟ مردج تتجابلين وياهم دامهم نسايبنا وان شالله العزايم والمناسبات وايد ....و.لو ما شفتيهم اليوم بيشوفونج عقب....وبعدين تراج شايفه خواته في العرس شمعنه احينه ما تبينهن يشوفنج؟؟؟ شموه بياس : حصوصي افهميني فديتج..انا مب خايفه منهم كثر ما انا خايفه من عمري ...صح انهم ما ايعرفوني انا منوه وما يعرفون سالفتيه ويا خوهم...لكن والله صعب عليه اني اطالعهم في ويوهم ولا جني مسويه شي....بعدين لا تنسين ان حرمة خوهم لي هي بنت عمه بتكون موجوده...وانا لين احينه ما شفتها ولا ابغي اشوفها ... حصوص بزعل خفيف : ما عندج سالفه تستهمين منها ...خاطريه اشوفها هالكريهه والله .. شموه مبتسمه ابتسامه باهته : كلها دقايق و بتتشرفين ... حصوص : الله يستر ....خلاص فديتج بسكر عنج احينه ... شموه : اوكيك حصوص ...وداعة الله....( وسكرت عنها ) شموه اتعرف انها لو سارت بتعذب عمرها ...واتعرف انها ممكن اتييب جروح جديمه وتعاني لو حطت عينها فعين شمسه بنت عم مبـــــــارك....." ما لها أي داعي سيرتيه " قالتها وهي حادره تحت بتشوف ختها فطيم لو وصلت...... ++++++++++++++++++++++++++++++++++++++++++++ الســـــــــاعة 7 ونص ........غرفة سموي كانت ميوده تيلفونها واتسولف ويا لي وهمت عمرها انها اتحبه " خلفان " ..... سموي وهي اتعدل مكياجها : انزين خلفان متى بتي المول ؟؟ خلفان : والله من توصلين دقيلي وبيي..تراني الا اتحوط هنيه... سموي ترمس بكل مكر: انزين وشله ما اتييب ربيعك حارب ...ترا ليلوه بتي وياي...ليش ما نسولها سبرايز حتى هو بيستانس ع الحركه حليله.... خلفان تم يفكر اشوي .......هو لين احينه ما يعرف ان مريوم لي ترمسه هي نفسها "ليلى" ربيعة سموي .........وعقب تفكير..عيبته السالفه من كثر ما يهاذي حروب بليلى قال في خاطره صدق حلو لو بيشوفها وايفكنا ...غادي عاشق متيم : خلاص بييبه ويايه انا ...متاكده ليلوه ما بتقول شي ؟؟؟ سموي : لالا شو بتقول ..بالعكس بتستانس .... سكر عنها خلفان وهي مبتسمه من خاطرها ......: أخيـــــــــراً بتنكشفين يا ليلوه ....( اتصلت ع ليلوه اتأكد عليها )... وكملت عدولها على مهل .... ++++++++++++++++++++++++++++++++++++++++++++++++ وعنـــــــــــد ليــــلى عقب ما تعدلت وتكشخت .. وريحة عطرها شاله البقعه ....رمست ربيعها راشد ع اساس انه اييها المول ....كانت واقفه في الحوي تتريا الدريول...ما فيها تترياه في الصاله ويظهرلها خوها نـــــايف وايسويلها سالفة ....دومه يحتشر عليها وهي ولا معبرتنه ..... اشوي وان تيلفونها يرن .....وكــــان حــــارب متصل .... تأففت ليلوه ....: مـــــب وقتـــه !! بس ردت عليه وتمت اتسولف بدلع ....سألها لو انها بتظهر بقعه والا بتم في البيت ....وهو بعده ما رمسه خلفان ولا يدري انهم بيتلاقون في المول......قالت له انها ما بتظهر ومثلت عليه انها مريضه وهو حليله تم يحاتيها ....ولا يدري انها مستغفلتنه ولاعبه لعبتها .....لكن هيـــهات....حبـــــل الجـــذب دومــه قصيـــر...والمخادع ما له بد من يوم ينكشف فيـــه....سواء كان هاليوم جريب والا بعيد.... كانت ثواني وهي مسكره عن حارب وراكبه السياره ويا الدريول......وكالعاده ...العنود حرمة نايف خوها كانت ظاهره صوب المطبخ وسمعت آخر رمستها...دومها تسمعها .....وتنصحها ...ولو كانت حيلتها جليله جدام عناد واصرار ليلى..خاصة انها اترمس اكثر عن شخص في نفس الوقت ولو جدام العنود......لكنها ما فكرت في يوم انها ترمس نايف وتخبره ....حاطه في بالها فكرة انها ما تبغي تسوي مشاكل بين الخو وخته ....وهي تدري ان خوان ليلى ما بيرحمونها ....شخصية العنود رغم طيبتها كانت ضعيفه و خوافه ...ومن كثر اللوم لي حاسه به صوب ريلها تتمنى لو انها ما درت ولا سمعت بعلوم ليلى..ولا انها اتعيش هالصراع النفسي...تدعي ربها انه يستر عليها ويهديها ......وبعد ان ما ايي اليوم لي تضطر فيه انها اتخبر نايف بعلوم ليلى !!!!!! ما حست العنود الا بيد انحطت ع جتفها بهدوء....صدت وكان نـــــايف ريلها...لي حس انها مستهمه ...انحرجت من نظراته وصدت الصوب الثاني قبل لا يقرا حزنها ... نـــــــايف : بلاج ؟؟ جنج تحاتين شي ؟؟ العنـــود : لالا بس مشتاقه لهلي ...خاطريه ازورهم ...بتوديني عندهم ؟؟؟ نــــايف مبتسم : أفا عليج بس ..انتي تامرين امر عنودي ... دخلوا داخل ...وعنود مبتسمه وفي يوفها نــار ومتحسفه............... +++++++++++++++++++++++++++++++++++++++++++++ الســــــــــــــاعة 8 ونص الليـــل .....بيـــت قوم حصوص بيت بو سلطـــــان .....خطّــــــــارهم قدهم واصلين ...الحريم متيمعات في ميلس الحريم ....والرياييل في ميلس الرياييل .... سلطان وحارب خوان حصوص ....وبوها ..ووياهم عمهم بو مــــايد ...وميــــود و ثــــاني عيال العم .....الشيبه بو منصور ريل نوف ....ومنصور وخوانه يايـــين....واكيـــد مبـــارك كان منهم.....دون ما ننسى بو حميد لي هو بو شما...وخوها حميــــد..... واما عند الحريم...كانن حصوص وختها العروس نــوف ...وشيخة حرمة سلطان خوهن...ووياهن امهن ام سلطــان....ويارتهن ام شمـــا وبنتها فطيم....بنات عم حصوص ...موزان ..مهره ..ٍسارونه الصغيرونه وامايتهن عوشـــه واللي استغربت منه حصوص هو وجـــود "منيـــــــرة" بنت خال موزان ومهاري......وما ننسى نسايبهم.....ام منصور وبناتها...حنـــان..ميعاد..وفــوي...وحرمة ولدهم...شمســـــــة.... الحريم ماشالله مسويات جو ..والسوالف محليه اليلسه...نوف مستانسه ع لمة هلها ومنيرة لي ما شافتها من زمان..صح ان منيـــرة بنت خال موزان ومهاري لكنها ما تستوي لحصوص ونوف.........انسانه وحده كانت متضايجه نوعاً مــا ..." حصـــــــوص " لي مفتقده ربيعتها شموه...واتطالع ضيوفها وفي قلبها تتسائل منوه فيهن شمسه يا ربي ؟؟؟....لين ما انقطع شكها باليقين من سمعت ميعاد اتسولف .... ميـــــعاد في نص سوالفها : هيه صح شموس منوه كان ويانا من خواتج ؟؟ شمســــه : محد الا ندوي... حصوص في خاطرها : أهــــــا !!! انتي شموس يعني ....ولاااا تبيــــن عليج حركاتج.....مسويه عمرها طيبه واتسولف ....." تمت حصوص تذكر معاناة ربيعتها شموه....وقلبها حارقنها وهي تذكر السوالف لي كانت اتخبرها شموه عنها......والحزن لي بصعوبه شموه تغلبت على اكبره..وما تم فيها غير بقايا رغم صغرها الا انها تعذب....مـــا أصدق....ياما صاحت ربيعتيه وختيه وانتي السبب...ما تخيلت في يوم اني بشوفج حتى ...بس شوفي الدنيا...هذي انتي ضيفتنا وفي بيتنا ..وما بينا غير جم متر....ليت لو شموه تشوفج...فرق بينج وبينها....( تمت حصوص تقارن بليا حاسية منها.. ..الاسلوب والصوت والجسم والجمال...وتكمل)..اوكي صح انتي حلوة ...بس مب ذاك الجمال لي يخلي الواحد يتخلى عن من يحبه....غريبه!! ولا مستحيه من لي سويتيه؟؟ ...جم شخص تأذى من وراج....وبعده يعاني ...وانتي ولاااا هامنج......" تمت حصوص اتكمل مونولوجها بينها وبين نفسها ونظراتها موجهة صوب شمسه....حصوص حاسه بضيج وما تعرف هل لأن شموه محد ..والا شوفة شمسه غصصتها...... بس الشي لي ما انتبهت له حصوص هو نظرات " منيرة " صوبها طول اليلسه .. .....ولا حست بموزان وهي كل شوي تساسر منيـــره ويطالعن حصوص......ولا كانت تدري بعد ...انها محــور حديثهن!!! ++++++++++++++++++++++++++++++++++++++++++++++ |
++++++++++++++++++++++++++++++++++++++++++++++ وعنـــــد الرياييـــــــــل الشيبه بو منصور حليله كان ماخذ الجو والكل مستانس ع سوالفه ....كان يسولف الهم عن الزمان القبلي وكيف انه احلى عن هالزمان ....وفي نص السوالف ايي حــــروب اتصال ويستاذن من ضيوفه اشوي........ ظهر الحوي ورد ع اتصال خلفان ... حروب : واعلووووومك بو خلف ؟؟ خلفان وهو متكدر من لي بيقوله لربيعه : والله يايب اعلوم يمكن ما تسرك ... حروب اتغيرت ملامحه : خير شسالفه ؟؟ خلفان : اول شي انت وين ؟؟ حروب : في بيتنا ...خير شو مستوي خلفان ؟؟ خلفان : ابغيك تي المول احينه ضروري حروب... حروب : شو هالرمسه خلوف تعرف عدنا خطّار كيف أجفيبهم واربع المول...بعدين شو هالضرورة لي في المول ؟؟ خلفان : لنك ما بتصدقنيه لو قلتلك وابغيك تشوف بعينك ....ع العموم يا تي وتلحق احينه يا بتروح عليك.... حروب تضايج : خلفان والله بديت اعصب يا ريال قولي شو عندك ؟؟ خلفان يتنهد : انا لله وانا اليه راجعون ..زين يا بوك اسمع ...قلتلك اني ظاهر مواعد سموي ...وامبوني بسويلك مفاجأة وبزقرك لن ليلى حبيبتك بتي بعد عسب تشوفها ..وحتى هي مب مخبرينها ان بنزقرك ...واقولك من يت قبضت تيلفوني بدقلك..لكني انصدمت من شفتها يايه ويايبه وياها واحد واتقولنا انه ربيعها رشود ...اقولك انا ودرتها هي وسموي وربيعها هذا و نشيت ودقيتلك حارب لي انصدم من لي يسمعه : لحظه لحظه .....اشوي اشوي عليه خلفان..اول شي قلتلي انك مواعد سموي...وعقولتك مسوي مفاجأة وليلوه يايه بكبرها...انا من ساعه مرمسنها وهي مريضه وطايحه في فراشها....( قاطعه خلفان ) خلفان : خرط والله العظيم ان كله خرط ...تعال انت بس وشوفها هاي لي لاعبه عليك اونه مريضه وهي مصبغه ويها بمية لون...ولا جنها تعرف اني ربيعك ....يايه ويايبه وياها واحد.....انا اقولك تعال وعق عليها جم كلمه حاره ...خلها تعرف تلعب على منوه ... حارب حس بضيج....سكر عن خلفان لنه مب قادر يرمس...معقولة ليلى اتخونه وبهالشكل ...مسويه عمرها مريضه وحالتها حاله ومن هناك هي مواعده .....حس بالخيانه والقهر منها..على طول دق ع رقمها ولا ردت وفي المره الثانيه سكرت ع ويهه ...هنيه عرف ان الخبر صدق ...وعلى طول ركب موتره وسار صوب المول...وهو في الدرب اتصل بخوه سلطان وقاله انه ظهر وما بيتأخر ...هزبه خوه وحاول يعرف منه وين ساير الا ما ضوى دار من رمسته ..... سلطان عقب ما سكر عن حارب وبصوت خفيف برمس بوه : بويــــه بو سلطان : خير ولدي ؟؟ سلطان : ها حروب مسوي تيلفون ما ادله وين ساير ...ويقولك ما بيبطي ... بو سلطان : مســـود الويه...ما يشوف العرب لي عدنا..اي درب قبض له ان شالله... سلطان: بويه ما ادريبه وين ساير الا شكله مستعيل جن عنده شي... بو سلطان : ولا عنده غير علومه الشينه ما عليه الهرم خله بس يضوي وعندي دواه ... وردوا بو سلطان وولده ايسولفون ويا عربهم .....منصور يحاول قد ما يقدر انه يتقرب من سلطان و عمه ...اما مبــــــارك ...بين كل سالفه و الثانيه كان يتأمل هالصبي لي جدامه .....حاس انه يعرفه ...الا ما يذكره منوه بالضبط...هو اول مره ايشوف بوه ...بو حميــــد....بس هالياهل حميـــــد ملامحه وايــــــد مألوفه عليه ....قرر انه يتجاهل هالفكره.... يلين يذكر اروحه وصد ويهه عنه ..... ++++++++++++++++++++++++++++++++++++++++++++ الســــــاعه 9 وربع.......المــــــول متيلسين ع طاوله جدام واحد من المطاعم وياكلون ...ليلى عايشه دنيتها واتسولف ويا رشود...وسموي تتريا لحظة وصول حارب وما فيها صبر..رغم انها من شافت ليلى يايه ويا راشد قالت حق خلفان خلاص لا تدق حق حروب ومثلت الخوف ع ربيعتها...لكنها من شافته ناش عنهم بعيد عرفت انه بيتصل بحارب وبييبه ..... خلفان كل ما حس ان السوالف خلصت وبينشون راشد وليلى ياب سالفه ثانيه ...ما يبغيهم يروحون قبل لا يوصل حارب...سموي كانت فاهمه عليه ...وسوت شراته كل اشوي تسولف ويا ربيعتها ليلى عسب تلهيها عن تنش.....بس فجأة نش رشود وقال حق ليلى يللا ... خلفان : ويـــــن يلسوا تونا ما سولفنا .... رشود : والله مستعيلين بس بناخذلنا لفه وبنظهر .... خلفان وهو محتار مب عارف كيف يتصرف وحارب تأخر : ما قلتلي شو من السيايير عندك بو سنيده ؟؟؟ رشود طالعه مستغرب : وشله تسال ؟؟ خلفان يبتسم : الا جي والله حبيت اعرف ... رشود ابتسم له بخقه : طال عمرك رنج سبورت سودا مبركننها في الزحمه امره مجابله...( يطري المدخل الرئيسي للمول).. خلفان : هيــــه الله يهنيك فيها ان شالله ... واترخصوا رشود وليلى....ثواني وان حارب واصلنهم .... حارب وهو مبين عليه انه معصب يا صوب الطاوله ولا احتفل من وجود سموي ... حارب : وينها ؟؟؟ خلفان نش وهو يطالع سموي وخذ حارب ع صوب ... توهم ظهروا من هالصوب ( و عطاه مواصفات السياره و المدخل لي مبركنين صوبه ) حاول حارب وهو يمشي انه يوصل بأسرع ما عنده صوب البوابه ....في داخله ميت قهر...يبغي يشوفها بأي شكل ..حس انها معيشتنه في وهم ...حس انه مهما يصير ما بيقدر يشوفها ...يبغي يستفسر منها..ليش تواعد غيره وهو لا؟؟ كيف اتقول انها اتحبه وهي اتخونه جدام ربيعه ؟؟ ومسويه عمرها مريضه ؟؟ ويوم ما تحبني كيف ما بينت لي في يوم هالشي ؟؟؟ هالتساؤلات كانت تارسه قلب حارب من الغيره والياس ...كلها يته مره وحده وتلاشت في اللحظه لي وصل فيها خاري وشاف الرنج الســـود اتخطف جدامه....ولا رام انه ايشوف أي شي داخلها ...المخفي قوي وليل ....تم يتصل ع ليلى وهي مب معبرتنه ...يلين اغلقت تيلفونها .............وهو قبض الدرب وسار ++++++++++++++++++++++++++++++++++++++++++++++++++ ++++ الســـــــــاعه 11 الليـــــــل ... حصوص متصله بشموه ......عقب ما ساروا ضيوفهم عنهم .... حصوص يالسه تتطالع عمرها في المرايه وترمس بانفعال خفيف : والله لو تشوفينها شموه عـــــــــاديه مب ذاك الجمال ...بس تبين الصدق يبين عليها طيبه وحبوبه شرات خواته.. ...يعني لي يشوفها ما يتوقع حركاتها ...بس اف ..والله اني باغضتنها وباغضه اليلسه بسبتها ....اقولج تميت اذكر كل لي مسوتنه ..واذكر سوالفج عنها ..تمنيت لو اشل كوب العصير واجبه ع ويهها ... شموه : ههههههههه حشا حشا وليش كل ها هدي ..مب شموس خت ابليس خليتيها ... حصوص : لا صدق شموه ....ما ارضاني والله انج حابسه عمرج في البيت و الكل ملتم ويسولف الا انتي وبسبتها بعد...عل العين ما تشوفها لا هي ولا الثاني ... شموه بابتسامه خفيفه : شكلج حطه في خاطرج عليهم اكثر عني .... حصوص : شو الا مب حاطه ... شموه : ........اممممم شفتيه ؟؟ حصوص : منـــوه ؟؟ شموه موخيه راسها ورفعته : مـ ..مبـــارك ...؟؟ حصوص فاجه عيونها : شموه شو تبينه شفته والا ما شفته ....هو اختار دربه و ودرج ...خلاص خليه ولا تطرينه حتــــى ....منوه هو يسوي فيج كل ها..لا وعشان منوه؟؟ وحده رخصت به وبالكل في يوم !!! شموه من اليوم وساير ما ابيغج اتييبين طاريه..حاولي وجاهدي نفسج..لا تذكرينه بقلبج قبل رمستج...شوفي شو سوابج..قد مره ياج واعتذر؟؟واظن انه يدله دربج صح والا انا غلطانه ؟؟ شموه : هيه والله يا حصوص صدقج.. .. خلاص القلب عافه وعاف أي شي يربطه فيه... ++++++++++++++++++++++++++++++++++++++++++++++ اليـــــوم لي عقبه .....الساعه 10 الصبح ... حصوص يالسه تتريق ودخلت عليها حرمة خوها سلطان ..شيــــــخة حصوص : مرحبا شويخ قربي .... شويخ وهي تيلس : قريبه ... حصوص وهي ميوده كوب : اصبلج حليب ؟؟؟ شويخ : هيه صبيلي وبترياه لين يدفى ...ما اروم اشربه حار ايعور ضروسي .... حصوص : دلـــع حوامل .. شويخ : هههههههههههههه حرام عليج ..والله صدق ايعور الضروس وهو حار .... حصوص وهي تقرب الملال صوب شويخ : ما قلتيلي شويخ ..شرايج في هل منصور.. شويخ : حليلهن والله حبوبات وطيبات ..خص حنون وشموس .... حصوص : هيه ... ( تشرب مالحليب ) ...ان شالله نوفوه تستانس عندهم ...شوفي كيف شواخي ...قبل نوف كانت وحده من هالبيت واحينه قامت لو تدخله تدخله ضيفه ...حرام ياخي اشتاقلها انها والله ... شويخ مبستمه : فديتج حصوص شو بتسوين تراها سنة الحياة ...ويوم بتعرسين ان شالله بتكونين مكانها ..ونفس الشي يوم بيعرس حارب بالسلامه بتي بنيه يديده في البيت بس مب على انها ضيفه لا بيكون بيتها .... حصوص : هيه والله ..يللا الحمدلله ع كل حال... وكملن ريوقهن ..... وشويخ جنها ذكرت شي فجأة : هيه صح منوه البنيه لي كانت يالسه ويا موزان؟؟ حصوص :هيه هاي الله يسلمج منــــــور تستوي بنت خالهن موزان ومهاري ...نادر نتشاوف حن وياها.. شويخ : غريبه حسيتها وايد اتطالعج .. حصوص : اتطالعني !! يمكن لنها من زمان مب شايفتني ... شويخ : يمكن والله ... سكتت شويخ ولا حبت تقول لحصوص ان موزان ومنيره كانن يطالعنها وايبين عليهن انهن يطرنها بشي شين ... +++++++++++++++++++++++++++++++++++ الســــــاعة 4 العصر ....بيت بــو مـــــايد موزان تتمشى في الحوي ويا مهاري ختها وتفكر ...ولا تعرف من وين يتها الفكره انها تدخل منيرة في الخط عسب ميود يتغاضى عن حصوص .....ما لقت عمرها الا وهي تتصل بمنـــور من يومين ...وتقولها انها بتي عندهم.....ومن وصلت تمت اتسولف الها عن ميود.....وان الهل كلهم يبون ميود حق منيره .... وقالتلها ان ميود ايحبها اصلن بس حصوص لعبت عليه وخلته ايغير رايه ....وحصوص غصب طيب تبغي تاخذه لنها تبغي تكسر خشومهم مب محبتن فيه.......أوهمت منيرة ان ميـــود حق من حقوقها...ولا يمكن انها ترخص به وتسلمه لأي حد....حتى انها عرضت عليها انها بتساعدها عسب ميود يغير رايه.. وهن يتمشن كسرت مهره ختها طوق افكارها .... مهاري : على فكره موزان.. موزان رفعت راسها صوبها ... مهاري بهدوء : احس ان هالحركات لي كانت بينج وبين منيره بالمره ما لها أي داعي ....ولا تتحريني ما اعرف نواياج صوب حصوص بنت عمي ...مب مغفله انا وبعدين اتسد نظراتكن ومساسركن البارحه ...وابشرج كل الموجودين حسوا انكم ترمسون عن حصوص ..لكنها عيبتني يوم ما عطتكن ويه ولا عبرتكن .. موزان : لا والله ...وانتي شلج ؟؟ وبعدين منوه هي تعبرني والا ما تعبرني ..مالت عليها خلها تفهم وبفهمها عدل بعد... مهاري عقب ما خذت نسخ طويــل وبنفس هدوءها : شوفي موزان بقولج كلمة حق و تذكريها عدل....تراج من يوم حطيتي سالفة حصوص في بالج وانتي مستويه سخيفه اشويتين ...( موزان تطالعها بقهر ) ...صدق والله موزان ...فجأة قمت احس ان مالج أي شغل يشغلج غير حصوص وميود ..وكيف بتفرقين بينهم..ما تشوفينها سخافه ؟؟؟شو بتستفيدين خبريني ؟؟ دام ميود يحبها ..والا شكلج ما تبغين الخير لخوج انتي ....( توها موزان يايه ترمس وقاطعتها مهاري ) ...ما ابغي اعرف ردج لني ادريبج يوم تعاندين ع الغلط...بس لا تخلين احقادج تنسيج شي واحد ...( هنيه وقفت مهروه وطالعت ختها ) ان شرات ما منيرة بنت خالنا ترا حصوص بنت عمي بعد ...بنت عمي الوحيد.... وراحت عن ختها ....بس موزان ولا حتى فكرت انها تعيد في بالها الرمسه لي سمعتها .....خلاص هي عزمت ع شي وما بتستانس الا وهي مسوتنه ....وشكلها واثقه من النتيجه..... ++++++++++++++++++++++++++++++++++++++++++++++++++ الســــــــــاعة 11 ونص الليل ...في ربوع مدينة الـ ع ـــــين يتمشى بسيارته ويتحوط ...لا شغله ولا مشغله ......حسوس الاغاني في سيارته من كثر ما هي عاليه تهز السيتات ....اغاني ومواويل عراقية هذا هو يـــوسف ....مب عارف وين يسير بسيارته ....طرى ع باله انها يسير صوب مبزره ......ومشى ع الفكره ....سار وماشالله لقى البقعه زحمه ...الناس متيمعه ..والسيايير في كل مكان ....اليهال يراكضون ....فج الجامه اشوي ....الجو جنــــان وريحة الهوا النظيف ترد الروح....ورغم انه مب من النوع لي يحب يمشي ....لكن الجو اغراه يبركن سيارته وينزل ...... تم يوسف يتمشى اروحه ....ايشوف اليهال يلعبون ويضحك عليهم من بعيد ...من بينهم شاف ياهل يتزلج صوب الرصيف حليله والارضيه ما تساعد فجان يطيح ويصيح ...استهم ع الصبي يوم شافه يصيح بقو ومحد ياه ..عقد حوايبه ...توه ياي بيسير صوبه ...وانه حد ياي وشله .. الريال : حمود بابا تعورت ؟؟ ما رد عليه الصبي بس كان يهز راسه انه اتعور وهو غرقان في دموعه .....الريال باس الصبي ووداه صوب حصير متيمعين عليه عيله كبيره ....شكلهم اهل ....ابتسم يوسف وارتاح ...كمل دربه ...ما عرف سبب الحزن لي ياه فجأة عقب ما شافهم ...لكنه تم يتذكر فترة يكرهها من عمره ...فتره يعتبرها نقلة كبيره في حياته .....من عقب احداثها كل شي فيه تدمر ..وتغير....هي نفسهاالفترة لي ظهر فيها من السجن ........غمض عيونه بقو و ير نسخه ...وتذكر اول يوم ظهر فيه من السجن ... وصل البيت واستغرب ان محد كان يترياه ....تم يدور عليهم وينادي ..... لكن ما ياه أي يواب .....طرى عباله انه يسير المطبخ ...ولقى امايته لي من شافته تمت تحضنه واتحبه وتتفداه ....اتفاجأت به ...ولا كانت تعرف انهم بيظهرونه اليوم ...قالت له وشله ما خبرتنا ؟؟وهو من صوبه استغرب لن بوه يدري...ومن هنيه حس بنغزه في قلبه ..سألها عن بوه ...قالتله انه ظاهر صوب دبي و خوانه في مدارسهم .......واحينه استوعب ليش ان محد في البيت ..نسى سالفة المدارس والدوامات .... ما رام يرقد ذاكي اليوم ....شل سيارته وتم يتمشى ويتحوط ويتأمل الخلق والشوارع ...حس انه مشتــاق للشوارع مشتاق لهله مشتاق لنفسه ومشتاق للحياة.....رد البيت وتم يتريى بوه يوصل ....من زمان ما شافه ...ما كان يزوره بالمره وهو مسجون ...محد غير خوانه ايوونه ....ما صدق من شاف باب الصاله ينفج ...دخل بوه ...و يوسف من شافه نزل راسه مستحي منه ...وخوانه تفاجئوا من شافوه ..الا محد تحرك من مكانه احترامن للوالد....ما لقى عمره الا وهو يمشي بسرعه صوب بوه ويحبه ع راسه وخشمه ويستسمح منه ....ما رد عليه بوه .....كل لي سواه انه طالعه بنظرة جفا وسار عنه ....انكسر خاطر يوسف ...لن بوه حطه فهالموقف وجدام خوانه ...بس حليلهم ما قصروا من خوه العود سالم لين اصغرهم يو صوبه ايسلمون عليه وايسولفون ...... تم يذكر كيف انه بوه كان يتجاهله بالمره ...ويوم بيظهر بيخبر كل عياله بيشلهم الا هو ....ولو بيظهر بقعه بيسلم عليهم كلهم الا هو ...ولو يتخبر عنهم كلهم ما كان اييب طاري يوسف بالمره ....يوسف عارف في قرارة نفسه انه اذنب في لحظة طيش...لكن جرمه ما كان كبير لدرجة انه يستاهل النكران والقسوة من بوه ....وهو لي كان اغلى واحد والمفضل عند بوه ....ما حب هالفرق بين حالته قبل واحين .....بوه مب راضي يسامحه ....شو حيلته ؟؟ تعذر منه وصاح جدامه اكثر عن مره ....قرر انه يبني عمره من اول ويديد .....بيحاول ايرد احسن عن قبل ...بيحاول يرضي هله والناس حوله ...واضب ع صلاته وكان هو لي يوعيهم ع صلاة الفير كل يوم ....والمصحف دوم في يده ....دور شغل وبصعوبه لقى ...حاول انه يزرو هله من عمامه وخواله.. ...واييب هدايا لبوه وخوانه بين فتره وفترة ....لكن للاسف كل هذا ما ثمر في فواد بوه ..... لين ما وصل يوسف لمرحلة ياس كبيرة ...ومن كثر حقران بوه له تأثروا خوانه الصغاريه وما قاموا يحشمونه ....وكل ما يا بيهزبهم يقولون له بابا قالنا انت مب زين انت مب خونا وبابا قالنا ما نسمع كلامك ..بابا قال .بابا قال....كل يوم كان يذبل اكثر عن لي قبله .. خاصه يوم كان يمشي في الفريج ويشوف الرياييل يسحبون عيالهم في صوب عنه والا يأشرون عليه ويحذرونهم منه ...يتصل بربعه يا انهم ما يردون عليه والا يردون عليه وحديثهم مختصر ...واذا لقى حد منهم في درب تهرب منه....لين قام يحس انه لو ما تصرف بيموت من الهم والاحساس بالنقص ...وكردة فعل ع ربعه لي تخلوا عنه ..وعلى بوه وعلى المجتمع لي حاط به ..قرر انه يتمرد ...قرر انه يجفي الناس شرات ما جفوه ...ببساطه ما بيستهم منهم ولا بيزعل عمره عشانهم ........ كانت هذي بداية استهتاره ...اللعب والمغازل والحواطه والسفرات بالشهور ...كان هذا روتينه ....ويمكن كان دواه عسب ينسى لي صابه...وللاسف هالدوا كانت له نتيجه وايد كبيره في انه يتناسى العقد لي ياته من الناس .....فما فكر في يوم انه يتخلى عنه....دامه يرب الدرب الزين ولا ياب نتيجه احينه دور الدرب الثاني....سنين مضن ع يوسف وهو ع هالحاله .....اشوي هو اهدا عن قبل ...لكن بعده ما ياز عن طبعه ...هو في قرارة نفسه انسان طيب وحساس...لكنه رافض ايبين هالشي....يخاف ان ضعفه ينكشف لحد ويستغله ...هو ميرب لحظات الضعف والانكسار ولا يبغي يعيشها مره ثانيه ...... : آآه ....( تنهد يوسف ) ....نفض راسه من هالافكار ورد صوب سيارته ....ركبها وخذله لفتين حول مبزره ..........وين يروح احينه ....امممممممممم وجان يبتسم يوسف .....ريــــــــــم....هههههه لعوزتها آخر مره ...بالعماله تستاهل ....واختفت ابتسامته يوم ذكر ان حتى ريمان في لحظات اتمصخرت عليه عند ربيعتها حسب لي سمعه ......امممممممممم واتذكر احداث اخر مره شافها فيها...... ريمان ..هالانسانه طاريها اييب الفرح ليوسف .... أسير صوبهم ؟؟؟............... لالالا احسن لي اثقل عليهم اشوي .......قبض الدرب وكمل حواطه... :: من خفايا قلب { صـــامت} :: من { خـــَافــي} الخ ـــوافي ،، من صميـــم الأعــــماق ] ببـــوح لــِكـ يـــا غـــــلاي عـن ســـر(ن) أخفيـــــتَهــ ْ~ ببــــُوح لــكـ بالاحــــزان وعـــن كم الاشـــــــــواق ْ يا ذا الحــب / بعترف// باللي عمــري ما رويتهــــــــ }~ يا { الشـــوْق قمــت أحســكـ // عـــذابي/ وشفا الاعواق ْ~ وقمت / أحسك / نـــبض القلـــب...{ عشــقـ(ن) وداريـتهـ ْ~ قمت أحســـك ::إحســـاس:: يسوي أحاسيس //عشَـــاق ْ~ تقدر تقول } فصـــل(ن) جــديد // بقصتـــي بكـ بديــتهـ ْ ++++++++++++++++++++++++++++++++++++++++++++++ الســــــــاعة 1 فليــــــــــــل بيت بو سلطان يالس في غرفته ويتأمل صورها...صورة صورة....حاس بخيبة الامل والحزن ....يبغي يشتكي وماله غير ربيعه خلفان....منصدم منها....وأبغض احساس حس به يوم خطفت الرنج السودا جدامه...ما كان بيده أي حيله.....مسكيـــــن حارب ...ما يعرف ان لي يترياه شي اكبر من لي درا به احين...ولا يعرف ان صدماته لها فصل ثاني....وان قصته لها جزء ثاني ويا انسانه ثانيه ......يتذكر آخر رمسة بينه وبين ليلى ....كانت الساعه 12 فليل من نفس اليوم لي استوت فيه السالفه..... ذاكي اليوم دقت له ليلى وهي اونها اتمثل التعب : ألووو....( رد حارب ع المكالمه لكنه ما رمس). ....حروبي فديتك سوري... مريضه وراقده ولا قدرت ارمسك..... حارب :...................( لا جواب غير صوت انفاسه القويه ) ليلى : حروبي رد عليه بلاك جي صاخ ؟؟ حارب بهدوء : انتي وحدة حقيرة...( قالها كلمة كلمة )... ليلى انصدمت : أ..أناا؟؟!! حارب يرمس والعبره خانقتنه : هيه نعم حقيره وجلبة بعد وخاينه وجذابه ...والمحبه خساره فيج والله يا ليلى خســـارة اني حبيتج ...خليتيني صغير جدام ربيعي وجدام ربيعتج وجدام عمري....بشوه قصرت عليج خبريني؟؟ هذا لي ظاهره وياه بشوه احسن عني هاا ؟؟ ( تغيرت نبرة صوته وحس ان نسخه ضاج) ؟ليلى كيف تخونيني كيف؟؟؟ كيف اتقولين انج تحبيني ؟؟ حشا يا ليلى انتي ما تعرفين المحبه ولا اظن قلبج يقدر يحب يوم هذي سواتج ....دامج اتحبينه هذا الرشود مالج و ما تحبيني وشله توهميني بالمحبه ؟؟ تلعبين عليّه ؟؟ كيف جي خبريني؟؟ وقتج رخيص مب عارفه اتضيعينه ؟؟يايه تضيعينه عليه ؟؟؟؟ نفسج رخيصه لدرجة انج اتطرشين صورج وانتي مب حاسه بشي صوبي؟؟ كيف ليلى خبريني ؟؟ ليلى مب عارفة اشو تقول من الصدمة ..ياها صوت حارب جنه يصيح..شدراه باللي سويته ؟؟معقولة خبره خلفان؟؟؟كيف طافتنيه هذي؟؟كيف ما انتبهت لوجوده.. مب عارفه اذا رمست ودافعت عن عمرها بتطلع عذر عن اشو والا اشو ....توها يايه بترمس : .........حارب ... ++++++++++++++++++++++++++++++++++++++++++++ في نفس الوقت....بيت بو منصور كان مبـــــــارك منسدح ع شبريته و صورة الياهل لي شافه في عزيمة نسايبهم بعدها ترد في باله.....منوه يكون يا ترى...احس اني اعرفه ومتأكد.....غمض عيونه ...لثواني قامت تتضح له الصورة.....ياه هاجس خوفه اشوي ...فز من شبريته على طول وسحب اللاب توب لي حاطنه ع الكوميدينه ..الغرفه كانت مظلمه لكنه حافظ مكان الاب توب لي ما يغيره ......حطه ع شبريته بسرعه تحسسه و شغله... ماشي ينور غرفته في هاللحظه غير هالشاشه ....فتح ع ملفاته الجديمه ....قام يدور ع ملف معين...ملف جديم من زمـــــــان ما فتحه ....وين حاطنه ياربي ؟؟؟ الفكره لي في باله لو انها صدق فالقدر لعب لعبة كبيره بينه وبين شخص ذكراه طواها النسيان من بال مبارك ..........اها هذوه اخيرن لقاه...ملف بإسم ( لبنــــان) ...كله قصايد جديمه وصور ومحادثاته في المسن و ياها...كل شي مسجل بتاريخه....من متى ما فجيت هالملف!!!!! ....تم يدور بين الصور لي هي مطرشتنهن........اخيرن لقى الصور المطلوبه ...مسيفه باسم حمود ......فتحهن وحده وحده ....وانصدم .......معقولــــــــــة !!!!!!!! ++++++++++++++++++++++++++++++++++++++++++++++++++ ++++ وهنـــــا ... أطوي صفحة اليوم بعد ان امتلأت بخفاياهم .. احمل دفتري وانسحب بهدوء...دون أن يلتفت إلي قلب... أقفل خلفي أبواب خفاياهم بسكـــــــون ... لأعــــود في الغد ...و أخط مــا أراه ..في دفتري .... بإذن اللـــه... لـــي ولكـــــم ×× لخفــــايا قلــوبهُم { بيــــبان } دقـيتهــا البــارحة و // طلـــّيت ×× |
حرااااااااااااااااااااااااام .. وين التكملة ؟ بليييييييز نزلي الباقي .. ولا تبطين علينا .. |
شــوقتنــــا .. نتريا البـــارت ,, |
Waiting For tHe Next Partttttttt ^_____^ |
| الساعة الآن 03:20 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir